ប្រទេសថៃបានចេញការព្រមានថ្មីអំពីអាកាសធាតុឡើងក្តៅខ្លាំងបំផុត នៅថ្ងៃព្រហស្បតិ៍ (ទី ២៥ ខែមេសា) នេះ ខណៈដែលរដ្ឋាភិបាលបានឲ្យដឹងថា ជំងឺសុរិយរោគ ឬការសន្លប់ដោយសារកម្ដៅ បានសម្លាប់មនុស្សយ៉ាងហោចណាស់ ៣០នាក់រួចហើយ ក្នុងឆ្នាំ២០២៤ នេះ។

អាជ្ញាធរទីក្រុងបាងកកបានចេញការព្រមានអំពីកម្ដៅក្ដៅខ្លាំងបំផុត ខណៈដែលសន្ទស្សន៍កម្ដៅត្រូវបានគេរំពឹងថា នឹងឡើងលើសពី ៥២អង្សាសេ។ សីតុណ្ហភាពនៅក្នុងរាជធានីរបស់ថៃមួយនេះ បានឡើងដល់៤០,១អង្សាសេ កាលពីថ្ងៃពុធ (ទី២៤ ខែមេសា) ហើយកម្រិតស្រដៀងគ្នានេះ ត្រូវបានគេព្យាករសម្រាប់ថ្ងៃទី២៥ ខែមេសានេះ។

រលកនៃអាកាសធាតុក្តៅខ្លាំងស្ទើរទ្រាំមិនបាននេះ បានវាយប្រហារផ្នែកខ្លះនៃតំបន់អាស៊ីខាងត្បូង និងអាស៊ីអាគ្នេយ៍ នៅសប្តាហ៍នេះ ដោយធ្វើឲ្យសាលារៀនទូទាំងប្រទេសហ្វីលីពីនត្រូវផ្អាកការរៀនសូត្រសិន ហើយអ្នកគោរពបូជានៅប្រទេសបង់ក្លាដែសបួងសួងសុំទឹកភ្លៀង។

ក្រសួងសុខាភិបាលថៃ កាលពីល្ងាចថ្ងៃទី ២៤ ខែមេសា បានប្រាប់ឲ្យដឹងថា មនុស្ស ៣០នាក់ បានស្លាប់ដោយសារជំងឺសុរិយរោគ នៅចន្លោះពីថ្ងៃទី១ ខែមករា ដល់ថ្ងៃទី១៧ ខែមេសា ដោយធៀបនឹងចំនួន ៣៧នាក់ ក្នុងឆ្នាំ២០២៣។

លោក Direk Khampaen អគ្គនាយករងនៃនាយកដ្ឋានគ្រប់គ្រងជំងឺរបស់ថៃ បានប្រាប់សារព័ត៌មាន AFP ថា ក្រុមមន្ត្រីកំពុងជំរុញមនុស្សចាស់ និងអ្នកដែលមានស្ថានភាពសុខភាពពីកំណើត ក្នុងនោះរួមទាំងអ្នកមានជំងឺធាត់ផងដែរ ឲ្យស្នាក់នៅតែក្នុងផ្ទះ និងបរិភោគទឹកឲ្យបានទៀងទាត់។

គួរបញ្ជាក់ថា ខែមេសា គឺជាពេលវេលាក្តៅបំផុតនៃឆ្នាំក្នុងប្រទេសថៃ និងប្រទេសផ្សេងទៀត នៅអាស៊ីអាគ្នេយ៍ ប៉ុន្តែស្ថានភាពក្នុងឆ្នាំ២០២៤ មានសភាពកាន់តែធ្ងន់ធ្ងរឡើងដោយសារបាតុភូតអាកាសធាតុ El Nino៕