​អ្នកនាំពាក្យរាជ​រដ្ឋាភិបាលជប៉ុន លោក Minoru Kihara បានប្រាប់ក្រុម​អ្នកសារ​ព័ត៌មាននៅថ្ងៃសុក្រ ១៥ ឧសភានេះ ថា ជប៉ុនកំពុងតាមដានកិច្ចប្រជុំរវាងសហរដ្ឋអាមេរិក និងចិន ដោយមានការចាប់អារម្មណ៍យ៉ាងខ្លាំង ហើយថាវាជារឿងសំខាន់ដែលទំនាក់ទំនងនេះ «រួមចំណែកដល់ស្ថិរភាពនៃសហគមន៍អន្តរជាតិ»។​

ការអត្ថាធិប្បាយ​នេះកើតឡើង ខណៈប្រធានាធិបតីអាមេរិក លោក Donald Trump និងលោក Xi Jinping របស់ប្រទេសចិន កំពុង​​ជួបគ្នាបន្តទៀត​នៅថ្ងៃសុក្រនេះ ​ ជាថ្ងៃទី២​​ ដើម្បីបញ្ចប់ដំណើរទស្សនកិច្ចរយៈពេលពីរថ្ងៃ ដែលផ្ដោត​លើ​​កិច្ចព្រមព្រៀងពាណិជ្ជកម្ម និងបញ្ហា​​ជាច្រើនទៀត។

លោក Trump កំពុងស្ថិតក្នុងដំណើរទស្សនកិច្ចលើកដំបូងរបស់ប្រធានាធិបតីអាមេរិកទៅកាន់ប្រទេសចិន ដែលជាគូប្រជែងយុទ្ធសាស្ត្រ និងសេដ្ឋកិច្ចដ៏សំខាន់របស់អាមេរិក ចាប់តាំងពីដំណើរទស្សនកិច្ចចុងក្រោយរបស់លោក​​​កាលពីឆ្នាំ ២០១៧ ហើយកំពុងស្វែងរកលទ្ធផលគាប់ប្រសើរ ដែលអាចជួយ​បង្កើន​​​ប្រជាប្រិយ៍ភាព​​របស់​លោក មុនការបោះឆ្នោតពាក់កណ្តាលអាណត្តិដ៏សំខាន់។

កិច្ចប្រជុំកំពូលនេះមានគោលបំណងបន្ត​​ការព្រមព្រៀង​ផ្អាក​ការដំឡើងពន្ធ​​ពាណិជ្ជកម្មដ៏ផុយស្រួយមួយ ដែលបានធ្វើឡើងនៅពេលមេដឹកនាំទាំងពីរបានជួបគ្នាចុងក្រោយកាលពី​​ខែតុលា ​នៅកូរ៉េខាងត្បូង​ហើយលោក Trump បានផ្អាកការដំឡើង​ពន្ធបីខ្ទង់លើទំនិញចិន ហើយលោក Xi បានដកការរឹតត្បិត​លើ​​ការផ្គត់ផ្គង់រ៉ែដ៏កម្រដ៏សំខាន់ទូទាំងពិភពលោក៕