BTV NEWS

អាវុធហត្ថរាជធានីភ្នំពេញ បង្ក្រាបទីតាំងលក់សម្ភារៈអាសអាភាសចំនួន ៣កន្លែង ឃាត់ខ្លួនជនសង្ស័យ ៩នាក់

គណៈបញ្ជាការឯកភាពរាជធានី បន្តចុះបង្ក្រាប Online Scams នៅសង្កាត់ចាក់អង្រែលើ ឃាត់មនុស្ស១៦នាក់

ផ្តន្ទាទោសជនជាប់ចោទ ៦នាក់ ដាក់ពន្ធនាគារអស់មួយជីវិតពាក់ព័ន្ធនឹងករណីឃាតកម្មដោយមានទារុណកម្មលើនិស្សិតជនជាតិកូរ៉េខាងត្បូង

ឃាត់ខ្លួនជនជាតិចិន ៦១នាក់ ក្នុងប្រតិបត្តិការបង្ក្រាបទីតាំង Online Scams នៅខណ្ឌចំនួនពីរ ក្នុងភូមិសាស្រ្តរាជធានីភ្នំពេញ

សន្តិសុខ និង សង្គម

ក្រុមប្រជាកសិករអឺរ៉ុប បន្តការតវ៉ាដោយដុតសំបកកង់រថយន្ត និងបិទផ្លូវហាយវ៉េក្នុងទីក្រុងសំខាន់ៗ

ក្រុមកសិករអេស្ប៉ាញបានបិទចរាចរណ៍នៅលើផ្លូវហាយវ៉េធំៗជាច្រើន ហើយបានដុតសំបកកង់រថយន្តកាលពីថ្ងៃអង្គារទី៦ខែកុម្ភៈ ខណៈប៊ុលការី បានបិទផ្លូវនានាទូទាំងប្រទេស ដោយចូលរួមជាមួយក្រុមប្រជាកសិករផ្សេងៗទៀតក្នុងបណ្ដាប្រទេសអឺរ៉ុបផ្សេងទៀត ដែលតវ៉ាប្រឆាំងនឹងការចំណាយខ្ពស់លើទំនិញតាមទីផ្សារប៉ះពាល់ដល់ការរស់នៅរបស់ពួកគេ ការិយាធិបតេយ្យ និងការប្រកួតប្រជែងពីប្រទេសមិនមែនសមាជិកសហភាពអឺរ៉ុប។ វីដេអូបង្ហាញពីផ្សែងខ្មៅខ្មួលខ្មាញ់ចេញពីការឆេះសំបកកង់រថយន្តនៅផ្លូវហាយវ៉េ AP-7 ក្នុងទីក្រុងជីរ៉ូណា(Girona) ភាគឦសាននៃតំបន់កាតាឡូនី(Catalonia)របស់អេស្ប៉ាញ។ទិន្នន័យចរាចរណ៍ផ្លូវការបានបង្ហាញថាផ្លូវហាយវ៉េយ៉ាងហោចណាស់១៤ខ្សែ នៅក្នុងតំបន់កាតាឡូនី អានដាលូស៊ី (Andalusia)កាស្ទីល ឡា ម៉ានចា(Castille-La Mancha)និងវ៉ាឡេនស៊ី(Valencia)ត្រូវបានបិទ។ ក្រុមអាជ្ញាធរបាននិយាយថា សមាគម ASAJA និង សមាគមផ្សេងទៀត បានអំពាវនាវឱ្យមានការតវ៉ាចាប់តាំងពីថ្ងៃព្រហស្បតិ៍ថ្ងៃទី ១ ខែកុម្ភៈ សប្តាហ៍មុន ប៉ុន្តែកសិករជាច្រើនបានចេញតវ៉ាតាមផ្លូវជាមួយត្រាក់ទ័ររបស់ពួកគេកាលពីថ្ងៃអង្គារដោយធ្វើឱ្យកកស្ទះចរាចរណ៍នៅទូទាំងប្រទេស ចាប់ពីទីក្រុងសេវីល(Seville)និងក្រាដាណា(Granada) នៅភាគខាងត្បូងរហូតដល់ ទីក្រុង ជីរ៉ូណា (Girona) ជិតព្រំដែនបារាំង។ ក្នុងរយៈពេលប៉ុន្មានថ្ងៃកន្លងមកនេះ ការបិទផ្លូវនៅប្រទេសបារាំង និងបែលហ្ស៊ិក ពេលខ្លះបានឈានដល់ការប៉ះទង្គិចគ្នាដោយហិង្សាជាមួយកងកម្លាំងនគរបាលទៀតផង។ ក្រសួងកសិកម្មរបស់ប្រទេសអេស្ប៉ាញបានប្រកាសកាលពីថ្ងៃអង្គារថាខ្លួននឹងឧបត្ថម្ភសាច់ប្រាក់ ចំនួន២៦៩ លានអឺរ៉ូ ស្មើរ ២៨៩លានដុល្លារ បន្ថែមជាជំនួយដល់កសិករជិត ១៤០.០០០ នាក់ ដើម្បីជួយកាត់បន្ថយផលប៉ះពាល់ពីគ្រោះរាំងស្ងួតដែលអូសបន្លាយពេលយូរ និងសង្គ្រាមនៅអ៊ុយក្រែន។ មិនខុសពីក្រុមកសិករនៅប្រទេសបារាំង បែលហ្ស៊ិក អ៊ីតាលី និងព័រទុយហ្គាល់ កសិករអេស្ប៉ាញនិយាយថាការទាមទារច្បាប់ដាក់លើកសិករសហភាពអឺរ៉ុបដើម្បីការពារបរិស្ថានធ្វើឱ្យពួកគេមានការប្រកួតប្រជែងតិចជាងក្នុងតំបន់ផ្សេងទៀត ដូចជាអាមេរិកឡាទីន ឬប្រទេសមិនមែនសមាជិកសហភាពអឺរ៉ុប៕

លោក Biden ស្តីបន្ទោសលោក Trump ចំពោះការជាន់ពន្លិចសំណើច្បាប់អន្តោប្រវេសន៍ទ្វេបក្ស

លោកប្រធានាធិបតីសហរដ្ឋអាមេរិក Joe Biden បាននិយាយកាលពីថ្ងៃអង្គារថា សំណើរច្បាប់ស្ដីពីកាធ្វើអន្តោប្រវេសន៍ទ្វេបក្ស កំពុងក្រោមធ្លាក់ក្នុងស្ថានភាពធ្ងន់ធ្ងរក្រោមសម្ពាធនយោបាយពីគូប្រជែងគណបក្សសាធារណរដ្ឋរបស់លោក Donald Trump ហើយបានប្តេជ្ញាថានឹងរារាំងផ្លូវដើម្បីរំលឹកក្រុមអ្នកបោះឆ្នោត ដែលត្រូវស្តីបន្ទោស ប្រសិនបើពង្រាងច្បាប់នេះបរាជ័យ។ លោក Biden បាននិយាយថា សុចនាករទាំងអស់គឺពង្រាងច្បាប់នេះនឹងមិនទៅដល់ដៃព្រឹទ្ធសភាទែ។ ហេតុអ្វី? ហេតុផលសាមញ្ញ គឺដោយសារលោក Donald Trump ជាឆ្អឹងទទឹង-ក ដោយសារតែលោក Donald Trump គិតថាសំណើរច្បាប់នេះ នឹងជះផលប៉ះពាល់ដល់នយោបាយរបស់លោក។ ក្ដីបារម្ភអំពីការធ្វើអន្តោប្រវេសន៍ បានក្លាយជាបញ្ហាធំបំផុតនៅក្នុងយុទ្ធនាការបោះឆ្នោតឆ្នាំនេះ ដោយលោក Trump បានរៀបចំសម្រាប់ការប្រកួតប្រជែងដណ្ដើមតំណែងប្រធានាធិបតីជាថ្មី នៅខែវិច្ឆិកាជាមួយលោក Biden ។លោក Trump បាននឹងកំពុងជំរុញឱ្យសមាជិកសភាមកពីគណបក្សសាធារណរដ្ឋបដិសេធកិច្ចព្រមព្រៀងសន្តិសុខព្រំដែនទ្វេបក្សដែលបានបង្ហាញកាលពីថ្ងៃអាទិត្យ។ អ្នកនាំពាក្យរបស់លោក Trump ពុំបានឆ្លើយតបភ្លាមៗចំពោះសំណើសុំការអត្ថាធិប្បាយទេ។ការប្តេជ្ញារបស់លោក Biden ដើម្បីធ្វើឱ្យកិច្ចខិតខំប្រឹងប្រែងរបស់អតីតប្រធានាធិបតីសាធារណរដ្ឋដែដែលមានបំណងសម្លាប់ពង្រាងច្បាប់នេះ ជាប្រធានបទសំខាន់នៃយុទ្ធនាការជាប់ឆ្នោតឡើងវិញរបស់លោក គឺជាការភ្នាល់ដ៏ប្រថុយប្រថាន ដែលត្រូវបានបញ្ជាក់តាមរយៈការស្ទង់មតិបង្ហាញថា ប្រជាជនអាមេរិកផ្តល់ការគាំទ្រកម្រិតទាបចំពោះ លោក Biden សម្រាប់ការដោះស្រាយសន្តិសុខព្រំដែន និងអន្តោប្រវេសន៍របស់លោក។ លោក Biden បានជួបប្រទះនឹងចំនួនជនអន្តោប្រវេសន៍ខុស្បាប់ដែលត្រូវបានចាប់បានឆ្លងកាត់ព្រំដែនអាមេរិក-ម៉ិកស៊ិក អំឡុងលោកកាន់តំណែងជាប្រធានាធិបតី។ គណបក្សសាធារណរដ្ឋអះអាងថា លោក Biden គួរតែរក្សាគោលនយោបាយរឹតត្បិតរបស់លោក Trump។កាលពីខែធ្នូ ឆ្នាំ២០២៣ កន្លងទៅ មានជនអន្តោប្រវេសន៍ឆ្លងចូលព្រំដែនដោយខុសច្បាប់ជាង៩.៥០០នាក់ ក្នុងមួយថ្ងៃ នេះបើយោងតាមស្ថិតិរបស់រដ្ឋាភិបាលសហរដ្ឋអាមេរិក ប៉ុន្តែបានធ្លាក់ចុះយ៉ាងខ្លាំងកាលពីខែមុន៕

ក្រឡាប់រថយន្តលើផ្លូវល្បឿនលឿនស្លាប់មនុស្ស៥នាក់ និងរបួស២នាក់

កំពង់ស្ពឺ ៖ មនុស្សចំនួន ៥នាក់ស្លាប់ និង២នាក់រងរបួស ក្នុងគ្រោះថ្នាក់ចរាចរណ៍មួយដែលបង្កឡើងដោយរថយន្ត Alphat ពណ៌ស ពាក់ស្លាកលេខ ភ្នំពេញ 2BD-6657 ជាប្រភេទរថយន្តរត់ឈ្នួល បានក្រឡាប់ជាច្រើនជុំនៅលើផ្លូវល្បឿនលឿន ខណៈកំពុងធ្វើដំណើរទិសដៅពីខេត្តព្រះសីហនុ ទៅរាជធានីភ្នំពេញ កាលពីព្រឹកថ្ងៃទី០៧ ខែកុម្ភៈ ឆ្នាំ២០២៤។ឯកឧត្តម វ៉ី សំណាង អភិបាលខេត្តកំពង់ស្ពឺបានឱ្យដឹងថា គ្រោះថ្នាក់ចរាចរណ៍នេះបានកើតឡើងនៅគីឡូម៉ែតលេខ២០ ស្ថិតក្នុងភូមិសាស្ត្រស្រុកសំរោងទង ខេត្តកំពង់ស្ពឺ លើផ្លូវល្បឿនលឿន ដែលបណ្តាលឲ្យមនុស្សចំនួន ៥នាក់ បានបាត់បង់ជីវិត និងពីរនាក់រងរបួសធ្ងន់ធ្ងរ។អភិបាលខេត្តកំពង់ស្ពឺ បានអំពាវនាវដល់អ្នកបើកបរ សូមប្រកបដោយការប្រុងប្រយ័ត្នជាប់ជានិច្ច ដោយមិនត្រូវវ៉ាជែងក្នុងស្ថានភាពមិនល្អ គោរពល្បឿននៃការបើកបរ មិនត្រូវបើកក្នុងស្ថានភាពដែលងងុយដេក ឬស្រវឹងឡើយ៕សូមបញ្ជាក់ថាកាលពីថៃ្ងទី៦ ខែកុម្ភៈ ឆ្នាំ២០២៤ ក្បែរកន្លែងកើតហេតុនេះ ក៏មានករណីគ្រោះថ្នាក់ចរាចរណ៍រថយន្ដ Rangrover មួយគ្រឿងបុករបាំងបាំងផ្លូវបណ្ដាលឲ្យខូតខាតយ៉ាងដំណំ និងរងរបួសផងដែ។ខណៈពេលនេះសមត្ថកិច្ចនគរបាល អធិការដ្ឋានស្រុកសំរោងទង នៃស្នងការដ្ឋាននគរបាលខេត្ដកំពង់ស្ពឺ បានសហការអន្ដរាគមន៍ជួយសង្គ្រោះ ករណីខាងលើ។តាមការបញ្ជាក់ពីព័ត៌មានបឋមពីអ្នកឃើញហេតុការណ៍ថា រថយន្ត Alphat ពណ៌សដឹក មនុស្ស លក្ខណៈគ្រួសារ ៧នាក់ ក្នុងគោលបំណងទៅលេងខេត្ដព្រះសីហនុ អ្នកបើកបរជាស្រ្ដី និងមានអ្នកស្លាប់ ៥នាក់នៅហ្នឹងកន្លែង របួសធ្ងន់ ២នាក់៕ អត្ថបទ ៖ ប្រាក់ វ៉ាន់ដា

អាវុធហត្ថខេត្តតាកែវ បង្ក្រាបក្រុមក្មេងទំនើង ៦នាក់បង្កការអុកឡុកប៉ះពាល់សន្តិសុខសង្គម

តាកែវ៖ ក្រុមក្មេងទំនើង ៦នាក់បង្កការអុកឡុកប៉ះពាល់សន្តិសុខ សណ្តាប់ធ្នាប់សង្គម ត្រូវបានកម្លាំងកងរាជអាវុធហត្ថខេត្តតាកែវចាប់ខ្លួន កសាងសំណំរឿង បញ្ជូនទៅអយ្យការអមសាលាដំបូងខេត្តតាកែវ ដើម្បីចាត់ការតាមនីតិវិធី ។លោកវរសេនីយ៍ឯក ង៉ែត ចាន់ធី មេបញ្ជាការរងកងរាជអាវុធហត្ថខេត្តតាកែវ ប្រាប់ឲ្យដឹងនាព្រឹកថ្ងៃទី៦ ខែកុម្ភៈ ឆ្នាំ២០២៤ ថា ដោយទទួលបានបទបញ្ជាពីលោកឧត្ដមសេនីយ៍ត្រី សេង មហា មេបញ្ជាការកងរាជអាវុធហត្ថខេត្តតាកែវ ក្រោមការសម្របសម្រួលនីតិវិធីពី លោក ឯក ឆេងហួត ព្រះរាជអាជ្ញា អមសាលាដំបូងខេត្តតាកែវ កាលពីវេលាម៉ោង១៦ និង៤០នាទី ថ្ងៃទី៤ ខែកុម្ភៈ ឆ្នាំ២០២៤ កម្លាំងមូលដ្ឋានកងរាជអាវុធហត្ថស្រុកត្រាំកក់ដឹកនាំដោយលោកវរសេនីយ៍ត្រី ឡេង ផាត មេបញ្ជាការមូលដ្ឋានស្រុក បានបង្រ្កាបករណីក្រុមក្មេងទំនើង ៦នាក់ បង្ករការអុកឡុក បណ្ដាលឱ្យប៉ះពាល់សន្តិសុខ សណ្តាប់ធ្នាប់សង្គម នៅចំណុច ភូមិខ្នាទៃ ឃុំអង្គតាសោម ស្រុកត្រាំកក់ ខេត្តតាកែវ។ ជនសង្ស័យទាំង ៦នាក់ ១.ឈ្មោះ ហ៊ុន ប៊ុនតុន ភេទប្រុស អាយុ១៤ឆ្នាំ មុខរបរសិស្ស រស់នៅភូមិសាមគ្គី ឃុំស្រែរនោង ស្រុកត្រាំកក់ ខេត្តតាកែវ, ២.ឈ្មោះ ឡន ភារុន ភេទប្រុស អាយុ១៥ឆ្នាំ មុខរបរសិស្ស រស់នៅភូមិប្រវន័យ ឃុំស្រែរនោង ស្រុកត្រាំកក់ ខេត្តតាកែវ, ៣.ឈ្មោះ នូច ធារ៉ា ភេទប្រុស អាយុ២០ឆ្នាំ មុខរបរជាងជួសជុលរថយន្ត រស់នៅភូមិ/ឃុំ ស្រែរនោង ស្រុកត្រាំកក់ ខេត្តតាកែវ, ៤.ឈ្មោះ សយ តូ ភេទប្រុស អាយុ១៥ឆ្នាំ មុខរបរសិស្ស រស់នៅភូមិត្រពាំងរបើម ឃុំស្រែរនោង ស្រុកត្រាំកក់ ខេត្តតាកែវ, ៥.ឈ្មោះ ញ៉ វណ្ណេត ភេទប្រុស អាយុ១៧ឆ្នាំ មុខរបរកសិករ រស់នៅភូមិគោករវៀង ឃុំស្រែរនោង ស្រុកត្រាំកក់ ខេត្តតាកែវ និង៦.ឈ្មោះ ណន សុខនឿន អាយុ១៨ ឆ្នាំមុខរបរកសិករ រស់នៅភូមិស្រែឈើនាង ឃុំស្រែរនោង ស្រុកត្រាំកក់ ខេត្តតាកែវ វត្ថុតាង ម៉ូតូចំនួន ០៤គ្រឿង ដាវចំនួន ០៤ដើម កាំបិតចំនួន ០២ដើម ។ចំពោះជនសង្ស័យ និងវត្ថុតាង កម្លាំងជំនាញការិយាល័យកងរាជអាវុធហត្ថខេត្ត តាកែវ កំពុងកសាងសំណុំរឿងបញ្ជូនទៅកាន់អយ្យការអមសាលាដំបូងខេត្តតាកែវ ដើម្បីចាត់ការតាមនីតិវិធី ៕ អត្ថបទ៖ តារាវុទ្ធី

មេធាវីតំណាងគណបក្សប្រជាជនកម្ពុជាប្ដឹងលោក ស៊ឹង សែនករុណា ទៅតំណាងអយ្យការ

ភ្នំពេញ ៖ មេធាវី៣រូប តំណាងឱ្យគណបក្សប្រជាជនកម្ពុជា បានសម្រេចប្ដឹងលោក ស៊ឹង សែនករុណា ទៅតំណាងអយ្យការអមសាលាដំបូងរាជធានីភ្នំពេញ បន្ទាប់ពីបានផ្ដល់សម្ភាសន៍ដល់សារព័ត៌មាន ឌឹ ខេមបូឌា ដេលី នូវចេតនាបំភ្លៃផ្ទុយពីការពិត។មេធាវី សាំង វណ្ណៈ មេធាវី ផូ សុធាផល មេធាវី ម៉ម ចាន់ណែត ដែលជាមេធាវីតំណាង គណបក្សប្រជាជនកម្ពុជា បានដាក់ពាក្យបណ្ដឹងប្ដឹង លោក ស៊ឹង សែនករុណា ដែលជាអ្នកនាំពាក្យសមាគមការពារសិទ្ធិមនុស្សអាដហុកចូលដល់អយ្យការអមសាលាដំបូងរាជធានីភ្នំពេញហើយនៅរសៀលនៅថ្ងៃទី០៥ ខែកុម្ភៈ ឆ្នាំ២០២៤នេះ។បណ្ដឹងរបស់មេធាវីតំណាងគណបក្សប្រជាជនកម្ពុជា បានស្រង់នូវខ្លឹមសារសម្ភាសន៍របស់លោក ស៊ឹង សែនករុណា ជាមួយនឹងសារព័ត៌មាន ឌឹ ខេមបូឌា ដេលី កាលពីថ្ងៃទី០២ ខែកុម្ភៈ ឆ្នាំ២០២៤ និងបានជម្រាបជូនព្រះរាជអាជ្ញាអមសាលាដំបូងរាជធានីភ្នំពេញថា ខ្លឹមសារនោះស្តែងចេញនូវចេតនាបំភ្លៃផ្ទុយពីការពិតថា គណបក្សប្រជាជនកម្ពុជា ប្រើប្រព័ន្ធតុលាការមកដោះស្រាយ និងតែងតែយកតុលាការមកធ្វើជារបាំងក្នុងការគាបសង្កត់ដៃគូនយោបាយប្រឆាំងរបស់ខ្លួន ព្រមទាំងប្រើប្រាស់វប្បធម៌គំរាមកំហែងដៃគូនយោបាយរបស់ខ្លួន ដែលពាក្យពេចន៍អះអាងបំផ្លើសទាំងនេះ ជាអំពើទុច្ចរិត ក្នុងចេតនាទម្លាក់កំហុសដោយអសុទ្ធចិត្ត និងមូលបង្កាច់នាំឱ្យប៉ះពាល់ដ៏ធ្ងន់ធ្ងរដល់កិត្តិយសរបស់គណបក្សប្រជាជនកម្ពុជា។ ជាងនេះទៀត ការប្រព្រឹត្តរបស់បុគ្គលរូបនេះ ជាអំពើបង្កចលាចល ញុះញង់បង្កើតឱ្យមានការស្អប់ រើសអើងចំពោះគណបក្សប្រជាជនកម្ពុជា និងមានចេតនាធ្វើឱ្យប៉ះពាល់ដល់ការបោះឆ្នោតជ្រើសតាំងសមាជិកព្រឹទ្ធសភានីតិកាលទី៥ ដែលនឹងប្រព្រឹត្តទៅក្នុងខែកុម្ភៈ ឆ្នាំ២០២៤ នាពេលដ៏ខ្លីខាងមុខនេះ។ក្នុងនាមជាមេធាវីតំណាងគណបក្សប្រជាជនកម្ពុជា មេធាវីទាំង៣រូប បានប្តឹង និងសំណូមពរដល់ព្រះរាជអាជ្ញាឱ្យធ្វើការពិនិត្យសម្រេចចោទប្រកាន់ និងផ្តន្ទាទោសលើឈ្មោះ ស៊ឹង សែនករុណា តាមច្បាប់ និងនីតិវិធីជាធរមាន និងទាមទារឱ្យឈ្មោះ ស៊ឹង សែនករុណា សងសំណងជំងឺចិត្តជូនគណបក្សប្រជាជនកម្ពុជា ចំនួន ពីរពាន់លានរៀល ៕ អត្ថបទ ៖ ប្រាក់ វ៉ាន់ដា

អ្នកនិពន្ធជនជាតិអូស្ត្រាលី លោក Yang Hengjun ត្រូវបានព្យួរទោសប្រហារជីវិតនៅប្រទេសចិន

អ្នកនិពន្ធជនជាតិអូស្ត្រាលី លោក យ៉ាង ហេងជុន (Yang Hengjun) ត្រូវបានព្យួរទោសប្រហារជីវិតដោយតុលាការចិន នៅថ្ងៃចន្ទ (០៥ កុម្ភៈ) នេះ រយៈពេល ៥ ឆ្នាំបន្ទាប់ពីលោកត្រូវបានចាប់ខ្លួន និងចោទប្រកាន់ពីបទធ្វើចារកម្ម។ ការព្យួរទោសនេះអាចនឹងត្រូវកាត់ឱ្យលោកជាប់ពន្ធនាគារអស់មួយជីវិតបន្ទាប់ពីរយៈពេលពីរឆ្នាំ នេះបើយោងតាមក្រុមមន្ត្រីអូស្ត្រាលី។លោកបណ្ឌិត យ៉ាង ដែលជាអ្នកប្រាជ្ញ និងជាអ្នកនិពន្ធប្រលោមលោកដែលបានសរសេរប្លុកអំពីកិច្ចការរបស់ចិន បានបដិសេធការចោទប្រកាន់នេះ ដែលមិនត្រូវបានផ្សព្វផ្សាយជាសាធារណៈ។ រដ្ឋាភិបាលអូស្ត្រាលីនិយាយថា ខ្លួនមានការ «រន្ធត់» ចំពោះការសម្រេចចិត្តរបស់ទីក្រុងប៉េកាំង។ លោកបណ្ឌិត យ៉ាង ដែលពីមុនធ្លាប់បម្រើការនៅក្រសួងសន្តិសុខរដ្ឋរបស់ប្រទេសចិន ត្រូវបានគេដាក់រហ័សនាមថា «អ្នកដើរតាមលទ្ធិប្រជាធិបតេយ្យ» ប៉ុន្តែការសរសេររបស់លោកជារឿយៗជៀសវាងការរិះគន់ចំៗទៅលើរដ្ឋាភិបាលចិន។បុរសវ័យ ៥៧ឆ្នាំរូបនេះ ត្រូវបានស្ទាក់ចាប់ខ្លួននៅអាកាសយានដ្ឋានទីក្រុង ក្វាងចូវ (Guangzhou) កាលពីខែមករា ឆ្នាំ២០១៩ ហើយត្រូវបានចោទប្រកាន់ពីបទចារកម្ម។ សំណុំរឿងរបស់លោក ភាគច្រើនត្រូវបានលាតត្រដាងនៅពីក្រោយការកាត់ទោសបិទទ្វារចាប់តាំងពីពេលនោះមក រួមទាំងការកាត់ក្តីសម្ងាត់នៅឆ្នាំ ២០២១។ ក្រុមមន្ត្រីអូស្ត្រាលីពីមុនបានលើកឡើងពីការព្រួយបារម្ភចំពោះការកាត់ទោសលើរូបលោក ប៉ុន្តែក្រសួងការបរទេសចិន បានព្រមានពួកគេមិនឱ្យជ្រៀតជ្រែកក្នុងសំណុំរឿងនេះ និងទទូចឲ្យគោរព «អធិបតេយ្យភាពតុលាការ» របស់ប្រទេសចិន៕

លទ្ធភាពកិច្ចព្រមព្រៀងដោះលែងចំណាប់ថ្នូរ គំរាមកំហែងធ្វើឲ្យគណៈរដ្ឋមន្ត្រីស្តាំនិយមរបស់អ៊ីស្រាអែល បែកបាក់

ខណៈដែលក្រុមហាម៉ាស ត្រៀមប្រកាសសេចក្តីសម្រេចរបស់ខ្លួនលើកិច្ចព្រមព្រៀង ដែលបានស្នើឡើងសម្រាប់បទឈប់បាញ់ និងការដោះលែងចំណាប់ថ្នូរជាង ១០០នាក់នៅតំបន់ហ្កាហ្សា ក្រុមរដ្ឋមន្ត្រី អ្នកវិភាគនយោបាយ និងមនុស្សជិតស្និទ្ធនឹងនាយករដ្ឋមន្ត្រីអ៊ីស្រាអែល និយាយថា កិច្ចព្រមព្រៀងនេះ គំរាមកំហែងធ្វើឲ្យគណៈរដ្ឋមន្ត្រីស្តាំនិយមរបស់អ៊ីស្រាអែល បែកបាក់។ ខណៈពេលដែលក្រុមហាម៉ាស មានចេតនា គណៈកម្មាធិការទទួលបន្ទុកសង្គ្រាមរបស់អ៊ីស្រាអែល ត្រូវបានគេរំពឹងថា នឹងពិភាក្សាអំពីកិច្ចព្រមព្រៀងនេះក្នុងអំឡុងពេលកិច្ចប្រជុំមួយកាលពីល្ងាចថ្ងៃអាទិត្យ នេះបើយោងតាមប្រព័ន្ធផ្សព្វផ្សាយអ៊ីស្រាអែល។ប៉ុន្តែលោកអ៊ីតាម៉ា បេនហ្គ្វី (Itamar Ben-Gvir) ដែលជារដ្ឋមន្ត្រីស្តាំនិយមទទួលបន្ទុកផ្នែកសន្តិសុខជាតិបានព្រមានកាលពីសប្តាហ៍មុនលើបណ្តាញសង្គមXថា៖«កិច្ចព្រមព្រៀងដែលពុំមានការពិចារណាគ្រប់ជ្រុងជ្រោយ គឺស្មើនឹងការរុះរដ្ឋាភិបាលនេះ»។ រយៈពេលប៉ុន្មានម៉ោង បន្ទាប់ពីការអត្ថាធិប្បាយរបស់បេនហ្គ្វី មេដឹកនាំបក្សប្រឆាំងលោក យ៉ៃ ឡាពីដ ( Yair Lapid) បានស្ម័គ្រចិត្តឲ្យគណបក្ស Yesh Atid ឆ្វេងនិយមកណ្តាលរបស់ខ្លួន ចូលរួមគណៈរដ្ឋមន្ត្រីដើម្បីជួយសង្គ្រោះក្រុមចម្រុះ និងកិច្ចព្រមព្រៀងដោះលែងចំណាប់ថ្នូរ ប្រសិនបើបេនហ្គ្វី ដកខ្លួនចេញនោះ។បើទោះជារដ្ឋាភិបាលបច្ចុប្បន្ន នៅរស់រានមានជីវិតក៏ដោយ ជម្លោះជុំវិញកិច្ចព្រមព្រៀងដោះលែងចំណាប់ថ្នូរ បានលាតត្រដាងការបែកបាក់យ៉ាងជ្រាលជ្រៅ នៅក្នុងសង្គមអ៊ីស្រាអែល។ កិច្ចព្រមព្រៀងនេះ បង្កប់នូវការដំណើររឿងអំពីចក្ខុវិស័យរបស់អ៊ីស្រាអែលចំពោះគ្នាទៅវិញទៅមក៖ ការសន្យាយ៉ាងឱឡារិករបស់ខ្លួនចំពោះទាហាន និងពលរដ្ឋរបស់ខ្លួនថា នឹងគ្មាននរណាម្នាក់ ត្រូវបានគេទុកចោលទេ គោលដៅដែលបានបញ្ជាក់ជាញឹកញាប់របស់អ៊ីស្រាអែល គឺត្រូវបំផ្លាញខ្មាំងសត្រូវ ទោះបីត្រូវចំណាយធនធានបែបណាក៏ដោយ។

ការព្យាករណ៍ធ្លាក់ព្រិលខ្លាំង សម្រាប់តំបន់ Kanto-Koshin ប្រទេសជប៉ុន ចាប់ពីរសៀលថ្ងៃចន្ទនេះ

មន្ត្រីឧតុនិយមប្រទេសជប៉ុន កំពុងព្រមានឲ្យប្រជាជនប្រុងប្រយ័ត្ន ចំពោះការធ្លាក់ព្រិលខ្លាំង ដែលរំពឹងទុកចាប់ពីរសៀលថ្ងៃចន្ទនេះ ដល់ថ្ងៃអង្គារ នៅក្នុងតំបន់ កាន់តូ-កូស្សីន(Kanto-Koshin)។ ទីភ្នាក់ងារឧតុនិយម បាននិយាយថា ប្រព័ន្ធសម្ពាធទាបដែលកំពុងវិវឌ្ឍ ត្រូវបានគេព្យាករណ៍ថានឹងផ្លាស់ទី ទៅភាគខាងកើត តាមបណ្តោយឆ្នេរសមុទ្រភាគខាងត្បូងនៃកោះ ហុងស្ស៊ូ(Honshu) ។ វាត្រូវបានគេរំពឹងថានឹងនាំមកនូវព្រិលធ្លាក់ខ្លាំងនៅតំបន់ភ្នំ នៅក្នុងតំបន់ Kanto-Koshin ដែលគ្របដណ្តប់លើទីក្រុងតូក្យូ និង ប្រទេសជប៉ុនភាគកណ្តាល។ ព្រិលកម្រាស់រហូតដល់ ៣០ សង់ទីម៉ែត្រ ត្រូវបានរំពឹងទុកនៅក្នុងតំបន់ Koshin និងនៅតំបន់ភ្នំនៅតំបន់ Kanto ភាគខាងជើង និងរហូតដល់ ២០សង់ទីម៉ែត្រ នៅលើដីរាបនៅភាគខាងជើងតំបន់ Kanto ព្រមទាំងតំបន់ Hakone, Tama និងឈីឈីប៊ូ(Chichibu) ក្នុងអំឡុងពេល ២៤ម៉ោង រហូតដល់ព្រឹកថ្ងៃអង្គារ។ ទីភ្នាក់ងារ និយាយថា ប្រសិនបើសីតុណ្ហភាពទាបជាងការរំពឹងទុក ការធ្លាក់ព្រិលកម្រិតប្រកាសអាសន្នអាចនឹងវាយប្រហារតំបន់ទំនាប រួមទាំងសង្កាត់ចំនួន ២៣ ក្នុងទីក្រុងតូក្យូផងដែរ។ មន្ត្រីកំពុងណែនាំឲ្យប្រជាជនប្រុងប្រយ័ត្ន ចំពោះការរំខានចរាចរណ៍ដែលបង្កឡើងដោយសារព្រិល និងផ្លូវមានទឹកកករអិល។ ពួកគេក៏កំពុងជំរុញឱ្យមានការប្រុងប្រយ័ត្នចំពោះព្រិលនៅលើខ្សែបណ្តាញអគ្គិសនី និងដើមឈើ ការបាក់រលំផ្ទះកញ្ចក់ និងព្រិលខ្លាំង។ ពួកគេកំពុងជំរុញឱ្យប្រជាជនធ្វើការពីលំនៅឋាន ឬត្រឡប់ទៅលំនៅឋានឲ្យបានលឿនជាងធម្មតា ប្រសិនបើពួកគេត្រូវចេញក្រៅ។ អ្នកបើកបរ ត្រូវបានណែនាំឲ្យត្រៀមទប់ទល់សម្រាប់ព្រិលធ្លាក់ខ្លាំង និងមិនត្រូវបើកបររថយន្តដែលពុំមានបំពាក់ដោយសំបកកង់រដូវរងាឡើយ។ ពួកគេកំពុងណែនាំអ្នកដំណើរ ឱ្យបន្តធ្វើបច្ចុប្បន្នភាពជាមួយនឹងព័ត៌មានចុងក្រោយបំផុត អំពីអាកាសធាតុ និងសេវាកម្មរថភ្លើង។

ក្រុមបាតុករ ប្រទេសសេណេហ្គាល់ ប៉ះទង្គិចជាមួយនគរបាល ជុំវិញការពន្យារពេលបោះឆ្នោត

អ្នករាយការណ៍ព័ត៌មាន Reuters បាននិយាយថា កងកម្លាំងសន្តិសុខប្រទេសសេណេហ្គាល់ បានប្រើប្រាស់ឧស្ម័នបង្ហៀរទឹកភ្នែក ដើម្បីបំបែកហ្វូងមនុស្ស ដែលបានមកប្រមូលផ្តុំគ្នានៅក្នុងរដ្ឋធានី Dakar កាលពីថ្ងៃអាទិត្យ ដើម្បីតវ៉ាប្រឆាំងការពន្យារពេលការបោះឆ្នោតប្រធានាធិបតី នៅថ្ងៃទី ២៥ ខែកុម្ភៈ។ប្រធានាធិបតី លោក Macky Sall បានប្រកាសកាលពីថ្ងៃសៅរ៍ថា ការបោះឆ្នោតនឹងត្រូវបានពន្យារពេលដល់កាលបរិច្ឆេទដែលពុំបានបញ្ជាក់ ដោយសារតែជម្លោះជុំវិញបញ្ជីឈ្មោះបេក្ខជន ជាចំណាត់ការមួយដែលគណបក្សប្រឆាំង និងអង្គការសង្គមស៊ីវិលមួយចំនួន បានរិះគន់ថាជា «រដ្ឋប្រហារស្ថាប័ន»។នៅក្នុងសញ្ញាដំបូង នៃការរុញច្រានប្រឆាំងការពន្យារពេលនៅតាមដងផ្លូវ ក្រុមអ្នកតវ៉ាប្រហែល ២០០ នាក់ បានរារាំងចរាចរណ៍នៅលើផ្លូវធំមួយក្នុងទីក្រុង Dakar ដោយមានរបាំងនៃការដុតសំបកកង់រថយន្ត។ ហ្វូងមនុស្ស បានដកថយទៅតាមចិញ្ចើមផ្លូវ បន្ទាប់ពីនគរបាលបង្ក្រាបកុបកម្ម បានបាញ់ឧស្ម័នបង្ហៀរទឹកភ្នែក និងចាប់ផ្តើមចាប់ខ្លួនអ្នកតវ៉ា។ប្រទេសសេណេហ្គាល់ ពុំដែលពន្យារពេលការបោះឆ្នោតប្រធានាធិបតី និងភាពមិនច្បាស់លាស់ អំពីអ្វីដែលកើតឡើងនៅពេលបន្ទាប់នោះទេ ដែលគំរាមកំហែងដល់ភាពចលាចលស៊ីវិល ដូចជាការតវ៉ាខ្លាំងក្លា ប៉ុន្មានឆ្នាំថ្មីៗនេះ ដែលបានធ្វើឱ្យខូចកេរ្តិ៍ឈ្មោះរបស់ខ្លួន ជាប្រទេសលទ្ធិប្រជាធិបតេយ្យ មានស្ថិរភាពបំផុតមួយនៅអាហ្វ្រិកខាងលិច។

រដ្ឋកាលីហ្វ័រនីញ៉ា ត្រៀមទប់ទល់ទឹកជំនន់ដែលគំរាមកំហែងដល់អាយុជីវិត ខណៈមានខ្យល់ខ្លាំងនិងព្យុះ

រដ្ឋកាលីហ្វ័រនីញ៉ាដែលរងការវាយប្រហារដោយព្យុះ បានប្រឈមការទទួលរងគ្រោះមួយផ្សេងទៀត កាលពីថ្ងៃអាទិត្យ ខណៈការិយាល័យព្យាករណ៍ បានព្យាករណ៍ថានឹងមានភ្លៀងធ្លាក់ខ្លាំង និងព្យុះសង្ឃរា ដែលនឹងវាយបោកបក់នៅរដ្ឋនេះភាគច្រើន ដោយគំរាមកំហែងដល់ការកើតមានទឹកជំនន់ បំណាក់ដី និងការដាច់ចរន្តអគ្គិសនី។ លោក ដេនញែល ស្វេន(Daniel Swain) អ្នកវិទ្យាសាស្ត្រអាកាសធាតុនៅសាកលវិទ្យាល័យរដ្ឋកាលីហ្វ័រនីញ៉ា ឡូសអេនជឺឡេស បាននិយាយកាលពីថ្ងៃអាទិត្យថា នេះគឺជាព្យុះខុសប្រក្រតីតែមួយសន្ទុះ។ ស្ថានភាពអាកាសធាតុធ្ងន់ធ្ងរ បានជំរុញឱ្យការិយាល័យតំបន់ឆ្នេរ របស់អង្គភាពសេវាអាកាសធាតុជាតិចេញការព្រមានកម្រិតខ្ពស់អំពីព្យុះសង្ឃរាដ៏កម្រសម្រាប់តំបន់ Big Sur និងតំបន់នៅក្បែរៗនោះ។អង្គភាពសេវាអាកាសធាតុជាតិ បានកត់ត្រាខ្យល់បក់ខ្លាំងបំផុតក្នុងល្បឿន ១១២,៦ គីឡូម៉ែត្រក្នុងមួយម៉ោង នៅតាមទីតាំងផ្សេងៗនៅទូទាំងរដ្ឋ។ ការកត់សម្គាល់ពីព្រឹត្តិការណ៍ដ៏កម្រ ទីភ្នាក់ងារអាកាសធាតុ បានដាក់តំបន់ដ៏ធំមួយនៅភាគខាងត្បូងរដ្ឋកាលីហ្វ័រញ៉ា ក្រោម«ហានិភ័យខ្ពស់នៃភ្លៀងធ្លាក់ខ្លាំង» រហូតដល់ថ្ងៃច័ន្ទនេះ។តំបន់ Santa Barbara និង Los Angeles បានចេញបទបញ្ជាជម្លៀសពលរដ្ឋមួយចំនួន ដោយសារហានិភ័យនៃទឹកជំនន់ដែលគំរាមកំហែងដល់អាយុជីវិតបង្កឡើងដោយព្យុះនេះ។ ការជម្លៀសជាកាតព្វកិច្ចបានចូលជាធរមាននៅក្នុងផ្នែកខ្លះនៃតំបន់ San Jose និងតំបន់វេនធ្យូរ៉ា(Ventura)។ អង្គភាពសេវាអាកាសធាតុជាតិនិយាយថា ភ្លៀងនឹងប្រែក្លាយទៅជាព្រិលធ្លាក់ខ្លាំងក្នុងកម្ពស់ខ្ពស់នៅតំបន់ជួរភ្នំភាគខាងជើងនៃរដ្ឋកាលីហ្វ័រនីញ៉ា និងសៀរ៉ាណេវ៉ាដា(Sierra Nevada) ដោយមានការកើនឡើងសរុបនៃការព្យាករណ៍កម្ពស់ច្រើនហ្វីត សម្រាប់តំបន់សៀរ៉ា រហូតដល់ថ្ងៃអង្គារ និងអត្រាព្រិលធ្លាក់ ២ទៅ៣ អ៊ីញក្នុងមួយម៉ោង។

បណ្ដាញសង្គម

ព័ត៌មានថ្មីៗ

រដ្ឋមន្រ្តីការពារជាតិជប៉ុនលោក Koizumi ច្រានចោលការចោទប្រកាន់ពីយោធានិយមថ្មី

ក្រសួងការងារ៖ ខេត្តចំនួន៤ នៅភូមិភាគឦសាន្ត មានឱកាសការងារជិត ៤,០០០កន្លែង កំពុងរង់ចាំអតីតពលករត្រឡប់មកពីថៃ និងអ្នកកំពុងស្វែងរកការងារធ្វើ

ប្រមុខ WHO ទទួចសុំឲ្យមានការបញ្ចុះសពដោយសុវត្ថិភាព អំឡុងធ្វើដំណើរទៅកាន់តំបន់រីករាលដាលឆ្លងជំងឺអេបូឡា

អាជ្ញាធរជាតិអប្សរា និង JQA បិទបញ្ចប់កម្មវិធីអប់រំបរិស្ថានសម្រាប់កុមារ ឆ្នាំ២០២៦ និងប្រគល់រង្វាន់ដល់សិស្សឆ្នើម

អ៊ីរ៉ង់និយាយថា កិច្ចប្រជុំជាមួយអាមេរិកកំពុងបន្ត តែពុំឈានដល់កិច្ចព្រមព្រៀងផ្តាច់ព្រ័ត្រនោះទេ

អភិបាលខេត្តបន្ទាយមានជ័យ អំពាវនាវដល់មន្ត្រីរាជការសប្បុរសជនចូលរួមយុទ្ធនាការ "១ម៉ឺនរៀល ១ម៉ឺននាក់"

អគ្គកុងស៊ុលវៀតណាម រៀបចំកម្មវិធីសប្ដាហ៍វប្បធម៌វៀតណាម ឆ្នាំ២០២៦ នៅខេត្ដសៀមរាប

រដ្ឋបាលខេត្តកំពតត្រៀមទុរេនទុំ ២តោន សម្រាប់ទទួលទេសចរចូលរួមព្រឹត្តិការណ៍ «មរតកផ្លែឈើ និងនំចំណីកំពត»

មន្ត្រីជំនាញ ស្នើដល់កសិករ សហគមន៍ និងអ្នកពាក់ព័ន្ធរួមគ្នាលើកកម្ពស់វិស័យកសិកម្មខេត្តកែប

គណៈកម្មការការពារទប់ស្កាត់ និងបង្ក្រាបបទល្មើសធនធានធម្មជាតិ ផ្សព្វផ្សាយសេចក្តីជូនដំណឹងស្ដីពីរដូវបិទនេសាទ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877