BTV NEWS

ឃាតកម្មសម្លាប់មនុស្ស ២នាក់រួចយកសពទៅកប់ចោលនៅខណ្ឌជ្រោយចង្វារ កម្លាំងសមត្ថកិច្ចរាជធានីបង្ក្រាបជនសង្ស័យបាន ៤នាក់

គណៈបញ្ជាការឯកភាពរដ្ឋបាលក្រុងកំពង់សោម ចុះត្រួតពិនិត្យរដ្ឋបាលចំហរ រកឃើញជនបរទេស ២៦នាក់ ពាក់ព័ន្ធករណី Online Scams

ចៅក្រមស៊ើបសួរសម្រេចឃុំខ្លួនមន្ត្រីនគរបាល-អាវុធហត្ថខេត្តកំពត និងអ្នកទទួលផលចោរកម្មសរុបចំនួន ៤៧នាក់

អាជ្ញាធររាជធានីភ្នំពេញ បន្តប្រតិបត្តិការបោសសម្អាត Online Scams ត្រួតពិនិត្យ ៨០ ទីតាំងទៀត និងផាកពិន័យម្ចាស់ទីតាំងរស់នៅប្រមូលផ្ដុំចំនួន ៤ទីតាំង

សន្តិសុខ និង សង្គម

នគរបាលប្រទេសប៉េរូ ប៉ះទង្គិចគ្នាជាមួយអ្នកបើកបររថយន្តឈ្នួល ចេញតវ៉ាប្រឆាំងការគំរាមទារប្រាក់ដោយជនអន្ធពាល

ការប៉ះទង្គិចគ្នា បានផ្ទុះឡើងរវាងនគរបាលប្រទេសប៉េរូ និងក្រុមបាតុករអ្នកបើកបររថយន្តឈ្នួល ដែលបានចេញតវ៉ាប្រឆាំងការគំរាមទារប្រាក់ពីសំណាក់ក្រុមជនអន្ធពាលឧក្រិដ្ឋកម្ម នៅក្នុងទីក្រុងលីម៉ា កាលពីថ្ងៃព្រហស្បតិ៍។អ្នកតវ៉ារាប់រយនាក់ ដែលបានចេញតវ៉ាទៅកាន់សភាប្រទេសប៉េរូ បានប៉ះទង្គិចគ្នាជាមួយនគរបាល នៅពេលពួកគេបានព្យាយាមឆ្លងកាត់របាំងសន្តិសុខនៅអគារសភា ខណៈក្រុមមន្ត្រីបានបាញ់ឧស្ម័នបង្ហៀរទឹកភ្នែក និងបានរុញក្រុមបាតុករដើម្បីបំបែកការតវ៉ា។ក្រុមអ្នកតវ៉ា បានអំពាវនាវដល់អាជ្ញាធរដើម្បីលុបបំបាត់ក្រុមជនអន្ធពាលគំរាមទារប្រាក់ ដែលតាមរាយការណ៍ត្រូវបានបង្កើតឡើងដោយជនបរទេស។ ក្រុមអ្នកបើកបររថយន្តឈ្នួល បានរិះគន់ថាពួកគេត្រូវបានបង្ខំឲ្យបង់ប្រាក់ដោយខុសច្បាប់ដល់ក្រុមជនអន្ធពាលដើម្បីអាចធ្វើការងារនៅលើដងផ្លូវនៅទីក្រុងលីម៉ា។

របាយការណ៍ថ្មីរបស់UN បង្ហាញរូបភាពពីការបំផ្លិចបំផ្លាញនៃសេដ្ឋកិច្ចប៉ាឡេស្ទីន ដែលកំពុងដួលរលំ

របាយការណ៍ថ្មីរបស់អង្គការសហប្រជាជាតិ បានបង្ហាញរូបភាពដ៏ច្បាស់ពីការបំផ្លិចបំផ្លាញនៃការដួលរលំរបស់ប៉ាឡេស្ទីន បន្ទាប់ពីសង្គ្រាមរយៈពេលមួយខែ និងការឡោមព័ទ្ធជុំវិញតំបន់ហ្កាហ្សារបស់អ៊ីស្រាអែល។អង្គការសហប្រជាជាតិ បាននិយាយថា ផលិតផលក្នុងស្រុកសរុប បានធ្លាក់ចុះ ៤ភាគរយ នៅតំបន់វេបែង និងហ្កាហ្សា ក្នុងខែដំបូងនៃសង្រ្គាម ដោយបានជំរុញមនុស្សជាង ៤០០.០០០ នាក់ធ្លាក់ទៅក្នុងភាពក្រីក្រ ដែលជាផលប៉ះពាល់សេដ្ឋកិច្ចដែលមិនធ្លាប់ឃើញពីមុន នៅក្នុងជម្លោះស៊ីរី និងអ៊ុយក្រែន ឬសង្រ្គាមអ៊ីស្រាអែល និងហាម៉ាសពីមុនណាមួយឡើយ ។មេដឹកនាំក្រុមហាម៉ាសនៅតំបន់ហ្កាហ្សា បានបើកការវាយប្រហារដ៏គួរឲ្យភ្ញាក់ផ្អើលមួយលើអ៊ីស្រាអែលកាលពីថ្ងៃទី៧ ខែតុលា ដោយបានសម្លាប់មនុស្សជាង១.៤០០នាក់ ភាគច្រើនជាជនស៊ីវិល និងមានការចាប់ពង្រត់មនុស្សប្រហែល ២៤០នាក់ផ្សេងទៀត។ជាងពីរភាគបីនៃប្រជាជនចំនួន ២,៣លាននាក់ នៅតំបន់ហ្កាហ្សា បានភៀសខ្លួនចេញពីផ្ទះរបស់ពួកគេចាប់តាំងពីអ៊ីស្រាអែល បានចាប់ផ្តើមការវាយប្រហារតាមអាកាសដ៏ខ្លាំងក្លាជាច្រើនសប្តាហ៍ ដែលបន្ទាប់មកដោយប្រតិបត្តិការជើងគោក ដែលកំពុងបន្ត ដោយប្តេជ្ញាលុបបំបាត់ក្រុមហាម៉ាស។ ក្រសួងសុខាភិបាលដែលគ្រប់គ្រងដោយក្រុមហាម៉ាសនៅតំបន់ហ្កាហ្សា បាននិយាយកាលពីថ្ងៃព្រហស្បតិ៍ថា ជនជាតិប៉ាឡេស្ទីន១០.៨១៨នាក់រួមទាំងកុមារជាង ៤.៤០០នាក់ ត្រូវបានសម្លាប់ រហូតមកដល់ពេលនេះ។

លោក ណេតានយ៉ាហ៊ូ៖ អ៊ីស្រាអែលមិនស្វែងរកការគ្រប់គ្រងតំបន់ហ្កាហ្សាទេ ប៉ុន្តែត្រូវការកម្លាំងគួរឱ្យទុកចិត្ត

លោកនាយករដ្ឋមន្ត្រីអ៊ីស្រាអែល បេន ចាមីនណេតានយ៉ាហ៊ូ (Benjamin Netanyahu)បាននិយាយកាលពីថ្ងៃព្រហស្បតិ៍ថា ប្រទេសរបស់លោកមិនស្វែងរកការដណ្តើមកាន់កាប់ ឬគ្រប់គ្រងតំបន់ ហ្កាហ្សានោះទេ បន្ទាប់ពីសង្គ្រាមប្រឆាំងនឹងក្រុមហាម៉ាសបញ្ចប់ទៅនោះ ប៉ុន្តែ កម្លាំងដ៏គួរឱ្យទុកចិត្ត នឹងត្រូវការដើម្បីចូលទៅក្នុងតំបន់ឡោមព័ទ្ធប៉ាឡេស្ទីន ក្នុងករណីចាំបាច់ ដើម្បីការពារការងើបឡើងនៃការគំរាមកំហែងរបស់ពួកសកម្មប្រយុទ្ធ។ ការអត្ថាធិប្បាយរបស់លោក Netanyahu នៅសប្តាហ៍នេះ ដែលបង្ហាញថា អ៊ីស្រាអែលនឹងទទួលខុសត្រូវចំពោះសន្តិសុខតំបន់ហ្កាហ្សាដោយមិនកំណត់ ត្រូវបានច្រានចោលពីសំណាក់សហរដ្ឋអាមេរិក ដែលជាសម្ព័ន្ធមិត្តដ៏សំខាន់របស់អ៊ីស្រាអែល។ក្រុងវ៉ាស៊ីនតោន បានលើកឡើងថា ខ្លួននឹងប្រឆាំងចំពោះការគ្រប់គ្រងតំបន់ហ្កាហ្សា ក្រោយសង្គ្រាមរបស់អ៊ីស្រាអែល ជាទីដែលអ៊ីស្រាអែលបានធ្វើយុទ្ធនាការទម្លាក់គ្រាប់បែកកម្ទេចរបបគ្រប់គ្រងក្រុមហាម៉ាស បន្ទាប់ពីពួកសកម្មប្រយុទ្ធបានវាយលុកឆ្លងព្រំដែនចូលក្នុងសហគមន៍នានារបស់អ៊ីស្រាអែលភាគខាងត្បូងកាលពីថ្ងៃទី ៧ ខែតុលា ក្នុងការវាយប្រហារដែលអ៊ីស្រាអែលនិយាយថាបានសម្លាប់មនុស្ស ១.៤០០នាក់ ។ ថ្លែងទៅកាន់ទូរទស្សន៍ Fox News របស់ទូរទស្សន៍អាមេរិក កាលពីថ្ងៃព្រហស្បតិ៍ លោក Netanyahu បាននិយាយថា យើងមិនស្វែងរកការដណ្តើមយកតំបន់ ហ្កាហ្សា ទេ យើងមិនស្វែងរកការកាន់កាប់លើតំបន់ហ្កាហ្សានោះឡើយ ហើយយើងក៏មិនស្វែងរកការគ្រប់គ្រង ហ្កាហ្សាដែរ។លោកនាយករដ្ឋមន្ត្រីអ៊ីស្រាអែល រូបនេះ បាននិយាយថា ចាំបាច់ត្រូវមានរដ្ឋាភិបាលស៊ីវិលុមួយលេចរូបរាងឡើងនៅក្នុងតំបន់ ហ្កាហ្សា ប៉ុន្តែអ៊ីស្រាអែលនឹងធ្វើឱ្យប្រាកដថា ការវាយប្រហារដូចថ្ងៃទី ៧ ខែតុលា មិនកើតឡើងទៀតឡើយ៕

ជនជាតិប៉ាឡេស្ទីន១៨នាក់ ត្រូវបានសម្លាប់ដោយកងកម្លាំងអ៊ីស្រាអែល ក្នុងអំពើហិង្សា នៅតំបន់វេសបែង

កងកម្លាំងអ៊ីស្រាអែល បានវាយឆ្មក់ទីក្រុង Jenin របស់ប៉ាឡេស្ទីន កាលពីថ្ងៃព្រហស្បតិ៍ ហើយបានប្រយុទ្ធគ្នារយៈពេលមួយម៉ោងជាមួយនឹងខ្មាន់កាំភ្លើង ដែលក្នុងនោះមនុស្ស ១៤នាក់ ត្រូវបានសម្លាប់ ដែលជាការប៉ះទង្គិចគ្នាខ្លាំងបំផុតមួយនៅតំបន់វេសបែងដែលគ្រប់គ្រងដោយអ៊ីស្រាអែល ក្នុងរយៈពេលជាច្រើនខែ។ក្រសួងសុខាភិបាលប៉ាឡេស្ទីន បាននិយាយថា ជនជាតិប៉ាឡេស្ទីន៤នាក់ទៀត ត្រូវបានសម្លាប់ដោយទាហានអ៊ីស្រាអែល នៅក្នុងឧបទ្ទវហេតុដាច់ដោយឡែកពីគ្នា នៅទូទាំងតំបន់វេសបែង ដែលជាការកើនឡើងនៃអំពើហិង្សាប្រឆាំងនឹងផ្ទៃខាងក្រោយនៃសង្គ្រាមរបស់អ៊ីស្រាអែលប្រឆាំងនឹងក្រុមហាម៉ាស នៅតំបន់ហ្កាហ្សាស្ទ្រីបក្បែរនោះ។សាក្សី បាននិយាយថា ការបាញ់កាំភ្លើង បានបន្លឺឡើងអស់ជាច្រើនម៉ោង ខណៈដែលទាហានអ៊ីស្រាអែលបានប្រយុទ្ធជាមួយក្រុមសកម្មប្រយុទ្ធបំពាក់អាវុធយ៉ាងត្រឹមត្រូវ នៅតាមដងផ្លូវនៃទីក្រុង Jenin និងជំរំជនភៀសខ្លួន ដែលនៅជាប់គ្នានោះ ដែលជាកន្លែងខ្មាន់កាំភ្លើងប្រដាប់អាវុធរាប់រយនាក់ ឈរជើង។យោធាអ៊ីស្រាអែល បាននិយាយថា ខ្លួនបានធ្វើប្រតិបត្តិការប្រឆាំងភេរវកម្ម នៅក្នុងទីក្រុងនេះ និងបានប្រើប្រាស់យានដ្រូន ដើម្បីវាយប្រហារក្រុមសកម្មប្រយុទ្ធប្រដាប់អាវុធ។ យោធា បានបន្ថែមថា ខ្លួនបានចាប់ខ្លួនជនសង្ស័យចំនួន ២០នាក់ ក្នុងការឆ្មក់ចូល និងរឹបអូសបានទាំងកាំភ្លើង និងគ្រាប់រំសេវ។

អាមេរិក៖ នឹងមានច្រករបៀងមនុស្សធម៌ចំនួន២ អនុញ្ញាតឲ្យពលរដ្ឋជម្លៀសខ្លួនទៅហ្កាហ្សាភាគខាងជើង

ក្រសួងការបរទេសសហរដ្ឋអាមេរិក បាននិយាយកាលពីថ្ងៃព្រហស្បតិ៍ថា នឹងមានច្រករបៀងមនុស្សធម៌ចំនួន២ ដែលអនុញ្ញាតឲ្យប្រជាជនជម្លៀសខ្លួនចេញពីតំបន់នានាពីការប្រយុទ្ធគ្នា នៅតំបន់ហ្កាហ្សាភាគខាងជើង ដែលនេះជាការផ្គត់ផ្គង់ផ្នែកមនុស្ស និងជំនួយដ៏សំខាន់ ដែលត្រូវបានពង្រីកទៅក្នុងតំបន់ជាច្រើន នៅកន្លែងដែលប្រជាជនកំពុងជម្លៀសខ្លួន។ អ្នកនាំពាក្យរងក្រសួងការបរទេស លោក Vedant Patel បានប្រាប់អ្នកសារព័ត៌មានថា ច្រកឆ្លងកាត់ Rafah កាលពីថ្ងៃព្រហស្បតិ៍ បានបើកឲ្យរថយន្តដឹកជំនួយចូលមកតំបន់ហ្កាហ្សា និងជនបរទេសចាកចេញ។ សេតវិមាននិយាយថា អ៊ីស្រាអែល បានព្រមព្រៀង ផ្អាកប្រតិបត្តិការយោធា នៅក្នុងផ្នែកមួយចំនួន នៅហ្កាហ្សាភាគខាងជើង រយៈពេល៤ម៉ោងក្នុងមួយថ្ងៃចាប់ពីថ្ងៃព្រហស្បតិ៍ ដោយបង្កើនក្តីសង្ឃឹមនៃការផ្អាកក្នុងរយៈពេលជាង១ខែនៃការប្រយុទ្ធគ្នាដែលបានសម្លាប់មនុស្សរាប់ពាន់នាក់ និងធ្វើឲ្យមានការព្រួយបារម្ភពីជម្លោះក្នុងតំបន់។

ទីតាំងកាំភ្លើងធំអ៊ីស្រាអែល ត្រៀមរួចរាល់ដើម្បីបាញ់តបតប្រទេសលីបង់

ទីតាំងកាំភ្លើងធំមួយកន្លែង នៅក្នុងប្រទេសអ៊ីស្រាអែលភាគខាងជើង បានដាក់ត្រៀមរួចរាល់ដើម្បីបាញ់តបត ប្រទេសលីបង់ បន្ទាប់ពីក្រុមហេសបូឡា អ៊ីស្លាមនិយមលីបង់ បាននិយាយថាខ្លួនបានបាញ់មីស៊ីលរំលងព្រំដែនចូលមកក្នុងប្រទេសអ៊ីស្រាអែល ហើយយោធាអ៊ីស្រាអែល បាននិយាយថា ខ្លួនបានឆ្លើយតបវិញដោយការបាញ់កាំភ្លើងធំ។ នៅក្នុងសប្តាហ៍នេះដែរ រដ្ឋមន្ត្រីការពារជាតិអ៊ីស្រាអែល បាននិយាយថា អ្នកប្រយុទ្ធក្រុមហេសបូឡាប្រមាណ៧០នាក់ ត្រូវបានសម្លាប់ ក្នុងការវាយប្រហារតាមអាកាសរបស់អ៊ីស្រាអែល រហូតមកដល់ពេលនេះ។ អ៊ីស្រាអែល និងក្រុមហេសបូឡា បានបាញ់តគ្នានៅទូទាំងព្រំដែន ចាប់តាំងពីក្រុមសកម្មប្រយុទ្ធហាម៉ាស់ ប៉ាឡេស្ទីននិងអ៊ីស្រាអែល ធ្លាក់ចូលក្នុងសង្គ្រាមកាលពីថ្ងៃទី៧ ខែតុលា។ វាបានកត់សំគាល់ជាអំពើហិង្សាដ៏អាក្រក់បំផុត នៅទូទាំងព្រំដែន ចាប់តាំងពីអ៊ីស្រាអែល និងក្រុមហេសបូឡា បានប្រយុទ្ធគ្នាក្នុងសង្គ្រាមក្នុងឆ្នាំ២០០៦។

កងកម្លាំងអាមេរិក រងការបាញ់ប្រហារនៅមជ្ឈិមបូព៌ា ខណៈអាមេរិករំកិលខ្លួនចូលកាន់តែជិតសង្រ្គាមនៅហ្កាហ្សា

យានដ្រូនខូចមួយគ្រឿងនៅក្នុងប្រទេសអ៊ីរ៉ាក់ ប្រហែលជាបានជួយការពារអាមេរិកពីការអូសទាញកាន់តែជ្រៅទៅក្នុងជម្លោះមជ្ឈិមបូព៌ាដែលកំពុងរីករាលដាល។ យោងតាមមន្ត្រីអាមេរិកពីររូប ដែលបានដឹងបញ្ហានេះ យានដ្រូនមួយគ្រឿង ដែលត្រូវបានបាញ់ទៅលើមូលដ្ឋានអាកាសអឺបៀល (Erbil) ដោយកងជីវពល គាំទ្រដោយអ៊ីរ៉ង់ មុនពេលថ្ងៃរះកាលពីថ្ងៃទី ២៦ តុលា បានទម្លាយប្រព័ន្ធការពារដែនអាកាសរបស់សហរដ្ឋអាមេរិក ហើយបានធ្លាក់ចូលទៅក្នុងជាន់ទី ២ នៃបន្ទាយទាហានអាមេរិក នៅម៉ោងប្រហែល ៥ ព្រឹក ។ ក្រុមមន្ត្រីដែលសុំមិនបញ្ចេញឈ្មោះបាននិយាយថា ប៉ុន្តែឧបករណ៍ដែលផ្ទុកដោយគ្រឿងផ្ទុះមិនអាចបំផ្ទុះបានទេ ហើយមានតែសមាជិកកងទ័ពម្នាក់ប៉ុណ្ណោះដែលរងការប៉ះទង្គិចពីផលប៉ះពាល់នោះ ។ ពួកគេបានបន្ថែមថា សហរដ្ឋអាមេរិកមានសំណាងណាស់ ព្រោះយានដ្រូននោះអាចបង្កឱ្យមានការសម្លាប់រង្គាល បើបានផ្ទុះ។ យោងតាមទិន្នន័យពីមន្ទីរបញ្ចកោណ និងក្រុមមន្ត្រីអាមេរិក ២រូប ឧបទ្ទវហេតុនេះគឺស្ថិតក្នុងចំណោមការវាយប្រហារដោយយានដ្រូននិងគ្រាប់រ៉ូកែតចំនួន៤០គ្រាប់ ដាច់ដោយឡែកពីគ្នា ដែលបានបាញ់ទៅលើកងកម្លាំងសហរដ្ឋអាមេរិកដោយកងជីវពលគាំទ្រដោយអ៊ីរ៉ង់នៅក្នុងប្រទេសអ៊ីរ៉ាក់ និងស៊ីរីក្នុងរយៈពេល ៣ សប្តាហ៍ចុងក្រោយនេះ ឆ្លើយតបទៅនឹងការគាំទ្ររបស់អាមេរិកសម្រាប់អ៊ីស្រាអែលនៅក្នុងសង្រ្គាមតំបន់ហ្កាហ្សា ។ គេមិនច្បាស់ទេថា តើលោកប្រធានាធិបតី Joe Biden នឹងឆ្លើយតបបែបណា ចំពោះការវាយប្រហារដ៏ធំ ដែលបានសម្លាប់ជនជាតិអាមេរិកមួយចំនួនធំ។ នៅក្នុងការស្ទង់មតិនៅមុនការបោះឆ្នោតប្រធានាធិបតីឆ្នាំក្រោយ លោក Biden រហូតមកដល់ពេលនេះបានព្យាយាមកំណត់តួនាទីរបស់សហរដ្ឋអាមេរិកនៅក្នុងជម្លោះភាគច្រើនក្នុងការធានាជំនួយយោធាដល់អ៊ីស្រាអែល៕

អ៊ីស្រាអែល ព្រមានក្រុមហាម៉ាស កុំកេងចំណេញជំនួយមនុស្សធម៌ ខណៈរថយន្តជំនួយហូរចូលតំបន់ហ្កាហ្សា

រថយន្តផ្ទុកជំនួយផ្គត់ផ្គង់មនុស្សធម៌សំដៅចូលទៅក្នុងតំបន់ហ្កាហ្សា បានកំពុងដំណើរការនៅច្រកឆ្លងកាត់ព្រំដែន នីត ហ្សាណា (Nitzana) កាលពីថ្ងៃព្រហស្បតិ៍ទី៩វិច្ឆិកា បន្ទាប់ពីអ៊ីស្រាអែលអនុញ្ញាតឲ្យដឹកជញ្ជូនជំនួយចូលក្រោមការសម្របសម្រួលជាមួយសហរដ្ឋអាមេរិក អង្គការសហប្រជាជាតិ និង ប្រទេសអេហ្ស៊ីប។ សុនខស្រង់ក្លិន និងវិធីសាស្ត្រសន្តិសុខផ្សេងទៀត ត្រូវបានប្រើប្រាស់ដើម្បីត្រួតពិនិត្យការដឹកជញ្ជូនជំនួយទាំងនោះ មុនពេលអនុញ្ញាតឲ្យចូលទៅតំបន់ហ្កាហ្សា។ ប្រធានសម្របសម្រួល និងទំនាក់ទំនងសម្រាប់តំបន់ហ្កាហ្សារបស់យោធាអ៊ីស្រាអែល លោក វរសេនីយ៍ឯក មូសេ តេត្រូ បាននិយាយថា រថយន្តដឹកស្បៀងអាហារ ទឹក និងជំនួយផ្គត់ផ្គង់មនុស្សចំនួន៧០០គ្រឿង កំពុងសំដៅចូលក្នុងតំបន់ហ្កាហ្សា។ នៅសន្និសីទសារព័ត៌មានខ្លីមួយលោកបាននិយាយថា អ៊ីស្រាអែល បានជួសជុលបំពង់បង្ហូរទឹកចំនួន២ ចូលទៅហ្កាហ្សា បន្ទាប់ពីត្រូវបានបំផ្លិចបំផ្លាញដោយគ្រាប់រ៉ូកែតក្រុមហាម៉ាស។ លោកក៏បាននិយាយផងដែរថា មានប្រេងឥន្ធនៈគ្រប់គ្រាន់ក្នុងតំបន់ហ្កាហ្សា។ លោក តេត្រូ បានព្រមានក្រុមហាម៉ាស កុំប្រើប្រាស់ជំនួយមនុស្សធម៌ជាផលប្រយោជន៍ផ្ទាល់ខ្លួនឲ្យសោះ និងបាននិយាយថា ក្រុមហាម៉ាស នៅតែព្យាយាមរារាំងប្រជាពលរដ្ឋមិនឲ្យចាកចេញពីភាគខាងជើង ចូលទៅភាគខាងត្បូង៕

លោក Biden និយាយថា អាមេរិកមានបំណងចង់បានរថយន្តជំនួយប្រចាំថ្ងៃយ៉ាងហោចណាស់ ១៥០ គ្រឿងសម្រាប់តំបន់ហ្កាហ្សា

លោកប្រធានាធិបតីអាមេរិក Joe Biden បាននិយាយកាលពីថ្ងៃព្រហស្បតិ៍ ទី៩ វិច្ឆិកា ថា ប្រតិបត្តិការ ផ្អាកប្រយុទ្ធរបស់យោធានៅតំបន់ហ្កាហ្សា ក្នុងគោលបំណងទទួលបានរថយន្តជំនួយរហូតដល់ ១៥០ គ្រឿងជារៀងរាល់ថ្ងៃ ដើម្បីបង្កើនលំហូរអាហារ ទឹក និងថ្នាំពេទ្យចូលទៅក្នុងតំបន់នេះ។ នៅក្នុងការបង្ហោះជាបន្តបន្ទាប់នៅលើបណ្ដាញសង្គម X លោក Biden បាននិយាយថា សហរដ្ឋអាមេរិកកំពុងផ្តោតលើការបង្កើនការផ្គត់ផ្គង់ និងជំនួយមនុស្សធម៌។ លោក Biden បាននិយាយថា អ៊ីស្រាអែល សម្រេចចិត្តដោយខ្លួនឯង ហើយថាពួកគេត្រូវតែ បែងចែករវាងភេរវករ និងជនស៊ីវិល។ សេតវិមានបាននិយាយកាលពីថ្ងៃព្រហស្បតិ៍ថា អ៊ីស្រាអែលបានយល់ព្រមផ្អាកប្រតិបត្តិការយោធានៅតំបន់ភាគខាងជើងនៃតំបន់ហ្កាហ្សារយៈពេល ៤ម៉ោងក្នុងមួយថ្ងៃ ប៉ុន្តែពុំមានសញ្ញាណាមួយនៃការផ្អាកប្រយុទ្ធ ដែលបានសម្លាប់មនុស្សរាប់ពាន់នាក់ និងបំផ្លិចបំផ្លាញយ៉ាងធ្ងន់ធ្ងររហូតដល់តំបន់មាត់សមុទ្រនោះទេ។ អ្នកនាំពាក្យសន្តិសុខជាតិរបស់សេតវិមានលោក John Kirby បាននិយាយថា ការផ្អាក ដែលនឹងអនុញ្ញាតឱ្យមនុស្សភៀសខ្លួនតាមច្រករបៀងមនុស្សធម៌ចំនួនពីរ និងអាចត្រូវបានប្រើសម្រាប់ការដោះលែងចំណាប់ថ្នូរ គឺជាជំហានដំបូងដ៏សំខាន់៕

សង្រ្គាមក្រោមដីរវាងកងទ័ពអ៊ីស្រាអែល និងក្រុមសកម្មប្រយុទ្ធហាម៉ាស នៅក្នុងផ្លូវរូងក្រោមដី នៅហ្គាហ្សា អាចនឹងចាប់ផ្តើម

កងកម្លាំងការពារអ៊ីស្រាអែលបានប្រកាសថា ពួកគេបានទៅដល់ជាយក្រុងហ្កាហ្សា ហើយរំពឹងថា នឹងចូលទីក្រុងក្នុងពេលឆាប់ៗនេះ។នៅពេលការវាយប្រហារកើតឡើង កងទ័ពអ៊ីស្រាអែល នឹងចាប់ផ្តើមដំណាក់កាលថ្មីដ៏គ្រោះថ្នាក់នៃយុទ្ធនាការយោធាប្រឆាំងនឹងក្រុមយុទ្ធជនហាម៉ាស នៅក្នុងដីទីក្រុងដែលមានប្រជាជនរស់នៅយ៉ាងច្រើន ដែលរួមមានអគារដែលប្រមូលផ្តុំជិតៗគ្នាពីលើដី និងផ្លូវរូងក្រោមដីដ៏លំបាកមួយ នៅខាងក្រោមនោះ។រហូតមកដល់ពេលនេះ យុទ្ធនាការរបស់អ៊ីស្រាអែលប្រឆាំងនឹងក្រុមហាម៉ាស ហាក់ដូចជាត្រូវបានធ្វើឡើង ជាចម្បងពីលើអាកាស រួមទាំងតាមរយៈគ្រាប់បែកបំពាក់ឡាស៊ែរដែលបំពាក់ដោយក្បាលគ្រាប់ដែលអាចទម្លុះចូលជ្រៅ និងមានហ្វុយស៊ីបដែលពន្យារពេល ដើម្បីឲ្យពួកវាអាចបំផ្ទុះ នៅក្រោមដីបាន។ប៉ុន្តែនៅថ្ងៃទី ២៩ ខែតុលា ឆ្នាំ ២០២៣ កងកម្លាំងការពារអ៊ីស្រាអែល បាននិយាយថា កងទ័ពរបស់ខ្លួនបានវាយប្រហារខ្មាន់កាំភ្លើងក្រុមហាម៉ាស នៅក្នុងផ្លូវរូងក្រោមដីមួយ ហើយបានសម្លាប់យុទ្ធជនហាម៉ាសដែលបានចេញពីផ្លូវរូងក្រោមដី ដើម្បីវាយប្រហារទីតាំងរបស់ពួកគេ នៅភាគពាយព្យនៃតំបន់ហ្កាហ្សា។ជាបន្តបន្ទាប់ ក្រុមហាម៉ាស បានបង្ហោះវីដេអូនៃអ្វីដែលហាក់ដូចជាការវាយប្រហារដូចគ្នា ពីទស្សនៈរបស់ក្រុមសកម្មប្រយុទ្ធរបស់ខ្លួន ដោយធ្វើដំណើរឆ្លងកាត់ឆ្នេរខ្សាច់ ដើម្បីវាយប្រហារជនជាតិអ៊ីស្រាអែល។

បណ្ដាញសង្គម

ព័ត៌មានថ្មីៗ

សម្ដេចតេជោ ហ៊ុន សែន កោតសរសើរថ្នាក់ដឹកនាំខេត្តកំពង់ធំដែលបានយកចិត្តទុកដាក់គ្រប់គ្រងអតីតយុទ្ធជន និងគ្រួសារយុទ្ធជនពលី បានយ៉ាងល្អ

អាមេរិកច្រានចោលរបាយការណ៍អំពីការវាយប្រហាររបស់អ៊ីរ៉ង់ទៅលើទីស្នាក់ការកណ្តាលកងនាវាទី៥ របស់ខ្លួន

អាល្លឺម៉ង់បង្ហាញសុឆន្ទៈ និងប្តេជ្ញាជួយជំរុញវិនិយោគិនពីប្រទេសខ្លួនមកបណ្តាក់ទុននៅកម្ពុជា

អ្នកជំនាញការអាដហុក អាយស៊ីស៊ី-អង្គរ និងសំបូរព្រៃគុក បន្តចុះពិនិត្យការដ្ឋានជួសជុលប្រាសាទបក្សីចាំក្រុង និងកំពង់ទឹកយសោតដាក

យោធាស្វែងរកការកាត់ទោសទាហានឥណ្ឌូនេស៊ីឲ្យជាប់ពន្ធនាគារសម្រាប់ការវាយប្រហារដោយទឹក អាស៊ីត

រដ្ឋមន្រ្ដីក្រសួងការងារ ចុះជួបសំណេះសំណាល និងទទួលទានអាហារជាមួយបងប្អូនកម្មករនិយោជិតនៅរោងចក្រ ស៊ិនគី អឹភែរឹល ក្នុងខេត្តកំពង់ឆ្នាំង

ក្រសួងកសិកម្មធ្វើជាម្ចាស់ផ្ទះកិច្ចប្រជុំលើកទី៦របស់ក្រុមការងារជំនាញអនុវត្តវារីវប្បកម្មល្អអាស៊ាន (6th EWG-ASEAN GAqP)

UN៖ នីតិវិធីត្រួតពិនិត្យថ្មី ពន្យារពេលការការដឹកជញ្ជូនជំនួយចូលតំបន់ហ្កាហ្សា

លោក Rubio៖ អ៊ីស្រាអែល ដណ្តើមយកតំបន់ហ្កាហ្សា៧០ភាគរយពុំមែនជាផ្នែកនៃផែនការរបស់អាមេរិកទេ

មនុស្សយ៉ាងហោចណាស់ ២១នាក់ស្លាប់នៅក្នុងអគ្គិភ័យឆាបឆេះសណ្ឋាគារ ក្នុងរដ្ឋធានីរបស់ឥណ្ឌា

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877