BTV NEWS

ករណីនាំសាច់បង្កកមកពីថៃជាង២០០តោន : តំណាងអយ្យការចោទប្រកាន់ជនសង្ស័យ ២នាក់

សំណុំរឿងសាច់បង្កកជាង ២០០តោន នាំមកពីថៃចូលដល់ដៃតុលាការហើយ

អាជ្ញាធររាជធានីភ្នំពេញបន្តត្រួតពិនិត្យតាមទីតាំងប្រមូលផ្ដុំក្នុងគោលដៅប្រតិបត្តិការបោសសម្អាតទីតាំងសង្ស័យប្រព្រឹត្តបទល្មើស

សមត្ថកិច្ចរាជធានីភ្នំពេញ បន្តត្រួតពិនិត្យទីតាំងស្នាក់នៅប្រមូលផ្ដុំ ដើម្បីស្វែងរក និងបោសសម្អាតបទល្មើស Online Scams

សន្តិសុខ និង សង្គម

ក្រុមអ្នកជួយសង្គ្រោះបោសសម្អាតគំនរបាក់បែក ក្នុងសាលប្រគុំតន្ត្រី នៅក្រុងមូស្គូ បន្ទាប់ពីមានការវាយប្រហារ

ក្រុមអ្នកជួយសង្គ្រោះ បានបន្តប្រតិបត្តិការបោសសម្អាតគំនរបាក់បែក និងស្វែងរកសាកសព ក្នុងសាលប្រគុំតន្ត្រី នៅទីក្រុងមូស្គូ នាថ្ងៃសៅរ៍ (ទី២៣ ខែមីនា) នេះ បន្ទាប់ពីមានការវាយប្រហារ ដែលបណ្ដាលឲ្យមានអ្នកស្លាប់ច្រើនបំផុត។ដោយដកស្រង់ទិន្នន័យបឋម គណៈកម្មាធិការស៊ើបអង្កេតរបស់រុស្ស៊ី បានឲ្យដឹងនៅថ្ងៃសៅរ៍នេះថា យ៉ាងហោចណាស់មនុស្ស ៩៣នាក់ត្រូវបានសម្លាប់ និងរាប់រយនាក់រងរបួស នៅក្នុងការវាយប្រហារមួយ កាលពីថ្ងៃសុក្រ (ទី២២ ខែមីនា) នៅជិតទីក្រុងម៉ូស្គូ ហើយបានព្រមានថា ចំនួនជនរងគ្រោះត្រូវបានរំពឹងថា នឹងកើនឡើងបន្ថែមទៀត។គួរបញ្ជាក់ថា ខ្មាន់កាំភ្លើងក្នុងសម្លៀកបំពាក់បន្លំខ្លួន បានបើកការបាញ់ប្រហារដោយអាវុធស្វ័យប្រវត្តិលើអ្នកទៅមើលការប្រគុំតន្ត្រីក្បែរទីក្រុងមូស្គូ កាលពីថ្ងៃសុក្រ ជាហេតុការណ៍វាយប្រហារមួយដែលត្រូវបានពួកសកម្មប្រយុទ្ធរដ្ឋអ៊ីស្លាមអះអាងថា ជាស្នាដៃរបស់ខ្លួន៕

សហរដ្ឋអាមេរិក៖ ខ្លួនបានអនុវត្តការវាយប្រហារស្វ័យការពារប្រឆាំងនឹងមូលដ្ឋានរបស់ក្រុមហ៊ួទី

ទីបញ្ជាការកណ្តាលរបស់សហរដ្ឋអាមេរិក (CENTCOM) កាលពីថ្ងៃសុក្រ (ទី២២ ខែមីនា) បាននិយាយថា កងកម្លាំងសហរដ្ឋអាមេរិកបានអនុវត្តការវាយប្រហារស្វ័យការពារប្រឆាំងនឹងកន្លែងស្តុកអាវុធក្រោមដីរបស់ក្រុមហ៊ួទីចំនួន ៣កន្លែង នៅក្នុងតំបន់ដែលគ្រប់គ្រងដោយក្រុមឧទ្ទាមរបស់ប្រទេសយេម៉ែនមួយនេះ។ការវាយប្រហារនោះបានកំណត់គោលដៅលើសមត្ថភាពដែលត្រូវបានប្រើប្រាស់ដោយក្រុមហ៊ួទី ដើម្បីគំរាមកំហែង និងវាយប្រហារលើនាវាកងទ័ពជើងទឹក និងនាវាពាណិជ្ជកម្មនៅក្នុងតំបន់។ នេះបើតាមសេចក្តីថ្លែងការណ៍មួយ ដែលបង្ហោះនៅលើបណ្ដាញសង្គម X។ជាមួយគ្នានេះ CENTCOM ក៏បានឲ្យផងដែរថា នៅក្នុងការវាយប្រហារស្វ័យការពារនេះ កងកម្លាំងរបស់ខ្លួនបានបំផ្លាញយានដ្រូន (UAV) ចំនួន ៤គ្រឿង ក្នុងតំបន់ដែលគ្រប់គ្រងដោយក្រុមហ៊ួទីរបស់ប្រទេសយេម៉ែននេះ។គួរបញ្ជាក់ដែរថា ក្រុមហ៊ួទីបានធ្វើការវាយប្រហារនៅក្នុងតំបន់សមុទ្រក្រហម ដោយក្រុមសកម្មប្រយុទ្ធមានសម្ព័ន្ធភាពជាមួយអ៊ីរ៉ង់មួយនេះ និយាយថា ជាសាមគ្គីភាពជាមួយប៉ាឡេស្ទីននៅតំបន់ហ្កាហ្សា ហើយការវាយប្រហារនេះ បានរំខានដល់ការដឹកជញ្ជូនទូទាំងពិភពលោក ដែលធ្វើឲ្យក្រុមហ៊ុនត្រូវចំណាយពេលយូរ និងថ្លៃជាងមុន ដោយសារប្ដូរផ្លូវធ្វើដំណើរទៅជុំវិញអាហ្វ្រិកខាងត្បូង។CENTCOM បាបបន្ថែមទៀតថា អំឡុងពេលនៃការវាយប្រហាររបស់សហរដ្ឋអាមេរិកលើយានដ្រូននោះ ក្រុមសកម្មប្រយុទ្ធហ៊ួទី បានបាញ់មីស៊ីលប្រឆាំងនាវាចំនួន ៤គ្រាប់ចេញពីតំបន់ដែលពួគគេគ្រប់គ្រងឆ្ពោះទៅកាន់សមុទ្រក្រហម ប៉ុន្តែការបាញ់ប្រហារនោះមិនបណ្ដាលឲ្យមានការរងរបួស ឬការខូចខាតអ្វីឡើយ៕

ហ្វីលីពីនចោទប្រកាន់ចិនពីការវាយប្រហារដោយកាណុងបាញ់ទឹកលើនាវាផ្គត់ផ្គង់

ប្រទេសហ្វីលីពីនបានចោទប្រកាន់ឆ្មាំសមុទ្រចិនថា បានរារាំងនាវាផ្គត់ផ្គង់ហ្វីលីពីន និងបង្កការខូចខាតដល់នាវានេះ ដោយប្រើកាណុងបាញ់ទឹក នៅព្រឹកថ្ងៃសៅរ៍ (ទី២៣ ខែមីនា) នេះ នៅម្ដុំតំបន់ថ្មប៉ប្រះទឹកដាច់ស្រយាល និងមានជម្លោះ ក្នុងសមុទ្រចិនខាងត្បូង។យោធាហ្វីលីពីនបានឲ្យដឹងថា ការវាយប្រហាររយៈពេលជិត ១ម៉ោង បានកើតឡើងនៅតំបន់ថ្មប៉ប្រះទឹក Second Thomas Shoal ជាកន្លែងដែលនាវារបស់ចិនបានប្រើកាណុងបាញ់ទឹក ហើយបានបុកជាមួយនាវាហ្វីលីពីន ដែលជាហេតុការណ៍ប្រឈមមុខដាក់គ្នាដដែលៗ ក្នុងប៉ុន្មានខែថ្មីៗនេះ។យោធាបានបញ្ចេញឃ្លីបវីដេអូ ដែលបង្ហាញពីនាវាពណ៌ស ម្តងហើយម្តងទៀត បានបាញ់ទឹកដោយប្រើកាណុងបាញ់ទឹកដាក់នាវាមួយផ្សេងទៀត ដែលបើកក្បែរគ្នានោះ។ ចំណែកឃ្លីបវីដេអូមួយទៀតបានបង្ហាញពីនាវាពណ៌ស ២គ្រឿង បាញ់ទឹកក្នុងពេលដំណាលគ្នាដាក់នាវាតែមួយ។បន្ថែមពីលើនោះ យោធាក៏បានចេញផ្សាយឃ្លីបមួយទៀតដែលបង្ហាញពីនាវាពណ៌សដែលមានអក្សរ «ឆ្មាំសមុទ្រចិន» បើកកាត់នាវាពណ៌ប្រផេះដែលត្រូវបានកំណត់អត្តសញ្ញាណថា ជាទូកផ្គត់ផ្គង់ហ្វីលីពីនឈ្មោះ Unaizah May 4 (UM4)។ដោយមិនបានពិពណ៌នាអំពីកម្រិតនៃការខូចខាត ឬថា តើមានអ្នករបួស ឬស្លាប់ដែរ ឬអត់នោះ យោធាបានឲ្យដឹងនៅក្នុងសេចក្តីថ្លែងការណ៍មួយថា៖ «ទូកផ្គត់ផ្គង់ UM4 បានរងការខូចខាតយ៉ាងធ្ងន់ធ្ងរនៅម៉ោងប្រហែល ៨:៥២ព្រឹក (ថ្ងៃសៅរ៍ ទី២៣ ខែមីនា) ដោយសារតែការបន្តប្រើកាណុងបាញ់ទឹកពីនាវាឆ្មាំសមុទ្រចិន»។អ្នកនាំពាក្យឆ្មាំសមុទ្រចិន លោក Gan Yu បាននិយាយនៅក្នុងសេចក្តីថ្លែងការណ៍មួយថា ក្បួននាវាហ្វីលីពីន «បានឈ្លានពានចូលក្នុងតំបន់នេះ បើទោះបីជាភាគីចិនបានព្រមានម្តងហើយម្តងទៀត និងការគ្រប់គ្រងផ្លូវក៏ដោយ« ដោយលោកបន្ថែមថា ចិនបានអនុវត្ត «ការគ្រប់គ្រង ការរារាំង និងការបណ្តេញចេញស្របតាមច្បាប់»៕

ប្រតិកម្មរបស់ពិភពលោកចំពោះការវាយប្រហារសាលប្រគុំតន្ត្រី Crocus នៅទីក្រុងមូស្គូ

យ៉ាងហោចណាស់មនុស្ស ៦០នាក់ បានស្លាប់ និង ១៤៥នាក់បានរងរបួស បន្ទាប់ពីខ្មាន់កាំភ្លើងបានបើកការបាញ់ប្រហារទៅលើអ្នកទៅមើលការប្រគុំតន្ត្រី នៅទីក្រុងមូស្គូ និងបានបំផ្ទុះគ្រឿងផ្ទុះ ដែលបានធ្វើឲ្យមានអគ្គិភ័យយ៉ាងធំ នៅក្នុងការវាយប្រហារបណ្ដាលឲ្យមានអ្នកស្លាប់យ៉ាងច្រើនបំផុតមួយ នៅប្រទេសរុស្ស៊ី ក្នុងរយៈពេលជាច្រើនទសវត្សរ៍។ប្រទេសរុស្ស៊ីកំពុងស៊ើបអង្កេតថា តើអ្នកណានៅពីក្រោយការវាយប្រហារ នៅកន្លែងប្រគុំតន្ត្រី Crocus ដែលបានកើតឡើងក្នុងខណៈដែលហ្វូងមនុស្សកំពុងអង្គុយដើម្បីមើលការប្រគុំតន្ត្រីរបស់ក្រុមតន្រ្តីរ៉ុកជើងចាស់ Picnic កាលពីថ្ងៃសុក្រ (ទី២២ ខែមីនា)។ ក្រុមជ្រុលនិយម ISIL (ISIS) បានអះអាងទទួលខុសត្រូវចំពោះការវាយប្រហារនេះ ដែលត្រូវបានថ្កោលទោសដោយមេដឹកនាំពីជុំវិញពិភពលោក។អ្នកនាំពាក្យរបស់អង្គការសហប្រជាជាតិ (UN) លោក Farhan Haq បានលើកឡើងនៅក្នុងសេចក្តីថ្លែងការណ៍មួយថា លោក Antonio Guterres «ថ្កោលទោសយ៉ាងខ្លាំងក្លាបំផុតចំពោះការវាយប្រហារភេរវកម្មថ្ងៃនេះ នៅឯសាលប្រគុំតន្ត្រី នៅខាងក្រៅទីក្រុងមូស្គូ ហើយលោកបន្ថែមថា លោកអគ្គលេខាធិការអង្គការសហប្រជាជាតិ «សូមចូលរួមរំលែកទុក្ខទៅកាន់ក្រុមគ្រួសារនៃសព និងប្រជាជន និងរដ្ឋាភិបាលនៃសហព័ន្ធរុស្ស៊ី»។ចំណែកក្រុមប្រឹក្សាសន្តិសុខ UN ក្រៅពីថ្កោលទោស ក៏បានគូសបញ្ជាក់ពីភាពចាំបាច់ក្នុងការធ្វើយ៉ាងណាត្រូវចាប់ខ្លួន និងនាំទៅកាត់ទោស ទាំងជនល្មើស អ្នករៀបចំ អ្នកផ្តល់ហិរញ្ញប្បទាន និងអ្នកឧបត្ថម្ភនៃអំពើភេរវកម្មដ៏គួរឲ្យស្អប់ខ្ពើមនេះ។ ក្រៅពីស្ថាប័នកំពូលរបស់ពិភពលោកទាំង២ នេះ បណ្ដាមេដឹកនាំជាច្រើនរូបផ្សេងទៀត ក៏បានចូលរួមថ្កោលទោស និងចូលរួមរំលែកទុក្ខផងដែរ ដែលមានដូចជាអ្នកនាំពាក្យក្រសួងការបរទេសអាហ្វហ្គានីស្ថានលោក Abdul Qahar Balkhi ប្រធានាធិបតីគុយបាលោក Miguel Diaz-Canel ប្រធានាធិបតីបារាំងលោក French President Emmanuel Macron នាយករដ្ឋមន្ត្រីអ៊ីតាលីលោកស្រី Giorgia Meloniនាយករដ្ឋមន្ត្រីឥណ្ឌាលោក Narendra Modi អ្នកនាំពាក្យសេតវិមានលោក John Kirby រដ្ឋមន្ត្រីការបរទេសវេណេហ៊្សុយអេឡាលោក Yvan Gil ក្រសួងការបទេសអាល្លឺម៉ង់ និងក្រសួងការបរទេសជប៉ុនជាដើម៕

ព្រះនាង Kate នៃដែនដីវ៉េល បង្ហាញពីការពិនិត្យរោគសញ្ញាមានជំងឺមហារីក

ព្រះនាង Catherine Middleton ជាព្រះនាងរបស់ដែនដីវ៉េល របស់ចក្រភពអង់គ្លេស កាលពីថ្ងៃសុក្រ បានប្រកាសថាព្រះនាងមានជំងឺមហារីក ហើយកំពុងស្ថិតក្នុងដំណាក់កាលដំបូងនៃការព្យាបាល ដោយស្នើសុំ ពេលវេលាសម្រាក និងឯកជនភាព ខណៈព្រះនាងត្រូវបំពេញការព្យាបាល។ព្រះនាង Kate ដែលត្រូវបានគេស្គាល់ជាទូទៅ បានមានបន្ទូលថា ការរកឃើញជំងឺមហារីក បន្ទាប់ពីការវះកាត់ពោះវៀនដោយជោគជ័យកាលពីខែមករា គឺជាការភ្ញាក់ផ្អើលយ៉ាងខ្លាំង ប៉ុន្តែព្រះនាង មានសុខភាពល្អនិងរឹងមាំ ជារៀងរាល់ថ្ងៃ។ព្រះនាងមានព្រះជន្ម ៤២ ព្រះវស្សា មិនបានបង្ហាញពីលក្ខណៈពិតប្រាកដនៃជំងឺមហារីកនោះទេ ប៉ុន្តែបានពណ៌នារយៈពេលប៉ុន្មានខែចុងក្រោយនេះ ចាប់តាំងពីព្រះនាងបានចូលមន្ទីរពេទ្យថា ពិបាកមិនគួរឱ្យជឿ សម្រាប់ព្រះនាង និងគ្រួសាររបស់ព្រះនាង។ព្រះនាង បានមានបន្ទូលនៅក្នុងសេចក្តីថ្លែងការណ៍តាមវីដេអូ ដែលថតកាលពីថ្ងៃពុធថា នៅក្នុងខែមករា ព្រះនាងបានធ្វើការវះកាត់ពោះវៀននៅទីក្រុងឡុងដ៍្រ ហើយនៅពេលនោះ វាត្រូវបានគេគិតថា ស្ថានភាពរបស់ព្រះនាងមិនមែនជាជំងឺមហារីកទេ។ការវះកាត់បានទទួលជោគជ័យ។ ទោះបីជាយ៉ាងណា ការធ្វើតេស្តបន្ទាប់ពីការវះកាត់បានរកឃើញថាមានជំងឺមហារីក។

សង្គ្រាមក្រុមជនអន្ធពាលនៅហៃទី ជំរុញឱ្យមានភាពអត់ឃ្លានដល់កម្រិតអាក្រក់បំផុតក្នុងកំណត់ត្រា

អង្គការអន្តរជាតិបាននិយាយកាលពីថ្ងៃសុក្រថា ជិតពាក់កណ្តាលនៃប្រជាជននៅប្រទេសហៃទី កំពុងជួបការលំបាកក្នុងជីវិតរស់នៅរបស់ពួកគេ ខណៈអំពើហឹង្សារបស់ក្រុមជនអន្ធពាល បានរាលដាលពាសពេញប្រទេស ដោយតំបន់ជាច្រើនស្ថិតលើមាត់ជ្រោះនៃគ្រោះទុរ្ភិក្ស។ ពួកគេនិយាយថា អតិផរណា និងការប្រមូលផលបានតិច បានជួយជំរុញប្រទេសហៃទី ធ្លាក់ចូលក្នុងកម្រិតអសន្តិសុខស្បៀងធ្ងន់ធ្ងរបំផុតក្នុងកំណត់ត្រា។លោក Jean-Martin Bauer នាយកកម្មវិធីស្បៀងអាហារពិភពលោកប្រចាំប្រទេសហៃទី បាននិយាយថា ការកើនឡើងនៃភាពអត់ឃ្លានកំពុងបញ្ឆេះវិបត្តិសន្តិសុខដែលកំពុងធ្វើឱ្យប្រទេសនេះរង្គោះរង្គើ។ យើង ត្រូវការវិធានការបន្ទាន់នៅពេលនេះ ដែលកំពុងរង់ចាំការឆ្លើយតបក្នុងកម្រិតពុំមែនជាជម្រើស។ការបែងចែងដំណាក់កាលសន្តិសុខស្បៀងដែលរួមបញ្ចូលគ្នា អង្គការមួយដែលកំណត់ទំហំត្រូវបានប្រើប្រាស់ដោយអង្គការសហប្រជាជាតិ និងរដ្ឋាភិបាលនានា ដើម្បីវាយតម្លៃភាពអត់ឃ្លាន បាននិយាយនៅក្នុងរបាយការណ៍ថា ប្រជាជនប្រហែល ៤,៩៧ លាននាក់ក្នុងចំណោមប្រជាជនប្រហែល ១១,៥ លាននាក់ កំពុងប្រឈមនឹងវិបត្តិ ឬកម្រិតកាន់តែធ្ងន់ធ្ងរនៃអសន្តិសុខស្បៀង។ប្រទេសតំបន់សមុទ្រការ៉ាអ៊ីបមួយនេះ បានធ្លាក់ចូលក្នុងអំពើហឹង្សា ចាប់តាំងពីក្រុមជនអន្ធពាលជាគូប្រជែង បានបើកការវាយប្រហារជាបន្តបន្ទាប់ក្នុងខែនេះ រួមទាំងការវាយឆ្មក់លើប៉ុស្តិ៍នគរបាល និងនៅអាកាសយានដ្ឋានអន្តរជាតិ។ ជម្លោះនេះ បានសម្លាប់មនុស្សរាប់ពាន់នាក់ និងរាប់សែននាក់ទៀតបានរត់ភៀសខ្លួន។មេដឹកនាំតំបន់ កំពុងព្យាយាមបង្កើតក្រុមប្រឹក្សាអន្តរកាលមួយ ហើយនាយករដ្ឋមន្ត្រី លោក អារីយ៉ែល ហង់រី(Ariel Henry) បានសន្យាថា នឹងលាលែងពីតំណែងនៅពេលដែលក្រុមប្រឹក្សាត្រូវបានបង្កើតឡើង។ អង្គការកម្មវិធីស្បៀងអាហារពិភពលោក (WFP) បាននិយាយថា ប្រទេសហៃទីបច្ចុប្បន្ននេះ កំពុងទទួលរងនូវកម្រិតអសន្តិសុខស្បៀងធ្ងន់ធ្ងរបំផុតរបស់ខ្លួនក្នុងកំណត់ត្រា។

រុស្ស៊ី និងចិន ប្រើសិទ្ធវ៉េតូ សេចក្តីសម្រេចរបស់UN ដឹកនាំដោយសហរដ្ឋអាមេរិក ស្តីពីបទឈប់បាញ់នៅហ្កាហ្សា

ក្រុមប្រឹក្សាសន្តិសុខអង្គការសហប្រជាជាតិ កាលពីថ្ងៃសុក្របានបដិសេធសេចក្តីសម្រេចដឹកនាំដោយសហរដ្ឋអាមេរិក ដែលអំពាវនាវឱ្យមានបទឈប់បាញ់នៅតំបន់ហ្កាហ្សា និងកិច្ចព្រមព្រៀងចំណាប់ថ្នូររវាងអ៊ីស្រាអែល-ក្រុមហាម៉ាស បន្ទាប់ពីរុស្ស៊ី និងចិន បានប្រើសិទ្ធវ៉េតូចំពោះវិធានការនេះ ជាចំណាត់ការមួយដែលអ្នកនាំពាក្យសេតវិមាន លោក John Kirby និយាយថាភ្ញាក់ផ្អើលខ្លាំង។ សេចក្តីសម្រេចនេះ អំពាវនាវឲ្យមានបទឈប់បាញ់ភ្លាមៗមានរយៈពេល៦សប្តាហ៍ ដែលនឹងការពារជនស៊ីវិល និងអនុញ្ញាតឲ្យមានការដឹកជញ្ជូនជំនួយមនុស្សធម៌។ ក្រុមប្រឹក្សាដែលមានសមាជិកចំនួន១១រូប ក្នុងចំណោមសមាជិកទាំង ១៥រូប បានបោះឆ្នោតគាំទ្រសេចក្តីសម្រេចនេះ។ ភាគច្រើននៃក្រុមប្រឹក្សា បានបោះឆ្នោតគាំទ្រសេចក្តីសម្រេច ប៉ុន្តែ រុស្ស៊ី និងចិនបានសម្រេចប្រើសិទ្ធិវ៉េតូរបស់ខ្លួន។ ឯកអគ្គរដ្ឋទូតសហរដ្ឋអាមេរិក លោកស្រី Linda Thomas-Greenfield បាននិយាយទៅកាន់ក្រុមប្រឹក្សាសន្តិសុខថា ប្រទេសទាំងពីរមានហេតុផលមើលឃើញតែភាពអាក្រក់ និងថាជារឿងតូចតាច ដោយនិយាយថា ពួកគេប្រឆាំងសេចក្តីសម្រេចជាធម្មតា ព្រោះត្រូវបានតាក់តែងដោយសហរដ្ឋអាមេរិក និងបានរិះគន់ប្រទេសទាំងពីរការមិនថ្កោលទោស ការវាយប្រហារកាលពីថ្ងៃទី៧ ខែតុលា របស់ក្រុមហាម៉ាស លើប្រទេសអ៊ីស្រាអែល។ឯកអគ្គរដ្ឋទូតរុស្ស៊ីលោក Vassily Nebenzia បាននិយាយថា សេចក្តីសម្រេចនេះ មានលក្ខណៈនយោបាយខ្លាំង ហើយមានភ្លើងខៀវដ៏មានប្រសិទ្ធភាពសម្រាប់អ៊ីស្រាអែល ដើម្បីធ្វើប្រតិបត្តិការយោធានៅទីក្រុងរ៉ាហ្វា ជាទីក្រុងមួយនៅភាគខាងត្បូងតំបន់ហ្កាហ្សា ដែលមានប្រជាជនប៉ាឡេស្ទីនជាងមួយលាននាក់ បានជ្រកកោននៅក្នុងតង់បណ្តោះអាសន្ន។ សហរដ្ឋអាមេរិក ចង់បានការគាំទ្រពីក្រុមប្រឹក្សាសន្តិសុខសម្រាប់បទឈប់បាញ់ដែលត្រូវបានផ្សារភ្ជាប់ទៅនឹងការដោះលែងចំណាប់ថ្នូរ ដែលចាប់ខ្លួននដោយក្រុមហាម៉ាសនៅក្នុងតំបន់ហ្កាហ្សា ដោយបានប្រើសិទ្ធវ៉េតូលើសេចក្តីសម្រេចបទឈប់បាញ់ចំនួនបីលើក ដែលបានដាក់ចេញដោយក្រុមប្រឹក្សា។ កាលពីថ្ងៃសុក្រ គឺជាលើកទីមួយហើយ ដែលទីក្រុងវ៉ាស៊ីនតោនបានគាំទ្រឯកសារ ដែលមានពាក្យថា« បទឈប់បាញ់» ដែលបង្ហាញពីភាពតឹងតែងនៃជំហររបស់រដ្ឋបាល លោក Biden ចំពោះប្រទេសអ៊ីស្រាអែល។ ក្រុមអ្នកការទូតនិយាយថា ក្រុមប្រឹក្សានឹងកោះប្រជុំឡើងវិញនៅព្រឹកថ្ងៃសៅរ៍នេះ ដើម្បីបោះឆ្នោតលើសេចក្តីសម្រេច ដែលព្រាងដោយសមាជិកជាប់ឆ្នោតរបស់ក្រុមប្រឹក្សាសន្តិសុខ។

កងទ័ព DPS របស់អាមេរិក បាញ់ជនអន្តោប្រវេសន៍នៅជិតព្រំដែនទីក្រុង El Paso

កងទ័ព DPS ដែលឈរជើងនៅផ្នែកម្ខាងនៃព្រំដែនសហរដ្ឋអាមេរិក ក្បែរទីក្រុង El Paso បានបាញ់គ្រាប់កាំភ្លើង ជាគ្រាប់ដែលមិនបង្កគ្រោះថ្នាក់អាយុជីវិត ទៅលើជនអន្តោប្រវេសន៍ កាលពីថ្ងៃសុក្រ ដែលព្យាយាមរុះរើរបងបន្លាលួស និងរបាំង ខណៈភាពតានតឹងកើនឡើង។តុលាការឧទ្ធរណ៍របស់សហរដ្ឋអាមេរិក កាលពីថ្ងៃពុធ បានចាប់ផ្តើមសវនាការលើថាតើត្រូវបន្តរារាំងច្បាប់រដ្ឋតិចសាស់ដែលគាំទ្រដោយគណបក្សសាធារណរដ្ឋឬយ៉ាងណា ដែលនឹងផ្តល់សិទ្ធអំណាចដល់អាជ្ញាធររដ្ឋដើម្បីចាប់ខ្លួន និងកាត់ទោសជនអន្តោប្រវេសន៍ ពីបទឆ្លងព្រំដែនអាមេរិក-ម៉ិកស៊ិក ដោយខុសច្បាប់ ។គណៈកម្មការចៅក្រមបីរូប នៃសាលាឧទ្ធរណ៍ទី ៥ ដែលមានមូលដ្ឋាននៅទីក្រុង New Orleans សហរដ្ឋអាមេរិក កំពុងពិចារណាលើបណ្តឹងឧទ្ធរណ៍របស់រដ្ឋ នៃសេចក្តីសម្រេចរបស់ចៅក្រមដែលបានបញ្ឈប់ច្បាប់នេះ ដែលត្រូវបានគេស្គាល់ថា SB4 ពីការចូលជាធរមាន ដោយរង់ចាំលទ្ធផលនៃការប្រជែងដោយរដ្ឋបាលប្រធានាធិបតីគណបក្សប្រជាធិបតេយ្យ លោក Joe Biden និងក្រុមសិទ្ធិមនុស្ស។ជម្លោះជុំវិញច្បាប់រដ្ឋតិចសាស់ គឺជាជម្លោះផ្លូវច្បាប់ជាបន្តបន្ទាប់រវាងមន្ត្រីរដ្ឋ គណបក្សសាធារណរដ្ឋ និងរដ្ឋបាលលោក Biden ជុំវិញសមត្ថភាពរបស់រដ្ឋក្នុងការការពារព្រំដែន។ មន្ត្រីរដ្ឋតិចសាស់ បានស្តីបន្ទោសលោក Biden ចំពោះលំហូរចូលនៅច្រកព្រំដែនខុសច្បាប់ដែលពួកគេបាននិយាយថា ធ្វើឲ្យបាត់បង់ធនធានរបស់រដ្ឋ និងគំរាមកំហែងដល់សុវត្ថិភាពសាធារណៈ។

រុស្ស៊ីវាយប្រហារមជ្ឈមណ្ឌលទីបញ្ជាការអ៊ុយក្រែន ខណៈអ៊ុយក្រែនវាយប្រហារប្រព័ន្ធការពារដែនអាកាសរុស្ស៊ី

រុស្ស៊ី បានអះអាងថា បានវាយប្រហារទៅលើមជ្ឈមណ្ឌលទីបញ្ជាការយោធារបស់អ៊ុយក្រែន និងស្ទាក់ចាប់បានគ្រាប់រ៉ុក្កែតអ៊ុយក្រែនជាច្រើនគ្រាប់ និងយានដ្រូនជាច្រើនគ្រឿង ខណៈអ៊ុយក្រែន បាននិយាយនៅថ្ងៃតែមួយនេះថា ខ្លួនបានវាយប្រហារប្រព័ន្ធមីស៊ីលការពារដែនអាកាសរបស់រុស្ស៊ី និងទីតាំងយោធាផ្សេងទៀត។ ក្រសួងការពារជាតិរុស្ស៊ី បានរាយការណ៍កាលពីថ្ងៃព្រហស្បតិ៍ថា កងកម្លាំងរុស្ស៊ី បានវាយរុញច្រានការវាយលុករបស់អ៊ុយក្រែននៅក្រុង Kupyansk, Donetsk, Avdiivka និងគោលដៅផ្សេងទៀត ហើយបានបើកការវាយប្រហារលើមជ្ឈមណ្ឌលទីបញ្ជាការយោធាអ៊ុយក្រែន មូលដ្ឋានផ្គត់ផ្គង់ដឹកជញ្ជូន និងទីតាំងដាក់ពង្រាយសម្ភារៈផ្គត់ផ្គង់បណ្តោះអាសន្ន។យោងតាមក្រសួងការពារជាតិរបស់ប្រទេសនេះបានឲ្យដឹងថា រុស្ស៊ី បានរាយការណ៍ពីការរឹបអូសបានស្ថានីយ៍រថភ្លើងមួយក្នុងតំបន់ Donetsk និងភូមិមួយទៀត នៅជិតទីក្រុង Avdiivka ។ កាលពីថ្ងៃព្រហស្បតិ៍ អធិការបតីអាល្លឺម៉ង់ លោក Olaf Scholz បានស្នើថា បណ្តាប្រទេសសហភាពអឺរ៉ុប គួរតែប្រើប្រាស់ចំណូលការប្រាក់ពីទ្រព្យសម្បត្តិរបស់រុស្ស៊ីដែលត្រូវបានបង្កក ដើម្បីផ្តល់ជំនួយយោធាដល់អ៊ុយក្រែន។ លោក Josep Borrell ប្រធានគោលនយោបាយការបរទេសរបស់សហភាពអឺរ៉ុប ក៏បានស្នើឱ្យប្រើប្រាស់ ៩០ ភាគរយនៃមូលនិធិទាំងនេះ សម្រាប់គោលបំណងដូចគ្នានេះដែរ។បន្ទាប់ពីសំណើរបស់ លោក Borrell អ្នកនាំពាក្យវិមានក្រឹមឡាំង លោក Dmitry Peskov បានព្រមានកាលពីថ្ងៃព្រហស្បតិ៍ថា រុស្ស៊ីនឹងប្រើប្រាស់យន្តការផ្លូវច្បាប់ដែលមានទាំងអស់ ហើយនឹងសងសឹក ប្រសិនបើសហភាពអឺរ៉ុប មានចំណាត់ការឈានទៅរកផែនការប្រើប្រាស់ចំណូលការប្រាក់ពីទ្រព្យសម្បត្តិរបស់រុស្ស៊ីដែលបានបង្កកដើម្បីផ្តល់អាវុធដល់ប្រទេសអ៊ុយក្រែន។

បសុសត្វជិត៥លានក្បាលបានងាប់នៅក្នុងរដូវរងាធ្ងន់ធ្ងរបំផុត ក្នុងរយៈពេលកន្លះសតវត្សរ៍របស់ ម៉ុងហ្គោលី

សហព័ន្ធអន្តរជាតិកាកបាទក្រហម ហៅកាត់ថា IFRC បានព្រមានថា ប្រទេសម៉ុងហ្គោលី កំពុងជួបប្រទះសីតុណ្ហភាព ចុះត្រជាក់ខ្លាំងក្នុងរដូវរងាដ៏ធ្ងន់ធ្ងរបំផុតរបស់ខ្លួនក្នុងរយៈពេលកន្លះសតវត្សរ៍ ដោយបានសម្លាប់សត្វជាង ៤,៧ លានក្បាល និងគំរាមកំហែងដល់ជីវភាពរស់នៅ និងការផ្គត់ផ្គង់ស្បៀងអាហាររបស់មនុស្សរាប់ពាន់នាក់។ ស្ថានភាព ដែលគេស្គាល់ថាជាស្ថានភាពអាកាសធាតុធ្ងន់ធ្ងររដូវរងា ត្រូវបានកំណត់លក្ខណៈដោយសីតុណ្ហភាពធ្លាក់ចុះ និងព្រិលធ្លាក់ក្រាស់ៗ និងទឹកកក ដែលគ្របដណ្តប់តំបន់វាលស្មៅ និងកាត់ផ្តាច់លទ្ធភាពទទួលបានចំណីអាហារសម្រាប់បសុសត្វ។ ប្រជាជនម៉ុងហ្គោលីប្រហែល ៣សែន នាក់ គឺជាអ្នកចិញ្ចឹមសត្វតាមបែបប្រពៃណី ហើយពឹងផ្អែកលើគោ ក្របី ពពែ និងសេះ សម្រាប់ធ្វើជាអាហារ និងលក់នៅទីផ្សារ។ លោកអាឡិចសាន់ឌ័រ ម៉ាទីវ (Alexander Matheou) នាយកប្រចាំតំបន់របស់សហព័ន្ធអន្តរជាតិកាកបាទក្រហម ប្រចាំតំបន់អាស៊ីប៉ាស៊ីហ្វិក បានប្រាប់សារព័ត៌មាន CNN កាលពីថ្ងៃព្រហស្បតិ៍ថា សម្រាប់ប្រជាជនទាំងនោះដែលពឹងផ្អែកទាំងស្រុងលើសត្វចិញ្ចឹមរបស់ពួកគេដើម្បីរស់រានមានជីវិត ពួកគេបានក្លាយទៅជាទុរគតជនក្នុងរយៈពេលតែប៉ុន្មានខែប៉ុណ្ណោះ។ ឥឡូវនេះពួកគេមួយចំនួនលែងអាចចិញ្ចឹមខ្លួនឯងបាន ឬកំដៅផ្ទះរបស់ពួកគេបានទៀតហើយ។ យោងតាម IFRC បានឱ្យដឹងថា ចាប់តាំងពីខែវិច្ឆិកាមក យ៉ាងហោចណាស់ គ្រួសារអ្នកចិញ្ចឹមសត្វចំនួន២.២៥០ គ្រួសារ បានបាត់បង់សត្វចិញ្ចឹមរបស់ពួកគេច្រើនជាង ៧០% ។ អង្គការនេះបានបន្ថែមទៀតថា បច្ចុប្បន្ននេះមានមនុស្សជាង ៧ ពាន់គ្រួសារគ្មានអាហារទទួលទានគ្រប់គ្រាន់។ស្ថានភាពរដូវរងារដ៏ធ្ងន់ធ្ងរ បានប៉ះពាល់ដល់បីភាគបួននៃប្រទេសនេះ ប៉ុន្តែស្ថានភាពដ៏លំបាកនេះ ត្រូវបានគេរំពឹងថានឹងកាន់តែធ្ងន់ធ្ងរថែមទៀត ខណៈដែលរដូវរងានៅតែបន្ត៕

បណ្ដាញសង្គម

ព័ត៌មានថ្មីៗ

សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ចាត់តំណាងនាំយកទេយ្យវត្ថុ និងបច្ច័យ ថ្វាយប្រគេនសម្ដេចព្រះមហាសង្ឃរាជ នន្ទ ង៉ែត

ក្រសួងបរិស្ថានគាំទ្រសហគមន៍តំបន់ការពារធម្មជាតិនៅកម្ពុជា ចូលរួមការពារនិងអភិរក្សធនធានធម្មជាតិ និងលើកកម្ពស់ជីវភាពប្រជាពលរដ្ឋនៅតាមសហគមន៍

អ៊ីរ៉ង់៖ បុណ្យសពអតីតមេដឹកនាំកំពូល នឹងចាប់ផ្តើមនៅថ្ងៃទី ៤ ខែកក្កដា ហើយបញ្ចប់ជាមួយការបញ្ចុះសពនៅថ្ងៃទី ៩ខែកក្កដា

សហគមន៍ទុរេនបែកអន្លូង ស្រុកស្ទឹងត្រង់បានចុះបញ្ជីម៉ាកសមូហភាព និងមាន QR Code ត្រឹមត្រូវ

ស.ស.យ.ក បន្តចុះអប់រំនិស្យិតដោយផ្សារភ្ជាប់ព្រះពុទ្ធសាសនាទៅនឹងការរស់នៅថ្លៃថ្នូរ

សមាគមអតីតយុទ្ធជន កំពង់ឆ្នាំង ប្រគល់ថវិកាបេឡាមរណៈសង្គ្រោះ ១២លានរៀល ជូនសមាជិក ៣គ្រួសារ

សំណុំរឿងសាច់បង្កកជាង ២០០តោន នាំមកពីថៃចូលដល់ដៃតុលាការហើយ

ការខូចខាតធ្ងន់ធ្ងរ បានកើតឡើងនៅទីក្រុងភាគខាងត្បូង Tyre ប្រទេសលីបង់ ក្រោយការវាយប្រហាររបស់អ៊ីស្រាអែល

សម្ដេចធិបតី៖គិតត្រឹមខែមេសាឆ្នាំនេះយុវជនមកពីគ្រួសារក្រីក្រ និងងាយរងហានិភ័យចំនួន ២៧,១ម៉ឺននាក់ទទួលបានការបណ្ដុះបណ្ដាលជំនាញវិជ្ជាជីវៈ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877