នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
សម្ដេចតេជោ ហ៊ុន សែន អញ្ជើញចូលក្រាបថ្វាយបង្គុំគាល់ព្រះករុណាព្រះមហាក្សត្រ និងសម្តេចព្រះមហាក្សត្រី
សម្តេចតេជោអញ្ជើញជួបពិភាក្សាការងារជាមួយប្រធានគណៈកម្មាធិការអចិន្ត្រៃយ៍នៃសភាតំណាងប្រជាជនចិន
សម្តេចតេជោ ហ៊ុន សែន នឹងបំពេញទស្សនកិច្ចមិត្តភាពផ្លូវការនៅប្រទេសចិនរយៈពេលបីថ្ងៃចាប់ពីថ្ងៃទី២៥ដល់២៧ ខែមិថុនាខាងមុខនេះ
កម្ពុជា-អ៊ីស្រាអែល ឯកភាពបន្តជំរុញទំនាក់ទំនង និងកិច្ចសហប្រតិបត្តិការទ្វេភាគីឱ្យកាន់តែរីកចម្រើន

នយោបាយ​ និង ការអភិវឌ្ឍន៍

ភ្នំពេញគ្រោងដំណើរការទីតាំងមួយបន្ថែមទៀត សម្រាប់ព្យាបាលអ្នកជំងឺកូវីដ ទោះករណីឆ្លងថ្មីថយចុះក្តី

2021/11/04 02:01:49 pm        670
Facebook Telegram Linkin
​ភ្នំពេញ ៖ ​ក្នុងក្របខណ្ឌរាជធានីភ្នំពេញ គ្រោងដាក់ដំណើរការទីតាំងសម្រាប់ទទួលអ្នកជំងឺកូវីដ១៩ កម្រិតធ្ងន់ មួយកន្លែងបន្ថែមទៀតនៅក្នុងមន្ទីរពេទ្យបង្អែករាជធានីភ្នំពេញ បើទោះបច្ចុប្បន្នស្ថានភាពឆ្លងកូវីដ១៩ មានការថយចុះក្តី ខណៈនៅភ្នំពេញ មានមណ្ឌលថែទាំព្យាបាលជំងឺកូវីដ-១៩ និងមណ្ឌលធ្វើចត្តាឡីស័ក ក្នុងរាជធានីភ្នំពេញ មានចំនួន ១១ទីតាំងរួចហើយនោះ។ នេះបើតាមការបញ្ជាក់របស់ឯកឧត្តម វេជ្ជបណ្ឌិត ងី មានហេង ប្រធានមន្ទីរសុខាភិបាលរាជធានីភ្នំពេញប្រាប់ BTV ព័ត៌មាន នាព្រឹកថ្ងៃទី៤ខែវិច្ឆិកា ឆ្នាំ២០២១នេះ។ឯកឧត្តម វេជ្ជបណ្ឌិត ងី មានហេង បានឲ្យដឹងទៀតថា ឋិតក្នុងអន្តរកាលកូវីដ-១៩ ទោះបីក្នុង​មូលដ្ឋាន​រាជធានី​ភ្នំពេញ ​មានចំនួនអ្នកឆ្លងមេរោគកូវីដ-១៩ និងអ្នកបាត់បង់ជីវិត​ដោយសារមេរោគ​កូវីដ-១៩ ​មានការថយចុះយ៉ាង​ណា​ក៏​ដោយ ក៏ក្រុមការងារគ្រូពេទ្យទាំងអស់មានស្មារតី​តាំងចិត្ត​យ៉ាង​មុះមុត​ ប្តេជ្ញាចិត្តបន្តចូលរួមប្រយុទ្ធ​ប្រឆាំង ​នឹង​ជំងឺ​កូវីដ-១៩។ជាពិសេសទាំងមណ្ឌលព្យាបាលកូវីដ-១៩ និងមណ្ឌលធ្វើចត្តាឡីស័កក្នុងរាជធានីភ្នំពេញ ​នៅរក្សា​ទីតាំង​ដដែលមិនមានការបិទ​ ឬផ្អាកដំណើរការនោះទេ។ ​ប៉ុន្តែយើងក៏បានរៀបចំជួសជុល និងដាក់​សម្ភារៈ​បរិក្ខារ​វេជ្ជសាស្រ្ត​សម្រាប់​ទទួលអ្នកជំងឺកូវីដ-១៩ ឲ្យចូលមកសម្រាកព្យាបាលនៅក្នុង​មនី្ទរពេទ្យបង្អែក​រាជធានីភ្នំពេញ ​នា​ពាក់​កណ្តាលខែវិចិ្ឆកា ​ខាងមុខនេះ ដែល​មានទីតាំងស្ថិត​ក្នុងខណ្ឌ៧មករា រាជធានីភ្នំពេញ។បើតាមប្រធានមនី្ទរពេទ្យបង្អែករាជធានីភ្នំពេញ លោកវេជ្ជបណ្ឌិត នេត សុវិរៈ បានបញ្ជាក់ថា អគារ​ដែលកំពុង​ជួស​ជុល និងដាក់ដំណើរការព្យាបាលអ្នកជំងឺកូវីដ-១៩ ​គឺអគារ C ​មានកំពស់៥ជាន់ និង៨០គ្រែ និង​មានបុគ្គលិក គ្រូពេទ្យ​​ព្យាបាលអ្នកជំងឺកូវីដ-១៩ ចំនួនជាង៨០នាក់ សម្រាប់​ជួយ​សង្រ្គោះ​អាយុជីវិត​បងប្អូនប្រជាពលរដ្ឋ ឲ្យរួច​ផុត​ពី​​ជំងឺកូវីដ-១៩នេះ។មនី្ទរពេទ្យក៏បានរៀបចំច្រកចូល និងចេញរបស់អ្នកជំងឺកូវីដ-១៩ រួចរាល់ ព្រមទាំង​ដាក់​បន្ទប់ទឹក និងទូរកុងតឺន័រ ​សម្រាប់ឲ្យលោកគ្រូពេទ្យ អ្នកគ្រូពេទ្យ ក្រោយពេលព្យាបាលអ្នកជំងឺកូវីដ១៩ មក​សម្រាក​រួចរាល់​ហើយដែរ ​ដោយមិនឲ្យនៅឡូកឡំគ្នានោះទេ​ ដើម្បីបង្ការ ​ការចម្លងមេរោគកូវីដ១៩។ ដោយ​ឡែក​សម្រាប់​ទីតាំង​អគារផ្សេងទៀត ​នៅក្នុងមនី្ទរពេទ្យបង្អែករាជធានីភ្នំពេញ នៅដំណើរការ​ទទួល​ពិនិត្យ ព្យាបាលជំងឺដូចធម្មតា​ ហើយ​មនី្ទរពេទ្យក៏កំពុងរៀបចំបន្ថែមផ្នែកខ្លះក្នុងមនី្ទរពេទ្យ ដើម្បី​ឲ្យអ្នកជំងឺចូលមកទទួលសេវាកម្ម រក្សាគម្លាត និង​ចូលរួម​ការពារ ទប់ស្កាត់​ការ​ចម្លង​មេរោគកូវីដ១៩ផងដែរ៕អត្ថបទ រដ្ឋា

កិច្ចប្រជុំកំពូលអាស៊ី-អឺរ៉ុប លើកទី១៣ នឹងបង្ហាញពីសិល្បៈវប្បធម៌ចម្រុះអាស៊ី-អឺរ៉ុប

2021/11/04 01:40:40 pm        457
Facebook Telegram Linkin
ភ្នំពេញ ៖ កិច្ចប្រជុំកំពូលអាស៊ី-អឺរ៉ុបលើកទី១៣ ដែលកម្ពុជានឹងធ្វើជាម្ចាស់ផ្ទះនៅចុងខែនេះ នឹងបង្ហាញពីសិល្បៈវប្បធម៌ចម្រុះអាស៊ី-អឺរ៉ុប ក្នុងគោលបំណងច្រើនយ៉ាងពិសេសគឺការរួមបញ្ចូលគ្នា នៃវប្បធម៌តំបន់ទាំងពីរនេះ។សម្ដេចតេជោ ហ៊ុន សែន នាយករដ្ឋមន្ត្រី នៅព្រឹកថ្ងៃទី០៤ ខែវិច្ឆិកានេះ បានបង្ហោះនៅ​លើទំព័រ​សង្គមហ្វេសប៊ុកនូវឃ្លីបវីដេអូខ្លីមួយ នៃព្រឹត្តិការណ៍នេះ ជាមួយនឹងសំណេរបញ្ជាក់ថា ក្រសួងវប្បធម៌ និងវិចិត្រសិល្បៈ ទទួលបន្ទុករៀបចំមហោស្រព​វប្បធម៌អាស៊ី-អឺរ៉ុប ក្រោមប្រធានបទ «អាស៊ី និង អឺរ៉ុប ៖ ចំណងវប្បធម៌» “Asia and Europe: Cultures Connect” ដែលជាព្រឹត្តិការណ៍អម នៃកិច្ចប្រជុំកំពូលអាស៊ី-អឺរ៉ុប លើកទី១៣ ឆ្នាំ២០២១។ព្រឹត្តិការណ៍ដ៏មានសារសំខាន់នេះ នឹងប្រព្រឹត្តទៅពីថ្ងៃទី២២-២៦ ខែវិច្ឆិកា ​ឆ្នាំ២០២១ តាម ប្រព័ន្ធវីដេអូ ព្រមទាំងមានការរៀបចំតាំងពិព័រណ៍វប្បធម៌ដោយផ្ទាល់នៅសារមន្ទីរជាតិ និង​ការ​បញ្ចាំងខ្សែ ភាពយន្តនៅរោងភាពយន្ត ​មេជើរស៊ីនេផ្លិច​ សាខាអ៊ីអន១ ក្នុងរាជធានីភ្នំពេញ។សម្តេចតេជោ ​បានបរិយាយទៀតថា​ ភាពចម្រុះ ​នៃវប្បធម៌អាស៊ី និងអឺរ៉ុប នឹងត្រូវបានប្រារព្ធឡើង នៅក្នុងមហោស្រពនេះ​ ជាមួយនឹងសិល្បៈទស្សនីយភាពច្រើនទម្រង់​ ការតាំងពិព័រណ៍ ការ​ចាក់​បញ្ចាំងខ្សែ ​ភាពយន្ត និងកិច្ចពិភាក្សា​ ក្នុងគោលបំណងជំរុញ​ទំនាក់ទំនង​រវាងប្រជាជន ​និងប្រជាជន ការចែករំលែក ​បទពិសោធន៍ និងការយល់ដឹងអំពីភាពផ្សេងៗគ្នា ​នៃវប្បធម៌ ដែលនាំមកនូវ​សុខដុមភាព ​ការអភិវឌ្ឍ និងកិច្ចសន្ទនាកាន់តែប្រសើរឡើងរវាងទ្វីបទាំងពីរ៕អត្ថបទ៖ យន់ វ៉ាន់

កងទ័ពកំណត់ថ្ងៃទី១៥ ខែវិច្ឆិកា ដើម្បីចាប់ផ្តើមចាក់វ៉ាក់សាំងដូសជំរុញជូនពលរដ្ឋតាមបណ្តាខេត្ត

2021/11/04 01:28:18 pm        500
Facebook Telegram Linkin
ភ្នំពេញ ៖ នាយឧត្តមសេនីយ៍ ឥត សារ៉ាត់ ប្រធានប្រតិបត្តិចាក់វ៉ាក់សាំងកូវីដ១៩ ក្របខណ្ឌក្រសួងការពារជាតិ បានឲ្យដឹងថា នៅថ្ងៃទី ១៥ខែវិច្ឆិកានេះ ក្រុមគ្រូពេទ្យយោធា នឹងចាប់ផ្តើមដំណើរការចាក់វ៉ាក់សាំងកូវីដ ជំរុញជូនប្រជាពលរដ្ឋខេត្តតាកែវ ដំបូងគេ ខណៈខេត្ត៧ផ្សេងទៀត នឹងទទួលបានការចាក់ជាបន្តបន្ទាប់។ថ្លែងប្រាប់BTV តាមទូរស័ព្ទ នៅថ្ងៃទី៤ ខែវិច្ឆិកា ឆ្នាំ២០២១នេះ នាយឧត្តមសេនីយ៍ ឥត សារ៉ាត់ អគ្គមេបញ្ជាការរង ​នាយសេនាធិការកងយោធពលខេមរភូមិន្ទ និងជាប្រធានប្រតិបត្តិចាក់វ៉ាក់សាំង​កូវីដ១៩ បានឲ្យដឹងថា តាមការណែនាំដ៏ខ្ពង់ខ្ពស់របស់ប្រមុខរាជរដ្ឋាភិបាលជុំវិញ​យុទ្ធនាការ​ចាក់វ៉ាក់​សាំងជូនប្រជាពលរដ្ឋនូវដូសជំរុញ ​ ឬដូសទី៣នេះ ​កងយោធពលខេមរភូមិន្ទ និងកងឯកភាព​ចំណុះទាំង​អស់​បានរៀបចំ និងត្រៀមរួចរាល់ ដើម្បីដំណើរការចាក់បន្តទៀតជូមប្រជាពលរដ្ឋ​តាម​បណ្តាខេត្ត។ នាយឧត្តមសេនីយ៍ ឥត សារ៉ាត់ បន្តថា ចំពោះផែនការក្រោយពីបានប្រជុំ​ជាមួយរដ្ឋបាលខេត្តទាំង៨​ ដែលកងទ័ពបានចុះទៅចាក់វ៉ាក់សាំងជូនប្រជាពលរដ្ឋក្នុងខេត្តចំនួន៨ រួមមាន ​ខេត្តព្រះសីហនុ កោះកុង កំពង់ស្ពឺ តាកែវ កំពង់ចាម ស្វាយរៀង សៀមរាប ​និងបន្ទាយមានជ័យ គឺសម្រេចកំណត់​ថ្ងៃទី១៥ ខែវិច្ឆិកានេះ នឹងចាប់ផ្តើមយុទ្ធនាការចាក់ដូសជំរុញជូនប្រជាពលរដ្ឋក្នុងខេត្តតាកែវ ខណៈខេត្ត​ចំនួន៧ផ្សេងទៀត នឹងរៀបចំចាក់ជាបន្តបន្ទាប់ក្រោយពីបានចាក់ដូស​ទី២​រយៈពេល៤ខែ​ឡើងទៅ។នាយឧត្តមសេនីយ៍ ឥត សារ៉ាត់ បានគូសបញ្ជាក់ថា យោងតាមផែនការអំពីការចាក់វ៉ាក់សាំង​ដូស​ជំរុញ​ជូនប្រជាពលរដ្ឋតាមបណ្តាខេត្ត ​គឺក្រុមការងារមានសមត្ថភាព​ និងបទពិសោធនគ្រប់គ្រាន់ ដើម្បី​បន្តចូលរួម​អនុវត្តការចាក់ដូសជំរុញនេះ​ឲ្យបានកាន់តែល្អប្រសើរ។ដោយឡែកនាយឧត្តមសេនីយ៍ ឥត សារ៉ាត់ ​បានឲ្យដឹងទៀតថា មុនដំណើរការចាក់វ៉ាក់សាំង​ជូន​ប្រជាពលរដ្ឋនូវដូស​ជំរុញតាមបណ្តាខេត្ត បច្ចុប្បន្ននេះកងទ័ពកំពុងបន្តការចាក់ជូនប្រជាពលរដ្ឋ​ក្នុង​រាជធានីភ្នំពេញ​នៅឡើយទេ ដោយសារទីតាំងមួយចំនួនក្នុងចំណោមខណ្ឌទាំង៦​ ដែលចាក់​ដោយ​កងទ័ពនោះបន្តមានប្រជាពលរដ្ឋទៅចាក់វ៉ាក់សាំងជារៀងរាល់ថ្ងៃ។គិតត្រឹមថ្ងៃទី៣ ខែវិច្ឆិកា ​ក្នុងចំណោមប្រជាពលរដ្ឋក្នុងរាជធានីភ្នំពេញសរុប ​១,០២៦,១២៦នាក់ ដែល​បានចាក់ដោយក្រុមគ្រូពេទ្យកងទ័ពដូសទី ១ និងដូសទី២ កន្លងមក មានប្រជាពលរដ្ឋដែល​បាន​ចាក់ដូសជំរុញចំនួន ៥៩២,៣១៩នាក់ ខណៈចំនួនប្រជាពលរដ្ឋតាមបណ្តាខេត្ត​ដែលកងទ័ព​នឹង​ត្រូវចាក់ជូននោះមានចំនួនជាង១លាន៤សែននាក់៕អត្ថបទ ៖ សេក ឧត្តម

សិស្សថ្នាក់ទី១២ បញ្ចេញទស្សនៈផ្សេងៗគ្នា ជុំវិញការពិនិត្យពន្យារពេលប្រឡងបាក់ឌុប

2021/11/04 01:09:09 pm        662
Facebook Telegram Linkin
ភ្នំពេញ ៖ ក្រសួងអប់រំ យុវជន និងកីឡា ពិចារណាពន្យារពេលប្រឡងសញ្ញាបត្របាក់ឌុប ទៅដើមឆ្នាំ២០២២ ដើម្បីផ្ដល់ពេលវេលាបន្ថែមជូនសិស្ស ក្នុងការសិក្សា។ ការពិចារណាពន្យារពេលប្រឡងនេះ សិស្សថ្នាក់ទី ១២ មួយចំនួនបង្ហាញការគាំទ្រ ហើយក៏មានសិស្សខ្លះចង់ឲ្យរក្សាកាលបរិច្ឆេទថ្ងៃប្រឡងដដែល គឺនៅថ្ងៃទី៦ខែធ្នូ ឆ្នាំ២០២១ដដែល ។ពាក់ព័ន្ធការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) ក្រសួងអប់រំ យុវជន និងកីឡា នឹងពិនិត្យលើកពេលប្រឡងសញ្ញាប័ត្រមធ្យមសិក្សាទុតិយភូមិថ្នាក់ទី១២ ​ទៅដើមឆ្នាំ ២០២២ វិញ ដើម្បីទុកឱកាស​ជូនសិស្សថ្នាក់ទី១២ មាន​ពេលបន្ថែមរៀនត្រៀមប្រឡង។ ក្នុងសប្តាហ៍នេះ ថ្នាក់ដឹកនាំក្រសួងអប់រំ យុវជន និងកីឡា នឹងប្រជុំ​វាយតម្លៃ​ស្ថានការណ៍​ពាក់ព័ន្ធ ដើម្បីបន្តរៀបចំការប្រឡងបាក់ឌុប​ និងជម្រាបដំណឹងជូនសាធារណជន។ ចំពោះការប្រឡងបាក់ឌុបថ្នាក់ជាតិ គឺក្រសួងនៅតែបន្តអនុវត្តន៍គោលការណ៍ច្បាប់ យុត្តិធម៌ តម្លាភាព និង​លទ្ធផល​ទទួល​យក​បាន ស្របនឹងវិធានការសុវត្ថិភាពសុខភាព។សម្រាប់ការពិចារណាពន្យារពេលប្រឡងនេះ សិស្សថ្នាក់ទី ១២ សិក្សានៅវិទ្យាល័យ សេរីភាព ក្រុងតាខ្មៅ ខេត្តកណ្ដាល មានការយល់ឃើញផ្សេងៗគ្នា។ ការយល់ឃើញរបស់ពួកគេ គឺមានទាំងការគាំទ្រ និងមានទាំង ការចង់ អោយរក្សាកាលបរិច្ឆេទចាស់នៅថ្ងៃទី ៦ ខែធ្នូឆ្នាំ ២០២១។សិស្សថ្នាក់ទី១២មួយរូបបានលើកឡើងថា ខ្លួនចង់អោយរក្សាកាលបរិច្ឆេទប្រឡងចាស់ ថ្ងៃទី ៦ខែធ្នូឆ្នាំ ២០២១។ យុវតី​លើកឡើងបែបនេះ ​ដោយយល់ឃើញថា បានត្រៀមខ្លួចរួចរាល់​សម្រាប់​ការ​ប្រឡងហើយ។យ៉ាងណាម៉ិញ សិស្សថ្នាក់ទី ១២ ពីររូបទៀត យល់ឃើញថា ការប្រឡងជារឿងចាំបាច់ តែពួកគេចង់​អោយក្រសួងអប់រំ ពន្យា​រពេលប្រឡង ។ ​ការចង់អោយពន្យារពេលប្រឡងនេះ ក៏ដោយសារពួកគេ​ត្រូវការពេលវេលាបន្ថែមទៀត ដើម្បី​ពង្រឹងសមត្ថភាពអោយកាន់តែល្អប្រសើរសម្រាប់ការប្រឡង។ សូមបញ្ជាក់ថា ការបញ្ចេញទស្សនៈខុសៗគ្នា របស់សិស្សថ្នាក់១២នេះ បន្ទាប់ពីរដ្ឋមន្រ្តីក្រសួងអប់រំ យុវជន និងកីឡា នៅថ្ងៃទី ៣ខែវិច្ឆិកា ឆ្នាំ២០២១ម្សិលមិញ ក្នុងឱកាសចុះពិនិត្យ ទស្សនកិច្ច និង​សម្ពោធ​វិទ្យាស្ថានស្រាវជ្រាវ​សេដ្ឋកិច្ច​អាស៊ាន ​នៃសាកលវិទ្យាល័យ​ជាតិគ្រប់គ្រង ​បានថ្លែងថា ក្រសួងអប់រំ ​នឹង​ពិនិត្យ​មើល​ពន្យារ​ពេល​ប្រឡង​សញ្ញាប័ត្រ​មធ្យម​សិក្សាទុតិយភូមិថ្នាក់ទី១២ ទៅ​ដើមឆ្នាំ២០២២វិញ ដើម្បី​អោយសិស្សអាចត្រៀមខ្លួនមានពេលគ្រប់គ្រាន់។ ​ហើយ​ការប្រឡង​ទៀត​សោធ​ ដើម្បីលើកទឹកចិត្តអោយសិស្សខំប្រឹងរៀន ហើយក្រសួងកំពុងតែ​ពិភាក្សា​រៀបចំ​ប្រឡង​យ៉ាងណា ដោយសារសម្តេចនាយករដ្ឋមន្ត្រី បានសម្រេចថា ​ត្រូវប្រឡង​អោយបានល្អផងដែរ៕ អត្ថបទ ៖ គឹមហុក

ជនជាតិដើមភាគតិចកម្ពុជា នឹងទទួលបានការជំរុញកម្រិតជីវភាព និងការអភិវឌ្ឍពីរាជរដ្ឋាភិបាល

2021/11/04 12:25:31 pm        678
Facebook Telegram Linkin
ភ្នំពេញ ៖ នៅថ្ងៃទី៤ ខែវិច្ឆិកានេះ ឯកឧត្តមទេសរដ្ឋមន្ត្រី ឆាយ ថន រដ្ឋមន្ត្រីក្រសួងផែនការ និងឯកឧត្តម អ៊ុក រ៉ាប៊ុន រដ្ឋមន្ត្រីក្រសួងអភិវឌ្ឍន៍ជនបទ បានចូលរួមក្នុងពិធីផ្សព្វផ្សាយរបាយការណ៍ជាតិ ស្តីពីស្ថានភាពប្រជាសាស្ត្រ និងសង្គម សេដ្ឋកិច្ច របស់ជនជាតិដើមភាគតិចកម្ពុជានៅសណ្ឋាគារហ៊ីម៉ាវ៉ារី។ ឯកឧត្តមកតិសេដ្ឋាបណ្ឌិត ឆាយ ថន ថ្លែងថា តាមរយៈការទទួលបានរបាយការណ៍ជាតិនេះ រាជរដ្ឋាភិបាលនឹងបង្កើនការអភិវឌ្ឍន៍ និងបង្កើនកម្រិតជីវភាពជនជាតិដើមភាគតិចអោយបានល្អប្រសើរ។ឯកឧត្តមកតិសេដ្ឋាបណ្ឌិត ឆាយ ថន មានប្រសាសន៍ថា របាយការណ៍ជាតិ ស្តីពីស្ថានភាព​ប្រជា​សាស្ត្រ និងសង្គម សេដ្ឋកិច្ច របស់ជនជាតិដើមភាគតិចកម្ពុជា ​គឺជារបាយការណ៍សំខាន់​ដែល​រាជរដ្ឋាភិបាល​សហការ​រៀបចំ​បង្កើនការ​យក​ចិត្តអភិវឌ្ឍន៍ ​និងអភិរក្ស ដោយមិនទុកចោល​ពលរដ្ឋ​ខ្មែរ​ណាម្នាក់ ​មិន​ទទួល​សេវាអភិវឌ្ឍន៍ពីរដ្ឋឡើយ។ឯកឧត្តម ឆាយ ថន បន្តថា អត្តសញ្ញាណ​ជនជាតិដើមភាគតិចនៅកម្ពុជា ​ត្រូវបានកំណត់តាមរយៈ​ការ​ប្រើ​ភាសា​និយាយពីកំណើត​ ហើយ​មកដល់​បច្ចុប្បន្ន កម្ពុជា ​បានកំណត់អត្តសញ្ញាណ​បាន​ចំនួន២២ អំបូរ​ជនជាតិ​ដើម​ភាគតិច ​ដែលមានប្រជាជនសរុបចំនួនជាង១៨ម៉ឺននាក់​ដែល​ស្មើ​នឹង១.៣៤% ​នៃប្រជាជនកម្ពុជា​សរុប​នៅ​ក្នុង​ឆ្នាំ២០០៨ ហើយមានកំណើនឡើង​ប្រមាណ០.៥១% ក្នុងមួយឆ្នាំៗ។ឯកឧត្តម បន្តថា បច្ចុប្បន្ន ជនជាតិដើមភាគតិច ​កំពុងរស់នៅស្ទើរគ្រប់រាជធានី ខេត្ត ​ប៉ុន្តែភាគច្រើន​លើស​លប់​នៃ​ជនជាតិដើមភាគតិចទំាងអស់នោះមានរស់នៅក្នុងខេត្តចំនួន៦​តែប៉ុណ្ណោះ​ រួមមាន ៖ ខេត្តរតនគិរី មណ្ឌលគិរី ក្រចេះ ស្ទឹងត្រែង កំពង់ធំ ​និងខេត្តព្រះវិហារ ​ដែលមានចំនួនរហូត ​៩២.៤% នៃជន​ជាតិ​ដើមភាគតិច​រស់​ទាំង​អស់​នៅ​ឆ្នាំ​២០១៣។ឯកឧត្តម​បណ្ឌិតសភារ្យ អ៊ុក រ៉ាប៊ុន ថ្លែងថា តាមរយៈការទទួលបានរបាយការណ៍ជាតិ​ស្តីពី​ស្ថានភាព​ប្រជាសាស្ត្រ ​និង​សង្គម សេដ្ឋកិច្ចរបស់ជនជាតិដើមភាគតិចនៅកម្ពុជា​នេះ​គឺ​​បានផ្តល់នូវធាតុ​ជា​ច្រើន ​ដែលនឹងជួយជម្រុញដល់​ការ​ដាក់​ផែនការជាតិនានា ​ការរៀបចំគោលនយោបាយ និង​ការ​លើក​គម្រោង​អភិវឌ្ឍន៍ និងអភិរក្សលើកស្ទួយ​វិស័យ​សេដ្ឋកិច្ច សង្គម និងវប្បធម៌របស់ជនជាតិ​ដើម​ភាគតិច អោយបានល្អប្រសើរ ​ពិសសេស ​ការចូលរួមកាត់បន្ថយ​ភាព​ក្រីក្រ និងបញ្ហាប្រឈម​នានា​​ទៀត ដល់ជនជាតិដើមភាគតិច។លោក ភាព សុជា នាយកប្រតិបត្តិស្តីទី អង្គការជនជាតិដើមភាគតិចកម្ពុជា ថ្លែងថា របាយការណ៍​ជាតិ ស្តីពី​ស្ថានភាព​ប្រជាសាស្ត្រ និងសង្គម ​សេដ្ឋកិច្ចរបស់ជនជាតិដើមភាគតិចនៅកម្ពុជា គឺជា​ទិន្នន័យ​ថ្នាក់​ជាតិ​តែមួយគត់​ក្នុង​ប្រវត្តិសាស្ត្រនៃការគាំទ្រ និងការអភិវឌ្ឍន៍លើផ្នែកទិន្នន័យសម្រាប់​ជន​ជាតិ​ដើមភាគតិចនៅកម្ពុជា ហើយ​របាយការណ៍​នេះ ក៏ជាមគ្គុទេសក៍សំខាន់សម្រាប់តម្រង់​ទិសដល់ការរៀបចំផែនការជាតិ ស្តីពីការអភិវឌ្ឍន៍​ និង​អភិរក្ស​ជនជាតិដើមភាគតិច ដោយឈរ​លើ​ទិន្នន័យវិទ្យាសាស្ត្រ ដែលស្របតាមសេចក្តីតម្រូវការក្នុងការ​អភិវឌ្ឍន៍​អភិរក្ស​ក្នុង​ស្ថានភាពសង្គម សេដ្ឋកិច្ច និងវប្បធម៌ ​ដូចមានចែងក្នុងរដ្ឋធម្មនុញ្ញ ច្បាប់ជាតិ ​និងលិខិ​តូបករណ៍​អន្តរជាតិ​នានាទៀត៕អត្ថបទ ៖ ស៊ុម សុខជា

សម្តេចតេជោ និងសម្ដេចកិត្តិព្រឹទ្ធបណ្ឌិត ផ្តល់ថវិកា២០លានរៀល និងផ្ទះ២ខ្នងដល់គ្រួសារកុមារ គង់ សីហា

2021/11/03 05:09:18 pm        2675
Facebook Telegram Linkin
សៀមរាប ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន នៅថ្ងៃទី០៣ ខែវិច្ឆិកា ឆ្នាំ២០២១នេះ តាមរយៈឯកឧត្តម ទៀ សីហា អភិបាលខេត្តសៀមរាប បានផ្តល់ថវិកា២០លានរៀល និងផ្ទះ២ខ្នងដល់គ្រួសារក្មេងប្រុស គង់ សីហា អាយុ៧ឆ្នាំ រស់នៅក្នុងភូមិត្មាតពង ឃុំរុនតាឯក ស្រុកបន្ទាយស្រី ខេត្តសៀមរាប។ បន្ទាប់ពីសម្តេចបានឃើញរូបភាពក្មេងប្រុសរូបនេះ ឈរដោះស្បែកជើង ពាក់ម៉ាស និងមានចងព្យួរស្បោងកាតចាក់វ៉ាក់សាំងនៅនឹងក ពេលទៅរៀននៅសាលាបឋមសិក្សាជ័យ។ ក្រៅពីនេះរដ្ឋបាលខេត្តសៀមរាបក៏បានផ្តល់ទូរស័ព្ទ និងស្បៀងអាហារមួយចំនួនទៅដល់គ្រួសារក្មេងប្រុស គង់ សីហា នេះផងដែរ។ក្មេងប្រុស គង់ សីហា ជាសិស្សរៀនថ្នាក់ទី១ នៅក្នុងសាលាបឋមសិក្សាជ័យ នៃឃុំរុនតាឯក មានប្អូនស្រីម្នាក់ទៀតអាយុ៣ឆ្នាំ និងស្ថិតក្នុងគ្រួសារដែលមានជីវភាពខ្វះខាត ដែលមាន​ឳពុកម្តាយ​ជាកសិករដើរប្រវាស់ដីស្រែគេធ្វើនៅក្នុងស្រុកស្វាយលើ ដោយហេតុតែមិនមានដី​ស្រែចម្ការផ្ទាល់ខ្លួន​សម្រាប់ធ្វើនោះទេ។ កន្លងមក ពួកគាត់តែងតែយកកូនទៅធ្វើស្រែនៅឯស្រុកស្វាយលើជាមួយ ដោយសារតែមិនទាន់អាចចូលរៀនបាន តែដល់ពេលសាលាបើកទទួលឱ្យចូលរៀន ទើបយក​កូនមកផ្ញើរជាមួយមីង ឬអ្នកជិតខាងនៅជាប់ផ្ទះឱ្យជួយមើល និងដើម្បីឱ្យកូនបាន​ចូលរៀននឹងគេ។ឯកឧត្តម ទៀ សីហា បានមានប្រសាសន៍ថា ដោយសារតែក្មួយប្រុសមានចិត្តចង់រៀនសូត្រ តែជីវភាពក្នុងគ្រួសារមានការលំបាក ដូច្នេះហើយបានជាសម្តេចទាំងទ្វេ ក៏ដូចជាសប្បុរសជន​ផ្សេងៗ​ជាច្រើនបានជួយដល់ពួកគាត់ អាចឱ្យក្មេងប្រុសនេះ​ មានសម្ភារបានរៀនសូត្រ និងមាន​ផ្ទះសម្បែងរស់នៅដូចជាគេដូចឯង។ ជាមួយគ្នានេះ ឯកឧត្តម ក៏បានណែដល់ឪពុកម្តាយរបស់កុមារ គង់ សីហា ត្រូវតែឱ្យកូនទៅរៀន ដោយ​ខាងអាជ្ញាធរ និងជួយជ្រោមជ្រែង។ ​ហើយអាជ្ញាធរក៏កំពុងសិក្សាមើល ដើម្បីរកវិធី​ជួយ​គាត់ដើម្បីមានមុខរបរ ឬការងារធ្វើនៅក្នុងភូមិ​ ងាយស្រួលឱ្យកូនៗបានរៀនសូត្រ ទទួលបានចំណេះដឹង។សូមបញ្ជាក់ថា សម្រាប់ផ្ទះ២ខ្នងដែលសម្តេចផ្តល់ជូននេះ ១ខ្នងជូនដល់គ្រួសារក្មេងប្រុស គង់ សីហា និង១ខ្នងទៀតផ្តល់ជូនដល់គ្រួសារប្អូនស្រីរបស់ម្តាយ គង់ សីហា ដែលមានជីវភាព​ខ្វះខាតដែរ៕ 

រមណីយដ្ឋានទឹកធ្លាក់អូរគគីរកំពុងទាក់ទាញក្រសែភ្នែកភ្ញៀវទេសចរ

2021/11/03 04:45:45 pm        958
Facebook Telegram Linkin
កំពង់ស្ពឺ ៖ ទឹកធ្លាក់អូរគគីរ គឺជារមណីយដ្ឋានទេសចរណ៍ធម្មជាតិមួយ ដែលកំពុងទទួលបានការចាប់អារម្មណ៍ច្រើនពីក្រសែភ្នែកភ្ញៀវទេសចរណ៍។ ទឹកធ្លាក់ធម្មជាតិនេះ មានទីតាំងស្ថិតក្នុងភូមិសាស្រ្ត ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ និងមានចំងាយប្រមាណ៥គីឡូម៉ែត្រប៉ុណ្ណោះពីទីសក្ការៈ បូជាលោកយាយម៉ៅនៃតំបន់ពេជ្រនិល ឬប្រសិនបើលោកអ្នកធ្វើដំណើរចេញពីទីសក្ការៈលោកយាយម៉ៅ ឆ្ពោះទៅខេត្តព្រះសីហនុ ក្នុងរយៈពេលត្រឹមតែ៥នាទីប៉ុណ្ណោះ នោះលោកអ្នកនឹងឃើញ ទឹកធ្លាក់ដ៏ស្រស់ត្រកាលបង្អួតរាងកណ្ដាលដងព្រៃ កំពង់រង់ចាំទទួលស្វាគមន៍ភ្ញៀវទេសចរ មកពីគ្រប់ទិសទី។ទឹកធ្លាក់មានរយៈកម្ពស់ជិត១០០ម៉ែត្រ បានហូរឆ្លងកាត់ល្បាក់ថ្មភ្នំជាច្រើនដំណាក់កាល​បង្កើត​បានជាខ្សែទស្សនីយភាពដ៏ល្អឯក ប្លែកពីកន្លែងដងជ្រោះដទៃទៀត។ ទឹកធ្លាក់ធម្មជាតិមួយនេះ ត្រូវបានគេរកឃើញជាយូរមកហើយ ប៉ុន្តែពីមុនមិនសូវមានអ្នកទៅទស្សនា ប៉ុន្មានទេ ដោយសារស្ថានភាពផ្លូវមិនសូវអំណោយផលដល់ការធ្វើដំណើរ។ រហូតមកសល់ពេលនេះ ផ្លូវឆ្ពោះទៅកាន់ទឹកធ្លាក់ត្រូវបានឈូសឆាយល្អជាងពេលមុន ដែលបង្កភាពងាយស្រួលក្នុងការធ្វើ ដំណើរចូលទៅ ហើយក៏អាចបររថយន្តចូលទៅដល់ផ្នែកខាងក្រោមបានផងដែរ។ ដើម្បីបន្តដំណើរ ទៅកម្សាន្តនៅទឹកធ្លាក់បាន អ្នកទេសចរណត្រូវថ្មើជើងប្រមាណ១០នាទីទៀត ដោយសារស្ថានភាព ផ្លូវមានសភាពចោទបន្តិច។តាមរយៈការផ្ដល់ព័ត៌មានពីអ្នកភូមិដែលរស់នៅក្បែរតំបន់នោះ បានឱ្យដឹងថា ទឹកធ្លាក់ដ៏ស្រស់ ត្រកាលនេះ មានប្រភពពីចេញពីអាងទឹកធម្មជាតិដ៏ធំមួយ ស្ថិតនៅផ្នែកខាងលើនៃខ្នងភ្នំពេជ្រនិល។ សម្រាប់អ្នកចូលចិត្តធ្វើដំណើរផ្សងព្រេង អាចឡើងសាកល្បងឡើងតាមជម្រាលភ្នំជាមួយអ្នកភូមិទៅ មើលអាងធម្មជាតិលើខ្នងភ្នំបាន ព្រោះធ្វើដំណើរសរសៀរតាមជម្រាលថ្មប្របនឹងដងជ្រោះក៏បាន។ នៅតំបន់រមណីយដ្ឋានទឹកធ្លាក់អូរគគីរ បច្ចុប្បន្នត្រូវបានប្រជាពលរដ្ឋដែលរស់នៅក្បែរតំបន់នោះ រៀបចំសេវាកម្មទេសចរណ៍មួយចំនួនដូចជា ៖ សេវាកម្មម្ហូបអាហារ ខ្ចុះស្បូវសម្រាប់អង្គុយសម្រាកលម្ហែ ព្រមទាំងមានរៀបចំជាផ្ទះស្នាក់ និងបឹងកាឡូត្រៀមទទួលភ្ញៀវទេសចរ ដែលចង់ស្នាក់នៅក្បែរជើងភ្នំ ថែមទៀតផង។ ក្នុងដំណើរកម្សាន្តឆ្លងកាត់ភូមិសាស្រ្តពេជ្រនិលនៃខេត្តកំពង់ស្ពឺ ប្រសិនបើខកខាន មិនបានចូលទៅ កម្សាន្តនៅទឹកធ្លាកអូរគគីរ ពិតជាគួរឱ្យស្ដាយណាស់៕ ដោយ៖ ចេន សុជាតា

ថៃអាចនឹងឲ្យកម្ពុជាដឹកវ៉ាក់សាំងកូវីដ១៩ចូលទឹកដីខ្លួន ដើម្បីចាក់ជូនពលរដ្ឋខ្មែរដែលកំពុងរស់នៅទីនោះ

2021/11/03 03:25:51 pm        397
Facebook Telegram Linkin
ភ្នំពេញ ៖ រាជរដ្ឋាភិបាលថៃ បានលើកឡើងថា ខ្លួនអាចនឹងឲ្យភាគីកម្ពុជាដឹកវ៉ាក់​សាំង​ប្រឆាំង​កូវីដ១៩ ចូលទឹកដីរបស់ខ្លួន ដើម្បីចាក់ជូនដល់បងប្អូនពលករ និងប្រជាពលរដ្ឋខ្មែរ ដែលកំពុង​រស់នៅទីនោះ ប៉ុន្តែជំនាញទាំងពីរភាគីកម្ពុជា-ថៃ បានកំពុងពិភាក្សាគ្នាយ៉ាង​យក​ចិត្តទុកដាក់​ចំពោះ​ករណីនេះ។ថ្លែងប្រាប់ទូរទស្សន៍BTV ពីប្រទេសថៃ តាមរយៈសាអេឡិចត្រូនិច (តេលេក្រាម) ក្រោយ​ពីកិច្ច​ជំនួបជាមួយ លោកវិស្នុ គ្រឿងង៉ាម ឧបនាយករដ្ឋមន្រ្តី នៃព្រះរាជាណាចក្រថៃ​ កាលពីម្សិលមិញ ឯកឧត្តម សុខ សុក្រឹត្យា រដ្ឋលេខាធិការក្រសួងទេសចរណ៍ ​និងទីប្រឹក្សាសម្តេចតេជោ ហ៊ុន សែន នាយករដ្ឋមន្រ្តី បានលើកឡើងថា ទាក់ទងនឹងសំណើរបស់កម្ពុជាដែលចង់ដឹកវ៉ាក់សំាង កូវីដ១៩ ចូលក្នុងទឹកដីថៃ​ ដើម្បីចាក់ជូនដល់ជនជាតិខ្មែរយើង ​ដែលរស់នៅទីនោះអាចធ្វើទៅបាន ដោយភាគី ថៃជាអ្នកចាក់ជូន និងភាគីកម្ពុជាគ្រាន់តែចូលរួមសង្កេតការណ៍។ឯកឧត្តម សុខ សុក្រឹត្យា បានបញ្ជាក់ថា នៅក្នុងកិច្ចជំនួបនោះ ឧបនាយករដ្ឋមន្រ្តីថៃ បានលើកឡើងថា ប្រសិនបើកម្ពុជាចង់ធ្វើបែបនេះ (ដឹកវ៉ាក់សាំងចូលទឹកដីថៃ) គឺអាចធ្វើទៅបាន ប៉ុន្តែរហូតមកដល់ពេលនេះគឺមិនទាន់មានកំណត់ទូតចេញនៅឡើយទេ ហើយឯកឧត្តម​កំពុង​ធ្វើការ​ទាក់ទងរឿងនេះ ​តាមកំណត់ទូត ហើយឯកឧត្តម ក៏បានជំរាបដល់សម្តេចតេជោ ​ហ៊ុន សែន ឲ្យបានដឹងផងដែរទាក់ទងនឹងការលើកឡើងរបស់ភាគីថៃនេះ។ឯកឧត្តម សុខ សុក្រឹត្យា បានថ្លែងដោយដកស្រងសម្តីរបស់ឧបនាយករដ្ឋមន្រ្តីថៃថា« រាជ​រដ្ឋាភិបាល​ថៃ​យល់​ស្រប​ឲ្យកម្ពុជា​នាំយក​វ៉ាក់សាំងចូលមកខាងថៃ ​ ចំណែកការចាក់វ៉ាក់សាំង​ជា​តួនា​ទី​របស់​ភាគីថៃ​ ដោយមានខាងកម្ពុជា​ចូលរួមសង្កេតការណ៍។ ប៉ុន្តែទោះជាយ៉ាងណាក៏ដោយតួនាទីនេះ សមត្ថកិច្ចជំនាញជាអ្នកធ្វើការទំនាក់ទំនងគ្នា ពីព្រោះថា​កម្ពុជា​មានវ៉ាក់សាំងដ៏ល្អជាច្រើន ហើយភាគីទាំងពីរបានកំពុងសិក្សា​ដោយ​យកចិត្តទុក​ដាក់​ផងដែរ»។កាលពីថ្ងៃទី១ ខែវិច្ឆិកាកន្លងទៅថ្មីៗនេះ សម្តេចតេជោ ហ៊ុន សែន នាយករដ្ឋមន្រ្តី បាន​ស្នើឲ្យ​មន្រ្តី​កម្ពុជាធ្វើការពិភាក្សាគ្នាជាមួយភាគីថៃ​ ដើម្បីធ្វើការបញ្ជូនវ៉ាក់ប្រឆាំងកូវីដ១៩ ទៅ​ចាក់ជូនបងប្អូន​ពលករខ្មែរ​ដែលកំពុងធ្វើការនៅប្រទេស ខណៈបងប្អូនខ្មែរដែលនៅក្នុងប្រទេស​បានធ្វើការចាក់​រួចរាល់បានជាង៨៥ភាគរយហើយនោះ។ប៉ុន្តែទោះបីជាយ៉ាងណាក៏ដោយការ យល់ព្រម ឬមិនយល់ព្រមឲ្យភាគីកម្ពុជាដឹកវ៉ាក់​សាំងចូល​ទឹកដីថៃ ដើម្បីចាក់ជូនដល់បងប្អូនខ្មែរ​ ដែលរស់នៅទីនោះបាន ឬយ៉ាងណានោះ​ គឺអាស្រ័យ​លើរាជរដ្ឋាភិបាលថៃ​តែប៉ុណ្ណោះ​ ខណៈកម្ពុជាត្រៀមវ៉ាក់សាំង ​ជានិច្ចដើម្បីដឹកទៅនោះ៕អត្ថបទ ៖ បានចក់

អាជ្ញាធរខេត្តកំពង់ធំ ​ចុះពិនិត្យទីតាំងសហគ្រាសធុនតូចលាយបេតុង ​ក្រោយពីពលរដ្ឋរអ៊ូរទាំ​

2021/11/03 08:12:14 am        592
Facebook Telegram Linkin
កំពង់ធំ ៖ អាជ្ញាធរខេត្តកំពង់ធំ នៅថ្ងៃទី០៣ខែវិច្ឆិកានេះ បានចុះពិនិត្យមើលទីតាំងសហគ្រាសធុនតូចលាយបេតុង “តាន់ ប៊ុនឆេង” នៅក្នុងស្រុកំពង់ស្វាយ ក្រោយពីមានការរអ៊ូរទាំពីសំណាក់ប្រជាពលរដ្ឋថា មានផលប៉ះពាល់លើការរស់នៅប្រចាំថ្ងៃ។លោក សុក ហៃ អភិបាលរងខេត្តកំពង់ធំ បានដឹកនាំមន្ទីរជំនាញ និងអាជ្ញាធរពាក់ព័ន្ធចុះពិនិត្យជាក់ស្តែងលើសកម្មភាពសហគ្រាសលាយបេតុងធុនតូច “តាន់ ប៊ុនឆេង” ស្ថិតនៅភូមិថ្នល់បែក ឃុំត្រពាងឬស្សី ស្រុកកំពង់ស្វាយ ខេត្តកំពង់ធំ ក្រោយពីប្រជាពលរដ្ឋរស់នៅក្បែរនោះរាយការណ៍ថា បានធ្វើឲ្យប៉ះពាល់ដល់សកម្មភាពរស់ប្រចាំថ្ងៃ។លោក សុក ហៃ បានឲ្យដឹងថា សកម្មភាពអាជីវកម្មនៃទីតាំងនេះ មានច្បាប់អនុញ្ញាតឲ្យធ្វើអាជីវកម្ម ចាប់ផ្តើមដំណើរការតាំងពីឆ្នាំ២០១៨មកម្លេះ។ ចំពោះការលើកឡើងរបស់ពលរដ្ឋថា មានផល​ប៉ះពាល់​ក្នុងការរស់នៅនោះ ក្រុមការងាររបស់ខេត្តចុះពិនិត្យ ​និងវាយតម្លៃឃើញថា មានតិចតួច គឺបង្កដោយ ​សំឡេងរំខានខ្លះ ​នៃសកម្មភាពក្រឡុក ​ដាក់ថ្មចូលម៉ាស៊ីនជាដើម។លោក បានបន្ថែមថា ក្តីបារម្ភដែលប្រជាពលរដ្ឋលើកឡើង​ គឺស្ថិតនៅលើសំណង់សុំពង្រីកបន្ថែម ដែលបច្ចុប្បន្នសំណង់នេះ​ មិនទាន់មានការសាងសង់រួចនៅឡើយនោះទេ។ទន្ទឹមនោះ មន្ទីរជំនាញ កំពុងពិនិត្យផ្តល់គោការណ៍អនុញ្ញាតស្របតាមបទដ្ឋានលក្ខណៈបច្ចេកទេស ដែលអាចរក្សាបានទាំងផលប្រយោជន៍របស់ក្រុមហ៊ុន និងផលប្រយោជន៍របស់​ប្រជាពលរដ្ឋ​រស់នៅ​ទីនោះ ​ដោយមិនឲ្យមានប៉ះពាល់ដល់សុខភាពប្រជាពលរដ្ឋឡើយ។លោក ពៅ វណ្ណា អនុប្រធានមន្ទីរឧស្សាហកម្ម​វិទ្យាសាស្រ្ត បច្ចេកវិទ្យា​ និងនុវានុវត្តន៍ បាន​បញ្ជាក់​ដែរ​ថា ទីតាំងសហគ្រាសធុនតូចលាយបេតុង “តាន់ ប៊ុនឆេង” មានសុពលភាពគិតចាប់ពីថ្ងៃស្នើសុំ​រហូត​មកដល់ថ្ងៃទី០២ ខែតុលាឆ្នាំ២០២១ តែប៉ុណ្ណោះ។ បន្ទាប់ពីផុតថ្ងៃកំណត់រយៈពេល៣០ថ្ងៃ ក្រុមហ៊ុន ត្រូវដាក់ពាក្យស្នើសុំបន្ត។ ​ដោយឡែកលើទីតាំងនេះដែរ ​ភាគីក្រុមហ៊ុនដាក់ពាក្យស្នើសុំពង្រីកបន្ថែម ដោយធ្វើការសាងសង់ថ្មីតាមបច្ចេកទេស ​ទៅមន្ទីររួចររាល់ហើយ។ក្នុងនោះមន្ទីរឧស្សាហកម្ម វិទ្យាសាស្រ្ត បច្ចេកវិទ្យា និងនុវានុវត្តន៍ កំពុងសិក្សារលម្អិត និងស្នើដល់​អាជ្ញាធរ​មូលដ្ឋាន​ចូលរួមពិនិត្យ ​ដើម្បីវាយតម្លៃពីសកម្មភាព ​ដែលអាចប៉ះពាល់ប្រជាពលរដ្ឋ និង​ស្នើ​ដល់សហគ្រាសបន្តកែតម្រូវបន្ថែមមុន​អនុញ្ញាត​ច្បាប់​ឲ្យធ្វើអាជីវកម្ម។លោក តាន់ ប៊ុនឆេង ម្ចាស់សហគ្រាសនេះ ​បាន​ទទួលស្គាល់ថា ការអនុវត្តការងារកន្លងមក​មាន​ផល​ប៉ះពាល់តិចតួច​ពិតមែនដល់ប្រជាពលរដ្ឋរស់នៅក្បែរនោះ ​ហើយលោកនឹងទទួលយកសំណើរបស់​ពលរដ្ឋ ​ទទួលយក​គោលការណ៍​បច្ចេកទេស​របស់អាជ្ញាធរ ​និងមន្ទីរជំនាញ ដោយឈរលើផល​ប្រយោជន៍​រួម ​ស្របតាមគោលការណ៍ច្បាប់ ​មិនធ្វើប៉ះពាល់សុខភាពសាធារណៈ៕អត្ថបទ ៖ លី សាងស៊ីន

កុមារតូចចាប់ផ្តើមប្រើប័ណ្ណចាក់វ៉ាក់សាំងថតចម្លងពេលចូលរៀន ដោយចៀសវាងការខូតខាតច្បាប់ដើម

2021/11/03 01:19:31 pm        337
Facebook Telegram Linkin
កណ្ដាល ៖ បណ្តាកុមារតូចៗ នៅតាមបណ្តាសាលារៀនមួយចំនួន បានចាប់ផ្តើមប្រើប្រាស់ប័ណ្ណចាក់វ៉ាក់សាំងការពារកូវីដ១៩ ជាប័ណ្ណថតចម្លង(ហ្វូតូកូពី) ពាក់ពេលចូលរៀន ក្រោមការជួយរៀបចំពីលោកគ្រូអ្នកគ្រូ និងអាណាព្យាបាល។បណ្តាកុមារតូច និងសាលារៀនមួយចំនួន ក្រុងតាខ្មៅ នៃខេត្តណ្តាល នៅថ្ងៃទី៣ ខែវិច្ឆិកានេះ កត់សំគាល់ឃើញថា បានចាប់ផ្តើមធ្វើការណែនាំដល់កុមារតូច និងអាណាព្យាបាលកូនតូច ជួយរៀបចំកូពីប័ណ្ណចាក់វ៉ាក់សំាង​ការ​ពារ​កូវីដ-១៩អោយកូនតូច ពាក់ចូលរៀនជំនួស​អោយ​ប័ណ្ណចាក់វ៉ាក់សាំងច្បាប់ដើម ដើម្បីពាក់និងការពារការបាត់បង់ ឬ​ត្រូវ​ទឹក​ភ្លៀង​សើម​ឲ្យខូចប័ណ្ណចាក់វ៉ាក់សាំងច្បាប់ដើម ។ការបង្ហាញប័ណ្ណចាក់វ៉ាក់សាំងពេលចូលរៀននេះ ឲ្យប្រាកដថាកុមារតូច ចាប់ពីអាយុ៦ឆ្នាំឡើងទៅ បានចាក់​វ៉ាក់​សាំងរួចរាល់ ទទួលបានការការពារ ​និងចូលរួមអនុវត្តវិធានសុខាភិបាល ដើម្បី​ទប់ស្កាត់កូវីដ-១៩ និងការរៀន​តាម​គន្លង​ប្រក្រតី​ភាពថ្មីប្រកបដោយសុវត្ថិភាព។ ចំណែកឯកុមារតូចនៅកំរិតមត្តេយ្យសិក្សាវិញក៏បានចូលរៀនវិញផងដែរ ពួកគេមួយចំនួន​មិនទាន់​បាន​ចាក់វ៉ាក់​សាំង​ទេ ខណៈដែលរាជរដ្ឋាភិបាលទើបចាប់ផ្តើមបើកចាក់វ៉ាក់​សាំង​សម្រាប់​ក្មេង​អាយុ៥ឆ្នាំបន្តទៀត។ ចំពោះកុមារក្រោម៥​ឆ្នាំ​ដែល​មិន​ទាន់បានចាក់ក៏បានចូលរៀនដែរ ដោយត្រូវ​បាន​តាមដានជាប់ជាប្រចាំពីសំណាក់លោកគ្រូអ្នកគ្រូប្រចាំថ្នាក់ ​និង​អាណាព្យាបាលរបស់ពួកគេ។កុមារតូច និងអាណាព្យាបាល ក៏បានសូមថ្លែងអំណរគុណជាខ្លាំងដល់ប្រមុខថ្នាក់ដឹកនាំ​រាជ​រដ្ឋា​ភិបាល ដែលបាន​ស្វែង​រកចាក់ជូនមនុស្សចាស់ ហើយចុងក្រោយក៏បាននិងកំពុងដំណើរ​ការចាក់​ជូនកុមារតូចៗទៀត ​និងបានបើក​ឱកាស​អោយ​ពួក​គេបាន​ចូលរៀននៅពេលនេះ។សូមបញ្ជាក់ថា ដើម្បីពន្លឿននិងសំរុកចាក់វ៉ាក់សាំងការពារកូវីដ១៩​ ជូនកុមារតូចអាយុ ៥ឆ្នាំ​ឲ្យ​បាន​លឿន អាជ្ញាធរក៏បានអំពាវនាវអោយអាណាព្យាបាលនាំកូនតូច​អាយុ៥ឆ្នាំទៅចាក់វ៉ាក់សាំង​អោយបានគ្រប់គ្នា ដើម្បី​ទទួល​បាន​ការ​ការ​ពារ បង្កើនប្រព័ន្ធ​ភាពសាំ ​និងទប់ស្កាត់ការរាលដាលខ្លាំង​នៃជំងឺកូវីដ១៩ក្នុងសហគមន៍ ព្រមទាំងអាច​អោយ​កុមារ​ចូល​រៀន​ប្រកបដោយសុវត្ថិភាព៕អត្ថបទ ស៊ុម សុខជា

បណ្ដាញសង្គម

ព័ត៌មានថ្មីៗ

សម្ដេចតេជោ ហ៊ុន សែន ជួបប្រជុំទ្វេភាគីជាមួយឯកឧត្តម ស៊ី ជីនពីង ប្រធានាធិបតីចិន
06/26/2026 11:06 AM
Facebook Telegram Linkin
បាល់ទាត់ពិភពលោក ២០២៦៖ បញ្ចប់ការប្រកួតពូល E បីក្រុមឡើងវគ្គ ៣២ ក្រុម
06/26/2026 11:06 AM
Facebook Telegram Linkin
ភ្នំពេញក្រោន បន្ដឈ្នះសៀមរាប ត្រឹម ១-០ ខណៈស្វាយរៀង ឡើងឈរលេខ៣ នៃលីគនារី សប្ដាហ៍ទី១០
06/26/2026 11:06 AM
Facebook Telegram Linkin
ហាង Randy's Donuts បង្កើតនំដូណាត់ពិសេស អបអរបាល់ទាត់ពិភពលោក​ទាក់ទាញ​អ្នកគាំទ្រ​បាល់ទាត់​នៅ Los Angeles
06/26/2026 11:06 AM
Facebook Telegram Linkin
អគ្គលេខាធិការ គ.ល.ក. ប្តេជ្ញាចិត្តរឹតបណ្តឹងមិនឱ្យមាន Online Scams នៅតាមកាស៊ីណូឡើយ
06/26/2026 11:06 AM
Facebook Telegram Linkin
រដ្ឋមន្រ្ដីក្រសួងការងារ និងឯកអគ្គរដ្ឋទូតនៃសាធារណរដ្ឋកូរ៉េ ប្តេជ្ញាបន្តពង្រឹងកិច្ចសហប្រតិបត្តិការលើវិស័យការងារ បណ្តុះបណ្តាលវិជ្ជាជីវៈ និងអភិវឌ្ឍធនធានមនុស្ស
06/26/2026 10:06 AM
Facebook Telegram Linkin
មេដឹកនាំកូរ៉េខាងជើង ត្រួតពិនិត្យការសាកល្បងអាវុធសំខាន់ដែលគេមើលឃើញថាផ្ដោតលើកូរ៉េខាងត្បូង
06/26/2026 10:06 AM
Facebook Telegram Linkin
កម្ពុជាអំពាវនាវឱ្យមានការអនុវត្តច្បាប់អន្តរជាតិឱ្យបានពេញលេញ ដើម្បីការពារកុមារក្នុងជម្លោះប្រដាប់អាវុធ
06/26/2026 10:06 AM
Facebook Telegram Linkin
កោះតៃវ៉ាន់ សាកល្បងការការពារប្រឆាំងនឹងការគំរាមកំហែងដែនសមុទ្ររបស់ប្រទេសចិន
06/26/2026 10:06 AM
Facebook Telegram Linkin
សម្ដេចធិបតី ហ៊ុន ម៉ាណែត ដឹកនាំកិច្ចប្រជុំពេញអង្គគណៈរដ្ឋមន្ត្រី នៅវិមានសន្តិភាព ដើម្បីពិភាក្សា និងឆ្លងលើរបៀបវារៈមួយចំនួន
06/26/2026 09:06 AM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.