BTV NEWS

សម្ដេចធិបតី ហ៊ុន ម៉ាណែត តែងប្រាប់មិត្តបរទេសថាកម្ពុជាប្រើយន្តការ UNCLOS មកពីថៃដកខ្លួនឯកតោភាគីពី MoU 2001

កម្ពុជា-ហ្វីលីពីន វាយតម្លៃខ្ពស់ចំពោះភាពរីកចម្រើននៃកិច្ចសហប្រតិបត្តិទ្វេភាគី

ICRC ប្ដេជ្ញាបន្តគាំទ្រ និងពង្រឹងកិច្ចសហប្រតិបត្តិការជាមួយកម្ពុជា បន្ថែមទៀត

សម្ដេចធិបតី៖ ភាពជោគជ័យរបស់អ្នកដឹកនាំអង្គភាពមួយ គឺការធានាឱ្យអង្គភាពនោះមានសមត្ថភាពបន្តដំណើរការ និងការរីកចម្រើន ទោះបីជាក្នុងពេលអវត្តមានរបស់ខ្លួនក៏ដោយ

នយោបាយ និង ការអភិវឌ្ឍន៍

ខេត្តបន្ទាយមានជ័យ បិទខ្ទប់ផ្នែកខ្លះនៃភូមិអូរនាងស្ថិតក្នុងក្រុងប៉ោយប៉ែត ដើម្បីទប់ស្កាត់ការរាលដាលនៃកូវីដ-១៩

បន្ទាយមានជ័យ៖ រដ្ឋបាលខេត្តបន្ទាយមានជ័យបានសម្រេចបិទខ្ទប់ផ្នែកខ្លះនៃភូមិអូរនាង ស្ថិតក្នុងក្រុងប៉ោយប៉ែតចាប់ពីថ្ងៃនេះទៅ ដើម្បីទប់ស្កាត់ការឆ្លងរីករាលដាលនៃមេរោគកូវីដ-១៩។ក្នុងសេចក្ដីសម្រេចចេញនៅថ្ងៃនេះ រដ្ឋបាលខេត្តបន្ទាយមានជ័យ បានប្រកាសថា សម្រេចបិទខ្ទប់ការធ្វើដំណើរចេញ-ចូលជាបណ្ដោះអាសន្នលើទីតាំងមួយផ្នែកនៃភូមិអូរនាង ស្ថិតក្នុងសង្កាត់ផ្សារកណ្ដាល នៃក្រុងប៉ោយប៉ែត។បើតាមសេចក្ដីសម្រេចនោះ ការបិទខ្ទប់បណ្ដោះអាសន្ននេះ មានរយៈពេល ១៤ថ្ងៃ ចាប់ពីថ្ងៃនេះរហូតទៅដល់ថ្ងៃទី១៤ ខែមិថុនាខាងមុខនេះ។រដ្ឋបាលខេត្តនេះបញ្ជាក់ថា ការសម្រេចបិទខ្ទប់នេះ គឺដើម្បីទប់ស្កាត់ការឆ្លងរីករាលដាលនៃមេរោគកូវីដ-១៩ បន្ទាប់ពីក្រុងប៉ោយប៉ែតបានមើលមនុស្សជាច្រើននាក់ឆ្លងមេរោគកូវីដ-១៩អស់រយៈជាច្រើនថ្ងៃមកហើយនោះ។អំឡុងពេលនៃការបិទខ្ទប់នេះ អាជ្ញាធរខេត្តនេះសម្រេចហាមឃាត់ការជួបជុំ ឬការប្រមូលផ្ដុំមនុស្ស ហាមឃាត់ការធ្វើដំណើរចេញ ឬចូល និងហាមឃាត់សកម្មភាពការងារ មុខរបរ ឬអាជីវកម្មដែលមិនចាំបាច់៕

ខេត្តកែបរកឃើញពលរដ្ឋ ៣៤នាក់ឆ្លងកូវីដ-១៩ បន្ទាប់ពីពួកគេពាក់ព័ន្ធនឹងកាស៊ីណូនៅស្រុកកំពង់ត្រាចក្នុងខេត្តកំពត

កែប៖ រដ្ឋបាលខេត្តកែប បានប្រកាសពីការរកឃើញពលរដ្ឋរហូតដល់ ៣៤នាក់បន្ថែមទៀត បានឆ្លងមេរោគកូវីដ-១៩កាលពីថ្ងៃម្សិលមិញនេះ ដែលពួកគេទាំងអស់សុទ្ធតែពាក់ព័ន្ធនឹងករណីផ្ទុះការឆ្លងមេរោគកូវីដ-១៩នៅឯកាស៊ីណូមួយស្ថិតក្នុងស្រុកកំពង់ត្រាច ខេត្តកំពត។ក្នុងសេចក្ដីប្រកាសព័ត៌មានរបស់ខ្លួន រដ្ឋបាលខេត្តកែបបានបញ្ជាក់ថា ករណីឆ្លងថ្មីទាំងអស់នេះ ត្រូវបានរកឃើញលើបុរសចំនួន ២៤នាក់ និងស្ត្រី ១០នាក់។រដ្ឋបាលខេត្តនេះ បញ្ជាក់បន្ថែមថា ពលរដ្ឋទាំង ៣៤នាក់នេះ បានឆ្លងមេរោគកូវីដ-១៩ បន្ទាប់ពីពួកគេបានធ្វើដំណើរទៅកាស៊ីណូ សុខ គីមម៉េង ស្ថិតនៅច្រកទ្វារទ្វេភាគីតន់ហន់ ស្ថិតក្នុងភូមិព្រែកក្រឹស ក្នុងស្រុកកំពត់ត្រាច។បើតាមរដ្ឋបាលខេត្តនេះ ពលរដ្ឋដែលឆ្លងមេរោគកូវីដ-១៩ទាំងអស់នេះ ត្រូវបានដាក់ឱ្យសម្រាកព្យាបាលនៅឯមណ្ឌលព្យាបាលជំងឺកូវីដ-១៩ នៃខេត្តកែប។ទន្ទឹមគ្នា រដ្ឋបាលខេត្តកែបបញ្ជាក់ថា កំពុងស្វែងរកមនុស្សជាច្រើនទៀតដែលបានប៉ះពាល់ជាមួយអ្នកជំងឺកូវីដ-១៩ទាំង ៣៤នាក់នេះ៕

កងទ័ពថែម៥ថ្ងៃទៀត ដើម្បីចាក់ដូសទី១ដល់ពលរដ្ឋអតីតតំបន់ក្រហមដែលនៅសល់ភាគច្រើនជាកម្មករកាត់ដេរ

ភ្នំពេញ ៖ នាយឧត្តមសេនីយ៍ ឥត សារ៉ាត់ ប្រធានប្រតិបត្តិការចាក់វ៉ាក់សាំងជូនប្រជាពលរដ្ឋនៅអតីតតំបន់ក្រហម ថ្លែងថា ដើម្បីឲ្យប្រជាពលរដ្ឋនៅអតីតតំបន់ក្រហមទាំងអស់បានចាក់វ៉ាក់សាំង កងទ័ពបានបន្ថែមថ្ងៃចាក់វ៉ាក់សាំងដូសទី១ ជូនប្រជាពលរដ្ឋចំនួន៥ថ្ងៃ បន្ថែមទៀត។ថ្លែងប្រាប់អ្នកសារព័ត៌មាន ក្នុងពេលចុះពិនិត្យទីតាំងចាក់វ៉ាក់សាំងនៅរាជធានីភ្នំពេញ នៅថ្ងៃទី៣១ ខែឧសភា ឆ្នាំ២០២១នេះ នាយឧត្តមសេនីយ៍ ឥត សារ៉ាត់ អគ្គមេបញ្ជាការងនាយសេនាធិការចម្រុះនៃកងយោធពលខេមរភូមិន្ទ និងជាប្រធានប្រតិបត្តិការចាក់វ៉ាក់សាំងជូនប្រជាពលរដ្ឋនៅអតីតតំបន់ក្រហម បានមានប្រសាសន៍ថា ក្នុងរយៈពេល៣០ថ្ងៃនៃដំណើរការអនុវត្តចាក់វ៉ាក់សាំងជូនប្រជាពលរដ្ឋ កងទ័ពបានជំរុញការចាក់វ៉ាក់សាំងដល់ប្រជាពលរដ្ឋដែលទទួលបានដូសទី១ មានចំនួនប្រមាណ៩០ម៉ឺននាក់ និងដូសទី២ មានចំនួនជាង៦៥ម៉ឺននាក់ ហើយតាមរយៈតួលេខនេះបានបង្ហាញពីការអនុវត្តស្របតាមផែនការរបស់រដ្ឋបាលរាជធានីភ្នំពេញ ខណៈការអនុវត្តបន្តចាក់វ៉ាក់សាំងដូសទី១ជូនប្រជាពលរដ្ឋដែលសេសសល់ភាគច្រើនជាកម្មករកាត់ដេរមានចំនួនប្រមាណជាង១០ម៉ឺននាក់។ដើម្បីធានាថា ប្រជាពលរដ្ឋក្នុងខណ្ឌទាំង៦ ដែលកងទ័ពបានចាក់វ៉ាក់សាំងគ្រប់ចំនួនទៅផែនការរបស់រដ្ឋបាលរាជធានីភ្នំពេញ ប្រមាណ១លាននាក់នោះ នាយឧត្តមសេនីយ៍ ឥត សារ៉ាត់ បានបញ្ជាក់ថា កងទ័ពនឹងប្រើប្រាស់រយៈពេលយ៉ាងយូរ៥ថ្ងៃប៉ុណ្ណោះ ដើម្បីបញ្ចប់ការចាក់ដូសទី១ជូនប្រជាពលរដ្ឋក្នុងខណ្ឌទាំង៦។ជាមួយគ្នានេះ នាយឧត្តមសេនីយ៍ បានវាយតម្លៃអំពីការប្រឹងប្រែងរបស់ក្រុមការងារចាក់វ៉ាក់សាំងទាំងអស់ ដែលបានយកចិត្តទុកដាក់ និងបំពេញការងារយ៉ាងសស្រាក់សស្រាំ ដើម្បីចាក់វ៉ាក់សាំងជូនប្រជាពលរដ្ឋឲ្យបានតាមផែនការ ពិសេសតបតាមអនុសាសន៍ដ៏ខ្ពង់ខ្ពស់របស់សម្តេចតេជោនាយករដ្ឋមន្ត្រី ធ្វើយ៉ាងណាឲ្យវ៉ាក់សាំងស្រោចស្រព និងចាក់វ៉ាក់សាំងជូនប្រជាពលរដ្ឋ ក្នុងការបង្កើតភាពស៊ាំការពារពីជំងឺកូវីដ-១៩។បន្ថែមលើសពីនេះ នាយឧត្តមសេនីយ៍ ឥត សារ៉ាត់ បានក្រើនរំលឹកដល់បងប្អូនប្រជាពលរដ្ឋដែលត្រូវទទួលដូសទី២ សូមមេត្តាទៅទទួលការចាក់តាមកាលបរិច្ឆេទកំណត់ ឬចន្លោះក្រោយការចាក់ដូសទី១ចំនួន១៥ថ្ងៃទៅ២៨ថ្ងៃ ដើម្បីធានាបាននូវប្រសិទ្ធភាពវ៉ាក់សាំង៕អត្ថបទ៖ ឧត្តម ភ័ណ

ខេត្តតាកែវរកឃើញពលរដ្ឋ ១៩នាក់ទៀតឆ្លងកូវីដ-១៩ ភាគច្រើនរកឃើញនៅស្រុកបាទី និងស្រុកត្រាំកក់

តាកែវ៖ ខេត្តតាកែវ បានប្រកាសពីការរកឃើញមនុស្សចំនួន ១៩នាក់ទៀត បានឆ្លងមេរោគកូវីដ-១៩កាលពីថ្ងៃម្សិលមិញនេះ ដែលភាគច្រើនរកឃើញនៅស្រុកបាទី និងស្រុកត្រាំកក់។ចំនួនអ្នកឆ្លងកូវីដ-១៩ថ្មីនៅក្នុងខេត្តនេះ ត្រូវបានមើលឃើញតាមរយៈរបាយការណ៍មួយដែលស្នងការដ្ឋាននគរបាលខេត្តតាកែវ ផ្ញើទៅអភិបាលខេត្តតាកែវកាលពីថ្ងៃម្សិលមិញនេះ។របាយការណ៍នោះ បង្ហាញថា ស្រុកបាទីបានរកឃើញពលរដ្ឋចំនួន ៧នាក់ទៀតឆ្លងមេរោគកូវីដ-១៩ ក្នុងនោះមានអាជីវករផ្សារសំរោងយ៉ោង ២នាក់ កសិករ ២នាក់ កូនសិស្ស ២នាក់ កម្មការិនីរោងចក្រសាន់បូ ១នាក់ និងអ្នកបើករថយន្ត ១នាក់។ចំណែកឯស្រុកត្រាំកក់វិញ របាយការណ៍ដដែលនេះបញ្ជាក់ថា បានរកឃើញមនុស្ស ៦នាក់ទៀតឆ្លងកូវីដ-១៩ ក្នុងនោះមានកសិករ ២នាក់ អាជីវករម្នាក់នៅផ្សារត្រពាំងអណ្ដើក កម្មការិនីរោងចក្រម្នាក់ អ្នកលក់ដូរនៅផ្ទះម្នាក់ និងជនជាតិម្នាក់។របាយការណ៍ឱ្យដឹងទៀតថា ក្រុងដូនកែវក៏បានរកឃើញពលរដ្ឋ ២នាក់ទៀតឆ្លងកូវីដ-១៩ផងដែរ ក្នុងនោះមានយោធាម្នាក់ និងពលករខ្មែរម្នាក់ដែលទើបវិលត្រឡប់មកពីប្រទេសថៃ។នៅឯស្រុកសំរោងឯណោះវិញ កសិករម្នាក់ និងកម្មការិនីម្នាក់ គឺជាករណីឆ្លងថ្មីដែលអាជ្ញាធរខេត្តតាកែវត្រូវបានរកឃើញនៅថ្ងៃម្សិលមិញនេះ។សម្រាប់ស្រុកព្រៃកប្បាស និងស្រុកកោះអណ្ដែត បានរកឃើញករណីឆ្លងថ្មីតែមួយប៉ុណ្ណោះនៅក្នុងស្រុកនីមួយៗ ដែលជាពលករខ្មែរវិលត្រឡប់មកពីប្រទេសថៃ និងពលរដ្ឋធ្វើដំណើរទៅពីរាជធានីភ្នំពេញ៕

អភិបាលខេត្តតាកែវ បន្តណែនាំដល់ប្រជាពលរដ្ឋឱ្យបង្កើនការប្រុងប្រយ័ត្នចំពោះជំងឺកូវីដ-១៩

ភ្នំពេញ ៖ អភិបាលខេត្តតាកែវ ឯកឧត្តម អ៊ូច ភា បានធ្វើការក្រើនរំលឹក ក៏ដូចជាបន្តណែនាំទៅដល់ប្រជាពលរដ្ឋ ឱ្យបង្កើនការប្រុងប្រយ័ត្នចំពោះជំងឺកូវីដ-១៩ ដែលកំពុងរីករាលដាលនៅក្នុងខេត្តតាកែវ នឹងត្រូវស្តាប់តាមការណែនាំរបស់ក្រសួងសុខាភិបាល និងអនុវត្ត៣កុំ ៣ការពារ ឱ្យបានល្អប្រសើរ។ក្នុងឱកាសចុះចែកអំណោយជូនគ្រួសារខ្វះខាត និងរងផលប៉ះពាល់ដោយសារជំងឺកូវីដ-១៩ ចំនួនជាង៣០០គ្រួសារ នៅក្នុងបរិវេណវត្តត្រពាំងព្រះ ឃុំត្រពាំងសាប ស្រុកបាទី កាលពីម្សិលមិញ ឯកឧត្តម អ៊ូច ភា អភិបាលខេត្តតាកែវ បានរំលឹកប្រជាពលរដ្ឋថា ជំងឺកូវីដ-១៩ នៅតែបន្តឆ្លងរាលដាលនៅតាមសហគមន៍ និងពុំធូរស្បើយសោះ សម្រាប់ខេត្តតាកែវ ដែលទាមទារឱ្យពលរដ្ឋទាំងអស់ បន្តរួមគ្នាទប់ស្កាត់ និងការពារជំងឺដ៏កាចសាហាវមួយនេះកុំឱ្យឆ្លងដល់សហគមន៍កាន់តែធ្ងន់ធ្ងរជាងនេះថែមទៀត។ឯកឧត្តម បានបន្ថែមទៀតថា ដើម្បីចូលរួមទប់ស្កាត់ នឹងប្រយុទ្ធប្រឆាំងជំងឺកូវីដ១៩នេះ ប្រជាពលរដ្ឋ ត្រូវអនុវត្តឱ្យបានត្រឹមត្រូវតាមការណែនាំរបស់ក្រសួងសុខាភិបាល និងត្រូវថែរក្សាសុខភាព និងរស់នៅទម្លាប់មានអនាម័យ លាងដៃនឹងសាប៊ូ អាល់កុល និងត្រូវពាក់ម៉ាស់ឱ្យបានគ្រប់ៗគ្នាពេលចេញក្រៅផ្ទះ មិនត្រូវជួបជុំគ្នាច្រើន ដែលនាំឱ្យមានការឆ្លងរីករាលដាលជំងឺកូវីដ-១៩នៅក្នុងសហគមន៍របស់ខ្លួន។ឯកឧត្តម អ៊ូច ភា បានបន្តទៀតថា បច្ចុប្បន្ននេះ អត្រាអ្នកឆ្លងជំងឺកូវីដ-១៩ មានការកើនឡើងយ៉ាងខ្លាំងពីមួយថ្ងៃទៅមួយថ្ងៃ ហើយចំនួនអ្នកស្លាប់ ក៏មានការកើនឡើងដូចគ្នាផងដែរ ដូច្នេះប្រជាពលរដ្ឋ ត្រូវមានការយកចិត្តទុកដាក់ខ្ពស់ពីបញ្ហានេះ ចៀសវាងអនុវត្តផ្ទុយពីការណែនាំរបស់អាជ្ញាធរមូលដ្ឋាន និងក្រសួងសុខាភិបាល ។ឯកឧត្តម អភិបាលខេត្តតាកែវ បានធ្វើការណែនាំដល់អាជ្ញាធរមូលដ្ឋាន ឱ្យបន្តផ្សព្វផ្សាយដល់ ប្រជាពលរដ្ឋនៅមូលដ្ឋាន អំពីគ្រោះថ្នាក់នៃជំងឺកូវីដ-១៩ និងត្រូវធ្វើយ៉ាងណាឱ្យប្រជាពលរដ្ឋចូលរួមសហការជាមួយអាជ្ញាធរ ជាមួយរាជរដ្ឋាភិបាល ព្រោះប្រសិនបើគ្មានការចូលរួមអនុវត្តពីប្រជាពលរដ្ឋនោះទេ មិនអាចទប់ស្កាត់ជំងឺកូវីដ-១៩បាននោះទេ៕អត្ថបទ៖ គុជ វិភាគ

ក្រសួងកសិកម្មរៀបចំផែនការគោលនយោបាយជំរុញការដាំដំណាំទុរេន

ភ្នំពេញ ៖ ដោយបានពិនិត្យឃើញ ដំណាំទុរេនកំពុងតែមានសក្ដានុពលទីផ្សារ ក្រសួងកសិកម្ម រុក្ខាប្រមាញ់ និងនេសាទ បាននិងកំពុងត្រៀមរៀបចំដាក់ចេញនូវគោលនយោបាយ ដើម្បីជំរុញដំណាំទុរេន និងផ្លែឈើមានសក្ដានុពលទីផ្សារដទៃទៀត។ការដាំដំណាំទុរេននៅកម្ពុជា នាពេលបច្ចុប្បន្ន កំពុងតែពេញនិយម ដោយសារមានអតិថិជននៅក្នុងស្រុកជាច្រើនបានគាំទ្រទៅលើគុណភាព និងសុវត្ថិភាពរបស់ផលិតផលទុរេនកម្ពុជា។ ម្យ៉ាងទៀត តម្លៃទុរេន ក្នុងស្រុកគឺខ្ពស់ជាងទុរេននាំចូល ហើយមិនមានបញ្ហាទីផ្សារដោយសារមានតម្រូវការខ្ពស់។ កសិករអាចរកប្រាក់ចំណូលបានច្រើន គឺក្នុង១ហិកតា អាចទទួលបានប្រមាណ ១-២ ម៉ឺនដុល្លារ ក្នុងលក្ខខណ្ឌនៃការដាំទុរេនដោយអនុវត្តតាមបទដ្ឋានបច្ចេកទេសត្រឹមត្រូវ និងទទួលបានទិន្នផលល្អ។ ប្រសិនបើកសិករដាំជាទ្រង់ទ្រាយធំ ឬច្រើនគ្រួសារដោយមានការចងក្រងជាសហគមន៍ ដំណាំទុរេននឹងអាចជួយរកចំណូលបានច្រើនដល់សេដ្ឋកិច្ចជាតិ។ ទោះបីជាដំណាំនេះ ទទួលបានប្រាក់ចំណូលខ្ពស់ ប៉ុន្តែតម្រូវឱ្យមានការវិនិយោគទុនច្រើន និងទាមទារការអនុវត្តបច្ចេកទេសត្រឹមត្រូវជាមួយនឹងការថែទាំយ៉ាងដិតដល់ទើបទទួលបានជោគជ័យ។ដោយបានពិនិត្យឃើញ ដំណាំទុរេនកំពុងតែមានសក្ដានុពលទីផ្សារ ក្រសួងកសិកម្ម រុក្ខាប្រមាញ់ និងនេសាទ បាននិងកំពុងត្រៀមរៀបចំដាក់ចេញនូវគោលនយោបាយ - រៀបចំផែនការ និងទិសដៅពង្រីកការដាំដំណាំទុរេន និងដំណាំឈើហូបផ្លែ ដែលមានសក្ដានុពលសម្រាប់ទីផ្សារក្នុង និងក្រៅប្រទេស - បង្កើតស្ថានីយបង្កាត់ និងផលិតពូជទុរេននិងដំណាំហូបផ្លែដែលពេញនិយមសម្រាប់ផ្គត់ផ្គង់ដល់កសិករដើម្បីងាយស្រួលដាក់លក់នៅលើផ្សារក្នុង និងក្រៅប្រទេស និង- អភិវឌ្ឍហេដ្ឋារចនាសម្ព័ន្ធចាំបាច់ ដើម្បីជួយសម្រួលដល់ខ្សែច្រវាក់ផលិតកម្មដំណាំទុរេន និងដំណាំហូបផ្លែផ្សេងទៀត។ក្រសួងក៏នឹង បណ្តុះបណ្តាលបច្ចេកទេសដាំដុះទំនើប រួមទាំងបច្ចេកទេសមុននិងក្រោយប្រមូលផលដល់អ្នកដាំដុះឱ្យស្របតាមស្តង់ដារសុវត្ថិភាព ឆ្លើយតមនឹងលក្ខខណ្ឌតម្រូវសម្រាប់ការនាំចេញ - ចងក្រងសហគមន៍ផលិតដំណាំទុរេន និងដំណាំហូបផ្លែដើម្បីជំរុញផលិតកម្មស្របតាមស្តង់ដារ និងតម្រូវការទីផ្សារ - លើកទឹកចិត្តដល់វិស័យឯកជនក្នុងការបង្កើតការវិនិយោគ ដើម្បីជំរុញខ្សែច្រវាក់ផលិតកម្ម និងការផ្គត់ផ្គង់ទីផ្សារក្នុងស្រុក និងជំរុញការនាំចេញទៅក្រៅប្រទេស និង- រៀបចំបង្កើតសហព័ន្ធកសិឧស្សាហកម្មកម្ពុជា ដើម្បីគាំទ្រ លើកទឹកចិត្ត និងជំរុញការអភិវឌ្ឍវិស័យកសិកម្ម កសិឧស្សាហកម្ម និងកសិធុរកិច្ចនៅក្នុងព្រះរាជាណាចក្រកម្ពុជា។បច្ចុប្បន្ននេះ កម្ពុជាមានផ្ទៃដីដាំដុះដំណាំទុរេនចំនួន ៥ ២៨៩ហិកតា ក្នុងនោះផ្ទៃដីប្រមូលផល មានចំនួន ៣ ៤០៣ហិកតា ដែលទទួលបានបរិមាណផលប្រមាណ ៣៦ ៦៥៦តោនក្នុង១ឆ្នាំ៕អត្ថបទ ៖ វណ្ណៈ

ក្រសួងអប់រំជំរុញឱ្យរួមគ្នាសកម្មទាំងអ្នកផ្ដល់ និងអ្នកទទួលសេវាអប់រំ ក្នុងអំឡុងវិបត្តិកូវីដ-១៩

ភ្នំពេញ ៖ ក្នុងដំណាក់កាលកូវីដ-១៩ ដែលការសិក្សាទូទាំងប្រទេសត្រូវផ្អែកលើការសិក្សាអនឡាញ និងការសិក្សាពីចម្ងាយទាំងស្រុង អ្នកនាំពាក្យក្រសួងអប់រំ បានបញ្ជាក់ថា ការអប់រំក្នុងកាលៈទេសៈនេះ គឺទាមទារជាចាំបាច់នូវភាពសកម្មរវាងភាគី អ្នកផ្ដល់សេវាអប់រំ និងភាពសកម្មនៃភាគីទទួលសេវាអប់រំដើរទន្ទឹមគ្នា ទើបធ្វើឱ្យការអប់រំក្នុងដំណាក់កាលនេះមានភាពប្រសើរ។កំឡុងពេលដែលការសិក្សាទូទាំងប្រទេសត្រូវពឹងផ្អែកលើការសិក្សាតាមប្រព័ន្ធអនឡាញ និងការសិក្សាពីចម្ងាយនាពេលនេះ ឯកឧត្តម រស់ សុវាចា អ្នកនាំពាក្យក្រសួងអប់រំ យុវជន និងកីឡា បានបញ្ជាក់ប្រាប់ BTV នាពេលថ្មីៗនេះថា ការអប់រំក្នុងគ្រាលំបាកនេះ គឺទាមទារឱ្យភាពសកម្មភាព តាំងចិត្តខ្ពស់ពីភាគីទាំងពីរ គឺភាគីអ្នកផ្ដល់សេវាអប់រំ និងភាគីអ្នកទទួលសេវាអប់រំ។ឯកឧត្តម អ្នកនាំពាក្យបញ្ជាក់ថា សម្រាប់ភាគីផ្ដល់សេវាអប់រំគឺមានភាគីពាក់ព័ន្ធច្រើន រាប់បញ្ចូលទាំងអ្នកជំនាញខាងខ្លឹមសារ អ្នកជំនាញខាងដំណើរការ រួមទាំងអ្នកជំនាញបច្ចេកទេស រួមគ្នាក្នុងការបង្កើតនូវខ្លឹមសារបង្រៀន និងបង្កើតនូវកម្មវិធីសិក្សាមួយចំនួន ដែលមានភាពងាយស្រួលសិក្សាក្នុងកំឡុងពេលផ្អាកការសិក្សានេះ។ទន្ទឹមនឹងភាពសកម្មរបស់អ្នកផ្ដល់សេវាអប់រំ ឯកឧត្តម រស់ សុវាចា លើកឡើងថា ការចូលរួមយ៉ាងសកម្ម និងការតាំងចិត្តខ្ពស់របស់ អ្នកទទួលសេវាអប់រំ ក៏ត្រូវដើរទន្ទឹមគ្នា មិនអាចខ្វះបាននោះទេ។ ឯកឧត្តម ថា បើអ្នកទទួលសេវាអប់រំគ្មានការចូលរួម គ្មានការតាំងចិត្តក្នុងការសិក្សានោះទេ គឺគ្មានប្រសិទ្ធភាពឡើយ។ក្នុងដំណាក់កាលបច្ចុប្បន្ន ដែលសាលារៀនទូទាំងប្រទេសនៅបន្តផ្អាកដំណើរការ ក្រសួងអប់រំជាភាគីធំក្នុងការផ្ដល់សេវាអប់រំ បានបង្កើតនូវវីដេអូបង្រៀនជាច្រើន ដោយមានការផ្សព្វផ្សាយជារៀងរាល់ថ្ងៃលើមធ្យោបាយមួយចំនួនដូចជា ទំព័រហ្វេសប៊ុកផ្លូវការរបស់ក្រសួងអប់រំ ប្រព័ន្ធយូធូបផ្លូវការរបស់ក្រសួង ទូរទស្សន៍ ទទក ២ កម្មវិធីទូរស័ព្ទ MoEYS E-Learning រួមទាំងការចូលរួមរបស់វិស័យឯកជនមួយចំនួនផងដែរ។ ទន្ទឹមនឹងមានកម្មវិធីសិក្សាទាំងនេះ គ្រូបង្រៀនជាច្រើនក៏បានចងក្រងសិស្ស តាមប្រព័ន្ធអនឡាញ ដើម្បីធ្វើការបង្រៀន និងដាក់កិច្ចឱ្យធ្វើជាប្រចាំរាល់ថ្ងៃផងដែរ។បច្ចុប្បន្នក្រសួងអប់រំក៏មិនទាន់អាចកំណត់ កាលបរិច្ឆេទបើកដំណើរការសាលារៀនវិញនោះទេ ដោយព្រឹត្តិការណ៍សហគមន៍ ២០កុម្ភៈ មិនទាន់បានបិទបញ្ចប់នៅឡើយ៕អត្ថបទ៖ គឹមហុក

ប្រឡាយជាង ៦០០ម៉ែត្រនឹងជួយដល់ដីស្រែកសិករជាង៣០០ហិកតា នៅស្វាយរៀងមានទឹកគ្រប់គ្រាន់

ស្វាយរៀង ៖ ប្រឡាយមួយខ្សែប្រវែងជាង៦០០ម៉ែត្រ រួមនិងស្ពានបេតុងប្រវែងជាង១០ម៉ែត្រ ស្ថិតនៅក្នុងឃុំស្វាយយា ស្រុកស្វាយជ្រំ ខេត្តស្វាយរៀង ត្រូវបានក្រុមការងាររាជរដ្ឋាភិបាល តាមរយះក្រសួងធនធានទឹក និងឧតុនិយម ជីកស្ដារ និងស្ថាបនា បានប្រមាណជាង៦០% និងត្រៀមដាក់អោយពលរដ្ឋប្រើប្រាស់ ក្នុងការងារបង្កបង្កើនផល និងឆ្លងកាត់។លោក សុខ សំអន មេឃុំស្វាយយា ស្រុកស្វាយជ្រំ ខេត្តស្វាយរៀង នៅថ្ងៃទី៣០ ខែឧសភា ម្សិលមិញ បានឲ្យដឹងថា ប្រឡាយ និងស្ពាន ដែលគាំទ្រគម្រោងដោយរាជរដ្ឋាភិបាល បច្ចុប្បន្នក្រុមការងារ មន្ទីរធនធានទឹក និងឧតុនិយមខេត្ត បានជីកស្តារ និងស្ថាបនា សម្រេចបានជាង៦០% និងត្រៀមដាក់អោយពលរដ្ឋប្រើប្រាស់ក្នុងវិស័យកសិកម្ម និងធ្វើដំណើរឆ្លងកាត់ នាពេលឆាប់ៗ ខាងមុខ។ លោក បានបន្តថា ប្រឡាយដែលក្រុមការងារមន្ទីរធនធានទឹក និងឧតុនិយម ជីកស្តានេះមានប្រវែង ៦៥០ម៉ែត្រ បន្ទាប់ពីជីកស្តាររួចរាល់ពលរដ្ឋនៅក្នុងតំបន់នេះ មានលទ្ធភាពបង្កបង្កើនផលបានទាំងប្រាំង និងវស្សានៅលើផ្ទៃដី ជាង៣០០ហិកតានៅក្នុងភូមិមួយចំនួនរបស់ឃុំ។លោក ចាន់ ប៉ុន ពលរដ្ឋនៅក្នុងឃុំសា្វយយា បានគោរពថ្លែងអំណរគុណចំពោះរាជរដ្ឋាភិបាលសម្តេចអគ្គមហាសេនាបតីតេជោ ហ៊ុន សែន នាយរដ្ឋមន្ត្រី ដែលបានគិតគូរ អភិវឌ្ឍន៍ ប្រព័ន្ធធារាសាស្ត្រ ស្ពាន ជូនពលរដ្ឋនៅគ្រប់តំបន់ ពិសេសនៅក្នុងឃុំរបស់ពួកគាត់ ដើម្បីប្រើប្រាស់ក្នុងការងារបង្កបង្កើនផល និងធ្វើដំណើរឆ្លងកាត់នាំកសិផលពីតំបន់មួយទៅតំបន់មួយទៀត។ឃុំស្វាយយា មានភូមិចំនួន១៥ មានពលរដ្ឋរស់នៅនិងអាស្រ័យផលលើវិស័យកសិកម្ម ចំនួនជាង៣ពាន់គ្រួសារ បច្ចុប្បន្នឃុំក្រោមការដឹកនាំរបស់រាជរដ្ឋាភិបាល រាល់ហេដ្ឋារចនាសម្ព័ន្ធ រូបវន្ត ប្រព័ន្ធ ទឹក ភ្លើង ផ្លូវ រួមនិងជីវភាពរបស់ពលរដ្ឋត្រូវបានលើកកម្ពស់ តាមរយះវិស័យកសិកម្ម សិប្បកម្មខ្នាតតូច និងចំណូលបន្ទាប់បន្សំបន្ថែមពីរោងចក្រសហគ្រាសនៅក្នុងតំបន់៕អត្ថបទ ៖ ភា សារិត

កងទ័ពកម្ពុជា ស្នើភាគីថៃកុំឲ្យមានការបាញ់ពលរដ្ឋខ្មែរ ខណៈពួកគេលួចឆ្លងដែនខុសច្បាប់

ភ្នំពេញ ៖ មន្ត្រីយោធារបស់កម្ពុជា បានស្នើទៅភាគីថៃជាថ្មីម្តងទៀត ដោយសូមឲ្យឆ្មាំការពារព្រំដែនរបស់ថៃ មានការយោគយល់ និងកុំធ្វើការបាញ់សម្លាប់ពលរដ្ឋខ្មែរ ពេលដែលពួកគាត់លួចឆ្លងដែនខុសច្បាប់ និងលួចទៅកាប់ឈើនៅលើទឹកដីថៃ ជាដើមនោះ។ការស្នើសុំរបស់យោធាកម្ពុជានេះ គឺបានធ្វើឡើងនៅក្នុងកិច្ចប្រជុំមួយ កាលពីចុងសប្តាហ៍កន្លងទៅនេះ នៅក្នុងភូមិសាស្ត្រជូរមុខតំបន់ភ្នំតាថាវ ខេត្តព្រះវិហារ ដើម្បីបន្តកិច្ចសហប្រតិបត្តិការរួមគ្នា ក្នុងទប់ស្កាត់បង្ក្រាបរាល់បទល្មើស ផ្សេងៗនៅតាមព្រំដែននៃប្រទេសទាំងពីរ(កម្ពុជា-ថៃ)។នៅក្នុងកិច្ចប្រជុំនោះភាគីទាំងពីរ បានប្ដេជ្ញារួមគ្នាបន្តក្នុងការបង្ក្រាប និងទប់ស្កាត់រាល់បទល្មើសដែលលួចឆ្លងដែនដោយខុសច្បាប់ ពិសេសបទល្មើសឆ្លងដែនដោយខុសច្បាប់ របស់បងប្អូនពលរដ្ឋខ្មែរលួចឆ្លងដែនចូលទៅរកកាប់ឈើប្រណិតក្នុងទឹកដីថៃជាដើមនោះ។យ៉ាងណាក៏ដោយនៅក្នុងកិច្ចប្រជុំនោះភាគីកម្ពុជា បានធ្វើការស្នើសុំការយោគយល់ពីសំណាក់ថ្នាក់ដឹកនាំ ក៏ដូចជាអាជ្ញាធរថៃ កុំមានការបាញ់សម្លាប់ពលរដ្ឋខ្មែរពេលដែលពួកគាត់លួចឆ្លងដែនទៅកាន់ប្រទេសថៃ។ រួមគ្នាទប់ស្កាត់ការរីករាលដាលជំងឺកូវីដ-១៩ តាមព្រំដែន មិនត្រូវធ្វើអ្វីថ្មីនៅចំណុចដែលមិនទាន់បានកំណត់ រួមគ្នាទប់ស្កាត់ការលួចឆ្លងដែន និងកាប់ព្រៃឈើខុសច្បាប់ និងការណាត់ជួបគ្នាឡើងវិញក្នុងរយ:ពេល១ខែម្តងនោះ។នៅក្នុងកិច្ចប្រជុំនោះដែរ លោកឧត្តមសេនីយ៍ត្រី ច័ន្ទ សុខុន មេបញ្ជាការកងពលតូចអន្តរាគមន៍លេខ៨ បានបញ្ជាក់ផងដែរថា គោលបំណងសំខាន់ក្នុងកិច្ចប្រជុំនេះ គឺបង្កើនកិច្ចសហប្រតិបត្តិការល្អបន្ថែមទៀត រវាងកងកម្លាំងឈរជើងជួរមុខ ដើម្បីរក្សាបានសុខសន្តិភាព និងការអភិវឌ្ឍន៍ ព្រមទាំងការរស់នៅប្រកបដោយភាពសុខសាន្តរបស់ប្រជាជន នៃប្រទេសទាំងពីរ ឈរលើគោលការណ៍ដោះស្រាយគ្នាដោយសន្តិវិធី ជៀសវាងការប្រឈមមុខដាក់គ្នាដោយកម្លាំងប្រដាប់អាវុធ។ បន្ថែមពីនោះទៀត លោកឧត្តមសេនីយ៍ត្រី ច័ន្ទ សុខុន បានធ្វើការក្រើនរំលឹកទៅដល់គ្រប់បណ្តាអង្គភាពទាំងអស់ ដែលកំពុងបំពេញភារកិច្ច ក្នុងកិច្ចការពារ នៅតាមគោលដៅខ្សែត្រៀមជួរមុខព្រំដែនកម្ពុជា-ថៃត្រូវប្តេជ្ញាចិត្តខ្ពស់ខិតខំប្រឹងប្រែងបន្តក្នុងការការពារ គ្រប់គ្រងបានយ៉ាងរឹងមាំ ដោយឈរលើស្មារតីប្រុងប្រយ័ត្ន និងទទួលខុសត្រូវខ្ពស់។ ពិសេសបង្កើនការចេញដើរល្បាតបានជាប់ជាប្រចាំ ទោះបីជាសភាពការណ៍ព្រំដែន មានសភាពស្ងប់ស្ងាត់ជាធម្មតាក្តី ក៏ត្រូវតែមានការប្រុងប្រយ័ត្នជាប់ជានិច្ច៕អត្ថបទបាន ចក់

សម្តេចប្រធានកាកបាទក្រហម ថ្វាយសារលិខិតអរព្រះគុណដល់ហ្លួងម៉ែ ដែលប្រទានព្រះរាជទ្រព្យ ទ្រទ្រង់សកម្មភាពកាកបាទក្រហមកម្ពុជា

ភ្នំពេញ ៖ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា នៅថ្ងៃទី២៩ឧសភានេះ បានថ្វាយនូវសារលិខិតអរព្រះគុណ ដល់សម្តេច ព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គលព្រះប្រធានកិត្តិយស កាកបាទក្រហមកម្ពុជា ជាទីសក្ការៈដ៏ខ្ពង់ខ្ពស់បំផុត ដែលព្រះអង្គបានប្រទាននូវព្រះរាជទ្រព្យប្រចាំត្រីមាសសម្រាប់ទ្រទ្រង់ដល់កម្មភាពមនុស្សធម៌របស់កាកបាទក្រហមកម្ពុជា។សម្តេចប្រធាន បានបញ្ជាក់ក្នុងសារលិខិតថា សម្តេចនិងថ្នាក់ដឹកនាំ សមាជិក សមាជិកា មន្ត្រី បុគ្គលិកទាំងអស់ នៃកាកបាទក្រហមកម្ពុជា មាន សេចក្តីសោមនស្សរីករាយក្រៃលែង ដោយបានទទួលព្រះរាជទ្រព្យដ៏ឧត្តុង្គឧត្តម ចំនួន 6.000 USD (ប្រាំមួយពាន់ ដុល្លារអាមេរិក) របស់ សម្តេចព្រះមហារត្រី ព្រះវររាជមាតាជាតិខ្មែរ ជាទីគោរពសក្ការៈដែលជាព្រះរាជូបត្ថម្ភ ដ៏ថ្លៃថ្លា ចំពោះ កាកបាទក្រហមកម្ពុជា សម្រាប់២ត្រីមាស (ខែកក្កដា ដល់ ខែធ្នូ)ឆ្នាំ២០២១។តាងនាមថ្នាក់ដឹកនាំ សមាជិក សមាជិកា មន្ត្រី បុគ្គលិកទាំងអស់ នៃកាកបាទក្រហមកម្ពុជា សម្តេចសូម ព្រះបរមរាជានុញ្ញាត ថ្លែងអំណរព្រះរាជគុណដ៏ខ្ពង់ខ្ពស់បំផុត ថ្វាយ សម្ដេចព្រះមហាក្សត្រី ព្រះវររាជមាតា ជាតិខ្មែរ ជាទីគោរពសក្ការៈដ៏ខ្ពង់ខ្ពស់បំផុតដែលព្រះអង្គតែងតែសព្វព្រះរាជហឫទ័យប្រោសព្រះរាជូបត្ថម្ភ ជារៀងរហូតមកសម្រាប់ទ្រទ្រង់សកម្មភាពមនុស្សធម៌ របស់កាកបាទក្រហមកម្ពុជា។សម្តេច និងសហការីទាំងអស់ នឹងប្រើប្រាស់ព្រះរាជទ្រព្យដ៏ឧត្តុង្គឧត្តមនេះ ទៅតាមព្រះរាជតម្រិះ ដ៏ខ្ពង់ខ្ពស់របស់សម្តេចព្រះមហាក្សត្រី ព្រះវររាជមាតាជាតិខ្មែរ ជាទីគោរពសក្ការៈដ៏ខ្ពង់ខ្ពស់បំផុត សម្រាប់ជួយសង្គ្រោះដល់ប្រជារាស្ត្រក្រីក្រ និងប្រជារាស្ត្រដែលទទួលរងគ្រោះ ដោយគ្រោះមហន្តរាយផ្សេងៗ នៅទូទាំងព្រះរាជាណាចក្រកម្ពុជា។សម្តេចប្រធាន ក៏បានបួងសួង គុណបុណ្យព្រះរតនត្រ័យកែវទាំងបី វត្ថុស័ក្តិសិទ្ធិក្នុងលោក ទេវតារក្សាព្រះមហា ស្វេតច្ឆត្រ ព្រះបារមី នៃព្រះវិញ្ញាណក្ខន្ធ អតីតព្រះមហាក្សត្រ ព្រះមហាក្សត្រិយានីខ្មែរគ្រប់ព្រះអង្គ ជាពិសេស ទេវតាឆ្នាំថ្មី ឆ្នាំ២០២១នេះ សូមប្រោសព្រះរាជទានព្រះពរជ័យ បវរមហាប្រសើរ ថ្វាយ សម្តេចព្រះមហាក្សត្រី ព្រះវររាជមាតាជាតិខ្មែរ ជាទីគោរពសក្ការៈដ៏ខ្ពង់ខ្ពស់បំផុត សូមព្រះអង្គ មានព្រះបរមសុខគ្រប់ប្រការ ដើម្បីគង់ប្រថាប់ជាមហាម្លប់ដ៏ត្រជាក់ត្រជំ សម្រាប់ប្រជារាស្ត្រ ជាកូនចៅ ចៅទូត របស់ព្រះអង្គនៅទូទាំងព្រះរាជាណាចក្រកម្ពុជា ជ្រកកោនតរៀងទៅ៕អត្ថបទ មុត សុទ្ធ

បណ្ដាញសង្គម

ព័ត៌មានថ្មីៗ

អ្នកនាំពាក្យក្រសួងព័ត៌មាន៖ ការពង្រឹងសុវត្ថិភាពឌីជីថល គឺជាកត្តាចម្បងក្នុងការប្រយុទ្ធប្រឆាំងព័ត៌មានក្លែងក្លាយ

កាកបាទក្រហមកម្ពុជា បណ្តុះបណ្តាលយុវជន ជាង១០០នាក់ លើច្បាប់មនុស្សធម៌ និងការកសាងសន្តិភាព

ផ្ទាំងទឹកនៅប្រទេសស្វីស ឆ្ពោះទៅរកការបំបែកកំណត់ត្រាមួយទៀត ក្រោយរលកកម្តៅខែមិថុនា

លោក Merz បញ្ជាក់ថា អាល្លឺម៉ង់អាចការពារការជំរុញការចំណាយយោធា ជាការឆ្លើយតបទៅនឹងលោក Trump

បុគ្គលិកសន្តិសុខស៊ីរី ៣រូបរងរបួស ដោយសារវាយប្រហារនៅជិតក្រុងដាម៉ាស ខណៈអ្នកប្រព្រឹត្តិស្លាប់

ក្រុមតាំងលំនៅនិគមន៍អ៊ីស្រាអែល ដណ្តើមក្តីស្រមៃជនប៉ាឡេស្ទីនក្នុងការមានផ្ទះសម្បែងនឹងគេនៅតំបន់វ៉េសប៊ែង

EU «ថ្កោលទោសយ៉ាងខ្លាំង» ចំពោះការវាយប្រហារបណ្ដាលឲ្យមានអ្នកស្លាប់ច្រើន នៅទីក្រុងដាម៉ាស

កងទ័ពជើងទឹកអង់គ្លេស សាកល្បងយានដ្រូនមានសមត្ថភាពវាយប្រហារចេញពីនាវា

មន្រ្តីជាន់ខ្ពស់រួមទាំងប្រធានាធិបតីអ៊ីរ៉ង់ ចូលរួមពិធីលាគ្នាចុងក្រោយ សម្រាប់អតីតមេដឹកនាំកំពូល Khamenei

អង្គការសហប្រជាជាតិ ព្រមានអំពីការមានបាតុភូតអែលនីញ៉ូដ៏ខ្លាំងក្លា

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

នយោបាយ និង ការអភិវឌ្ឍន៍

កងទ័ពថែម៥ថ្ងៃទៀត ដើម្បីចាក់ដូសទី១ដល់ពលរដ្ឋអតីតតំបន់ក្រហមដែលនៅសល់ភាគច្រើនជាកម្មករកាត់ដេរ

ខេត្តតាកែវរកឃើញពលរដ្ឋ ១៩នាក់ទៀតឆ្លងកូវីដ-១៩ ភាគច្រើនរកឃើញនៅស្រុកបាទី និងស្រុកត្រាំកក់

អភិបាលខេត្តតាកែវ បន្តណែនាំដល់ប្រជាពលរដ្ឋឱ្យបង្កើនការប្រុងប្រយ័ត្នចំពោះជំងឺកូវីដ-១៩

ក្រសួងកសិកម្មរៀបចំផែនការគោលនយោបាយជំរុញការដាំដំណាំទុរេន

ក្រសួងអប់រំជំរុញឱ្យរួមគ្នាសកម្មទាំងអ្នកផ្ដល់ និងអ្នកទទួលសេវាអប់រំ ក្នុងអំឡុងវិបត្តិកូវីដ-១៩

ប្រឡាយជាង ៦០០ម៉ែត្រនឹងជួយដល់ដីស្រែកសិករជាង៣០០ហិកតា នៅស្វាយរៀងមានទឹកគ្រប់គ្រាន់

កងទ័ពកម្ពុជា ស្នើភាគីថៃកុំឲ្យមានការបាញ់ពលរដ្ឋខ្មែរ ខណៈពួកគេលួចឆ្លងដែនខុសច្បាប់

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

នយោបាយ​ និង ការអភិវឌ្ឍន៍

ខេត្ត​តាកែវ​រក​ឃើញ​ពលរដ្ឋ ​១៩​នាក់​ទៀត​ឆ្លង​កូវីដ-១៩ ភាគ​ច្រើន​រក​ឃើញ​នៅ​ស្រុក​បាទី និង​ស្រុក​ត្រាំកក់

អភិបាលខេត្ត​តាកែវ​ បន្ត​ណែនាំ​ដល់​ប្រជាពលរដ្ឋ​ឱ្យ​បង្កើន​ការ​ប្រុងប្រយ័ត្ន​ចំពោះ​ជំងឺ​កូ​វីដ​-១៩

ក្រសួងកសិកម្ម​រៀបចំ​ផែនការ​គោលនយោបាយ​ជំរុញ​ការ​ដាំ​ដំណាំ​ទុរេន

ប្រឡាយ​ជាង ៦០០​ម៉ែត្រ​នឹង​ជួយ​ដល់​ដីស្រែ​កសិករ​ជាង៣០០​ហិកតា​ នៅ​ស្វាយរៀង​មាន​ទឹក​គ្រប់គ្រាន់

កងទ័ព​កម្ពុជា ​ស្នើ​ភាគី​ថៃ​កុំ​ឲ្យ​មានការ​បាញ់​ពលរដ្ឋ​ខ្មែរ ​ខណៈ​ពួកគេ​លួច​ឆ្លងដែន​ខុសច្បាប់

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

នយោបាយ និង ការអភិវឌ្ឍន៍

ខេត្តតាកែវរកឃើញពលរដ្ឋ ១៩នាក់ទៀតឆ្លងកូវីដ-១៩ ភាគច្រើនរកឃើញនៅស្រុកបាទី និងស្រុកត្រាំកក់

អភិបាលខេត្តតាកែវ បន្តណែនាំដល់ប្រជាពលរដ្ឋឱ្យបង្កើនការប្រុងប្រយ័ត្នចំពោះជំងឺកូវីដ-១៩

ក្រសួងកសិកម្មរៀបចំផែនការគោលនយោបាយជំរុញការដាំដំណាំទុរេន

ប្រឡាយជាង ៦០០ម៉ែត្រនឹងជួយដល់ដីស្រែកសិករជាង៣០០ហិកតា នៅស្វាយរៀងមានទឹកគ្រប់គ្រាន់

កងទ័ពកម្ពុជា ស្នើភាគីថៃកុំឲ្យមានការបាញ់ពលរដ្ឋខ្មែរ ខណៈពួកគេលួចឆ្លងដែនខុសច្បាប់