BTV NEWS

អាវុធហត្ថរាជធានីភ្នំពេញ បង្ក្រាបទីតាំងលក់សម្ភារៈអាសអាភាសចំនួន ៣កន្លែង ឃាត់ខ្លួនជនសង្ស័យ ៩នាក់

គណៈបញ្ជាការឯកភាពរាជធានី បន្តចុះបង្ក្រាប Online Scams នៅសង្កាត់ចាក់អង្រែលើ ឃាត់មនុស្ស១៦នាក់

ផ្តន្ទាទោសជនជាប់ចោទ ៦នាក់ ដាក់ពន្ធនាគារអស់មួយជីវិតពាក់ព័ន្ធនឹងករណីឃាតកម្មដោយមានទារុណកម្មលើនិស្សិតជនជាតិកូរ៉េខាងត្បូង

ឃាត់ខ្លួនជនជាតិចិន ៦១នាក់ ក្នុងប្រតិបត្តិការបង្ក្រាបទីតាំង Online Scams នៅខណ្ឌចំនួនពីរ ក្នុងភូមិសាស្រ្តរាជធានីភ្នំពេញ

សន្តិសុខ និង សង្គម

យន្តហោះរុស្ស៊ី ដែលដឹកមនុស្សចំនួន១៥៩នាក់ បានធ្វើការចុះចតជាបន្ទាន់

រុស្ស៊ី៖ ទីភ្នាក់ងាររុស្ស៊ីបានរាយការណ៍នៅថ្ងៃអង្គារ (១២ កញ្ញា) នេះថា យន្តហោះរបស់ក្រុមហ៊ុនអាកាសចរណ៍ Ural Airlines របស់រុស្ស៊ី ដែលមានមនុស្ស១៥៩នាក់នៅលើនោះ និងហោះហើរពីទីក្រុង Sochi ទៅកាន់ទីក្រុង Omsk បានចុះចតជាបន្ទាន់នៅក្នុងតំបន់ Novosibirsk ភាគខាងលិចតំបន់ស៊ីបេរី។មិនទាន់មានរបាយការណ៍ភ្លាមៗអំពីអ្នករបួស ឬមូលហេតុនៃការចុះចតបន្ទាន់នេះនោះទេ។ ទីភ្នាក់ងារព័ត៌មាន Interfax របស់រុស្ស៊ីបានរាយការណ៍ថាមានមនុស្ស១៥៩នាក់នៅលើយន្តហោះ ប៉ុន្តែនៅមុននោះ សារព័ត៌មាន TASS បានរាយការណ៍ថា យន្តហោះនោះបានដឹកមនុស្ស១៥៦នាក់ប៉ុណ្ណោះ៕

ប្រជាជនរស្ស៊ី មានប្រតិកម្មផ្សេងគ្នាពាក់ព័ន្ធនឹងដំណើរទស្សនកិច្ចរបស់មេដឹកនាំកូរ៉េខាងជើង

រុស្ស៊ី៖ មេដឹកនាំកូរ៉េខាងជើង លោកគីម ជុងអ៊ុន បានទៅដល់ប្រទេសរុស្ស៊ីហើយ នេះបើតាមសារព័ត៌មានជប៉ុនរាយការណ៍នៅថ្ងៃអង្គារ (១២ កញ្ញា) នេះ ដោយតបតាមការអញ្ជើញរបស់ប្រធានាធិបតីរុស្ស៊ី លោកវ្លាឌីមៀ ពូទីន ដែលនាំឱ្យមានប្រតិកម្មផ្សេងគ្នាពីពលរដ្ឋទីក្រុងមូស្គូ និងប្រជាជននៅទីក្រុងវ្លាឌីវ៉ូស្តុក (Vladivostok) នៅចុងបូព៌ានៃប្រទេសរុស្ស៊ី។អ្នកក្រុងវ្លាឌីវ៉ូស្តុក ជាច្រើនបាននិយាយថា ពួកគេមិនប្រាកដទេថា តើមេដឹកនាំកូរ៉េខាងជើងលោកគីម ជុងអ៊ុន នឹងទៅទស្សនាទីក្រុងមួយនេះ ប៉ុន្តែបាននិយាយថារុស្ស៊ី និងកូរ៉េខាងជើងមានផលប្រយោជន៍រួម។អ្នករស់នៅទីក្រុងមូស្គូ ដោយមិនបានប្រាប់ឈ្មោះម្នាក់ បាននិយាយថា «ប្រសិនបើយើងគិតពីស្ថានភាពនេះ ដោយសំដៅដល់កិច្ចសហប្រតិបត្តិការរវាងកូរ៉េខាងជើង និងរុស្ស៊ី តាមរបៀបត្រឹមត្រូវ យើងអាចទទួលបានអត្ថប្រយោជន៍ពីខាងក្រៅបន្ថែមទៀត»។ ជាមួយគ្នានោះដែរ អ្នកក្រុងមូស្គូម្នាក់ទៀតបាននិយាយថា «ខ្ញុំគិតថាវាជារឿងល្អ សម្រាប់ប្រទេសទាំងពីរក្នុងការអភិវឌ្ឍភាពជាដៃគូរបស់ពួកគេ។ ដូច្នេះខ្ញុំសូមស្វាគមន៍ជានិច្ច ដរាបណាអ្វីៗទាំងអស់ត្រូវបានធ្វើក្នុងលក្ខណៈមិត្តភាព»។កូរ៉េខាងជើង គឺជាប្រទេសមួយក្នុងចំណោមប្រទេសមួយចំនួន ដែលបានគាំទ្រដោយបើកចំហចំពោះ «ប្រតិបត្តិការយោធាពិសេស» របស់រុស្ស៊ីនៅអ៊ុយក្រែន ហើយលោកពូទីន បានសន្យាកាលពីសប្តាហ៍មុនថានឹង «ពង្រីកទំនាក់ទំនងទ្វេភាគីគ្រប់ផ្នែក តាមវិធីដែលបានគ្រោងទុកដោយកិច្ចខិតខំប្រឹងប្រែងរួមគ្នា» ផងដែរ៕

យានអវកាសផ្ទុកទំនិញ ធានចូវ-៥ របស់ចិន ហោះចេញស្ថានីយអវកាសត្រឡប់មកផែនដីវិញ

ចិន៖ យោងតាមទីភ្នាក់ងារអវកាសចិន បានឲ្យដឹងថា យានអវកាសផ្ទុកទំនិញធានចូវ-៥ (Tianzhou 5) បានចាកចេញពីស្ថានីយអវកាសធានកុង (Tiangong) កាលពីរសៀលថ្ងៃច័ន្ទ (១១ កញ្ញា) ហើយគ្រោងនឹងត្រឡប់មកផែនដីវិញនៅថ្ងៃអង្គារ (១២ កញ្ញា) នេះ។ ទីភ្នាក់ងារនេះបាននិយាយនៅក្នុងការចេញផ្សាយខ្លីមួយថា យានអវកាសរូបយន្តនេះបានចាកចេញពីស្ថានីយអវកាសធានកុង នៅម៉ោង៤:៤៦នាទីព្រឹក (ម៉ោងក្នុងស្រុក) ហើយនឹងត្រូវបានដឹកនាំដោយប្រព័ន្ធបញ្ជា ដើម្បីត្រឡប់មកផែនដីវិញនៅថ្ងៃស្អែកនេះ។ទីភ្នាក់ងារនេះបានលើកឡើងថា ក្នុងអំឡុងពេលនៃការវិលត្រលប់មកបរិយាកាសវិញ ផ្នែកភាគច្រើននៃយានអវកាសនឹងឆេះ ហើយកម្ទេចកម្ទីមួយចំនួនតូចត្រូវបានគេរំពឹងថា នឹងធ្លាក់ចូលទៅក្នុងតំបន់សុវត្ថិភាពក្នុងមហាសមុទ្រប៉ាស៊ីហ្វិកខាងត្បូង។ យាននោះ គឺជាយានផ្ទុកទំនិញទីបួន ដែលបានភ្ជាប់ជាមួយស្ថានីយអវកាសធានកុង ដោយឥឡូវនេះត្រូវបានគ្រប់គ្រងដោយអវកាសយានិកបីនាក់នៅក្នុងបេសកកម្មស៊ិនចូវ លើកទី១៦។យានធានចូវ-៥ នេះ បានបាញ់បង្ហោះកាលពីថ្ងៃទី១២ ខែវិច្ឆិកា ឆ្នាំមុន ពីមជ្ឈមណ្ឌលបង្ហោះយានអវកាស វ៉ិនចាង (Wenchang) ក្នុងខេត្តហៃណាន (Hainan) ហើយបានចូលចតនៅស្ថានីយអវកាសធានកុង នៅថ្ងៃដដែលនោះ។ យាននេះ មានភារកិច្ចក្នុងការចាក់សាំងស្ថានីយអវកាស និងនាំយកសម្ភារៈចាំបាច់សម្រាប់ការរស់នៅ និងការងាររបស់អវកាសយានិកផងដែរ៕

កិច្ចប្រឹងប្រែងរបស់លោកពូទីន ដើម្បីទទួលបានអាវុធកូរ៉េខាងជើង និងក្រុមអ្នកប្រយុទ្ធគុយបា បង្ហាញពីសញ្ញានៃការអស់សង្ឃឹម

រុស្ស៊ី៖ កិច្ចប្រឹងប្រែងដើម្បីចរចាកិច្ចព្រមព្រៀងសព្វាវុធជាមួយលោក គីម ជុងអ៊ុន និង ការចរចាជាមួយទាហានគុយបា គ្រាន់តែជាសញ្ញាចុងក្រោយនៃការអស់សង្ឃឹមកាន់តែខ្លាំងឡើងរបស់រុស្ស៊ី ខណៈដែលខ្លួនកំពុង តស៊ូ ដើម្បីរក្សាកម្លាំងប្រយុទ្ធរបស់ខ្លួន នៅក្នុងប្រទេសអ៊ុយក្រែន។ក្រុមមន្ត្រីអាមេរិក សមាជិកសភា និងអ្នកជំនាញ បាននិយាយថា នៅពេលដែលការវាយបករបស់អ៊ុយក្រែនឈានចូលដល់ខែទីបួន កងកម្លាំងរុស្ស៊ីត្រូវទ្រាំទ្រលែងបាន ដោយសារស្លាប់និងរងរបួសដ៏ធ្ងន់ធ្ងរ កង្វះឧបករណ៍ ការបណ្តុះបណ្តាលមានកម្រិត និងសីលធម៌កម្រិតទាប ដែលបង្ខំឲ្យទីក្រុងមូស្គូមើលទៅខាងក្រៅព្រំដែនរបស់ខ្លួន ដើម្បីជំនួយ ដែលខ្លួនអាចទទួលបាន។ជាមួយនឹងជំនួបថ្មីរវាងលោក គីម និងប្រធានាធិបតីរុស្ស៊ី លោក វ្ល៉ាឌីមៀ ពូទីន នាពេលឆាប់ៗខាងមុខនេះ ដំណើរទស្សនកិច្ចបែបនេះ គឺបង្ហាញពីឋានៈអព្យាក្រឹតអន្តរជាតិរបស់មេដឹកនាំរុស្ស៊ី ដែលនាំឲ្យមាន «បញ្ហាក្នុងការទ្រទ្រង់កិច្ចខិតខំប្រឹងប្រែងផ្នែកយោធា នេះបើយោងតាមអ្នកនាំពាក្យក្រសួងការបរទេសលោក Matt Miller។លោក Miller បានប្រាប់អ្នកយកព័ត៌មានរបស់ពូទីនកាលពីថ្ងៃចន្ទថា៖«មិនត្រឹមតែគាត់បរាជ័យក្នុងការសម្រេចគោលដៅរបស់គាត់ នៅលើសមរភូមិប៉ុណ្ណោះទេ ប៉ុន្តែអ្នកឃើញគាត់ ធ្វើដំណើរឆ្លងកាត់ប្រទេសរបស់គាត់ ដោយកាន់មួកនៅក្នុងដៃ ដើម្បីអង្វរ លោក គីម ជុងអ៊ុនឲ្យជួយផ្នែកយោធា៕

មនុស្ស៧នាក់ស្លាប់ និងជាច្រើននាក់ជាប់ក្នុងទឹកជំនន់ ខណៈភ្លៀងធ្លាក់ឥតឈប់ឈរ បង្កជាបំណាក់ដីនៅប្រទេសចិន

ចិន៖ ប្រព័ន្ធផ្សព្វផ្សាយរដ្ឋបាននិយាយថា ភ្លៀងធ្លាក់ឥតឈប់ឈរជាច្រើនថ្ងៃពីសំណល់នៃអតីតព្យុះទីហ្វុង ហៃខួយ (Haikui) បានបណ្តាលឱ្យមានបំណាក់ដីជាង១០០កន្លែង ដែលបានធ្វើឲ្យអ្នកស្រុកប្រហែល១.៣៦០នាក់ ជាប់នៅក្នុងទឹកជំនន់ និងបានសម្លាប់មនុស្សយ៉ាងហោចណាស់៧នាក់ នៅភាគខាងត្បូងនៃប្រទេសចិន។ ព្យុះទីហ្វុង ហៃខួយ បានបោកបក់មកភាគខាងត្បូងប្រទេសចិនកាលពីប្រាំបីថ្ងៃមុន ហើយចាប់តាំងពីពេលនោះមក បានប្រែក្លាយទៅជាព្យុះត្រូពិចវិញ ប៉ុន្តែភ្លៀងមិនឈប់ឈរនៅតែបន្តវាយប្រហារនៅភាគនិរតីនៃខេត្តគ័ងស៊ី (Guangxi)។ប្រព័ន្ធផ្សព្វផ្សាយរដ្ឋបាននិយាយថា ខ្យល់ព្យុះមិនឈប់ឈរក្នុងរយៈពេលបីថ្ងៃចុងក្រោយនេះ នៅក្នុងតំបន់ភាគច្រើននៃទីក្រុងយូលីន (Yulin) បានបណ្តាលឱ្យមានបំណាក់ដីចំនួន១១៥កន្លែង ដែលបានបំផ្លាញផ្លូវថ្នល់ ដើមឈើបាក់រលំ បណ្តាលឱ្យមានទឹកជំនន់ និងនាំឱ្យក្រុមអាជ្ញាធរចេញការព្រមានអំពីភាពអាសន្ននៅលើផ្លូវជាតិ និងផ្លូវខេត្តជាច្រើនផងដែរ។មនុស្ស៣នាក់នៅតែបាត់ខ្លួននៅឡើយ ហើយប្រតិបត្តិការជួយសង្គ្រោះកំពុងបន្ត។ ក្រុមសង្កេតការណ៍របស់ទីក្រុងនេះ បានបង្កើនការព្រមានអំពីព្យុះ ដល់កម្រិតខ្ពស់បំផុតនៅក្នុងប្រព័ន្ធប្រកាសអាសន្នចំនួនបួនកម្រិត បន្ទាប់ពីមានភ្លៀងធ្លាក់លើសពីកម្រិត ១០១មីលីម៉ែត្រ ក្នុងរយៈពេល៣ម៉ោងនៅព្រឹកថ្ងៃអង្គារ (១២ កញ្ញា) នេះ ហើយបានបង្ហាញពីហានិភ័យនៃទឹកជំនន់ដ៏គំហុក គ្រោះមហន្តរាយភូគព្ភសាស្ត្រ និងការលិចលង់ក្នុងទីក្រុង និងតំបន់ជនបទផងដែរ៕

អាមេរិក និងវៀតណាម ព្រមានប្រឆាំងនឹងការគំរាមកំហែង ឬការប្រើប្រាស់កម្លាំង នៅសមុទ្រចិនខាងត្បូង

អាមេរិក៖ សហរដ្ឋអាមេរិក និងវៀតណាមបានព្រមានកាលពីថ្ងៃចន្ទ (១១ កញ្ញា) ប្រឆាំងនឹង «ការគំរាមកំហែង ឬការប្រើប្រាស់កម្លាំង» នៅក្នុងសមុទ្រចិនខាងត្បូងដែលមានជម្លោះ រយៈពេលប៉ុន្មានថ្ងៃបន្ទាប់ពីការប៉ះទង្គិចគ្នាចុងក្រោយដែលពាក់ព័ន្ធនឹងនាវាចិន។ ប្រធានាធិបតីអាមេរិក លោកចូ បៃដិន និងប្រធានបក្សកុម្មុយនិស្តវៀតណាម លោក ង្វៀន ភូទ្រុង (Nguyen Phu Trong) បាននិយាយថា ការទាមទារប្រកួតប្រជែងលើផ្លូវទឹកយុទ្ធសាស្ត្រនោះ ត្រូវតែដោះស្រាយក្រោមបទដ្ឋានអន្តរជាតិ។ទីក្រុងប៉េកាំង ទាមទារសិទ្ធស្ទើរតែទាំងស្រុងលើសមុទ្រចិនខាងត្បូង ដែលពាណិជ្ជកម្មរាប់ពាន់លានដុល្លារក្នុងមួយឆ្នាំៗ ធ្វើការឆ្លងកាត់តាមរយៈនោះ ហើយចិនបានព្រងើយកន្តើយនឹងសេចក្តីសម្រេចរបស់តុលាការអន្តរជាតិដែលថា ការអះអាងរបស់ខ្លួនមិនមានមូលដ្ឋានផ្លូវច្បាប់ច្បាស់លាស់។អាមេរិក និងវៀតណាម ក៏បានអំពាវនាវឱ្យមាន «សេរីភាពនៃការធ្វើនាវាចរណ៍ និងការហោះហើរ ព្រមទាំងពាណិជ្ជកម្មស្របច្បាប់គ្មានការរារាំង នៅក្នុងសមុទ្រចិនខាងត្បូងផងដែរ»។ សេចក្តីថ្លែងការណ៍នេះបានធ្វើឡើងមួយថ្ងៃបន្ទាប់ពីលោកបៃដិន និងលោកទុ្រង បានធ្វើកិច្ចព្រមព្រៀងមួយដើម្បីពង្រឹងកិច្ចសហប្រតិបត្តិការ ដែលមើលឃើញយ៉ាងទូលំទូលាយថា ជាមធ្យោបាយមួយដើម្បីប្រឆាំងនឹងការអះអាងដែលកំពុងកើនឡើងរបស់ប្រទេសចិននៅក្នុងតំបន់៕

អតិផរណាប្រចាំខែសីហារបស់អាហ្សង់ទីន គឺខ្ពស់បំផុតចាប់តាំងពីឆ្នាំ១៩៩១មក

អាហ្សង់ទីន៖ សន្ទស្សន៍តម្លៃទំនិញប្រើប្រាស់ (CPI) របស់ប្រទេសអាហ្សង់ទីន បានកើនឡើងចំនួន១១,៨% នៅក្នុងខែសីហា ដែលនោះនឹងក្លាយជាតួលេខប្រចាំខែខ្ពស់បំផុតចាប់តាំងពីឆ្នាំ១៩៩១មក នេះបើយោងតាមការស្ទង់មតិរបស់សារព័ត៌មាន រ៉យទ័រ ពីក្រុមអ្នកវិភាគកាលពីថ្ងៃចន្ទ (១១ កញ្ញា) បន្ទាប់ពីការធ្លាក់ចុះយ៉ាងខ្លាំងនៃរូបិយប័ណ្ណប្រាក់ប៉េសូក្នុងស្រុកកាលពីខែមុន។រដ្ឋាភិបាលរបស់ប្រទេសនេះ បានបន្ថយតំលៃរូបិយប័ណ្ណរបស់ខ្លួនជិត២០% កាលពីពាក់កណ្តាលខែសីហា បន្ទាប់ពីអ្នកនយោបាយសេរីនិយម លោក Javier Milei ដែលចង់កាត់ផ្តាច់ធនាគារកណ្តាល និងធ្វើឱ្យប្រាក់ដុល្លារក្លាយជារូបិយប័ណ្ណគោលរបស់សេដ្ឋកិច្ច បានឈ្នះការបោះឆ្នោតដ៏គួរឱ្យភ្ញាក់ផ្អើលដោយសម្លេងចំនួន៣០% នៅក្នុងការបោះឆ្នោតបឋមបើកចំហរបស់ប្រទេសនេះ។អាហ្សង់ទីនកំពុងប្រយុទ្ធនឹងអតិផរណាប្រចាំឆ្នាំរបស់ខ្លួនមានកម្រិតជិត១១៥% ដែលកំពុងជំរុញឱ្យមានវិបត្តិជីវភាពរស់នៅដ៏ឈឺចាប់ និងរុញប្រជាជនឱ្យធ្លាក់ទៅក្នុងភាពក្រីក្រ។ វិបត្តិនេះក៏កំពុងធ្វើឲ្យកក្រើកឆាកនយោបាយមុនការបោះឆ្នោតសកលនៅប្រទេសអាហ្សង់ទីន ក្នុងខែតុលាខាងមុខនេះផងដែរ៕

មេដឹកនាំកូរ៉េខាងជើងបានទៅដល់រុស្ស៊ី ស្របពេលអាមេរិកព្រមានមិនឲ្យមានការលក់អាវុធ

កូរ៉េខាងជើង៖ ប្រព័ន្ធផ្សព្វផ្សាយជប៉ុនបានរាយការណ៍នៅថ្ងៃអង្គារ (១២ កញ្ញា) នេះថា មេដឹកនាំកូរ៉េខាងជើង លោក គីម ជុងអ៊ុន បានទៅដល់ប្រទេសរុស្ស៊ីហើយ សម្រាប់អ្វីដែលវិមានក្រឹមឡាំងបាននិយាយថា នឹងជាការពិភាក្សាដ៏ទូលំទូលាយជាមួយប្រធានាធិបតី វ្លាឌីមៀ ពូទីន ស្របពេលមានការព្រមានពីទីក្រុងវ៉ាស៊ីនតោនថា ពួកគេមិនគួរយល់ព្រមលើកិច្ចព្រមព្រៀងអាវុធនោះទេ។ប្រព័ន្ធផ្សព្វផ្សាយរដ្ឋកូរ៉េខាងជើងបានរាយការណ៍នៅថ្ងៃអង្គារនេះថា លោក គីម បានចាកចេញពីទីក្រុងព្យុងយ៉ាងទៅកាន់ប្រទេសរុស្ស៊ីកាលពីថ្ងៃអាទិត្យ (១០ កញ្ញា) តាមរថភ្លើងឯកជនរបស់ខ្លួន ដែលអមដោយក្រុមមន្ត្រីឧស្សាហកម្មអាវុធជានខ្ពស់ និងក្រុមមន្ត្រីយោធា ព្រមទាំងរដ្ឋមន្ត្រីការបរទេសផងដែរ។ទីភ្នាក់ងារសារព័ត៌មានក្យូដូរបស់ប្រទេសជប៉ុនបានរាយការណ៍នៅថ្ងៃអង្គារនេះ ដោយសំអាងដល់ប្រភពផ្លូវការរបស់រុស្ស៊ីដែលមិនបញ្ចេញឈ្មោះថា រថភ្លើងដឹកលោកគីម បានទៅដល់ស្ថានីយ៍ខាសាន (Khasan) ដែលជាច្រកផ្លូវដែកសំខាន់ទៅកាន់ចុងបូព៌ារបស់រុស្ស៊ីពីកូរ៉េខាងជើង។លោកពូទីន ត្រូវបានគេរំពឹងថា នឹងទៅដល់ទីក្រុងវ្ល៉ាឌីវ៉ូស្តុក (Vladivostok) នៅថ្ងៃអង្គារនេះ ជាទីដែលលោកត្រូវបានគ្រោងនឹងចូលរួមសម័យប្រជុំសំខាន់នៃវេទិកាសេដ្ឋកិច្ចបូព៌ាដែលដំណើរការរហូតដល់ថ្ងៃពុធ (១៣ កញ្ញា) ស្អែកនេះ។កិច្ចប្រជុំរបស់លោកពូទីន ជាមួយលោក គីម ត្រូវបានគេរំពឹងថា នឹងធ្វើឡើងនៅខាងក្រៅវេទិកានោះ ទោះបីជាមិនទាន់មានការបញ្ជាក់អំពីទីតាំង ឬថាតើលោក គីម នឹងចូលរួមក្នុងព្រឹត្តិការណ៍វេទិកាសេដ្ឋកិច្ចបូព៌ា នោះក៏ដោយ៕

លោកត្រាំ ស្នើឲ្យមានការដកសិទ្ធិចៅក្រមអាមេរិកក្នុងសំណុំរឿងបោះឆ្នោតសហព័ន្ធ

អាមេរិក៖ អតីតប្រធានាធិបតីអាមេរិក លោកដូណាល់ ត្រាំ បានដាក់សំណើកាលពីថ្ងៃចន្ទ (១១ កញ្ញា) ដើម្បីដកសិទ្ធិចៅក្រមសហព័ន្ធប្រចាំតំបន់របស់អាមេរិក លោកស្រី Tanya Chutkan ពីការធ្វើជាប្រធានលើសំណុំរឿងព្រហ្មទណ្ឌមួយ ដែលចោទប្រកាន់លោកពីបទព្យាយាមបង្វែរលទ្ធផលការបោះឆ្នោតប្រធានាធិបតីឆ្នាំ២០២០ របស់ខ្លួន។ លោកត្រាំ ដែលជាអ្នកនាំមុខគេសម្រាប់ការតែងតាំងប្រធានាធិបតីពីគណបក្សសាធារណរដ្ឋឆ្នាំ២០២៤ បាននិយាយកាលពីខែមុនថា លោកមានគម្រោងស្វះស្វែងឲ្យមានការដកតំណែងរបស់លោកស្រី Chutkan ក៏ដូចជាការផ្លាស់ប្តូរទីតាំងកាត់ក្ដីសម្រាប់ករណីនេះផងដែរ។លោកត្រាំ បានលើកឡើងនៅក្នុងឯកសារតុលាការ ដែលសេចក្តីថ្លែងការណ៍ពីមុនរបស់លោកស្រី Chutkan បានសំដៅទៅលើតួនាទីរបស់លោកក្នុងការជំរុញឲ្យមានការវាយប្រហារលើវិមានកាពីតូល របស់សហរដ្ឋអាមេរិក នៅថ្ងៃទី៦ ខែមករា ឆ្នាំ២០២១ ដោយក្រុមអ្នកគាំទ្ររបស់លោកបានចោទជាសំណួរអំពីភាពមិនលំអៀងរបស់លោកស្រីនៅក្នុងសំណុំរឿងនេះ។មេធាវីរបស់លោកត្រាំ បានប្រកែកថា ការអត្ថាធិប្បាយដែលលោកស្រី Chutkan បានធ្វើនៅក្នុងសវនាការកាត់ទោសឆ្នាំ២០២២ លើចុងចោទករណីកុប្បកម្មនៅវិមានកាពីតូល ដោយលោកស្រី បានស្នើថាកុបកម្មនោះត្រូវបានជំរុញដោយ «ភាពស្មោះត្រង់ដោយងងឹតងងុលចំពោះមនុស្សម្នាក់ ដែលនៅមានសេរីភាពរហូតមកដល់សព្វថ្ងៃនេះ» បានបង្ហាញថា ចៅក្រមរូបនោះ ជឿថាលោកត្រាំ «គួរតែត្រូវបានកាត់ទោស និងដាក់ពន្ធនាគារ»។កាលពីថ្ងៃចន្ទ (១១ កញ្ញា) លោកត្រាំ ក៏បានព្យាយាមច្រានចោលការចោទប្រកាន់ចំនួនប្រាំពីរករណី ដែលលោកប្រឈមមុខនៅក្នុងសំណុំរឿងបោះឆ្នោតនៅរដ្ឋ Georgia ដាច់ដោយឡែក ដោយលើកហេតុផលថា លោកមានអភ័យឯកសិទ្ធិពីការកាត់ទោសចំពោះសកម្មភាព ដែលលោកបានធ្វើនៅក្នុងសមត្ថភាពផ្លូវការរបស់ខ្លួនជាប្រធានាធិបតី៕

អាមេរិកបដិសេធសង្គ្រាមត្រជាក់ជាមួយចិន ក្នុងដំណើរទស្សនកិច្ចនៅវៀតណាម

អាមេរិក៖ ប្រធានាធិបតីអាមេរិក លោក ចូ បៃដិន បានបដិសេធថា សហរដ្ឋអាមេរិកមិនបានកំពុងព្យាយាមរារាំងឥទ្ធិពលអន្តរជាតិរបស់ចិននោះទេ បន្ទាប់ពីបានចុះហត្ថលេខាលើកិច្ចព្រមព្រៀងជាប្រវត្តិសាស្ត្រថ្មីមួយជាមួយវៀតណាម។រយៈពេលជាង៥០ឆ្នាំចាប់តាំងពីទាហានអាមេរិកចុងក្រោយបានចាកចេញពីប្រទេសវៀតណាម លោក បៃដិន បានធ្វើដំណើរទៅកាន់ទីក្រុងហាណូយ ដើម្បីចុះហត្ថលេខាលើកិច្ចព្រមព្រៀង ដែលនឹងនាំអតីតសត្រូវមួយនេះឲ្យកាន់តែជិតស្និទ្ធជាងមុន។ភាពជាដៃគូយុទ្ធសាស្ត្រគ្រប់ជ្រុងជ្រោយជាមួយវៀតណាម គឺជាការលើកកំពស់ទំនាក់ទំនងដ៏សំខាន់សម្រាប់អាមេរិក។ នេះគឺជាចំណុចកំពូលនៃការជំរុញមិនឈប់ឈររបស់ក្រុងវ៉ាស៊ីនតោន ក្នុងរយៈពេលពីរឆ្នាំចុងក្រោយនេះ ដើម្បីពង្រឹងទំនាក់ទំនងជាមួយវៀតណាម ដែលខ្លួនមើលឃើញថា ជាគន្លឹះដើម្បីទប់ទល់ឥទ្ធិពលរបស់ចិននៅអាស៊ី។ភាពជាដៃគូជាមួយទីក្រុងវ៉ាស៊ីនតោន គឺជាទំនាក់ទំនងការទូតកម្រិតខ្ពស់បំផុត ពង្រីកដោយវៀតណាម ដែលជាមិត្តចាស់បំផុត និងរឹងមាំបំផុតរបស់ចិន។ លោក បៃដិន បានប្រាប់អ្នកយកព័ត៌មាននៅទីក្រុងហាណូយថា សកម្មភាពរបស់អាមេរិក មិនមែនសំដៅលើការទប់ស្កាត់ ឬដាក់ឱ្យនៅដាច់ដោយឡែកពីប្រទេសចិននោះទេ ប៉ុន្តែលោកបាននិយាយអំពីការរក្សាស្ថិរភាពស្របតាមច្បាប់អន្តរជាតិ៕

បណ្ដាញសង្គម

ព័ត៌មានថ្មីៗ

ឯកឧត្តម ឌី វិជ្ជា និងលោកជំទាវ ហ៊ុន ម៉ាណា អញ្ជើញនាំយកទេយ្យវត្ថុ ប្រគេនព្រះសង្ឃ និងចែកអំណោយប្រជាពលរដ្ឋ នៅស្រុកភ្នំស្រួច ខេត្តកំពង់ស្ពឺ

ឯកឧត្តមកិត្តិសង្គហបណ្ឌិត គន់ គីម អញ្ជើញជួបប្រជាពលរដ្ឋភៀសសឹក និងពិនិត្យទីតាំងរៀបចំផ្សារបណ្តោះអាសន្ន ក្នុងខេត្តបន្ទាយមានជ័យ

ក្រសួងការងារ៖ ខេត្តស្ថិតក្នុងតំបន់ទំនាបកណ្ដាលចំនួន៣ មានឱកាសការងារជាង ៨,០០០កន្លែង កំពុងរង់ចាំអតីតពលករត្រឡប់មកពីថៃ និងអ្នកកំពុងស្វែងរកការងារធ្វើ

ក្រសួងការងារ៖ នៅខេត្តជាប់សមុទ្រទាំង៤ មានឱកាសការងារជិត ៧,០០០កន្លែង ដែលកំពុងរង់ចាំអតីតពលករត្រឡប់មកពីថៃ និងអ្នកកំពុងស្វែងរកការងារធ្វើ

ឯកឧត្តមឧបនាយករដ្ឋមន្ត្រី ហ៊ុន ម៉ានី៖ វិញ្ញាសាតាក់តែងចប់ភ្លាម ប្រឡងភ្លាមតែម្តង

រដ្ឋមន្រ្តីការពារជាតិជប៉ុនលោក Koizumi ច្រានចោលការចោទប្រកាន់ពីយោធានិយមថ្មី

ក្រសួងការងារ៖ ខេត្តចំនួន៤ នៅភូមិភាគឦសាន្ត មានឱកាសការងារជិត ៤,០០០កន្លែង កំពុងរង់ចាំអតីតពលករត្រឡប់មកពីថៃ និងអ្នកកំពុងស្វែងរកការងារធ្វើ

ប្រមុខ WHO ទទួចសុំឲ្យមានការបញ្ចុះសពដោយសុវត្ថិភាព អំឡុងធ្វើដំណើរទៅកាន់តំបន់រីករាលដាលឆ្លងជំងឺអេបូឡា

អាជ្ញាធរជាតិអប្សរា និង JQA បិទបញ្ចប់កម្មវិធីអប់រំបរិស្ថានសម្រាប់កុមារ ឆ្នាំ២០២៦ និងប្រគល់រង្វាន់ដល់សិស្សឆ្នើម

អ៊ីរ៉ង់និយាយថា កិច្ចប្រជុំជាមួយអាមេរិកកំពុងបន្ត តែពុំឈានដល់កិច្ចព្រមព្រៀងផ្តាច់ព្រ័ត្រនោះទេ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877