សេតវិមានបាននិយាយកាលពីថ្ងៃពុធ (០២ មេសា) ថា ការនាំចូលប្រេង ឧស្ម័ន និងផលិតផលចម្រាញ់ ត្រូវបានលើកលែងពីការដំឡើងពន្ធចុងក្រោយបំផុតលើទូទាំងពិភពលោករបស់លោកប្រធានាធិបតីអាមេរិក Donald Trump ដែលបង្កហានិភ័យនៃការពង្រីកជម្លោះពាណិជ្ជកម្ម។

ការលើកលែងនេះនឹងក្លាយជារឿងធូរស្រាលចិត្តយ៉ាងខ្លាំងដល់ឧស្សាហកម្មប្រេងរបស់អាមេរិក ដែលបានសម្តែងក្ដីបារម្ភថា ការយកពន្ធថ្មីអាចរំខានដល់លំហូរ និងបង្កើនថ្លៃចំណាយលើអ្វីៗគ្រប់យ៉ាង រាប់ចាប់ពីប្រេងឆៅរបស់កាណាដា ដែលបម្រើដល់រោងចក្រចម្រាញ់ប្រេងនៅតំបន់ខាងលិចកណ្ដាល រហូតដល់ទំនិញនៅអឺរ៉ុប នៃប្រេងសាំង និងប្រេងម៉ាស៊ូត ទៅកាន់ឆ្នេរភាគខាងកើតរបស់អាមេរិក។

លោក Trump កាលពីថ្ងៃពុធ បានប្រកាសដាក់ពន្ធមូលដ្ឋាន ១០% លើការនាំចូលទាំងអស់ទៅកាន់សហរដ្ឋអាមេរិក និងពន្ធកាន់តែខ្ពស់ផ្សេងៗគ្នាលើដៃគូពាណិជ្ជកម្មដ៏ធំបំផុតជាច្រើនប្រទេសរបស់អាមេរិក ដោយធ្វើឱ្យសង្គ្រាមពាណិជ្ជកម្មកាន់តែស៊ីជម្រៅ និងតានតឹង។

មន្រ្តីសេតវិមាននិយាយថា ទោះជាយ៉ាងណាក៏ដោយ ការការពារពាណិជ្ជកម្មនេះ មិនអនុវត្តចំពោះការនាំចូលថាមពលពីកាណាដា ឬម៉ិកស៊ិក ដែលត្រូវបានលើកលែងរួចទៅហើយនៅក្រោមកិច្ចព្រមព្រៀងពាណិជ្ជកម្មសេរីនោះទេ ហើយក៏មិនអនុវត្តចំពោះការនាំចូលថាមពលពីប្រទេសផ្សេងទៀតដែរ។

គួរឱ្យដឹងថា កាណាដា និងម៉ិកស៊ិក គឺជាប្រភពប្រេងឆៅដ៏ធំបំផុតចំនួនពីរ ដែលនាំចូលទៅកាន់អាមេរិក ខណៈអឺរ៉ុបគឺជាប្រភពដ៏សំខាន់នៃប្រេងឥន្ធនៈ ដែលនាំចូលទៅកាន់ឆ្នេរខាងកើតអាមេរិក ជាទីដែលខ្វះខាតរោងចក្រចម្រាញ់ប្រេង៕