កោះតៃវ៉ាន់ បានបញ្ចប់ការសាកល្បងនាវាមុជទឹកដំបូងរបស់ខ្លួននៅថ្ងៃព្រហស្បតិ៍ (២៩ មករា) ដែលជាព្រឹត្តិការណ៍ដ៏សំខាន់ នៅក្នុងគម្រោងមួយដែលមានគោលបំណងពង្រឹងការទប់ទល់កងទ័ពជើងទឹកដ៏ធំសម្បើមរបស់ប្រទេសចិន និងការពារផ្លូវសមុទ្រសំខាន់ៗរបស់ខ្លួន ក្នុងករណីមានជម្លោះ។

កោះតៃវ៉ាន់ ដែលចិនអះអាងសិទ្ធិថាជាទឹកដីរបស់ខ្លួន បានចាត់ទុកកម្មវិធីនាវាមុជទឹកផលិតក្នុងស្រុកនេះ ថាជាផ្នែកសំខាន់នៃគម្រោងដ៏មានមហិច្ឆតាមួយ ដើម្បីធ្វើទំនើបកម្មកងកម្លាំងប្រដាប់អាវុធរបស់ខ្លួន ខណៈទីក្រុងប៉េកាំង ធ្វើសមយុទ្ធយោធាស្ទើរតែរាល់ថ្ងៃនៅជុំវិញកោះមួយនេះ។

កម្មវិធីនាវាមុជទឹកនេះ ត្រូវបានគ្រោងទុកថា នៅទីបំផុតនឹងមាននាវាមុជទឹកចំនួន ៨គ្រឿង ហើយបានទាញយកជំនាញនិងបច្ចេកវិទ្យាពីប្រទេសជាច្រើន រួមទាំងសហរដ្ឋអាមេរិក និងចក្រភពអង់គ្លេសផងដែរ។ សាជីវកម្ម CSBC របស់តៃវ៉ាន់ ដែលកំពុងដឹកនាំការសាងសង់ បាននិយាយក្នុងសេចក្តីថ្លែងការណ៍មួយថា នាវាដំបូងឈ្មោះ Narwhal បានបញ្ចប់ការធ្វើតេស្តក្រោមទឹកលើកដំបូងរបស់ខ្លួនក្នុងសមុទ្រ។

បន្ទាប់ពីនាវាមុជទឹកដំបូង ដែលមានតម្លៃ ១,៥៨ ពាន់លានដុល្លារអាមេរិក កោះតៃវ៉ាន់បាននិយាយថា ខ្លួនសង្ឃឹមថានឹងដាក់ពង្រាយនាវាមុជទឹកដែលផលិតក្នុងស្រុក យ៉ាងហោចណាស់ ២គ្រឿងនៅត្រឹមឆ្នាំ២០២៧ ហើយអាចបំពាក់មីស៊ីលលើម៉ូដែលក្រោយៗទៀត៕