BTV NEWS

ចៅក្រមស៊ើបសួរសម្រេចឃុំខ្លួនមន្ត្រីនគរបាល-អាវុធហត្ថខេត្តកំពត និងអ្នកទទួលផលចោរកម្មសរុបចំនួន ៤៧នាក់

អាជ្ញាធររាជធានីភ្នំពេញ បន្តប្រតិបត្តិការបោសសម្អាត Online Scams ត្រួតពិនិត្យ ៨០ ទីតាំងទៀត និងផាកពិន័យម្ចាស់ទីតាំងរស់នៅប្រមូលផ្ដុំចំនួន ៤ទីតាំង

អាវុធហត្ថរាជធានីភ្នំពេញ បង្ក្រាបទីតាំងលក់សម្ភារៈអាសអាភាសចំនួន ៣កន្លែង ឃាត់ខ្លួនជនសង្ស័យ ៩នាក់

គណៈបញ្ជាការឯកភាពរាជធានី បន្តចុះបង្ក្រាប Online Scams នៅសង្កាត់ចាក់អង្រែលើ ឃាត់មនុស្ស១៦នាក់

សន្តិសុខ និង សង្គម

លោក Netanyahu ព្រមានពីការចាប់ផ្តើមនៃទីបញ្ចប់សម្រាប់ក្រុមហាម៉ាស និងជំរុញឱ្យចុះចាញ់

នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) បានអំពាវនាវឱ្យក្រុមសកម្មប្រយុទ្ធហាម៉ាស ចុះចាញ់ដោយនិយាយថានេះគឺជា «ការចាប់ផ្តើមនៃទីបញ្ចប់» សម្រាប់អង្គការនេះ ដែលអ៊ីស្រាអែល សហរដ្ឋអាមេរិក និងប្រទេសលោកខាងលិចភាគច្រើនបានកំណត់ថាជាក្រុមភេរវកម្ម។ លោក ណេតាន់យ៉ាហ៊ូ បាននិយាយនៅក្នុងសេចក្តីថ្លែងការណ៍មួយកាលពីថ្ងៃអាទិត្យថា យើងទទួលស្គាល់ថាវានឹងត្រូវការពេលវេលា ប៉ុន្តែការកើនឡើងនៃចំនួនយុទ្ធជនហាម៉ាសដែលចុះចាញ់ បានបង្ហាញពីជំនោរនៃសង្គ្រាមដែលកំពុងផ្លាស់ប្ដូរស្ថានការណ៍។លោក ណេតាន់យ៉ាហ៊ូ បាននិយាយ «ក្នុងរយៈពេលប៉ុន្មានថ្ងៃកន្លងមកនេះ ភេរវករហាម៉ាសរាប់សិបនាក់បានចុះចាញ់នឹងកងកម្លាំងរបស់យើង។ ពួកគេបានដាក់អាវុធចុះ ហើយប្រគល់ខ្លួនឲ្យទាហានដ៏មានវីរភាពរបស់យើង។ នេះនឹងត្រូវការពេលវេលា ហើយសង្រ្គាមនៅតែបន្ត ប៉ុន្តែវាគឺជាការចាប់ផ្តើមនៃចុងបញ្ចប់នៃក្រុមហាម៉ាស»។ការអត្ថាធិប្បាយរបស់លោក ណេតាន់យ៉ាហ៊ូ បានកើតឡើងខណៈឧត្តមសេនីយរបស់កងពលតូចការពារអ៊ីស្រាអែលដែលចូលនិវត្តន៍ លោក អាម៊ឺ អាវីវី (Amir Avivi) បាននិយាយថា អ៊ីស្រាអែលជិតទទួលបានការគ្រប់គ្រងនៅតំបន់ហ្កាហ្សា ភាគខាងជើងទាំងមូល ហើយការប្រយុទ្ធគ្នាយ៉ាងខ្លាំងក្លានៅតែបន្តនៅភាគខាងត្បូង នៅក្នុងតំបន់នេះ និងជុំវិញទីក្រុងខាន់ យ៉ូនីស (Khan Younis)។អ៊ីស្រាអែលបានធ្វើការវាយប្រហារតាមអាកាសប្រឆាំងនឹងភាគកណ្តាលហ្កាហ្សាពេញមួយយប់ ដោយបានវាយប្រហារជំរំភៀសខ្លួនក្នុងចំណោមគោលដៅផ្សេងទៀតគឺជំរំជន ន ម៉ាហ្កាហ្ស៊ី (Maghazi) និងជំរំ នុសៃរ៉ាត (Nuseirat)។ ការវាយប្រហារតាមអាកាសនេះក៏បានវាយប្រហារទៅលើលំនៅដ្ឋាននៅភាគខាងលិចនៃទីក្រុងព្រំដែនរ៉ាហ្វាហ្វ និងនៅក្នុងសង្កាត់កណ្តាលនៃទីក្រុង ដែលត្រូវបានកំណត់ថាជាតំបន់ «សុវត្ថិភាព»៕

វេជ្ជបណ្ឌិតអ៊ីស្រាអែល៖ ចំណាប់ថ្នូរ ត្រូវបានគេឲ្យប្រើប្រាស់គ្រឿងញៀន និងធ្វើបាប នៅតំបន់ហ្កាហ្សា

អ្នកជំនាញម្នាក់បាននិយាយកាលពីថ្ងៃចន្ទថា ចំណាប់ថ្នូរដែលត្រូវបានចាប់ខ្លួនចូលទៅក្នុងតំបន់ហ្កាហ្សាក្នុងអំឡុងពេលការវាយប្រហារថ្ងៃទី៧ ខែតុលារបស់ក្រុមហាម៉ាសលើប្រទេសអ៊ីស្រាអែល ត្រូវបានគេឲ្យប្រើប្រាស់គ្រឿងញៀន ដើម្បីឲ្យពួកគេនៅស្ងៀមក្នុងការជាប់ឃុំឃាំង និងទទួលរងការរំលោភបំពានផ្លូវចិត្ត និងផ្លូវភេទ។លោកស្រី Renana Eitan ប្រធានផ្នែកចិត្តសាស្រ្តនៃមជ្ឈមណ្ឌលវេជ្ជសាស្ត្រ Tel Aviv Sourasky-Ichilov បាននិយាយថា៖«ខ្ញុំមិនដែលឃើញអ្វីដូចនេះទេ ក្នុងរយៈពេល២០ឆ្នាំនៃការព្យាបាលជនរងគ្រោះដែលរបួសធ្ងន់ធ្ងរ»។លោកស្រី បានបន្ថែមថា៖ «រំលោភបំពានផ្លូវកាយ ផ្លូវចិត្ត ផ្លូវភេទលើចំណាប់ថ្នូរទាំងនេះ ដែលបានកើតឡើងនេះ គឺគួរឲ្យខ្លាចណាស់»។ «យើងត្រូវសរសេរសៀវភៅសិក្សាឡើងវិញ»។មជ្ឈមណ្ឌលនេះ បានទទួលអតីតចំណាប់ថ្នូរចំនួន ១៤នាក់ដែលត្រូវបានដោះលែងដោយក្រុមហាម៉ាស ដែលមួយចំនួន បានរាយការណ៍ថា ត្រូវបានគេឲ្យប្រើប្រាស់គ្រឿងញៀន រួមទាំងអ្វីដែលគ្រូពេទ្យជឿថាជាថ្នាំជួយឲ្យដេកលក់ (benzodiazapines) ដែលជាប្រភេទថ្នាំជំនួយដល់ការធ្លាក់ទឹកចិត្ត ដែលរួមមានដូចជាថ្នាំសណ្តំ(Valium)ជាដើម។លោកស្រី បានបន្ថែមថា៖«ពួកគេចង់គ្រប់គ្រងកុមារ ហើយជួនកាលវាពិបាកក្នុងការគ្រប់គ្រងកុមារតូចៗ ក្មេងជំទង់ ហើយពួកគេដឹងថា ប្រសិនបើឲ្យពួកគេប្រើប្រាស់គ្រឿងញៀន ពួកគេ នឹងត្រូវស្ងប់ស្ងៀម។

ផ្លូវសមុទ្រម៉េឌីទែរ៉ាណេទៅអឺរ៉ុប នៅតែមមាញឹកបំផុតសម្រាប់ជនអន្តោប្រវេសន៍មិនទៀងទាត់

ទីភ្នាក់ងារត្រួតពិនិត្យព្រំដែនរបស់សហភាពអឺរ៉ុប បាននិយាយកាលពីថ្ងៃចន្ទថា ការឆ្លងកាត់ព្រំដែនមិនទៀងទាត់ ចូលទៅក្នុងសហភាពអឺរ៉ុប (EU) បានកើនឡើងយ៉ាងខ្លាំងនៅឆ្នាំនេះ។ យោងតាមទិន្នន័យដែលចេញផ្សាយដោយទីភ្នាក់ងារការពារព្រំដែន និងឆ្មាំល្បាតឆ្នេរអឺរ៉ុប (Frontex) បានឲ្យដឹងថា ក្នុងរយៈពេល ១១ ខែដំបូងនៃឆ្នាំ២០២៣ ចំនួននៃការមកដល់បានកើនលើសពីចំនួនសរុបពេញមួយឆ្នាំរួចហើយ នៅក្នុងឆ្នាំនីមួយៗចាប់តាំងពីឆ្នាំ២០១៦មក។ ទីភ្នាក់ងារ Frontex បាននិយាយថា ចំនួនសរុបនៃជនអន្តោប្រវេសន៍មកដល់សហភាពអឺរ៉ុបតាមមធ្យោបាយមិនទៀងទាត់ក្នុងឆ្នាំនេះ បានឈានដល់យ៉ាងហោចណាស់ ៣៥៥.៣០០នាក់ គិតត្រឹមចុងខែវិច្ឆិកា។ ទោះជាយ៉ាងណា ចំនួននៃការមកដល់មិនទៀងទាត់ កំពុងថយចុះ។ ផ្លូវតាមសមុទ្រមេឌីទែរ៉ាណេភាគកណ្តាល ដែលត្រូវបានសម្គាល់ដោយការឆ្លងកាត់ទៅកាន់ប្រទេសអ៊ីតាលី ពីប្រទេសទុយនីស៊ី ឬលីប៊ី នៅតែជាមធ្យោបាយធម្មតាបំផុតក្នុងការចូលទៅកាន់សហភាពអឺរ៉ុប។ ទីភ្នាក់ងារ Frontex បាននិយាយថា តាមផ្លូវនេះមានប្រហែល៤៣ភាគរយ នៃការមកដល់ទាំងអស់ដែលមានច្រើនជាង ១៥២.០០០នាក់ កើនឡើង៦១ភាគរយ បើប្រៀបធៀបទៅនឹងឆ្នាំមុន។ ទន្ទឹមនឹងនេះ ស្នងការជាន់ខ្ពស់អង្គការសហប្រជាជាតិទទួលបន្ទុកជនភៀសខ្លួន បានដាក់តួលេខនេះ ត្រឹមតែជាង ១៥៣.០០០នាក់ប៉ុណ្ណោះ រហូតដល់ថ្ងៃអាទិត្យ។ ទីភ្នាក់ងារ Frontex បានព្រមានថា តួលេខពុំមានលក្ខណៈគ្រប់ជ្រុងជ្រោយនោះទេ ព្រោះវារួមបញ្ចូលតែជនអន្តោប្រវេសន៍ដែលដំណើរការដោយមន្ត្រីរដ្ឋាភិបាលប៉ុណ្ណោះ និងមិនមែនជាអ្នកដែលចូលមកក្នុងប្លុកនេះដោយមិនត្រូវបានរកឃើញ។ ភាគច្រើននៃការមកដល់មិនទៀងទាត់នៃជនអន្តោប្រវេសន៍នៅឆ្នាំនេះ គឺមានមកពីប្រទេសស៊ីរី ហ្គីណេ និងប្រទេសអាហ្វហ្គានីស្ថាន។

UN ព្រមានពីភាពអត់ឃ្លាន និងការដួលរលំសណ្តាប់ធ្នាប់នៅក្នុងតំបន់ហ្កាហ្សា

លោក ហ្វីលីប ឡាហ្សារីណា (PHILIPPE LAZZARINI) អគ្គស្នងការនៃទីភ្នាក់ងារផ្តល់ជំនួយនិងការងារអង្គការសហប្រជាជាតិ(UNRWA) បាននិយាយថា យើងបានស្តាប់ឮជាលើកដំបូងថា ភាពអត់ឃ្លានកំពុងកើតមាននៅហ្កាហ្សា។ មនុស្សកាន់តែច្រើនឡើង ពុំបានទទួលទានមួយថ្ងៃ ពីរថ្ងៃ និងបីថ្ងៃមកហើយ។ លោក ហ្វីលីប ឡាហ្សារីណា (PHILIPPE LAZZARINI) និងបេសកជនផ្សេងទៀតរបស់អង្គការសហប្រជាជាតិ បានទាមទារឱ្យបញ្ចប់សង្រ្គាម ខណៈពួកគេបានធ្វើដំណើរឆ្លងកាត់ឧបទ្វីប Sinai របស់ប្រទេសអេហ្ស៊ីប ទៅកាន់ច្រកព្រំដែន Rafah ជាចំណុចច្រកចូលតែមួយគត់សម្រាប់ការដឹកជញ្ជូនជំនួយចូលទៅតំបន់ប៉ាឡេស្ទីនដែលត្រូវបានហ៊ុមព័ទ្ធ ។ប៉ុន្មានថ្ងៃ បន្ទាប់ពីអគ្គលេខាធិការលោក Antonio Guterres បានព្រមានថា ពលរដ្ឋប៉ាឡេស្ទីនរាប់ពាន់នាក់ កំពុងស្រេកឃ្លាន។ លោកបានព្រមានអំពី ការដួលរលំសណ្តាប់ធ្នាប់ ខណៈភាពស្រេកឃ្លានរីករាលដាល ហើយពលរដ្ឋតំបន់ហ្កាហ្សា ដែលមិនបានទទួលទានជាច្រើនថ្ងៃ បានចូលលួចនៅមជ្ឈមណ្ឌលចែកចាយជំនួយ និងបញ្ឈប់រថយន្តដឹកទំនិញនៅលើផ្លូវក្នុងការពុះពារស្វែងរកអាហារសម្រាប់គ្រួសាររបស់ពួកគេ។ ទុក្ខលំបាក កំពុងបង្កការព្រួយបារម្ភនៃការភៀសខ្លួនទ្រង់ទ្រាយធំទៅកាន់ប្រទេសអេហ្ស៊ីប។លោក Lazzarini បាននិយាយខណៈលោកបានមើលឃើញ នៅក្នុងដំណើរទស្សនកិច្ចចុងក្រោយរបស់លោកទៅកាន់ តំបន់ហ្កាហ្សា ថា ប្រជាជនកំពុងដេកនៅលើបេតុង។ រដូវរងាគឺនៅទីនេះ មានទឹកស្អុយ ពួកគេកំពុងតស៊ូស្វែងរកទឹកស្អាត ពួកគេកំពុងតស៊ូដើម្បីទទួលបានអាហារ។កាលពីថ្ងៃច័ន្ទ ក្រុមសកម្មប្រយុទ្ធ និងប្រជាជនមួយចំនួន បាននិយាយថា ក្រុមអ្នកប្រយុទ្ធកំពុងរារាំងរថក្រោះរបស់អ៊ីស្រាអែល មិនឱ្យធ្វើដំណើរទៅភាគខាងលិចបន្ថែមទៀតកាត់តាមទីក្រុង និងបានប៉ះទង្គិចជាមួយកងកម្លាំងអ៊ីស្រាអែល នៅភាគខាងជើងតំបន់ហ្កាហ្សា ជាកន្លែងដែលអ៊ីស្រាអែល បាននិយាយថា ភារកិច្ចរបស់ខ្លួនបានបញ្ចប់ទាំងស្រុងហើយ។

ជំងឺផ្តាសាយបក្សីបានសម្លាប់សត្វភេ និងសត្វតោសមុទ្រជាង ៩០០ក្បាល នៅភាគខាងត្បូងប្រេស៊ីល

សត្វភេ និងសត្វតោសមុទ្រជិត ១.០០០ក្បាលនៅភាគខាងត្បូងប្រទេសប្រេស៊ីល បានស្លាប់ដោយសារការផ្ទុះឡើងនៃជំងឺគ្រុនផ្តាសាយបក្សី នេះបើយោងតាមសម្ដីក្រុមអាជ្ញាធរដែលកំពុងព្យាយាមទប់ទល់មេរោគដ៏សាហាវនេះចេញពីហ្វូងសត្វបក្សីពាណិជ្ជកម្ម។រដ្ឋ រីអូ ក្រានដេ ដូសុល (Rio Grande do Sul) ចុងភាគខាងត្បូង បានបញ្ជាក់ពីការស្លាប់របស់ថនិកសត្វសមុទ្រចំនួន ៩៤២ក្បាល ដែលមិនធ្លាប់មានពីមុនមក បន្ទាប់ពីការឆ្លងមេរោគដោយជំងឺគ្រុនផ្តាសាយបក្សី(HPAI) ដែលបង្កជាជំងឺធ្ងន់ធ្ងរ និងត្រូវបានរាយការណ៍ជាលើកដំបូងដែលមិនធ្លាប់មាននៅក្នុងប្រទេសអាមេរិកខាងត្បូងមួយនេះក្នុងឆ្នាំនេះ។អ្នកស្រាវជ្រាវមហាសមុទ្រម្នាក់ឈ្មោះ ស៊ីលវីណា បូតា (Silvina Botta) នៅសាកលវិទ្យាល័យសហព័ន្ធ រីអូ ក្រានដេ (FURG) បាននិយាយថា សាកសពសត្វទាំងនោះត្រូវកប់ ឬដុតចោលឱ្យបានឆាប់តាមដែលអាចធ្វើទៅបាន ដើម្បីកាត់បន្ថយហានិភ័យនៃការឆ្លងទៅមនុស្ស ឬសត្វដទៃទៀត។ ក្រុមអ្នកវិទ្យាសាស្ត្រក៏បានរកឃើញថនិកសត្វសមុទ្រមួយចំនួនមានអាការៈប្រកាច់នៅតាមឆ្នេរក្នុងតំបន់នេះផងដែរ ដោយសារវីរុសវាយប្រហារប្រព័ន្ធសរសៃប្រសាទរបស់ពួកវា។ចាប់តាំងពីរបាយការណ៍ដំបូងរបស់ប្រទេសប្រេស៊ីលអំពីជំងឺផ្តាសាយបក្សីប្រភេទ HPAI នេះនៅក្នុងចំណោមបក្សីព្រៃកាលពីខែឧសភាមក ក្រសួងកសិកម្មនិយាយថាវិធានការបង្ការបានដាក់ចេញដើម្បីបញ្ចៀសការផ្ទុះឡើងលើកសិដ្ឋានចិញ្ចឹមសត្វបក្សីដែលអាចបង្កឱ្យមានការហាមឃាត់ការនាំចេញប្រឆាំងនឹងប្រេស៊ីល ដែលជាប្រទេសនាំចេញសត្វមាន់កំពូលរបស់ពិភពលោក ប៉ុន្តែមេរោគនេះបានរីករាលដាលដល់ហ្វូងសត្វដទៃទៀតរួចទៅហើយ៕

ក្រុមអ្នកសង្រ្គោះស្វែងរកមនុស្សជាប់ក្រោមកម្ទេចថ្ម បន្ទាប់ពីការបាក់រលំអគារដោយផ្នែកនៅទីក្រុងNew York

ក្រុមអ្នកពន្លត់អគ្គិភ័យបានស្វែងរកក្រែងមានមនុស្សជាប់នៅក្នុងគំនរកម្ទេចថ្មទាំងយប់ នៃអគារអឹផាតមិនប្រូនស៍ (Bronx)កម្ពស់ ៦ជាន់ ដែលបានដួលរលំកាលពីរសៀលថ្ងៃចន្ទ។ ពុំមានសេចក្តីរាយការណ៍ថាមានអ្នករងរបួសទេគិតត្រឹមល្ងាចថ្ងៃចន្ទនោះ។ការបាក់រលំនេះបានកើតឡើងនៅអគារកម្ពស់៦ ជាន់ ក្នុងប្លុក 1915 Billingsley Terrace លើអគារប្រូនស៍ ក្នុងទីក្រុង New York សហរដ្ឋអាមេរិក នៅប្រហែល ម៉ោង ៣:៣០នាទីរសៀល ជាទីដែលមានអគារលំនៅឋានចំនួន៤៧ ប្លុក និង អាជីវកម្មចំនួន៦កន្លែង។ លោក ជូលៀន រ៉ូឌ្រីក (Julian Rodriguez) បុគ្គលិកម្នាក់នៅហាង Deli ក្បែរនោះ បាននិយាយថា រូបលោកនៅខាងក្រោយបញ្ជរ ពេលដែលលោកបានឮមនុស្សស្រែកថា មានការបាក់រលំអគារ។លោក Eric Adams អភិបាលក្រុង New York បានបញ្ជាក់ថាអគារ ប្រូនស៍ នៅក្នុងតំបន់ ម៉ូរីស ហេតស៍(Morris Heights) បានបាក់រលំដោយផ្នែក កាលពីថ្ងៃន្ទ ។ លោកបាននិយាយថា ព័ត៌មានបឋមលើកឡើងថាពុំមានមនុស្សនៅក្នុងជាន់ទីមួយនៃអគារនោះទេ ពេលបាក់រលំ។អគារនេះមានអាយុកាល៩៦ ឆ្នាំ ។អ្នករាយការណ៍ពីការស៊ើបអង្កេត លោក ទីម មាក់នីកូឡាស់(Tim McNicholas) បានរកឃើញរូបភាព Google កាលពីខែវិច្ឆិកាឆ្នាំមុន ដែលបានបង្ហាញយ៉ាងច្បាស់ពីស្នាមប្រេះនៅតាមជ្រុងអគារជាកន្លែងដែលការបាក់រលំបានកើតឡើង៕

រុស្ស៊ី ទាមទារឲ្យដោះលែងចំណាប់ថ្នូរ ក្នុងការចរចាជាមួយប៉ាឡេស្ទីន

ក្រសួងការបរទេសរុស្ស៊ី បាននិយាយថា អនុរដ្ឋមន្ត្រីការបរទេសរុស្ស៊ីលោក Mikhail Bogdanov បានទាមទារឲ្យមានការដោះលែងចំណាប់ថ្នូរដែលឃុំខ្លួន នៅតំបន់ហ្កាហ្សា ក្នុងការសន្ទនាតាមទូរស័ព្ទ កាលពីថ្ងៃអាទិត្យ និងថ្ងៃចន្ទ ជាមួយក្រុមហាម៉ាស និងក្រុមប្រឆាំងប៉ាឡេស្ទីនដទៃទៀត។សេចក្តីថ្លែងការណ៍នេះ បានធ្វើឡើង បន្ទាប់ពីកិច្ចប្រជុំ និងការសន្ទនាតាមទូរស័ព្ទជាបន្តបន្ទាប់រវាងលោក ប្រធានាធិបតី វ្ល៉ាឌីមៀ ពូទីន និងក្រុមមេដឹកនាំមជ្ឈិមបូព៌ា កាលពីសប្តាហ៍មុន។ក្រសួង បាននិយាយថា ការសន្ទនារបស់លោក Bogdanov បានសង្កត់ធ្ងន់ទៅលើស្ថានភាពយោធា និងមនុស្សធម៌ នៅតំបន់ហ្កាហ្សា ដែលរុស្ស៊ី «បានបញ្ជាក់ពីគោលជំហររបស់ខ្លួនលើតម្រូវការក្នុងការបញ្ឈប់ អរិភាព និងដោះស្រាយជាបន្ទាន់នូវរាល់បញ្ហាមនុស្សធម៌ ដែលបានកើតឡើង រួមទាំងការដោះលែងចំណាប់ថ្នូរ»។សេចក្តីថ្លែងការណ៍នោះ មិនបានបញ្ជាក់ច្បាស់ថា តើរុស្ស៊ីបានស្វែងរកការដោះលែងចំណាប់ថ្នូរទាំងអស់ដែលត្រូវបានចាប់ខ្លួនដោយក្រុមហាម៉ាស ក្នុងអំឡុងពេលការប្រហារកាលពីថ្ងៃទី៧ ខែតុលារបស់ខ្លួន ចូលទៅក្នុងអ៊ីស្រាអែលភាគខាងត្បូង ឬគ្រាន់តែជាការដោះលែងជនជាតិរុស្ស៊ីណាមួយ ក្នុងចំណោមពួកគេនោះ ឬយ៉ាងណា?

រដ្ឋមន្ត្រីការពារជាតិ៖ អ៊ីស្រាអែល មិនមានបំណងនៅជាអចិន្ត្រៃយ៍ក្នុងតំបន់ហ្កាហ្សាទេ

រដ្ឋមន្ត្រីការពារជាតិអ៊ីស្រាអែល កាលពីថ្ងៃច័ន្ទ (១១ ធ្នូ) បាននិយាយថាប្រទេសរបស់លោកមិនមានចេតនាក្នុងការស្នាក់នៅជាអចិន្ត្រៃយ៍នៅក្នុងតំបន់ហ្កាហ្សាស្ទ្រីប នោះទេហើយថាខ្លួនបើកចំហដើម្បីពិភាក្សាជម្រើសអំពីអ្នកដែលនឹងគ្រប់គ្រងទឹកដីនេះ ដរាបណាវាមិនមែនជាក្រុមអរិភាពចំពោះអ៊ីស្រាអែល។រដ្ឋមន្ត្រីការពារជាតិ លោក យ៉ាវ ហ្កាឡាន (Yoav Gallant) ក៏បាននិយាយផងដែរថា អ៊ីស្រាអែលបើកចំហរក្នុងការឈានដល់កិច្ចព្រមព្រៀងជាមួយក្រុមសកម្មប្រយុទ្ធ ហេសបូឡា ដែលគាំទ្រដោយអ៊ីរ៉ង់ក្នុងប្រទេសលីបង់ ក្នុងលក្ខខណ្ឌដែលកិច្ចព្រមព្រៀងណាមួយរួមបញ្ជូលតំបន់សុវត្ថិភាពនៅតាមព្រំដែន និងការធានាត្រឹមត្រូវ។លោកបានប្រាប់អ្នកយកព័ត៌មានថា «អ៊ីស្រាអែលនឹងចាត់វិធានការណាមួយ ដើម្បីកម្ទេចក្រុមហាម៉ាស ប៉ុន្តែយើងមិនមានចេតនាស្នាក់នៅជាអចិន្ត្រៃយ៍នៅក្នុងតំបន់ហ្កាហ្សាស្ទ្រីបទេ ហើយអ៊ីស្រាអែលបើកចំហដើម្បីពិភាក្សាអំពីជម្រើសអំពីអ្នកដែលអាចគ្រប់គ្រងតំបន់ហ្កាហ្សា បន្ទាប់ពីសង្រ្គាមបញ្ចប់»។រយៈពេលជាងពីរខែចាប់តាំងពីការវាយលុករបស់ក្រុមហាម៉ាសកាលពីថ្ងៃទី៧ ខែតុលា ឆ្លងកាត់ភាគខាងត្បូងអ៊ីស្រាអែល ដែលបានបង្កឱ្យមានសង្រ្គាមជុំថ្មីនេះ និងរយៈពេលជាងមួយខែចាប់តាំងពីអ៊ីស្រាអែលចាប់ផ្តើមការវាយលុកផ្លូវគោករបស់ខ្លួនមក លោក Gallant បាននិយាយថា វឌ្ឍនភាពដ៏ធ្ងន់ធ្ងរត្រូវបានធ្វើឡើង ជាពិសេសនៅតំបន់ហ្កាហ្សាភាគខាងជើង ដែលគ្រប់យ៉ាងបានឈានដល់ចំណុចទប់ទល់លែងបាន៕

មនុស្សយ៉ាងហោចណាស់ ១៥នាក់ បានស្លាប់ក្នុងបំណាក់ដីនៅសាធារណរដ្ឋកុងហ្គោ

មន្ត្រីក្នុងតំបន់ម្នាក់បាននិយាយកាលពីថ្ងៃច័ន្ទ (១១ ធ្នូ) ថាមនុស្សយ៉ាងហោចណាស់ ១៥នាក់ បានស្លាប់នៅភាគខាងកើតនៃសាធារណរដ្ឋប្រជាធិបតេយ្យកុងហ្គោ បន្ទាប់ពីភ្លៀងធ្លាក់ខ្លាំងបានវាយលុកទីក្រុង ប៊ុកាវុ (Bukavu) ពេញមួយយប់ ដែលបណ្តាលឱ្យមានបំណាក់ដី និងលំនៅឋានជាច្រើនខ្នងត្រូវដួលរលំ។អភិបាលក្រុងនេះបាននិយាយថា ជនរងគ្រោះទាំងអស់ត្រូវបានសម្លាប់នៅក្នុងឃុំ អ៊ីបានដា (Ibanda) នៃទីក្រុង ប៊ុកាវុ ជាទីដែលមនុស្សជាច្រើនរស់នៅក្នុងផ្ទះបណ្តោះអាសន្ន ដែលដួលរលំដាយសារភ្លៀង ហើយអភិបាលក្រុងបានបន្ថែមថា ចំនួនអ្នកស្លាប់ទំនងជាកើនឡើង ខណៈដែលជនរងគ្រោះជាច្រើននាក់កំពុងសម្រាកព្យាបាលនៅមន្ទីរពេទ្យដោយមានរបួសធ្ងន់ធ្ងរ។ប្រទេសកុងហ្គោ កំពុងស្ថិតក្នុងយុទ្ធនាការនយោបាយក្នុងការបន្តការបោះឆ្នោតសកលនៅថ្ងៃទី២០ ខែធ្នូ ដែលបានបង្ហាញពីហេដ្ឋារចនាសម្ព័ន្ធដ៏ទន់ខ្សោយនៅទូទាំងប្រទេសធំទីពីររបស់ទ្វីបអាហ្រ្វិកនេះ ជាពិសេសនៅក្នុងខេត្តភាគខាងកើតដែលហែកហួរដោយជម្លោះ ដូចជាខេត្ត សៅ គីវុ (South Kivu) ជាទីដែលក្រុង ប៊ុកាវុ ស្ថិតនៅ។ ភាពក្រីក្រ និងហេដ្ឋារចនាសម្ព័ន្ធមិនល្អ ធ្វើឱ្យសហគមន៍ដូចជាពលរដ្ឋនៅក្នុងឃុំ អ៊ីបានដា កាន់តែងាយរងគ្រោះដោយសារបញ្ហាអាកាសធាតុធ្ងន់ធ្ងរ ដូចជាភ្លៀងធ្លាក់ខ្លាំងជាដើម៕

អាហ្វហ្គានីស្ថានត្រូវបានដកចេញពី COP28 ខណៈកំពុងរងផលប៉ះពាល់ពីបញ្ហាអាកាសធាតុ

ក្តីបារម្ភផ្នែកមនុស្សធម៌ត្រូវបានលើកឡើងជុំវិញបញ្ហាប្រទេសអាហ្វហ្គានីស្ថាន ដែលត្រូវបានដកចេញពីការចរចាអាកាសធាតុរបស់អង្គការសហប្រជាជាតិសម្រាប់រយៈពេលបីឆ្នាំជាប់ៗគ្នា ខណៈដែលប្រទេសនេះកំពុងជួបនឹងគ្រោះរាំងស្ងួត និងទឹកជំនន់កាន់តែអាក្រក់ទៅៗ។ មនុស្សរាប់សិបនាក់ត្រូវបានសម្លាប់នៅអាហ្វហ្គានីស្ថាន ដែលជាប្រទេសមួយក្នុងចំណោមប្រទេសងាយរងគ្រោះបំផុតក្នុងពិភពលោកចំពោះបម្រែបម្រួលអាកាសធាតុ បន្ទាប់ពីមានភ្លៀងធ្លាក់ខ្លាំងបានបង្កជាទឹកជំនន់យ៉ាងគំហុក ដែលបានបោកបក់ពាសពេញប្រទេសដែលរងគ្រោះដោយគ្រោះរាំងស្ងួតកាលពីដើមឆ្នាំនេះ។ប៉ុន្តែប្រទេសនេះអវត្តមានពីកិច្ចប្រជុំកំពូលស្តីពីអាកាសធាតុ COP28 នៅទីក្រុងឌុយបៃ ដោយសារត្រូវបានដកចេញពីកិច្ចចរចារបស់អង្គការសហប្រជាជាតិ ចាប់តាំងពីពួកតាលីបង់បានកាន់កាប់ទីក្រុងកាប៊ុល ក្នុងឆ្នាំ ២០២១មក។ មិនមានរដ្ឋាភិបាលបរទេសណាមួយបានទទួលស្គាល់ជាផ្លូវការនូវភាពជាអ្នកដឹកនាំតាលីបង់នោះទេ ហើយប្រទេសនេះមិនមានកៅអីនៅសន្និបាតអគ្គស្នងការអង្គការសហប្រជាជាតិឡើយ។ទោះជាយ៉ាងណាក៏ដោយ មានអ្នកខ្លះបានចោទសួរពីការបន្តត្រូវដកចេញរបស់ប្រទេសនេះ។ ក្រុមមន្ត្រីមនុស្សធម៌ និងអន្តរជាតិបានប្រាប់សារព័ត៌មានរ៉យទ័រថា ពួកគេបានខិតខំប្រឹងប្រែងនៅឆ្នាំនេះ ដើម្បីអនុញ្ញាតឱ្យតំណាងអាហ្វហ្គានីស្ថានអាចចូលរួមបាន ស្របពេលជាមួយនឹងការពិភាក្សាកាន់តែទូលំទូលាយក្នុងចំណោមរដ្ឋាភិបាលបរទេស និងស្ថាប័នពហុភាគី អំពីមធ្យោបាយដោះស្រាយជាមួយពួកតាលីបង់៕

បណ្ដាញសង្គម

ព័ត៌មានថ្មីៗ

ប្រធានាធិបតីមីយ៉ាន់ម៉ាបញ្ជាក់ឡើងវិញពីការប្តេជ្ញាចិត្តចំពោះសន្តិសុខរបស់ឥណ្ឌា

ប្រតិបត្តិករនាវា ជំរុញឲ្យមានច្បាប់ច្បាស់វិលត្រឡប់មកកាន់ច្រកសមុទ្រ Hormuz វិញ

កងទ័ពជើងទឹកបារាំងដោយមានការគាំទ្រពីអង់គ្លេស បានស្កាត់ចាប់នាវាដឹកប្រេងរុស្ស៊ី

EU ជំរុញឲ្យអ៊ីស្រាអែលឈប់បង្កើនភាពតានតឹងផ្នែកយោធា នៅលីបង់ និងគាំទ្រកិច្ចប្រឹងប្រែងការទូត

មន្ត្រី៖ ក្រុមហាម៉ាសនឹងធ្វើកិច្ចពិភាក្សាជាមួយអន្តរការីតំបន់ហ្កាហ្សា នៅអេហ្ស៊ីប

កម្អែហូរចេញពីមាត់ភ្នំភ្លើង Kilauea របស់រដ្ឋហាវ៉ៃ ខណៈការកម្រើកត្រូវបានគេរំពឹងថានឹងកើនឡើង

កិច្ចព្រមព្រៀងពាណិជ្ជកម្មឥណ្ឌា-អាមេរិក ឆ្លុះបញ្ចាំងពីការផ្លាស់ប្តូរពន្ធរបស់ទីក្រុងវ៉ាស៊ីនតោន

អ៊ីស្រាអែល៖ «គ្មានភាពស្ងប់ស្ងាត់ នៅទីក្រុងបេរូត» ទេ បើក្រុមហេសបូឡាមិនបញ្ឈប់ការវាយប្រហារ

វិមានក្រឹមឡាំង៖ អាជ្ញាធរកំពុងធ្វើការដោះស្រាយបញ្ហាបែងចែកប្រេងនៅតំបន់គ្រីមៀ

ពលរដ្ឋជម្លៀសខ្លួនចេញពីតំបន់ជាយក្រុងភាគខាងត្បូងទីក្រុងបេរូត ក្រោយលោក Netanyahu បញ្ជាឲ្យវាយប្រហារក្រុមហេសបូឡា

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877