នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
សម្ដេចធិបតី ដឹកនាំគណៈប្រតិភូចូលក្រាបបង្គំគាល់ព្រះករុណា ព្រះមហាក្សត្រ ទូលថ្វាយលទ្ធផលចុះបញ្ជីបូជនីយដ្ឋានចងចាំនៃកម្ពុជា ក្នុងបញ្ជីបេតិកភណ្ឌពិភពលោក
សភាតំណាងប្រជាជនចិនចាត់ទុកសម្តេចតេជោ ជាតួអង្គសំខាន់បន្ត​ពីព្រះបរម​រតនកោដ្ឋ​ក្នុង​ការ​ពូន​ជ្រំ​ទំនាក់ទំនងរវាងកម្ពុជា និងចិន
សម្តេចតេជោអនុញ្ញាតឱ្យសមាជិកគណៈកម្មាធិការអចិន្ត្រៃយ៍សភាប្រជាជនចិនជួបសម្តែងការគួរសម
ក្រុមការងារបច្ចេកទេសអន្តរក្រសួងបន្តចុះកំណត់និយាមកា និងបោះបង្គោលព្រំដីតាមបណ្តោយព្រែកជីកហ្វូណនតេជោ សម្រាប់កំណាត់ទី២ ក្នុងភូមិសាស្រ្តខេត្តកំពត

នយោបាយ​ និង ការអភិវឌ្ឍន៍

ប្រទេសកូរ៉េខាងត្បូង ចាប់ផ្តើមការបោះឆ្នោតសកលនៅថ្ងៃពុធនេះ

2024/04/10 02:23:07 pm        66
Facebook Telegram Linkin
ប្រជាជនកូរ៉េខាងត្បូង ចេញបោះឆ្នោតជ្រើសរើសសភាថ្មីនៅថ្ងៃពុធ ទី១០ ខែមេសានេះ នៅក្នុងការប្រកួតប្រជែងដ៏ស្វិតស្វាញ ដែលត្រូវបានអ្នកវិភាគមើលឃើញថាជាការបោះឆ្នោតប្រជាមតិ សម្រាប់ប្រធានាធិបតី លោក Yoon Suk Yeol ដែលប្រជាប្រិយភាពរបស់លោករងការលំបាក ក្នុងពេលមានវិបត្តិជីវភាពរស់នៅ និងការរាលដាលនៃរឿងអាស្រូវនយោបាយ។អ្នកបោះឆ្នោតកូរ៉េខាងត្បូង បោះឆ្នោតដើម្បីជ្រើសរើសតំណាងរបស់ពួកគេទៅកាន់រដ្ឋសភា។ ប្រទេសនេះ រៀបចំការបោះឆ្នោតសកលរៀងរាល់បួនឆ្នាំម្តង។ ការបោះឆ្នោតនៅឆ្នាំនេះ ត្រូវបានគេមើលឃើញថាជាការវាយតម្លៃពាក់កណ្តាលអាណត្តិ នៃការគ្រប់គ្រងរបស់ប្រធានាធិបតី លោក Yoon Suk-yeol ដែល លោកនឹងចូលដល់ឆ្នាំទីបីនៃអាណត្តិរយៈពេលប្រាំឆ្នាំរបស់លោកនៅខែក្រោយ។ការបោះឆ្នោតត្រូវបានកំណត់ចាប់ផ្តើមនៅវេលាម៉ោង៦ព្រឹក នៅការិយាល័យបោះឆ្នោតជាង១៤.០០០កន្លែង។ សមាជិក ៣០០រូបនៃប្រព័ន្ធឯកសភា នឹងត្រូវបានបោះឆ្នោតជ្រើសរើសដោយការបោះឆ្នោតថ្នាក់ស្រុកឬសង្កាត់ និងតាមរយៈប្រព័ន្ធតំណាងសមាមាត្រ។ ការបោះឆ្នោតនេះ ត្រូវបានគេរំពឹងថានឹងក្លាយជាការប្រកួតប្រជែងរវាងគណបក្សអំណាចប្រជាជនដែលកំពុងកាន់អំណាច និងគណបក្សប្រជាធិបតេយ្យ ជាគណបក្សប្រឆាំងធំ។គណបក្សអំណាចប្រជាជន(PPP) ស្វែងរកការទទួលបានសំឡេងភាគច្រើន ដើម្បីជួយដំណើរការ រដ្ឋាភិបាលដែលមានស្ថិរភាព។ ការិយាល័យបោះឆ្នោត នឹងបិទនៅម៉ោង ៦ ល្ងាច ដោយលទ្ធផលបឋមត្រូវបានរំពឹងទុកនៅព្រឹកថ្ងៃព្រហស្បតិ៍ស្អែកនេះ។

រណសិរ្សកម្ពុជា ឡាវ វៀតណាម ចុះហត្ថលេខាលើអនុស្សារណៈយោគយល់គ្នា ដើម្បី​បន្តពង្រឹងពង្រីកនូវចំណងមិត្តភាព និងកិច្ចសហប្រតិបត្តិការ

2024/04/10 01:55:28 pm        169
Facebook Telegram Linkin
សម្តេចកិត្តិសង្គហបណ្ឌិត ម៉ែន សំអន ប្រធានក្រុមប្រឹក្សាជាតិរណសិរ្សសាមគ្គី អភិវឌ្ឍន៍ មាតុ​ភូមិ​កម្ពុជា បានអញ្ជើញចូលរួមក្នុងកិច្ចប្រជុំរណសិរ្ស ៣ប្រទេស កម្ពុជា-ឡាវ-វៀតណាម នៅ​រដ្ឋធានី​វៀង​ចន្ទន៍ នៃសាធារណរដ្ឋប្រជាធិបតេយ្យប្រជាមានិតឡាវ កាលពីរសៀលថ្ងៃអង្គារ ១កើត ខែ​ចេត្រ ឆ្នាំថោះ បញ្ចស័ក ព.ស. ២៥៦៧ ត្រូវនឹង ថ្ងៃទី៩ ខែមេសា ឆ្នាំ២០២៤។សម្តេចកិត្តិសង្គហបណ្ឌិត បានមានប្រសាសន៍លើកឡើងថា ឆ្នាំនេះគឺជាកិច្ចប្រជុំលើកទី ៥ រវាង​ក្រុម​ប្រឹក្សា​ជាតិរណសិរ្សសាមគ្គី អភិវឌ្ឍន៍មាតុភូមិកម្ពុជា, គណ:កម្មាធិការមជ្ឈិម រណសិរ្ស​អភិវឌ្ឍន​ជាតិ​ឡាវ និងគណ:កម្មាធិការមជ្ឈិមរណសិរ្ស មាតុភូមិវៀតណាម នៃ ដំណាក់កាល ២០២៤-២០២៧។ នៅក្នុងកិច្ចប្រជុំនោះប្រទសទាំង៣ បានលើកឡើងអំពីវឌ្ឍន:ភាពរបស់រណសិរ្សនីមួយៗ និង បាន​ចែករំលែកនូវបទពិសោធន៍ទៅវិញទៅមកក្នុងបរិយាកាសយ៉ាងស្និទ្ធស្នាលជាទីបំផុត។បន្ទាប់មកទៀតរណសិរ្សនៃប្រទសទាំង ៣ ក៏មានឯកភាពគ្នា និងចុះហត្ថលេខា លើ អនុស្ស​រណៈ​នៃ​យោគយល់គ្នាដំណាក់កាល ២០២៤ ២០២៧ ដើម្បីបន្តកិច្ចសហប្រតិបត្តិការ​ នៃ​ប្រទេស​ទាំង​៣ ដើម្បីជម្រុញការពង្រឹង និងពង្រីក សាមគ្គីភាព មិត្តភាព និងកិច្ចសហ ប្រតិបត្តិ​ការ​របស់​ប្រទេស​ទាំង៣ កាន់តែទូលំទូលាយ រឹងមាំ ស្ថិតស្ថេរ គង់វង្សយូរអង្វែង ៕

សហភាពអឺរ៉ុប ប្រកាសស៊ើបអង្កេតលើអាជីវកម្មថាមពលខ្យល់របស់ប្រទេសចិននៅក្នុងប្លុកអឺរ៉ុប

2024/04/10 11:51:08 am        124
Facebook Telegram Linkin
សហភាពអឺរ៉ុប បានប្រកាសពីការស៊ើបអង្កេតលើក្រុមហ៊ុនផ្គត់ផ្គង់ទុរប៊ិនខ្យល់របស់ប្រទេសចិន ដែលមានសកម្មភាពនៅក្នុងប្លុកអឺរ៉ុប។ ចំណាត់ការនេះ ធ្វើឡើងក្នុងពេលដែលការស៊ើបអង្កេតជាបន្តលើថាតើ រថយន្តអគ្គិសនីរបស់ប្រទេសចិន ដែលនាំចូលមកប្លុកអឺរ៉ុប បានទទួលអត្ថប្រយោជន៍មិនយុត្តិធម៌ដោយសារការឧបត្ថម្ភធនពីទីក្រុងប៉េកាំងឬយ៉ាងណា។លោកស្រី ម៉ាហ្គារេត វ៉េសស្តាជឺ(Margrethe Vestager) អនុប្រធានប្រតិបត្តិនៃគណៈកម្មាធិការអឺរ៉ុបបានធ្វើសេចក្តីប្រកាស កាលពីថ្ងៃអង្គារក្នុងអំឡុងពេលសុន្ទរកថានៅសហរដ្ឋអាមេរិក។ លោកស្រី បានបង្ហាញការព្រួយបារម្ភរបស់សហភាពអឺរ៉ុប ទាក់ទងទៅនឹងការផលិតលើសបរិមាណរបស់ប្រទេសចិននៅក្នុងថាមពលកកើតឡើងវិញ និងទីផ្សារផ្សេងៗទៀត។ លោកស្រី និយាយថា វាមិនត្រឹមតែមានគ្រោះថ្នាក់សម្រាប់ការប្រកួតប្រជែងរបស់យើងប៉ុណ្ណោះទេ វាថែមទាំងធ្វើឱ្យប៉ះពាល់ដល់សន្តិសុខសេដ្ឋកិច្ចរបស់យើងផងដែរ។លោកស្រី Vestager និយាយថា សហភាពអឺរ៉ុបកំពុងស៊ើបអង្កេតលក្ខខណ្ឌជាច្រើនសម្រាប់ការអភិវឌ្ឍឧទ្យានខ្យល់ នៅក្នុងប្រទេសអេស្ប៉ាញ ក្រិក និងប្រទេសជាសមាជិកផ្សេងទៀត។ជាការឆ្លើយតបទៅនឹងការស៊ើបអង្កេតរបស់ប្រព័ន្ធផ្សព្វផ្សាយ NHK គណៈកម្មការអឺរ៉ុប បានបង្ហាញថាក្រុមហ៊ុនផលិតថាមពលខ្យល់របស់ប្រទេសចិនមួយចំនួនដែលមានភាពសកម្មនៅលើទីផ្សារសហភាពអឺរ៉ុប អាច ទទួលអត្ថប្រយោជន៍ប្រកួតប្រជែងមិនយុត្តិធម៌តាមរយៈការឧបត្ថម្ភធនរបស់រដ្ឋ ដែលនាំឱ្យមានការប្រកួតប្រជែងមិនសមស្រប។សហភាពអឺរ៉ុប បានចាប់ផ្តើមការស៊ើបអង្កេតស្រដៀងគ្នាលើក្រុមហ៊ុនផលិតរថយន្តអគ្គិសនីរបស់ប្រទេសចិន កាលពីខែតុលា បន្ទាប់ពីមានការសង្ស័យថាការឧបត្ថម្ភធនរបស់រដ្ឋ កំពុងជួយពួកគេឲ្យរក្សាតម្លៃទាបនៅក្នុងប្លុកអឺរ៉ុប។ ប្រទេសចិន បានច្រានចោលដោយរិះគន់សហភាពអឺរ៉ុប ចំពោះការចាប់ផ្តើម ការស៊ើបអង្កេតដោយគ្មានភស្តុតាងគ្រប់គ្រាន់។

ចក្រភពអង់គ្លេស និងរ្វាន់ដា ទន្ទឹងរង់ចាំការនិរទេសជនអន្តោប្រវេសន៍

2024/04/10 11:45:07 am        134
Facebook Telegram Linkin
នាយករដ្ឋមន្រ្តីអង់គ្លេស លោក Rishi Sunak និងប្រធានាធិបតីរបស់ប្រទេសរ្វាន់ដា លោក Paul Kagame បានជួបគ្នា កាលពីថ្ងៃអង្គារ ដើម្បីពិភាក្សាអំពីផែនការរបស់ចក្រភពអង់គ្លេស ដើម្បីនិរទេសអ្នកស្វែងរកសិទ្ធិជ្រកកោនទៅកាន់ប្រទេសរ្វាន់ដា។បន្ទាប់ពីជំនួបនៅទីក្រុងឡុងដ៍ ការិយាល័យរបស់ លោក Sunak បាននិយាយថា មេដឹកនាំទាំងពីរ ទន្ទឹងរង់ចាំជើងហោះហើរ ដែលចេញដំណើរទៅកាន់ប្រទេសរ្វាន់ដា នៅនិទាឃរដូវ។លោក Sunak មានបំណងផ្លាស់ប្តូរទីតាំងអ្នកស្វែងរកសិទ្ធិជ្រកកោនរាប់ពាន់នាក់ដែលបានមកដល់ ចក្រភពអង់គ្លេសដោយគ្មានការអនុញ្ញាតក្នុងមួយឆ្នាំៗ ទៅកាន់ប្រទេសអាហ្វ្រិកខាងកើត។ ប៉ុន្តែរហូតមកដល់ពេលនេះ បញ្ហាប្រឈមផ្លូវច្បាប់ បានរារាំងអ្នកដែលនឹងត្រូវបានបញ្ជូនទៅទីនោះ ហើយដំបូងរដ្ឋាភិបាលរបស់ចក្រភពអង់គ្លេស ចាំបាច់ត្រូវអនុម័តច្បាប់ថ្មី។លោក Sunak សង្ឃឹមថា នឹងត្រួសត្រាយផ្លូវសម្រាប់រដ្ឋាភិបាលដើម្បីចាប់ផ្តើមដំណើរការនិរទេសជនអន្តោប្រវេសន៍ទៅកាន់ប្រទេសរ្វាន់ដា។ លោក Sunak ធ្លាប់បាននិយាយថា លោករំពឹងថាជើងហោះហើរដំបូងនឹងចាកចេញនៅនិទាឃរដូវ មុនពេលការបោះឆ្នោតរបស់ប្រទេស ដែលត្រូវបានរំពឹងទុកនៅឆមាសទីពីរនៃឆ្នាំនេះ។ច្បាប់ដែលព្យាយាមរារាំងបញ្ហាប្រឈមនានារបស់តុលាការចំពោះផែនការនេះ នឹងត្រូវបានលើកយកមកពិភាក្សាដេញដោល ក្នុងសភា នៅថ្ងៃទី ១៥ ខែមេសា។

សម្ដេចធិបតីណែនាំគ្រប់រាជធានី-ខេត្ត ត្រូវយកចិត្តទុកដាក់ខ្ពស់លើសន្ដិសុខសណ្តាប់ធ្នាប់សង្គម ក្នុងឱកាសពិធីចូលឆ្នាំថ្មី

2024/04/10 11:10:05 am        187
Facebook Telegram Linkin
សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា នាព្រឹកថ្ងៃទី១០ ខែមេសា ឆ្នាំ ២០២៤តាមរយៈបណ្ដាញសង្គម តេឡេក្រាម និងហ្វេសប៊ុក បានណែនាំដល់ គ្រប់រាជធានី-ខេត្តត្រូវយកចិត្តទុកដាក់ខ្ពស់លើសុខសណ្តាប់ធ្នាប់សង្គម ជាពិសេស បញ្ហាចរាចរណ៍​ដោយត្រូវកាត់បន្ថយឱ្យបានជាអប្បបរមា ក្នុងឱកាសពិធីបុណ្យចូលឆ្នាំថ្មី ប្រពៃណីខ្មែរខាងមុខនេះ។ អមជាមួយនឹងរូបភាព រាជធានី-ខេត្ត ទាំង ២៥ ដែលបានត្រៀមលក្ខណៈ និងរៀបចំលម្អរួចរាល់ ដើម្បីប្រារព្ធពិធីបុណ្យចូលឆ្នាំថ្មី ប្រពៃណីខ្មែរ នាពេលខាងមុខនេះ។សម្ដេចធិបតី នាយករដ្ឋមន្រ្ដី មានប្រសាសន៍ថា សម្រាប់បងប្អូនប្រជាពលរដ្ឋដែលបំពេញការងារ​ក្នុង​រាជធានីភ្នំពេញ ដែលមានបំណងធ្វើដំណើរទៅស្រុកកំណើតក្នុងឱកាសឆ្នាំថ្មីនេះ អាចប្រើប្រាស់​មធ្យោបាយ​រថយន្តក្រុង ដែលសាលារាជធានីភ្នំពេញបានរៀបចំនៅតាមគោលដៅ​ទាំង ៨ ដែលបានជូនដំណឹង​ជាមុនរួចរាល់ហើយ។ សម្ដេចធិបតីនាយករដ្ឋមន្រ្ដី បានបញ្ជាក់បន្ថែមថា គ្រប់រាជធានី-ខេត្តទាំងអស់ ត្រូវបន្តយកចិត្ត​ទុកដាក់​ខ្ពស់លើសុខសណ្តាប់ធ្នាប់សង្គម ពិសេស បញ្ហាចរាចរណ៍ ដោយត្រូវកាត់បន្ថយឱ្យបាន​ជាអប្បបរមា។សូមជម្រាបថា ពិធីបុណ្យចូលឆ្នាំថ្មីប្រពៃណីខ្មែរឆ្មាំនេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា ​បានណែនាំដល់គ្រប់រាជធានី ខេត្ត ស្រុក ក្រុង ត្រូវរៀបចំឱ្យបាន​អធិកអធម ជាពិសេសរៀបចំពិធីសង្ក្រាន្តឱ្យបានសប្បាយរីករាយនៅតាមមូដ្ឋានភូមិ ឃុំផ្ទាល់តែម្ដង៕

មេដឹកនាំជាប់ឆ្នោតកោះតៃវ៉ាន់ តែងតាំងអតីតប្រធានបក្សកាន់អំណាច ជាមន្រ្តីជាន់ខ្ពស់ថ្មី

2024/04/10 11:00:19 am        56
Facebook Telegram Linkin
មេដឹកនាំជាប់ឆ្នោតថ្មីរបស់កោះតៃវ៉ាន់ លោក ឡៃ ឈីងតឺ (Lai Ching-te) បានប្រកាសនៅថ្ងៃពុធ (១០ មេសា) នេះថា លោកបានតែងតាំងលោក ចូ យ៉ុងថៃ (Cho Jung-tai) ដែលជាអតីតប្រធានគណបក្សប្រជាធិបតេយ្យ (DPP) ដែលកំពុងកាន់អំណាច ធ្វើជាមន្ដ្រីជាន់ខ្ពស់ថ្មី (កោះនេះហៅថា នាយករដ្ឋមន្ត្រី)។ មន្ដ្រីជាន់ខ្ពស់ថ្មី និងគណៈរដ្ឋមន្ត្រីរបស់ខ្លួន នឹងមិនកាន់តួនាទីទេរហូតដល់លោក ឡៃ បានចូលកាន់តំណែងនៅថ្ងៃទី២០ ខែឧសភា ខាងមុខ។នៅក្រោមប្រព័ន្ធរដ្ឋាភិបាលរបស់តៃវ៉ាន់ មេដឹកនាំតែងតាំងមន្ដ្រីជាន់ខ្ពស់ ដែលបន្ទាប់មកមន្ដ្រីជាន់ខ្ពស់នោះតែងតាំងសមាជិកគណៈរដ្ឋមន្ត្រីជាមួយនឹងការយល់ព្រមចុងក្រោយពីមេដឹកនាំ ហើយគណៈរដ្ឋមន្ត្រីនោះជាអ្នកដែលបង្កើតគោលនយោបាយ និងស្នើច្បាប់។លោក ចូ បានប្រាប់អ្នកសារព័ត៌មានថា លោកនឹងប្រកាសសមាជិកគណៈរដ្ឋមន្ត្រីរបស់ខ្លួននៅពេលក្រោយ ដោយបន្ថែមថា លោកនឹងជ្រើសរើសពីគ្រប់ជួរគណបក្ស។ លោក ឡៃ ដែលបច្ចុប្បន្នជាមេដឹកនាំលំដាប់ទី២ បានឈ្នះការបោះឆ្នោតមេដឹកនាំកាលពីខែមករា ប៉ុន្តែបក្ស DPP បានបាត់បង់សំឡេងភាគច្រើននៅក្នុងសភា។គណបក្សប្រឆាំងដ៏សំខាន់របស់តៃវ៉ាន់ គឺគណបក្ស គូមីនតាំង (KMT) បានយកអាសនៈច្រើនជាងគេ ប៉ុន្តែមិនគ្រប់គ្រាន់ដើម្បីបង្កើតសភាភាគច្រើនដោយខ្លួនឯងនោះទេ។ អាសនៈផ្សេងទៀតត្រូវបានឈ្នះដោយគណបក្សប្រជាជនតៃវ៉ាន់ (TPP) ដ៏តូច ដែលដឹកនាំដោយអតីតអភិបាលក្រុងតៃប៉ិ លោក កឺ វិនជឺ (Ko Wen-je)៕

សហរដ្ឋអាមេរិក ពិចារណាបន្ធូរបន្ថយការព្រមានសម្រាប់ពលរដ្ឋអាមេរិក ដែលធ្វើដំណើរទៅចិន

2024/04/10 10:37:23 am        43
Facebook Telegram Linkin
អនុរដ្ឋមន្រ្តីការបរទេសអាមេរិក លោក ឃឺដ ខេមប៊ែល (Kurt Campbell) បាននិយាយកាលពីថ្ងៃអង្គារ (០៩ មេសា) ថាសហរដ្ឋអាមេរិក កំពុងពិចារណាបន្ធូរបន្ថយការប្រឹក្សាប្រឆាំងនឹងពលរដ្ឋរបស់ខ្លួនដែលធ្វើដំណើរទៅកាន់ប្រទេសចិន ដោយទទួលស្គាល់ការព្រួយបារម្ភថា ការព្រមាននេះអាចកាត់បន្ថយការផ្លាស់ប្តូររវាងប្រជាជនអាមេរិក និងប្រជាជនចិន។លោក ខេមប៊ែល បាននិយាយក្នុងព្រឹត្តិការណ៍មួយដែលរៀបចំឡើងដោយគណៈកម្មាធិការជាតិមិនរកប្រាក់ចំណេញស្តីពីទំនាក់ទំនងអាមេរិក-ចិន ថា បណ្តាញទំនាក់ទំនងរវាងទីក្រុងវ៉ាស៊ីនតោន និងទីក្រុងប៉េកាំង បានដំណើរការជាធម្មតាបន្ទាប់ពីមានភាពតានតឹងកើនឡើងជាច្រើនខែ។ យ៉ាងណាក៏ដោយ លោកក៏បានព្រមានថា ការគាំទ្ររបស់ចិន ចំពោះសង្គ្រាមរបស់រុស្ស៊ី នៅអ៊ុយក្រែន ធ្វើឱ្យទំនាក់ទំនងដែលមានស្ថិរភាពនេះស្ថិតក្នុងហានិភ័យ។ក្រសួងការបរទេសបានចេញការព្រមានជាលំដាប់សម្រាប់ជនជាតិអាមេរិក ដែលធ្វើដំណើរទៅកាន់ប្រទេសចិន ដោយអំពាវនាវឱ្យពួកគេពិចារណាឡើងវិញនូវដំណើរទាំងនោះ ឬបង្កើនការប្រុងប្រយ័ត្ន ដោយសារហានិភ័យនៃ «ការអនុវត្តច្បាប់ក្នុងស្រុក» ការហាមឃាត់ការចាកចេញ និងការឃុំខ្លួនដោយច្រឡំ។ប៉ុន្តែប្រធានាធិបតីនៃប្រទេសទាំងពីរ បានស្វះស្វែងរកការកសាងឡើងវិញនូវការផ្លាស់ប្តូររវាងប្រជាជន និងប្រជាជន ដើម្បីជាសសរស្តម្ភសម្រាប់គ្រប់គ្រងការកើនឡើងនៃការប្រកួតប្រជែងភូមិសាស្ត្រនយោបាយរវាងប្រទេសមហាអំណាចទាំងពីរនេះ៕

រដ្ឋមន្ត្រីការបរទេស៖ អូស្ត្រាលីនឹងពិចារណាលើការទទួលស្គាល់រដ្ឋប៉ាឡេស្ទីន

2024/04/10 10:32:04 am        53
Facebook Telegram Linkin
រដ្ឋមន្ត្រីការបរទេសអូស្ត្រាលី លោកស្រី Penny Wong បាននិយាយថា ទីក្រុងកង់បេរ៉ា នឹងពិចារណាលើការទទួលស្គាល់រដ្ឋប៉ាឡេស្ទីន ដែលជាការផ្លាស់ប្តូរគោលនយោបាយួយ ខណៈដែលសហគមន៍អន្តរជាតិ ស្វែងរកដំណោះស្រាយរដ្ឋពីរ ដើម្បីបញ្ចប់ជម្លោះអ៊ីស្រាអែល-ប៉ាឡេស្ទីន។នៅក្នុងសុន្ទរកថាមួយកាលពីល្ងាចថ្ងៃអង្គារ លោកស្រី Wong បានគាំទ្រការអត្ថាធិប្បាយរបស់រដ្ឋមន្ត្រីការបរទេសអង់គ្លេសដេវីត កាមេរុន ( David Cameron) ដែលបាននិយាយថា ការទទួលស្គាល់រដ្ឋប៉ាឡេស្ទីន រួមទាំងនៅអង្គការសហប្រជាជាតិ នឹងធ្វើឲ្យដំណោះស្រាយរដ្ឋពីរ មិនអាចកែប្រែបានទេ។លោកស្រី Wong បានលើកឡើងថា សហគមន៍អន្តរជាតិ កំពុងពិភាក្សាអំពីភាពជារដ្ឋរបស់ប៉ាឡេស្ទីន «ជាមធ្យោបាយនៃការបង្កើតកម្លាំងជំរុញឆ្ពោះទៅរកដំណោះស្រាយរដ្ឋពីរ»។លោកស្រី បានថ្លែងថា៖«ដំណោះស្រាយរដ្ឋពីរ គឺជាក្តីសង្ឃឹមតែមួយគត់ ដើម្បីបំបែកវដ្តនៃអំពើហិង្សា ដែលគ្មានទីបញ្ចប់នោះ»។អ្វីដែលហៅថាដំណោះស្រាយរដ្ឋពីរជាមូលដ្ឋានសម្រាប់កិច្ចប្រឹងប្រែងសន្តិភាពអន្តរជាតិ ដើម្បីដោះស្រាយជម្លោះអ៊ីស្រាអែល-ប៉ាឡេស្ទីនយូរមកហើយ ប៉ុន្តែដំណើរការ ត្រូវបានជាប់គាំងអស់មួយទសវត្សរ៍មកហើយ សូម្បីតែមុនពេលសង្រ្គាមបច្ចុប្បន្ននៅក្នុងតំបន់ហ្កាហ្សារបស់ប៉ាឡេស្ទីនរវាងអ៊ីស្រាអែលនិងក្រុមសកម្មប្រយុទ្ធប៉ាឡេស្ទីនហាម៉ាស។ប្រជាជនប៉ាឡេស្ទីន ប្រាថ្នាចង់មានរដ្ឋឯករាជ្យមួយនៅតំបន់វេសបែង( West Bank) និងទីក្រុងហ្ស៊េរុយសាឡឹមខាងកើត ( East Jerusalem) ដែលគ្រប់គ្រងដោយអ៊ីស្រាអែល ចាប់តាំងពីសង្រ្គាមមជ្ឈិមបូព៌ាឆ្នាំ ១៩៦៧ និងរួមទាំងតំបន់ហ្កាហ្សាផងដែរ។

លោក Biden រិះគន់ វិធីសាស្ត្រសង្រ្គាមរបស់លោក Netanyahu ជាមួយក្រុមហាម៉ាស ថាជាកំហុស

2024/04/10 10:06:52 am        52
Facebook Telegram Linkin
លោកប្រធានាធិបតី Joe Biden បានស្តីបន្ទោសយ៉ាងខ្លាំង មួយក្នុងចំណោមការស្ដីបន្ទោសជាច្រើន របស់លោកចំពោះដំណោះស្រាយសង្រ្គាមរបស់អ៊ីស្រាអែលនៅក្នុងដែនដីហ្កាហ្សា អំឡុងបទសម្ភាសន៍មួយដែលបានចាក់ផ្សាយកាលពីថ្ងៃអង្គារដោយហៅវិធីសាស្រ្តរបស់នាយករដ្ឋមន្រ្តីអ៊ីស្រាអែល Benjamin Netanyahu ចំពោះជម្លោះនោះ ថាជា កំហុស និងអំពាវនាវឱ្យបញ្ឈប់ការប្រយុទ្ធនេះ។ លោក Biden បានប្រាប់សារព័ត៌មាន Univision ថា ខ្ញុំចង់ប្រាប់អ្នកថា ខ្ញុំគិតថាអ្វីដែលលោក Benjamin កំពុងធ្វើគឺជាកំហុស។ខ្ញុំមិនយល់ស្របនឹងវិធីសាស្រ្តរបស់លោកទេ នៅក្នុងបទសម្ភាសន៍មួយដែលបានថតត្រឹមតែប៉ុន្មានថ្ងៃបន្ទាប់ពីការវាយប្រហារដោយយោធារបស់អ៊ីស្រាអែលបានសម្លាប់បុគ្គលិកផ្ដល់ជំនួយផ្ទះបាយកណ្តាលពិភពលោក(World Central Kitchen) ចំនួនប្រាំពីរនាក់ ដែលបង្កឱ្យផ្ទុះកំហឹងពីបណ្ដាប្រទេសជាច្រើន និងការខកចិត្តពេញទូទាំងសេតវិមានរបស់អាមេរិក។យោងតាមអត្ថបទនៃបទសម្ភាសន៍របស់សារព័ត៌មាន Univision លោកបានបន្តថា ខ្ញុំគិតថាវាជារឿងដ៏គួរឲ្យហួសចិត្តដែលរថយន្ត៣គ្រឿង ក្នុងចំណោមបួនគ្រឿងនោះ ត្រូវបានវាយប្រហារដោយយានដ្រូន របស់អ៊ីស្រាអែលនៅក្នុងតំបន់ហ្កាហ្សា។ ការស្ដីបន្ទោសនេះ បានក្លាយជាការរិះគន់ដ៏ខ្លាំងបំផុតមួយរបស់លោកប្រឆាំងនឹងរបៀបដែលរដ្ឋាភិបាលរបស់លោក Netanyahu កំពុងធ្វើសង្គ្រាមប្រឆាំងនឹងក្រុមហាម៉ាស។ លោកប្រធានាធិបតីបានបន្ថែមថាលោកកំពុងអំពាវនាវឱ្យអ៊ីស្រាអែលយល់ព្រមលើបទឈប់បាញ់មួយ ហើយថា មិនមាន លេសសម្រាប់ការមិនបញ្ជូនជំនួយមនុស្សធម៌នោះទេ។បណ្ដាប្រទេសមហាអំណាចលោកខាងលិច មានការព្រួយបារម្ភយ៉ាងខ្លាំងលើចំនួនការស្លាប់របស់ពលរដ្ឋប៉ាឡេស្ទីនដែលចេះតែកើនឡើង និងវិបត្តិមនុស្សធម៌កើតចេញពីការវាយប្រហារមិនសំចៃដៃរបស់កងទ័ពអ៊ីស្រាអែលក្នុងបំណងបំផ្លាញក្រុមហាម៉ាសនៅក្នុងដែនដីហ្កាហ្សាស្ទ្រីប៕

ជប៉ុន មើលឃើញឱកាសកាន់តែច្រើន ក្នុងការពង្រឹងទំនាក់ទំនងវិស័យសេដ្ឋកិច្ច និងការពារជាតិ ជាមួយអាមេរិក

2024/04/10 09:19:00 am        56
Facebook Telegram Linkin
លោកនាយករដ្ឋមន្ត្រីជប៉ុន Fumio Kishida បាននិយាយកាលពីថ្ងៃអង្គារទី៩មេសា ថា លោកបានមើលឃើញឱកាសកាន់តែច្រើនសម្រាប់កិច្ចការរួមគ្នាបន្ថែមទៀត ជាមួយសហរដ្ឋអាមេរិក លើផ្នែកបន្ទះឈីបអេឡិចត្រូនិកកុំព្យូទ័រជំនាន់ថ្មី។ លោក Kishida បានធ្វើអត្ថាធិប្បាយបែបនេះ ត្រឹមតែមួយថ្ងៃ មុនជំនួបកំពូលជាមួយលោកប្រធានាធិបតីអាមេរិក Joe Biden ដែលនឹងផ្ដោតលើការពង្រឹងផ្នែកសេដ្ឋកិច្ច និងទំនាក់ទំនងការពារជាតិដើម្បីបញ្ឈប់ឥទ្ធិពលដែលចេះតែកើនឡើងរបស់ប្រទេសចិន។ ក្រុមហ៊ុនបច្ចេកវិទ្យាខ្នាតយក្សរបស់អាមេរិក Microsoft បាននិយាយថា ខ្លួននឹងវិនិយោគទំហំទឹកប្រាក់២,៩ពាន់លានដុល្លារអាមេរិក រយៈពេលជាង២ឆ្នាំដើម្បីពង្រីកហេដ្ឋារចនាសម្ព័ន្ធបច្ចេកវិទ្យា និងបញ្ញាសិប្បនិម្មិតរបស់ខ្លួននៅក្នុងប្រទេសជប៉ុន ជាការវិនិយោគដ៏ធំបំផុតរបស់ខ្លួនក្នុងពេល៤៦ឆ្នាំ ដែលប្រទេសនេះ បានធ្វើប្រតិបត្តិការក្នុងប្រទេសនៅអាស៊ីមួយនេះ។ ថ្លែងនៅឯកិច្ចប្រជុំតុមូលស្ដីពីបច្ចេកវិទ្យា រៀបចំដោយសភាពាណិជ្ជកម្មរបស់អាមេរិក នៅក្នុងទីក្រុងវ៉ាស៊ីនតោន លោកនាយករដ្ឋមន្ត្រីជប៉ុន បានសំដៅដល់រោងចក្រផលិតបន្ទះឈីបអេឡិចត្រូនិក Rapidus ក្នុងប្រទេសជប៉ុន។ លោកថា នៅក្នុងវិស័យផលិតបន្ទះឈីបអេឡិចត្រូនិក ក្រុមហ៊ុន Rapidus គឺជាដៃគូជាមួយក្រុមហ៊ុនរបស់សហរដ្ឋអាមេរិក នៅក្នុងការស្រាវជ្រាវ និងការអភិវឌ្ឍនៃបន្ទះឈីបជំនាន់ថ្មី។ លោកប្រាកដណាស់ថា នឹងមានឱកាសកាន់តែច្រើនថែមទៀត សម្រាប់កិច្ចការរួមគ្នារវាងប្រទេសជប៉ុន និងសហរដ្ឋអាមេរិក ។ លោក Kishida ពុំបាននិយាយឈ្មោះប្រទេសចិនទេ នៅក្នុងសុន្ទរកថារបស់លោកទៅកាន់សភានោះ ប៉ុន្តែបាននិយាយថា វាពិតជាមានសារៈសំខាន់ណាស់សម្រាប់សហរដ្ឋអាមេរិក និងជប៉ុន ដែលត្រូវកសាងសមត្ថភាពនៅក្នុងវិស័យសេដ្ឋកិច្ចរបស់ប្រទេសទាំង២ និងជំរុញកកំណើនរួមគ្នាសម្រាប់សេដ្ឋកិច្ចសកល៕

បណ្ដាញសង្គម

ព័ត៌មានថ្មីៗ

ចាប់ពីថ្ងៃទី២៧ ខែមិថុនាដល់ថ្ងៃទី១៦ ខែកក្កដានេះ គ.ប.ឆ.ប. បង្រ្កាប ONLINESCAMS ២០ទីតាំងឃាត់ខ្លួនជនសង្ស័យ ១.៣៦២ នាក់ ក្នុងនោះជនជាតិវៀតណាម ៣៤៧នាក់
07/17/2025 10:07 PM
Facebook Telegram Linkin
រាជរដ្ឋាភិបាលបានកំណត់តម្លៃនិងតួនាទីព្រៃឈើ ដោយមិនកាត់ផ្តាច់ចេញពីវិស័យអាទិភាពរបស់រដ្ឋ
07/17/2025 09:07 PM
Facebook Telegram Linkin
ឯកឧត្តមឧបនាយករដ្ឋមន្ត្រី ប្រាក់ សុខុន អញ្ជើញធ្វើបាឋកថាស្តីពី «សភាពការណ៍អន្តរជាតិ និងនយោបាយការបរទេសរបស់កម្ពុជា» ចែករំលែកដល់សិស្សមន្ត្រីសាលាភូមិន្ទរដ្ឋបាល
07/17/2025 09:07 PM
Facebook Telegram Linkin
ក្រសួងការងារបដិសេធចំពោះជនខិលខូចប្រើប្រាស់រូប និងឈ្មោះ ឯកឧត្តម ហេង សួរ ក្នុងចេតនាឆបោកសាធារណជន
07/17/2025 09:07 PM
Facebook Telegram Linkin
តើហេតុអ្វីបានជាប្រទេសប៉ាគីស្ថានងាយរងគ្រោះដោយសារទឹកជំនន់ស្លាប់មនុស្ស?
07/17/2025 08:07 PM
Facebook Telegram Linkin
ឯកឧត្តមឧបនាយករដ្ឋមន្ត្រី ហ៊ុន ម៉ានី ជួបសំណេះសំណាលជាមួយសមាជិក សមាជិកា ក្រុមការងារគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី ដែលទើបនឹងជ្រើសរើសថ្មី ប្រចាំសាកលវិទ្យាល័យវិទ្យាសាស្រ្តសុខាភិបាល ចំនួន ៥៨៤នាក់
07/17/2025 08:07 PM
Facebook Telegram Linkin
ការទម្លាក់គ្រាប់បែករបស់រុស្ស៊ីសម្លាប់មនុស្ស ៤នាក់ និង ២៧នាក់ រងរបួសនៅទីក្រុង Dobropillia ប្រទេសអ៊ុយក្រែន
07/17/2025 08:07 PM
Facebook Telegram Linkin
ក្រសួងឧស្សាហកម្ម ដាក់ប្រព័ន្ធបន្សុទ្ធទឹកស្អាតនៅមន្ទីរពេទ្យគន្ធបុប្ផា ជូនដល់អ្នកព្យាបាលជំងឺពិសា
07/17/2025 08:07 PM
Facebook Telegram Linkin
សាស្ត្រាចារ្យសាកលវិទ្យាល័យតូក្យូ ចាប់អារម្មណ៍ស្វែងយល់បន្ថែមអំពីកម្ពុជា និងការអភិវឌ្ឍសង្គម-សេដ្ឋកិច្ច
07/17/2025 08:07 PM
Facebook Telegram Linkin
សារព័ត៌មាន NBC News៖ ការវាយប្រហាររបស់អាមេរិក បានបំផ្លាញទីតាំងនុយក្លេអ៊ែរអ៊ីរ៉ង់តែមួយប៉ុណ្ណោះ
07/17/2025 08:07 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.