អ្នកវិភាគមួយរូបនិយាយប្រាប់ទីភ្នាក់ងារព័ត៌មានរ៉យទ័រថា ការបិទរដ្ឋាភិបាលសហរដ្ឋអាមេរិករយៈពេល ១ខែ ដែលស្ថិតលើផ្លូវឆ្ពោះទៅរកការបិទរដ្ឋាភិបាលយូរបំផុតជាប់កំណត់ត្រានោះ ត្រូវបានបន្ត ដោយសារក្រុមប្រជាធិបតេយ្យ និងក្រុមសាធារណរដ្ឋ បោះបង់ចោលការឯកភាពគ្នារួមផ្នែកនយោបាយ ដើម្បីបញ្ចេញយុទ្ធសាស្រ្តនៅតាមមណ្ឌលបោះឆ្នោតដែលមានមូលដ្ឋានគាំទ្ររឹងមាំរបស់ពួកគេ ។

ការបិទរដ្ឋាភិបាល បានបង្អាក់សេវាកម្មផ្តល់មូលនិធិដោយរដ្ឋាភិបាល ដូចជាការគ្រប់គ្រងចរាចរណ៍ផ្លូវអាកាស ផ្អាកការងាររបស់បុគ្គលិកសហព័ន្ធប្រហែល៧៥ម៉ឺននាក់ និងគំរាមកំហែងដល់កម្មវិធីអត្ថប្រយោជន៍ ដូចជាជំនួយស្បៀងអាហារសម្រាប់ពលរដ្ឋអាមេរិករកប្រាក់ចំណូលទាប ។

ស្របពេលដែលការបិទរដ្ឋាភិបាលនៅតែបន្ត រដ្ឋបាលរបស់លោកប្រធានាធិបតី Donald Trumpបានចាត់វិធានការ ដើម្បីបើកប្រាក់បៀវត្សរ៍ដល់ទាហាន ក្រុមមន្រ្តីអនុវត្តច្បាប់ និងក្រុមមន្រ្តីអន្តោប្រវេសន៍ ។ ចំណែកឯនិយោជិកសហព័ន្ធផ្សេងទៀត ធ្វើការដោយគ្មានទទួលបានប្រាក់កម្រៃនោះឡើយ ។

ការបិទរដ្ឋាភិបាល បានឈានដល់ថ្ងៃទី ៣៥ កាលពីថ្ងៃអង្គារ ធ្វើឲ្យវាស្មើកំណត់ត្រាបង្កើតឡើង អំឡុងអាណត្តិលើកដំបូងរបស់លោក Trump ពេលដែលរដ្ឋាភិបាលបានបិទ ចាប់ពីថ្ងៃទី ២២ ខែធ្នូ ឆ្នាំ ២០១៨ ដល់ថ្ងៃទី ២៥ ខែមករា ឆ្នាំ ២០១៩ ។

លោក Jonathan Burks គឺជាអ្នកវិភាគមកពីមជ្ឈមណ្ឌលគោលនយោបាយទ្វេបក្ស និយាយថា ក្រុមសាធារណរដ្ឋ និងក្រុមប្រជាធិបតេយ្យ មានភាពស្ទាក់ស្ទើរក្នុងការសម្របសម្រួល ពីព្រោះថា ភាគីទាំង ២ ស្រួលតិច ឬច្រើនជាមួយគោលនយោបាយ និងចំណុចនយោបាយរបស់ពួកគេ ៕