នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
សម្ដេចធិបតី៖ រាជរដ្ឋាភិបាល និងមហាគ្រួសារខ្មែរ​នៅ​ជាមួយ​កងទ័ព​ជួរ​មុខ​គាំទ្រ​គ្រប់​មធ្យោបាយ​ទាំង​អស់
សម្ដេចធិបតី ដឹកនាំគណៈប្រតិភូចូលក្រាបបង្គំគាល់ព្រះករុណា ព្រះមហាក្សត្រ ទូលថ្វាយលទ្ធផលចុះបញ្ជីបូជនីយដ្ឋានចងចាំនៃកម្ពុជា ក្នុងបញ្ជីបេតិកភណ្ឌពិភពលោក
សភាតំណាងប្រជាជនចិនចាត់ទុកសម្តេចតេជោ ជាតួអង្គសំខាន់បន្ត​ពីព្រះបរម​រតនកោដ្ឋ​ក្នុង​ការ​ពូន​ជ្រំ​ទំនាក់ទំនងរវាងកម្ពុជា និងចិន
សម្តេចតេជោអនុញ្ញាតឱ្យសមាជិកគណៈកម្មាធិការអចិន្ត្រៃយ៍សភាប្រជាជនចិនជួបសម្តែងការគួរសម

នយោបាយ​ និង ការអភិវឌ្ឍន៍

សម្ដេចធិបតី ហ៊ុន ម៉ាណែត៖ កម្ពុជានៅតែមានការប្តេជ្ញាចិត្តខ្ពស់ក្នុងការអនុវត្តកាតព្វកិច្ច អនុសញ្ញាអូតាវ៉ា

2024/04/22 03:49:53 pm        126
Facebook Telegram Linkin
សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា មាន​ប្រសាសន៍​បញ្ជាក់​ថា​កម្ពុជានៅតែមានការប្តេជ្ញាចិត្តខ្ពស់ នៅក្នុងការអនុវត្តកាតព្វកិច្ច ដែលមានចែង​ក្នុង​អនុសញ្ញា​ស្តីពី​ការហាមការប្រើប្រាស់ ការរក្សាទុក ការផលិត និងការផ្ទេរគ្រាប់មីនប្រឆាំងមនុស្ស និង​ការបំផ្លាញគ្រាប់មីន ឬ ហៅកាត់ថា អនុសញ្ញាអូតាវ៉ា។ សម្ដេចធិបតី នាយករដ្ឋមន្រ្ដី បានថ្លែងបញ្ជាក់បែបនេះ ក្នុងឱកាសអញ្ជើញថ្លែងសុន្ទរកថា ក្នុងពិធីបើកសន្និបាតប្រចាំឆ្នាំលើកទី៨០ របស់គណៈកម្មការសេដ្ឋកិច្ច និងសង្គមកិច្ចសម្រាប់អាស៊ី-ប៉ាស៊ីហ្វិក (ESCAP) ក្រោមប្រធានបទ “ការប្រើប្រាស់ នវានុវត្តន៍ឌីជីថល សម្រាប់ការអភិវឌ្ឍប្រកបដោយចីរភាពនៅអាស៊ី-ប៉ាស៊ីហ្វិក” នាព្រឹកថ្ងៃទី២២ ខែមេសា ឆ្នាំ២០២៤ នៅរាជធានីបាងកក ប្រទេសថៃ។ក្នុងឱកាសនោះ សម្ដេចធិបតី នាយករដ្ឋមន្រ្ដីមានប្រសាសន៍ ពាក់ព័ន្ធនឹងបញ្ហាប្រឈមរួមនៃតំបន់ និងសកល ដោយសម្តេចបានលើកឡើងអំពី បញ្ហានៃការបោសសម្អាតមីន និងសំណល់ជាតិផ្ទុះពីសង្គ្រាមនៅកម្ពុជា ដែលនៅតែជាឧបសគ្គដ៏ធំមួយ សម្រាប់ការអភិវឌ្ឍជារួម បូករួមទាំងការបង្រួមគម្លាតឌីជីថល និងការទទួលបាននូវសេវាអ៊ីនធឺណិត ដែលមានគុណភាព។ សម្ដេចនាយករដ្ឋមន្រ្ដីបានថ្លែងបញ្ជាក់ថា ដោយទទួលស្គាល់នូវភាពចាំបាច់នៃបញ្ហានេះសកម្មភាពមីនត្រូវបានបញ្ចូលទៅជា គោលដៅទី១៨ នៃគោលដៅអភិវឌ្ឍន៍ប្រកបដោយចីរភាពរបស់កម្ពុជា។ កម្ពុជានៅតែមានការប្តេជ្ញាចិត្តខ្ពស់នៅក្នុងការអនុវត្តកាតព្វកិច្ច ដែលមានចែងក្នុងអនុសញ្ញាស្តីពីការហាមការប្រើប្រាស់ ការរក្សាទុក ការផលិត និងការផ្ទេរគ្រាប់មីនប្រឆាំងមនុស្ស និងការបំផ្លាញគ្រាប់មីនឬហៅកាត់ថា អនុសញ្ញាអូតាវ៉ា។ សម្ដេចធិបតី ថ្លែងបញ្ជាក់ថា ក្នុងនាមជាប្រធានអនុសញ្ញាអូតាវ៉ា សម្រាប់ឆ្នាំនេះកម្ពុជានឹងធ្វើជាម្ចាស់ផ្ទះរៀបចំកិច្ចប្រជុំត្រួតពិនិត្យ ឡើងវិញលើកទី ៥ ក្រោមប្រធាបទ កិច្ចប្រជុំកំពូលសៀមរាប-អង្គរ ស្តីអំពីពិភពលោកមួយដែលគ្មានមីន ដែលនឹងប្រព្រឹត្តទៅនៅថ្ងៃទី២៥ ដល់ ថ្ងៃ២៩ ខែ វិច្ឆិកា ឆ្នាំ២០២៤។ សម្តេចធិបតីបានអំពាវនាវឱ្យមានកិច្ចខិតខំប្រឹងប្រែងរួមគ្នា ដើម្បីលុបបំបាត់នូវអាវុធដ៏សាហាវនេះ ក៏ដូចជាគាំទ្រ និងចូលរួមនៅក្នុងព្រឹត្តិការណ៍ជាប្រវត្តិសាស្ត្រនេះព្រមទាំងបានថ្លែងអំណរគុណចំពោះគណ:កម្មការ ESCAP ដែលបាន ជួយគាំទ្រដល់កម្ពុជាក្នុងការរៀបចំសេចក្តីព្រាងគោលនយោបាយជាតិសកម្មភាពមីន ដែលជាលើកដំបូង សម្រាប់គណ:កម្មការ ESCAP ចូលរួមក្នុងសកម្មភាពពាក់ព័ន្ធនឹងមីន៕ អត្ថបទ៖ វ៉ន ដារ៉ា

សម្ដេចធិបតី៖ នវានុវត្តន៍ឌីជីថលមានសារៈសំខាន់សម្រាប់ការអភិវឌ្ឍប្រកបដោយចីរភាព បរិយាបន្ន និងភាពធន់

2024/04/22 03:39:18 pm        106
Facebook Telegram Linkin
សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បាន​ថ្លែង​បញ្ជាក់​ថា នវានុវត្តន៍ឌីជីថល មានសារៈសំខាន់សម្រាប់ការអភិវឌ្ឍប្រកបដោយចីរភាព បរិយាបន្ន និង​ភាពធន់ ជាពិសេស នៅក្នុងការដោះស្រាយបញ្ហាវិសមភាព ដែលបានបង្កឡើងដោយជំងឺកូវីដ-១៩ ក៏ដូចជាការឆ្លើយតបឱ្យទាន់ពេល ទៅនឹងកំណើននៃតម្រូវការថ្មីរបស់ប្រជាពលរដ្ឋ។សម្ដេចធិបតី នាយករដ្ឋមន្រ្ដីបានថ្លែងបញ្ជាក់បែបនេះ ក្នុងឱកាសអញ្ជើញថ្លែងសុន្ទរកថា ក្នុងពិធី​បើក​សន្និបាត​ប្រចាំឆ្នាំលើកទី៨០ របស់គណៈកម្មការសេដ្ឋកិច្ច និងសង្គមកិច្ចសម្រាប់អាស៊ី-ប៉ាស៊ីហ្វិក (ESCAP) ក្រោមប្រធានបទ “ការប្រើប្រាស់ នវានុវត្តន៍ឌីជីថល សម្រាប់​ការ​អភិវឌ្ឍ​ប្រកប​ដោយ​ចីរភាពនៅអាស៊ី-ប៉ាស៊ីហ្វិក” នាព្រឹកថ្ងៃទី២២ ខែមេសា ឆ្នាំ២០២៤ នៅរាជធានី​បាងកក ប្រទេសថៃ។សម្តេចធិបតីនាយករដ្ឋមន្ត្រី បានគូសបញ្ជាក់ថា តាមរយៈការប្រើប្រាស់បច្ចេកវិទ្យា ទាំង​អស់​គ្នា​អាច​បង្រួម​គម្លាត ក្នុងការទទួលបានឱកាស និងសេវាកម្មសំខាន់ៗ ពោលគឺអាច​ចែក​រំលែក​បាន​នូវ​ផ្លែផ្កា​នៃការអភិវឌ្ឍ ដល់ប្រជាពលរដ្ឋគ្រប់ៗរូបស្មើៗគ្នា។ ដូចបណ្តាប្រទេសនានាដែរ កម្ពុជា​បាន​ចាត់​ទុកបច្ចេកវិទ្យាឌីជីថល ជាចលករដ៏សំខាន់ក្នុងដំណើរការអភិវឌ្ឍសង្គម-សេដ្ឋកិច្ច ក្នុង​បរិបទ​បដិវត្តន៍ឧស្សាហកម្ម ៤.០ ដោយសារ បច្ចេកវិទ្យាឌីជីថល អាចបង្កើត​ក្បាលម៉ា​ស៊ីន​ជំរុញ​កំណើន​សេដ្ឋកិច្ចថ្មីៗ និងបង្កើនការទទួលបានសេវាសាធារណៈ ចាំបាច់ក៏ដូច​ជា​កសាង​សង្គម​ទំនើប និងស៊ីវីល័យមួយ ដែលពលរដ្ឋអាចទទួលបាននូវផលប្រយោជន៍ ប្រកបដោយបរិយាបន្ន ភាព​ជឿ​ទុកចិត្តបាន និងសុវត្ថិភាពខ្ពស់។ សម្ដេចធិបតីមានប្រសាសន៍ថា បច្ចេកវិទ្យាឌីជីថល អាចជួយរក្សាបាននូវអត្តសញ្ញាណ និង​វប្បធម៌​ជាតិ។ ក្នុងន័យនេះ រាជរដ្ឋាភិបាល នីតិកាលទី៧ នៃរដ្ឋសភានេះ បានប្រកាស​ដាក់​ឱ្យ​អនុវត្ត «យុទ្ធសាស្ត្របញ្ចកោណ-ដំណាក់កាលទី១» ដោយបានកំណត់អាទិភាពចំនួន ៥ គឺ ៖ មនុស្ស, ផ្លូវ, ទឹក, ភ្លើង និងបច្ចេកវិទ្យា, ពោលគឺបច្ចេកវិទ្យាឌីជីថល ដែលជាអាទិភាពថ្មីមួយ កំណត់នៅក្នុងបញ្ចកោណទី៥ គឺ «ការកសាងសេដ្ឋកិច្ច និងសង្គមឌីជីថល»។ បន្ថែមលើនេះ រាជរដ្ឋាភិបាល ក៏បានដាក់ឱ្យអនុវត្ត «ក្របខ័ណ្ឌគោលនយោបាយសេដ្ឋកិច្ច និង​សង្គម​ឌីជីថល​កម្ពុជា ២០២១-២០៣៥», «គោលនយោបាយរដ្ឋាភិបាលឌីជីថលកម្ពុជា ២០២២-២០៣៥» «គោលនយោបាយអភិវឌ្ឍបច្ចេកវិទ្យា ហិរញ្ញវត្ថុកម្ពុជា ២០២៣-២០២៨» និង «គោល​នយោបាយ​ជាតិ​ស្តីពីវិទ្យាសាស្ត្រ បច្ចេកវិទ្យា និង នវានុវត្តន៍ឆ្នាំ ២០២០-២០៣០» ។ល។សម្ដេច​ធិបតីនាយករដ្ឋមន្រ្ដីបន្តថាក្នុងបរិបទសកល និងតំបន់, កម្ពុជា បាននិង​កំពុង​ចូល​រួម​យ៉ាង​បុរេស​កម្ម ក្នុងការអនុវត្តរបៀបវារៈគោលនយោបាយ ឌីជីថល សំដៅសម្រេច​ឱ្យ​បាន​គោល​ដៅ​អភិវឌ្ឍន៍​ឌីជីថលក្នុងតំបន់ និងសកលរួមមានដូចជា «ផែនការមេ ឌីជីថលអាស៊ាន២០២៥» និង«យុទ្ធសាស្ត្រឌីជីថល២០២២-២០២៥» របស់អង្គការ សហប្រជាជាតិ។ ទន្ទឹមនេះ​កម្ពុជា​បាន​និង​កំពុងចូលរួមក្នុងគំនិតផ្តួចផ្តើមឌីជីថលអាស៊ានផ្សេងៗ ជាពិសេសការរៀបចំ កិច្ចព្រមព្រៀង​ក្រប​ខ័ណ្ឌ​សេដ្ឋកិច្ចឌីជីថលអាស៊ាន (DEFA) ដែលមានគោលបំណង ក្នុងការផ្តល់ជាអភិក្រម យុទ្ធសាស្ត្រ និងពេញលេញកម្រិតតំបន់ ក្នុងការលើកកម្ពស់ការធ្វើឌីជីថលូបនីយកម្ម ក្នុងតំបន់ ប្រកប​ដោយ បរិយាបន្ន និងទាន់ពេល។ លើសពីនេះ អាស៊ានក៏បានចាត់ទុកសេដ្ឋកិច្ចឌីជីថល ជា​ជំពូក​អាទិភាពមួយ នៅក្នុង កិច្ចព្រមព្រៀងនានា ដូចជា កិច្ចព្រមព្រៀងពាណិជ្ជកម្មសេរី អាស៊ាន-អូស្ត្រាលី-ណូវែលហ្សេឡង់ (AANZFTA) និងកិច្ចព្រមព្រៀងពាណិជ្ជកម្មសេរីអាស៊ាន-ចិន (ACFTA 3.0) ក៏ដូចជា កិច្ចព្រមព្រៀងភាពជាដៃគូយុទ្ធសាស្ត្រ គ្រប់ជ្រុងជ្រោយតំបន់ (RCEP) ។សម្តេចធិបតីបានបង្ហាញនូវក្តីសង្ឃឹមជឿជាក់ថា តាមរយៈវេទិកានេះនឹង​អាច​រួម​គ្នា​ដោះ​ស្រាយ​បាន​នូវបញ្ហាប្រឈមមួយចំនួន ដូចជា គម្លាតឌីជីថលទាំងរវាងប្រទេស និង ប្រទេស និងរវាង​ទីក្រុង និងជនបទ កង្វះហេដ្ឋារចនាសម្ព័ន្ធ និង ការទទួលបាន​សេវា​អ៊ីន​ធឺណិត​ដែល​មាន​គុណភាព, អក្ខរកម្មឌីជីថលរបស់ ប្រជាពលរដ្ឋនៅមានកម្រិត កង្វះការចាប់យក និងប្រើប្រាស់​បច្ចេក​វិទ្យា​ឌីជីថល, កង្វះការធ្វើពាណិជ្ជកម្ម និង សេវាកម្មឌីជីថល បញ្ហាសន្តិសុខសាយប័រ និង បទ​ល្មើសតាមប្រព័ន្ធបច្ចេកវិទ្យា ។ល។ ដើម្បីឆ្លើយតប ឱ្យទាន់ពេល​ទៅ​នឹង​កំណើន​នៃ​តម្រូ​វ​កា​រ​ថ្មី​របស់​ប្រជាពលរដ្ឋក្នុងអាស៊ី-ប៉ាស៊ីហ្វិក ក្នុងដំណើរឆ្ពោះទៅកាន់ សេដ្ឋកិច្ច និងសង្គម​ឌីជីថល​ពេញ​លេញ​៕ អត្ថបទ៖ វ៉ន ដារ៉ា

រាជរដ្ឋាភិបាលកម្ពុជា និងគណៈកម្មការ ESCAP បន្តពង្រឹងកិច្ចសហប្រតិបត្តិការជំរុញ​នវានុវត្តន៍ឌីជីថល

2024/04/22 03:17:24 pm        62
Facebook Telegram Linkin
នាព្រឹកថ្ងៃទី២២ ខែមេសា ឆ្នាំ២០២៤ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃ​ព្រះរាជាណាចក្រកម្ពុជា បានជួបពិភាក្សាការងារជាមួយ លោកជំទាវបណ្ឌិត អាមីដា សាលស៊ី​យ៉ាអាលីស​ចាបាណា (Armida Salsiah Alisjahbana) អគ្គលេខាធិការរង នៃអង្គការ​សហ​ប្រជាជាតិ និងជាលេខាធិការប្រតិបត្តិ នៃគណៈកម្មការសេដ្ឋកិច្ច និងសង្គមកិច្ច សម្រាប់អាស៊ី-ប៉ាស៊ីហ្វិក (ESCAP) ក្នុងឱកាសនៃការអញ្ជើញចូលរួមសន្និបាតលើកទី៨០ របស់គណៈកម្មការ ESCAP នៅរាជធានីបាងកក នៃព្រះរាជាណាចក្រថៃ។ក្នុងជំនួបនេះ លោកជំទាវបណ្ឌិត អាមីដា បានថ្លែងអំណរគុណយ៉ាងជ្រាលជ្រៅចំពោះ សម្តេច​ធិបតី ដែលបានចំណាយពេលដ៏មមាញឹកចូលរួម និងថ្លែងសន្ទរកថាគន្លឹះក្នុងសន្និបាតលើកទី៨០ របស់​គណៈកម្មការ ESCAP។ ឆ្លៀតក្នុងឱកាសនេះដែរ លោកជំទាវបណ្ឌិត ក៏បានវាយ​តម្លៃ​ខ្ពស់​ចំពោះ​រាជ​រដ្ឋាភិបាលកម្ពុជា ដែលបានដាក់ចេញនូវយុទ្ធសាស្រ្តបញ្ចកោណ-ដំណាក់កាលទី១ ដែល​ផ្តល់​អាទិភាពលើបច្ចេកវិទ្យាឌីជីថល ព្រមទាំង​បាន​សម្ដែង​នូវ​ការ​អរគុណ​ចំពោះ​រាជ​រដ្ឋាភិបាល​កម្ពុជា ដែលបានផ្ដល់នូវកិច្ចសហប្រតិបត្តិការយ៉ាងល្អជាមួយគណ:កម្មការ ESCAP។ជាការឆ្លើយតប សម្តេចធិបតី បានថ្លែងអំណរគុណ និងវាយតម្លៃខ្ពស់ចំពោះកិច្ចសហប្រតិបត្តិការ និ​ង​ការគាំទ្ររបស់គណ:កម្មការ ESCAP ដែលបានរួម​ចំណែក​យ៉ាង​សំខាន់​ក្នុង​ដំណើរ​ការ​នៃ​ការ​អភិវឌ្ឍ​សង្គម-សេដ្ឋកិច្ចរបស់កម្ពុជានាពេលកន្លងមក ដោយគណ:កម្មការ ESCAP គឺជាដៃគូ​ដ៏​សំខាន់​មួយ​របស់កម្ពុជាដែលបានផ្តល់នូវជំនួយបច្ចេកទេស និងការបណ្ដុះបណ្ដាល​ជំនាញ​លើ​វិស័យ​នានា រួមមាន ដូចជា៖ ការអភិវឌ្ឍន៍សេដ្ឋកិច្ច, និរន្តរភាពបរិស្ថាន, ការជំរុញបរិយាប័ន្នសង្គម និងអភិបាលកិច្ច ជាដើម។បន្ថែមលើនេះ សម្តេចធិបតី បានថ្លែងអំណរគុណចំពោះគណ:កម្មការ ESCAP ក្នុងការ​ជួយ​គាំទ្រ​ដល់​ក្នុង​ការរៀបចំសេចក្តីព្រាងគោលនយោបាយជាតិសកម្មភាពមីន ដែលគោលនយោបាយនេះ គឺ​ជា​លើកដំបូងក្នុងប្រវត្តិសាស្ត្រ ESCAP ក្នុងការចូលរួមក្នុងសកម្មភាពពាក់ព័ន្ធនឹងមីន។ ទន្ទឹមនោះ សម្តេចធិបតី បានបង្ហាញ​នូវ​ការ​ប្ដេជា្ញ​ចិត្ត​របស់​កម្ពុជា​ក្នុង​ការ​ពង្រឹង​កិច្ច​សហ​ប្រតិបត្តិការ​ និងភាពជាដៃគូរវាងកម្ពុជា និង គណ:កម្មការ ESCAP បន្ថែមទៀត ដើម្បីជំរុញ​ការ​អភិវឌ្ឍ​សង្គម-សេដ្ឋកិច្ច ឆ្ពោះទៅសម្រេចបានគោលដៅអភិវឌ្ឍន៍ប្រកបដោយចីរភាព និងការ​កសាង​អនាគតដ៏ល្អប្រសើរមួយសម្រាប់ទាំងអស់គ្នា។សម្តេចធិបតី ក៏បានជម្រាបជូនលោកជំទាវបណ្ឌិតអំពីក្របខ័ណ្ឌគោលនយោបាយ និងក្រប​ខ័ណ្ឌ​យុទ្ធ​សាស្រ្ត​របស់រាជរដ្ឋាភិបាលនីតិកាលទី៧ នៃរដ្ឋសភា ជាពិសេសការដាក់​ចេញ​នូវ​យុទ្ធ​សាស្រ្ត​បញ្ច​កោណ-ដំណាក់កាលទី១ ដែលផ្តល់អាទិភាពលើបច្ចេកវិទ្យាឌីជីថល ដែលជាសមាសធាតុ​ដ៏​សំខាន់​នៃ​ការជំរុញប្រភពកំណើនសេដ្ឋកិច្ចថ្មី ព្រមទាំងសម្រេចបាន​ចក្ខុ​វិស័យ​នៃ​ការ​ប្រែក្លាយ​ប្រទេស​កម្ពុជា​ទៅជាប្រទេសចំណូលខ្ពស់នៅឆ្នាំ២០៥០៕

ឯកអគ្គរដ្ឋទូតប្រទេសចិន ប្រចាំនៅកាណាដា ចាកចេញពីមុខតំណែង

2024/04/22 02:57:55 pm        63
Facebook Telegram Linkin
ឯកអគ្គរដ្ឋទូតចិន ប្រចាំប្រទេសកាណាដា លោក ខុង ភៃអ៊ូ (Cong Peiwu) ដែលបានបម្រើការតាំងពីឆ្នាំ ២០១៩ បានចាកចេញពីមុខតំណែង ហើយបានត្រឡប់ទៅប្រទេសចិនវិញហើយ នេះបើយោងតាមប្រភពដែលដឹងពីបញ្ហានេះបាននិយាយកាលពីថ្ងៃអាទិត្យ (២១ មេសា) ដោយព័ត៌មាននេះបានលេចចេញក្នុងអំឡុងពេលដំណើរទស្សនកិច្ចរបស់អ្នកការទូតជាន់ខ្ពស់កាណាដាម្នាក់ទៅកាន់ប្រជាជាតិអាស៊ីមួយនេះ។ព័ត៌មានលម្អិតបន្ថែមអំពីមូលហេតុដែលលោកចាកចេញពីមុខតំណែងមិនទាន់មាននៅឡើយទេ ហើយស្ថានទូតចិន នៅទីក្រុងអូតាវ៉ា ក៏មិនបានឆ្លើយតបភ្លាមៗចំពោះសំណើសុំការអត្ថាធិប្បាយដែរ។ការចាកចេញរបស់ឯកអគ្គរដ្ឋទូតចិនរូបនេះត្រូវបានរាយការណ៍ជាលើកដំបូងដោយសារព័ត៌មាន គ្លូប អ៊ែន មែល (Globe and Mail)។ ព័ត៌មាននេះរាយការណ៍ដោយដកស្រង់ពីប្រភពថា មុខតំណែងរបស់លោក ខុង បានបញ្ចប់កាលពីថ្ងៃទី០៩ ខែមេសា ហើយបានធ្វើឱ្យមានការភ្ញាក់ផ្អើលដល់មនុស្សមួយចំនួននៅក្នុងស្ថាប័នការទូត ដោយសារតែលឿនខ្លាំងពេក។ទំនាក់ទំនងរវាងទីក្រុងអូតាវ៉ា និងទីក្រុងប៉េកាំង មានភាពតានតឹងចាប់តាំងពីឆ្នាំ២០១៨ មកនៅពេលដែលនគរបាលកាណាដាបានឃុំខ្លួនលោក ម៉េង វ័នចូវ (Meng Wanzhou) ដែលជាប្រធានផ្នែកហិរញ្ញវត្ថុនៃក្រុមហ៊ុនទូរគមនាគមន៍យក្សរបស់ចិន ហ័រវ៉ី តិចណូឡូជីស៍ (Huawei Technologies) តាមដីការបស់សហរដ្ឋអាមេរិក ហើយក្រោយមកជនជាតិកាណាដាពីរនាក់ត្រូវបានចិនចាប់ឃុំខ្លួនវិញ ដែលបង្កជាភាពរកាំរកូសរវាងប្រទេសទាំងពីរ៕

ទីក្រុងរ៉ូម របស់អ៊ីតាលី ប្រារព្ធខួបលើកទី២.៧៧៧ ជាមួយនឹងព្រឹត្តិការណ៍យ៉ាងឱឡារិក

2024/04/22 02:48:14 pm        55
Facebook Telegram Linkin
រដ្ឋធានីរបស់ប្រទេសអ៊ីតាលី បានប្រារព្ធពិធីខួបគម្រប់ ២.៧៧៧ ឆ្នាំរបស់ទីក្រុងកាលពីថ្ងៃអាទិត្យ (២១ មេសា) ដែលជាការរំលឹកប្រចាំឆ្នាំនៃប្រវត្តិសាស្រ្តដ៏យូរអង្វែងរបស់ទីក្រុង ដែលក្នុងរយៈពេលប៉ុន្មានឆ្នាំចុងក្រោយនេះមានការពេញនិយមកាន់តែខ្លាំងឡើងពីភ្ញៀវទេសចរ។កាលពីថ្ងៃអាទិត្យ ទីក្រុងបានប្រារព្ធពិធីយ៉ាងគគ្រឹកគគ្រេងជាមួយនឹងការប្រគុំតន្ត្រី ការតាំងពិព័រណ៌ ពិធីផ្សេងៗ និងក្បួនដង្ហែដែលមានមនុស្សជាង ២.០០០ នាក់ដើរក្បួនតែងខ្លួនជាទាហាន មេទ័ព ព្រឹទ្ធសមាជិក អ្នកប្រយុទ្ធ អាចារ្យ បុព្វជិត និងពួកអភិជន ដែលសុទ្ធតែស្លៀកពាក់សំលៀកបំពាក់សម័យរ៉ូម៉ាំង។យោងតាមប្រពៃណី ទីក្រុងរ៉ូម ត្រូវបានបង្កើតឡើងនៅថ្ងៃទី២១ ខែមេសា ឆ្នាំ៧៥៣ មុនគ.ស។ ការប្រារព្ធពិធីកាលពីថ្ងៃអាទិត្យនេះត្រូវបានធ្វើឡើងនៅក្នុងកីឡាដ្ឋាន ឆៀលកូ ម៉ាកស៊ីម៉ូ (Circus Maximus) ដែលជាអតីតទីលានប្រណាំងនៃសម័យរ៉ូម៉ាំងដែលស្ថិតនៅក្នុងតំបន់ទំនាបរវាងភ្នំ ប៉ាឡាទីន (Palatine) និងភ្នំ អាវេនទីន (Aventine) ដែលជាតំបន់ភ្នំមានទំនាក់ទំនងយ៉ាងស៊ីជម្រៅទៅនឹងប្រវត្តិសាស្រ្តរបស់ទីក្រុង។ទោះបីជាប្រភពដើមនៃការប្រារព្ធពិធីកាលពីថ្ងៃអាទិត្យនេះមានអាយុកាលរាប់សតវត្សរ៍មកហើយក៏ដោយ ព្រឹត្តិការណ៍បានទាក់ទាញអ្នកដំណើរយ៉ាងច្រើន ខណៈដែលទេសចរនៅក្នុងប្រទេសអ៊ីតាលី បានងើបឡើងវិញពីវិបត្តិជំងឺរាតត្បាតកូវីដ១៩។ មិនមានការប៉ាន់ស្មានជាផ្លូវការសម្រាប់ចំនួនមនុស្សដែលបានចូលរួមក្នុងសកម្មភាពកាលពីថ្ងៃអាទិត្យនោះទេ ខណៈរបាយការណ៍ប្រព័ន្ធផ្សព្វផ្សាយបាននិយាយថា ទីក្រុងបានដាក់ពង្រាយនគរបាលយ៉ាងច្រើនសម្រាប់សន្តិសុខ និងការត្រួតពិនិត្យចរាចរណ៍៕

ឧទ្ធម្ភាគចក្រកងទ័ពជើងទឹកជប៉ុនពីរគ្រឿង ធ្លាក់អំឡុងពេលធ្វើហ្វឹកហាត់

2024/04/22 02:41:50 pm        77
Facebook Telegram Linkin
រដ្ឋមន្ត្រីក្រសួងការពារជាតិជប៉ុន លោក Minoru Kihara បាននិយាយកាលពីថ្ងៃអាទិត្យ ទី២១ ខែមេសាថា ឧទ្ធម្ភាគចក្រកងទ័ពជើងទឹករបស់ប្រទេសជប៉ុនចំនួនពីរគ្រឿង បានធ្លាក់ចូលទៅក្នុងសមុទ្រអំឡុងពេលហ្វឹកហាត់ ហើយយ៉ាងហោចណាស់សមាជិកយានិកម្នាក់ក្នុងចំណោមយានិក៨នាក់នៅលើឧទ្ធម្ភាគចក្រ បានស្លាប់។ឧបករណ៍ថតទិន្នន័យជើងហោះហើររបស់ឧទ្ធម្ភាគចក្រទាំងពីរគ្រឿង ត្រូវបានរកឃើញ នៅទីតាំងជិតគ្នា។ នៅលើមូលដ្ឋាននេះ ការស៊ើបអង្កេតពីមូលហេតុនៃការធ្លាក់ឧទ្ធម្ភាគចក្រ ត្រូវបានធ្វើឡើង រួមទាំងលទ្ធភាពដែលយន្តហោះទាំងពីរគ្រឿងបានបុកគ្នា។ ឧទ្ធម្ភាគចក្រល្បាត SH-60 ពីរគ្រឿង កំពុងធ្វើសមយុទ្ធប្រឆាំងនាវាមុជទឹក កាលពីយប់ថ្ងៃសៅរ៍នៅជិត កោះ Torishima ក្នុងប្រជុំកោះ Izu ដាច់ស្រយាល នៅឆ្នេរភាគខាងត្បូងនៃប្រទេសជប៉ុនភាគកណ្តាល។ កងកម្លាំងស្វ័យការពារដែនសមុទ្ររបស់ប្រទេសជប៉ុន ឬ MSDF និងឆ្មាំល្បាតឆ្នេរកំពុងស្វែងរកសមាជិកយានិក៧នាក់ដែលនៅសល់។កាលពីថ្ងៃសៅរ៍ នាយសេនាធិការកងកម្លាំងស្វ័យការពារដែនសមុទ្ររបស់ប្រទេសជប៉ុន(MSDF) លោក Yoshitaka Sakai បានបញ្ជាក់ថា លោកមិនជឿថាមានការជាប់ពាក់ព័ន្ធពីប្រទេសមួយផ្សេងទៀត ក្នុងការធ្លាក់យន្តហោះនោះទេ។នៅក្នុងការបង្ហោះលើបណ្តាញ X ឯកអគ្គរដ្ឋទូតសហរដ្ឋអាមេរិកប្រចាំប្រទេសជប៉ុន លោក Rahm Emanuel បានផ្តល់ជំនួយរបស់ប្រទេសលោក ក្នុងកិច្ចខិតខំប្រឹងប្រែងស្វែងរក និងជួយសង្គ្រោះ។

អាមេរិក ពិចារណាអំពីការបញ្ជូនទីប្រឹក្សាយោធាបន្ថែមទៅអ៊ុយក្រែន ខណៈដែលរុស្ស៊ី ព្យាយាមបង្កើនការវាយលុក

2024/04/22 01:46:37 pm        79
Facebook Telegram Linkin
សារព័ត៌មាន Politico បានរាយការណ៍ថា សហរដ្ឋអាមេរិក កំពុងពិចារណាអំពីការបញ្ជូនទីប្រឹក្សាយោធាបន្ថែមទៅកាន់ស្ថានទូតរបស់ខ្លួន នៅទីក្រុងគីវ នៅពេលដែលប្រទេសរុស្ស៊ី បន្តប្រតិបត្តិការវាយលុករបស់ខ្លួន នៅក្នុងប្រទេសអ៊ុយក្រែន។មន្ត្រីអាមេរិក ៤នាក់ដែលមិនបញ្ចេញឈ្មោះ និងអ្នកដែលមិនបញ្ចេញឈ្មោះម្នាក់ទៀតដែលដឹងពីបញ្ហានេះ បានប្រាប់សារព័ត៌មាននេះថា ទាហានបន្ថែម នឹងគាំទ្រជាចម្បងលើការដឹកជញ្ជូន និងត្រួតពិនិត្យអាវុធ ដែលត្រូវបានបញ្ជូនទៅកាន់អ៊ុយក្រែនដោយសហរដ្ឋអាមេរិក។មន្ត្រីម្នាក់និងអ្នកដែលស្គាល់ផែនការនេះ បាននិយាយថា ពួកគេ ក៏នឹងជួយយោធាអ៊ុយក្រែន ក្នុងការ ថែរក្សាអាវុធផងដែរ។ ពុំទាន់មានការបញ្ជាក់អំពីចំនួនទាហានអាមេរិកបន្ថែម នឹងត្រូវបញ្ជូនទៅអ៊ុយក្រែនទេ បើទោះបីជាមន្ត្រីពីរនាក់ បាននិយាយថា នឹងអាចមានរហូតដល់ ៦០នាក់។នៅក្នុងសេចក្តីថ្លែងការណ៍មួយទៅកាន់សារព័ត៌មាន Business Insider ឧត្តមសេនីយ៍ឯក Patrick Ryder អ្នកនាំពាក្យមន្ទីរបញ្ចកោណ បាននិយាយថា៖«ពេញមួយជម្លោះនេះ ក្រសួងការពារជាតិ បានពិនិត្យ និងកែសម្រួលវត្តមានរបស់យើង នៅក្នុងប្រទេសនេះ ដោយសារលក្ខខណ្ឌសន្តិសុខ ត្រូវបានកែប្រែជាបន្តបន្ទាប់។ បច្ចុប្បន្ននេះ យើងកំពុងពិចារណាអំពីការបញ្ជូនទីប្រឹក្សាបន្ថែម ដើម្បីពង្រីកការិយាល័យសហប្រតិបត្តិការការពារជាតិ (ODC) នៅស្ថានទូត»។ចំណែកប្រធានាធិបតីរុស្ស៊ី លោក វ្ល៉ាឌីមៀ ពូទីន បានព្រមានប្រទេសលោកខាងលិច ប្រឆាំងនឹងការបញ្ជូនទាហានទៅអ៊ុយក្រែន។

ប្រទេសចិន ប្ដេជ្ញាដោះស្រាយជម្លោះដែនទឹក តាមរយៈការពិភាក្សា

2024/04/22 01:43:38 pm        76
Facebook Telegram Linkin
មន្ត្រីយោធាជាន់ខ្ពស់មួយរូបបាននិយាយនៅឯកិច្ចប្រជុំមួយនៃក្រុមមន្ត្រីកងព័ទជើងទឹកបរទេសជាន់ខ្ពស់ នៅក្នុងទីក្រុងកំពង់ផែឈីងតាវ (Qingdao)នៅថ្ងៃចន្ទនេះថា ប្រទេសចិន នៅតែប្ដេជ្ញាចិត្តដោះស្រាយជម្លោះដែនសមុទ្រជាមួយប្រទេសផ្សេងៗ តាមរយៈការសុន្ទនា ប៉ុន្តែនឹងមិនអនុម័តឲ្យមានករណីបំពានណាមួយលើខ្លួនជាដាច់ខាត។ លោក ចាងយ៉ូស្ហា (Zhang Youxia) អនុប្រធានគណៈកម្មាធិការយោធាមជ្ឈិម និងជាសម្ព័ន្ធមិត្តដ៏ជិតស្និទ្ធរបស់លោកប្រធានាធិបតី Xi Jinping។ លោកចាង បាននិយាយថា ការពិត បានបង្ហាញថា អ្នកទាំងឡាយដែលមានចេតនាបង្ករឿង ដុតបញ្ឆេះភាពតានតឹង ឬគាំទ្រភាគីមួយប្រឆាំងភាគីមួយ ដើម្បីតែប្រយោជន៍ផ្ទាល់ខ្លួនដ៏អាត្មានិយម ទីបំផុត នឹងត្រូវឈឺខ្លួនឯង។ ការអត្ថាធិប្បាយនេះ ទំនងជាសំដៅលើភាពតានតឹងដែលកំពុងកើនឡើង នៅក្នុងសមុទ្រចិនខាងត្បូង ជាទីដែលសន្ធិសញ្ញាក្រុងវ៉ាស៊ីនតោន ជាមួយសម្ព័ន្ធមិត្តក្រុងម៉ានីល កំពុងប្រឈមជាមួយក្រុងវ៉ាស៊ីន ជុំវិញផ្លូវទឹកយុទ្ធសាស្ត្រ ជាចំណុចក្ដៅគគុកមួយសម្រាប់ភាពតានតឹងរវាងមហាអំណាចពិភពលោកទាំង២ គឺអាមេរិក -ចិន។ ព្រឹត្តិការណ៍នេះ បានកើតឡើងស្របពេលគ្នានឹងសមយុទ្ធយោធាប្រចាំឆ្នាំរវាងអាមេរិក និងហ្វីលីពីន ដែលបានចាប់ផ្ដើមនៅថ្ងៃចន្ទនេះ និងនៅខាងក្រៅដែនទឹករបស់ហ្វីលីពីន ជាលើកដំបូង៕

លោក Zelenskyy ស្វាគមន៍ជំនួយអាមេរិកដល់អ៊ុយក្រែន និងជំរុញឲ្យបញ្ជូនអាវុធឲ្យបានលឿន

2024/04/22 01:39:58 pm        69
Facebook Telegram Linkin
លោកប្រធានាធិបតីអ៊ុយក្រែន បានស្វាគមន៍កញ្ចប់ជំនួយយោធាក្នុងទំហំទឹកប្រាក់៦០ពាន់លានដុល្លារសម្រាប់ប្រទេសរបស់លោកដោយសភាអាមេរិក និងជំរុញដល់ទីក្រុងវ៉ាស៊ីនតោន ឲ្យបញ្ជូនពង្រាងច្បាប់នោះក្លាយជាច្បាប់ឲ្យបានឆាប់ និងដំណើរការដឹកជញ្ជូនអាវុធទៅឲ្យអ៊ុយក្រែន។លោក Zelenskyy បានសរសេរនៅលើបណ្ដាញសង្គម X កាលពីថ្ងៃអាទិត្យថា ខ្ញុំសូមសម្ដែងការដឹងគុណចំពោះសមាជិកសភាទាំង២គណបក្សរបស់សហរដ្ឋអាមេរិក ពិសេស ប្រធានសភា លោក Mike Johnson សម្រាប់ការសម្រេចចិត្ត ដែលបន្តប្រវត្តិសាស្ត្រនៅលើផ្លូវដ៏ត្រឹមត្រូវ។ ប្រធានាធិបតីរូបនេះ និយាយថា ពង្រាងច្បាប់នេះ នឹងទប់កុំឲ្យសង្រ្គាមរីករាលដាល ជួយសង្រ្គោះជីវិតមនុស្សរាប់ម៉ឺននាក់ និងជួយប្រទេសរបស់យើងទាំង២ឲ្យកាន់តែរឹងមាំថែមទៀត។ នៅក្នុងបទសម្ភាសន៍មួយជាមួយកម្មវិធី Meet the Press របស់ទូរទស្សន៍ NBC លោក Zelenskyy និយាយថា ផ្លូវនៃពង្រាងច្បាប់ផ្ដល់ជំនួយនេះ នឹងបញ្ជូនសារដ៏សំខាន់បំផុតទៅកាន់រុស្ស៊ី ថា ទីក្រុងវ៉ាស៊ីនតោន នៅតែឈរនៅខាងរដ្ឋធានីគីវ ហើយថាអ៊ុយក្រែន នឹងមិនក្លាយជាប្រទេសអាហ្វហ្គានីស្ថានទេ។ លោកនិយាយថាលោកគិតថា ការគាំទ្រនេះ នឹងជួយដល់កងកម្លាំងប្រដាប់អាវុធអ៊ុយក្រែន ហើយ យើងនឹងមានឱកាសទទួលបានជ័យជម្នះ ។ លោកបានជំរុញដដែលៗថាក្រុមតំណាងរាស្ត្រអាមេរិក នឹងចាត់វិធានការភ្លាមៗ ដើម្បីអនុម័តពង្រាងច្បាប់នេះនៅក្នុងព្រឹទ្ធសភា ។ លោកថាអ៊ុយក្រែន ត្រូវការអាវុធចម្ងាយឆ្ងាយពីអាមេរិក ជាចាំបាច់ រួមទាំងប្រព័ន្ធមីស៊ីលតាកទិកកងទ័ព ATACMS និងប្រព័ន្ធការពារដែនអាកាស ដើម្បីទប់ទល់ការលុកលុយរបស់រុស្ស៊ី៕

អ៊ីស្រាអែល ស្វាគមន៍ការអនុម័តសេចក្តីស្នើច្បាប់ជំនួយនៅក្នុងសភាអាមេរិក

2024/04/22 01:35:19 pm        63
Facebook Telegram Linkin
រដ្ឋាភិបាលប្រទេសអ៊ីស្រាអែល បានស្វាគមន៍ការអនុម័តសេចក្តីស្នើច្បាប់ជំនួយបន្ទាន់របស់សភាសហរដ្ឋអាមេរិក សម្រាប់អ៊ីស្រាអែល។ សេចក្តីស្នើច្បាប់នេះ ត្រូវបានអនុម័តដោយមានការគាំទ្រទ្វេបក្សនៅក្នុងសភា កាលពីថ្ងៃសៅរ៍។ កញ្ចប់ជំនួយ មានតម្លៃប្រមាណ ២៦ ពាន់លានដុល្លារ រួមមានជំនួយសម្រាប់យោធា និងមនុស្សធម៌។ ប្រសិនបើសេចក្តីស្នើច្បាប់នេះឆ្លងផុតព្រឹទ្ធសភា ប្រធានាធិបតី លោក Joe Biden នឹងចុះហត្ថលេខាចូលជាច្បាប់។នាយករដ្ឋមន្ត្រី លោក Benjamin Netanyahu បានបង្ហោះសារនៅលើប្រព័ន្ធផ្សព្វផ្សាយសង្គម ដោយលោកបាននិយាយថា សភាសហរដ្ឋអាមេរិក បានអនុម័តយ៉ាងលើសលប់នូវសេចក្តីស្នើច្បាប់ជំនួយដ៏មានតម្លៃ ដែលបង្ហាញពីការគាំទ្រទ្វេបក្សដ៏រឹងមាំសម្រាប់អ៊ីស្រាអែល និងការពារអារ្យធម៌ប្រទេសលោកខាងលិច។ លោកបានបញ្ជាក់ថា យោធាអ៊ីស្រាអែល ចាំបាច់ត្រូវធានាបានគ្រាប់រំសេវ សម្រាប់ការប្រយុទ្ធរយៈពេលវែងជាមួយក្រុមហាម៉ាស នៅក្នុងតំបន់ហ្កាហ្សា និងការប្រយុទ្ធរបស់ខ្លួនជាមួយក្រុមដទៃទៀត ដូចជាក្រុមហេសបូឡាជាក្រុមមូស្លីមShia ក្នុងប្រទេសលីបង់។ ទន្ទឹមនឹងនេះ ចំនួនអ្នកស្លាប់ និងរងរបួសនៅក្នុងតំបន់ហ្កាហ្សាកំពុងកើនឡើង។អាជ្ញាធរសុខាភិបាលក្នុងតំបន់ បាននិយាយកាលពីថ្ងៃអាទិត្យថា ចំនួនអ្នកស្លាប់បានកើនឡើងដល់ ៣៤.០៩៧នាក់។ ចំនួននេះ កើនឡើងខណៈជម្លោះរវាងយោធាអ៊ីស្រាអែល និងក្រុមហាម៉ាស នៅតែបន្ត។ ប្រព័ន្ធផ្សព្វផ្សាយក្នុងស្រុក រាយការណ៍ថាមនុស្សយ៉ាងហោចណាស់ ១៦នាក់ រួមទាំងកុមារ ៩ នាក់ ត្រូវបានសម្លាប់នៅក្នុងការវាយប្រហាររបស់អ៊ីស្រាអែលនៅទីក្រុង Rafah ភាគខាងត្បូង កាលពីថ្ងៃអាទិត្យ។ រដ្ឋាភិបាលសហរដ្ឋអាមេរិក កំពុងគាំទ្រការចរចាដែលមានគោលបំណងនាំយកការផ្អាកការប្រយុទ្ធគ្នានៅតំបន់ហ្កាហ្សា និងការដោះលែងចំណាប់ថ្នូរដែលត្រូវបានចាប់ខ្លួនដោយក្រុមហាម៉ាស ប៉ុន្តែការចរចា បានជាប់គាំង។

បណ្ដាញសង្គម

ព័ត៌មានថ្មីៗ

ចិនចាប់ផ្តើមសាងសង់ទំនប់វារីអគ្គិសនីធំជាងគេបំផុតរបស់ពិភពលោកនៅតំបន់ទីបេតិ៍
07/23/2025 12:07 AM
Facebook Telegram Linkin
គណៈកម្មាធិការស្វែងរកការពិតស៊ីរី រាយការណ៍ថា មនុស្ស ១.៤២៦នាក់ ត្រូវបានសម្លាប់អំឡុងអំពើហិង្សាក្នុងខែមីនា
07/23/2025 12:07 AM
Facebook Telegram Linkin
ជនប៉ាឡេស្ទីននៅទីក្រុងហ្កាហ្សានិយាយថា ពួកគេពុំបានបរិភោគអស់រយៈពេល ៥ថ្ងៃមកហើយ
07/23/2025 12:07 AM
Facebook Telegram Linkin
រដ្ឋមន្ត្រីសុខាភិបាល «អ្នកដឹកនាំសុខាភិបាល ស្ថិតនៅជាប់ជានិច្ចជាមួយមន្រ្តីរបស់ខ្លួន ឈរលើគោលដៅសម្រេចឱ្យបានជោគជ័យក្នុងការបម្រើសេវាជូនប្រជាពលរដ្ឋ និងលើកកិត្តិយសវិជ្ជាជីវៈសុខាភិបាលទាំងមូល»
07/23/2025 12:07 AM
Facebook Telegram Linkin
ផ្សារសមាគមខ្មែរកំពុងស្រូបយកផលិតផលកែច្នៃក្នុងស្រុក គាំទ្រដល់ការរីកចម្រើនរបស់សហគ្រិន
07/22/2025 11:07 PM
Facebook Telegram Linkin
រលកកម្តៅធ្ងន់ធ្ងរនៅតំបន់បាល់កង់ បណ្តាលឲ្យមានភ្លើងឆេះព្រៃនៅប្រទេសប៊ុលហ្គារី និងអាល់បានី
07/22/2025 08:07 PM
Facebook Telegram Linkin
ប្រេសិតពិសេសសហរដ្ឋអាមេរិកជួបជាមួយប្រធានសភាលីបង់នៅទីក្រុងបេរូត
07/22/2025 08:07 PM
Facebook Telegram Linkin
រដ្ឋមន្រ្តីសុខាភិបាល «យុទ្ធសាស្ត្រមួយល្អ លុះត្រាតែយុទ្ធសាស្រ្តនោះត្រូវបានយកទៅអនុវត្តជាក់ស្តែងបាន ដេីម្បីសម្រេចគោលដៅតាមការគ្រោងទុក»
07/22/2025 07:07 PM
Facebook Telegram Linkin
ទូតឥណ្ឌូនេស៊ីកោតសរសើរកម្ពុជា ចំពោះការគ្រប់គ្រងវិស័យព័ត៌មាន និង សោតទស្សន៍
07/22/2025 07:07 PM
Facebook Telegram Linkin
គម្រោង Golden Dome របស់លោក Trump ស្វែងរកជម្រើសជំនួស SpaceX របស់លោក Musk
07/22/2025 07:07 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.