BTV NEWS

ស្មារតីគាំទ្រទំនិញក្នុងស្រុករបស់ពលរដ្ឋនាំឱ្យការផលិតមានការកើនឡើងទ្វេដង ដើម្បីបំពេញតម្រូវការទីផ្សារ

រដ្ឋមន្ត្រីក្រសួងរ៉ែ៖ រាជរដ្ឋាភិបាលកំពុងតាមដាន និងពិនិត្យលទ្ធភាពការអនុវត្តពន្ធជួយលើការធ្វើពាណិជ្ជកម្ម

មន្រ្តីជាន់ខ្ពស់ក្រសួងសេដ្ឋកិច្ច ចាត់ទុកធនធានផ្នែកគណនេយ្យ ជាកាតាលីករជួយរុញកំណើនសេដ្ឋកិច្ច

ភ្ញៀវទេសចរបរទេសចាប់អារម្មណ៍ប្រើប្រាស់ Bakong Tourist ដើម្បីទូទាត់តាមប្រព័ន្ធឌីជីថលនៅកម្ពុជា

សេដ្ឋកិច្ច និង កសិកម្ម

ស្មារតីគាំទ្រទំនិញក្នុងស្រុករបស់ពលរដ្ឋនាំឱ្យការផលិតមានការកើនឡើងទ្វេដង ដើម្បីបំពេញតម្រូវការទីផ្សារ

សហគ្រាសធុនតូច និងមធ្យម (SME) បានដើរតួនាទីយ៉ាងសំខាន់ចូលរួមដាស់ស្មារតីឱ្យប្រជាពលរដ្ឋប្រើប្រាស់ផលិតផលក្នុងស្រុក តាមរយៈយុទ្ធនាការប្រើប្រាស់ទំនិញក្នុងស្រុកដែលគាំទ្រដោយរដ្ឋាភិបាល។ ដោយស្មារតីសាមគ្គីពីប្រជាពលរដ្ឋ បានងាកមកប្រើប្រាស់ផលិតផលក្នុងស្រុកនាំឱ្យការផលិតទំនិញក្នុងស្រុករបស់សហគ្រាសមួយបានកើនឡើង៣ដង ដើម្បីបំពេញតម្រូវការទីផ្សារដែលកំពុងតែហក់ឡើង បន្ទាប់ពីប្រជាពលធ្វើពហិការទំនិញនាំចូលពីប្រទេសថៃ។ លោកស្រី ហុក ស្រីហួរ អគ្គនាយិកា សហគ្រាស PPF Yummy, Khmer Food Manufacturer បានប្រាប់ BTV ថា សហគ្រាសរបស់លោកស្រី មានផលិតផលជាច្រើនប្រភេទ ដូចជា បុកត្រីឆ្អើ, កាពិឆាបាត់ដំបង, ប្រហុកអង្រ្កង, ប្រហុកឦសាន, ប្រហុកអប់ក្រូចឆ្មា, និងប្រហុកខ្ទិះ ហើយមាន ផលិតផលប្រភេទ ទឹកឆាអំពិលទុំ, ទឹកប្រហុក, និងទឹកជ្រលក់ជូរអែម ព្រមទាំង គ្រឿងសម្លរកកូ, ឆាគ្រឿង, សម្លរការី, ម្ជូរគ្រឿង, ម្ជួរស្លឹកថ្នឹង, ម្ជូរសណ្តាន់, អាម៉ុក និងប្រហុកខ្មែរ។ ផលិតផលទាំងអស់នេះបានប្រើប្រាស់គ្រឿងផ្សំក្នុងស្រុក ៩៥% ផលិត ដោយប្រជាកសិករ នៅតាមមូលដ្ឋាន។ លោកស្រី ហុក ស្រីហួរ បានបញ្ជាក់ថា សព្វថ្ងៃប្រជាពលរដ្ឋខ្មែរបានងាកមកប្រើប្រាស់ផលិតផលក្នុងស្រុក ជាពិសេស យុវជនការគាំទ្រផលិតផលជាតិកាន់តែច្រើន គឺជាការជំរុញដល់កម្លាំងសេដ្ឋកិច្ចជាតិ ហើយក៏នឹងជួយកាត់បន្ថយការនាំចូលទំនិញពីខាងក្រៅ និងបង្កើតការងារ និងទីផ្សារកាន់ល្អប្រសើរឡើង។ លោកស្រីថា បន្ទាប់ពីប្រជាពលរដ្ឋធ្វើពហិការទំនិញថៃ គឺមានសន្ទុះខ្លាំងក្លានូវការគាំទ្រនូវផលិតផលខ្មែរ ដែលនាំឱ្យសហគ្រាសរបស់លោកស្រីបានបង្កើនការផលិត៣ដង បើធៀបនឹងមុនការធ្វើពហិការ។ ការកើនឡើងនេះគឺ ដោយសារមានការជួយជ្រោមជ្រែងមិនអាចខ្វះបានពីរាជរដ្ឋាភិបាល និងក្រសួង-ស្ថាប័ន ពាក់ព័ន្ធនានា ក្នុងជួយជំរុញការផលិតឱ្យស្របតាមស្តង់ដារអនាម័យ និងសុវត្ថិភាពចំណីអាហារ។ សហគ្រាសនេះ ទទួលបានវិញ្ញាបនបត្របញ្ជាក់ចំណីអាហារ HACCP និង GMP ដែលធានាគុណភាពខ្ពស់ ព្រមទាំង ទទួលបានវិញ្ញាបនបត្រ FDA សម្រាប់ការនាំចេញទៅទីផ្សារសហរដ្ឋអាមេរិក ផងដែរ។ ដោយមានសន្ទុះគាំទ្រពីប្រជាពលរដ្ឋ ទាំងក្នុង និងក្រៅប្រទេស សព្វថ្ងៃសហគ្រាសកំពុងមមាញឹកខ្លាំងក្នុងការផលិតដោយយកចិត្តទុកដាក់ផ្តោតជាចម្បងលើគុណភាព និងសុវត្ថិភាពសម្រាប់អ្នកទទួលទាន។ បច្ចុប្បន្ន ផលិតផលរបស់សហគ្រាស PPF Yummy បាននាំចេញទៅកាន់ទីផ្សារ សហរដ្ឋអាមេរិក, នូវែលសេឡង់, អូស្ត្រាលី, កូរ៉េខាងត្បូង និងជប៉ុន។ ដោយឡែក ទីផ្សារក្នុងស្រុកវិញ គឺមានលក់ទៅតាមផ្សារទំនើបនានាជាង ២៥០កន្លែងរាជធានីភ្នំពេញ៕ អត្ថបទ៖ ធូ វិរៈ

រដ្ឋមន្ត្រីក្រសួងរ៉ែ៖ រាជរដ្ឋាភិបាលកំពុងតាមដាន និងពិនិត្យលទ្ធភាពការអនុវត្តពន្ធជួយលើការធ្វើពាណិជ្ជកម្ម

រដ្ឋមន្ត្រីក្រសួងរ៉ែ និងថាមពល ថ្លែងថា ក្នុងស្ថានភាពមិនទាន់មានភាពប្រាកដប្រជានេះ រាជរដ្ឋាភិបាលបានកំពុងតាមដាន និងការពិនិត្យលទ្ធភាពលើការអនុវត្តពន្ធ ដើម្បីសម្រួលដល់ការធ្វើពាណិជ្ជកម្ម គាំទ្រដល់សកម្មភាពភាពនៃវិស័យចម្បងៗក្នុងស្រុក ក្នុងគោលដៅជំរុញសេដ្ឋកិច្ចឱ្យងើបឡើងវិញ។ ឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពល លើកឡើងនៅក្នុងពិធីសំណេះសំណាលសាកសួរសុខទុក្ខដល់ថ្នាក់ដឹកនាំ នាយទាហាន យោធាចារ្យនាយទាហានរង និងសិក្ខាកាមពលទាហានថ្មីវគ្គ៧ នៅមជ្ឈមណ្ឌលហ្វឹកហ្វឺនកងទ័ពជើងគោក នៅថ្ងៃទី២៥ ខែឧសភា ម្សិលមិញនេះថា នៅក្នុងបរិការណ៍មិនទាន់មានភាពប្រាកដប្រជា, កំណើនសេដ្ឋកិច្ចកម្ពុជាដែលបានគ្រោងប្រមាណ ៥% នៅដើមឆ្នំា ត្រូវបានរាជរដ្ឋាភិបាលទម្លាក់មកនៅត្រឹម ៤,២% ដោយសារកម្មវិបាកនៃឥទ្ធិពលសាយភាយបញ្ហាជម្លោះព្រំដែនកម្ពុជា-ថៃ, ការបង្រ្កាបការឆបោកតាមប្រព័ន្ធបច្ចេកវិទ្យា និងការកើនឡើងដោយសារបញ្ហាថ្លៃប្រេងឥន្ធនៈ ដែលធ្វើឱ្យមានសម្ពោធអតិផរណា និងបានជះឥទ្ធិពលដល់វិស័យសំខាន់ៗផងដែរ។ ឯកឧត្តមរដ្ឋមន្ត្រី បន្តថា ជុំវិញបញ្ហាខាងលើនេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី និងស្ថាប័នទាំងអស់ របស់រាជរដ្ឋាភិបាល បាននិងកំពុងខិតខំប្រឹងប្រែងយ៉ាងខ្លាំង ដើម្បីការលើកកម្ពស់ជីវភាព និងសុខុមាលភាពប្រជាជន និងជំរុញការ វិនិយោគសាធារណៈនានា ក្នុងគោលដៅទប់លំនឹងនៃសេដ្ឋកិច្ច និងឱ្យសេដ្ឋកិច្ចកម្ពុជាឈានទៅងើបឡើងវិញ ដែលមានកំណើនខ្ពស់ ដូចមុនវិបត្តិជំងឺកូវីដ-១៩ ក្នុងនោះទាក់ទងការវិនិយោគ, រាជរដ្ឋាភិបាលក៏បានយកចិត្តទុកដាក់ផងដែរ តាមរយៈជំនួបធុរកិច្ចនៅតាម បណ្តាប្រទេសនានា បង្ហាញពីសក្តានុពល និងភាពអំណោយផលរបស់កម្ពុជា ដើម្បីស្រូបយកឱកាសវិនិយោគបន្ថែម។ យោងតាមក្របខ័ណ្ឌហិរញ្ញវត្ថុសាធារណៈរយៈពេលមធ្យមឆ្នាំ២០២៧-២០២៩ បានបង្ហាញថា ក្រៅពីការអនុវត្តពន្ធគយបដិការបស់ សហរដ្ឋអាមេរិក និងជម្លោះព្រំដែនកម្ពុជ-ថៃ នៅក្នុងឆ្នាំ២០២៥, កម្ពុជាបានទទួលរងនូវព្យុះកំបុតត្បូងថ្មីមួយទៀត គឺសង្គ្រាមនៅ មជ្ឈិមបូព៌ា ដែលបង្កើនភាពមិនប្រាកដប្រជា និងហានិភ័យដល់កំណើនសេដ្ឋកិច្ចកម្ពុជាមួយកម្រិតបន្ថែមទៀត។ កម្មវិបាកធំៗទាំង៣ នេះបានធ្វើឱ្យកម្ពុជាប្រឈមនឹងការលំបាកទ្វេដង ក្នុងការបត់បែនគោលនយោបាយរបស់ខ្លួនទាំងផ្នែកសេដ្ឋកិច្ច ផ្នែកការទូត និងផ្នែក សង្គម។ ដើម្បីបញ្ចៀសនិងកាត់បន្ថយនូវកម្មវិបាកនានា, ទាំងផ្ទាល់និងប្រយោលមកលើសង្គម និងសេដ្ឋកិច្ច នៅក្នុងបរិការណ៍នេះ, កំណើនសេដ្ឋកិច្ចកម្ពុជា ដែលគ្រោងក្នុងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២៦ ថាអាចសម្រេចបាន ៥% ត្រូវបានវាយ តម្លៃថា នឹងអាចសម្រេចបានត្រឹម ៤,២% ដោយសារកម្មវិបាកនិងឥទ្ធិពលសាយភាយពីបញ្ហាជម្លោះព្រំដែនកម្ពុជា-ថៃផង, ការបង្ក្រាប ការឆបោកតាមប្រព័ន្ធបច្ចេកវិទ្យាផង និងការកើនថ្លៃថាមពលដែលធ្វើឱ្យមានសម្ពាធអតិផរណា និងបន្តជះឥទ្ធិពលដល់វិស័យសំខាន់ៗ តួយ៉ាងកសិកម្ម, ដឹកជញ្ជូន, ទេសចរណ៍ និងលក់ដុំ-រាយ ជាដើម៕ អត្ថបទ៖ សុន រ៉ាឌី

មន្រ្តីជាន់ខ្ពស់ក្រសួងសេដ្ឋកិច្ច ចាត់ទុកធនធានផ្នែកគណនេយ្យ ជាកាតាលីករជួយរុញកំណើនសេដ្ឋកិច្ច

មន្រ្តីជាន់ខ្ពស់ក្រសួងសេដ្ឋកិច្ច និងហិរញ្ញវត្ថុ បានចាត់ទុកការអភិវឌ្ឍធនធានមនុស្សផ្នែកគណនេយ្យ គឺជាធនធានដ៏មានសារៈសំខាន់ គាំទ្រកម្មវិធីកំណែទម្រង់សេដ្ឋកិច្ច និងហិរញ្ញវត្ថុ ការអភិវឌ្ឍវិស័យហិរញ្ញវត្ថុ និងការចូលរួមជំរុញកំណើនសេដ្ឋកិច្ចជាតិនៅកម្ពុជាផងដែរ។ ឯកឧត្តមបណ្ឌិត ងី តាយី រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានគណៈកម្មាធិការគ្រប់គ្រងកម្ពុជាសិក្សា គណនេយ្យជំនាញកម្ពុជា លើកឡើងបែបនេះ ក្នុងពិធីប្រគល់សញ្ញាបត្របញ្ចប់ការសិក្សា បរិញ្ញាបត្រជាន់ខ្ពស់ជំនាញវិទ្យាសាស្រ្តគណនេយ្យ និង ហិរញ្ញវត្ថុ និងសញ្ញាបត្រជំនាញគណនេយ្យអន្តរជាតិ ACCA ថា កម្ពុជាបាននិងកំពុងជំរុញជំនាញអភិវឌ្ឍន៍ជំនាញ វិជ្ជាជីវៈមានចំនួន កើនឡើង ជាក់ស្តែងជំនាញលើផ្នែកគណនេយ្យ បានកំពុងកើនឡើងជាបន្តបន្ទាប់ តែទោះបីយ៉ាងមិនទាន់ឆ្លើយតបនិងត្រូវការទីផ្សារក្នុង ស្រុកនៅឡើយ ខណៈកម្ពុជាមានក្រុមហ៊ុនសហគ្រាសជាច្រើន ដែលបានកើនឡើងពីមួយឆ្នាំទៅមួយឆ្នាំ ដែលសហគ្រាសទាំងនោះសុទ្ធ តែតម្រូវឱ្យកាន់បញ្ជីការ។ ឯកឧត្តមបណ្ឌិត បន្តថា តាមរយៈនៃការបណ្តុះបណ្តាលនេះ យើងបានកំពុងឆ្លើយតបទៅនឹងវិស័យការងារជាបណ្តើរៗ ប៉ុន្តែក៏ ទាមទារឱ្យមានការពង្រឹងសមត្ថភាពបន្ថែមផងដែរ ក្នុងនោះអ្នកដែលមានចំណេះ ជំនាញ គឺជាកាតាលីករដ៏សំខាន់ ក្នុងការចូលរួមទាំង សកម្មភាពការងារ ការបង្កើតអាជីវកម្ម និងក៏ជាអ្នកដែលជួយអូសទាញ និងបង្កើតទំនុកចិត្តដល់វិនិយោគិនឱ្យមកវិនិយោគនៅកម្ពុជាផងដែរ, ដូច្នេះធនធានមនុស្សពិតជាមានសារៈសំខាន់ សម្រាប់គាំទ្រដល់កំណើនសេដ្ឋកិច្ច និងការអភិវឌ្ឍវិស័យហិរញ្ញវត្ថុនៅកម្ពុជា។ លោកបណ្ឌិត ព្រំ វីរៈ ប្រធានក្រុមប្រឹក្សាភិបាលនៃវិទ្យាស្ថានខេមអេដ លើកឡើងថា ជុំវិញការកាន់បញ្ជីគណនេយ្យពិតជាមាន សារៈសំខាន់ណាស់ ដើម្បីបង្កើតទំនុកចិត្តដល់ម្ចាស់រោងចក្រ និងសហគ្រាស ឬអាជីវកម្មដែលអនុវត្តបានដោយខ្លួនឯង គឺមិនត្រូវឱ្យ របាយការណ៍ហិរញ្ញវត្ថុលាតត្រដាង ឬបែកធ្លាយ ជាពិសេសព័ត៌មានសម្ងាត់របស់អតិថិជន ឬអ្នកធ្វើការជាមួយនោះឡើយ ទោះបីបច្ចុប្បន្ន យើងពុំទាន់មានច្បាប់ស្តីអំពីការថែរក្សាអាថ៌កំបាំងពាណិជ្ជកម្ម តែអ្នកកាន់បញ្ជីរបាយការណ៍ហិរញ្ញវត្ថុ គឺត្រូវយកចិត្តទុកដាក់និងនុវត្តឱ្យ បានគត់មាត់ ខណៈបច្ចុប្បន្នកម្ពុជាបាននិងកំពុងរៀបចំសេចក្តីព្រាងរួចហើយ ដែលមិនយូរមិនឆាប់ច្បាប់នេះនឹងចូលជាធរមាន។ លោក នូវ រតនា នាយកការិយាល័យតំណាងសមាគមគណនេយ្យករជំនាញ (ACCA, អេស៊ីស៊ីអេ) ប្រចាំកម្ពុជា និងប្រទេស ឡាវ ក៏បានលើកទឹកចិត្តដល់និស្សិតដែលបញ្ចប់វគ្គសិក្សាបរិញ្ញាបត្រជាន់ខ្ពស់ជំនាញវិទ្យាសាស្រ្តគណនេយ្យ និងហិរញ្ញវត្ថុ ឱ្យពង្រីក ចំណេះដឹងបន្ថែម ជាពិសេសការចាប់យកជំនាញគណនេយ្យអន្តរជាតិ ACCA (Association of Chartered Certified Accountants) ដែលជាស្ថាប័នគណនេយ្យករជំនាញអន្តរជាតិឈានមុខគេមួយនៅលើពិភពលោក មានដើមកំណើតនៅចក្រភពអង់គ្លេស ដែល ACCA ត្រូវបានទទួលស្គាល់ជាសញ្ញាបត្រគណនេយ្យ និងហិរញ្ញវត្ថុដ៏មានឥទ្ធិពល។ ដូច្នេះនៅពេលយើងបានបញ្ចប់ ACCA វាជាមោទនភាពរបស់កម្ពុជា និងធ្វើឱ្យកម្ពុជាមានគណនេយ្យករជំនាញអន្តរជាតិកាន់តែច្រើន ដើម្បីរួមគ្នាបង្កើតទំនុកវិនិយោគិន និងការស្រូបយកឱកាស វិនិយោគបន្ថែម៕ អត្ថបទ៖ សុន រ៉ាឌី

ភ្ញៀវទេសចរបរទេសចាប់អារម្មណ៍ប្រើប្រាស់ Bakong Tourist ដើម្បីទូទាត់តាមប្រព័ន្ធឌីជីថលនៅកម្ពុជា

ភ្នំពេញ៖ ធនាគារជាតិនៃកម្ពុជា(NBC) បានតភ្ជាប់កម្មវិធីទូទាត់បាគងទេសចរ (Bakong Tourist) ជាមួយក្រុមហ៊ុន បណ្តាញប័ណ្ណទូទាត់អន្តរជាតិ Mastercard និង VISA ដើម្បីសម្រួលដល់ការទូទាត់របស់ភ្ញៀវទេសចរអន្តរជាតិដែលធ្វើដំណើរកម្សាន្តនៅប្រទេសកម្ពុជា ដោយផ្តល់លទ្ធភាពក្នុងការស្កេន KHQR ទូទាត់បែបឌីជីថលបានងាយស្រួលដូចប្រជាជនក្នុងស្រុក។ ជាក់ស្តែង ភ្ញៀវទេសចរបរទេសមកដើរលេងនៅផ្សារធំថ្មីក្នុងរាជធានីភ្នំពេញ បានចាប់អារម្មណ៍ប្រើប្រាស់ កម្មវិធីទូទាត់បាគងទេសចរ (Bakong Tourist) ដើម្បីទូទាត់ទំនិញ និងសេវាកម្មតាមប្រព័ន្ធឌីជីថល ដែលមានភាពងាយស្រួល រហ័ស និងសុវត្ថិភាព។កម្មវិធី Bakong Tourists គឺជាកម្មវិធីទូទាត់ប្រាក់ឌីជីថល ដែលបង្កើតឡើងដោយធនាគារជាតិនៃកម្ពុជា (NBC) ដែលអនុញ្ញាតឱ្យអ្នកទេសចរអន្តរជាតិស្កេនបង់ប្រាក់នៅតាមទីតាំងលក់រាយរាប់លានកន្លែងទូទាំងប្រទេសកម្ពុជា ដោយលុបបំបាត់តម្រូវការយកសាច់ប្រាក់ ឬការប្តូរប្រាក់ សម្រាប់ភ្ញៀវទេសចរ។ភ្ញៀវទេសចរបរទេសដែលមកពីប្រទេស អេស្បាញ់ និងអូស្ត្រាលី បានមកដើរកម្សាន្ត និងទិញទំនិញនៅផ្សារធំថ្មី រាជធានីភ្នំពេញ បានផ្តល់បទសម្ភាសន៍ជាមួយ BTV ថា ជាធម្មតា ពួកគេបានបង់ប្រាក់ជាសាច់ប្រាក់សុទ្ធទៅកាន់អាជីវករ និងពេលខ្លះគឺបង់ប្រាក់តាមរយៈការឆូតកាត់។ នៅពេលណែនាំអំពីការប្រើប្រាស់កម្មវិធី Bakong Tourists គឺពួកគេបានចាប់អារម្មណ៍ជាខ្លាំង ដោយពួកគេនឹងសាងល្បងប្រើប្រាស់កម្មវិធីនេះ ដើម្បីងាយស្រួលដល់ការទូទាត់របស់ពួកគេក្នុងអំឡុងពេលដំណើរកម្សាន្តនៅកម្ពុជា។សូមជម្រាបថា ធនាគារជាតិនៃកម្ពុជាបានរួមចំណែកលើកស្ទួយវិស័យ ទេសចរណ៍នៅកម្ពុជា ដោយបានដាក់ឱ្យដំណើរការជាបឋមកម្មវិធីទូទាត់បាគងទេចរ កាលពីថ្ងៃទី១៩ ខែវិច្ឆិកា ឆ្នាំ២០២៤ ដោយភ្ញៀវទេសចរដែលមកកម្ពុជា អាចទាញយកកម្មវីធីបាគងទេសចរ និង ភ្ជាប់ជាមួយប័ណ្ណទូទាត់អន្តរជាតិ ដូចជា Mastercard និង VISA ដើម្បីទូទាត់ទំនិញនិងសេវាផ្សេងៗ ជាមួយ KHQR របស់ពាណិជ្ជករទូទាំងប្រទេសកម្ពុជាប្រកបដោយភាពងាយស្រួល និង សុវត្ថិភាពខ្ពស់។ធនាគារជាតិនៃកម្ពុជាបានអភិវឌ្ឍនិងតភ្ជាប់ហេដ្ឋារចនាសម្ព័ន្ធប្រព័ន្ធទូទាត់ឆ្លងដែនផ្លូវការ និងជំរុញការទូទាត់ឌីជីថល ក្នុងគោលបំណងរួមចំណែកជំរុញវិស័យទេសចរណ៍ ពាណិជ្ជកម្ម និងលើកកម្ពស់ការប្រើប្រាស់រូបិយវត្ថុជាតិ ដោយបានដាក់ឱ្យដំណើរការគម្រោងទូទាត់ឆ្លងដែនទ្វេភាគីតាម ហ្សូអរកួត (QR) ជាមួយប្រទេសថៃ ឡាវ វៀតណាម ម៉ាឡេស៊ី កូរ៉េខាងត្បូង ចិន ជប៉ុន និងសិង្ហបុរី ហើយគ្រោងនឹងដាក់ឱ្យដំណើរការគម្រោងទូទាត់ឆ្លងដែនទ្វេភាគីជាមួយប្រទេសឥណ្ឌា នាពេលឆាប់ៗខាងមុខ និងបានចុះអនុស្សរណៈយោគយល់ជាមួយឥណ្ឌូណេស៊ី ព្រមទាំង កំពុងពិភាក្សាតភ្ជាប់ការទូទាត់ឆ្លងដែន ជាមួយប្រទេសហ្វីលីពីនផងដែរ៕ អត្ថបទ៖ ធូ វិរៈ

អគ្គនាយកដ្ឋានពន្ធដារបានកំណត់នូវទិសដៅកែទម្រង់សំខាន់ៗពីរ គឺការកែទម្រង់គោលនយោបាយ និងរដ្ឋបាលសារពើពន្ធ

ឯកឧត្តម គង់ វិបុល អគ្គនាយកនៃអគ្គនាយកដ្ឋានពន្ធដារ បានបញ្ជាក់ថា ស្របគ្នាជាមួយនឹងការរីកចម្រើននៃសេដ្ឋកិច្ចកម្ពុជា អគ្គនាយកដ្ឋានពន្ធដារបានកំណត់នូវទិសដៅកែទម្រង់សំខាន់ៗចំនួនពីរ គឺការកែទម្រង់គោលនយោបាយ និងរដ្ឋបាលសារពើពន្ធ ដើម្បីពង្រឹងគុណភាព ប្រសិទ្ធភាព ស័ក្តិសិទ្ធិភាព និងតម្លាភាព ក្នុងការផ្តល់សេវាជូនអ្នកបង់ពន្ធឱ្យកាន់តែងាយស្រួល និងប្រសើរឡើង។ ឯកឧត្តម គង់ វិបុល បានបញ្ជាក់ថា ការកែទម្រង់រដ្ឋបាលសារពើពន្ធ ទាំងពីរនេះ គឺ តាមរយៈការធ្វើទំនើបកម្មនៃរដ្ឋបាលសារពើពន្ធកម្ពុជា ជាពិសេសការធ្វើបរិវត្តកម្ម និងទំនើបកម្មផ្នែកបច្ចេកវិទ្យាព័ត៌មានឌីជីថល ដែលបានប្រែក្លាយពីការបំពេញភារកិច្ចការងារដោយដៃ (Manual) ទាំងស្រុងមកធ្វើតាមប្រព័ន្ធឌីជីថលស្ទើរតែទាំងស្រុងវិញ។ ឯកឧត្តម បន្តថា ការកែទម្រង់ការគ្រប់គ្រងធនធានមនុស្ស ក៏ជាមុខព្រួញមួយដ៏សំខាន់ ក្នុងការពង្រឹងចំណេះដឹង របស់មន្ត្រី និងការពង្រឹងក្រមសីលធម៌ ព្រមទាំង ពង្រឹងគុណភាពនៃការផ្តល់សេវាពន្ធដារនានាជូន អ្នកជាប់ពន្ធឱ្យបានកាន់តែប្រសើរឡើង និងមានប្រសិទ្ធភាពខ្ពស់, ការបង្កើតអង្គភាពសវនកម្មពន្ធដារពិសេស ចំណុះអគ្គនាយកដ្ឋានពន្ធដារ ស្របតាមអនុសាសន៍ដ៏ខ្ពង់ខ្ពស់របស់សម្តេចធិបតី នាយករដ្ឋមន្ត្រី ដើម្បីគាំទ្រនិងជាយន្តការពន្លឿនការងារសវនកម្ម ពន្ធដារជូនដល់អ្នកជាប់ពន្ធដែលមានអនុលោមភាពខ្ពស់។ ទន្ទឹមគ្នានេះ ការកែទម្រង់នីតិវិធីនៃការអនុវត្តការងារដោយបានរៀបចំនូវនិយាមនីតិវិធីប្រតិបត្តិ ការងារ (SOP) នូវរាល់គ្រប់មុខងារស្នូលក្នុងការបម្រើសេវាអ្នកជាប់ពន្ធនានា។ ឯកឧត្តម បានអះអាងថា ផ្អែកតាមលទ្ធផលនៃកំណែទម្រង់ដូចបានរៀបរាប់ខាងលើ ជាលទ្ធផលគឺ សម្រេចបានជោគជ័យ ក្នុងការប្រមូលចំណូលពន្ធផ្ទៃក្នុងជាបន្តបន្ទាប់ ដែលមានការកើនឡើងដល់កម្រិតខ្ពស់ និងបានក្លាយជាអង្គភាពប្រមូលចំណូលខ្ពស់ជាងគេក្នុងចំណោមអង្គភាពប្រមូលចំណូលនានា។ ការប្រមូលចំណូលដោយជោគជ័យនេះ គឺជាសមិទ្ធផលនៃការកែទម្រង់របស់ រដ្ឋបាលសារពើពន្ធកម្ពុជា ដើម្បីប្រមូលពន្ធឱ្យអស់សក្តានុពល និងប្រកបដោយតម្លាភាព បើទោះបីជាស្ថិតក្នុងបរិការណ៍ដែលមិនមានការបង្កើតប្រភេទពន្ធថ្មី, មិនដំឡើងអត្រាពន្ធ និងអាករ និងមានការបន្តការផ្តល់ការលើកទឹកចិត្តពន្ធដារជាច្រើនជាបន្តបន្ទាប់ក៏ដោយ។ បើតាម ឯកឧត្តម គង់ វិបុល ការកែទម្រង់រដ្ឋបាលសារពើពន្ធដោយជោគជ័យបានធ្វើឱ្យលទ្ធផលនៃការប្រមូលចំណូលពន្ធមានភាពល្អប្រសើរ អាចឆ្លើយតបបានគ្រប់គ្រាន់នឹងតម្រូវការហិរញ្ញវត្ថុសាធារណៈ។ លើសពីនេះការប្រមូលចំណូលបានលើសផែនការនាពេលកន្លងមកក៏ផ្តល់លទ្ធភាពដល់រាជរដ្ឋាភិបាល បំពេញបន្ថែមនូវកញ្ចប់ថវិកាសន្សំ ដើម្បីអភិវឌ្ឍ និងអនុវត្តគោលនយោបាយនានាបន្ថែមទៀត ជាពិសេសការចាត់វិធានការដោះស្រាយដើម្បីឆ្លើយតបយ៉ាងសមស្រប និងទាន់ពេលវេលាជាមួយនឹងវិបត្តិនៃការរីករាលដាលនៃជំងឺកូវីដ-១៩ និងវិធានការអន្តរាគមន៍ចាំបាច់នានាកន្លងមក៕ អត្ថបទ៖ ធូ វិរៈ

ការប្រមូលចំណូលពន្ធដារបានកើនពី ៧៣៨ ដល់ ៣ ៥៧៧ លានដុល្លារអាមេរិក ក្នុងរយៈពេល១៣ឆ្នាំចុងក្រោយ

ឯកឧត្តម អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្ដី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ បានថ្លែងក្នុងវិធីសម្ពោធអគារទីស្នាក់ការកណ្តាលនៃអគ្គនាយកដ្ឋានពន្ធដារថ្មី នៅព្រឹកថ្ងៃទី ២១ ខែឧសភា ឆ្នាំ២០២៦នេះថា ក្នុងរយៈពេល ១៣ឆ្នាំចុងក្រោយ ការប្រមូលចំណូលពន្ធដារ បានកើនឡើងជិត៤ដង ពីប្រមាណ ៧៣៨ លានដុល្លារអាមេរិកក្នុងឆ្នាំ២០១២ ដល់ ៣ ៥៧៧ លានដុល្លារអាមេរិក ក្នុងឆ្នាំ២០២៥ ទោះបីកម្ពុជាប្រឈមនឹងសត្រូវឈ្លានពាន វិបត្តិប្រេង និងវិបត្តិសកលក្ដី។ឯកឧត្តម អគ្គបណ្ឌិតសភាចារ្យ អូន ព័ន្ធមុនីរ័ត្ន បានថ្លែងទៀត ជាក់ស្ដែងចំណូលដែលត្រូវបានប្រមូលដោយអគ្គនាយកដ្ឋានពន្ធដារ បានកើនគួរឱ្យគត់សម្គាល់ ពីចំនួនត្រឹមតែប្រមាណ ៧៣៨ លានដុល្លារអាមេរិកក្នុងឆ្នាំ២០១២ កើនដល់ ៣៥៧៧ លានដុល្លារអាមេរិក ក្នុងឆ្នាំ២០២៥ កន្លងទៅ ពោលគឺមានកំណើនជិត ៤ដង ក្នុងរយៈពេល ១៣ឆ្នាំចុងក្រោយនេះ។ឯកឧត្តមអគ្គបណ្ឌិតសភាចារ្យ បានឱ្យដឹងទៀតថា ក្នុងរយៈពេលជាងមួយទសវត្សរ៍នេះអគ្គនាយកដ្ឋានពន្ធដារនៃក្រសួងសេដ្ឋកិច្ច និងហិរញ្ញវត្ថុ បានសម្រេចបាននូវសមិទ្ធផលចម្បងជាច្រើន ជាអាទិ៍ ការធ្វើទំនើបកម្មកម្មវិធី និងប្រព័ន្ធបច្ចេកវិទ្យាឌីជីថលជាច្រើន តាមរយៈការធ្វើសមាហរណកម្ម និងសន្ធានកម្មប្រព័ន្ធបច្ចេកវិទ្យាព័ត៌មានឱ្យបានពេញលេញជា ប្រព័ន្ធអេកូឡូស៊ីឌីជីថលមួយ ដើម្បីបង្កលក្ខណៈងាយស្រួល និងផ្តល់សេវាកាន់តែ ប្រសើរជូនអ្នកជាប់ពន្ធក្នុងការបំពេញកាតព្វកិច្ចសារពើពន្ធ និងការពង្រឹងអភិបាលកិច្ច និងការអភិវឌ្ឍមូលធនមនុស្ស តាមរយៈការវិភាគមុខងារ អង្គភាពក្រោមឱវាទ, ការកែសម្រួលរចនាសម្ព័ន្ធការងារក្នុងករណីចាំបាច់, ការពង្រីក ចំណេះដឹង និងការជំរុញអនុវត្តនូវក្រមប្រតិបត្តិវិជ្ជាជីវៈរបស់មន្ត្រី។ឯកឧត្តម អគ្គបណ្ឌិតសភាចារ្យ បានបញ្ជាក់ថា ក្រោមដំបូល នៃសន្តិភាព និងស្ថិរភាពនយោបាយកម្ពុជាបានសម្រេចនូវការអភិវឌ្ឍ និងបន្តរក្សាបាននូវស្ថិរភាពម៉ាក្រូសេដ្ឋកិច្ចនិង ហិរញ្ញវត្ថុសាធារណៈ។ កត្តាទាំងនេះបានក្លាយជាមូលដ្ឋានគ្រឹះដ៏រឹងមាំដែលផ្តល់លទ្ធភាពឱ្យមានការរីកចម្រើននៃវិស័យពន្ធដារ និងភាពជោគជ័យនៃការប្រមូលចំណូលបើទោះបីជាការប្រមូល គឺក្នុងក្របខណ្ឌ “មិនបង្កើតប្រភេទពន្ធថ្មី និងមិនដំឡើងអត្រាពន្ធ និងអាករ” ក៏ដោយ។បើតាមឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន តាមរយៈលទ្ធផលប្រមូលពន្ធបានល្អប្រសើររាជរដ្ឋាភិបាលមានលទ្ធភាពសន្សំនូវថវិកាដើម្បីជាទុន ក្នុងការដោះស្រាយបញ្ហាប្រឈមនានាក្នុងគ្រប់កាលៈទេសៈលំបាកទាំងឡាយកន្លងមក រួមទាំងវិបត្តិនៃជំងឺកូវីដ-១៩ ជាសកល និងភាពមិនប្រាកដប្រជាខ្ពស់នៃវិបត្តិសកលនានាព្រមទាំងបានផ្តល់លទ្ធភាពឱ្យសេដ្ឋកិច្ចកម្ពុជាស្ទុះងើបឡើងវិញបានយ៉ាងរហ័ស និងប្រកប ដោយភាពធន់។សូមបញ្ជាក់ថា តាមរយៈកំណើនសេដ្ឋកិច្ចដ៏រឹងមាំប្រកបដោយចីរភាព និងការប្រមូលចំណូលប្រកបដោយ ប្រសិទ្ធភាព និងស័ក្តិសិទ្ធិភាពរបស់កម្ពុជា ពិតជាបានរួមចំណែកយ៉ាងសំខាន់ក្នុងការផ្តល់លទ្ធភាពជូនដល់រាជរដ្ឋាភិបាល ក្នុងការបង្កើនការវិនិយោគសាធារណៈលើហេដ្ឋារចនាសម្ព័ន្ធគ្រប់ប្រភេទ ដូចជាផ្លូវថ្នល់ ស្ពាន សាលារៀន មន្ទីរពេទ្យ ប្រព័ន្ធធារាសាស្ត្រ ប្រព័ន្ធទឹកស្អាត បណ្តាញអគ្គិសនី ។ល។ និងក្នុងការដំឡើងប្រាក់បៀវត្ស ប្រាក់បំណាច់មុខងារ និងរបបសន្តិសុខសង្គម ជូនមន្ត្រីរាជការ ស៊ីវិល កងកម្លាំងប្រដាប់អាវុធ និវត្តជន និងមន្ត្រីបុគ្គលិកគ្រប់ប្រភេទ ទន្ទឹមនឹងការបង្កើន ប្រាក់សោធនប្រចាំខែសម្រាប់អតីតមន្ត្រីរាជការស៊ីវិល និងអតីតយុទ្ធជនផងដែរ៕ អត្ថបទ៖ ធូ វិរៈ

អ្នកជំនាញ៖ ការជំរុញអភិវឌ្ឍកំពង់ផែ នឹងលើកកម្ពស់ការធ្វើពាណិជ្ជកម្ម នឹងឈានទៅសម្រេចឆ្នាំ២០៣០

អ្នកជំនាញក្នុងវិស័យដឹកជញ្ជូន មើលឃើញថា ការជំរុញអភិវឌ្ឍន៍ផែទឹកជ្រៅ និងចំណតផែរណបនៅក្នុងស្រុក នៃកំពង់ផែធំៗទាំងពីរ របស់កម្ពុជា គឺជាការចូលរួមលើកកម្ពស់ជំរុញដល់ការធ្វើពាណិជ្ជកម្មឱ្យកាន់តែខ្លាំងក្លាថែមទៀត ជាពិសេសការឈានទៅសម្រេចចក្ខុ វិស័យរបស់រាជរដ្ឋាភិបាលឆ្នាំ២០៣០។លោក ជា ចាន់ដារ៉ា ប្រធានសមាគមពាណិជ្ជករដឹកជញ្ជូន ខ្សែច្រវាក់ផ្គត់ផ្គង់ និងភ្នាក់ងារជើងសានៅកម្ពុជា លើកឡើងក្នុងកិច្ច សម្ភាសន៍ជាមួយ BTV ស្តីពីការដឹកជញ្ជូនតាមផ្លូវទឹក និងគម្រោងអភិឌ្ឍន៍កំពង់ផែនៅព្រះរាជាណាចក្រកម្ពុជា នេះថា កម្ពុជាមានការ ដឹកជញ្ជូន៣ប្រភេទរួមមាន ការដឹកជញ្ជូនតាមផ្លូវអាកាស ផ្លូវគោក និងផ្លូវទឹក ក្នុងនោះការដឹកជញ្ជូនតាមផ្លូវពិតជាមានសារៈសំខាន់ណាស់ អាចដឹកជញ្ជូនបានច្រើន និងបានឆ្ងាយ និងមានតម្លៃសមរម្យផងដែរ បច្ចុប្បន្នការដឹកជញ្ជូនប្រភេទបាននិងកំពុងគាំទ្រដល់ ប្រតិបត្តិការនាំចេញ-ចូលរបស់កម្ពុជា។ លោក បន្តថា ជាក់ស្តែងការអភិវឌ្ឍកំពង់ផែនេះ ក្នុងនោះកំពង់ផែស្វយ័តក្រុងព្រះសីហនុ បាននិងកំពុងពង្រីកគម្រោងសាង សង់ទៅតាមជំហាននីមួយៗមាន៣ដំណាក់កាល ដែលគម្រោងទាំងនោះបន្ទាប់ពីសាងសង់រួចរាល់ នឹងអាចមានសមត្ថភាពទទួលបាន កុងតឺន័រឆ្លងកាត់កាន់តែច្រើន នឹងអាចទទួលកងនាវាទូទាំងពិភពលោកចូលចតបានផងដែរ។ ចំណែកកំពង់ផែស្វយ័តភ្នំពេញ ក៏បានកំពុងពង្រីកសមត្ថភាពរបស់ខ្លួន លើគម្រោងអភិវឌ្ឍន៍កំពង់ផែកុងងតឺន័រ ចំណតផែរណបពហុបំណង គម្រោងបង្កើតផែស្ងួត និង តំបន់សេដ្ឋកិច្ចជាដើម ដែលគម្រោងទាំងនេះសុទ្ធតែជួយជ្រោមជ្រែងដល់ការដឹកជញ្ជូន ការចូលរួមលើកកម្ពស់ដល់ការធ្វើពាណិជ្ជកម្ម ការគាំទ្រដល់នាំចេញរបស់កម្ពុជាកាន់តែខ្លាំងក្លា ជាពិសេសគឺការឈានទៅសម្រេចចក្ខុវិស័យជាប្រទេសមានចំណូលមធ្យមកម្រិត ខ្ពស់ត្រឹមឆ្នាំ២០៣០។ ជុំវិញគម្រោងពង្រីកកំពង់ផែនេះ ក្នុងនោះចំពោះគម្រោងរបស់កំពង់ផែស្វយ័តក្រុងព្រះសីហនុ, ឯកឧត្តម លូ គឹមឈន់ ប្រធាន អគ្គនាយកកំពង់ផែស្វយ័តក្រុងព្រះសីហនុ លើកឡើងថ្មីៗនេះថា បច្ចុប្បន្នកំពង់ផែបានកំពុងបង្កើនសមត្ថភាពទៅតាមដំណាក់កាល ក្នុងនោះសម្រាប់ដំណាក់កាលទី១ នៅក្នុងឆ្នាំ២០២៦នេះ, គឺការសាងសង់ចំណតមានជម្រៅទឹក ១៤,៥ ម៉ែត្រ អាចឱ្យកប៉ាល់ដឹកបាន (៤ពាន់ ទៅ ៥ពាន់ TEU)។ ដំណាក់កាលទី២ គ្រោងនឹងចប់នៅឆ្នាំ២០២៨, មានជម្រៅ ១៦,៥ ម៉ែត្រ មានសមត្ថភាពកប៉ាល់ ផ្ទុកបាន ១២ ម៉ឺន DWT ស្មើ ១ ម៉ឺន TEU។ ដោយឡែកដំណាក់កាលទី៣ គឺគម្រោងសាងសង់កំពង់ជម្រៅទឹក ១៧,៥ ម៉ែត្រ អាចឱ្យ កប៉ាល់ផ្ទុកដល់ ១៦ ម៉ឺន DWT ត្រូវប្រមាណ ១,៥ ម៉ឺន TEU ក្នុងនោះបន្ទាប់ពីដាក់ឱ្យដំណើរការ នឹងអាចឱ្យកងនាវាស្ទើរតែទូទាំង ពិភពលោកចូលចតបាន នឹងអាចមានកុងតឺន័រឆ្លងកាត់សរុបដល់ប្រមាណ ២,៦ លាន TEU។ ចំណែកកំពង់ផែស្វយ័តភ្នំពេញវិញ ក្នុងឆ្នាំ២០២៦នេះ រំពឹងថា នឹងទទួលបានបរិមាណកុងតឺន័រឆ្លងកាត់ក្នុងរង្វង់ប្រមាណ ៦៦ ម៉ឺន TEU ខណៈនៅឆ្នាំ២០២៥ ទទួលបានត្រឹម ៦០ម៉ឺន TEU។ ចំណែកនៅឆ្នាំ២០៣០ កំពង់ផែស្វយ័តភ្នំពេញ នឹងអាចទទួល បានកុងតឺន័រឆ្លងកាត់ជិត ១ លាន TEU ក្នុងនោះសម្រាប់គម្រោងកំពង់ផែមួយនេះ ក៏បានកំពុងពង្រីកចំណតផែរណបពហុបំណង និងគ្រោងអភិវឌ្ឍន៍ផែថ្មីផ្សេងៗទៀត និងគម្រោងបង្កើតផែស្ងួត រួមជាមួយគម្រោងបង្កើតតំបន់សេដ្ឋកិច្ចពិសេសជាដើម៕ អត្ថបទ៖ សុន រ៉ាឌី

ជប៉ុនស្រូបយកទំនិញកម្ពុជា មានទឹកជាង ៦១៤ លានដុល្លារ ឈក្នុងលំដាប់ទី៣ នៃការនាំចេញទំនិញកម្ពុជា

កម្ពុជាបាននាំចេញទំនិញសំខាន់ៗទៅកាន់ទីផ្សារជប៉ុន នៅក្នុងរយៈពេល ៤ខែ ឆ្នាំ២០២៦ មានទឹកប្រាក់សុរបជាង ៦១៤ លាន ដុល្លារអាមេរិក កើនឡើងជាង ១៧ ភាគរយ ធៀបរយៈពេលដូចគ្នានិងឆ្នាំមុន ដោយទីផ្សារមួយនេះឈរក្នុងលំដាប់ទី៣ ជួយជ្រោមជ្រែង ដល់ការនាំចេញទំនិញរបស់កម្ពុជា។ ជុំវិញការធ្វើពាណិជ្ជកម្មទ្វេភាគីរវាងកម្ពុជា-ជប៉ុន ឃើញថា នៅក្នុងរយៈពេលប៉ុន្មានឆ្នាំចុងក្រោយនេះ ការផ្លាស់ប្តូរពាណិជ្ជកម្ម នៃប្រទេសទាំងពីរ បានកើនឡើងជាបន្តបន្ទាប់ និងមានសមតុល្យពាណិជ្ជកម្មប្រហាក់ប្រហែលគ្នា ដោយទីផ្សារប្រទេសជប៉ុនបានកំពុង គាំទ្រដល់ការនាំចេញរបស់កម្ពុជា ឈក្នុងលំដាប់ទី៣ បន្ទាប់ពីការនំាចេញទៅសហរដ្ឋអាមេរិក និងទីផ្សារនៃប្រទេសវៀតណាម។ ជាក់ស្តែងនៅក្នុងរយៈពេល ៤ខែ ឆ្នាំ២០២៦នេះ, បើយោងតាមរយបាយការណ៍របស់អគ្គនាយកដ្ឋានគយ និងរដ្ឋាករកម្ពុជា នៃក្រសួងសេដ្ឋកិច្ច និងហិរញ្ញវត្ថុ បានបង្ហាញឱ្យឃើញថា ការធ្វើពាណិជ្ជកម្មទ្វេរភាគីរវាងកម្ពុជា-ជប៉ុន មានទំហំទឹកប្រាក់សរុបជិត ១ ពាន់លានដុល្លារអាមេរិក កើនឡើងជាង ១៦ ភាគរយ ក្នុងនោះកម្ពុជាបាននាំចេញទំនិញទៅទីផ្សារជប៉ុន មានទឹកប្រាក់ជាង ៦១៤ លានដុល្លារអាមេរិក កើនជាង ១៧ ភាគរយ ខណៈការនាំចូលទំនិញពីប្រទេសជប៉ុនមកកម្ពុជា មានទឹកប្រាក់ជាង ៣៥២ លានដុល្លារ អាមេរិក កើន ១៤ ភាគរយ បើធៀបរយៈពេលដូចគ្នានិងឆ្នាំ២០២៥។ ជុំវិញការធ្វើពាណិជ្ជកម្ម និងវិនិយោគកម្ពុជា-ជប៉ុននេះ, នៅដើមឆ្នាំ២០២៦ កន្លងមក ប្រទេសទាំងពីរក៏បានប្រកាសដាក់ឱ្យ ដំណើរក្រុមសហបង្កើតធុរកិច្ច (BCT) ដើម្បីជំរុញឱ្យក្រុមហ៊ុនជប៉ុន ទាំងក្រុមហ៊ុនដែលកំពុងប្រតិបត្តិការនៅកម្ពុជា និងក្រុមហ៊ុនដែល កំពុងពិចារណាវិនិយោគ ទទួលបាននូវព័ត៌មានកាន់តែទូលំទូលាយ និងដំណោះស្រាយតែមួយកន្លែង ដើម្បីលើកកម្ពស់ដល់ការ វិនិយោគនៅកម្ពុជា។ ទីផ្សារជប៉ុនគាំទ្រដល់ការនាំចេញទំនិញសំខាន់ៗរបស់កម្ពុជារួមមាន៖ សម្លៀកបំពាក់, វាយនភណ្ឌ, ស្បែកជើង, សម្ភារៈធ្វើ ដំណើរ, គ្រឿងអេឡិចត្រូនិចនិងគ្រឿងបំណែក, ខ្សែភ្លើងនិងគ្រឿងបង្គុំខ្សែភ្លើង និងគ្រឿងបន្លាស់រថយន្តជាដើម ។ ចំណែកការនាំចូល ពីជប៉ុនរួមមាន៖ ប្រេងម៉ាស៊ូត និងប្រេងរំអិល, វាយនភណ្ឌ, សម្ភារៈសំណង់ និងដែកថែម, រថយន្ត និងគ្រឿងបន្លាស់រថយន្តជាដើម៕ អត្ថបទ៖ សុន រ៉ាឌី

ប្រធានសមាគម៖ រយៈពេលជាង ៤ខែដើមនេះវិស័យដឹកជញ្ជូនកម្ពុជាមានស្ថានភាពល្អទោះតម្លៃប្រេងខ្ពស់ក៏ដោយ

ប្រធានសមាគមពាណិជ្ជករដឹកជញ្ជូន ខ្សែច្រវាក់ផ្គត់ផ្គង់ និងភ្នាក់ងារជើងសានៅកម្ពុជា ថ្លែងថា នៅក្នុងរយៈពេលជាង ៤ខែ ដើមឆ្នាំ២០២៦ វិស័យ ដឹកជញ្ជូននៅកម្ពុជាមានស្ថានភាពល្អប្រសើរ ជាងនៅដើមឆ្នាំ២០២៥ គាំទ្រដោយលំហូរនៃទំនិញ (ចេញ-ចូល) និងសកម្មភាពអាជីវកម្ម ក្នុងស្រុកទោះបីកម្ពុជាជួបបញ្ហានៃការហក់ឡើងប្រេងឥន្ធនៈក៏ដោយ។លោក ជា ចាន់ដារ៉ា ប្រធានសមាគមពាណិជ្ជករដឹកជញ្ជូន ខ្សែច្រវាក់ផ្គត់ផ្គង់ និងភ្នាក់ងារជើងសានៅកម្ពុជា លើកឡើងក្នុងកិច្ចសម្ភាសន៍ជាមួយ BTV ស្តីពីប្រតិបត្តិការនៃសេវាដឹកជញ្ជូនក្នុងពេលបច្ចុប្បន្ន នៅថ្ងៃទី២០ ខែមេសា ឆ្នាំ២០២៦ នេះថា វិស័យដឹកជញ្ជូនពឹងផ្អែកទាំងស្រុងលើប្រេងឥន្ធនៈ (ជាពិសេសប្រេង ម៉ាស៊ូត) បន្ទាប់ពីការហក់ឡើងថ្លៃនៃប្រេងឥន្ធនៈ ដោយសារសង្គ្រាមនៅមជ្ឈឹមបូព៌ា សេវានៃប្រតិបត្តិការដឹកជញ្ជូនក៏បានហក់ឡើងថ្លៃ ផងដែរ នៅក្នុងរង្វង់ប្រមាណ ២៥ ទៅ ៣០% ចំណែកនៅក្នុងស្ថានភាពមិនប្រាកដប្រជានេះ អាចនឹងពិបាកក្នុងការវាយតម្លៃ ប៉ុន្តែ ទោះបីយ៉ាងណា ជុំវិញបញ្ហាប្រេងឥន្ធនៈនេះ រាជរដ្ឋាភិបាលបានយកចិត្តទុកដាក់យ៉ាងខ្លាំង និងបានដាក់ចេញនូវកិច្ចអន្តរាគមន៍ជាបន្ត បន្ទាប់រួមមាន តាមរយៈការបញ្ចុះអាករ និងដកពន្ធលើការនាំចូលប្រេង ដើម្បីជួយសម្រាលបន្ទុកជីវភាពរបស់ប្រជាពលរដ្ឋ ជាពិសេស ការសម្រួលដល់ប្រតិបត្តិកាដឹកជញ្ជូន ដែលជាផ្នែកមួយជួយគាំទ្រដល់សកម្មភាពសេដ្ឋកិច្ចជាតិផងដែរ។លោកបន្តថា ជុំវិញការដឹកជញ្ជូននេះឃើញថា ក្នុងរយៈពេលជាង ៤ខែ ដើមឆ្នាំ២០២៦នេះ មានស្ថានភាពល្អប្រសើរ បើធៀប រយៈពេលដូចនឹងឆ្នាំមុន ខណៈនៅក្នុងឆ្នាំ២០២៥កន្លងមក កម្ពុជាទទួលបានគម្រោងវិនិយោគជាច្រើន គាំទ្រដល់ការនាំចេញទំនិញ របស់កម្ពុជា គួបផ្សំជាមួយការហូរចូលទំនិញមានកំណើនកើនឡើង រួមជាមួយសកម្មភាពអាជីវកម្មក្នុងស្រុកមានភាពមមាញឹកជាងមុនបានគាំទ្រដល់សេវានៃការដឹកជញ្ជូន ហើយបញ្ហានេះលោករំពឹងថា វិស័យដឹកជញ្ជូននៅក្នុងឆ្នាំ២០២៦ នឹងមានស្ថានភាពល្អ ប្រសើរទោះបីជួបបញ្ហាខ្លះៗក៏ដោយ។ ទាក់ទិនអនុវិស័យដឹកជញ្ជូននេះ, បើយោងតាមក្របខ័ណ្ឌហិរញ្ញវត្ថុសាធារណៈរយៈពេលមធ្យមឆ្នាំ២០២៧-២០២៩, អនុវិស័យនេះ ត្រូវបានវាយតម្លៃថា នៅក្នុងឆ្នាំ២០២៦នេះ នឹងបន្តសម្រេចបានកំណើនល្អក្នុងអត្រា ៤,៥% ដែលគាំទ្រដោយនិន្នាការល្អនៃវិស័យ បម្រើការនាំចេញ គួបផ្សំនឹងការបន្តពង្រីក និងពង្រឹងសមត្ថភាពផ្ទុក និងចរាចរណ៍ទំនិញនៅតាមកំពង់ផែទាំងពីរ, ស្របពេលដែល ការដឹកជញ្ជូនបញ្ញើរហ័ស ក៏នៅបន្តរក្សាបាននិន្នាការល្អ ។ ចំណែកការកើនថ្លៃប្រេងឥន្ធនៈ ក៏បង្កផលប៉ះពាល់ដល់សកម្មភាព និង ប្រាក់ចំណេញរបស់ក្រុមហ៊ុនដឹកជញ្ជូនផងដែរ ដែលធ្វើឱ្យមានការកាត់បន្ថយនូវចំនួនជើងនៃការដឹកជញ្ជូន ពិសេសការដឹកជញ្ជូនបញ្ញើរហ័សក្នុងស្រុក, ប៉ុន្តែការដឹកជញ្ជូន ពិសេសទំនិញបម្រើការនាំចេញ នៅបន្តរក្សាបាននិន្នាការល្អ ដែលចូលរួមគាំទ្រដល់ អនុវិស័យនេះជារួម៕ អត្ថបទ៖ សុន រ៉ាឌី

មន្រ្តីជាន់ខ្ពស់ CDC និង AmCham ប្តេជ្ញាបន្តពង្រឹងភាពជាដៃគូយុទ្ធសាស្ត្រឱ្យកាន់តែរឹងមាំ

ក្រុមប្រឹក្សាអភិវឌ្ឍន៍កម្ពុជា និងសភាពាណិជ្ជកម្មអាមេរិកប្រចាំនៅកម្ពុជា ប្តេជ្ញាបន្តពង្រឹងភាពជាដៃគូយុទ្ធសាស្ត្រ រវាងរដ្ឋនិងឯកជន ឱ្យកាន់តែរឹងមាំ ដើម្បីរួមចំណែកដល់ការអភិវឌ្ឍសេដ្ឋកិច្ច-សង្គមកម្ពុជា ឱ្យកាន់តែរីកចម្រើន ប្រកបដោយចីរភាព និងបរិយាបន្ន។ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា (ក.អ.ក.) នៅថ្ងៃទី១៨ ខែឧសភា ឆ្នាំ២០២៦ បានទទួលជួបប្រតិភូសភាពាណិជ្ជកម្មអាម៉េរិកប្រចាំនៅកម្ពុជា (AmCham) ដឹកនាំដោយលោក Devin Barta ប្រធាន AmCham ពិភាក្សាការងារអំពីការត្រៀមរៀបចំពិធីទទួលទានអាហារពេលព្រឹកធុរកិច្ចលើកទី២ រវាងស្ថាប័នរដ្ឋ និងវិស័យឯកជន ដែលគ្រោងនឹងធ្វើឡើង នាដើមខែមិថុនា ឆ្នាំ២០២៦ ខាងមុខនេះ ដោយមាន AmCham ទទួលបន្ទុកធ្វើជាអ្នកសម្របសម្រួលនិងរៀបចំ។ ឯកឧត្តមឧបនាយករដ្ឋមន្ត្រី ក៏បានផ្តល់ការណែនាំឱ្យផ្តោតការយកចិត្តទុកដាក់ លើការកំណត់ប្រធានបទពិភាក្សាឱ្យបាន ច្បាស់លាស់ ចំគោលដៅ និងឆ្លើយតបទៅនឹងបច្ចុប្បន្នភាពនៃនិន្នាការសេដ្ឋកិច្ចសកល ជាពិសេសការលើកឡើងពីបញ្ហាប្រឈម និង ការស្វែងរកដំណោះស្រាយរួមគ្នា សំដៅធានាដល់កាលានុវត្តភាពវិនិយោគយ៉ាងពិតប្រាកដសម្រាប់ធុរជនទាំងអស់។ ជាការឆ្លើយតប, លោកប្រធាន Devin Barta បានថ្លែងអំណរគុណយ៉ាងជ្រាលជ្រៅ និងបានបង្ហាញនូវក្តីសោមនស្សរីករាយ ដែល AmCham ទទួលបានសេចក្តីទុកចិត្ត ក្នុងការរៀបចំពិធីទទួលទានអាហារពេលព្រឹកធុរកិច្ចលើកទី២ ដែលនេះជាវេទិកាដ៏សំខាន់ ក្នុងការបង្កើនការសន្ទនាដោយត្រង់ទៅត្រង់មក និងជិតស្និទ្ធ រវាងថ្នាក់ដឹកនាំស្ថាប័នរដ្ឋ និងតំណាងវិស័យឯកជន។ តាមរយៈការត្រៀមរៀបចំនេះ ក្រុមប្រឹក្សាអភិវឌ្ឍន៍កម្ពុជា និងសភាពាណិជ្ជកម្មអាម៉េរិកប្រចាំនៅកម្ពុជារំពឹងថា នឹងបន្តដើរតួ ជាកាតាលីករដ៏សំខាន់មួយ ក្នុងការលើកកម្ពស់បរិយាកាសវិនិយោគនៅកម្ពុជា ឱ្យកាន់តែមានភាពបត់បែន និងបង្កភាពងាយស្រួល ដល់ប្រតិបត្តិការវិនិយោគិនពីវិស័យឯកជន។ បញ្ហានេះដែរ ភាគីទាំងពីរបានប្តេជ្ញាចិត្តរួមគ្នា ក្នុងការរៀបចំកម្មវិធីនេះ ឱ្យទទួលបានលទ្ធផលជាផ្លែផ្កា សំដៅបន្តពង្រឹងភាពជាដៃគូយុទ្ធសាស្ត្ររវាងរដ្ឋនិងឯកជនឱ្យកាន់តែរឹងមាំ ក្នុងន័យរួមចំណែកដល់ការអភិវឌ្ឍ សេដ្ឋកិច្ច-សង្គមកម្ពុជា ឱ្យកាន់តែរីកចម្រើនប្រកបដោយចីរភាព និងបរិយាបន្ន៕ អត្ថបទ៖ សុន រ៉ាឌី

បណ្ដាញសង្គម

ព័ត៌មានថ្មីៗ

ពលរដ្ឋលីបង់ជម្លៀសខ្លួន ព្រួយបារម្ភពីការកើនឡើងភាពតានតឹងជាមួយអ៊ីស្រាអែល

ពលរដ្ឋអ៊ីរ៉ង់មិនទុកចិត្តបទឈប់បាញ់ ខណៈអាមេរិកថា កិច្ចព្រមព្រៀងត្រូវការពេលប៉ុន្មានថ្ងៃទៀត

ពលរដ្ឋអ៊ុយក្រែននៅទីក្រុងគីវនិយាយថា ការព្រមានវាយប្រហារជាប្រព័ន្ធរបស់រុស្ស៊ី គ្មានអ្វីថ្មីនោះទេ

អ៊ីរ៉ង់ទាមទារឲ្យបញ្ចេញទ្រព្យបង្កក ១២ពាន់លានដុល្លារ ក្នុងកិច្ចព្រមព្រៀងដែលអាចមានជាមួយអាមេរិក

ជប៉ុនគ្រោងដាក់ចេញថវិកា ១៩ពាន់លានដុល្លារបន្ថែមទៀត ខណៈវិបត្តិថាមពលអ៊ីរ៉ង់ បង្កការគំរាមកំហែង

អ្នករួចជីវិត និងមន្ត្រី៖ ការវាយប្រហារដោយយានដ្រូន សម្លាប់មនុស្សយ៉ាងតិច ១៤នាក់ នៅក្រុងព្រំដែនរបស់ស៊ូដង់

ក្រសួងការបរទេសអ៊ីរ៉ង់ ប្រកាសថា សហរដ្ឋអាមេរិកបានរំលោភបទឈប់បាញ់

អង់គ្លេសបំបែកកំណត់ត្រាថ្ងៃក្តៅបំផុតប្រចាំខែឧសភាពេលដែលសីតុណ្ហភាពកើនឡើងដល់ ៣៣,៥អង្សាសេ

គម្រោងរួមគ្នារបស់ស្ថានទូតជប៉ុនប្រចាំកម្ពុជា និងកម្មវិធីអភិវឌ្ឍន៍សហប្រជាជាតិ UNDP ផ្តល់ធុងសំរាមបន្ថែមចំនួន ៣ ០០០ធុង ដល់ក្រសួងបរិស្ថាន ដើម្បីគាំទ្រភាពស្អាតនៅកម្ពុជា

ហ្គាណាជម្លៀសពលរដ្ឋចេញ ខណៈបាតុកម្មប្រឆាំងអន្តោប្រវេសន៍នៅអាហ្វ្រិកខាងត្បូង

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

សេដ្ឋកិច្ច និង កសិកម្ម

ស្មារតីគាំទ្រទំនិញក្នុងស្រុករបស់ពលរដ្ឋនាំឱ្យការផលិតមានការកើនឡើងទ្វេដង ដើម្បីបំពេញតម្រូវការទីផ្សារ

រដ្ឋមន្ត្រីក្រសួងរ៉ែ៖ រាជរដ្ឋាភិបាលកំពុងតាមដាន និងពិនិត្យលទ្ធភាពការអនុវត្តពន្ធជួយលើការធ្វើពាណិជ្ជកម្ម

មន្រ្តីជាន់ខ្ពស់ក្រសួងសេដ្ឋកិច្ច ចាត់ទុកធនធានផ្នែកគណនេយ្យ ជាកាតាលីករជួយរុញកំណើនសេដ្ឋកិច្ច

ភ្ញៀវទេសចរបរទេសចាប់អារម្មណ៍ប្រើប្រាស់ Bakong Tourist ដើម្បីទូទាត់តាមប្រព័ន្ធឌីជីថលនៅកម្ពុជា

អគ្គនាយកដ្ឋានពន្ធដារបានកំណត់នូវទិសដៅកែទម្រង់សំខាន់ៗពីរ គឺការកែទម្រង់គោលនយោបាយ និងរដ្ឋបាលសារពើពន្ធ

ការប្រមូលចំណូលពន្ធដារបានកើនពី ៧៣៨ ដល់ ៣ ៥៧៧ លានដុល្លារអាមេរិក ក្នុងរយៈពេល១៣ឆ្នាំចុងក្រោយ

អ្នកជំនាញ៖ ការជំរុញអភិវឌ្ឍកំពង់ផែ នឹងលើកកម្ពស់ការធ្វើពាណិជ្ជកម្ម នឹងឈានទៅសម្រេចឆ្នាំ២០៣០

ជប៉ុនស្រូបយកទំនិញកម្ពុជា មានទឹកជាង ៦១៤ លានដុល្លារ ឈក្នុងលំដាប់ទី៣ នៃការនាំចេញទំនិញកម្ពុជា

ប្រធានសមាគម៖ រយៈពេលជាង ៤ខែដើមនេះវិស័យដឹកជញ្ជូនកម្ពុជាមានស្ថានភាពល្អទោះតម្លៃប្រេងខ្ពស់ក៏ដោយ

មន្រ្តីជាន់ខ្ពស់ CDC និង AmCham ប្តេជ្ញាបន្តពង្រឹងភាពជាដៃគូយុទ្ធសាស្ត្រឱ្យកាន់តែរឹងមាំ

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

សេដ្ឋកិច្ច និង កសិកម្ម

មន្រ្តីជាន់ខ្ពស់ក្រសួងសេដ្ឋកិច្ច ចាត់ទុកធនធានផ្នែកគណនេយ្យ ជាកាតាលីករ​ជួយរុញ​កំណើន​សេដ្ឋកិច្ច

ភ្ញៀវទេសចរបរទេសចាប់អារម្មណ៍ប្រើប្រាស់ Bakong Tourist ដើម្បី​ទូទាត់តាមប្រព័ន្ធ​ឌីជីថល​នៅកម្ពុជា

អគ្គនាយកដ្ឋានពន្ធដារបានកំណត់នូវទិសដៅកែទម្រង់សំខាន់ៗពីរ គឺការកែទម្រង់​គោល​នយោបាយ ​និងរដ្ឋបាលសារពើពន្ធ

ការប្រមូលចំណូលពន្ធដារបានកើនពី ៧៣៨ ដល់ ៣ ៥៧៧ លានដុល្លារអាមេរិក ក្នុង​រយៈពេល​១៣​ឆ្នាំ​ចុងក្រោយ

អ្នកជំនាញ៖ ការជំរុញអភិវឌ្ឍកំពង់ផែ នឹងលើកកម្ពស់ការធ្វើពាណិជ្ជកម្ម នឹងឈាន​ទៅ​សម្រេច​ឆ្នាំ​២០៣០

ជប៉ុនស្រូបយកទំនិញកម្ពុជា មានទឹកជាង ៦១៤ លានដុល្លារ ឈក្នុងលំដាប់ទី៣ នៃ​ការ​នាំ​ចេញ​ទំនិញក​ម្ពុជា

ប្រធានសមាគម៖ រយៈពេលជាង ៤ខែដើមនេះវិស័យដឹកជញ្ជូនកម្ពុជា​មានស្ថានភាព​ល្អ​ទោះ​តម្លៃ​ប្រេង​ខ្ពស់​ក៏​ដោយ

មន្រ្តីជាន់ខ្ពស់ CDC និង AmCham ប្តេជ្ញាបន្តពង្រឹងភាពជាដៃគូយុទ្ធសាស្ត្រឱ្យកាន់តែរឹងមាំ

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

មន្រ្តីជាន់ខ្ពស់ក្រសួងសេដ្ឋកិច្ច ចាត់ទុកធនធានផ្នែកគណនេយ្យ ជាកាតាលីករជួយរុញកំណើនសេដ្ឋកិច្ច

ភ្ញៀវទេសចរបរទេសចាប់អារម្មណ៍ប្រើប្រាស់ Bakong Tourist ដើម្បីទូទាត់តាមប្រព័ន្ធឌីជីថលនៅកម្ពុជា

អគ្គនាយកដ្ឋានពន្ធដារបានកំណត់នូវទិសដៅកែទម្រង់សំខាន់ៗពីរ គឺការកែទម្រង់គោលនយោបាយ និងរដ្ឋបាលសារពើពន្ធ

ការប្រមូលចំណូលពន្ធដារបានកើនពី ៧៣៨ ដល់ ៣ ៥៧៧ លានដុល្លារអាមេរិក ក្នុងរយៈពេល១៣ឆ្នាំចុងក្រោយ

អ្នកជំនាញ៖ ការជំរុញអភិវឌ្ឍកំពង់ផែ នឹងលើកកម្ពស់ការធ្វើពាណិជ្ជកម្ម នឹងឈានទៅសម្រេចឆ្នាំ២០៣០

ជប៉ុនស្រូបយកទំនិញកម្ពុជា មានទឹកជាង ៦១៤ លានដុល្លារ ឈក្នុងលំដាប់ទី៣ នៃការនាំចេញទំនិញកម្ពុជា

ប្រធានសមាគម៖ រយៈពេលជាង ៤ខែដើមនេះវិស័យដឹកជញ្ជូនកម្ពុជាមានស្ថានភាពល្អទោះតម្លៃប្រេងខ្ពស់ក៏ដោយ