នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
TOP STORY | សម្ដេចតេជោបញ្ជាក់ថា សំឡេងសន្ទនារវាងសម្ដេច និងនាយករដ្ឋមន្រ្តីថៃដែលបែកធ្លាយបានផ្ញើទៅមន្រ្ដីពាក់ព័ន្ធប្រហែល៨០នាក់»
TOP STORY | សម្ដេចតេជោ គាំទ្រការបិទច្រកអន្តរជាតិដូងខេត្តបាត់ដំបង ខណៈថៃប្រើច្រកនេះដឹកទំនិញឆ្លងកាត់ទៅវៀតណាមរាប់រយឡានក្នុងមួយថ្ងៃៗ
ឯកឧត្តមបណ្ឌិត ចាន់ ដារ៉ុង ដឹកនាំក្រុមការងារចុះពិនិត្យវាយតំលៃលើការងារថែទាំផ្លូវចំនួន២ខ្សែ ក្នុងខេត្តពោធិ៍សាត់
ឯកឧត្តម ប៉ែន បូណា៖ ក្នុងស្ថានភាពការប្រឈមមុខរវាងកម្ពុជា-ថៃ ព័ត៌មានក្លែងក្លាយ គឺគ្រោះថ្នាក់ណាស់

នយោបាយ​ និង ការអភិវឌ្ឍន៍

ឯកឧត្តម ហ៊ុន ម៉ានី អញ្ជើញជាអធិបតីក្នុងពិធីអបអរសាទរខួបទី៤៦ ទិវាជ័យជម្នះ លើរបបប្រល័យពូជសាសន៍ ៧មករា នៅខេត្តកំពង់ស្ពឺ

2025/01/07 01:36:45 pm        246
Facebook Telegram Linkin
ឯកឧត្តម ហ៊ុន ម៉ានី ឧបនាយករដ្ឋមន្រ្តី រដ្ឋមន្រ្តីក្រសួងមុខងារសាធារណៈ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ស្ពឺ បានអញ្ជើញជាអធិបតីក្នុងពិធីអបអរសាទរខួបទី ៤៦ ទិវាជ័យជម្នះ លើរបបប្រល័យពូជសាសន៍ ៧មករា នៅបរិវេណវិមានឯករាជ្យខេត្តកំពង់ស្ពឺ ។ មានវត្តមានក្នុងពិធីនោះដែរ រួមមាន ឯកឧត្តម លោកជំទាវជាសមាជិក សមាជិកា ព្រឹទ្ធសភា រដ្ឋសភា ប្រចាំភូមិភាគ និងមណ្ឌលខេត្តកំពង់ស្ពឺ អនុប្រធាន សមាជិក សមាជិកាក្រុមការងាររាជរដ្ឋាភិបាល ថ្នាក់ដឹកនាំខេត្ត មន្ទីរ អង្គភាព និងកងកម្លាំងប្រដាប់អាវុធទូទាំងខេត្ត ព្រមទាំងមហាជនចូលរួមយ៉ាងច្រើនកុះករ ប្រមាណជាង ៥ពាន់នាក់, នាព្រឹកថ្ងៃទី០៧ ខែមករា ឆ្នាំ២០២៥នេះ។ក្នុងអង្គពិធី ឯកឧត្តម ហ៊ុន ម៉ានី បានអានសុន្ទរកថារបស់សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា និងជាប្រធានគណបក្សប្រជាជនកម្ពុជា ប្រកបដោយគតិបណ្ឌិត និងអត្ថន័យយ៉ាងជ្រាលជ្រៅដែលបានរំលឹកនូវវីរភាព និងបេសកកម្មជាប្រវត្តិសាស្រ្តរបស់ថ្នាក់ដឹកនាំ ជាអ្នកស្នេហាជាតិដ៏បរិសុទ្ធនៃគណបក្សប្រជាជនកម្ពុជា ក្នុងការរំដោះជាតិ និងដំណើរស្វែងរកសន្តិភាពប្រកបដោយជោគជ័យ ដោយបានបញ្ចប់បានទាំងស្រុងនូវជម្លោះផ្ទៃក្នុងដ៏រ៉ាំរ៉ៃ។ ជាមួយគ្នានោះដែរ សម្តេចក៏បានធ្វើការគូសបញ្ជាក់សារជាថ្មី នូវការប្តេជ្ញាចិត្តខ្ពស់របស់គណបក្សក្នុងការបន្តថែរក្សា ការពារ សន្តិភាព ដែលជាមូលដ្ឋានគ្រឹះនៃការអភិវឌ្ឍ។ ពិតណាស់ថា ដើម្បីកសាងព្រះរាជាណាចក្រកម្ពុជា ជារដ្ឋជឿនលឿន និងរឹងមាំ មានសេដ្ឋកិច្ចរីកចម្រើនខ្លាំងក្លាក្លាយជា អរិយប្រទេសមួយនោះ យើងត្រូវបន្តធ្វើដំណើរវែងឆ្ងាយទៀត ដែលទាមទារឱ្យមានការប្រឹងប្រែងទ្វេឡើង ប្រកបដោយភាពជឿជាក់ ដើម្បីឱ្យសុបិនរបស់យើងក្លាយជាការពិត គឺ «កម្ពុជា ជាប្រទេសអភិវឌ្ឍន៍ នៅឆ្នាំ២០៥០»។ យើងពិតជាសម្រេចបាននូវគោលដៅនេះ ព្រោះថា ៤៦ឆ្នាំមកនេះ បានសាកល្បងរួចហើយនូវ កម្លាំង ឆន្ទៈ និងសមត្ថភាពរបស់យើង។ នៅត្រង់ចំណុចនេះ សម្តេចតេជោ សូមសង្កត់ធ្ងន់ថា ភាពជាម្ចាស់របស់ប្រជាជន លើជោគវាសនាប្រទេសជាតិ គឺជាកត្តាសម្រេចនូវជ័យជម្នះរបស់ប្រជាជាតិយើង។សូមបញ្ជាក់ផងដែរថា ជារៀងរាល់ឆ្នាំខេត្តកំពង់ស្ពឺ តែងតែប្រារព្ធពិធីអបអរសាទរនេះយ៉ាងអធិកអធម ជាមួយនឹងការចូលរួមពីមហាជនរួមមាន មន្ត្រីរាជការ គ្រូបង្រៀន សិស្សានុសិស្ស អាជីវករជុំវិញខេត្ត ដើម្បីរំលឹកដល់វីរភាពនៃយុទ្ធជនអង់អាចក្លាហាន ដែលបានជួយសង្គ្រោះប្រជាជនចេញពីជ្រោះមរណៈ និងបានចាត់ទុក៧មករា ជាថ្ងៃកំណើតទី២របស់ខ្លួន៕ អត្ថបទ រដ្ឋា

អបអរថ្ងៃ៧មករា ក្រុមយុវជនរៀនជំនាញវិជ្ជាជីវៈ ដឹងគុណដល់រាជរដ្ឋាភិបាល និងអរគុណសន្តិភាព

2025/01/07 01:16:52 pm        122
Facebook Telegram Linkin
ស្របពេលដែលថ្ងៃនេះ គឺជាគម្រប់ខួប៤៦ឆ្នាំនៃថ្ងៃជ័យជម្នះ ៧មករា ដែលគណបក្សប្រជាជនកម្ពុជាតែងតែប្រារព្ធពិធីរំលឹកខួប។ ក្រុមយុវជនដែលជាគ្រូបណ្តុះបណ្តាលផង និងជានិស្សិតកំពុងសិក្សាក្នុងវិស័យអប់រំបណ្តុះបណ្តាលជំនាញបច្ចេកទេស និងវិជ្ជាជីវៈ (TVET) បានសម្តែងការដឹងគុណ និងបានអរគុណសន្តិភាពដូចគ្នាផងដែរ ដែលនាំឲ្យកើតឡើងនូវសមិទ្ធផលថ្មីៗជាច្រើនរហូតមកដល់សព្វថ្ងៃនេះ។លោក ថង ស៊ីថាច យុវជនមកពីសហភាពសហព័ន្ធយុវជនកម្ពុជា និងជាគ្រូអប់រំបណ្តុះបណ្តាលជំនាញបច្ចេកទេស និងវិជ្ជាជីវៈ នៃវិទ្យាស្ថានបច្ចេកទេសឧស្សាហកម្ម (ITI) បានឲ្យព័ត៌មាន ប៊ីធីវី ដឹងថា ទោះបីជាកើតមិនទាន់ និងមិនបានឆ្លងកាត់រឿងរ៉ាវជាក់ស្តែង ប៉ុន្តែអ្វីដែលលោកបានដឹង គឺតាមរយៈជីដូនជីតា និងឪពុកម្តាយ និងតាមឯកសារផ្សេងៗ ដែលចាត់ទុកថា ថ្ងៃរំដោះ ៧មករា ជាថ្ងៃចងចាំមិនអាចបំភ្លេចបានសម្រាប់មនុស្សគ្រប់ជំនាន់ពីអំពើឃោរឃៅ និងសោកនាដកម្ម ដែលបានកើតឡើងចំពោះប្រទេសជាតិ និងប្រជាជនទាំងមូលក្នុងរបបប្រល័យពូជសាសន៍នេះ។ជាមួយគ្នានេះ ក្រុមនិស្សិត នៃវិទ្យាស្ថានបច្ចេកទេសឧស្សាហកម្ម បានលើកឡើងស្រដៀងគ្នាថា កាពិត បើគ្មានថ្ងៃ៧មករា ក្រុមយុវជនជំនាន់ក្រោយក្នុងពេលបច្ចុប្បន្ននេះ ក៏គ្មានគ្រប់យ៉ាងដូចសព្វថ្ងៃនេះដែរ ទាំងការសិក្សាក្រេបយកចំណេះដឹង គ្មានសិទ្ធិទាំងការរស់នៅ ទាំងការហូបចុកជាដើម ដូច្នេះហើយ មានតែការអរគុណសន្តិភាព និងសង្ឃឹមថា ក្រោមការដឹកនាំដ៏ឈ្លាសវៃរបស់គណបក្សប្រជាជនកម្ពុជា នឹងធ្វើឲ្យប្រទេសកម្ពុជាបន្តការអភិវឌ្ឍន៍រីកចម្រើនបន្ថែមទៀត និងរស់នៅក្រោមម្លប់សន្តិភាពគ្រប់ៗគ្នា។ បន្ទាប់ពីថ្ងៃជ័យជម្នះ ៧មករា គណបក្សប្រជាជនកម្ពុជា បានដឹកនាំសាធារណរដ្ឋប្រជាមានិតកម្ពុជាឆ្លងកាត់ឧបសគ្គយ់ាងច្រើនឥតគណនា ដើម្បីទប់ស្កាត់ការប៉ុនប៉ងវិលត្រឡប់នៃរបប ប៉ុល ពត ការពារការរស់ឡើងវិញរបស់ប្រជាជន និងស្តារ កសាងមាតុភូមិឡើងវិញពីបាតដៃទទេ ក្នុងស្ថានភាពមានសន្តិភាពផង និងសង្រ្គាមផង។ ដូច្នេះហើយបានជាប្រជាជនកម្ពុជាបានចងចាំជានិច្ចថា ថ្ងៃជ័យជំនះ ៧មករា ឆ្នាំ១៩៧៩ ជាថ្ងៃកំណើតទី២របស់ខ្លួន «បើគ្មានថ្ងៃនេះទេគឺគ្មានអ្វីៗសព្វបែបយ៉ាងដូចថ្ងៃនេះដែរ»៕ អត្ថបទ ឈិត បូរ៉ាវី

អបអរ៧មករា សមាគមស្វាយចន្ទីកម្ពុជា អរគុណសន្តិភាពនាំឱ្យវិស័យឯកជនមានសុវត្ថិភាពប្រកបអាជីវកម្ម

2025/01/07 01:08:48 pm        163
Facebook Telegram Linkin
ភ្នំពេញ៖ បើទោះបីជា ៧មករា ១៩៧៩ បានកន្លងផុតជាយូរឆ្នាំក៏ដោយ ប្រជាពលរដ្ឋ​ខ្មែរ​នៅ​តែ​ចង​ចាំ​នូវ​អតីតកាលដ៏ជូចត់គ្រប់រូបភាព។ ទន្ទឹមនេះ ក្រុមសមាជិក នៃសមាគមស្វាយចន្ទីកម្ពុជា ក៏​បានចូលរួមអបអរសាទរ ខួបទី៤៦ នៃទិវាជ័យជម្នះ ៧មករា និង​បង្ហាញ​ការ​អរគុណ​ថ្នាក់ដឹកនាំ​គ្រប់​ជាន់​ថ្នាក់​របស់គណបក្សប្រជាជនកម្ពុជា ដែលដឹកនាំប្រទេស​ជាតិ​មាន​សុខសន្តិភាព​រហូត​មក​ដល់​សព្វ​ថ្ងៃនេះ។លោក ស៊ុយ កុកធាន តំណាងឱ្យសមាជិក សមាជិកា សមាគមស្វាយចន្ទីកម្ពុជា ក្នុងឱកាស​ចូល​រួម​អបអរសាទរ ខួបទី៤៦ នៃទិវាជ័យជម្នះ ៧មករា នៅខេត្តកំពង់ចាម បានលើកឡើងថា ៧មករា គឺជាសន្តិភាព ៧មករា នាំមកនូវសុខសន្តិភាព ដែលធ្វើឲ្យ​វិស័យ​ឯក​ទាំង​មូល​អាចរកស៊ី​ទទួល​ទាន​ដោយ​មិន​មានការភ័យខ្លាច ដោយមិនមានហានិភ័យ ខណៈនៅក្រៅប្រទេស​មួយ​ចំនួន​បាន​កំពុង​ជួប​បញ្ហា​ប្រឈមសង្រ្គាម ដូចជាសង្រ្គាមរួមរឹតនៅប៉ែកមជ្ឈឹមបូព៌ា និងនៅប្រទេសអ៊ុយក្រែន។ល។ និង​នៅក្នុងអាស៊ានក៏ដូចគ្នាដែរ។ លោកបានបន្តថា ក្រៅពីនេះ នៅប្រទេសមួយចំនួនផ្សេងៗទៀត ក៏​មិនទាន់មានសុខសន្តិភាពផងដែរ ខណៈនៅប្រទេសកម្ពុជាយើង គឺពោពេញ​ទៅ​ដោយ​សុវត្ថិភាព សន្តិភាព ដែលធ្វើឲ្យវិស័យឯកជនអាចរកស៊ីទទួលទានមានសុវត្ថិភាព និងមាន​អំណរ​គ្រប់​បែប​យ៉ាងទាំងអស់ នេះគឺជាគុណបំណាច់នៃថ្ងៃ៧មករា។សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា និង​ជា​ប្រធាន​គណបក្សប្រជាជនកម្ពុជា នៅក្នុងពិធីមិទ្ទីញរំឭកខួបលើកទី៤៦ នៃទិវាជ័យជម្នះ៧មករា នា​ព្រឹកថ្ងៃទី៧ ខែមករា ឆ្នាំ២០២៥នេះ បានថ្លែងបញ្ជាក់ថា បន្ទាប់ពីជ័យជម្នះ ថ្ងៃ៧មករា ឆ្នាំ​១៩៧៩ គណបក្សប្រជាជនកម្ពុជា បានសាមគ្គីប្រជាជាតិទាំងមូល ដឹកនាំ​ប្រទេស​ឆ្លង​កាត់​ឧបសគ្គ និងការលំបាករាប់ម៉ឺនសែនជំពូក សម្រេចបានជោគជ័យយ៉ាងធំធេងក្នុងបុព្វហេតុស្តារ កសាង និងការពារមាតុភូមិ ព្រមទាំងការស្វែងរកសន្តិភាព និងការផ្សះផ្សាជាតិ ធ្វើឱ្យ​ប្រទេស​ជាតិបានចាកផុតពីស្ថានភាពដែលត្រូវបំផ្លាញខ្ទេចខ្ទី និងសង្គ្រាមដ៏រ៉ាំរ៉ៃ ឈានមក​ដល់​ដំណាក់​កាល​អភិវឌ្ឍន៍លើគ្រប់វិស័យក្រោមម្លប់នៃសន្តិភាពប្រកបដោយមោទនភាពជាទីបំផុត៕ អត្ថបទ៖ ឈិត បូរ៉ាវី

៧មករា ជាជីវិតទី២ដែលជួយគ្រួសារខ្មែរ និងប្រទេសជាតិទាំងមូលឱ្យតាំងនៅដល់សព្វថ្ងៃ

2025/01/06 04:27:58 pm        222
Facebook Telegram Linkin
ប្រជាពលរដ្ឋដែលបាន​ឆ្លង​កាត់​ទុក្ខ​លំបាក​ក្នុងរបបខ្មៅ​ប្រល័យពូជសាសន៍ខ្មែរក្រហម ​​ចងចាំ​មិន​ភ្លេច​នូវ​គុណ​បំណាច់​កាត់​ថ្លៃ​មិ​នបានគឺថ្ងៃ៧មករា បានផ្តល់នូវជីវិតទី២ ជួយដល់គ្រួសារខ្មែរ និង​ប្រទេស​ជាតិ​ទាំង​មូល​ឱ្យ​ចាក​​ផុត​ពីការរងទុក្ខលំបាកគ្រប់យ៉ាងកាល​ពី ៤៦ឆ្នាំមុន។ស្រមោលអន្ធការ ដែលគ្របដណ្តប់លើប្រទេសកម្ពុជា ក្នុងសម័យ​កម្ពុជា​ប្រជាធិបតេយ្យ​ចន្លោះ​ឆ្នាំ​១៩៧៥ ដល់១៩៧៩ មុនថ្ងៃរំដោះ៧មករា ប្រជាជនកម្ពុជា​មាន​តែ​ការ​បង្ខំ​ឱ្យ​ធ្វើ​ការងារ​ហួស​កម្លាំង​ គ្មានសិទ្ធ សេរីភាព គ្មានវត្តអារាម សលារៀន មន្ទីរពេទ្យ គ្មានទីផ្សារ ពាណិជ្ជកម្ម​អ្វី​ទាំង​អស់​​។ លោក តិច សាង ប្រជាពលរដ្ឋនៅរាជធានីភ្នំពេញដែលបាន​ឆ្លង​កាត់​ទុក្ខ​លំបាក​ទាំង​នោះ​បាន​លើកឡើងថា ក្រោយ​ពី៧មករា​មក​​នឹង​ហើយ​ជា​ជីវិត​ទី​២​របស់​យើង បើគ្មាន​៧មករា​ក៏គ្មាន​ជីវិត​ទី២​ដែរ ហើយអ្វីដែលមិនអាចភ្លេច​បានគឺរឿងបិទសិទ្ធិ សេរីភាពប្រជាពលរដ្ឋ ឱ្យប្រជា​ពលរដ្ឋ​ធ្វើ​ស្រែ ធ្វើ​ចម្ការ ធ្វើពលកម្ម ក៏ប៉ុន្តែមិនឱ្យហូបគ្រប់គ្រាន់ បើ​ប្រជាពលរដ្ឋ​ហ៊ាន​និយាយ​អី​ពាក់​ព័ន្ធ​តិច​តួច​​យក​ប្រជាពលរដ្ឋទៅសម្លាប់ចោល»។ ចំណែកលោក អ៊ែល សារឿន ក៏បានបញ្ជាក់ផងដែរថា «វាដឹងថាយើងហ្នឹងជាអ្នក​ធ្វើការ​ជា​ទាហាន ឬមួយគ្រូបង្រៀនអី វាដឹងវាយកទៅវាយចោលទាំងយប់ ហើយ​វា​មិន​មែន​ថា​យក​ទៅ​វាយ​ទេ ថាបញ្ជូនទៅលើតែតាមពិតយកទៅវាយចោល»។ លោកបានលើកឡើងផងដែរថា «អរគុណ​ដល់​រាជ​រដ្ឋាភិបាល​ដែល​បាន​រំដោះយើ​ង​ឱ្យ​រួច​ផុត ហើយឱ្យកូនចៅយើងបានរៀនបានសូត្រ សប្បាយកូន សប្បាយ​ព្រោះ​បានរួចខ្លួនពីរបបដែលឱ្យយើងស៊ីបាយ១វែកនោះ»។ទុក្ខលំបាកវេទនាទាំងអស់ត្រូវបានរលាយបាត់ខ្ចាត់ខ្ចាយអស់ និង​ផ្តល់​មក​វិញនូ​វ​ស្នាមញញឹម សប្បាយ​រីករាយ ការជួបជុំសាច់ញាតិ ហ៊ោកញ្ជ្រៀវ ខ្ញៀវខ្ញារសាទរ​ចំពោះ​ថ្ងៃ​រំដោះ​៧មករា ឆ្នាំ​១៩៧៩ ដែលជាការខិតខំរបស់រណសិរ្សសាមគ្គី សង្រ្គោះជាតិកម្ពុជា ដឹកនាំ​ដោយ​សម្តេចតេជោ ហ៊ុន សែន ដែលបច្ចុប្បន្នមានឈ្មោះថា រណសិរ្សសាមគ្គី អភិវឌ្ឍន៍​មាតុភូមិ​កម្ពុជា។លោកបណ្ឌិត យង់ ពៅ អ្នកជំនាញវិទ្យាសាស្ត្រនយោបាយ នៃរាជបណ្ឌិត្យសភាកម្ពុជា អះអាងថា ៧មករា ជាសច្ចភាពប្រវត្តិសាស្ត្រមិនអាចប្រកែកបាន និងជាមេរៀន ដែល​ពលរដ្ឋ​ខ្មែរ​គ្រប់​រូប​ត្រូវ​ចងចាំ សរសេរទុក និងផ្សព្វផ្សាយបន្តគ្រប់ជំនាន់ ព្រោះបើគ្មាន៧មករាទេ កម្ពុជាគ្មាន​នៅ​ក្នុងផែ​នទី​ពិភព​លោកដល់សព្វថ្ងៃនេះទេ។លោកបណ្ឌិត យង់ ពៅ បន្តថា «ប្រសិនបើអត់បានមានថ្ងៃ៧មករាហ្នឹងទេ អាចអស់​ប្រទេស​កម្ពុជា ហើយមិនបាច់និយាយអំពីសន្តិភាព មិនបាច់និយាយអំពីសិទ្ធិប្រជាធិបតេយ្យ សិទ្ធិ​មនុស្ស ឬ​ក៏អ្វី​ផ្សេង​ទៀត​គ្មាន​ទេ។ កាល​ណាអ​ត់​មាន​ការ​រំដោះ​ហ្នឹង​មក​គឺ​ថា​មាន​មនុស្ស​ឯណាម​ក​រស់​នៅ​ទាម​ទារ​រកសន្តិភាព»។ជាការពិត បើគ្មានមហាជ័យជម្នះ ៧មករា ១៩៧៩ បានបពា្ចប់នូវសម័យកាលដ៏ខ្មៅងងឹតបំផុត ពុំធ្លាប់មានក្នុងប្រវត្ដិសាស្ដ្រកម្ពុជាទេនោះ ទំព័រសករាជថ្មី ដែលធ្វើឱ្យ​ប្រជាជ​ន​កម្ពុជា​បាន​ទទួល​មក​វិញ នូវសិទ្ធិសេរីភាពពេញលេញ និងឱកាសដើម្បីស្ដារ កសាង និងអភិវឌ្ឍន៍​មាតុភូមិ​របស់​ខ្លួន​ឡើង​វិញ​ក៏គ្មានដែរ ពោលគឺ បើគ្មានជ័យជម្នះ ៧មករា ទេនោះ ក៏គ្មានជីវិតទី២របស់ប្រជាជន និង​គ្មាន​អ្វីៗដូចថ្ងៃនេះដែរ៕

គណបក្សនយោបាយក្រៅរដ្ឋាភិបាល អំពាវនាវឱ្យយុវជន និងប្រជាពលរដ្ឋបន្តចងចាំ និងដឹងគុណ​ថ្ងៃជ័យជម្នះ ៧មករា

2025/01/06 02:56:05 pm        214
Facebook Telegram Linkin
គណបក្សនយោបាយក្រៅរដ្ឋាភិបាល បានអំពាវនាវឱ្យយុវជន និងប្រជាពលរដ្ឋ​កម្ពុជា​បន្ត​ចង​ចាំ​ថ្ងៃ​ជ័យ​ជម្នះ​៧មករាឆ្នាំ ១៩៧៩ ដោយពួកគេចាត់ទុកថា ជាថ្ងៃកំណើតទី២របស់ប្រជាជនខ្មែរ បន្ទាប់​ពី​រំដោះប្រទេសចេញពីរបបប្រល័យពូជសាសន៍ប៉ុល ពតដ៏ឃោរឃៅរយៈពេល ៣ឆ្នាំ ៨ខែ និង ២០ថ្ងៃ ដែលនាំមកនូវការរស់រានមានជីវិត សេរីភាព សុខដុមរមនា និង​សន្តិភាព​សម្រាប់​ប្រជាជាតិ​ទាំងមូល។នៅថ្ងៃទី០៧ ខែមករា ឆ្នាំ២០២៥នេះ គឺជាខួបលើកទី៤៦ ខណៈប្រជាពលរដ្ឋខ្មែរ​នៅ​តែ​ចង​ចាំ​ជាប់​ជានិច្ច និងចារិកទុកក្នុងដួងចិត្តមិនអាចបំភ្លេចបាន សូម្បីតែយុវជន​ជំនាន់​ក្រោយ​ក៏​ទទួល​ស្គាល់ ​និងផ្តល់តម្លៃជានិរន្តរចំពោះថ្ងៃ ៧មករានេះផងដែរ។លោក អ៊ុន វិសិទ្ធគុន ប្រធានគណបក្សកម្លាំង​ប្រជាធិបតេយ្យ​បាន​ថ្លែងថា «៧ មករា ឆ្នាំ១៩៧៩ គឺ​ជា​ថ្ងៃកំណើតទីពីររបស់ប្រជាពលរដ្ឋកម្ពុជា ហើយប្រសិនបើគ្មាន ៧មករា គឺយើង​ក៏​គ្មាន​ឱកាស​មក​អង្អុយ​និយាយគ្នានាពេលដែរ ហើយប្រទេសជាតិយើង ក៏មិនដឹងជាមាន​ស្ថានភាព​យ៉ាង​ណាដែ​រ ប្រសិនបើមិនមានការលះបង់សាច់ស្រស់ ឈាមស្រស់របស់សម្ដេចតេជោ ហ៊ុន សែន។ នេះ​ហើយជាគុណបំណាច់របស់សម្ដេចតេជោ ទាំងខ្ញុំ និងយុវជនផ្សេងៗទៀត សូម​កុំភ្លេច​ថ្ងៃ​កំណើត​ទីពីររបស់យើង»។វាជាថ្ងៃជោគជ័យដែលជំនាន់មុនបានរួបរួមគ្នារំដោះប្រជាជនកម្ពុជាពីរបបប្រល័យពូជសាសន៍ប៉ុល ពត ដែលនាំមកនូវ ការរស់រានមានជីវិត សេរីភាព និងភាពសុខដុមរមនា។ ក្នុង​នាម​លោក​ជា​យុវជន​ជំនាន់​ក្រោយបានអំពាវនាវឱ្យយុវជនខ្មែរទាំងអស់ត្រូវតែចងចាំ និងប្ដេជ្ញាការពារឱ្យ​បាន​ដាច់​ខាត​នូវ​ភាពសុខដុមរមនា បូរណភាពទឹកដី និងអធិបតេយ្យភាពជាតិនេះបន្តទៅថ្ងៃអនាគត។ចំណែក​លោក គុជ លី ប្រធានគណបក្សខ្មែរតែមួយបានថ្លែងថា «យើងកុំភ្លេចថ្ងៃ ៧មករា ហើយ​ត្រូវតែ​រួបរួមគ្នាក្នុងការការពារសន្ដិភាពឱ្យខានតែបាន ដើម្បីស្វែងរកឱ​កាស​បន្ថែម​ក្នុង​ការ​អភិវឌ្ឍ​ប្រទេស​ទៅ​តាម​គោលនយោបាយរបស់យើង។ ជាពិសេស គឺអនុវត្តយុទ្ធសាស្ត្របញ្ចកោណ-ដំណាក់​កាល​ទី១ ដើម្បីក្លាយជាប្រទេសមានចំណូលខ្ពស់នៅឆ្នាំ២០៥០ខាងមុខ»។«ខ្ញុំចង់ឱ្យ​មាន​ការចូលរួមឱ្យបានផុលផុសពីប្រជាពលរដ្ឋជាមួយរដ្ឋាភិបាល មានន័យថា ពលរដ្ឋ​យើង​​កុំរវល់ជាមួយយុទ្ធសាស្រ្តផ្ការីករបស់សម រង្ស៊ី ឬសកម្មភាពបដិវត្តពណ៌ផ្សេងៗទៀត ហើយ​ងាក​មក​រួមដៃជាមួយរដ្ឋាភិបាល អភិវឌ្ឍប្រទេសជាតិយើងវិញឱ្យបានជឿនលឿនទៅមុខ ហើយ​ដើរ​ទាន់​ប្រទេសផ្សេងៗនៅលើពិភពលោក»។លោកបន្តថា របបប្រល័យពូជសាសន៍ប៉ុល ពត ត្រូវបានផ្តួលរំលំរយៈពេល ៤៦ឆ្នាំមកហើយ ដែល​ប្រទេស​មាន​សុខសន្តិភាពពេញលេញ ប៉ុន្ដែក្មេងៗជំនាន់​ក្រោយ​មួយ​ចំនួ​ន​ហាក់​មិន​ជឿ​ទាំង​ស្រុង​ថា កម្ពុជាធ្លាប់ឆ្លងកាត់សម័យកាលនោះទេ។ ដូច្នេះលោកបានផ្តាំដល់យុវជនជំនាន់ក្រោយថា ថ្ងៃ៧ មករា ជាថៃ្ងប្រវត្តិសាស្ត្រ និង​ជា​បុណ្យ​ជាតិ​ដ៏​សំខាន់​ដែលជនរួមជាតិគ្រប់រូបធ្វើការរំលឹកដល់គុណបំណាច់របស់យុទ្ធជន យុទ្ធនារី ដែលបាន​ពលី​ជីវិត ដើម្បីរំដោះប្រទេសជាតិ និងប្រជាជនចេញពីរបបប្រល័យពូជសាសន៍ និងនាំមក​នូវ​សុខ​សន្តិភាព​ដូច​បច្ចុប្បន្ន។ ក្នុងន័យនេះ យុវជនត្រូវចងចាំគុណបំណាច់នៃថ្ងៃ៧មករា ហើយចូលរួម​ថែ​រក្សា​សុខសន្តិភាពឱ្យបានគង់វង្ស ដើម្បីបន្តការអភិវឌ្ឍប្រទេសឱ្យកាន់តែរីកចម្រើន។ពិធីអបអរសាទរថ្ងៃជ័យជម្នះ ៧ មករា ត្រូវបានប្រារព្ធ​ធ្វើ​ឡើង​យ៉ាង​កង​រំពង​ជា​រៀង​រាល់​ឆ្នាំ​ក្នុ​ង​រយៈ​ពេល ៤៦ឆ្នាំកន្លងមកនេះ។ គណបក្សប្រជាជនកម្ពុជា ក៏ដូចជាប្រជាពលរដ្ឋ​កម្ពុជា​ស្ទើរ​ទូទាំង​ប្រទេស​បាន​ចាត់ទុកថ្ងៃ ៧ មករា ឆ្នាំ១៩៧៩ ជាថ្ងៃជ័យជម្នះជាប្រវត្តិសាស្រ្តរបស់ប្រជាជនកម្ពុជា ដែល​បានវាយផ្តួលរំលំរបបប្រល័យពូជសាសន៍ ប៉ុល ពត បញ្ច​ប់សម័យ​កាល​ដ៏​ខ្មៅ​ងងឹត​បំផុត​នៅ​កម្ពុជា ដែលបានកាប់សម្លាប់ និងធ្វើឱ្យប្រជាពលរដ្ឋខ្មែរស្លាប់ជិត ៣លាននាក់។ ៧ មករា ១៩៧៩ គឺជាបើកឡើងវិញនូវទំព័រសករាជថ្មី គឺឯករាជ្យ សេរីភាព ប្រជាធិបតេយ្យ និងវឌ្ឍនភាព​សង្គម​ជាតិ​។ប្រមុខគណបក្សប្រជាជនកម្ពុជា សម្តេចតេជោ ហ៊ុន សែន ជាបុរសម្នាក់​ដ៏​សំខាន់​ក្នុង​ចំណោម​យុទ្ធជន យុទ្ធនារីផ្សេងទៀតដែលបានពលីកម្មសព្វបែបយ៉ាង ដើម្បីជាតិមាតុភូមិកម្ពុជា ហើយ​សម្ដេច​តេជោតែងបានគូសបញ្ជាក់ថា ការប្រារព្ធពិធីអបអរសាទរថ្ងៃជ័យជម្នះ ៧ មករា ក៏ជា​ការ​បង្ហាញ​នូវ​ស្មារតីចងចាំជានិច្ចនូវគុណូបការៈដ៏ឧត្តង្គឧត្តមរបស់វីរកម្មាភិបាល យុទ្ធជន យុទ្ធនារី នៃ​រណសិរ្សសាមគ្គីសង្រ្គោះជាតិកម្ពុជាដែលបានធ្វើការលះបង់យ៉ាងធំធេងក្នុងការប្រយុទ្ធ ដើម្បី​ផ្តួល​រំលំ​រប​បប្រល័យពូជសាសន៍ ប៉ុល ពត និងការពារការរស់ឡើងវិញរបស់កម្ពុជា។ក្រុមយុវជនបានបង្ហាញចំណាប់អារម្មណ៍របស់ពួកគេថា ការប្រារព្ធទិវាជ័យជម្នះ ៧ មករា គឺ​ជា​រឿង​ល្អ​មួយសម្រាប់ក្រើនរំលឹកដល់យុវជនឱ្យបានដឹងអំពីប្រវត្តិឈឺចាប់ និងឃោរឃៅក្នុងរបប ប៉ុល ពត ហើយក៏ជាការក្រើនរំលឹកដល់យុវជនឱ្យស្រឡាញ់នូវសន្តិភាព និងត្រូវចេះរួបរួម​សាមគ្គីគ្នា​អភិវឌ្ឍន៍ប្រទេសជាតិកុំឱ្យធ្លាក់ចូលក្នុងសភាពអន្តរាយដូចរបប ប៉ុល ពត បន្ត​ទៅ​ទៀត​៕

ឯកឧត្តម កែប ជុតិមា៖ សម្តេចមហាបវរធិបតី ហ៊ុន ម៉ាណែត ប្តេជ្ញាដោយឆន្ទៈមោះមុត និងផែនការច្បាស់លាស់ កសាងផ្លូវក្រវាត់ព្រំដែនឲ្យបានរួចរាល់ចប់សព្វគ្រប់

2025/01/06 12:36:22 pm        243
Facebook Telegram Linkin
មណ្ឌលគិរី៖ គណៈកម្មការមហាផ្ទៃ ការពារជាតិ មុខងារសាធារណៈ និងកិច្ចការព្រំដែន ដឹកនាំដោយឯកឧត្តម កែប ជុតិមា ប្រធានគណៈកម្មការ នៅព្រឹកថ្ងៃទី៥ ខែមករា ឆ្នាំ២០២៥ បានដឹកនាំប្រតិភូអញ្ជើញចុះសំណេះសំណាល សួរសុខទុក្ខ និងចែកអំណោយរបស់សម្តេចមហារដ្ឋសភាធិការបតី ឃួន សុដារី ប្រធានរដ្ឋសភា ជូនកងកម្លាំងវិស្វកម្មនៃកងយោធពលខេមរភូមិន្ទ ដែលកំពុងឈរជើងកសាងស្ថាបនាផ្លូវតាមក្រវាត់ព្រំដែនកម្ពុជា-វៀតណាមក្នុងភូមិសាស្រ្តស្រុក ពេជ្រាដា ច្រកព្រំដែនទ្វេភាគីណាមលៀខេត្តមណ្ឌលគិរី ។ ការអញ្ជើញចុះសំណេះសំណាលសួរសុខទុក្ខកងកម្លាំងវិស្វកម្មរបស់គណៈកម្មការទី៤នេះបន្ទាប់ពីដំណើរសួរសុខទុក្ខកងកម្លាំងវិស្វកម្មនិងពិនិត្យព្រំដែននៅខេត្តរតនគិរីកាលពីថ្ងៃទី៤ខែមករាឆ្នាំ២០២៥។ វត្តមានរបស់គណៈកម្មការទី៤រដ្ឋសភានៅច្រកព្រំដែនមណ្ឌលគិរីនិងប្រទេសវៀតណាមនេះក៏ដូចជានៅព្រំដែនរតនគិរី-វៀតណាម​ដែរ គឺ ក្នុងគោលបំណងសួរសុខទុក្ខកងកម្លាំងវិស្វកម្មដែលកំពុងឈរជើងកសាងស្ថាបនាផ្លូវតាមក្រវាត់ព្រំដែនកម្ពុជា-វៀតណាមក្នុងភូមិសាស្រ្ត ស្រុកពេជ្រាដា ខេត្តមណ្ឌលគិរី ព្រមទាំងពិនិត្យស្ថានភាពបង្គោលព្រំដែន និងវឌ្ឍនភាពព្រំដែនក៏ដូចជាស្ថានភាពរស់នៅរបស់ប្រជាពលរដ្ឋ។ ថ្លែងក្នុងពិធីសំណេះសំណាល ឯកឧត្តម កែប ជុតិមា បានមានប្រសាសន៍លើកឡើងថា៖«សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី បានប្តេជ្ញាដោយឆន្ទៈមោះមុតនិងផែនការច្បាស់លាស់ដើម្បីកសាងផ្លូវក្រវាត់ព្រំដែនឲ្យបានរួចរាល់ចប់សព្វគ្រប់»។ ឯកឧត្តមប្រធានគណៈកម្មការទី៤ បានបញ្ជាក់ថា៖ រដ្ឋាភិបាលកម្ពុជា បានប្តេជ្ញាចិត្តយ៉ាងច្បាស់ក្នុងការបញ្ចប់ការកសាងផ្លូវក្រវាត់ព្រំដែនដែលជាគម្រោងហេដ្ឋារចនាសម្ព័ន្ធយុទ្ធសាស្ត្រដ៏មានសារៈសំខាន់ក្នុងគោលបំណងពង្រឹងបូរណភាពទឹកដី និងជំរុញការអភិ​វឌ្ឍ​ន៍ក្នុងតំបន់។គំនិតផ្តួចផ្តើមមូលនិធិកសាងហេដ្ឋារចនាសម្ព័ន្ធតាមព្រំដែននេះបានឆ្លុះបញ្ចាំងពីការយកចិត្តទុកដាក់របស់រដ្ឋាភិបាល​ក្នុងការការពារ អធិបតេយ្យភាពជាតិនិងបង្កើតឱកាសសម្រាប់ធ្វើឲ្យមានកំណើនសេដ្ឋកិច្ចនៅក្នុងតំបន់ព្រំដែនដាច់ស្រយាល។ ឯកឧត្តមកែប ជុតិមា បានគូសបញ្ជាក់ថា៖« ផ្លូវក្រវាត់ព្រំដែន គឺជារបងការពារដ៏សំខាន់មួយទៀតសម្រាប់ បូរណភាពទឹកដី អធិប​តេយ្យ​ជាតិកម្ពុជា ។ ច្បាស់ណាស់ថា ពេលណាមានផ្លូវ ទីនេះប្រាកដជាមានការអភិវឌ្ឍ ប្រជាពលរដ្ឋអាចទៅតាំងទីលំនៅដ្ឋាននៅទីនេះ ដែលនឹងមានហេដ្ឋារចនាសម្ព័ន្ធផ្សេងៗទៀត ដូចជា សាលារៀន មន្ទីរពេទ្យ មណ្ឌលសុខភាព ផ្សារ ដែលក្លាយជាតំបន់អភិវឌ្ឍន៍ ពីព្រោះគោលដៅរបស់រាជរដ្ឋាភិបាល គឺកសាងខ្សែបន្ទាត់ព្រំដែនឲ្យទៅជាព្រំដែន សន្ដិភាព មិត្ដភាព សហប្រតិបត្ដិការ និងការអភិវឌ្ឍ»។ឯកឧត្តមប្រធានគណៈកម្មការ បានលើកទឹកចិត្តដល់ប្រជាពលរដ្ឋមកមើលតំបន់ព្រំដែនដើម្បីលើកទឹកចិត្តកងកម្លាំងវិស្វកម្ម និងមកស្វែងយល់ជាក់ស្តែងពីស្ថានភាពព្រំដែន និងការស្ថាបនាផ្លូវក្រវាត់ព្រំដែន ជាពិសេសលើកទឹកចិត្តឱ្យប្រជាពលរដ្ឋមករស់នៅតំបន់ព្រំដែននេះ ព្រោះប្រជាពលរដ្ឋជាជញ្ជាំងការពារព្រំដែនដ៏រឹងមាំ។ ទាក់ទងនឹងស្ថានភាពភូមិសាស្ត្រ លោក វណ្ណា ម៉ាប់ អភិបាលស្រុកពេជ្រាដា បានមានប្រសាសន៍ថា៖ស្រុកពេជ្រាដា ជាស្រុកមួយក្នុងចំណោមស្រុកទាំង៤ និងក្រុង១ មានចម្ងាយផ្លូវ ៤០គីឡូម៉ែត្រពី ទីរួមខេត្តមណ្ឌលគិរី ជាតំបន់ខ្ពង់រាបសម្បូរទៅដោយព្រៃឈើ សត្វព្រៃ រ៉ែក្នុងដីមានដូចជា៖ រ៉ែមាស ត្បូង លោហៈបុកស៊ីត..។ល។ និងជាតំបន់ទេសចរណ៍ធម្មជាតិដ៏មានសក្តានុពលជាច្រើនកន្លែងពិសេសរមណីយដ្ឋាន ទឹកជ្រោះប៊ូស្រា, ភ្នំណាមលៀរ,ទឹកជ្រោះអូផ្លាយ, ទឹកជ្រោះអូរតាំកន, ភ្នំលុប្រាណ,ភ្នំមូសរលូងជាដើម។ ស្រុក ពេជ្រាដាមានផ្ទៃដីសរុប ៣,៨១៩គីឡូម៉ែត្រការ៉េ ។ខាងកើត មានព្រំប្រទល់ជាប់នឹងស្រុកដាក់មីល, ដាក់សុង, គីយ៉ូត ខេត្តដាក់ណុង និងស្រុកបួនដូន ខេត្តដាក់ឡាក់ នៃសាធារណរដ្ឋសង្គមនិយមវៀតណាម។ខាងលិច ជាប់នឹង ស្រុកអូរគ្រៀងសែនជ័យ ខេត្តក្រចេះ ខាងជើង ជាប់នឹង ស្រុកកោះញែក ខាងត្បូងជាប់នឹងស្រុកអូររាំង ស្រុកកែវសីមា និងក្រុងសែនមនោរម្យ។ លោកអភិបាលស្រុកបានឱ្យដឹងថា៖ស្រុកពេជ្រាដា មានព្រំប្រទល់ជាប់ជាមួយប្រទេសវៀតណាម ប្រវែង១១០គីឡូម៉ែត្រ និងមានបង្គោល ព្រំដែនសរុបទាំងអស់ ចំនួន ៥០បង្គោល។ច្រកទ្វារព្រំដែនទ្វេរភាគីណាមលៀរ មានប្រវែង ២៧គីឡូម៉ែត្រ ពីទីរួមស្រុកពេជ្រាដា និងមានប្រវែង ៦៧ គីឡូម៉ែត្រ ពីទីរួមខេត្តមណ្ឌលគិរី។ ស្រុកពេជ្រាដាមាន ៤ឃុំ ស្មើនឹង១៨ភូមិ មានប្រជាជនរស់នៅសរុប៥,៧៥១គ្រួសារ ស្មើនឹង ២២,០៧២នាក់ ស្រីចំនួន ១០,​៩​២​២​នាក់។ ប្រជាពលរដ្ឋអាយុ១៨ឆ្នាំឡើងសរុប១៥,៦៨៨នាក់ ស្រី ៥,៧៩៦នាក់ មានឈ្មោះក្នុងបញ្ជីឈ្មោះបោះឆ្នោតចំនួន ១១,២៤៨នាក់ ស្រី ៥,៤៦៨នាក់ មាន០៩ជនជាតិរស់នៅ គឺ ជនជាតិព្នង, ខ្មែរ, ខ្មែរឥស្លាម, គ្រឹង, ឡាវ, កម្ពុជាក្រោម, ថៃ, វៀតណាមនិងហុល្លង់។ដង់ស៊ីតេប្រជាជនស្មើ០៦នាក់ ក្នុងមួយគីឡូម៉ែត្រការ៉េ ប្រជាពលរដ្ឋ ៧០% ជាកសិករធ្វើស្រែចំការ និងប្រកបមុខរបរ បន្ទាប់បន្សំដូចជា ចូលព្រៃ បោចវល្លិ៍ ផ្តៅ និងជ័រទឹក ជ័រចុងជាដើម។ ប្រជាពលរដ្ឋ ១០%ធ្វើជា បុគ្គលិកកម្មករក្រុមហ៊ុន, ១០% ជាមន្ត្រីរាជការ និង ១០%ទៀត ជាអាជីវករលក់ដូរផ្សេងៗ។ លោកឧត្តមសេនីយ៍ទោ ជុំ ហុន តំណាងកងវិស្វកម្ម បានឱ្យដឹងថា៖កងឯកភាពចំនួន៦នៅក្នុងខេត្តមណ្ឌលគិរី បានកំពុងស្ថាបនាផ្លូវព្រំដែននេះ ដោយប្រើប្រាស់មធ្យោបាយគ្រឿងចក្រគ្រប់ប្រភេទចំនួន១៤៨គ្រឿងសម្រាប់ធ្វើផ្លូវ១៣៣គីឡូម៉ែត្រក្នុងនេះផ្លូវខ្សែក្រវាត់ព្រំដែនប្រវែង៨៤គីឡូម៉ែត្រ និងផ្លូវតភ្ជាប់ប្រវែង៤៩គ.ម។ ពាក់ព័ន្ធនឹងវឌ្ឍនភាពផ្លូវ លោកឧត្តមសេនីយ៍ទោ បានឱ្យដឹងថា៖សម្រាប់ផ្លូវខ្សែក្រវាត់ព្រំដែន បានកាត់ចំណោតនិងបំពេញតួផ្លូវបានប្រវែង១៣.៧ គ.ម និងសម្រាប់ផ្លូវតភ្ជាប់ បានកាត់ចំណោតនិងបំពេញតួផ្លូវបានប្រវែង១៥.៥ គ.ម។ ច្រកទ្វាព្រំដែនទ្វេភាគីណាមលៀរ មានចម្ងាយផ្លូវប្រវែង៦០គីឡូម៉ែត្រពីក្រុងសែនមនោរម្យ និងមានចម្ងាយផ្លូវប្រវែង ២៦គីឡូ​ម៉ែ​ត្រ​ ពីទីរួមស្រុកពេជ្រាដា មានទីតាំងស្ថិតនៅក្នុងភូមិពូលុ ឃុំប៊ូស្រា ស្រុកពេជ្រាដា ខេត្តមណ្ឌលគិរី ជាប់ជាមួយនឹង ច្រកទ្វារព្រំដែនទ្វេភាគីដាក់ប័រ ស្ថិតនៅក្នុងភូមិធន់ហាញ់ ឃុំធុនអាន ស្រុកដាក់មីល ខេត្តដាក់ណុង ប្រទេសវៀតណាម។ គួរជម្រាបថា ប្រតិភូគណៈកម្មការទី៤រដ្ឋសភាដែលរួមមានឯកឧត្តម កែប ជុតិមា ប្រធានគណៈកម្មការ ឯកឧត្តម ច័ន្ទ សុផល អនុប្រធានគណៈកម្មការ លោកជំទាវ អ៊ុន សុគន្ធា លេខាធិការគណៈកម្មការ ឯកឧត្តម នៅ សំ, ឯកឧត្តម សត្យា វុធ ,ឯកឧត្តម ចាន់ យឿន ,ឯកឧត្តម ឡុង ប៊ុន្នី ,ឯកឧត្តម សេរី កុសលនិងឯកឧត្តម នាង ចាន់ណាក់ សមាជិកគណៈកម្មការទី៤នៃរដ្ឋសភាក៏បាននាំយកនូវគ្រឿង​ឧបភោគ បរិភោគជូនកងកម្លាំងវិស្វកម្មរួមមាន៖ ទឹកសុទ្ធ៣០កេស, ត្រីខ១៥កេស, ថ្នាំពេទ្យ២៥ ប្រអប់, គុយទាវ និងមីសួ៣០កេស,ត្រីងៀត១៥គីឡូក្រាម និងថវិកា៣លានរៀល។ ដោយឡែករដ្ឋបាលខេត្តមណ្ឌលគិរី បានឧបត្ថម្ភអង្ករ២តោន ថវិកា៥០០ដុល្លារ និងថ្នាំប៉ារ៉ា២កេស៕  

អ្នកនាំពាក្យ៖ ស្ពានឆ្លងកាត់ទន្លេបាសាក់ចាក់អង្រែក្រោម-ព្រែកប្រាសម្រេចការសាងសង់បាន ១៦ភាគរយ បើគិតត្រឹមដំណាច់ឆ្នាំ២០២៤

2025/01/03 02:27:14 pm        303
Facebook Telegram Linkin
អ្នកនាំពាក្យរបស់ក្រសួងសាធារណការ និងដឹកជញ្ជូន ឯកឧត្តម ផន រឹម បានប្រកាសឲ្យដឹងថា គិតត្រឹមដំណាច់ឆ្នាំ២០២៤នេះ ស្ពានឆ្លងកាត់ទន្លេបាសាក់ចាក់អង្រែក្រោម-ព្រែកប្រា ដែល​មាន​ប្រវែង​ជិតមួយគីឡូម៉ែត្រនោះគឺសាងសង់បានសម្រេចចំនួន១៦ភាគរយហើយ។តាមរយៈផេកហ្វេសបុកផ្ទាល់នាថ្ងៃទី៣ ខែមករា ឆ្នាំ២០២៥នេះ ឯកឧត្តម ផន រឹម បានបញ្ជាក់ឲ្យ ដឹងថា «គិតត្រឹមតំណាច់ឆ្នាំ២០២៤នេះ គម្រោងស្ថាបនាស្ពានឆ្លងទន្លេបាសាក់ចាក់អង្រែក្រោម-ព្រែក​ប្រា សម្រេចបាន១៦%ហើយបន្ទាប់ពីសម្ពោធបើកការដ្ឋានសាងសង់នាថ្ងៃទី១៩ ខែកុម្ភៈ ឆ្នាំ២០២៤ ក្រោមអធិបតីភាពដ៏ខ្ពង់ខ្ពស់របស់សម្តេចធិបតី ហ៊ុន ម៉ាណែត នាយករដ្ឋមន្ត្រី និង​ឯកឧត្តម វ៉ាង វិនធៀន ឯកអគ្គរដ្ឋទូតចិនប្រចាំកម្ពុជា»។បើតាម​អ្នកនាំពាក្យរូបនេះបានឲ្យដឹងផងដែរថាគម្រោងសាងសង់ស្ពានឆ្លងទន្លេបាសាក់-ចាក់​អង្រែ​ក្រោម មានប្រវែងសរុប ១.៦៥០ម៉ែត្រ (ប្រវែងស្ពាន ៨៤៥,៧០ម៉ែត្រ, ទទឹងផ្លូវ​២៧​ម៉ែត្រ, ផ្លូវ​តភ្ជាប់​ក្បាល​ស្ពានប្រវែង ៨០៤,៣០ម៉ែត្រ, ទទឹងធម្មតាផ្លូវ ២០ម៉ែត្រ)។សូមបញ្ជាក់ថាគម្រោងស្ពានឆ្លងកាត់ទន្លេបាសាក់ចាក់អង្រែក្រោម-ព្រែកប្រានេះ ត្រូវ​បាន​អនុវត្ដ​ការ​សាង​សង់​ដោយក្រុមហ៊ុនសំណង់សៀងហៃ និងត្រួតពិនិត្យបច្ចេកទេស​ដោយ​ក្រុមហ៊ុន​ទីប្រឹក្សា​បច្ចេក​ទេសក្វាងចូវវ៉ានអាន ប្រើប្រាស់រយៈពេលសាងសង់ចំនួន ៤២ខែ នឹង​បញ្ចប់​នៅ​ក្នុង​អំឡុង​ឆ្នាំ​២០២៧ ដោយគ្រោងចំណាយថវិកាសរុបប្រមាណ ៦០,២លានដុល្លារអាម៉េរិក ដែល​ជា​ឥណទាន​សម្បទានពីរដ្ឋាភិបាលចិន រួមជាមួយនឹងថវិកាបដិភាគរបស់រាជរដ្ឋាភិបាលកម្ពុជា សម្រាប់​ការដោះស្រាយផលប៉ះពាល់ ការបោសសម្អាតគ្រាប់មីន យុទ្ធភ័ណ្ឌមិនទាន់ផ្ទុះ និង​ពន្ធអាករ​ផ្សេង​ៗជាដើម៕ អត្ថបទ៖ បាន ចក់

ផ្លូវខេត្តពីរខ្សែក្នុងខេត្តក្រចេះ គ្រោងបញ្ចប់ការស្ថាបនានាកំឡុងខែមេសា

2025/01/03 12:22:45 pm        291
Facebook Telegram Linkin
ប្រធានមន្ទីរសាធារណៈការ និងដឹកជញ្ជូនខេត្តក្រចេះ លោក សាំង ប៊ុនថេន បានឲ្យ​ដឹង​នៅ​រសៀល​ថ្ងៃ​ទី២ ខែមករា ឆ្នាំ២០២៥ ពីការសាងសង់ផ្លូវ ក្នុងខេត្តចំនួនពីរខ្សែ គឺផ្លូវខេត្តលេខ ៣៧៧ និង លេខ ៣៧៧A ក្រោមឥណទានសម្បទានរបស់ធនាគារពិភពលោក ដែលក្នុង​កិច្ច​សន្យា​ត្រូវបញ្ចប់ការស្ថាបនា សាងសង់ ក្នុងខែធ្នូ ឆ្នាំ២០២៤ ប៉ុន្តែយោង​តាម​ស្ថានភាព​ជាក់​ស្ដែង​កា​​រសាងសង់មិនទាន់រួចក៏ត្រូវបានពន្យាពេលបញ្ចប់ការសាងសង់ដល់ក្រុមហ៊ុនទទួលការ ។ លោកប្រធានមន្ទីរ បានបញ្ជាក់ជុំវិញការយឺតយ៉ាវក្នុងការធ្វើផ្លូវខេត្តទាំងពីរខ្សែនេះថា ក្នុង​ករណី​ដែល​ក្រុម​ហ៊ុន​ទទួលគម្រោងស្តារ ជួសជុល និងថែទាំផ្លូវ អនុវត្តមិនបានត្រឹម​ត្រូវ​តាម​កិច្ច​សន្យា​ទេ​នោះ នឹងអាចពន្យាពេលបានពីរដង ក្នុងរយៈពេលពីមួយខែទៅពីរខែ នៅក្នុងកិច្ចសន្យា ប៉ុន្តែបើមា​ន​លើក​ទីបីនោះ នឹងត្រូវរងការផាកពិន័យ។ មន្ទីរសាធារណៈការ និងដឹកជញ្ជូនខេត្ត គឺមានតួនាទី​ចូល​រួម​សហការ​ក្នុង​ការ​សម្រប​សម្រួល​ដោះស្រាយ​នៅ​ពេល​កន្លែ​ង​ណា​មួយមាន​បញ្ហា​កើត​ឡើង​តែ​ប៉ុណ្ណោះ។ គូបញ្ជាក់ផងដែរថា ផ្លូវដែលកំពុងធ្វើនេះ គឺមាន ផ្លូវខេត្តលេខ ៣៧៧ និង៣៧៧A មាន​ប្រវែង​សរុប ៤៨,៦គីឡូម៉ែត្រ ក្នុងនោះ ផ្លូវខេត្តលេខ៣៧៧ មានប្រវែង ៣៥គីឡូម៉ែត្រ ចាប់ពីរង្វង់​មូល​ព្រាប​ស ក្នុងក្រុងក្រចេះ ដល់ ទីរួមស្រុកសំបូរ និងផ្លូវខេត្តលេខ ៣៧៧A មានប្រវែង ១៣,៦​គីឡូម៉ែត្រ ចាប់ពីផ្សារសណ្ដាន់ ឃុំសណ្តាន់ ដល់ភូមិសង្គម ឃុំសណ្តាន់ នៃស្រុកសំបូរ។ ផ្លូវ​ខេត្ត​ទាំង ២ខ្សែនេះ នឹងត្រូវស្តារពង្រីក និងលើកកម្រិតគុណភាពជាប្រភេទផ្លូវក្រាលកៅស៊ូAC កម្រាស់ ៥សង់ទីម៉ែត និងក្រាលបេតុងសរសៃដែក កម្រាស់ ២០សង់ទីម៉ែត្រ មានទទឹងចាប់ពី ៧ម៉ែត្រ ដល់ ១១ម៉ែត្រ មាន ២គន្លងទៅមក ព្រមទាំងការសាងសង់ស្ពានថ្មីចំនួន ៩កន្លែង ប្រវែងសរុប ៤១៣ម៉ែត្រ នៅលើផ្លូវខេត្តលេខ៣៧៧ ៕ អត្ថបទ៖ សេង ម័រ

សម្ដេចធិបតី អរគុណ ស.ស.យ.ក និងភាគីពាក់ព័ន្ធបានរៀបចំព្រឹត្តិការណ៍ «សាទរកម្ពុជា» ដោយរលូន និងសុវត្ថិភាពបំផុត

2025/01/01 11:52:49 am        178
Facebook Telegram Linkin
នៅព្រឹកថ្ងៃទី១ ខែមករា ឆ្នាំ ២០២៥នេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដី​នៃកម្ពុជា បានផ្ញើសារថ្លែងអំណរគុណដល់ក្រុមការងារសហភាពសហព័ន្ធយុវជនកម្ពុជា (ស.ស.យ.ក) យុវជនស័្មគ្រចិត្ត សាលារាជធានីភ្នំពេញ កងកម្លាំងប្រដាប់អាវុធគ្រប់ប្រភេទ ក្រុម​ការងារ​អនាម័យ និងក្រុមការងារទាំងអស់ ដែលបានចូលរួមសហការរៀបចំព្រឹត្តិការណ៍ «សាទរកម្ពុជា» ទៅបានរលូន និងសុខសុវត្ថិភាព ជូនបងប្អូនប្រជាពលរដ្ឋ ភ្ញៀវទេសចរជាតិ និង​អន្តរជាតិ​មក​ចូលរួមលេងកម្សាន្ត និងសាទរឆ្នាំថ្មី ឆ្នាំសកល ២០២៥ ប្រកបដោយសន្តិសុខ សណ្ដាប់​ធ្នាប់​ជាទីបំផុត។តាមរយៈព្រឹត្តិការណ៍ «សាទរកម្ពុជា» ដែលបានរៀបចំឡើងដោយ ស.ស.យ.ក នៅយប់ឆ្លងឆ្នាំថ្មី ឆ្នាំ​សកលនេះ មានប្រជាពលរដ្ឋ និងភ្ញៀវទេសចរជាតិ អន្តរជាតិរាប់លាននាក់ បាន​មក​ចូល​រួម​ទស្សនា​កម្សាន្ត​នូវទស្សនីយភាព ការសម្ដែងទស្សនីភាពនានា និងតន្រ្ដីយ៉ាងសប្បាយរីករាយ តាំង​តែ​ពី​ព្រឹក​ថ្ងៃទី៣០ ខែធ្នូ ឆ្នាំ ២០២៤ រហូតដល់យប់បំណាច់ឆ្នាំឈានចូលឆ្នាំថ្មី ឆ្នាំសកល ២០២៥។ តាមរយៈទិដ្ឋភាពដ៏រីករាយនេះ សម្ដេចធិបតី នាយករដ្ឋមន្ត្រី បានថ្លែង​អំណរ​គុណដ​ល់​ក្រុម​ការងារ​សហ​ភាព​សហព័ន្ធយុវជនកម្ពុជា និងក្រុមការងារ​ទាំង​អស់​ដែល​បាន​ចូល​រួម​សហការ​រៀប​ចំ​ព្រឹត្តិការណ៍ «សាទរកម្ពុជា» ទៅបានរលូន និងសុខសុវត្ថិភាពជូនភ្ញៀវទេសចរជាតិ និង​អន្តរជាតិ​មក​ចូល​រួម​លេងកម្សាន្ត និងសាទរឆ្នាំថ្មី ឆ្នាំសកល ២០២៥នេះ។ សូម​ជម្រាបថា ព្រឹត្តិការណ៍ «សាទរកម្ពុជា» ជាព្រឹត្តិការណ៍​នៃ​ការ​អប​អ​រ​សាទរ​ដល់​សង្គម​មួយ​ដែល​ប្រកប​ដោយភាពរស់ រវើកជាមួយនឹងការបង្ហាញវិសេសភាពនៃអត្តសញ្ញាណជាតិ ដោយ​សមាន​ចិត្ត​សោមនស្សចំពោះអ្វីៗដែលឆ្លងកាត់ និងជ័យជម្នះ និងការលើកតម្កើនមោទនភាព ក្នុង​ភាពជាប្រជាជាតិមួយ។ ព្រឹត្តិការណ៍ «សាទរកម្ពុជា» ការអបអរសាទរនូវគុណតម្លៃរួមគ្នាដើម្បីបង្ហាញ មោទនភាព ចំពោះ​បណ្តា​សមិទ្ធផលនៃការអភិវឌ្ឍសង្គម សេដ្ឋកិច្ចកម្ពុជាជាមួយការរក្សាបាននូវអត្តសញ្ញាណ នៃ​ប្រជាជាតិ និងប្រជាជន និងការអបអរសាទរ ដល់ការរួមរស់ជាមហាគ្រួសារខ្មែរតែមួយ។ មិន​ត្រឹម​តែ​ប៉ុណ្ណោះ ព្រឹត្តិការណ៍នេះ គឺផ្តល់ជាវេទិកា និងឱកាសដល់គ្រប់ កោសិកាសង្គម គ្រប់​ស្រទាប់​វណ្ណៈ គ្រប់សហគមន៍ និងមជ្ឈដ្ឋាន បង្ហាញនូវមោទនភាពចំពោះអត្តសញ្ញាណរបស់ខ្លួន ក្រោម «ទង់នៃព្រះរាជាណាចក្រកម្ពុជា» ដោយការរួបរួមសមគ្គីពីមហាគ្រួសារខ្មែរ៕

សមិទ្ធផលការងារការទូតក្រៅប្រទេសរយៈពេល ១៦ ខែមកនេះរបស់សម្ដេចធិបតី ហ៊ុន ម៉ាណែត

2024/12/31 12:54:41 pm        309
Facebook Telegram Linkin
ក្រោយកាន់តំណែង​ជានាយកដ្ឋមន្រ្ដី នៃរាជរដ្ឋាភិបាល​អាណត្តិទី៧ រយៈពេលប្រមាណ ១៦ ខែមកនេះ​ សម្ដេច​មហាបវរធិបតី ហ៊ុន ម៉ាណែត បាន​អនុវត្តបេសកម្មកាទូតសេដ្ឋកិច្ចនៅក្រៅប្រទេស​ជាច្រើនដើម្បីពង្រឹង​ទំនាក់ទំនង​កាទូតរបស់កម្ពុជា​ជាមួយបណ្ដាប្រទេស​ជាមិត្ត និង​​ទាក់ទាញវិនិយោគទេសចរមកកាន់កម្ពុជា។- នាវាកម្ពុជាបាននិងកំពុងបន្តបោះពួយទៅមុខ លើកនេះតាំងពីថ្ងៃទី២២ ខែសីហា ឆ្នាំ២០២៣មក ក្រោមសន្ទុះនៃយុទ្ធសាស្ត្របញ្ចកោណរបស់រាជរដ្ឋាភិបាល ដឹកនាំដោយសម្តេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី។ គោលដៅចុងក្រោយនៃយុទ្ធសាស្ត្របញ្ចកោណនេះតាមរយៈការកសាងជាតិមួយឱ្យរឹងមាំ, រស់រវើក, រុងរឿង គឺធ្វើឱ្យកម្ពុជាក្លាយជាប្រទេសចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសចំណូលកម្រិតខ្ពស់នៅឆ្នាំ ២០៥០។ - ការទូតសេដ្ឋកិច្ច គឺជាសកម្មភាពស្នួលលេចធ្លោរជាងគេនៅក្រៅប្រទេសរបស់រាជរដ្ឋាភិបាល ក្នុងរយៈពេលជាងមួយឆ្នាំកន្លងទៅនេះ។ ការទូតសេដ្ឋកិច្ចនេះគោលដៅទាំងស្រុងគឺសំដៅទៅរកការចូលរួមចំណែករក្សាកំណើនសេដ្ឋកិច្ចនៃប្រទេសកម្ពុជា​, បង្កើតការងារ, ពង្រឹងគុណភាពនៃវិស័យអប់រំ និងសុខាភិបាល​ជាដើម...។ ក្រៅពីនេះក៏បានចូលរួមចំណែកក្នុងការបន្តកាត់បន្ថយភាពក្រីក្រ និងលើកកម្ពស់ជីវភាពរបស់ប្រជាជនក្នុងចក្ខុវិស័យកម្ពុជាឆ្នាំ២០៣០ និងឆ្នាំ២០៥០ផងដែរ។ - ពិភពលោកក្រោយសករាជកូវីដ-១៩ គឺកំពុងឋិតនៅពិភពលោកមួយពោរពេញដោយភាពតានតឹងភូមិសាស្ត្រនយោ​បាយ និងភាពមិនជាក់លាក់, សេដ្ឋកិច្ចសកលដែលនៅតែដើរអូសជើងបន្តជះផលវិបាកអវិជ្ជ​មានលើសេដ្ឋកិច្ចនៃតំបន់អាស៊ីផង និងលើសេដ្ឋកិច្ចជាតិរបស់កម្ពុជា​ផង។  ប៉ុន្ដែ​តាមរយៈយុទ្ធសាស្រ្ដកាទូតច្បាស់លាស់របស់សម្ដេច​ធិបតី នាយករដ្ឋមន្រ្ដី ក្នុង​រយៈពេលប្រមាណ១៦ខែ គិតត្រឹមបំណាច់ខែធ្នូ ឆ្នាំ២០២៤នេះ សម្តេចធិបតី បានធ្វើដំណើរទស្សកិច្ចទៅកាន់តំបន់ អាស៊ី, អាមេរិក, អាហ្វ្រិក, អឺរ៉ុប និង អូសេអានី, សរុបមាន​ប្រទេសជិត ២០ ប្រទេស។ បេសកម្មនេះ គឺជាសកម្មភាពក្រៅប្រទេសមមាញឹកនឹងសកម្ម និង​ជាការចូលរួមក្នុងជំនួបកំពូលតំបន់នឹងកិច្ចប្រជុំអន្តរជាតិក្នុងនោះរួមមាន៖ ជំនួបកំពូលអាស៊ាន និងជំនួបកំពូលពាក់ព័ន្ធនៅហ្សាការតាប្រទេសឥណ្ឌូណេស៊ី កាលពីខែកញ្ញា២០២៣, មហាសន្និបាតអង្គការសហប្រជាជាតិនៅញូវ​យ៉កសហរដ្ឋអាមេរិកនៅខែកញ្ញា២០២៣, វេទិកាខ្សែក្រវ៉ាត់និងផ្លូវនៅប៉េកាំង​ប្រទេស​​ចិន ខែតុលា២០២៣, ជំនួបកំពូលអាស៊ាន-ក្រុមប្រឹក្សាសហប្រតិបត្តិការឈូងសមុទ្រពែរ្យ នៅខែតុលា២០២៣, កិច្ចប្រជុំកំពូលរំលឹកខួបអនុស្សាវរីយ៍ ដើម្បីអបអរសាទរឆ្នាំទី៥០នៃមិត្តភាព និងកិច្ចសហប្រតិបត្តិការអាស៊ាន-ជប៉ុន នៅទីក្រុងតូក្យូ ប្រទេសជប៉ុន កាលពីខែធ្នូ២០២៣, ជំនួបកំពូលពិសេសអាស៊ាន-អូស្ត្រាលី, នៅទីក្រុង​ម៉ែលប៊នប្រទេសអូស្ត្រាលី កាលពីខែមីនា ២០២៤។ - ក្រៅពីនេះសម្ដេច​ធិបតី នាយករដ្ឋមន្រ្ដីបាន​អញ្ជើញធ្វើទស្សនកិច្ចផ្លូវការនៅបណ្តាប្រទេសមិត្តជិតខាងមិត្តក្នុងតំបន់និងមិត្តក្នុង​លោក។ រួមមានទស្សនកិច្ចនៅចិន ក្នុងខែកញ្ញា២០២៣, នៅវៀតណាម ខែធ្នូ ២០២៣, នៅបារាំង ខែមករា២០២៤, នៅថៃ ខែកុម្ភៈ ២០២៤, នៅម៉ាឡេស៊ី ខែកុម្ភៈ២០២៤, នៅឡាវ ខែមី នា២០០៤, នៅកូរ៉េខាងត្បូង ខែឧសភា២០២៤, នៅសិង្ហបុរី មិថុនា២០២៤។- ជាពិសេស​ក្នុងរយៈពេល៣ខែចុងក្រោយនៃឆ្នាំ២០២៤នេះ សម្តេចបវរធិបតី ហ៊ុន ម៉ាណែត បាន​បន្ត​បំពេញទស្សនកិច្ច ៣ លើកនៅបរទេសបន្ថែមទៀត រួមមាន​៖ ទី១ ទស្សនកិច្ចនៅវៀងចន្ទន៍ សាធារណរដ្ឋប្រជាធិបតេយ្យប្រជាមានិតឡាវ ចាប់ពីថ្ងៃ ៨ រហូតដល់ ១១ ខែតុលា ឆ្នាំ​២០២៤។ គោលដៅនៃទស្សនកិច្ចនេះ គឺចូលរួមកិច្ចប្រជុំកំពូលអាស៊ាន និងកិច្ចប្រជុំកំពូល ពាក់ព័ន្ធផ្សេងៗទៀតទាំងអស់១៧កិច្ចប្រជុំ។ - ទី២ ទស្សនកិច្ចនៅឥណ្ឌូណេស៊ី ចាប់ពីថ្ងៃ១៩ ដល់២០ ខែតុលាដើម្បីចូលរួមពិធីឡើងកាន់តំណែងប្រធា​នាធិបតីរបស់ ឯកត្តម Prabowo Subianto ក្លាយជាប្រធានាធិបតីថ្មីនៃប្រទេស​ឥណ្ឌូណេស៊ី និងទី៣គឺទស្សនកិច្ចនៅ គុនមីង, ខេត្តយូណាន សាធារណរដ្ឋប្រជាមានិតចិន កាលពីថ្ងៃ៥ដល់ថ្ងៃ៧ ខែវិច្ឆិកា ឆ្នាំ២០២៤។ ទស្សនកិច្ចនេះ គោលដៅធំ គឺចូលរួមកិច្ចប្រជុំកំពូលមហាអនុតំបន់មេគង្គលើកទី៨។ - ទស្សនកិច្ចនៅបរទេសទាំងអស់នេះ ពិសេសទស្សនកិច្ចចុងក្រោយនៅប្រទេសចិន ជាឱកាសសម្រាប់ឱ្យប្រមុខរាជរដ្ឋាភិបាល និងគណប្រតិភូជាន់ខ្ពស់កម្ពុជាឆ្លៀតបន្តពង្រឹង និងពង្រីកការទូតសេដ្ឋកិច្ច។ ការទូតសេដ្ឋកិច្ចនេះរបស់កម្ពុជាបន្តស្តែងឡើង៖ ទី១ តាមរយៈជំនួបទ្វេភាគីរដ្ឋាភិបាល និងរដ្ឋាភិបាល នាឱកាសទស្សនកិច្ចរបស់សម្តេចបវរធិបតីនៅបរទេសម្តងៗ។ ប្រមុខរាជរដ្ឋាភិបាលតែងតែឆ្លៀតផ្សព្វផ្សាយផលិត​ផលកម្ពុជា វិស័យទេសចរណ៍កម្ពុជា និងតែងតែជំរុញរដ្ឋាភិបាលបរទេសនីមួយៗឱ្យលើកទឹកចិត្តវិស័យឯកជនមកដាក់ទុនរកស៊ីនៅកម្ពុជា។ - តាមរយៈជំនួបរវាងរដ្ឋាភិបាល និងវិស័យឯកជនបរទេស, នៅបរទេសឬនៅកម្ពុជា។ គឺសុទ្ធសឹងជាការ ចូលរួមផ្ទាល់របស់ សម្តេចបវរធិបតី ក្នុងវេទិកាធុរកិច្ចតូចឬធំ, សុទ្ធសឹងជាជំនួបសំណេះសំណាលគ្នាផ្ទាល់ រវាង សម្តេចបវរធិបតី និងបណ្តាក្រុមហ៊ុនបរទេស ខ្នាតតូច មធ្យម និងធំ។ ប្រមុខរាជរដ្ឋាភិបាល និងគណ ប្រតិភូជាន់ខ្ពស់កម្ពុជា រួមមានឧបនាយករដ្ឋមន្ត្រី ទេសរដ្ឋមន្ត្រី និងរដ្ឋមន្ត្រី ប្រឹងប្រែងបញ្ចុះបញ្ចូលធុរជន និងវិនិយោគិនបរទេសឱ្យមកបង្កើនទុនឬមកដាក់ទុនរកស៊ីនៅកម្ពុជា គឺសុទ្ធសឹងជាឱកាសដើម្បី ផ្សព្វ​ផ្សាយ​ផលិតផលខ្មែរ និងទេសចរណ៍សម្បូរបែបរបស់កម្ពុជា។ល។ ជារួមមុខព្រួញនៃការទូតសេដ្ឋកិច្ចរបស់កម្ពុជាមានបីឬបួនសំខាន់ៗ៖ ក្នុងនោះរួមមាន ជំរុញពាណិជ្ជ កម្មអន្តរជាតិ, បានន័យថា បង្កើនការផ្លាស់ប្តូរពាណិជ្ជកម្មរវាងកម្ពុជានិងពិភពលោក; ទាក់ទាញការវិនិ យោគផ្ទាល់ពីបរទេស, និងលើកកម្ពស់វិស័យទេសចរណ៍...។- ចំណែកឯលទ្ធផលជាក់ស្តែងវិញ, បានផ្តើមលេចចេញបណ្តើរៗហើយ៖ ក្នុងនោះមាន រយៈពេល១០ខែចុងក្រោយនេះ, ទំហំពាណិជ្ជកម្មសរុបរបស់កម្ពុជា មានចំនួនប្រមាណ ៤៥,៥៨ ប៊ីលានដុល្លារ ពោលគឺកើនឡើងជាង ១៥% បើធៀបទៅនឹងរយៈពេល១០ខែដំបូងនៃឆ្នាំ២០២៣។ កំណើននៃទំហំពាណិជ្ជកម្មនេះបានមកជាអាទិ៍ពីការកើនឡើងខ្លាំងនៃការនាំចេញ ពិសេសទៅកាន់ឥណ្ឌូណេស៊ី និងឡាវ។ (ផ្ទុយទៅវិញ ការនាំចេញធ្លាក់ចុះ ទៅកាន់មីយ៉ាន់ម៉ា សិង្ហបុរី និងឥណ្ឌា។ ជាសរុបការនាំចេញទាំងអស់កើនបាន ១៣,៤២%, គិតជាទឹកប្រាក់ គឺប្រមាណជាង២ម៉ឺន១ពាន់៩រយ ៣៣លានដុល្លារ។ចំណែកការនាំចូលកើនឡើង ១៦,៥៦%, គិតជាទឹកប្រាក់ប្រមាណជាង២ម៉ឺន៣ពាន់៦រយ ៥៣លានដុល្លារ)។ ចំពោះការទាក់ទាញវិនិយោគវិញ, រយៈពេល១០ខែដំបូងក្នុងឆ្នាំ២០២៤វិញ, ក្រុមប្រឹក្សា អភិវឌ្ឍន៍កម្ពុជា អនុម័តគម្រោងវិនិយោគសរុប៣៤៦គម្រោង ក្នុងនោះគម្រោងនៅក្នុងតំបន់សេដ្ឋកិច្ច ពិសេសមាន១៣២។ ហើយទាំងអស់នេះ, ក្នុងទុនវិនិយោគសរុបប្រមាណ ៥,៥ ប៊ីលានដុល្លា, បង្កើតការងារបាន២៧ម៉ឺនកន្លែង។ ជារួមទំហំទុនវិនិយោគមានកំណើនប្រមាណ៣៨% ធៀបនឹងរយៈពេលដូចគ្នាក្នុងឆ្នាំ២០២៣។ បើរាប់ត្រឹមត្រីមាសទី៣ឆ្នាំ២០២៤, ទេសចរអន្តរជាតិដែលចូលមកលេងកម្ពុជា មានចំនួន ៤លាន៨ សែននាក់, កើនឡើង២២,២% ធៀបទៅរយៈពេលដូចគ្នានក្នុងឆ្នាំ២០២៣។ ជើងហោះហើរអន្តរជាតិចូល មកកម្ពុជា សរុប ១ម៉ឺន៨ពាន់៤រយ១៧ជើង ពិសេសតាមច្រកអាកាសយានដ្ឋានអន្តរជាតិភ្នំពេញ និងអាកាសយានដ្ឋានអន្តរជាតិសៀមរាបអង្គរ។ ដោយឡែកសម្រាប់រយៈពេល ១០ ខែឆ្នាំ២០២៤ បណ្ណលក់ឱ្យទេសចរ​បរទេសដែលចូលទស្សនាតំបន់រមណីយដ្ឋានអង្គរមានចំនួនសរុប ៧សែន៧ម៉ឺន៤ពាន់២រយ៣ សន្លឹក ជាមួយនឹងប្រាក់ចំណូលសរុប ជិត៣៦លានដុល្លារកើនឡើង ២៩,០៧% ធៀបទៅនឹង១០ខែដំបូង ក្នុងឆ្នាំ២០២៣។ ការកើនឡើងនៃចំនួនភ្ញៀវទេសចរ គឺអាស្រ័យជាពិសេសលើការផ្សព្វផ្សាយទេសចរណ៍សម្បូរបែបរបស់កម្ពុជា, លើការដាក់ចេញនូវគោលនយោបាយលើកទឹកចិត្តពីសំណាក់រាជរដ្ឋាភិបាល រួម ជាមួយគោលនយោបាយគាំទ្រជាច្រើន ស្របពេលដែលក្រសួងទេសចរណ៍កំពុងបន្តអនុវត្តយុទ្ធនាការមួយ ចំនួន ដូចជា ទស្សនាសៀមរាប ២០២៤. ឆ្នាំនៃការផ្លាស់ប្តូរប្រជាជន និងប្រជាជន កម្ពុជា-ចិន ២០២៤ និង ឆ្នាំទេសចរណ៍ កម្ពុជា-ឥណ្ឌា ២០២៤ ។ល។និង។ល។ សូមជម្រាបថា កំណើនសេដ្ឋកិច្ចខ្ពស់ដែលកម្ពុជាបានស្គាល់មុនសម័យកូវីដ១៩ កំពុងវិលមកវិញបណ្តើរៗហើយ។ បើតាមការព្យាកររបស់ស្ថាប័នហិរញ្ញវត្ថុអន្តរជាតិផ្សេងៗ, ដូចជា World Bank និង IMF, សេដ្ឋកិច្ចកម្ពុជានឹងអាចកើនដល់ ៦,១% នៅឆ្នាំ២០២៤, ពោលគឺជាតួលេខខ្ពស់ជាងគេបង្អស់មួយ នៅតំបន់អាស៊ីអាគ្នេយ៍។ យ៉ាងណាក្តីលទ្ធផលដែលស្តែងឡើងបណ្តើរៗទាំងអស់នេះទាំងនៅលើវិស័យពាណិជ្ជកម្ម ការវិនិយោគ និងទេសចរណ៍ នាំមកនូវសុទិដ្ឋិនិយមនិងនូវជំនឿជឿជាក់ថា បន្តអនុវត្តការទូតសេដ្ឋកិច្ចឱ្យកាន់តែសកម្ម និងបែបឆ្លាតវៃ គឺដើរលើផ្លូវត្រូវសំដៅទៅស្វែងរកប្រយោជន៍សេដ្ឋកិច្ចធំធេងឡើងជាលំដាប់ មកជូនប្រជាជាតិ និងប្រជាពលរដ្ឋកម្ពុជា​៕ អត្ថបទ៖​វ៉ន ដារ៉ា

បណ្ដាញសង្គម

ព័ត៌មានថ្មីៗ

[BREAKING NEWS] ប្រភព៖ លោកTrump បានយល់ព្រមលើផែនការវាយប្រហាររបស់អាមេរិកលើអ៊ីរ៉ង់ តែចាំការសម្រេចចិត្តចុងក្រោយ
06/19/2025 08:06 AM
Facebook Telegram Linkin
សម្តេចតេជោ ហ៊ុន សែន នៅបន្តស្រក់ទឹកភ្នែកខណៈរំលឹកដល់ដំណើរដ៏គ្រោះថ្នាក់កាលពីជាង៤០ឆ្នាំមុន
06/19/2025 08:06 AM
Facebook Telegram Linkin
ឯកឧត្តម ឌិត ទីណា បន្តជំរុញមន្ត្រីកសិកម្មឃុំ បង្កេីនការចុះផ្សព្វផ្សាយគោលនយោបាយកសិកម្មដល់ប្រជាកសិករដេីម្បីប្រយោជន៍រួមទាំងអស់គ្នា
06/18/2025 10:06 PM
Facebook Telegram Linkin
សាខាកាកបាទក្រហមកម្ពុជាខេត្តកំពង់ឆ្នាំងប្រារព្ធព្រះរាជពិធីបុណ្យចម្រើនព្រះជន្មថ្វាយសម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរគម្រប់៨៩ យាងចូល៩០ព្រះវស្សា
06/18/2025 08:06 PM
Facebook Telegram Linkin
រដ្ឋាភិបាលសំឡេងភាគតិចរបស់ព័រទុយហ្គាល់ ឡើងកាន់អំណាច
06/18/2025 08:06 PM
Facebook Telegram Linkin
ការស្ទង់មតិ៖ បក្ស Tisza នាំមុខ ១៥ពិន្ទុ លើបក្សកាន់អំណាច Fidesz របស់លោក Orban
06/18/2025 08:06 PM
Facebook Telegram Linkin
ជម្រកការពារគ្រាប់បែកអ៊ីស្រាអែលនៅស្ថានីយរថភ្លើងក្រោមដី ខណៈការវាយប្រហារមីស៊ីលអ៊ីរ៉ង់
06/18/2025 08:06 PM
Facebook Telegram Linkin
មេដឹកនាំកំពូលអ៊ីរ៉ង់ច្រានចោលការអំពាវនាវរបស់លោក Trumpឲ្យចុះចាញ់ដោយឥតលក្ខខណ្ឌ
06/18/2025 08:06 PM
Facebook Telegram Linkin
រដ្ឋមន្ត្រីអាល្លឺម៉ង់ និយាយទៅកាន់អ៊ីរ៉ង់ថា មិនយឺតពេលពេកនោះទេ ក្នុងការចរចា
06/18/2025 08:06 PM
Facebook Telegram Linkin
ប្រធានក្រុមមេធាវីស្មគ្រ័ចិត្តសម្តេចតេជោសែន ចែករំលែក«បទពិសោធន៍ដឹកនាំអង្គភាព និងបទពិសោធន៍ក្នុងការប្រកបវិជ្ជាជីវៈជាមេធាវី»
06/18/2025 07:06 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.