BTV NEWS

ចៅក្រមស៊ើបសួរសម្រេចឃុំខ្លួនមន្ត្រីនគរបាល-អាវុធហត្ថខេត្តកំពត និងអ្នកទទួលផលចោរកម្មសរុបចំនួន ៤៧នាក់

អាជ្ញាធររាជធានីភ្នំពេញ បន្តប្រតិបត្តិការបោសសម្អាត Online Scams ត្រួតពិនិត្យ ៨០ ទីតាំងទៀត និងផាកពិន័យម្ចាស់ទីតាំងរស់នៅប្រមូលផ្ដុំចំនួន ៤ទីតាំង

អាវុធហត្ថរាជធានីភ្នំពេញ បង្ក្រាបទីតាំងលក់សម្ភារៈអាសអាភាសចំនួន ៣កន្លែង ឃាត់ខ្លួនជនសង្ស័យ ៩នាក់

គណៈបញ្ជាការឯកភាពរាជធានី បន្តចុះបង្ក្រាប Online Scams នៅសង្កាត់ចាក់អង្រែលើ ឃាត់មនុស្ស១៦នាក់

សន្តិសុខ និង សង្គម

ភាពយន្ត Barbie រកប្រាក់ចំណូលបាន ១ពាន់លានដុល្លារ នៅកន្លែងលក់សំបុត្រ Box Office ទូទាំងពិភពលោក

យោងតាមក្រុមហ៊ុនចែកចាយស្ទូឌីយោ Warner Bros បានឲ្យដឹងថា ខ្សែភាពយន្ត Barbie រកប្រាក់បានរាប់ពាន់លានដុល្លារត្រឹមរយៈពេលតែ១៧ថ្ងៃប៉ុណ្ណោះ បន្ទាប់ពីខ្សែភាពយន្តនេះ ត្រូវបានដាក់បញ្ចាំង។ស្ទូឌីយោ បានឲ្យដឹងនៅក្នុងសេចក្តីថ្លែងការណ៍មួយកាលពីថ្ងៃអាទិត្យ (ទី៦ ខែសីហា) ថា ភាពយន្តនេះនឹងបញ្ចប់នៅចុងសប្តាហ៍ជាមួយនឹង ១,០៣ពាន់លានដុល្លារ ក្នុងការលក់សំបុត្រនៅឯបញ្ជរលក់សំបុត្រ Box Office ទូទាំងពិភពលោក។ នេះមានន័យថា អ្នកដឹកនាំ Greta Gerwig បានក្លាយជាស្ត្រីដំបូងគេ ដែលសម្រេចបានបែបនេះ ក្នុងនាមជាអ្នកដឹកនាំរឿងទោល ហើយស្ទូដីយោ Warner Bros បានពណ៌នាការសម្រេចបាននេះថា ជា «ពេលវេលានៃប្រវត្តិសាស្ត្រ»។លោក Jeff Goldstein ប្រធានផ្នែកចែកចាយក្នុងស្រុក នៅសហរដ្ឋអាមេរិក បាននិយាយថា៖ «គ្មាននរណាម្នាក់នោះឡើយ ប៉ុន្តែលោកស្រី Greta Gerwig អាចនាំនិមិត្តរូបឆ្លងជំនាន់នេះ និងពិភពរបស់លោកស្រីទៅកាន់ជីវិតរស់រវើក តាមរយៈរឿងកំប្លែង រំជួលចិត្ត និងកម្សាន្ត ដោយប្រែក្លាយពិភពលោកទាំងមូលឲ្យទៅជាពណ៌ផ្កាឈូក»។ខ្សែភាពយន្តពណ៌ផ្កាឈូកនេះ ទទួលបានការសរសើរពីអ្នករិះគន់ និងនាំឲ្យមានការថតរូបសែលហ្វី (Selfie) ជាច្រើន នៅក្នុងប្រអប់តុក្កតា ដែលបានដំឡើងនៅក្នុងរោងកុន នៅទូទាំងប្រទេសអង់គ្លេសផងដែរ។ ភាពយន្តដែលសម្តែងដោយតារាស្រី Margot Robbie ជា Barbie និងតារាប្រុស Ryan Gosling ជា Ken រកចំណូលបាន ៤៥៩លានដុល្លារនៅអាមេរិក និង ៥៧២លានដុល្លារ ជាអន្តរជាតិ៕

ក្រុមគ្រូពេទ្យវះកាត់អាមេរិកធ្វើដំណើរទៅកាន់តំបន់ហ្គាហ្សាដើម្បីវះកាត់អ្នកជំងឺ និងបង្វឹកគ្រូពេទ្យ

អាមេរិក៖ ក្រុមគ្រូពេទ្យវះកាត់ឆ្អឹងសហរដ្ឋអាមេរិក នឹងបំពេញទស្សនកិច្ចទៅកាន់តំបន់កាន់កាប់ហ្គាហ្សាស្រ្ទីប ដើម្បីជួយកាត់បន្ថយបញ្ជីឈ្មោះរង់ចាំជាយូរសម្រាប់ការវះគាត់ឆ្អឹងសន្លាក់ ដែលកំពុងធ្វើឲ្យមនុស្សរាប់រយនាក់មានពិភាការភាព ហើយនិងផ្តល់វគ្គបណ្តុះបណ្តាលដល់ក្រុមគ្រូពេទ្យក្នុងស្រុក ។ លោក Khaled Salehដែលជាប្រធានក្រុមវិទ្យាសាស្រ្តមិនរកប្រាក់ចំណេញ Fajrដែលមានមូលដ្ឋាននៅសហរដ្ឋអាមេរិក និយាយថា ដំណើរទស្សនកិច្ចនេះ នឹងជួយអ្នកជំងឺដែលមានបញ្ហាឆ្អឹងសន្លាក់ធ្ងន់ធ្ងរ និងការឈឺចាប់ដ៏រ៉ាំរ៉ៃ ក៏ដូចជាអ្នកដែលអង្គុយលើរទេះរុញ ឬអ្នកដែលប្រើប្រាស់ឈើច្រត់សម្រាប់ដើរ ។ បេសកកម្មនេះ នឹងវះកាត់អ្នកជំងឺ ១៥០នាក់ អំឡុងរយៈពេល ៥ថ្ងៃ ស្របពេលដែលបង្វឹកក្រុមគ្រូពេទ្យក្នុងស្រុក ហើយនិងបរិច្ចាគសម្ភារៈវេជ្ជសាស្រ្តចាំបាច់តម្លៃ ៤លានដុល្លារ ។ គួរឲ្យដឹងថា ទណ្ឌកម្មសេដ្ឋកិច្ច និងការបិទច្រករយៈពេលច្រើនឆ្នាំ បានធ្វើឲ្យទន់ខ្សោយសេដ្ឋកិច្ចនៅក្នុងតំបន់ហ្គាហ្សាស្រ្ទីប ដែលជាដែនដីជាប់មាត់សមុទ្រគ្រប់គ្រងដោយក្រុមចលនាអ៊ីស្លាមហាម៉ាស់ ហើយនិងធ្វើឲ្យមានចន្លោះប្រហោងធ្ងន់ធ្ងរនៅក្នុងប្រព័ន្ធសុខភាព ក្នុងនោះមានបញ្ជីឈ្មោះអ្នកជំងឺយ៉ាងច្រើន ដែលរង់កចាំការវះកាត់ឆ្អឹង ។ អ្នកស្រី Halima Abu Hayyaវ័យ ៥៧ឆ្នាំ និយាយថា អ្នកស្រីបានរង់ចាំអស់រយៈពេល ៣ឆ្នាំមកហើយ ដើម្បីវះកាត់ឆ្អឹងសន្លាក់ ដោយសារតែអ្នកស្រីគ្មានប្រាក់ព្យាបាលថ្លៃនោះទេ នៅក្រៅតំបន់ហ្គាហ្សា ។ ក្រោយការវះកាត់រួច ស្រ្តីមានកូន ៤នាក់រូបនេះ និយាយថា អ្នកស្រីទន្ទឹងរង់ចាំការដើរដោយគ្មានការឈឺចាប់នាពេលដ៏ខ្លីខាងមុខនេះ ៕

ពលរដ្ឋឆាដដឹកជនភៀសខ្លួនស៊ូដង់តាមរទេះសេះដោយឥតគិតថ្លៃ នៅតាមតំបន់ព្រំដែន

ស៊ូដង់៖ ក្រុមម្ចាស់រទេះសេះឆាដ កំពុងដឹកជនភៀសខ្លួនស៊ូដង់ និងឥវ៉ាន់របស់ពួកគេដោយឥតគិតថ្លៃនៅតាមព្រំដែនចូលទៅក្នុងប្រទេសឆាដ ស្របពេលដែលជម្លោះនៅស៊ូដង់ នៅតែបន្តបង្ខំឲ្យមនុស្សកាន់តែជ្រើនចាកចេញពីប្រទេសរបស់ខ្លួន ។ មិនសំខាន់ថាជនភៀសខ្លួនមានប្រាក់ ឬគ្មានប្រាក់នោះទេ ម្ចាស់រទេះសេះទាំងអស់នេះ និយាយថា ពួកគេនៅតែជួយដឹកពួកគេដដែលចេញពីប្រទេសស៊ូដង់ ចូលទៅកាន់ប្រទេសឆាដ ពោលគឺភាគច្រើននៃការដឹកនេះ ពុំគិតប្រាក់នោះឡើយ ។ រទេះសេះខ្លះប្រតិបត្តការផងដែរដោយព្រំដែន ដោយដឹកជញ្ជូនជាច្រើនជើងក្នុង១ថ្ងៃ ដោយដឹកអ្នកដំណើរ ៤នាក់ក្នុង១ជើង ។ សូមបញ្ជាក់ថា មនុស្សរាប់ម៉ឺននាក់ បានរត់ភៀសខ្លួនចូលទៅក្នុងប្រទេសឆាដ ចាប់តាំងពីជម្លោះចាប់ផ្តើមកាលពីខែមេសា រវាងកងទ័ពស៊ូដង់ និងកងកម្លាំងគាំទ្ររហ័ស(RSF) ស្របពេលមានជម្លោះជុំវិញផែនការគាំទ្រដោយអន្តរជាតិសម្រាប់ការផ្លាស់ប្តូរទៅរកការគ្រប់គ្រងដោយស៊ីវិល ។ លោក Ismailដែលជាជនភៀសខ្លួនស៊ូដង់មួយរូប និយាយថា ពេលដែលពួកយើងត្រូវបានបង្ខំចិត្តចាកចេញដោយសារសង្រ្គាម ពួកយើងក៏បានធ្វើដំណើរមកទីនេះដោយគ្មានអ្វីនោះឡើយ ប៉ុន្តែបងប្រុស Yasser បានមកជួយខ្ញុំ ដើម្បីឲ្យខ្ញុំមកកាន់ជំរំនេះ ។ ខ្ញុំអរគុណគាត់ ពីព្រោះថាខ្ញុំគ្មានប្រាក់នោះទេ ហើយគាត់នៅតែដឹកខ្ញុំដដែល ។ ដោយឡែក លោក Mustafaដែលជាម្ចាស់រទេះសេះឆាដ និយាយថា ពួកគេមួយចំនួនមកគ្មានប្រាក់ជាប់ខ្លួននោះទេ ហើយពួកគេមួយចំនួនតូច បានប្រាក់ស្តួចស្តើងប៉ុណ្ណោះ ហើយពួកយើងជួយពួកគេដោយមិនគិតអ្វីទាំងអស់ ។ ពួកយើងតែងតែដឹកទាំងអ្នកមានប្រាក់ និងអ្នកដែលគ្មានប្រាក់ ។ លោកបន្តថា ពួកយើងដឹកពួកគេពីច្រកព្រំដែន រួចមកទម្លាក់ពួកគេនៅទីនេះនៅជំរំ ។ ពួកយើងជួយពួកគេ ដោយសារតែពួកគេគ្មានរថយន្ត ហើយនិងជួយឲ្យពួកគេជិះរទេះសេះរបស់ពួកយើង ៕

ក្រុមអ្នកភូមិយាមប៉ុស្តិ៍នៅលេណដ្ឋានធ្វើឡើងខ្លួនឯង នៅរដ្ឋញំាំញីដោយអំពើហិង្សា Manipur ប្រទេសឥណ្ឌា

ឥណ្ឌា៖ ប្រជាពលរដ្ឋរស់នៅក្នុងភូមិ Phayengស្ថិតនៅរដ្ឋភាឦសាន Manipurប្រទេសឥណ្ឌា ដែលភាគច្រើនមកពីសហគមន៍កុលសម្ព័ន្ធជនជាតិដើមភាគតិច Meitei បានធ្វើលេណដ្ឋានដើម្បីការពារក្រុមគ្រួសាររបស់ពួកគេ ស្របពេលដែលមនុស្សរាប់ពាន់នាក់ រស់នៅដោយការភ័យខ្លាច ក្រោយតំបន់មួយនេះ រងភាពរង្គោះរង្គើរដោយសារការប៉ះទង្គិចគ្នាជនជាតិដើមភាគតិចស្លាប់មនុស្សជាបន្តបន្ទាប់ ។ ភូមិ Phayengដែលស្ថិតនៅក្នុងស្រុក West Imphal គឺជាភូមិព្រំប្រទល់សម្រាប់សហគមន៍ជម្លោះទាំង ២ ដែលរួមមានសហគមន៍កុលសម្ព័ន្ធជនជាតិដើមភាគតិច Meitei និងសហគមន៍កុលសម្ព័ន្ធជនជាតិដើមភាគតិច Kuki ។ ក្រុមអ្នកភូមិ បានរៀបចំលេណដ្ឋាន ហើយនិងការពារភូមិរបស់ពួកគេនៅគ្រប់ម៉ោងនៃវេនយាមកាមរបស់ពួកគេ ។ គួរឲ្យដឹងថា អំពើហិង្សា បានផ្ទុះឡើងកាលពីថ្ងៃទី ៣ ខែឧសភា នៅរដ្ឋ Manipurក្រោយតុលាការបញ្ជាឲ្យរដ្ឋមួយនេះ ពិចារណាលើការបន្តអត្ថប្រយោជន៍សេដ្ឋកិច្ចពិសេសដល់សហគមន៍ Meitei និងកូតាការងាររដ្ឋ និងការអប់រំ ដែលមកទល់នឹងពេលបច្ចុប្បន្ននេះ ត្រូវបានគេបម្រុងទុកសម្រាប់កុលសម្ព័ន្ធ Kuki ។ មនុស្សជាង ១៨០នាក់ ត្រូវបានសម្លាប់ និងមនុស្សរាប់ពាន់នាក់ផ្សេងទៀត បានរត់ភៀសខ្លួនចេញពីផ្ទះសម្បែងរបស់ពួកគេ ចាប់តាំងពីអំពើហិង្សាចាប់ផ្តើមនៅរដ្ឋ Manipur ដែលជារដ្ឋមានពលរដ្ឋ ៣,២លាននាក់ ជាប់ព្រំដែនសហភាពមីយ៉ាន់ម៉ា ។ លោក Devinដែលជាឆ្មាំលេណដ្ឋានម្នាក់ និយាយថា កុលសម្ព័ន្ធផ្សេងទៀត ចាប់ផ្តើមវាយប្រហារមកលើសហគមន៍កុលសម្ព័ន្ធ Meiteiរបស់ពួកយើង ហើយក្រោយមកពួកយើងក៏ចាប់ផ្តើមការពារខ្លួន ពួកយើងការពារភូមិរបស់ពួកយើង ពួកយើងធ្វើលេណដ្ឋាននៅលើដីព្រៃ ដើម្បីសុវត្ថិភាពរបស់ពួកយើង ៕

អគ្គិភ័យនៅរោងចក្រកែច្នៃប្លាស្ទិកនៅរដ្ឋ New Mexico សហរដ្ឋអាមេរិក បង្ខំឲ្យមានការប្រកាសអាសន្នពីបញ្ហាសុខភាព

អាមេរិក៖ អគ្គិភ័យដ៏ធំមួយ បានឆាបឆេះឡើងនៅរោងចក្រកែឆ្នៃប្លាស្ទិក ស្ថិតក្នុងរដ្ឋ New Mexico សហរដ្ឋអាមេរិក កាលពីរសៀលថ្ងៃអាទិត្យ ក្នុងនោះក្រុមឆ្លើយតបសង្រ្គោះបន្ទាន់ ត្រូវបានបញ្ជូនទៅកាន់កន្លែងកើតហេតុ ហើយក្រុមមន្រ្តី បានចេញការព្រមានពីបញ្ហាសុខភាព ។ ក្រុមភ្នាក់ងារពន្លត់អគ្គិភ័យ មកពីក្រុមជួយសង្រ្គោះអគ្គិភ័យក្រុង Albuquerque ( អាល់ប៊ូគើគី)ក្រុមជួយសង្រ្គោះអគ្គិភ័យស្រុក Bernalillo និងកងកម្លាំងរបស់មូលដ្ឋានកងទ័ពអាកាស Kirtland កំពុងព្យាយាមពន្លត់អណ្តាតភ្លើងនៅតំបន់ភាគខាងត្បូងទីក្រុង Albuquerque ស្របពេលដែលស្ថានភាពប្រែក្លាយឧបទ្ទេវហេតុអាសន្នជាច្រើន ។ រូបភាពវីដេអូឃ្លីបពីនាយកដ្ឋានពន្លត់អគ្គិភ័យក្រុង ឃើញរោងចក្រហ៊ុព័ទ្ធដោយអណ្តាតភ្លើង និងផ្សែងខ្មៅដ៏ក្រាស់ឃ្មឹក ។ គ្មានអ្នករងរបួសត្រូវបានរាយការណ៍នោះទេ ប៉ុន្តែក្រុមមន្រ្តីក្រុង បានចេញសេចក្តីប្រកាសអាសន្នពីបញ្ហាសុខភាព នៅក្នុងតំបន់ ដោយសារតែការកខ្វក់ខ្យល់ដ៏គ្រោះថ្នាក់បង្កឡើងពីផ្សែងភ្លើងឆេះប្លាស្ទិក ។ ដោយឡែក ខ្យល់បក់ខ្លាំង បាននាំផ្សែងទៅកាន់តំបន់ជាច្រើននៅភាគអាគ្នេយ៍ទីក្រុង Albuquerque និងជ្រលងភ្នំខាងត្បូង ជាទីដែលក្រុមមន្រ្តីណែនាំឲ្យរឹតត្បិតសកម្មភាពខាងក្រៅ ដើម្បីចៀសផុតពីគ្រោះថ្នាក់ ៕

យ៉ាងហោចណាស់ ២នាក់ បានស្លាប់ និងជាង ៣០នាក់ បាត់ខ្លួន បន្ទាប់ពីទូកជនអន្តោប្រវេសន៍ លិចនៅសមុទ្រម្ដុំកោះ Lampedusa របស់អ៊ីតាលី

អ៊ីតាលី៖ សាកសពស្ត្រីម្នាក់ និងកុមារម្នាក់ត្រូវបានស្រង់ឡើងដោយឆ្មាំល្បាតឆ្នេរសមុទ្ររបស់ប្រទេសអ៊ីតាលី បន្ទាប់ពីទូកដឹកជនអន្តោប្រវេសន៍ចំនួន២ បានលិចនៅសមុទ្រម្ដុំកោះ Lampedusa ភាគខាងត្បូងនៃប្រទេសអ៊ីតាលី កាលពីថ្ងៃអាទិត្យ (ទី៦ ខែកក្កដា) ហើយជាមួយគ្នានេះ ឆ្មាំល្បាតឆ្នេរ បាននិយាយថា មនុស្សប្រមាណជា ៥៧នាក់ ត្រូវបានជួយសង្គ្រោះ ហើយជាង ៣០នាក់ត្រូវបានគេជឿថា បានបាត់ខ្លួន ក្នុងសមុទ្រ គិតត្រឹមថ្ងៃអាទិត្យ បន្ទាប់ពីមានហេតុការណ៍លិចទូកនោះ។ដោយឡែក សេវាសង្គ្រោះតាមតំបន់ភ្នំ នៅអ៊ីតាលី បាននិយាយថា ក្នុងប្រតិបត្តិការមួយ ជនអន្តោប្រវេសន៍ ៣៤នាក់ ត្រូវបានយោងឡើងដោយឧទ្ធម្ភាគចក្រពីច្រាំងថ្មចោទនៅកោះ Lampedusa ដែលពួកគេបានជាប់នៅទីនោះ តាំងពីល្ងាចថ្ងៃសុក្រ បន្ទាប់ពីមានការលិចកប៉ាល់មួយទៀត។ សេវាសង្គ្រោះបានបន្ថែមទៀតថា កុមារម្នាក់ និងស្ត្រីមានផ្ទៃពោះ ២នាក់ ក៏ស្ថិតក្នុងចំណោមអ្នកត្រូវបានជួយសង្គ្រោះនោះដែរ។សារព័ត៌មាន Guardian បានរាយការណ៍ថា ដោយដកស្រង់ការរៀបរាប់ដំណើររឿងពីអ្នកនៅរស់រានមានជីវិត ប្រព័ន្ធផ្សព្វផ្សាយអ៊ីតាលី បានឲ្យដឹងថា ទូកទាំង ២នេះ បានចាកចេញពីទីក្រុង Sfax ក្នុងប្រទេសទុយនីស៊ី ហើយបានលិចនៅក្នុងសមុទ្រ ដែលមានការលំបាក ក្នុងការធ្វើដំណើរ។ក្រសួងមហាផ្ទៃអ៊ីតាលី បាននិយាយកាលពីថ្ងៃសុក្រសប្ដាហ៍មុនថា ប្រទេសនេះកំពុងជួបប្រទះការកើនឡើងនៃការធ្វើដំណើររបស់ជនអន្តោប្រវេសន៍តាមសមុទ្រ ដោយមានអ្នកចូលមកដល់ជិត ៩២.០០០នាក់មកទល់ពេលនេះ នៅឆ្នាំនេះ ធៀបនឹងចំនួនប្រហែល ៤៣.០០០នាក់ ក្នុងរយៈពេលដូចគ្នា កាលពីឆ្នាំ២០២២។ របាយការណ៍មួយ បានឲ្យដឹងថា មនុស្សជាង ២.០០០នាក់ បានមកដល់កោះ Lampedusa ក្នុងរយៈពេលប៉ុន្មានថ្ងៃចុងក្រោយនេះ៕

ព័រទុយហ្គាល់ប្រឹងប្រយុទ្ធនឹងចំហេះព្រៃ ក្នុងពេលដែលកម្ដៅក្ដៅកាន់តែខ្លាំងឡើងៗ

ព័រទុយហ្គាល់៖ អ្នកពន្លត់អគ្គិភ័យជាង ១.០០០នាក់ កាលពីថ្ងៃអាទិត្យ (ទី៦ ខែសីហា) បាន និងកំពុងប្រឹងប្រយុទ្ធនឹងចំហេះព្រៃ នៅកណ្តាលប្រទេសព័រទុយហ្គាល់ ដែលបានបំផ្លាញផ្ទៃដីចំនួន ៧.០០០ហិកតា និងបណ្ដាលឲ្យមនុស្ស ១១នាក់ រងរបួសស្រាល។សីតុណ្ហភាពបានឡើងលើសពី ៤០អង្សារសេ នៅក្នុងតំបន់មួយចំនួននៃប្រទេសព័រទុយហ្គាល់ ហើយអាជ្ញាធរ បាននិយាយថា ហានិភ័យពីចំហេះព្រៃ នឹងនៅតែ «ខ្ពស់ខ្លាំង ឬក្នុងកម្រិតអតិបរមា នៅទូទាំងប្រទេស» ក្នុងរយៈពេលប៉ុន្មានថ្ងៃខាងមុខនេះ។ផ្ទៃដីប្រហែល ៧.០០០ហិកតា ត្រូវបានបំផ្លាញក្នុងតំបន់ Castelo Branco នៅភាគកណ្តាលនៃប្រទេស ប៉ុន្តែមេបញ្ជាការប្រតិបត្តិការពន្លត់អគ្គិភ័យលោក Jose Gulherme បាននិយាយថា ហានិភ័យដែលអាចកើតមានពីការឆាបឆេះនេះ អាចមានដល់ទៅ «ជាង ២០.០០០ហិកតា»។ លោក Gulherme បានប្រាប់អ្នកសារព័ត៌មានថា វាជាតំបន់ធំល្វឹងល្វើយដែលមានផ្ទះ និងភូមិដាច់ស្រយាលជាច្រើន ដោយបន្ថែមថា បរិវេណភ្លើងឆេះ បានលាតសន្ធឹងរួចហើយចម្ងាយ ៦០គីឡូម៉ែត្រ។ផ្សែង និងផេះពីភ្លើង ដែលបានចាប់ផ្តើមឆេះ កាលពីថ្ងៃសុក្រ បានរាលដាលជាង ១៣០គីឡូម៉ែត្រ នៅភាគខាងកើត កាលពីថ្ងៃសៅរ៍ (ទី៥ ខែសីហា) ទៅកាន់ទីប្រជុំជន Fatima។ ជាមួយគ្នានេះ អ្នកពន្លត់អគ្គិភ័យ ៤០០នាក់បន្ថែមទៀត ត្រូវបានដាក់ពង្រាយ ដើម្បីប្រយុទ្ធនឹងចំហេះព្រៃដាច់ដោយឡែកពីគ្នា នៅក្នុងទីក្រុង Odemira ក្បែរឆ្នេរសមុទ្រភាគនិរតី។មន្ត្រីសន្តិសុខស៊ីវិល លោក Tiago Bugio បាននិយាយថា អណ្តាតភ្លើងនៅក្រុង Odemira ត្រូវឆាបឆេះឡើងវិញ កាលពីថ្ងៃអាទិត្យ។ ការឆេះ ២កន្លែង នៅតែសកម្ម ប៉ុន្តែមួយភាគបីនៃចំហេះដែលធ្វើដំណើរឆ្ពោះទៅរកទីក្រុងទេសចរណ៍ភាគខាងត្បូងនៃទីក្រុង Algarve ឥឡូវនេះ ស្ថិតក្នុងការគ្រប់គ្រងហើយ។ តែយ៉ាងណាក្ដី អាជ្ញាធរបានព្រមានថា ហានិភ័យនៃចំហេះព្រៃ នៅតែមានកម្រិតខ្ពស់បំផុតទូទាំងប្រទេស៕

អ៊ីស្រាអែលបញ្ចុះសពទាហានល្បាតម្នាក់ ដែលត្រូវបានសម្លាប់ ក្នុងការបាញ់ប្រហារនៅទីក្រុង Tel Aviv

អ៊ីស្រាអែល៖ ប្រជាជនអ៊ីស្រាអែល កាលពីថ្ងៃអាទិត្យ (ទី៦ ខែសីហា) បានធ្វើពិធីបញ្ចុះសពអ្នកល្បាតក្រុង ដែលត្រូវបានសម្លាប់ ដោយខ្មាន់កាំភ្លើងប៉ាឡេស្ទីនកាលពីថ្ងៃមុន។មិត្តភ័ក្តិ និងក្រុមគ្រួសារ បានកាន់ទុក្ខសពលោក Chen Amir ដែលបានស្លាប់ បន្ទាប់ពីត្រូវបានបាញ់ ដោយជនជាតិប៉ាឡេស្ទីន នៅលើផ្លូវមួយ នាកណ្តាលទីក្រុង Tel Aviv។ ហើយបន្ទាប់មកអភិបាលក្រុង Tel Aviv បាននិយាយថា ជនសង្ស័យដែលជាខ្មាន់កាំភ្លើងនោះ ត្រូវបានបាញ់សម្លាប់ដោយមន្ត្រីល្បាតក្រុង។សេចក្តីថ្លែងការណ៍របស់នគរបាលអ៊ីស្រាអែលបានឲ្យដឹងថា អ្នកបាញ់ប្រហារនោះ គឺជាអ្នកស្រុកវ័យ ២៧ឆ្នាំម្នាក់ នៅទីក្រុង Jenin របស់ប៉ាឡេស្ទីន ក្នុងតំបន់កាន់កាប់ West Bank។ ក្រុមសកម្មប្រយុទ្ធប៉ាឡេស្ទីនហាម៉ាស់ (Hamas) បានសរសើរពីភាពក្លាហាននៃការវាយប្រហារនេះ ប៉ុន្តែមិនទទួលខុសត្រូវចំពោះហេតុការណ៍នេះឡើយ។សូមបញ្ជាក់ថា ការបាញ់ប្រហារនេះកើតឡើងមួយថ្ងៃបន្ទាប់ពីក្មេងជំទង់ជនជាតិប៉ាឡេស្ទីនម្នាក់ ត្រូវបានសម្លាប់ក្នុងការវាយប្រហារដោយជនស៊ីវិលអ៊ីស្រាអែលលើភូមិប៉ាឡេស្ទីនមួយនៅតំបន់ West Bank ហើយទីក្រុងវ៉ាស៊ីនតោនបានសម្តែងកង្វល់ពីការកើនឡើងនៃការវាយប្រហារ ដោយអ្នកតាំងលំនៅជនជាតិជ្វីហ្វលើភូមិប៉ាឡេស្ទីននៅតំបន់ West Bank ជាកន្លែងដែលអំពើហិង្សាមានសភាពកាន់តែអាក្រក់ទៅៗ ចាប់តាំងពីឆ្នាំមុន ដោយការវាយឆ្មក់របស់អ៊ីស្រាអែលកាន់តែកើនឡើង ក្នុងពេលដែលការវាយប្រហារតាមដងផ្លូវពីសំណាក់ប៉ាឡេស្ទីនលើជនជាតិអ៊ីស្រាអែលក៏កាន់តែកើតមានដែរ៕

ក្រុមភ្នាក់ងារពន្លត់អគ្គិភ័យ កំពុងព្យាយាមពន្លត់ភ្លើងនៅកោះ Sardinia ប្រទេសអ៊ីតាលី

អ៊ីតាលី៖ យោងតាមសេចក្តីរាយការណ៍ពីសារព័ត៌មានក្នុងស្រុក បានឲ្យដឹងថា ក្រុមភ្នាក់ងារពន្លត់អគ្គិភ័យ បានព្យាយាមទប់ស្កាត់ភ្លើងឆេះព្រៃនៅកោះ Sardinia ប្រទេសអ៊ីតាលី កាលពីថ្ងៃអាទិត្យ ស្របពេលដែលប្រជាពលរដ្ឋប្រហែល ៦០០នាក់ ត្រូវបានជម្លៀសចេញពីតំបន់នោះភ្លាមៗ ។ សារព័ត៌មានក្នុងស្រុក រាយការណ៍ថា ការជម្លៀសខ្លួនមនុស្ស បានធ្វើឡើងនៅសង្កាត់ Podasa និងសង្កាត់ San Giovanni ជាវិធានការប្រការទុកជាមុន ។ រូបភាពវីដេអូឃ្លីបដែលបញ្ចេញដោយកងពន្លត់អគ្គិភ័យអ៊ីតាលី ឃើញក្រុមភ្នាក់ងារពន្លត់អគ្គិភ័យ ព្យាយាមពន្លត់ភ្លើងឆេះព្រៃនៅទីក្រុង Cagliari ហើយយន្តហោះពន្លត់អគ្គិភ័យ បានដឹកទឹកពីតំបន់ឆ្នេរសង្កាត់ Monte Longu ដើម្បីពន្លត់ភ្លើងឆេះព្រៃនៅលើកោះមួយនេះ ។ យន្តហោះពន្លត់អគ្គិភ័យ ៧គ្រឿង បានចូលរួមប្រតិបត្តិការពន្លត់ភ្លើងឆេះព្រៃ ដោយទម្លាក់ទឹកលើអណ្តាតភ្លើង ។ វីដេអូថតបានផងដែរការឆេះបន្លែ និងរបងនៅតាមផ្លូវនៅសង្កាត់ Posada ។ ខ្យល់បក់ខ្លាំង បានរួមចំណែកនាំឲ្យភ្លើងឆេះព្រៃរីករាលដាលយ៉ាងឆាប់រហ័ស ។ សេវាកម្មពន្លត់អគ្គិភ័យនៅលើកោះ បានបិទផ្លូវហាយវ៉េចម្ងាយ ៤០គ.ម រវាងទីក្រុង Siniscola និងទីក្រុង Olbia ។ សូមបញ្ជាក់ថា តំបន់ភាគខាងត្បូងប្រទេសអ៊ីតាលី ជាពិសេសកោះធំបំផុត និងជាកោះមានប្រជាពលរដ្ឋច្រើនបំផុត Sicilyបានរងផលប៉ះពាល់ដោយសារភ្លើងឆេះព្រៃកាលពីខែកក្កដាកន្លងទៅ ៕

ប្រទេសចិន និងរុស្សី បញ្ជូននាវាចម្បាំងទៅជិតរដ្ឋអាឡាស្កា អាមេរិកឆ្លើយតបជាមួយនាវាពិឃាតរបស់កងទ័ពជើងទឹក

ចិន៖ សមាជិកព្រឹទ្ធសភាអាមេរិកពីររូបរបស់រដ្ឋអាឡាស្កា បាននិយាយថា នាវាយោធាចំនួន ១១ គ្រឿងមកពីប្រទេសចិន និងរុស្ស៊ីដែលត្រូវបានរកឃើញប្រតិបត្តិការនៅជិតកោះ Aleutian( អាលូស្ហិន) កាលពីសប្តាហ៍មុន ត្រូវបានជួបដោយនាវាពិឃាតចំនួន៤គ្រឿង របស់កងទ័ពជើងទឹកអាមេរិក។ សមាជិកព្រឹទ្ធសភាមកពីគណបក្សសាធារណរដ្ឋទាំងពីររូប គឺលោក ដានស៊ុលលីវ៉ាន់ (Dan Sullivan) និង លោក លីសា មឺណូស្គី (Lisa Murkowski) បានចេញសេចក្តីប្រកាសព័ត៌មានរួមគ្នាមួយកាលពីយប់ថ្ងៃសៅរ៍ ដោយនិយាយថា ពួកគេបានទទួលព័ត៌មានសង្ខេបអំពីប្រតិបត្តិការនេះ។លោក មឺណូស្គី បាននិយាយថា៖«យើងបានទាក់ទងយ៉ាងជិតស្និទ្ធជាមួយថ្នាក់ដឹកនាំមកពីទីបញ្ជាការ អាឡាស្កា អស់រយៈពេលជាច្រើនថ្ងៃហើយ ហើយបានទទួលការព័ត៌មានសង្ខេបសម្ងាត់លម្អិតអំពីនាវាបរ ទេសទាំងនោះ។លោកស៊ុលលីវ៉ាន បាននិយាយថា៖«ការលុកលុយរបស់នាវាចម្បាំងចិន និងរុស្ស៊ីចំនួន ១១គ្រឿង ដែលប្រតិបត្តិការជាមួយគ្នា នៅឆ្នេរសមុទ្រអាឡាស្កា គឺជាការរំលឹកមួយទៀតថា យើងបានឈានចូលយុគសម័យថ្មីនៃការឈ្លានពានផ្តាច់ការដែលដឹកនាំដោយពួកផ្តាច់ការនៅទីក្រុងប៉េកាំង និងទីក្រុងមូស្គូ»។សង្គ្រាមនៅអ៊ុយក្រែន និងភាពតានតឹងចិន-តៃវ៉ាន់ បានធ្វើឲ្យទំនាក់ទំនងអាមេរិកជាមួយប្រទេសទាំងពីរមានភាពតានតឹង។លោក Brent Sadler ដែលជាប្រធានក្រុមកងទ័ពជើងទឹកចូលនិវត្តន៍ និងជាអ្នកស្រាវជ្រាវជាន់ខ្ពស់នៅអង្គការមូលនិធិ Heritage Foundation បាននិយាយប្រាប់កាសែត Wall Street Journal ថា៖«ចំណាត់ការ គឺជាការបង្កហេតុយ៉ាងខ្លាំង»៕

បណ្ដាញសង្គម

ព័ត៌មានថ្មីៗ

ក្រសួងរតនាគារអាមេរិកចេញទណ្ឌកម្មថ្មីលើអ៊ីរ៉ង់ ដោយផ្តោតលើការដោះដូររូបិយប័ណ្ណគ្រីបតូ

អាមេរិកសម្លឺងដល់ការបើកច្រកសមុទ្រ Hormuz ដោយទម្រង់ស្ងាត់ៗ សម្រាប់គម្រោង Project Freedom

ក្រុមប្រដាប់អាវុធអ៊ីរ៉ាក់ចំនួន ២ ប្រកាសពីការកំណត់អាវុធឲ្យស្ថិតនៅក្រោមការគ្រប់គ្រងរបស់រដ្ឋ

ឥណ្ឌាដករូបសំណាក Messi ចេញនៅទីក្រុង Kolkata ដោយសារបារម្ភពីបញ្ហាសុវត្ថិភាព

បើក Soccer League នឹងរំលេចទស្សនីយភាពជាច្រើន ពិសេសការច្រៀងចម្រៀងជាតិ ដើម្បីលើកទឹកចិត្តវីរកងទ័ព និងជនភៀសសឹក

សមាជិកសភា៖ អ៊ីរ៉ង់ចង់ធ្វើជាតូបនីយកម្មច្រកសមុទ្រហ័រមូស

មេដឹកនាំសហគមន៍លីបង់នឹងដាក់ពាក្យប្តឹងប្រឆាំងការគាំទ្ររបស់អាមេរិកចំពោះសង្គ្រាមរបស់អ៊ីស្រាអែលនៅលីបង់

អ្នកជំនាញ៖ អ៊ីរ៉ង់មានតួនាទីសំខាន់នៅក្នុងដំណើរការរំសាយអាវុធរបស់ក្រុមហេសបូឡា

FIFA បើកដំណើរការមជ្ឈមណ្ឌលផ្សព្វផ្សាយអន្តរជាតិសម្រាប់ World Cup នៅក្រុង Dallas

ក្រុមហ៊ុនអឺរ៉ុបជាច្រើនទទួលស្គាល់ថា មានការលំបាកក្នុងការផលិតអាវុធល្បឿនលឿនជាងសំឡេង

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877