ការស្ទង់ភូគព្ភសាស្ត្រអាមេរិក ឥឡូវនេះកំពុងប៉ាន់ប្រមាណចំនួនអ្នកស្លាប់ បន្ទាប់ពីគ្រោះរញ្ជួយដីកម្រិត ៧.៧ រ៉ិចទ័រ ដែលស្ថិតនៅចំនុចកណ្តាលនៅសហភាពមីយ៉ាន់ម៉ា និងរញ្ជួយដល់ប្រទេសថៃ កាលពីថ្ងៃសុក្រ នឹងកើនឡើងលើស ១០.០០០នាក់។

គ្រោះរញ្ជួយដីបានវាយប្រហារពេលថ្ងៃត្រង់នៅជិតទីក្រុង Mandalay ដែលជាទីក្រុងធំជាងគេបំផុតទីពីររបស់សហភាពមីយ៉ាន់ម៉ា ហើយបានអង្រួនបាក់អគាររាបដល់ដីនៅប្រទេសថៃចម្ងាយ៦០០ ម៉ាយ។

យោងតាមអភិបាលរងក្រុងបាងកក លោក Tavida Kamolvej បាននិយាយថា គ្រោះរញ្ជួយដីដ៏ខ្លាំងក្លាមួយ ដែលបានវាយប្រហារមីយ៉ាន់ម៉ា កាលពីរសៀលថ្ងៃសុក្រ បានបណ្តាលឲ្យមនុស្ស ១០នាក់ស្លាប់ របួស ១៦នាក់ និង១០១នាក់បាត់ខ្លួន នៅឯការដ្ឋានសំណង់ចំនួន ៣ ក្នុងទីក្រុងបាងកក រួមទាំងការដួលរលំអគាររដ្ឋាភិបាលកម្ពស់ ៣០ជាន់ផងដែរ។

ការរញ្ជួយដីកម្រិត ៧,៧ រ៉ិចទ័រ ដែលកើតឡើងក្នុងជម្រៅ ១០ គីឡូម៉ែត្រ នៅម៉ោង ១:២០នាទីរសៀល នៅទីក្រុង Mandalay សហភាពមីយ៉ាន់ម៉ា ត្រូវបានរញ្ជួយទៅដល់ប្រទេស ចិន និងវៀតណាមទៀតផង៕