នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
សម្តេចតេជោអនុញ្ញាតឱ្យសមាជិកគណៈកម្មាធិការអចិន្ត្រៃយ៍សភាប្រជាជនចិនជួបសម្តែងការគួរសម
ក្រុមការងារបច្ចេកទេសអន្តរក្រសួងបន្តចុះកំណត់និយាមកា និងបោះបង្គោលព្រំដីតាមបណ្តោយព្រែកជីកហ្វូណនតេជោ សម្រាប់កំណាត់ទី២ ក្នុងភូមិសាស្រ្តខេត្តកំពត
សម្ដេចតេជោ ជំរុញឱ្យកម្ពុជា-កូរ៉េខាងត្បូងលើកកម្ពស់ទំនាក់ទំនងភាពជាដៃគូយុទ្ធសាស្រ្តគ្រប់ជ្រុងជ្រោយក្នុងឱកាសខួប៣០ឆ្នាំនៃទំនាក់ទំនងប្រទេសទាំងពីរ
ទូតកូរ៉េខាងត្បូងជម្រាបសម្ដេចតេជោថា ស្ពានមិត្តភាពកម្ពុជា-កូរ៉េខាងត្បូងនឹង​បើកការដ្ឋាន​សាង​សង់​នៅ​ឆ្នាំ២០២៦

នយោបាយ​ និង ការអភិវឌ្ឍន៍

ឯកឧត្តម ហោ ណាំហុង ជួបពិភាក្សាជាមួយឯកអគ្គរាជទូតថៃ ស្តីពីកិច្ចសហប្រតិបត្តិការតាមព្រំដែន

2022/12/27 01:48:37 pm        507
Facebook Telegram Linkin
ភ្នំពេញ៖ នៅថ្ងៃទី២៧ ខែធ្នូ ឆ្នាំ២០២២នេះ ឯកឧត្តមកិត្តិបរិរក្សបណ្ឌិតឧបនាយករដ្ឋមន្រ្តី បានអនុញ្ញាត ឯកឧត្តម ឆឺតកៀត អាត់ថាក័រ (H.E. Mr. Cherdkiat ATTHAKOR) ឯកអគ្គរាជទូតព្រះរាជាណាចក្រថៃថ្មីប្រចាំកម្ពុជា ជួបពិភាក្សាការងារ នៅទីស្តីការគណៈរដ្ឋមន្រ្តី។ ក្នុងឱកាសនោះ ឯកឧត្តមឧបនាយករដ្ឋមន្រ្តី ​បានកោតសរសើរ​ និងជូនពរឯកឧត្តមឯកអគ្គរាជទូត​ដែលបានមកបំពេញភារកិច្ចថ្មីឱ្យបានជោគជ័យក្នុងឋានៈជាឯកអគ្គរាជទូតថៃប្រចំានៅកម្ពុជា ដោយសារប្រទេសកម្ពុជា-ថៃ ​ជារាជានិយមដូចគ្នា ​មានព្រះពុទ្ធសាសនាដូចគ្នា​ និងភាសា ទំនៀមទំលាប់ប្រហាក់ប្រហែលគ្នា។ ម្យ៉ាងទៀតប្រទេសយើងទំាងពីរ ​មានយន្ដការកិច្ចសហប្រតិបត្តិការជាច្រើន ដើម្បីពង្រឹងកិច្ច​សហប្រតិបត្តិការ​រវាង​ប្រទេសទាំងពីរ​ ដូចជាគណៈកម្មាធិការព្រំដែនទូទៅកម្ពុជា-ថៃ(GBC) ដែល​មានរដ្ឋមន្រ្តីការពារជាតិទាំងពីរជាប្រធាន ​និងគណៈកម្មាធិការកំណត់ព្រំដែនកម្ពុជា-ថៃ(JBC) ព្រមទំាង​ការប្រជុំអភិបាលខេត្តជាប់ព្រំដែន ដើម្បីពង្រឹងកិច្ចសហប្រតិបត្តិការ និងមិត្តភាព និង​ដោះស្រាយ​បញ្ហាតាមព្រំដែនរវាងប្រទេសទាំង២។បន្ទាប់មកឯកឧត្តមឧបនាយករដ្ឋមន្រ្តី បាន​សរសើរប្រទេសថៃ​ដែលសម្រេចបានកំណើន​សេដ្ឋកិច្ច៣.២៤% ក្នុងឆ្នាំ២០២២ និងទទួលទេសចរបានចំនួន ១០លាននាក់។ ឯកឧត្តម ឧបនាយករដ្ឋមន្រ្តីក៏បានលើកថា ​ពាណិជ្ជកម្មរវាងប្រទេសយើងទំាងពីរ​សម្រេចបានជិត ៥ពាន់លានដុល្លារអាមេរិក​ ក្នុងឆ្នាំ២០២២នេះ។ក្នុងឱកាសនោះ ទាក់ទននឹងបញ្ហាដោះមីន ​ឯកឧត្តមកិត្តិបរិរក្សបណ្ឌិតឧបនាយករដ្ឋមន្រ្តី ក៏​បានលើកថា ​អាជ្ញាធរដោះមីនកម្ពុជានិងថៃ គួរធ្វើយ៉ាងណាដោះមីនអោយអស់តាមព្រំដែន មុន​នឹងកំណត់ព្រំដែនដើម្បីចៀសវាងគ្រោះថ្នាក់ដល់ប្រជាជនកម្ពុជានិងថៃនៅតាមតំបន់ព្រំដែន ដោយកម្ពុជា​បានកំណត់យកឆ្នាំ២០២៥​ ដោះមីនអោយអស់នៅកម្ពុជា។ជាមួយគ្នានេះ ​ឯកឧត្តមឯកអគ្គរាជទូត ឆឺតកៀត ​បានលើកថា ឯកឧត្តមនឹងជំរុញកិច្ច​សហប្រតិបត្តិការ​លើសកម្មភាពដោះមីននៅតាមព្រំដែនកម្ពុជា​និងថៃក្នុងរង្វង់ទំហំដី២២គីឡូម៉ែត្រ។ ក្នុង​អាណត្តិឯកឧត្តមជា​ឯកអគ្គរាជទូតនៃព្រះរាជាណាចក្រថៃប្រចំា​នៅព្រះរាជាណាចក្រកម្ពុជា ឯកឧត្តមនឹងខិតខំឱ្យអស់ពីសមត្ថភាព​ ដើម្បីពង្រឹង និងពង្រីកទំនាក់ទនងកិច្ចសហប្រតិបត្តិការ និងមិត្តភាពកម្ពុជានិងថៃឱ្យកាន់តែរឹងមាំថែមទៀត៕អត្ថបទ៖ ជា ធីរិទ្ធ

សម្តេចកិត្តិព្រឹទ្ធបណ្ឌិត អញ្ជើញសំណេះសំណាល និងបំពាក់គ្រឿងឥស្សរិយយសជូននិវត្តជនកាកបាទក្រហមកម្ពុជា

2022/12/27 08:19:46 am        318
Facebook Telegram Linkin
ភ្នំពេញ៖ នៅល្ងាចថ្ងៃចន្ទ ទី២៦ ខែធ្នូ ឆ្នាំ២០២២នេះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា អញ្ជើញជួបសំណេះសំណាល សួរសុខទុក្ខ និងបំពាក់គ្រឿងឥស្សរិយយសជូននិវត្តន៍ជន-មន្ត្រីកាកបាទក្រហមកម្ពុជា ដែលធ្លាប់បានបម្រើការងារមនុស្សធម៌យ៉ាងសកម្មជាមួយកាកបាទក្រហមកម្ពុជា នាពេលកន្លងមក។ពិធីនេះប្រព្រឹត្តទៅនៅទីស្នាក់ការកណ្តាលកាកបាទក្រហមកម្ពុជា ដោយមានការអញ្ជើញចូលរួមពីសំណាក់ សម្ដេចចៅហ្វាវាំង វរវៀងជ័យ អធិបតីស្រឹង្គារ គង់ សំអុល អនុប្រធានអចិន្រ្តៃយ៍ លោកជំទាវ ឯកឧត្តម អនុប្រធាន អគ្គហេរញ្ញិក សមាជិកគណៈកម្មាធិការកណ្តាល និវត្តន៍ជន និងក្រុមប្រតិបត្តិសរុបប្រមាណ ៨០នាក់។ក្នុងឱកាសនោះ សម្តេចកិត្តិព្រឹទ្ធបណ្ឌិត បានថ្លែងដោយក្តីសោមនស្សរីករាយដោយបានជួបសំណេះសំណាលសួរសុខទុក្ខ ជាមួយនិវត្តន៍ជន និងមន្ត្រីកាកបាទក្រហមកម្ពុជាទាំងអស់។ សម្តេចកិត្តិព្រឹទ្ធបណ្ឌិត បានថ្លែងអំណរគុណយ៉ាងជ្រាលជ្រៅបំផុតប្រកបដោយមោទកភាពយ៉ាងក្រៃលែងចំពោះបងប្អូននិវត្តន៍ជនទាំងអស់ ដែលបានពលិកម្មគ្រប់បែបយ៉ាង ខិតខំប្រឹងប្រែងអស់ពីកម្លាំងកាយចិត្តបំពេញការងារមនុស្សធម៌ជាមួយកាកបាទក្រហមកម្ពុជាតាំងពីដើមរហូតមក ដែលអ្នកខ្លះបានបំពេញការងារមុនពេលសម្តេចកិត្តិព្រឹទ្ធបណ្ឌិត ធ្វើជាប្រធានកាកបាទក្រហមកម្ពុជាមកម្លេះ។សមិទ្ធផល ស្នាដៃ និងជោគជ័យ តាំងពីដើម រហូតដល់បច្ចុប្បន្ន ក៏ដូចជាទៅអនាគត គឺបានដោយសារការចូលរួមពីបងប្អូននិវត្តន៍ជន និងមន្ត្រី​ អ្នកស្ម័គ្រចិត្ត​ យុវជនកាកបាទក្រហមកម្ពុជា​យេីងទាំងអស់ ដែលបាននិងកំពុងជួយសម្រាលការលំបាកដល់បងប្អូនប្រជាពលរដ្ឋងាយរងគ្រោះបំផុត និងរងគ្រោះដោយគ្រោះមហន្តរាយផ្សេងៗ ដូចជាគ្រោះទឹកជំនន់ ខ្យល់កន្ត្រាក់ ភ្លើងឆេះផ្ទះ។ល។ ជាពិសេសបានរួមចំណែកធ្វើឱ្យកាកបាទក្រហមកម្ពុជា មានឈ្មោះល្បីរន្ទឺ ខ្ពស់មុខខ្ពស់មាត់លើឆាកអន្តរជាតិ។ជាចុងក្រោយ សម្តេចកិត្តិព្រឹទ្ធបណ្ឌិត បានជូនពរដល់និវត្តន៍ជន គណៈកម្មាធិការកណ្តាល​ មន្ត្រី​ អ្នកស្ម័គ្រចិត្ត​ យុវជនកាកបាទក្រហមកម្ពុជា​ទាំងអស់ ជាពិសេសក្នុងឱកាសបុណ្យចូលឆ្នាំថ្មីឆ្នាំសកល២០២៣ សូមមានសុខភាពល្អ ជោគជ័យគ្រប់ភារកិច្ច និងជួបប្រទះតែនឹងព្រះពុទ្ធពរទាំង៤ប្រការ គឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕

សម្តេចកិត្តិព្រឹទ្ធបណ្ឌិតអញ្ជើញដឹកនាំប្រជុំបូកសរុបការងាររបស់កាកបាទក្រហមកម្ពុជាប្រចាំឆ្នាំ២០២២ និងលើកទិសដៅបន្ត

2022/12/27 07:59:47 am        272
Facebook Telegram Linkin
ភ្នំពេញ៖​កាកបាទក្រហមកម្ពុជា ដែលមានសម្ដេចព្រះមហាក្សត្រី ព្រះវររាជមាតាជាតិខ្មែរ នរោត្ដម មុនិនាថ សីហនុ ជាព្រះប្រធានកិត្ដិយស បានបើកកិច្ចប្រជុំប្រចាំឆ្នាំគណៈកម្មាធិការកណ្តាល នៅទីស្នាក់ការកណ្ដាលកាកបាទក្រហមកម្ពុជា រសៀល ថ្ងៃទី ២៦ ធ្នូ ក្រោមអធិបតីភាពដ៏ខ្ពង់ខ្ពស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ។ សម្តេចកិត្តិព្រឹទ្ធបណ្ឌិតប្រធាន បានបញ្ជាក់ពីរបៀបវារៈនៃកិច្ចប្រជុំ រួមមាន៖ឆ្លងសេចក្តីព្រាង របាយការណ៍សកម្មភាពឆ្នាំ២០២២ និងទិសដៅការងារឆ្នាំ២០២៣ឆ្លងសេចក្តីព្រាង របាយការណ៍ចំណូល-ចំណាយមូលនិធិឆ្នាំ២០២២ស្នើសុំការអនុម័តលើផែនការមូលនិធិសម្រាប់ចំណាយជាអាទិភាពឆ្នាំ២០២៣បញ្ហាផ្សេងៗ។ លោកជំទាវ ម៉ែន នារីសោភ័គ អគ្គលេខាធិការរងទី១ បានធ្វើរបាយការណ៍បូកសរុបការងារឆ្នាំ២០២២ដោយរំលេចពីព្រះរាជូបត្ថម្ភ ព្រះរាជទ្រព្យពី ព្រះករុណា ព្រះមហាក្សត្រ ជាអម្ចាស់ជីវិតលើត្បូង និង សម្តេចម៉ែ ព្រះប្រធានកិត្តិយសកាកបាទក្រហមកម្ពុជា រួមជាមួយសប្បុរសជនគ្រប់មជ្ឈដ្ឋាន ដែលបានធ្វើឱ្យសមាគមជាតិមានមូលនិធិទាំងនៅថ្នាក់កណ្តាល និងតាមសាខាទាំងរាជធានី-ខេត្ត សម្រាប់ធ្វើប្រតិបត្តិការ។ក្នុងឆ្នាំ២០២២ នេះ កាកបាទក្រហមកម្ពុជា សម្រេចបានការជួយសម្រាលជីវភាពប្រជាពលរដ្ឋងាយរងគ្រោះបំផុតបានចំនួន ៧៣.១៣៤ គ្រួសារ (ក្នុងនោះថ្នាក់កណ្តាលឆ្លើយតបបាន ៨.៥២០ គ្រួសារ) កសាងផ្ទះបាន ចំនួន ១០៤ ខ្នង និងបណ្តុះបណ្តាលជំនាញ និងអប់រំផ្សព្វផ្សាយលើកកម្ពស់ការយល់ដឹងផ្សេងៗបានរាប់សែនគ្រួសារទៀត។ ចំណែកសមិទ្ធផលសំខាន់ៗ ទៅតាមវិស័យអាទិភាពទាំង៤ នៃយុទ្ធសាស្ត្រ ២០២១-២០៣០។របាយការណ៍បានរំលេចពីការងារតាមវិស័យដូចជាវិស័យអាទិភាពគ្រប់គ្រងគ្រោះមហន្តរាយ វិបត្តិភ័យ និងការប្រែប្រួលអាកាសធាតុដែលក្នុងវិស័យនេះបានផ្តល់ស្បៀងសម្រាលជីវភាពរបស់គ្រួសាររងគ្រោះ និងងាយរងគ្រោះបំផុតចំនួន ១៨.៥៣៩គ្រួសារ សាខាបានសង់ផ្ទះ ១២ខ្នង និងផ្តល់ស័ង្កសីជួសជុល ផ្ទះរងគ្រោះដោយខ្យល់កន្ត្រាក់ ចំនួន ១.២២៥គ្រួសារ។ ក្នុងការកសាងភាពធន់សហគមន៍ ដែលសហការជាមួយសមាគមជាតិកាកបាទក្រហមចិន, កាកបាទក្រហមកម្ពុជា បានផ្តល់អណ្តូងចំនួន៤ បង្គន់អនាម័យចំនួន២៧២ កន្លែងលាងសម្អាតដៃនៅក្នុងមណ្ឌលសុខភាពចំនួន២ ក្នុងឃុំចំនួន ២ នៃស្រុកថ្ពង ខេត្តកំពង់ស្ពឺ ។ក្នុងពេលដែលរាជរដ្ឋាភិបាលទទួលដោះស្រាយ១០០% ក្នុងការផ្តល់ពូជស្រូវ ស្បៀង និងថវិកា ដល់ប្រជាពលរដ្ឋរងគ្រោះដោយទឹកជំនន់ទូទាំងប្រទេស កាកបាទក្រហមកម្ពុជា បន្តយកចិត្តទុកដាក់ក្នុងការតម្រង់ទិសដល់ក្រុមប្រតិបត្តិរបស់សាខាទាំង ២៥រាជធានី-ខេត្ត ស្តីពីការពង្រឹងសមត្ថភាពភស្តុភារ ការប្រកាសព័ត៌មានជាមុន ការរាយការណ៍ពីផលប៉ះពាល់របស់មុខសញ្ញារងគ្រោះ និងទម្រង់ប្រតិបត្តិការឆ្លើយតប។ ជាមួយគ្នានោះ ថ្នាក់កណ្តាលក៏បានបញ្ជ្រាបការយល់ដឹងពីហានិភ័យបង្កដោយការប្រែប្រួលអាកាសធាតុដល់សាខា សម្រាប់ជាមូលដ្ឋាននៃការគិតគូរដោះស្រាយផលប៉ះពាល់នានាតាមសហគមន៍ផងដែរ។ក្នុងការចូលរួមកាត់បន្ថយហានិភ័យបង្កដោយការប្រែប្រួលអាកាសធាតុ សម្តេចកិត្តិព្រឹទ្ធបណ្ឌិតប្រធាន បានដឹកនាំសកម្មភាពដាំដើមឈើជាង ១.២០០ដើម នៅមជ្ឈមណ្ឌលពុទ្ធសាសនាកម្ពុជា។ ចំណែក សាខារាជធានី-ខេត្ត សម្រេចបានការដាំដើមឈើ សរុបប្រមាណ ៥.៣៧៥ដើម នៅតាមទីសាធារណៈ និងគ្រឹះស្ថានសិក្សានានា រួមទាំងបានដាំកូនឈើកោងកាង សរុប ២.០០០ដើម នៅតាមដងព្រែកកោងកាងសាងស្នេហ៍ ឃុំតានៃ ក្នុងស្រុកព្រៃនប់ ខេត្តព្រះសីហនុ។ក្នុងការចូលរួមកាត់បន្ថយអត្រាមរណៈ ពិការ របួស និងបាត់បង់ទ្រព្យសម្បត្តិរដ្ឋ ឯកជន បង្កដោយគ្រោះថ្នាក់ចរាចរណ៍ កាកបាទក្រហមកម្ពុជា និងសាខាទាំង២៥ រាជធានី-ខេត្ត សម្រេចបានការធ្វើយុទ្ធនាការទូទាំងប្រទេសស្តីពីសុវត្ថិភាពចរាចរណ៍ក្នុងឱកាសបុណ្យចូលឆ្នាំខែ្មរ បុណ្យភ្ជុំបិណ្ឌ និងបុណ្យអុំទូក ធ្វើការអប់រំផ្សព្វផ្សាយ ស្តីពីសុវត្ថិភាពចរាចរណ៍ប្រកបដោយបរិយាប័ន្ន និងគំាពារកុមារ បានចំនួន ៥៧៧លើក មានអ្នកទទួលផលសរុប ១៣៣.៥០៩នាក់ (ស្រីចំនួន ៧៣.៥៦០នាក់) និងអ្នកមានពិការភាពចំនួន១.៧៦៩នាក់។ លើសពីនេះទៅទៀត បាន កសាងជម្រាល ចំនួន ៦កន្លែង សម្រាប់ជនមានពិការភាពចំនួន ១.៣៥៣នាក់។វិស័យអាទិភាព សុខភាព និងការថែទាំសុខភាពក្នុងសហគមន៍កាកបាទក្រហមកម្ពុជា បានបន្តផ្តល់ថវិកា ១លានដុល្លារ ជូនមូលនិធិគន្ធបុប្ផាកម្ពុជា (លើកទី៥) ដែលត្រូវជាលើកទី១១ សម្រាប់មន្ទីរពេទ្យកុមារគន្ធបុប្ផា និងថវិកា ៥ម៉ឺនដុល្លារ ជូនមន្ទីរពេទ្យកុមារអង្គរ (លើកទី៤) ។ការងារអប់រំផ្សព្វផ្សាយលើកកម្ពស់ពីសារប្រយោជន៍នៃការថែទាំសុខភាពមាតា ទារក និងកុមារ រួមទាំងការទប់ស្កាត់ការចម្លងមេរោគអេដស៍ ថ្លើមប្រភេទបេ ជំងឺស្វាយពីម្តាយទៅកូន និងការងារត្រូវបានអនុវត្តតាមយន្តការ ការងារឥស្សរជនឆ្នើមថ្នាក់ជាតិគ្របដណ្តប់ទូទាំងប្រទេស និងអនុវត្តជាប្រចាំក្នុងយុទ្ធនាការឈានឆ្ពោះទិវាដ៏សំខាន់ ចំនួន ៣ គឺ ទិវាជាតិសុខភាពមាតា ទារក និងកុមារ ២១កុម្ភៈ ទិវាឆ្មបជាតិ-អន្តរជាតិ ៥ឧសភា និង ទិវាពិភពលោកប្រយុទ្ធនឹងជំងឺអេដស៍ ១ធ្នូ។ក្នុងការងារអភិវឌ្ឍសុខភាពសហគមន៍វិញ កាកបាទក្រហមកម្ពុជា បានផ្តោតលើការសាងសង់កន្លែងលាងសម្អាតដៃតាមគ្រឹះស្ថានសិក្សា ដែលជារួមមានព្រះសមិទ្ធផល សម្តេចម៉ែជាអម្ចាស់ តាមរយៈសម្តេចកិត្តិព្រឹទ្ធបណ្ឌិតប្រធាន នៅខេត្តមណ្ឌលគីរី ជាអណ្ដូងទឹកស្អាតចំនួន៣ កន្លែងលាងសម្អាតដៃចំនួន៧ និងបង្គន់អនាម័យចំនួន១ខ្នង (មាន៤បន្ទប់) ក្នុងវិទ្យាល័យចំនួនមួយ និងសាលាបឋមសិក្សាចំនួន៦ សម្រាប់លោកគ្រូ-អ្នកគ្រូ និងសិស្សានុសិស្សប្រមាណជាង ២.៤០០នាក់ និងកន្លែងលាងសម្អាតដៃចំនួន៦ និងបង្គន់អនាម័យចំនួន ៣ខ្នង (មាន ៩បន្ទប់) សម្រាប់លោកគ្រូ-អ្នកគ្រូ និងសិស្សានុសិស្សប្រមាណ ៥.០២០នាក់ ក្នុងវិទ្យាល័យចំនួន៤ និងសាលាបឋមសិក្សាចំនួន១ នៅក្នុងក្រុង១ ស្រុក៤ នៃខេត្តកំពង់ធំ។ លើសពីនេះទៅទៀត ដោយមានការជួយឧបត្ថម្ភពី សហព័ន្ធអន្តរជាតិ កាកបាទក្រហមសិង្ហបូរី និងកាកបាទក្រហមកូរ៉េ សមិទ្ធផលបន្ថែមទៀតមានអណ្តូងស្នប់មានម៉ូទ័រ១៩ កន្លែងលាងសម្អាតដៃ៤២ បន្ទប់អនាម័យ៣៣ និងស៊ីទែនទឹក១៧ មានអ្នកទទួលផលសរុប ៣៨.៣០៧នាក់ ។វិស័យអាទិភាព ការអភិវឌ្ឍស្ថាប័ន កាកបាទក្រហមកម្ពុជា អាចពង្រឹងបានភាពជាម្ចាស់របស់សាខាទាំង២៥រាជធានី-ខេត្ត ទៅតាមទិសវិមជ្ឈ ការ វិសហមជ្ឈការ, សាខានីមួយៗ មានសមត្ថភាពក្នុងការបំផុសចលនាកៀរគររកមូលនិធិ និងជំនួយឧបត្ថម្ភ ព្រមទាំងដឹកនាំ គ្រប់គ្រងសាខាតាមអភិក្រមអភិបាលកិច្ចល្អ ការគ្រប់គ្រងមានតម្លាភាព និងគណនេយ្យភាព។ ចំណែក ថ្នាក់កណ្តាលវិញ បាននឹងកំពុងបន្តតួនាទីជួយគាំទ្របច្ចេកទេស កសាងសមត្ថភាព និងបណ្តុះបណ្តាលសមត្ថភាពជំនាញដូចជា ផែនការអភិវឌ្ឍសាខា អនុសាខាជាដំណាក់កាល តាមទិសស្លោក “សកម្មភាពនៅមូលដ្ឋាន សម្រេចបានគោលដៅសាកល” នៃយុទ្ធសាស្ត្រ ២០២១-២០៣០។ការងារអភិវឌ្ឍធនធានហិរញ្ញវត្ថុ ៖ ទិវា ៨ឧសភា បានក្លាយជាទិវាដ៏សំខាន់ និងចាំបាច់របស់ថ្នាក់កណ្តាល និងគណៈកម្មាធិការសាខាក្នុងការបំផុសសប្បុរសជនកៀរគររកមូលនិធិ។ បទពិសោធន៍ថ្មីឆ្នាំនេះ ឃើញថា គណនីទទួលថវិកា តាមធនាគារ ABA អាចទទួលថវិកាពីសប្បុរសបានច្រើនជាងមុន។ ការងារសមាជិកភាពនៅតែបន្ត ដោយឆ្នាំនេះមានចុះបញ្ជីនៅថ្នាក់កណ្តាល ២.៩៤៥នាក់ និងសាខាទាំងអស់ ៥៧.០៩៩នាក់។លោកជំទាវកិត្តិបណ្ឌិត អ៊ុក ម៉ាលី អគ្គហេរញ្ញិក បានអានជូននូវរបាយការណ៍ចំណូល-ចំណាយមូលនិធិឆ្នាំ២០២២ ហើយអង្គប្រជុំបានអនុម័ត ជាមួយនឹងអនុសាសន៍បន្តពង្រឹងការធ្វើសវនកម្ម ដើម្បីធានាបានការជឿទុកចិត្តពីសប្បុរសជនគ្រប់មជ្ឈដ្ឋាន និងអនុម័តផែនការ ចំណាយជាអាទិភាពឆ្នាំ២០២៣ ដែលជាកញ្ចប់ថវិកាមិនស្ថិតនៅក្នុងមូលនិធិទទួលបានពីសប្បុរសជន ។កាកបាទក្រហមកម្ពុជា ប្តេជ្ញានឹងបន្តបំពេញតួនាទីជាជំនួយការឱ្យអាជ្ញាធរសាធារណៈឱ្យកាន់តែប្រកបដោយគុណតម្លៃថែមទៀត ជាពិសេស ក្នុងការអប់រំផ្សព្វផ្សាយឱ្យសហគមន៍ពង្រឹងការអនុវត្ត “៣ការពារ ៣កុំ”, រួមសាមគ្គីគ្នាចូលរួមអនុវត្តយុទ្ធសាស្ត្រស្តីពី “ការរស់នៅតាមគន្លងប្រក្រតីភាពថ្មី ក្នុងបរិបទនៃជំងឺកូវីដ-១៩” និង “យុទ្ធសាស្ត្រស្ដារ និងជំរុញកំណើនសេដ្ឋកិច្ច ក្នុងការរស់នៅជាមួយកូវីដ១៩ តាមគន្លងប្រក្រតីភាពថ្មី”។សម្តេចប្រធានបានថ្លែងអំណរគុណនិងកោតសរសើរដល់កិច្ចខិតខំប្រឹងប្រែងរបស់មន្ត្រីកាកបាទក្រហមគ្រប់ថ្នាក់សាខារាជធានីខេត្តទាំងអស់ដែលបានខិតខំបំពេញការងារក្នុងឆ្នាំ២០២២ក៏ដូចជាពេលកន្លងមកបានយកចិត្តទុកដាក់ជួយប្រជាពលរដ្ឋបានភ្លាមៗទាន់ពេលវេលានៅពេលពលរដ្ឋជួបការលំបាកឬគ្រោះធម្មជាតិផ្សេងៗនិងបានផ្តាំផ្ញើឱ្យបន្តយកចិត្តទុកដាក់ឱ្យកាន់តែសកម្មថែមទៀតនៅឆ្នាំ២០២៣។សម្តេចបញ្ជាក់ថា ទោះជាយ៉ាងនេះក្តីថ្នាក់កណ្តាលនឹងជួយដល់សាខានៅពេលមានតម្រូវការ ឆ្លើយតបក្នុងករណីហួសពីលទ្ធភាពរបស់សាខានីមួយៗ៕…………

ប្រសាសន៍សំខាន់ៗសម្ដេចតេជោ ហ៊ុន សែន​ ក្នុងពិធីសំណេះសំណាល និងបើកការដ្ឋានស្ដារ និងលើកកម្រិតគុណភាពផ្លូវជាតិលេខ៤១

2022/12/26 09:37:12 am        827
Facebook Telegram Linkin
នៅថ្ងៃទី២៦ ខែធ្នូ ឆ្នាំ២០២២នេះ សម្ដេចអគ្គមហានសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានអញ្ជើញជាអធិបតីភាពដ៏ខ្ពង់ខ្ពស់ក្នុងពិធីសំណេះសំណាល និង​បើក​ការដ្ឋានស្ដារ និងលើកកម្រិតគុណភាពផ្លូវជាតិលេខ៤១ ដែលមានប្រវែងសរុប ៩៥,២៧គីឡូម៉ែត្រ។ ខាងក្រោមនេះជាប្រសាសន៍សំខាន់ៗរបស់សម្ដេចតេជោ​ ហ៊ុន​ សែន​៖ - សម្តេចតេជោ ហ៊ុន សែន បាន​ប្រកាស​សុំការអធ្យាស្រ័យ​ពី​ប្រជាពលរដ្ឋ​រស់​នៅ​តាម​សង​ខាង​ផ្លូវ​ជាតិ​លេខ​៤១​ និងប្រជាពលរដ្ឋធ្វើដំណើរពេលការដ្ឋានបានចាប់ផ្តើម ដែល​នឹង​មាន​ផល​ប៉ះពាល់​ខ្លះ​ជៀស​មិនរួច តែទៅពេលរួចរាល់ផ្លូវនេះនឹងផ្តល់អត្ថប្រយោជន៍រាប់មិនអស់ដល់ប្រជាពលរដ្ឋ និង​សង្គមជាតិ។- សម្តេចតេជោ ហ៊ុន សែន បានបញ្ជាក់ថា ដោយសារទំនាក់ទំនងមិត្តភាពកម្ពុជា-ចិន កម្ពុជា​បាន​នាំ​ផលិត​ផលកសិកម្មទៅប្រទេសចិនជាច្រើនដោយផ្ទាល់ជាបន្តបន្ទាប់ដូចជា៖ ផ្លែឈើស្រស់ និង​ចុង​ក្រោយ​នេះ គឺការនាំត្រីប្រាទៅកាន់ទីផ្សារប្រទេសចិនផងដែរ។- សម្តេចតេជោ ហ៊ុន សែន បានបញ្ជាក់ថា កំណើនយានយន្តដ៏ច្រើនលើសលប់របស់កម្ពុជា បាន​ក្លាយ​ជា​អតុល្យភាពមួយក្នុងសង្គម ខណៈផ្លូវជាច្រើនមានភាពតូចចង្អៀត ដែល​ទាមទារ​ឱ្យ​មាន​ការ​ស្តារ និងលើកកម្រិតគុណភាពជាចាំបាច់។- សម្តេចតេជោ ហ៊ុន សែន បានប្រកាសថា រាជរដ្ឋាភិបាលកំពុងប្រឹងប្រែងធ្វើយ៉ាងម៉េច កុំឱ្យ​មាន​អតុល្យភាព​ទំនិញ និងតម្រូវការខ្លាំងពេក ដូចជា៖ អ្នកចិញ្ចឹមជ្រូក ចង់ឱ្យសាច់ជ្រូកបានថ្លៃ ខណៈ​ដែល​អ្នក​ទទួលទានសាច់ជ្រូក ចង់ឱ្យសាច់ជ្រូកចុះថោកជាដើម..[]..។- សម្តេចតេជោ ហ៊ុន សែន បានប្រកាសថា ពីមុន​កម្ពុ​ជា​ខ្វះ​ខាត​ស្បៀង​ សម្រាប់​ប្រជាពលរដ្ឋ​ទទួ​ល​ទាន តែពេលនេះកម្ពុជាសល់ស្បៀង(ស្រូវ-អង្ករ)ប្រមាណ ៤លានតោនក្នុងមួយឆ្នាំៗ ដែល​ទាមទារ​ឱ្យ​រាជរដ្ឋាភិបាលប្រឹងប្រែងរកទីផ្សារ ដើម្បីបញ្ចេញស្រូវ-អង្ករ លើស​តម្រូវ​ការ​ប្រើប្រាស់​ក្នុង​ស្រុក​ចេញ។- សម្តេចតេជោ ហ៊ុន សែន បានបញ្ជាក់ថា សេដ្ឋកិច្ច​សកល​បាន​រង​ផល​ប៉ះពាល់​យ៉ាង​ខ្លាំង​ក្នុង​រយៈ​ពេល​ប៉ុន្មាន​ឆ្នាំចុ​ង​ក្រោយនេះ ដែលមួយផ្នែកបណ្តាលមកពីការរាតត្បាតមេរោកជំងឺកូវីដ-១៩ ,​បញ្ហាស​ង្គ្រាមរុស្ស៊ី-អ៊ុយក្រែន និ​ងបញ្ហាទណ្ឌកម្មសេដ្ឋកិច្ចជាដើម។- សម្តេចតេជោ ហ៊ុន សែន បានប្រកាសថា ទោះបីពិភពលោក រួមទាំងកម្ពុជាផង រង​ផល​ប៉ះពាល់​ដោយ​សេដ្ឋកិច្ច​សកល ជាពិសេសវិបត្តិថាមពល ក៏តម្លៃអគ្គិសនី​នៅ​កម្ពុជា មិនឡើងថ្លៃឡើយ តែ​សម្តេច​ក៏​សូមអំពាវនាវដល់ប្រជាពលរដ្ឋប្រើប្រាស់អគ្គិសនី​ដោយភាពសន្សំសំចៃខ្ពស់។- សម្តេចតេជោ ហ៊ុន សែន បានប្រកាសអំពាវនាវដល់គ្រួសារ ដែលមានឪពុក-ម្តាយ-យាយ-តា ចាស់​ជរា សូមគិតគូរខ្ពស់​ដល់សុខភាពពួកគាត់ឱ្យបានដិត​ដល់បំផុតក្នុងរដូវរងារនេះ ព្រោះ​អាកាសធាតុ​ត្រជាក់​ប៉ះពាល់​ដល់​មនុស្ស​ចាស់​ណាស់។- សម្តេចតេជោ ហ៊ុន សែន ប្រកាសអំពាវនាវ​ឱ្យប្រជាពលរដ្ឋដែលប្រើប្រាស់ដងផ្លូវ សូម​គោរព​ច្បាប់​ចរាចរណ៍ និងប្រុងប្រយ័ត្នជាប់ជានិច្ច ខណៈ​ដែល​គ្រោះ​ថ្នាក់​ចរាចរណ៍​បាន​កើត​ឡើង​រៀង​រាល់​ថ្ងៃ បណ្តាលឱ្យមានមនុស្សស្លាប់-របួស និងខូតខាតទ្រព្យសម្បត្តិជាច្រើន។- សម្តេចតេជោ ហ៊ុន សែន បញ្ជាក់ថា ពីមុន​សម្តេច​ធ្លាប់​ប្រកាស​ឱ្យ​ប្រជាពលរដ្ឋ​គោរព​ច្បាប់​ចរាចរណ៍ ជាជាងខ្លាចនគរបាលចរាចរណ៍ចាប់ផាកពិន័យ តែ​ពេល​នេះ​សម្តេច​សូម​អំពាវនាវ​«ឱ្យ​ខ្លាច​ការ​បាត់​បង់​អាយុជីវិតខ្លួនឯង និងអ្នកដទៃ...[]..»។- សម្តេចតេជោ ហ៊ុន សែន សូមថ្លែងអំណរគុណដល់ក្រសួងអប់រំ យុវជន និងកីឡា ,លោកគ្រូ-អ្នក​គ្រូ,គណៈកម្មការរៀបចំការប្រឡងបាក់ឌុប,ស.ស.យ.ក, សមត្ថកិច្ច និង​អាជ្ញាធរ​មូលដ្ឋាន​នៅ​ទូទាំង​ប្រទេស​ដែល​បានយកចិត្តទុកដាក់ខិតខំរៀបចំការប្រឡងបាក់ឌុបប្រកបដោយជោគជ័យ។- សម្តេចតេជោ ហ៊ុន សែន ប្រកាសសូមចូលរួមអបអរសាទរជាមួយឪពុក-ម្តាយ,អាណាព្យាបាល និង​ចៅ​ៗទាំងអស់ ដែល​ទើបប្រឡងជាប់សញ្ញាបត្រមធ្យមសិក្សាទុតិយភូមិ (បាក់ឌុប) នៅ​ទូទាំង​ប្រទេស​ ទោះក្នុងកម្រិតនិទ្ទេសអ្វីក៏ដោយ។- សម្តេចតេជោ ហ៊ុន សែន ប្រកាស​អំពាវនាវ​ដល់​ប្រជាពលរដ្ឋ​ឱ្យ​បន្ត​នាំ​គ្នាប្រុ​ង​ប្រយ័ត្ន​ខ្ពស់​ជាប់​ជា​និច្ច​ពី​ការឆ្លងរីករាលដាលជំងឺកូវីដ-១៩ ខណៈដែលតួលេខ នៃករណីឆ្លងប្រចាំថ្ងៃជំងឺកូវីដ-១៩ មាន​ការ​ឡើងចុះ​ក្នុងកម្រិតតិចតួចក៏ដោយ។- សម្តេចតេជោ ហ៊ុន សែន ប្រកាសថ្លែងអំណរគុណដល់ប្រជាពលរដ្ឋខេត្តកណ្តាល និងកំពង់ស្ពឺ ដែល​បាន​បោះឆ្នោត​គាំទ្រ​គណបក្សប្រជាជនកម្ពុជា ក្នុងពេលបោះឆ្នោតជ្រើសរើសក្រុមប្រឹក្សាឃុំ-សង្កាត់ ហើយសម្តេចសង្ឃឹមយ៉ាងមុតមាំថា ប្រជាពលរដ្ឋខេត្តកំពង់ស្ពឺ និងកណ្តាល នឹង​បន្ត​បោះឆ្នោត​ជូន​គណបក្សប្រជាជនកម្ពុជា ក្នុងការបោះឆ្នោតសកលឆ្នាំ២០២៣ និង​ការ​បោះឆ្នោត​ជា​បន្ត​បន្ទាប់។- សម្តេចតេជោ ហ៊ុន សែន បានប្រកាសបន្តយុទ្ធនាការបោសសម្អាតគ្រាប់មីន និង​យុទ្ធភ័ណ្ឌ​សល់​ពី​សង្គ្រាម ដើម្បីផ្តល់ដីសុវត្ថិភាព និង​ស្នាមញញឹមដ​ល់ប្រជាពលរដ្ឋ។- សម្តេចតេជោ ហ៊ុន សែន បានបន្តប្រកាសអំពាវនាវដល់ប្រជាពលរដ្ឋ​ឱ្យនាំគ្នាទៅ​ទទួល​វ៉ាក់​សាំង​កូវីដ-១៩ ទាំងដូលមូលដ្ឋាន និងដូសជំរុញទី៣,ទី៤ ព្រមទាំងដូសបន្តបន្ទាប់ឱ្យបានគ្រប់ៗគ្នា តាម​ទី​កន្លែង និងតាមការណែនាំរបស់ក្រុមគ្រូពេទ្យចាក់វ៉ាក់សាំងបង្ការជំងឺកូវីដ-១៩។សង្កថាសម្តេចតេជោ ហ៊ុន សែន ចប់នៅវេលាម៉ោង ០៩ និង៣១នាទី

សម្តេចតេជោ ហ៊ុន សែន អញ្ជើញបើកការដ្ឋានស្តារ និងលើកកម្រិតគុណភាពផ្លូវជាតិលេខ៤១ ប្រវែងជាង ៩៥គីឡូម៉ែត្រ

2022/12/26 07:30:42 am        375
Facebook Telegram Linkin
កំពង់ស្ពឺ៖ សម្តេចតេជោ ហ៊ុន សែន នាយករដ្ឋមន្ត្រី បានអញ្ជើញជាអធិបតីភាពដ៏ខ្ពង់ខ្ពស់បំផុត ក្នុងពិធីសំណេះសំណាល និងបើកការដ្ឋានស្តារ និងលើកកម្រិតគុណភាព ផ្លូវជាតិលេខ៤១ ប្រវែងសរុប ៩៥,២៧គីឡូម៉ែត្រ នៅព្រឹកថ្ងៃទី២៦ ខែធ្នូ ឆ្នាំ២០២២នេះ ។ ផ្លូវជាតិលេខ៤១ ចាប់ពីថ្នល់ទទឹង (ចំណុចប្រសព្វផ្លូវជាតិលេខ៤ )ដល់ជុំគិរី(ខេត្តកំពត) នឹងត្រូវស្តារ លើកកម្រិតគុណភាព ក្រោយឥណទានសម្បទានពីរដ្ឋាភិបាល នៃសាធារណរដ្ឋប្រជាមានិតចិន។គម្រោងស្តារ និងលើកកម្រិតគុណភាពផ្លូវជាតិលេខ៤១ ត្រូវសាងសង់ជាប្រភេទផ្លូវក្រាលបេតុងកៅស៊ូ AC កម្រាស់ ៥សង់ទីម៉ែត្រ និងពង្រីកទទឹងតួផ្លូវរហូតដល់ ១២ម៉ែត្រ។ គម្រោងនេះនឹងសាងសង់បន្ថែមសំណង់សិល្បការ្យផ្សេងៗរួមមាន៖ ពង្រីកស្ពានចាស់ចំនួន ០១កន្លែង ប្រវែងសរុប ២០០ម៉ែត្រ ដាក់លូគ្រប់ប្រភេទចំនួន ៣១៥កន្លែង បំពាក់កាមេរ៉ាត្រួតពិនិត្យល្បឿនចំនួន ០៨កន្លែង រួមទាំងបំពាក់ផ្លាកសញ្ញាចរាចរណ៍ គំនូសសញ្ញាចរាចរណ៍ បង្គោលគីឡូម៉ែត្រ និងបង្គោលសុវត្ថិភាពផងដែរ។គម្រោងនេះ នឹងត្រូវអនុវត្តការសាងសង់ដោយក្រុមហ៊ុនសាជីវកម្មស្ពាន និងថ្នល់ចិន (CRBC) និងត្រួតពិនិត្យបច្ចេកទេសដោយក្រុមហ៊ុនទីប្រឹក្សាបច្ចេកទេសក្វាងចូវវ៉ានអាន ដោយប្រើរយៈពេលសាងសង់សរុបចំនួន ៤០ខែ ដែលនឹងបញ្ចប់នៅអំឡុងឆ្នាំ២០២៦។ផ្លូវជាតិលេខ៤១ គឺផ្លូវតភ្ជាប់សេដ្ឋកិច្ចដ៏មានសារៈសំខាន់ដែលឆ្លងកាត់ខេត្តចំនួន ០៤ រួមមាន៖ ខេត្តកណ្តាល ខេត្តកំពង់ស្ពឺ ខេត្តតាកែវ និងខេត្តកំពត ដែលផ្លូវនេះក្រោយបញ្ចប់ការសាងសង់ នឹងដើរតួនាទីសំខាន់ក្នុងការជួយសម្រួលដល់ការធ្វើដំណើររបស់បងប្អូនប្រជាពលរដ្ឋ ភ្ញៀវទេសចរ និងការដឹកជញ្ជូនទំនិញគ្រប់ប្រភេទ ព្រមទាំងកសិផល ដំណាំស្រូវ ដំណាំកៅស៊ូ ម្រេច ផលនេសាទ អំបិល និងផ្លែឈើផ្សេងៗ ទៅកាន់ទីផ្សារក្នុងស្រុក និងទីផ្សារអន្តរជាតិផងដែរ។

សហរដ្ឋអាមេរិកវាយតម្លៃខ្ពស់ភាពជាអ្នកដឹកនាំរបស់កម្ពុជាលើអាស៊ាន ក្នុងឆ្នាំដែលមានបញ្ហាប្រឈមថ្នាក់តំបន់ និងសាកលលោក

2022/12/24 02:06:23 pm        850
Facebook Telegram Linkin
ភ្នំពេញ៖ សហរដ្ឋអាមេរិកវាយតម្លៃខ្ពស់ចំពោះភាពជាអ្នកដឹកនាំរបស់កម្ពុជាលើអាស៊ាន ក្នុងឆ្នាំដែលមានបញ្ហាប្រឈមថ្នាក់តំបន់ និងសាកលលោក។សេចក្តីប្រកាសព័ត៌មានរបស់ស្ថានទូតអាមេរិកនៅថ្ងៃទី២៤ ខែធ្នូនេះមានខ្លឹមសារថា នៅពេលឆ្នាំ២០២២ ជិតបញ្ចប់ លោកឯកអគ្គរដ្ឋទូត Murphy និងបុគ្គលិកបានទទួលសម្តេចនាយករដ្ឋមន្រ្តី ហ៊ុន សែន និងគណ:ប្រតិភូដែលជាទីប្រឹក្សាជាន់ខ្ពស់របស់លោកនៅស្ថានទូតអាមេរិកនៅភ្នំពេញ។ សហរដ្ឋអាមេរិកវាយតម្លៃខ្ពស់ចំពោះភាពជាអ្នកដឹកនាំរបស់កម្ពុជាលើអាស៊ាន ក្នុងឆ្នាំដែលមានបញ្ហាប្រឈមថ្នាក់តំបន់ និងសាកលលោក ការគាំទ្រចំពោះកិច្ចប្រជុំកំពូលពិសេស សហរដ្ឋអាមេរិក អាស៊ាន នៅទីក្រុង Washington បដិសណ្ឋារកិច្ចចំពោះការចូលរួមរបស់លោកប្រធានាធិបតី Biden នៅក្នុងកិច្ចប្រជុំកំពូលកាលពីខែវិច្ឆិកានៅភ្នំពេញ ហើយនឹងការគាំទ្រចំពោះការដំឡើងភាពជាដៃគូជាយុទ្ធសាស្រ្តគ្រប់ជ្រុងជ្រោយ សហរដ្ឋអាមេរិក អាស៊ាន។ស្ថានទូតអាមេរិកប្រកាសថា “យើងសូមស្វាគមន៍ជំហររបស់កម្ពុជា ក្នុងការលើកកម្ពស់ធម្មនុញ្ញរបស់អង្គការសហប្រជាជាតិ ការពារបូរណភាពទឹកដី និងសហការគាំទ្រដំណោះស្រាយរបស់អង្គការសហប្រជាជាតិ ដែលថ្កោលទោសការឈ្លានពានរបស់រុស្ស៊ីលើអ៊ុយក្រែន”។ ដោយសម្លឹងទៅកាន់ឆ្នាំថ្មី លោកឯកអគ្គរដ្ឋទូត Murphy និងសម្តេចនាយករដ្ឋមន្រ្តី ហ៊ុន សែន បានពិភាក្សាលើវិធីកែលម្អទំនាក់ទំនងទ្វេភាគី។ យើងរំពឹងថា ឆ្នាំ២០២៣ ល្អប្រកបដោយផ្លែផ្កា ហើយអាចបន្តការខិតខំក្នុងការពង្រឹងមិត្តភាពរវាងប្រជាជនអាមេរិក និងប្រជាជនកម្ពុជា៕

ឯកឧត្តម វេង សាខុន ប្រជុំផ្សព្វផ្សាយសេចក្តីសម្រេចផែនការរួមឆ្ពោះទៅកាន់ការបោះឆ្នោតជ្រើសតាំងតំណាងរាស្រ្តនីតិកាលទី៧របស់គណបក្សប្រជាជនកម្ពុជា

2022/12/24 11:24:26 am        128
Facebook Telegram Linkin
ត្បូងឃ្មុំ៖ ឯកឧត្តម វេង សាខុន សមាជិកគណៈកម្មាធិការកណ្តាល និងជាប្រធានក្រុមការងារគណបក្សចុះមូលដ្ឋានស្រុកតំបែរ ខេត្តត្បូងឃ្មុំ និងស្រុកកំពង់សៀម ខេត្តកំពង់ចាម បានអញ្ជើញចប្រជុំផ្សព្វផ្សាយសេចក្តីសម្រេច ស្តីពីផែនការរួមឆ្ពោះទៅកាន់ការបោះឆ្នោត ជ្រើសតាំងតំណាងរាស្រ្ត នីតិកាលទី៧ ឆ្នាំ២០២៣ របស់គណៈកម្មាធិការគណបក្សស្រុកតំបែរ ខេត្តត្បូងឃ្មុំ នៅទីស្នាក់ការគណបក្សស្រុកតំបែរ ខេត្តត្បូងឃ្មុំ នាព្រឹកថ្ងៃទី២៤ ខែធ្នូ ឆ្នាំ២០២២នេះ។ ឯកឧត្តម វេង សាខុន បានកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែង ដោយស្មារតីទទួលខុសត្រូវរបស់ឯកឧត្តមអនុប្រធានក្រុមការងារគណបក្សទាំងអស់​ ដែលបានចុះជួយដោះស្រាយរាល់កង្វល់ ទុក្ខលំបាក និងតម្រូវការរបស់ប្រជាពលរដ្ឋនៅទូទាំងស្រុកតំបែរបានយ៉ាងសកម្ម និងល្អប្រសើរ។ឯកឧត្តមបញ្ជាក់ថា ការងារបម្រើប្រជាពលរដ្ឋ និងការដឹងអំពីសុខទុក្ខរបស់គាត់ គឺជាការតបស្នងសងគុណដែលពួកគាត់បាន និងបន្តគាំទ្រសម្តេចអគ្គមហាសេនាបតីតេជោ ហ៊ុន សែន និងគណបក្សប្រជាជនយើងរហូតមក ស្តែងចេញគឺលទ្ធផលនៃការបោះឆ្នោតជ្រើសរើសក្រុមប្រឹក្សាឃុំ អាណត្តិទី៥ ឆ្នាំ២០២២ កន្លងមកនេះ។ សម្រាប់ការបោះឆ្នោតជ្រើសតាំងតំណាងរាស្ត្រនីតិកាលទី៧ ឆ្នាំ២០២៣ សមាជិក សមាជិកាបក្សទូទាំងស្រុកតំបែរត្រូវប្តេជ្ញាគាំទ្រសម្តេចតេជោ ជាបេក្ខភាពនាយករដ្ឋមន្ត្រី និងគាំទ្រឯកឧត្តមបណ្ឌិត ហ៊ុន ម៉ាណែត ជាបេក្ខភាពនាយករដ្ឋមន្ត្រីនាពេលអនាគត។ទន្ទឹមនឹងនេះ ត្រូវយកចិត្តទុកដាក់ពង្រឹង ពង្រីក និងបន្តធ្វើបច្ចុប្បន្នភាពសមាជិកគណបក្សឱ្យបាន ព្រោះថាសមាជិកគណបក្ស០១រូប គឺជាសម្លេងឆ្នោតគាំទ្រគណបក្ស០១សន្លឹក។ សមាជិក សមាជិកាគណបក្សទាំងក្រុមការងារថ្នាក់កណ្តាល ថ្នាក់មូលដ្ឋាន និងយុវជនបក្សត្រូវបន្តសកម្មភាពឱ្យបានសកម្មក្នុងការចិញ្ចឹមចលនាមហាជនតាមភូមិ ឃុំ និងបញ្រ្ជាបអំពីអំពើល្អ សមិទ្ធផល និងសកម្មភាពរបស់គណបក្សក្រោមការដឹកនាំដោយសម្តេចតេជោ ដូចជាជោគជ័យក្នុងការទប់ទល់នឹងជំងឺកូវីដ-១៩ ការបញ្ចេញប្រាក់ឧបត្ថម្ភដល់ប្រជាជនក្រីក្រ ការរក្សាបានយ៉ាងរឹងមាំនូវសេដ្ឋកិច្ចជាតិ ជញ្ជីងពាណិជ្ជកម្មជាមួយបណ្តាប្រទេសនៅតែមានការកើនឡើងជាបន្តបណ្តាប់ ការជោគជ័យក្នុងភាពជាម្ចាស់ផ្ទះនៃកិច្ចប្រជុំអាស៊ាន និងទស្សនកិច្ចរបស់សម្តេចតេជោទៅអឺរ៉ុបកន្លងមកនេះ បានបង្ហាញយ៉ាងច្បាស់ពីភាពស្មើមុខស្មើមាត់របស់កម្ពុជាលើឆាកអន្តរជាតិ។ឯកឧត្តមប្រធានសង្កត់ធ្ងន់ថា គីជាក្តីមោទនៈដែលសមាជិក សមាជិកាគណបក្សយើងមិនអាចមើលរំលង ហើយត្រូវផ្សព្វផ្សាយ ដើម្បីធានានូវភាពឈ្នះជូនគណបក្ស។ បន្តរក្សាសាមគ្គីភាព និងឯកភាពផ្ទៃក្នុងរវាងសមាជិក សមាជិកាយើងទាំងអស់។ ទន្ទឹមនឹងនេះ អាជ្ញាធរមូលដ្ឋានទាំងអស់ត្រូវរក្សា និងធានាដល់សន្តិសុខ សុវត្ថិភាព និងភាពកក់ក្តៅជូនប្រជាពលរដ្ឋយើង៕

តំបន់​សំណង់​អគារ​បារាំង​ក្នុង​ក្រុង​កំពតនឹង​ប្រែក្លាយ​ឲ្យ​ទៅជា​ផាប់​ស្ត្រី​តទី​២​ នៅ​កម្ពុជា

2022/12/24 10:00:13 am        387
Facebook Telegram Linkin
កំពត៖ សេវាករ​ទេសចរណ៍​នៅ​តំបន់​ផ្សារ​ក្រណាត់​ចាស់​ក្រុង​កំពត​បាន​លើកឡើងថា​ ពួកគាត់​កំពុង​ខិតខំ​បង្កើន​សេវាកម្ម​ឲ្យ​កាន់តែ​ល្អ និង​សំបូរបែប ដើម្បី​ទាក់ទាញ​ភ្ញៀវ​ទេសចរ​ជាតិ និង​អន្តរជាតិ​ឲ្យ​បាន​កាន់​តែច្រើន ​ពោល​គឺ​ចង់​ឲ្យ​តំបន់​នោះ​ក្លាយជា​ផាប់​ស្ត្រី​ត​។ ​ចំណែក​មន្ត្រី​ជំនាញ​ក៏បាន​អះអាង​ដែរ​ថា​ កំពុង​សហការ​រៀបចំ ស្វែងរក​លទ្ធភាព​ជំរុញ​តំបន់​នោះ​ឲ្យ​កាន់តែ​ទាក់ទាញ​ និង​ក្លាយជា​ផាប់​ស្ត្រី​តទី​២​ នៅ​កម្ពុជា​។ ​​បុគ្គលិក​អាហារដ្ឋាន “​ឌឺ​ជេ​ប្រេ​ក​” បាន​ប្រាប់​ឲ្យ​ដឹង​ថា តំបន់​ផ្សារ​ក្រណាត់​ចាស់ ឬ​តំបន់​សំណង់​អគារ​បន្សល់​ទុក​ពី​សម័យ​អាណានិគម​បារាំង ជា​កន្លែង​ដែល​ទាក់ទាញ​ភ្ញៀវ​បរទេស​ឲ្យ​មក​អង្គុយ​កម្សាន្ត និង​ទទួល​អាហារ​ច្រើន​ជាងគេ​ក្នុង​ខេត្ត​។ ហើយ​បន្ទាប់ពី​ស្ងប់ស្ងាត់​ភ្ញៀវ​មួយ​រយៈ​អំឡុងពេល​កូ​វីដ-​១៩ បី​ខែ​ចុងក្រោយ​នេះ​កំណើន​ភ្ញៀវ​កើន​ឡើងវិញ​ខ្លាំង ហើយ​ឃើញ​មាន​ហាង អាហារដ្ឋាន ភោជនីយដ្ឋាន​ថ្មីៗ​ជាច្រើន​បាន​បើក​បម្រើ​សេវាកម្ម​រប​ស់​ខ្លួន ធ្វើ​ឲ្យ​តំបន់​នេះ​អ៊ូអរ និង​ទាក់ទាញ​ជាង​មុន​។ អ្នក​គ្រប់​គ្រង់ “​កា​ប៉ាល់​” (KAPAL) ភោជនីយដ្ឋាន ក្លិប​កម្សាន្ត និង​ស្កា​យ​បារ ដែល​ទើប​បង្កើត​ថ្មី​ដំបូង​គេ​នៅ​ម្តុំ​សួនច្បារ​ផ្សា​ក្រណាត់​ក្រុង​កំពត​បាន​ប្រាប់​ឲ្យ​ដឹង​ថា​ ដោយ​ឃើញ​អំពី​សន្ទុះ​នៃ​ការខិតខំ​អភិវឌ្ឍន៍​របស់ ឯកឧត្តម ម៉ៅ ធនិន អភិបាល​ខេត្ត​កំពត ស្ថាបនា​ផ្លូវ​បាន​ស្អាត បង្កើត​ឆ្នេរ​ខ្សាច់ និង​សួន​កម្សាន្ត​មាត់​ព្រែក​ដ៏​ទាក់ទាញ ពិសេស​លោក​តែងតែ​ខិតខំ​បង្កើត​ព្រឹត្តិការ​ធំៗ​សប្បាយ​ៗ សម្រាប់​ទាក់ទាញ​ភ្ញៀវ​ទេសចរ​ផង​នោះ ទើប​ក្រុមការងារ​លោក​មានគំនិត​បង្កើត KAPAL នេះ​ឡើង ដើម្បី​ជំរុញ​តំបន់​សំណង់​អគារ​បារាំង​នេះ​ទៅជា​តំបន់​ផាប់​ស្ត្រី​តទី​២ ​របស់​កម្ពុជា​។ ​ប្រធាន​មន្ទីរ​ទេសចរណ៍ លោក សយ ស៊ី​ណុល បាន​បញ្ជាក់ថា តំបន់​សំណង​អគារ​បន្សល់ទុក​ពី​សម័យ​អាណានិគម​និយម​បារាំង​នៅ​ក្រុង​កំពត​ប្រមាណ​ជាង ​៣០០​ខ្នង ហើយ​ត្រូវ​បាន​គេ​ចាត់ទុកជា​សម្បត្តិ​បេតិកភណ្ឌ​ជាតិ​។ តំបន់​នេះ​ស្ថិត​នៅ​តាម​បណ្តោយ​ដង​ព្រែក​ប៉ែក​ខាងកើត ហើយ​ជា​កន្លែង​ទាក់ទាញ​ចំណាប់អារម្មណ៍​ភ្ញៀវ​បរទេស​យ៉ាង​ច្រើន ពិសេស​រាប់​ពេល​ល្ងាច​ពួក​គេ​តែងតែ​មក​ប្រមូល​ផ្តុំគ្នា អង្គុយ​លម្ហែ ទទួល​ទាន​អាហារ ជជែក​កន្លែង​កម្សាន្ត​នៅ​តាម​ហាង អាហារដ្ឋា​ន និង​ផាប់​ប្រមាណ​ជាង​មួយ​រយ​កន្លែង​នៅក្នុង​តំបន់​នោះ​។ លោក​បាន​បញ្ជាក់​ថា លោក​បាន​ពិភាក្សា​ជាមួយ​អ្នក​ជំនាញ​ពាក់ព័ន្ធ ដើម្បី​រៀបចំ​តំបន់​នេះ​ឲ្យ​កាន់​តែ​មាន​ភាព​ទាក់ទាញ និង​ក្លាយ​ជា​តំបន់​ផាប់​ស្ត្រី​ទី​២​ របស់​កម្ពុជា​នៅ​ប៉ែក​និរតី​។ ​សម្រាប់​ឆ្នាំ​២០២២​ មាន​ចំនួន​ភ្ញៀវ​ទេសចរ ១​លាន ៨​សែន​នាក់ ក្នុង​នោះ​ភ្ញៀវ​ទេសចរ​អន្តរជាតិ​ជាង ៥​ម៉ឺន​នាក់។ ភ្ញៀវ​អន្តរជាតិ​មកពី​អឺរ៉ុប​បើ​ប្រៀបធៀប​ទោ​នឹង​ឆ្នាំ​២០១៩ គឺ​ស្មើនឹង ៦០%​ហើយ​៕ អត្ថបទ៖ អន សារឹម

កិច្ចពិគ្រោះយោបល់ក្រៅផ្លូវការថ្នាក់រដ្ឋមន្ត្រីស្តីពីស្ថានការណ៍នៅមីយ៉ាន់ម៉ា កោតសរសើរកិច្ចខិតខំប្រឹងប្រែងរបស់កម្ពុជា និងការងាររបស់ប្រេសិតពិសេស នៃប្រធានអាស៊ាន

2022/12/23 12:30:03 pm        295
Facebook Telegram Linkin
ភ្នំពេញ៖ កិច្ចពិគ្រោះយោបល់ក្រៅផ្លូវការថ្នាក់រដ្ឋមន្ត្រីស្តីពីស្ថានការណ៍នៅមីយ៉ាន់ម៉ា បានកោតសរសើរកិច្ចខិតខំប្រឹងប្រែងរបស់កម្ពុជា និងការងាររបស់ប្រេសិតពិសេស នៃប្រធានអាស៊ាន ក្នុងការសម្របសម្រួលការអនុវត្ត 5pc ជាពិសេសផ្តោតលើការផ្តល់ជំនួយមនុស្សធម៌ដល់ប្រជាជនដែលត្រូវការជំនួយបំផុត។គួរបញ្ជាក់ថា ឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិកម្ពុជា បានអញ្ជើញចូលរួមកិច្ចពិគ្រោះយោបល់ក្រៅផ្លូវការថ្នាក់រដ្ឋមន្ត្រី ស្តីពីស្ថានការណ៍នៅមីយ៉ាន់ម៉ា កាលពីថ្ងៃទី២២ ខែធ្នូ ឆ្នាំ២០២២។ កិច្ចពិគ្រោះយោបល់ក្រៅផ្លូវការថ្នាក់រដ្ឋមន្ត្រី ស្តីពីស្ថានការណ៍នៅមីយ៉ាន់ម៉ា រៀបចំឡើងតាមសំណុcទី១៤ នៃការត្រួតពិនិត្យ និងសេចក្តីសម្រេចរបស់ថ្នាក់ដឹកនាំអាស៊ានលើការអនុវត្តកិច្ចព្រមព្រៀងជាឯកច្ឆ័ន ៥ចំណុច(5PC)។ កិច្ចពិគ្រោះយោបល់ក្រៅផ្លូវការជាលក្ខណៈបើកចំហនេះ បានផ្តល់ឱកាសដ៏ល្អសម្រាប់រដ្ឋមន្ត្រី ក៏ដូចជាតំណាងដែលបានចូលរួមទាំងអស់ ធ្វើការត្រួតពិនិត្យ ដោយបើកចំហ ស្មោះត្រង់ និងប្រកបដោយអត្ថន័យ ព្រមទាំងទទួលបាននូវព័ត៌មានថ្មីៗពីមីយ៉ាន់ម៉ា។

សម្ដេចតេជោ ហ៊ុន សែន សួរទៅក្រុមប្រឆាំងថា តើហ៊ានស្បថទេដែលតែងតែនិយាយថា រដ្ឋាភិបាលធ្វើយូរៗទៅ ក្រទៅៗនោះ

2022/12/22 10:10:09 am        267
Facebook Telegram Linkin
ព្រះសីហនុ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា​បាន​មាន​ប្រសាសន៍​ដោយ​ចោទ​សួរ​ទៅ​ក្រុម​ប្រឆាំងថា តើហ៊ានស្បថទេដែលតែងតែនិយាយថា រដ្ឋាភិបាលធ្វើយូរៗទៅ ក្រទៅ​ៗ​នោះ​។សម្តេចតេជោប្រមុខរាជរដ្ឋាភិបាលកម្ពុជាបានបង្ហាញការហួសចិត្ត និង​ដាក់​ជា​សំណួរ​ឱ្យ​ក្រុម​អ្នក​ប្រឆាំង​ស្បថ​អំពី​ការ​ពិត​យ៉ាង​ដូច្នេះ​ក្នុង​ពេល​អញ្ជើញ​ជា​អធិបតី​សម្ពោធ​បើក​ឱ្យប្រើប្រាស់​ជាផ្លូ​វ​ការ​ផ្លូវ​២​ខ្សែ​ គឺផ្លូវលេខ១៤៦បេ(វិថីសម្តេចសង្ឃរាជ ទេព វង្ស) និងផ្លូវ១៤៨(តីរវិថីសម្តេចតេជោ ហ៊ុន សែន)ប្រវែងសរុប៤៣,០២៥គ.ម នៅខេត្តព្រះសីហនុ ដែលប្រើប្រាស់ថវិកាជាតិរបស់រាជ រដ្ឋាភិបាល នៃព្រះរាជាណាចក្រកម្ពុជា។ក្នុងពិធីដែលធ្វើនៅថ្ងៃទី២២ ខែធ្នូ ឆ្នាំ២០២២ ដោយ​សារ​តែ​ការ​រីក​ចម្រើន​តាម​រយៈ​សមិទ្ធផល​រីក​ដុះ​ដាល​ជាបន្តបន្ទាប់ សម្តេចតេជោ ក៏បានមាន​ប្រសាសន៍​ចោទ​ជា​សំណួរ​ទៅ​កាន់​ក្រុម​ប្រឆាំង​ដែល​តែង​តែ​និយាយថា រដ្ឋាភិបាលធ្វើយូរៗទៅ ក្រទៅៗនោះ តើហ៊ានស្បថដែរឬទេ។ សម្តេច​បាន​មាន​ប្រសាសន៍បន្តថា គ្មានអ្វីដែលក្រជាងកាលពីឆ្នាំ១៩៧៩ទេ ហើយ​សមិទ្ធផល​ដែល​ទទួល​បានរហូតមកដល់សព្វថ្ងៃជាការរីកចម្រើនសម្រាប់ប្រជាជន។គួរបញ្ជាក់ថា សមិទ្ធផលដែលសម្ពោធបើកឱ្យប្រើប្រាស់នៅថ្ងៃនេះ មានផ្លូវ២ខ្សែ ក្នុងនោះមួយ​ខ្សែមានឈ្មោះថាផ្លូវលេខ១៤៦B ឬហៅថា វិថីសុវត្ថិភាពសម្តេចព្រះសង្ឃរាជ ទេព វង្ស ចាប់​ពី​ចំណុច​បំបែកផ្លូវជាតិលេខ៤ ត្រង់គីឡូម៉ែត្រលេខ ១៧៨+១៦៥ ស្ថិតនៅភូមិវាលធំ ឃុំវាលរេញ ស្រុកព្រៃនប់ ទៅដល់រង្វង់មូលស្ទឹងហាវ ស្ថិតនៅភូមិ១ ឃុំអូរត្រេះ ស្រុកស្ទឹងហាវ។ មួយខ្សែ​ទៀត​មាន​ឈ្មោះផ្លូវលេខ១៤៨ ឬហៅថា តីរវិថីសម្តេចតេជោ ហ៊ុន សែន (តីរវិថី គឺវិថីស្ថិត​នៅ​បណ្តោយ​តាមឆ្នេរ) បន្តពីរង្វង់មូលស្ទឹងហាវ ដល់ចំណុចប្រសព្វផ្លូវជាតិលេខ៤ ត្រង់គីឡូម៉ែត្រលេខ ២២៥+៥៥០ កំពង់ផែស្វយ័តក្រុងព្រះសីហនុ។ផ្លូវទាំងពីរខ្សែនេះ ត្រូវបានស្ថាបនាឡើងវិញទៅតាមលក្ខណៈបច្ចេកទេស និងបែងចែកជាពីរប្រភេទគឺ៖ ១). កំណាត់ផ្លូវប្រវែងជិត ២១គីឡូម៉ែត្រ ត្រូវបានស្ថាបនាដោយក្រាលបេតុងកៅស៊ូAC កម្រាស់ ៩សង់ទីម៉ែត្រ មានទទឹងតួផ្លូវ ១១ម៉ែត្រ និង ២). កំណាត់ផ្លូវប្រវែងជាង ២២គីឡូម៉ែត្រ ត្រូវបានស្ថាបនាដោយក្រាលបេតុងសរសៃដែក កម្រាស់ ២៦សង់ទីម៉ែត្រ ទទឹងតួផ្លូវ ១១ម៉ែត្រ រួមទាំងការសាងសង់សំណង់សិល្បការ្យផ្សេងៗ រួមមានដូចជា សាងសង់ស្ពានថ្មី ០១កន្លែង និងពង្រីកស្ពានចាស់ ១៧កន្លែង និងដាក់លូគ្រប់ប្រភេទចំនួន ១៦១កន្លែង។គម្រោងស្ថាបនាផ្លូវទាំងពីរខ្សែនេះ បានបើកការដ្ឋានសាងសង់កាលពីអំឡុង ខែមេសា ឆ្នាំ២០២០ និងបញ្ចប់ជាស្ថាពរនៅអំឡុងខែសីហា ឆ្នាំ២០២២ ប្រើប្រាស់រយៈពេលសាងសង់ចំនួន ២៨ខែ សាងសង់ដោយក្រុមហ៊ុនសាជីវកម្មស្ពាននិងថ្នល់ចិន (CRBC) និងត្រួតពិនិត្យបច្ចេកទេសដោយក្រុមការងារបច្ចេកទេសនៃក្រសួងសាធារណការ និងដឹកជញ្ជូន។ ការស្ថាបនាផ្លូវទាំងពីរខ្សែនេះ បានចំណាយថវិកាសាងសង់ជាង ៧៦លានដុល្លារអាមេរិក ជាប្រភពថវិកាសន្សំរបស់រាជរដ្ឋាភិបាល៕

បណ្ដាញសង្គម

ព័ត៌មានថ្មីៗ

ឯកឧត្តម ប៉េង ពោធិ៍នា អញ្ជើញចុះជួបសំណេះសំណាល និងសួរសុខទុក្ខ​កងទ័ព​នៅ​ទី​បញ្ជាការ​ជួរមុខ សមរភូមិទិសទី៣ យោធាភូមិភាគទី៤ ខេត្តឧត្តរមានជ័យ
07/16/2025 12:07 PM
Facebook Telegram Linkin
សេចក្ដីរាយការណ៍៖ លោក Trump គ្រោងជួបនាយករដ្ឋមន្រ្តីកាតា ដើម្បីពិភាក្សាបទឈប់បាញ់ហ្កាហ្សា
07/16/2025 12:07 PM
Facebook Telegram Linkin
ភ្នំភ្លើងនៅប្រទេសអ៊ីស្លង់ បានផ្ទុះឡើងជាលើកទី១២ ចាប់តាំងពីឆ្នាំ២០២១ មក
07/16/2025 12:07 PM
Facebook Telegram Linkin
សម្ដេចតេជោ ប្រាប់សមាជិកក្រុមប្រឹក្សាពិគ្រោះយោបល់ប្រធានាធិបតីឥណ្ឌូណេស៊ីថា កម្ពុជាប្រកាន់យកគោលជំហរប្តឹងទៅ ICJ គឺជាជម្រើសសន្តិវិធី
07/16/2025 12:07 PM
Facebook Telegram Linkin
រដ្ឋមន្រ្តីពាណិជ្ជកម្ម ស្នើក្រុមហ៊ុន VISA បន្តកិច្ចសហប្រតិបត្តិការជាមួយកម្ពុជាបន្ថែមទៀត ដើម្បីលើកកម្ពស់ពាណិជ្ជកម្មតាមប្រព័ន្ធអេទ្បិចត្រូនិក
07/16/2025 12:07 PM
Facebook Telegram Linkin
តវ៉ាចំពោះការធ្វើអន្តោប្រវេសន៍ខុសច្បាប់ក្នុងពេលមានភាពវឹកវរនៅភាគខាងត្បូងអេស្ប៉ាញ
07/16/2025 12:07 PM
Facebook Telegram Linkin
ពលរដ្ឋសហគមន៍ Druze ប្រមូលផ្តុំគ្នានៅជិតរបងតំបន់ខ្ពង់រាប Golan កាន់កាប់ដោយអ៊ីស្រាអែលDruze gather
07/16/2025 12:07 PM
Facebook Telegram Linkin
កងទ័ពអាមេរិក និងប៉ាណាម៉ា ធ្វើសមយុទ្ធយោធានៅជុំវិញតំបន់ព្រែកជីក
07/16/2025 12:07 PM
Facebook Telegram Linkin
អ្នកនាំពាក្យរងក្រសួងមហាផ្ទៃ៖ ស្ថាប័ន Interpol នឹងមិនខ្វល់រឿងបន្ដឹងនយោបាយផ្ទៃក្នុងថៃទេ ហើយ​កម្ពុជាក៏មិនរងសម្ពាធណាមួយពីបណ្ដឹងរបស់ថៃដែរ
07/16/2025 12:07 PM
Facebook Telegram Linkin
តុលាការ៖ លោក Trump មិនអាចរារាំងជនភៀសខ្លួនមិនឲ្យចូលសហរដ្ឋអាមេរិកដោយបម្រាមធ្វើដំណើរទេ
07/16/2025 12:07 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.