សេចក្ដីថ្លែងការណ៍មួយពីក្រសួងការបរទេសចិនបាននិយាយនៅថ្ងៃសៅរ៍នេះថា ប្រទេសចិនបានបង្ហាញក្ដីបារម្ភខ្លាំងជុំវិញភាពតានតឹងចេះតែកើនឡើងរវាងឥណ្ឌា និងប៉ាគីស្ថាន និងស្នើសុំខ្លួនដើរតួនាទីប្រកបដោយស្ថាបនាដោះស្រាយបញ្ហានេះ។ 

ក្រសួងនេះបាននិយាយក្នុងការបង្ហោះលើគេហទំព័ររបស់ខ្លួនថា ប្រទេសចិនកំពុងតាមដានយ៉ាងដិតដល់ចំពោះស្ថានភាព រវាងឥណ្ឌា និងប៉ាគីស្ថាន។ 

អ្នកនាំពាក្យក្រសួងខាងលើបាននិយាយថា ចិនអំពាវនាវយ៉ាងម៉ឺងម៉ាត់ដល់ទាំងឥណ្ឌា ទាំងប៉ាគីស្ថានផ្ដល់អាទិភាពដល់សន្តិភាព និងស្ថិរភាព ភាពស្ងប់សុខ និងការអត់ធ្មត់ ងាកទៅរកមាគ៌ាដំណោះស្រាយនយោបាយតាមរយៈមធ្យោបាយសន្តិវិធី និងចៀងវាងការចាត់វិធានការនានាដែលនាំឲ្យមានភាពតានតឹងថែមទៀត ។ 

ប្រភពខាងលើបន្ថែមទៀតថា ប្រទេសចិន នៅតែមានឆន្ទៈបន្តដើរតួនាទីប្រកបដោយការស្ថាបនាក្នុងបញ្ហានេះ ។

ការអត្ថាធិប្បាយរបស់ក្រុងប៉េកាំងពេលនេះ កើតឡើងជួនគ្នានឹងការអំពាវនាវរបស់ប្រមុខការទូតអាមេរិក លោក Marco Rubio នៅថ្ងៃសៅរ៍នេះ ឲ្យឥណ្ឌា និងប៉ាគីស្ថានស្ដារទំនាក់ទំនងដោយផ្ទាល់ឡើងវិញ ដើម្បីបញ្ចៀសការគណនាខុស។ហើយក្រុមប្រទេសG7វិញបានអំពាវនាវឲ្យភាគីជម្លោះទាំងពីរស្វែងរកការសន្ទនា៕