BTV NEWS

បង្រ្កាបបទល្មើសគ្រឿងញៀននៅចំណុចស្តារវីហ្កាសឃាត់ខ្លួនមនុស្ស ចំនួន១៤១នាក់

អាវុធហត្ថខេត្តព្រះសីហនុបង្រ្កាបទីតាំង ONLINE SCAMS មួយកន្លែងឃាត់ខ្លួនជនសង្ស័យចំនួន ១៨នាក់

ជនជាតិចិន ១៦៤នាក់ពាក់ទៀត ព័ន្ធករណី Online Scams ត្រូវបានបណ្ដេញចេញពីកម្ពុជា

អាជ្ញាធរស្រុកឈូកព្រមានអាជីវករឱ្យបញ្ឈប់ការទិញលក់ទំនិញនាំចូលពីថៃ

សន្តិសុខ និង សង្គម

នាយនគរបាល ត្រូវបានដកចេញពីតំណែងបន្ទាប់ពីហ្វូងមនុស្ស វាយប្រហារលើក្រុមបាតុករគាំទ្រប៉ាឡេស្ទីន

នាយនគរបាលប្រចាំនៅសាកលវិទ្យាល័យកាលីហ្វ័រនីញ៉ា នៅទីក្រុង Los Angeles ត្រូវបានដកចេញពីមុខតំណែង រយៈពេលបីសប្តាហ៍បន្ទាប់ពីមន្រ្តីជាច្រើននៅបរិវេណសាកលវិទ្យាល័យ បានរងការរិះគន់ចំពោះចំណាត់លើការវាយប្រហារដោយហ្វូងមនុស្សឥតសណ្តាប់ធ្នាប់ដ៏ហិង្សា ទៅលើសកម្មជនគាំទ្រប៉ាឡេស្ទីន ដែលបានបោះជំរំនៅសាកលវិទ្យាល័យកាលីហ្វ័រនីញ៉ា នៅទីក្រុង Los Angeles (UCLA) ។សាកលវិទ្យាធិការរង លោក Mary Osako បាននិយាយនៅក្នុងសេចក្តីថ្លែងការណ៍មួយ កាលពីថ្ងៃពុធ ថា លោក John Thomas ដែលត្រូវបានតែងតាំងជាផ្លូវការជានាយនគរបាលប្រចាំនៅសាកលវិទ្យាល័យ UCLA កាលពីខែមករា ត្រូវបានចាត់តាំងឡើងវិញជាបណ្តោះអាសន្ន ដោយរង់ចាំការពិនិត្យលើដំណើរការផ្នែកសន្តិសុខ។ លោក Osako និយាយថា នាយនគរបាលប្រចាំនៅបរិវេណសាកលវិទ្យាល័យ លោក Gawin Gibson ត្រូវបានតែងតាំងជានាយនគរបាលស្តីទីរបស់សាកលវិទ្យាល័យ UCLA ដែលចូលជាធរមាន កាលពីថ្ងៃអង្គារ។លោក Thomas និងមន្ត្រីមួយចំនួនទៀត នៅនៅបរិវេណសាកលវិទ្យាល័យ ព្រមទាំងអង្គភាពនគរបាលនៅទីក្រុង Los Angeles បានធ្វើឲ្យមានការរិះគន់ជុំវិញការឆ្លើយតបរបស់ពួកគេ ចំពោះអំពើហិង្សា ដែលបានផ្ទុះឡើងនៅសាកលវិទ្យាល័យ UCLA រវាងសកម្មជនគាំទ្រប៉ាឡេស្ទីន និងក្រុម អ្នកវាយប្រហារ។អ្នកវាយប្រហារមានពាក់ម៉ាស់ ដែលក្រោយមកត្រូវបានមន្ត្រីសាកលវិទ្យាល័យចាត់ទុកថាជា «អ្នកញុះញង់» បានសម្រុកចូលជំរំតង់ ដោយមានកាន់ដំបង និងឈើវែង។ ការប៉ះទង្គិចគ្នាយ៉ាងខ្លាំង រវាងភាគីទាំងពីរ បានអូសបន្លាយយ៉ាងហោចណាស់បីម៉ោង មុនពេលនគរបាលបានចេញធ្វើអន្តរាគមន៍។ ភាគីទាំងពីរ បានវាយគ្នា និងបាចម្សៅម្រិចដាក់គ្នាទៅវិញទៅមក។ សមាជិកនៃភាគីគាំទ្រប៉ាឡេស្ទីនបាននិយាយថា ផាវត្រូវបានដុតបំផ្ទុះគប់មកលើពួកគេ។

កងកម្លាំងអ៊ីស្រាអែល វាយចូលជ្រៅទៅក្នុងក្រុង Rafah ក្នុងការប្រយុទ្ធដ៏ខ្លាំងក្លាបំផុតមួយ

រថក្រោះអ៊ីស្រាអែល បានឈានដល់ជាយនៃតំបន់លំនៅឋានដែលមានមនុស្សរស់នៅច្រើននៅភាគកណ្តាលក្រុងរ៉ាហ្វា (Rafah) កាលពីថ្ងៃពុធ (២២ ឧសភា) ក្នុងអំឡុងពេលមួយយប់នៃការទម្លាក់គ្រាប់បែកដ៏ខ្លាំងបំផុតនៃទីក្រុងហ្កាហ្សា ភាគខាងត្បូង ចាប់តាំងពីអ៊ីស្រាអែល បានបើកការវាយលុកនៅទីនោះក្នុងខែនេះមក។ការវាយលុករបស់អ៊ីស្រាអែល លើក្រុងរ៉ាហ្វា នៅតំបន់ភាគខាងត្បូងនៃតំបន់ហ្កាហ្សា បានធ្វើឱ្យមនុស្សរាប់សែននាក់ភៀសខ្លួនចេញពីកន្លែងដែលជាជម្រកសម្រាប់មនុស្សពាក់កណ្តាលនៃប្រជាជនសរុបចំនួន ២,៣ លាននាក់នៃតំបន់ហ៊ុមព័ទ្ធនេះ។ ការវាយប្រហារនេះក៏បានកាត់ផ្តាច់ផ្លូវចូលសំខាន់ៗសម្រាប់ជំនួយទៅកាន់តំបន់ហ្កាហ្សា ដែលនាំឱ្យមានការភ័យខ្លាចពីអន្តរជាតិចំពោះជនរងគ្រោះកាន់តែច្រើន និងគ្រោះទុរ្ភិក្ស។អ៊ីស្រាអែលនិយាយថា ខ្លួនគ្មានជម្រើសអ្វីក្រៅពីវាយប្រហារទីក្រុងនេះឡើយ ដើម្បីកម្ចាត់កងវរសេនាតូចចុងក្រោយរបស់យុទ្ធជនហាម៉ាស ដែលខ្លួនជឿថាកំពុងជ្រកនៅទីនោះ។ កងទ័ពរបស់ខ្លួនបាននិងកំពុងរំកិលយឺតៗចូលទៅជាយភាគខាងកើតនៃក្រុងរ៉ាហ្វា ចាប់តាំងពីដើមខែនេះ។អ្នកស្រុក និងក្រុមសកម្មប្រយុទ្ធបាននិយាយថា រថក្រោះបានចូលកាន់កាប់ទីតាំងថ្មីកាលពីថ្ងៃពុធ កាន់តែជ្រៅនៅភាគខាងលិចតាមបណ្តោយរបងព្រំដែនភាគខាងត្បូងជាមួយអេហ្ស៊ីប ហើយឥឡូវនេះបានឈរជើងនៅជាយតំបន់លំនៅឋាន យីបណា (Yibna) នៅកណ្តាលទីក្រុងរ៉ាហ្វា៕

មនុស្ស ៤០ នាក់ បានស្លាប់ក្នុងការវាយប្រហារនៅភាគកណ្តាលប្រទេសនីហ៊្សេរីយ៉ា

នគរបាល និងអ្នកស្រុកបាននិយាយកាលពីថ្ងៃអង្គារ (២១ ឧសភា) ថា មនុស្សយ៉ាងតិច ៤០ នាក់បានស្លាប់ និងជាច្រើននាក់ទៀតរងរបួសនៅក្នុងការវាយប្រហារដោយខ្មាន់កាំភ្លើងនៅលើភូមិ ហ៊្សូរ៉ាក់ (Zurak) ក្នុងរដ្ឋ ផ្លាតេអ៊ូ (Plateau) ភាគខាងជើងនៃភាគកណ្តាលប្រទេសនីហ៊្សេរីយ៉ា ជាទីដែលការប៉ះទង្គិចគ្នារវាងអ្នកចិញ្ចឹមសត្វ និងកសិករមានការកើនឡើង។អ្នកនាំពាក្យនគរបាលរដ្ឋ លោក អាល់ហ្វ្រេដ អាឡាបូ (Alfred Alabo) បាននិយាយថា បុរសប្រដាប់អាវុធ ដែលជារឿយៗគេហៅថាជាក្រុមចោរ និងដែលបានរត់គេចពី «ការវាយប្រហារដ៏ខ្លាំងក្លា» ដោយភ្នាក់ងារសន្តិសុខនៅក្នុងព្រៃ បាងហ្កាឡាឡា (Bangalala) នៃតំបន់រដ្ឋាភិបាល វ៉ាសេ (Wase) នៃរដ្ឋនេះ បានវាយប្រហារភូមិ ហ៊្សូរ៉ាក់ និងភូមិ ដាខៃ (Dakai) កាលពីល្ងាចថ្ងៃចន្ទ។អ្នកស្រុកនិយាយថាចំនួនអ្នកស្លាប់មានច្រើនជាងនេះ។ ពួកគេបានប្រាប់សារព័ត៌មានរ៉យទ័រ ថា ខ្មាន់កាំភ្លើងរាប់សិបនាក់បានសម្រុកចូលភូមិដោយជិះម៉ូតូ បាញ់ប្រហារដោយមិនរើសមុខ ចាប់ពង្រត់មនុស្សមួយចំនួន និងដុតបំផ្លាញផ្ទះសម្បែង។ការវាយប្រហារនៅតំបន់ជនបទ និងការចាប់ជំរិតទារប្រាក់លោះបានក្លាយជារឿងធម្មតានៅភាគខាងជើងប្រទេសនីហ៊្សេរីយ៉ា ក្នុងរយៈពេលប៉ុន្មានឆ្នាំចុងក្រោយនេះ ដែលក្រុមជនអន្ធពាលប្រដាប់អាវុធបានកំណត់គោលដៅលើភូមិ សាលារៀន និងអ្នកធ្វើដំណើរដោយទាមទារប្រាក់លោះរាប់លានណៃរ៉ា៕

ព្យុះកួចនៅរដ្ឋ Iowa របស់អាមេរិក បណ្ដាលឱ្យមនុស្សជាច្រើននាក់ស្លាប់ និងបង្កការបំផ្លិចបំផ្លាញ

អាជ្ញាធរបាននិយាយថា ព្យុះកួចដ៏ខ្លាំងក្លាមួយបានបោកបក់កាត់ទីក្រុងតូចមួយនៃរដ្ឋ អ៊ីអូវ៉ា (Iowa) កាលពីថ្ងៃអង្គារ (២១ ឧសភា) ដោយបានសម្លាប់មនុស្សជាច្រើននាក់ និងបណ្តាលឱ្យមនុស្សរាប់សិបនាក់រងរបួស។ រូបភាពពីទីប្រជុំជន ហ្គ្រីនហ្វីល (Greenfield) បង្ហាញពីផ្លូវដែលរងការបំផ្លិចបំផ្លាញទាំងស្រុង លំនៅឋានត្រូវបានបំផ្លាញទៅជាគំនរបាក់បែក ហើយកំទេចកំទីមាននៅគ្រប់ទីកន្លែង។លោក អាឡិច ឌីងក្លា (Alex Dinkla) អ្នកនាំពាក្យរបស់ក្រុមល្បាតរដ្ឋ អ៊ីអូវ៉ា បាននិយាយក្នុងអំឡុងពេលសន្និសីទសារព័ត៌មានថា «ព្យុះកួចនេះបានបំផ្លិចបំផ្លាញផ្នែកដ៏ជាច្រើននៃភូមិ»។ លោកមិនបានផ្តល់ចំនួនអ្នកស្លាប់ទេ ប៉ុន្តែបាននិយាយថាតួលេខអាចត្រូវបានផ្តល់ឱ្យឆាប់ៗ។លោក ឌីងក្លា បាននិយាយថា យ៉ាងហោចណាស់មនុស្ស ១២ នាក់បានរងរបួសនៅក្នុងឧបទ្ទវហេតុនេះនៅក្នុងភូមិ ហ្គ្រីនហ្វីល ជាទីប្រជុំជនដែលមានប្រជាជនប្រហែល ២.០០០ នាក់។ ដោយសារតែមន្ទីរពេទ្យក្នុងតំបន់រងការខូចខាតក្នុងព្យុះនោះ មនុស្សទាំងនោះត្រូវផ្ទេរទៅកាន់កន្លែងព្យបាលនៅក្នុងភូមិក្បែរនោះ។លោកស្រី លីហ៊្សា ប្រោន (Lisa Brown) អ្នកពិនិត្យសុខភាពនៅក្នុងតំបន់បាននិយាយថា យ៉ាងហោចណាស់ស្ត្រីម្នាក់នៅក្នុងតំបន់ អាដាមស៍ (Adams County) ត្រូវបានរាយការណ៍ថាស្លាប់ដោយសារព្យុះនេះ ប៉ុន្តែលោកស្រីមិនទាន់អាចផ្តល់ព័ត៌មានលម្អិតបន្ថែមបានទេ៕

ចំនួនអ្នកស្លាប់ដោយសារទឹកជំនន់នៅប្រេស៊ីល ភាគខាងត្បូងកើនឡើងដល់១៦១នាក់

ទីភ្នាក់ងារការពារជនស៊ីវិលបាននិយាយកាលពីថ្ងៃអង្គារទី២១ឧសភា ថា ការរកឃើញសាកសព៤នាក់បន្ថែមទៀត កាលពីប៉ុន្មានម៉ោងចុងក្រោយ នៅក្នុងគ្រោះថ្នាក់អាកាសធាតុធ្ងន់ធ្ងរដែលបានវាយប្រហាររដ្ឋ រីអូ ក្រែនដេ ដូស៊ុល (Rio Grande do Sul )ភាគខាងត្បូងរបស់ប្រទេសប្រស៊ីល បានរុញឲ្យចំនួនអ្នកស្លាប់ កើនឡើងដល់១៦១នាក់ ។ កម្រិតភ្លៀងធ្លាក់ខ្ពស់បំផុត បានបំផ្លិចបំផ្លាញរដ្ឋនេះ ចាប់តាំងពីថ្ងៃទី២៩ខែមេសាមក ដោយបង្កឲ្យមានទឹកជំនន់និងបំណាក់ដីធ្ងន់ធ្ងរ នៅក្នុងទីក្រុងតូចធំចំនួន៤៦៤ និងប៉ះពាល់ដល់ប្រជាពលរដ្ឋជាង២លាន២សែននាក់ ទាំងនៅតំបន់ជាយក្រុងនិងជនបទ រួមទាំងរដ្ឋធានី ព័រតូ អេឡេគ្រេ (Porto Alegre)។ អាកាសយានដ្ឋានអន្តរជាតិ ព័រតូ អេឡេគ្រេ ត្រូវបានបិទដោយពុំកំណត់ថានឹងបើកនៅពេលណា ដូច្នេះរដ្ឋាភិបាលសហព័ទ្ធបានអនុញ្ញាតឲ្យប្រើប្រាស់មូលដ្ឋានទ័ពអាកាសកាណូសអ៊ែរហ្វស ( Canoas Air Force) សម្រាប់ការហោះហើរពាណិជ្ជកម្ម។ ទីភ្នាក់ងារខាងលើ បាននិយាយថា ចំនួនអ្នកស្លាប់ទំនងនឹងកើនឡើងថែមទៀត ក្នុងពេលប៉ុន្មានថ្ងៃខាងមុខ ខណៈមនុស្ស៨៥នាក់ផ្សេងទៀតនៅតែបាត់ខ្លួន និង មនុស្សចំនួន៨០៦នាក់ បានរងរបួស។ កងកម្លាំងសន្តិសុខ និងក្រុមអ្នកឆ្លើយតបដំបូង បានជួយសង្រ្គោះអ្នកនៅរស់រានមានជីវិតចំនួន ៨២.៦៦៦នាក់ ទូទាំងរដ្ឋភាគខាងត្បូង និង តំបន់ផលិតដំណាំកសិកម្មដ៏សំខាន់ របស់ប្រេស៊ីល ជាប់ព្រំដែនជាមួយប្រទេសអាហ្សង់ទីន និង អ៊ុយរ៉ាហ្គាយ៕

ផ្ទុះការតវ៉ានៅក្រៅសភាតៃវ៉ាន់ នៅថ្ងៃដំបូងនៃការឡើងកាន់តំណែងរបស់មេដឹកនាំថ្មីលោក ឡៃ ឆឹងទ័រ

ថ្ងៃដំបូងរបស់លោក ឡៃ ឆឹងទ័រ (Lai Ching-te) ជាមេដឹកនាំថ្មីរបស់កោះតៃវ៉ាន់ ត្រូវបានរួមរឹតដោយការតវ៉ាដ៏ធំប្រឆាំងទៅនឹងក្រុមប្រឆាំង ជុំវិញច្បាប់ដ៏ចម្រូងចម្រាសនៅក្នុងសភា ដែលបង្ហាញពីអាណត្តិដំបូងយ៉ាងលំបាកសម្រាប់មេដឹកនាំ ដែលខ្វះសំឡេងភាគខាគច្រើនដាច់ខាតនៅសភា។ មនុស្សរាប់ពាន់នាក់តវ៉ាប្រឆាំងនឹងច្បាប់ដែលនឹងផ្តល់អំណាចពិសេសឱ្យសមាជិកសភាមានសិទ្ធិសាកសួរនរណាម្នាក់នៅក្នុងសភា។ ពលរដ្ឋតៃវ៉ាន់រាប់ពាន់នាក់ បានប្រមូលផ្តុំគ្នានៅខាងក្រៅសភាតវ៉ាប្រឆាំងនឹងការប៉ុនប៉ងរបស់ក្រុមគណបក្សប្រឆាំងដើម្បីជំរុញតាមរយៈសំណើច្បាប់ដោយគ្មានការពិនិត្យឡើងវិញ ដែលនឹងផ្តល់ឱ្យសមាជិកសភានូវអំណាចវិសាមញ្ញក្នុងការសាកសួរនរណាម្នាក់រួមទាំងមេដឹកនាំផង ក្រោមការគំរាមកំហែងនៃការផាកពិន័យនិងជាប់ពន្ធនាគារ។ កាលពីថ្ងៃសុក្រសប្ដាហ៍មុន សមាជិកសភាម្នាក់ ត្រូវបានបញ្ជូនទៅមន្ទីរពេទ្យ បន្ទាប់ពីភាគីនានាបានប៉ះទង្គិចគ្នាក្នុងការជជែកដេញដោល ជុំវិញកំណែទម្រង់សភា។ ក្រុមអ្នករិះគន់សកម្មភាពរបស់បក្សប្រឆាំងបានព្រមានថា ភាពចលាចល និងភាពមិនចុះសម្រុងគ្នា កំពុងកើតឡើងនៅក្នុងកណ្ដាប់ដៃរបស់ប្រទេសចិន ដែលបានប្តេជ្ញាថានឹងវាយក្រសោបយកកោះតៃវ៉ាន់ និងចាត់ទុករដ្ឋាភិបាលរបស់កោះនេះ ជាអ្នកបំបែកខ្លួនដ៏គ្រោះថ្នាក់។ ការតវ៉ាបានចាប់ផ្តើមកាលពីព្រឹកថ្ងៃអង្គារសប្ដាហ៍នេះ ហើយចំនួនអ្នកតវ៉ាបានកើនឡើងរាប់ពាន់នាក់នៅពេលល្ងាច ស្របពេលមនុស្សបានបញ្ចប់ការងារ និងសាលារៀនបិទទ្វារ ដោយពុំមានការរំខានពីព្យុះផ្គររន្ទះ និងភ្លៀងធ្លាក់ខ្លាំងឡើយ។ មនុស្សរាប់ពាន់នាក់ភាគច្រើនជាយុវជន បានស្ដាប់សុន្ទរកថា និងកាន់បដា ដោយចោទប្រកាន់គណបក្សប្រឆាំងថាកំពុងព្យាយាមធ្វើកំណែទម្រង់ដោយបង្ខំ និងរួមដៃជាមួយប្រទេសចិន សម្រាប់លទ្ធិប្រជាធិបតេយ្យ៕

កម្លាំងនគរបាលខណ្ឌដូនពេញ ចុះបង្ក្រាបករណីគ្រឿងញៀនឃាត់ខ្លួនមនុស្ស ១៨នាក់

កម្លាំងនគរបាល នៃអធិការដ្ឋាននគរបាលខណ្ឌដូនពេញ បានឡោមព័ទ្ធទីតាំងផ្ទះសំណាក់មួយកន្លែងយីហោសួស្ដី ធ្វើការបង្ក្រាបនិងឃាត់ខ្លួនជនសង្ស័យ ប្រុសស្រី ពាក់ព័ន្ធនឹងគ្រឿងញៀន ១៨នាក់ ដកហូតសារញៀនធាតុមួយចំនួន រួមទាំងសម្ភារៈប្រើប្រាស់មួយចំនួន។ប្រតិបត្តិការនេះ ដឹកនាំផ្ទាល់ដោយ ជា ខេមា អភិបាលខណ្ឌដូនពេញ ប្រធានគណៈបញ្ជាការឯកភាពខណ្ឌ និងលោកវរៈសេនីយ៍ឯកទៀង ចាន់សា អធិការនគរបាលខណ្ឌដូនពេញបានធ្វើឡើងនៅវេលាម៉ោង ១២ និង៤០នាទីរសៀលថ្ងៃទី២១ ខែឧសភា ឆ្នាំ២០២៤ នៅចំណុចផ្ទះសំណាក់ យីហោ សួរស្តី ផ្ទះលេខ38A0 ផ្លូវលេខ៨៦ សង្កាត់ស្រះចក ខណ្ឌដូនពេញ រាជធានីភ្នំពេញ។តាមប្រភពព័ត៌មានពីមន្ត្រីជំនាញអធិការដ្ឋាននគរបាលខណ្ឌដូនពេញបានឲ្យដឹងថាមុនឈានដល់ការឡោមព័ទ្ធនៅចំណុចទីតាំងផ្ទះសំណាក់នេះដោយមានប្រជាពលរដ្ឋរាយការណ៍មកថានៅចំណុចផ្ទះសំណាក់យីហោ សួស្ដី មានក្រុមក្មេងស្ទាវមិនស្គាល់អត្តសញ្ញាណប្រមូលផ្ដុំ ពពាក់ពពួនគ្នាចេញចូលនៅក្នុងផ្ទះសំណាក់នេះដែលមានការសង្ស័យពាក់ព័ន្ធនឹងសារធាតុញៀនផងដែរ។ក្រោយទទួលបានសេចក្ដីរាយការណ៍កម្លាំងជំនាញនៃអធិការដ្ឋាននគរបាលខណ្ឌដូនពេញបានធ្វើការស្រាវជ្រាវ រហូតកំណត់មុខសញ្ញាបាន រួចសុំគោលការណ៍ចុះឡោមព័ទ្ធចំណុចទីតាំងផ្ទះសំណាក់នេះ និងឈានដល់ការឃាត់ខ្លួនជនសង្ស័យ ប្រុសស្រី ១៨នាក់ និងដករហូតសារធាតុមានមួយចំនួនផងដែរ។បច្ចុប្បន្នជនសង្ស័យ១៨នាក់រួមទាំងវត្ថុតាង ត្រូវបានកម្លាំងនគរបាលខណ្ឌដូនពេញនាំខ្លួនយកទៅអធិការដ្ឋាននគរបាលខណ្ឌដើម្បីធ្វើការសួរនាំ កសាងសំណុំរឿងចាត់ការតាមនីតិវិធី៕ អត្ថបទ៖ កុម្ភៈ

មនុស្សរាប់សិបនាក់ តវ៉ានៅសភាប្រទេសក្រិក មុនពេលជម្រះក្តីជុំវិញការលិចនាវាជនអន្តោប្រវេសន៍

មនុស្សរាប់សិបនាក់ បានមកប្រមូលផ្តុំគ្នានៅខាងក្រៅសភាប្រទេសក្រិក កាលពីថ្ងៃចន្ទដើម្បីតវ៉ា នៅមុនការជម្រះក្តីបុរសជនជាតិអេហ្ស៊ីប៩នាក់ ដែលប្រឈមមុខទៅនឹងបទចោទប្រកាន់ពីបទរត់ពន្ធ ពាក់ព័ន្ធនឹងការលិចនាវាជនអន្តោប្រវេសន៍កាលពីឆ្នាំមុន។ នៅថ្ងៃទី ១៤ ខែមិថុនា ឆ្នាំ២០២៣ ទូកនេសាទឈ្មោះ Adriana មួយគ្រឿងមានផ្ទុកជនអន្តោប្រវេសន៍ពី ៥០០ ទៅ៧០០នាក់ មកពីប្រទេសប៉ាគីស្ថាន ស៊ីរី និងអេហ្ស៊ីប បានលិចនៅជិតទីក្រុង Pylos ភាគខាងត្បូង នៅក្នុងដែនទឹកអន្តរជាតិ ក្នុងផ្លូវធ្វើដំណើរពីប្រទេសលីប៊ី ទៅកាន់ប្រទេសអ៊ីតាលី។ មនុស្ស១០៤នាក់ បានរួចជីវិត ហើយមានតែសាកសព៨២នាក់ ប៉ុណ្ណោះ ត្រូវបានគេរកឃើញ។ការតវ៉ានេះ ធ្វើឡើងដើម្បីគាំទ្រដល់អ្នកនៅរស់រានមានជីវិតជនជាតិអេហ្ស៊ីប៩នាក់ ដែលជិះនៅលើទូកជនអន្តោប្រវេសន៍ និងជាអ្នកដែលត្រូវបានចោទប្រកាន់ពីបទបង្កឧបទ្ទវហេតុ ចូលរួមក្នុងអង្គការឧក្រិដ្ឋកម្ម និងការរត់ពន្ធជនអន្តោប្រវេសន៍។ ពួកគេ បានបដិសេធថាពុំមានកំហុសអ្វីទាំងអស់។ពេលវេលានៃការលិចទូក Adriana ក្នុងខែមិថុនាឆ្នាំមុន នៅតែជាប្រភពនៃជម្លោះរវាងអាជ្ញាធរប្រទេសក្រិក និងក្រុមគាំទ្រសិទ្ធិអ្នកនៅរស់រានមានជីវិត និងជនអន្តោប្រវេសន៍ មានន័យថាការជម្រះក្តី អាចជាឱកាសដំបូងដើម្បីស្តាប់ជាផ្លូវការនូវសាច់រឿងរបស់អ្នកដែលមានវត្តមាននៅពេលលិចទូកនោះ។អ្នកនៅរស់រានមានជីវិត បានចោទប្រកាន់ឆ្មាំល្បាតឆ្នេរប្រទេសក្រិកថាបានពន្លិចទូក។ អាជ្ញាធរ ដែលបានឃ្លាំមើល ទូក Adriana ជាច្រើនម៉ោង បាននិយាយថា ទូកបានក្រឡាប់នៅពេលដែលនាវាឆ្មាំល្បាតឆ្នេរ ស្ថិតនៅក្នុងចម្ងាយប្រហែល៧០ម៉ែត្រ។ អង្គភាពសេវាឆ្មាំល្បាតឆ្នេរ បានបដិសេធថាពុំមានកំហុសអ្វីនោះទេ។

មនុស្សជាច្រើនមកពីប្រទេសនៅអឺរ៉ុប ចូលរួមបាតុកម្មនៅទីក្រុងប្រ៊ុចសែល អំពាវនាវឱ្យមានបទឈប់បាញ់នៅហ្កាហ្សា

ក្រុមបាតុកររាប់ម៉ឺននាក់ មកពីបណ្តាប្រទេសនានានៅអឺរ៉ុប បានចូលរួមធ្វើបាតុកម្មនៅទីក្រុងប្រ៊ុចសែល កាលពីថ្ងៃអាទិត្យ ដោយអំពាវនាវឱ្យមានបទឈប់បាញ់បន្ទាន់នៅក្នុងតំបន់ហ្កាហ្សា។ ដោយការស្រែកពាក្យស្លោកដូចជា «បញ្ឈប់ប្រល័យពូជសាសន៍នៅប៉ាឡេស្ទីន» «តស៊ូ» និង «សាមគ្គីភាពជាមួយប្រជាជនប៉ាឡេស្ទីន» ក្រុមបាតុករ បានដង្ហែរបាតុកម្មពីស្ថានីយ៍ ហ្គែ ឌូណត(Gare du Nord) ទៅកាន់ទីលាន Jean Rey ទីស្នាក់ការអឺរ៉ុប។បាតុកម្ម ដែលត្រូវបានរៀបចំដោយសម្ព័ន្ធអង្គការសង្គមស៊ីវិល រួមមានសមាគមបែលហ្សិក-ប៉ាឡេស្ទីន អង្គការឆ័ត្រនិយាយភាសាបារាំងនិងហូឡង់ និងសមូហភាពប៉ាឡេស្ទីន Beitna បានទាក់ទាញអ្នកចូលរួមប្រហែល ៤០.០០០នាក់។អ្នករៀបចំ បានអំពាវនាវឱ្យសហគមន៍អន្តរជាតិ មានចំណាត់ការបន្ទាន់ ដើម្បីធានាបានបទឈប់បាញ់ជាអចិន្ត្រៃយ៍ ការពារជនស៊ីវិល និងដោះលែងចំណាប់ថ្នូរ។ ពួកគេក៏បានទាមទារឱ្យបញ្ចប់ការបិទផ្លូវនៅតំបន់ហ្កាហ្សា និងបង្កើនលទ្ធភាពដំណើរការជំនួយមនុស្សធម៌សម្រាប់ដែនដីប៉ាឡេស្ទីន។លោក ក្រេកហ្គ័ររី ម៉ៅហ្សេ(Gregory Mauze) អ្នកនាំពាក្យសមាគមបែលហ្សិក-ប៉ាឡេស្ទីន បាននិយាយថា សហភាពអឺរ៉ុប គឺជាដៃគូពាណិជ្ជកម្មធំបំផុតរបស់អ៊ីស្រាអែល ហើយមានសម្ពាធយ៉ាងសំខាន់ក្នុងការដើរតួនាទីយ៉ាងសកម្ម និងបញ្ចប់នូវអ្វីដែលស្ថាប័នអន្តរជាតិ និងអង្គការក្រៅរដ្ឋាភិបាលកាន់តែច្រើនកំពុងចាត់ទុកថា ជាអំពើប្រល័យពូជសាសន៍។បាតុកម្មនៅទីក្រុងប្រ៊ុចសែល ប្រទេសបែលហ្សិក គឺជាបាតុកម្មទ្រង់ទ្រាយធំលើកទីប្រាំមួយ នៅក្នុងប្រទេសបែលហ្សិក ចាប់តាំងពីជម្លោះបានចាប់ផ្តើមនៅថ្ងៃទី៧ ខែតុលា ឆ្នាំ ២០២៣។ អ្នករៀបចំ បានបង្ហាញក្តីសង្ឃឹមថា សម្ពាធអន្តរជាតិ នឹងជួយបញ្ចប់អរិភាព និងផ្តល់ជំនួយដែលត្រូវការច្រើនដល់ ប្រជាជនប៉ាឡេស្ទីន។ អាជ្ញាធរសុខាភិបាលប៉ាឡេស្ទីន នៅតំបន់ហ្កាហ្សា បាននិយាយថា ចំនួនអ្នកស្លាប់នៃប្រជាជនប៉ាឡេស្ទីន ពីការវាយប្រហារដែលនៅបន្តរបស់អ៊ីស្រាអែល ទៅលើតំបន់ហ្កាហ្សា បានកើនឡើងដល់ ៣៥.៣៨៦ នាក់។

មនុស្ស ២០នាក់បានស្លាប់ នៅក្នុងការវាយប្រហារតាមអាកាស នៅតំបន់ហ្កាហ្សាភាគកណ្តាល

មនុស្ស២០នាក់ នៅតំបន់ហ្កាហ្សាភាគកណ្តាល ត្រូវបានសម្លាប់ បន្ទាប់ពីការវាយប្រហារតាមអាកាសរបស់អ៊ីស្រាអែលកាលពីថ្ងៃអាទិត្យ ខណៈដែលការប្រយុទ្ធ នៅតែបន្តបំផ្លាញតំបន់នេះ កាលពីចុងសប្តាហ៍។សារព័ត៌មាន AP បានរាយការណ៍ថា កំណត់ត្រាពីមន្ទីរពេទ្យ Al-Aqsa Martyrs បានបង្ហាញថា មនុស្ស ២០នាក់ ត្រូវបានសម្លាប់នៅក្នុងការវាយប្រហារតាមអាកាសនៅជំរំ Nuseirat ជាជំរុំជនភៀសខ្លួនប៉ាឡេស្ទីនដែលមានតាំងពីសង្គ្រាមអារ៉ាប់-អ៊ីស្រាអែល ឆ្នាំ ១៩៤៨មកម្ល៉េះ។ មន្ទីរពេទ្យដែលមានទីតាំងនៅទីក្រុង Deir al-Balah ក្បែរនោះ បានរកឃើញសាកសព ដែលភាគច្រើនជាស្ត្រី និងកុមារ។សេវាសង្គ្រោះអឌ្ឍចន្ទក្រហមប៉ាឡេស្ទីន បាននិយាយថា ការវាយប្រហារដាច់ដោយឡែកមួយ នៅជំរំNuseirat បានសម្លាប់មនុស្ស ៥នាក់បន្ថែមទៀត នេះបើយោងតាមសារព័ត៌មាន AP។សង្គ្រាមនៅតំបន់ហ្កាហ្សា បានសម្លាប់ប្រជាជនប៉ាឡេស្ទីនប្រហែល ៣៥.000នាក់ នេះបើយោងតាមក្រសួងសុខាភិបាលហ្កាហ្សាគ្រប់គ្រងដោយក្រុមហាម៉ាស ដែលមិនបែងចែករវាងការស្លាប់របស់ជនស៊ីវិលនិងក្រុមប្រយុទ្ធទេ។ នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) បានប្តេជ្ញាលុបបំបាត់ក្រុមហាម៉ាស បន្ទាប់ពីការវាយប្រហារកាលពីថ្ងៃទី៧ ខែតុលា របស់ក្រុមសកម្មប្រយុទ្ធ ទៅលើអ៊ីស្រាអែលភាគខាងត្បូង ដែលបានសម្លាប់មនុស្សប្រហែល ១.២០០ នាក់។

បណ្ដាញសង្គម

ព័ត៌មានថ្មីៗ

លោក Ramiro Valdes ដែលស្ថិតក្នុងចំណោមឥស្សរជនបដិវត្តន៍នៅរស់ចុងក្រោយរបស់គុយបា បានទទួលមរណភាព

កាកបាទក្រហមកម្ពុជា បើកយុទ្ធនាការបរិច្ចាគឈាមដ៏ធំក្រោមប្រធានបទ «តំណក់ឈាមមនុស្សធម៌! ផ្តល់ឈាមសង្គ្រោះជីវិត»

ក្រសួងការងារ បើកវគ្គបណ្តុះបណ្តាលរយៈពេល ៣ថ្ងៃ ដើម្បីពង្រឹងសមត្ថភាពជនបង្គោលយេនឌ័ររបស់ក្រសួង

ជប៉ុនផ្ដល់ឥណទានសម្បទានប្រមាណ ១៦២.៧ លានដុល្លារអាម៉េរិក ដើម្បីអនុវត្តគម្រោងស្តារឡើងវិញនូវប្រព័ន្ធស្រោចស្រព និងប្រព័ន្ធដោះទឹកភាគនិរតីរាជធានីភ្នំពេញ

រដ្ឋសភាអនុម័តសេចក្តីព្រាងច្បាប់ស្តីពីវិសោធនកម្មច្បាប់ស្តីពីផ្លូវថ្នល់ ដែលបានធ្វើវិសោធនកម្មចំនួន ១៥ មាត្រា លើច្បាប់ស្តីពីផ្លូវថ្នល់ដើម្បីឆ្លើយតបតាមការអភិវឌ្ឍសង្គម-សេដ្ឋកិច្ច

មន្រ្ដីជំនាញ៖ការសិក្សារំហូរទេសចរជាយុទ្ធសាស្រ្តពីអ្នកជំនាញរួមចំណែកយ៉ាងសំខាន់ក្នុងការអភិវឌ្ឍន៍វិស័យទេសចរណ៍ខេត្តបាត់ដំបង

ភាគីថៃជូនដំណឹងជាផ្លូវការមកកម្ពុជាអំពីការជ្រើសរើសអ្នកផ្សះផ្សាចំនួនពីររូបរួចហើយ ដើម្បីចូលរួមក្នុងយន្តការផ្សះផ្សាដោយបង្ខំ ក្រោមអនុសញ្ញា UNCLOS

បាល់ទាត់ពិភពលោក ២០២៦៖ ជាងកាត់សក់នៅ LA ផ្តល់សេវាកាត់សក់ឥតគិតថ្លៃ ស្វាគមន៍អ្នកគាំទ្របាល់ទាត់

ភ្ញៀវទេសចររាប់ម៉ឺននាក់ទៅលេងកម្សាន្តទឹកដីស្រុកសំឡូត ខេត្តបាត់ដំបង ក្នុងរដូវកាលបៃតង និងជារដូវកាលប្រមូលផលផ្លែឈើ

សហគ្រិនក្នុងស្រុក បង្ហាញក្ដីរីករាយ ខណៈសន្ទុះគាំទ្រផលិតផលខ្មែរពីពលរដ្ឋបន្តមានការកើនឡើង

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877