BTV NEWS

ចៅក្រមស៊ើបសួរសម្រេចឃុំខ្លួនមន្ត្រីនគរបាល-អាវុធហត្ថខេត្តកំពត និងអ្នកទទួលផលចោរកម្មសរុបចំនួន ៤៧នាក់

អាជ្ញាធររាជធានីភ្នំពេញ បន្តប្រតិបត្តិការបោសសម្អាត Online Scams ត្រួតពិនិត្យ ៨០ ទីតាំងទៀត និងផាកពិន័យម្ចាស់ទីតាំងរស់នៅប្រមូលផ្ដុំចំនួន ៤ទីតាំង

អាវុធហត្ថរាជធានីភ្នំពេញ បង្ក្រាបទីតាំងលក់សម្ភារៈអាសអាភាសចំនួន ៣កន្លែង ឃាត់ខ្លួនជនសង្ស័យ ៩នាក់

គណៈបញ្ជាការឯកភាពរាជធានី បន្តចុះបង្ក្រាប Online Scams នៅសង្កាត់ចាក់អង្រែលើ ឃាត់មនុស្ស១៦នាក់

សន្តិសុខ និង សង្គម

បុរសម្នាក់ត្រូវបានចោទពីបទបើកបរក្នុងស្ថានភាពស្រវឹង បន្ទាប់បុករថយន្តក្នុងក្បួនរថយន្តលោក Biden

នគរបាលបាននិយាយកាលពីថ្ងៃចន្ទថា បុរសអាយុ ៤៦ ឆ្នាំម្នាក់ កំពុងប្រឈមមុខនឹងបទចោទប្រកាន់បើកបរក្នុងស្ថានភាពស្រវឹង បន្ទាប់ពីរថយន្តរបស់លោក បានបុករថយន្តអង្គភាពសេវាកម្មសម្ងាត់របស់សហរដ្ឋអាមេរិក ដែលអមដំណើរក្នុងក្បួនរថយន្តរបស់ប្រធានាធិបតី លោក Joe Biden។ ឧបទ្ទវហេតុនេះ បានកើតឡើងកាលពីល្ងាចថ្ងៃអាទិត្យមានចម្ងាយប្រហែល ៤០ ម៉ែត្រ ពីលោក Biden នៅពេលដែលលោកបានចាកចេញពីទីស្នាក់ការកណ្តាលយុទ្ធនាការបោះឆ្នោតប្រធានាធិបតីរបស់លោកនៅទីក្រុង Wilmington រដ្ឋ Delaware ។នគរបាលនិយាយថា វាគឺជា «ការប៉ះទង្គិចដោយចៃដន្យ» ហើយអ្នកបើកបរជាបុរស នៅទីក្រុងWilmington ដែលមិនស្គាល់អត្តសញ្ញាណ ត្រូវបានចោទប្រកាន់ពីបទបើកបររថយន្ត ក្រោមឥទ្ធិពលនៃជាតិស្រវឹង និងការបើកបរមិនប្រុងប្រយ័ត្ន។បុគ្គលិកសន្តិសុខ បានប្រញាប់ប្រញាល់នាំលោកប្រធានាធិបតី ចូលទៅក្នុងរថយន្តដែលកំពុងរង់ចាំបន្ទាប់ពីឧបទ្ទវហេតុនេះ ហើយលោកត្រូវបានគេជូនដំណើរទៅកាន់លំនៅឋានក្នុងតំបន់របស់លោក។

ភ្នំភ្លើងរបស់ប្រទេសអ៊ីស្លង់ បានផ្ទុះបន្ទាប់ពីសកម្មភាពរញ្ជួយដីអស់ជាច្រើនសប្តាហ៍

ការិយាល័យឧតុនិយមរបស់ប្រទេសអ៊ីស្លង់ បាននិយាយថា ភ្នំភ្លើងមួយបានផ្ទុះឡើងកាលពីល្ងាចថ្ងៃច័ន្ទ (១៨ ធ្នូ) នៅភាគនិរតីប្រទេសអ៊ីស្លង់ ដោយបានបញ្ចេញកម្អែភ្នំភ្លើង និងផ្សែងពាសពេញតំបន់ធំទូលាយ បន្ទាប់ពីសកម្មភាពរញ្ជួយដីដ៏ខ្លាំងក្លាអស់ជាច្រើនសប្តាហ៍ ដែលគំរាមកំហែងដល់ទីក្រុងក្បែរនោះ។ដោយភ័យខ្លាចការផ្ទុះដ៏ខ្លាំងមួយនៅលើឧបទ្វីប រ៉ៃក្យាណេស (Reykjanes) ក្រុមអាជ្ញាធរកាលពីខែមុនបានជម្លៀសប្រជាជនជិត ៤.០០០នាក់នៃទីក្រុងនេសាទ ហ្គ្រីនដាវីក (Grindavik) ហើយបានបិទស្ប៉ាទឹកក្ដៅ ប្លូ ឡាហ្គន (Blue Lagoon) ដ៏ធំនៅក្បែរនោះ។ការិយាល័យឧតុនិយម បាននិយាយនៅលើគេហទំព័ររបស់ខ្លួនថា «ការព្រមាន៖ ការផ្ទុះបានចាប់ផ្តើមនៅភាគខាងជើងនៃទីក្រុង ហ្គ្រីនដាវីក ពីភ្នំហាហ្កាហ្វែល (Hagafell)» ដោយបញ្ជាក់ថាការផ្ទុះបានចាប់ផ្តើមត្រឹមតែចម្ងាយពីរបីគីឡូម៉ែត្រពីទីក្រុងប៉ុណ្ណោះ ហើយស្នាមប្រេះនៅក្នុងដីលាតសន្ធឹងឆ្ពោះទៅភូមិដែលមានចម្ងាយប្រហែល ៤០គីឡូម៉ែត្រ ភាគនិរតីនៃរដ្ឋធានី រ៉ៃក្យាវីក (Reykjavik) របស់ប្រទេសអ៊ីស្លង់។ការិយាល័យឧតុនិយម បាននិយាយថា កម្អែលភ្នំភ្លើងប្រហែល ១០០ម៉ែត្រគូបទៅ ២០០ម៉ែត្រគូប បានផុសឡើងក្នុងមួយវិនាទី ដែលមានកម្រិតច្រើនដងច្រើនជាងការផ្ទុះពីមុននៅក្នុងតំបន់។ នគរបាលក្នុងតំបន់បាននិយាយថា ពួកគេបានបង្កើនកម្រិតប្រកាសអាសន្នជាលទ្ធផលនៃការផ្ទុះភ្នំភ្លើងនេះ ហើយទីភ្នាក់ងារការពារស៊ីវិលរបស់ប្រទេសនេះបានព្រមានសាធារណជនកុំឱ្យចូលទៅជិតតំបន់នោះ ខណៈដែលបុគ្គលិកសង្គ្រោះបន្ទាន់បានវាយតម្លៃស្ថានភាព៕

សមាជិកសភាគណបក្សប្រជាធិបតេយ្យព្រមានថា យុទ្ធសាស្ត្ររបស់អ៊ីស្រាអែល នៅហ្កាហ្សា អាចបរាជ័យ និងធ្វើឲ្យភាពជ្រុលនិយមកើនឡើង

សមាជិកសភាប្រជាធិបតេយ្យមួយចំនួនដែលបានបម្រើការក្នុងជួរយោធា និងនៅក្នុង CIA និយាយថា យុទ្ធសាស្ត្ររបស់អ៊ីស្រាអែល នៅតំបន់ហ្កាហ្សាស្ទ្រីប គឺជាកិច្ចខិតខំប្រឹងប្រែងដ៏គ្រោះថ្នាក់ ដើម្បីកម្ចាត់ក្រុម សកម្មប្រយុទ្ធហាម៉ាស ហើយបានអំពាវនាវឲ្យប្រធានាធិបតី ចូ បៃដិន ប្រើ «ឥទ្ធិពលរបស់យើងទាំងអស់» ដើម្បីទទួលបានការផ្លាស់ប្តូរភ្លាមៗ នៅក្នុងវិធីសាស្រ្តរបស់អ៊ីស្រាអែល។នៅក្នុងលិខិតមួយច្បាប់ផ្ញើទៅកាន់លោកបៃដិន កាលពីថ្ងៃចន្ទ សមាជិកសភា បាននិយាយថា ពួកគេមាន «ការព្រួយបារម្ភយ៉ាងខ្លាំង» ចំពោះយុទ្ធសាស្ត្រយោធាបច្ចុប្បន្នរបស់នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ នៅក្នុងតំបន់ហ្កាហ្សា។ក្រុមសមាជិកសភានេះ បានសរសេរថា៖«ចំនួនអ្នកស្លាប់ជនស៊ីវិលកើនឡើង និងវិបត្តិមនុស្សធម៌ គឺមិនអាចទទួលយកបាន ហើយមិនសមស្របនឹងផលប្រយោជន៍របស់អាមេរិក។ ពួកគេ ក៏មិនជំរុញបុព្វហេតុសន្តិសុខសម្រាប់សម្ព័ន្ធមិត្តរបស់យើង គឺអ៊ីស្រាអែលនោះទេ»។លិខិតនោះ បានឲ្យដឹងថា៖«យើងក៏ជឿថា វាធ្វើឲ្យប៉ះពាល់ដល់កិច្ចខិតខំប្រឹងប្រែង ដើម្បីបំផ្លាញអង្គការភេរវកម្មហាម៉ាស និងធានាការដោះលែងចំណាប់ថ្នូរទាំងអស់»។លិខិតនេះ បានកើតឡើងចំពេលមានភាពតានតឹងកាន់តែខ្លាំងឡើងរវាងរដ្ឋបាលលោកបៃដិន និងអ៊ីស្រាអែល អំពីរបៀបដែលកងកម្លាំងអ៊ីស្រាអែល កំពុងធ្វើការវាយលុកប្រឆាំងនឹងក្រុមហាម៉ាស នៅតំបន់ហ្កា ហ្សា និងបង្កើនការខកចិត្តក្នុងចំណោមសមាជិកបក្សប្រជាធិបតេយ្យរបស់លោកបៃដិន នៅក្នុងសភា។ កិច្ចប្រជុំកាលពីសប្តាហ៍មុនរវាងសមាជិកសភា និងឯកអគ្គរដ្ឋទូតអ៊ីស្រាអែលប្រចាំនៅសហរដ្ឋអាមេរិក បានបរាជ័យ ដោយមិនបានធ្វើឲ្យសមាជិកសភាគណបក្សប្រជាធិបតេយ្យមានជំនឿទុកចិត្ត។

អ៊ុយក្រែន បង្ខំចិត្តកាត់បន្ថយប្រតិបត្តិការយោធានៅសមរភូមិ ខណៈជំនួយបរទេសជិតអស់

អ៊ុយក្រែន បានព្រមានថា ខ្លួនកំពុងត្រូវបានបង្ខំឱ្យកាត់បន្ថយប្រតិបត្តិការយោធាមួយចំនួន រួចទៅហើយ ដោយសារការធ្លាក់ចុះជំនួយបរទេស។លោក ឧត្តមសេនីយឯក អូឡេកសានឌ័រ តាណាវស្គី (Oleksandr Tarnavskyi) បាននិយាយថា កងទ័ពប្រឈមនឹងកង្វះគ្រាប់រំសេវនៅតាមសមរភូមិជួរមុខទាំងអស់ ដែលបង្កកជាបញ្ហាធំ សម្រាប់ទីក្រុង គីវ (Kyiv) ។ការប្រកាសនេះ កើតឡើងនៅពេលដែលជំនួយរបស់សហរដ្ឋអាមេរិក និងសហភាពអឺរ៉ុបរាប់ពាន់លានដុល្លារត្រូវបានជា់គាំង ស្របពេលមានជម្លោះខាងនយោបាយ។អ៊ុយក្រែនបាននិយាយថា ខ្លួន បានសង្ឃឹមថានឹងជំរុញឧស្សាហកម្មគ្រាប់រំសេវរបស់ខ្លួនដោយមានជំនួយពីលោកខាងលិច។ប៉ុន្តែអ៊ុយក្រែនពឹងផ្អែកខ្លាំងលើការផ្គត់ផ្គង់របស់លោកខាងលិច ជាពិសេសលើការដឹកជញ្ជូនមីស៊ីលរយៈចម្ងាយឆ្ងាយ និងប្រព័ន្ធការពារដែនអាកាស ដើម្បីប្រយុទ្ធប្រឆាំងនឹងការកាន់កាប់របស់កងកម្លាំងរុស្ស៊ី។ លោកបាននិយាយថា ការកាត់បន្ថយជំនួយយោធាបរទេសកំពុងប៉ះពាល់ដល់សមរភូមិរួចហើយ ហើយបង្ខំឲ្យមានការផ្លាស់ប្តូរយុទ្ធសាស្ត្រ។ ការអត្ថាធិប្បាយរបស់លោកកើតឡើងបន្ទាប់ពីមានការធ្លាក់ចុះការគាំទ្រទាំងក្នុងសហភាពអឺរ៉ុប និងសហរដ្ឋអាមេរិក។ គណបក្សសាធារណរដ្ឋនៅក្នុងសភាអាមេរិកជាលើកដំបូងបានរារាំងកញ្ចប់យោធា ចំនួន ៦០ពាន់លានដុល្លារអាមេរិក សម្រាប់អ៊ុយក្រែននៅដើមខែនេះ។ អ៊ុយក្រែនកំពុងប្រឈមនឹងកង្វះ គ្រាប់រំសេវរួចទៅហើយ ខណៈមហាអំណាចលោកខាងលិចព្យាយាមបន្តការផ្គត់ផ្គង់។ សហភាពអឺរ៉ុបបានសន្យាថានឹងបញ្ជូនកាំភ្លើងធំមួយលានគ្រាប់នៅខែមីនាឆ្នាំ ២០២៤ ប៉ុន្តែរហូតមកដល់ពេលនេះមានតែ ចំនួន ៤៨០.០០០គ្រាប់ ប៉ុណ្ណោះដែលត្រូវបានបញ្ជូនទៅ ឬកំពុងស្ថិតនៅក្នុងដំណាក់កាលបញ្ចូននៅឡើយ៕

នៅទីក្រុងប៉ារីស រដ្ឋមន្ត្រីការបរទេសអង់គ្លេស នឹងអំពាវនាវឲ្យមានការសម្របសម្រួលអឺរ៉ុប កាន់តែខ្លាំងឡើងលើបញ្ហាតំបន់ហ្កាហ្សា

ការិយាល័យរបស់ខ្លួន បាននិយាយថា រដ្ឋមន្ត្រីការបរទេសអង់គ្លេសលោក David Cameron នឹងអំពាវនាវឲ្យបង្កើនការសម្របសម្រួលរវាងសម្ព័ន្ធមិត្តទាំងអស់ ដើម្បីដោះស្រាយស្ថានការណ៍មនុស្សធម៌ «ដ៏អស់សង្ឃឹម» នៅតំបន់ហ្កាហ្សា ក្នុងអំឡុងដំណើរទស្សនកិច្ចទៅកាន់ទីក្រុងប៉ារីស និងទីក្រុងរ៉ូម នៅថ្ងៃអង្គារនេះ។លោក Cameron អតីតនាយករដ្ឋមន្រ្ដី ដែលបានចូលកាន់តួនាទីជារដ្ឋមន្ត្រីការបរទេសប្រហែលមួយខែកន្លងទៅនេះ បាននិយាយថា៖«នៅពេលដែលយើងប្រឈមមុខនឹងបញ្ហាប្រឈមដ៏ធំបំផុតមួយចំនួនចំពោះសន្តិសុខអន្តរជាតិ ការឆ្លើយតបរបស់យើង ត្រូវតែមានការរួមកម្លាំង និងកិច្ចខិតខំប្រឹងប្រែងជាមួយសម្ព័ន្ធមិត្តអឺរ៉ុបរបស់យើង»។លោក បាននិយាយនៅក្នុងសេចក្តីថ្លែងការណ៍មួយថា៖«ពីស្ថានភាពមនុស្សធម៌ដ៏អស់សង្ឃឹម នៅតំបន់ហ្កា ហ្សា រហូតដល់ភាពឃោរឃៅរបស់ (ប្រធានាធិបតីរុស្ស៊ី វ្ល៉ាឌីមៀ) ពូទីននៅអ៊ុយក្រែន វាមានសារៈសំខាន់ជាងពេលណាទាំងអស់ ក្នុងការពង្រឹងសម្ព័ន្ធភាពរបស់យើង និងធ្វើឲ្យប្រាកដថា សំឡេងរបស់យើងត្រូវបានគេឮ»។លោក Cameron គ្រោងនឹងជំរុញឲ្យមានការបន្តគាំទ្រដល់ទីក្រុងទីក្រុង ក្នុងជំនួបជាមួយសមភាគីបារាំងលោកស្រី Catherine Colonna និងលោក ប្រធានាធិបតី អេម៉ានូអែល ម៉ាក្រុង ( Emmanuel Macron) នៅទីក្រុងប៉ារីស។ ការិយាល័យរបស់លោកម៉ាក្រុង បាននិយាយថា ក្រុមមេដឹកនាំ នឹងពិភាក្សាអំពីអ៊ុយក្រែន និងស្ថានភាពនៅមជ្ឈិមបូព៌ា។

អាមេរិក ជំរុញឲ្យអ៊ីស្រាអែល ប្រឹងប្រែងបន្ថែមទៀត ដើម្បីការពារជីវិលជនស៊ីវិល ក្នុងសង្រ្គាមជាមួយក្រុមហាម៉ាស

រដ្ឋមន្ត្រីការពារជាតិអាមេរិក លោក ឡយអូស្ទីន(Lloyd Austin)បាននិយាយកាលពីថ្ងៃចន្ទ ទី១៨ ខែធ្នូ ថា ការគាំទ្ររបស់ក្រុងវ៉ាស៊ីនតោន ចំពោះអ៊ីស្រាអែល គឺមិនងាករេឡើយ ប៉ុន្តែលោកបានជំរុញឱ្យសម្ព័ន្ធមិត្តរបស់ខ្លួន ប្រឹងប្រែងបន្ថែមទៀតដើម្បីការពារជនស៊ីវិល ខណៈសង្គ្រាមប្រឆាំងនឹងក្រុមហាម៉ា បាននាំមកនូវការស្លាប់រង្គាល និងការបំផ្លិចបំផ្លាញបន្ថែមទៀតដល់ប្រជាជនប៉ាឡេស្ទីន នៅតំបន់ហ្កាហ្សាស្ទ្រីប។ ថ្លែងក្នុងអំឡុងដំណើរទស្សនកិច្ចទៅកាន់ប្រទេសអ៊ីស្រាអែល លោក ឡយ បាននិយាយថា ក្រុមហាម៉ាសគឺជា ក្រុមភេរវកម្មជ្រុលនិយម ដែលមិនត្រូវឲ្យមានធ្វើការវាយប្រហារលើអ៊ីស្រាអែលពីតំបន់ហ្កាហ្សាទៀតទេ។ ដំណើរទស្សនកិច្ចរបស់លោក បានកើតឡើងស្របពេលមានការព្រួយបារម្ភកាន់តែខ្លាំងឡើងពីបណ្ដារដ្ឋាភិបាលបរទេស និងអង្គការអន្តរជាតិជុំវិញនានា ចំនួនការស្លាប់ក្នុងចំណោមជនស៊ីវិលនៅតំបន់ហ្កាហ្សា ពីការទម្លាក់គ្រាប់បែករបស់អ៊ីស្រាអែល ក៏ដូចជាការកើនឡើងនៃភាពអត់ឃ្លាន និងគ្រោះទុរ្ភិក្ស។រដ្ឋមន្ត្រីការពារជាតិអ៊ីស្រាអែលបាននិយាយកាលពីថ្ងៃចន្ទថា ពួកគេនឹងផ្លាស់ប្តូរជាបណ្តើរៗទៅកាន់ដំណាក់កាលបន្ទាប់នៃប្រតិបត្តិការរបស់ខ្លួននៅតំបន់ហ្កាហ្សា ដែលប្រជាជនក្នុងតំបន់ទំនងជាអាចត្រឡប់ទៅភាគខាងជើងនៃឆ្នេរសមុទ្រជាលើកដំបូង។ រដ្ឋមន្ត្រីការពារជាតិ លោក យ៉ាវ ហ្គាឡិន (Yoav Gallant) បាននិយាយនៅក្នុងសន្និសីទសារព័ត៌មានរួមគ្នាមួយជាមួយសមភាគីអាមេរិកលោក លោកអូស្ទីន នៅទីក្រុង Tel Aviv ថាលោកអាចប្រាប់អ្នកគ្រប់គ្នាថា ឆាប់ៗនេះ យើងនឹងអាចបែងចែករវាងតំបន់ផ្សេងៗគ្នានៅក្នុងតំបន់ហ្កាហ្សា៕

អ៊ីស្រាអែល ផ្ដល់សញ្ញាពីការផ្លាស់ប្តូរបន្តិចម្តងៗ ក្នុងសង្រ្គាមហ្កាហ្សា បន្ទាប់ពីទស្សនកិច្ចពីប្រមុខការពារជាតិអាមេរិក

រដ្ឋមន្ត្រីការពារជាតិរបស់អ៊ីស្រាអែល បាននិយាយកាលពីថ្ងៃច័ន្ទ (១៨ ធ្នូ) ថាអ៊ីស្រាអែល នឹងផ្លាស់ប្តូរជាបណ្តើរៗទៅកាន់ដំណាក់កាលបន្ទាប់នៃប្រតិបត្តិការនៅតំបន់ហ្កាហ្សា បន្ទាប់ពីកិច្ចពិភាក្សាជាមួយរដ្ឋមន្ត្រីការពារជាតិអាមេរិក លោក ឡយដ៍ អស្ទីន (Lloyd Austin) អំពីការប្រយុទ្ធដែលមានកម្រិតទាប និងវិធីកាត់បន្ថយគ្រោះថ្នាក់ដល់ជនស៊ីវិល។រដ្ឋមន្ត្រីការពារជាតិ លោក យ៉ាវ ហ្កាឡាន់ (Yoav Gallant) បាននិយាយថា ប្រជាជនក្នុងតំបន់ទំនងជាអាចត្រឡប់ទៅភាគខាងជើងហ្កាហ្សា ដែលជាតំបន់មានប្រជាជនច្រើនជាងគេបំផុតនៃតំបន់ហ៊ុមព័ទ្ធមេឌីទែរ៉ាណេ មុនពេលការលុកលុយរបស់អ៊ីស្រាអែល ក្នុងការសងសឹកចំពោះការវាយប្រហាររបស់ក្រុមសកម្មប្រយុទ្ធហាម៉ាស កាលពីថ្ងៃទី០៧ ខែតុលា។លោក អស្ទីន និងលោក ហ្កាឡាន់ មិនបានផ្តល់ពេលវេលាសម្រាប់ការផ្លាស់ប្តូរទៅរកអ្វីដែលលោក អស្ទីន ហៅថា «ប្រតិបត្តិការកាត់បន្ថយគ្រោះថ្នាក់ដល់ជនស៊ីវិល» នោះទេ។ ភាគច្រើននៃអ្នកស្រុកភាគខាងជើងនៃតំបន់ហ្កាហ្សា បានធ្វើតាមការណែនាំរបស់អ៊ីស្រាអែល ក្នុងការជម្លៀសខ្លួនទៅភាគខាងត្បូង ជាទីដែលយោធាប្រាប់ប្រជាជនឱ្យបន្តជម្លៀសជាប្រចាំ ស្របពេលមានការវាយប្រហារតាមអាកាស និងការប្រយុទ្ធគ្នាដោយកាំភ្លើងជាមួយអ្នកប្រយុទ្ធមកពីក្រុមអ៊ីស្លាមនិយមមួយនេះ។សម្ពាធអន្តរជាតិសម្រាប់បទឈប់បាញ់បានកើនឡើងយ៉ាងខ្លាំងលើអ៊ីស្រាអែល ជុំវិញការស្លាប់ជនស៊ីវិលជាង ១៩.០០០នាក់ ដែលបណ្តាលមកពីយុទ្ធនាការទម្លាក់គ្រាប់បែកដ៏បង្ហូរឈាម និងសង្រ្គាមជើងគោកក្នុងគោលបំណងបំផ្លាញក្រុមហាម៉ាស ដែលគ្រប់គ្រងតំបន់ហ្កាហ្សា និងប្រយុទ្ធតាមបែបទ័ពព្រៃពីបណ្តាញផ្លូវរូងក្រោមដីក្នុងទីក្រុងនេះ៕

កងទ័ពជើងទឹកអាមេរិក វាយប្រហារស្ទាក់ចាប់បានយានដ្រូនចំនួន ១៤គ្រឿង នៅសមុទ្រក្រហម

សារព័ត៌មាន Al Jazeera រាយការណ៍ថា ជាការឆ្លើយតបទៅនឹងការគំរាមកំហែងកាន់តែខ្លាំងឡើង នៅក្នុងសមុទ្រក្រហម កងទ័ពជើងទឹកអាមេរិក និងចក្រភពអង់គ្លេស បានវាយប្រហារស្ទាក់ចាប់ដោយជោគជ័យនូវយានដ្រូនចំនួន ១៥គ្រឿង ដែលមានប្រភពមកពីតំបន់គ្រប់គ្រងដោយក្រុមហ៊ូធីនៃប្រទេសយេម៉ែន។ចលនាក្រុមឧទ្ទាមហ៊ូធី បានបង្ហាញពីចេតនារបស់ពួកគេ ក្នុងការបន្តការវាយប្រហារក្នុងគោលបំណងដាក់សម្ពាធលើអ៊ីស្រាអែល ឲ្យមានបទឈប់បាញ់នៅតំបន់ហ្កាហ្សា។ ភាពតានតឹង ដែលកំពុងកើនឡើងនេះ បន្ថែមទៅលើការព្រួយបារម្ភអំពីសង្គ្រាមរបស់អ៊ីស្រាអែលលើក្រុមហាម៉ាស ដែលកំពុងក្លាយទៅជាជម្លោះក្នុងតំបន់។សហរដ្ឋអាមេរិក បានរារាំងអ៊ីស្រាអែលកុំឲ្យបង្កើនសង្គ្រាមដែនសមុទ្រជាមួយក្រុមហ៊ូធីនេះ។ទីបញ្ជាការកណ្តាលរបស់សហរដ្ឋអាមេរិក (CENTCOM) បានរាយការណ៍ថា នាវាពិឃាតបំពាក់ដោយ មីស៊ីលតម្រង់គោលដៅ USS Carney បានបាញ់ទម្លាក់យានដ្រូនចំនួន ១៤គ្រឿង កាលពីថ្ងៃសៅរ៍ ដោយហៅឧបទ្ទវហេតុនេះថាជា «យានដ្រូនវាយប្រហារទៅលើគោលដៅតែមួយ»។នាវាពិឃាដ Royal Navy របស់ចក្រភពអង់គ្លេស ឈ្មោះ HMS Diamond បានចូលរួមកិច្ចខិតខំប្រឹងប្រែងនេះ ដោយបានដាក់ពង្រាយមីស៊ីល Sea Viper ហើយបានកម្ទេចយានដ្រូនមួយគ្រឿង ដែលកំណត់គោលសំដៅជាពិសេសទៅលើការដឹកជញ្ជូនទំនិញ។

អ៊ីស្រាអែលវាយប្រហារតំបន់ហ្កាហ្សា ខណៈសម្ពាធកើនឡើង ដើម្បីឲ្យដោះលែងចំណាប់ថ្នូរបន្ថែមទៀត

អ៊ីស្រាអែល បានធ្វើការវាយប្រហារថ្មីៗលើតំបន់ហ្កាហ្សា កាលពីថ្ងៃអាទិត្យ ខណៈដែលមេដឹកនាំរបស់ខ្លួនស្ថិតនៅក្រោមសម្ពាធកាន់តែខ្លាំងឡើង ដើម្បីធានាការដោះលែងចំណាប់ថ្នូរ ដែលនៅតែត្រូវបានឃុំខ្លួននៅក្នុងទឹកដីគ្រប់គ្រងដោយក្រុមហាម៉ាសច្រើនជាងពីរខែ បន្ទាប់ពីការវាយប្រហារកាលពីថ្ងៃទី ៧ខែតុលា។លោកនាយករដ្ឋមន្ត្រី បេនចាមីន ណេតាន់យ៉ាហ៊ូ (Benjamin Netanyahu) បានប្រឈមមុខនឹងការតវ៉ាកាលពីថ្ងៃសៅរ៍ ដោយសាច់ញាតិរបស់ចំណាប់ថ្នូរដែលបានអំពាវនាវឲ្យមានកិច្ចព្រមព្រៀងបន្ទាន់មួយដើម្បីទទួលបានសេរីភាពរបស់ពួកគេ បន្ទាប់ពីកងទ័ព បានសារភាពថា បានសម្លាប់ចំណាប់ថ្នូរបីនាក់ដោយច្រឡំ នៅហ្កាហ្សា។អ្នកទាំងបី គឺស្ថិតក្នុងចំណោមមនុស្សប្រមាណ ២៥០នាក់ ដែលត្រូវបានចាប់ធ្វើជាចំណាប់ថ្នូរក្នុងអំឡុងពេលការវាយឆ្មក់ថ្ងៃទី៧ ខែតុលារបស់ក្រុមហាម៉ាសចូលទៅក្នុងប្រទេសអ៊ីស្រាអែល ដែលបានសម្លាប់មនុស្សប្រហែល ១.១៤០នាក់ផងដែរ នេះបើយោងតាមតួលេខចុងក្រោយរបស់អាជ្ញាធរអ៊ីស្រាអែល។យោងតាមក្រុមហាម៉ាស ការវាយលុកសងសឹករបស់អ៊ីស្រាអែល នៅតំបន់ហ្កាហ្សា បានសម្លាប់មនុស្ស ១៨.៨០០នាក់ ដែលភាគច្រើនជាស្ត្រី និងកុមារ។នៅឯការតវ៉ាមួយ នៅទីក្រុងតែលអាវីវ (Tel Aviv) កាលពីថ្ងៃសៅរ៍ សាច់ញាតិរបស់ចំណាប់ថ្នូរ បានប្រមូលផ្តុំគ្នា ដើម្បីអង្វរសុំឲ្យរដ្ឋាភិបាលមានកិច្ចព្រមព្រៀងដោះលែងចំណាប់ថ្នូរបន្ថែមទៀត។

រុស្ស៊ី អះអាងថាបានវាយរុញច្រានអ៊ុយក្រែន ខណៈអ៊ុយក្រែនថាខ្លួនបានកម្ទេចគោលដៅជាច្រើរបស់រុស្ស៊ី

យោងតាមការធ្វើបច្ចុប្បន្នភាពចុងក្រោយដែលបានចេញផ្សាយដោយភាគីជម្លោះទាំងពីរបានឲ្យដឹងថា កាលពីថ្ងៃអាទិត្យ រុស្ស៊ី បានអះអាងថា ខ្លួនបានវាយរុញច្រានការវាយលុករបស់អ៊ុយក្រែនក្នុងទិសដៅជាច្រើន ខណៈអ៊ុយក្រែននិយាយថា កងកម្លាំងរបស់ខ្លួនបានវាយប្រហារលើគោលដៅច្រើនកន្លែងរបស់រុស្ស៊ី ក្នុងរយៈពេល២៤ម៉ោងមុន។ ក្រសួងការពារជាតិរុស្ស៊ី បាននិយាយនៅក្នុងរបាយការណ៍មួយដែលបានចេញផ្សាយកាលពីថ្ងៃអាទិត្យថា យោធារុស្ស៊ី បានវាយរុញច្រានការវាយលុករបស់អ៊ុយក្រែននៅតំបន់ Kupyansk, Krasnyi Lyman និងគោលដៅផ្សេងៗទៀត និងបានវាយប្រហារលើបុគ្គលិកយោធាអ៊ុយក្រែន ព្រមទាំងគោលដៅជាច្រើន រួមទាំងឃ្លាំងផ្ទុកប្រេងយន្តហោះ ប៉ុស្តិ៍ទីបញ្ជាការ និងទីតាំងសង្គ្រាមអេឡិចត្រូនិក។ យោធារុស្ស៊ី បានបំផ្លាញរថក្រោះចំនួន ៤គ្រឿង យានរថពាសដែក៦គ្រឿង កាំភ្លើងធំ៨គ្រឿង កាំភ្លើងធំបាញ់ផ្លោង៤គ្រឿង និងស្ថានីយ៍រ៉ាដាកាំភ្លើងធំដែលផលិតដោយសហរដ្ឋអាមេរិក របស់កងទ័ពអ៊ុយក្រែន ខណៈស្ទាក់ចាប់បានគ្រាប់រ៉ុក្កែត២គ្រាប់ ពីប្រព័ន្ធរ៉ុក្កែត HIMARS និងបានបាញ់ទម្លាក់យន្តហោះចម្បាំង MiG-29 ចំនួន២គ្រឿង និងយន្តហោះចម្បាំង Su-25 មួយគ្រឿង។ នៅថ្ងៃដដែលនោះដែរ នាយសេនាធិការនៃកងកម្លាំងប្រដាប់អាវុធអ៊ុយក្រែន បាននិយាយថា មានការប្រយុទ្ធគ្នា៥៤លើក នៅតំបន់សមរភូមិ ក្នុងរយៈពេល ២៤ ម៉ោងមុននេះ។ កងកម្លាំងទ័ពអាកាសអ៊ុយក្រែន ឧបករណ៍បាញ់គ្រាប់រ៉ុក្កែត និងអង្គភាពកាំភ្លើងធំ បានវាយប្រហារលើគោលដៅជាច្រើនកន្លែង ដូចជាតំបន់ដែលបុគ្គលិកនិងឧបករណ៍យោធារុស្ស៊ីប្រមូលផ្តុំ ទីតាំងការពារដែនអាកាស និងឃ្លាំងគ្រាប់រំសេវ បំផ្លាញកាំភ្លើងធំមួយគ្រឿង និងស្ទាក់ចាប់យានដ្រូនវាយប្រហារចំនួន៧គ្រឿង។ យោងតាមការរាយការណ៍របស់សារព័ត៌មាន Ukrinform ជាទីភ្នាក់ងារព័ត៌មានជាតិរបស់អ៊ុយក្រែន បានឲ្យដឹងថាកាលពីថ្ងៃអាទិត្យថា អង្គភាពសេវាសន្តិសុខ និងកងកម្លាំងប្រដាប់អាវុធអ៊ុយក្រែន បានធ្វើការវាយលុកពេញមួយយប់លើមូលដ្ឋានទ័ពអាកាស Morozovsk ក្នុងតំបន់ Rostov របស់រុស្ស៊ី ដោយយានដ្រូនកាលពីថ្ងៃអាទិត្យ។ សេចក្តីរាយការណ៍និយាយថា នៅពេលនៃការវាយប្រហារនោះ មានយន្តហោះ Su-34 ចំនួន២០គ្រឿង ស្ថានីយ៍រ៉ាដាចំនួន៣ និងឧបករណ៍ផ្សេងទៀតនៅក្នុងមូលដ្ឋានកងទ័ពអាកាសនោះ។

បណ្ដាញសង្គម

ព័ត៌មានថ្មីៗ

ប្រធានាធិបតីមីយ៉ាន់ម៉ាបញ្ជាក់ឡើងវិញពីការប្តេជ្ញាចិត្តចំពោះសន្តិសុខរបស់ឥណ្ឌា

ប្រតិបត្តិករនាវា ជំរុញឲ្យមានច្បាប់ច្បាស់វិលត្រឡប់មកកាន់ច្រកសមុទ្រ Hormuz វិញ

កងទ័ពជើងទឹកបារាំងដោយមានការគាំទ្រពីអង់គ្លេស បានស្កាត់ចាប់នាវាដឹកប្រេងរុស្ស៊ី

EU ជំរុញឲ្យអ៊ីស្រាអែលឈប់បង្កើនភាពតានតឹងផ្នែកយោធា នៅលីបង់ និងគាំទ្រកិច្ចប្រឹងប្រែងការទូត

មន្ត្រី៖ ក្រុមហាម៉ាសនឹងធ្វើកិច្ចពិភាក្សាជាមួយអន្តរការីតំបន់ហ្កាហ្សា នៅអេហ្ស៊ីប

កម្អែហូរចេញពីមាត់ភ្នំភ្លើង Kilauea របស់រដ្ឋហាវ៉ៃ ខណៈការកម្រើកត្រូវបានគេរំពឹងថានឹងកើនឡើង

កិច្ចព្រមព្រៀងពាណិជ្ជកម្មឥណ្ឌា-អាមេរិក ឆ្លុះបញ្ចាំងពីការផ្លាស់ប្តូរពន្ធរបស់ទីក្រុងវ៉ាស៊ីនតោន

អ៊ីស្រាអែល៖ «គ្មានភាពស្ងប់ស្ងាត់ នៅទីក្រុងបេរូត» ទេ បើក្រុមហេសបូឡាមិនបញ្ឈប់ការវាយប្រហារ

វិមានក្រឹមឡាំង៖ អាជ្ញាធរកំពុងធ្វើការដោះស្រាយបញ្ហាបែងចែកប្រេងនៅតំបន់គ្រីមៀ

ពលរដ្ឋជម្លៀសខ្លួនចេញពីតំបន់ជាយក្រុងភាគខាងត្បូងទីក្រុងបេរូត ក្រោយលោក Netanyahu បញ្ជាឲ្យវាយប្រហារក្រុមហេសបូឡា

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877