នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
សម្ដេចតេជោ ហ៊ុន សែន អញ្ជើញចូលក្រាបថ្វាយបង្គុំគាល់ព្រះករុណាព្រះមហាក្សត្រ និងសម្តេចព្រះមហាក្សត្រី
សម្តេចតេជោអញ្ជើញជួបពិភាក្សាការងារជាមួយប្រធានគណៈកម្មាធិការអចិន្ត្រៃយ៍នៃសភាតំណាងប្រជាជនចិន
សម្តេចតេជោ ហ៊ុន សែន នឹងបំពេញទស្សនកិច្ចមិត្តភាពផ្លូវការនៅប្រទេសចិនរយៈពេលបីថ្ងៃចាប់ពីថ្ងៃទី២៥ដល់២៧ ខែមិថុនាខាងមុខនេះ
កម្ពុជា-អ៊ីស្រាអែល ឯកភាពបន្តជំរុញទំនាក់ទំនង និងកិច្ចសហប្រតិបត្តិការទ្វេភាគីឱ្យកាន់តែរីកចម្រើន

នយោបាយ​ និង ការអភិវឌ្ឍន៍

អង្គភាពព័ត៌មាន និងប្រតិកម្មរហ័ស៖ «ជោគជ័យលើសមរភូមិវ៉ាក់សាំងជាសរសគ្រឹះសម្រាប់ការបើកប្រទេសឡើងវិញ»

2021/11/05 01:45:02 pm        78
Facebook Telegram Linkin
នៅថ្ងៃទី៥ ខែវិច្ឆិកា ឆ្នាំ២០២១នេះ អង្គភាពព័ត៌មាន និងប្រតិកម្មរហ័ស នៃទីស្តីការគណៈរដ្ឋមន្ត្រី បានបញ្ចេញផ្សាយវីដេអូថ្មីមួយទៀត ក្រោមចំណងជើងថា «ជោគជ័យលើសមរភូមិវ៉ាក់សាំងជាសរសគ្រឹះសម្រាប់ការបើកប្រទេសឡើងវិញ» ។វីដេអូនេះ បានរំលេចឱ្យឃើញនូវជោគជ័យដ៏ធំធេងនៃនយោបាយវ៉ាក់សាំង ក្រោមការដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រីនៃរាជរដ្ឋាភិបាលកម្ពុជា បន្ទាប់ពីសម្តេតេជោ បានប្រកាសបើកប្រទេសជាតិរបស់ខ្លួនឡើងវិញលើគ្រប់វិស័យ និងគ្រប់ផ្នែកជាបណ្តើរៗ ចាប់តាំងពីថ្ងៃទី១ ខែវិច្ឆិកា ឆ្នាំ២០២១ តទៅ បន្ទាប់ពីអាចគ្រប់គ្រងបានយ៉ាងល្អប្រសើរនូវជំងឺរាតត្បាត កូវីដ-១៩ ក្នុងរយៈពេលជិត២ឆ្នាំកន្លងមកនេះ ដោយឆ្លងកាត់នូវការលំបាក និងឧបសគ្គគ្រប់បែបយ៉ាងដែលកើតមាននៅក្នុងដំណាក់កាលទាំង៤ នៃការរាតត្បាតនៃជម្ងឺដ៍កាចសាហាវឥតស្រមោលនេះទាំងប្រភេទចាស់និងប្រភេទថ្មី។ កត្ដាដ៍សំខាន់បំផុតរបស់កម្ពុជាក្នុងការគ្រប់គ្រងជំងឺនេះបានល្អប្រសើរនោះ គឺជោគជ័យលើសមរភូមិវ៉ាក់សាំងដែលរហូតមកត្រឹមដំណាច់ខែតុលា ឆ្នាំ២០២១នេះ គឺមានប្រជាជន ៨៥.៦៨%នៃចំនួនប្រជាជន១៦នាក់បានទទួលការចាក់វ៉ាក់សាំងរួចរាល់ហើយ ដែលបង្កើតបាននូវភាពសាំក្នុងសហគមន៍យ៉ាងរឹងមាំនៅទូទាំងប្រទេស។ កម្ពុជាជាប្រទេសមួយក្នុងចំណោមប្រទេសដែលបានចាក់វ៉ាក់សាំងបង្ការវីរុសCovid-19 ដល់ប្រជាជនរបស់ខ្លួនបានច្រើនជាងគេបំផុតនៅក្នុងពិភពលោកដោយសារជំនួយពីបណ្តាប្រទេសជាមិត្តនិងដៃគូអភិវឌ្ឍ ជាពិសេសគឺប្រទេសចិន។ ប្រទេសកម្ពុជាបានធ្វើឲ្យមានការប្រែប្រួលដោយនឹកស្មានមិនដល់ ដោយសារតែព្រះរាជាណាចក្រកម្ពុជាមានអត្រាចាក់វ៉ាក់សាំងច្រើនជាងបណ្ដាប្រទេសអ្នកមានមួយចំនួនទៅទៀត រាប់ទាំងសហរដ្ឋអាមេរិកនិងចក្រភពអង់គ្លេសផង»។ដោយសារតែចំណុចពិសេសនេះហើយ ដែលធ្វើឲ្យសកម្មភាពសង្គមនិងសេដ្ឋកិច្ចកម្ពុជាអាចចាប់ផ្តើមដំណើរការឡើងវិញបានក្នុងទម្រង់នៃជីវភាពប្រក្រតីបែបថ្មីក្នុងបរិការនៃជំងឺកូវីដ- ១៩។ កម្ពុជា ត្រូវបានគេកោតសរសើរអំពីការឆ្លើយតបយ៉ាងលឿនរហ័សចំទិសដៅ និងប្រកបដោយប្រសិទ្ធភាពខ្ពស់ក្នុងការប្រយុទ្ធប្រឆាំងជាមួយសត្រូវឥតស្រមោលប្រចាំសតវត្សរ៍ទី២១ នេះ។ ម៉្យាងវិញទៀត វ៉ាក់សាំងពិតជាមានប្រសិទ្ធិភាពអាចបញ្ចៀសអ្នកឆ្លងពីការធ្លាក់ខ្លួនឈឺធ្ងន់ធ្ងរ និងស្លាប់បាត់បង់ជីវិត។ ជាក់ស្តែងយោងតាមរបាយការណ៍ប្រចាំថ្ងៃរបស់ក្រសួងសុខាភិបាលស្តីពីស្ថានភាពជំងឺកូវីដ-១៩ នៅកម្ពុជាបានបង្ហាញថា តួលេខអ្នកជំងឺកូវីដ-១៩ ដែលស្លាប់ភាគច្រើនគឺអ្នកដែលមិនបានចាក់វ៉ាក់សាំង។កិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ពិតជាបាននិងកំពុងជួយកម្ពុជាក្នុងកាម៉្យាងវិញទៀត វ៉ាក់សាំងពិតជាមានប្រសិទ្ធិភាពអាចបញ្ចៀសអ្នកឆ្លងពីការធ្លាក់ខ្លួនឈឺធ្ងន់ធ្ងរ និងស្លារបើកដំណើការសង្គម និងសេដ្ឋកិច្ចឡើងវិញ ជាពិសេសការឈានទៅបើកប្រទេសឡើងវិញលើគ្រប់វិស័យបានឆាប់រហ័សជាង និងសុវត្ថិភាពប្រកបដោយភាពរឹងមាំ និងការជឿជាក់ ជាងបណ្តាប្រទេសផ្សេងៗជាច្រើន ពោលគឺកម្ពុជាបាននិងកំពុងចាកចេញពីជម្ងឺរាតត្បាតដោយភាពជឿជាក់ និងរឹងមាំ។ ប្រជាពលរដ្ឋខ្មែរ ពិតជាមានមោទនភាពយ៉ាងខ្លាំងដែលបានឃើញប្រទេសរបស់ខ្លួនឈរនៅលើកំពូលតារាងក្នុងចំណោម ប្រទេសដែលទទួលបានជោគជ័យក្នុងការការពារអាយុជីវិតពលរដ្ឋរបស់ខ្លួនចេញពីជំងឺឆ្លងសាកលដ៏កាចសាហាវប្រចាំសតវត្សរ៍។ នេះជាកិត្តិយស ដ៏ធំធេងសម្រាប់ជាតិសាសន៍ខ្មែរទាំងមូល។ ការបើកប្រទេសឡើងវិញនេះ គឺជាក្តីសង្ឃឹមយ៉ាងមុតមាំថា សង្គមនិងសេដ្ឋកិច្ចកម្ពុជា ក៏ដូចជាជីវភាពរបស់ប្រជាពលរដ្ឋខ្មែរទូទៅនឹងស្ទុះងើបឡើងវិញយ៉ាងឆាប់រហ័ស ក្រោមម្លប់នៃសុខសន្តិភាព៕សូមទស្សនាវីដេអូ៖

គម្រោងរោងចក្រកាន់តែប្រសើរនៅកម្ពុជា រួមចំណែកជំរុញការនាំចេញ​ក្នុង​ឧស្សាហកម្មកាត់​ដេរ​របស់កម្ពុជា

2021/11/05 01:03:37 pm        438
Facebook Telegram Linkin
ភ្នំពេញ ៖ រដ្ឋមន្រ្តីក្រសួងការងារ ថ្លែងថា គម្រោងរោងចក្រកាន់ តែប្រសើរនៅកម្ពុជា (BFC) បានចូលរួមចំណែកយ៉ាងសំខាន់ ក្នុងការជំរុញការនាំចេញក្នុងឧស្សាហកម្មកាត់ដេររបស់កម្ពុជា ដែលជាផ្នែកមួយក្នុងការជំរុញកំណើនសេដ្ឋកិច្ចកម្ពុជា។នៅក្នុងពិធីគម្រប់ខួប២០ឆ្នាំ នៃការបង្កើតគម្រោងរោងចក្រកាន់តែប្រសើរនៅកម្ពុជា កាលពីរសៀល​ថ្ងៃទី​៤ វិច្ឆិកា ឆ្នាំ២០២១កន្លងទៅ តាមប្រព័ន្ធ វីដេអូ ដែលមានការអញ្ជើញចូលរួមពីឯកឧត្តម W Patrick Murphy ឯកអគ្គរដ្ឋទូត​សហរដ្ឋអាមេរិកប្រចាំនៅកម្ពុជា, លោក Graeme Buckley នាយកការិយាល័យអង្គការអន្តរជាតិ ខាង​ការងារប្រចាំនៅកម្ពុជា ថៃនិងឡាវ, និងតំណាង​សមាគម​និយោជក​ តំណាងសហជីព និងអ្នក​បញ្ជា​ទិញ​អន្តរជាតិ​ ឯកឧត្តមបណ្ឌិត អ៊ិត សំហេង រដ្ឋមន្រ្តី​ក្រសួងការងារ និងបណ្តុះបណ្តាលវិជ្ជាជីវៈ មានប្រសាសន៍ថា កម្ពុជាគឺជាប្រទេសទី១ ដែលមានភាព​ក្លាហាន​ក្នុងការ​ អនុវត្តពាណិជ្ជកម្មអន្តរជាតិដោយផ្សារភ្ជាប់ជាមួយ​នឹង​ការធានាលក្ខខណ្ឌការងារ​ស្រប​តាម​ច្បាប់​ ស្តីពី​ការងារ និងបទដ្ឋានការងារស្នូលជាអន្តរជាតិ។ដោយសារតែគម្រោងនេះ មានបេសកកម្ម និងកម្មវិធីការងារគាំទ្រនូវគោលនយោបាយ និង​ការប្តេជ្ញា​ចិត្តរបស់ ​រាជរដ្ឋាភិបាលក្នុងការសំដៅធានាការលើកកម្ពស់លក្ខខណ្ឌការងារ ​សិទ្ធិការងារ និង​សេរីភាព​អង្គការវិជ្ជាជីវៈ ទើប​បាន​ជា​គម្រោងនេះ​ទទួល​បាន​ការគាំទ្រយ៉ាងពេញទំហឹង ពី​រាជរដ្ឋាភិបាលកម្ពុជា​ តាមរយៈក្រសួងការងារ​ និង​បណ្តុះ​បណ្តាលវិជ្ជាជីវៈ​ និងក្រសួងពាណិជ្ជកម្ម ហើយអាចដំណើរការបានយ៉ាងរលូនក្នុងរយៈពេល ២០ឆ្នាំនេះ។ ឯកឧត្តម បានទទួលស្គាល់ថា កម្មករនិយោជិត ​និងនិយោជកនៃរោងចក្រកាត់ដេរ ដែលធ្វើការនាំ​ចេញ​ផលិតផល ទៅក្រៅប្រទេស​បាន​ទទួលនូវអត្ថប្រយោជន៍ជាច្រើនអំពីការអនុវត្តគម្រោងនេះ ដោយ​អាចរក្សា​បាននូវការងារ ដែលមាន​លក្ខខណ្ឌល្អប្រសើរ​និង​ទទួល​ប្រាក់​ចំណេញ​អាជីវកម្ម​តាមរយៈការទទួល​បាន​ការបញ្ជាទិញ​ពី​អ្នកបញ្ជាទិញអន្តរជាតិ ដែលមានកំណើន​ជាប្រចាំជាមួយ​នឹង​អនុលោមភាពតាមច្បាប់មានកម្រិតខ្ពស់។ឯកឧត្តម បានណែនាំឲ្យគ្រប់ភាគី ពាក់ព័ន្ធទាំងអស់ អនុវត្តគម្រោងរោងចក្រកាន់​តែប្រសើរ​នៅ​កម្ពុជា (BFC) និង​កសាងវប្បធម៌​អនុលោមភាព ​ការងារនៅកម្ពុជា សំដៅជំរុញកំណើន​ក្នុង​វិស័យវាយនភណ្ឌ ​សំលៀកបំពាក់ និង​ផលិត​ផលិតផលធ្វើដំណើរ ​និងកាបូប៕អត្ថបទ ៖ ឈិត បូរ៉ាវី

អាជីវកម្មដ្ឋានបៀរហ្កាឌិននៅរាជធានីភ្នំពេញ និងក្រុងតាខ្មៅ មួយចំនួនចាប់ផ្តើមរៀបចំបើកដំណើរការឡើងវិញ

2021/11/05 12:53:47 pm        158
Facebook Telegram Linkin
ភ្នំពេញ ៖ បន្ទាប់ពីក្រសួងទេសចរណ៍ប្រកាសបើកអាជីវកម្មបៀរហ្កាឌិនឡើងវិញ នៅទូទាំងប្រទេស ក្រោយស្ថានការកូវីដ១៩ មានការធូរស្រាល មកដល់ពេលនេះ មានបណ្តាអាជីវកម្មដ្ឋានបៀរហ្កាឌិនមួយចំនួន បានចាប់ផ្តើមរៀបចំទីតាំងអាជីវកម្ម និងរៀបចំសំណុំលិខិតដាក់ស្នើទៅអាជ្ញាធរមូលដ្ឋាន ដើម្បីស្នើសុំបើកអាជីវកម្មបៀរហ្កាឌិនជាបន្តបន្ទាប់។បើតាមប្រធានមន្ទីរទេសចរណ៍រាជធានីភ្នំពេញ និងប្រធានមន្ទីរទេសចរណ៍ខេត្តកណ្តាល បាន​ថ្លែង​ប្រាប់BTV ដូចៗ​គ្នា​នៅថ្ងៃទី៥ ខែវិច្ឆិកានេះថា ជាទូទៅគ្រប់អាជីវកម្មដ្ឋាន​ទេសចរណ៍​​ទាំងអស់ ជាពិសេស​អាជីវកម្មបៀរហ្កាឌិន​ដែល​រាជរដ្ឋាភិបាលទើបប្រកាសអោយបើកដំណើរការឡើងវិញនេះ គឺត្រូវរៀបចំការបើកដោយត្រូវអនុវត្តតាមវិធាន​ស្តង់ដារ​អប្បរមា​ ឬស្តង់ដារ SOP ពោល​គឺ​គ្រប់អាជីវកម្មបៀរហ្កាឌិននានា ​មុននឹងបើកទទួលភ្ញៀវ​ បើទោះអាជីវកម្មនោះ​មាន​ច្បាប់ ឬ​មិន​ច្បាប់​អនុញ្ញាតក៏ដោយ ​គឺត្រូវដាក់ការស្នើសុំទៅរដ្ឋបាលរាជធានីខេត្ត​ ដើម្បីអោយមន្ត្រីជំនាញ​ចុះទៅ​វាយ​តំលៃត្រួតពិនិត្យ។ សម្រាប់អាជីវកម្មដែលបានរៀបចំអនុវត្តតាមស្តង់ដារ SOP ត្រឹមត្រូវគឺត្រូវ​បាន​អនុញ្ញាត​ឲ្យ​បើក។លោក សំ សារិទ្ធ ចៅសង្កាត់ផ្សារកណ្តាលទី១ ខណ្ឌដូនពេញ​ រាជធានីភ្នំពេញ ​បានថ្លែងថា អនុវត្ត​ការ​ណែនាំ​រដ្ឋបាល​រាជធានីភ្នំពេញ ​នៅពេលបច្ចុប្បន្ននេះ ​សង្កាត់បានបែងចែកវេនចុះត្រួតពិនិត្យ អនុវត្តច្បាប់ ​និងវិធានការអនាម័យ​ទប់​ស្កាត់ការរាតត្បាតកូវីដ១៩នៅតាមបៀរហា្កឌិន និង ភោជនីយដ្ឋាន ​អាហារដ្ឋាន​នានា​ទៀត​ទាំងនៅ​ពេលថ្ងៃ និង​យប់​ជាប់​ប្រចាំ ហើយការចុះត្រួតពិនិត្យ​នោះក៏មានអាជីវកម្មទេសចរណ៍មួយចំនួន ត្រូវ​រងការបិទបណ្តោះអាសន្នផងដែរ ដោយសារ​ការអនុវត្តវិធានការណែនាំមិនបានត្រឹមត្រូវ។ទោះយ៉ាងណា សម្រាប់​ហាងអាជីវកម្មទេសចរណ៍ដែលទទួល​បាន​ការអនុញ្ញាត​បើក​ដំណើរ​នៅរាជធានីភ្នំពេញ ​និង​ក្រុង​តាខ្មៅ ​បានថ្លែងអរគុណរាជរដ្ឋាភិបាល ដែលបានគិតគូ​ និង​អនុញ្ញាត​ការបើកអាជីកវម្មដ្ឋាន​ទេសចរណ៍​មួយ​ចំនួន​ឡើង​វិញ ​ដើម្បីបង្កើតឱកាសការងារជូនពលរដ្ឋឡើងវិញ ហើយ​ការរៀបចំបើកនោះ ​គឺត្រូវខិតខំអនុវត្តតាមណែនាំពី​ក្រសួង​ទេសចរណ៍ ​និងអាជ្ញាធរមូលដ្ឋាន ជាពិសេសការត្រួតពិនិត្យភ្ញៀវមានកាតវ៉ាក់សាំង​ និងការរក្សាគន្លាតជាដើម។សូមបញ្ជាក់ថា គ្រប់អាជីវកម្មបៀរហ្កាឌិន​ មុននឹងបើក ក្រសួងទេសចរណ៍បានណែនាំ​ឲ្យ​គ្រប់​អាជីវកម្មដ្ឋាន​បៀរហ្កាឌិន ​ត្រូវរៀបចំទីតាំង ​និងអនុវត្តតាមខ្លឹមសារប្រកាសលេខ១០៨ប្រក ចុះថ្ងៃទី៣ ​ខែវិច្ឆិកា ឆ្នាំ២០២១ស្តីពី ការ​ដាក់អោយអនុវត្តវិធានសុវត្ថិភាព​ទេសចរណ៍សម្រាប់​អាជីវកម្ម​បៀរហ្កាឌិន ​អោយ​បានត្រឹមត្រូវ ​បន្ថែម​លើ​គោលនយោបាយ និងគោលការណ៍​ណែនាំ​នានា​ទៀត​របស់រាជរដ្ឋាភិបាល​ ជាពិសេសការគាំទ្រគោល​នយោបាយ​ចាក់​វ៉ាក់សាំង​របស់​រាជ​រដ្ឋាភិបាល និងប្រកាន់​ខ្ជាប់​វិធានទាំងឡាយ​ដែលដាក់ចេញដោយក្រសួងសុខាភិបាល ​និងវិធាន​សុវត្ថិភាព​ក្រសួងទេសចរណ៍ជាដើម៕អត្ថបទ ស៊ុម សុខជា

វិស័យឯក​ប្រគល់សម្ភារៈអប់រំផ្សព្វផ្សាយពីជំងឺកូវីដ១៩ ជូនមជ្ឈមណ្ឌលជាតិលើកកំពស់សុខភាព

2021/11/05 05:21:34 am        116
Facebook Telegram Linkin
ភ្នំពេញ ៖ ​ទោះបីជាបរិបទនៃការរីករាលដាលពីជំងឺកូវីដ១៩ នៅទូទាំងពិភពលោកនាពេលនេះ កំពុងវិលត្រឡប់ទៅភាពល្អប្រសើរវិញបន្តិចក្តី ក៏រាជរដ្ឋាភិបាល និងក្រសួងសុខាភិបាល នៅតែបន្តផ្សព្វផ្សាយ និងអប់រំដល់ប្រជាពលរដ្ឋឲ្យបន្តការការពារ។ ដើម្បីជំរុញឲ្យបាននូវការចូលរួមចំណែកទទួលខុសត្រូវទប់ស្កាត់ការចម្លងជំងឺនេះ ក្រសួងសុខាភិបាល សហការជាមួយក្រុមហ៊ុន អ័រគីដេ ឌីវែឡុបម៉ិន បានប្រគល់សម្ភារៈផ្សព្វផ្សាយអប់រំសុខភាព ជូនដល់មជ្ឈមណ្ឌលជាតិលើកកំពស់សុខភាព។កម្មវិធីប្រគល់សម្ភារៈផ្សព្វផ្សាយអប់រំសុខភាពស្តីពីការទប់ស្កាត់ការចម្លងវីរុសកូវីដ១៩ រួមមាន ៖ អាវយឺត ផ្ទាំងបដា និងស្ទិកគឺ រូបភាពផ្ទាំងធំ (Poster) សម្រាប់យុទ្ធនាការជាតិក្រោមប្រធានបទ "រួមគ្នាទទួលខុសត្រូវ ទប់ស្កាត់ការចម្លងវីរុសកូវីដ-១៩ បានប្រព្រឹត្តទៅនៅព្រឹកថ្ងៃទី៥ វិច្ឆិកា ឆ្នាំ២០២១នេះ នៅមជ្ឈមណ្ឌលជាតិលើកកំពស់សុខភាព ស្ថិតសង្កាត់ព្រែកលាប ខណ្ឌជ្រោយចង្វារ រាជធានីភ្នំពេញក្រោមអធិបតីភាពលោកជំទាវ ឱ វណ្ណឌីន រដ្ឋលេខាធិការក្រសួងសុខាភិបាល និង​ជាប្រធានអនុគណៈកម្មការអប់រំបណ្តុះបណ្តាល ​និងទំនាក់ទំនងសាធារណៈ រួមទាំងគណៈគ្រប់គ្រង​របស់​ក្រុមហ៊ុន អ័រគីដេ ឌីវែឡុបម៉ិន ផ្ទាល់។នៅក្នុងឱកាសនោះលោកជំទាវ ឱ វណ្ណឌីន បានសម្តែងការអរគុណដល់ថ្នាក់ដឹកនាំក្រុមហ៊ុនអ័រគីដេ ឌីវែឡុបម៉ិន និងបុគ្គលិកក្រុមហ៊ុន ដែលបានជួយចូលរួមចំណែកក្នុងការទប់ស្កាត់​ការ​ឆ្លងរាល​ដាល​ជំងឺកូវីដ ដោយ​បាន​ឧបត្ថម្ភជាសម្ភារៈដល់ក្រសួង។លោកជំទាវ លើកឡើងថា ​សម្ភារៈទាំងអស់នេះ ពិតជាមានសារៈសំខាន់ណាស់​សម្រាប់ជួយ​ផ្សព្វ​ផ្សាយ​បន្ដ ក៏ដូចជាការរំលឹកជូនដល់សាធារណបន្ដអនុវត្ដ ​៣ការពារ និង៣កុំ ទោះជាស្ថានភាពជំងឺកូវីដ១៩​នៅកម្ពុជា​ មានភាពល្អប្រសើរជាងមុនក្ដី។លោកជំទាវ បានអំពាវនាវដល់បុគ្គលគ្រប់រូបគ្រួសារ សហគមន៍ និងស្ថាប័នឯកជនចូលរួមទាំង​អស់​គ្នា ជាមួយរដ្ឋាភិបាលក្នុងការបើកដំណើរការសង្គម ​និងសេដ្ឋកិច្ចតាមគន្លងប្រតីភាពថ្មី ដោយម្នាក់ៗ​ទ​ទួល​ខុសត្រូវក្នុងការអនុវត្តទម្លាប់រស់នៅថ្មី តាមការណែនាំរបស់ក្រសួងសុខាភិបាល។ជាមួយគ្នានេះ ថ្នាក់ដឹកនាំកក្រុមហ៊ុនអ័រគីដេ ឌីវែឡុបម៉ិន ​បានថ្លែងអំណរគុណដល់រដ្ឋាភិបាល ក្រសួងសុខាភិបាល ក្រុមគ្រូពេទ្យស្ម័គ្រចិត្តធីតា​ និងមន្ត្រីថ្នាក់មូលដ្ឋាន ដែលបានខិតខំប្រឹង​ប្រែង​ទាំងកម្លាំងកាយចិត្ត ដើម្បីចូលរួមទប់ស្កាត់រហូតកន្លងមក ​ដែលទទួលបានជាលទ្ធផលល្អប្រសើរ ជា​ពិសេសយុទ្ធនាការចាក់វ៉ាក់សាំង​ទូទាំង​ប្រទេសបានរហូតដល់ជិត​ ៩០ភាគរយ​ នៃប្រជាជនសរុប ដែល​លទ្ធផលនេះស្ថិតនៅលំដាប់ខ្ពស់នៅក្នុងអាស៊ាន​ និងពិភពលោក។ក្រុមហ៊ុនអ័រគីដេ ឌីវែឡុបម៉ិន ​បានចូលរួមក្នុងសកម្មភាពសង្គមផ្សេងៗ​ជាមួយរាជរដ្ឋាភិបាលដូចជា៖ ឧបត្ថម្ភក្នុង​ការទប់ស្កាត់​ការរីករាលដាលជំងឺកូវីដ១៩, ឧបត្ថម្ភក្នុងការទិញវ៉ាក់សាំង​សម្រាប់​ចាក់​ជូន​ដល់ប្រជាពលរដ្ឋ ​ការចូលរួមជាមួយកាកកបាទក្រហមកម្ពុជា ​និងឧបត្ថម្ភសម្ភារៈប្រើប្រាស់ គ្រឿង​ឧបភោគបរិភោគផ្សេងៗ ​ទៅកាន់គោលដៅផ្សេងៗ​ដែល​បាន​ទទួលរងនូវផលប៉ះពាល់ពីជំងឺកូវីដ-១៩៕អត្ថបទ ៖ ឈិត បូរ៉ាវី

មុខព្រះបរមរាជវាំងមាន​សភាព​ស្ងប់ស្ងាត់ ខណៈបុណ្យអុំទូកឆ្នាំនេះ មិនទាន់មានការរៀបចំអ្វីឡើយ

2021/11/05 12:09:21 pm        288
Facebook Telegram Linkin
ភ្នំពេញ ៖ នៅព្រឹកថ្ងៃទី០៥ ខែវិច្ឆិកា ឆ្នាំ២០២១នេះ ទិដ្ឋភាពទូទៅនៅតាមសួនច្បារ និងតាមដងផ្លូវ ស្របមាត់ទន្លេចតុមុខ មានសភាពស្ងប់ស្ងាត់ជាធម្មតា ទិដ្ឋភាពនៅតាមសួនច្បារនិងដងផ្លូវ មានបងប្អូនប្រជាពលរដ្ឋធ្វើដំណើរ និងមកឲ្យចំណីសត្វព្រាបជាធម្មតា ទោះបីពុំទាន់មានរៀបចំពិធីបុណ្យអុំទូក បណ្តែតប្រទីត អកអំបុក និងសំពះព្រះខែ នាថ្ងៃខាងមុខក្នុងខែវិច្ឆិកានេះក្ដី។លោក ម៉េត មាសភក្ដី អ្នកនាំពាក្យសាលារាជធានីភ្នំពេញ បានឲ្យដឹងថា មកដល់ពេលនេះ​មិនទាន់​មាន​ការ​ណែនាំ​អី្វនោះទេ។កាលពីថ្ងៃទី១១ខែតុលាឆ្នាំ២០២១កន្លងទៅ ក្នុងពិធីចូលកាន់តំណែងអភិបាលខេត្តបាត់ដំបង សម្ដេចក្រឡាហោ ស ខេង ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃ បានថ្លែងថា បញ្ហាជំងឺកូវីដ នៅមិនទាន់ដឹងថានឹងត្រូវបិទបញ្ចប់នៅពេលណាឡើយ ដែលករណីនេះ​តម្រូវឲ្យពលរដ្ឋគ្រប់រូប​ ត្រូវចេះសម្របខ្លួនរស់នៅជាមួយស្ថានភាពនេះ ដោយអនុវត្តតាមវិធានសុខាភិបាល និងការណែនាំ របស់រដ្ឋាភិបាល ដើម្បី​​ទប់ស្កាត់​ការ​ចម្លង​បន្តទៀត ហើយពិធីបុណ្យអុំទូក អកអំបុក សំពះព្រះខែ និងបណ្ដែតប្រទីប ​សម្រាប់ឆ្នាំនេះ ​ត្រូវបាន​ផ្អាក​ម្ដងទៀត​ដោយ​ហេតុផល​នៃការឆ្លង​រាលដាល​នៃជំងឺកូវីដ១៩ ។ទាក់ទិននឹងការឈប់សម្រាកវិញ ក្រសួងការងារ និងបណ្តុះបណ្តាលវិជ្ជាជីវៈ កាលពីថ្ងៃទី៤ ខែវិច្ឆិកា ឆ្នាំ២០២១​ បានជូនដំណឹងដល់ម្ចាស់​ ឬ​នាយករោងចក្រ ​សហគ្រាសទាំងអស់ ដែលស្ថិតក្នុងដែន​អនុវត្ត​នៃច្បាប់ស្តីពីការងារ ​ត្រូវ​អនុញ្ញាត​ឲ្យកម្មករនិយោជិតទាំងអស់ របស់ខ្លួនឈប់សម្រាក ដោយ​មាន​ប្រាក់​ឈ្នួល​ក្នុងឱកាសព្រះរាជពិធីបុណ្យអុំទូក ​បណ្តែត ប្រទីប ​និងសំពះព្រះខែ អកអំបុក ខាងមុខនេះ ​ក្នុងរយៈពេលបីថ្ងៃ ​គឺថ្ងៃទី១៨-១៩-២០ ខែវិច្ឆិកា ឆ្នាំ២០២១ ៕អត្ថបទ ៖ ប្រាក់ វ៉ាន់ដា 

មេបញ្ជាការកងទ័ពជើងអាកាស ៖ ​កងទ័ពទាំងអស់ត្រូវជឿជាក់​ដោយ​ឥតងាក់រេ​លើ​ការ​ដឹកនាំ​របស់​សម្តេចតេជោ

2021/11/05 11:56:40 am        315
Facebook Telegram Linkin
ភ្នំពេញ ៖ នាយឧត្តមសេនីយ៍ សឹង សំណាង អគ្គមេបញ្ជាការរង មេបញ្ជាការកងទ័ពជើងអាកាស បានក្រើនរំលឹកដល់ នាយទាហានពលទាហាននៃកងទ័ពជើងអាកាសទាំងអស់ មិនថាកំពុងបំរើការងារ ឬបានចូលនិវត្តន៍ក៏ដោយគឺត្រូវ ជឿជាក់ដោយឥតងាក់រេលើការដឹកនាំរបស់សម្តេចតេជោ ហ៊ុន សែន នាយករដ្ឋមន្រ្តី បានធ្វើឲ្យប្រទេសមានសុខសន្តិភាព និងការអភិវឌ្ឍជាបន្តបន្ទាប់។នៅក្នុងពិធីសំណេះសំណាលជាមួយយោធិនចូលនិវត្តន៍ជាច្រើនរូបនាព្រឹកថ្ងៃទី៥ ខែតុលានេះ នៅបញ្ជាការដ្ឋានកងទ័ពជើងអាកាសឯកឧត្តម នាយឧត្តមសេនីយ៍ សឹង សំណាង បាន​លើកឡើងថា ប្រទេសកម្ពុជាមានសុខសន្តិភាពពេញលេញនាពេលនេះ គឺកើតចេញពី​យុទ្ធសាស្រ្ត​នយោបាយ ឈ្នះ ឈ្នះ ដែលមានសម្តេចតេជោ ហ៊ុន សែន ជា​ស្ថាបនិក​មគ្គុទេសក៍​ឯក រួម​នឹង​រៀមច្បង​ដែល​ជាប្រតិបត្តិករ ដ៏ស្មោះត្រង់​ ក្នុងនោះមាននាយទាហាន ដែលបំរើការក្នុងជូរកងទ័ព​ជើង​អាកាស បាន​ពួតដៃគ្នា​បញ្ចេញ​អស់​ពី​កម្លាំងកាយចិត្ត ​ដោយ​បានតស៊ូយ៉ាងសកម្ម ក្នុង​បេសកកម្មដ៏លំបាក ​និង​សែនមហាគ្រោះថ្នាក់ជាច្រើន ដើម្បីតែសុខសន្តិភាព និង​ការអភិវឌ្ឍ​ជូន​ប្រជាជន ​និងប្រទេសជាតិទាំងមូល។យ៉ាងណាក៏ដោយនាយឧត្តមសេនីយ៍ សឹង សំណាង បាន​ជំរុញដល់កងទ័ពនៅក្នុងបញ្ជាការដ្ឋាន កងទ័ពជើង​អាកាសទាំងអស់​ មិនថា​កំពុងបំរើការ​ និងចូលនិវត្តន៍នោះ គឺត្រូវ​«ជឿជាក់ដោយ​ឥតងាក​រេលើ​ការដឹកនាំរបស់សម្តេចតេជោ​ ហ៊ុន សែន ​ដើម្បីកម្ពុជាបាននូវសុខសន្តិភាព​ សេរីភាព និង​ការ​អភិវឌ្ឍប្រកបដោយចីរភាព។ត្រូវយកចិត្តទុកដាក់​ក្នុងការ​វិនិច្ឆ័យ​រាល់គ្រប់ព័ត៌មាន​ ទាំងក្នុងបណ្តាញសង្គម និងក្នុងជីវភាព​រស់​នៅ​ប្រចាំថ្ងៃ ដោយត្រូវពិចារណារកហេតុផលឲ្យបានច្បាស់លាស់មុននឹងធ្វើការសម្រេចចិត្តណា មួយទៅលើព័ត៌មានទាំងនោះ ​ដើម្បីជៀសផុតពីកំហុសឆ្គង»។នៅក្នុងពិធីសំណេះសំណាលជាមួយមន្រ្តីយោធិនចូលនិវត្តន៍នេះដែរ​ នាយឧត្តមសេនីយ៍ សឹង សំណាង ក៏បានបញ្ជាក់ផងដែរថា ​ចាប់ពីពេលនេះតទៅ​ការចូលនិវត្តន៍របស់យោធិន គឺត្រូវ​អនុវត្តន៍ទៅ តាម​គោលការណ៍​ដែលបានកំណត់ក្នុងច្បាប់ ហើយតាមសេចក្តីជូនដំណឹង​របស់​ក្រសួងការពារជាតិ ដោយយោធិនគ្រប់រូបដែលត្រូវបាន​ចូលនិវត្តន៍នោះ គឺត្រូវដំឡើងមួយសក្តិ ហើយក៏​នឹង​មាន​ការឲ្យចូលនិវត្តន៍ជារៀងរាល់ឆ្នាំផងដែរ៕អត្ថបទ ៖ បានចក់ 

ឯកឧត្តម ជាវ តាយ បង្ហាញឆន្ទៈធ្វើឱ្យក្រុងពោធិ៍សាត់គ្មានសំរាមទៅពេលអនាគត

2021/11/04 04:26:58 pm        582
Facebook Telegram Linkin
ពោធិ៍សាត់ ៖ អភិបាលខេត្តពោធិ៍សាត់ ឯកឧត្តម ជាវ តាយ បានបង្ហាញឆន្ទៈធ្វើឱ្យក្រុងពោធិ៍សាត់ គ្មានសំរាម ទៅពេលអនាគត ដើម្បីសោភណភាពក្រុង បរិស្ថានល្អ និងសុខុមាលភាពពលរដ្ឋល្អ។កាលពីម្សិលមិញ ឯកឧត្ដម ជាវ តាយ អភិបាលខេត្តពោធិ៍សាត់ បានលើកយកបញ្ហាសំរាមក្នុង ក្រុងពោធិ៍សាត់ មកពិភាក្សាជាមួយអ្នកពាក់ព័ន្ធក្នុងការគ្រប់គ្រងសំរាម ដើម្បីរកដំណោះស្រាយ ធ្វើយ៉ាងណាឱ្យការគ្របគ្រងបញ្ហាសំរាម ការប្រមូលសំរាមមានភាពល្អប្រសើរ មិនកកស្ទះ ដើម្បីកុំឱ្យប៉ះពាល់ដល់ការរស់នៅរស់ប្រជាពលរដ្ឋ និងបាត់បង់សោភណភាពក្រុង។ឯកឧត្តម បានលើកឡើងថា បច្ចុប្បន្នការប្រមូលសំរាម ក្នុងក្រុងពោធិ៍សាត់ មិនទាន់ទទួលបាន ជោគជ័យនោះទេ គឺនៅសល់សំរាមច្រើនណាស់ ​ហើយមធ្យោបាយដឹកជញ្ជូន​ ក៏មានតិចដែរ។ មានឡាន ដឹកសំរាមតែពីរទៅបីគ្រឿងប៉ុណ្ណោះ និងមានសភាពចាស់ៗទៅហើយ។លោក អ៊ឹង គឹមលាង អភិបាលរងខេត្តទទួលបន្ទុកការងារគ្រប់គ្រងសំរាម បានឱ្យដឹងថា ចាប់តាំងពី ឆ្នាំ២០១៦មក សំរាមក្នុងក្រុងពោធិ៍សាត់ មានការកើនឡើងជានិច្ច ​រហូតដល់ឆ្នាំនេះ កើន​ដល់​ចំនួន៤០ តោន ក្នុងមួយថ្ងៃ។ ពីមុនមានក្រុមហ៊ុនពីរ បានធ្វើការប្រមូលសំរាម តែឥឡូវ បានដួល​រលំ​ទៅហើយ បច្ចុប្បន្នការប្រមូលសំរាមក្នុងក្រុងពោធិ៍សាត់ គឺក្រុមយុវជន ជាអ្នកម៉ៅការប្រមូល។លោកបានបញ្ជាក់ថា បច្ចុប្បន្ន ទីលានចាក់សំរាមពេញ ផ្លូវចូលតូច ពិបាកក្នុងការដឹកជញ្ជូន ​ទើបធ្វើ ឱ្យកកស្ទះសំរាម។ ​ប្រសិនបើទីលានចាក់សំរាមថ្មី ​ត្រូវបានសាងសង់រួចរាល់ ហើយក្រុមហ៊ុន​ម៉ៅការ​ប្រមូល សំរាមបន្ថែមគ្រឿងចក្រនោះការប្រមូលសំរាមក្នុងក្រុងពោធិ៍សាត់ នឹងល្អប្រសើរ ។ឯកឧត្តម ជាវ តាយ អភិបាលខេត្តពោធិ៍សាត់ បានផ្តល់អនុសាសន៍ណែនាំ ឱ្យគិតគូរពីមធ្យោបាយ ក្នុងការដឹកជញ្ជូនសំរាម ​និងទីតាំងស្តុកដំបូងឱ្យបានល្អ ដែលនឹងអាចកាត់បន្ថយការរ៉ាយប៉ាយ​នៃ​សំរាម។ ក្រុមហ៊ុនម៉ៅការសង់ទីលានចាក់សំរាមថ្មី ត្រូវពន្លឿនការសាងសង់។លោក ចាប នាង អភិបាលក្រុងពោធិ៍សាត់ បានឱ្យដឹងថា មកដល់ពេលនេះ ​ការសាងសង់ទីលាន ចាក់សំរាមថ្មី សម្រេចបាន៨០ភាគរយហើយ ដោយលាតសន្ធឹងលើផ្ទៃដីទំហំប្រមាណ១០ហិកតា ចម្ងាយ ពីទីប្រជុំជនក្រុងពោធិ៍សាត់ ប្រមាណ៥គីឡូម៉ែត្រ។ ​ការស្ថាបនាទីលានចាក់សំរាមថ្មីនេះ គឺស្ថិតក្នុង គម្រោងកែលម្អគ្រប់គ្រងបរិស្ថានជុំវិញបឹងទ្លេសាប ដោយប្រើប្រាស់ថវិកាជំនួយរបស់ ADB ៕អត្ថបទ៖ ភិរុណ ពៅ

ភាពជោគជ័យលើការគ្រប់គ្រងសំណល់រឹង ទាមទារការចូលរួមពីគ្រប់ភាគីពិសេសពលរដ្ឋ

2021/11/04 04:19:12 pm        335
Facebook Telegram Linkin
ព្រះសីហនុ ៖ ក្រសួងបរិស្ថាន និងរដ្ឋបាលខេត្តព្រះសីហនុ កាលពីម្សិលមិញ បានដឹកនាំកិច្ចប្រជុំជាមួយផ្នែកពាក់ព័ន្ធ ដើម្បីដោះស្រាយបញ្ហាសំរាម ក្នុងនោះ មន្ត្រីជាន់ខ្ពស់ក្រសួងបរិស្ថាន បានលើកឡើងថា ភាពជោគជ័យនៃការគ្រប់គ្រងសំរាម គឺ ទាមទារឱ្យមានការចូលរួមពីគ្រប់មជ្ឈដ្ឋានពាក់ព័ន្ធ ពិសេសគឺប្រជាពលរដ្ឋ ដែលជាអ្នកទុកដាក់សំរាមឱ្យបានត្រឹមត្រូវ។អនុរដ្ឋលេខាធិការក្រសួងបរិស្ថាន ឯកឧត្តម ហេង ណារ៉េត ក្នុងកិច្ចប្រជុំតាមរយៈប្រព័ន្ធវីដេអូ ដែល​ផ្ដោត​លើប្រធានបទពីរ គឺ១. បទបង្ហាញពីក្របខណ្ឌការងារឈានទៅអនុវត្តប្រព័ន្ធថ្មីគ្រប់គ្រងសំរាម សំណល់រឹង ក្នុងទីប្រជុំជនក្រុងព្រះសីហនុ និង២. បទបង្ហាញស្តីពីការគ្រប់គ្រងសំរាម សំណល់​រឹង​ឆ្លាតវៃ បានលើកឡើងថា គោលនយោបាយបរិស្ថានស្អាត សុខភាពល្អ វាមានសារសំខាន់​សម្រាប់​សុខុមាលភាពប្រជាពលរដ្ឋ។ ដើម្បីកែទម្រង់ប្រព័ន្ធគ្រប់គ្រងសំរាមក្នុងខេត្តព្រះសីហនុ និង​លើក​កម្ពស់ប្រព័ន្ធគ្រប់គ្រងសំរាម និងតម្លៃឱ្យមានប្រសិទ្ធិភាពតាមប្រព័ន្ធថ្មី ទី១. ឆន្ទៈ ២. ការបេជ្ញាចិត្ត ៣.ធ្វើជាម្ចាស់។ ដើម្បីធានាសមត្ថភាព និងសមិទ្ធផលក្នុងការគ្រប់គ្រងសំរាម និងសំណល់រឹង ដោយមានការចូលរួមពីក្រុមហ៊ុន អាជ្ញាធរ និងប្រជាពលរដ្ឋ ទើបក្រុងមានភាពស្អាត និង​មានពណ៌បៃតង។ ក្រុមហ៊ុន ត្រូវមានតួនាទីក្នុងការប្រមូលសំរាមចេញពីក្រុង-ស្រុក តែប្រជាពលរដ្ឋ ជាអ្នកបង្កើតសំរាម ត្រូវធ្វើការញែកសំរាមឱ្យបានត្រឹមត្រូវ។ អាជ្ញាធរ ក៏ទាមទារការអប់រំ ផ្សព្វផ្សាយឱ្យប្រជាពលរដ្ឋ មាន​ការ​យល់ដឹងកាន់តែស៊ីជម្រៅបន្ថែមទៀតក្នុងការបញ្ចេញសំរាម។ឯកឧត្តម គួច ចំរើន អភិបាលខេត្តព្រះសីហនុ បានលើកឡើងថា រយៈពេលកន្លងមក វិបត្តិសំរាម​នៅ​ក្រុងព្រះសីហនុ ទោះបីមានក្រុមហ៊ុនដឹកជញ្ជូនសំរាម បានប្រមូលសំរាមដឹកចេញពីក្រុង តែបន្តយក​ទៅទៅចាក់រាយប៉ាយគ្មានសណ្តាប់ធ្នាប់ ការគ្រប់គ្រងគ្មានបច្ចេកទេស សំរាមបានប្រមូលចេញពីក្រុងយកទៅទុកកន្លែងផ្សេងតែប៉ុណ្ណោះ។ ក្រសួងបរិស្ថាន បានសង់ទីលានចាក់សំរាមរួចរាល់ហើយ ប៉ុន្តែគំនរសំរាមនៅក្រៅទីលានគរដូចភ្នំ។ឯកឧត្តម បានស្នើក្រសួងបរិស្ថានជួយធ្វើយ៉ាងណាឱ្យឆាប់បានដំណើរការ ដើម្បីឱ្យ​សំរាមដែល​ប្រមូល​ចេញពីក្រុងយកទៅទុកដាក់ក្នុងទីលានគ្រប់គ្រងបានត្រឹមត្រូវតាមបច្ចេកទេស។ រដ្ឋបាលខេត្ត ខិតខំផ្សព្វផ្សាយនូវស្លាកសញ្ញាហាមបោះចោលសំរាម រួមទាំងចារតម្លៃ នៃការផាកពិន័យ ចាប់ពី២ម៉ឺនរៀល ដល់៤០ម៉ឺនរៀល ប្រសិនបើមានការបំពានបោះចោលសំរាមមិនត្រឹមត្រូវ នៅតាមបណ្តោយឆ្នេរសមុទ្រ តាមដងផ្លូវសាធារណៈ។ ក្រុមការងារក្រុង កំពុងធ្វើការអប់រំ​ផ្សព្វផ្សាយនៅលើផ្លូវ៤៧ខ្សែ ក្នុងក្រុងព្រះសីហនុ ដើម្បីឱ្យប្រជាពលរដ្ឋយល់ដឹង និងបញ្ចេញសំរាមតាមពេលវេលា៕អត្ថបទ៖ គង់ ប៊ុនថា

អាជ្ញាធរមីនកម្ពុជា ទទួលអំណោយពីសមាគមពុទ្ធសាសនិកកម្ពុជា-ចិន សម្រាប់ការងារមនុស្សធម៌

2021/11/04 03:58:41 pm        340
Facebook Telegram Linkin
ភ្នំពេញ ៖ អាជ្ញាធរមីនកម្ពុជា នៅថ្ងៃនេះ បានទទួលអំណោយពីសមាគមពុទ្ធសាសនិកកម្ពុជា-ចិន និងសមាគមអ្នកស្រាវជ្រាវវឌ្ឍនភាពកម្ពុជា-ចិន មានជាអង្ករ និងបរិក្ខារសុខាភិបាល សម្រាប់ចែកជូនប្រជាពលរដ្ឋក្រីក្រ និងពលរដ្ឋប៉ះពាល់ផ្នែកសេដ្ឋកិច្ចដោយវិបត្តិជំងឺកូវីដ១៩ ។ព្រះតេជគុណ ចាវ ស៊ីន អនុប្រធានសមាគមពុទ្ធសាសនិកកម្ពុជា-ចិន ឯកឧត្តមទេសរដ្ឋមន្ត្រី លី ធុជ អនុប្រធានអាជ្ញាធរមីនកម្ពុជា ទទួលបន្ទុកបេសកកម្មពិសេស នៅថ្ងៃទី៤ ខែវិច្ឆិកានេះ បានលើក​ឡើងថា បច្ចុប្បន្ន មិត្តភាពកម្ពុជា និងចិន កំពុងមានការជិតស្និទ្ធគ្នា រហូតដល់ក្លាយជាមិត្ត​ដែកថែប ខណៈមិត្តភាពនេះ បានបង្កើតឡើងតាំងពីជំនាន់សម្ដេចព្រះបរមរតនកោដ្ឋ ព្រះបាទនរោត្តម សីហនុ អតីតព្រះមហាក្សត្រខ្មែរ។ឯកឧត្តម លី ធុជ បានបញ្ជាក់ថា ទន្ទឹមនឹងមានការរឹតចំណងមិត្តភាពនេះ រដ្ឋាភិបាលចិន បាន​ផ្ដល់​នូវជំនួយជាបន្តបន្ទាប់ រួមទាំងជួយអភិវឌ្ឍនូវហេដ្ឋារចនាសម្ព័ន្ធនៅកម្ពុជាជាហូរហែរ រួមទាំង​អ្នក​វិនិយោគចិន មកធ្វើការវិនិយោគនៅកម្ពុជា ​ដែលបានជួយធ្វើឲ្យសេដ្ឋកិច្ច ​កាន់តែមានភាពរីកចម្រើន ។ឯកឧត្តម លី ធុជ បានបន្ថែមថា ខណៈកម្ពុជា បានជួបនូវវិបត្តិជំងឺកូវីដ១៩ រដ្ឋាភិបាលចិន បានផ្ដល់​ជំនួយ​ផ្សេងៗ មានគ្រឿងបរិក្ខារសុខាភិបាល ពិសេសវ៉ាក់សាំងកូវីដ១៩ ​ដើម្បីចាក់ជូនពលរដ្ឋ ដែល​វ៉ាក់សាំងនេះ បានចូលរួមចំណែកធ្វើឲ្យកម្ពុជា បានបើកដំណើរការប្រទេសឡើងវិញ​នាពេល​បច្ចុប្បន្ន ។ជាមួយគ្នានេះ ឯកឧត្តមទេសរដ្ឋមន្ត្រី បានថ្លែងអំណរគុណដល់ ​សមាគមពុទ្ធសាសនិកកម្ពុជា-ចិន និង​សមាគមអ្នកស្រាវជ្រាវវឌ្ឍនភាពកម្ពុជា-ចិន បានផ្ដល់ជំនួយដល់អាជ្ញាធរមីន ទុកចែកជូនពលរដ្ឋ​ក្រីក្រ ការផ្ដលជំនួយមនុស្សធម៌នេះ បានបង្ហាញពីការជួយគ្នាទៅវិញទៅមក ៕អត្ថបទ៖ បាន សុខរិទ្ធ

កំពង់ផែក្នុងខេត្តសៀមរាប នឹងដំណើរការវិញនៅដើមឆ្នាំក្រោយ តាមស្ដង់ដារកំពង់ផែទេសចរណ៍

2021/11/04 02:34:41 pm        508
Facebook Telegram Linkin
សៀមរាប ៖ អភិបាលខេត្តសៀមរាប បានអះអាងថា នៅដើមឆ្នាំក្រោយនេះ កំពង់ផែចុងឃ្នៀស ដែលជាកំពង់ផែដ៏ មានសក្តានុពលក្នុងការស្រូបទាញភ្ញៀវទេសចរទស្សនាសម្រស់ធម្មជាតិ នៃបឹងទន្លេសាបនោះ ​នឹងមានសកម្មភាពកត់ត្រាចំនួនភ្ញៀវឡើងវិញ ជាមួយនឹងការរំពឹងទុកថា កំពង់ផែចុងឃ្នៀស ​នឹងត្រូវអភិវឌ្ឍឱ្យ ស្របតាមស្តង់ដាកំពង់ផែទេសចរណ៍ បំពាក់ដោយសម្បទាទ្រទ្រង់សេវាកម្មពេញលេញ នាថ្ងៃអនាគត។កំពង់ផែចុងឃ្នៀស ដែលមានទីតាំងនៅជាប់មាត់បឹងបឹងទន្លេសាប ក្នុងសង្កាត់ចុងឃ្នៀស ក្រុង សៀមរាប ត្រូវបានអាជ្ញាធរខេត្តសៀមរាប ដាក់ចេញនូវផែនការជំរុញឱ្យមានការចាប់ផ្តើមជាថ្មី បន្ទាប់ពី អសកម្មភាពអស់ពេលយូរមកហើយ ដើម្បីត្រៀមលក្ខណៈទទួលភ្ញៀវទេសចរឡើងវិញ។កាលពីម្សិលមិញ ក្នុងឱកាសចុះផ្ទាល់ដល់កំពង់ផែមួយនេះ ឯកឧត្តម ទៀ សីហា អភិបាលខេត្ត សៀមរាប បានបង្ហាញឲ្យដឹងអំពីផែនការចំពោះមុខ ដែលក្នុងជំហានដំបូងនេះ គឺចាំបាច់ត្រូវតែមាន​ការជួសជុលបន្ទាន់ នូវផ្លូវចូលតំបន់ចុងឃ្នៀស។ ឯកឧត្តម បានបញ្ជាក់ថា កំពង់ផែចុងឃ្នៀស គឺជាគោលដៅ សម្រាប់ការអភិវឌ្ឍន៍នាពេលអនាគត ឲ្យស្របតាមស្តង់ដារកំពង់ផែទេសចរណ៍ ដោយគិតគូរ លើការ បំពាក់សម្បទាទ្រទ្រង់​សេវាកម្ម​ផងដែរ ។សម្រាប់ការត្រៀមបើកទទួលទេសចរណ៍សុវត្ថិភាព ឬទេសចរណ៍វ៉ាក់សាំង ​និងទេសចរណ៍ផ្ទៃក្នុង ដែលសៀមរាប-អង្គរ ​គ្រោងនឹងបើកទទួលភ្ញៀវជាផ្លូវការ ​នៅថ្ងៃទី០១ ខែមករា ឆ្នាំ២០២២នោះ តំបន់ចុងឃ្នៀស ត្រូវតែបានរៀបចំល្អប្រសើរ មានសន្តិសុខ​ សណ្តាប់ធ្នាប់សាធារណៈ ដែល​ជាពិសេសនោះ​ គឺត្រូវបានកំណត់ច្បាស់លាស់ បែងចែកឲ្យមានជាតំបន់បដិសណ្ឋារកិច្ច តំបន់ប្រជាជនរស់នៅ និងតំបន់ផ្សារត្រីជាដើម។កំពង់ផែចុងឃ្នៀស ត្រូវបានរដ្ឋបាលខេត្តចូលគ្រប់គ្រងជាបណ្តោះអាសន្ន កាលពីចុងខែសីហា កន្លងមកនេះ បន្ទាប់ពីរាជរដ្ឋាភិបាលកម្ពុជា បានដកហូតចេញពីការវិនិយោគរបស់​ក្រុមហ៊ុន​ឯកជន។យោងតាមសេចក្តីជូនដំណឹងចុះថ្ងៃទី២៩ ខែកក្កដា ឆ្នាំ២០២១ របស់ទីស្តីការគណៈរដ្ឋមន្តី បាន​កំណត់ថា រាជរដ្ឋាភិបាលកម្ពុជា បានប្រគល់ជូនរដ្ឋបាលខេត្តសៀមរាប​ និងគ្រឹះស្ថានអង្គរ គ្រប់គ្រង​តំបន់កំពង់ផែនេះ ​ជាបណ្តោះអាសន្ន។ តំបន់ចុងឃ្នៀសនេះដែរ គឺជាគោលដៅនៃការអភិវឌ្ឍពហុវិស័យ ​ដោយមានវិស័យ ទេសចរណ៍​ជាស្នូល ហើយក៏ជាកំពង់ផែដឹកជញ្ជូនផ្លូវទឹក​ និងជាតំបន់ចែកចាយផលនេសាទទឹកសាបផងដែរ៕អត្ថបទ៖ ងឹន គឹមឡេង

បណ្ដាញសង្គម

ព័ត៌មានថ្មីៗ

មេដឹកនាំកូរ៉េខាងជើង ត្រួតពិនិត្យការសាកល្បងអាវុធសំខាន់ដែលគេមើលឃើញថាផ្ដោតលើកូរ៉េខាងត្បូង
06/26/2026 10:06 AM
Facebook Telegram Linkin
កម្ពុជាអំពាវនាវឱ្យមានការអនុវត្តច្បាប់អន្តរជាតិឱ្យបានពេញលេញ ដើម្បីការពារកុមារក្នុងជម្លោះប្រដាប់អាវុធ
06/26/2026 10:06 AM
Facebook Telegram Linkin
កោះតៃវ៉ាន់ សាកល្បងការការពារប្រឆាំងនឹងការគំរាមកំហែងដែនសមុទ្ររបស់ប្រទេសចិន
06/26/2026 10:06 AM
Facebook Telegram Linkin
សម្ដេចធិបតី ហ៊ុន ម៉ាណែត ដឹកនាំកិច្ចប្រជុំពេញអង្គគណៈរដ្ឋមន្ត្រី នៅវិមានសន្តិភាព ដើម្បីពិភាក្សា និងឆ្លងលើរបៀបវារៈមួយចំនួន
06/26/2026 09:06 AM
Facebook Telegram Linkin
ប្រទេសកេនយ៉ា ចាប់ខ្លួនមនុស្សជាង ៣៥០នាក់ ខណៈប្រជាជនប្រារព្ធខួបនៃការតវ៉ាដ៏បង្ហូរឈាម
06/26/2026 09:06 AM
Facebook Telegram Linkin
UN៖ ការជម្លៀសនាវិកនៅច្រកសមុទ្រHormuz ត្រូវបានផ្អាកក្រោយការវាយប្រហារនៅឈូងសមុទ្រអូម៉ង់
06/26/2026 09:06 AM
Facebook Telegram Linkin
រលកកម្ដៅកំពុងប៉ះពាល់ដល់មនុស្សជាង១០០ លាននាក់ចាប់ពីអេស្ប៉ាញដល់អាល្លឺម៉ង់ខណៈអ្នកស្លាប់ជាង២០០នាក់
06/26/2026 09:06 AM
Facebook Telegram Linkin
នៅព្រឹកនេះ ព្រឹទ្ធសភាបន្តសម័យប្រជុំលើកទី៥ ដើម្បីពិនិត្យហើយឱ្យយោបល់លើសេចក្តីព្រាងច្បាប់ស្តីពី«វិសោធនកម្មច្បាប់ស្តីពីផ្លូវថ្នល់»
06/26/2026 09:06 AM
Facebook Telegram Linkin
កម្ពុជាទទួលបានមេដាយមាស ប្រាក់ សំរឹទ្ធ និងពាន៣ ពី​ការប្រឡងកម្មវិធី The Young Master Challenge Global Final 2026 នៅចក្រភពអង់គ្លេស
06/26/2026 08:06 AM
Facebook Telegram Linkin
រុស្ស៊ី-កម្ពុជា បន្តទំនាក់ទំនងដ៏រឹងមាំលើវិស័យអប់រំ វប្បធម៌ កសិកម្ម ថាមពល ការពារជាតិ និងពាណិជ្ជកម្ម​
06/26/2026 08:06 AM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.