យោងតាមទិន្នន័យពីទីភ្នាក់ងារស៊ើបការណ៍ចារកម្មសម្ងាត់យោធា (HUR) របស់អ៊ុយក្រែន ដែលបានចែករំលែកជាមួយសារព៏ត៌មាន Kyiv Independent បានឱ្យដឹងថា ការផលិតមីស៊ីលបាលីស្ទិករបស់រុស្ស៊ី បានកើនឡើងយ៉ាងហោចណាស់ក្នុងអត្រា ៦៦% ក្នុងឆ្នាំកន្លងទៅ។

យោងតាមទិន្នន័យដែលទទួលបានដោយចារកម្ម HUR បង្ហាញថា ឥឡូវនេះទីក្រុងមូស្គូ កំពុងផលិតមីស៊ីលពី ៦០ ទៅ ៧០គ្រាប់នៃសព្វាវុធ Iskander-M ដែលជាកំណែមីស៊ីលបាលីស្ទិក - និងពីចំនួន ១០ ទៅ ១៥គ្រាប់ នៃមីស៊ីល Kinzhals ក្នុងមួយខែ។ តួលេខនេះប្រៀបធៀបទៅនឹងសេចក្ដីរាយការណ៍នៃការផលិតមីស៊ីល Iskander-Ms ៤០គ្រាប់ ក្នុងខែឧសភា ឆ្នាំ២០២៤ និងការរាយការណ៍ពីចំនួន ៤ ទៅ ៥គ្រាប់ នៃមីស៊ីល Kinzhals ក្នុងខែមេសា ឆ្នាំ២០២៤។

នៅរយៈចម្ងាយខ្លី តួលេខនេះគឺជាកំណើន ៦៦,៦៧% នៃផលិតកម្ម ចំណែកនៅរយៈចម្ងាយឆ្ងាយគឺក្នុងអត្រា ៨៨,៨៩%។ ការវាយប្រហារមីស៊ីលបាលីស្ទិកលើអ៊ុយក្រែន បានបង្កឱ្យមានមនុស្សស្លាប់កាន់តែច្រើនក្នុងប៉ុន្មានខែថ្មីៗនេះ ខណៈស្តុកមីស៊ីលការពារដែនអាកាស ជាពិសេសសម្រាប់ក្រុមប្រឆាំងមីស៊ីល Patriot ដែលផលិតដោយសហរដ្ឋអាមេរិក របស់ទីក្រុងគីវ បានថយចុះ។

ការពង្រីកផលិតកម្មរបស់រុស្ស៊ី គឺជាមូលហេតុសម្រាប់ការប្រកាសអាសន្ននៅអ៊ុយក្រែន។ ប្រសិនបើតួលេខរបស់ HUR នេះត្រឹមត្រូវនោះ ការផលិតមីស៊ីលរបស់រុស្ស៊ី នាពេលបច្ចុប្បន្ន មានចំនួនច្រើនជាងការផលិតសរុបនៃមីស៊ីល PAC-3 MSE សម្រាប់ប្រព័ន្ធការពារដែនអាកាស Patriot ដែលជាប្រព័ន្ធប្រឆាំងបាលីស្ទិកដ៏ពេញនិយមសម្រាប់អឺរ៉ុបភាគច្រើន៕