BTV NEWS

សម្ដេចធិបតី អំពាវនាវដល់ជនរួមជាតិជឿទុកចិត្តលើរាជរដ្ឋាភិបាលដែលកំពុងធ្វើកិច្ចការងារយ៉ាងសកម្មស្វែងរកដំណោះស្រាយបញ្ចប់បញ្ហាព្រំដែនកម្ពុជា-ថៃ ឱ្យបានឆាប់រហ័ស

សម្ដេចធិបតីផ្ដល់អនុសាសន៍៧ចំណុច ដល់ក្រសួង-ស្ថាប័នពាក់ព័ន្ធឱ្យយកចិត្តទុកដាក់ក្នុងឱកាសទិវាអក្ខរកម្មអន្តរជាតិ ៨ កញ្ញា ២០២៥

សម្ដេចធិបតី៖ រាជរដ្ឋាភិបាលប្តេជ្ញាចិត្តយ៉ាងមុតមាំលើកកម្ពស់ការងារអក្ខរកម្ម និងបំពាក់បំប៉ន ជំនាញ និងឱកាសសិក្សាពេញមួយជីវិត ជាពិសេសជំនាញឌីជីថល

ប្រជាពលរដ្ឋត្រេកអរនឹងសមិទ្ធផលអាកាសយានដ្ឋានថ្មីដែលត្រៀមបើកដំណើរការ

នយោបាយ និង ការអភិវឌ្ឍន៍

ប៉ាគីស្ថាន កោះហៅបេសកជនពីប្រទេសអ៊ីរ៉ង់ បន្ទាប់ពីការវាយប្រហារដោយមីស៊ីល

ប្រទេសប៉ាគីស្ថាន បានកោះហៅឯកអគ្គរដ្ឋទូតរបស់ខ្លួនពីប្រទេសជិតខាងអ៊ីរ៉ង់ កាលពីថ្ងៃពុធ (១៧ មករា) ដើម្បីតវ៉ាចំពោះ «ការរំលោភអធិបតេយ្យភាពរបស់ខ្លួន» បន្ទាប់ពីទីក្រុងតេអេរ៉ង់ បាននិយាយថាខ្លួនបានបើកការវាយប្រហារដោយមីស៊ីលទៅលើមូលដ្ឋានសកម្មប្រយុទ្ធនៅភាគនិរតីប៉ាគីស្ថាន។រដ្ឋមន្ត្រីការបរទេសអ៊ីរ៉ង់បាននិយាយថា ខ្លួនបានវាយប្រហារក្រុមសកម្មប្រយុទ្ធក្នុងការវាយប្រហារដោយ «មីស៊ីល និងយានដ្រូន»។ ប្រព័ន្ធផ្សព្វផ្សាយរដ្ឋបាននិយាយថា មីស៊ីលរបស់អ៊ីរ៉ង់បានវាយប្រហារមូលដ្ឋានចំនួនពីរទីតាំងនៃក្រុមមូស្លីមនិកាយស៊ុននី ចាអ៊ីស អាល់អាឌែល (Jaish al-Adl) ដែលត្រូវបានកំណត់ថាជា «អង្គការភេរវករបរទេស» ដោយក្រសួងការបរទេសសហរដ្ឋអាមេរិក។ប្រទេសប៉ាគីស្ថានដែលមានអាវុធនុយក្លេអ៊ែរបាននិយាយថា ការរំលោភលើដែនអាកាសរបស់ខ្លួនបានបណ្តាលឲ្យកុមារពីរនាក់ស្លាប់ ប៉ុន្តែមិនបានបញ្ជាក់ពីលក្ខណៈនៃការរំលោភបំពាននោះ ឬទីតាំងនៃការវាយប្រហារឡើយ។រដ្ឋមន្ត្រីការបរទេសអ៊ីរ៉ង់ លោក ហូសេន អាមីរ៉ាបឌូលឡាសអៀន (Hossein Amirabdollahian) បាននិយាយនៅទីក្រុងដេវ៉ូស (Davos) ប្រទេសស្វីស ជាទីដែលលោកកំពុងចូលរួមវេទិកាសេដ្ឋកិច្ចពិភពលោក ដោយចោទប្រកាន់ថាការវាយប្រហារទាំងនោះមានទំនាក់ទំនងនឹងអ៊ីស្រាអែល។ប៉ាគីស្ថាន និងអ៊ីរ៉ង់ កាលពីអតីតកាលមានទំនាក់ទំនងដ៏រកាំរកូស ប៉ុន្តែការវាយប្រហារនេះគឺជាការឈ្លានពានឆ្លងព្រំដែនខ្ពស់បំផុតក្នុងរយៈពេលប៉ុន្មានឆ្នាំចុងក្រោយនេះ៕

សម្តេចធិបតី និងលោកជំទាវបានបញ្ចប់ការងារនៅប្រទេសស្វីស និងបន្តទស្សនកិច្ចផ្លូវការនៅបារាំង

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងលោកជំទាវបណ្ឌិត ពេជ ចន្ទមុនី ហ៊ុនម៉ាណែត នៅវេលាម៉ោងប្រមាណ ៨ យប់ថ្ងៃទី១៧ ខែមករា ឆ្នាំ២០២៤ ម៉ោងនៅប្រទេសបារាំង ត្រូវនឹងម៉ោង ២ ទៀបភ្លឺថ្ងៃទី១៨ ខែមករា ម៉ោងនៅកម្ពុជា បានដឹកនាំគណៈប្រតិភូអញ្ជើញដល់ទីក្រុងប៉ារីស ប្រទេសបារាំងប្រកបដោយសុខសុវត្ថិភាពដើម្បីបំពេញទស្សនកិច្ចជាផ្លូវការតបតាមការអញ្ជើញរបស់ប្រធានាធិបតីបារាំង។ ដំណើរអញ្ជើញដល់ព្រលានយន្តហោះក្នុងទីក្រុងប៉ារីស ប្រទេសបារាំង សម្តេចធិបតី និងលោកជំទាវបណ្ឌិត បានទទួលបានការស្វាគមន៍ និងបដិសណ្ឋារកិច្ចយ៉ាងកក់ក្តៅពីសំណាក់ លោក Paul FURIA អនុប្រធានពិធីការរដ្ឋ ទទួលបន្ទុកការងារពិធីការរបស់បារាំង ព្រមទាំងឯកអគ្គរាជទូតកម្ពុជាប្រចាំប្រទេសបារាំង។សម្តេចធិបតី នាយករដ្ឋមន្រ្ដីបានអញ្ជើញបំពេញទស្សនកិច្ចផ្លូវការរយៈពេលពីរថ្ងៃនៅប្រទេសបារាំង គឺនៅថ្ងៃទី១៨-១៩ ខែមករា ឆ្នាំ ២០២៤នេះ តបតាមការអញ្ជើញរបស់ឯកឧត្តម អេម៉ានូអែល ម៉ាក្រុង ប្រធានាធិបតីបារាំង។ក្នុងដំណើរបំពេញទស្សនកិច្ចជាផ្លូវការនេះ សម្ដេចធិបតីនឹងត្រូវទទួលស្វាគមន៍ និងមានជំនួបផ្លូវការជាមួយឯកឧត្តមប្រធានាធិបតី ម៉ាក្រុង នៅវិមានអេលីហ្សេ។ ជំនួបកំពូលនេះនឹងផ្ដល់ឱកាសដ៏ប្រសើរសម្រាប់រដ្ឋាភិបាលនៃប្រទេសទាំងពីរ និងបញ្ជាក់ជាថ្មីនូវការប្ដេជ្ញាចិត្តរួមក្នុងការលើកកម្ពស់ទំនាក់ទំនងជាប្រពៃណីនៃមិត្តភាពដ៏ស្និទ្ធស្នាល និងល្អប្រសើរឱ្យឈានដល់កម្រិតថ្មី ដាក់ចេញផែនការសកម្មភាពដើម្បីពង្រឹង និងពង្រីកកិច្ចសហប្រតិបត្តិការដែលផ្តល់ប្រយោជន៍ទៅវិញទៅមក ក្នុងក្របខ័ណ្ឌទ្វេភាគី និងពហុភាគី ព្រមទាំងរួមគ្នាដោះស្រាយបញ្ហាប្រឈមសកល និងរក្សាសណ្ដាប់ធ្នាប់ពិភពលោកដែលផ្អែកលើច្បាប់ ឯកសារកិច្ចសហប្រតិបត្តិការមួយចំនួននឹងត្រូវចុះហត្ថលេខាក្នុងអំឡុងពេលទស្សនកិច្ចនេះ។ក្នុងអំឡុងពេលស្នាក់នៅប្រទេសបារាំង សម្ដេចធិបតី ក៏នឹងចូលជួបសម្តែងការគួរសមជាមួយ លោក Gérard ARCHER ប្រធានព្រឹទ្ធសភា និងលោកស្រី Yaël Braun-Pivet ប្រធានរដ្ឋសភាបារាំងផងដែរ។សូមបញ្ជាក់ថា នាអំឡុងបំពេញទស្សនកិច្ចផ្លូវការនៅប្រទេសស្វីសសម្តេចធិបតី នាយករដ្ឋមន្រ្ដី និងលោកជំទាវបណ្ឌិត បានអញ្ជើញបំពេញការងារនៅប្រទេសស្វីសរយៈពេលពីរថ្ងៃ ចាប់ពីថ្ងៃទី១៦ និង១៧ ខែមករា ឆ្នាំ ២០២៤នេះ។ ការងារស្នូលនៅក្នុងប្រទេសស្វីស គឺការអញ្ជើញចូលរួមកិច្ចប្រជុំប្រចាំឆ្នាំនៃវេទិកាសេដ្ឋកិច្ចពិភពលោក។ ក្រៅពីការអញ្ជើញចូលរួមកិច្ចប្រជុំនៃវេទិកាសេដ្ឋកិច្ចពិភពលោក សម្តេចធិបតី ក៏បានឆ្លៀតជួបជាមួយនាយករដ្ឋមន្ត្រីថៃ វៀតណាម មេដឹកនាំអង្គការអន្តរជាតិនានា មេដឹកនាំអង្គការដៃគូអភិវឌ្ឍន៍ ព្រមទាំងមេដឹកនាំក្រុមហ៊ុននានា សរុបដល់ទៅជាង ២០ កម្មវិធី៕ អត្ថបទ៖ វ៉ន ដារ៉ា

យុវជនសង្គមស៊ីវិលខេត្តព្រៃវែងអំពាវនាវរួមគ្នាលុបបំបាត់មនោគមវិជ្ជាខ្មៅកខ្វក់ចេញពីកម្ពុជា និងផ្សព្វផ្សាយអំពី «សៀវភៅខៀវ»

ព្រៃវែង៖ លោក ពៅ សុជាតិ ប្រធានក្រុមយុវជនសង្គមស៊ីវិល នៃសមាគមយុវជនខ្មែរមហានគរ ប្រចាំខេត្តព្រៃវែង នៅថ្ងៃទី១៨ ខែមករា ឆ្នាំ២០២៤ នេះ បានធ្វើយុទ្ធនាការអំពាវនាវដល់បណ្តាលគណបក្សនយោបាយ អង្គការ សមាគម រួមគ្នាលុបបំបាត់មនោគមវិជ្ជាជ្រុលនិយមចេញពីកម្ពុជា។ក្រុមយុវជនសង្គមស៊ីវិលបានលើកឡើងថា ពួកគេទាំងអស់គ្នាជា បណ្តុំអង្គការសង្គមស៊ីវិល សិស្ស និស្សិត ក្រុមសេដ្ឋកិច្ចក្រៅប្រព័ន្ធនានា បានសម្តែងការសោកស្តាយ និងថោ្កលទោសចំពោះមេដឹកនាំក្រុមប្រឆាំងជ្រុលនិយមដែលតែងតែយក សមាជិក សមាជិកា របស់ខ្លួនមកចូលរួមធ្វើអំពើខុសច្បាប់ជាចរិកនយោយបាយ ដែលមិនបានហុចផលជូនសង្គមជាតិ ជាក់ស្តែងមានមេដឹកនាំក្រុមប្រឆាំងជាទណ្ឌិតរស់នៅក្រៅប្រទេស តែងតែញុះញង់បំបែកបំបាក់ បង្កើតគោលនយោបាយ ភូតភរកុហក ប្រជាភិថុត បោកបញ្ឆោតសកម្មជនរបស់ខ្លួនឲ្យជឿលង់មនោគមវិជ្ជាខ្មៅកខ្វក់ បង្កើតបញ្ហាផ្សេងៗរាប់មិនអស់។ក្រុមយុវជនបានលើកឡើងថា នយោបាយក្រុមប្រឆាំង គឺរាប់សិបឆ្នាំមកនេះមិនដែលបានផ្តល់ផលចំណេញជូនជាតិនោះទេមានតែរាំងខ្ទប់ ការអភិវឌ្ឍជាតិ បំផ្លាញវប្បធម៌នយោបាយល្អៗហើយបង្កើតនូវវប្បធម៌នយោបាយអាក្រក់ក្នុងរូបភាពដដែលៗ។ កន្លងមកមុនការបោះឆ្នោតនីតិកាលទី៧ និងរហូតមកពេលបច្ចុប្បន្ននេះ ក្រុមប្រឆាំងជ្រុល បានចេញសារគំរាមក្នុងន័យនយោបាយទុច្ចរិកខ្មៅកខ្វក់ ទន្ទឹមប្រទេសកម្ពុជាកំពុងមាន សុខសន្តិភាព និងការអភិវឌ្ឍពេញលេញ ពិសេសការបង្កើតមហាព្រឹត្តការណ៍ ដ៏អស្ចារ្យក្នុង ប្រវត្តសាស្រ្តកម្ពុជាផងនោះ យើងគួរតែនាំគ្នាអបអរសាទរ និងចូលរួមលើវិថីសន្តិភាព។លោក ពៅ សុជាតិ ថ្លែងថា ក្នុងរយៈពេលនេះជារយៈពេលដ៏មានសារៈសំខាន់បំផុត ក្នុងការពង្រឹងមូលដ្ឋានគ្រឹះសម្រាប់ការអភិវឌ្ឍប្រកបដោយចីរភាព បរិយាបន្ន និងសមធម៌ ដើម្បីសម្រេចនូវចក្ខុវិស័យរយៈពេលមធ្យមរបស់កម្ពុជានៅឆ្នាំ ២០៣០ និងរយៈពេលវែងនៅឆ្នាំ២០៥០។លោកបន្តថា ក្នុងន័យនេះកម្ពុជា ត្រូវការប្រមូលកម្លាំងសរុបរបស់ជាតិទាំងមូល ដើម្បីកសាងប្រទេស និងការពារមាតុភូមិស្របតាមស្មារតីនៃរដ្ឋធម្មនុញ្ញ សំដៅសម្រេចគោលដៅរក្សាសន្តិភាព និងការអភិវឌ្ឍរយៈពេលវែង ការពារឯករាជ្យ អធិបតេយ្យ និងបូរណភាពទឹកដី, ការពារ លទ្ធិប្រជាធិបតេយ្យសេរី ពហុបក្ស និងនីតិរដ្ឋ ការពារសន្តិសុខ សណ្តាប់ធ្នាប់សង្គម និងរួមគ្នាកម្ចាត់ នយោបាយជ្រុលនិយមឱ្យចេញផុតពីកម្ពុជា។ក្រុមយុវជនសង្គមស៊ីវិលក៏បានអំពាវនាវដល់ សកម្មជនប្រឆាំង បែរមកចូលរួមជាមួយរាជរដ្ឋាភិបាល ដើម្បីមានឱកាសកសាងសង្គមជាតិរួមគ្នា កុំបណ្តោយខ្លួនឲ្យជាក្លាយជាឈ្នាន់នយោបាយដែរ អាចបណ្តាលឲ្យក្លាយជាជនរងគ្រោះដល់ខ្លួនឯង ក្រុមគ្រួសារ និងសង្គមជាតិ។ ពិសេសអំពាវនាវដល់បណ្តាលគណបក្សនៅក្នុងប្រទេសកម្ពុជាទាំងអស់រួបរួមគ្នាលុបបំបាត់នយោបាយបំបែកបំបាក់ ទុច្ចរិត និងខ្មៅកខ្វក់របស់ក្រុមប្រឆាំងជ្រុលនិយមឲ្យអស់ចេញពីកម្ពុជា៕

នាយករដ្ឋមន្រ្តីកម្ពុជា និងរដ្ឋមន្រ្តីក្រសួងបរិវត្តកម្មឌីជីថលនៃប្រទេសជប៉ុន បានពិភាក្សាគ្នាជាច្រើនទាក់ទងវិស័យឌីជីថល

នៅក្នុងកិច្ចជំនួបទ្វេភាគី កាលពីថ្ងៃទី១៧ ខែមករា ឆ្នាំ២០២៤ម្សិលមិញ ក្នុងឱកាសអញ្ជើញចូលរួមក្នុងវេទិកាសេដ្ឋកិច្ចពិភពលោកឆ្នាំ២០២៤នៅទីក្រុងដាវ៉ូសសហព័ន្ធស្វីសសម្តេចធិបតី ហ៊ុន ម៉ាណែត នាយក រដ្ឋមន្រ្តីនៃកម្ពុជា និងលោក Kono Taro រដ្ឋមន្ត្រីក្រសួងបរិវត្តកម្មឌីជីថល នៃប្រទេសជប៉ុន បានពិភាក្សា គ្នាជាច្រើនទាក់ទងនិងវិស័យឌីជីថល ខណៈភាគីទាំងពីរចាត់ទុកថា វិស័យឌីជីថលនេះមានតួនាទីយ៉ាងសំ ខាន់ក្នុងការអភិវឌ្ឍប្រទេសឲ្យកាន់តែរីកចម្រើនខ្លាំងក្លាបន្ថែមទៀត។ថ្លែងនៅក្នុងកិច្ចជំនួបនោះលោក Kono Taro បានថ្លែងអំណរគុណយ៉ាងជ្រាលជ្រៅចំពោះសម្ដេចធិបតី ដែលបានអនុញ្ញាតឱ្យលោក និងសហការីបានជួបពិភាក្សាការងារ ហើយលោកបានវាយតម្លៃខ្ពស់ចំពោះការរីកចម្រើននៃកិច្ចសហប្រតិបត្តិការរវាងកម្ពុជា-ជប៉ុន ជាពិសេសលើវិស័យឌីជីថល ពាណិជ្ជកម្ម និងវិស័យអាទិភាពផ្សេងៗទៀតជាដើមនោះ។លោករដ្ឋមន្ត្រីបានជម្រាបជូនសម្ដេចធិបតីថា ក្នុងយុគសម័យឌីជីថល ទិន្នន័យពិតជាមានសារៈសំខាន់ ហើយលោកបានគូសបញ្ជាក់ថា រដ្ឋាភិបាលជប៉ុនបានរៀបចំគំនិតផ្ដួចផ្ដើមស្ដីពីទិន្នន័យអង្គការOECD ដែលគ្របដណ្ដប់លើវិស័យជាច្រើន និងអាចប្រើប្រាស់សម្រាប់ការរៀបចំកសាង និងអភិវឌ្ឍគោលនយោបាយប្រកបដោយប្រសិទ្ធភាព និងដើម្បីជំរុញ និងលើកម្ពស់កម្រិតជីវភាពរស់នៅរបស់ប្រជាពលរដ្ឋ។ ថ្លែងនៅក្នុងកិច្ចជំនួបនោះដែរសម្ដេចធិបតី ហ៊ុន ម៉ាណែត បានសម្ដែងនូវការស្វាគមន៍ និងក្ដីសោមនស្សរីករាយ ដែលបានជួបពិភាក្សាការងារជាមួយ លោករដ្ឋមន្ត្រី និងសហការី និងបានគូសបញ្ជាក់ថា ទំនាក់ទំនងកម្ពុជា-ជប៉ុន ឡើងដល់កម្រិត «ភាពជាដៃគូយុទ្ធសាស្រ្តគ្រប់ជ្រុងជ្រោយ» ដែលជាកម្រិតល្អប្រសើរបំផុតក្នុងប្រវត្តិនៃទំនាក់ទំនងកម្ពុជា-ជប៉ុន។ សម្ដេចធិបតីក៏បានប្រកាសអរគុណចំពោះរដ្ឋាភិបាល និងប្រជាជនជប៉ុន ដែលតែងតែជួយគាំទ្រដល់កម្ពុជា ចាប់តាំងពីដំណាក់កាលកម្ពុជាស្វែងរកសន្ដិភាព រហូតដល់កម្ពុជាមានការអភិវឌ្ឍនរីកចម្រើនលើគ្រប់វិស័យដូចសព្វថ្ងៃនេះផងដែរ។ សម្ដេចធិបតីនាយករដ្ឋមន្រ្តីក៏បានប្រាប់ដល់រដ្ឋមន្រ្តីជប៉ុនរូបនេះផងដែរថា រាជរដ្ឋាភិបាលកម្ពុជាបានផ្តល់អាទិភាពលើបច្ចេកវិទ្យាឌីជីថល ដែលជាសមាសធាតុដ៏សំខាន់នៃការជំរុញប្រភពកំណើនសេដ្ឋកិច្ចថ្មី ព្រមទាំងសម្រេចបានចក្ខុវិស័យនៃការប្រែក្លាយប្រទេសកម្ពុជា ទៅជាប្រទេសចំណូលខ្ពស់នៅឆ្នាំ២០៥០ផងដែរ។ក្នុងកិច្ចជំនួបនោះដែរសម្ដេចធិបតី ហ៊ុន ម៉ាណែត ក៏បានឯកភាពចំពោះការលើកឡើងរបស់លោករដ្ឋមន្ត្រីអំពីសារៈសំខាន់នៃទិន្នន័យឌីជីថលសម្រាប់ការកសាង ក្របខ័ណ្ឌគោលនយោបាយ ហើយរាជរដ្ឋាភិបាលកម្ពុជាបានចាត់ទុកទិន្នន័យនេះជាផែនទីបង្ហាញផ្លូវ និងជាត្រីវិស័យ ដែលជួយឱ្យធ្វើការសម្រេចបានត្រឹមត្រូវ។ ក្រៅពីនេះ សម្ដេចធិបតីបានគូសបញ្ជាក់បន្ថែមអំពីការវិវត្តនៃបច្ចេកវិទ្យាហិរញ្ញវត្ថុនៅកម្ពុជា ដែលបច្ចុប្បន្ន ធនាគារជាតិនៃកម្ពុជាបាននិងកំពុងដាក់ឱ្យប្រើប្រាស់តាមរយៈប្រព័ន្ធទូទាត់អនឡាញ ឆ្លងដែនដើម្បីសម្រួលដល់វិនិយោគិន,ពាណិជ្ជករ,និងប្រតិបត្តិការអាជីវកម្មរបស់សហគ្រាសធុនតូចនិងមធ្យមផងដែរ៕អត្ថបទបាន ចក់

USAIDសន្យាផ្ដល់ជំនួយបន្តទៀតដល់កម្ពុជា សម្រាប់ជួយវិស័យអប់រំ ,បរិស្ថាន និងវិស័យមួយចំនួនទៀត

ប្រធានគ្រប់គ្រងទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិ ដែលហៅកាត់ថាUSAID លោកស្រីSamantha Power បានសន្យាបន្តផ្តល់ជំនួយដល់កម្ពុជាបន្ថែមទៀតសម្រាប់លើកស្ទួយវិស័យអប់រំ បរិស្ថាន និងវិស័យមួយចំនួនទៀតដើម្បីលើកកម្ពស់ជីវភាពដល់សហគមន៍ជាដើម។នៅក្នុងកិច្ចជំនួបជាមួយសម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជានាថ្ងៃទី១៧ ខែមករា ឆ្នាំ២០២៤នេះ ក្នុងឱកាសអញ្ជើញចូលរួមក្នុងវេទិកាសេដ្ឋកិច្ចពិភពលោក ឆ្នាំ២០២៤ នៅទីក្រុងដាវ៉ូស សហព័ន្ធស្វីស លោកស្រី Samantha Power បាន បានបញ្ជាក់ពីការបន្តកិច្ចសហប្រតិបត្តិការដែលមានស្រាប់ និងការបន្តការផ្ដល់ជំនួយលើវិស័យអប់រំ និងបរិស្ថាន ដែលផ្តោតលើការអភិរក្សជីវៈចម្រុះ ការការពារប្រព័ន្ធអេកូឡូស៊ី និងការលើកកម្ពស់ជីវភាពសហគមន៍នៅកម្ពុជា។ក្នុងឱកាសនោះដែរ ប្រធានទីភ្នាក់ងារ USAID បានថ្លែងអំណរគុណជូនចំពោះ សម្តេចធិបតី ដែលបានអនុញ្ញាតឱ្យលោកស្រី និងសហការី បានចូលជួបសម្តែងការគួរសម និងពិភាក្សាការងារ ហើយលោកស្រីបានគោរពជម្រាបជូនសម្តេចធិបតី អំពីវឌ្ឍនភាពការងាររបស់ USAID នៅកម្ពុជា ពិសេសក្នុងកិច្ចសហប្រតិបត្តិការលើវិស័យអប់រំ និងការការពារកុមារតូចតាមរយៈកិច្ចសហប្រតិបត្តិការរវាងUSAID និងក្រសួងអប់រំ យុវជន និងកីឡា ក្នុងការលើកកម្ពស់កម្មវិធីអប់រំ អនាម័យ និងបរិក្ខាសិក្សានៅតាមសាលារៀនសម្រាប់កុមារតូចជាដើម។ ឆ្លៀតក្នុងឱកាសនោះលោកស្រីក៏បានកោតសរសើរ ដល់រាជរដ្ឋាភិបាលកម្ពុជាដែលបានខិតខំប្រឹងប្រែងក្នុងការកាត់បន្ថយអត្រាជំងឺឆ្លង និងកាត់បន្ថយអត្រាមរណភាពរបស់ទារក និងកុមារតូចក្រោមអាយុ៥ឆ្នាំផងដែរ។ ថ្លែងនៅក្នុងកិច្ចជំនួបនោះដែរ សម្តេចធិបតី នាយករដ្ឋមន្រ្តីកម្ពុជា បានសម្តែងនូវក្តីរីករាយ ចំពោះគម្រោងកិច្ចសហប្រតិបត្តិការរបស់ USAIDនៅកម្ពុជា នាពេលកន្លងមក និងបានវាយតម្លៃខ្ពស់ចំពោះការគាំទ្រ និងជំនួយរបស់USAID ដែលបានរួមចំណែកដល់ការអភិវឌ្ឍ និងការរីកចម្រើនសង្គម-សេដ្ឋកិច្ច របស់កម្ពុជា។ជាមួយគ្នានោះសម្តេចនាយករដ្ឋមន្រ្តីក៏បានរំលឹក និងថ្លែងអំណរគុណចំពោះការសម្រេចចិត្តរបស់រដ្ឋាភិបាលសហរដ្ឋអាមេរិកក្នុងការបន្តផ្តល់ជំនួយចំនួន១៨ លានដុល្លារអាមេរិក តាមរយៈ USAID ដល់កម្ពុជា ក្នុងពេលសម្តេចធិបតីបានទទួលជួបពិភាក្សាការងារជាមួយនឹងលោកជំទាវ Victoria Nuland អនុរដ្ឋមន្រ្តីការបរទេសសហរដ្ឋអាមេរិក នាឱកាសអញ្ជើញបំពេញទស្សនកិច្ចទៅចូលរួម មហាសន្និបាតអង្គការសហប្រជាជាតិលើកទី៧៨នៅបុរីញូយ៉កន្លងមកផងដែរ៕អត្ថបទបាន ចក់

ឯកឧត្តម វង្សី វិស្សុត ដឹកនាំកិច្ចប្រជុំអន្តរក្រសួងពិនិត្យ និងពិភាក្សាលើសេចក្តីព្រាងច្បាប់ស្តីពីការដឹកជញ្ជូនតាមផ្លូវទឹក

ភ្នំពេញ៖ ឯកឧត្តម វង្សី វិស្សុត ឧបនាយករដ្ឋមន្រ្តីប្រចាំការ រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី នៅព្រឹកថ្ងៃទី១៧ ខែមករា ឆ្នាំ២០២៤ បានដឹកនាំកិច្ចប្រជុំអន្តរក្រសួង ដើម្បីពិនិត្យ និងពិភាក្សាលើសេចក្តីព្រាងច្បាប់ ស្តីពី ការដឹកជញ្ជូនតាមផ្លូវទឹក ដោយមានការចូលរួមពីសំណាក់ឯកឧត្តម ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន និងសហការី ព្រមទាំងតំណាងក្រសួង ស្ថាប័ន ពាក់ព័ន្ធជាច្រើនរូបនៅទីស្តីការគណៈរដ្ឋមន្រ្តី ។សេចក្តីព្រាងច្បាប់ស្តីពីការដឹកជញ្ជូនតាមផ្លូវទឹក មាន ២៨០ មាត្រា និង ១៨ ជំពូក ហើយត្រូវបានរៀបចំឡើងដោយធ្វើការច្របាច់បញ្ចូលនូវសេចក្តីព្រាងច្បាប់ចំនួន ៣ រួមមាន៖ សេចក្តីព្រាងច្បាប់ស្តីពីការដឹកជញ្ជូនតាមផ្លូវសមុទ្រ សេចក្តីព្រាងច្បាប់ស្តីពីការដឹកជញ្ជូនតាមផ្លូវទឹក និងសេចក្តីព្រាងច្បាប់ស្តីពីកំពង់ផែ។ សេចក្តីព្រាងច្បាប់ស្តីពីការដឹកជញ្ជូនតាមផ្លូវទឹកនេះ កំណត់អំពីការគ្រប់គ្រងនិងការអភិវឌ្ឍវិស័យ ដឹកជញ្ជូនតាមផ្លូវទឹក និងកំពង់ផែនៃព្រះរាជាណាចក្រកម្ពុជា ក្នុងគោលបំណងដើម្បីរក្សាសណ្តាប់ធ្នាប់ ធានាសុវត្ថិភាព និងសន្តិសុខ នៃការដឹកជញ្ជូនតាមផ្លូវទឹក ព្រមទាំងកសាង និងថែរក្សាការពារហេដ្ឋារចនាសម្ព័ន្ធពាក់ព័ន្ធ និងរួមចំណែកការពារបរិស្ថាន ព្រមទាំងផ្តល់កាលានុវត្តភាពវិនិយោគ និងការប្រកួតប្រជែង ប្រកបដោយយុត្តិធម៌ សមធម៌ និងតម្លាភាព សម្រាប់បម្រើពាណិជ្ជកម្មជាតិ និងអន្តរជាតិ និងទ្រទ្រង់ការអភិវឌ្ឍសេដ្ឋកិច្ចជាតិ។សេចក្តីព្រាងច្បាប់ស្តីពីការដឹកជញ្ជូនតាមផ្លូវទឹកនេះ នឹងចូលរួមជំរុញការអភិវឌ្ឍ ហេដ្ឋារចនាសម្ព័ន្ធ ផ្លូវទឹក កំពង់ផែ និងការដឹកជញ្ជូនតាមផ្លូវទឹក ដែលជាសរសៃឈាមនៃប្រព័ន្ធគមនាគមន៍ និងឡូជីស្ទីកដ៏ សំខាន់នៅកម្ពុជា ពិសេសការដឹកជញ្ជូន តាមទន្លេ ផ្ទៃក្នុងប្រទេស ដែលមានថ្លៃថោក តែបច្ចុប្បន្នមិនទាន់ ត្រូវបានប្រើប្រាស់ឱ្យអស់សក្តានុពល និងមានប្រសិទ្ធ ភាពនៅឡើយ ក៏ដូចជាដើម្បីដោះស្រាយបញ្ហា ប្រឈមមួយចំនួនក្នុងវិស័យដឹកជញ្ជូនតាមផ្លូវទឹក ដើម្បីឆ្លើយតបទៅនឹងដំណើរវិវត្តន៍ឈានឡើងជាលំដាប់នៃសង្គម-សេដ្ឋកិច្ចកម្ពុជា ក្នុងដំណើរឆ្ពោះទៅ ជាប្រទេសចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសចំណូលខ្ពស់នៅឆ្នាំ២០៥០៕

លោក Trump ចូលតុលាការសម្រាប់ការកាត់ទោសពីបទបរិហារកេរ្តិ៍លើកទីពីរ បន្ទាប់ពីជ័យជម្នះនៅរដ្ឋ Iowa

បន្ទាប់ពីជ័យជម្នះនៃយុទ្ធនាការនៅរដ្ឋ Iowa លោក Donald Trump បានអង្គុយនៅក្នុងបន្ទប់សវនាការនៅទីក្រុងញូវយ៉ក កាលពីថ្ងៃអង្គារ ដើម្បីការពារខ្លួនលោកជាលើកទីពីរ ប្រឆាំងបទចោទប្រកាន់ថា លោកបានបរិហារកេរ្តិ៍អ្នកនិពន្ធម្នាក់ លោកស្រី E Jean Carroll បន្ទាប់ពីលោកស្រី បានចោទប្រកាន់លោក ពីបទរំលោភ កាលពីជាច្រើនទសវត្សរ៍កន្លងទៅនេះ។ លោក Trump បានមើលពីតុរបស់ចុងចោទ ខណៈដែលមេធាវីរបស់លោកស្រី Carroll បានប្រាប់គណៈវិនិច្ឆ័យថា ក្រោយមកប្រធានាធិបតីអាមេរិករូបនេះ បានធ្វើឱ្យជីវិតរបស់លោកស្រី ជួបទុក្ខលំបាក នៅពេលលោកស្រីដើរចេញជាសាធារណៈក្នុងឆ្នាំ ២០១៩ ដោយរឿងរ៉ាវ ដែលលោកបាននិយាយវាយប្រហារ នៅក្នុងបន្ទប់សំលៀកបំពាក់នៅហាងមួយកន្លែង ក្នុងទីក្រុង Manhattan ។ មេធាវី លោក Shawn Crowley បាននិយាយថា លោកTrump បានប្រើប្រាស់មីក្រូហ្វូនធំបំផុតរបស់ពិភពលោកដើម្បីនិយាយវាយប្រហារលោកស្រី Carroll ធ្វើឱ្យលោកស្រីអាម៉ាស់មុខ និងបំផ្លាញកេរ្តិ៍ឈ្មោះរបស់លោកស្រី។ លោកស្រី Carroll អាយុ ៨០ ឆ្នាំ កំពុងស្វែងរកការខូចខាតយ៉ាងហោចណាស់ ១០ លានដុល្លារអាមេរិកនៅក្នុងសំណុំរឿងរដ្ឋប្បវេណី ដែលនឹងធ្វើឱ្យការចោទប្រកាន់ពីបទរំលោភផ្លូវភេទនេះ ត្រឡប់ទៅដើមរឿងវិញ ខណៈលោកត្រាំ បន្តការតែងតាំងតំណែងប្រធានាធិបតីគណបក្សសាធារណរដ្ឋឆ្នាំ ២០២៤ ។ ចៅក្រម នឹងពិចារណាតែថាតើលោក Trump គួរតែបង់ថ្លៃខូចខាតដល់លោកស្រី Carroll ចំនួនប៉ុនហ្មាន។ លោកត្រាំ បានទទួលជ័យជម្នះការប្រកួតប្រជែងដំបូងនៅរដ្ឋ Iowa កាលពីថ្ងៃចន្ទ ដោយកម្រិតទូលំទូលាយ ហើយការបោះឆ្នោតស្ទង់មតិ បង្ហាញថា លោកនាំមុខគេក្នុងការប្រកួតប្រជែងបន្ទាប់នៅរដ្ឋ New Hampshire ក្នុងមួយសប្តាហ៍ទៀត ចាប់ពីថ្ងៃនេះទៅ។ លោក Trump បាននិយាយពីភាពគ្មានទោស នៅក្នុងសំណុំរឿងព្រហ្មទណ្ឌចំនួនបួន ដែលអាចធ្វើឲ្យលោកជាប់ពន្ធនាគារ មុនពេលការបោះឆ្នោតប្រធានាធិបតី នៅខែវិច្ឆិកា រួមទាំងករណីចំនួនពីរដែលចោទប្រកាន់លោកពីការព្យាយាមផ្តួលរំលំការចាញ់ឆ្នោតរបស់លោកកាលពីឆ្នាំ២០២០ ចំពោះគណបក្សប្រជាធិបតេយ្យ លោក Joe Biden ។

កម្ពុជា-ហុងគ្រី ឯកភាពពង្រីកកិច្ចសហប្រតិបត្តិការជាមួយគ្នាបន្ថែមទៀត លើវិស័យអាទិភាពពាក់ព័ន្ធចំនួន៩

ភ្នំពេញ៖ នៅទីក្រុងប៊ុយដាប៉ែស ប្រទេសហុងគ្រី កាលពីថ្ងៃទី៩ ខែមករា ឆ្នាំ២០២៤នេះ លោកជំទាវ តឹករ៉េត កំរង រដ្ឋលេខាធិការនៃក្រសួងពាណិជ្ជកម្មកម្ពុជា និងឯកឧត្តម ទ្រីស្ពាន អាហ្សបេទ្យ (Tristan AZBEJ) រដ្ឋលេខាធិការនៃក្រសួងការបរទេស និងពាណិជ្ជកម្មហុងគ្រី បានបើកកិច្ចប្រជុំលើកទី២ នៃគណៈកម្មការចម្រុះ ស្តីពីកិច្ចសហប្រតិបត្តិការលើវិស័យសេដ្ឋកិច្ច រវាងកម្ពុជានិងហុងគ្រី។ក្រសួងពាណិជ្ជកម្មកម្ពុជា នៅក្នុងសេចក្តីប្រកាសព័ត៌មាន ចេញផ្សាយនៅថ្ងៃទី១៧ ខែមករានេះ បានបញ្ជាក់ថា ជាលទ្ធផលនៃកិច្ចប្រជុំលើកទី២នេះ ភាគីទាំងពីរ បានកត់សម្គាល់អំពីវឌ្ឍនភាពនៃកិច្ចសហប្រតិបត្តិការលើគ្រប់វិស័យ ជាពិសេសការកើនឡើងនៃទំហំពាណិជ្ជកម្មទ្វេភាគីនៅឆ្នាំ២០២២ ប្រមាណ៨៤% ធៀបនឹងឆ្នាំ២០២១ ដែលនេះបង្ហាញពីជំហានវិជ្ជមានគួរឱ្យកត់សម្គាល់ និងបានឯកភាពក្នុងការខិតខំពង្រឹងបន្ថែមនូវកិច្ចសហប្រតិបត្តិការលើវិស័យអាទិភាព មានចំនួន៩ ដូចជា៖ ១)វិស័យពាណិជ្ជកម្ម និងសេដ្ឋកិច្ច ២) កិច្ចសហប្រតិបត្តិការលើគម្រោងឥណទាន ៣) កិច្ចសហប្រតិបត្តិការលើវិស័យគ្រប់គ្រងធនធានទឹក និងបរិស្ថាន ៤) កិច្ចសហប្រតិបត្តិការលើវិស័យកសិកម្ម ៥) កិច្ចសហប្រតិបត្តិការលើការអភិវឌ្ឍអន្តរជាតិ ៦) កិច្ចសហប្រតិបត្តិការលើមូលនិធិហិរញ្ញវត្ថុដែលគ្រប់គ្រង ដោយគណៈកម្មការអឺរ៉ុប ៧) វិស័យអប់រំ យុវជន និងកីឡា ៨) វិស័យវប្បធម៌ និង៩) វិស័យអាកាសចរស៊ីវិល។សេចក្តីប្រកាសដដែលនេះ បានឲ្យដឹងទៀតថា សម្រាប់កិច្ចប្រជុំខាងលើនេះរៀបចំឡើង ក្នុងគោលបំណងតាមដានវឌ្ឍនភាពការងារ និងដើម្បីជំរុញកិច្ចសហប្រតិបត្តិការ លើវិស័យសេដ្ឋកិច្ច ពាណិជ្ជកម្ម វិនិយោគ និងវិស័យអាទិភាពផ្សេងៗឱ្យកាន់តែល្អប្រសើរស្របតាមខ្លឹមសារនៃ កិច្ចព្រមព្រៀង ស្តីពីកិច្ចសហប្រតិបត្តិការសេដ្ឋកិច្ច រវាងកម្ពុជានិងហុងគ្រី ដែលត្រូវបានចុះហត្ថលេខានៅថ្ងៃទី១៣ ខែមិថុនា ឆ្នាំ២០១៩ នាអំឡុងពេល សម្តេចតេជោ ហ៊ុន សែន អតីតនាយករដ្ឋមន្ត្រីនៃកម្ពុជា ធ្វើដំណើរទស្សនកិច្ចផ្លូវការនៅប្រទេសហុងគ្រី។ក្រសួងពាណិជ្ជកម្មកម្ពុជា បានបញ្ជាក់ថា សម្រាប់វិស័យសេដ្ឋកិច្ច និងពាណិជ្ជកម្ម ភាគីទាំងពីរ បានបង្ហាញឆន្ទៈខ្ពស់ក្នុងការបន្តបង្កើន ទំហំពាណិជ្ជកម្មទ្វេភាគីឱ្យឈានដល់កម្រិតសក្តានុពល និងបានជំរុញលើកទឹកចិត្តឱ្យធុរជន និងវិនិយោគិន ស្វែងរក កាលានុវត្តភាពធុរកិច្ចបន្ថែម ជាពិសេសក្នុងវិស័យសំខាន់ៗដូចជា៖ ផលិតផលនិងបច្ចេកវិទ្យាកសិកម្ម កម្មន្តសាល បរិស្ថាន សុខភាព និងបច្ចេកវិទ្យាគមនាគមន៍ និងព័ត៌មាន(ICT)។ ស្របគ្នានេះដែរ ភាគីទាំងពីរក៏បានពិភាក្សាអំពី កិច្ចសហប្រតិបត្តិការ និងការគាំទ្រសម្រាប់ដំណើរការចាកចេញពីឋានៈប្រទេសអភិវឌ្ឍន៍តិចតួច (LDCs) របស់កម្ពុជា នាពេលខាងមុខ។គិតត្រឹមរយៈពេល១១ខែ ឆ្នាំ២០២៣កន្លងទៅ ទំហំពាណិជ្ជកម្មកម្ពុជា-ហុងគ្រី សម្រេចបានចំនួន ៧,៧លានដុល្លារអាម៉េរិក កើនឡើង ៩,៥៣% ប្រៀបធៀបរយៈពេលដូចគ្នាទៅនឹងឆ្នាំ២០២២។ ក្នុងនោះ កម្ពុជានាំចេញទំនិញសំខាន់ៗទៅទីផ្សារហុងគ្រី រួមមាន៖ គ្រាប់ធញ្ញជាតិ ថ្នាំជក់ ឧបករណ៍អគ្គិសនី សំលៀកបំពាក់ បរិធានមេកានិក ដែកថែប និងស្បែកជើង។ រីឯទំនិញនាំចូលពីហុងគ្រី រួមមាន៖ ឱសថ ម៉ាស៊ីននិងបរិធានមេកានិក ប្រដាប់ក្មេងលេង ផលិតផលធ្វើពីទឹកដោះជាដើម៕

រដ្ឋមន្រ្តីកសិកម្ម រម្លឹកមន្រ្តីក្រោមឱវាទត្រូវបង្កើនកិច្ចសហការជាមួយគ្នាឲ្យបានល្អ ដើម្បីជួយកសិករទៅមុខបន្តទៀត

ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានក្រើនរម្លឹកទៅដល់មន្រ្តីក្រោមឱវាទគ្រប់អនុវិស័យទាំងអស់ ត្រូវយកចិត្តទុកដាក់ និងធ្វើការជាមួយគ្នាឱ្យបានល្អថែមទៀត ដើម្បីរួមគ្នាដោះស្រាយរាល់បញ្ហាប្រឈមរបស់ប្រជាកសិករ និងត្រូវពិនិត្យតាមដានឲ្យបានទៀងទាត់ទៅលើស្ថានភាពកសិកម្មដូចគ្នាផងដែរ។ក្នុងឱកាសអញ្ញើញចូលរួមក្នុងពិធីបិទកិច្ចប្រជុំបូកសរុបលទ្ធផលការងារអនុវិស័យដំណាំ នៅថ្ងៃទី១៦ ខែមករា ឆ្នាំ២០២៤កន្លងទៅ ឯកឧត្តមរដ្ឋមន្ត្រី បានលើកឡើងនូវកម្មវិធីគោលនយោបាយអាទិភាពទី៥ និងទី៦ ដែលជាត្រីវិស័យក្នុងជំរុញ គោលនយោបាយកសិកម្មឈានទៅរកភាពជោគជ័យ ធានាបាននូវស្ថិរភាពការផ្គត់ផ្គង់ និងតម្លៃ តាមរយៈការជំរុញសហគមន៍កសិកម្មទំនើបដែលបម្រើឱ្យវិស័យកសិកម្មទាំងមូល ព្រមទាំងការដាក់ពង្រាយមន្ត្រីកសិកម្មឃុំឱ្យចំទិសដៅ និងដល់មូលដ្ឋាន ដើម្បីជួយដល់កសិករទាំងបច្ចេកទេស ទីផ្សារ និងបញ្ហាប្រឈមផ្សេងៗឱ្យបានទាន់ពេលវេលា និងមានប្រសិទ្ធភាព។ ឯកឧត្តមរដ្ឋមន្ត្រី បានលើកទឹកចិត្តបន្ថែមឲ្យគ្រប់អនុវិស័យទាំងអស់ ត្រូវយកចិត្តទុកដាក់ សហការឱ្យបានល្អ ដោយត្រូវមានការសិក្សានិងវាយតម្លៃច្បាស់លាស់ទាំងទិដ្ឋភាពបច្ចេកទេស ច្បាប់ និងនយោបាយ។ លើសពីនេះទៀត ត្រូវមានផែនការជាក់លាក់ ស្របតាមគោលនយោបាយ ហើយត្រូវពិនិត្យតាមដានស្ថានភាពកសិកម្មជាទៀងទាត់ រៀបចំយុទ្ធសាស្ត្រកាត់បន្ថយថ្លៃដើមផលិត សំដៅផ្តល់ផលចំណេញដល់កសិករ និងមិនបង្កើតបញ្ហា ឬផលប៉ះពាល់ផ្សេងៗដល់សន្តិសុខស្បៀងទាំងក្នុងស្រុក និងការនាំចេញកសិផល ព្រមទាំងផលិតផលកសិកម្ម។ទោះជាយ៉ាងណា ឯកឧត្តមរដ្ឋមន្ត្រី ក៏មិនភ្លេចសម្តែងនូវការកោតសរសើរ និងវាយតម្លៃខ្ពស់ ចំពោះកិច្ចខិតខំប្រឹងប្រែងរបស់មន្រ្តីទាំងអស់ ដែលបានអនុវត្តការងារប្រកប ដោយការទទួលខុសត្រូវ មានភាពម្ចាស់ការ និងសម្រេចបានលទ្ធផលល្អក្នុមួយឆ្នាំ២០២៣កន្លងមកនេះ។ ជាមួយគ្នានេះ ឯកឧត្តម បានគូសបញ្ជាក់អំពីគោលនយោបាយរបស់ក្រសួង ដែលចាំបាច់ត្រូវធានាសន្តិសុខស្បៀង និងរក្សានិរន្តរភាពសេដ្ឋកិច្ចនិងបរិស្ថាន៕ អត្ថបទ ឈិត បូរ៉ាវី

ចំនួនប្រជាជនរបស់ចិនបានធ្លាក់ចុះសម្រាប់ឆ្នាំទី២ ដែលបង្កើនការព្រួយបារម្ភអំពីកំណើនសេដ្ឋកិច្ចរយៈពេលវែង

ចំនួនប្រជាជនរបស់ប្រទេសចិនបានធ្លាក់ចុះសម្រាប់ឆ្នាំទី២ ជាប់គ្នាក្នុងឆ្នាំ២០២៣ ដោយសារអត្រាកំណើតធ្លាក់ចុះ និងរលកនៃការស្លាប់ដោយសារវីរុស COVID-19 នៅពេលវិធានការបិទខ្ទប់ដ៏តឹងរ៉ឹងបានបញ្ចប់ បានបង្កើនល្បឿននៃការធ្លាក់ចុះដែលនឹងមានឥទ្ធិពលយូរអង្វែងលើសក្តានុពលកំណើនសេដ្ឋកិច្ច របស់ប្រទេសនេះ។ ការិយាល័យស្ថិតិជាតិបាននិយាយថាចំនួនប្រជាជនសរុបនៅក្នុងប្រទេសចិនបានធ្លាក់ចុះពី២,៧៥ លាននាក់មកនៅត្រឹម១,៤០៩លាន ក្នុងឆ្នាំ២០២៣ ជាការធ្លាក់ចុះលឿនជាងកាលពីឆ្នាំ២០២២ ដែលជាការធ្លាក់ចុះជាលើកដំបូងចាប់តាំងពីឆ្នាំ១៩៦១ក្នុងអំឡុងគ្រោះទុរ្ភិក្សដ៏ធ្ងន់ធ្ងរនៃសម័យកាលរបស់លោក ម៉ៅសេទុង(Mao Zedong)។ ប្រទេសចិនបានឆ្លងកាត់ការកើនឡើងនៃវីរុស COVID-19 នៅទូទាំងប្រទេសកាលពីដើមឆ្នាំមុន បន្ទាប់ពីការតាមដានយ៉ាងតឹងរ៉ឹងរយៈពេលបីឆ្នាំ និងវិធានការដាក់ឱ្យនៅដាច់ដោយឡែក រហូតដល់ក្រុមអាជ្ញាធរបានលុបចោលវិធានការទប់ស្កាត់ភ្លាមៗកាលពីខែធ្នូ ឆ្នាំ ២០២២។ អត្រាកំណើតរបស់ប្រទេសនេះ បានធ្លាក់ចុះអស់ជាច្រើនទសវត្សរ៍មកហើយ ដោយសារគោលនយោបាយមានកូនតែមួយ ដែលបានអនុវត្តពីឆ្នាំ១៩៨០ ដល់ឆ្នាំ ២០១៥ និងលំហូរអ្នកចូលទៅរស់នៅក្នុងទីក្រុងយ៉ាងឆាប់រហ័សក្នុងអំឡុងពេលនោះ។ ដូចទៅនឹងការរីកចំរើនផ្នែកសេដ្ឋកិច្ចមុនៗនៅក្នុងប្រទេសជប៉ុន និងកូរ៉េខាងត្បូង ប្រជាជនដ៏ច្រើន បានផ្លាស់ប្តូរទីលំនៅពីកសិដ្ឋានជនបទនានារបស់ប្រទេសចិន ចូលទៅកាន់ទីក្រុង ជាទីដែលការមានកូនមួយៗ ត្រូវចំណាយច្រើនជាងជនបទ។យោងតាមការប៉ាន់ប្រមាណរបស់អង្គការសហប្រជាជាតិ ចំនួនប្រជាជនរបស់ប្រទេសឥណ្ឌាបានឈ្នះដាច់ប្រទេសចិន ជាប្រទេសដែលមានប្រជាជនច្រើនជាងគេបំផុតរបស់ពិភពលោកកាលពីឆ្នាំមុន ដោយជំរុញឱ្យមានការជជែកវែកញែកកាន់តែច្រើនអំពីគុណសម្បត្តិនៃការផ្លាស់ប្តូរខ្សែសង្វាក់ផ្គត់ផ្គង់ដែលមានមូលដ្ឋាននៅប្រទេសចិនមួយចំនួនទៅកាន់ទីផ្សារផ្សេងទៀត ជាពិសេសនៅពេលដែលភាពតានតឹងផ្នែកភូមិសាស្ត្រនយោបាយកើនឡើងរវាងទីក្រុងប៉េកាំង និងទីក្រុងវ៉ាស៊ីនតោន៕

បណ្ដាញសង្គម

ព័ត៌មានថ្មីៗ

រដ្ឋមន្រ្តីសុខាភិបាល អនុញ្ញាតឱ្យគណៈកម្មការប្រយុទ្ធប្រឆាំងផលិតផលក្លែងក្លាយ ដែលបង្កគ្រោះថ្នាក់មានហានិភ័យខ្ពស់ដល់សុខភាព និងសុវត្ថិភាពសង្គម ជួបសម្តែងការគួរសម និងពិភាក្សាការងារ

រ៉្វាន់ដា៖ ការអំពាវនាវរបស់កុងហ្គោឲ្យ UN ទទួលស្គាល់មាន «អំពើប្រល័យពូជសាសន៍» គឺជាទង្វើ «ល្ងង់ខ្លៅ»

វិមានក្រឹមឡាំងបដិសេធមិនធ្វើអត្ថាធិប្បាយ ជុំវិញឧប្បត្តិហេតុយានដ្រូន នៅប៉ូឡូញ

ក្រុមបារាំងកៀរគរគ្នាដើម្បីបេតិកភណ្ឌកម្ពុជា

នាយករដ្ឋមន្ត្រីអង់គ្លេស៖ ការរំលោភរបស់រុស្ស៊ីលើដែនអាកាសប៉ូឡូញ គឺជា «ធ្វេសប្រហែសខ្លាំងណាស់»

សមាជិកព្រឹទ្ធសភាអូស្ត្រាលីស្តាំនិយម ត្រូវបណ្តេញចេញពីក្រសួងស្រមោល ជុំវិញការអត្ថាធិប្បាយប្រឆាំងឥណ្ឌា

ក្រុងច្បារមន និងខេត្តកំពង់ស្ពឺ ទទួលបាន ជ័យលាភី “ទីក្រុងទេសចរណ៍គ្មានផ្សែងបារី”

ក្រុមហ៊ុនអាកាសចរណ៍ JAL រងការព្រមានជាលើកទី២ ពាក់ព័ន្ធនឹងអ្នកបើកបរយន្តហោះស្រវឹង

ប្រមុខគណៈកម្មការ EU បញ្ជាក់ថា លោកស្រីនឹងស្នើវិធានការថ្មីផ្ដោតលើអ៊ីស្រាអែល

សំឡេងផ្ទុះបន្លឺឡើង ក្រោយរថយន្តផ្លូវដែកផ្ទុកដោយឥន្ធនៈ មានអគ្គិភ័យ នៅលីទុយអានី

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

នយោបាយ​ និង ការអភិវឌ្ឍន៍