នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
TOP STORY | សម្ដេចធិបតី បានចាត់វិធានការចាំបាច់​ជាបន្ត​បន្ទា​ប់ចំ​ពោះកា​រ​វិល​ត្រឡប់​ទ្រង់ទ្រាយ​ធំរ​បស់​ពលករ​ខ្មែរ និងជនភៀសសឹក
TOP STORY | សម្ដេចតេជោ៖ ពេលនេះ ខ្ញុំកំពុងតែរួមចំណែកបញ្ជាទ័ព តាមប្រព័ន្ធវីដេអូ និងប្រព័ន្ធផ្សេងទៀតជាមួយនាយករដ្ឋមន្ត្រី, រដ្ឋមន្ត្រីក្រសួងការពារជាតិ អគ្គមេបញ្ជាការកងទ័ព និងបញ្ជាការកងកម្លាំងប្រដាប់អាវុធគ្រប់លំដាប់ថ្នាក់
TOP STORY |សម្ដេចធិបតី ហ៊ុន ម៉ាណែត ដាក់លិខិតស្នើសុំ​​កោះប្រជុំក្រុមប្រឹក្សាសន្តិសុខជាបន្ទាន់ ដើម្បី​សុំ​ការ​អន្ត​រាគមន៍​បញ្ចប់​ការ​ឈ្លាន​ពាន​របស់​កង​ទ័ព​ថៃមក​លើដែនអធិបតេយ្យភាពរបស់កម្ពុជា
TOP STORY | សម្ដេចធិបតី៖ កងទ័ពថៃបានបើកការ​វាយប្រហារ​មក​លើ​ទីតាំង​ឈរ​ជើង​របស់​កង​ទ័ព​កម្ពុជា​ នៅប្រាសាទតាមាន់ធំ តាក្របី និងបានពង្រីកភូមិសាស្ត្រវាយប្រហារទៅដល់តំបន់មុំបី

នយោបាយ​ និង ការអភិវឌ្ឍន៍

សម្ដេចតេជោ ហ៊ុន សែន អញ្ជើញជួបពិភាក្សាការងារជាមួយប្រធានរដ្ឋសភាថៃ

2024/03/22 11:22:13 am        98
Facebook Telegram Linkin
នៅព្រឹកថ្ងៃទី២២ ខែមីនា ឆ្នាំ២០២៤ សម្ដេចអគ្គមហាសេនាបតីតេជោ ហ៊ុន សែន ប្រធាន​ក្រុម​ឧត្តម​ប្រឹក្សាផ្ទាល់ព្រះមហាក្សត្រ និងជាប្រធានគណបក្សប្រជាជនកម្ពុជា បានអញ្ជើញ​ជួប​ពិភាក្សា​ការងារ​ជាមួយ ឯកឧត្តម វ៉ាន់មូហាម៉ាត់ ណ័រ មៈថា (Wan Muhamad Noor Matha) ប្រធាន​រដ្ឋសភា នៃ​ព្រះរាជាណាចក្រថៃ នៅវិមាន៧មករា រាជធានីភ្នំពេញ។ សម្ដេចតេជោបានស្វាគមន៍យ៉ាងកក់ក្ដៅចំពោះឯកឧត្តម វ៉ាន់ មហាម៉ាត់ ណ័រ ម៉ៈថា ប្រធានរដ្ឋសភានៃព្រះរាជាណាចក្រថៃ ដែលបានដឹកនាំគណៈប្រតិភូជាន់ខ្ពស់​រដ្ឋសភា​មក​បំពេញ​​ទស្សនកិច្ចជាផ្លូវការនៅព្រះរាជាណាចក្រកម្ពុជា។ សម្ដេចតេជោ មាន​ជំនឿ​ជាក់​យ៉ាង​មុត​មាំថា ដំណើរ​ទស្សនកិច្ច​របស់​គណៈ​ប្រតិភូ​ជាន់​ខ្ពស់រ​ដ្ឋសភា​ព្រះរាជាណាចក្រ​ថៃ​នៅ​ពេល​នេះនឹ​ង​បាន​រួម​ចំណែកយ៉ាងសំខាន់ថែមទៀត​ដល់ការពង្រឹង និងពង្រីកនៅទំនាក់ទំនងជាមិត្តភាព​រវាង​ប្រទេស និង​ប្រជាជន ជាពិសេសស្ថាប័ននិតិប្ប​​ញ្ញត្តិ​នៃប្រទេសទាំងពីរ។ សម្ដេចតេជោ បានថ្លែងអំណរគុណយ៉ាងជ្រៀលជ្រៅនិងមានកិត្តិយសណាស់ដែលឯកឧត្តម វ៉ាន់ មហាម៉ាត់ ណ័រ ម៉:ថា ដែលបានអញ្ជើញចូលរួមពិធីស្រាយ​បួសជាមួយបងប្អូនខ្មែរអ៊ីស្លាម​​នៅកម្ពុជា ​ដែល​ជាផ្នែកមួយធ្វើឱ្យមានសុខដុមនីយកម្មសាសនានៅព្រះរាជាណាចក្រកម្ពុជា។ ឯកឧត្តម វ៉ាន់ មហាម៉ាត់ ណ័រ ម៉ៈថា បានថ្លែងអំណរគុណយ៉ាងជ្រៀលជ្រៅចំពោះសម្ដេចតេជោ ដែ​ល​បានអនុញ្ញាតឱ្យគណៈប្រតិភូជាន់ខ្ពស់រដ្ឋសភាថៃជួបសម្ដែងការគួរសម និងបានជម្រាបជូន​សម្ដេចតេជោ​ថា កាលពី៣០ឆ្នាំមុនឯកឧត្តមបានជួបសម្ដេច​តេជោក្នុងនាមជាអ្នកនយោបាយវ័យ​ក្មេង​របស់​កម្ពុជា​ដ៏មានសក្ដានុពល និងនៅថ្ងៃនេះបានជួបសម្ដេចបានសារជាថ្មីម្ដងទៀត។ឯកឧត្តម វ៉ាន់ មហាម៉ាត់ ណ័រ ម៉:ថា ឯកឧត្តមបានលើកឡើងថា កម្ពុជានិងថៃ ជាប្រទេសភូមិផង​របង​ជាមួយគ្នា​​ ដូច្នេះយើងត្រូវចេះស្រលាញ់និងសាមគ្គីគ្នា ដើម្បីជាផលប្រយោជន៍ដល់ប្រជាជន​នៃ​​ប្រទេសយើង​ទាំងពីរ។ ឯកឧត្តមគូសបញ្ជាក់ថា ប្រទេសថៃ​នឹង​យក​ចិត្ត​ទុក​ដាក់​មើល​ថែ​ពលករ​កម្ពុជា​​ដែ​លកំពុងធ្វើការ និងប្រកបមុខរបបក្នុងប្រទេសថៃដូចជាប្រជាជនថៃដែរ ជាពិសេស​បាន​ផ្ដល់​ឱកាស​​ឱ្យ​គ្រួសារ ​និងកូនរបស់ពលករកម្ពុជាទទួលបានការអប់រំរៀនសូត្រភាសាថៃផងដែរ។ ឯកឧត្តម វ៉ាន់ មហាម៉ាត់ ណ័រ ម៉ៈថា បានអបអរសាទរចំពោះសម្ដេចតេជោ ដែល​បាន​ទទួល​តួនាទី​​​ជាប្រធានក្រុមឧត្តមប្រឹក្សាផ្ទាល់ព្រះមហាក្សត្រ និងអបអរសាទរចំពោះសម្ដេចតេជោ ដែល​នឹង​​ត្រូវ​ក្លាយ​ជាប្រធានព្រឹទ្ធសភានៅពេលខាងមុខ។ ជាការឆ្លើយតបសម្ដេចតេជោ បានវាយតម្លៃខ្ពស់ចំពោះការរីកចំរើនលើគ្រប់វិស័យនៃ​ទំនាក់ទំនង​កម្ពុជាថៃ និងបានថ្លែងអំណរគុណយ៉ាងជ្រៀលជ្រៅ​ចំពោះរដ្ឋាភិបាលថៃដែលបានយកចិត្តទុក​ដាក់​ផ្ដល់​ការថែទាំដល់ពលករកម្ពុជាដែលកំពុងធ្វើការនៅប្រទេសថៃ។ សម្ដេចតេជោបានជម្រុញឱ្យប្រទេស​ទាំងពីរ​លើកកម្ពស់ថែម​ទៀត​លើ​កិច្ច​សហ​ប្រតិបត្តិការ​ផ្នែក​សេដ្ឋកិច្ច ពាណិជ្ជកម្ម វិស័យការងារ ទេសចរណ៍ជាដើម។ល។ និងចង់​ឃើញ​ទំនាក់ទំនង​រវាង​ប្រទេស​ទាំង​ពីរលើកកម្ពស់ពីទំនាក់ទំនងដៃ​គូរ​ជាយុទ្ធសាស្ដ្រ​ទៅ​ជាដៃគូរ​យុទ្ធសាស្ដ្រ​គ្រប់​ជ្រុង​ជ្រោយ​នៅ​ពេលអនាគត។ ចំពោះកិច្ចសហប្រតិបត្តិការ   តំបន់យើងត្រូវ​ជំរុញ​ថែមទៀត ដើម្បី​ផល​ប្រយោជន៍រវាង​ប្រទេស​ទាំងពីរក្នុងក្របខ័ណ្ឌអាស៊ាន អ៊ិចមិច និង មហាអនុតំបន់មេគង្គ ។ ជាចុងបញ្ចប់ សម្ដេចបានថ្លែងអំណរគុណដល់ឯកឧត្តម វ៉ាន់ មហាម៉ាត់ ណ័រ ម៉ៈថា ដែលបាន​អបអរ​សាទរចំពោះសម្ដេច និងបានជូនពរគណៈប្រតិភូទទួលបានជោគជ័យ​ក្នុង​ដំណើរ​ទស្សន​កិច្ច​​​នៅ​ព្រះរាជាណាចក្រកម្ពុជា៕ អត្ថបទៈ ដារ៉ា

ធនាគារលោកខាងលិច ព្រមានពីហានិភ័យនៃគម្រោង EU ក្នុងការប្រើប្រាសចំណូលពីទ្រព្យបង្កករបស់រុស្ស៊ី

2024/03/22 11:14:23 am        64
Facebook Telegram Linkin
ប្រភពឧស្សាហកម្មជាន់ខ្ពស់បាននិយាយថា ធនាគារលោកខាងលិចមួយចំនួនបានចាប់ផ្តើមបញ្ចុះបញ្ចូលប្រឆាំងនឹងសំណើរបស់សហភាពអឺរ៉ុប ក្នុងការចែកចាយឡើងវិញនូវការប្រាក់រាប់ពាន់លានអឺរ៉ូ ដែលរកបានលើទ្រព្យសម្បត្តិរបស់រុស្ស៊ី ដែលត្រូវបានបង្កក ដោយបារម្ភថាគម្រោងនេះអាចនាំឱ្យមានការកាត់ក្តី ដែលត្រូវចំណាយសងវិញយ៉ាងលើសលប់។មេដឹកនាំសហភាពអឺរ៉ុបកាលពីថ្ងៃព្រហស្បតិ៍ (២១ មីនា) កំពុងពិភាក្សាអំពីផែនការប្រើប្រាស់ប្រាក់រហូតដល់ ៣ ពាន់លានអឺរ៉ូ (៣,២៦ ពាន់លានដុល្លារ) ក្នុងមួយឆ្នាំ ដើម្បីផ្គត់ផ្គង់អាវុធដល់អ៊ុយក្រែន ខណៈដែលពួកគេព្យាយាមជំរុញការប្រយុទ្ធរបស់ទីក្រុងគីវ ប្រឆាំងនឹងរុស្ស៊ី ដែលនៅតែជាម្ចាស់ទ្រព្យសម្បត្តិដែលជាប់គាំងនេះ។ទោះជាយ៉ាងណាក៏ដោយ ធនាគារមួយចំនួនភ័យខ្លាចថា បន្ទាប់ពីផែនការនោះ ពួកគេអាចនឹងត្រូវចាប់ឱ្យទទួលខុសត្រូវដោយរុស្ស៊ី ប្រសិនបើពួកគេពាក់ព័ន្ធនឹងការផ្ទេរប្រាក់ណាមួយទៅកាន់អ៊ុយក្រែន ហើយថាផែនការរបស់សហភាពអឺរ៉ុប អាចត្រូវបានពង្រីកដល់ទ្រព្យសម្បត្តិនៅក្នុងគណនីដែលពួកគេកាន់កាប់សម្រាប់បុគ្គល និងក្រុមហ៊ុនដែលត្រូវបានទទួលទណ្ឌកម្ម។ប្រភពនេះក៏មានការព្រួយបារម្ភផងដែរថា សំណើនេះនឹងនាំឱ្យមានការលុបបំបាត់ការទុកចិត្តកាន់តែធំនៅក្នុងប្រព័ន្ធធនាគារលោកខាងលិច។ រុស្ស៊ីនិយាយថា ការប៉ុនប៉ងណាមួយដើម្បីដណ្តើមយកដើមទុន ឬការប្រាក់របស់ខ្លួនគឺជា «អំពើចោរកម្ម» ដែលនឹងនាំទៅដល់ការចាត់វិធានការផ្លូវច្បាប់ជាច្រើនទសវត្សរ៍ប្រឆាំងនឹងអ្នកពាក់ព័ន្ធទាំងអស់ ហើយទីក្រុងមូស្គូ បាននិយាយម្តងហើយម្តងទៀតថា ខ្លួននឹងសងសឹកវិញ ប្រសិនបើទ្រព្យសម្បត្តិ ឬប្រាក់ចំណូលរបស់ខ្លួនត្រូវបានដកហូត៕

ប្រទេសវេណេស៊ុយអេឡា បង្កើតរដ្ឋថ្មី ក្នុងដែនដីក្រោមជម្លោះជាមួយប្រទេសហ្គីយ៉ាន

2024/03/22 11:08:39 am        102
Facebook Telegram Linkin
សមាជិកសភាប្រទេសវ៉េណេស៊ុយអេឡា ដែលជាសម្ព័ន្ធមិត្តជាមួយរដ្ឋាភិបាលរបស់ប្រធានាធិបតី លោក នីកូឡាស់ ម៉ាឌូរ៉ូ កាលពីថ្ងៃព្រហស្បតិ៍ បានអនុម័តការបង្កើតរដ្ឋថ្មីមួយនៅក្នុងដែនដី ជាគោលដៅនៃជម្លោះជាយូរមកហើយជាមួយប្រទេសជិតខាងហ្គីយ៉ាន ទោះបីជាសំណុំរឿងតុលាការអន្តរជាតិ កំពុងនៅបន្តក៏ដោយ។ ការអនុម័តនេះ គឺស្របតាមវោហាសាស្ត្រថ្មីៗរបស់លោក Maduro អំពីសិទ្ធិរបស់ប្រទេសលោក ក្នុងការគ្រប់គ្រងតំបន់អេសេហ្គីបូ(Esequibo) មានទំហំ ១៦០.០០០ គីឡូម៉ែត្រក្រឡា ប៉ុន្តែនឹងពុំមានផលប៉ះពាល់ជាក់ស្តែងភ្លាមៗនៅឡើយនោះទេ។តុលាការយុត្តិធម៌អន្តរជាតិ (ICJ) នឹងត្រូវសម្រេចថាតើប្រទេសណាមួយ ជាកម្មសិទ្ធិដែនដីនេះ ប៉ុន្តែ រដ្ឋាភិបាលប្រទេសវេណេស៊ុយអេឡា បាននិយាយថា ខ្លួនមិនទទួលស្គាល់តុលាការយុត្តិធម៌អន្តរជាតិ (ICJ)នោះទេ ហើយការធ្វើប្រជាមតិកាលពីខែធ្នូដែលគាំទ្រការបង្កើតរដ្ឋថ្មី ស្ថិតក្នុងចំណោមបញ្ហាផ្សេងទៀត ដែលផ្តល់ឱ្យប្រទេសនេះនូវសិទ្ធិគ្រប់គ្រងតំបន់ Esequibo និងអនុញ្ញាតឱ្យរុករកប្រេងនៅទីនោះ។ អាជ្ញាធរបោះឆ្នោតរបស់ប្រទេសវេណេហ្ស៊ុយអេឡា បាននិយាយថា ប្រជាជនវេណេស៊ុយអេឡា ជាង១០លាននាក់ បានបោះឆ្នោតប្រជាមតិកាលពីខែធ្នូ ប៉ុន្តែរហូតមកដល់ពេលនេះពុំទាន់បានបញ្ចេញលទ្ធផលណាមួយនៅឡើយ។ប្រទេសហ្គីយ៉ាន បាននិយាយថា ព្រំដែនរបស់ខ្លួន ពុំមានសម្រាប់កិច្ចពិភាក្សាទេ ហើយប្រទេសនេះ នឹងការពារដែនអធិបតេយ្យភាពរបស់ខ្លួន។ប្រទេសវេណេស៊ុយអេឡា ក្នុងរយៈពេលប៉ុន្មានឆ្នាំចុងក្រោយនេះ បានពិនិត្យឡើងវិញនូវការទាមទាររបស់ខ្លួនចំពោះដែនដី និងតំបន់ឆ្នេរសមុទ្រ បន្ទាប់ពីការរកឃើញអណ្តូងប្រេង និងឧស្ម័នធំៗ និងក្នុងពេលមានភាពចលាចលនយោបាយផ្ទៃក្នុង នៅមុនការបោះឆ្នោត ដែលត្រូវបានរំពឹងទុក នៅឆ្នាំនេះ។

អង្គការសហប្រជាជាតិ អនុម័តសេចក្ដីសម្រេចប្រាជ្ញាសិប្បនិម្មិតសកលជាលើកដំបូង

2024/03/22 11:03:53 am        63
Facebook Telegram Linkin
ក្រុមមន្ត្រីសហរដ្ឋអាមេរិកបាននិយាយថា មហាសន្និបាតអង្គការសហប្រជាជាតិ កាលពីថ្ងៃព្រហស្បតិ៍ (២១ មីនា) បានអនុម័តជាឯកច្ឆ័ន្ទនូវសេចក្ដីសម្រេចសកលជាលើកដំបូង ស្តីពីប្រព័ន្ធបច្ចេកវិទ្យាប្រាជ្ញាសិប្បនិម្មិត AI ដើម្បីលើកទឹកចិត្តដល់ការការពារទិន្នន័យផ្ទាល់ខ្លួន ការត្រួតពិនិត្យ AI សម្រាប់ហានិភ័យ និងការការពារសិទ្ធិមនុស្ស។ក្រុមមន្ត្រីទាំងនោះបាននិយាយថា សេចក្ដីសម្រេចគ្មានចំណងផ្លូវច្បាប់ ដែលស្នើឡើងដោយសហរដ្ឋអាមេរិក និងសហការឧបត្ថម្ភដោយប្រទេសចិន និងប្រទេសចំនួន ១២១ ផ្សេងទៀតនេះ បានចំណាយពេលបីខែដើម្បីចរចា ហើយក៏ជាអ្នកតស៊ូមតិដើម្បីពង្រឹងគោលនយោបាយឯកជនភាពផងដែរ។ឯកអគ្គរដ្ឋទូតសហរដ្ឋអាមេរិក លោកស្រី លីនដា ថូម៉ាស ហ្គ្រីនហ្វីល (Linda Thomas-Greenfield) បាននិយាយបន្ទាប់ពីសេចក្ដីសម្រេចត្រូវបានអនុម័តថា «ថ្ងៃនេះ សមាជិកទាំង ១៩៣ ប្រទេសនៃមហាសន្និបាតអង្គការសហប្រជាជាតិ បានបញ្ចេញសំឡេងតែមួយ ហើយបានរួមគ្នាធ្វើការជ្រើសរើសដើម្បីគ្រប់គ្រងបប្រាជ្ញាសិប្បនិម្មិត AI ជាជាងអនុញ្ញាតឱ្យបច្ចេកវិទ្យានេះគ្រប់គ្រងលើមនុស្ស»។សេចក្ដីសម្រេចនេះគឺជាគំនិតផ្តួចផ្តើមចុងក្រោយបង្អស់ដោយរដ្ឋាភិបាលជុំវិញពិភពលោកដើម្បីកំណត់លើការអភិវឌ្ឍន៍របស់ AI ស្របពេលមានការភ័យខ្លាចថាបច្ចេកវិទ្យានេះអាចត្រូវបានគេប្រើដើម្បីរំខានដល់ដំណើរការប្រជាធិបតេយ្យ ការក្លែងបន្លំ ឬនាំឱ្យមានការបាត់បង់ការងារសម្រាប់មនុស្ស ក្នុងចំណោមគ្រោះថ្នាក់ផ្សេងទៀត៕

ប្រធានក្រុមប្រឹក្សាអឺរ៉ុប៖ ទ្រព្យរុស្ស៊ីដែលត្រូវបានបង្កក យើងប្តេជ្ញាថានឹងចាត់វិធានការឱ្យបានឆាប់

2024/03/22 10:43:01 am        84
Facebook Telegram Linkin
មេដឹកនាំសហភាពអឺរ៉ុប បាននិយាយកាលពីថ្ងៃព្រហស្បតិ៍ថា សហភាពអឺរ៉ុប អាចប្រើប្រាស់ចំណូលការប្រាក់ពីទ្រព្យសម្បត្តិរបស់រុស្ស៊ីដែលត្រូវបានបង្កកដើម្បីជួយអ៊ុយក្រែន ក្នុងរយៈពេលពីរបីខែ ក្រោមផែនការដែលរួមមានការទិញអាវុធសម្រាប់ទីក្រុងគីវ។ មេដឹកនាំប្រទេសជាសមាជិកទាំង ២៧ របស់ប្លុកនេះ បានព្រមព្រៀងគ្នានៅក្នុងកិច្ចប្រជុំកំពូលនៅទីក្រុងប្រ៊ុចសែល ដើម្បីឆ្ពោះទៅមុខជាមួយនឹងការងារលើផែនការ ដែលបានបង្ហាញក្នុងសប្តាហ៍នេះដោយស្ថាប័នប្រតិបត្តិរបស់សហភាពអឺរ៉ុប។ លោក Charles Michel ប្រធានក្រុមប្រឹក្សាអឺរ៉ុប បាននិយាយទៅកាន់អ្នកសារព័ត៌មានថា «យើងប្តេជ្ញាថានឹងមានចំណាត់ការឲ្យបានឆាប់រហ័ស» ។បំណងរបស់មេដឹកនាំសម្រាប់ភាពបន្ទាន់ បង្ហាញពីការបង្កើនការព្រមានអំពីសង្រ្គាមនៅអ៊ុយក្រែន ដោយកងកម្លាំងអ៊ុយក្រែនចង់បានគ្រាប់រំសេវយ៉ាងខ្លាំងសម្រាប់ទីក្រុងគីវ ដែលបានតស៊ូទប់ទល់ជាមួយកងទ័ពរុស្ស៊ី ព្រមទាំងចង់បានកញ្ចប់ជំនួយយោធាចំនួន ៦០ពាន់លានដុល្លារដែលបានជាប់គាំងនៅក្នុងសភាសហរដ្ឋអាមេរិក។ ប្រធានគណៈកម្មការអឺរ៉ុប លោកស្រី Ursula von der Leyen បាននិយាយថា ជំនួយ ១ ពាន់លានអឺរ៉ូដំបូង (១,០៩ ពាន់លានដុល្លារ) ពីផែនការនេះអាចត្រូវបានបញ្ចេញនៅដើមខែ ថ្ងៃទី ១ ខែ កក្កដា។ គណៈកម្មាការ បានស្នើឱ្យផ្ទេរប្រាក់ ៩០ភាគរយ ពីទ្រព្យរបស់រុស្ស៊ីដែលត្រូវបានបង្កក ចូលទៅមូលនិធិ គ្រប់គ្រងដោយសហភាពអឺរ៉ុប ដែលប្រើសម្រាប់ផ្តល់ហិរញ្ញប្បទានអាវុធសម្រាប់ទីក្រុងគីវ។ ១០ភាគរយផ្សេងទៀតនឹងដាក់ចូលទៅក្នុងជំនួយថវិកាសម្រាប់ទីក្រុងគីវ។ គណៈកម្មាការ បានប៉ាន់ប្រមាណថា ប្រាក់លើទ្រព្យសកម្ម មូលបត្រ និងសាច់ប្រាក់របស់ធនាគារកណ្តាលរុស្ស៊ីផ្សេងៗ អាចស្ថិតនៅចន្លោះពី ២,៥ ពាន់លានអឺរ៉ូ (២,៧៣ ពាន់លានដុល្លារ) និង៣ ពាន់លានអឺរ៉ូ ក្នុងមួយឆ្នាំ។លោកស្រី Von der Leyen បាននិយាយថា គណៈកម្មការអឺរ៉ុប បានរៀបចំសំណើរដើម្បីបង្កើនពន្ធលើការនាំចូលគ្រាប់ធញ្ញជាតិ គ្រាប់ពូជ និងផលិតផលជាច្រើនទៀតដែលមកពីរុស្ស៊ី និងប្រទេសបេឡារុស ហើយមានហេតុផលល្អមួយចំនួនសម្រាប់បង្កើតសំណើនេះ។ គោលដៅគឺ ដើម្បីការពារគ្រាប់ធញ្ញជាតិរុស្ស៊ី ពីការធ្វើឲ្យមានអស្ថិរភាពទីផ្សារនៅសហភាពអឺរ៉ុបសម្រាប់ផលិតផលទាំងនេះ។

ជនភៀសខ្លួនអ៊ុយក្រែន និងទាហានដែលរងរបួស កំពុងសង្ឃឹមជំនួយអាមេរិក ខណៈដែលការផ្តល់មូលនិធិនៅជាប់គាំង

2024/03/22 10:03:08 am        73
Facebook Telegram Linkin
ប្រាក់ពន្ធអាមេរិកជាង ១១៣ ពាន់លានដុល្លារ ត្រូវបានបញ្ជូនទៅជួយអ៊ុយក្រែនទប់ទល់នឹងការឈ្លានពានរបស់រុស្ស៊ី។ ប៉ុន្តែជំនួយបន្ថែមចំនួន ៦០ពាន់លានដុល្លារ ត្រូវបានជាប់គាំងនៅក្នុងសភា ហើយមន្ត្រីការពារជាតិ បានព្រមានថា អ៊ុយក្រែនកំពុងអស់ធនធានហើយនោះ។នៅប្រទេសអ៊ុយក្រែន មានការខ្វះខាតទាហាន គ្រាប់រំសេវ និងទំនុកចិត្តថា ជំនួយរបស់លោកខាងលិច នឹងមកដល់ក្នុងពេលឆាប់ៗនេះ។ទាហាននិងជនស៊ីវិលរាប់ម៉ឺននាក់ បានស្លាប់ឬបាត់បង់អវយវៈក្នុងសង្គ្រាម។លោកអូលេកសាន បាហ្ស៊ីលីវីច (Oleksandr Bazilevych) មានវ័យ២៥ឆ្នាំ មាននៅសល់តែដៃស្តាំប៉ុណ្ណោះ។ គ្រាប់បែកដៃរុស្ស៊ី បានផ្ទុះនៅជិតលោកកាលពីខែកញ្ញាឆ្នាំមុន ខណៈដែលលោកកំពុងជួយមិត្ត ដែលរងរបួស ទៅដល់ពេទ្យ។ លោកមិនមានការភ្ញាក់ផ្អើលទេ នៅពេលដែលខ្លួន បានបាត់អវយវៈនោះ។លោកបាហ្ស៊ីលីវីច បាននិយាយថា៖«វាអាចនឹងអាក្រក់ជាងនេះទៅទៀត។ អង្គការផ្សេងទៀត បានប្រាប់លោកថា ពួកគេមិនអាចជួយលោកបាន។ បន្ទាប់មកលោក បានទៅរកជំនួយពីមូលនិធិProtez។លោកវេជ្ជបណ្ឌិត Yakov Gradinar ជនជាតិអាមេរិកដើមកំណើតអ៊ុយក្រែន រស់នៅក្នុងរដ្ឋមីនីសូតា( Minnesota) និងធ្វើការជាអ្នកជំនាញផ្នែកអវៈយវៈសិប្បនិម្មិត នៅពេលដែលសង្រ្គាម បានចាប់ផ្តើមកាលពីពីរឆ្នាំមុន។ លោកវេជ្ជបណ្ឌិត និងដៃគូអាជីវកម្ម និងជានាយកប្រតិបត្តិរបស់ខ្លួនគឺ លោក Yury Aroshidze ឥឡូវនេះ បានបើកគ្លីនិកចំនួន៣ ដោយមួយទៀត នៅតាមផ្លូវក្នុងទីក្រុងគីវ ប្រទេសអ៊ុយក្រែន។

បណ្ដាទីភ្នាក់ងារ UN និងប្រទេស៣៦ទៀត ពិភាក្សាពីមធ្យោបាយផ្ដល់ជំនួយទៅហ្កាហ្សា តាមរយៈកោះស៊ីប

2024/03/22 09:55:39 am        105
Facebook Telegram Linkin
ក្រុមមន្ត្រីមកពីប្រទេសចំនួន៣៦និងបណ្ដាទីភ្នាក់ងារអង្គការសហប្រជាជាតិបានប្រមូលផ្តុំគ្នានៅក្នុងប្រទេសកោះស៊ីបកាលពីថ្ងៃព្រហស្បតិ៍ ២១ មីនា ដើម្បីពិភាក្សាអំពីរបៀបពន្លឿនការផ្តល់ជំនួយដល់ប្រជាជនប៉ាឡេស្ទីស្ថិតក្នុងតំបន់រងការឡោមព័ទ្ធនៅតំបន់ហ្កាហ្សាតាមផ្លូវសមុទ្រដែលបានចាប់ផ្តើមកាលពីសប្តាហ៍មុន។ ការប្រមូលផ្តុំកាលពីថ្ងៃព្រហស្បតិ៍ត្រូវបានចូលរួមដោយលោក ស៊ីគ្រីដ កាក (Sigrid Kaag) អ្នកសម្របសម្រួលជាន់ខ្ពស់ផ្នែកមនុស្សធម៌ និងការកសាងឡើងវិញរបស់អង្គការសហប្រជាជាតិសម្រាប់តំបន់ហ្កាហ្សា ព្រមទាំងលោក ឃើទីស រេដ (Curtis Ried) ប្រធានបុគ្គលិកនៃក្រុមប្រឹក្សាសន្តិសុខជាតិសហរដ្ឋអាមេរិក។ខណៈគ្រោះទុរភិក្សបានកើតមានពេញតំបន់ហ្កាហ្សា បណ្ដាទីភ្នាក់ងារកំពុងស្វែងរកផ្លូវជំនួសកាន់តែច្រើនឡើង ដើម្បីនាំជំនួយចូលទៅក្នុងតំបន់ហ្កាហ្សា ដោយបញ្ចៀសការដឹកជញ្ជួនឆ្លងកាត់ព្រំដែនដីគោក។ ប៉ុន្តែកង្វះហេដ្ឋារចនាសម្ព័ន្ធគឺជាបញ្ហា។អង្គការសប្បុរសធម៌មួយដែលបានបញ្ជូនជំនួយពីប្រទេសស៊ីបកាលពីសប្តាហ៍មុន បានចតចតក្នុងសមុទ្រឆ្ងាយពីគំនរបាក់បែក ស្របពេលសហរដ្ឋអាមេរិកក៏បានប្រកាសពីគម្រោងបង្កើតផែបណ្តែតទឹក ផងដែរ។ នៅក្រោមកិច្ចព្រមព្រៀងដែលធ្វើឡើងជាមួយអ៊ីស្រាអែល ទំនិញអាចឆ្លងកាត់ការត្រួតពិនិត្យសន្តិសុខនៅប្រទេសស៊ីបដោយក្រុមមួយរួមទាំងអ៊ីស្រាអែល ដោយលុបចោលតម្រូវការសម្រាប់ការស៊ើបអង្កេតនៅចំនុចដឹកជញ្ជូនចុងក្រោយរបស់ខ្លួនដើម្បី ឲ្យការដឹកជញ្ជូនជំនួយដំណើរការរលូន ។ នាវាមួយគ្រឿង បានចាកចេញពីប្រទេសស៊ីបកាលពីសប្តាហ៍មុន ហើយបានចែកចាយជំនួយនៅហ្កាហ្សា ខណៈនាវាពីរផ្សេងទៀតត្រូវបានគេរំពឹងថា នឹងចាកចេញនៅប៉ុន្មានថ្ងៃខាងមុខនេះ អាស្រ័យលើលក្ខខណ្ឌអាកាសធាតុ។ រដ្ឋមន្ត្រីការបរទេស កោះស៊ីប (Cyprus) លោក កូស្តានទីណូស កូមបូស (Constantinos Kombos) បាននិយាយថា ការពិភាក្សាផ្តោតលើមធ្យោបាយក្នុងការបង្កើនសមត្ថភាពប្រតិបត្តិការ ទាំងក្នុងលក្ខខណ្ឌនៃការចាកចេញ ទាំងមធ្យោបាយដឹកជញ្ជូន ព្រមទាំងទាក់ទងនឹងការទទួល និងការចែកចាយផងដែរ៕

ប្រធានគណៈកម្មការសម្ព័ន្ធយោធាណាតូ អំពាវនាវឲ្យសម្ព័ន្ធមិត្តផ្ដល់ការគាំទ្រដ៏រឹងមាំលើអ៊ុយក្រែន

2024/03/22 09:51:59 am        127
Facebook Telegram Linkin
លោក រ៉ុប បាវើ(Rob Bauer)ប្រធានគណៈកម្មការសម្ព័ន្ធយោធាណាតូ បាននិយាយអំឡុងធ្វើទស្សនកិច្ចទៅកាន់ទីក្រុងគីវ (Kyiv) កាលពីថ្ងៃព្រហស្បតិ៍ ថា ក្រុមសម្ព័ន្ធមិត្តរបស់អ៊ុយក្រែន មិនគួរមានទុទិដ្ឋិនិយមជ្រុលហួសហេតុអំពីសមត្ថភាពរបស់ខ្លួនដើម្បីបណ្ដេញកងទ័ពរុស្ស៊ីចេញពីអ៊ុយក្រែន ទេ និងអំពាវនាវឲ្យបញ្ជូនជំនួយសំខាន់ៗដល់ប្រទេសនេះឲ្យបានឆាប់។ លោកបាវើ បានដឹកនាំដំណើរទស្សនកិច្ចផ្លូវការនៃគណៈប្រតិភូយោធាសម្ព័ន្ធណាតូ លើកដំបូង ទៅកាន់ទីក្រុងគីវ ចាប់តាំងពីខែកុម្ភៈឆ្នាំ២០២២មក នៅពេលដែលរុស្ស៊ី បានបញ្ជូនកងទ័ពរាប់ពាន់នាក់ចូលវាយលុកក្នុងប្រទេសអ៊ុយក្រែន។ កងទ័ពរបស់ទីក្រុងគីវ កំពុងប្រឈមការខ្វះខាតគ្រាប់កាំភ្លើងធំ និងកម្លាំងទ័ព ព្រមទាំងកំពុងជួបឧបសគ្គ នៅភាគខាងកើត ជាទីដែលកងកម្លាំងរុស្ស៊ីកំពុងរុលទៅមុខ។ លោកបានប្រាប់វេទិកាសន្តិសុខក្រុងគីវ ថា អ៊ុយក្រែន ត្រូវការការគាំទ្របន្ថែមទៀត ។ដូចអ្នកដឹងស្រាប់ហើយនៅពេលនេះ ។ ពេលវេលានៅក្នុងប្រទេសអ៊ុយក្រែន មិនអាចវាស់ស្ទង់ដឹងទេក្នុងពេលប៉ុន្មានថ្ងៃ ប៉ុន្មានសប្ដាហ៍ ឬប៉ុន្មានខែខាងមុខ។ លោកប្រធានាធិបតីអ៊ុយក្រែន Volodymyr Zelenskiy បានសរសេរនៅលើគេហទំព័ររបស់លោកថា លោកបានគូសបញ្ជាក់ដល់លោក បាវើ រួចហើយ ថា តម្រូវការចាំបាច់បំផុតរបស់អ៊ុយក្រែន នៅពេលនេះ គឺអាវុធ គ្រាប់រំសេវ និងយានដ្រូន៕

រុស្ស៊ីចាប់ផ្តើមផលិតគ្រាប់បែកទម្លាក់ពីលើអាកាស FAB-3000 និងបង្កើនការផលិតគ្រាប់កាំភ្លើងធំ

2024/03/22 09:11:43 am        164
Facebook Telegram Linkin
ក្រសួងការពារជាតិរុស្ស៊ី បាននិយាយកាលពីថ្ងៃព្រហស្បតិ៍ទី ២១ ខែមីនាថា រុស្ស៊ីបានចាប់ផ្តើមផលិតគ្រាប់បែកទម្លាក់ពីលើអាកាសមានកម្លាំងផ្ទុះខ្លាំង FAB-3000 ចាប់តាំងពីខែកុម្ភៈឆ្នាំនេះ។រដ្ឋមន្ត្រីក្រសួងការពារជាតិលោក Sergei Shoigu បានពិនិត្យរោងចក្រឧស្សាហកម្មការពារជាតិ នៅក្នុងតំបន់ នីស្នី នូវហ្ករ៉ូដ(Nizhny Novgorod) ដែលផលិតគ្រាប់បែក FAB-3000 និងប្រភេទគ្រាប់រំសេវផ្សេងទៀត រួមទាំងគ្រាប់កាំភ្លើងធំផងដែរ។លោក Shoigu បាននិយាយថា ការផលិតគ្រាប់រំសេវសម្រាប់កាំភ្លើងធំ បានកើនឡើងជិត ២២ ដង។ លោកនិយាយថា នេះធានាបាននូវការបញ្ជូនចំនួនគ្រាប់រំសេវគ្រប់គ្រាន់ទៅកាន់តំបន់នៃ «ប្រតិបត្តិការសឹកពិសេសនៅអ៊ុយក្រែន។កាលពីព្រឹកថ្ងៃព្រហស្បតិ៍ រុស្ស៊ី បានវាយប្រហារដោយមីស៊ីល ទៅលើទីក្រុងគីវ រដ្ឋធានីរបស់អ៊ុយក្រែន បណ្តាលឲ្យមនុស្ស១០នាក់រងរបួស និងបានបំផ្លាញអគារលំនៅឋានជាច្រើនខ្នង និងអគារឧស្សាហកម្មជាច្រើនកន្លែង ទោះបីជាប្រព័ន្ធការពារដែនអាកាសរបស់អ៊ុយក្រែន បានបាញ់ទម្លាក់មីស៊ីលទាំងអស់ក៏ដោយ។ ការវាយប្រហារទ្រង់ទ្រាយធំដំបូងក្នុងរយៈពេលប៉ុន្មានសប្តាហ៍ថ្មីៗនេះ បានដាក់គោលដៅលើទីក្រុងគីវ ទាំងមីស៊ីលបាលីស្ទីក និងមីស៊ីលតម្រង់គោលដៅ។

អាជ្ញាធរខេត្តព្រះវិហារ ចុះផ្សព្វផ្សាយបញ្ជ្រាបការយល់ដឹងអំពីសុវត្ថិភាពចរាចរណ៍ ផ្លូវគោក និងចែកមួកសុវត្ថិភាពដល់យុវសិស្សនៅអនុវិទ្យាល័យហ្មសែត

2024/03/21 10:13:05 pm        207
Facebook Telegram Linkin
នាព្រឹកថ្ងៃទី២១ ខែមីនា ឆ្នាំ២០២៤នេះ មន្ទីរសាធារណការ និងដឹកជញ្ជូនខេត្តព្រះវិហារ បានសហការជាមួយនាយកដ្ឋានសុវត្ថិភាពចរាចរណ៍ផ្លូវគោក នៃក្រសួងសាធារណការ និងដឹកជញ្ជូន រៀបចំកម្មវិធីអប់រំផ្សព្វផ្សាយ បញ្ជ្រាបការយល់ដឹង អំពីសុវត្ថិភាពចរាចរណ៍ផ្លូវគោក ដល់ សិស្សានុសិស្ស និងកុមារ នៅអនុវិទ្យាល័យហ្មសែត ស្ថិតក្នុងភូមិសាស្ដ្រភូមិហ្មសែត សង្កាត់ប៉ាល ហាល ក្រុងព្រះវិហារ ខេត្តព្រះវិហារ ។ពិធីធ្វើឡើងក្រោមអធិបតីភាពលោក អ៊ុក គឹមសាន អភិបាលរងខេត្ត ព្រះវិហារ ដោយមានការអញ្ជើញចូលរួមពីសំណាក់លោក ព្រំ វន្ថា ប្រធាននាយកដ្ឋានសុវត្ថិភាព ចរាចរណ៍ផ្លូវគោក នៃក្រសួងសាធារណការ និងដឹកជញ្ជូន លោក សំ លាងទ្រី ប្រធានមន្ទីរ សាធារណការ និងដឹកជញ្ជូនខេត្តព្រះវិហារ ព្រមទាំងថ្នាក់ដឹកនាំ មន្ត្រីរាជការ កងកម្លាំងទាំង៣ លោកគ្រូ អ្នកគ្រូ សិស្សានុសិស្ស និងប្អូនៗកុមារជាច្រើនរូបទៀត។លោក សំ លាងទ្រី បានថ្លែងថា កម្មវិធីអប់រំ ផ្សព្វផ្សាយសុវត្ថិភាពចរាចរណ៍ផ្លូវគោកដែល បានរៀបចំនាពេលនេះ ធ្វើឡើងក្នុងគោលបំណងដើម្បីចូលរួមបង្កើនស្មារតីយកចិត្តទុកដាក់ ទប់ស្កាត់ឱ្យបាននូវគ្រោះថ្នាក់ចរាចរណ៍ ដែលបង្ករឱ្យមានការបាត់បង់នូវអាយុជីវិតមនុស្ស និងទ្រព្យ សម្បត្តិរដ្ឋ និងឯកជនយ៉ាងច្រើន ជាពិសេសគ្រោះថ្នាក់ចរាចរណ៍ ដែលបង្ករឡើងទៅលើកុមារ ហើយក៏ជាការពញ្ញាក់ស្មារតី ដល់អ្នកប្រើប្រាស់ផ្លូវថ្នល់ឱ្យបង្កើនការយកចិត្តទុកដាក់ខ្ពស់ អំពី សុវត្ថិភាពចរាចរណ៍តាមដងផ្លូវសាធារណៈ។ លោកបានបន្ដថា បញ្ហាដែលបង្ករឱ្យមានគ្រោះ ថ្នាក់ចរាចរណ៍ កើតឡើងដោយកត្តា៣ធំៗរួមមាន៖ ទី១.កត្តាមនុស្ស គឺការយល់ដឹងអំពីច្បាប់ ផ្លូវគោកនៅមានកម្រិត, ទី២.កត្តាយានជំនិះ ដោយម្ចាស់យានជំនិះទាំងនោះមិនបានថែទាំ ត្រួត ពិនិត្យលក្ខណៈបច្ចេកទេស តាមពេលកំណត់, ទី៣.កត្តាផ្លូវ ដូចជាផ្លូវរអិល ផ្លូវកោង ផ្លូវធំតែ មានស្ពានតូចចង្អៀត និងពុំបានបំពាក់ផ្លាកសញ្ញាចរាចរណ៍ឱ្យបានគ្រប់គ្រាន់នៅលើដងផ្លូវសាធារណៈមួយចំនួនផងដែរ។ថ្លែងក្នុងឱកាសនោះ លោក អ៊ុក គឹមសាន អភិបាលរងខេត្តព្រះវិហារ បានអំពាវនាវដល់ អ្នកបើកយានយន្ដគ្រប់ប្រភេទ ត្រូវគោរពច្បាប់ស្ដីពីចរាចរណ៍ផ្លូវគោក មានសុជីវធម៌ល្អ និងចេះ អធ្យាស្រ័យគ្នាក្នុងពេលបើកបរ សូមបំពាក់ខ្សែក្រវ៉ាត់សុវត្ថិភាពនៅពេលបើកបរយានយន្ដ និងពាក់ មួកសុវត្ថិភាពនៅពេលបើកបរទោចក្រយានយន្ដ ឱ្យបានត្រឹមត្រូវទាំងអស់គ្នាក្នុងពេលធ្វើដំណើរទាំងអ្នកបើកបរ និងអ្នករួមដំណើរជាដើម។សូមបញ្ជាក់ជូនថា ក្នុងពិធីនេះដែរ ក៏មានការចែកមួកសុវត្ថិភាព ជូនដល់ប្អូនៗ ជាយុវជន ចំនួន៥០មួក ប្អូនៗកុមារចំនួន១០០មួក។ បន្ថែមពីនេះ លោកប្រធាននាយកដ្ឋានសុវត្ថិភាព ចរាចរណ៍ផ្លូវគោក ក៏បានឧបត្ថម្ភមួកសុវត្ថិភាពចំនួន៣០មួក ដល់សាលាបឋមសិក្សាហ្មសែត និងជូនអ្នកគ្រូៗ សាលាបឋមសិក្សាហ្មសែតចំនួន ១៩មួកថែមទៀតផង៕

បណ្ដាញសង្គម

ព័ត៌មានថ្មីៗ

ក្រសួងអភិវឌ្ឍន៍ជនបទផ្តល់សម្ភារៈអនាម័យ និងបង្គន់អនាម័យ១៦បន្ទប់​នៅទីតាំង​ជម្លៀសជនភៀសសឹក​មកពីថ្មដា
07/29/2025 01:07 PM
Facebook Telegram Linkin
ឯកឧត្តមរដ្ឋមន្ត្រី ឌិត ទីណា បន្តសួរសុខទុក្ខពុកម៉ែបងប្អូនភៀសសឹកនៅស្រុកភ្នំស្រុក ខេត្តបន្ទាយមានជ័យ
07/29/2025 01:07 PM
Facebook Telegram Linkin
ប្រទេសបារាំងវាយតម្លៃខ្ពស់ចំពោះការប្រកាសពីបទឈប់បាញ់ដែលចូលជាធរមានរវាងកម្ពុជា និងថៃ
07/29/2025 01:07 PM
Facebook Telegram Linkin
ទីក្រុងប៉េកាំង រក្សាសម្ពាធលើការនាំចេញរ៉ែកម្រលើសហរដ្ឋអាមេរិក
07/29/2025 12:07 PM
Facebook Telegram Linkin
ប្រមុខការពារជាតិកម្ពុជាទូរស័ព្ទទៅមេការពារជាតិស្តីទីថៃ ពិភាក្សាគ្នាលើបញ្ហាមួយចំនួន​ដែល​បាន​​កើតឡើង អំឡុងពេលអនុវត្តបទឈប់បាញ់
07/29/2025 12:07 PM
Facebook Telegram Linkin
ប្រមុខការពារជាតិអ៊ីស្រាអែល ព្រមានជាថ្មីថានឹងតាមកម្ទេចក្រុមហាម៉ាស ប្រសិនបើមិនដោះលែងចំណាប់ថ្នូរ
07/29/2025 12:07 PM
Facebook Telegram Linkin
ក្តីសង្ឃឹមសន្តិភាពអ៊ុយក្រែន នៅតែស្រពេចស្រពិល ខណៈលោក Trump បង្ខំលោក Putin ធ្វើបទឈប់បាញ់
07/29/2025 12:07 PM
Facebook Telegram Linkin
ក្រុមពន្លត់អគ្គិភ័យ រាប់រយនាក់បន្តប្រឹងប្រែងទប់ស្កាត់ចំហេះព្រៃធំៗនៅប្រទេសទួរគី ក្រិក អាល់បានី និងប៊ុលហ្គារី
07/29/2025 12:07 PM
Facebook Telegram Linkin
កូរ៉េខាងត្បូង នឹងកំណត់គោលដៅលើកិច្ចព្រមព្រៀងពាណិជ្ជកម្មអាមេរិកដែលមានអត្ថប្រយោជន៍ទៅវិញទៅមក
07/29/2025 12:07 PM
Facebook Telegram Linkin
ប្រមុខអង្គការសហប្រជាជាតិ ស្វាគមន៍កិច្ចព្រមព្រៀងឈប់បាញ់រវាងកម្ពុជា និងថៃ
07/29/2025 12:07 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.