BTV NEWS

សម្តេចតេជោ ហ៊ុន សែន៖ យើងសម្រេចយកវិធីចរចា ដើម្បីចៀសវាងការចោទប្រកាន់ថាយើងបំពានកិច្ចព្រមព្រៀងឈប់បាញ់

អ្នកនាំពាក្យសម្ដេចតេជោ ច្រានចោលការចុះផ្សាយរបស់សារព័ត៌មានថៃមួយចំនួន ដែលដកស្រង់ប្រសាសន៍របស់សម្តេចតេជោ ហ៊ុន សែន ខុសពីការពិតជុំវិញជំហររបស់កម្ពុជាក្នុងការដោះស្រាយបញ្ហាព្រំដែនជាមួយប្រទេសថៃ

វិនិយោគិនកូរ៉េ បាននិងកំពុងចាប់អារម្មណ៍អំពីការធ្វើធុរកិច្ចនៅកម្ពុជា

មន្រ្តីជាន់ខ្ពស់ក្រសួងអភិវឌ្ឍន៍៖ ផ្លូវជាកាតាលីករយ៉ាងសំខាន់ ជួយជំរុញសេដ្ឋកិច្ចជនបទឱ្យរីកចម្រើន

ព័ត៌មានជាតិ

ផ្លូវបេតុង១ខ្សែក្នុងស្រុកខ្សាច់កណ្តាល បានកំពុងលើកកម្ពស់ការរស់នៅរបស់ប្រជាពលរដ្ឋតាមជនបទ

កណ្ដាល ៖ ផ្លូវបេតុងមួយខ្សែ ក្នុងស្រុកខ្សាច់កណ្តាល បានកំពុងលើកកម្ពស់ដល់ការរស់នៅរបស់ប្រជាពលរដ្ឋ មានផ្លូវល្អសម្រាប់ធ្វើដំណើរ ការតភ្ជាប់ធុរកិច្ចផ្សេងៗ រវាងតំបន់ជនបទ និងទីប្រជុំជន ពោលគឺបាននិងកំពុងប្រែក្លាយជនបទ ទៅជាតំបន់ដែលមានភាពរីកម្រើន។ឯកឧត្តម ជី ស៊ីថា រដ្ឋលេខាធិការ តំណាងដ៏ខ្ពង់ខ្ពស់ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ លើកឡើង ក្នុងការចុះត្រួតពិនិត្យ វាយតម្លៃបញ្ចប់សុពលភាព លើការងារស្ថាបនាផ្លូវក្រាលបេតុងចំនួន១ខ្សែ ប្រវែង ១,៥៧០ ម៉ែត្រ ទទឹង ៦ ម៉ែត្រ និងសំណង់សិល្បការ្យផ្សេងៗ ស្ថិតនៅឃុំជ័យធំ ស្រុកខ្សាច់ កណ្តាល ខេត្តកណ្ដាល នៅថ្ងៃទី១៧ ខែកុម្ភៈ ឆ្នាំ២០២៥ នេះថា ជុំវិញការស្ថាបនាផ្លូវនៅតាមជនបទ រាជរដ្ឋាភិបាលបានផ្តោតយកចិត្តទុកដាក់យ៉ាងខ្លាំង ដោយបានជំរុញការអភិវឌ្ឍន៍នៅតាមជនបទ ពីគ្មានផ្លូវមកមានផ្លូវ, ផ្លូវដែលពិបាកធ្វើដំណើរមកជាផ្លូវក្រាលក្រួស, ជាពិសេសនៅតាមតំបន់ជនបទមួយចំនួន បានប្រែក្លាយពីផ្លូវ ក្រាលក្រួស មកជាផ្លូវក្រាលកៅស៊ូ DBST និងផ្លូវក្រាលបេតុង ដូចផ្លូវនៅទីនេះជាដើម។ឯកឧត្តម បន្តថា ជុំវិញបញ្ហានេះ រាជរដ្ឋាភិបាលបាននិងកំពុងបន្តជំរុញលើកកម្ពស់ផ្លូវនៅតាមជនបទ តាមរយៈការស្តារ, ការ ស្ថាបនា និងការលើកកម្ពស់កម្រិតផ្លូវជនបទ ពីផ្លូវក្រាលក្រួសក្រហមទៅជាផ្លូវក្រាលកៅស៊ូ ឬផ្លូវបេតុង សំដៅធានាការប្រើប្រាស់យូរ អង្វែង និងធន់ទៅនិងបម្រែបម្រួលអាកាសធាតុ ដើម្បីជំរុញដំណើរការអន្តរសេដ្ឋកិច្ច-សង្គម និងការផ្សារភ្ជាប់សកម្មភាពធុរកិច្ចផ្សេងៗ រវាងតំបន់ជនបទ និងទីប្រជុំជន។ បញ្ហានេះដែរ ក្រសួងអភិវឌ្ឍន៍ជនបទកំពុងបន្តយកចិត្តទុកដាក់ លើការជួសជុលផ្លូវជនបទជា ប្រចាំ, ពង្រឹងការតាមដាន, ត្រួតពិនិត្យ និងវាយតម្លៃអនុវត្តគម្រោងជាដើម។ ជាក់ស្តែងផ្លូវបេតុងនេះ ឯកឧត្តម បានវាយតម្លៃខ្ពស់ ចំពោះនាយកដ្ឋានស្ថាបនានិងវិស្វកម្ម នៃអគ្គនាយកដ្ឋានភស្ដុភារ និងហិរញ្ញវត្ថុ ក្រសួងមហាផ្ទៃ ដែលបានស្ថាបនាផ្លូវ នេះបានយ៉ាង ល្អប្រសើរ ដើម្បីទុកជាប្រយោជន៍ប្រើប្រាស់យូរអង្វែង ជាពិសេសការធ្វើដំណើររបស់ប្រជាពលរដ្ឋនៅមូលដ្ឋាន។ឧត្តមសេនីយ៍ទោ អ៊ុន សុវណ្ណាសារ អនុប្រធាននាយកដ្ឋានស្ថាបនានិងវិស្វកម្ម នៃអគ្គនាយកដ្ឋានភស្តុភារ និងហិរញ្ញវត្ថុ ក្រសួងមហាផ្ទៃ លើកឡើងថា បន្ទាប់ពីបានគោលការណ៍ឯកភាពពីក្រសួងអភិវឌ្ឍន៍ជនបទ និងក្រសួងសេដ្ឋកិច្ច និងហិរញ្ញវត្ថុ រួចមក នាយកដ្ឋានក៏បានចាប់ផ្តើមស្ថាបនា និងឈានមកដល់ការវាយតម្លៃបញ្ចប់សុពលភាព, បច្ចុប្បន្នផ្លូវនេះបានកំពុងជួយសម្រួលដល់ការធ្វើដំណើរ ការដឹកជញ្ជូនកសិផល និងដំណាំបន្ទាប់បន្សំរបស់ប្រជាពលរដ្ឋជាដើម។ក្នុងជំនួបសំណេះសំណាលជាមួយប្រជាពលរដ្ឋ ឯកឧត្តម ជី ស៊ីថា ក៏បានលើកឡើងពីគុណបំណាចដ៏ធំធេងរបស់រាជរដ្ឋាភិ- បាល ដែលបានស្តារប្រទេសជាតិពីបាតដៃទទេ ឈានមកដល់មានការអភិវឌ្ឍរីកចម្រើនគួរឱ្យកត់សម្គាល់ ជាពិសេសការអភិវឌ្ឍនៅតាម មូលដ្ឋាន ជាក់ស្តែងផ្លូវបេតុងនេះជាដើម ។ ទាក់ទិនបញ្ហាផ្លូវនេះ ឯកឧត្តម ក៏បានអំពាវនាវដល់អាជ្ញាធរ និងប្រជាពលរដ្ឋ សូមចូលរួម ថែទាំងផ្លូវនៅក្នុងមូលដ្ឋានរបស់ពួកគាត់ឱ្យបានល្អ សម្រាប់ជាប្រយោជន៍ជាសាធារណៈ។ ក្នុងពិធីសំណេះសំណាលនេះដែរ ឯកឧត្តម រដ្ឋលេខាធិការ ក៏បានយកអំណោយដ៏ថ្លៃថ្លារបស់ឯកឧត្តម ឆាយ ឫទ្ធិសែន ក្រសួងអភិវឌ្ឍន៍ជនបទ ចែកជូនប្រជាពលរដ្ឋ ដោយម្នាក់ៗ ទទួលបានក្រម៉ាចំនួន១៕អត្ថបទ៖ សុន រ៉ាឌី

មនី្ទរពេទ្យបង្អែករាជធានី ប្រឹងប្រែងបង្កើនប្រសិទ្ធភាព និងសមត្ថភាពក្នុងការផ្តល់សេវាសុខាភិបាលជូនប្រជាពលរដ្ឋ

មនី្ទរពេទ្យបង្អែករាជធានីភ្នំពេញ មនី្ទរសុខាភិបាលនៃរដ្ឋបាលរាជធានីភ្នំពេញ បានខិតខំប្រឹងប្រែងបង្កើនប្រសិទ្ធភាព និងសមត្ថភាពក្នុងការផ្តល់ សេវាសុខាភិបាលជូនប្រជាពលរដ្ឋ។លោកស្រីវេជ្ជបណ្ឌិតឯកទេស ញ៉ែម ណាវី ប្រធានផ្នែកជំងឺសើស្បែក តំណាងលោកវេជ្ជបណ្ឌិត នេត សុវីរៈ ប្រធានមនី្ទរពេទ្យបង្អែករាជធានីភ្នំពេញ បានប្រាប់BTV ព័ត៌មាន នាព្រឹកថ្ងៃទី១៧ ខែកុម្ភៈ ឆ្នាំ២០២៥នេះថា សព្វថ្ងៃមនី្ទរពេទ្យបង្អែករាជធានីភ្នំពេញ មានផ្តល់សេវាពិនិត្យ ពិគ្រោះ ព្យាបាលជំងឺ គ្រប់ជំនាញទាំងអស់ មិនមែនមានតែផ្នែកសម្ភពនោះទេ។ ក្នុងនោះមានផ្នែកជំងឺទូទៅ សម្ភព រោគស្រី្ត សើស្បែក កាមរោគ ត្រចៀក ច្រមុះ និងបំពង់ក ជំងឺទូទៅកុមារ ជំងឺទឹកនោមផ្អែម ភ្នែក លើសសម្ពាធឈាម វះកាត់ទូទៅ បាក់បែកឆ្អឹង មាត់ធ្មេញ អេកូសាស្រ្ត វិទ្យុសាស្រ្ត មនី្ទរពិសោធន៍ ជាដើម។ នៅក្នុងសេវាកម្មដែលក្រុមគ្រូពេទ្យជំនាញបានផ្តល់ជូនប្រជាពលរដ្ឋ គឺមានគ្រប់ផ្នែក ប្រៀបដូចទៅនឹងមនី្ទរពេទ្យថ្នាក់ជាតិផងដែរ។ គ្រាន់តែមនី្ទរពេទ្យបង្អែករាជធានីភ្នំពេញ ស្ថិតក្នុងកម្រិតCPA3(ស៊ីភីអេ ស្រ៊ី) មានន័យថាក្រោមមនី្ទរពេទ្យថ្នាក់ជាតិ មួយកម្រិត។ចំណែកបងប្អូនប្រជាពលរដ្ឋ មកពីរាជធានី-ខេត្ត អញ្ជើញមកទទួលសេវាសុខាភិបាលពីក្រុមការងារគ្រូពេទ្យនៃមនី្ទរពេទ្យបង្អែករាជធានីភ្នំពេញ បានលើកឡើងរួមគ្នាថា គ្រូពេទ្យ បុគ្គលិក ក្នុងមនី្ទរពេទ្យបម្រើសេវាជូនប្រជាជន បានល្អណាស់ ចេះគួរសម ពាក្យសម្តីពិរោះពិសា មកកាន់ប្រជាជនបានល្អ ជាពិសេសនៅពេលពិគ្រោះ ពិនិត្យជំងឺ និងផ្តល់ឱសថសម្រាប់យកទៅលេប មានភាពច្បាស់លាស់។សូមបញ្ជាក់ផងដែរ ប្រសាសន៍ដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានថ្លែងថា សុខភាព និងសុខមាលភាពរបស់ប្រជាពលរដ្ឋ គឺជាអាទិភាពចម្បងមួយនៃគោលនយោបាយរបស់រាជរដ្ឋាភិបាល។ ចាប់តាំងពីដើមអាណត្តិ រាជរដ្ឋាភិបាលនីតិកាលទី៧ នៃរដ្ឋសភា បានកំណត់គោលដៅច្បាស់លាស់ក្នុងការពង្រឹង និងលើកកម្ពស់សមត្ថភាពរបស់មូលដ្ឋានសុខាភិបាលសាធារណៈជួរមុខ ជាពិសេសមណ្ឌលសុខភាព និងពេទ្យបង្អែកស្រុក។ ដើម្បីសម្រេចគោលដៅនេះ ក្នុងរយៈពេលជាងមួយឆ្នាំកន្លងមក រាជរដ្ឋាភិបាលសម្រេចបាននូវកិច្ចការមួយចំនួនដែលរួមមាន៖១. បានជ្រើសរើសបុគ្គលិកសុខាភិបាល ៧០០នាក់ នៅក្នុងឆ្នាំ២០២៤ និងត្រូវជ្រើសរើសបន្ថែមជាង ៦៥០នាក់ បន្ថែមទៀតនៅឆ្នាំ២០២៥ ដើម្បីបំពេញនៅតាមមណ្ឌលសុខភាព នៅទូទាំងប្រទេស។ ការបំពេញបុគ្គលិកសុខាភិបាល នឹងជួយបង្កើនប្រសិទ្ធភាព និងសមត្ថភាពរបស់មណ្ឌលសុខភាព ក្នុងការផ្ដល់សេវាជូនប្រជាពលរដ្ឋ ដែលឈានទៅរកការផ្ដល់សេវា ២៤ម៉ោង/២៤ម៉ោងនៅពេលអនាគត។ ២. បានទម្លាក់ថវិកាបន្ថែមជាង ៣០ពាន់លានរៀល នៅឆ្នាំ២០២៤ និងថវិកាពិសេសបន្ថែមចំនួន ១៨លានដុល្លារសហរដ្ឋអាមេរិក នៅឆ្នាំ២០២៥ និងឆ្នាំបន្ទាប់ ដើម្បីបង្កើនបរិមាណថ្នាំ សម្រាប់ព្យាបាលជំងឺលើសឈាម និងជំងឺទឹកនោមផ្អែម ដែលត្រូវផ្តល់ជូនដល់ប្រជាពលរដ្ឋ (ពេលមុនអាចផ្តល់ថ្នាំជូនប្រជាពលរដ្ឋថ្នាំសម្រាប់លេបរយៈពេលត្រឹម ១សប្តាហ៍ រហូតដល់ពេលបច្ចុប្បន្នអាចផ្ដល់ថ្នាំជូនសម្រាប់លេបរហូតដល់រយៈពេល១ខែ នៅកន្លែងខ្លះ)។ ការបង្កើនបរិមាណថ្នាំជូនដល់ប្រជាពលរដ្ឋ បាននិងកំពុងជួយកាត់បន្ថយតម្រូវការរបស់ប្រជាពលរដ្ឋ ក្នុងការធ្វើដំណើរទៅទទួលថ្នាំនៅមណ្ឌលសុខភាពច្រើនដងក្នុងមួយខែៗ ដែលជួយកាត់បន្ថយការចំណាយពេលវេលា និងថវិកា។ ៣. បានសម្រេចផ្ដល់ថវិកាជាង១៨លានដុល្លារសហរដ្ឋអាមេរិក ក្នុងឆ្នាំ២០២៥នេះ ដើម្បីពង្រឹងសមត្ថភាពវះកាត់សង្គ្រោះបន្ទាន់ (ICU) នៅមន្ទីរពេទ្យបង្អែកស្រុកកម្រិត២ ដែលនឹងជួយសង្គ្រោះអាយុជីវិតប្រជាពលរដ្ឋដែលត្រូវការវះកាត់ចាំបាច់ នឹងបន្ទាន់ ដោយមិនរង់ចាំការបញ្ជូនទៅមន្ទីរពេទ្យខេត្ត។ ក្រៅពីសមិទ្ធផលដែលសម្តេចមហាបវរធិបតី បានរៀបរាប់ខាងលើ រាជរដ្ឋាភិបាល ដែលមានក្រសួងសុខាភិបាល ជាសេនាធិការ បានសម្រេចនូវសមិទ្ធផលធំៗផ្សេងទៀតជាច្រើន ក្នុងរយៈពេលជាងមួយឆ្នាំកន្លងមកនេះ ក្នុងការពង្រឹង និងលើកកម្ពស់វិស័យសុខាភិបាលនៅគ្រប់កម្រិត នៅក្នុងព្រះរាជាណាចក្រកម្ពុជា៕ អត្ថបទ រដ្ឋា

រដ្ឋមន្ត្រីក្រសួងអប់រំ អញ្ជើញបើកសន្និសីទ និងពិព័រណ៍បច្ចេកវិទ្យាអប់រំកម្ពុជាលើកទី១ ក្រោមប្រធានបទ «មាគ៌ាកម្ពុជាឆ្ពោះទៅកាន់ការអប់រំឌីជីថល»

នាព្រឹកថ្ងៃទី១៧ ខែកុម្ភៈ ឆ្នាំ២០២៥ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា តំណាងដ៏ខ្ពង់ខ្ពស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានអញ្ជើញជាអធិបតីក្នុងពិធីបើកសន្និសីទ និងពិព័រណ៍បច្ចេកវិទ្យាអប់រំកម្ពុជាលើកទី១ (The First Cambodia EdTech Summit) ក្រោមប្រធានបទ «មាគ៌ាកម្ពុជាឆ្ពោះទៅកាន់ការអប់រំឌីជីថល» ដែលប្រព្រឹត្តិទៅនៅ វិទ្យាស្ថានបច្ចេកវិទ្យាកម្ពុជា ដោយមានការចូលរួមពីសំណាក់ ឯកឧត្ដម លោកជំទាវ ថ្នាក់ដឹកនាំក្រសួង លោកស្រី Moonjung Choi, Country Director of KOICA Cambodia Office, លោកបណ្ឌិត Aniban, Deputy Representative of UNICEF, Chair of ESWG , លោក Simon Perkins នាយកប្រតិបត្តិផ្នែកព័ត៌មានវិទ្យា នៃក្រុមហ៊ុនសែលកាត ឯកឧត្តមបណ្ឌិត សាកលវិទ្យាធិការ សាស្ត្រាចារ្យ លោកគ្រូ អ្នកគ្រូ តំណាងដៃគូអភិវឌ្ឍ វិស័យឯកជន និងសិស្សនិស្សិត។មានប្រសាសន៍នាឱកាសនេះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានគូសបញ្ជាក់ពីសារៈសំខាន់នៃការរៀបចំសន្និសីទ និងពិព័រណ៍បច្ចេកវិទ្យាអប់រំកម្ពុជាលើកទី១ (The First Cambodia EdTech Summit) ក្រោមប្រធានបទ «មាគ៌ាកម្ពុជាឆ្ពោះទៅកាន់ការអប់រំឌីជីថល» ក្នុងគោលបំណងដើម្បីលើកកម្ពស់ការអប់រំឌីជីថលនៅកម្ពុជា ផ្សព្វផ្សាយអំពីយុទ្ធសាស្រ្តអប់រំឌីជីថលសម្រាប់សាលារៀន, ផ្ដល់ឱកាសដល់គ្រប់ភាគីពាក់ព័ន្ធដើម្បីពិភាក្សា ចែករំលែកចំណេះដឹង និងឧត្ដមានុវត្តន៍បច្ចេកវិទ្យាអប់រំ, ការប្រមូលធាតុចូលសម្រាប់ការអភិវឌ្ឍក្របខ័ណ្ឌបច្ចេកវិទ្យាអប់រំ (EdTech Framework) និងក្របខ័ណ្ឌសាលារៀនឌីជីថលកម្ពុជា (Cambodia’s Digital School), និងការតាំងពិព័រណ៍បច្ចេកវិទ្យាអប់រំពីវិស័យសាធារណៈ និងឯកជនជាង ៥០ស្ថាប័ន ព្រមទាំងកម្មវិធីប្រកួតប្រជែងគ្រូបង្រៀនដែលប្រើប្រាស់បច្ចេកវិទ្យាអប់រំ ប្រកបដោយភាពច្នៃប្រឌិតបំផុតរបស់កម្ពុជាប្រចាំឆ្នាំ ២០២៥ និងការប្រកួតប្រជែងសមត្ថភាពឌីជីថលដែលអ្នកចូលរួមអាច វាស់ស្ទង់សមត្ថភាព និងចំណេះដឹងឌីជីថលរបស់ខ្លួននៅក្នុងព្រឹត្តិការណ៍នេះផងដែរ។ក្រសួងអប់រំ យុវជន និងកីឡា បាននិងកំពុងយកចិត្តទុកដាក់ធ្វើបរិវត្តកម្មការអប់រំនៅកម្ពុជា ដើម្បីជំរុញការរៀន និងបង្រៀនឱ្យកាន់តែមានប្រសិទ្ធភាពខ្ពស់ ឈានទៅលើកកម្ពស់ការអប់រំ និងអភិបាលកិច្ចសាលារៀនប្រកបដោយសក្តានុពល និងផលិតភាពខ្ពស់ ឆ្លើយតបទៅនឹងអាទិភាពកំណែទម្រង់មួយក្នុងចំណោមអាទិភាពកំណែទម្រង់ទាំង ៨ចំណុច ដែលក្រសួងអប់រំ យុវជន និងកីឡាបានដាក់ចេញសម្រាប់ឆ្នាំ២០២៣ ដល់ ឆ្នាំ២០២៨ ស្តីពី “ការអប់រំឌីជីថល” ក៏ដូចជាឆ្លើយតបទៅនឹង ក្របខណ្ឌគោលនយោបាយអភិវឌ្ឍសេដ្ឋកិច្ចនិងសង្គមឌីជីថលកម្ពុជា ឆ្នាំ២០២២-២០៣៥ ដែលត្រូវបានអនុម័តនិងដាក់ឱ្យអនុវត្តកាលពីឆ្នាំ ២០២១ កន្លងទៅ សំដៅជំរុញកំណើនផលិតភាពនិងប្រសិទ្ធភាពសេដ្ឋកិច្ច ឆ្ពោះទៅកសាងសង្គមមួយប្រកបដោយភាពស៊ីវិល័យនិងពលរដ្ឋឌីជីថល ដែលទទួលបាននូវការប្រើប្រាស់សេវាកម្មឌីជីថលប្រកបដោយបរិយាបន្ន ជំនឿទុកចិត្ត និងសុវត្ថិភាពខ្ពស់។ក្រសួងក៏បានរៀបចំយុទ្ធសាស្ត្រជំរុញការអប់រំឌីជីថល ដោយបានគ្របដណ្តប់គ្រប់សមាសភាពសំខាន់ៗនៅកម្រិតសាលារៀន ដូចជា៖ ១).សាលារៀនមានបរិយាកាសអំណោយផលសម្រាប់ការប្រើប្រាស់បច្ចេកវិទ្យាឌីជីថល, ២).គ្រូបង្រៀននិងអ្នកអប់រំមានតួនាទីជាអ្នកលើកទឹកចិត្តនិងជាអ្នកដឹកនាំ ដោយប្រើប្រាស់បច្ចេកវិទ្យាឌីជីថល, ៣).នាយកសាលាជាអ្នកដឹកនាំមានចក្ខុវិស័យ និងជាអ្នកដោះស្រាយបញ្ហានៅកម្រិតសាលារៀន ដោយប្រើប្រាស់បច្ចេកវិទ្យាឌីជីថល និង ៤).កម្មវិធីសិក្សាគាំទ្រដល់ការអប់រំឌីជីថល និងវិធីសាស្ត្របង្រៀនគាំទ្រដល់ការអប់រំឌីជីថល។ការប្រើប្រាស់បច្ចេកវិទ្យាបញ្ញាសិប្បនិម្មិត (AI) អាចជួយគាំទ្រដល់អ្នកសិក្សាឱ្យសម្រេចបានគោលដៅនៃការអប់រំ ជួយដល់គ្រូបង្រៀនក្នុងការរៀបចំកិច្ចតែងការបង្រៀន និងធ្វើការរង្វាយតម្លៃលើកិច្ចការសិស្ស និងជាពិសេសទៅលើលទ្ធផលនៃការសិក្សា ដោយចំណាយពេលវេលាតិច។ បន្ថែមពីនេះទៀត AI ក៏ជួយដល់ដល់គ្រូបង្រៀនអាចស្វែងរកព័ត៌មាន ការសរសេរអត្ថបទ ការឆ្លើយសំណួរ ការបង្កើតសំណើ ការបង្កើតមេរៀន សំណួរនិងចម្លើយពេលប្រឡង កិច្ចតែងការ វីដេអូបង្រៀន ផលិតរូបភាពដើម្បីប្រើប្រាស់ក្នុងការបង្រៀន និងល្បែងសិក្សា។ បច្ចេកវិទ្យា AI ឱ្យសិស្សរៀនបានលឿន បង្កបរិយាកាសរីករាយក្នុងការរៀនសូត្រ ជាក់ស្តែងនៅសាលារៀនជំនាន់ថ្មី សិស្សកំពុងប្រើប្រាស់ AI ដើម្បីស្វែងយល់ពីមេរៀនដែលគេកំពុងសិក្សា និងការដោះស្រាយលំហាត់ជាដើម។ដើម្បីប្រើប្រាស់បច្ចេកវិទ្យានេះប្រកបដោយប្រសិទ្ធភាព ទាមទារឱ្យបុគ្គលិកអប់រំ គ្រូបង្រៀន សិស្សានុសិស្សបន្តអភិវឌ្ឍសមត្ថភាព ចំណេះដឹង និងការរៀនសូត្រជាប្រចាំដើម្បីឆ្លើយតបនឹងការវិវត្តឥតឈប់ឈរនេះ។ អ្នកសិក្សាក៏ត្រូវស្វែងយល់ និងប្រតិបត្តិក្រមសីលធម៌នៃការប្រើប្រាស់បច្ចេកវិទ្យាថ្មីនេះផងដែរ ជាពិសេស ចំណេះដឹងពីការប្រើប្រាស់បច្ចេកវិទ្យាដោយសុវត្ថិភាព ដែលមានផលជះទៅលើកុមារតូច និងត្រូវយល់ដឹងអំពីឥទ្ធិពលនៃបច្ចេកវិទ្យាដែលធ្វើឱ្យប៉ះពាល់ដល់ការរីកលូតលាស់ផ្នែកបញ្ញា ស្មារតី និងកាយសម្បទាររបស់សិស្សផងដែរ។ យ៉ាងណាមិញ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានគូសបញ្ជាក់ថា AI នៅមិនទាន់ជំនួសលោកគ្រូអ្នកគ្រូ ដោយសារគ្មានបេះដូង និងមិនទាន់អាចមានសមត្ថភាពសម្រេចចិត្តជំនួសមនុស្សបាននៅឡើយទេ។ជាថ្មីម្តងទៀត តាងនាមក្រសួងអប់រំ យុវជន និងកីឡា ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានកោតសរសើរ និងថ្លែងអំណរគុណយ៉ាងជ្រាលជ្រៅដល់ ក្រសួង ស្ថាប័ន អាជ្ញាធរគ្រប់ជាន់ថ្នាក់ អង្គការដៃគូ ក្រុមហ៊ុនឯកជន និងអ្នកពាក់ព័ន្ធផ្សេងៗទៀត ជាពិសេស KOICA អង្គការយូនីសេហ្វ អង្គការយូណេស្កូ ក្រុមហ៊ុនសែលកាត មជ្ឈមណ្ឌលស្រាវជ្រាវដើម្បីអភិវឌ្ឍកម្ពុជា (CDRI) ធនាគារពិភពលោក និងកម្មវិធីអភិវឌ្ឍន៍អន្តរជាតិរបស់ចក្រភពអង់គ្លេស ដែលបានចូលរួមចំណែកគាំទ្រយ៉ាងសំខាន់ទាំងផ្នែកធនធានថវិកា ធនធានសម្ភារៈ និងបច្ចេកទេស ដែលជំរុញឱ្យព្រឹត្តិការណ៍នេះឱ្យលេចចេញជារូបរាងឡើងដោយជោគជ័យ និងសូមលើកទឹកចិត្តឱ្យមានការចូលរួមឱ្យបានផុសផុលពីសំណាក់គ្រប់ភាគីពាក់ព័ន្ធទាំងអស់ ដើម្បីជំរុញឱ្យព្រឹត្តិការណ៍នេះដំណើរការទៅបានដោយរលូន និងប្រកបដោយប្រសិទ្ធផល ឆ្លើយតបនឹងអនុសាសន៍សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែលបានដាក់ចេញនូវយុទ្ធសាស្ត្របញ្ចកោណ ដំណាក់កាលទី១ ដែលមុំទី១ ផ្តោតលើការអភិវឌ្ឍមូលធនមនុស្ស និងមុំទី៥ ផ្តោតលើការលើកកម្ពស់ការអប់រំឌីជីថល សំដៅកសាងសេដ្ឋកិច្ចឌីជីថល និងឆ្ពោះទៅសម្រេចចក្ខុវិស័យកម្ពុជា២០៣០៕

ឯកឧត្តម កែវ រ៉េមី អញ្ជើញប្រគល់រថយន្តសង្គ្រោះដល់មណ្ឌលអប់រំកែប្រែទី២ ដើម្បីគាំទ្រសុខុមាលស្ត្រីជាប់ឃុំ

ភ្នំពេញ៖ ឯកឧត្តម ទេសរដ្ឋមន្រ្តី កែវ រ៉េមី ប្រធានគណៈកម្មាធិការសិទ្ធិមនុស្សកម្ពុជា ថ្លែងថា ការប្រគល់រថយន្តសង្គ្រោះដល់មណ្ឌលអប់រំកែប្រែទី២ គឺដើម្បីគាំទ្រសុខុមាលស្ត្រីជាប់ឃុំឱ្យទទួលបានការគាំពារដូចស្រ្តីទូទៅ។នៅថ្ងៃទី១៧ ខែកុម្ភៈ ឆ្នាំ២០២៥ ឯកឧត្តម ទេសរដ្ឋមន្រ្តី កែវ រ៉េមី ប្រធានគណៈកម្មាធិការសិទ្ធិមនុស្សកម្ពុជា បានអញ្ជើញក្នុងពិធីប្រគល់-ទទួលរថយន្តសង្គ្រោះបន្ទាន់សម្រាប់ផ្តល់ជូនមណ្ឌលអប់រំកែប្រែទី២ ជាអំណោយរបស់សម្តេចតេជោ ហ៊ុន សែន ប្រធានព្រឹទ្ធសភា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា តាមរយៈអ្នកឧកញ៉ាបណ្ឌិត ជា រតនា និងអ្នកឧកញ៉ា លីហៀក រតនា ក្នុងសង្កាត់ព្រៃស ខណ្ឌដង្កោ រាជធានីភ្នំពេញ។បន្ទាប់ពីពិធីប្រគល់-ទទួលរថយន្តសង្គ្រោះបន្ទាន់ ព្រមទាំងចុះសំណេះសំណាលជាមួយជនជាប់ឃុំជាស្រ្តី ឯកឧត្តម ទេសរដ្ឋមន្រ្តី កែវ រ៉េមី មានប្រសាសន៍ថា ការផ្តល់អំណោយរថយន្តសង្គ្រោះបន្ទាន់នាពេលនេះ តបតាមសំណើរបស់អគ្គនាយកដ្ឋានពន្ធនាគារ ក្នុងការជួយសម្រួលដល់ការគាំទ្រសុខុមាលភាពស្ត្រីក្នុងពន្ធនាគារ ពិសេសក្រោមការគិតគូរដ៏ខ្ពង់ខ្ពស់ពីសម្តេចធិបតី ហ៊ុន ម៉ាណែត នាយករដ្ឋមន្រ្តី តាមរយៈយុទ្ធសាស្រ្តបញ្ចកោណ ដំណាក់កាលទី១ មានការយកចិត្តទុកដាក់លើ ផ្លូវ មនុស្ស ទឹក ភ្លើង និងបច្ចេកវិទ្យា។ ឯកឧត្តម ទេសរដ្ឋមន្រ្តី កែវ រ៉េមី បញ្ជាក់ថា ក្នុងនាមគណៈកម្មាធិការសិទ្ធិមនុស្សកម្ពុជា បានចាត់ទុកសិទ្ធិរបស់ស្រ្តីត្រូវទទួលបានស្មើគ្នា រាប់ទាំងស្រ្តីទូទៅនៅក្នុងសង្គម និងស្រ្តីជាប់ឃុំ គឺរាជរដ្ឋាភិបាលបានផ្តល់សិទ្ធិគាំពារផ្នែកសុខុមាលភាពដូចគ្នា។ ឯកឧត្តម ទេសរដ្ឋមន្រ្តី កែវ រ៉េមី បានលើកឡើងថា ជំនួយរថយន្តសង្គ្រោះបន្ទាន់នេះ គឺចំគោលដៅ ដែលកំពុងត្រូវការប្រើប្រាស់ជាចាំបាច់ ហើយការណ៍នេះជាការលើកស្ទួយនិងលើកកម្ពស់សិទ្ធិមនុស្ស ជាពិសេសសិទ្ធិទទួលបានសេវាសុខភាព សិទ្ធិស្រ្តី និងសិទ្ធិកុមារ។ឯកឧត្តមទេសរដ្ឋមន្រ្តី បានកោតសរសើរដល់ថ្នាក់ដឹកនាំនៅពន្ធនាគារ ដែលបានចូលរួមក្នុងការលើកស្ទួយសិទ្ធិមនុស្សនៅក្នុងកន្លែងឃុំឃាំង ដោយជនជាប់ឃុំទទួលបានរបបអាហារតាមការកំណត់របស់ច្បាប់ស្តីពីពន្ធនាគារ ទទួលបានការបណ្តុះបណ្តាលជំនាញវិជ្ជាជីវៈក្នុងពេលជាប់ឃុំ មានម៉ោងសម្រាប់ហាត់ប្រាណ ទទួលបាននូវការថែទាំជំងឺ មានបណ្ណាល័យសម្រាប់អានសៀវភៅ មានកន្លែងសម្រាប់ធ្វើពិធីសាសនាផ្សេងៗ មានសួនកម្សាន្ដសម្រាប់កូនតាមម្តាយ។ បន្ថែមពីនេះ អគ្គនាយកដ្ឋានពន្ធនាគារ ក៏យកចិត្តទុកដាក់ពីការរស់នៅចំពោះជនជាប់ឃុំជាភេទទីបី ដែលជាការចូលរួមលើកកម្ពស់ និងការពារសិទ្ធិក្រុមអ្នកស្រឡាញ់ភេទដូចគ្នា។ ក្នុងឱកាសនោះ អ្នកឧកញ៉ាបណ្ឌិត ជា រតនា លើកឡើងថា អំណោយរថយន្តសង្គ្រោះបន្ទាន់ដែលផ្តល់ឱ្យមណ្ឌលអប់រំកែប្រែទី២នាពេលនេះ គឺជាការបន្តសកម្មភាពរបស់សម្តេចតេជោ ហ៊ុន សែន អតីតនាយករដ្ឋមន្រ្តី និងបច្ចុប្បន្នជាប្រធានព្រឹទ្ធសភា តាមរយៈអ្នកឧកញ៉ា ក្នុងការជួយដល់បណ្តាស្ថាប័ន-អង្គភាព ដែលមានតម្រូវការរថយន្តសង្គ្រោះបន្ទាន់សម្រាប់បម្រើដល់ដំណើរការប្រចាំថ្ងៃ។អ្នកឧកញ៉ាបណ្ឌិត ជា រតនា សង្ឃឹមថា រថយន្តសង្គ្រោះបន្ទាន់នេះនឹងរួមចំណែកដល់ការគាំទ្រចំពោះការគាំពារសុខភាព និងសុខុមាលភាពស្រ្តីក្នុងមណ្ឌលអប់រំកែប្រែទី២ទាំងមូល ដើម្បីជាប្រយោជន៍ក្នុងការថែទាំ និងរក្សាកំណើនប្រជាពលរដ្ឋឱ្យបានកាន់តែច្រើនផងដែរ៕

រដ្ឋបាលឃុំនៅខេត្តស្វាយរៀងអំពាវនាវដល់ពលរដ្ឋដែលគ្មានដីអញ្ជើញមកធ្វើការចុះឈ្មោះនៅសាលាឃុំដើម្បីសុំដីសម្បទានសេដ្ឋកិច្ចពីរាជរដ្ឋាភិបាល

ស្វាយរៀង ៖ រដ្ឋបាលឃុំគ្រួស ស្រុកស្វាយជ្រំ ខេត្តស្វាយរៀងលោកអ៊ិច ប៊ុនធឿន នៅថ្ងៃទី១៧ ខែកុម្ភៈឆ្នាំ ២០២៥នេះ បានអំពាវនាវដល់ពលរដ្ឋ ដែលគ្មានដីលំនៅដ្ឋាន ដីបង្កបង្កើនផល សូមអញ្ជើញមកទំនាក់ទំនងនិងធ្វើការចុះឈ្មោះសុំដី សម្បទានសេដ្ឋកិច្ចពីរាជរដ្ឋាភិបាលនៅសាលាឃុំ ខណៈដែលរាជរដ្ឋាភិបាល មានគោលការណ៍បែងចែកដីនៅក្នុងភូមិសាស្ត្រខេត្តស្ទឹងត្រែង ផ្តល់អោយពលរដ្ឋដែលខ្វះខាតដីសង់លំនៅដ្ឋាន និងបង្កបង្កើមផលដើម្បីបំណិនជីវិត។លោកបានបញ្ជាក់ថាបន្ទាប់ពីរាជរដ្ឋាភិបាលមានគោលការបែងចែកដីធ្លីជូនពលរដ្ឋដែលប្រឈមកង្វះខាតដីពិតប្រាកដនៅតាមភូមិឋាននានាក្នុងទូទាំងប្រទេសកាលពីពេលថ្មីៗនេះក្នុងនោះរដ្ឋបាលឃុំគ្រួស បានធ្វើការផ្សព្វផ្សាយជូនដល់ពលរដ្ឋជាទូលំទូលាយតាមគ្រប់មធ្យោបាយ សំដៅធ្វើឲ្យពលរដ្ឋបានយល់ជ្រៀតជ្រាប ពីព័ត៌មានបែងចែកដីរបស់រាជរដ្ឋាភិបាល ដើម្បីឲ្យពលរដ្ឋមកធ្វើការចុះឈ្មោះ សុំដីពីរាជរដ្ឋាភិបាលរួចរាល់ហើយនៅទូទាំងឃុំក្នុងនោះមានពលរដ្ឋចំនួនមួយគ្រួសារបានស្ម័គ្រចិត្តមកចុះឈ្មោះសុំដីដើម្បីរស់នៅក្នុងភូមិសាស្ត្រខេត្តស្ទឹងត្រែង ហើយដែរ ។

សម្ដេចធិបតី ហ៊ុន ម៉ាណែត អនុញ្ញាតជូនគណៈប្រតិភូសភាសហរដ្ឋអាមេរិកចូលជួបសម្តែងការគួរសម និងពិភាក្សាការងារ

ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា នៅរសៀលថ្ងៃទី១៧ ខែកុម្ភៈ ឆ្នាំ ២០២៥នេះ បានអនុញ្ញាតជូន គណៈប្រតិភូសភាសហរដ្ឋអាមេរិក ដឹកនាំដោយ ឯកឧត្តម Jimmy Panetta សមាជិកសភាប្រចាំរដ្ឋកាលីហ្វ័រញ៉ា ក្នុងជំនួបសម្តែងការគួរសម និងពិភាក្សាការងារ នៅវិមានសន្តិភាព។

ក្រុមហ៊ុនចិនចំនួន ១៨ ចំណាប់អារម្មណ៍យ៉ាងខ្លាំងលើការបណ្តាក់ទុនវិនិយោគនៅកម្ពុជា

ប្រតិភូក្រុមហ៊ុនចំនួន ១៨ មកពីទីក្រុងនីងប៉ ខេត្តចឺជាំង នៃសាធារណរដ្ឋប្រជាមានិតចិន បានបង្ហាញនូវការចំណាប់អារម្មណ៍ យ៉ាងខ្លាំង អំពីគម្រោងមកបណ្តាក់ទុន ក្រោមបរិយាសអំណោយផលលើការវិនិយោគនៅព្រះរាជាណាចក្រកម្ពុជា។ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា និងសហការី តាមរយៈអ្នកឧកញ៉ាបណ្ឌិត ពុង ខៀវសែ ប្រធានក្រុមប្រឹក្សាភិបាលធនាគារ កាណាឌីយ៉ា ភីអិលស៊ី នៅថ្ងៃទី១៧ ខែកុម្ភៈ ឆ្នាំ២០២៥ បានទទួលជួបពិភាក្សាការងារ ជាមួយ គណៈប្រតិភូក្រុមហ៊ុនចិនចំនួន ១៨ មកពីទីក្រុងនីងប៉ ខេត្តចឺជាំង សាធារណរដ្ឋប្រជាមានិតចិន ដឹកនាំដោយលោកស្រី លូ ចឺឈីង (Lu Zhiqiong) អគ្គនាយកធនាគារ នីងប៉ ដែលក្រុមហ៊ុនទាំងនោះមានកម្មវត្ថុអាជីវកម្មក្នុងវិស័យមួយចំនួនដូចជា៖ ការកែច្នៃកៅស៊ូ , ផលិតសម្ភារៈបរិក្ខារពេទ្យ, សម្ភារៈឆ្លាតវៃប្រើប្រាស់ក្នុងផ្ទះ, សម្លៀកបំពាក់ និងធនាគារជាដើម។ឯកឧត្តមអគ្គលេខាធិការ បានមានមតិស្វាគមន៍ ចំពោះគណៈប្រតិភូដែលបានចំណាយពេលវេលាដ៏មានតម្លៃ មកធ្វើទស្សន កិច្ចសិក្សាផ្ទាល់នៅកម្ពុជា ក្នុងនោះឯកឧត្តមក៏បានលើកទ្បើង ពីសក្តានុពលក្នុងវិស័យឧស្សាហកម្ម, កម្មន្តសាល, ការកែច្នៃផលិតផល, ការបង្កើតតំបន់សេដ្ឋកិច្ចពិសេស និងវិស័យកសិកម្ម និងកសិ-ឧស្សាហកម្ម ជាពិសេសកម្ពុជាមានដំណាំយុទ្ធសាស្ត្រជាច្រើនរួមមាន ស្រូវ ដំទ្បូងមី និងស្វាយចន្ទីជាដើម ដែលទាមទារឱ្យមានការវិនិយោគ កែច្នៃក្នុងស្រុក ដើម្បីបង្កើតតម្លៃបន្ថែម។ ឯកឧត្តម ជា វុទ្ធី ក៏បានជំរុញឱ្យវិនិយោគិនធ្វើការគិតគូរ ក្នុងការបង្កើតខ្សែចង្វាក់ផលិតកម្មក្នុងវិស័យកសិកម្ម ជាពិសេសការ កែច្នៃស្វាយចន្ទី ដែលជាគំនិតផ្តួចផ្តើមរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាផងដែរ។ ទន្ទឹមនឹងនេះ ឯកឧត្តមអគ្គលេខាធិការក៏បានជម្រាបជូនគណៈប្រតិភូ ពីស្ថានភាពវិនិយោគនៅកម្ពុជា ច្បាប់ និងបទប្បញ្ញត្តិពាក់ព័ន្ធ នឹងការវិនិយោគដែលបើកចំហ មានតម្លាភាព និងអាចប៉ាន់ប្រមាណទុកជាមុនបាន ព្រមទាំងការលើកទឹកចិត្តនានា។ជាការឆ្លើយតប, លោកស្រី លូ ចឺឈីង បានថ្លែងអំណរគុណដល់ឯកឧត្តមអគ្គលេខាធិការ ដែលបានឆ្លៀតពេលមមាញឹក ទទួលជួបគណៈប្រតិភូ និងបានជម្រាបជូនយ៉ាងក្បោះក្បាយពីបរិយាកាសវិនិយោគនៅកម្ពុជា។ លោកស្រីសង្ឃឹមថា តាមរយៈជំនួប លើកនេះ នឹងធ្វើឲ្យក្រុមហ៊ុនមានចំណាប់អារម្មណ៍កាន់តែខ្លាំងក្នុងការគិតគូរមកបណ្តាក់ទុនវិនិយោគនៅកម្ពុជា៕ អត្ថបទ៖ សុន រ៉ាឌី

កាកបាទក្រហមគិតគូរខ្ពស់ពីសេវាសុខាភិបាលសាធារណៈ និងឯកជនក្នុងការថែទាំសុខភាពមាតា ទារក កុមារ និងយុវវ័យ

ក្នុងឱកាសប្រារព្ធទិវាជាតិសុខភាពមាតា ទារក និងកុមារខាងមុខ កាកបាទក្រហមកម្ពុជា នៅព្រឹកថ្ងៃទី១៧ ខែកុម្ភៈ ឆ្នំា២០២៥នេះ បានរៀបចំកិច្ចពិភាក្សាផ្សព្វផ្សាយស្តីពី៖ «សេវាសុខាភិបាលសាធារណៈ និងសេវាឯកជន ដើម្បីលើកកម្ពស់គុណភាព នៃការថែទាំសុខភាពមាតា ទារក កុមារ និងយុវវ័យ នៅសាលប្រជុំ “A” ទីស្នាក់ការកណ្តាល កាកបាទក្រហមកម្ពុជា ក្រោម អធិបតីភាពលោកជំទាវ ពុំ ចន្ទីនី អគ្គលេខាធិការ ព្រមទាំងអ្នកពាក់ព័ន្ធ និងយុវជន កក្រក សរុបចំនួន១៨០នាក់។ដើម្បីអបអរទិវាជាតិសុខភាពមាតា ទារក និងកុមារ ២១ កុម្ភៈ ២០២៥ ខាងមុខនេះ ក្នុងនាម កាកបាទក្រហមកម្ពុជា ដែលមាន ហ្លួងម៉ែ នរោត្តម មុនិនាថ សីហនុ ជាព្រះប្រធានកិត្តិយស និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន និងឥស្សរជនឆ្នើមថ្នាក់ជាតិ នៃផែនការសកម្មភាពរួមអគ្គលេខាធិការ អង្គការសហប្រជាជាតិ ដើម្បីសុខភាពស្ត្រី និងកុមារ រួមជាមួយក្រុមការងារ ឥស្សរជនឆ្នើមថ្នាក់ជាតិ បានរៀបចំកិច្ចពិភាក្សាស្តីពី៖ «សេវាសុខាភិបាលសាធារណៈ និងសេវាឯកជន ដើម្បីលើកកម្ពស់គុណភាព នៃការថែទាំសុខភាពមាតា ទារក កុមារ និងយុវវ័យ» ដោយមានការសម្របសម្រួលកម្មវិធីពី លោកជំទាវ ម៉ែន នារីសោភ័គ អគ្គលេខាធិការរងទី១ និងជាអនុប្រធានអចិន្ត្រៃយ៍ក្រុមការងារឥស្សរជនឆ្នើមថ្នាក់ជាតិ និងមានការបកស្រាយពីវាគ្មិនចំនួន៣នាក់៖ ១លោកស្រីសាស្ត្រាចារ្យជំនួយ គឹម រ័ត្ននា ប្រធានមជ្ឈមណ្ឌលជាតិគាំពារមាតា និងទារក, ២លោកជំទាវ ប៉ាង ដានី អនុប្រធានអចិន្ត្រៃយ៍គណៈកម្មាធិការ និងជាប្រធានក្រុមការងារឥស្សរជនឆ្នើមថ្នាក់ជាតិ នៃសាខាកក្រកខេត្តកំពង់ចាម, និងទី៣ លោកវេជ្ជបណ្ឌិត MANABU OKAWADA ប្រធានគ្លីនិក មន្ទីរពេទ្យសាន់រ៉ាយ។មុននឹងឈានដល់ដំណើរការនៃកិច្ចពិភាក្សា និង សំនួរ-ចម្លើយ របស់វាគ្មិនទាំង៣ខាងលើ លោកជំទាវអគ្គលេខាធិការ ដែលបានឱ្យដឹងថា គោលបំណងនៃកិច្ចពិភាក្សានេះ គឺស្របទៅនឹងប្រធានបទរបស់ទិវាជាតិសុខភាពមាតា ទារក និងកុមារ ២១ កុម្ភៈ ឆ្នាំ២០២៥ ដែល សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានចេញសារលិខិតផ្ញើជូនបង-ប្អូនជនរួមជាតិ ក្នុងនាមជាឥស្សរជនឆ្នើមថ្នាក់ជាតិ នៃផែនការសកម្មភាពរួមអគ្គលេខាធិការអង្គការសហប្រជាជាតិ ដើម្បីសុខភាពស្ត្រី និងកុមារ ដែលក្នុងសារលិខិតនោះ សម្តេចកិត្តិព្រឹទ្ធបណ្ឌិត បានជម្រាបជូនពីស្ថានភាពសុខភាពមាតា ទារក និងកុមារ នៅកម្ពុជា រួមជាមួយនឹងអ្វីដែល កាកបាទក្រហមកម្ពុជា និងក្រុមការងារឥស្សរជនឆ្នើមថ្នាក់ជាតិ បាននិងកំពុងរួមចំណែកជាមួយរាជរដ្ឋាភិបាល លើកកម្ពស់សុខុមាលភាពស្រ្តី និងកុមារ ដើម្បីឈានឆ្ពោះការសម្រេចបានគោលដៅអភិវឌ្ឍន៍មានចីរភាពឆ្នាំ២០៣០។លោកជំទាវអគ្គលេខាធិការ សង្ឃឹមយ៉ាងមុតមាំថា វេទិការនៃកិច្ចពិភាក្សានេះ នឹងដំណើរការដោយរលូន នឹងផលិត ចេញនូវផ្លែផ្កា ខ្លឹមសារសម្រាប់អប់រំផ្សព្វផ្សាយ យ៉ាងទូលំទូលាយ ជាប្រយោជន៍ដើម្បីឱ្យប្រជាពលរដ្ឋ ជាពិសេស យុវវ័យ ស្រ្តីកំពុងពរពោះ ស្រ្តីមានកូនតូច និងលើកកម្ពស់ការយល់ដឹង អំពីការថែទាំសុខភាពរបស់ខ្លួន ក៏ដូចជាការបង្កើតបាននូវកូន ជាទីស្រឡាញ់របស់ខ្លួន ប្រកបដោយសុខភាពល្អ សតិបញ្ញាវាងវៃ។សូមបញ្ជាក់ថា ស្ថានីយ៍ទូរទស្សន៍ជាតិកម្ពុជា និងបណ្តាស្ថានីយ៍ទូរទស្សន៍មួយចំនួនផ្សេងទៀត នឹងធ្វើការចាក់ផ្សាយកម្មវិធីខ្លឹមសារទាំងស្រុងខាងលើ នៅថ្ងៃទី ២១-២២-២៣ ខែកុម្ភៈ ឆ្នាំ២០២៥ខាងមុខនេះ៕ អត្ថបទ៖ សំ ងីម

ស្ត្រីជនជាតិវៀតណាម ដែលផលិតទឹកឃ្មុំក្លែងក្លាយត្រូវបានចៅក្រមស៊ើបសួរសម្រេចឃុំខ្លួនបណ្ដោះអាសន្ន

លោក អួង វុទ្ធា ចៅក្រមស៊ើបសួរ នៃសាលាដំបូងរាជធានីភ្នំពេញ បានសម្រេចឃុំខ្លួនស្រ្តីជនត្រូវចោទ ដែលជាម្ចាស់ក្រុមហ៊ុន CHAN HONEY ដែលផលិតទឹកឃ្មុំក្លែងក្លាយ។យោងតាមដីការបង្គាបឲ្យឃុំខ្លួន លេខ១៣៤០ ង១ ដឃដ ចុះថ្ងៃទី១៥ ខែកុម្ភៈ ឆ្នាំ២០២៥ របស់ លោក អួង វុទ្ធា ចៅក្រមស៊ើបសួរ នៃសាលាដំបូងរាជធានីភ្នំពេញ បានសម្រេចឃុំខ្លួនស្រ្តីជនត្រូវចោទ មានឈ្មោះ ង្វៀង ធីថាញ់ធឿន (NGUYEN THI THANH THIEN) ភេទស្រី អាយុ ៤០ឆ្នាំ ជនជាតិវៀតណាម មុខរបរ នាយកក្រុមហ៊ុន CHAN HONEY មានទីកន្លែងកំណើតនៅប្រទេសវៀតណាម ទៅមណ្ឌលអប់រំកែប្រែទី២ (ម២) ដោយអនុវត្តឲ្យបានត្រឹមត្រូវតាមច្បាប់ ពាក់ព័ន្ធករណីពីបទៈ ក្លែងបន្លំដើមកំណើតទំនិញ។គួរបញ្ជាក់ផងដែរកាលពីថ្ងៃទី១២ ខែកុម្ភៈ ឆ្នាំ២០២៥ ក្រោមការដឹកនាំសម្របសម្រួលនីតិវិធីផ្ទាល់ដោយលោក ឆាយ ហុង ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ កម្លាំងជំនាញការិយាល័យប្រឆាំងបទល្មើសកម្មសិទ្ធិបញ្ញា នៃនាយកដ្ឋាននគរបាលប្រឆាំងបទល្មើសសេដ្ឋកិច្ច មន្រ្តីសាខា ក.ប.ប រាជធានីភ្នំពេញ, មន្ត្រីជំនាញ នៃស្នងការដ្ឋាននគរបាលរាជធានីភ្នំពេញរួមនឹងអាជ្ញាធរមូលដ្ឋាន បានចុះបង្រ្កាបទីតាំងក្រុមហ៊ុន CHAN HONEY IMPORT EXPORT CO.,LTD ស្ថិតនៅផ្ទះលេខ៧៦ ផ្លូវបេតុង ភូមិតាងៅកណ្តាល សង្កាត់និរោធ ខណ្ឌច្បារអំពៅ រាជធានីភ្នំពេញ។មន្រ្តីជំនាញបានឲ្យដឹងថា ក្នុងការត្រួតពិនិត្យជាក់ស្តែង សមត្ថកិច្ចចម្រុះបានរកឃើញ ទឹកឃ្មុំសរុបចំនួន ១៣០ធុង ដែលមានទំងន់សរុប១៩,៨៩០ គីឡូក្រាម ។ ដោយមានភាពសង្ស័យចំពោះទឹកឃ្មុំទាំងអស់អាចជាផលិតផលក្លែងបន្លំប្រភពដើម៕ អត្ថបទ៖ កុម្ភៈ

ក្រុមអ្នកជំនាញបរិស្ថានជាតិ-អន្តរជាតិ ជួបប្រជុំគ្នានៅកម្ពុជា ដើម្បីពង្រឹងការអភិរក្សសត្វត្មាត

ក្រុមអ្នកជំនាញជាតិ និងអន្តរជាតិ នៅថ្ងៃទី១៧ ខែកុម្ភៈ ឆ្នាំ២០២៥ បានដំណើរការពិភាក្សាគ្នា ដើម្បីពង្រឹងការអភិរក្សសត្វត្មាតនៅក្នុងពិភពលោក។នេះជាជំនួបសន្ទនាលើកដំបូងសម្រាប់កម្ពុជា ជាមួយក្រុមអ្នកជំនាញ និងអ្នកអភិរក្សនៃប្រទេសមានវត្តមានសត្វត្មាតដូចជា បង់ក្លាដេស ឥណ្ឌា នេប៉ាល់ ប៉ាគីស្ថាន និងមីយ៉ាន់ម៉ា។ ក្នុងឱកាសនេះ ក៏មានអ្នកជំនាញមកពីប្រទេសថៃ ដែលមានគម្រោងសិក្សាពីការត្រៀមបង្កាត់ពូជសត្វត្មាត ដើម្បីបង្កើតឱ្យមានវត្តមាននៅក្នុងប្រទេសរបស់ខ្លួនផងដែរ។ឯកឧត្តម ជា សំអាង រដ្ឋលេខាធិការក្រសួងបរិស្ថាន ចាត់ទុកថាវេទិកានេះ ជាឱកាសដ៏សំខាន់មួយ សម្រាប់អ្នកជំនាញ បានបង្ហាញពីវឌ្ឍនភាព បញ្ហាប្រឈម និងយុទ្ធសាស្រ្តនានា ដើម្បីធានាបាននូវអនាគតដ៏មានសុវត្ថិភាព សម្រាប់សត្វត្មាតដែលជិតផុតពូជនៅក្នុពិភពលោក។ ឯកឧត្តម មានប្រសាសន៍ថា កម្ពុជា គឺជាក្តីសង្ឃឹមចុងក្រោយ សម្រាប់ប្រភេទសត្វត្មាតនៅក្នុងតំបន់អាស៊ីអាគ្នេយ៍ ខណៈចំនួនបានធ្លាក់ចុះពាក់កណ្តាល ក្នុងរយៈពេល១០ឆ្នាំចុងក្រោយនេះ។ «អស់រយៈពេលជិតពីរទស្សវត្សមកហើយ ដែលក្រសួងបរិស្ថាន និងក្រុមការងារសត្វត្មាតកម្ពុជា បានធ្វើការក្នុងភាពជាដៃគូជិតស្និទ្ធ ដើម្បីការពារសត្វត្មាតរស់នៅទាំងបីប្រភេទរបស់កម្ពុជា។ តាមរយៈកិច្ចខិតខំប្រឹងប្រែងអភិរក្សរួមគ្នា យើងបានអនុវត្តកម្មវិធីជាច្រើននៅទូទាំងតំបន់ការពារជាច្រើន ដើម្បីដោះស្រាយការគំរាមកំហែងសំខាន់ៗ តាមដានចំនួនប្រជាសាស្ត្រ និងធានាការរស់រានមានជីវិតរយៈពេលវែងរបស់ពួកវា។» ឯកឧត្តមរដ្ឋលេខាធិការក្រសួងបរិស្ថានបានលើកឡើងបន្ថែម។ លោក ប៊ូ វរសក្ស នាយកអង្គការជិវិតធម្មជាតិនៅកម្ពុជា បានថ្លែងថា ប្រទេសកម្ពុជាជាប្រទេសមួយក្នុងចំណោមប្រទេសឥណ្ឌូចិន ដែលនៅមានសត្វត្មាតជិតផុតពូជចំនួនបីប្រភេទ គឺត្មាតភ្លើង ត្មាតផេះ និងត្មាតត្នោត។ លោកបញ្ជាក់ថា «ជាមួយនឹងការខិតខំប្រឹងប្រែងរបស់ក្រុមការងារ យើងអាចបញ្ជាក់បានថា ចំនួនប្រជាសាស្ត្រសត្វត្មាតនៅកម្ពុជា ស្ថិតក្នុងស្ថានភាពថេរ ដោយតាមទិន្នន័យជំរឿនចុងក្រោយនេះចំនួនរបស់ពួកវាទាំងបីប្រភេទ មានប្រហែល១៣០ក្បាល។ អ្នកជំនាញបានលើកឡើងថា សត្វត្មាត រងការគំរាមកំហែងដូចជា៖ ការពុល កង្វះចំណីអាហារ ការបាត់បង់ជម្រក និងសកម្មភាព រំខានដោយមនុស្ស ដែលការណ៍នេះ ត្រូវតែមានកិច្ចសហប្រតិបត្តិការពីបណ្តាអ្នកពាក់ព័ន្ធទាំងអស់។លោកស្រី Jemima Parry-Jones ប្រធានសមាគមនៃអង្គការមកពីប្រទេសចំនួនប្រាំមួយសម្រាប់ការសង្គ្រោះសត្វត្មាតអាស៊ីពីការផុតពូជ (SAVE) បានអំពាវនាវឱ្យមានការចូលរួមអភិរក្ស និងការពារសត្វត្មាត ដោយសារវាជាអ្នកដែលសម្អាតបរិស្ថានដោយស៊ីគម្រង់សាកសពសត្វផ្សេងទៀតជាអាហារ។ លោកស្រី ថ្លែងថា ការការពារ និងអភិរក្សសត្វត្មាត បានគង់វង្ស វាជាការថែរក្សាមរតកធម្មជាតិដ៏ មានតម្លៃមហាសាលសម្រាប់កម្ពុជា និងពិភពលោកទាំងមូល ព្រមទាំងជាតម្លៃសម្រាប់ការអភិរក្សជីវៈចម្រុះ និងការទាក់ទាញភ្ញៀវទេសចរ។សូមបញ្ជាក់ថា សត្វត្មាត មានតួនាទីសំខាន់ក្នុងធម្មជាតិនោះគឺជាអ្នកសម្អាតបរិស្ថាន និងត្រូវចាត់ទុកជាសត្វមានតម្លៃសម្រាប់វិស័យទេសចរណ៍ធម្មជាតិ។ ត្មាតត្រូវបានចាត់ថ្នាក់ជាប្រភេទសត្វជិតផុតពូជបំផុត ក្នុងបញ្ជីក្រហមនៃអង្គការសហភាពអន្ដរជាតិដើម្បីការអភិរក្សធម្មជាតិ(IUCN)។ បច្ចុប្បន្ន ក្រុមការងារអភិរក្សសត្វត្មាតនៅកម្ពុជា បានបង្កើតឡើងដោយរួមមាន តំណាងក្រសួង ស្ថាប័នរបស់រាជរដ្ឋាភិបាល អង្គការមិនមែនរដ្ឋាភិបាល និងគ្រឹះស្ថានសិក្សាជាន់ខ្ពស់ ក្នុងគោលបំណង ទប់ស្កាត់ការផុតពូជរបស់សត្វត្មាតនៅកម្ពុជា។ កិច្ចប្រជុំប្រចាំឆ្នាំស្តីពីការអភិរក្សសត្វត្មាតនេះ ធ្វើឡើងចាប់ពីថ្ងៃទី១៧ ដល់ថ្ងៃទី២១ ខែកុម្ភៈ ឆ្នាំ២០២៥ នឹងផ្តល់ឱកាសមួយឱ្យក្រុមអ្នកអភិរក្សបរិស្ថានជាតិនិងអន្តរជាតិបានរៀបចំផែនការសកម្មភាព ដើម្បីដោះស្រាយ ការគំរាមកំហែងដូចជា ចំណីពុលដល់សត្វត្មាត និងកម្ពុជាមានឱកាសចែករំលែកការអភិរក្សសត្វត្មាតជូនតំណាងប្រទេសនានាផងដែរ។ ក្នុងឱកាសនេះ ពួកគេនឹងមានឱកាសបង្ហាញ ពីកិច្ចខិតខំប្រឹងប្រែង អភិរក្សសត្វត្មាតរបស់ប្រទេសកម្ពុជា ក្នុងអំឡុងពេលទស្សនកិច្ចសិក្សា នៅដែនជម្រកសត្វព្រៃសៀមប៉ាង។ នៅទីនោះ គណៈប្រតិភូនឹងរៀនអំពីសារៈសំខាន់ នៃភោជនីយដ្ឋានសត្វត្មាត និងលទ្ធផលនៃវេទិកាសំបុកសិប្បនិម្មិត៕

បណ្ដាញសង្គម

ព័ត៌មានថ្មីៗ

ប្រជាកសិករឥណ្ឌូនេស៊ី ត្រៀមខ្លួនរួចរាល់ក្នុងការសម្របខ្លួនតាមបាតុភូតអែល នីញ៉ូ

គម្រោងផ្លូវថ្លៃបំផុតរបស់ឥណ្ឌាខិតទៅរកការប្រកួតប្រជែង ក្រោយពិធីបើកការដ្ឋានសាងសង់

វិនិយោគិនកូរ៉េ បាននិងកំពុងចាប់អារម្មណ៍អំពីការធ្វើធុរកិច្ចនៅកម្ពុជា

សម្តេចធិបតី និងលោកជំទាវបណ្ឌិត អញ្ជើញមកដល់អាកាសយានដ្ឋានអន្តរជាតិតេជោ ប្រកបដោយសុវត្ថិភាព

ភ្លើងឆេះព្រៃទ្រង់ទ្រាយធំ បានឆាបឆេះតំបន់កាស្មៀ ប្រទេសឥណ្ឌា

ប្រធានគណៈកម្មការអឺរ៉ុប៖ EU មានគោលដៅលើថាមពល ធនាគារ និងការនេសាទរបស់រុស្ស៊ី នៅក្នុងទណ្ឌកម្មថ្មី

ខ្សែដៃតាមដានអេឡិចត្រូនិចរបស់លោក ថាក់ស៊ីន ត្រូវដោះចេញ ក្រោយតុលាការថៃពិនិត្យបញ្ជីលើកលែងទោស

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

ព័ត៌មានជាតិ

ផ្លូវបេតុង១ខ្សែក្នុងស្រុកខ្សាច់កណ្តាល បានកំពុងលើកកម្ពស់ការរស់នៅរបស់ប្រជាពលរដ្ឋតាមជនបទ

ឯកឧត្តម កែវ រ៉េមី អញ្ជើញប្រគល់រថយន្តសង្គ្រោះដល់មណ្ឌលអប់រំកែប្រែទី២ ដើម្បីគាំទ្រសុខុមាលស្ត្រីជាប់ឃុំ

សម្ដេចធិបតី ហ៊ុន ម៉ាណែត អនុញ្ញាតជូនគណៈប្រតិភូសភាសហរដ្ឋអាមេរិកចូលជួបសម្តែងការគួរសម និងពិភាក្សាការងារ

ក្រុមហ៊ុនចិនចំនួន ១៨ ចំណាប់អារម្មណ៍យ៉ាងខ្លាំងលើការបណ្តាក់ទុនវិនិយោគនៅកម្ពុជា

កាកបាទក្រហមគិតគូរខ្ពស់ពីសេវាសុខាភិបាលសាធារណៈ និងឯកជនក្នុងការថែទាំសុខភាពមាតា ទារក កុមារ និងយុវវ័យ

ស្ត្រីជនជាតិវៀតណាម ដែលផលិតទឹកឃ្មុំក្លែងក្លាយត្រូវបានចៅក្រមស៊ើបសួរសម្រេចឃុំខ្លួនបណ្ដោះអាសន្ន

ក្រុមអ្នកជំនាញបរិស្ថានជាតិ-អន្តរជាតិ ជួបប្រជុំគ្នានៅកម្ពុជា ដើម្បីពង្រឹងការអភិរក្សសត្វត្មាត

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

ព័ត៌មានជាតិ

ផ្លូវបេតុង១ខ្សែក្នុងស្រុកខ្សាច់កណ្តាល បានកំពុងលើកកម្ពស់ការរស់នៅរបស់ប្រជាពលរដ្ឋតាមជនបទ

ឯកឧត្តម កែវ រ៉េមី អញ្ជើញប្រគល់រថយន្តសង្គ្រោះដល់មណ្ឌលអប់រំកែប្រែទី២ ដើម្បីគាំទ្រសុខុមាលស្ត្រីជាប់ឃុំ

សម្ដេចធិបតី ហ៊ុន ម៉ាណែត អនុញ្ញាតជូនគណៈប្រតិភូសភាសហរដ្ឋអាមេរិក​ចូលជួបសម្តែង​ការគួរសម និងពិភាក្សាការងារ

ក្រុមហ៊ុនចិនចំនួន ១៨ ចំណាប់អារម្មណ៍យ៉ាងខ្លាំងលើការបណ្តាក់ទុនវិនិយោគនៅកម្ពុជា

កាកបាទក្រហមគិតគូរខ្ពស់ពីសេវាសុខាភិបាលសាធារណៈ និងឯកជន​ក្នុងការថែទាំសុខភាព​មាតា ទារក កុមារ និងយុវវ័យ

ស្ត្រីជនជាតិវៀតណាម ដែលផលិតទឹកឃ្មុំក្លែងក្លាយត្រូវបានចៅក្រមស៊ើបសួរ​សម្រេចឃុំខ្លួន​បណ្ដោះ​អាសន្ន

ក្រុមអ្នកជំនាញបរិស្ថានជាតិ-អន្តរជាតិ ជួបប្រជុំគ្នានៅកម្ពុជា ដើម្បីពង្រឹងការអភិរក្សសត្វត្មាត

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

សម្ដេចធិបតី ហ៊ុន ម៉ាណែត អនុញ្ញាតជូនគណៈប្រតិភូសភាសហរដ្ឋអាមេរិកចូលជួបសម្តែងការគួរសម និងពិភាក្សាការងារ

កាកបាទក្រហមគិតគូរខ្ពស់ពីសេវាសុខាភិបាលសាធារណៈ និងឯកជនក្នុងការថែទាំសុខភាពមាតា ទារក កុមារ និងយុវវ័យ

ស្ត្រីជនជាតិវៀតណាម ដែលផលិតទឹកឃ្មុំក្លែងក្លាយត្រូវបានចៅក្រមស៊ើបសួរសម្រេចឃុំខ្លួនបណ្ដោះអាសន្ន