នៅពីក្រោយឆាកនៃការជួបជុំប្រចាំឆ្នាំរបស់មេដឹកនាំពិភពលោកនៅអង្គការសហប្រជាជាតិ បណ្ដាប្រទេសសំខាន់ៗ និងអង្គការក្នុងតំបន់ កំពុងរួមគ្នាសម្របសម្រួលកិច្ចខិតខំប្រឹងប្រែងមួយដើម្បីព្យាយាមបញ្ចប់សង្រ្គាមដ៏រន្ធត់នៅក្នុងប្រទេសស៊ូដង់ ដែលបានបង្កើតវិបត្តិមនុស្សធម៌ និងការភៀសខ្លួនដ៏អាក្រក់បំផុតនៅលើពិភពលោក។

លោក Alan Boswell នាយកគម្រោងរបស់ក្រុមវិបត្តិអន្តរជាតិ ICG សម្រាប់តំបន់ញកអាហ្រ្វិក បាននិយាយថា កិច្ចប្រជុំមហាសន្និបាតកម្រិតខ្ពស់នៅឆ្នាំនេះ ដែលនឹងត្រូវបញ្ចប់នៅថ្ងៃចន្ទ (២៩ កញ្ញា) សប្ដាហ៍ក្រោយនេះ អាចជាពេលវេលា "សម្រេចចុងក្រោយ" សម្រាប់ការបញ្ឈប់ជម្លោះ។

លោក Boswell បាននិយាយក្នុងសេចក្តីថ្លែងការណ៍មួយថា "ជាលើកដំបូងចាប់តាំងពីសង្រ្គាមផ្ទុះឡើងជាង ២ឆ្នាំមុនមក មហាអំណាចខាងក្រៅដ៏មានឥទ្ធិពលបំផុតរបស់ស៊ូដង់ បានយល់ព្រមក្នុងខែនេះលើផែនទីបង្ហាញផ្លូវដើម្បីបញ្ចប់សង្រ្គាម"។ លោកបន្តថា៖ ឥឡូវនេះ ភារកិច្ចដ៏ធំគឺការព្យាយាមបញ្ចុះបញ្ចូលភាគីសង្រ្គាមស៊ូដង់ ឱ្យឈប់ប្រយុទ្ធគ្នា។

ស៊ូដង់បានធ្លាក់ក្នុងជម្លោះនៅពាក់កណ្តាលខែមេសា ឆ្នាំ២០២៣ នៅពេលភាពតានតឹងដ៏យូរអង្វែងរវាងគូប្រជែងយោធា និងមេបញ្ជាការយោធាប៉ារ៉ា បានផ្ទុះឡើងនៅរដ្ឋធានីខាទុម និងរាលដាលដល់ភាគខាងលិចតំបន់ Darfur និងផ្នែកជាច្រើននៃប្រទេស។ ទីភ្នាក់ងារអង្គការសហប្រជាជាតិនិយាយថា មនុស្សយ៉ាងតិច ៤ម៉ឺននាក់ ត្រូវសម្លាប់ ជិត ១៣លាននាក់ជម្លៀស និងមនុស្សជាច្រើនកំពុងស្ថិតលើមាត់ជ្រោះនៃគ្រោះទុរ្ភិក្ស ជាមួយនឹងមនុស្សជាង ២៤លាននាក់ ជួបអសន្តិសុខស្បៀងអាហារធ្ងន់ធ្ងរ៕