ការប្រមូលផ្ដុំដ៏ធំសម្បើមរបស់ជនជាតិជ្វីហ្វប្រកាន់សាសនាជ្រុលនិយម បាននាំគ្នាធ្វើបាតុកម្មប្រឆាំងនឹងការចូលបម្រើកងទ័ព ប៉ុន្តែការតវ៉ាបានប្រែក្លាយជាសោកនាដកម្មនៅទីក្រុងហ្សេរុយសាឡិម កាលពីថ្ងៃអង្គារ (៦ មករា) នៅពេលរថយន្តក្រុងមួយគ្រឿង បើកបំបុកហ្វូងមនុស្ស ហើយកិនក្មេងប្រុសជំទង់ម្នាក់បណ្ដាលឱ្យស្លាប់។

នគរបាលអ៊ីស្រាអែលនិយាយថា ពួកគេឃាត់ខ្លួនអ្នកបើកបរ ហើយកំពុងស៊ើបអង្កេត។ វីដេអូនៃកន្លែងកើតហេតុ បានបង្ហាញឱ្យឃើញរថយន្តក្រុងមួយគ្រឿង បើកបុកហ្វូងបុរសជ្វីហ្វជ្រុលនិយម នៅក្នុងបាតុកម្មដែលមានអ្នកចូលរួមរាប់ពាន់នាក់។ សេវាសង្គ្រោះបន្ទាន់របស់អ៊ីស្រាអែល បាននិយាយថា យុវជនអាយុ ១៨ឆ្នាំរូបនោះ បានជាប់ខ្លួននៅក្រោមរថយន្ត ក្រោយមកក៏បានស្លាប់នៅនឹងកន្លែង។

ការជជែកវែកញែកអំពីកាតព្វកិច្ចបម្រើយោធា និងអ្នកដែលត្រូវបានលើកលែងពីកាតព្វកិច្ចនេះ បានបង្កឱ្យមានភាពតានតឹងជាយូរមកហើយនៅក្នុងសង្គមអ៊ីស្រាអែលដែលបែកបាក់គ្នាយ៉ាងខ្លាំង ហើយក៏បានធ្វើឱ្យលោកនាយករដ្ឋមន្ត្រី Benjamin Netanyahu ស្ថិតនៅក្រោមភាពតានតឹងនយោបាយកាន់តែខ្លាំងឡើងក្នុងរយៈពេល ១ឆ្នាំកន្លងមកនេះ។

គួរឱ្យដឹងថា និស្សិតកាន់សាសនាជ្វីហ្វជ្រុលនិយម ត្រូវបានលើកលែងពីកាតព្វកិច្ចបម្រើកងទ័ព ជាយូរមកហើយ។ ជនជាតិអ៊ីស្រាអែលជាច្រើន បានរិះគន់អ្វីដែលពួកគេយល់ឃើញថា ជាបន្ទុកដ៏អយុត្តិធម៌ ដែលត្រូវរែកពន់ដោយអ្នកជាប់កាតព្វកិច្ចយោធាភាគច្រើន។ ការរឹងទទឹងរបស់ជនជាតិជ្វីហ្វជ្រុលនិយម ក្នុងការចូលបម្រើក្នុងជួរកងទ័ពបែបនេះ គឺផ្អែកលើស្មារតីដ៏តឹងរឹងរបស់ពួកគេចំពោះអត្តសញ្ញាណសាសនា ដែលមេដឹកនាំសាសនានិយាយថា ខ្លាចត្រូវចុះខ្សោយដោយសារការបម្រើទ័ព៕