នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ក្រសួងទេសចរណ៍៖ កម្ពុជានៅតែជាគោលដៅទេសចរណ៍សុវត្ថិភាព និងរាក់ទាក់ស្វាគមន៍
ប្រតិភូក្រសួងទេសចរណ៍ទស្សនកិច្ចសារមន្ទីរ ព្រះស្រីឦសានវរ្ម័ន ស្វែងយល់ពីប្រវត្តិសេដ្ឋកិច្ច និង​រូបិយវត្ថុ​កម្ពុជា
«ដំណើរទេសចរណ៍នៅប្រទេសកម្ពុជាពិតជាសប្បាយរីករាយ និង​ពោរ​ពេញ​ដោយ​អនុស្សាវរីយ៍​ល្អៗដែលមិនអាចបំភ្លេចបាន ហើយយើងមកលេងម្តងទៀតជាមិនខាន» ចំណាប់​អារម្មរណ៍​រួម​របស់​ប្រតិភូបុគ្គលិកក្រុមហ៊ុន EdF និង GdF បារាំង
ក្រសួងវប្បធម៌ និងវិចិត្រសិល្បៈ រៀបចំពិធីអបអរសាទរការចុះ “បូជនីយដ្ឋានចងចាំនៃកម្ពុជា៖ ពីទីតាំងឧក្រិដ្ឋកម្មមកជាមណ្ឌលផ្សះផ្សា និងសន្តិភាព” ក្នុងបញ្ជីបេតិកភណ្ឌពិភពលោក

វប្បធម៌ និងទេសចរណ៍

ក្រសួងវប្បធម៌ នឹងរៀបចំការសម្តែងល្ខោនបាមោជ្ជទ័យ និងពិព័រណ៌សិប្បកម្មខ្មែរ រយៈពេល៤ថ្ងៃ

2025/01/09 11:23:16 am        140
Facebook Telegram Linkin
នាយកដ្ឋានសិល្បៈទស្សនីយភាព នៃក្រសួងវប្បធម៌ និងវិចិត្រសិល្បៈ នឹង​រៀបចំ​ការ​សម្តែង​ល្ខោន​បាមោជ្ជ​ទ័យ រឿង"កុលាបប៉ៃលិន" និងពិព័រណ៌សិប្បកម្មខ្មែរ ជូនទស្សនិក​ជន​ទស្សនា​រយៈពេ​ល​៤​ថ្ងៃ គឺចាប់ពីថ្ងៃទី២៣ ដល់ថ្ងៃទី២៦ ខែមករា ឆ្នាំ២០២៥ វេលាម៉ោង៥ និង៣០នាទីល្ងាច នៅ​សាល​សន្និសីទចតុម្មុខ។លោក ឈាង ឆដាភ័ក្រ្ត ប្រធាននាយកដ្ឋានសិល្បៈទស្សនីយភាព បានថ្លែងប្រាប់BTV ព័ត៌មាន​នា​ព្រឹក​ថ្ងៃ​ទី០៩ ខែមករា ឆ្នាំ២០២៥នេះថា នៅថ្ងៃទី២៣ រហូតដល់ថ្ងៃទី២៦ ខែមករា ឆ្នាំ​២០២៥​ខាង​មុខ​នេះ នាយកដ្ឋាន នឹងរៀបចំការសម្តែងល្ខោនបាមោជ្ជទ័យ «រឿងកុលាបប៉ៃលិន» ព្រឹតិ្តការណ៍​វប្បធម៌នេះ ក៏មានរៀបចំពិព័រណ៌សិប្បកម្មខ្មែរ ជូនទស្សនិកជន​ទស្សនា​​ឲ្យ​កាន់​តែ​អធិក​អធម​។ តាមរយៈព្រឹតិ្តការណ៍វប្បធម៌នេះ គឺពិតជាមានសារសំខាន់ មន្ត្រីជំនាញ​បាន​គាស់​រម្លើង យើងបានលើកយកនូវទម្រង់សិល្បៈល្ខោនបាមោជ្ជទ័យ ដែលជាទម្រង់សិល្បៈដ៏កម្រ និងមិនសូវមានសកម្មភាព។ ជាក់ស្តែងទម្រង់សិល្បៈមួយនេះ ត្រូវបានប្រមុខរាជរដ្ឋាភិបាលកម្ពុជា ក៏​ដូចជាថ្នាក់ដឹកនាំរបស់ក្រសួងវប្បធម៌ និងវិចិត្រសិល្បៈ លោកបានផ្តល់នូវអនុសាសន៍ ណែនាំ​ដល់​មន្ត្រី​ជំនាញនៃនាយកដ្ឋានសិល្បៈទស្សនីយភាព ឲ្យគាស់រម្លើង​នៅ​ទម្រង់​សិល្បៈ​ដែល​មិន​សូវ​មាន​សកម្មភាព និងជិតបាត់បង់ ត្រូវធ្វើឲ្យរស់រវើកឡើងវិញ ដើម្បីឲ្យប្រជាពលរដ្ឋខ្មែរ បានស្គាល់​នូវ​អ្វី​ទៅ​ដែលជាមរតកវប្បធម៌អរូបី ដ៏មានតម្លៃរបស់ជាតិ។ឆ្លៀតក្នុងឱកាសនេះលោក ឈាង ឆដាភ័ក្រ្ត សូមអំពាវនាវដល់មហាជន ជា​ពិសេស​យុវជន​ចូល​រួម​គាំទ្រ​ក្នុង​ការសម្តែងល្ខោនបាមោជ្ជទ័យ ព្រោះការចូលរួមគាំទ្រទស្សនារបស់ប្រជាពលរដ្ឋ គឺជា​កម្លាំង​ចិត្ត​ដ៏សំខាន់ ក្នុងការលើកទឹកចិត្ដដល់លោកសាស្រ្តាចារ្យ លោកគ្រូ អ្នកគ្រូ សិល្បករ សិល្ប​ការិនី ឲ្យគាត់មានកម្លាំងចិត្តថែរក្សាការពារនូវមរតកវប្បធម៌ដ៏មានតម្លៃរបស់ជាតិ។ ហើយ​ការ​បង្កើត​ស្នាដៃនេះ ក៏ដើម្បីឲ្យប្រជាពលរដ្ឋទស្សនា និងគាំទ្រ ហើយក៏គ្មានប្រទេសណា ប្រជាជន​ណា គេមកគាំទ្រវប្បធម៌របស់ជាតិយើង ក្រៅពីខ្លួនយើងនោះទេ។ ដូច្នេះសុំឲ្យយុវជន ស្រលាញ់​គាំទ្រ នូវវប្បធម៌របស់ជាតិយើង ដូចនេះយើងមិនបារម្ភក្នុងការបាត់បង់ និងមិន​បារម្ភ​ពី​ការ​ទទួល​រង​នូវ​ឥទិ្ធពលវប្បធម៌បរទេសចូលមក និងមិនធ្វើឲ្យយើងភ្លេចនូវវប្បធម៌ជាតិរបស់យើងនោះទេ៕ អត្ថបទ រដ្ឋា

“សំណេរអង្គរ” លើកទី២ នៅប្រាសាទអង្គរវត្ត, ព្រឹត្តិការណ៍ដ៏សំខាន់ជួយ​លើក​កម្ពស់​អក្សរសាស្ត្រខ្មែរ និងការផ្សព្វផ្សាយទេសចរណ៍របស់កម្ពុជា នឹងរៀបចំនៅក្នុងខែមករានេះ

2025/01/05 04:53:37 pm        342
Facebook Telegram Linkin
សំណេរអង្គរ ដែលនឹងធ្វើឡើងដោយការសរសេរតាមអាន ក្នុងបំណង​ស្វែង​រក​អ្នក​សរសេរ​បាន​ត្រឹម​ត្រូវ​តាមក្បួន​អក្ខរាវិរុទ្ធ​នៃ​អក្សរ​សាស្ត្រ​ខ្មែរ​ព្រម​ទាំង​អ្នក​មាន​ស្នាដៃ​សរសេរ​អក្សរ​បាន​ស្អាត​បំផុត​នឹង​ប្រារព្ធ​ឡើង​ជាលើកទី២ នៅប្រាសាទអង្គរវត្ត នៅថ្ងៃទី១៩ ខែមករា ឆ្នាំ២០២៥ខាងមុខ។អ្នករៀបចំកម្មវិធីសំណេរអង្គរ លោក លីម ប៊ុនហុក បានថ្លែង​នៅក្នុង​សន្និសីទ​សារព័ត៌មាន​នាព្រឹ​ក​ថ្ងៃ​ទី៥ខែម​ករានេះថា ការអភិរក្ស និងលើកតម្លៃអក្សរសាស្រ្តខ្មែរពិតជាមានសារសំខាន់ ពី​ព្រោះ​ខ្មែរ​​មា​ន​ភាសា និងអក្សរសាស្ត្រយូរលង់ណាស់មកហើយ។ លោកថា «ដោយសារ​តែខ្មែរ​មាន​អក្សរ​ជា​យូរ​លង់​មកហើយ ព្រមទាំងបានចារិកទុកនៅតាមប្រាសាទនានាផង ដូច្នេះហើយ​បាន​ជា​«សំណេរអង្គរ» ជា​ព្រឹត្តិការណ៍ដ៏សំខាន់ ក្នុងការជួយលើកកម្ពស់អក្សរសាស្ត្រខ្មែរ ពិសេស​គឺជួយ​ឱ្យ​ប្រជាពលរដ្ឋ និងមហាជនទូទៅសរសេរភាសាខ្មែរឱ្យបានត្រឹមត្រូវតាមក្បួនអក្ខរាវិរុទ្ធ ការ​អាន​ពាក្យ​ខ្មែ​រ​ឱ្យត្រឹមត្រូវ ព្រមទាំងស្វែងរកអ្នកដែលមានស្នាដៃសរសេរអក្សរខ្មែរបានស្អាតបំផុត”។លោក ប៊ុនហុក បន្តថា សំណេរអង្គរក៏មានគោលបំណងផ្សាភ្ជាប់ទៅនិងរមណីយដ្ឋានអង្គរ ដែល​ជា​សម្បត្តិបេតិកភណ្ឌពិភពលោក ជាមួយប្រវត្តិសាស្ត្រដ៏យូរលង់របស់ខ្មែរផងដែរ។ បើតាមលោក ប៊ុន ហុក ព្រឹត្តិការណ៍សំណេរអង្គរលើកទី២ ដែលនឹងធ្វើ​ឡើង​នៅ​លើ​ស្ពាន​ហាល​ផ្នែក​ខាង​លិចរបស់ប្រាសាទអង្គរវត្ត នឹងមានបេក្ខជនចូលរួម១២២០នាក់។ បេក្ខជនទាំងនោះ មាន​ទាំងកុមារចាប់ពីអាយុ៦ឆ្នាំនិងមនុស្សចាស់ដែលមានអាយុរហូតដល់៨១ឆ្នាំ។ ក្នុងនោះដែរក៏មានព្រះសង្ឃចូលរួមចំនួន៨២អង្គ ជនបរទេសរៀនភាសាខ្មែរមួយចំនួន ព្រម​ទាំង​អនិកជន​ខ្មែរ​ដែលរស់នៅបរទេសខ្លះទៀតផង។ចំណែកឯកឧត្តម ឡុង កុសល អគ្គនាយករង​នៃ​អាជ្ញាធរ​ជាតិ​អប្សរា​បា​ន​ចាត់ទុ​ក​ថា​កម្ម​វិធី​សំណេរ​អង្គរ​លើកទី២ ក្នុងឆ្នាំ២០២៥នេះ ក៏មានសារៈសំខាន់ខ្លាំង​ដែល​ស្ដែង​ចេញ​នូវ​អារ្យធម៌ និង​ទំនៀម​ទម្លាប់​មួយ​នៃការសរសេរដោយផ្សាភ្ជាប់ទៅនិងសេចក្តីចងចាំជាច្រើនឡើងវិញ។ ឯកឧត្តម ឡុង កុសល បញ្ជាក់ទៀតថា សំណេរអង្គរ​ក៏មាន​សារសំខាន់​ណាស់​ដែរ​ក្នុង​ការ​ជួយ​បង្កើត​ចលករ​ផ្សេង​ៗ​លើ​ផ្នែកវិស័យទេសចរណ៍នៅតំបន់អង្គរ។សំណេរអង្គរលើកទី១ ធ្លាប់បានរៀបចំនៅលើស្ពានហាលខាងលិចប្រាសាទអង្គរវត្តម្ដងមកហើយ កាល​ពីថ្ងៃទី២១ ខែមករា ឆ្នាំ២០២៤ ដោយមានចំនួនអ្នកចូលរួមប្រមាណ៨០០នាក់៕ 

ភ្ញៀវទេសចរជិត៤០ម៉ឺននាក់ទៅលេងខេត្តព្រះសីហនុកំលុងថ្ងៃឆ្លងឆ្នាំសកល កើនឡើងជាង១២ភាគរយធៀបនឹងឆ្នាំមុន

2025/01/02 03:50:19 pm        159
Facebook Telegram Linkin
ព្រះសីហនុ៖ លោក តាំង សុចិត្តគ្រឹស្នា ប្រធានមន្ទីរទេសចរណ៍ខេត្តព្រះសីហនុ បានឱ្យដឹងថា ក្នុងឱកាសឆ្លងឆ្នាំ សកល ២០២៤-២០២៥ ភ្ញៀវទេសចរចូលលេងកម្សាន្ដនៅខេត្តព្រះសីហនុ មានចំនួនជិត៤០ម៉ឺននាក់ កើនឡើង ជាង១២ភាគរយ ធៀបនឹងឆ្នាំមុន ។ ភ្ញៀវជាតិ មានចំនួនជាងជិត៣៩ម៉ឺននាក់ កើនឡើង ១២,៥៥% និងភ្ញៀវបរ ទេស ៤.៤១៣នាក់ កើនឡើង២០,៨៧%។ ភ្ញៀវចូលកម្សាន្តតាមបណ្តាឆ្នេរ កោះ និងរមណីយដ្ឋាននានា ។ ដោយ ឡែក ភ្ញៀវចូលតាមអាកាសយានដ្ឋានអន្តរជាតិខេត្ដព្រះសីហនុ មានចំនួន០៣ជើងហោះហើរ ចំនួន៤១៣នាក់ ភ្ញៀវជាតិ ០២នាក់ និងភ្ញៀវអន្តរជាតិ ៤១១នាក់ ។នាឱកាសថ្ងៃឆ្លងឆ្នាំ២០២៥នេះ រដ្ឋបាលខេត្ត បានរៀបចំនូវការប្រគំតន្ត្រី ការតាំងពិព័រណ៍ សម្ដែងសិល្បៈ បង្ហោះគោម បាញ់កាំជ្រួច ដើម្បីបង្កភាពសប្បាយរីករាយជូនដល់ប្រជាពលរដ្ឋ ភ្ញៀវទេសចរ ក្រោមការគ្រប់គ្រងសន្តិ សុខសណ្ដាប់ធ្នាប់ល្អប្រសើរ ខណៈតម្លៃអាហារហូបចុក ទីតាំងស្នាក់នៅ បានហក់ឡើងបន្តិចបន្តួចដែលភ្ញៀវអាច ទទួលយកបាន ៕ អត្ថបទ៖ គង់ ប៊ុនថា

មន្ត្រីជំនាញខិតខំបំពេញតួនាទី ថែរក្សាអភិរក្សសម្បតិ្តបេតិកភណ្ឌវប្បធម៌ជាតិ រូបី និងអរូបី ក្នុងខេត្តកំពង់ស្ពឺ

2025/01/02 02:09:04 pm        198
Facebook Telegram Linkin
លោក ស៊ុន មានជ័យ ប្រធានមនី្ទរវប្បធម៌ និងវិចិត្រសិល្បៈ ខេត្តកំពង់ស្ពឺ ថ្លែងប្រាប់BTV ព័ត៌មាន នា​ថ្ងៃនេះថា មន្ត្រីរាជការ នៃមន្ទីរវប្បធម៌ និងវិចិត្រសិល្បៈខេត្ត បានខិតខំប្រឹងប្រែង បំពេញតួនាទី ភារកិច្ច​របស់ខ្លួន ក្នុងការថែរក្សាអភិរក្សសម្បតិ្តបេតិកភណ្ឌវប្បធម៌ជាតិ ទាំងរូបី និងអរូបី ក្នុងខេត្ត​កំពង់ស្ពឺ។លោក ប្រធានមនី្ទរវប្បធម៌ខេត្តកំពង់ស្ពឺ បានជម្រាបជូន២ចំនុច ដោយចំនុចទី១. គឺ​សម្បតិ្ត​បេតិក​ភណ្ឌ​វប្បធម៌​ជាតិ រូបី នៅទូទាំងខេត្តកំពង់ស្ពឺ មានបុរាណដ្ឋានចំនួន៦២០ទីតាំង ក្នុងនោះ​មន្ត្រី​ជំនាញ ​ចុះវាស់វែង បានចំនួន៥៧១ទីតាំង និងមិនទាន់វាស់វែង ចំនួន៤៩ទីតាំង។ ក្នុងចំណោម​នៃ​ការ​វាស់វែងបុរាណដ្ឋាននេះ យើងទទួលបានប័ណ្ណសម្គាល់អចលនវត្ថុ និងបង្កាន់ដៃ សម្រាប់​ទទួល​វិញ្ញាបនបត្រមួយចំនួន និងមានវត្ថុបុរាណចំនួន០៤ ដូចជាបដិមាព្រះនរាយណ៌ និងបាន​បញ្ជូន​ទៅ​កាន់សារមនី្ទរជាតិកម្ពុជា ដើម្បីជួសជុលថែរក្សាអភិរក្សបដិមាព្រះនរាយណ៌ ក្រៅពីនោះ​ខេត្ត ក៏មានសារមនី្ទរឯកជនមួយកន្លែង គឺសារមនី្ទរនរ បុរី (ក្នុងសារមនី្ទរនេះ មានវត្ថុ​សិល្បៈ​ចម្លង​ដូច​ ចំនួន៣១០ដុំ-ផ្ទាំង) ក្នុងឆ្នាំ២០២៤នេះ មានអ្នក ចូលទស្សនាចំនួន២០១០នាក់។ ចំនុច​ទី២​. សម្បតិ្តបេតិកភណ្ឌវប្បធម៌ជាតិ អរូបី ផ្តោតលើសិល្បៈសូនរូប និងសិល្បៈសិប្បកម្ម ដែល​ប្រជា​ពលរដ្ឋកំពុងប្រកបរបរនេះ មានចំនួន១១៩កន្លែង(ចម្លាក់ពុំស៊ីម៉ង់ដ្ឋ ចម្លាក់ឈើ ចម្លាក់​ម្នាង​សិលា ចម្លាក់ស្មិត ចម្លាក់ស្ពាន់ ទីកន្លែងផលិតឧបករណ៍ភ្លេងប្រពៃណី កុលាលភាជន៍ កន្លែង​តម្បាញ​សរសៃ​អំបោះ តម្បាញវល្លិ៍ផ្តៅ វល្លិ៍ល្ពាក់ និងតម្បាញអំពីរុក្ខជាតិត្នោត)។ជាចុងក្រោយលោក ស៊ុន មានជ័យ បានបញ្ជាក់ទៀតថា នៅដើមឆ្នាំ២០២៥នេះ មន្ត្រី​ជំនាញ​របស់​មនី្ទរ​វប្បធម៌ខេត្ត និងបន្តធ្វើការជួសជុលអភិរក្សប្រាសាទភ្នំក្អែកពង ដែលស្ថិតលើចង្កេះ​ភ្នំក្អែក​ពង ភូមិក្អែកពង ឃុំតាំងស្យា ស្រុកភ្នំស្រួច ខេត្តកំពង់ស្ពឺ។ ក្នុងដំណាក់កាលទី១ នាឆ្នាំ​២០២៤ កន្លង​មកនេះ មន្ត្រីជំនាញបានខិតខំធ្វើការជួសជុលអភិរក្ស បានទល់ទ្រ កាប់ឆ្ការកូន និង​ដើមឈើតូចៗ ដុះក្នុង និងលើប្រាសាទ។ ប្រាសាទភ្នំក្អែកពង គឺជាប្រាសាទឥដ្ឋ មាន​សភាព​ទ្រុឌ​ទ្រោម (ខូចខាតប្រមាណ៦០%) និងមានតែមួយគត់ក្នុងខេត្តកំពង់ស្ពឺ៕ អត្ថបទ រដ្ឋា 

កម្ពុជាទទួលបានចំណូលពីការលក់បណ្ណសម្រាប់ភ្ញៀវទេសចរបរទេស មានទឹកប្រាក់ជិត ៤៨ លានដុល្លារ

2025/01/02 11:42:34 am        106
Facebook Telegram Linkin
គ្រឹះស្ថានអង្គរទទួលបានភ្ញៀវទេសចរបរទេស ចូលទស្សនារមណីយដ្ឋានអង្គរ ប្រាសាទកោះកែរ និងកំពង់ផែចុងឃ្នៀស ក្នុងបំណាច់ឆ្នាំ ២០២៤ មានចំនួនជាង ១ លាននាក់ និងទទួលបានចំណូលពីការលក់បណ្ណ បានចំនួនជិត ៤៨ លានដុល្លារអាមេរិក កើនឡើងប្រមាណជាង ២៨ ភាគរយ បើធៀបនិងឆ្នាំ ២០២៣។ គ្រឹះស្ថានអង្គរ ចេញសេចក្តីប្រកាសព័ត៌មាន ស្តីពីស្ថិតិភ្ញៀវទេសចរបរទេស និងចំណូលដែលទទួលបានពីការលក់បណ្ណចូល ទស្សនា រមណីយដ្ឋានអង្គរ ប្រាសាទកោះកែរ និងកំពង់ផែចុងឃ្នៀស ក្នុងនោះសម្រាប់ភ្ញៀវទេសចរបរទេស ប្រចាំខែ ធ្នូ ឆ្នាំ២០២៤, កម្ពុជាទទួលបានភ្ញៀវទេសចរបរទេស ជាង ១២៥ ពាន់នាក់ កើនឡើងជាង ២៧ ភាគរយ និងទទួលបានចំណូលពីការលក់បណ្ណចូល ទស្សនា មានទឹកប្រាក់ជិត ៦ លានដុល្លារអាមេរិក កើនឡើងប្រមាណជាង ២៧ ភាគរយ បើធៀបទៅរយៈពេលដូចគ្នាឆ្នាំ២០២៣។ចំណែកនៅក្នុងរយៈពេល ១២ ខែ ក្នុងឆ្នាំ២០២៤ នេះវិញ, កម្ពុជាទទួលបានភ្ញៀវទេសចរបរទេស ចូលទស្សនារមណីយ ដ្ឋានអង្គរ ប្រាសាទកោះកែរ និងកំពង់ផែចុងឃ្នៀសនេះ មានចំនួនសរុបជាង ១ លាននាក់ កើនឡើង ២៨ ភាគរយ និងទទួលបាន ចំណូលពីការលក់បណ្ណចូលទស្សនា មានទឹកប្រាក់សរុបជិត ៤៨ លានដុល្លារអាមេរិក កើនជាង ២៨ ភាគរយ បើប្រៀបធៀបទៅរយៈ ពេលដូចគ្នាឆ្នាំ ២០២៣។សូមបញ្ជាក់ថា នៅក្នុងបំណាច់ឆ្នាំ ២០២៤ នេះ, គ្រឹះស្ថានអង្គរបានប្រមូលចំណូលពីវិស័យផ្សេងៗ ក្នុងនោះសម្រាប់ចំណូលសរុប ឧបត្ថម្ភមូលនិធិគន្ធបុប្ផាកម្ពុជា មានចំនួនទឹកប្រាក់សរុបជាង ២ លានដុល្លាអាមេរិក, ចំណូលពីការលក់បណ្ណនៅប្រាសាទកោះកែវ ទទួលបានភ្ញៀវទេសចរជាង ២១ ពាន់នាក់ មានទឹកប្រាក់ជាង ៣២៩ ពាន់ដុល្លារអាមេរិក, និងចំណូលពីការលក់សំបុត្រទូក មាន ចំនួនជាង ៧៩៤ ពាន់ដុល្លារអាមេរិក៕ អត្ថបទ៖ សុន រ៉ាឌី

ភ្ញៀវទេសចរជាង ៣៣ម៉ឺននាក់ ទៅទស្សនាខេត្តសៀមរាបនាថ្ងៃឆ្លងឆ្នាំសកល

2025/01/01 08:42:05 am        211
Facebook Telegram Linkin
ភ្ញៀវទេសចរជាតិ និងអន្ដរជាតិ ព្រមទាំងប្រជាពលរដ្ឋ ប្រមាណជាង៣៣ម៉ឺននាក់ បានទៅទស្សនាកំសាន្ដឆ្លងឆ្នាំសកល២០២៤ឈានចូលឆ្នាំ២០២៥នៅខេត្តសៀមរាប ដោយចាប់ពីថ្ងៃទី៣០ដល់ថ្ងៃទី៣១ខែធ្នូឆ្នាំ២០២៤។យោងតាមរបាយការណ៍មន្ទីរទេសចរណ៍ខេត្ដសៀមរាប បានបង្ហាញថា ចំនួនអ្នកទេសចរប្រមាណ៣៣៣,៦៦០ នាក់ មានការកើនឡើងប្រមាណ ៩.៧៣%បើប្រៀបធៀបនឹងឆ្នាំ២០២៣ ចំនួនប្រមាណ ៣០៤,០៦៤ ក្នុងនោះ ទេសចរជាតិ និងបងប្អូនប្រជាពលរដ្ឋក្នុងខេត្ត មានចំនួនប្រមាណ ៣២៣,៤០០ នាក់ មានការកើនឡើងប្រមាណ៩.៦៣% បើប្រៀបធៀបនឹងរយៈពេលដូចគ្នាឆ្នាំ២០២៣ ចំនួនប្រមាណ ២៩៥,០០០ នាក់។ ភ្ញៀវទេសចរអន្តរជាតិ មានចំនួន ១០,២៦០ នាក់ មានការកើនឡើង ១៣.២០% បើប្រៀបធៀបនឹងរយៈពេលដូចគ្នាឆ្នាំ២០២៣ ចំនួន ៩,០៦៤ នាក់៕

ខេត្តបាត់ដំបងទាក់ទាញភ្ញៀវទេសចរបានជាង៩ម៉ឺននាក់ក្នុងព្រឹត្តិការណ៍ពិព័រណ៍ម្ហូបអាហារខ្មែររយៈពេល២ថ្ងៃ

2024/12/31 10:29:02 am        196
Facebook Telegram Linkin
លោក ហម អរុណ អនុប្រធានមន្ទីរ និងជាអ្នកនាំពាក្យនៃមន្ទីរទេសចរណ៍ខេត្តបាត់ដំបង ថ្លែង​ឱ្យ​ដឹង​ថា រយៈពេល២ថ្ងៃចាប់ពីថ្ងៃទី២៩-៣០ ខែធ្នូ ឆ្នាំ២០២៤ នៃព្រឹត្តិការណ៍ពិព័រណ៍ម្ហូបអាហារ និង​បង្អែមខ្មែរ ខេត្តបាត់ដំបងទទួលបានភ្ញៀវទេសចរជាតិ និងអន្តរជាតិជាង៩ម៉ឺននាក់។លោក ហម អរុណ គូសបញ្ជាក់ថា ស្ថិតិភ្ញៀវ​ទេសចរ​ដែល​បាន​មក​កម្សាន្ត​នៅ​ខេត្ត​បាត់ដំបង​ក្នុង​ពិធី​អបអរ​សាទរបុណ្យចូលឆ្នាំថ្មី ឆ្នាំសកលឆ្នាំ២០២៤-២០២៥ នាថ្ងៃទី២៩ ខែធ្នូ ឆ្នាំ​២០២៤​មាន​ចំនួន ៣៩,២៩៥នាក់ កើនឡើង ៣,៧៧ % បើធៀបឆ្នាំ២០២៣។ ចំណែកនៅថ្ងៃទី៣០ ខែធ្នូ ឆ្នាំ២០២៤ទទួលបានភ្ញៀវជាតិសរុបចំនួន៥៤,១១៤ នាក់ មានការកើនឡើង ៤,១៤ % បើធៀបឆ្នាំ២០២៣។លោក ហម អរុណ អំពាវនាវដល់បងប្អូនប្រជាពលរដ្ឋ ភ្ញៀវទេសចរជាតិ និងអន្តរជាតិ​មក​ទស្សនា​កម្សាន្ត​សប្បាយ​នៅ​ខេត្តបាត់ដំប​ង​ឱ្យ​បាន​ច្រើនកុះករ​ក្នុង​ព្រឹត្តិការណ៍​ពិព័រណ៍​ម្ហូប​អាហារ​នា​ថ្ងៃ​ចុង​ក្រោយ និងកម្មវិធីសប្បាយផ្សេងៗទៀតក្នុងឱកាសពិធីបុណ្យឆ្លងឆ្នាំសកលនារាត្រីថ្ងៃទី៣១ ខែធ្នូ ឆ្នាំ២០២៤នេះ។សូមរំលឹកថា ក្រោមគំនិតផ្ដួចផ្ដើមរបស់ឯកឧត្តម សុខ លូ អភិបាល​នៃគ​ណៈអ​ភិបាល​ខេត្ត​បាត់ដំបង រដ្ឋបាលខេត្តបាត់ដំបង បាននិងកំពុងរៀបចំព្រឹត្តិការណ៍ពិព័រណ៍ម្ហូបអាហារ និង​បង្អែម​ខ្មែរ​រយៈពេល៣ថ្ងៃនៅបរិវេណមុខអគារសាលាខេត្ត ដើម្បីអបអរពិធីបុណ្យឆ្លងឆ្នាំសកល២០២៤-២០២៥ និងលើកកម្ពស់ការផ្សព្វផ្សាយផលិតផលខ្មែរ ក៏ដូចជា​បង្ក​បរិយាកាស​សប្បាយ​រីក​រាយ​ជូន​ដល់​ប្រជាពលរដ្ឋ ភ្ញៀវទេសចរជាតិ និងអន្តរជាតិ។អ្វីដែលកាន់តែពិសេសនៅរាត្រីថ្ងៃទី៣១ ខែធ្នូ ឆ្នាំ២០២៤ នឹងមានរប្រគុំតន្ត្រីខ្នាតធំ ការអុជកាំជ្រួច និងរាប់ថយក្រោយ​ឆ្លង​ឆ្នាំ​ដើម្បី​អបអរ​សាទរ​ការឈានចូលឆ្នាំថ្មីឆ្នាំសាកល៕

នាវាទេសចរណ៍បរទេសមួយគ្រឿង ផ្ទុកមនុស្សជិត ១.០០០នាក់ ចូលសំចតធ្វើ​ទស្សនកិច្ច​នៅកម្ពុជា

2024/12/31 09:46:11 am        281
Facebook Telegram Linkin
ព្រះសីហនុ៖ នាយនគរបាលអន្ដោប្រវេសន៍ច្រកទ្វារកំពង់ផែអន្ដរជាតិក្រុងព្រះសីហនុ ប្រាប់​ឲ្យ​ដឹង​ថា នាវាទេសចរណ៍បរទេស មួយគ្រឿង ផ្ទុកអ្នកដំណើរចម្រុះជាតិសាសន៍ជិត ១.០០០នាក់ បាន​ចូល​ចត​ដល់កំពង់ផែស្វយ័តអន្តរជាតិក្រុងព្រះសីហនុ ថ្ងៃទី៣១ ខែធ្នូ ឆ្នាំ២០២៤ ។ លោក បន្តថា នាវា នេះ ឈ្មោះ SEA BOURN ENCORE សញ្ជាតិ BAHAMAS ផ្ទុកអ្នក​ដំណើរ​ជម្រុះ​ជាតិ​សាសន៍សរុប ៨៧២នាក់ ក្នុងនោះ មាននាវិក ៤០២នាក់ ជាតិសាសន៍​ដែល​ច្រើ​នជា​ង​គេ គឺជនជាតិអាមេរិកកាំង អង់គ្លេស និងអូស្ត្រាលី ។ ក្នុងដំណើរទេសចរណ៍អន្តរជាតិ មក​ពី​ប្រទេស​វៀតណាម ចូលសំចតធ្វើទស្សនកិច្ចនៅខេត្តព្រះសីហនុ (កម្ពុជា) រួច​នឹង​បន្ត​ដំណើរ​ទៅប្រ​ទេសថៃ នៅយប់ថ្ងៃទី៣១ ខែធ្នូ នេះ ដដែល។ នាវា នេះ មានបណ្តោយប្រវែងជាង ២០០​ម៉ែត្រ ទទឹងជិត ៣០ម៉ែត្រ ជំរៅទឹក ៦ម៉ែត្រ។ លោក បន្ថែមថា ការចូលចតនាវាទេសចណ៍ បានផ្ដល់ឱកាសឱ្យភ្ញៀវទេសចរចម្រុះជាតិសាសន៍ បាន​ទស្សនាពីវឌ្ឍនភាពខេត្ដព្រះសីហនុ និងបានស្វែង​យល់​ពី​វប្បធម៌​រស់​នៅរ​បស់​ប្រជា​ពលរដ្ឋ​ខ្មែរ ​ជាមួយនិងធនធានធម្មជាតិដ៏សម្បូរបែបរបស់ខេត្ដព្រះសីហនុ ព្រមទងបាន​ផ្ដល់​អត្ថ​ប្រយោជន៍​មួយ​ចំនួនដល់ប្រជាពលរដ្ឋខេត្ដព្រះសីហនុ ដែលជាអ្នកលក់ផលិតទេសចរណ៍ ពិសេស​អ្នករត់តាក់ស៊ី ឬម៉ូតូកង់បី និងម៉ូតូឌុប ។ល។ 

រកឃើញជ័យលាភីលេខ១ការប្រកួតខ្លែងឯក និងខ្លែងសេរី ក្រោយការប្រកួតរយៈពេល៣ថ្ងៃ នៅសៀមរាប

2024/12/30 04:31:04 pm        190
Facebook Telegram Linkin
សៀមរាប៖ បន្ទាប់ពីឆ្លងកាត់ការប្រកួតរយៈពេល៣ថ្ងៃរួចមក នៅរសៀលថ្ងៃទី២៩ ខែធ្នូ ឆ្នាំ២០២៤​ម្សិលមិញនេះ ​គណៈកម្មការមេប្រយោគ និងគណៈកម្មការគ្រប់គ្រង និងបច្ចេកទេស នៃការប្រកួតខ្លែងខ្មែរ របស់ក្រសួងវប្បធម៌ និងវិចិត្រសិល្បៈ បានរកឃើញម្ចាស់ជ័យលាភី នៃការប្រកួតខ្លែងឯកខ្មែរ និងខ្លែងសេរីរវាងផ្នែកឯកជននិងរដ្ឋ។សម្រាប់ជ័យលាភីខ្លែងឯកមន្ទីរ អង្គភាព រដ្ឋបាលក្រុង ស្រុក ជ័យលាភីលេខ១ បានទៅ​លើ​ខ្លែង​ជ័យ​​ឯកកណ្តាលវេហាស៍របស់មន្ទីរវប្បធម៌ និងវិចិត្រសិល្បៈខេត្តកណ្តាល ជ័យលាភីលេខ២ ខ្លែង​ឈ្មោះ​ស​ម្រស់បន្ទាយស្រីរបស់រដ្ឋបាលស្រុកបន្ទាយស្រី និងជ័យលាភីលេខ៣ ខ្លែង​ឈ្មោះ​ពោធិសាត់​មានជ័យបារមីសួគ៌ាលោក របស់មន្ទីរវប្បធម៌ខេត្តពោធិសាត់។ សម្រាប់ជ័យលាភីខ្លែងឯកខ្មែរ ផ្នែកឯកជន ជ័យលាភីលេខ១បានទៅលើខ្លែង ផែនសិល្បៈ និង​កីឡា ពីក្រុមការងារយុវជនផែនសិល្បៈ និងកីឡានៃយុវជនគណបក្សខេត្តសៀមរាប លេខ២ខ្លែង ផ្ការីកគ្រប់រដូវ ក្រុមបាល់ទាត់ផ្ការីកគ្រប់រដូវ ខេត្តស្វាយរៀង និងលេខ៣ បានទៅលើខ្លែង ធនញ្ជ័យ ខេត្តសៀមរាប។ ដោយឡែកខ្លែងសេរីមកពីរដ្ឋបាលក្រុង ស្រុក ជ័យលាភីលេខ១ បានទៅខ្លែងឈ្មោះ ស្តេចរាត្រី មកពីមន្ទីរវប្បធម៌ និងវិចិត្រសិល្បៈខេត្តសៀមរាប ជ័យលាភីលេខ២ បានទៅខ្លែង​ឈ្មោះ​ក្រុឌមាសធិបតីសែនជ័យ មកពីកងរាជអាវុធហត្ថខេត្តសៀមរាប និងជ័យលាភីលេខ៣ បានទៅខ្លែងឈ្មោះ ស្នងការនគរបាលខេត្តសៀមរាប របស់ស្នងការដ្ឋាននគរបាលខេត្តសៀមរាប។ ជ័យលាភីខ្លែងសេរីផ្នែកឯកជន លេខ១បានទៅលើខ្លែង នាគរាជក្បាល៥ មកពីស្រុកកៀនស្វាយ ខេត្តកណ្ដាល លេខ២ខ្លែងសំពៅហង្សខេត្តកណ្ដាល និងលេខ៣ខ្លែង ឈ្មោះប្រយុទ្ធអន្តរជាតិ មកពីខេត្តសៀមរាប។ លោក លី សារី អភិបាលរងខេត្ត តំណាងឯកឧត្តម ប្រាក់ សោភ័ណ អភិបាល​នៃ​គណៈអភិបាល​ខេត្ត​សៀមរាប បានថ្លែងអំណរគុណ និងការកោតសរសើរ​គ្រប់​ភាគី​ចូល​រួម​ទាំង​អស់​ដែល​បាន​លះបង់​ពេលវេលាកម្លាំងកាយចិត្ត និងធនធានចូលរួមប្រកួតប្រកបដោយភាពសប្បាយរីករាយ ក្នុង​ការរៀបចំពិធីព្រឹត្តិការណ៍បុណ្យខ្លែងឯកខ្មែរ និងខ្លែងសេរីលើកទី១ឆ្នាំ២០២៤ ខេត្តសៀមរាប ទាំងនេះគឺជាប្រភពនៃការលើកទឹកចិត្តដ៏ធំធេង ក៏ដូច​ជាការ​ជួយ​សម្រាល​បន្ទុក​ដល់​គណៈកម្មការ​រៀបចំ​ព្រឹត្តិការណ៍បុណ្យខ្លែង ក៏ដូចជាប្រតិភូខ្លែងបានមួយកម្រិតថែមទៀត។ លោកអភិបាលរងខេត្តបានបន្តថា ការរៀបចំព្រឹត្តិការណ៍បុណ្យបង្ហើរខ្លែងឯកខ្មែរនាពេលនេះ គឺ​ផ្អែក​តាម​អនុសាសន៍ ណែនាំដ៏ខ្ពង់ខ្ពស់របស់ឯកឧត្តម នាយឧត្តមសេនីយ៍ ទៀ សីហា ឧប​នាយករដ្ឋ​មន្រ្តី រដ្ឋមន្រ្តីក្រសួងការពារជាតិ និង​ជា​ប្រធាន​ក្រុម​ការងារ​រាជ​រដ្ឋាភិបាល​ចុះ​មូល​ដ្ឋាន​ខេត្ត​សៀមរាប ក្នុងឱកាសដែលឯ​កឧត្តម​អញ្ជើ​ញ​ជាអ​ធិបតី​ក្នុងពិ​ធី​បើក​ព្រឹត្តិការណ៍​សៀមរា​ប​សង្ក្រាន្ត​ឆ្នាំ​២០២៤ កន្លងទៅ និងស្របតាមយុទ្ធនាការ “ទស្សនាខេត្តសៀមរាប ឆ្នាំ២០២៤” ដែ​ល​បាន​ដាក់ចេញដោយប្រមុខរាជរដ្ឋាភិបាលកម្ពុជា នីតិកាល ទី៧ នៃរដ្ឋសភា ដែលមាន​សម្តេច​មហាបវរធិបតី ហ៊ុន ម៉ាណែត នាយករដ្ឋមន្រ្តី ជាប្រមុខដឹកនាំមួយ រូបពោពេញ​ទៅ​ភាព​ប៉ិន​ប្រសប់ និងមានចក្ខុវិស័យវែងឆ្ងាយ។ លោក លី សារី ពិតណាស់ ការរៀបចំពិធីបុណ្យបង្ហើរខ្លែងឯកខ្មែរ និងខ្លែងឯកសេរី លើកទី១ ខេត្តសៀមរាប ឆ្នាំ២០២៤នេះ គឺជាព្រឹត្តិការណ៍វប្បធម៌ជាតិ ដែលមានលក្ខណៈជាប្រវត្តិសាស្រ្ត និងមានចរិកជាបេតិកភណ្ឌរបស់ជាតិមានតំលៃសម្រាប់ទ្រទ្រង់ព្រលឹង និងអត្តសញ្ញាណរបស់ជាតិ តាមរយៈការលើកកម្ពស់តំលៃវប្បធម៌សង្គមកម្ពុជា។ ឧត្តមភាព នៃវប្បធម៌ និងការផ្សព្វផ្សាយព្រឹត្តការណ៍នេះ នឹងបង្កើននូវភាពទាក់ទាញថ្មីថែមទៀតដល់ភ្ញៀវទេសជាតិ អន្តរជាតិចូលមកទស្សនាខេត្តសៀមរាប និងសិក្សាឈ្វេងយល់អំពីកម្ពុជាកាន់តែច្រើនទៀត ក្នុងឆ្នាំបន្តបន្ទាប់ខាងមុខ ។តាមការបញ្ជាក់របស់លោក មួន សុភាព ប្រធានមន្ទីរវប្បធម៌ និង វិចិត្រសិល្បះខេត្តសៀមរាប ក្នុងរយៈពេល៣ថ្ងៃ នៃព្រឹត្តិការណ៍បុណ្យបង្ហើរខ្លែងឯកខ្មែរ និង ខ្លែងសេរី មានភ្ញៀវជាតិ អន្តរជាតិ ចូលទស្សនា មានចំនួនប្រមាណជា២ម៉ឺននាក់ ៕

កម្ពុជា-ចិន ចាប់ផ្ដើមបើកជើងហោះហើរឡើងវិញពីទីក្រុងស៊ីអានមកកាន់ទីក្រុងភ្នំពេញ​

2024/12/30 11:47:43 am        146
Facebook Telegram Linkin
ភ្នំពេញ៖ កម្ពុជា-ចិន បានចាប់ផ្ដើមបើកជើងហោះហើរឡើងវិញ ពីទីក្រុងស៊ីអាន (Xi’an) មកកាន់ទីក្រុងភ្នំពេញ ដោយក្រុមហ៊ុនអាកាសចរណ៍ Spring Airlines នៅថ្ងៃទី២៩ ខែធ្នូ ឆ្នាំ២០២៤នេះ នៅអាកាសយានដ្ឋានអន្ដរជាតិភ្នំពេញ ដោយមានភ្ញៀវទេសចរជិះតាមជើងហោះហើរចំនួន ១២២នាក់។ ក្នុងពិធីទទួលស្វាគមន៍ ជើងហោះហើរត្រង់ទី១ នេះ ដោយមានការចូលរួម ពីឯកឧត្តម ហួត ហាក់ រដ្ឋមន្រ្តីក្រសួងទេសចរណ៍, ឯកឧត្ដមបណ្ឌិត ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល និងឯកឧត្ដម Wang Wenbin ឯកអគ្គរដ្ឋទូតចិនប្រចាំកម្ពុជា។ទំនាក់ទំនង កម្ពុជា-ចិន ជាពិសេសភ្ញៀវទេសចរចិន មានការកើនឡើង ដោយសារអ្នកធ្វើដំណើរ, ជើងហោះហើរ និងក្រុមហ៊ុនអាកាសចរណ៍ចិន បានពង្រីកជើងហោះហើរ ។ អ្នកធ្វើដំណើរ តាមជើងហោះហើរ គឹតត្រឹមឆ្នាំ២០២៤ មានប្រមាណ៥.៦លាននាក់ ហើយរំពឹងថា នៅឆ្នាំ២០២៥ ចំនួនអ្នកធ្វើដំណើរ តាមជើងហោះហើរ មានការកើនឡើង លើស៧លាននាក់ នៅក្នុងមួយឆ្នាំ៕ 

បណ្ដាញសង្គម

ព័ត៌មានថ្មីៗ

កម្ពុជាស្នើឱ្យអាស៊ានត្រួតពិនិត្យលើការចោទប្រកាន់ច្រំដែលរបស់ថៃថាកម្ពុជាបំពាទបទឈប់បាញ់
08/02/2025 08:08 PM
Facebook Telegram Linkin
ក្រសួងការងារ បើកយុទ្ធនា​ការជា​ទ្រង់ទ្រា​យធំ​ជំហានទី២ ដើម្បីនាំឱកា​សការងា​រជូនពលក​រខ្មែរដែ​លទើប​ត្រឡប់​ពីថៃ
08/02/2025 07:08 PM
Facebook Telegram Linkin
ឯកឧត្តម ទេសរដ្ឋមន្ត្រី គន់ គីម នាំយកថវិការបស់សម្តេចធិបតី ហ៊ុន ម៉ាណែត ប្រគល់​ជូន​វីរភាព​កងទ័ព​ពលី ចំនួន៤រូប នៅខេត្តឧត្តរមានជ័យ
08/02/2025 07:08 PM
Facebook Telegram Linkin
គណៈប្រតិភូជាន់ខ្ពស់សភាកម្ពុជា អញ្ជើញនិវត្តន៍មកដល់មាតុ​ប្រទេស​វិញ​ដោយ​សុវត្ថិភាព និង​ជោគជ័យ ក្រោយបញ្ចប់បេសកកម្មការទូតសភា នៅទីក្រុងហ្សឺណែវ ប្រទេសស្វីស
08/02/2025 06:08 PM
Facebook Telegram Linkin
សេចក្ដីរាយការណ៍៖ ឥណ្ឌានឹងបន្តទិញប្រេងពីរុស្ស៊ី ទោះមានការគំរាមកំហែងពីលោក Trump
08/02/2025 05:08 PM
Facebook Telegram Linkin
អាមេនី និងសហរដ្ឋអាមេរិក នឹងធ្វើសមយុទ្ធយោធារួមគ្នា ពីថ្ងៃទី ១២ ដល់ទី២០ ខែសីហា
08/02/2025 05:08 PM
Facebook Telegram Linkin
មនុស្សយ៉ាងតិច ៦នាក់ស្លាប់ ខណៈព្យុះត្រូពិក Wipha បង្កឲ្យមានទឹកជំនន់ នៅថៃ
08/02/2025 05:08 PM
Facebook Telegram Linkin
ចិនចោទអាមេរិកថា បានឆ្លៀតយកចន្លោះប្រហោងរបស់ Microsoft ដើម្បីវាយប្រហារតាមប្រព័ន្ធអ៊ីនធឺណិត
08/02/2025 05:08 PM
Facebook Telegram Linkin
នាយឧត្តមសេនីយ៍ វង្ស ពិសេន អញ្ជើញចុះសួរសុខទុក្ខយុទ្ធជនរបួស កំពុង​សម្រាក​ព្យាបាល​នៅ​មន្ទីរ​ពេទ្យព្រះកេតុមាលា
08/02/2025 04:08 PM
Facebook Telegram Linkin
ឯកឧត្តម ហ៊ុន ម៉ានី​ បញ្ជាក់ពីនិតិវិធីនៃការតាក់តែងវិញ្ញាសា និងផ្តាំផ្ញើដល់បេក្ខជនឱ្យ​ផ្តោតអារម្មណ៍ យកចិត្តទុកដាក់ និងខិតខំប្រឹងប្រែងមកលើការប្រឡងប្រជែង ដោយបញ្ចេញ​ឱ្យអស់ពីសមត្ថភាព
08/02/2025 04:08 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.