BTV NEWS

សម្ដេចតេជោ គាំទ្រកម្ពុជា-វៀតណាម ចៀសវាងកុំឱ្យមានការប្រើប្រាស់កម្លាំងនៅក្នុងប្រទេសមួយ ប្រឆាំងនឹងប្រទេសណាមួយទៀត

សម្តេចតេជោ ហ៊ុន សែន អនុញ្ញាតឱ្យរដ្ឋមន្ត្រីសន្តិសុខសាធារណៈវៀតណាម ចូលជួបសម្តែងការគួរសម

សម្ដេចធិបតី ហ៊ុន ម៉ាណែត៖ អាទិភាពរបស់រាជរដ្ឋាភិបាល គឺ ប្រទេសជាតិ,ប្រជាជន, ទឹកដី និង ឯករាជ្យភាពជាតិ

សម្ដេចធិបតី៖ យុទ្ធនាការកម្ចាត់ Online Scams ប៉ុន្មានខែចុងក្រោយនេះ បានស្ដារមុខមាត់កម្ពុជាមកវិញ

នយោបាយ និង ការអភិវឌ្ឍន៍

ក្រសួងទេសចរណ៍ ចាប់ផ្តើមរៀបចំប្រព័ន្ធវិញ្ញាបនបត្រវិជ្ជាជីវៈទេសចរណ៍ជំរុញយុវជនបន្តសិក្សាលើជំនាញទេសចរណ៍

ភ្នំពេញ ៖ ដើម្បីជំរុញអោយយុវជនកម្ពុជាដែលបានបោះបង់ការសិក្សានានា ទទួលបានសិក្សាជំនាញនានា ជាបន្តបន្ទាប់ក្នុងវិស័យទេសចរណ៍ផងដែរនោះ និងអាចចូលបំរើការងារនៅតាមមូលដ្ឋានអាជីវកម្មទេសចរណ៍បាន ក្រសួងទេសចរណ៍បានសម្រេចរៀបចំគុណវុឌ្ឍិជាតិវិជ្ជាជីវៈទេសចរណ៍ វិញ្ញាបនបត្រវិជ្ជាជីវៈកម្រិតដំបូង ជូនដល់យុវជនដែលសិក្សាជំនាញទេសចរណ៍ចប់អាចយកវិញ្ញាបនបត្រនោះទៅប្រើប្រាស់ស្វែងរកការសិក្សាជំនាញបន្តរហូតកម្រិតឧត្តមសិក្សា។នៅក្នុងកិច្ចប្រជុំបច្ចេកទេសស្តីពី ការរៀបចំគុណវុឌ្ឍិជាតិវិជ្ជាជីវៈទេសចរណ៍ វិញ្ញាបនបត្រវិជ្ជាជីវៈលើជំនាញសេវាម្ហូបអាហារ និងភេសជ្ជៈ ជំនាញការិយាល័យជួរមុខ និងគេហកិច្ច នៅល្ងាចថ្ងៃទី២១ ខែមិថុនានេះ ។លោក ជួប រតនា ប្រធាននាយកដ្ឋានផែនការអភិវឌ្ឍទេសចរណ៍ និងប្រធានលេខាធិការដ្ឋានគណៈកម្មការគ្រប់គ្រងគម្រោងហូកា បានថ្លែងថា នៅក្នុងដំណាក់ដំបូងនេះ ក្រសួងទេសចរណ៍ចាប់ផ្តើមរៀបចំវិញ្ញាបនបត្រវិជ្ជាជីវៈ១ ក្របខ័ណ្ឌគុណវុឌ្ឍិជាតិ ជូនដល់បណ្តាយុវជននានាដែលទទួលបានការបណ្តុះបណ្តាលលើ ជំនាញសេវាម្ហូបអាហារនិងភេសជ្ជៈ ជំនាញការិយាល័យជួរមុខ និងគេហកិច្ច ដើម្បីអោយគេយកវិញ្ញាបនបត្រនោះទៅប្រើប្រាស់ស្វែងរកការងារធ្វើផង និងប្រើប្រាស់ដើម្បីបន្តការសិក្សាជំនាញទេសចរណ៍ រហូតដល់បរិញ្ញាបត្ររង និងបរិញ្ញាបត្រជាន់ខ្ពស់ជាដើម។លោក បន្តថា អនុវត្តគម្រោងកិច្ចសហប្រតិបត្តិការជាមួយអង្គការស្វីសខនថាក់ នៅក្នុងដំណាក់កាលបន្ទាប់ក្រសួងទេសចរណ៍នឹងបន្តរៀបចំគុណវុឌ្ឍិជាតិវិជ្ជាជីវៈ វិញ្ញាបនបត្រវិជ្ជាជីវៈលើជំនាញបដិសណ្ឋារកិច្ច ជំនាញចុងភៅ និងជំនាញនានាទៀតក្នុងវិស័យទេសចរណ៍ ហើយគ្រប់យុវជនដែលសិក្សាជំនាញទេសចរណ៍ ដែលទទួលស្គាល់ក្នុងកម្រិតគុណវុឌ្ឍិជាតិវិជ្ជាជីវៈទេសចរណ៍នេះ គេក៏អាចបន្តសិក្សា ឬ អាចដាក់ពាក្យស្នើប្រឡងតេស្តសមត្ថភាពដើម្បីទទួលវិញ្ញាបនបត្រវិជ្ជាជីវៈទេសចរណ៍ និងសញ្ញាប័ត្រដែលទទួលស្គាល់កម្រិតស្តង់ដារអាស៊ានផងដែរ។ឯកឧត្តម ប៉ាក់ សុខុម រដ្ឋលេខាធិការក្រសួងទេសចរណ៍ មានប្រសាសន៍ថា ការបង្កើតគុណវុឌ្ឍិជាតិ វិជ្ជាជីវៈទេសចរណ៍នេះ គឺជាការបង្កលក្ខណៈអោយយុវជនកម្ពុជា ជាពិសេសយុវជនបោះបង់ការសិក្សា យុវជនក្នុងក្រុមងាយរងគ្រោះ យុវជនបាត់បង់ឱកាសការងារនានា និងពលករចំណាកស្រុកនានា ទទួលបានឱកាសការសិក្សា ជំនាញវិជ្ជាជីវៈទេសចរណ៍ ក្នុងប្រព័ន្ធច្បាស់លាស់ដើម្បីទទួលបានការទទួលស្គាល់ជាផ្លូវការលើចំណេះដឹង ជំនាញ និងបទពិសោធន៍ ដែលខ្លួនបានសិក្សានិងអនុវត្ត ព្រមទាំងបើកច្រកអោយយុវជនកម្ពុជាយើងទទួលបានការសិក្សាពេញមួយជីវិត ។ឯកឧត្តម ប៉ាក់ សុខុម បញ្ជាក់ថា តាមរយៈកិច្ចប្រជុំពិគ្រោះយោបល់តាមប្រព័ន្ធ VIDEO CONFERENCE នៅថ្ងៃនេះ គឺជាចំណុចផ្ដើមដ៏មានអត្ថន័យបំផុតសម្រាប់វិស័យទេសចរណ៍កម្ពុជា ពិសេសការផ្តល់ឱកាសអោយយុវជនជំនាន់ក្រោយៗ ទទួលបានការសិក្សាជំនាញវិជ្ជាជីវៈតាម ប្រព័ន្ធដែលមានការទទួលស្គាល់ត្រឹមត្រូវ៕អត្ថបទ ស៊ុម សុខជា

ខេត្តកណ្តាលដំណើរការចាក់វ៉ាក់សាំងកូវីដ-១៩ ជូនពលរដ្ឋទូទៅបានជាង៧០%ហើយ លើកលែងស្ត្រីមានផ្ទៃពោះមិនអនុញ្ញាតចាក់នោះទេ

កណ្ដាល ៖ នៅសល់ប្រមាណតែបីថ្ងៃទៀតប៉ុណ្ណោះ ដំណើរការចាក់វ៉ាក់សាំងការពារកូវីដ-១៩ដូសទី១ នៅតាមទីប្រជុំជន និងកម្មកររោងចក្រតាមក្រុងស្រុកនៅខេត្តកណ្តាល នឹងត្រូវបិទបញ្ចប់ ហើយក្រុមពេទ្យនឹងដំណើរការចាក់តែដូសទី២។ សម្រាប់យុទ្ធនាការចាក់វ៉ាក់សាំងនេះ សំគាល់ឃើញថា បណ្តាស្ត្រីជាកម្មការិនីមានផ្ទៃពោះកំពុងបំរើការងារនៅតាមរោងចក្របានបង្ហាញពីការសោកស្តាយដោយសារមិនអាចចាក់វ៉ាក់សាំងពេលឱកាសមកដល់នេះ។បើតាមកម្មការិនីដែលមានផ្ទៃពោះកំពុងបំរើការងារនៅក្នុងរោងចក្រប្រូពីស័ស ក្នុងក្រុងតាខ្មៅខេត្តកណ្តាល បានប្រាប់ BTV នៅថ្ងៃទី២១ ខែមិថុនានេះ ថា នៅក្នុងរោងចក្រប្រូពីស័សនេះ គ្រប់កម្មករកម្មការិនីបានចាក់វ៉ាក់សាំងការពារកូវីដ-១៩ រួចរាល់ហើយ ប៉ុន្តែសម្រាប់កម្មការិនីអំឡុងពេលកំពុងមានផ្ទៃពោះ ក្រុមពេទ្យបានណែនាំថាមិនអាចចាក់វ៉ាក់សាំងនេះបាននោះទេ ដោយសារបារម្ភខ្លាចប៉ះពាល់ទារកនៅក្នុងផ្ទៃម្តាយ តែទោះយ៉ាងណា បណ្តាកម្មការិនីដែលមានផ្ទៃពោះទាំងនោះ ក៏បានត្រៀមទៅចាក់ការពារខ្លួនផងដែរ នៅក្រោយពេលសម្រាលបានបីខែ។កម្មការិនីកំពុងពរពោះ បានថ្លែងថា ទោះយ៉ាងណានៅក្នុងអំឡុងពេលនេះ យើងបានបន្តធ្វើការងារក្នុងរោងចក្រជាធម្មតា តែត្រូវប្រកាន់ខ្ជាប់អនុវត្តវិធាន៣កុំ៣ការពារយ៉ាងខ្លាំងក្លាបំផុត ចៀសវាងការឆ្លងមេរោគកូវីដ-១៩ អំឡុងពេលពរពោះនេះអោយខាងតែបាន។បើតាមវេជ្ជបណ្ឌិត គួយ ប៊ុនធឿន ប្រធានមន្ទីរសុខាភិបាលខេត្តកណ្តាល បានថ្លែងថា គិតត្រឹមព្រឹកថ្ងៃទី២១ ខែមិថុនានេះ ក្រុមពេទ្យបាននិងកំពុងចុះចាក់វ៉ាក់សាំងការពារកូវីដ-១៩ ដូសទី១ ជូនពលរដ្ឋ និងកម្មករកម្មការិនីទូទៅនៅតាមទីប្រជុំជនតាមភូមិឃុំសង្កាត់ តាមរោងចក្រនានានៅទូទាំងខេត្តកណ្តាល បានចំនួនជាង៧០% នៃចំនួនវ៉ាក់សាំងដែលត្រូវចាក់ជិត៦០ម៉ឺននាក់ (៥៩៩២៥១នាក់) ហើយនៅសល់ប្រមាណតែ៣ថ្ងៃទៀត ការចាក់ដូសទី១ នឹងត្រូវបិទបញ្ចប់ ហើយក្រុមពេទ្យនឹងត្រូវបន្តចាក់តែដូសទី២ ជូនពលរដ្ឋ និងកម្មករកម្មការិនីណាដែលបានចាក់ដូសទី១តែប៉ុណ្ណោះ។វេជ្ជបណ្ឌិត គួយ ប៊ុនធឿន បញ្ជាក់ថា នៅក្នុងអំឡុងយុទ្ធនាការចាក់វ៉ាក់សាំងជូនពលរដ្ឋអាទិភាពមានមន្ត្រីរាជការជួរមុខ នគរបាល មន្ត្រីចូលនិវត្តន៍ និងអាជីវករជាដើមកន្លងមក គឺក្រុមពេទ្យចាក់បានប្រមាណជាង៧ម៉ឺននាក់ ហើយនៅក្នុងយុទ្ធនាការចាក់ជូនពលរដ្ឋទូទៅតាមទីប្រជុំជន និងកម្មកររោងចក្រនានា ដែលកំពុងដំណើរចាក់បានចំនួន១១ថ្ងៃនេះ គឺយើងចាក់បានចំនួនជាង៤២ម៉ឺននាក់ ។បើតាម ឯកឧត្តម គង់ សោភ័ណ្ឌ អភិបាលខេត្តកណ្តាល បានថ្លែងថា បច្ចុប្បន្ន រដ្ឋបាលខេត្តកណ្តាល មានផែនការចាក់វ៉ាក់សាំងការពារកូវីដ-១៩ ជូនពលរដ្ឋដែលត្រូវចាក់ចាប់ពីអាយុ១៨ឆ្នាំឡើងទៅ គឺមានចំនួនប្រមាណជាង៩០ម៉ឺននាក់៕អត្ថបទ ៖ ស៊ុម សុខជា

សិស្សថ្នាក់ទី១២លើកឡើងនូវមតិផ្សេងគ្នាជុំវិញការប្រឡង ដែលក្រសួងអប់រំប្រកាសថា នៅតែបន្តរៀបចំ

ភ្នំពេញ ៖ ថ្មីៗនេះក្រសួងអប់រំ បានប្រកាសថា ការប្រឡងថ្នាក់ទី៩ ក៏ដូចជា ការប្រឡងថ្នាក់ជាតិថ្នាក់ទី១២ នៅតែបន្តរៀបចំ ដោយប្រកាន់ខ្ជាប់នូវគោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបាន ស្របនឹងវិធានការសុវត្ថិភាពសុខភាព។ ការអះអាងរក្សាការប្រឡងនេះ គឺមានការចាប់អារម្មណ៍ច្រើន ជាពិសេសសិស្សថ្នាក់ទី១២ ដោយមានទាំងការគាំទ្រ និងការមិនគាំទ្រ។ក្រសួងអប់រំយុវជន និងកីឡា បានប្រកាសនាពេលចុងសប្ដាហ៍មុនថា ការប្រឡងទាំងថ្នាក់ទី៩ និងថ្នាក់ទី២ ទាំងរដ្ឋនិងឯកជន នឹងរៀបចំឡើង ដោយប្រកាន់ខ្ជាប់នូវគោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបាន ស្របនឹងវិធានការសុវត្ថិភាពសុខភាព។ ក្រសួងអប់រំ បានកំណត់យកថ្ងៃទី១៥ វិច្ឆិកា ២០២១ សម្រាប់ការប្រឡងថ្នាក់ទី៩ និងកំណត់យកថ្ងៃទី០៦ ធ្នូ២០២១ សម្រាប់ការប្រឡងបាក់ឌុបសម្រាប់សាលារដ្ឋ។ ចំពោះសាលារៀនឯកជនវិញ គឺកំណត់យកថ្ងៃទី១១ តុលា ២០២១ សម្រាប់សិស្សថ្នាក់ទី៩ និងកំណត់យកថ្ងៃទី២៥ តុលា ២០២១ សម្រាប់សិស្សថ្នាក់ទី ១២។ការរក្សាការប្រឡងនេះ គឺមានការចាប់អារម្មណ៍ច្រើន ជាពិសេសសិស្សថ្នាក់ទី១២ដែលត្រូវបញ្ចប់ថ្នាក់វិទ្យាល័យ ចូលទៅសកលវិទ្យាល័យ។ សិស្សមួយចំនួនលើកឡើងនូវជំនឿទុកចិត្តចំពោះការរៀបចំ របស់ក្រសួងអប់រំ ដោយខ្លួនកំពុងព្យាយាមខិតខំរៀនសូត្រគ្រប់វិធីសាស្ត្រ សម្រាប់ការឡងខាងមុខ។យ៉ាងណាម៉ិញ ការរក្សាការប្រឡងនេះ ក៏មានការមិនពេញចិត្តមួយចំនួន ពីសំណាក់សិស្សផងដែរ។ ជាក់ស្ដែង គឺមានការចូលទៅបញ្ចេញមតិសម្ដែងការមិនពេញមួយចំនួន ក្នុងទំព័រហ្វេសប៊ុកផ្លូវការរបស់ក្រសួងអប់រំផ្ទាល់តែម្ដង។ ការលើកឡើងនូវភាពមិនពេញចិត្ត ភាគច្រើនគឺក្រោមហេតុផល សិក្សានៅថ្នាក់រៀនបានតិច និងភាពពិបាកនៃការសិក្សាតាមប្រព័ន្ធអនឡាញ ដែលក្រសួងបន្តផ្ដល់ជូនរាល់ថ្ងៃ។ ភាពពិបាកកាន់តែមានច្រើន ពិសេសសម្រាប់សិស្សនៅតាមបណ្ដាខេត្តជនបទ។ សម្រាប់អ្នកប្រើប្រាស់ហ្វេសប៊ុក មួយនាក់ឈ្មោះ Dazai Sama បានលើកឡើងថា “ ទី ១២ឆ្នាំនេះ ពិបាកជាងឆ្នាំមុនឆ្ងាយណាស់ ឆ្នាំមុនគេបានរៀននៅសាលាខ្លះ តែឆ្នាំនេះវិញរៀនបានមួយខែ បិទសាលាបាត់ រៀនតាមអនឡាញ ខ្ញុំខំប្រឹងកត់មេរៀនយកពិន្ទុប្រចាំខែហើយ តែបើប្រឡងបាក់ឌុបវិញគឺសង្ឃឹមតិចណាស់ គណិតរូប គីមី ជីវៈ មិនសូវមានការរៀនតាម zoom ទេ ភាគច្រើនគឺមុខវិជ្ជាកត់មេរៀនបានតែត្រឹមកត់មេរៀនហើយ ផ្ញើអោយគ្រូដើម្បីយកពិន្ទុ។ និយាយតាមត្រង់បើខ្ញុំធ្លាក់មែនគឺ អស់ចិត្តហើយអត់ស្ដាយក្រោយទេ។” រីឯអ្នកប្រើហ្វេសប៊ុក មួយនាក់ទៀត បានបានលើកឡើងថា “ សិស្សធ្លាក់យ៉ាងតិច ៧០ ទៅ ៨០% បើប្រឡងទាំងខ្ញុំទាំងគេ តើយកអ្វីទៅប្រឡងមួយឆ្នាំរៀនបានពីរខែ?” ។សម្រាប់ឆ្នាំ ២០២១នេះ ក្រសួងអប់រំបានសម្រេចផ្អាកការសិក្សាក្នុងថ្នាក់រៀនទូទាំងប្រទេស គ្រប់កម្រិតសិក្សាទាំងរដ្ឋ និងឯកជន តាំងពីថ្ងៃទី ២០ ខែមីនា មកម្ល៉េះ។ មកទល់ពេលនេះ ក៏ពុំទាន់មានការជូនដំណឹងជាថ្មី ពីការបើកដំណើរការថ្នាក់រៀនវិញនោះទេ ព្រោះព្រឹត្តិការណ៍សហគមន៍ ២០កុម្ភៈ មិនទាន់បានបិទបញ្ចប់និងករណីឆ្លងស្ថិតក្នុងចំនួនច្រើនជារៀងរាល់ថ្ងៃ។ សព្វថ្ងៃ ក្រសួងអប់រំនៅតែបន្តលើកទឹកចិត្ត ជំរុញឱ្យសិស្សព្យាយាមធ្វើស្វ័យសិក្សា ក៏ដូចជាសិក្សាតាមប្រព័ន្ធអនឡាញ ដែលក្រសួងមានផ្ដល់ជូន៕អត្ថបទ ៖ គឹមហុក

គណៈកម្មការរដ្ឋសភា និងតំណាងរាជរដ្ឋាភិបាលបានលើកយកសេចក្តីព្រាងច្បាប់ចំនួនពីរមកពិភាក្សា

ភ្នំពេញ ៖ គណៈកម្មការជំនាញរដ្ឋសភា នៅព្រឹកថ្ងៃទី២១ ខែមិថុនា ឆ្នាំ២០២១នេះ បានបើកកិច្ចប្រជុំជាមួយតំណាងរាជរដ្ឋាភិបាល ដោយបានលើកយកសេចក្តីព្រាងច្បាប់ចំនួន២ ដើម្បីពិភាក្សាគ្នា ដែលសេចក្តីព្រាងច្បាប់នោះគឺស្តីពី ការអនុម័តយល់ព្រមលើកិច្ចព្រមព្រៀងភាពជាដៃគូរសេដ្ឋកិច្ចគ្រប់ជ្រុងជ្រោយតំបន់ និងសេចក្តីព្រាងច្បាប់ ស្តីពីវិសោធនកម្មមាត្រា១៨ថ្មី នៃច្បាប់ស្តីពីវិសោធនកម្មមាត្រា១៨ នៃច្បាប់ស្តីពីសវនកម្ម នៃព្រះរាជាណាចក្រកម្ពុជា។កិច្ចប្រជុំនេះ បានធ្វើឡើងក្រោមអធិបតីភាព ឯកឧត្តមបណ្ឌិត ជាម យៀប ប្រធានគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្ម នៃរដ្ឋសភា សហការជាមួយគណៈកម្មការសាធារណការ ដឹកជញ្ជូន ទូរគមនាគមន៍ ប្រៃសណីយ៍ ឧស្សាហកម្មរ៉ែ ថាមពល ពាណិជ្ជកម្ម រៀបចំដែនដី នគរូបនីយកម្ម និងសំណង់ នៃរដ្ឋសភា និងឯកឧត្តម នឹម ច័ន្ទតារា លេខាធិការគណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាននៃរដ្ឋសភា ដោយមានការចូលរួមពីលោក លោកស្រីអនុប្រធាន លេខាធិការ និងសមាជិក សមាជិកាគណៈកម្មការជំនាញនានា។តំណាងភាគីរាជរដ្ឋាភិបាលរួមមាន ឯកឧត្តមបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ, ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម និងលោកស្រី សោម គឹមសួគ៌ អគ្គសវនករនៃអាជ្ញាធរសវនកម្មជាតិ តំណាងរាជរដ្ឋាភិបាលការពារសេចក្តីព្រាងច្បាប់ទាំងពីរនេះ ដែលផ្សាយចេញពីសាលសន្និសីទបាយ័ន នៃវិមានរដ្ឋសភា ទៅកាន់ក្រសួងពាក់ព័ន្ធ តាមប្រព័ន្ធវីដេអូ។នៅក្នុងកិច្ចពិភាក្សានោះ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន បានថ្លែងថា សេចក្តីព្រាងច្បាប់ស្តីពីការអនុម័តយល់ព្រមលើកិច្ចព្រមព្រៀងភាពជាដៃគូរសេដ្ឋកិច្ចគ្រប់ជ្រុងជ្រោយតំបន់ គឺជាកិច្ចព្រមព្រៀងភាពជាដែគូសេដ្ឋកិច្ចគ្រប់ជ្រុងជ្រោយតំបន់ដែលតទៅនេះ ហៅកាត់ថាកិច្ចព្រមព្រៀងអាសិប (Regional Comprehensive Economic Partnership RCEP) ជាកិច្ចព្រមព្រៀងពាណិជ្ជកម្មសេរី តំបន់ ដើមឡើយមានប្រទេសចូលរួមចរចាចំនួន១៦ រួមមាន ៖ ប្រទេសសមាជិកអាស៊ានទាំង១០ និងប្រទេសដៃគូរពាណិជ្ជកម្មសេរី អាស៊ានចំនួន៦ ដូចជា ៖ ប្រទេសអូស្ត្រាលី ចិន ឥណ្ឌា ជប៉ុន កូរ៉េខាងត្បូង និង ណូវែលហ្សេឡង់។ បន្ទាប់មកទៀត ដោយសារបញ្ហាផ្ទៃក្នុងរបស់ខ្លួនឥណ្ឌា បានប្រកាសដកខ្លួនចេញពីកិច្ចព្រមព្រៀងអាសិប ក្នុងកិច្ចប្រជុំកំពូលអាសិបលើកទី៣ កាលពីឆ្នាំ២០១៩ នៅប្រទេសថៃ។ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន បានបន្ថែមថា កិច្ចព្រមនេះ ត្រូវបានរចនាឡើង ដើម្បីសម្រេចបាននូវគោលបំណងដោយវិធីសាស្ត្រមួយចំនួន ដូចជា តាមរយៈភាពទន់ភ្លន់ដែលសមស្រប និងបទប្បញ្ញត្តិសម្រាប់ប្រព្រឹត្តកម្មពិសេស ជាពិសេសសម្រាប់ប្រទេសកម្ពុជា ឡាវ មីយ៉ាន់ម៉ា និងវៀតណាម និងភាពទន់ភ្លន់បន្ថែម សម្រាប់ប្រទេសអភិវឌ្ឍន៍តិចតួច។ លើសពីនេះទៀតកិច្ចព្រមព្រៀងអាសិប បញ្ចូលនូវកិច្ចសហប្រតិបត្តិការបច្ចេកទេស និងការកសាងសមត្ថភាព ដើម្បីអនុវត្តន៍កាតព្វកិច្ចនៅក្នុងកិច្ចព្រមព្រៀង និងទាញយកផលប្រយោជន៍ឱ្យបានជាអតិបរមា។ កិច្ចព្រមព្រៀងអាសិប ក៏បានបញ្ចូលនៅបទប្បញ្ញត្តិ ដែលធានាថាប្រទេសចូលរួមចរចាទោះបីសេដ្ឋកិច្ច និងទំហំអាជីវកម្មខុសៗគ្នាក៏ដោយអាចទទួលបានអត្ថប្រយោជន៍ពីពាណិជ្ជកម្ម។ដោយឡែកសេចក្តីព្រាងច្បាប់ ស្តីពីវិសោធនកម្មមាត្រា១៨ថ្មី នៃច្បាប់ស្តីពីវិសោធនកម្មមាត្រា១៨ នៃច្បាប់ស្តីពីសវនកម្ម នៃព្រះរាជាណាចក្រកម្ពុជា ត្រូវបានលោកស្រី សោម គឹមសួគ៌ អគ្គសវនករនៃអាជ្ញាធរសវនកម្មជាតិ បានពន្យល់ថា សេចក្តីព្រាងច្បាប់នេះរៀបចំឡើង ក្នុងគោលបំណងបើកផ្លូវឱ្យមានការតែងតាំងអគ្គសវនករ និងអគ្គសវនកររងថ្មី នៅពេលដែលអាណត្តិ៥ឆ្នាំ ត្រូវបានបញ្ចប់ដើម្បីទទួលស្គាល់គុណវុឌ្ឍិ ស្នាដៃ បទពិសោធន៍ សមត្ថភាព កិច្ចសហប្រតិបត្តិការ និងការទទួលខុសត្រូវខ្ពស់លើការដឹកនាំអាជ្ញាធរសវនកម្មជាតិ ក្នុងការបំពេញតួនាទីរបស់ខ្លួនដូចមានចែងក្នុងច្បាប់ស្តីពីសវនកម្ម នៃព្រះរាជាណាចក្រកម្ពុជា។ក្រោយពីស្តាប់ការពន្យល់ពីតំណាងរដ្ឋាភិបាលបានបកស្រាយពីអត្ថប្រយោជន៍នៃសេចក្តីព្រាងច្បាប់ទាំងពីរគណៈជំនាញរបស់រដ្ឋសភា បានចោទជាសំនួរ និងមានការបកស្រាយពីខាងតំណាងរដ្ឋាភិបាល ហើយអង្គប្រជុំបានឯកភាពគ្នាដោយរក្សាទម្រង់អត្ថបទនៃសេចក្តីព្រាងច្បាប់ទាំងពីរឱ្យនៅដែល ដោយគ្រាន់តែកែសម្រួលអក្ខរាវិរុទ្ធឱ្យត្រឹមត្រូវតាមអត្ថបទច្បាប់៕អត្ថបទ ៖ បាន ចក់

ប្រមុខការទូតអង់គ្លេស នឹងមកបំពេញទស្សនកិច្ចនៅកម្ពុជា នៅថ្ងៃទី២៣ខែមិថុនា ខាងមុខនេះ

ភ្នំពេញ ៖ រដ្ឋមន្ត្រីការបរទេស និងអភិវឌ្ឍន៍នៃចក្រភពអង់គ្លេស លោកដូមីនី រ៉ាអាប់(Dominic Raab) នឹងមកបំពេញទស្សនកិច្ចនៅប្រទេសកម្ពុជា រយៈពេលមួយថ្ងៃគឺថ្ងៃទី២៣ខែមិថុនា ឆ្នាំ២០២១ខាងមុខនេះ ដោយដំណើរទស្សនកិច្ចនេះ នឹងជួយជំរុញឲ្យទំនាក់ទំនងទ្វេភាគីកម្ពុជា-អង់គ្លេសកាន់តែល្អប្រសើរបន្ថែមទៀត។យោងតាមសេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ ដែលទូរទស្សន៍BTV ទទួលបាន នៅព្រឹកថ្ងៃទី២១ ខែមិថុនា នេះ បានឲ្យដឹងថា តបតាមការអញ្ជើញ របស់ឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ នៃព្រះរាជាណាចក្រកម្ពុជា លោកដូមីនី រ៉ាអាប់ នឹងមកបំពេញទស្សនកិច្ចជាផ្លូវការប្រទេសកម្ពុជា នាថ្ងៃទី២៣ ខែមិថុនាខាងមុខនេះ។សេចក្តីប្រកាសព័ត៌មាន បានឲ្យដឹងទៀតថា ប្រមុខការទូតកម្ពុជា និងអង់គ្លេស នឹងមានកិច្ចប្រជុំទ្វេភាគី ដែលនឹងផ្តោតការពិភាក្សាលើទិដ្ឋភាពផ្សេងៗនៃកិច្ចសហប្រតិបត្តិការទ្វេភាគី ព្រមទាំងបញ្ហាតំបន់ និងអន្តរជាតិ ដែលជាប្រយោជន៍ និងកង្វល់រួមជាដើម។ប្រភពដដែល បានបន្ថែមទៀតថា ក្នុងឱកាសស្នាក់នៅក្នុងរាជធានីភ្នំពេញនេះ លោកដូមីនី រ៉ាអាប់ នឹងមានកិច្ចជំនួបជាមួយឯកឧត្តម សាល សំអាល់ រដ្ឋមន្ត្រីក្រសួងបរិស្ថាន ហើយក៏នឹងអញ្ជើញទៅ ទស្សនាសារមន្ទីរឧក្រិដ្ឋកម្មប្រល័យពូជសាសន៍ទូលស្លែង និងមជ្ឈមណ្ឌលឯកសារកម្ពុជាផងដែរ។បើតាមសេចក្តីប្រកាសព័ត៌មានរបស់ក្រសួងការបរទេស បានបញ្ជាក់ទៀតថា ដំណើរទស្សនកិច្ចជាផ្លូវការនៅប្រទេសកម្ពុជារបស់លោកដូមីនី រ៉ាអាប់នេះ នឹងជួយរួមចំណែកជំរុញ និងពង្រឹងបន្ថែមទៀតនូវទំនាក់ទំនងទ្វេភាគីរវាងកម្ពុជា និងអង់គ្លេស និងជាការបោះជំហានទៅមុខនៅក្នុងកិច្ចសហប្រតិបត្តិការពហុភាគីក្នុងក្របខណ្ឌអាស៊ានផងដែរ៕អត្ថបទ ៖ បាន ចក់

ក្រោយបញ្ចប់ការសាងសង់ផ្លូវល្បឿនលឿនភ្នំពេញ-ព្រះសីហនុ គ្រោងឱ្យពលរដ្ឋធ្វើដំណើរដោយមិនបង់ប្រាក់ពីមួយសប្ដាហ៍ទៅមួយខែ

ព្រះសីហនុ ៖ នៅពេលបើកឱ្យដំណើរការផ្លូវល្បឿនលឿនភ្នំពេញ-ព្រះសីហនុ ក្រសួងសាធារណការគ្រោងពិចារណាជាមួយក្រុមហ៊ុនចិន នឹងបើកឱ្យប្រជាពលរដ្ឋ ធ្វើដំណើរដោយមិនបង់ប្រាក់ពីមួយសប្ដាហ៍ទៅមួយខែ ខណៈដំណើរការសាងសង់សម្រេចបានជាង៥៥ភាគរយហើយ។ក្នុងឱកាសអញ្ជើញត្រួតពិនិត្យពីវឌ្ឍនភាពផ្លូវល្បឿនលឿន ភ្នំពេញ ព្រះសីហនុ នាព្រឹកថ្ងៃទី២១ ខែមិថុនា ឆ្នាំ២០២១ ឯកឧត្ដមទេសរដ្ឋមន្ដ្រី ស៊ុន ចាន់ថុល រដ្ឋមន្ដ្រីក្រសួងសាធារណការ និងដឹកជញ្ជូន បានថ្លែងថា ដំណើរការសាងសង់ផ្លូវល្បឿនលឿននេះ សម្រេចបានជាង៥៥ភាគរយហើយ ចំពោះគុណភាពសាងសង់ គឺល្អប្រសើរណាស់។ឯកឧត្ដមទេសរដ្ឋមន្ដ្រី បន្ថែមថា នៅពេលបើកឱ្យដំណើរការផ្លូវល្បឿនលឿន ភ្នំពេញ ព្រះសីហនុនេះ ក្រសួងសាធារណការគ្រោងពិចារណាជាមួយក្រុមហ៊ុនចិន នឹងបើកឱ្យប្រជាពលរដ្ឋធ្វើដំណើរដោយមិនបង់ប្រាក់ពីមួយសប្ដាហ៍ទៅមួយខែ។ឯកឧត្ដមទេសរដ្ឋមន្ដ្រី ស៊ុន ចាន់ថុល បានបញ្ជាក់ថា ផ្លូវល្បឿនលឿននេះ មិនអាចឱ្យមានការឆ្លងកាត់ទេ គឺផ្លូវត្រូវបានសាងសង់របងសងខាង ដូច្នេះអ្នកដំណើរអាចប្រើល្បឿនបាន១០០គីឡូម៉ែត្រក្នុងមួយម៉ោង និងមានទីតាំងផ្ដល់សេវា៣កន្លែង សម្រាប់ឈប់សម្រាក ចាក់ប្រេងជាដើម។ សម្រាប់ប្រជាពលរដ្ឋតាមភូមិអាចធ្វើដំណើរបាននៅខាងក្រោមផ្លូវល្បឿនលឿននេះ ដោយក្រុមហ៊ុនបានសាងសង់ស្ពានខាងក្រោមផ្លូវចំនួន ២៧០កន្លែង។សូមបញ្ជាក់ថា ផ្លូវល្បឿនលឿន ភ្នំពេញ ព្រះសីហនុ បានបើកការដ្ឋានសាងសង់នៅខែមីនា ឆ្នាំ២០១៩ ហើយគ្រោងបើកដាក់ឱ្យប្រើប្រាស់នៅខែកញ្ញា ឆ្នាំ២០២២ ដែលគម្រោងបិទបញ្ចប់ការសាងសង់ គឺនៅខែឧសភា ឆ្នាំ២០២៣។ ផ្លូវនេះមានប្រវែងជាង ១៨៧គីឡូម៉ែត្រ៕អត្ថបទ ៖ ប្រាក់ វ៉ាន់ដា

សម្ដេចតេជោ ៖ រដ្ឋាភិបាលនិងប្រជាពលរដ្ឋចងចាំជានិច្ចចំពោះការលះបង់របស់អតីតយុទ្ធជនគ្រប់រូប

ភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រី នៅថ្ងៃទី២១មិថុនា បានផ្ញើសារលិខិតអបអរសាទរខួបលើកទី១៤ អតីតយុទ្ធជនកម្ពុជាដែលជាទិវាប្រវត្តិសាស្ត្រ ប្រកបដោយមោទនភាពបំផុតសម្រាប់បងប្អូនអតីតយុទ្ធជន និងប្រជាពលរដ្ឋនៅទូទាំងប្រទេស។ខ្លឹមសារក្នុងសារលិខិតរបស់សម្ដេចតេជោ សម្ដេចបានសរសេរថា ទិវាអតីតយុទ្ធជនកម្ពុជារៀបចំឡើង គឺដើម្បីរំឭកដល់គំរូវីរភាពដ៏មោះមុតនិងគុណបំណាច់ដ៏ធំធេងរបស់ វីរយុទ្ធជនយុទ្ធនារីនៃកងកម្លាំងប្រដាប់អាវុធ និង ប្រជាពលរដ្ឋគ្រប់ស្រទាប់ ដែលបានពលិកម្មយ៉ាងអង់អាចក្លាហាន បូជាសាច់ស្រស់ ឈាមស្រស់ ដើម្បីបុព្វហេតុជាតិមាតុភូមិជាទីស្នេហានៃយើង។ពលិកម្មប្រកបដោយស្មារតីស្នេហាជា តិរបស់វីរអតីតយុទ្ធជន យុទ្ធនារី និងប្រជាពលរដ្ឋយើងនៅគ្រប់ដំណាក់កាល នៃប្រវត្តិសាស្ត្រគឺបានរួម ចំណែកយ៉ាងសំខាន់ក្នុងកិច្ចការពារបូរណភាពទឹកដី ការកសាងសុខសន្តិភាព និងស្ថិរភាពសង្គមសម្រាប់កម្ពុជា សំដៅធានាឱ្យមានការអភិវឌ្ឍសេដ្ឋកិច្ច និងសង្គម ដើម្បីជាឧត្តមប្រយោជន៍សម្រាប់ជាតិមាតុភូមិ និងប្រជាជនកម្ពុជា។ក្នុងឱកាសនេះ សម្តេចក៏បានអំពាវនាវដល់បងប្អូនអតីតយុទ្ធជនកម្ពុជា សូមបន្តរក្សាស្មារតីវីរភាពដ៏ឧត្ដុង្គឧត្ដម និងសេចក្ដីថ្លៃថ្នូរ ជាពលរដ្ឋឆ្នើមរបស់ជាតិ មាតុភូមិ ដើម្បីបន្តធ្វើជាគំរូល្អក្នុងសង្គមជាតិ។ រាជរដ្ឋាភិបាល និងប្រជាជនកម្ពុជាទូទាំងប្រទេស ពិតជាចងចាំជានិច្ចនូវការលះបង់ និងគុណបំណាច់ដ៏ធំធេង របស់បងប្អូនអតីតយុទ្ធជនគ្រប់រូប ចំពោះជាតិមាតុភូមិជាទីស្នេហានៃយើង ជាពិសេសក្រសួងសង្គមកិច្ច អតីតយុទ្ធជន និងយុវនីតិសម្បទា ត្រូវបន្តអនុវត្តឱ្យបានល្អ និងមានប្រសិទ្ធភាពផ្ដល់សេវារបបសន្តិសុខសង្គមសម្រាប់អតីតយុទ្ធជន និងគ្រួសារអតីតយុទ្ធជនតាមរយៈបេឡាជាតិ អតីតយុទ្ធជននៅទូទាំងប្រទេស។ម្យ៉ាងវិញទៀត ត្រូវខិតខំជំរុញការអនុវត្តគម្រោងសាងសង់ផ្ទះជូនអតីតយុទ្ធជន និងគ្រួសារដូចដែលបានបញ្ចូលក្នុងផែនការវិនិយោគសាធារណៈរបស់រាជរដ្ឋាភិបាល។ក្រសួងរៀបចំដែនដី នគរូបនីយកម្ម និងសំណង់ និងក្រសួងសង្គមកិច្ច អតីតយុទ្ធជន និងយុវនីតិសម្បទា ត្រូវសហការជាមួយក្រសួង ស្ថាប័នពាក់ព័ន្ធ បន្តជំរុញការអនុវត្តគោលនយោបាយស្តីពីការផ្តល់សម្បទានដីសង្គមកិច្ចជូនអតីត កងកម្លាំងប្រដាប់អាវុធ និងគ្រួសារ ឱ្យកាន់តែមានប្រសិទ្ធភាពខ្ពស់។ក្រសួងស្ថាប័នពាក់ព័ន្ធ អាជ្ញាធរដែនដី និងកងកម្លាំងប្រដាប់អាវុធគ្រប់ប្រភេទ ត្រូវចូលរួមក្នុងការជួយឧបត្ថម្ភ គាំទ្រដល់អតីតយុទ្ធជន ជាពិសេសត្រូវយកចិត្តទុកដាក់ជួយឧបត្ថម្ភគាំទ្រដល់គ្រួសារអតីត យុទ្ធជនដែលកំពុងជួបប្រទះការលំបាក៕អត្ថបទ ៖ មុត សុទ្ធ

មន្ទីសាធារណៈការ បានបន្តអ៊ុតកៅស៊ូនៅលើផ្លូវលេខ៤៧ មូលដ្ឋានខណ្ឌដូនពេញ រួចរាល់ហើយ

ភ្នំពេញ ៖ រដ្ឋបាលរាជធានីភ្នំពេញ បានយកចិត្តទុកដាក់ពីបញ្ហា ការខូចផ្លូវ រលុបគំនូសសញ្ញាចរាចរណ៍ ការកក់ស្ទះចរាចរណ៍ និងរៀបចំសណ្ដាប់ធ្នាប់នៅតាមបណ្ដាមហាវិថីតូចធំ និងផ្លូវតូចៗ ក្នុងមូលដ្ឋានទាំង១៤ខណ្ឌ ដើម្បីកាត់បន្ថយការកក់ស្ទះចរាចរណ៍ និងលើកសោភ័ណភាពទីក្រុងផងដែរ។ជាក់ស្ដែងថ្ងៃទី២០ ខែមិថុនា ឆ្នាំ២០២១ សកម្មភាពអ៊ុតកៅស៊ូផ្លូវលេខ ៤៧ ចាប់ពីរង្វង់មូលវត្តភ្នំ ដល់រង្វង់កួចកាណុង ក្នុងមូលដ្ឋានខណ្ឌដូនពេញរាជធានីភ្នំពេញ បានរួចរាល់ជាស្ថាពរ ដើម្បីដាក់អោយបងប្អូនធ្វើដំណើរចរាចរណ៍ បានងាយស្រួលជាងមុន។មន្រ្តីជំនាញ បានបញ្ជាក់ថា កន្លងនៅតាមបណ្ដោយផ្លូវលេខ៤៧នេះ គឺមន្ទីរសាធារណៈការ និងដឹកជញ្ជូន បានធ្វើការកាយផ្លូវដើម្បីផ្លាស់ប្ដូរប្រព័ន្ធលូមេ ដូច្នេះ មន្ទីរសាធារណៈការ បានចាត់ម្លាំងចុះអ៊ុតកៅស៊ូថ្មីឡើងវិញ ដើម្បីអោយបងប្អូនប្រជាពលរដ្ឋងាយស្រួលក្នុងការបញ្ជាយានយន្ត។គួរបញ្ជាក់ផងដែរ កន្លងមករដ្ឋបាលរាជធានីភ្នំពេញ បានបន្តគម្រោងការពារទឹកជំនន់ និងកែលម្អប្រព័ន្ធប្រឡាយ លូ ក្នុងរាជរាធានីភ្នំពេញ ជំហានទី៤ ហិរញ្ញប្បទានឥតសំណងពីប្រជាជនជប៉ុន ជាសក្ខីភាពនៃមិត្តភាព និងកិច្ចសហប្រតិបត្តិការរវាងប្រទេសជប៉ុន និងព្រះរាជាណាចក្រកម្ពុជា ដាក់បណ្តាញលូមេ មានជាច្រើនគម្រោងមកហើយ រួមមាន ផ្លូវលេខ៣១៥ ផ្លូវលេខ៤៧ ផ្លូវលេខ៥៩២-ល-។ ដើម្បីដោះស្រាយទឹកលិចពេលមានភ្លៀងធ្លាក់ខ្លាំងម្ដងៗ បង្ហូរទឹកទាន់ពេលវេលា៕អត្ថបទ៖ កុម្ភះ

សមមិត្តហ៊ុន សែន៖ ខ្ញុំមិនដែលភ្លេចនូវទឹកភ្នែករាប់ម៉ឺនរាប់សែនដំណក់ ពេលឈានជើងចេញពីប្រជាជន និងប្រពន្ធកំពុងមានផ្ទៃពោះ

ភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី លកាលពីជាង៤០ឆ្នាំមុន ត្រូវបានគេហៅថាសមមិត្ត ហ៊ុន សែន បានរៀបរាប់ជាថ្មីម្តងទៀតនូវប្រវត្តិដ៏ជូរចត់ និងគ្រោះថ្នាក់បំផុតពេលដែលបានឈានជើងផ្សងព្រេងទៅកាន់ប្រទេសវៀតណាម ដើម្បីស្នើសុំកម្លាំងជួយស្រោចស្រងជីវិតរបស់បងប្អូនប្រជាពលរដ្ឋកម្ពុជាទាំងមូល ចេញពីរបបវាលពិឃាត ប៉ុល ពតនោះ។ថ្ងៃទី២០ ខែមិថុនា គឺជាខួបលើកទី៤៤ឆ្នាំ (២០ មិថុនា ១៩៧៧-២០ មិថុនា ២០២១) ដែលសមមិត្តហ៊ុន សែន និងកម្មាភិបាលចំនួន៤រូបទៀត បានសម្រេចចិត្តដ៏គ្រោះថ្នាក់បំផុត ចោលប្រពន្ធកូន របស់ខ្លួនឆ្ពោះទៅកាន់ប្រទេសវៀតណាម ដើម្បីស្នើកម្លាំងភាគីវៀតណាម មកផ្តួលរំលំរបបប្រល័យពូជសាសន៍ ប៉ុលពតនោះ។តាមរយៈហ្វេសបុក នាថ្ងៃទី២០ ខែមិថុនា ឆ្នាំ២០២១នេះ សម្តេចតេជោ ហ៊ុន សែន បានលើកឡើងថា«ខ្ញុំសម្រេចចិត្តដោយការឈឺចាប់យកជីវិតធ្វើដើមទុន ដើម្បីតស៊ូរំដោះប្រជាជនកម្ពុជាចេញពីរបបប្រល័យពូជសាសន៍ ប៉ុល ពត។ ទោះបីពេលនេះខ្លួនខ្ញុំ និងប្រជាជនកម្ពុជាកំពុងទទួលបាននូវសេចក្តីសុខ តែខ្ញុំមិនដែលភ្លេចនូវទឹកភ្នែករាប់ម៉ឺន រាប់សែន ដំណក់ នៅពេលដែលខ្ញុំឈានជើងចេញពីមាតុភូមិចោលប្រជាជនកម្ពុជា ដែលកំពុងរងគ្រោះ ពិសេសចាកចេញចោល ភរិយា ដ៏កំសត់ដែលកំពុងមានផ្ទៃពោះ។ ខ្ញុំអត់មានជម្រើសឲ្យល្អជាងនេះទេ ព្រោះយើងមិនអាចសុំការអាណិតពីពួក ប៉ុល ពត បានឡើយ។ ជំរើសប្រកបដោយគ្រោះថ្នាក់ និងទឹកភ្នែកនោះហើយ ដែលនាំមកនូវសេចក្តីសុខ និងការរីកចម្រើនរហូតសព្វថ្ងៃនេះ»។សម្តេចតេជោ លើកឡើងទៀតថា« ខ្ញុំធ្លាប់បានរៀបរាប់ពីប្រវត្តិដ៏ឈឺចាប់នេះច្រើនដងហើយ តែខ្ញុំមិនទាន់បានបញ្ចេញនូវចម្ងល់ក្នុងចិត្តខ្ញុំទាក់ទងជាមួយប្រវត្តិនេះ ដែលតាំងជាសំនួរថា ប្រសិនបើខ្ញុំមិនសម្រេចចិត្តដឹកនាំការតស៊ូដោយចាប់ផ្តើមពីថ្ងៃ២០ មិថុនា ១៩៧៧ ទេតើពេលនោះពួក ប៉ុល ពត សម្លាប់ខ្ញុំនៅឯណា? ដោយវិធីណា?។ សំនួរបន្ទាប់តើមានអ្នកស្នេហាជាតិណាផ្សេងទៀតបង្កើតឡើងនូវកងកម្លាំងប្រដាប់អាវុធ សាមគ្គីសង្រ្គាះជាតិជំនួសខ្ញុំដែរឬទេ? តើដំណើរឆ្ពោះមករំដោះប្រទេសពីរបប ប៉ុល ពត កើតមានឡើងបានដោយរបៀបណា? តើមានដំណោះស្រាយតាមរយៈការចចារ និងកិច្ចព្រមព្រៀងប៉ារីសឬទេ? និងចុងក្រោយតើមាន នយោបាយ ឈ្នះ ឈ្នះ ដើម្បីបញ្ចប់សង្រ្គាមនាំមកនូវសន្តិភាព និងការអភិវឌ្ឍដូចសព្វថ្ងៃឬទេ? ។សំនួរសង្ខេបទាំងនេះ តែងបង្កប់ក្នុងខួរក្បាលខ្ញុំជានិច្ច ហើយខ្ញុំក៏មិនអាចឆ្លើយជាមួយសំនួរនេះដោយខ្លួនឯងបានដែរ ខ្ញុំទុកជូនបងប្អូនជនរួមជាតិមេត្តាជួយរកចម្លើយ»។សូមបញ្ជាក់ថា ថ្ងៃទី២០ ខែមិថុនា ឆ្នាំ២០២១នេះគឺជាខួបគម្រប់ ៤៤ឆ្នាំហើយ នៃដំណើរតស៊ូឆ្ពោះទៅរកការរំដោះជាតិរបស់សមមិត្ត ហ៊ុន សែន និងយុទ្ធមិត្ត ដើម្បីរំដោះជាតិ និងប្រជាជនកម្ពុជាចេញពីកាប់សម្លាប់របស់ខ្មែរក្រហម។ ក្រសួងការពារជាតិកម្ពុជា បានយកថ្ងៃនេះ ប្រារព្ធទិវាចងចាំ ហើយបានសាងសង់នូវហេដ្ឋារចនាសម្ព័ន្ធជាច្រើន រួមទាំងសារមន្ទីរផង ដើម្បីទុកជាប្រវត្តិសាស្រ្តសម្រាប់កូនខ្មែរជំនាន់ក្រោយទៀតផងដែរ។ជាក់ស្តែងនៅថ្ងៃនេះ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិកម្ពុជា និងលោក ហ្វាន វ៉ាន់ ហ្សាង រដ្ឋមន្ត្រីក្រសួងការពារប្រទេសរបស់វៀតណាម បានធ្វើជាអធិបតីភាពរួមគ្នាប្រារព្ធពិធីរំលឹកខួប នៃដំណើរការតស៊ូនេះ ព្រមទាំងបញ្ចុះបឋមសិលាសាងសង់អគារមិត្តភាពកម្ពុជា-វៀតណាម និងសម្ពោធសមិទ្ធផលមួយចំនួន ដែលបានសាងសង់នៅភូមិទន្លូង ឃុំកោះថ្ម ស្រុកមេមត់ ខេត្តត្បូងឃ្មុំ ដែលជាទីតាំងស្លាកស្នាមនៃតម្រាយផ្លូវរបស់សមមិត្តតេជោ ហ៊ុន សែន និងយុទ្ធមិត្តបានភាសខ្លួនទាំងយប់ទៅកាន់វៀតណាម កាលពី ៤៤ឆ្នាំមុននោះ។ថ្ងៃទី២០ ខែមិថុនា ឆ្នាំ១៩៧៧នោះ គឺជាពេលដែលសមមិត្ត ហ៊ុន សែន ក្នុងវ័យ ២៥ឆ្នាំ រួមនឹងយុទ្ធមិត្តដ៏ស្ម័គ្រស្មោះ៤រូបផ្សេងទៀត បានសម្រេចចិត្តក្នុងស្ថានភាពដ៏តាន់តឹងបំផុតលាចាកទឹកដី លាចាកឧត្តមភរិយា និងកូនក្នុងផ្ទៃជាទីស្រឡាញ់ធ្វើដំណើរជ្រែកស្បៃរាត្រីឆ្លងកាត់ព្រំដែនទាំងគ្រោះថ្នាក់បំផុត ឆ្ពោះទៅកាន់ប្រទេសវៀតណាម ដើម្បីស្វែងរកគាំទ្រក្នុងការរំដោះជាតិ និងប្រជាជនកម្ពុជា ចេញពីក្រញាំបិសាចដ៏សែនឃោឃៅ របស់ប៉ុលពត។ទាក់ទងនឹងព្រឹត្តិការណ៍ ដ៏ជួរចត់របស់សមមិត្តហ៊ុន សែន និងកម្មាភិបាលចំនួន៤រូបទៀតនេះ ត្រូវ បានក្រសួងការពារជាតិកម្ពុជា បានយកទៅចារ និងឆ្លាក់ទុកជាប្រវត្តិសាសន៍នៅក្នុងបរិវេនវិមាន ឈ្នះ ឈ្នះ ដែលស្ថិតនៅទឹកដីខណ្ឌជ្រោយចង្វារ រាជធានីភ្នំពេញ៕អត្ថបទ ៖ បាន ចក់

ក្រសួងទេសចរណ៍ប្រកាសបញ្ឈប់ផ្តល់អាជ្ញាប័ណ្ណដល់អាជីវកម្មដឹកជញ្ជូនទេសចរណ៍តាមផ្លូវគោកនិងផ្លូវទឹក

ភ្នំពេញ ៖ ដើម្បីជួយសម្រួលម្ចាស់អាជីវកម្មក្នុងវិស័យទេសចរណ៍ កាត់បន្ថយការចំណាយថ្លៃធ្វើអាជ្ញាប័ណ្ណដឹកជញ្ជូនភ្ញៀវទេសចរច្រើនកន្លែង ចាប់ពីថ្ងៃទី១ ខែកក្កដា ឆ្នាំ២០២១នេះតទៅ គ្រប់អាជីវកម្មដឹកជញ្ជូនតាមផ្លូវគោក និងផ្លូវទឹកទាំងអស់ ដែលមានអាជ្ញាប័ណ្ណប្រកបអាជីវកម្មដឹកជញ្ជូនអ្នកដំណើរពីក្រសួងសាធារណៈការ និងដឹកជញ្ជូនរួចហើយ គឺអាចប្រកបអាជីវកម្មដឹកជញ្ជូនភ្ញៀវទេសចរជាតិ និងអន្តរជាតិ នៅក្នុងវិស័យទេសចរណ៍បានផងដែរ។បើតាមការបញ្ជាក់ពីឯកឧត្តម តុប សុភ័គ រដ្ឋលេខាធិការ និងជាអ្នកនាំពាក្យក្រសួងទេសចរណ៍ បានថ្លែងប្រាប់ BTV នៅថ្ងៃទី១៩ ខែមិថុនានេះថា នៅពេលកន្លងមកនេះ គ្រប់អាជីវកម្មដឹកជញ្ជូនតាមផ្លូវគោក និងផ្លូវទឹកទាំងអស់ នៅពេលដែលគេមានលិខិតអនុញ្ញាតដឹកជញ្ជូនអ្នកដំណើរពីក្រសួងសាធារណការ និងដឹកជញ្ជូនរួចហើយ ហើយប្រសិនបើគេចង់ពង្រីកអាជីវកម្មប្រកបរបរដឹកជញ្ជូនភ្ញៀវទេសចរបន្ថែមទៀត គឺម្ចាស់អាជីវកម្មនោះត្រូវទៅសុំធ្វើអាជ្ញាប័ណ្ណប្រកបអាជីវកម្មដឹកជញ្ជូនភ្ញៀវទេសចរបន្ថែមទៀតពីក្រសួងទេសចរណ៍។ឯកឧត្តម តុប សុភ័គ ថ្លែងថា ប៉ុន្តែនៅពេលថ្មីនេះ ដោយសារយើងមានសារាចរពីរាជរដ្ឋាភិបាល និងដើម្បីជួយសម្រួលដល់អាជីវកម្មធុនតូចធុនមធ្យមដែលផ្តល់សេវាកម្មដឹកជញ្ជូនទេសចរណ៍តាមផ្លូវទឹកផ្លូវគោគនោះ កុំអោយមានការសុំអាជ្ញាប័ណ្ណច្រើនកន្លែង ដូចនេះ រាជរដ្ឋាភិបាល ក៏បានសម្រេចអោយតែក្រសួងសាធារណការ និងដឹកជញ្ជូនជាអ្នកផ្តល់អាជ្ញាប័ណ្ណដឹកជញ្ជូនទេសចរណ៍នោះវិញ។តាមសេចក្តីជូនដំណឹងរបស់ក្រសួងទេសចរណ៍នៅថ្ងៃទី១៧ ខែមិថុនានេះ ក៏បានចេញផ្សាយដែរថា ក្រសួងទេសចរណ៍នឹងបញ្ឈប់ការចេញអាជ្ញាប័ណ្ណទេសចរណ៍ ដល់ម្ចាស់អាជីវកម្មដឹកជញ្ជូនទេសចរណ៍តាមផ្លូវគោក និងផ្លូវទឹកចាប់ពីថ្ងៃទី១ ខែកក្កដា ឆ្នាំ២០២១តទៅ ប៉ុន្តែសម្រាប់ម្ចាស់អាជីវកម្មដឹកជញ្ជូនទេសចរណ៍តាមផ្លូវគោក ផ្លូវទឹកណាពង្រឹងគុណភាពសេវាកម្មដឹកជញ្ជូនទេសចរណ៍ គឺអាចស្នើចូលរួមផ្តល់ការបណ្តុះបណ្តាល និងដាក់ពាក្យចូលរួមប្រឡងប្រណាំងផ្សេងៗនៅកម្រិតថ្នាក់ជាតិ និងថ្នាក់តំបន់តាមរយៈក្រសួងទេសចរណ៍។បើតាមការបញ្ជាក់ពីឯកឧត្តម វ៉ាស៊ីម សូរិយា អ្នកនាំពាក្យក្រសួងសាធារណៈការ និងដឹកជញ្ជូន បានឲ្យដឹងថា ក្រសួងសាធារណៈការ មិនមានការផ្លាស់ប្តូរនីតីវិធី នៃការផ្តល់អាជ្ញាប័ណ្ណជូនម្ចាស់អាជីវកម្មដឹកអ្នកដំណើរនោះទេ ពោលគឺ គ្រប់អាជ្ញាប័ណ្ណដឹកជញ្ជូនអ្នកដំណើរទូទៅក្តី និងដឹកជញ្ជូនទេសចរណ៍ក្តី តាមមធ្យោបាយផ្លូវគោក និងផ្លូវទឹក គឺត្រូវធ្វើបន្តសុពលភាពធ្វើអាជ្ញាប័ណ្ណរៀងរាល់មួយឆ្នាំម្តងដូចៗគ្នា៕អត្ថបទ ៖ ស៊ុម សុខជា

បណ្ដាញសង្គម

ព័ត៌មានថ្មីៗ

លោក Trump និយាយថា អាមេរិកនិងអ៊ីរ៉ង់ចុះសម្រុងគ្នាខ្លាំងណាស់

ភ្លៀងធ្លាក់ខ្លាំងបង្កការជន់លិចនៅទីក្រុងមជ្ឈមណ្ឌលហិរញ្ញវត្ថុម៉ុមបៃប្រទេសឥណ្ឌា

អាហ្វ្រិកខាងត្បូងអះអាងថា មនុស្សជាង ៩០០នាក់ ត្រូវបានចាប់ខ្លួន អំឡុងបាតុកម្មប្រឆាំងអន្តោប្រវេសន៍

UN ៖ ការរីករាលដាលឆ្លងជំងឺអេបូឡា អាចនឹងធ្វើឲ្យអាហ្វ្រិកខាតបង់ប្រាក់ ៣,៦ ពាន់លានដុល្លារ

ក្រុមជួយសង្រ្គោះស្វែងរកអ្នកជាប់ខ្លួនក្រោយប្លុកអគារផ្ទះល្វែងបាក់នៅទីក្រុងអាតែន ប្រទេសក្រិក

ទិន្នន័យអង្គការណាសាបង្ហាញថា អគារប្រហែល ៥៨.៨៧០ខ្នង រងការខូចខាតក្នុងការរញ្ជួយដីនៅវេណេស៊ុយអេឡា

មនុស្ស ១២នាក់ស្លាប់ ក្រោយទឹកជំនន់វាយប្រហារតំបន់ជាច្រើនរបស់ហ្គាណា

ក្មេងៗ ១៤នាក់ស្លាប់ ក្នុងហេតុកាណ៍បាក់ដំបូលមជ្ឈមណ្ឌលសិក្សានៅប៉ាគីស្ថាន

លោក Trumpរាយការណ៍ប្រាក់ចំណូលជាង១,៤ពាន់លានដុល្លារពីការបណ្តាក់ទុនគ្រីបតូ

មេដឹកនាំបេឡារុសបំពេញទស្សនកិច្ចទៅកាន់ឥណ្ឌូនេស៊ី ជាផ្នែកមួយនៃដំណើរទស្សនកិច្ចនៅអាស៊ី

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

នយោបាយ និង ការអភិវឌ្ឍន៍

ក្រសួងទេសចរណ៍ ចាប់ផ្តើមរៀបចំប្រព័ន្ធវិញ្ញាបនបត្រវិជ្ជាជីវៈទេសចរណ៍ជំរុញយុវជនបន្តសិក្សាលើជំនាញទេសចរណ៍

សិស្សថ្នាក់ទី១២លើកឡើងនូវមតិផ្សេងគ្នាជុំវិញការប្រឡង ដែលក្រសួងអប់រំប្រកាសថា នៅតែបន្តរៀបចំ

គណៈកម្មការរដ្ឋសភា និងតំណាងរាជរដ្ឋាភិបាលបានលើកយកសេចក្តីព្រាងច្បាប់ចំនួនពីរមកពិភាក្សា

ប្រមុខការទូតអង់គ្លេស នឹងមកបំពេញទស្សនកិច្ចនៅកម្ពុជា នៅថ្ងៃទី២៣ខែមិថុនា ខាងមុខនេះ

សម្ដេចតេជោ ៖ រដ្ឋាភិបាលនិងប្រជាពលរដ្ឋចងចាំជានិច្ចចំពោះការលះបង់របស់អតីតយុទ្ធជនគ្រប់រូប

មន្ទីសាធារណៈការ បានបន្តអ៊ុតកៅស៊ូនៅលើផ្លូវលេខ៤៧ មូលដ្ឋានខណ្ឌដូនពេញ រួចរាល់ហើយ

ក្រសួងទេសចរណ៍ប្រកាសបញ្ឈប់ផ្តល់អាជ្ញាប័ណ្ណដល់អាជីវកម្មដឹកជញ្ជូនទេសចរណ៍តាមផ្លូវគោកនិងផ្លូវទឹក

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

នយោបាយ​ និង ការអភិវឌ្ឍន៍

គណៈកម្មការ​រដ្ឋសភា និង​តំណាង​រាជរដ្ឋាភិបាល​បាន​លើក​យក​សេចក្តីព្រាងច្បាប់​ចំនួន​ពីរ​មក​ពិភាក្សា

ប្រមុខ​ការទូត​អង់គ្លេស​ នឹង​មក​បំពេញ​ទស្សនកិច្ច​នៅ​កម្ពុ​ជា នៅ​ថ្ងៃទី​២៣ខែមិថុនា ​ខាងមុខនេះ

សម្ដេច​តេ​ជោ​ ៖ រដ្ឋាភិបាល​និង​ប្រជាពលរដ្ឋ​ចងចាំ​ជានិច្ច​ចំពោះ​ការ​លះបង់​របស់​អតីត​យុទ្ធជន​គ្រប់រូប

មន្ទីសាធារណៈការ បានបន្តអ៊ុតកៅស៊ូនៅលើផ្លូវលេខ៤៧ មូលដ្ឋានខណ្ឌដូនពេញ រួចរាល់ហើយ

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

នយោបាយ និង ការអភិវឌ្ឍន៍

គណៈកម្មការរដ្ឋសភា និងតំណាងរាជរដ្ឋាភិបាលបានលើកយកសេចក្តីព្រាងច្បាប់ចំនួនពីរមកពិភាក្សា

ប្រមុខការទូតអង់គ្លេស នឹងមកបំពេញទស្សនកិច្ចនៅកម្ពុជា នៅថ្ងៃទី២៣ខែមិថុនា ខាងមុខនេះ

សម្ដេចតេជោ ៖ រដ្ឋាភិបាលនិងប្រជាពលរដ្ឋចងចាំជានិច្ចចំពោះការលះបង់របស់អតីតយុទ្ធជនគ្រប់រូប