BTV NEWS

កម្លាំងចម្រុះ រកឃើញជនជាតិចិន ៩០នាក់, ជនជាតិវៀតណាម ៣៥នាក់, ជនជាតិមីយ៉ាន់ម៉ា១៥នាក់, ឡាវម្នាក់ ក្នុងប្រតិបត្តិការចុះត្រួតពិនិត្យទីតាំងសង្ស័យលួចលាក់ប្រព្រឹត្តបទល្មើស Online Scam នៅក្រុងបាវិត

អាជ្ញាធរខេត្តកោះកុង បំភ្លឺថាមិនមានការបង្រ្កាបទីតាំងល្បែងអនឡាញទេ មានការស្រាវជ្រាវករណីឃាតកម្ម

អាវុធហត្ថខេត្តស្ទឹងត្រែងឃាត់រថយន្តដឹកជនជាតិចិនចំនួន ៩នាក់ ពាក់ព័ន្ធការឆបោកតាមប្រព័ន្ធបច្ចេកវិទ្យា

ចាប់ពីថ្ងៃទី២៧ ខែមិថុនាដល់ថ្ងៃទី១៦ ខែកក្កដានេះ គ.ប.ឆ.ប. បង្រ្កាប ONLINESCAMS ២០ទីតាំងឃាត់ខ្លួនជនសង្ស័យ ១.៣៦២ នាក់ ក្នុងនោះជនជាតិវៀតណាម ៣៤៧នាក់

សន្តិសុខ និង សង្គម

លោក Biden និយាយថា រុស្ស៊ីឈរតែម្នាក់ឯងដែលឈររាំងផ្លូវសន្តិភាពនៅអ៊ុយក្រែន

អាមេរិក៖ ប្រធានាធិបតី សហរដ្ឋអាមេរិក លោក Joe Biden បន្ទាប់ពីជំនួបនៅសេតវិមានជាមួយប្រធានាធិបតីអ៊ុយក្រែន លោក Volodymyr Zelenskiy ថា រុស្ស៊ីឈរតែម្នាក់ឯងដែលឈររាំងផ្លូវសន្តិភាព។ លោក Biden បាននិយាយនៅក្នុងជំនួបទ្វេភាគីនៅសេតវិមានជាមួយលោក Zelenskyy ថា រុស្ស៊ីកំពុងឈរតែម្នាក់ឯងដែលឈររាំងផ្លូវសន្តិភាព។ ជំនួសមកវិញ ប្រទេសរុស្ស៊ីកំពុងស្វែងរកអាវុធបន្ថែមទៀត ពីប្រទេសអ៊ីរ៉ង់ និងប្រទេសកូរ៉េខាងជើង ដែលបំពានសេចក្តីសម្រេចនានារបស់ក្រុមប្រឹក្សាសន្តិសុខអង្គការសហប្រជាជាតិ ដែលទីក្រុងមូស្គូខ្លួនឯងធ្លាប់បានបោះឆ្នោតដាក់ឲ្យអនុវត្តន៍។លោក Biden បានធានាដល់លោកZelenskyy កាលពីថ្ងៃព្រហស្បតិ៍ថា ការគាំទ្រដ៏ខ្លាំងរបស់សហរដ្ឋអាមេរិក សម្រាប់សង្គ្រាមដើម្បីវាយរុញច្រានអ្នកឈ្លានពានរុស្ស៊ី គឺនៅតែមាន ទោះបីជាមានការប្រឆាំងពីសមាជិកសភាគណបក្សសាធារណៈរដ្ឋក្នុងការបញ្ជូនជំនួយរាប់ពាន់លានក៏ដោយ។សហរដ្ឋអាមេរិក បានបញ្ជូនជំនួយមនុស្សធម៌និងសន្តិសុខប្រមាណ១១៣ពាន់លានដុល្លារ ដើម្បីជួយរដ្ឋាភិបាលរបស់លោក Zelenskyy ចាប់តាំងពីរុស្ស៊ី បានឈ្លានពានកាលពីខែកុម្ភះ ឆ្នាំ២០២២៕

ការកើនឡើងយ៉ាងខ្លាំងនៃជនអន្តោប្រវេសន៍ទៅកាន់ព្រំដែនអាមេរិក គឺជាការសាកល្បងថ្មីសម្រាប់លោក Biden

អាមេរិក៖ ជនអន្តោប្រវេសន៍រាប់ពាន់នាក់ បានឆ្លងព្រំដែនចូលទៅក្នុងសហដ្ឋអាមេរិក ក្នុងពេលប៉ុន្មានថ្ងៃថ្មីៗនេះ ពីរដ្ឋ California ទៅកាន់រដ្ឋ Texas ក្នុងនោះមនុស្សជាច្រើននៅតែបន្តទៅដល់តាមរថយន្តក្រុង និងរថភ្លើងដឹកទំនិញទៅកាន់ទៅក្រុងនានានៅតាមព្រំដែនរបស់ម៉ិកស៊ិកជាលំហូរនៃការធ្វើអន្តោប្រវេសន៍ដ៏ច្រើន បន្ថែមទៀត ទៅកាន់ភាគខាងត្បូង។ ការកើនឡើងយ៉ាងច្រើននៅតាមព្រំដែន ដែលគេបានកត់សម្គាល់ឃើញ នៅក្នុងទីក្រុង San Diego រដ្ឋ California និងទីក្រុង El Paso និង ទីក្រុង Eagle Pass នៅរដ្ឋតិ Texas ក្លាយជាចំណុចរបត់ថ្មីមួយ បន្ទាប់ពីចំនួននេះបានថយចុះក្នុងពេលប៉ុន្មានខែថ្មីៗនេះ និងអាចបង្កឲ្យមានជាបញ្ហាប្រឈមខាងនយោបាយថ្មីសម្រាប់លោកប្រធានាធិបតីអាមេរិក Joe Biden ក្នុងពេលវេលានៃការបោះឆ្នោត។កាលពីខែឧសភា លោក Biden បានដាក់ចេញគោលនយោបាយថ្មីមួយដើម្បីបញ្ឈប់ការឆ្លងដែនខុសច្បាប់ រួមទាំងការនិរទេសជនអន្តោប្រវេសន៍ទៅប្រទេសកំណើតរបស់ពួកគេ និងបម្រាមមិនឲ្យចូលក្នុងទឹកដីអាមេរិករយៈពេល៥ឆ្នាំ ជាដើម ខណៈដែលរដ្ឋបាលរបស់លោកប្រឹងប្រឹងទប់ស្កាត់លំហូរជនអន្តោប្រវេសន៍ដ៏ច្រើនបំផុត ។ ក្រុមអ្នកជំនាញនិយាយថា សហរដ្ឋអាមេរិកខ្វះសមត្ថភាពរារាំង និងដំណើរការជនអន្តោប្រវេសន៍នៅព្រំដែន ដែលជារឿយៗរដ្ឋបាលមួយនេះ មិនអាចអនុវត្តន៍ការដាក់ទោសធ្ងន់ធ្ងរដូចដែលខ្លួនបានប្រកាសកាលពីខែឧសភា៕

ប្រទេសប៉ាគីស្ថានកំណត់ការបោះឆ្នោតសម្រាប់ខែមករា ដែលទំនងជាដកបេក្ខភាពលោកអតីតនាយករដ្ឋមន្ត្រី Imran Khan

ប៉ាគីស្ថាន៖ គណៈកម្មាធិការរៀបចំការបោះឆ្នោតនៃប្រទេសប៉ាគីស្ថាន (ECP) កាលពីថ្ងៃព្រហស្បតិ៍ (២១ កញ្ញា) បានប្រកាសពីការបោះឆ្នោតសកលនៅក្នុងខែមករា រយៈពេលជិតបីខែក្រោយការគ្រោងទុក ដោយដកចេញនូវភាពមិនច្បាស់លាស់ខាងនយោបាយលើពេលវេលា ដើម្បីជួយសង្រ្គោះសេដ្ឋកិច្ច ដែលកំពុងធ្លាក់ចុះក្នុងប្រទេសនេះ។ការបោះឆ្នោតនៅក្នុងប្រទេសអាស៊ីខាងត្បូងដែលមានបញ្ហានយោបាយ និងសេដ្ឋកិច្ចមួយនេះ ធ្លាប់ត្រូវបានគ្រោងធ្វើឡើងនៅក្នុងខែវិច្ឆិកានេះ ប៉ុន្តែត្រូវបានពន្យារពេលដោយសារតែការបែកបាក់នៃមណ្ឌលបោះឆ្នោត ជុំវិញការធ្វើជំរឿនថ្មី។ សេចក្តីថ្លែងការណ៍របស់គណៈកម្មាធិការ ECP បាននិយាយថា ការបោះឆ្នោតនោះនឹងប្រព្រឹត្តទៅនៅចុងខែមករា បន្ទាប់ពីការបញ្ចប់នៃដំណើរការដែលរួមមានការដាក់ពាក្យស្នើសុំការតែងតាំង ការអំពាវនាវ និងការឃោសនាបោះឆ្នោត ដោយទំនងជាដកបេក្ខភាពរបស់លោកអតីតនាយករដ្ឋមន្រ្តី Imran Khan ចេញពីការបោះឆ្នោតនេះ។គណៈកម្មាធិការរៀបចំការបោះឆ្នោតបានចោទជាសំណួររួចមកហើយ អំពីភាពមិនលំអៀងនៃរដ្ឋាភិបាលចាំផ្ទះ ដែលដឹកនាំដោយនាយករដ្ឋមន្ត្រីបណ្ដោះអាសន្ន លោក Anwaar ul Haq Kakar ដែលមកពីគណបក្សគាំទ្រយោធា ដោយនិយាយថា វាហាក់ដូចជាស្របពេលជាមួយនឹងបក្សប្រឆាំងរបស់អតីតនាយករដ្ឋមន្ត្រីប៉ាគីស្ថាន លោក Imran Khan ដែលកំពុងជាប់ពន្ធនាគារ។ គួររម្លឹកផងដែរថា លោកអតីតនាយករដ្ឋមន្ត្រី Khan ដែលជាមេដឹកនាំគណបក្សប្រឆាំងដ៏សំខាន់នៅប៉ាគីស្ថាន មិនអាចចូលរួមប្រកួតប្រជែងក្នុងការការបោះឆ្នោតនេះបានទេ បន្ទាប់ពីលោកត្រូវបានរារាំងពីតំណែងសាធារណៈអស់រយៈពេលប្រាំឆ្នាំ បន្ទាប់ពីការស៊ើបអង្កេតអំពើពុករលួយ៕

ប្រធានាធិបតីកេនយ៉ាបញ្ជាក់ថា លោកបានត្រៀមខ្លួនជាស្រេច ដើម្បីជួយប្រទេសហៃទី ដោយអំពាវនាវឲ្យUNអនុម័តសេចក្តីសម្រេច

កេនយ៉ា៖ ប្រធានាធិបតីកេនយ៉ា បាននិយាយកាលពីថ្ងៃព្រហស្បតិ៍ថា ប្រទេសអាហ្វ្រិកខាងកើតរបស់លោកត្រៀមខ្លួនជាស្រេច ដើម្បីដឹកនាំបេសកកម្មគាំទ្រសន្តិសុខពហុជាតិ ចូលទៅក្នុងប្រទេសហៃទី ហើយបានអំពាវនាវអង្គការសហប្រជាជាតិផ្តល់ជាបន្ទាន់នូវក្របខ័ណ្ឌសមស្រប ដើម្បីធ្វើឲ្យបេសកកម្មនេះ កើតឡើង។លោកប្រធានាធិបតី វីលៀម រ៉ូតូ (William Ruto) បានថ្លែងក្នុងអំឡុងការជជែកដេញដោលទូទៅនៅអង្គការសហប្រជាជាតិ នៅទីក្រុងញូវយ៉កថា៖«កេនយ៉ា បានត្រៀមខ្លួនរួចជាស្រេច ដើម្បីបំពេញផ្នែករបស់ខ្លួនយ៉ាងពេញលេញ និងចូលរួមជាមួយសម្ព័ន្ធនៃប្រទេសដទៃទៀតដែលមានសុឆន្ទៈ ហើយមានមនុស្សជាច្រើនជាមិត្តល្អ និងជាបងប្អូនពិតប្រាកដរបស់ហៃទី។ «យើងជំរុញឲ្យUNផ្តល់ជាបន្ទាន់នូវក្របខណ្ឌសមស្របមួយ ដើម្បីជួយសម្រួលដល់ការដាក់ពង្រាយការគាំទ្រផ្នែកសន្តិសុខពហុជាតិ ដែលជាផ្នែកនៃការឆ្លើយតបរួមចំពោះបញ្ហាប្រឈមរបស់ប្រទេសហៃទី។លោក បានបន្ថែមថា៖«យើងអំពាវនាវឲ្យក្រុមប្រឹក្សាសន្តិសុខចូលរួមចំណែកជាវិជ្ជមាន ដោយអនុម័តសេចក្តីសម្រេចមួយនៅក្នុងជំពូកទី៧ ដែលកែសម្រួលបេសកកម្មគាំទ្រសន្តិសុខទៅនឹងតម្រូវការជាក់លាក់របស់ប្រទេសហៃទី និងប្រជាជនរបស់ខ្លួន»។រហូតមកដល់ពេលនេះ លោករ៉ូតូ បាននិយាយថា រដ្ឋបាលរបស់លោកកំពុង«ពិចារណាជាវិជ្ជមាន»អំពីការជួយប្រទេសហៃទី ដែលបានមើលឃើញការកើនឡើងនៃអំពើហិង្សា និងការចាប់ពង្រត់ដោយក្រុមប្រដាប់អាវុធ ចាប់តាំងពីការធ្វើឃាតលោក ប្រធានាធិបតី ហ្សូវេណែល ម៉ូអ៊ីស ( Jovenel Moïse) ក្នុងខែកក្កដា ឆ្នាំ២០២១៕

ប្រជាជនប្រេស៊ីលសម្រុកទៅលេងឆ្នេរសមុទ្រដើម្បីគេចពីសីតុណ្ហភាពដ៏ខ្ពស់ក្នុងរដូវរងា

ប្រេស៊ីល៖ ប្រជាជនប្រេស៊ីល បានសម្រុកទៅកាន់ឆ្នេរ Copacabana ក្នុងទីក្រុង រីអូ (Rio) កាលពីថ្ងៃព្រហស្បតិ៍ (២១ កញ្ញា) ដោយសារផ្នែកដ៏ធំមួយនៃប្រទេសត្រូវបានគេរំពឹងថា នឹងទទួលរងនូវកម្ដៅយ៉ាងខ្លាំងក្នុងសប្តាហ៍នេះ ដោយក្រុមអ្នកឧតុនិយមបានព្រមានអំពីសីតុណ្ហភាពលើសពី៤០អង្សាសេ។ អ្នកព្យាករណ៍អាកាសធាតុឯករាជ្យពីទីភ្នាក់ងារ Climatempo បាននិយាយថា លក្ខខណ្ឌបរិយាកាសមិនអំណោយផល នឹងរារាំងការមកដល់នៃអាកាសធាតុត្រជាក់នៅផ្នែកភាគច្រើននៃប្រទេសនេះ ក្នុងរយៈពេលពីរបីថ្ងៃខាងមុខ ដោយជំរុញឱ្យមេឃមានពន្លឺថ្ងៃដ៏យូរជាមួយនឹងកម្ដៅលើសពីកម្រិតធម្មតា សម្រាប់សប្តាហ៍ចុងក្រោយនៃរដូវរងានៅប្រទេសអឌ្ឍគោលខាងត្បូងមួយនេះ។អ្នកព្យាករណ៍ក៏បានព្រមានអំពីបញ្ហាសុខភាព ដែលអាចកើតមានបណ្តាលមកពីកម្ដៅដ៏ខ្លាំងក្លា និងលើសកម្រិតនេះ ដែលនឹងប៉ះពាល់ដល់ផ្នែកធំៗនៃតំបន់ភាគអាគ្នេយ៍ និងភាគកណ្តាលខាងលិចនៃប្រទេសនេះផងដែរ៕

មេដឹកនាំរបបសឹកហ្គីណេ រិះគន់លទ្ធិប្រជាធិបតេយ្យលោកខាងលិច ស្របពេលមានរលកនៃរដ្ឋប្រហារ

ហ្គីណេ៖ មេដឹកនាំយោធារបស់ប្រទេសហ្គីណេ លោក Mamady Doumbouya បានប្រាប់មហាសន្និបាតអង្គការសហប្រជាជាតិកាលពីថ្ងៃព្រហស្បតិ៍ (២១ កញ្ញា) ថា គំរូលទ្ធិប្រជាធិបតេយ្យរបស់លោកខាងលិច មិនដំណើរការសម្រាប់ទ្វីបអាហ្រ្វិកទេ ដូចដែលបានបង្ហាញដោយរលកនៃរដ្ឋប្រហារនាពេលថ្មីៗនេះ។លោកបានប្រាប់បណ្ដាមេដឹកនាំពិភពលោក ដែលប្រមូលផ្តុំគ្នានៅទីក្រុងញូវយ៉ក សហរដ្ឋអាមេរិក ថា «អាហ្វ្រិកកំពុងទទួលរងនូវគំរូអភិបាលកិច្ច ដែលត្រូវបានដាក់លើទ្វីបមួយនេះ។ វាជាគំរូល្អ និងមានប្រសិទ្ធភាពសម្រាប់តែប្រទេសលោកខាងលិចប៉ុណ្ណោះ ប៉ុន្តែវាមានការពិបាកក្នុងការសម្របខ្លួនទៅនឹងការពិត ទំនៀមទម្លាប់ និងបរិស្ថានរបស់អាហ្វ្រិកជាខ្លាំង»។លោក Doumbouya បានឡើងកាន់អំណាចក្នុងរដ្ឋប្រហារក្នុងឆ្នាំ២០២១ ដែលជារដ្ឋប្រហារមួយក្នុងចំណោមរដ្ឋប្រហារទាំងប្រាំបីនៅអាហ្វ្រិកខាងលិច និងកណ្តាលក្នុងរយៈពេលបីឆ្នាំចុងក្រោយនេះ។ ប្រទេសម៉ាលី នីហ្សេ ប៊ូគីណា-ហ្វាសូ ឆាដ និងហ្គាបុង ក៏គ្រប់គ្រងដោយក្រុមមន្ត្រីយោធាផងដែរ។ រដ្ឋប្រហារទាំងនោះ ត្រូវបានថ្កោលទោសយ៉ាងខ្លាំងដោយអង្គការសហប្រជាជាតិ និងមហាអំណាចលោកខាងលិច ដូចជាសហរដ្ឋអាមេរិក និងបារាំង ជាដើម ដែលបានជំរុញឱ្យមានការស្តារលទ្ធិប្រជាធិបតេយ្យឡើងវិញឱ្យបានឆាប់តាមដែលអាចធ្វើទៅបាន។ លោក Doumbouya បានរិះគន់ការឆ្លើយតបរបស់ពួកគេដោយនិយាយថា វាជាការរើសអើងជាតិសាសន៍ និងដាក់សម្ពាធយ៉ាងខ្លាំងលើការគ្រប់គ្រងប្រទេស៕

ជនអន្តោប្រវេសន៍រាប់ពាន់នាក់ត្រូវបានទម្លាក់ចោលនៅមជ្ឈមណ្ឌលឆ្លងកាត់រដ្ឋកាលីហ្វ័រនីញ៉ា បន្ទាប់ពីឆ្លងកាត់ព្រំដែនអាមេរិក-ម៉ិកស៊ិក

អាមេរិក៖ យោងតាមអង្គការផ្ដល់ជំនួយ ជនអន្តោប្រវេសន៍ជាង៣.០០០នាក់ ត្រូវបានទម្លាក់ចោលកាលពីសប្ដាហ៍មុន នៅមជ្ឈមណ្ឌលឆ្លងកាត់ នៅទីក្រុង San Diego រដ្ឋ California បន្ទាប់ពីពួកគេបានឆ្លងព្រំដែនអាមេរិក-ម៉ិកស៊ិក ។ក្រុមទីភ្នាក់ងារល្បាតព្រំដែនអាមេរិក កំពុងធ្វើការលើកិច្ចការជនអន្តោប្រវេសន៍មកពីជុំវិញពិភពលោក ដែលកំពុងរង់ចាំនៅចន្លោះរបងដែកព្រំដែនរវាងប្រទេសទាំង២នៅព្រំដែនភាគខាងត្បូង ជាការកើនឡើងយ៉ាងច្រើនៃចំនួនជនអន្តោប្រវេសន៍ដ៏ធំ ដែលបានប្រមូលផ្ដុំគ្នានៅទីនោះកាលពីខែឧសភា។ លោក ស៊ឺជីអូ ម៉ូជីកា (Sergio Mogica) បានធ្វើដំណើរមកពីប្រទេសប្រេស៊ីល និងបានផ្លោះរបងព្រំដែន កាលពីថ្ងៃអាទិត្យទី១៧ខែកញ្ញា ជាមួយមនុស្សប្រហែល៣០០នាក់ផ្សេងទៀត ។ លោក ត្រូវបានផ្ដល់កាលបរិច្ឆេទនៅតុលាការសម្រាប់ការដាក់លិខិតស្នើសុំសិទ្ធិជ្រកកោន នៅខែតុលាឆ្នាំ២០២៥ ។ជាមួយគ្នានេះដែរ លោក គ្រោងធ្វើដំណើរទៅកាន់រដ្ឋ Oklahoma ជាទីដែលគ្រួសាររបស់លោករស់នៅទីនោះ។ លោកថា នេះជារឿងល្អណាស់ ។លោកមិនធ្លាប់បានមកដល់ទីនេះទេ។ លោកមានក្ដីស្រម៉ៃចង់មកកាន់ទីនេះ។ លោកមិនដែលគិតទេថាលោកបានមកដល់ទីនេះ ប៉ុន្តែលោកបានសម្រេចចិត្តមកកាន់ទីនេះ ព្រោះលោកមានបញ្ហាសេដ្ឋកិច្ចតិចតួចនៅក្នុងប្រទេសរបស់លោក ហេតុនេះ ទើបលោកព្យាយាម ថាតើលោកអាចមកកាន់ទីនេះនិងធ្វើអ្វីមួយនៅទីនេះ បានដែរឬអត់៕

ក្រុមហ៊ូធីយ៉េម៉ែនបង្ហាញសាច់ដុំយោធាក្នុងព្យុហយាត្រា ខណៈដែលទីក្រុងរីយ៉ាដស្វះស្វែងរកបទឈប់បាញ់

យ៉េម៉ែន៖ ចលនាហ៊ូធី ( Houthi) នៅប្រទេសយ៉េម៉ែន បានបង្ហាញមីស៊ី និងយានដ្រូនប្រដាប់អាវុធ នៅក្នុងក្បួនព្យុហយាត្រាយោធាដ៏ធំមួយក្នុងទីក្រុងសាណា(Sanaa) កាលពីថ្ងៃព្រហស្បតិ៍ ដែលជាសារមួយទៅកាន់សត្រូវរបស់ពួកគេ នៅក្នុងក្រុមចម្រុះដឹកនាំដោយអារ៉ាប៊ីសាអ៊ូឌីត ខណៈដែលពួកគេបន្តការចរចាបទឈប់បាញ់ជាមួយទីក្រុងរីយ៉ាដ (Riyadh) ។ប្រធានក្រុមប្រឹក្សានយោបាយជាន់ខ្ពស់ហ៊ូធីរបស់ប្រទេសយ៉េម៉ែន លោក ម៉ាឌី អាល់ ម៉ាសហាត (Mahdi al-Mashat) និងមន្ត្រីផ្សេងទៀត បានឃ្លាំមើល នៅពេលដែលរថយន្តដឹកទំនិញធុនធ្ងន់រាប់សិបគ្រឿង បានដឹកមីស៊ីលតម្រង់គោលដៅ និងយានដ្រូនប្រដាប់អាវុធរយៈចម្ងាយឆ្ងាយ។ទាហានរាប់ពាន់នាក់ បានដើរក្បួន ក្រោមពន្លឺថ្ងៃកកតៅខ្លាំង ខណៈដែលក្រុមមន្ត្រីពាក់ទង់ជាតិយ៉េម៉ែនជាខ្សែក្រវាត់ គ្រវីដៃដាក់ក្រុមអ្នករាំប្រពៃណីចេញពីវេទិកានោះ។ក្រុមដែលមានសម្ព័ន្ធមិត្តជាមួយអ៊ីរ៉ង់ បានវាយប្រហារសម្រុកចូលទៅក្នុងរដ្ឋធានី និងភាគច្រើននៃប្រទេសយ៉េម៉ែនភាគខាងជើង នៅក្នុងឆ្នាំ ២០១៤ នៅពេលដែលពួកគេ បានបណ្តេញរដ្ឋាភិបាលដែលទទួលស្គាល់ជាអន្តរជាតិពីអំណាច។អារ៉ាប៊ីសាអ៊ូឌីត និងអារ៉ាប់រួម បានធ្វើអន្តរាគមន៍ក្នុងសង្រ្គាមក្នុងឆ្នាំ ២០១៥ ដើម្បីព្យាយាមស្ដាររដ្ឋាភិបាលឡើងវិញ ប៉ុន្តែជម្លោះនេះ បានអូសបន្លាយយ៉ាងយូរ ដោយបានសម្លាប់មនុស្សរាប់ម៉ឺននាក់ និងធ្វើ ឲ្យមនុស្សរាប់លាននាក់ ពឹងផ្អែកលើជំនួយមនុស្សធម៌៕

អាមេនី និងអាស៊ែរបៃហ្សង់ចោទដាក់គ្នាពីបញ្ហានៅតំបន់ការ៉ាបាក់ ខណៈក្រុមប្រឹក្សាសន្តិសុខUNទាមទារសន្តិភាព

អាមេនី៖ សមាជិកក្រុមប្រឹក្សាសន្តិសុខអង្គការសហប្រជាជាតិ រួមមានសហរដ្ឋអាមេរិក ទួរគី រុស្ស៊ី និងអាល្លឺម៉ង់ បានអំពាវនាវកាលពីថ្ងៃព្រហស្បតិ៍ (២១ កញ្ញា) សម្រាប់សន្តិភាពនៅតំបន់ណាហ្គ័រណូ-ការ៉ាបាក់ ដែលជាតំបន់បំបែកខ្លួនរបស់អាមេនីនៅក្នុងប្រទេសអាស៊ែរបៃហ្សង់ ជាទីដែលរដ្ឋធានីបាគូ បានបើកការវាយលុកក្នុងសប្តាហ៍នេះ។រដ្ឋមន្ត្រីការបរទេសអាមេនី លោក អារ៉ារ៉ាត់ មឺហ្ស៊ូយ៉ាន (Ararat Mirzoyan) បាននិយាយថា រដ្ឋធានីបាគូ ទំនងជានឹងបន្តប្រើកម្លាំងប្រឆាំងនឹងជនស៊ីវិលនៅតំបន់ណាហ្គ័រណូ-ការ៉ាបាក់ ម្តងទៀត លុះត្រាតែមានការរារាំងដោយមហាអំណាចពិភពលោក។ សមភាគីអាស៊ែបៃហ្សង់របស់លោក មឺហ្ស៊ូយ៉ាន គឺលោករដ្ឋមន្ត្រីការបរទេស Jeyhun Bayramov ដែលចោទប្រកាន់រដ្ឋធានីយេរ៉េវ៉ាន់ ពីការផ្សព្វផ្សាយព័ត៌មានមិនពិត បាននិយាយថា រដ្ឋធានីបាគូបានធ្វើប្រតិបត្តិការប្រឆាំងភេរវកម្មប្រឆាំងនឹងកងកម្លាំងរបស់រដ្ឋធានីយេរ៉េវ៉ាន់ តែប៉ុណ្ណោះ។គួរបញ្ជាក់ផងដែរថា តំបន់ ការ៉ាបាក់ ត្រូវបានទទួលស្គាល់ជាអន្តរជាតិថា ជាផ្នែកមួយនៃប្រទេសអាស៊ែរបៃហ្សង់ ប៉ុន្តែបានទទួលឯករាជ្យភាពជាក់ស្តែង ចាប់តាំងពីផ្តាច់ខ្លួននៅក្នុងសង្គ្រាមក្នុងទសវត្សរ៍ឆ្នាំ១៩៩០មក នៅពេលដែលសហភាពសូវៀតបនាដួលរលំ។ អាស៊ែរបៃហ្សង់បានបើកការវាយលុកយោធាដើម្បីដណ្តើមបានការគ្រប់គ្រងឡើងវិញលើទីក្រុង ការ៉ាបាក់ នេះកាលពីថ្ងៃទី១៩ ខែកញ្ញា រយៈពេលមួយថ្ងៃបន្ទាប់ពីជំនួយមនុស្សធម៌ត្រូវបានបញ្ជូនទៅតំបន់នេះជាលើកដំបូងក្នុងរយៈពេលជាច្រើនខែ៕

ឥណ្ឌាបញ្ឈប់ការផ្ដល់ទិដ្ឋាការថ្មីសម្រាប់ជនជាតិកាណាដា ដោយស្នើទីក្រុងអូតាវ៉ា កាត់បន្ថយបេសកកម្មការទូតខណៈភាពតានតឹងកាន់តែខ្លាំង

ឥណ្ឌា៖ ប្រទេសឥណ្ឌាកាលពីថ្ងៃព្រហស្បតិ៍ បានផ្អាកការផ្ដល់ទិដ្ឋាការឆ្លងដែនថ្មីសម្រាប់ពលរដ្ឋកាណាដា និងបានស្នើឲ្យទីក្រុងអូតាវ៉ា (Ottawa) កាត់បន្ថយវត្តមានអ្នកការទូតរបស់ខ្លួននៅក្នុងប្រទេសនេះ ជាការកើនឡើងកម្ដៅខ្លាំងថ្មី កើតចេញពីការចោទប្រកាន់របស់លោកនាយករដ្ឋមន្ត្រីកាណាដា ចាស្ទីន ទ្រូដូ (Justin Trudeau) ពាក់ព័ន្ធទៅនឹងទីក្រុង New Delhi ចំពោះឃាតកម្មរបស់មេដឹកនាំក្រុមផ្ដាច់ខ្លួនកាន់សាសនាស៊ីគ។ ក្រសួងការបរទេសឥណ្ឌា បាននិយាយថា កាណាដា ពុំបានចែករំម្លែកព័ត៌មានជាក់លាក់ណាមួយជាប់ពាក់ព័ន្ធទៅនឹងការចោទប្រកាន់ពី សំណាក់លោកទ្រូដូ នោះទេ ហើយថា ទីក្រុង New Delhi មានឆន្ទៈទទួល ប្រសិនបើត្រូវបានផ្ដល់ឲ្យនោះ ។ការផ្អាកដ៏ធំនៃទិដ្ឋាការឆ្លងដែនថ្មីធ្វើឡើងដោយប្រទេសឥណ្ឌា សម្រាប់ប្រទេសលោកខាងលិចមួយនេះ ពុំធ្លាប់បានកើតឡើងទេ និងធ្វើឲ្យទំនាក់ទំនងឥណ្ឌា -កាណាដា ធ្លាក់ដល់ចំណុចទាបបំផុត។សេចក្ដីប្រកាសនេះ បានកើតឡើងប៉ុន្មានម៉ោងប៉ុណ្ណោះ បន្ទាប់ពីអាជ្ញាធរជាន់ខ្ពស់របស់កាណាដានិយាយថា ខ្លួននឹងកាត់បន្ថយវត្តមានបុគ្គលិកផ្នែកការទូតរបស់ខ្លួនជាបណ្ដោះអាសន្ននៅក្នុងប្រទេសឥណ្ឌា ក្រោយក្រុមអ្នកការទូតមួយចំនួន បានទទួលសារគំរាមនៅលើបណ្ដាញសង្គម។ អ្នកនាំពាក្យក្រសួងការបរទេសឥណ្ឌា លោក អារីនដាំបាកជី(Arindam Bagchi) បាននិយាយថា ឥណ្ឌាបានផ្អាកចេញទិដ្ឋាការឆ្លងដែនថ្មី ចំពោះពលរដ្ឋកាណាដា ដោយសារការគំរាមផ្នែកសន្តិសុខចំពោះបុគ្គលិករបស់ខ្លួនក្នុងស្ថានកុងស៊ុលរបស់ខ្លួននៅកាណាដា។ គួររម្លឹកថា ភាពតានតឹងមិនធ្លាប់មានបានរីកកាន់តែធំកាលពីថ្ងៃចន្ទដើមសប្ដាហ៍នេះ បន្ទាប់ពីលោកទ្រូដូ និយាយថា ទីក្រុងអូតាវ៉ា កំពុងស៊ើបអង្កេតការចោទប្រកាន់ដែលអាចទុកចិត្តបានអំពីការពាក់ព័ន្ធរបស់រដ្ឋាភិបាលឥណ្ឌាក្នុងករណីឃាតកម្មកាលពីខែមិថុនាលើសកម្មជនកាន់សាសនាស៊ីគ លោក ហាឌីបស៊ីញនីចា (Hardeep Singh Nijjar)នៅខេត្តប្រ៊ីធីសកូឡុំប៊ីរបស់កាណាដា៕

បណ្ដាញសង្គម

ព័ត៌មានថ្មីៗ

សម្ដេចធិបតី ហ៊ុន ម៉ាណែត ថ្លែងអំណរគុណដល់បងប្អូនមហាគ្រួសារខ្មែរ ដែលបានជួបជុំគ្នាជាលើកទីពីរ ជាសារលើកទឹកចិត្តដ៏ធំធេងទៅដល់វីរកងទ័ពជួរមុខ

ប្រតិភូគណៈចលនាសាសនិកឥស្លាមកម្ពុជា នាំយកអំណោយឧបត្ថម្ភជូនកងកម្លាំងជួរមុខ ដែលកំពុងឈរជើងការពារព្រំដែន ខេត្តព្រះវិហារ

ឯកឧត្តម ឌិត ទីណា អញ្ជើញបើកកិច្ចប្រជុំបូកសរុបសកម្មភាព និងលទ្ធផលការងារមូលដ្ឋានខេត្តបន្ទាយមានជ័យ

កូនប្រុសពៅសម្ដេចធិបតី ហ៊ុន ម៉ាណែត ទទួលបានមេដាយមាសសិស្សឆ្នើម លើការប្រកួតគណិតវិទ្យាអន្តរជាតិ ចំណាត់ថ្នាក់លេខមួយ ៣ឆ្នាំជាប់គ្នា

ក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី បន្តចុះពិនិត្យ ព្យាបាលជំងឺ ជូនប្រជាពលរដ្ឋដោយឥតគិតថ្លៃ នៅឃុំតាសាល ស្រុកឱរ៉ាល់ ខេត្តកំពង់ស្ពឺ

ចិនប្តេជ្ញាចាត់វិធានការកាន់តែតឹងរ៉ឹង ប្រឆាំងនឹងការរត់ពន្ធរ៉ែយុទ្ធសាស្ត្រ

មន្ត្រីជាន់ខ្ពស់ក្រសួងធម្មការនិងសាសនាណែនាំដល់យុវជនត្រូវធ្វើអំពើល្អនិងខិតខំរៀនសូត្រដើម្បីបន្តការពារនិងអភិវឌ្ឍន៍ជាតិ

លោក Zelenskyy៖ រុស្ស៊ីបាញ់មីស៊ីលជាង ៣០គ្រាប់ និងយានដ្រូន ៣០០គ្រឿង អំឡុងការវាយប្រហារលើអ៊ុយក្រែន

មនុស្សយ៉ាងតិច ១៩នាក់ រងរបួសដោយសារការផ្ទុះកាំជ្រួចនៅកន្លែងតាំងពិព័រណ៍ ភាគខាងលិចអាល្លឺម៉ង់

កុងហ្គោ និងក្រុមឧទ្ទាម M23 ចុះហត្ថលេខាលើកិច្ចព្រមព្រៀងឈប់បាញ់ នៅកាតា

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877