រដ្ឋមន្ត្រីការពារជាតិរុស្ស៊ី លោក Sergei Shoigu នៅថ្ងៃសុក្រ (ទី១៩ ខែមេសា) នេះ បាននិយាយថា ប្រទេសនេះកំពុងបង្កើនការផលិតរថក្រោះ និងប្រព័ន្ធបាញ់គ្រាប់រ៉ុក្កែតលើរថក្រោះ ប៉ុន្តែត្រូវធ្វើការងារបន្ថែមទៀត ដើម្បីបង្កើនការផលិតឧបករណ៍ការពាររថក្រោះ។

ក្រសួងរបស់លោក Shoigu បានចេញផ្សាយវីដេអូដែលបង្ហាញឲ្យឃើញរូបលោកទៅមើលរោងចក្រផលិតរថក្រោះ នៅតំបន់ស៊ីបេរី ក្នុងទីក្រុង Omsk និងជួបជាមួយពួកកម្មករ ដែលត្រូវបានលោកសរសើរថា បង្កើតបាននូវផលិតកម្មលើសពីគោលដៅ។

លោក Shoigu បានប្រាប់ក្រុមមន្រ្តីថា៖ «រោងចក្រ នៅ Omsk កំពុងសម្រេចបានតាមកម្មវិធី ពោលគឺខ្ញុំអាចនិយាយបានថា ថែមទាំងសម្រេចបានតាមកម្មវិធីលើសពីកម្រិតកំណត់ទៀតផង។ បញ្ហា និងកិច្ចការដែលយើងសម្រេចក្នុងដំណើរទស្សនកិច្ចចុងក្រោយរបស់យើង ត្រូវបានដោះស្រាយស្ទើរតែទាំងអស់»។

គួរបញ្ជាក់ថា ការផលិតរថក្រោះថ្មី គឺជាភាពចាំបាច់សម្រាប់រុស្ស៊ី ដោយសារការបាត់បង់យ៉ាងច្រើននូវយុទ្ធោបករណ៍ធុនធ្ងន់នេះ ក្នុងរយៈពេល ២ឆ្នាំដំបូងនៃសង្គ្រាមនៅអ៊ុយក្រែន។ វិទ្យាស្ថានអន្តរជាតិសម្រាប់ការសិក្សាយុទ្ធសាស្ត្រ បានឲ្យដឹងកាលពីខែកុម្ភៈថា រុស្សីបានបាត់បង់រថក្រោះជាង ៣.០០០គ្រឿង នៅទីនោះ ដែលស្មើនឹងបញ្ជីសារពើភ័ណ្ឌសកម្មទាំងមូលរបស់ខ្លួន នៅមុនសង្រ្គាម ហើយកំពុងដករថក្រោះចាស់ៗចេញពីឃ្លាំង ជំនួសវិញដោយរថក្រោះថ្មីៗ។

ជាមួយគ្នានេះ លោក Shoigu បានបញ្ជាឲ្យប្រធានរោងចក្របង្កើនការផលិតឧបករណ៍ការពាររថក្រោះ ហើយបាននិយាយថា ការបង្កើនការផ្គត់ផ្គង់ដល់កងពលជួសជុលរថក្រោះ គឺជាផ្នែកសំខាន់នៃចំណុចប្រមូលផ្ដុំ៕