BTV NEWS

ស្នងការរាជធានី ដាក់ចេញនូវគោលការណ៍បង្ការ ទប់ស្កាត់រាល់បទល្មើស និង អនុវត្តប្រកបដោយក្រមសីលធម៌វិជ្ជាជីវៈនគរបាល

ក្មេងទំនើង៣នាក់បំផ្លាញទ្រព្យសម្បត្តិសាធារណៈត្រូវបានឃាត់ខ្លួន ធ្វើកិច្ចសន្យាអប់រំណែនាំដោយមានការធានាពីអាណាព្យាបាល ដើម្បីអប់រំនៅមូលដ្ឋានបន្ត

រយៈពេល១ខែកន្លះចុងឆមាសទី១នេះ សមត្ថកិច្ចរាជធានី បង្ក្រាបបទល្មើសគ្រឿងញៀន ឃាត់មនុស្ស៧៣នាក់

កម្លាំងនគរបាលស្រុកស្វាយជ្រំយកចិត្តទុកដាក់ទប់ស្កាត់និងបង្ក្រាប ធ្វើឱ្យបទល្មើសថយចុះស្ទើរទាំងស្រុង

សន្តិសុខ និង សង្គម

គុយបា និងរុស្ស៊ី កំពុងធ្វើការរួមគ្នាលើករណីជួញដូរពលរដ្ឋគុយបាឲ្យទៅធ្វើជាទាហានរុស្ស៊ី

រុស្ស៊ី៖ ឯកអគ្គរដ្ឋទូតរុស្ស៊ីប្រចាំប្រទេសគុយបា បានប្រាប់អ្នកសារព័ត៌មានកាលពីថ្ងៃពុធ (២៧ កញ្ញា) ថា ប្រទេសគុយបា និងរុស្ស៊ី កំពុងធ្វើការរួមគ្នាលើករណីដែលពលរដ្ឋគុយបាត្រូវបានជ្រើសរើសឱ្យចូលប្រយុទ្ធក្នុងយោធារុស្ស៊ី។នៅដើមខែនេះ រដ្ឋាភិបាលគុយបាបាននិយាយថា បុរសវ័យក្មេងជនជាតិគុយបាជាច្រើន បានចុះឈ្មោះក្នុងជួរយោធារបស់វិមានក្រឹមឡាំងក្នុងរយៈពេលប៉ុន្មានខែថ្មីៗនេះ ក្នុងនាមជាទាហានស៊ីឈ្នួល និងជាជនរងគ្រោះក្នុងគម្រោងការជួញដូរមនុស្ស ដែលត្រូវបានចោទប្រកាន់ ស្របពេលសង្គ្រាមកំពុងបន្តនៅអ៊ុយក្រែន។ឯកអគ្គរដ្ឋទូតរុស្ស៊ី លោក Víctor Koronelli បាននិយាយនៅក្នុងការអត្ថាធិប្បាយជាសាធារណៈលើកដំបូងលើបញ្ហានេះថា ភាគីរុស្ស៊ី និងគុយបា កំពុងទាក់ទងគ្នាក្នុងរឿងនេះ។ ការអត្ថាធិប្បាយរបស់លោក Koronelli កាលពីថ្ងៃពុធ បានកើតឡើងក្នុងពិធីមួយ ដែលបង្ហាញពីការបរិច្ចាគប្រេងបន្លែចំនួន៦៥០តោន មានតម្លៃ៣លានដុល្លារ ដែលជាអំណោយមួយក្នុងចំណោមអំណោយជាបន្តបន្ទាប់ រាប់ចាប់ពីស្រូវសាលី រហូតដល់ការផ្គត់ផ្គង់ផ្នែកវេជ្ជសាស្រ្ត ដែលបានផ្តល់ដល់ប្រទេសគុយបានាពេលថ្មីៗនេះ ដោយសម្ព័ន្ធមិត្តរុស្ស៊ីរបស់ខ្លួន៕

ទីក្រុងឆ្នេរសមុទ្ររបស់ប្រទេសក្រិក បានរងការវាយប្រហារម្តងទៀតដោយទឹកជំនន់

ក្រិក៖ ភ្លៀងធ្លាក់ដ៏ខ្លាំងក្លា បានបង្កជាទឹកជំនន់នៅផ្នែកខ្លះនៃប្រទេសក្រិក កាលពីថ្ងៃពុធ (២៧ កញ្ញា) ដោយភ្លៀងនៅតែបន្តធ្លាក់ពីព្យុះមុននោះ ដែលបានឆក់យកជីវិតមនុស្ស១៦នាក់។ នៅទីក្រុងឆ្នេរសមុទ្រ វ៉ូឡុស (Volos) ក្នុងតំបន់ថេសាលី (Thessaly) ព្យុះឈ្មោះ អេលីយ៉ាស (Elias) បានបង្កឲ្យមានភ្លៀងធ្លាក់ខ្លាំង ដែលបណ្ដាលឲ្យទឹកជន់លិចផ្លូវជាច្រើន។នាយកដ្ឋានពន្លត់អគ្គិភ័យ បានឆ្លើយតបទៅនឹងការហៅទូរស័ព្ទរាប់សិបករណី ដើម្បីជួយបាចទឹកចេញពីលំនៅឋាននៅក្នុងប្រទេសក្រិកដីគោក និងនៅលើកោះអេវីយ៉ា (Evia) ក្នុងប្រទេសនេះផងដែរ។ កាលពីដើមខែនេះ តំបន់ថេសាលី រួមទាំងទីក្រុង វ៉ូឡុស ត្រូវបានវាយប្រហារដោយព្យុះ ដានីញ៉ែល (Daniel) ម្ដងរួចមកហើយ ដែលបានសម្លាប់មនុស្ស១៦នាក់ បន្ទាប់ពីទឹកជំនន់បានបោកបក់ហូរកាត់ទីក្រុង និងភូមិជាច្រើនក្នុងតំបន់នោះ។ក្រុមអ្នកឧតុនិយមបាននិយាយថា ព្យុះថ្មីដែលបានវាយប្រហារប្រទេសកាលពីថ្ងៃច័ន្ទនោះ ត្រូវបានគេរំពឹងថា នឹងបន្តស្ថិតនៅក្នុងប្រទេសក្រិក រយៈពេលពីរថ្ងៃបន្ទាប់ ដែលនាំមកនូវភ្លៀងធ្លាក់ខ្លាំង និងសំណុំទឹកកក ហើយក្រុមអាជ្ញាធរបានបញ្ជូនការព្រមានជាបន្ទាន់ដល់សាធារណជន ដើម្បីរឹតបន្តឹងការធ្វើដំណើរផ្សេងៗផងដែរ៕

កូនទាហានអាមេរិក Travis King កំពុងស្ថិតក្នុងការឃុំខ្លួននៅអាមេរិក បន្ទាប់ពីកូរ៉េខាងជើងបណ្តេញចេញ

អាមេរិក៖ សហរដ្ឋអាមេរិក បាននិយាយកាលពីថ្ងៃពុធថា ពលបាល លោក Travis King ជាកូនទាហានសហរដ្ឋអាមេរិក ដែលបានរត់ចូលទៅក្នុងប្រទេសកូរ៉េខាងជើង កាលពីខែកក្កដាកន្លងទៅ កំពុងស្ថិតក្នុងការឃុំខ្លួននៅសហរដ្ឋអាមេរិក និងវិលត្រឡប់ទៅកាន់ប្រទេសកំណើតវិញ បន្ទាប់ពីកូរ៉េខាងជើងបណ្តេញចេញចូលទៅក្នុងប្រទេសចិន ។ ខណៈព័ត៌មានអំពីការទូតដែលឈានដល់ការបញ្ជូនខ្លួនរបស់ King នៅតែពុំទាន់ច្បាស់លាស់នៅឡើយ ព័ត៌មានវិវត្តន៍នេះ គឺជាឧទាហរណ៍ដ៏កម្រមួយនៃកិច្ចសហប្រតិបត្តិការ រវាងសហរដ្ឋអាមេរិក កូរ៉េខាងជើង និងប្រទេសចិន។ ក្រសួងការបរទេសអាមេរិក បាននិយាយថា ទាហានរូបនេះ ត្រូវគេរំពឹងថានឹងត្រូវបានវិលត្រឡប់មកកាន់សហរដ្ឋអាមេរិកវិញនៅពេលក្រោមមកកាលពីថ្ងៃពុធ។ កូនទាហាន King វ័យ២៣ឆ្នាំ បានរត់ចូលទៅក្នុងប្រទេសកូរ៉េខាងជើងពីកូរ៉េខាងត្បូង កាលពីថ្ងៃទី១៨ខែកក្កដា ខណៈមានដំណើរកម្សាន្តរបស់ក្រុមជនស៊ីវិលទៅកាន់ព្រំដែនប្រទេសទាំង២ដែលមានការយាមកាមសន្តិសុខតឹងរ៉ឹងបំផុត និងត្រូវបានចាប់ឃុំខ្លួនភ្លាមៗនៅក្នុងប្រទេសកូរ៉េខាងជើង។ ទីក្រុងវ៉ាស៊ីនតោន ពុំបានប្រកាសថារូបគេជាឈ្លើយសឹកនោះទេ ទោះបីមានការជជែកវែកញែកដ៏ចម្រូងចម្រាសនៅក្នុងរដ្ឋាភិបាលក៏ដោយ។ជ្រុងមួយទៀត កូរ៉េខាងជើង ទំនងជានឹងចាត់ទុកករណីរបស់កូនទាហានរូបនេះជាការធ្វើអន្តោប្រវេសន៍ខុសច្បាប់ប៉ុណ្ណោះ ។ទីភ្នាក់ងារសារព័ត៌មានរដ្ឋ KCNA របស់កូរ៉េខាងជើង បាននិយាយថា King បានប្រាប់ទីក្រុងព្យុងយ៉ាងថា រូបគេបានចូលទៅក្នុងទឹកដីកូរ៉េខាងជើងដោយខុសច្បាប់ ព្រោះគេមិនពេញចិត្តចំពោះវិសមភាពនៅក្នុងសង្គមសហរដ្ឋអាមេរិក។ រដ្ឋាភិបាលស៊ុយអែត ដែលតំណាងឲ្យផលប្រយោជន៍អាមេរិកក្នុងប្រទេសកូរ៉េខាងជើងព្រោះក្រុងវ៉ាស៊ីនតោនពុំមានស្ថានទូតក្នុងប្រទេសនេះ បានទទួល King នៅក្នុងទឹកដីកូរ៉េខាងជើង ទាំងមានសុខភាពល្អធម្មតា រួចនាំគេទៅកាន់ប្រទេសចិន៕

អាស៊ែរបៃហ្សង់ ចាប់ខ្លួនអតីតប្រមុខរដ្ឋាភិបាលបំបែកខ្លួន បន្ទាប់ពីដណ្តើមបានតំបន់ណាហ្គ័រណូ-ការ៉ាបាក់ មកកាន់កាប់វិញ

អាស៊ែរបៃហ្សង់៖ ប្រទេសអាស៊ែរបៃហ្សង់ បាននិយាយថា ខ្លួនបានចាប់ខ្លួនអតីតប្រមុខរដ្ឋាភិបាលផ្តាច់ខ្លួនរបស់ណាហ្គ័រណូ-ការ៉ាបាក់ ខណៈដែលអតីតមេដឹកនាំរូបនេះ បានព្យាយាមឆ្លងចូលទៅក្នុងប្រទេសអាមេនី កាលពីថ្ងៃពុធ រួមជាមួយមនុស្សរាប់ម៉ឺននាក់ផ្សេងទៀត ដែលបានភៀសខ្លួន បន្ទាប់ពីការវាយប្រហារ២៤ម៉ោងកាលពីសប្តាហ៍របស់អាស៊ែរបៃហ្សង់ ដើម្បីដណ្តើមយកដែនដីដែលនៅឆ្ងាយនេះ មកគ្រប់គ្រងវិញ។ការចាប់ខ្លួន លោក រ៉ូបិន វ៉ាដានយ៉ាន ( Ruben Vardanyan) ត្រូវបានប្រកាសដោយសេវាកម្មឆ្មាំល្បាតព្រំដែនរបស់ប្រទេស អាស៊ែរបៃហ្សង់។ វាហាក់ដូចជាឆ្លុះបញ្ចាំងពីចេតនារបស់អាស៊ែរបៃហ្សង់ ក្នុងការពង្រឹងការកាន់កាប់តំបន់នេះយ៉ាងឆាប់រហ័ស និងដោយកម្លាំងខ្លាំងក្លា បន្ទាប់ពីការវាយលុករបស់យោធា ដែលបានជំរុញឲ្យមានការភៀសខ្លួនដ៏ឆាប់រហ័សនៃជនជាតិភាគតិចអាមេនី។លោក វ៉ាដានយ៉ាន ជាពាណិជ្ជករមានប្រាក់រាប់ពាន់លាន ដែលបានបង្កើតទ្រព្យសម្បត្តិរបស់ខ្លួន នៅក្នុងប្រទេសរុស្ស៊ី ជាកន្លែងលោកជាម្ចាស់ធនាគារវិនិយោគដ៏ធំមួយ បានផ្លាស់ប្តូរទីតាំងទៅតំបន់ណាហ្គ័រណូ-ការ៉ាបាក់ ក្នុងឆ្នាំ២០២២ ហើយបានបម្រើការជាប្រមុខរដ្ឋាភិបាលក្នុងតំបន់អស់រយៈពេលជាច្រើនខែ មុនពេលចុះចេញពីតំណែង កាលពីដើមឆ្នាំនេះ។សេវាឆ្មាំល្បាតព្រំដែន បាននិយាយថា លោក វ៉ាដានយ៉ាន ត្រូវបានអមដំណើរទៅកាន់រដ្ឋធានីបាគូរបស់ប្រទេសអាស៊ែរបៃហ្សង់ ហើយបានប្រគល់ទៅឲ្យ «ស្ថាប័នរដ្ឋពាក់ព័ន្ធ» ដែលនឹងសម្រេចជោគវាសនារបស់អតីតមេដឹកនាំផ្តាច់ខ្លួនរូបនេះ។ សេវានេះ បានបង្ហោះរូបភាពរបស់ លោក វ៉ាដានយ៉ាន ដែលត្រូវបានចាប់ខ្លួនដោយឆ្មាំល្បាតព្រំដែនពីរនាក់ នៅក្បែរឧទ្ធម្ភាគចក្រ៕

សហរដ្ឋអាមេរិកថ្កោលទោសការវាយប្រហាររបស់ក្រុមឧទ្ទាមហ៊ូធី លើតំបន់ព្រំដែនអារ៉ាប៊ីសាអូឌីត-យេម៉ែន

កាលពីថ្ងៃអង្គារម្សិលមិញ សហរដ្ឋអាមេរិក បានថ្កោលទោសការវាយប្រហារដោយយានដ្រូនរបស់ក្រុមឧទ្ទាមហ៊ូធីកាលពីថ្ងៃទី ២៥ ខែកញ្ញា ដែលបានសម្លាប់កងកម្លាំងបារ៉ែនចំនួន ២នាក់ និងមនុស្សជាច្រើននាក់ផ្សេងទៀត បនរងរបួសនៅក្នុងប្រទេសអារ៉ាប៊ីសាអូឌីត ជិតព្រំដែនជាមួយយេម៉ែន ។ អ្នកនាំពាក្យក្រសួងការបរទេសសហរដ្ឋអាមេរិក Matthew Miller និយាយថា ក្រុមមន្រ្តីសហរដ្ឋអាមេរិក បានទាក់ទងជាមួយសមភាគីបារ៉ែន ហើយនិងបញ្ជាក់ឡើងវិញការគាំទ្រសម្រាប់រាជាណាចក្រមួយនេះ ។ លោក Miller បានអំពាវនាវឲ្យមានកិច្ចព្រមព្រៀងនៅក្នុងចំណោមភាគីពាក់ព័ន្ធ ដោយលោកបញ្ជាក់ថា មានតែកិច្ចព្រមព្រៀងរវាងយេម៉ែនទេ ទើបអាចដោះស្រាយជម្លោះមួយនេះបាន ។ លោក Millerនិយាយថា ពួកយើងបានធ្វើការដោយឥតមានការនឿយហត់ជាមួយដៃគូរបស់ពួកយើង ដើម្បីបន្ធូរបន្ថយស្ថានការ ដើម្បីស្វែងរកបទឈប់បាញ់ និងជំរុញឲ្យភាគីទាំង ២ឆ្ពោះទៅរកសន្តិភាព ។ លោកបន្តថា រដ្ឋមន្រ្តីការបរទេសសហរដ្ឋអាមេរិកលោក Antony Blinken បានពិភាក្សាលើសន្តិភាពនៅយេម៉ែន ហើយនិងបានចូលរួមជាមួយសមភាគីជាច្រើននៅក្នុងតំបន់កាលពីសប្តាហ៍មុន អំឡុងមហាសន្និបាតអង្គការសហប្រជាជាតិ ហើយលោកបានធ្វើការសង្កត់ធ្ងន់ថា មានតែកិច្ចព្រមព្រៀងនយោបាយយេម៉ែនមួយគត់ ដែលអាចដោះស្រាយជម្លោះមួយនេះបាន ហើយនិងបញ្ចប់វិបត្តិមនុស្សធម៌ ។ គួរឲ្យដឹងថា ភាគីទាំង ២ ក្នុងសង្រ្គាមរយៈពេល ៨ឆ្នាំនៅយេម៉ែន បានចោទប្រកាន់គ្នាទៅវិញទៅមកសម្រាប់ការវាយប្រហារទាំងអស់នេះ ដែលបានធ្វើឲ្យប៉ះពាល់ដល់ដំណើរការស្វែងរកសន្តិភាព។ ចលនាក្រុមឧទ្ទាមហ៊ូធីរបស់យេម៉ែន បានធ្វើសង្រ្គាមជាមួយកងកម្លាំងចម្រុះដឹកនាំដោយអារ៉ាប៊ីសាអូឌីត ចាប់តាំងពីឆ្នាំ ២០១៥រហូតមក នៅក្នុងជម្លោះមួយដែលបានសម្លាប់មនុស្សរាប់ម៉ឺននាក់ ហើយនិងធ្វើប្រជាពលរដ្ឋ ៨០ភាគរយ ពឹងផ្អែកលើជំនួយមនុស្សធម៌ ៕

អតីតនាយករដ្ឋមន្រ្តីប៉ាគីស្ថាន ផ្ទេរទៅកាន់ពន្ធនាគារថ្មី ក្រោយការបញ្ជារបស់តុលាការ

មេធាវីរបស់លោក និងគណបក្សរបស់លោកនិយាយកាលពីថ្ងៃអង្គារថា អតីតនាយករដ្ឋមន្រ្តីប៉ាគីស្ថាន លោក Imran Khan ត្រូវបានផ្ទេរទៅកាន់ពន្ធនាគារថ្មី ដែលមានស្ថានភាពល្អប្រសើរជាងនេះ នៅជិតរដ្ឋធានីជាតិ អ៊ីស្លាម៉ាបាដ ក្រោយការបញ្ជារបស់តុលាការ ។ ក្រុមអ្នកគាំទ្ររាប់សិបនាក់ បានជួបជុំគ្នានៅក្រៅពន្ធនាគារ Adyala បាចស្លឹកផ្កាកុលាប និងនាំគ្នាស្រែក ពេលដែលក្បួនរថយន្តក្រុមនគរបាល និងរថពាសដែក ធ្វើដំណើរមកដល់ ។ គួរឲ្យដឹងថា លោក Khan ត្រូវបានតុលាការសម្រេចដាក់ពន្ធនាគារកាលពីខែសីហាកន្លងទៅ ពាក់ព័ន្ធនឹងករណីពុករលួយ ។ តុលាការបានផ្អាកការជាប់ពន្ធនាគាររបស់លោករយៈពេលច្រើនសប្តាហ៍ ប៉ុន្តែការបញ្ជាលើកមុនឲ្យឃុំឃាំងរូបលោក ក្នុងករណីពាក់ព័ន្ធនឹងបទចោទប្រកាន់បែកធ្លាយការសម្ងាត់រដ្ឋ បានរារាំងការដោះលែងរូបលោក ។ ក្រុមមេធាវី និងគណបក្សរបស់លោក បានអង្វរឲ្យតុលាការ ចេញបទបញ្ជាផ្ទេររូបលោក Khan ទៅកាន់ពន្ធនាគារ Adyala ស្ថិតនៅទីក្រុង Rawalpindi ដោយពួកគេនិយាយថា វាស័ក្តិសមជាងសម្រាប់អតីតនាយករដ្ឋមន្រ្តីរូបនេះ ។ លោក Khan ត្រូវបានគេឃុំឃាំងនៅក្នុងពន្ធនាគារសល់ពីសម័យអាណានិគម ស្ថិតនៅសង្កាត់ភាគពាយ័ព្យ Attock ដែលខ្វះខាតហេដ្ឋារចនាសម្ព័ន្ធសំខាន់ៗជាច្រើន ដូចជាបន្ទាប់ទឹកផ្ទាល់ខ្លួន និងទូរទស្សន៍ ហើយនិងធ្វើឲ្យក្រុមគ្រួសារ និងមិត្តភក្តិពិបាកទៅសួរសុខទុក្ខរូបលោក ឬផ្ញើកាសែត សៀវភៅ និងចំណីអាហារដល់រូបលោក ៕

ម៉ារ៉ុកបង្ហាញការដឹងគុណយ៉ាងជ្រាលជ្រៅចំពោះជំនួយមនុស្សធម៌ ក្រោយការរញ្ជួយដីសម្លាប់មនុស្សជាង៣ពាន់នាក់

ឯកអគ្គរដ្ឋទូតម៉ារ៉ុកប្រចាំនៅអង្គការសហប្រជាជាតិលោក Omar Hilale បានថ្លែងអំណរគុណយ៉ាងជ្រាលជ្រៅដល់ក្រុមមេដឹកនាំពិភពលោកសម្រាប់ការគំាទ្ររបស់ពួកគេ បន្ទាប់ពីគ្រោះរញ្ជួយដីបានអង្រួនប្រទេសរបស់លោកកាលពីដើមខែនេះ ។ នៅក្នុងសុន្ទរកថាទៅកាន់មហាសន្និបាតអង្គការសហប្រជាជាតិនៅបុរីញូវយ៉ក សហរដ្ឋអាមេរិក លោក Hilale និយាយថា អនុញ្ញាតឲ្យខ្ញុំបង្ហាញការដឹងគុណយ៉ាងជ្រាលជ្រៅ ហើយនិងការកើតសរសើររបស់រាជាណាចក្រម៉ារ៉ុក ។ លោកបន្តថា ម៉ារ៉ុក បានប្រឈមផលប៉ះពាល់ខ្លាំងដោយសារការរញ្ជួយដីមួយនេះ ដែលបានសម្លាប់មនុស្សជាង ៣ពាន់នាក់ ហើយនិងធ្វើឲ្យមនុស្សជាង ៥.៧០០នាក់ផ្សេងទៀត រងរបួស ។ វានាំឲ្យមានការខាតប់ងសម្ភារៈដ៏ច្រើនសន្ធឹកសន្ធាប់ផងដែរ ។ នៅក្នុងសុន្ទរកថានេះដែរ លោក Hilale បានថ្កោលទោសប្រទេសជិតខាងអាល់ហ៊្សេរី ពាក់ព័ន្ធនឹងស្ថានភាពជម្លោះនៅតំបន់សាហារ៉ាខាងលិច ។ ប្រទេសអាល់ហ៊្សេរី បានផ្តាច់ទំនាក់ទំនងការទូតជាមួយម៉ារ៉ុក កាលពីរយៈពេល ២ឆ្នាំមុន ដោយសារជម្លោះនៅតំបន់ជួរមុខ Polisario ដែលព្យាយាមស្វែងរកឯករាជ្យពីម៉ារ៉ុក ។ លោកនិយាយថា ពួកយើងនៅតែតាមដានស្ថានការនយោបាយសម្រាប់ជម្លោះក្នុងតំបន់បង្កើតថ្មីនៅតំបន់សាហារ៉ារបស់ម៉ារ៉ុក ដើម្បីលើកកម្ពស់ការអភិវឌ្ឍន៍ ស្ថិរភាព និងសន្តិភាពក្នុងតំបន់ និងនៅទូទាំងទ្វីបអាហ្វ្រិក ។ លោកនិយាយទៀតថា អាល់ហ៊្សេរី ដែលជាប្រទេសម្ចាស់ផ្ទះ ផ្ទេរសិទ្ធិអំណាចរបស់ខ្លួនដោយខុសច្បាប់ដល់ក្រុមប្រដាប់អាវុធផ្តាច់ខ្លួន ដែលមានទំនាក់ទំនងជាមួយក្រុមឧក្រិដ្ឋករ និងបណ្តាញភេរវកម្ម ។ ភាពច្របូកច្របល់មួយនេះ ត្រូវការចំណាប់អារម្មណ៍ពីសហគមន៍អន្តរជាតិ ។ សូបញ្ជាក់ថា បញ្ហានៅតំបន់សាហារ៉ាខាងលិច ស្ថិតនៅកណ្តាលជម្លោះកើនឡើងរវាងម៉ារ៉ុក និងអាល់ហ៊្សេរី ដែលព្រំដែនរបស់ពួកគេ បានបិទ ចាប់តាំងពីឆ្នាំ ១៩៩៤រហូតមក ៕

ជនអន្តោប្រវេសន៍បន្តសម្រុកឆ្លងកាត់ព្រំដែនអាមេរិក-ម៉ិកស៊ិក

ជនអន្តោប្រវេសន៍បានបន្តសម្រុកឆ្លងកាត់ព្រំដែនអាមេរិក-ម៉ិកស៊ិកកាលពីថ្ងៃអង្គារ (២៦ កញ្ញា) ស្របពេលមានការកើនឡើងចុងក្រោយនេះ។ កាលពីល្ងាចថ្ងៃអង្គារ សារព័ត៌មាន រ៉យទ័រ បានបង្ហាញវីដេអូជនអន្តោប្រវេសន៍ វេណេស៊ុយអេឡា មួយក្រុមធំ ដែលកំពុងធ្វើដំណើរឆ្លងកាត់ទន្លេ Rio Grande និងចូលទៅក្នុងទីក្រុងព្រំដែន Eagle Pass នៃរដ្ឋតិចសាស់ របស់សហរដ្ឋអាមេរិក ជាទីដែលពួកគេរង់ចាំដំណើរការស្នើសុំសិទ្ធជ្រកកោន។ជនអន្តោប្រវេសន៍មួយចំនួនធំ បាននឹងកំពុងឆ្លងចូលសហរដ្ឋអាមេរិក ពីប្រទេសម៉ិកស៊ិក ក្នុងប៉ុន្មានសប្តាហ៍ថ្មីៗនេះ ដោយដាក់សម្ពាធលើរដ្ឋបាលលោកប្រធានាធិបតី បៃដិន ក្នុងការរារាំងលំហូរនៃប្រជាជន ខណៈការកួតប្រជែងការបោះឆ្នោតប្រធានាធិបតីអាមេរិកឆ្នាំ២០២៤ ចាប់ផ្តើមស្ថិតក្នុងដំណាក់កាលក្ដៅគគុក។ជនអន្តោប្រវេសន៍កាន់តែច្រើនឡើង ត្រូវបានគេមើលឃើញថាឆ្លងកាត់ទ្វីបអាមេរិក ហើយប្រធានាធិបតីប្រទេសកូស្តា រីកា កាលពីថ្ងៃអង្គារ (២៦ កញ្ញា) បានបញ្ជាឱ្យដាក់ប្រទេសក្នុងភាពអាសន្នជុំវិញការកើនឡើងយ៉ាងខ្លាំងក្លានៃប្រជាជន ដែលឆ្លងកាត់ប្រទេសដ៏តូចនៅអាមេរិកកណ្តាលមួយនេះផងដែរ៕

នគរបាលប្រឆាំងការជូញដូរមនុស្សឃាត់ខ្លួនជនជាតិស្វីសម្នាក់ ពាក់ព័ន្ធករណីទិញ ពេស្យាចារ កុមារ

ភ្នំពេញ៖ កម្លាំងនគរបាលប្រឆាំងការជួញដូរមនុស្ស និងការពារអនីតិជនបានធ្វើការស្រាវជ្រាវ និងឃាត់ខ្លួនជនបរទេសម្នាក់ពាក់ព័ន្ធករណីទិញពេស្យាចាលើកុមារ។ប្រតិបត្តិការនេះ បានធ្វើឡើង នៅថ្ងៃទី២៦ ខែកញ្ញាឆ្នាំ២០២៣ ស្ថិតនៅបុរីរុងរឿង តាមបណ្ដោយផ្លូវរុងរឿង ភូមិគោកឃ្លាំង សង្កាត់ព្រែកលាភ ខណ្ឌជោយចង្វារ រាជធានីភ្នំពេញ។ប្រតិបត្តិការនេះ ដោយមានចង្អុលបង្ហាញពីឯកឧត្តមឧត្តមសេនីយ៍ទោ ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ មានការដឹកនាំបញ្ជាពីលោក ឧត្តមសេនីយ៍ទោ ចាន់ កិត្តិខុម ស្នងការរងទទួលដឹកនាំការងារការិយាល័យប្រឆាំងការជួញដូរមនុស្ស និងការពារអនីតិជន នៃស្នងការដ្ឋាននគរបាលរាជាធានីភ្នំពេញ និងសម្របសម្រួល ដោយលោក ស៊ិត វណ្ណះ ព្រះរាជអាជ្ញារងអមសាលាដំបូងរាជធានីភ្នំពេញលោកវរសេនីយ៍ទោ ហាក់ លី ប្រធានការិយាល័យ ធ្វើការស្រាវជ្រាវឃាត់ខ្លួនជនសង្ស័យ។តាមប្រភពព័ត៌មាន បានឲ្យដឹងថា ក្រោយទទួលបានសេចក្ដីរាយការណ៍កម្លាំងជំនាញបានធ្វើការងារស្រាវជ្រាវភ្លាមពាក់ព័ន្ធ នឹងករណីជនបរទេសជនជាតិស្វីស បានធ្វើការទិញពេស្យាចា លើកុមារចំនួន០៣នាក់។ ដូច្នេះកម្លាំងធ្វើការស៊ើបអង្កេតច្បាស់ការរហូតឈានដល់ការឃាត់ខ្លួនជនបរទេសរូបនេះតែម្ដង។ក្នុងរង្វង់ប្រតិបត្តិការនេះ កម្លាំងជំនាញបានរំដោះកុមាររងគ្រោះចំនួន៣នាក់។ប្រភពព័ត៌មាន បានឲ្យដឹងទៀតថា ក្នុងការទិញលក់ពេស្យាចា លើកុមារនេះគឺម្ដាយជនរងគ្រោះផ្ទាល់តែម្ដង បានលក់ពេស្យាចាកុមារទៅឲ្យជនបរទេសរូបនេះតម្លៃក្នុងមួយខែ ១៥០ ដុល្លារ។ដោយក្នុងមួយសប្តាហ៍យកកុមារនោះទៅជួបជនបរទេស បីដងទៅបួនដង ហើយជនបរទេសរូបនោះក៏បានទិញសម្ភាៈប្រើប្រាស់បន្តិចបន្តួចឲ្យម្ដាយ របស់កុមាររងគ្រោះបន្ថែមទៀតផងដែរ។ក្រោយប្រតិបត្តិការកម្លាំងជំនាញ បានធ្វើការឃាត់ខ្លួនជនបរទេសនេះ ដើម្បីធ្វើការសាកសួរនិងកសាងសំណុំរឿងចាត់ការតាមនីតិវិធីច្បាប់។ ចំណែកកុមាររងគ្រោះត្រូវបានកម្លាំងនគរបាលបញ្ជូនទៅមន្ទីរសង្គមកិច្ចរាជធានីភ្នំពេញ៕ អត្ថបទ៖ កុម្ភៈ

ជប៉ុននឹងពិនិត្យមើលការប្រកាសរបស់រុស្ស៊ីពិចារណាលើបំរាមនាំចូលគ្រឿងសមុទ្ររបស់ខ្លួន

ជប៉ុននឹងពិនិត្យមើលការប្រកាសរបស់រុស្ស៊ីចំពោះលទ្ធភាពនៃការចូលរួមជាមួយចិនក្នុងការហាមឃាត់ការនាំចូលគ្រឿងសមុទ្រជប៉ុន ដើម្បីឆ្លើយតបនឹងការបញ្ចេញទឹកបន្សាបវិទ្យុសកម្មចេញពីរោងចក្រថាមពលនុយក្លេអ៊ែរ Fukushimaចូលទៅក្នុងមហាសមុទ្រ ។ នេះបើយោងតាមការអះអាងរបស់លោក Hirokazu Matsuno គឺជាអ្នកនាំពាក្យរដ្ឋាភិបាលជប៉ុន បានប្រកាសឲ្យដឹងនៅថ្ងៃពុធនេះ ។ ជប៉ុនចាប់ផ្តើមបញ្ចេញទឹកកាកសំណល់ពីរោងចក្រនុយក្លេអ៊ែរចូលទៅក្នុងមហាសមុទ្រកាលពីខែមុន ជាហេតុធ្វើឲ្យមានការរិះគន់ខ្លាំងពីចិន ។ ជាការសងសឹកនឹងទង្វើបែបនេះ ចិនបានដាក់ចេញបំរាមនាំចូលគ្រឿងសមុទ្រទាំងអស់ពីប្រទេសជប៉ុន ។ ដោយឡែក ក្រុមឃ្លាំមើលសុវត្ថិភាពចំណីអាហាររុស្ស៊ី Rosselkhoznadzor បាននិយាយកាលពីថ្ងៃអង្គារថា ពួកគេបានពិភាក្សាលើការនាំចូលគ្រឿងសមុទ្រជប៉ុន ជាមួយសមភាគីចិន ហើយពួកគេនិយាយថា ខ្លួនបានផ្ញើរលិខិតមួយច្បាប់ជូនជប៉ុន លើតម្រូវការពិភាក្សា និងស្នើសុំព័ត៌មានពាក់ព័ន្ធនឹងការធ្វើតេស្តវិទ្យុសកម្មរបស់ជប៉ុនលើផលិតផលត្រីនាំចេញនៅថ្ងៃទី ១៦ ខែតុលាការខាងមុខនេះ ដែលរួមទាំងសារធាតុទ្រីទីយ៉ូមផងដែរ ។ ជប៉ុននិយាយថា ទឹកមានសុវត្ថិភាព ក្រោយត្រូវបានបន្សាប ដើម្បីយកចេញសារធាតុវិទ្យុសកម្ម លើកលែងតែសារធាតុទ្រីទីយ៉ូមដែលជាសារធាតុបញ្ចេញកាំរស្មី ពបាកញែកចេញពីទឹក ។ បន្ទាប់មកទឹកកាកសំណល់នេះ ត្រូវបានបន្សាបដល់កម្រិតទទួលស្គាល់ដោយអន្តរជាតិ មុនពេលបញ្ចេញចូលទៅក្នុងមហាសមុទ្រ ។ ជប៉ុននិយាយថា ការរិះគន់ពីរុស្ស៊ី និងចិន ពុំបានគាំទ្រដោយភស្តុតាងវិទ្យាសាស្រ្តនោះទេ ។ លោក Hirokazu Matsunoគឺជារដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តីជប៉ុន និយាយថា ពួកយើងចង់ពិនិត្យមើលការប្រកាសដែលរុស្ស៊ីបានធ្វើឡើងលើការនាំចូលគ្រឿងសមុទ្រជប៉ុន ។ លោកបន្តថា រដ្ឋាភិបាលជប៉ុន បានព្យាយាមពន្យល់ឥតឈប់ឈរ និងផ្តល់ព័ត៌មានលើសុវត្ថិភាពប្រព័ន្ធដំណើរការសារធាតុរាវដ៏ទំនើប(ALPS) ដើម្បីបន្សាបទឹក ដោយផ្អែកលើភស្តុតាងវិទ្យាសាស្រ្ត ដើម្បីបញ្ជាក់ដល់សហគមន៍អន្តរជាតិ ដែលរួមទាំងរុស្ស៊ីផងដែរថាទឹកមានសុវត្ថិភាព ៕

បណ្ដាញសង្គម

ព័ត៌មានថ្មីៗ

ការពិនិត្យឡើងវិញ៖ ភាពយន្តឯកសារពីតំបន់ហ្កហ្សារបស់ BBC បំពានគោលការណ៍ណែនាំអំពីភាពត្រឹមត្រូវ

មនុស្សជាច្រើននាក់ស្លាប់ក្នុងអគ្គិភ័យនៅមជ្ឈមណ្ឌលសង្គ្រោះ ក្នុងរដ្ឋ Massachusetts

ជំនួយការរបស់លោក Netanyahu ប្រឈមនឹងការចោទប្រកាន់ផ្លូវការ ជុំវិញការបែកធ្លាយព័ត៌មានយោធា

រដ្ឋមន្ត្រីការបរទេសអ៊ីស្រាអែល និងប៉ាឡេស្ទីន នឹងចូលរួមកិច្ចប្រជុំរបស់ EU

អ៊ីរ៉ង់៖ ការដាក់ទណ្ឌកម្មជាថ្មីរបស់ UN នឹងជួបជាមួយការឆ្លើយតបយ៉ាងសមស្រប

វិមានក្រឹមឡាំង៖ ការបញ្ជូនអាវុធ និងគ្រាប់រំសេវទៅអ៊ុយក្រែនពីអាមេរិក កំពុងបន្តមានធម្មតា

នគរបាលឃាត់ខ្លួនមនុស្ស ៨នាក់ ក្រោយមានការប៉ះទង្គិចរបស់ក្រុមប្រឆាំងជនអន្តោប្រវេសន៍ ក្នុងទីក្រុងនៅអេស្ប៉ាញ

ព្រះអង្គម្ចាស់ នរោត្តម ចក្រាវុធ ជួបពិភាក្សាការងារជាមួយ ឯកឧត្តម Chen Zhou អនុរដ្ឋមន្រ្តី ក្រសួងទំនាក់ទំនងអន្តរជាតិចិន

EU នឹងត្រៀមបញ្ជីពន្ធ ២៤,៥២ពាន់លានដុល្លារ សម្រាប់ទំនិញរបស់អាមេរិក

សេដ្ឋកិច្ចកម្ពុជានៅបន្តរឹងមាំ៖ ២២ខែនៃរាជរដ្ឋាភិបាលអាណតិ្តទី៧របស់សម្តេចធិបតី រោងចក្រសហគ្រាសកើនជាង៥,៣ពាន់ដែលបង្ហាញពីភាពរឹងមាំ និងជំនឿទុកចិត្ត

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877