ចាប់តាំងពីកិច្ចចរចាចំណាប់ថ្នូររវាងអ៊ីស្រាអែល និងក្រុមហាម៉ាស បានបន្តនៅទីក្រុងដូហា ក្នុងថ្ងៃពុធសប្ដាហ៍នេះមក ប្រេសិតពិសេសរបស់សហរដ្ឋអាមេរិក ប្រចាំតំបន់មជ្ឈិមបូព៌ា គឺលោក Steve Witkoff បានប្រាប់អ្នកសម្របសម្រួលផ្សេងទៀតថា ទីក្រុងវ៉ាស៊ីនតោន មិនមានគម្រោងបង្ខំអ៊ីស្រាអែល ឱ្យបញ្ចប់សង្រ្គាមតំបន់ហ្កាហ្សាទេ ស្របពេលការបដិសេធយ៉ាងម៉ឺងម៉ាត់របស់លោកនាយករដ្ឋមន្ត្រី Benjamin Netanyahu នេះបើយោងតាមប្រភពមន្ត្រីអារ៉ាប់ពីររូប កាលថ្ងៃព្រហស្បតិ៍ (១៥ ឧសភា)។

អ្នកសម្រុះសម្រួលកាតា និងអេហ្ស៊ីបបានសង្ឃឹមថា សហរដ្ឋអាមេរិក នឹងដើរក្នុងទិសដៅបញ្ចប់អរិភាពនេះ ដោយសារការអត្ថាធិប្បាយពីលោកប្រធានាធិបតី Donald Trump និងជំនួយការជាន់ខ្ពស់ផ្សេងទៀតពីបំណងប្រាថ្នារបស់ពួកគេក្នុងការបញ្ចប់សង្គ្រាម។

តែទោះយ៉ាងណាក្ដី លោក Netanyahu បានទទូចថា លោកនឹងគ្រាន់តែយល់ព្រមលើបទឈប់បាញ់បណ្តោះអាសន្នប្រហែល ៤៥ថ្ងៃប៉ុណ្ណោះ ដែលនឹងចាប់ផ្តើមដោយក្រុមហាម៉ាស ដោះលែងចំណាប់ថ្នូរប្រហែល ១០នាក់។ ប្រភពនិយាយថា អំឡុងពេលនោះ លោក Netanyahu បានប្រាប់លោក Witkoff ថា អ៊ីស្រាអែល ត្រៀមរៀបចំកិច្ចពិភាក្សាស្តីពីការបញ្ចប់សង្រ្គាមអចិន្ត្រៃយ៍ ដោយមិនមានការប្តេជ្ញាចិត្តចំពោះលទ្ធផលដូចមុននោះទេ។

ក្រុមហាម៉ាស បានច្រានចោលទាំងស្រុងនូវក្របខណ្ឌនេះ ដោយលើកហេតុផលថា ខ្លួនបានយល់ព្រមរួចជាស្រេចក្នុងការដោះលែងចំណាប់ថ្នូរអំឡុងកិច្ចព្រមព្រៀងបទឈប់បាញ់កាលខែមករា ដែលសន្មត់ថានឹងមើលឃើញអ៊ីស្រាអែល ធ្វើកិច្ចពិភាក្សាទាក់ទងនឹងការបញ្ចប់សង្គ្រាមអចិន្ត្រៃយ៍ ប៉ុន្តែក្រោយមក លោក Netanyahu បានបដិសេធមិនចូលរួមក្នុងការចរចា និងបានបើកការវាយលុករបស់យោធាលើតំបន់ហ្កាហ្សាជាថ្មីម្ដងទៀតនៅថ្ងៃទី១៨ ខែមីនា ហើយយុទ្ធនាការនោះបានបន្តកាន់តែខ្លាំងក្លាឡើង៕