BTV NEWS

សម្តេចតេជោ ហ៊ុន សែន បញ្ជាក់ថា រូបថតមួយសន្លឹក ដែលថតនៅឆ្នាំ១៩៩០ គឺពិតជានៅខេត្តបាត់ដំបងមែន

សម្ដេចធិបតី ហ៊ុន ម៉ាណែត តែងប្រាប់មិត្តបរទេសថាកម្ពុជាប្រើយន្តការ UNCLOS មកពីថៃដកខ្លួនឯកតោភាគីពី MoU 2001

កម្ពុជា-ហ្វីលីពីន វាយតម្លៃខ្ពស់ចំពោះភាពរីកចម្រើននៃកិច្ចសហប្រតិបត្តិទ្វេភាគី

ICRC ប្ដេជ្ញាបន្តគាំទ្រ និងពង្រឹងកិច្ចសហប្រតិបត្តិការជាមួយកម្ពុជា បន្ថែមទៀត

នយោបាយ និង ការអភិវឌ្ឍន៍

អាជ្ញាធរខេត្តមណ្ឌលគិរីពិនិត្យកែលម្អសោភ័ណភាពក្រុងត្រៀមទទួលទេសចរក្នុងឱកាសថ្ងៃឈប់សម្រាកបុណ្យអុំទូក

ភ្នំពេញ ៖ អភិបាលខេត្តមណ្ឌលគិរី បានដឹកនាំមន្ត្រីជំនាញគ្រប់អង្គភាពពាក់ព័ន្ធ ពិនិត្យគោលដៅសំខាន់ៗ ក្នុងក្រុងសែនមនោរម្យ ដើម្បីកែលម្អសណ្ដាប់ធ្នាប់ និងរៀបចំទីប្រជុំជនក្រុង ឱ្យកាន់តែមានសោភ័ណភាព ត្រៀមទទួលទេសចរ ក្នុងឱកាសថ្ងៃ ឈប់សម្រាក នៃព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក នៅចុងសប្ដាហ៍ នេះ។ឯកឧត្ដម ស្វាយ សំអ៊ាង អភិបាលខេត្តមណ្ឌលគិរី បានថ្លែងថា ទោះបីឆ្នាំនេះ រាជរដ្ឋាភិបាល មិនបានប្រារព្ធពិធី បុណ្យអុំទូក ព្រោះកត្តាគ្រោះធម្មជាតិ និងបញ្ហាកូវីដ–១៩ ប៉ុន្តែប្រជាពលរដ្ឋ មន្ត្រីរាជការ គឺមានថ្ងៃសម្រាកជាធម្មតា ហើយ នឹងប្រាកដជាធ្វើដំណើរកម្សាន្ត ដូចរៀងរាល់ឆ្នាំ ចំណុចនេះហើយ ទើបឯកឧត្ដម បានដឹកនាំមន្ត្រីជំនាញចុះពិនិត្យមើល ស្ថានភាពទូទៅក្នុងក្រុង និងរៀបចំសណ្ដាប់ធ្នាប់ សោភ័ណភាព តួយ៉ាងគឺនៅចំណុចរង្វង់មូលគោព្រៃ នឹងរៀបចំឱ្យមានទី ធ្លាធំទូលាយ ដើម្បីស្រួលធ្វើដំណើរ និងមានទីតាំងសម្រាប់អ្នកទេសចរឈប់សំចត ចំណែកតាមដងផ្លូវមួយចំនួនក្នុងក្រុង នឹងត្រូវជួសជុលការខូចខាត និងសម្អាត ផងដែរ ។ឯកឧត្ដម ស្វាយ សំអ៊ាង បានបញ្ជាក់ទៀតថា ក្រៅពីនេះ អាជ្ញាធរ ក៏បាននឹងកំពុងជំរុញការសាងសង់វិមានឯក រាជ្យឱ្យឆាប់រួចរាល់ ដែលនេះជាសំណង់ប្រវត្តិសាស្ត្រមួយរបស់ខេត្ត ដែលនឹងជួយឱ្យខេត្តមណ្ឌលគិរី កាន់តែមានភាពទាក់ ទាញ ជាទីតាំងកម្សាន្តថ្មីមួយរបស់ប្រជាពលរដ្ឋ និងទេសចរ៕អត្ថបទ៖ អ៊ិត ភីរុណ

UN សម្ដែងការកោតសរសើរ ចំពោះកម្ពុជាដែលបានលើកកម្ពស់សិទ្ធិទទួលបានបរិស្ថានស្អាត

ភ្នំពេញ៖ លោក ដេវីដ ប៉ូយដ៍ David.Boyd អ្នករាយការណ៍ពិសេសទទួលបន្ទុកសិទ្ធិមនុស្ស និងបរិស្ថាន បានសម្តែងការកោតសរសើរកម្ពុជា ដែលបានលើកកម្ពស់សិទ្ធិទទួលបានបរិស្ថានស្អាត មានសុវត្ថិភាព និងអនាម័យ និងប្រកបដោយចរីភាព ដែលនេះជាគំរូជំរុញឲ្យប្រទេសដ៏ទៃដោះស្រាយវិបត្តិបរិស្ថានពិភពលោក។ នេះបើយោងតាមសេចក្តីប្រកាសព័ត៌មានរបស់ស្ថានបេសកកម្មអចិន្ត្រៃយ៍កម្ពុជាប្រចាំអង្គការសហប្រជាជាតិ។យោងតាមសេចក្តីប្រកាសព័ត៌មាន របស់ស្ថានបេសកម្មអចិន្ត្រៃយ៍កម្ពុជាប្រចាំអង្គការសហប្រជាជាតិចុះថ្ងៃទី២៧ ខែតុលាម្សិលមិញនេះ ក្នុងកិច្ចសន្ទនាអន្តរកម្មរបស់គណៈកម្មាធិការទី៣ នៃសម័យប្រជុំលើកទី៧៥នៃមហាសន្និបាតអង្គការសហប្រជាជាតិ អ្នករាយការណ៍ពិសេស ទទួលបន្ទុកសិទ្ធិមនុស្ស និងបរិស្ថាន លោក ដេវីដ ប៉ូយដ៍ បានលើកសរសើររដ្ឋ សមាជិកអង្គសហប្រជាជាតិ រួមទាំងកម្ពុជាផង ចំពោះការចាត់វិធានការលើកកម្ពស់សិទ្ធិទទួលបានបរិស្ថានស្អាត មានសុវត្ថិភាព មានអនាម័យ និងប្រកបដោយចីរភាព ក្នុងនោះ លោក ដេវីដ ប៉ូយដ៍ បានបន្តថា រាជរដ្ឋាភិបាលកម្ពុជា បានផ្តល់ជាគំរូ ដែលជាការជំរុញឲ្យប្រទេសដ៏ទៃទៀតដោះស្រាយវិបត្តិបរិស្ថានពិភពលោក។អ្នករាយការណ៍ពិសេស ទទួលបន្ទុកសិទ្ធិមនុស្ស និងបរិស្ថាន រូបនេះបានបញ្ជាក់ថា អង្គការសហប្រជាជាតិ បានដាក់បញ្ជូលគំរូរបស់កម្ពុជាទៅក្នុងឧបសម្ពន្ធ នៃរបាយការណ៍ពិសេសស្តីពីបញ្ហានៃកាតព្វកិច្ចសិទ្ធិមនុស្ស ពាក់ព័ន្ធដល់ការរីករាយក្នុងការទទួលបានបរិស្ថានស្អាត មានសុវត្ថិភាព មានអនាម័យ និងប្រកបដោយចិរភាព។ជាមួយគ្នានេះ អ្នករាយការណ៍ពិសេស រូបនេះបានបញ្ជាក់ទៀតថា កម្ពុជាបានអនុលោមតាមកំណែទម្រង់អភិបាលកិច្ចបរិស្ថានសម្រាប់កម្មវិធីការអភិវឌ្ឍប្រកបដោយចិរភាព រួមមាន តំបន់ព្រៃឈើមួយចំនួនធំត្រូវបានដាក់ជាតំបន់ការពារ ហើយតំបន់សម្រាប់អភិរក្សជីវចម្រុះត្រូវបានគ្រប់គ្រងដោយក្រសួងបរិស្ថាន ខណៈប្រព័ន្ធតំបន់ការពាររបស់កម្ពុជានាពេលបច្ចុប្បន្នគ្របដណ្តប់លើផ្ទៃដី៣៩ភាគរយនៃផ្ទៃប្រទេស។នៅក្នុងបទអន្តរាគមន៍ នៃកិច្ចសន្ទនាខាងលើនេះ ឯកឧត្តម កែ សុវណ្ណ ឯកអគ្គរាជទូតតំណាងអចិន្ត្រៃយ៍កម្ពុជាប្រចាំអង្គការសហប្រជាជាតិ បានគូសបញ្ជាក់ថា កម្ពុជាជាអ្នកគាំទ្រពេញទំហឹងចំពោះកិច្ចសហប្រតិបត្តិការពហុភាគី និងបានប្ដេជ្ញាយ៉ាងមុតមាំ ដើម្បីអនុវត្តកិច្ចព្រមព្រៀងបរិស្ថានអន្តរជាតិនានា រួមទាំងកិច្ចព្រមព្រៀងក្រុងប៉ារីសស្តីពីបរិស្ថាន ដើម្បីឆ្លើយតបទៅនឹងការប្រែប្រួលអាកាសធាតុ ការការបារប្រព័ន្ធអេកូឡូស៊ី និងការអភិវឌ្ឍន៍សេដ្ឋកិច្ចសង្គមព្រមទាំងការធ្វើឲ្យប្រសើរឡើងវិញនូវជីវភាពរស់នៅរបស់ប្រជាជនកម្ពុជា។ឯកអគ្គរាជទូតតំណាងអចិន្ត្រៃយ៍កម្ពុជាប្រចាំអង្គការសហប្រជាជាតិ បានបន្ថែមថា ការគ្រប់គ្រងធនធានធម្មជាតិប្រកបដោយចិរភាព គឺជាសមាសភាពចម្បងមួយនៃផែនការយុទ្ធសាស្ត្រអភិវឌ្ឍន៍ជាតិ ដោយកម្ពុជានៅតែបន្តកិច្ចសហប្រតិបត្តិការជាមួយទីភ្នាក់ងារពាក់ព័ន្ធអង្គការសហប្រជាជាតិ និងដៃគូអភិវឌ្ឍន៍នានា ដើម្បីអនុវត្តបណ្តាវិធានការដោះស្រាយ ដែលរក្សាធនធានធម្មជាតិរបស់ខ្លួន ក្នុងគោលដៅផ្តល់អត្ថប្រយោជន៍សេដ្ឋកិច្ច និងសង្គមប្រជាជនកម្ពុជាទាំងអស់ ជាពិសេសដល់ប្រជាជនទទួលរងគ្រោះ៕ អត្ថបទ៖ សេក ឧត្តម

សមាគមចិន ផ្តល់អំណោយជាថវិកា និងសម្ភារផ្សេងៗជូនបញ្ជាការដ្ឋានអង្គរក្សជួយពលរដ្ឋរងគ្រោះទឹកជំនន់

ភ្នំពេញ៖ ឯកឧត្តម ហង្ស សាមឿន អនុប្រធានគណៈកម្មាធិការជាតិគ្រប់គ្រងគ្រោះមហន្តរាយ និងជាតំណាង ឯកឧត្ដមទេសរដ្ឋមន្ត្រី គន់ គីម អនុប្រធានទី១គណៈកម្មាធិការជាតិគ្រប់គ្រងគ្រោះមហន្តរាយ នៅថ្ងៃទី២៨ ខែតុលានេះ បានដឹកនាំគណៈប្រតិភូសមាគមចិន ផ្តល់ជូនថវិកា និងសម្ភារៈមួយចំនួនទៀត ជូនបញ្ជាការដ្ឋានអង្គរក្ស ក្នុងបំណងជួយពលរដ្ឋរងគ្រោះ ដោយសារទឹកជំនន់។ខណៈកម្ពុជា កំពុងរងផលប៉ះពាល់ដោយសារជំនន់ទឹកភ្លៀង ឯកឧត្តម ហង្ស សាមឿន អនុប្រធានគណៈកម្មាធិការជាតិគ្រប់គ្រងគ្រោះមហន្តរាយ និងជាតំណាងឯកឧត្តមទេសរដ្ឋមន្ត្រីគន់ គីមអនុប្រធានទី១គណៈកម្មាធិការជាតិគ្រប់គ្រងគ្រោះមហន្តរាយ នៅថ្ងៃទី២៨ ខែតុលានេះ បានដឹកនាំគណៈប្រតិភូសមាគមចិន ផ្តល់ជាអំណាយថវិការ និងសំភារៈផ្សេងៗមួយចំនួនទៀត ជូនឯកឧត្តមនាយឧត្តមសេនីយ៍កិត្តិបណ្ឌិត ហ៊ីង ប៊ុនហៀង អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការ បញ្ជាការដ្ឋានអង្គរក្សសម្ដេចតេជោហ៊ុន សែន ដើម្បីទុកជួយសង្គ្រោះប្រជាពលរដ្ឋរងគ្រោះដោយទឹកជំនន់នៅកម្ពុជា។ ពិធីប្រគល់ និងទទួលអំណោយសប្បុរសធម៌នេះ បានធ្វើឡើងក្រោមវត្តមានឯឧត្តម ហង្ស សាមឿន និងសមាសភាពសមាគមពាណិជ្ជកម្មបេតុកម្ពុជា-ចិន ស្ថិតនៅបញ្ជាការដ្ឋានកងអង្គរក្ស ទីក្រុងតាខ្មៅខេត្តកណ្តាល។នៅក្នុងឱកាសនោះ តំណាងសមាគមពាណិជ្ជកម្មបេតុកម្ពុជា-ចិន បានលើកឡើងថា ដោយមើលឃើញប្រទេសកម្ពុជា បច្ចុប្បន្ននេះ បាននឹងកំពុងរងគ្រោះមហន្តរាយដោយទឹកជំនន់ទឹកភ្លៀង ដែលបានប៉ះពាល់ដល់រាជធានី-ខេត្ត មួយចំនួន ដូច្នេះក្នុងនាមជាសមាគមពាណិជ្ជកម្មចិន នៅក្នុងប្រទេសកម្ពុជា ប្រឹងប្រែងកៀងគរអំណោយ និងថវិកា ដើម្បីចូលរួមរំលែកនូវការលំបាករបស់រាជរដ្ឋាភិបាល ដែលមានសម្តេចតេជោ ហ៊ុន សែន ជានាយករដ្ឋមន្ត្រី ដែលបានប្រឹងប្រែងរឹតចំណងមិត្តភាពកម្ពុជា-ចិន ឱ្យកាន់តែរីកចម្រើនពីមួយថ្ងៃទៅមួយថ្ងៃ។ជាការឆ្លើយតបឧត្តមសេនីយ៍ឯកណុប រ័ត្ននិមល តំណាងនាយឧត្តមសេនីយ៍កិត្តិបណ្ឌិតហ៊ីង ប៊ុនហៀង អគ្គមេបញ្ជាការង នៃកងយុទ្ធពលខេមរភូមិន្ទ និងជាមេបញ្ជាការដ្ឋានអង្គរក្សសម្ដេចតេជោហ៊ុន សែន បានថ្លែងអំណរគុណដល់សប្បុរសជនទាំងអស់ដែលជួយផ្តល់ជាថវិកា សម្ភារៈ និងស្បៀងអាហារជាដើម។ឧត្តមសេនីយ៍ឯក បានសន្យាថា នឹងយកអង្ករ ព្រមទាំងថវិកា ដែលទទួលបានពីសប្បុរសជននានា ទៅប្រគល់ដល់កងយុទ្ធពលខេមរភូមិន្ទ និងកងកម្លាំងប្រដាប់អាវុធ និងកងកម្លាំងពាក់ព័ន្ធទាំងអស់ ដើម្បីបន្ដយកចិត្តទុកដាក់ជួយសង្គ្រោះប្រជាពលរដ្ឋ។បើយោតាមរបាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយ ចេញផ្សាយនៅពេលថ្មីៗនេះ បានលើកឡើងថា ចាប់ពីថ្ងៃទី០១ ខែកញ្ញា រហូតដល់ថ្ងៃទី២៧ ខែតុលា ឆ្នាំ២០២០នេះ រាជធានី-ខេត្តចំនួន២០ បានរងផលប៉ះពាល់ដោយសារទឹកជំនន់ បណ្តាលអោយពលរដ្ឋជាង ១៤ម៉ឺនគ្រួសាររងគ្រោះ និងមនុស្សស្លាប់៤៤នាក់ ព្រមទាំងបំផ្លាញហេដ្ឋារចនាសម្ព័ន្ធ និងដំណាំផ្សេងៗមួយចំនួនទៀត៕ អត្ថបទ៖ទូច សោភ័ណ

សមត្ថកិច្ចបង្កើនការរឹតបន្តឹងចរាចរណ៍ តាមដងផ្លូវ អំឡុងថ្ងៃឈប់សម្រាកបុណ្យជាតិ

ភ្នំពេញ ៖ អនុសេនីយ៍ឯក អោក ឆាត នាយរងផ្នែកការិយាល័យចរាចរណ៍ផ្លូវគោក និងសណ្តាប់ធ្នាប់ ប្រចាំការនៅរង្វង់គួចកាណុងជ្រោយចង្វា នៅថ្ងៃទី២៩ ខែតុលានេះ បានលើកឡើងថា ស្ថានភាពចរាចរណ៍នៅពេលនេះ មានភាពមមាញឹកជាងថ្ងៃធម្មតា ខណៈពលរដ្ឋ បានធ្វើដំណើរទៅកាន់លំនៅឋាន ក្នុងថ្ងៃឈប់សម្រាកបុណ្យជាតិ។ដើម្បីកាត់បន្ថយករណីគ្រោះថ្នាក់ចរាចរណ៍ដែលអាចកើតមានជាយថាហេតុ ខណៈពលរដ្ឋធ្វើដំណើរទៅលំនៅឋាន និងដើរលេងកំសាន្ត នាឱកាសថ្ងៃឈប់សម្រាក ព្រះរាជពិធីខួប១៦ឆ្នាំ នៃការគ្រងរាជសម្បត្តិ ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា និងក្នុងព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកបុក សមត្ថកិច្ច បានបង្កើនការរឹតចរាចរណ៍ នៅតាមដងផ្លូវសំខាន់ៗ ពីរាជធានីភ្នំពេញ ចេញទៅបណ្តាលខេត្តផ្សេងៗ។បើតាមអនុសេនីយ៍ឯក អោក ឆាត នាយរងផ្នែកការិយាល័យចរាចរណ៍ផ្លូវគោក និងសណ្តាប់ធ្នាប់ ប្រចាំការនៅរង្វង់គួចកាណុងជ្រោយចង្វា បានលើកឡើងថា ស្ថានភាពចរាចរណ៍នៅពេលនេះ មានភាពមមាញឹកជាងថ្ងៃធ្វើធម្មតា ព្រោះពលរដ្ឋបានធ្វើដំណើរទៅកាន់លំនៅឋាន ក្នុងឱកាសថ្ងៃឈប់សម្រាកបុណ្យជាតិ។លើសពីនេះ អនុសេនីយ៍ឯក បានអំពាវនាវដល់ប្រជាពលរដ្ឋប្រុងប្រយ័ត្ន និងគោរពច្បាប់ចរាចរណ៍ទាំងអស់គ្នា ដើម្បីរួមចំណែកកាត់គ្រោះថ្នាក់ចរាចរណ៍ក្នុងពេលធ្វើដំណើរ។ប្រជាពលរដ្ឋ បានលើកឡើងដែរថា ក្នុងថ្ងៃឈប់សម្រាកនេះ គឺពួកគាត់ចង់ទៅជួបជុំគ្នាគ្រួសារនៅស្រុកកំណើត ដែលបានឃ្លាតឆ្ងាយពីគ្នាមានក្តីនឹករលឹក។សម្រាប់រថយន្តឈ្នួលមិនដំឡើងថ្លៃនោះទេ ពោលគឺដូចជាថ្ងៃធម្មតា គ្រាន់តែថ្ងៃបុណ្យដាក់មនុស្សច្រើនបន្តិច។ជាការកត់សំគាល់ ក្នុងថ្ងៃឈប់សម្រាកបុណ្យជាតិរបស់កម្ពុជា ពលរដ្ឋតែងតែធ្វើដំណើរ ទៅលេងស្រុកកំណើត និងដើរលេងកម្សាន្តនៅតំបន់ទេសចរណ៍ផ្សេងៗ ជាហេតុធ្វើអោយចរាចរណ៍នៅតាមដងផ្លូវមានភាពមមាញឹក ជំរុញដល់សមត្ថកិច្ចចរាចរណ៍បង្កើនការយកចិត្តទុកដាក់៕អត្ថបទ ៖ ទូច សោភ័ណ

ទណ្ឌិតចំនួន ៦៩៥នាក់ត្រូវបានស្នើសុំបន្ធូរបន្ថយ និងលើកលែងទោសនាឱកាសបុណ្យអុំទូក

ភ្នំពេញ៖ ក្រសួងយុត្តិធម៌សម្រេចស្នើសុំបន្ធូរបន្ថយ និងលើកលែងទោសទណ្ឌិតចំនួន ៦៩៥នាក់នាឱកាសបុណ្យអុំទូកឆ្នាំនេះ។ នេះបើយោងតាមហ្វេសប៊ុក ឯកឧត្ដម គឹម សន្តិភាព អ្នកនាំពាក្យក្រសួងយុត្តិធម៌។អ្នកនាំពាក្យក្រសួងយុត្តិធម៌បានបញ្ជាក់ឲ្យដឹងថា គណៈកម្មការថ្នាក់ជាតិបានទទួលសំណុំឯកសារ ពីបណ្ដាពន្ធនាគាររាជធានី-ខេត្តចំនួន ២៤ និងមណ្ឌលអប់រំកែប្រែទាំង ៤ ដែលស្នើសុំផ្ដល់ការអនុគ្រោះទោសដល់ទណ្ឌិតសរុបចំនួន ១០៨៦នាក់ (ស្រី ៧៦នាក់)។ អ្នកនាំពាក្យបន្តថា កិច្ចប្រជុំពិនិត្យលើបញ្ជីឈ្មោះទណ្ឌិត ដើម្បីគោរពស្នើសុំសម្ដេចតេជោនាយករដ្ឋមន្ត្រី ក្រាបបង្គំទួលថ្វាយព្រះមហាក្សត្រផ្ដល់ការបន្ធូរបន្ថយទោស និងលើកលែងទោសក្នុងឱកាសពិធីបុណ្យអុំទូក ក្រោមវត្តមានឯកឧត្តម កើត រិទ្ធ រដ្ឋមន្ត្រីក្រសួងយុត្តិធម៌បានសម្រេចគោរពស្នើសុំទៅសម្ដេចតេជោនាយករដ្ឋមន្ត្រី ដើម្បីទូលថ្វាយព្រះមហាក្សត្រផ្ដល់ភាពអនុគ្រោះទោសដល់ទណ្ឌិតសរុប ៦៩៥នាក់ (ស្រី ៦៥នាក់) រួមមាន៖-ស្នើសុំបន្ថយទោសមួយជីវិតមកនៅ ២០ឆ្នាំចំនួន ០៥នាក់ (ស្រី ០០នាក់)-ស្នើសុំលើកលែងទោសចំនួន ១៩នាក់ (ស្រី ០៦នាក់) (ទណ្ឌិតដែលមានជំងឺរាំរ៉ៃ ចាស់ជរា…)-ស្នើសុំបន្ធូរបន្ថយទោស ១២ខែ ចំនួន ៩២នាក់ (ស្រី ១០នាក់)-ស្នើសុំបន្ធូរបន្ថយទោស ៩ខែ ចំនួន ៩៥នាក់ (ស្រី ០៨នាក់)-ស្នើសុំបន្ធូរបន្ថយទោស ៦ខែ ចំនួន ៤៨៤នាក់ (ស្រី ៤១ នាក់)៕

រដ្ឋមន្ត្រីក្រសួងអភិវឌ្ឍន៍ជនបទបន្តចុះពិនិត្យ និងជួសជុលបន្ទាន់ផ្លូវជនបទដែលខូចខាតដោយជំនន់ទឹកភ្លៀងក្នុងខេត្តតាកែវ

តាកែវ៖ នៅព្រឹកនេះឯកឧត្ដមបណ្ឌិតសភាចារ្យ អ៊ុក រ៉ាប៊ុន រដ្ឋមន្ត្រីក្រសួងអភិវឌ្ឍន៍ជនបទ បានបន្តចុះបេសកកម្មពិនិត្យស្ថានភាពផ្លូវជនបទមួយចំនួនស្ថិតក្នុងស្រុកត្រាំកក់ ខេត្តតាកែវ ដែលបានរងផលប៉ះពាល់ពីជំនន់ទឹកភ្លៀងនាពេលថ្មីៗកន្លងទៅ។តាមការវាយតម្លៃរបស់ឯកឧត្តមរដ្ឋមន្ត្រីក្រសួងអភិវឌ្ឍន៍ជនបទ ផ្លូវជនបទចំនួន ១៧ខ្សែបានរងផលប៉ះពាល់ ហើយក្នុងនោះផ្លូវចំនួន ២ខ្សែរងកាតខូចខាតខ្លាំងជាងគេដែលទាមទារជួលជុលជាបន្ទាន់។ ផ្លូវទី១ ជាផ្លូវក្រាលគ្រួសក្រហមប្រវែង ១១២០០ម៉ែត្រ ចាប់ពីផ្លូវឯកឧត្ដម ចាន់សារ៉ុន កាត់តាមផ្លូវជាតិលេខ៤១ និងស្ពានមួយកន្លែងប្រវែង ៣០ម៉ែត្រ ស្ថិតក្នុងឃុំអូស្វាយ ស្រុកត្រាំកក់ ទទួលរងការហូរច្រោះដោយទឹកជំនន់បណ្ដាលឲ្យរលំជើងទម្រស្ពាន ដែលបង្កហានិភ័យខ្ពស់ចំពោះចរាចរ។ ផ្លូវមួយខ្សែទៀតក្រាលគ្រួសក្រហម ចេញពីមឿងចារអង្គរកា ទៅផ្សារអង្គរកា មានប្រវែង ១៣ ៧០០ម៉ែត្រ កាត់តាមឃុំពពែល ឃុំជាងទង ឃុំត្រពាំងធំខាងជើង ស្រុកត្រាំកក់ ខេត្តតាកែវ។ ផ្លូវទាំង២ ខ្សែនេះគឺជាបណ្ដាញតភ្ជាប់ចរន្តសេដ្ឋកិច្ចក្នុងមូលដ្ឋានយ៉ាងសំខាន់ សម្រាប់បងប្អូនប្រជាពលរដ្ឋជាច្រើនឃុំនៃស្រុកត្រាំកក់ខេត្តតាកែវ៕ អត្ថបទ៖ ចេន សុជាតា

ពលរដ្ឋឃុំពាមកោះស្នានឹងមានស្ពានបេតុងថ្មីឆ្លងកាត់ជំនួសឲ្យស្ពានចាស់ដែលរងការខូចខាត

កំពង់ចាម៖ ស្ពានព្រែកអាចារ្យសួន បច្ចុប្បន្នជាស្ពានបាឡេត៍ដែលចម្លងអ្នកដំណើរទៅមកស្ថិតក្នុងភូមិ ទួលរកា ឃុំពាមកោះស្នា ស្រុកស្ទឹងត្រង់ ខេត្តកំពង់ចាម ដែលបានរងការខូចខាត នឹងត្រូវជំនួសដោយស្ពានបេតុងថ្មីនាពេលឆាប់ខាងមុខនេះ។ឯកឧត្ដម ឧត្ដមសេនីយ៍ទោ សោម សូដេត នាយករងនៃនាយកដ្ឋានកងវិស្វកម្មក្រសួងការពារជាតិ បានបញ្ជាក់ថា ស្ពានបេតុងមួយខ្សែនេះប្រវែង ៩០ម៉ែត្រ ទទឹង ៩ម៉ែត្រ កំពុងស្ថាបនាសម្រេចបានខ្ទង់ ៨៥% ហើយ គ្រោងនឹងបញ្ចប់នាខែវិច្ឆិកា ឆ្នាំ២០២០ ខាងមុខនេះ។ សាវតានៃស្ពានព្រែកអាចារ្យសួននេះ ពីមុនជាស្ពានឈើនៅឆ្នាំ១៩៩២ កងវិស្វកម្មសម្ដេចតេជោបានសាងសង់ជាស្ពានបាឡេត៍ ហើយបានរងខូចខាតដោយទឹកជំនន់ទន្លេមេគង្គ ហូរច្រោះគ្រឹះសសរទ្រស្ពានបណ្ដាលឲ្យសសរស្ពានដួលរលំ។ មន្ទីរសាធារណការ និងដឹកជញ្ជូនខេត្តកំពង់ចាម បានយកធ្នឹមបណ្ដោះអាសន្នមកដាក់អប ដើម្បីឲ្យប្រជាជនធ្វើចរាចរបណ្ដោះអាសន្ន។ ក្រោយមកនៅថ្ងៃទី១ ខែកក្កដា ឆ្នាំ២០២០ កងវិស្វកម្មលេខ ១៨០ ដឹកនាំដោយឯកឧត្ដម ឧត្ដមសេនីយ៍ទោ សោម សូដេត នាយករងនៃនាយកដ្ឋានកងវិស្វកម្មក្រសួងការពារជាតិ តាមរយៈក្រសួងអភិវឌ្ឍន៍ជនបទបានស្ថាបនាស្ពានបេតុងថ្មីមួយទៀត សម្រាប់ជួយសម្រួលដល់ការធ្វើសំណើរបស់ប្រជាពលរដ្ឋ នៃឃុំពាមកោះស្នាទាំងមូល៕ អត្ថបទ៖ ចេន សុជាតា

មណ្ឌលចត្តាឡីស័កថ្មីសំរាប់ដាក់អ្នកដំណើរមកពីក្រៅប្រទេសនឹងអាចដាក់ដំណើរការនៅចុងខែធ្នូ ឆ្នាំ២០២០

ភ្នំពេញ៖ លោកជំទាវ យក់ សម្បត្តិ រដ្ឋលេខាធិការក្រសួងសុខាភិបាលបានបញ្ជាក់ប្រាប់ BTV នៅថ្ងៃនេះថា ទាក់ទងនឹងការធ្វើចត្តាឡីស័ករបស់អ្នកដំណើរមកពីក្រៅប្រទេស ក្រសួងសុខាភិបាលបន្តយកចិត្តទុកដាក់ខ្ពស់ និងមានសាងសង់អគារថ្មីបន្ថែមទៀតនៅជាយរាជធានីភ្នំពេញ ដោយគិតមកដល់ពេលនេះសម្រេចបានប្រមាណ ៤០% ហើយអាចនឹងដំណើរការនៅចុងឆ្នាំ២០២០នេះ។លោកជំទាវ យក់ សម្បតិ្ត រដ្ឋលេខាធិការក្រសួងសុខាភិបាលបានបញ្ជាក់ថា គិតត្រឹមថ្ងៃទី២៨ តុលា ២០២០ អ្នកដំណើរពីក្រៅប្រទេសចូលមកកាន់កម្ពុជាមានចំនួន ៧៣៦០០នាក់ គិតទាំងអាកាសយានដ្ឋានអន្តរជាតិភ្នំពេញ និងអាកាសយានដ្ឋានអន្តរជាតិក្រុងព្រះសីហនុ។ លោកជំទាវបន្តទៀតថា ក្នុងចំណោមអ្នកដំណើរដែលចូលមកកាន់កម្ពុជាមានជនជាតិចិនច្រើនជាងគេ ជនជាតិខ្មែរ ជនជាតិកូរ៉េ ជនជាតិអាមេរិក និងតៃវ៉ាន់។ ដោយឡែកសម្រាប់ការធ្វើតេស្តគិតត្រឹមថ្ងៃទី២៨ តុលា មន្រី្តសុខាភិបាលបានធ្វើតេស្តបានចំនួន ១៨ម៉ឺនតេស្ត ធ្វើតេស្តលើចំនួនមនុស្សបាន ១៤ម៉ឺននាក់។ សម្រាប់ធ្វើតេស្តនេះ ក្រសួងសុខាភិបាលមានមនី្ទរពិសោធន៍ចំនួន០៣ គឺវិទ្យាស្ថានសុខភាពសាធារណៈ និងមនី្ទរពេទ្យក្នុងខេត្តសៀមរាប (មានមនី្ទរពិសោធន៍សម្រាប់ជួយខេត្តសៀមរាប និងខេត្តកំពង់ធំ និងខេត្តផ្សេងទៀត)។ ក្រោយពីកម្ពុជាលើកលែងប្រទេសទាំង ៦ ឲ្យចូលមកកម្ពុជាវិញ ក្រសួងសុខាភិបាលបានធ្វើតេស្តនៅអាកាសយានដ្ឋានអន្តរជាតិភ្នំពេញ យើងរកឃើញអ្នកដែលមានកូវីដ១៩ វិជ្ជមាន ចំនួន ១៥៩ករណី បូករួមទាំងបុរសម្នាក់ដែលជាមន្រី្ត UN មកពីប្រទេសស៊ូដង់។ ដូច្នេះក្រសួងសុខាភិបាលបន្តរឹតបន្តឹងគ្រប់អ្នកដំណើរទាំងអស់ ដែលចូលមកកាន់កម្ពុជាត្រូវតែឆ្លងកាត់វិធាន របស់ក្រសួងសុខាភិបាលមានជាធរមាន ស្របពេលដែលប្រទេសក្នុងតំបន់អឺរ៉ុប មួយចំនួនកំពុងតែប្រឈមនឹងរលកទី២ ទន្ទឹមនឹងនោះប្រទេសកម្ពុជាក៏ត្រូវតែប្រុងប្រយ័ត្នផងដែរ៕អត្ថបទ៖ រដ្ឋា

សមាគមរោងចក្រស្បែកជើងកម្ពុជារួមចំណែកឧបត្ថម្ភគាំទ្រជួយដល់កងទ័ពជើងគោកក្នុងការជួយសង្គ្រោះពលរដ្ឋរងគ្រោះដោយទឹកជំនន់

ភ្នំពេញ៖ នៅថ្ងៃទី៣០ ខែតុលា ឆ្នាំ២០២០ លោកឧកញ៉ា លី ឃុនថៃ ប្រធានសមាគមរោងចក្រស្បែកជើងកម្ពុជាបានដឹកនាំ អនុប្រធាន និងគណៈកម្មការសមាគម ជួបសម្ដែងការគួរសមជាមួយនឹងឯកឧត្ដម ហ៊ុន ម៉ាណែត និងបាននាំយកអំណោយរបស់សមាគមរួមមាន៖ មីចំនួន ២១៦៦កេស, ទឹកបរិសុទ្ធចំនួន ៦០០កេស និងស្បែកជើងចំនួន ២០០កេសជូនដល់កងទ័ពជើងគោក ដើម្បីចូលរួមចំណែកជួយដល់កងទ័ពជើងគោក ក្នុងយុទ្ធនាការដោះស្រាយការងារជួយសង្គ្រោះប្រជាពលរដ្ឋ នៅតាមមូលដ្ឋានទូទាំងប្រទេសដែលកំពុងរងគ្រោះដោយទឹកជំនន់។លោកប្រធានសមាគមបានលើកឡើងថា ដោយមើលឃើញយុទ្ធនាការជួយជនរងគ្រោះ ដោយសារទឹកជំនន់រហ័សទាន់ពេលវេលា ក្រោមការដឹកនាំរបស់មេបញ្ជាការកងទ័ពជើងគោក សមាគមព្រមទាំងអ្នកវិនិយោគនៅក្នុងប្រទេសកម្ពុជា បានចូលរួមចំណែកឧបត្ថម្ភគាំទ្រចំពោះកងទ័ព ដើម្បីជួយសង្គ្រោះប្រជាជនឲ្យបានទាន់ពេលវេលា។ លោកបន្តថា នេះគឺជាទឹកចិត្ត និងការថ្លែងអំណរគុណរបស់សមាគមស្បែកជើងកម្ពុជា ចំពោះកងទ័ពដែលតែងតែឃើញកងទ័ពនៅជួរមុខជានិច្ច និងតែងតែចុះជួយសង្គ្រោះប្រជាពលរដ្ឋ រាល់ពេលដែលមានគ្រោះមហន្តរាយផ្សេងៗ។ ឯកឧត្ដម ហ៊ុន ម៉ាណែត បានថ្លែងអំណរគុណចំពោះទឹកចិត្តសប្បុរសធម៌ និងការចូលរួមគាំទ្រដ៏ថ្លៃថ្លាបំផុតចំពោះឧកញ៉ា លី ឃុនថៃ ប្រធានសមាគមស្បែកជើងកម្ពុជា និងគណៈកម្មការទាំងអស់ ដែលបានចូលរួមឧបត្ថម្ភអំណោយជួយដល់កងទ័ព ដើម្បីសង្គ្រោះប្រជាជននៅក្នុងគ្រាដ៏លំបាកនេះ៕

ឯកឧត្ដម យឹម ឆៃលី៖ តំបន់សេដ្ឋកិច្ចពិសេសខេត្តក្រចេះមានការវិនិយោគលើវិស័យឧស្សាហកម្មសំខាន់ៗ

ក្រចេះ៖ ឯកឧត្ដមឧបនាយករដ្ឋមន្ត្រី យឹម ឆៃលី ប្រធានក្រុមប្រឹក្សាស្ដារអភិវឌ្ឍន៏វិស័យកសិកម្ម និងជនបទ អមដំណើរដោយឯកឧត្ដម អ៊ិត ប្រាង្គ រដ្ឋលេខាធិការក្រសួងរ៉ែ និងថាមពល, ឯកឧត្ដមរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ថ្នាក់ដឹកនាំក្រុមប្រឹក្សាស្តារអភិវឌ្ឍន៏វិស័យកសិកម្ម និងជនបទ អាជ្ញាធរដែនដីនៅថ្ងៃទី២៩ តុលា ឆ្នាំ២០២០ បានអញ្ជើញចុះទស្សនកិច្ចតំបន់សេដ្ឋកិច្ចពិសេសខេត្តក្រចេះ ដែលស្ថិតនៅក្នុងភូមិត្រពាំងស្រែ ឃុំ២ធ្នូ ស្រុកស្នួល ខេត្តក្រចេះ ក្រោមការវិនិយោគរបស់ក្រុមហ៊ុនយូប៊ីអ៊ី ឌីវេលឡប់មេន។លោក ចាង លូជឺ អគ្គនាយកក្រុមហ៊ុន ហ្សុងឈី ហូលឌីង គ្រុប បានឲ្យដឹងថា ក្រុមហ៊ុនយូប៊ីអ៊ី ឌីវេលឡប់មេន គឺជាឧទ្យានឧស្សាហកម្មដ៏ធំទូលំទូលាយថ្នាក់ជាតិ ដែលត្រូវបានវិនិយោគដោយក្រុមហ៊ុន ហ្សុងឈី ហូលឌីង គ្រុប ដែលមានផ្ទៃដីគម្រោងទំហំប្រមាណ ៩គីឡូម៉ែត្រក្រឡាក្នុងទុនវិនិយោគ ៦០០លានដុល្លារអាមេរិក ដើម្បីក្លាយជាចង្កោមនៃការច្នៃផលិតផលកសិកម្ម ពាណិជ្ជកម្ម ដឹកជញ្ជូន និងឧស្សាហកម្ម។ ក្រុមហ៊ុននឹងធ្វើការសាងសង់រោងចក្រថាមពលអគ្គិសនី កន្លែងស្តុកទឹក រោងចក្រប្រព្រឹត្តិកម្មទឹកកខ្វក់ជាដើម ដោយអាចទទួលសហគ្រាសជាង ១០០កន្លែង និងផ្ដល់ការងារប្រមាណ ៦ម៉ឺននាក់។ គម្រោងនេះក៏ត្រូវបានបញ្ចូលក្នុងគម្រោងនៃកិច្ចសហប្រតិបត្តិការ “ផ្លូវ១ខ្សែក្រវាត់១” នៃគណៈកម្មាធិការជាតិអភិវឌ្ឍន៏ និងកែទម្រង់ប្រទេសចិន ហើយនៅឆ្នាំ២០១៨ ត្រូវបានចុះបញ្ជីជាគម្រោងអាទិភាព សម្រាប់ការផ្សព្វផ្សាយក្រៅប្រទេសនៃ “ផ្លូវ១ខ្សែក្រវាត់១” នៃខេត្តសានទុង។លោកបន្តថា បច្ចុប្បន្នក្រុមហ៊ុនដែលចុះបញ្ជី ក្នុងតំបន់សេដ្ឋកិច្ចពិសេសខេត្តក្រចេះរួមមានៈ ១. ក្រុមហ៊ុន លីមរ៉ូយ៉ាល់ជ័ញស្តុក (LIM ROYAL JOINT STOCK CO., LTD) បើករោងចក្រកែច្នៃគ្រឿងសង្ហារឹម, ២. ក្រុមហ៊ុន ZHONG QI LI HUI CABLE CO., LTD ផលិតខ្សែភ្លើង និងខ្សែកាប, ទី៣. ក្រុមហ៊ុនឧស្សាហកម្មកៅស៊ូ Car Far Rubber Industrial Co., Ltd វិនិយោគលើផ្ទៃដី ៤០ហិចតា មានសមត្ថភាពផលិតជ័រកៅស៊ូស្តង់ដារប្រចាំឆ្នាំប្រមាណ ៥ម៉ឺនតោន និងមានទិសដៅបង្កើតរោងចក្រផលិតកង់រថយន្តទៀតផង, ទី៤. ក្រុមហ៊ុន ហ្គ្រីនលីតឌ័រ ខេមបូឌា (Green Leader (Cambodia) Co., Ltd ដែលមានសមត្ថភាពផលិតម្សៅដំឡូងមី ១០ម៉ឺនតោនក្នុង១ឆ្នាំ, ទី៥. ក្រុមហ៊ុនដឹកជញ្ជូនអន្តរជាតិចិន-កម្ពុជា, ទី៦. ក្រុមហ៊ុនស៊ូសាងខេមបូឌា អ៊ីនដាស់ស្ទ្រី (SHUSHANG CAMBODIA INDUSTRY CO., LTD) វិនិយោគលើផ្ទៃដី ៣១០ហិចតាលើរោងឧស្សាហកម្មវាយនភណ្ឌ, ការបោះពុម្ព និងឧបករណ៍ផ្នែករឹង។ ជាមួយនោះក៏មានក្រុមហ៊ុនដែលបានចុះកិច្ចសន្យាជាច្រើន ទៅលើការកែច្នៃសម្ភារៈសំណង់, ក្រុមហ៊ុនផលិតគ្រឿងបន្លាស់ម៉ូតូ និងផលិតរថយន្តគ្រប់ប្រភេទ និងក្រុមហ៊ុនកែច្នៃថ្មម៉ាប ។ល។ក្នុងឱកាសនោះ ឯកឧត្ដមឧបនាយករដ្ឋមន្ត្រី យឹម ឆៃលី មានប្រសាសន៏ថា ក្នុងនាមរាជរដ្ឋាភិបាលកម្ពុជាក្រោមការដឹកនាំរបស់សម្ដេចតេជោ ហ៊ុន សែន នាយករដ្ឋមន្ត្រី សូមបានគាំទ្រចំពោះក្រុមហ៊ុនហ្សុងឈី ហូលឌីង គ្រុប ដែលបានវិនិយោគនូវតំបន់សេដ្ឋកិច្ចពិសេសនៅខេត្តក្រចេះនេះ ពិសេសការផលិតជ័រកៅស៊ូ និងឈានទៅបង្កើតរោងចក្រផលិតកង់រថយន្ត ព្រោះតំបន់នេះមានដំណាំកៅស៊ូច្រើន ដែលអាចផ្គត់ផ្គង់វត្ថុធាតុដើមដល់រោងចក្រ។ ម្យ៉ាងទៀតការផលិតខ្សែភ្លើង និងខ្សែកាប ពិតជាជួយបំពេញសេចក្ដីត្រូវការរបស់កម្ពុជា និងតម្លៃកាន់តែទាប ព្រោះកម្ពុជាបច្ចុប្បន្ន ជាប្រទេសកំពុងអភិវឌ្ឍន៍ដែលត្រូវការខ្សែភ្លើង ឬខ្សែកាបច្រើនក្នុងការងារឧស្សាហកម្ម និងការប្រើប្រាស់ទូទៅប្រចាំថ្ងៃ។ ឯកឧត្ដមឧបនាយករដ្ឋមន្ត្រី ក៏បានស្នើឲ្យក្រុមហ៊ុនហ្សុងឈី ហូលឌីង គ្រុប ពង្រីកការវិនិយោគរបស់ខ្លួននៅកម្ពុជាឲ្យកាន់តែធំជាងនេះទៀត បើទោះបីជាបច្ចុប្បន្នក្រុមហ៊ុននេះបានបោះទុនវិនិយោគ នៅខេត្តមណ្ឌលគីរីលើវិស័យកសិកម្ម, ខេត្តព្រះសីហនុលើផ្នែកសណ្ឋាគារ វិឡា និងអចលនទ្រព្យ និងតំបន់សេដ្ឋកិច្ចពិសេសខេត្តក្រចេះនេះ និងសូមជួយទាក់ទាញវិនិយោគិន មកបណ្ដាក់ទុននៅកម្ពុជាបន្ថែមទៀត។ឯកឧត្ដមឧបនាយករដ្ឋមន្ត្រី ក៏បានណែនាំដល់ក្រុមហ៊ុនវិនិយោគដាំដំណាំណា ដែលទីផ្សារនៅប្រទេសចិនត្រូវការ ដើម្បីងាយស្រួលនាំចេញទៅប្រទេសចិន ព្រោះកម្ពុជា និងចិនបានចុះកិច្ចព្រមព្រៀងពាណិជ្ជកម្មសេរីរួចហើយ សម្រាប់ជំរុញពាណិជ្ជកម្មរវាងប្រទេសទាំងពីរ ឲ្យកាន់តែខ្លាំងក្លាថែមទៀត។ ឯកឧត្ដមឧបនាយករដ្ឋមន្ត្រី ក៏បានផ្ដាំផ្ញើអាជ្ញាធរដែនដីគ្រប់លំដាប់ថ្នាក់ សូមសហការ និងជួយសម្របសម្រួលគ្រប់បែបយ៉ាងដល់ក្រុមហ៊ុន ក្នុងដំណើរការវិនិយោគនៅក្នុងស្រុកស្នួល ខេត្តក្រចេះនេះ និងសូមឲ្យក្រុមហ៊ុនសហការឲ្យបានជិតស្និទ្ធជាមួយនឹងក្រសួង ស្ថាប័នពាក់ព័ន្ធនានាលើបទដ្ឋានគតិយុត្តិនានា ដើម្បីឲ្យស្របនឹងច្បាប់នៃប្រទេសកម្ពុជា៕

បណ្ដាញសង្គម

ព័ត៌មានថ្មីៗ

ក្រុមអាជីវករលក់ដូរជុំវិញផ្សារដើមគ យល់ព្រមទទួលយកគម្រោងកែលម្អ និងស្ថាបនាផ្លូវជុំវិញផ្សារ

កាកបាទក្រហមកម្ពុជាផ្តល់ផ្ទះ២ខ្នង ដល់គ្រួសារទីទ័លក្រនៅស្រុកបសេដ្ឋ ខេត្តកំពង់ស្ពឺ

រដ្ឋមន្ត្រីក្រសួងវប្បធម៌និង វិចិត្រសិល្បៈ បញ្ជាក់អំពីការប្តេជ្ញាចិត្តរបស់រាជរដ្ឋាភិបាលក្នុងកិច្ចការពារបូរណភាពទឹកដី និងសម្បត្តិវប្បធម៌នានាស្របតាមច្បាប់អន្តរជាតិ

សមត្ថកិច្ចចុះបង្ក្រាបទីតាំងសង្ស័យលួចលាក់ធ្វើសកម្មភាព Online Scam ឃាត់ខ្លួនជនបរទេសជាង ១៤០នាក់

មនុស្ស៩នាក់រងរបួសដោយសារភ្លើងឆេះព្រៃនៅក្នុងប្រទេសព័រទុយហ្គាល់

ប្រធានាធិបតីទួរគី ថ្លែងថា មិនត្រូវឲ្យអ៊ីស្រាអែលបំផ្លាញកិច្ចព្រមព្រៀងរវាងសហរដ្ឋអាមេរិក និងអ៊ីរ៉ង់ ឡើយ

អ៊ីរ៉ង់ ផ្សព្វផ្សាយសារនៃការបន្ត និងការសងសឹកនៅក្នុងពិធីរំលឹកវិញ្ញាណក្ខន្ធលោក Khamenei

លោក Trump អបអរសាទរទិវាឯករាជ្យជាតិលើកទី២៥០ អមដោយការបាញ់កាំជ្រួចភ្ញី និងក្បួនយន្តហោះ

KCNA៖លោក Xi ត្រៀមខ្លួនធ្វើការជាមួយលោក Kim សម្រាប់ចំណងមិត្តភាពចិន-កូរ៉េខាងជើងប្រកបដោយស្ថិរភាព

ប្រធានក្រុមការងារចុះមូលដ្ឋានឃុំទងត្រឡាច អំពាវនាវពលរដ្ឋជឿជាក់រាជរដ្ឋាភិបាលលើការដោះស្រាយបញ្ហាព្រំដែន

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

នយោបាយ និង ការអភិវឌ្ឍន៍

អាជ្ញាធរខេត្តមណ្ឌលគិរីពិនិត្យកែលម្អសោភ័ណភាពក្រុងត្រៀមទទួលទេសចរក្នុងឱកាសថ្ងៃឈប់សម្រាកបុណ្យអុំទូក

UN សម្ដែងការកោតសរសើរ ចំពោះកម្ពុជាដែលបានលើកកម្ពស់សិទ្ធិទទួលបានបរិស្ថានស្អាត

សមាគមចិន ផ្តល់អំណោយជាថវិកា និងសម្ភារផ្សេងៗជូនបញ្ជាការដ្ឋានអង្គរក្សជួយពលរដ្ឋរងគ្រោះទឹកជំនន់

សមត្ថកិច្ចបង្កើនការរឹតបន្តឹងចរាចរណ៍ តាមដងផ្លូវ អំឡុងថ្ងៃឈប់សម្រាកបុណ្យជាតិ

ទណ្ឌិតចំនួន ៦៩៥នាក់ត្រូវបានស្នើសុំបន្ធូរបន្ថយ និងលើកលែងទោសនាឱកាសបុណ្យអុំទូក

ពលរដ្ឋឃុំពាមកោះស្នានឹងមានស្ពានបេតុងថ្មីឆ្លងកាត់ជំនួសឲ្យស្ពានចាស់ដែលរងការខូចខាត

មណ្ឌលចត្តាឡីស័កថ្មីសំរាប់ដាក់អ្នកដំណើរមកពីក្រៅប្រទេសនឹងអាចដាក់ដំណើរការនៅចុងខែធ្នូ ឆ្នាំ២០២០

ឯកឧត្ដម យឹម ឆៃលី៖ តំបន់សេដ្ឋកិច្ចពិសេសខេត្តក្រចេះមានការវិនិយោគលើវិស័យឧស្សាហកម្មសំខាន់ៗ

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

នយោបាយ​ និង ការអភិវឌ្ឍន៍

UN សម្ដែង​ការ​កោតសរសើរ​ ចំពោះ​កម្ពុជា​ដែល​បាន​លើកកម្ពស់​សិទ្ធិ​ទទួល​បាន​បរិស្ថាន​ស្អាត

សមត្ថកិច្ច​បង្កើន​កា​ររឹតបន្តឹង​ចរាចរណ៍ ​តាម​ដង​ផ្លូវ ​អំឡុង​ថ្ងៃ​ឈប់សម្រាក​បុណ្យជាតិ

ទណ្ឌិត​ចំនួន​ ៦៩៥​នាក់​ត្រូវ​បាន​ស្នើសុំ​បន្ធូរ​បន្ថយ និង​លើកលែងទោស​នា​ឱកាស​បុណ្យអុំទូក

ពលរដ្ឋ​ឃុំ​ពាម​កោះ​ស្នា​នឹង​មាន​ស្ពានបេតុង​ថ្មី​ឆ្លងកាត់​ជំនួស​ឲ្យ​ស្ពាន​ចាស់​ដែល​រង​​ការ​ខូច​ខាត

ឯកឧត្ដម យឹម ឆៃលី​៖ តំបន់​សេដ្ឋកិច្ច​ពិសេស​ខេត្ត​ក្រចេះ​មានការ​វិនិយោគ​លើ​វិស័យ​ឧស្សាហកម្ម​សំខាន់ៗ

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

នយោបាយ និង ការអភិវឌ្ឍន៍

UN សម្ដែងការកោតសរសើរ ចំពោះកម្ពុជាដែលបានលើកកម្ពស់សិទ្ធិទទួលបានបរិស្ថានស្អាត

សមត្ថកិច្ចបង្កើនការរឹតបន្តឹងចរាចរណ៍ តាមដងផ្លូវ អំឡុងថ្ងៃឈប់សម្រាកបុណ្យជាតិ

ទណ្ឌិតចំនួន ៦៩៥នាក់ត្រូវបានស្នើសុំបន្ធូរបន្ថយ និងលើកលែងទោសនាឱកាសបុណ្យអុំទូក

ពលរដ្ឋឃុំពាមកោះស្នានឹងមានស្ពានបេតុងថ្មីឆ្លងកាត់ជំនួសឲ្យស្ពានចាស់ដែលរងការខូចខាត

ឯកឧត្ដម យឹម ឆៃលី៖ តំបន់សេដ្ឋកិច្ចពិសេសខេត្តក្រចេះមានការវិនិយោគលើវិស័យឧស្សាហកម្មសំខាន់ៗ