នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
TOP STORY | សម្ដេចធិបតី បានចាត់វិធានការចាំបាច់​ជាបន្ត​បន្ទា​ប់ចំ​ពោះកា​រ​វិល​ត្រឡប់​ទ្រង់ទ្រាយ​ធំរ​បស់​ពលករ​ខ្មែរ និងជនភៀសសឹក
TOP STORY | សម្ដេចតេជោ៖ ពេលនេះ ខ្ញុំកំពុងតែរួមចំណែកបញ្ជាទ័ព តាមប្រព័ន្ធវីដេអូ និងប្រព័ន្ធផ្សេងទៀតជាមួយនាយករដ្ឋមន្ត្រី, រដ្ឋមន្ត្រីក្រសួងការពារជាតិ អគ្គមេបញ្ជាការកងទ័ព និងបញ្ជាការកងកម្លាំងប្រដាប់អាវុធគ្រប់លំដាប់ថ្នាក់
TOP STORY |សម្ដេចធិបតី ហ៊ុន ម៉ាណែត ដាក់លិខិតស្នើសុំ​​កោះប្រជុំក្រុមប្រឹក្សាសន្តិសុខជាបន្ទាន់ ដើម្បី​សុំ​ការ​អន្ត​រាគមន៍​បញ្ចប់​ការ​ឈ្លាន​ពាន​របស់​កង​ទ័ព​ថៃមក​លើដែនអធិបតេយ្យភាពរបស់កម្ពុជា
TOP STORY | សម្ដេចធិបតី៖ កងទ័ពថៃបានបើកការ​វាយប្រហារ​មក​លើ​ទីតាំង​ឈរ​ជើង​របស់​កង​ទ័ព​កម្ពុជា​ នៅប្រាសាទតាមាន់ធំ តាក្របី និងបានពង្រីកភូមិសាស្ត្រវាយប្រហារទៅដល់តំបន់មុំបី

នយោបាយ​ និង ការអភិវឌ្ឍន៍

មន្រី្តជាន់ខ្ពស់សុខាភិបាល ជំរុញមន្រី្តពង្រឹងសហការលើការលុបបំបាត់ជំងឺរបេង

2022/03/31 02:38:17 pm        428
Facebook Telegram Linkin
​ភ្នំពេញ៖ ឯកឧត្តមសាស្រ្តាចារ្យ ស៊ា ហួង រដ្ឋលេខាធិការក្រសួងសុខាភិបាល ស្នើមន្រី្តសុខាភិបាលទាំងអស់ ត្រូវពង្រឹងកិច្ចសហការ ការងារ របេងស៊ាំថ្នាំ និងរបេង អេដស៍ ដើម្បីកាត់បន្ថយអត្រាឈឺ និងស្លាប់ដោយសារបញ្ហានេះ។ការថ្លែងរបស់ឯកឧត្តម សាស្រ្តាចារ្យ ស៊ា ហួង យ៉ាងដូច្នេះ នាឱកាសបើកសន្និបាត​ស្តីពី​ការងារ​កម្ចាត់​រោគរបេងប្រចាំឆ្នាំ២០២១ ទូទាំងប្រទេស លើកទី២៤ រយៈពេល០២ថ្ងៃ ចាប់ពីថ្ងៃទី៣០-៣១ ខែមីនា ឆ្នាំ២០២២នេះ។ ឯកឧត្តមរដ្ឋលេខាធិការ បានបន្តថា ការងារទាំងនេះទាមទារឲ្យមាន ការចូលរួម​យ៉ាង​ជិតស្និទ​បន្ថែម ទៀត​ ពីគ្រប់ភាគីពាក់ព័ន្ធ ​ស្របតាមខ្លឹមសារនៃសារលិខិតរបស់​សម្តេច​អគ្គមហា​សេនាបតីតេជោ ហ៊ុន សែន នាយករដ្ឋមន្រី្ត នៃព្រះរាជាណាចក្រកម្ពុជា ក្នុងឱកាស​ទិវា​កម្ចាត់​រោគ​របេង​ពិភពលោក ថ្ងៃទី២៤ ​ខែមីនា ឆ្នាំ២០២២ នាពេលថ្មីៗនេះ​ ពិសេសការរួមគ្នា​ជាមួយ​ដៃគូ​អភិវឌ្ឍន៍ ​អាជ្ញាធរដែនដី និង​សហគមន៍មូលដ្ឋាន ​ស្ថាប័នសុខាភិបាលពាក់ព័ន្ធទាំងឡាយ ព្រមទាំង​ស្ថាប័ន​មិនមែន​សុខាភិបាល​ផ្សេងទៀត​ សំដៅបញ្ចប់ជំងឺរបេង នៅថ្ងៃអនាគត។បើតាមលោកវេជ្ជបណ្ឌិត ​ហួត ចាន់យុដា ប្រធានមជ្ឈមណ្ឌលជាតិ ​កំចាត់រោគរបេង​ និងហង់​សិន បានឲ្យដឹងថា ​នៅកម្ពុជា ក្នុងឆ្នាំ២០២១​កន្លងមកនេះ​ ដោយមានជំនួយឧបត្ថម្ភគាំទ្រយ៉ាងខ្លាំងពី​រាជរដ្ឋាភិបាល អង្គការជាដៃគូ ព្រមទាំង​កិច្ច​សហ​ប្រតិបតិ្តការ​ និង​សម្របសម្រួល​​​ល្អ របស់មន្រី្ត សុខាភិបាល​បំរើការ​នៅមនី្ទរពេទ្យបង្អែក​ មណ្ឌលសុខភាព ប៉ុស្តិ៍សុខភាព​ ជាមួយ​សហគមន៍​មូលដ្ឋាន ស្ថាប័នសុខាភិបាលពាក់ព័ន្ធ ​និងស្ថាប័ន​មិនមែន​សុខាភិបាល​ បានធ្វើឲ្យកម្មវិធីជាតិ​កម្ចាត់​រោគរបេង​ បានទទួល​សមិទ្ធផល​ថ្មីៗ​បន្ថែមទៀត ​ពិសេសគឺការរក្សា​បាន ​អត្រា​ព្យាបាល​ដោយ ជោគជ័យបាន៩៥% ដែល​លើស​ពី​គោលដៅ​ចំណុច​ប្រចាំឆ្នាំ​ដែលកំណត់ត្រឹមតែ៩០%៕ អត្ថបទ៖ រដ្ឋា

សម្តេចក្រឡាហោម ស ខេង គាំទ្រការ​បង្កើត​ច្បាប់​គ្រប់​គ្រង​សារធាតុទាំងឡាយ​ដែលអាច​ច្នៃ​ផលិត​គ្រឿងញៀន

2022/03/31 02:28:38 pm        417
Facebook Telegram Linkin
ភ្នំពេញ៖ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានបញ្ជាក់ពីការគាំទ្រចំពោះការបង្កើតច្បាប់មួយ ដើម្បីគ្រប់គ្រងសារធាតុផ្សំទាំងឡាយ ដែលអាចយកទៅកែច្នៃ ឬផលិតជាគ្រឿងញៀន ខណៈនាពេលកន្លងទៅ សារធាតុផ្សំខ្លះ ត្រូវបានជនទុច្ចរិតយកទៅផ្សំធ្វើជាគ្រឿងញៀន។ក្នុងឱកាសអញ្ជើញបូកសរុបលទ្ធផលការប្រយុទ្ធប្រឆាំងគ្រឿងញៀនខុសច្បាប់លើកទី៦ នាព្រឹកថ្ងៃទី៣១ ខែមីនា ឆ្នាំ២០២២នេះ សម្ដេចក្រឡាហោម ស ខេង បានថ្លែងថា សម្ដេចបាន​ពិភាក្សា​ជាមួយ​ឯកឧត្តម កើត រិទ្ធ រដ្ឋមន្ដ្រីក្រសួងយុត្តិធម៌ និងនាយឧត្តមសេនីយ៍សន្ដិបណ្ឌិត នេត សាវឿន អគ្គស្នងការនគរបាលជាតិ រួចរាល់ហើយ ដើម្បីរៀបចំបង្កើតច្បាប់នេះ សំដៅទប់ស្កាត់​ការ​លួចផលិត ​និង​កែច្នៃ​គ្រឿងញៀន​នៅក្នុងប្រទេសកម្ពុជា។សម្ដេចក្រឡាហោម ស ខេង បានថ្លែងបញ្ជាក់ថា «បានពិភាក្សាជាមួយក្រសួងយុត្តិធម៌ និង​អគ្គស្នងការដ្ឋាននគរបាល យើងបានឯកភាពគ្នាថា យើងចាំបាច់ត្រូវតែបង្កើតក្របខណ្ឌច្បាប់មួយ ដើម្បីគ្រប់គ្រងសារធាតុទាំងឡាយ ដែលយកទៅ​កែច្នៃ​ផលិតគ្រឿងផ្សំ ​ដើម្បី​ផលិតគ្រឿង​ញៀន​បាន»។ការបញ្ជាក់បែបនេះ របស់សម្ដេចក្រឡាហោម ស ខេង ក្រោយពេលដែលកម្ពុជា បង្ក្រាប​បានជា​បន្ដបន្ទាប់នូវបទល្មើសគ្រឿងញៀន ​ពិសេសការលួចផលិតនៅក្នុងស្រុកតែម្ដង ដើម្បីនាំចេញ​ទៅ​កាន់​ប្រទេសទីបី។ បើតាមសម្ដេច ស ខេង ក្រៅពីគ្រឿងញៀនហើយនោះ សមត្ថកិច្ចជំនាញ​ក៏បាន​រក​ឃើញនូវ​សារធាតុ​គីមីផ្សំ រហូតដល់ជាង ៣០០តោនផងដែរ ​ដែលបម្រើឲ្យការផលិត​គ្រឿងញៀន​។សម្ដេចក្រឡាហោម ស ខេង​ បានលើកឡើងទៀតថា ក្រសួងស្ថាប័នពាក់ព័ន្ធ បាន​អនុញ្ញា​ឲ្យ​នាំ​ចូល​សារធាតុគីមីស្របច្បាប់​មក​ប្រទេសកម្ពុជា ​ដើម្បីផលិត ​ឬកែច្នៃ សម្រាប់​ប្រើប្រាស់​ក្នុងវិស័យផ្សេងៗ ​សម្រាប់អភិវឌ្ឍសេដ្ឋកិច្ច ​ប៉ុន្ដែពួកក្រុមឧក្រិដ្ឋជនបានលួចបន្លំយកសារធាតុគីមីនេះ ទៅប្រើប្រាស់​ផ្សំ​ចេញជាគ្រឿងញៀន រួចហើយ ​ប្រើប្រាស់នៅប្រទេសកម្ពុជា និងប្រើប្រាស់ទៅប្រទេសទី៣ ឬទី៤ ជាដើម។ចំណុចនេះ សម្ដេចក្រឡាហោម ស ខេង ក៏បានលើកទឹកចិត្តដល់ភាគីពាក់ព័ន្ធទាំងអស់ ដើម្បីធ្វើ​យ៉ាង​ណា​ឲ្យការងារទាំងនេះទទួលបានជោគជ័យ​ មិនមែនមានន័យថា រាំងស្ទះ​ដល់​ការ​នាំចូលសារធាតុគីមីទាំងនោះ ចូលមកកម្ពុជាឡើយ។ប៉ុន្ដែទន្ទឹមនឹងនោះ ត្រូវអនុវត្តផែនការ ក្នុងការលួចកែច្នៃគ្រឿងញៀន។ យ៉ាងណាក៏ដោយសម្ដេចក្រឡាហោម ​សង្ឃឹមថា​ ក្រសួង-ស្ថាប័នពាក់ព័ន្ធ នឹងខិតខំធ្វើការងារទាំង​នេះ ក្នុងគោលដៅទប់ស្កាត់ គ្រឿងញៀនខុសច្បាប់​នៅប្រទេសកម្ពុជា។សូមបញ្ជាក់ថា កម្លាំងសមត្ថកិច្ចកម្ពុជា បានបង្ក្រាបបានសារធាតុផ្សំ ដើម្បីធ្វើជាគ្រឿងញៀន រហូត​ដល់ជាង ៣០០តោន ហើយនៅពេលនេះ ស្ថាប័នជំនាញពាក់ព័ន្ធទាំងអស់ កំពុងតែរួមគ្នា​គិតគូរ​រក​វិធី​ដើម្បី​បន្សាប​នូវសារធាតុផ្សំទាំងអស់នោះ​ មុនយកទៅកម្ទេចចោល។ នេះបើតាមការឲ្យដឹងពីសម្ដេចក្រឡាហោម ស ខេង ក្នុង​ពិធី​បិទសន្និបាត​បូកសរុបលទ្ធផល​ការងារ​ត្រួត​ពិនិត្យគ្រឿងញៀន ​ឆ្នាំ២០២១​ និងលើកទិសដៅការងារឆ្នាំ២០២២ របស់​អាជ្ញាធរជាតិ​ប្រយុទ្ធ​ប្រឆាំងគ្រឿង៕អត្ថបទ៖ បាន ចក់

ជាងមួយសប្តាហ៍កុមារអាយុក្រោម៥ឆ្នាំ ជាង១ម៉ឺននាក់នៅភ្នំពេញ ចាក់វ៉ាក់សាំងដូសទី២រួចរាល់

2022/03/31 12:45:42 pm        591
Facebook Telegram Linkin
ភ្នំពេញ៖ ក្នុងរយៈពេលជាង១សប្តាហ៍ គិតចាប់ពីថ្ងៃទី២៣ រហូតដល់ថ្ងៃទី៣០ខែមីនាម្សិលមិញ កុមារអាយុពី៣ឆ្នាំ ដល់ក្រោម៥ឆ្នាំ ជាង១ម៉ឺននាក់ រស់នៅរាជធានីភ្នំពេញ បានចាក់វ៉ាក់សាំងបង្ការជំងឺកូវីដ-១៩ ដូសទី២រួចរាល់ តាមការកំណត់របស់គ្រូពេទ្យ។តាមរយៈរបាយការណ៍របស់គណៈកម្មការចំពោះកិច្ចចាក់វ៉ាក់សាំងបង្ការជំងឺកូវីដ-១៩ ក្នុងក្រប ខណ្ឌទូទាំងប្រទេស​ ដែលBTVទទួលបាននៅថ្ងៃនេះ បានបង្ហាញថា គិតត្រឹមថ្ងៃទី៣០ ខែមីនានេះ កុមារអាយុ៣ឆ្នាំ​ ដល់ក្រោម៥ឆ្នាំ ចំនួនជាង១៤០០០នាក់ រស់នៅរាជធានីភ្នំពេញ ចាក់វ៉ាក់សាំងដូសទី២រួចរាល់ តាមការកំណត់របស់គ្រូពេទ្យ ខណៈដំណើរការចាក់វ៉ាក់សាំងនៅតែបន្ត។យុទ្ធនាការចាក់វ៉ាក់សាំងបង្ការជំងឺកូវីដ-១៩ ប្រភេទSinovac ដូសទី១ ជូនកុមារអាយុពី៣ឆ្នាំ ដល់ ក្រោម៥ឆ្នាំ នៅក្នុងប្រទេសកម្ពុជា ​ចាប់ផ្តើមអនុវត្តពីថ្ងៃទី២៣ ខែកុម្ភៈ ឆ្នាំ២០២២ ហើយការចាក់​ដូសទី២ ត្រូវមានគម្លាតពី២៨ថ្ងៃឡើងទៅ បន្ទាប់ពីចាក់ដូសទី១រួចរាល់។ការចាក់វ៉ាក់សាំងបង្ការជំងឺកូវីដ-១៩ ជូនប្រជាពលរដ្ឋ ​គឺជាយុទ្ធសាស្រ្តចំម្បងមួយ ដែល​រាជ​រដ្ឋាភិបាល​កម្ពុជា​ បានដាក់ចេញ ​ដើម្បីប្រយុទ្ធប្រឆាំងនឹងការរាតត្បានៃជំងឺកូវីដ-១៩។បច្ចុប្បន្នកម្ពុជា រកវ៉ាក់សាំងកូវីដ-១៩ ​បានប្រមាណជិត ៥០លានដូស ​ទាំងការបញ្ជាទិញ ​និងជំនួយ​តាមរយៈយន្តការកូវ៉ាក់ ​និងជំនួយទ្វេភាគីពីបណ្តាប្រទេសផ្សេងៗ​មួយចំនួនទៀត សម្រាប់​យក​ទៅប្រើប្រាស់ក្នុងយុទ្ធនាការចាក់វ៉ាក់សាំងបង្ការជំងឺកូវីដ-១៩ ​ជូនពលរដ្ឋ ​ចាប់ពីដូសទី១ ដល់ដូសទី៤៕ អត្ថបទ៖ ទូច សោភ័ណ

រដ្ឋមន្ត្រីទេសចរណ៍៖ សហគមន៍ទេសចរណ៍ ​និង​អេកូទេសចរណ៍ ​បានអភិវឌ្ឍរួចរាល់​ទទួល​ភ្ញៀវ​ចូល​ទស្សនា

2022/03/31 12:24:16 pm        418
Facebook Telegram Linkin
ភ្នំពេញ៖ នៅថ្ងៃ៣១ ខែមីនានេះនៅក្រសួងទេសចរណ៍ បានបើកប្រជុំលើកទី១ គណៈកម្មាធិការជាតិ គ្រប់គ្រង និងអភិវឌ្ឍន៍សហគមន៍ទេសចរណ៍ និងអេកូទេសចរណ៍ ដែលមានការចូលរួមពីឯកឧត្តម ថោង ខុន រដ្ឋមន្ត្រីក្រសួងទេសចរណ៍ ឯកឧត្តម វេង សាខុន រដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទ និងឯកឧត្តម សាយ សំអាល់ រដ្ឋមន្ត្រីក្រសួងបរិសា្ថន។ តាមរយៈគណកម្មាធិការជាតិ គឺយើងបានបង្កើត និងអភិវឌ្ឍន៍សហគមន៍ទេសចរណ៍ និង​អេកូទេសចរណ៍ជាច្រើន។ឯកឧត្តម រដ្ឋមន្ត្រី ថោង ខុន ក្នុងនាមជាប្រធានគណៈកម្មាធិការជាតិ គ្រប់គ្រង និងអភិវឌ្ឍន៍​សហគមន៍ទេសចរណ៍ និងអេកូទេសចរណ៍ បានថ្លែងថា ​នៅក្នុងអំឡុងពេលដែល ពិភពលោក​កំពុងជួបការរាតត្បាតមេរោគកូវីដ១៩កម្ពុជា តាមរយៈគណៈកម្មាធិការជាតិ គឺបានបង្កើត​សហគមន៍​ទេសចរណ៍ និងអេកូទេសចរណ៍ ​និងមាន​ការ​អភិវឌ្ឍ ដើម្បីជម្រុញការទទួលភ្ញៀវទេសចរ​ជាតិ​អន្តរជាតិ​អញ្ជើញទៅទស្សនាកម្សាន្ត ​ជាពិសេសនៅក្នុងអំឡុងពេលបុណ្យចូលឆ្នាំប្រពៃណីជាតិ នឹងឈានចូលមកដល់នៅថ្ងៃទី១៤ ដល់ថ្ងៃទី១៦ ខែមេសា ​ប៉ុន្មានថ្ងៃនេះទៀតនេះ។ឯកឧត្តម ថោង ខុន មានប្រសាសន៍ថា ក្នុងចំណោមសហគមន៍​ទេសចរណ៍ និងអេកូទេសចរណ៍​ដែលយើង​បាន​បញ្ចូល​សកម្មភាព​ទេសចរណ៍​ដែលអាចអោយភ្ញៀវទេសចរ​ទៅទស្សនាបាននោះ គឺមាន​សហគមន៍​ជាច្រើនបានអភិវឌ្ឍន៍អោយមានផ្លូវស្អាត ​រៀបចំដាក់បណ្តាញប្រព័ន្ធទូរស័ព្ទ Internet តភា្ជប់បណ្តាញ​អគ្គិសនី ការបោសសំអាតមីន ​ការរៀបចំទីតាំងដាក់ធុងសម្រាម និង​បណ្តុះបណ្តាលមគ្គុទេសទេសចរណ៍ បដិសណ្ឋារកិច្ច ​នៅក្នុងសហគមជាដើម។បើតាមលោក ជុក ជំនោរ​ ប្រធាន​នាយកអភិវឌ្ឍន៍ទេសចរណ៍នៃក្រសួងទេសចរណ៍ថ្លែងថា ក្នុង​បរិបទកូវីដនេះ ក្រុមការងារបានចុះ​បណ្តុះបណ្តាល​បញ្ចូល​សកម្មភាព​ទេសចរណ៍​បៃតង​បាន​ចំនួនជាង៤០កន្លែងបន្ថែមទៀត និងបានបង្កើតការងារក្នុងសហគមន៍​បានចំនួនជាង៧០០នាក់ ​បន្ថែម​ទៀត ហើយចំណោមសហគមន៍ទេសចរណ៍​ និង​អេកូទេសចរណ៍​ទំាងនោះ ក៏មាន​សហគមន៍មួយចំនួនស្នើរាជរដ្ឋាភិបាល ​ពង្រីក​ស្ថាបនាផ្លូវចូលសហគមន៍ ការតភ្ជាប់​បណ្តាញ​អគ្គិសនី​ និងបណ្តាញទូរសព្ទ Internetជាដើម។ សូមបញ្ជាក់ថា នៅទាំងប្រទេស មានសហគមន៍ទេសចរណ៍ និងអេកូទេសចរណ៍បានរៀបចំ​សៀវភៅ​បញ្ជីសារពើភណ្ឌតំបន់​ទេសចរណ៍ជិត១១០០កន្លែង អាចទៅលេងកម្សាន្ត ក្នុងនោះ​សហគមន៍ស្ថិតនៅក្រោមការគ្រប់គ្រងដោយក្រសួងបរិស្ថាន មានចំនួន ១៨២សហគមន៍​ក្នុងនោះ​មាន​សហគមន៍បញ្ចូល​សកម្មភាពទេសចរណ៍មានចំនួន ២៦សហគមន៍ ​ហើយសហគមន៍​ស្ថិតក្នុង​ការគ្រប់គ្រង​ដោយក្រសួងទេសចរណ៍មានចំនួន ៨៦សហគមន៍ ។ក្រៅពីនេះ ជា​សហគមន៍​ស្ថិតក្រោមការ​គ្រប់គ្រងរបស់ក្រសួងកសិកម្មរុក្ខាប្រមាញ់ ​និងនេសាទ ហើយតាមរយៈសហគមន៍​ដែលបាន​បញ្ចូល​សកម្មភាពទេសចរណ៍នោះ គឺបានផ្លាស់​ប្តូរមុខរបរពលរដ្ឋ​ក្នុង​សហគមន៍​ពីការកាប់ឈើ ​ដុតធ្យូង ​និងបរបាញ់សត្វព្រៃ​ ទៅជាការខិតខំថែរក្សាព្រៃឈើ និង​សត្វព្រៃ ធ្វើ​ការងាររកចំណូលពីវិស័យទេសចរណ៍វិញ៕អត្ថបទ៖ ស៊ុម សុខជា

ប្រទេសហ្គាបុងចង់បង្កើត MOU ជាមួយកម្ពុជា ដើម្បីបង្កើនកិច្ចសហប្រតិបត្តិការពាណិជ្ជកម្ម

2022/03/31 12:11:17 pm        229
Facebook Telegram Linkin
ភ្នំពេញ៖ ភាគីប្រទេសហ្គាបុង បានបង្ហើបពីគោលបំណង នៃការចង់បង្កើតMOU ស្តីពីកិច្ចសហប្រតិបត្តិការពាណិជ្ជកម្មកម្ពុជា-ហ្គាបុង ដើម្បីសម្រួលដល់កិច្ចសហប្រតិបត្តិការសេដ្ឋកិច្ច និងពាណិជ្ជកម្ម ខណៈទំហំពាណិជ្ជកម្ម រវាងប្រទេសទាំងពីរ គិតក្នុងរយៈពេល ៤ឆ្នាំកន្លងទៅនេះ សម្រេចបានចំនួនប្រមាណ ១៤៩លានដុល្លារអាម៉េរិក។នៅក្រោយជំនួបការងារ រវាងឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មកម្ពុជា និងឯកឧត្តម វីត ហ្វើរណែម ម៉ែនហ្វមប៊ី (Yves Fernand Manfoumbi) រដ្ឋមន្ត្រីក្រសួងពាណិជ្ជកម្មប្រទេសហ្គាបុង កាលពីល្ងាចថ្ងៃទី៣០ មីនា ម្សិលមិញនេះ ក្រសួងពាណិជ្ជកម្ម បានឲ្យដឹងថា ពីមួយឆ្នាំទៅមួយឆ្នាំ ទំហំពាណិជ្ជកម្មរបស់ប្រទេសទាំងពីបានកើនឡើងបន្តបន្ទាប់ ដោយគិតត្រឹមឆ្នាំ២០២១ កន្លងទៅ ទំហំពាណិជ្ជកម្មទ្វេភាគីមានតម្លៃប្រហែល ៤៥លានដុល្លារ ប្រៀបធៀបនឹងឆ្នាំ២០២០ មានតម្លៃ ៤៣លានដុល្លារក្នុងឆ្នាំ២០២០។ ក្នុងនោះ ការនាំចេញពីកម្ពុជាមានតម្លៃ ៤៤,៧៥លានដុល្លា និងកម្ពុជានាំចូលមានចំនួន ០,០២លានដុល្លារ។ក្នុងជំនួបនោះ ភាគីហ្គាបុង បានជម្រាបជូនឯកឧត្តមរដ្ឋមន្រ្តីថា ហ្គាបុងកំពុងស្វែងរកប្រទេសដៃ​គូ​ពាណិជ្ជកម្ម​បន្ថែមនៅតំបន់អាស៊ី ​ជាពិសេសនៅកម្ពុជា និងបានស្នើភាគីទាំងពីរពង្រីកកិច្ច​សហប្រតិបត្តិការ​លើវិស័យដែលផ្តល់ប្រយោជន៍ទៅវិញទៅមក ​រួមមាន៖ ការបង្កើតMOU ស្តីពី​កិច្ចសហប្រតិបត្តិការពាណិជ្ជកម្ម​កម្ពុជា-ហ្គាបុង ​ដើម្បីសម្រួលដល់កិច្ចសហប្រតិបត្តិការសេដ្ឋកិច្ច​និង​ពាណិជ្ជកម្មក្នុងការអនុវត្តក្របខណ្ឌគម្រោងនានា, ​ជំរុញការវិនិយោគផ្នែកឧស្សាហកម្ម និងការ​ដោះដូរ​ពាណិជ្ជកម្មទ្វេភាគី ​ដែល​មានលក្ខណៈបំពេញបន្ថែម និងការរៀបចំ​ពិព័រណ៍​ពាណិជ្ជកម្ម​ជាដើម។ ភាគីហ្គាបុង ក៏បានជម្រាបជូនអំពីការអនុវត្តប្រព័ន្ធបញ្ជរតែមួយជាតិ ដែលជួយសម្រួលច្រើនដល់​សកម្មភាព​ធុរកិច្ច​នៅហ្គាបុង ​និងចង់​ទទួល​បានការចែករំលែកបទបពិសោធន៍កម្ពុជា​នា​ពេលកន្លងមក។ជាកិច្ចឆ្លើយតប ឯកឧត្តមរដ្ឋមន្រ្តី ប៉ាន សូរស័ក្តិ បានស្វាគមន៍ និងគាំទ្រលើគ្រប់សំណើដែលបាន​ដាក់​ជូន ​និងជាពិសេសគាំទ្រឱ្យមានការបង្កើត MOU ស្តីពីកិច្ចសហប្រតិបត្តិការពាណិជ្ជកម្មរវាង​កម្ពុជា-ហ្គាបុង ​ដែល​រំពឹងថា ​ភាគីទាំងពីរ​នឹង​ពន្លឿននីតិវិធី​ និង​ពិនិត្យ​បញ្ចប់​សេចក្តីព្រាងMOU នេះឲ្យបានឆាប់រហ័ស ដើម្បីអាចធ្វើការចុះហត្ថលេខាបាន ​នៅអំឡុងឆមាសទី២ ឆ្នាំ២០២២នេះ។ស្របគ្នានេះដែរ ឯកឧត្តមបានជម្រាបជូនថា កម្ពុជាកំពុងធ្វើកំណែទម្រង់ប្រព័ន្ធបញ្ជរតែមួយជាតិ សំដៅជួយសម្រួលសកម្មភាពធុរកិច្ច ​និងស្នើដាក់បញ្ចូលវិស័យនេះ ក្នុងកិច្ចសហប្រតិបត្តិការ​រវាង​កម្ពុជា-ហ្គាបុងនាពេលខាងមុខ ​និងបានស្នើភាគីហ្គាបុងឱ្យពិចារណានាំចូល​ទំនិញ​សក្តានុពល​កម្ពុជា​បន្ថែមពីអង្ករ ដែលរួមមានជា​អាទ៍​ ផ្លែឈើស្រស់ ​ដំឡូងមី ​សំលៀកបំពាក់​ ស្បែកជើង និងកាបូបធ្វើដំណើរ ។ល។ប្រភពខាងលើ បានបញ្ជាក់ទៀតថា នៅមុនបញ្ចប់ជំនួបនាឱកាសនោះ ឯកឧត្តម ប៉ាន សូរស័ក្តិ បានជម្រាបជូនពីការត្រៀមខ្លួនជាស្រេចដើម្បីស្វាគមន៍​និងសម្របសម្រួលដល់អ្នកវិនិយោគ និង​សកម្មភាពពាណិជ្ជកម្មរបស់ភាគីហ្គាបុង​ នៅប្រទេសកម្ពុជា ​និងលើកទឹកចិត្តដល់ក្រុមបណ្តាប្រទេស​ក្របខ័ណ្ឌតំបន់​ដែលនិយាយភាសាបារាំង​ ក៏ដូចជាក្រុមហ៊ុនមកពីហ្គាបុង ​និងក្រុមហ៊ុនកម្ពុជា ពិនិត្យលទ្ធភាពក្នុងភាពជាដៃគូក្នុងវិស័យធុរកិច្ច ​រវាងក្រុមហ៊ុនផ្សេងៗគ្នានៃភាគីទាំងពីរ៕ អត្ថបទ៖ បូរ៉ាវី

សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ផ្ញើសារអបអរសាទរ និងជូនពរជ័យដល់សាសនិកឥស្លាមកម្ពុជាទាំងក្នុង និងក្រៅប្រទេស ក្នុងឱកាសបួសខែរ៉ាម៉ាឌន

2022/03/31 11:54:10 am        255
Facebook Telegram Linkin
ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ផ្ញើសារអបអរសាទរ និងជូនពរជ័យ សិរីសួស្ដី សុភមង្គល ជូនដល់បងប្អូនសាសនិកឥស្លាមកម្ពុជាទាំងក្នុង និងក្រៅប្រទេស ដែលនឹងចូលបួសខែរ៉ាម៉ាឌន ដែលនៅកម្ពុជា​អាចនឹងចាប់ផ្ដើមនៅថ្ងៃសៅរ៍​ទី១​ ខែរ៉ម៉ាឌន ឆ្នាំ១៤៤៣​មូហាំម៉ាត់សករាជ ត្រូវនឹងថ្ងៃ​១កើត ខែចេត្រ ឆ្នាំឆ្លូវ​ ត្រីស័ក ព.ស.២៥៦៥ ត្រូវនឹងថ្ងៃទី២ ខែមេសា ឆ្នាំ២០២២។ យោងតាមសារបង្ហោះលើfacebookផ្លូវការសម្តេចនាយករដ្ឋមន្ត្រីបានបញ្ជាក់ថា សម្តេចសូមផ្ញើជូននូវក្តីនឹករលឹក និងអរគុណយ៉ាងជ្រាលជ្រៅបំផុតចំពោះបងប្អូនខ្មែរឥស្លាមកម្ពុជា ដែលបានចូលរួមថែរក្សា សុខសន្តិភាព ហើយមានជំនឿជឿជាក់លើការដឹកនាំរបស់សម្តេច និងគណបក្សប្រជាជនកម្ពុជា តាំងពីដើមតរៀងមក រួមជាមួយនឹងប្រជាជនកម្ពុជាយើង ។ ជាមួយគ្នានេះដែរ សម្តេចក៏សូមការអធ្យាស្រ័យសុំការយោគយល់ពីបងប្អូនសាសនិកខ្មែរឥស្លាម ដែលកម្មវិធីជួបជុំស្រាយបួសរ៉ាម៉ាឌនថ្នាក់ជាតិលើកទី ៧ ទី៨ និងទី៩ ឆ្នាំ២០២២នេះ ត្រូវបានផ្អាកដោយសារជំងឺកូវីដ-១៩​ មិនទាន់ទៅឆ្ងាយពីយេីងនៅឡេីយ។រាជរដ្ឋាភិបាលបានអនុញ្ញាតការថ្វាយបង្គំនៅតាមវិហារ(ម៉ាស្ជិទ ស៊ូរ៉ាវ)​ការជួបជុំលក្ខណៈសាសនាឡេីងវិញ រួមនឹងកម្មវិធីផ្សេងៗ និងសុំបង្កេីនការអនុវត្តតាមសារាចរណែនាំពីវិធីបង្ការទប់ស្កាត់ជំងឺកូវីដ-១៩ ក៏ដូចជាសេចក្តីណែនាំរបស់ចាងហ្វាងនៃគណៈដឹកនាំជាន់ខ្ពស់នៃសាសនាឥស្លាមកម្ពុជា ទៅតាមគោលការណ៍របស់រាជរដ្ឋាភិបាល ដោយយើងមិនត្រូវភ្លេចខ្លួន និងធ្វេសប្រហេស មើលស្រាលដល់ជំងឺដ៏កាចសាហាវនេះឡើយ គឺត្រូវរួមគ្នាការពារជាប់ជានិច្ច ដោយសូមបងប្អូនអនុវត្តតាមវិធានការ​ ៣ការពារ​ និង ៣កុំ ជាប្រចាំ​ឱ្យបានខ្ជាប់ខ្ជួន និង អញ្ជើញទៅទទួលការចាក់វ៉ាក់សាំងប្រឆាំងកូវីដ-១៩ នូវដូសជំរុញ ថែមទៀត ឱ្យបានគ្រប់ៗគ្នា៕

គ.ជ.ប បេីកសវនាការលេីបណ្តឹងប្តឹងសុំលុបបញ្ជីបេក្ខជនដំបូង និងការសុំមិនឈរជាបេក្ខជន

2022/03/31 11:28:37 am        279
Facebook Telegram Linkin
ភ្នំពេញ៖ នៅថ្ងៃទី៣១ ខែមីនា ឆ្នាំ២០២២នេះ គណៈកម្មាធិការជាតិរៀបចំការបោះឆ្នោត ហៅកាត់ គ.ជ.ប បានបើកសវនាការជំនុំជម្រះជាសាធារណៈលើបណ្តឹងសុំបញ្ជីបេក្ខជនដំបូងរបស់គណបក្សភ្លើងទៀន និងការប្តឹងជំទាស់មិនឈរឈ្មោះជាបេក្ខជនរបស់គណបក្សនយោបាយ ដើម្បចូលរួមការបោះឆ្នោក្រុមប្រឹក្សាឃុំ-សង្កាត់ នាពេលខាងមុខ។ឯកឧត្តម ប្រាជ្ញ ច័ន្ទ ប្រធាន គ.ជ.ប និងជាប្រធានក្រុមប្រឹក្សាជំនុំជម្រះ នៅថ្ងៃទី៣១ ខែមីនា ឆ្នាំ២០២២នេះ បានបេីកសវនាការជំនុំជម្រះជាសាធារណ:លេីបណ្តឹងចំនួន ៥ ពាក់ព័ន្ធនឹងបញ្ជីបេក្ខជនឈរឈ្មោះរបស់គណបក្ស នយោបាយ និងការប្តឹងជំទាស់មិនឈរឈ្មោះជាបេក្ខជនក្រុមប្រឹក្សា ។ក្នុងសវនាការជំនុំជម្រះលើបណ្តឹងរបស់ប្រជាពលរដ្ឋសុំលុបបញ្ជីបេក្ខជនដំបូងរបស់គណបក្សភ្លើងទៀន ភាគីដើមបណ្តឹងជាប្រជាពលរដ្ឋ បានបញ្ជាក់ជូនក្រុមប្រឹក្សាជំនុំជម្រះថា សុំឲ្យ គ.ជ.ប លុបបញ្ជីបេក្ខចជនដំបូងរបស់គណបក្សភ្លើងទៀនចេញពីសង្កាត់ព្រែកលៀប ខណ្ឌជ្រោយចង្វា ដោយសារមិនមានលក្ខណៈសមស្របតាមច្បាប់។ ទន្ទឹមគ្នានោះ ក្រុមប្រឹក្សាជំនុំជម្រះរបស់ គ.ជ.ប បានសួរដេញដោលទៅបេក្ខជនរបស់គណបក្សភ្លើងទៀន ដោយបានអះអាងថា ពួកគេមិនចេះអាន និងសរសេរអក្សរឡើយ ខណៈការបំពេញលើទម្រង់ចុះឈ្មោះបេក្ខជនរបស់គណបក្សនយោបាយ គឺមានបុគ្គលផ្សេងជាអ្នកបំពេញជំនួស។ដោយឡែក ក្នុងសវនាការចំពោះបណ្តឹងតវ៉ាលើការសុំមិនឈរបេក្ខជនរបស់គណបក្សភ្លើងទៀននោះ ត្រូវបានបេក្ខជនជាសាម៉ីនៃដើមបណ្តឹង អះអាងថា រូបលោកមិនបានស្ម័គ្រចិត្ត ក៏ដូចជាមិនមានឆន្ទះឈរជាបេក្ខជនរបស់គណបក្សភ្លើងទៀនឡើយ ហើយបានស្នើក្រុមប្រឹក្សាជំនុំជម្រះលុបឈ្មោះរបស់ខ្លួនចេញពីបញ្ជីបេក្ខជនដំបូងរបស់គណបក្សភ្លើងទៀន។ចំពោះសវនាការខាងលើនេះ ក្រុមប្រឹក្សាជំនុំជម្រះ នឹងប្រកាសសេចក្តីសម្រេច នៅរសៀលថ្ងៃនេះ។ ការរៀបចំបញ្ជីចុះឈ្មោះបេក្ខជនរបស់គណបក្សនយោបាយធ្វើឡើង ដើម្បីឈានទៅរកការប្រកាសអំពីសុពលភាពរបស់បញ្ជីបេក្ខជនផ្លូវការ នាថ្ងៃទី២៤ ខែមេសាខាងមុខ ខណៈការបោះឆ្នោតជ្រើសរើសក្រុមប្រឹក្សាឃុំ-សង្កាត់នឹងប្រព្រឹត្តទៅ នាថ្ងៃទី៥ ខែមិថុនា ឆ្នាំ២០២២។(អត្ថបទ សេក ឧត្តម)

ឯកឧត្តម ប្រាក់ សុខុន បញ្ជាក់ជាថ្មីថា មានតែមីយ៉ាន់ម៉ាខ្លួនឯងតែប៉ុណ្ណោះ ទើបអាចរកដំណោះស្រាយបានជោគជ័យ

2022/03/31 11:23:39 am        426
Facebook Telegram Linkin
ភ្នំពេញ៖ ក្នុងជំនួបជាមួយប្រេសិតពិសេសរបស់អង្គការសហប្រជាជាតិទទួលបន្ទុកមីយ៉ាន់ម៉ា នៅថ្ងៃទី៣១ ខែមីនានេះ ឯកឧត្តម ឧបនាយករដ្ឋមន្រ្តី ប្រាក់ សុខុន បញ្ជាក់ជាថ្មីថា បញ្ហារបស់មីយ៉ាន់ម៉ា គឺមានតែមីយ៉ាន់ម៉ាតែប៉ុណ្ណោះ ដែលត្រូវដឹកនាំដោយផ្ទាល់ ទើបអាចស្វែងរកដំណោះស្រាយបានដោយជោគជ័យ។ ឯកឧត្តម ឧបនាយករដ្ឋមន្រ្តី ប្រាក់ សុខុន រដ្ឋមន្រ្តីក្រសួងការបរទេស និងសហប្រតិបត្តិការអន្តរជាតិ និងជាប្រេសិតពិសេសរបស់ប្រធានអាស៊ានស្តីពីមីយ៉ាន់ម៉ា នៅថ្ងៃទី៣១ ខែមីនា ឆ្នាំ២០២២ បានអញ្ជើញជួបពិភាក្សាការងារជាមួយ លោកស្រី ណូលីន ហេហ្ស៊ឺ ប្រេសិតពិសេសអង្គការសហប្រជាជាតិទទួលបន្ទុកបញ្ហាមីយ៉ាន់ម៉ា ជុំវិញទស្សនកិច្ចការងារលើកដំបូងរបស់ឯកឧត្តម ប្រាក់ សុខុន ទៅកាន់មីយ៉ាន់ម៉ា ក្នុងឋានៈជាប្រេសិតពិសេស កាលពីសប្តាហ៍មុន។ឯកឧត្តម ប្រាក់ សុខុន បានជម្រាបជូនប្រេសិតពិសេសរបស់អង្គការសហប្រជាជាតិទទួលបន្ទុកមីយ៉ាន់ម៉ា ថា ក្នុងដំណើរទស្សនកិច្ចកាលពីសប្តាហ៍មុននេះ កម្ពុជាបានជំរុញដល់មីយ៉ាន់ម៉ានូវកិច្ចព្រមព្រៀងជាឯកច្ឆ័ន្ទប្រាំចំណុចរបស់អាស៊ាន។ជាក់ស្តែងតាមរយៈដំណើរទស្សនកិច្ចរបស់សម្តេចតេជោ ហ៊ុន សែន នាយករដ្ឋមន្រ្តី ដែលជាការចាប់ផ្តើមសម្រាប់ការចូលរួមរកដំណោះស្រាយជូនមីយ៉ាន់។ ក្នុងជំនួបនេះ ឯកឧត្តម ប្រាក់ សុខុន បានបញ្ជាក់ថា កម្ពុជាបានខិតខំប្រឹងប្រែង ដោយការជួបជាមួយភាគីពាក់ព័ន្ធ ដើម្បីឈានទៅរកការចចារទម្លុះភាពទាល់ច្រក ដើម្បីជួយដល់ប្រជាជនមីយ៉ាន់ម៉ា។ឯកឧត្តម ប្រាក់ សុខុន បន្តថា អ្វីដែលសំខាន់ក្នុងឋានៈជាប្រេសិតពិសេសរបស់ប្រធានអាស៊ានស្តីពីមីយ៉ាន់ម៉ា នឹងកំណត់យកបញ្ហាការផ្តល់ជំនួយមនុស្សធម៌ដល់ប្រជាជនមីយ៉ាន់ម៉ាដែលកំពុងត្រូវការបំផុត។ទន្ទឹមគ្នានេះ លោកស្រី ណូលីន ហេហ្ស៊ឺ ប្រេសិតពិសេសអង្គការសហប្រជាជាតិទទួលបន្ទុកបញ្ហាមីយ៉ាន់ម៉ា បានសម្តែងក្តីរីករាយចំពោះការជួបពិភាក្សាជាមួយកម្ពុជាសម្រាប់បញ្ហានៅមីយ៉ាន់ម៉ា។ លោកស្រី អះអាងថា ដំណើរទស្សនកិច្ចរបស់សម្តេចតេជោនាយករដ្ឋមន្រ្តីកម្ពុជា ទៅកាន់មីយ៉ាន់ម៉ា កាលពីពេលកន្លងទៅ គឺជាពេលវេលាដ៏សមស្របបំផុត ដើម្បីជួយស្វែងរកដំណោះស្រាយលើបញ្ហារបស់មីយ៉ាន់ម៉ា។គួរបញ្ជាក់ថា ក្នុងដំណើរទស្សនកិច្ចការងារលេីកដំបូងរបស់ប្រេសិតពិសេសរបស់ប្រធានអាស៊ានស្តីពីមីយ៉ាន់ម៉ា ឯកឧត្តម ឧបនាយករដ្ឋមន្រ្តី ប្រាក់ សុខុន បានជួបជាមួយឯកឧត្តម មីង អោង ឡាំង នាយឧត្តមសេនីយ៍ជាន់ខ្ពស់ និងជាប្រធានក្រុមប្រឹក្សារដ្ឋបាលរដ្ឋនៃសាធារណរដ្ឋសហភាពមីយ៉ាន់ម៉ា និងរដ្ឋមន្រ្តីសំខាន់ៗចំនួន៣រូបផ្សេងទៀត និងបានបង្ហាញការប្តេជ្ញារបស់កម្ពុជាប្រកាន់ខ្ជាប់ជានិច្ចភាពមិនលំអៀង ជ្រៀតជ្រែក កិច្ចការផ្ទៃក្នុង និងអធិបតេយ្យភាពរបស់មីយ៉ាន់ម៉ាឡើយ។ឯកឧត្តម ប្រាក់ សុខុន ធ្លាប់បានអះអាងថា ភាពបន្ទាន់ ដើម្បីសម្រេចឲ្យបាននូវកិច្ចព្រមព្រៀងជាឯកច្ឆន្ទប្រាំចំណុចរបស់អាស៊ាន ជាដំបូងត្រូវផ្តោតសំខាន់បញ្ហាសំខាន់ៗចំនួន៣ គឺការបញ្ឈប់អំពើហិង្សា ការផ្តល់ជំនួយមនុស្សធម៌ និងការស្វែងរកដំណោះស្រាយនយោបាយ ដែលដឹកនាំដោយមីយ៉ាន់ម៉ាផ្ទាល់តែម្តង តាមរយៈការចូលរួមពីភាគីពាក់ព័ន្ធទាំងអស់។(អត្ថបទ សេក ឧត្តម)

តំណាងអចិន្ត្រៃយ៍៖ អ្នករាយការណ៍ពិសេសUN មិនបានលើកឡើងឱ្យត្រឹមត្រូវ និងគ្រប់ជ្រុងជ្រោយពាក់ព័ន្ធកម្ពុជា

2022/03/31 11:14:14 am        975
Facebook Telegram Linkin
ភ្នំពេញ៖ ឯកអគ្គរាជទូត និងជាតំណាងអចិន្ត្រៃយ៍កម្ពុជាប្រចាំ អង្គការសហប្រជាជាតិ ឯកឧត្តម អាន សុខខឿន ថ្លែងថា «បើទោះបីជាកម្ពុជាបានផ្តល់នូវកិច្ចសហប្រតិបត្តិការពិតប្រាកដរបស់ខ្លួន ដែលស្ដែងឡើងតាមរយៈកិច្ចសន្ទនាចំនួន១៩លើក ជាមួយអ្នករាយការណ៍ពិសេស ចាប់តាំងពីខែឧសភា ឆ្នាំ២០២១ យ៉ាងណាក៏ដោយ ក៏របាយការណ៍របស់អ្នករាយការណ៍ពិសេសពុំបានលើកឡើងឱ្យបានត្រឹមត្រូវនិងគ្រប់ជ្រុងជ្រោយ ថែមទាំងរំលងនូវគោលការណ៍សត្យានុម័ត អព្យាក្រឹត និងមិនជ្រើសរើសតែមួយជ្រុង»។ការថ្លែងដូចនេះ ក្នុងកិច្ចសន្ទនាអន្តរសកម្មស្ដីពីរបាយការណ៍ផ្ទាល់មាត់របស់អ្នករាយការណ៍ពិសេសស្តីពីស្ថានភាពសិទ្ធិមនុស្សនៅកម្ពុជាកាលពីថ្មីៗនេះ នៅទីក្រុងហ្សឺណែវ ដោយមានគណៈប្រតិភូចំនួន៣៦ប្រទេស បានចូលរួមថ្លែងបទអន្តរាគមន៍។

សម្ដេចតេជោ ហ៊ុន សែន ជំរុញឱ្យពន្លឿនដំឡើងប្រាក់​សោធននិវត្តន៍

2022/03/31 10:10:59 am        290
Facebook Telegram Linkin
ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ត្រី បានផ្ញើសារដោយជំរុញឱ្យឯកឧត្តមឧបនាយករដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ពន្លឿនដំឡើងប្រាក់សោធននិវត្តន៍ ដល់មន្ត្រីរាជការ អតីតយុទ្ធជន ដែលទទួលបានប្រាក់បៀវត្សរ៍ទាប ដើម្បីឱ្យមានកម្រិតលម្អៀងខុសគ្នាតិច ជាពិសេសបងប្អូន ដែលមានប្រាក់បៀវត្សរ៍តិចជាង១លានរៀល​ នៅ​ពេលដែលពួកគាត់បានចូលនិវត្តន៍រួចហើយនោះ។ថ្លែងក្នុងពិធីសម្ពោធដាក់ឱ្យប្រើប្រាស់ស្ពានអាកាស និងផ្លូវក្រោមដីចោមចៅ នៅព្រឹកថ្ងៃទី៣១ ខែមីនា ឆ្នាំ២០២២នេះ សម្តេចតេជោ ហ៊ុន សែន ​បានបញ្ជាក់ថា​ នេះជាការ​គិតខ្ពស់របស់​រាជ​រដ្ឋាភិបាលដល់មន្ត្រីរាជការ ​អតីតយុទ្ធជន ​ដែលមិនមាននរណាម្នាក់ត្រូវបានបោះបង់ ឬបំភ្លេចមិនបានយកចិត្តទុកដាក់នោះឡើយ ​តែអ្វីៗត្រូវធ្វើជាដំណាក់កាលៗ៕

បណ្ដាញសង្គម

ព័ត៌មានថ្មីៗ

[UPDATE] មនុស្ស ៤នាក់ស្លាប់ និង ៥០នាក់បាត់ខ្លួន ក្រោយទឹកជំនន់ដ៏គំហុកវាយប្រហារទីក្រុងតំបន់ហិម៉ាឡៃ ប្រទេសឥណ្ឌា
08/05/2025 08:08 PM
Facebook Telegram Linkin
អំណោយសប្បុរសធម៌ជាច្រើនរបស់សហជីព និងកម្មកររោងចក្រ បានផ្តល់ជូនជនភៀសសឹកនៅខេត្តព្រះវិហារ
08/05/2025 08:08 PM
Facebook Telegram Linkin
ស៊ុយអែត ន័រវែស និងដាណឺម៉ាក ផ្តល់ ៤៨៦លានដុល្លារ ដល់គម្រោងរបស់ណាតូ ដើម្បីបញ្ជូនអាវុធអាមេរិកទៅអ៊ុយក្រែន
08/05/2025 08:08 PM
Facebook Telegram Linkin
លោក Netanyahu ៖ វាចាំបាច់ត្រូវបញ្ចប់គោលបំណងសង្រ្គាមហ្កាហ្សា
08/05/2025 08:08 PM
Facebook Telegram Linkin
UNICEF៖ ការកាត់បន្ថយមូលនិធិ ធ្វើឲ្យកុមារស៊ូដង់ធ្លាក់ទៅកៀកកម្រិតគ្រោះថ្នាក់សង្គ្រោះមិនបាន
08/05/2025 07:08 PM
Facebook Telegram Linkin
មនុស្ស ២នាក់ស្លាប់ក្រោយរុស្ស៊ីប្រើប្រាស់យានដ្រូនវាយប្រហារតំបន់ Kharkiv របស់អ៊ុយក្រែន
08/05/2025 07:08 PM
Facebook Telegram Linkin
ឥណ្ឌាចោទប្រកាន់ EU និងអាមេរិកថា ប្រើប្រាស់ស្តង់ដារ ២ ជុំវិញពាណិជ្ជកម្មរុស្ស៊ី
08/05/2025 07:08 PM
Facebook Telegram Linkin
គណៈរដ្ឋមន្ត្រីលីបង់ ជួបប្រជុំ ដើម្បីពិភាក្សា អំពីអាវុធរបស់ក្រុមហេសបូឡា ក្រោយមានសម្ពាធពីអាមេរិក
08/05/2025 07:08 PM
Facebook Telegram Linkin
ភ្លៀងធ្លាក់ខ្លាំងធ្វើឲ្យដងផ្លូវប្រែក្លាយជាដងទន្លេនៅតំបន់ភាគខាងត្បូងប្រទេសចិន
08/05/2025 07:08 PM
Facebook Telegram Linkin
UNICEF៖ អ៊ីស្រាអែលសម្លាប់កុមារប៉ាឡេស្ទីនជាមធ្យម ២៨នាក់ជារៀងរាល់ថ្ងៃនៅតំបន់ហ្កាហ្សា
08/05/2025 07:08 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.