នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ក្រុមការងារបច្ចេកទេសអន្តរក្រសួងបន្តចុះកំណត់និយាមកា និងបោះបង្គោលព្រំដីតាមបណ្តោយព្រែកជីកហ្វូណនតេជោ សម្រាប់កំណាត់ទី២ ក្នុងភូមិសាស្រ្តខេត្តកំពត
សម្ដេចតេជោ ជំរុញឱ្យកម្ពុជា-កូរ៉េខាងត្បូងលើកកម្ពស់ទំនាក់ទំនងភាពជាដៃគូយុទ្ធសាស្រ្តគ្រប់ជ្រុងជ្រោយក្នុងឱកាសខួប៣០ឆ្នាំនៃទំនាក់ទំនងប្រទេសទាំងពីរ
ទូតកូរ៉េខាងត្បូងជម្រាបសម្ដេចតេជោថា ស្ពានមិត្តភាពកម្ពុជា-កូរ៉េខាងត្បូងនឹង​បើកការដ្ឋាន​សាង​សង់​នៅ​ឆ្នាំ២០២៦
គណៈកម្មការអន្តរក្រសួងចុះពិនិត្យវាយតម្លៃការងារថែទាំផ្លូវចំនួន៨ខ្សែ ក្នុងខេត្តពោធិ៍សាត់

នយោបាយ​ និង ការអភិវឌ្ឍន៍

តម្លៃអង្ករកើនឡើងដល់កម្រិតខ្ពស់បំផុតក្នុងរយៈពេលជិត១៥ឆ្នាំនៅអាស៊ី

2023/08/10 12:20:41 pm        81
Facebook Telegram Linkin
អាស៊ី៖ របាយការណ៍ប្រព័ន្ធផ្សព្វផ្សាយបាននិយាយថា តម្លៃអង្ករបានឡើងដល់កម្រិតខ្ពស់បំផុតក្នុងរយៈពេលជិត១៥ឆ្នាំនៅក្នុងទ្វីបអាស៊ី ជំរុញឲ្យមានកង្វល់កាន់តែខ្លាំងឡើងលើការផ្គត់ផ្គង់ពិភពលោក ខណៈដែលអាកាសធាតុស្ងួតគំរាមកំហែងដល់ផលិតកម្មនៅក្នុងប្រទេសថៃ ព្រមទាំងបន្ទាប់ពីក្រុមហ៊ុនដឹកជញ្ជូនដ៏ធំរបស់ឥណ្ឌា បានហាមឃាត់ការនាំចេញនៃប្រភេទអង្ករមួយចំនួន។របាយការណ៍នោះបាននិយាយថា អង្ករមានសារៈសំខាន់សម្រាប់របបអាហាររបស់មនុស្សរាប់ពាន់លាននាក់នៅអាស៊ី និងអាហ្រ្វិក ហើយកំណើននៃតម្លៃអាចបន្ថែមសម្ពាធអតិផរណា និងជំរុញតម្លៃនាំចូលសម្រាប់អ្នកទិញ។ ការគំរាមកំហែងចុងក្រោយក្នុងការផ្គត់ផ្គង់ គឺមកពីប្រទេសថៃ ដែលជាប្រទេសផ្គត់ផ្គង់អង្ករធំបំផុតទីពីររបស់ពិភពលោក។ ទីភ្នាក់ងារព័ត៌មាន Bloomberg បានរាយការណ៍ថា ក្រុមអាជ្ញាធរប្រទេសថៃកំពុងលើកទឹកចិត្តកសិករឱ្យប្តូរទៅដាំដំណាំដែលត្រូវការទឹកតិច ខណៈដែលប្រទេសនេះកំពុងប្រឈមមុខនឹងស្ថានភាពស្ងួត ជាមួយនឹងការចាប់ផ្តើមនៃបាតុភូតអាកាសធាតុ អ៊ែលនីញ៉ូ។កំណើនតម្លៃនឹងធ្វើឱ្យមានភាពតានតឹងកាន់តែខ្លាំងឡើងនៅក្នុងទីផ្សារម្ហូបអាហារពិភពលោក ដែលត្រូវបានរង្គោះរង្គើដោយអាកាសធាតុដ៏ធ្ងន់ធ្ងរ និងកាត់បន្ថយការផ្គត់ផ្គង់គ្រាប់ធញ្ញជាតិពីតំបន់សមុទ្រខ្មៅដោយសារតែសង្គ្រាមរុស្ស៊ី និងអ៊ុយក្រែន៕

ខ្យល់បក់និងភ្លៀងធ្លាក់ខ្លាំង វាយបក់មកលើកូរ៉េខាងត្បូង ខណៈព្យុះ Khanun ធ្វើឲ្យមានបំណាក់ដី

2023/08/10 12:18:20 pm        70
Facebook Telegram Linkin
កូរ៉េខាងត្បូង៖ ទឹកភ្លៀង បានធ្លាក់នៅទីក្រុងកំពុងផែ Busan ភាគខាងត្បូង ប្រទេសកូរ៉េខាងត្បូងនៅព្រឹកថ្ងៃព្រហស្បតិ៍ទី១០ ខែសីហានេះ ខណៈព្យុះទីហ្វុងKhanun បង្កឲ្យមានបំណាក់ដីនៅឆ្នេរភាគខាងត្បូងរបស់ប្រទេស។ ការព្រមានជាច្រើន ត្រូវបានចេញនៅទូទាំងប្រទេសកូរ៉េខាងត្បូង ដោយជើងហោះហើរជាង៣៣០ជើង ត្រូវបានលុបចោល ហើយមនុស្សជាង១ម៉ឺននាក់ ត្រូវបានជម្លៀស។ ព្យុះទីហ្វុង Khanun ស្ថិតនៅលើមហាសមុទ្រ ហើយកំពុងឆ្លងកាត់នៅចន្លោះកោះ Kyushu និងកោះធំនៅភាគនិរតីប្រទេសជប៉ុនមានចម្ងាយប្រមាណ៨៦០គីឡូម៉ែត្រពីទីក្រុងតូក្យូ និងឧបទ្វីបកូរ៉េ។ដោយមានបរិយាកាសសើម ពីព្យុះទីហ្វុង Khanun ភ្លៀងធ្លាក់ខ្លាំង ត្រូវបានគេរំពឹងថា នឹងធ្លាក់នៅជុំវិញប្រទេសកូរ៉េភាគខាងត្បូង ហើយរដ្ឋបាលឧតុនិយមកូរ៉េនិយាយថា ព្យុះទីហ្វុងកំពុងវាយបក់ឆ្ពោះទៅភាគខាងជើង ក្នុងល្បឿន២២គីឡូម៉ែត្រក្នុងមួយម៉ោង។ រដ្ឋបាលឧតុនិយមកូរ៉េនិយាយថា ការកើនឡើងខ្លាំងនៃព្យុះទីហ្វុង Khanun ត្រូវបានព្យាករណ៍ថា នឹងថយចុះមកដល់កម្រិតមធ្យម ពីកម្រិតខ្លាំង៕

មនុស្ស៣នាក់បានស្លាប់នៅប្រទេសអូស្ត្រាលី បន្ទាប់ពីបរិភោគផ្សិតព្រៃមានជាតិពុល

2023/08/10 12:14:45 pm        114
Facebook Telegram Linkin
អូស្ត្រាលី៖ នគរបាលអូស្ត្រាលីបាននិយាយនៅក្នុងសន្និសីទសារព័ត៌មានមួយកាលពីថ្ងៃចន្ទថា មនុស្ស៣នាក់បានស្លាប់ និងមនុស្សម្នាក់ស្ថិតក្នុងស្ថានភាពធ្ងន់ធ្ងរពីការបរិភោគផ្សិតពុល។យោងតាមការចេញផ្សាយរបស់សារព័ត៌មានកាលពីថ្ងៃទី៥ ខែសីហា បានឲ្យដឹងថា ក្រុមនគរបាលប្រឆាំងមនុស្សឃាត វីកតូរៀ បាននិយាយថា មនុស្ស៤នាក់ត្រូវបានបញ្ជូនទៅមន្ទីរពេទ្យ បន្ទាប់ពីទទួលទានអាហារនៅផ្ទះឯកជនមួយកន្លែងនៅទីក្រុង Leongatha ដែលទីក្រុងមួយនៅភាគអាគ្នេយ៍នៃប្រទេសអូស្ត្រាលីកាលពីថ្ងៃទី២៩ ខែកក្កដា នៅពេលនោះនគរបាលបាននិយាយថាស្ត្រីពីរនាក់ វ័យ៦៦ឆ្នាំ និងវ័យ៧០ឆ្នាំ ព្រមទាំងបុរសម្នាក់វ័យ៧០ឆ្នាំបានស្លាប់ បន្ទាប់ពីឧប្បត្តិហេតុនោះ។ ជនរងគ្រោះទី៤ ភេទប្រុស វ័យ៦៨ឆ្នាំ កំពុងសម្រាកព្យាបាលនៅមន្ទីរពេទ្យ ។ក្រុមស៊ើបអង្កេតករណីឃាតកម្មបាននិងកំពុងស៊ើបអង្កេតករណីនេះ។ នគរបាលបានសម្ភាសនារីម្នាក់នោះ ដែលសារព័ត៌មាន BBC កំណត់អត្តសញ្ញាណថាឈ្មោះអ្នកស្រី Erin Patterson ជាអ្នកចម្អិនម្ហូបនៅផ្ទះរបស់ខ្លួនកាលពីថ្ងៃទី២៩ ខែកក្កដា ប៉ុន្តែមិនបានធ្លាក់ខ្លួនឈឺនោះទេ។ ណគរបាលបានដោះលែងអ្នកស្រី Patterson ដោយមិនបានចោទប្រកាន់អ្វីឡើយ ប៉ុន្តែនិយាយថា អ្នកស្រីនៅតែជាជនសង្ស័យ។នាយកដ្ឋាននគរបាល វីកតូរៀ លោកអធិការ Dean Thomas បាននិយាយថា គេមិនច្បាស់ថាផ្សិតប្រភេទណាដែលអ្នកទាំងនោះបានបរិភោគនោះទេ ប៉ុន្តែរោគសញ្ញារបស់ពួកគេគឺស្របទៅនឹងរោគសញ្ញាដែលកើតឡើងបណ្ដាលពីផ្សិតមួកមរណៈ ជាផ្សិតមានជាតិពុលខ្លាំងមួយប្រភេទ៕

លោក Biden មិនទំនងជាចូលរួមកិច្ចប្រជុំកំពូលអាស៊ាននៅខែកញ្ញានោះទេក្នុងដំនើរទស្សនកិច្ចមកអាស៊ី

2023/08/10 12:12:17 pm        66
Facebook Telegram Linkin
អាមេរិក៖ប្រភពជាច្រើន បានប្រាប់សារព័ត៌មានរ៉យទ័រថា ប្រធានាធិបតីសហរដ្ឋអាមេរិក លោក Joe Biden មិនទំនងជាចូលរួមក្នុងកិច្ចប្រជុំកំពូលជាមួយមេដឹកនាំអាស៊ីអាគ្នេយ៍នៅក្នុងទីក្រុងហ្សាកាតាប្រទេសឥណ្ឌូនេស៊ីនៅខែក្រោយនោះទេ ជាអវត្តមានដែលនឹងលើកឡើងជាសំនួរជាច្រើនអំពីការប្តេជ្ញាចិត្តរបស់សហរដ្ឋអាមេរិកមកកាន់តំបន់មួយដែលចាំចាប់ក្នុងកិច្ចប្រឹងប្រែងរបស់ខ្លួនដើម្បីរុញច្រានប្រឆាំងឥទ្ធិពលដែលកំពុងពង្រីករបស់ប្រទេសចិន។ លោក Biden បានកំណត់ពេលចូលរួមកិច្ចប្រជុំកំពូលG20 នៅក្នុងប្រទេសឥណ្ឌា នៅថ្ងៃទី៩ ដល់ថ្ងៃទី១០ ខែកញ្ញា ហើយបាននិយាយកាលពីថ្ងៃអង្គារទី៩ ខែសីហាថា លោកមានផែនការធ្វើទស្សនកិច្ចនៅប្រទេសវៀតណាមជាដៃគូនៅអាស៊ីអាគ្នេយ៍ដែលកំពុងលេចចេញដ៏សំខាន់ ដើម្បីធ្វើឲ្យទំនាក់ទំនងប្រសើរឡើង ប៉ុន្តែវត្តមានរបស់លោកនៅក្នុងកិច្ចប្រជុំកំពូលនៅថ្ងៃទី៤ ដល់ថ្ងៃទី៧ ខែកញ្ញា របស់ប្រទេសសមាគមប្រជាជាតិអាស៊ីអាគ្នេយ៍ឬអាស៊ាន ស្ថិតក្នុងភាពមន្ទិលសង្ស័យខ្លាំង។ ប្រភពមួយដែលដឹងច្បាស់អំពីបញ្ហា បាននិយាយថា លោក Biden នឹងមិនទៅកាន់ប្រទេសឥណ្ឌូនេស៊ីនោះទេ ហើយប្រភពមួយផ្សេងទៀតបានលើកឡើងថា ឯកអគ្គរដ្ឋទូតមានមូលដ្ឋាននៅទីក្រុងវ៉ាស៊ីនតោនមកពីសមាជិកអាស៊ាន និយាយថា ប្រទេសឥណ្ឌូនេស៊ី ត្រូវបានគេប្រាប់កាលពីថ្ងៃចន្ទថា លោកBiden នឹងមិនទៅទីនោះទ។ នៅពេលត្រូវបានសួរថាតើវាពិតឬទេដែលលោក Biden នឹងមិនទៅកាន់ប្រទេសឥណ្ឌូនេស៊ី មន្ត្រីជាន់ខ្ពស់សេតវិមាន បានប្រាប់សារព័ត៌មានរ៉យទ័រកាលពីថ្ងៃអង្គារថា យើងនៅកំពុងធ្វើការលើរឿងនេះ យើងប្រហែលជានឹងមានអ្វីៗច្រើនទៀតដើម្បីនិយាយអំពីរឿងនេះឆាប់ៗ។  ប្រភពជាច្រើន និយាយថា កាលបរិច្ឆេទរបស់លោក Biden មកកាន់អាស៊ី នៅមិនទាន់ផ្លូវការនៅឡើយរហូតដល់ដំណើរនោះ ត្រូវបានគេប្រកាស ហើយនឹងអាចផ្លាស់ប្តូរ៕

អភិបាលរាជធានី ជំរុញអាជ្ញាធរទាំង១៤ខណ្ឌ បន្តបម្រើសេវាជូនពលរដ្ឋឱ្យកាន់តែល្អ

2023/08/10 12:10:07 pm        70
Facebook Telegram Linkin
ភ្នំពេញ៖ អភិបាលរាជធានីភ្នំពេញឯកឧត្តម ឃួង ស្រេង បានជំរុញឱ្យអាជ្ញាធរខណ្ឌទាំង១៤ សង្កាត់ទាំង១០៥ ​បន្តបម្រើសេវាជូនប្រជាពលរដ្ឋឱ្យកាន់តែល្អប្រសើរថែមទៀត ពោលគឺឱ្យសមនឹង​ការជឿទុកចិត្តពីសំណាក់ប្រជាពលរដ្ឋមកលើអាជ្ញាធរ។ក្នុងឱកាសអញ្ជើញជាអធិបតីក្នុងកិច្ចប្រជុំសាមញ្ញលើកទី៥១ របស់ក្រុមប្រឹក្សារាជធានីភ្នំពេញ នាព្រឹកថ្ងៃទី១០ ខែសីហា ឆ្នាំ២០២៣ នៅសាលារាជធានីភ្នំពេញ ​ឯកឧត្តម ឃួង ស្រេង អភិបាល​រាជធានីភ្នំពេញ បានមានប្រសាសន៍លើកឡើងថា ការផ្ដល់សេវាតាមរយៈច្រកចេញ​ចូលតែមួយ​នៅទូទាំងខណ្ឌទាំង១៤ ​ក៏ដូចជាសង្កាត់ទាំង១០៥ឃើញថា មានលក្ខណៈល្អប្រសើរ ដោយទទួល​បានការគាំទ្រ​ពីប្រជាពលរដ្ឋ។ដូច្នេះសូមឱ្យអាជ្ញាធរបន្តការខិតខំប្រឹងប្រែងលើការផ្ដល់សេវាជូន​ប្រជាពលរដ្ឋឱ្យកាន់តែ​ប្រសើរ​ថែមទៀត ខណៈដែលប្រជាពលរដ្ឋបច្ចុប្បន្ននេះរស់​នៅក្នុងភាពស៊ីវិល័យ ដែលតម្រូវឱ្យការងារ​របស់អាជ្ញាធរ​ក៏ត្រូវតែស៊ីវិល័យឱ្យលឿនទាន់ចិត្ត​ទៅតាមនោះដែរ។ឯកឧត្តម ឃួង ស្រេង ​ក៏បានបញ្ជាក់ផងដែរថា ​ឆ្លងតាមលទ្ធផលនៃការបោះឆ្នោតជ្រើសតាំង តំណាងរាស្ត្រ នីតិកាលទី៧ នៃរដ្ឋសភា ​កាលពីថ្ងៃអាទិត្យ ទី២៣ ​ខែកក្កដា ឆ្នាំ២០២៣កន្លងមកនេះ ក៏បានបង្ហាញឱ្យឃើញថា ​ប្រជាពលរដ្ឋពិតជាស្រឡាញ់លើការដឹកនាំរបស់រាជរដ្ឋាភិបាលក៏ដូចជា​អាជ្ញាធររាជធានីភ្នំពេញ​ផងដែរ។ ដូច្នេះជាការឆ្លើយតប អាជ្ញាធរត្រូវតែបម្រើពលរដ្ឋ​ឱ្យកាន់តែល្អ​ថែមទៀត។ក្នុងកិច្ចប្រជុំនេះដែរ ឯកឧត្តម ឃួង ស្រេង ក៏បានបញ្ជាក់ពីបញ្ហាសំរាមដែលនៅតែជាបញ្ហាដែល​អាជ្ញាធរ​ត្រូវតែបន្តយកចិត្តទុកដាក់​ ដោយមិនត្រូវទុកសំរាមឱ្យនៅ​តាមដងផ្លូវនោះទេ។ ដូច្នេះអាជ្ញាធរខណ្ឌទាំង១៤ ​សង្កាត់ទាំង១០៥ ​បន្តផ្សព្វផ្សាយឱ្យប្រជាពលរដ្ឋគោរពម៉ោងពេល ដែលត្រូវយកសំរាមចេញក្រៅផ្ទះ ព្រោះការផាកពិន័យលើការចោលសំរាម​ក៏នឹងអនុវត្ត​នៅពេលឆាប់ៗ​នេះដែរ ​តែអ្វីដែលត្រូវអនុវត្តនៅពេលនេះ គឺការផ្សព្វផ្សាយឱ្យប្រជាពលរដ្ឋយល់ដឹង​ពីការទុកដាក់សំរាមជាមុនសិន។ឯកឧត្តម ម៉ប់ សារិន ប្រធានក្រុមប្រឹក្សារាជធានីភ្នំពេញ ​ក្នុងឱកាសនោះក៏មានប្រសាសន៍ កោត​សរសើរចំពោះគណៈកម្មាធិការជាតិរៀបចំការបោះឆ្នោត គណៈកម្មការរៀបចំការ​បោះឆ្នោតរាជធានី​ភ្នំពេញ ​រដ្ឋបាលរាជធានីភ្នំពេញ ​គណៈបញ្ជាការឯកភាពរាជធានីភ្នំពេញ សមត្ថកិច្ចគ្រប់ថ្នាក់ ខណ្ឌ សង្កាត់ កងកម្លាំង ​និងអ្នកពាក់ព័ន្ធដែលបានយកចិត្តទុកដាក់ខិតខំការពារ ថែរក្សាសន្តិសុខ​សណ្តាប់ធ្នាប់ ​ក្នុងយុទ្ធនាការឃោសនាបោះឆ្នោតរយៈពេល២១ថ្ងៃ ​និងថ្ងៃបោះឆ្នោតជ្រើសរើសតាំង តំណាង​រាស្ត្រនីតិកាលទី៧ ​ថ្ងៃទី២៣ ​ខែកក្កដា ឆ្នាំ២០២៣​ តាំងពីចាប់ផ្តើមរហូតដល់ចប់ ដោយធានា​បានសុវត្ថិភាព សណ្ដាប់ធ្នាប់របៀបរៀបរយបានល្អប្រសើរ និងទទួលបានជោគជ័យទាំងស្រុង៕ អត្ថបទ ៖ ប្រាក់ វ៉ាន់ដា 

រដ្ឋមន្ត្រីឥណ្ឌា ទម្លាក់កំហុសលើភាពចលាចលក្នុងប្រទេសជិតខាងមីយ៉ាន់ម៉ា ជាមូលហេតុនៃការបង្ហូរឈាមនៅរដ្ឋម៉ានីពួរ

2023/08/10 12:09:21 pm        62
Facebook Telegram Linkin
ឥណ្ឌា៖ កាលពីថ្ងៃពុធ (៩ ខែសីហា) រដ្ឋមន្ត្រីក្រសួងមហាផ្ទៃឥណ្ឌា លោក Amit Shah បានទម្លាក់កំហុសលើភាពចលាចលក្នុងសហភាពមីយ៉ាន់ម៉ា ជាមូលហេតុនៃជម្លោះជនជាតិភាគតិចនៅរដ្ឋម៉ានីពួរ ភាគឦសាននៃប្រទេសឥណ្ឌា ដែលនៅជិតខាង ហើយជំរុញឱ្យភាគីជម្លោះទាំងពីរនៅក្នុងរដ្ឋម៉ានីពួរ ដោះស្រាយជម្លោះរបស់ពួកគេតាមរយៈការសន្ទនា។លោក Shah បានប្រាប់សភាថា អស្ថិរភាពនយោបាយនៅក្នុងសហភាពមីយ៉ាន់ម៉ា បានជំរុញឱ្យជនភៀសខ្លួនរាប់ពាន់នាក់ភៀសខ្លួនឆ្លងកាត់ព្រំដែនចូលទៅក្នុងរដ្ឋម៉ានីពួរ។ មនុស្សជាង១៨០នាក់ត្រូវបានសម្លាប់ ជាច្រើនរយនាក់ទៀតរងរបួស និងមនុស្សរាប់ម៉ឺននាក់បានបាត់បង់ផ្ទះសម្បែងនៅក្នុងរដ្ឋម៉ានីពួរ ចាប់តាំងពីខែឧសភាមក។ចាប់តាំងពីរដ្ឋប្រហារនៅមីយ៉ាន់ម៉ាក្នុងឆ្នាំ២០២១ របបសឹកបានប្រយុទ្ធប្រឆាំងនឹងកងកម្លាំងគាំទ្រលទ្ធិប្រជាធិបតេយ្យនៅទូទាំងប្រទេស។ លោក Shah បានជំរុញភាគីជម្លោះជនជាតិភាគតិចទាំងពីរនៅក្នុងរដ្ឋម៉ានីពួរ ដែលភាគច្រើនជាជនជាតិម៉ីតី និងជនជាតិគូគី ឲ្យមកចូលតុចរចាសន្តិភាព និងដោះស្រាយបញ្ហាតាមរយៈការសន្ទនា។អំពើហឹង្សាបានកើតឡើងបន្ទាប់ពីតុលាការក្នុងខែកុម្ភៈបានស្នើថា សិទ្ធិពិសេសៗជាច្រើនត្រូវបានផ្តល់ដល់ជនជាតិភាគតិចគូគី រួមមានចំនួន១៦% នៃចំនួនប្រជាជនទាំងអស់របស់រដ្ឋ ដែលបានពង្រីកខ្លួនទៅជាជនជាតិម៉ីតី និងជាប្រជាជនភាគច្រើននៅរដ្ឋម៉ានីពួរ៕

យ៉ាងហោចណាស់មនុស្ស២នាក់ បានស្លាប់ ក្នុងការប៉ះទង្គិចគ្នានៅប្រទេសលីបង់

2023/08/10 12:07:11 pm        65
Facebook Telegram Linkin
លីបង់៖ ប្រភពសន្តិសុខបានប្រាប់សារព័ត៌មាន រ៉យទ័រ ថា មនុស្ស២នាក់ បានសម្លាប់កាលពីថ្ងៃពុធ (៩ សីហា) នៅក្នុងការប៉ះទង្គិចគ្នារវាងសមាជិកនៃក្រុមប្រដាប់អាវុធ ស៊ីអ៊ីថេ ហេសបូឡា (Shi'ite Hezbollah) និងក្រុមអ្នកស្រុកនៃទីក្រុងគ្រិស្តសាសនា បន្ទាប់ពីអ្នកស្រុកបានឡោមព័ទ្ធរថយន្តដឹកទំនិញដែលបានក្រឡាប់មួយគ្រឿង។ទូរទស្សន៍លីបង់ Al-Jadeed បានចាក់ផ្សាយវីដេអូពី ក្រុមបុរសស្លៀកពាក់ស៊ីវិលបាញ់កាំភ្លើងនៅតាមផ្លូវ។ ក្រោយមកពួកគេបានបង្ហាញពី កងទ័ពលីបង់ដែលបានដាក់ពង្រាយជុំវិញរថយន្តដឹកទំនិញនោះនៅពេលយប់ ខណៈរថយន្តស្ទូចមួយគ្រឿងបានទាញយកប្រអប់ឈើចេញពីរថយន្តនោះ។ អ្នកស្រុកជាច្រើនក្រុមធំបានប្រមូលផ្តុំគ្នា ដោយមានមនុស្សជាច្រើនប្រាប់អ្នកផ្សាយព័ត៌មានថា ពួកគេមានបំណងបិទផ្លូវ។ប្រភពនោះបាននិយាយថា រថយន្តដឹកទំនិញបានក្រឡាប់នៅលើផ្លូវចុះចំណោតក្បែរទីក្រុងភ្នំ កាហាឡេ (Kahaleh) កាលពីល្ងាចថ្ងៃពុធ ហើយអ្នកស្រុកបានបិទផ្លូវជុំវិញនោះយ៉ាងលឿន។ ប្រភពសន្តិសុខម្នាក់បាននិយាយថា រថយន្តដឹកទំនិញនោះជាកម្មសិទ្ធិរបស់ក្រុម ហេសបូឡា ហើយម្នាក់ក្នុងចំណោមអ្នកស្លាប់គឺជាសមាជិកនៃក្រុមនោះ ខណៈអ្នកទីពីរជាពលរដ្ឋកាន់សាសនាគ្រឹស្តរស់នៅក្នុងទីក្រុង។ ប្រភពទាំងនោះមិនអាចផ្តល់ព័ត៌មានលម្អិតអំពីខ្លឹមសារនៃរថយន្តនោះបានទេ ហើយក៏មិនមានការអត្ថាធិប្បាយភ្លាមៗពីក្រុម ហេសបូឡា ផងដែរ៕

UNនិយាយថា ពលរដ្ឋស៊ូដង់ទទួលរងនូវអំពើហិង្សាផ្លូវភេទក្នុងកម្រិតធ្ងន់ធ្ងរ

2023/08/10 12:04:43 pm        47
Facebook Telegram Linkin
ស៊ូដង់៖ ក្រុមមន្ត្រីអង្គការសហប្រជាជាតិបានប្រាប់ក្រុមប្រឹក្សាសន្តិសុខកាលពីថ្ងៃពុធ (៩ សីហា)ថា អំពើហឹង្សាផ្លូវភេទកំពុងត្រូវបានប្រព្រឹត្តនៅក្នុងប្រទេសស៊ូដង់ក្នុងកម្រិតដ៏ឈឺចាប់មួយ ខណៈពេលដែលការប្រយុទ្ធគ្នានៅក្នុងតំបន់ Darfur កំពុងជីកកាយឡើងវិញនូវភាពប្រេះឆាកាលពីមុននៃភាពតានតឹងជនជាតិភាគតិច ដែលអាចវាយប្រហារប្រទេសនេះ។មន្ត្រីជំនួយជាន់ខ្ពស់របស់អង្គការសហប្រជាជាតិ លោក Edem Wosornu បាននិយាយថា ករណីគួរឱ្យព្រួយបារម្ភនៃអំពើហិង្សាផ្លូវភេទ ដែលត្រូវបានលើកឡើងពីប្រជាជនបានភៀសខ្លួនទៅកំពង់ផែ ផត ស៊ូដាន គឺគ្រាន់តែជាផ្នែកមួយនៃការកើតឡើងម្តងទៀតក្នុងកម្រិតដ៏ឈឺចាប់ពីចំណុចក្តៅនៃជម្លោះនៅទូទាំងប្រទេស។សង្គ្រាមនៅប្រទេសស៊ូដង់បានផ្ទុះឡើងកាលពីថ្ងៃទី១៥ ខែមេសា ពោលគឺរយៈពេល៤ឆ្នាំបន្ទាប់ពីការផ្តួលរំលំអតីតប្រធានាធិបតីលោក Omar al-Bashir ក្នុងអំឡុងពេលការបះបោរមួយ។ ភាពតានតឹងរវាងកងទ័ពស៊ូដង់ (SAF) និងកងកម្លាំងគាំទ្ររហ័សយោធាប៉ារ៉ា (RSF) ដែលរួមគ្នាធ្វើរដ្ឋប្រហារក្នុងឆ្នាំ២០២១ បានផ្ទុះឡើងជុំវិញការខ្វែងគំនិតគ្នាអំពីផែនការផ្លាស់ប្តូរទៅកាន់ការគ្រប់គ្រងស៊ីវិល។អង្គការសហប្រជាជាតិបាននិយាយថា សង្រ្គាមក្នុងប្រទេសស៊ូដង់បច្ចុប្បន្ន បានធ្វើឱ្យមនុស្សជាង៤លាននាក់ភៀសខ្លួនចេញពីផ្ទះសម្បែងរបស់ពួកគេ ដែលក្នុងនោះមនុស្ស៣,២លាននាក់ត្រូវបានផ្លាស់ទីលំនៅខាងក្នុង ហើយមនុស្សជិត៩០០.០០០នាក់បានឆ្លងកាត់ព្រំដែនចូលទៅក្នុងប្រទេសឆាដ អេហ្ស៊ីប ស៊ូដង់ខាងត្បូង និងប្រទេសដទៃទៀតផងដែរ៕

អាជ្ញាធរលីប៊ីនិយាយថា ជនអន្តោប្រវេសន៍២៧នាក់ ត្រូវបានរកឃើញស្លាប់ជិតព្រំដែនទុយនីស៊ី

2023/08/10 12:01:36 pm        75
Facebook Telegram Linkin
លីប៊ី៖ ក្រុមអាជ្ញាធរលីប៊ីបាននិយាយកាលពីថ្ងៃអង្គារថា ជនអន្តោប្រវេសន៍យ៉ាងហោចណាស់២៧នាក់ មកពីអនុតំបន់អាហ្វ្រិកសាហារ៉ា បានស្លាប់ក្នុងពេលប៉ុន្មានថ្ងៃថ្មីៗនេះ នៅក្នុងតំបន់វាលខ្សាច់ភាគខាងលិចរបស់ប្រទេសលីប៊ី ជិតព្រំដែនជាមួយ ប្រទេសទុយនីស៊ី ។ ក្រសួងមហាផ្ទៃរបស់លីប៊ី បាននិយាយថា សាកសពទាំងនោះ ត្រូវបានរកឃើញថ្មីៗនេះជិតព្រំដែនហើយថាក្រុមនិតិកោសល្យវិជ្ជា ត្រូវបានបញ្ជូនទៅកាន់តំបន់នោះរួចហើយ។  សារព័ត៌មាន AP បានរាយការណ៍ថា លោក ម៉ូហាម៉េដ ហាម៉ូដា(Mohamed Hamouda) អ្នកនាំពាក្យរដ្ឋាភិបាលលីប៊ី កាលពីថ្ងៃពុធ បានបញ្ជាក់ពីការរកឃើញសាកសពទាំងនេះ ប៉ុន្តែពុំបានផ្ដល់ព័ត៌មានលម្អិតបន្ថែមទៀត។  តំបន់ឆ្នេរភាគខាងកើតរបស់ប្រទេសទុយនីស៊ី បាននាំមុខប្រទេសជិតខាងលីប៊ី ជាចំណុចចេញដំណើរដ៏សំខាន់របស់តំបន់នេះ សម្រាប់ជនអន្តោប្រវេសន៍ ភាគច្រើនមកពីអនុតំបន់សាហារ៉ា អាហ្វ្រិក ដែលកំពុងព្យាយាមទៅកាន់ប្រទេសអ៊ីតាលី និងប្រទេសផ្សេងទៀតនៅអឺរ៉ុបតាមទូកតូចៗ។ ក្រុមសិទ្ធិមនុស្សរបស់ប្រទេសលីប៊ី បានចោទប្រកាន់កងកម្លាំងសន្តិសុខទុយនីស៊ី ពីបទបណ្ដេញជនអន្តោប្រវេសន៍ដោយបង្ខំ និងបោះបង់ពួកគេចោលក្នុងតំបន់វាលខ្សាច់ដោយគ្មានទឹកនិងអាហារ ។ រដ្ឋមន្ត្រីក្រសួងមហាផ្ទៃទុយនីស៊ី លោក កាម៉េល ហ្វេគី(Kamel Feki) កាលពីសប្ដាហ៍មុន បានទទួលស្គាល់ថា ជនអន្តោប្រវេសន៍មួយក្រុមតូចមកពីអនុតំបន់សាហារ៉ា ដែលកំពុងពន្យាយាមឆ្លងចូលប្រទេសនេះ ត្រូវបានរុញឲ្យបកក្រោយចូលទៅក្នុងវាលខ្សាច់តំបន់ព្រំដែនជាប់ជាមួយប្រទេសលីប៊ី និងអាល់ហ្សេរី ។ ប្រទេសទុយនីស៊ី មិនអាចគាំទ្រដល់ចំនួនជនអន្តោប្រវេសន៍គ្មានឯកសារដ៏ច្រើននេះមកពីអនុតំបន់សាហារ៉ាបានទេ។  ក្នុងឧបទ្ទវហេតុដាច់ដោយឡែកមួយកាលពីថ្ងៃពុធ ជនអន្តោប្រវេស៊ី ចំនួន៤១នាក់ ត្រូវគេជឿថាបានស្លាប់ បន្ទាប់ពីទូកមួយគ្រឿង ដឹកជញ្ជូនពួកគេបានក្រឡាប់លិចនៅក្បែរឆ្នេរសមុទ្ររបស់ប្រទេសទុយនីស៊ី៕

មនុស្សយ៉ាងហោចណាស់៦នាក់បានស្លាប់ ក្នុងចំហេះព្រៃនៅរដ្ឋហាវ៉ៃ សហរដ្ឋអាមេរិក

2023/08/10 11:58:33 am        95
Facebook Telegram Linkin
អាមេរិក៖ ក្រុមមន្ត្រីបាននិយាយថា ចំហេះព្រៃដែលជំរុញបន្ថែមដោយខ្យល់នៃព្យុះសង្ឃរាដ៏ឆ្ងាយមួយ បានសម្លាប់មនុស្សយ៉ាងហោចណាស់៦នាក់ និងបានបង្កការខូចខាតយ៉ាងធំធេងនៅលើកោះ Maui (ម៉ូអ៊ី) នៃរដ្ឋហាវ៉ៃ កាលពីថ្ងៃពុធ (៩ សីហា) ដោយបង្ខំមនុស្សមួយចំនួនឲ្យលោតចូលទៅក្នុងមហាសមុទ្រដើម្បីគេចពីផ្សែង និងអណ្តាតភ្លើង។ផ្នែកខាងលិចនៃកោះនេះ រួមទាំងរមណីយដ្ឋានទេសចរណ៍ ឡាហេណា (Lahaina) ស្ទើរតែត្រូវបានកាត់ផ្តាច់ ដោយមានតែផ្លូវហាយវេមួយខ្សែប៉ុណ្ណោះដែលនៅតែបើក ខណៈក្រុមមន្ត្រីបានរាយការណ៍ពីការបំផ្លិចបំផ្លាញយ៉ាងទូលំទូលាយ ដែលមិនអាចកំណត់ពីទំហំនៃការខូចខាតបាននៅឡើយ។ ស្ថានភាពនៅរដ្ឋហាវ៉ៃ បានឆ្លុះបញ្ចាំងពីទិដ្ឋភាពនៃការបំផ្លិចបំផ្លាញនៅកន្លែងផ្សេងទៀតក្នុងពិភពលោកនៅរដូវក្តៅនេះ ដោយសារចំហេះព្រៃដែលបណ្តាលមកពីកម្ដៅដ៏ខ្ពស់ បានបង្ខំឱ្យមានការជម្លៀសមនុស្សរាប់ម៉ឺននាក់នៅក្នុងប្រទេសក្រិក អេស្ប៉ាញ ព័រទុយហ្គាល់ និងផ្នែកផ្សេងទៀតនៃទ្វីបអឺរ៉ុប។ក្រុមអ្នកវិទ្យាសាស្ត្របាននិយាយថា បម្រែបម្រួលអាកាសធាតុបង្កឡើងដោយមនុស្ស ដែលជំរុញដោយការប្រើប្រាស់ឥន្ធនៈហ្វូស៊ីល កំពុងកើតឡើងញឹកញាប់ និងបង្កើនអាំងតង់ស៊ីតេនៃព្រឹត្តិការណ៍អាកាសធាតុធ្ងន់ធ្ងរបែបនេះ ដោយពួកអ្នកវិទ្យាសាស្រ្តបានព្រមានជាយូរមកហើយថា ក្រុមមន្ត្រីរដ្ឋាភិបាលត្រូវតែកាត់បន្ថយការបំភាយឧស្ម័នពុលទៅក្នុងបរិយាកាសដើម្បីការពារគ្រោះមហន្តរាយអាកាសធាតុ៕

បណ្ដាញសង្គម

ព័ត៌មានថ្មីៗ

សម្ដេចធិបតី ហ៊ុន ម៉ាណែត ដាក់ចេញបទបញ្ជា ៩ ចំណុច ស្តីពីយុទ្ធនាការបោសសម្អាតការឆបោកតាមប្រព័ន្ធបច្ចេកវិទ្យា
07/15/2025 10:07 PM
Facebook Telegram Linkin
សម្តេចប្រធានរដ្ឋសភាកម្ពុជាចែករំលែកអនុសាសន៍៥ចំនុច ក្នុងការលើកកម្ពស់វប្បធម៌សន្ទនា កសាងសុខសន្តិភាព ដល់កិច្ចប្រជុំ AIPA
07/15/2025 08:07 PM
Facebook Telegram Linkin
សហគមន៍ជនបទយេម៉ែនកំពុងជួបការលំបាកខ្លាំង ស្របពេលដែលគ្រោះរាំងស្ងួតកាន់តែធ្ងន់ធ្ងរទៅ
07/15/2025 08:07 PM
Facebook Telegram Linkin
ប៉េរ៉ូបើកឡើងវិញតំបន់បុរាណវិទ្យាអាយុកាល ៣.៨០០ឆ្នាំ Penico ដល់ភ្ញៀវទេសចរ
07/15/2025 08:07 PM
Facebook Telegram Linkin
រដ្ឋមន្ត្រីសុខាភិបាល បន្តរំលឹក «គំនិត ពេលវេលា និងសុចរិតភាព គឺជាកត្តាគន្លឹះឈានទៅរកភាពជោគជ័យយូរអង្វែង ទាំងក្នុងជីវិតការងារ ទាំងក្នុងជីវិតបុគ្គលម្នាក់ៗ»
07/15/2025 08:07 PM
Facebook Telegram Linkin
UN ៖ ជនប៉ាឡេស្ទីន ៨៧៥នាក់ ត្រូវបានសម្លាប់នៅជិតទីតាំងចែកចាយជំនួយក្នុងតំបន់ហ្កាហ្សា
07/15/2025 08:07 PM
Facebook Telegram Linkin
វិមានក្រឹមឡាំង៖ សេចក្តីថ្លែងការណ៍របស់លោក Trump ស្តីពីរុស្ស៊ី និងលោក Putin គឺធ្ងន់ធ្ងរ និងត្រូវការការវិភាគ
07/15/2025 08:07 PM
Facebook Telegram Linkin
បារាំង៖ សន្និសីទ UN នឹងពិភាក្សា អំពីហ្កាហ្សាក្រោយសង្គ្រាម និងការទទួលស្គាល់រដ្ឋប៉ាឡេស្ទីន
07/15/2025 07:07 PM
Facebook Telegram Linkin
កូរ៉េខាងត្បូងកោះអញ្ជើញមន្ត្រីអនុព័ន្ធការពារជាតិជប៉ុន ដើម្បីតវ៉ា ជុំវិញការអះអាងសិទ្ធិលើកោះ
07/15/2025 07:07 PM
Facebook Telegram Linkin
លោក Netanyahu ស្ថិតក្រោមសម្ពាធនយោបាយកាន់តែខ្លាំង ក្រោយមានគណបក្សដកខ្លួន
07/15/2025 07:07 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.