នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
TOP STORY | សម្ដេចធិបតី បានចាត់វិធានការចាំបាច់​ជាបន្ត​បន្ទា​ប់ចំ​ពោះកា​រ​វិល​ត្រឡប់​ទ្រង់ទ្រាយ​ធំរ​បស់​ពលករ​ខ្មែរ និងជនភៀសសឹក
TOP STORY | សម្ដេចតេជោ៖ ពេលនេះ ខ្ញុំកំពុងតែរួមចំណែកបញ្ជាទ័ព តាមប្រព័ន្ធវីដេអូ និងប្រព័ន្ធផ្សេងទៀតជាមួយនាយករដ្ឋមន្ត្រី, រដ្ឋមន្ត្រីក្រសួងការពារជាតិ អគ្គមេបញ្ជាការកងទ័ព និងបញ្ជាការកងកម្លាំងប្រដាប់អាវុធគ្រប់លំដាប់ថ្នាក់
TOP STORY |សម្ដេចធិបតី ហ៊ុន ម៉ាណែត ដាក់លិខិតស្នើសុំ​​កោះប្រជុំក្រុមប្រឹក្សាសន្តិសុខជាបន្ទាន់ ដើម្បី​សុំ​ការ​អន្ត​រាគមន៍​បញ្ចប់​ការ​ឈ្លាន​ពាន​របស់​កង​ទ័ព​ថៃមក​លើដែនអធិបតេយ្យភាពរបស់កម្ពុជា
TOP STORY | សម្ដេចធិបតី៖ កងទ័ពថៃបានបើកការ​វាយប្រហារ​មក​លើ​ទីតាំង​ឈរ​ជើង​របស់​កង​ទ័ព​កម្ពុជា​ នៅប្រាសាទតាមាន់ធំ តាក្របី និងបានពង្រីកភូមិសាស្ត្រវាយប្រហារទៅដល់តំបន់មុំបី

នយោបាយ​ និង ការអភិវឌ្ឍន៍

ក្រុមវេជ្ជបណ្ឌិតកេនយ៉ា ចាប់ផ្ដើមកូដកម្មទូទាំងប្រទេស ជំរុញឲ្យរដ្ឋាភិបាលបញ្ជូលឈ្មោះពេទ្យហាត់ការជាពេទ្យពេញសិទ្ធិ

2024/03/15 01:44:32 pm        84
Facebook Telegram Linkin
ក្រុមវេជ្ជបណ្ឌិតក្នុងប្រទេសកេនយ៉ា បានចាប់ផ្ដើមកូដកម្មទូទាំងប្រទេសកាលពីថ្ងៃព្រហស្បតិ៍ទី១៤មីនាសប្ដាហ៍នេះ ដោយចោទប្រកាន់រដ្ឋាភិបាលថាបានបរាជ័យក្នុងការដោះស្រាយទុក្ខលំបាករបស់ពួកគេ រួមទាំងការអំពាវនាវឲ្យបង្កើន និងបញ្ចូលឈ្មោះពេញសិទ្ធិសម្រាប់បុគ្គិលពេទ្យកម្មសិក្សាឬហាត់ការជាង៤ពាន់នាក់។ កូដកម្មនេះ បានប៉ះពាល់ដល់សេវាវេជ្ជសាស្ត្រ នៅមន្ទីរពេទ្យនានាទូទាំងប្រទេសនៅអាហ្វ្រិកខាងកើតមួយនេះ ខណៈអ្នកជំងឺជាច្រើន មិនត្រូវបានទទួលបានការយកចិត្តទុកដាក់។ តំបន់រងផលប៉ះពាល់ជាច្រើនដោយសារកូដកម្មនេះ រួមមាន តំបន់ ណាគូរូ(Nakuru)តំបន់ក្វាឡេ ( Kwale)តំបន់គីលីហ្វី(Kilifi) តំបន់ មីហ្កូរី (Migori) និងតំបន់ម៉ុមបាសា (Mombasa)។ អគ្គលេខាធិការនៃគ្រូរពេទ្យជំនាញវេជ្ជសាស្ត្រ និងសហជីពពេទ្យធ្មេញ(KMPDU) លោក ដាវជី អាតេឡា (Davji Atellah) បាននិយាយថា ពួកគេបានប្រឆាំងទៅនឹងចំណាត់ការឧស្សាហកម្ម បន្ទាប់ពីការចរចាជាមួយរដ្ឋាភិបាលបានបរាជ័យ។ លោកបានបញ្ជាក់កាលពីថ្ងៃពុធថា ការជូនដំណឹងអំពីកូដកម្មរបស់យើងរយៈពេលថ្ងៃនិងសកម្មភាពឧស្សាហកម្មរបស់យើង នឹងចាប់ផ្ដើមហើយ។ កាលពីថ្ងៃពុធ តុលាការទំនាក់ទំនងការងារនិងជួល បានបញ្ឈប់កូដកម្មនោះ និងបានស្នើឲ្យភាគីពាក់ព័ន្ធទាំងអស់ចូលរួមការចរចាដើម្បីដោះស្រាយក្ដីកង្វល់ទាំងនេះ។លោកពីទ័រ ជីរូ (Peter Njiru) ជាអ្នកជំងឺម្នាក់មកពីតំបន់ណាគូរូ ចម្ងាយ១៦០គីឡូម៉ែត្រភាគខាងជើងរដ្ឋធានីណៃរ៉ូប៊ី (Nairobi) បាននិយាយថាយើងឈឺចាប់ណាស់។ខ្ញុំនៅទីនេះច្រើនម៉ោងហើយគ្មានគ្រូពេទ្យណាមកមើលខ្ញុំទេ ។រដ្ឋាភិបាលគួរតែដោះស្រាយវិបត្តិនេះឲ្យបានឆាប់ៗ៕

រដ្ឋមន្ត្រីការពារជាតិជប៉ុននិយាយថា ការហោះហើរយន្តហោះOsprey គឺឲ្យស៊ាំទៅនឹងស្ថានភាពបើកបរ

2024/03/15 01:41:17 pm        94
Facebook Telegram Linkin
រដ្ឋមន្ត្រីក្រសួងការពារជាតិជប៉ុន លោក Kihara Minoru និយាយថា កងកម្លាំងសហរដ្ឋអាមេរិក ក្នុងប្រទេសជប៉ុន កំពុងធ្វើការហោះហើរជាមូលដ្ឋាននៃយន្តហោះដឹកជញ្ជូន Osprey ដើម្បីជួយក្រុមយានិកឱ្យស៊ាំទៅនឹងកម្រិតជំនាញរបស់ពួកគេ។លោក Kihara បាននិយាយទៅកាន់អ្នកសារព័ត៌មាន នៅថ្ងៃសុក្រនេះ មួយថ្ងៃបន្ទាប់ពីជើងហោះហើររបស់យន្តហោះ tilt-rotor បានដំណើរការឡើងវិញនៅស្ថានីយ៍អាកាស Futenma របស់កងម៉ារីនសហរដ្ឋអាមេរិកនៅក្នុងខេត្តភាគនិរតីនៃកោះ Okinawa របស់ប្រទេសជប៉ុន។យន្តហោះនេះត្រូវបានត្រូវបានគេចតចោលបន្ទាប់ពីបានធ្លាក់នៅក្នុងខេត្ត Kagoshima ភាគនិរតីប្រទេសជប៉ុន កាលពីខែវិច្ឆិកា។ បុគ្គលិកយោធាសហរដ្ឋអាមេរិកទាំងប្រាំបីនាក់ នៅលើយន្តហោះបានស្លាប់។លោក Kihara បាននិយាយថា យន្តហោះកំពុងធ្វើការហោះហើរជាមូលដ្ឋាន បន្ទាប់ពីមានការថែទាំ និងការបណ្តុះបណ្តាលសមាជិកយានិកក្នុងគោលបំណងការពារឧបទ្ទវហេតុនៅពេលអនាគត។ លោកនិយាយថា លោក និងរដ្ឋមន្ត្រីការពារជាតិសហរដ្ឋអាមេរិក លោក Lloyd Austin បានបញ្ជាក់ជាថ្មីនៅក្នុងការសន្ទនាតាមទូរស័ព្ទថា ការធានាបានសុវត្ថិភាពនៃការហោះហើរ គឺជាអាទិភាពកំពូលសម្រាប់ទាំងប្រទេសជប៉ុន និងសហរដ្ឋអាមេរិក។ លោក Kihara បានសន្យាថា ប្រទេសទាំងពីរនឹងបន្តធ្វើការយ៉ាងជិតស្និទ្ធជាមួយគ្នា និងចាត់វិធានការសុវត្ថិភាពចាំបាច់ទាំងអស់។

មេដឹកនាំប៉ាឡេស្ទីន តែងតាំងទីប្រឹក្សាសេដ្ឋកិច្ចដ៏យូរឆ្នាំជានាយករដ្ឋមន្ត្រី បន្ទាប់ពីការអំពាវនាវឲ្យមានកំណែទម្រង់

2024/03/15 01:33:13 pm        94
Facebook Telegram Linkin
ប្រធានប៉ាឡេស្ទីនលោក ម៉ាខ្មូដ អាបាស (Mahmoud Abbas) បានតែងតាំងទីប្រឹក្សាសេដ្ឋកិច្ចដ៏យូរឆ្នាំរបស់ខ្លួនធ្វើជានាយករដ្ឋមន្ត្រីបន្ទាប់ ដើម្បីទប់ទល់នឹងសម្ពាធរបស់សហរដ្ឋអាមេរិក ឲ្យធ្វើការទម្រង់អាជ្ញាធរប៉ាឡេស្ទីន ដែលជាផ្នែកនៃចក្ខុវិស័យក្រោយសង្គ្រាមរបស់ទីក្រុងវ៉ាស៊ីនតោនសម្រាប់តំបន់ហ្កាហ្សា។លោក ម៉ូហាម៉េដ មូស្តាហ្វា (Mohammad Mustafa) ជាសេដ្ឋវិទូដែលបានសិក្សានៅសហរដ្ឋអាមេរិក និងជាអ្នកឯករាជ្យផ្នែកនយោបាយ នឹងដឹកនាំរដ្ឋាភិបាលវិទ្យាសាស្ត្រនិងបច្ចេកទេសមួយ នៅក្នុងតំបន់វេសបែង (West Bank) ដែលអាចគ្រប់គ្រងតំបន់ហ្កាហ្សាយ៉ាងសំខាន់ មុនពេលក្លាយជារដ្ឋនៅពេលណាមួយ។ ប៉ុន្តែផែនការទាំងនោះ ប្រឈមមុខនឹងឧបសគ្គធំៗ រួមទាំងការប្រឆាំងយ៉ាងខ្លាំងពីនាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) និងសង្រ្គាមអ៊ីស្រាអែល និងក្រុមហាម៉ាសដែលនៅតែកំពុងបន្តអូសបន្លាយដោយគ្មានទីបញ្ចប់។វាពុំច្បាស់ទេថាតើការតែងតាំងគណៈរដ្ឋមន្ត្រីថ្មីដែលដឹកនាំដោយសម្ព័ន្ធមិត្តជិតស្និទ្ធរបស់លោក អាបាស នឹងគ្រប់គ្រាន់ ដើម្បីឆ្លើយតបនឹងការទាមទាររបស់សហរដ្ឋអាមេរិកសម្រាប់កំណែទម្រង់ដែរឬទេ ខណៈដែលប្រធានអាជ្ញាធរមានវ័យ៨៨ឆ្នាំរូបនេះ នឹងនៅតែគ្រប់គ្រងរួមដដែល។លោក ហានី អាល់ ម៉ាស្រ៊ី (Hani al-Masri) អ្នកវិភាគនយោបាយប៉ាឡេស្ទីន បាននិយាយថា៖«ការផ្លាស់ប្តូរដែលសហរដ្ឋអាមេរិក និងបណ្តាប្រទេសក្នុងតំបន់ចង់បាន មិនមែនជាការផ្លាស់ប្តូរដែលពលរដ្ឋប៉ាឡេស្ទីន ចង់បាននោះទេ»។ «ប្រជាជនចង់បានការផ្លាស់ប្តូរនយោបាយពិតប្រាកដ មិនមែនការផ្លាស់ប្តូរឈ្មោះទេ...ពួកគេចង់ បានការបោះឆ្នោត»។លោកបាននិយាយថា លោកមូស្តាហ្វា គឺជា «បុរសដែលមានការគោរព និងមានចំណេះដឹង ប៉ុន្តែនឹងតស៊ូក្នុងការបំពេញតាមការទាមទាររបស់សាធារណៈជន ដើម្បីកែលម្អស្ថានភាពនានា នៅក្នុងតំបន់វេសបែង ជាទីដែលការរឹតបន្តឹងរបស់អ៊ីស្រាអែល បានដាក់ ចាប់តាំងពីការចាប់ផ្តើមនៃសង្រ្គាមបានបណ្តាលឲ្យមានវិបត្តិសេដ្ឋកិច្ចកើតឡើង។

សភាអ៊ឺរ៉ុប៖រុស្ស៊ីគួរតែប្រគល់មាសរបស់រ៉ូម៉ានីដែលផ្ញើទៅទីក្រុងមូស្គូក្នុងកំឡុងសង្គ្រាមលោកលើកទី១ឲ្យប្រទេសនេះវិញ

2024/03/15 01:18:21 pm        212
Facebook Telegram Linkin
សមាជិកសភារ៉ូម៉ានីម្នាក់ បាននិយាយថា សមាជិកសភាក្នុងសភាអឺរ៉ុបកាលពីថ្ងៃព្រហស្បតិ៍ បានអនុម័តសេចក្តីសម្រេចដែលមិនជាប់កាតព្វកិច្ច ដោយបញ្ជាក់ថា រុស្ស៊ីគួរតែប្រគល់មាស និងវត្ថុបេតិកភណ្ឌដ៏មានតម្លៃផ្សេងទៀតដែលត្រូវបានបញ្ជូនទៅទីក្រុងមូស្គូក្នុងអំឡុងសង្គ្រាមលោកលើកទី១ ឲ្យទៅប្រទេសរ៉ូម៉ានី ដើម្បីរក្សាសុវត្ថិភាព។ក្នុងអំឡុងសង្គ្រាមលោកលើកទី១ ព្រះរាជាណាចក្ររ៉ូម៉ានី បានបញ្ជូនកាក់មាសចំនួន ៩១.៥តោនតាមផ្លូវដែកទៅកាន់ទីក្រុងមូស្គូ រួមជាមួយនឹងគ្រឿងអលង្ការ និងសម្បត្តិវប្បធម៌ដូចជាស្នាដៃសិល្បៈជាដើម។ នៅក្នុងសង្រ្គាម រូម៉ានីបានចូលភាគីជាមួយរុស្ស៊ី អង់គ្លេស និងបារាំង ប្រឆាំងនឹងអាល្លឺម៉ង់ ចក្រភពអូទ្រីស-ហុងគ្រី និងចក្រភពអូតូម៉ង់។មាសទាំងនោះ ត្រូវបានរឹបអូស បន្ទាប់ពីក្រុមឆ្លេងនិយម បានដណ្តើមអំណាច នៅក្នុងប្រទេសរុស្ស៊ីក្នុងឆ្នាំ ១៩១៧។ ប៉ុន្មានឆ្នាំក្រោយមក កិច្ចខិតខំប្រឹងប្រែងរបស់រ៉ូម៉ានី ដើម្បីយកមាសមកវិញ គឺគ្មានប្រសិទ្ធ ភាព។ វត្ថុវប្បធម៌មួយចំនួន ត្រូវបានប្រគល់មកវិញដោយអាជ្ញាធរសូវៀតក្នុងឆ្នាំ ១៩៣៥ និង ១៩៥៦ ប៉ុន្តែមិនមែនមាសទេ។នៅឆ្នាំ២០០៣ គណៈកម្មការចម្រុះមួយ ត្រូវបានបង្កើតឡើងរវាងរ៉ូម៉ានី និងរុស្ស៊ី ដើម្បីកែលម្អទំនាក់ទំនងទ្វេភាគី ហើយក៏ធ្វើការលើបញ្ហាមាសផងដែរ។កាលពីថ្ងៃព្រហស្បតិ៍ សភាអឺរ៉ុប បានអនុម័តសេចក្តីសម្រេចនេះ ដែលស្នើឡើងដោយសមាជិកសភារ៉ូម៉ានី លោក អឺហ្គែន ថូម៉ាក (Eugen Tomac) ដែលមានការគាំទ្រពីធនាគារជាតិនៃរូម៉ានី ដោយកំណត់ថា ទីក្រុងមូស្គូ គួរតែប្រគល់មាសនោះមកវិញ។លោកថូម៉ាក បានសាទរការបោះឆ្នោតនេះថា ជាការបោះឆ្នោតជាប្រវត្តិសាស្ត្រ និងជារឿងសេចក្តីថ្លៃថ្នូររបស់ជាតិ ក្នុងការបង្ហោះនៅលើFacebook។ លោកបាននិយាយថា៖«ប្រទេសរ៉ូម៉ានី មិនអាចទទួលយកអ្វីដែលមិនតិចជាងការប្រគល់មាសចំនួន ៩១.៥ តោន និងសម្បត្តិវប្បធម៌ទាំងអស់មកវិញ។

ជប៉ុន ផ្អាកការបញ្ចេញសំណល់ទឹកពីរោងចក្រហ្វ៊ូគូស៊ីម៉ា ក្រោយការរញ្ជួយដី ជាការប្រុងប្រយ័ត្នជាមុន

2024/03/15 01:14:43 pm        92
Facebook Telegram Linkin
ប្រតិបត្តិករបាននិយាយ ខណៈបញ្ជាក់ថាវិធានការនេះ ជាការប្រុងប្រយ័ត្នជាមុន ថា ការបញ្ចេញសំណល់ទឹកចេញពីរោងចក្រថាមពលនុយក្លេអ៊ែរហ្វ៊ូគូស៊ីម៉ា ដ៏ចម្រូងចម្រាសរបស់ប្រទេសជប៉ុន ត្រូវបានពន្យាពេលនៅថ្ងៃសុក្រទី១៥ខែមីនាសប្ដាហ៍នេះ ក្រោយការរញ្ជួយដី។ទីភ្នាក់ងារឧតុនិយមជប៉ុននិយាយថា នៅម៉ោង១២និង១៤នាទីព្រឹកថ្ងៃសុក្រសប្ដាហ៍នេះ ការរញ្ជួយកម្រិត៥,៨រ៉ិចទ័រ បានអង្រួនតំបន់ឆ្នេរភាគឦសានតំបន់រោងចក្រហ្វ៊ូគូស៊ីម៉ា ដែលរងការផ្លិចបំផ្លាញដោយរលកយក្សស៊ូណាមិឆ្នាំ២០១១ ។ ក្រុមហ៊ុនថាមពលអគ្គិសនីតូក្យូ (TEPCO) បាននិយាយនៅលើបណ្ដាញសង្គម X ដោយសំដៅដល់ដំណើរការបញ្ចេញសំណល់ទឹកមានសារធាតុនុយក្លេអ៊ែរថា យើងធ្លាប់បានបញ្ជាក់ហើយថា ពុំមានការខុសពីធម្មតាអ្វីទេ លើការបញ្ចេញសំណល់ទឹកដែលបានធ្វើប្រព្រឹត្តិកម្ម ឬពង្រាវ រួច។ ប៉ុន្តែផ្អែកលើសុវត្ថិភាព យើងបានផ្អាកប្រតិបត្តិការនៅទីតាំងនានាស្របតាមនិតិវិធីប្រតិបត្តិការបង្កាrជាមុន ។ អាជ្ញាធរនិយ័តករជប៉ុន ក៏បាននិយាយផងដែរភ្លាមៗបន្ទាប់ពីរញ្ជួយដីថា គ្មានភាពខុសប្រក្រតីណាមួយត្រូវបានរកឃើញនៅរោងចក្រហ្វ៊ូគូស៊ីម៉ា ដៃអ៊ីឈិ ឬរោងចក្រថាមពលហ្វ៊ូគូស៊ីម៉ា ដៃនី របស់ខ្លួននោះទេ។ ក្រុមហ៊ុន TEPCO បានចាប់ផ្ដើមការបញ្ចេញសំណល់ទឹកមានសារធាតុវិទ្យសកម្មចូលទៅក្នុងមហាសមុទ្រប៉ាស៊ីហ្វិក កាលពីខែសីហា ឆ្នាំមុន៕

សម្ដេចធិបតី៖ ៦ខែនេះ រាជរដ្ឋាភិបាលបានដាក់ចេញគោលនយោបាយអាទិភាពចំនួន៦ ប្រកបដោយសមិទ្ធផល

2024/03/15 12:58:14 pm        163
Facebook Telegram Linkin
ក្នុងឱកាសអញ្ជើញជាអធិបតីដឹកនាំកិច្ចប្រជុំពេញអង្គគណៈរដ្ឋមន្រ្តី នៅព្រឹកថ្ងៃទី១៥ ខែមីនា ឆ្នាំ២០២៤ នៅវិមានសន្តិភាព សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា បានលើកឡើងពីការវិវត្តនៃកម្មវិធីនយោបាយអាទិភាព៦ចំណុច របស់រាជរដ្ឋាភិបាលដែលបានដាក់ឱ្យអនុវត្តភ្លាមៗ ក្រោយរាជរដ្ឋាភិបាលថ្មីឡើងកាន់តំណែង។ សម្តេចធិបតី ហ៊ុន ម៉ាណែត បានថ្លែងថា ការវិវត្តនៃកម្មវិធីនយោបាយអាទិភាព៦ចំណុច ដែលសម្តេចធិបតី ហ៊ុន ម៉ាណែត បានលើកឡើងនោះមានដូចជា៖ ទី១ ការពង្រីករបបសន្តិសុខសង្គម និងមូលនិធិសមធម៌សុខាភិបាលដែលគ្របដណ្តប់លើ​ប្រជាពលរដ្ឋ​ចំនួន៦,៨ លាននាក់ នៅក្នុងនោះមានសមាជិកប.ស.ស ទាំងរបបកាតព្វកិច្ចនិងរបបស្ម័គ្រចិត្ត​សរុបជាង ២លាន១សែននាក់។ ទី២ មូលនិធិសមធម៌សម្រាប់ប្រជាជននៃគ្រួសារ​ងាយរងហានិភ័យ​ចំនួន ៤៩ម៉ឺនគ្រួសារស្មើនឹង១លាន៨សែននាក់។ ទី៣ មូលនិធិសមធម៌ប្រជាជនសម្រាប់ប្រជាពលរដ្ឋនៃគ្រួសារក្រីក្រ (ក្រ១ និងក្រ២) មានចំនួន៧០ម៉ឺនគ្រួសារ ដែលមានប្រជាជន២លាន៨សែននាក់ និងពង្រីកការគ្របដណ្តប់នូវរបបសន្តិសុខសង្គមដល់ប្រជាជនក្នុងសេដ្ឋកិច្ចក្រៅប្រព័ន្ធជាង១០ ម៉ឺននាក់។ ទី៤-ការជំរុញ និងលើកកម្ពស់ការអភិវឌ្ឍសេដ្ឋកិច្ចក្រៅប្រព័ន្ធ ទី៥- ការរៀបចំយន្តការសម្របសម្រួល និងកម្មវិធីហិរញ្ញប្បទានសំដៅលើកស្ទួយផលិតកម្ម រកទីផ្សារ និងរក្សាលំនឹងថ្លៃកសិផលសំខាន់ៗក្នុងកម្រិតសមរម្យ និងទី៦-ការដាក់ពង្រាយមន្រ្តីបច្ចេកទេសកសិកម្មនៅក្នុងគ្រប់ឃុំសង្កាត់ដែលមានសកម្មភាពកសិកម្មទូទាំងប្រទេស។សូមជម្រាបថា រាជរដ្ឋាភិបាលអាណត្តិទី៧ ដឹកនាំដោយធិបតី ហ៊ុន ម៉ាណែត បានដាក់ឱ្យ​អនុវត្ត​ភ្លាមៗ​ចាប់ពីឆ្នាំ ២០២៣ មកនូវគោលនយោបាយអាទិភាព ៦ចំណុចដែលជាក្តីសង្ឃឹមដ៏រឹងមាំ​របស់រដ្ឋ។ សរុបមក គោលនយោបាយរបស់រាជរដ្ឋាភិបាលអាណត្តិទី៧​ ដឹកនាំដោយសម្ដេចធិបតី គឺជាគោលនយោបាយគាំពារប្រជាពលរដ្ឋ ​ជាពិសេសពលរដ្ឋក្រីក្រ និងងាយរងគ្រោះ។ គោលនយោបាយនេះ ​គឺជាក្តីសង្ឃឹមយ៉ាងកក់ក្តៅរបស់ប្រជាពលរដ្ឋខ្មែរ បន្តពីរាជរដ្ឋាភិបាលសម្តេចតេជោ៕អត្ថបទ៖ វ៉ន ដារ៉ា

សម្ដេចធិបតី ចាត់ទុកលទ្ធផលបោះឆ្នោតព្រឹទ្ធសភា បង្ហាញពីភាពចាស់ទុំផ្នែកនយោបាយ និងលទ្ធិប្រជាធិបតេយ្យនៅកម្ពុជា

2024/03/15 12:37:01 pm        96
Facebook Telegram Linkin
សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា បានចាត់ទុកលទ្ធផលផលនៃការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ឆ្នាំ២០២៤នេះ គឺបានប្រព្រឹត្តទៅប្រកបដោយភាពចាស់ទុំ និងលទ្ធិប្រជាធិបតេយ្យ ដែលនេះបានបង្ហាញយ៉ាងច្បាស់ពីកត្តាសុខសន្ដិភាពរបស់ប្រទេសកម្ពុជា។ សម្ដេចធិបតី នាយករដ្ឋមន្រ្ដី មានប្រសាន៍បញ្ជាក់បែបនេះ ក្នុងឱកាសអញ្ជើញជាអធិបតីដឹកនាំកិច្ចប្រជុំពេញអង្គគណៈរដ្ឋមន្រ្តី នៅព្រឹកថ្ងៃទី១៥ ខែមីនា ឆ្នាំ២០២៤ នៅវិមានសន្តិភាព។ សម្តេចធិបតី ថ្លែងថា ការបោះឆ្នោតព្រឹទ្ធសភា នីតិកាលទី៥ ដែលបានប្រព្រឹត្តទៅដោយ ជោគជ័យកាលពីថ្ងៃទី២៥ ខែកុម្ភៈ ឆ្នាំ២០២៤ ដោយមានគណបក្ស ៤ ចូលរួមប្រកួតប្រជែង និងមានអង្គបោះឆ្នោតចូលរួម រហូតដល់ ៩៩,៨៦%។ សម្តេចធិបតីបន្តថា លទ្ធផលនៃការបោះឆ្នោតព្រឹទ្ធសភា បានបង្ហាញពីភាពចាស់ទុំផ្នែក នយោបាយ និងវឌ្ឍនភាពនៃការអនុវត្តលទ្ធិប្រជាធិបតេយ្យនៅកម្ពុជា។សម្តេចធិបតី ហ៊ុន ម៉ាណែត ក៏បានវាយតម្លៃខ្ពស់ និងអរគុណដល់គ្រប់ភាគីពាក់ព័ន្ធទាំងអស់​ជា​ពិសេស គណៈកម្មាធិការជាតិរៀបចំការបោះឆ្នោត និងអាជ្ញាធរដែនដីគ្រប់លំដាប់ថ្នាក់​ដែលបាន​សហការចូលរួម និងញ៉ាំងឱ្យព្រឹត្តិការណ៍ជាតិដ៏សំខាន់នេះប្រព្រឹត្តទៅដោយរលូន សេរី យុត្តិធម៌ អហិង្សា ត្រឹមត្រូវនិងតម្លាភាព៕

ប្រធានាធិបតីបារាំង និយាយថា អឺរ៉ុបត្រូវតែត្រៀមខ្លួនសម្រាប់សង្គ្រាម ប្រសិនបើចង់បានសន្តិភាព

2024/03/15 12:20:59 pm        91
Facebook Telegram Linkin
ប្រធានាធិបតីបារាំង លោក Emmanuel Macron បាននិយាយកាលពីថ្ងៃព្រហស្បតិ៍ទី ១៤ ខែមីនាថា អឺរ៉ុបគួរតែត្រៀមខ្លួនសម្រាប់សង្រ្គាម ប្រសិនបើខ្លួនចង់បានសន្តិភាព ដោយចាត់ទុកប្រទេសរុស្ស៊ី របស់ប្រធានាធិបតី លោក Vladimir Putin ថាជាសត្រូវ ដែលមិនបានបញ្ឈប់សង្គ្រាមនៅក្នុងប្រទេសអ៊ុយក្រែន ក្នុងជម្លោះដែលមានរយៈពេលពីរឆ្នាំមកនេះ។លោក Macron បានបង្កឱ្យមានភាពចម្រូងចម្រាសកាលពីខែមុន បន្ទាប់ពីលោក បាននិយាយថា លោកមិនអាចច្រានចោលការដាក់ពង្រាយកងទ័ពទៅក្នុងប្រទេសអ៊ុយក្រែននាពេលអនាគតបានទេ ដោយមេដឹកនាំជាច្រើនរូប បានចេញឆ្ងាយពីបញ្ហានោះ ខណៈអ្នកផ្សេងទៀត ជាពិសេសនៅអឺរ៉ុបខាងកើត បានសម្តែងការគាំទ្រ។លោក Macron បាននិយាយនៅក្នុងបទសម្ភាសន៍តាមទូរទស្សន៍ថា ប្រសិនបើរុស្ស៊ីឈ្នះសង្រ្គាមនេះ ភាពជឿជាក់របស់អឺរ៉ុប នឹងត្រូវកាត់បន្ថយដល់សូន្យ។ វាជារឿងសំខាន់សម្រាប់អឺរ៉ុប ក្នុងការមិនគូសបន្ទាត់ក្រហម ដែលនឹងបង្ហាញភាពទន់ខ្សោយដល់វិមានក្រឹមឡាំង និងជំរុញទឹកចិត្តដល់ទីក្រុងនេះ បន្តការឈ្លានពានអ៊ុយក្រែន។ លោក បាននិយាយថា ប្រទេសបារាំង ពុំដែលមានគំនិតវាយលុកប្រឆាំងរុស្ស៊ីទេ ហើយទីក្រុងប៉ារីស ក៏ពុំមានសង្រ្គាមជាមួយទីក្រុងមូស្គូដែរ ទោះបីជាការពិតថា រុស្ស៊ីបានបើកការវាយប្រហារយ៉ាងចាស់ដៃប្រឆាំងផលប្រយោជន៍របស់ប្រទេសបារាំងនៅក្នុង និងក្រៅ ប្រទេសបារាំងក៏ដោយ។ លោក Macron បាននិយាយថា ប្រទេសអ៊ុយក្រែន ស្ថិតក្នុងស្ថានភាពលំបាកនៅលើទឹកដីរបស់ខ្លួន ហើយការគាំទ្រកាន់តែខ្លាំងពីសម្ព័ន្ធមិត្ត គឺចាំបាច់។ លោក សង្ឃឹមថា ពេលវេលានឹងមកដល់នៅថ្ងៃណាមួយ ដើម្បីចរចាសន្តិភាពជាមួយប្រធានាធិបតីរុស្ស៊ី ឬអ្នកណាក៏ដោយដែលអាចធ្វើទៅបាន។

ការជម្រះក្តីក្នុងសំណុំរឿងប្រាក់បំបិទមាត់របស់លោក Trump អាចប្រឈមការនឹងពន្យារពេល

2024/03/15 12:17:15 pm        116
Facebook Telegram Linkin
រដ្ឋអាជ្ញា ក្នុងសំណុំរឿងប្រាក់បំបិទមាត់របស់ លោក ដូណាល់ ត្រាំ បាននិយាយកាលពីថ្ងៃព្រហស្បតិ៍ ថា ពួកគេនឹងមិនប្រឆាំងការពន្យារពេលរយៈពេល ៣០ ថ្ងៃក្នុងការជម្រះក្តី ដែលកំណត់ពេលចាប់ផ្តើម នៅថ្ងៃទី ២៥ ខែមីនា បន្ទាប់ពីបេក្ខជនប្រធានាធិបតីមកពីគណបក្សសាធារណរដ្ឋរូបនេះ បាននិយាយថា ការបង្ហាញភស្តុតាងយឺតយ៉ាវ ធ្វើឱ្យប៉ះពាល់ដល់ការត្រៀមខ្លួនរបស់លោក។ ការពន្យាពេលចំពោះការជម្រះក្តីបទព្រហ្មទណ្ឌមិនធ្លាប់មានលើកដំបូងរបស់អតីតប្រធានាធិបតីសហរដ្ឋអាមេរិក នឹងកំណត់ជ័យជម្នះមួយផ្សេងទៀតសម្រាប់ លោក Trump ដែលបានព្យាយាមពន្យឺតដំណើរការនីតិវិធី នៅក្នុងការជាប់ពាក់ព័ន្ធផ្លូវច្បាប់ផ្សេងៗរបស់លោក ខណៈលោកត្រៀមខ្លួនដើម្បីប្រកួតប្រជែងជាមួយប្រធានាធិបតីគណបក្សប្រជាធិបតេយ្យ លោក Joe Biden ក្នុងការបោះឆ្នោត នៅថ្ងៃទី ៥ ខែវិច្ឆិកា។ សំណុំរឿងផ្តល់ប្រាក់បំបិទមាត់នៅក្នុងតុលាការ រដ្ឋញូវយ៉ក ទីក្រុង Manhattan នឹងក្លាយជាសំណុំរឿងព្រហ្មទណ្ឌដំបូងក្នុងចំណោមសំណុំរឿងព្រហ្មទណ្ឌចំនួន៤ករណីរបស់លោក Trump ដែលឈានដល់ការជម្រះក្តី។ លោក Trump បានផ្តល់ចម្លើយពីភាពគ្មានទោសក្នុងសំណុំរឿងនៅរដ្ឋញូវយ៉ក ចំពោះករណីចំនួន ៣៤ នៃការក្លែងបន្លំឯកសារអាជីវកម្ម ដើម្បីលាក់បាំងការបង់ប្រាក់ចំនួន ១៣០.០០០ ដុល្លាររបស់អតីតមេធាវីរបស់លោក លោក Michael Cohen ដល់តារាភាពយន្តអាសអាភាស នាង ស្តមី ដេនញែល(Stormy Daniels) សម្រាប់ការបំបិទមាត់នាង នៅមុនការបោះឆ្នោតឆ្នាំ ២០១៦ អំពីការជួបប្រាស្រ័យទាក់ទងផ្លូវភេទ ដែលនាងនិយាយថាមានរយៈពេលមួយទសវត្សរ៍មកហើយ។ ប៉ុន្តែ លោក Trump បានបដិសេធការជួបនេះ។ មេធាវីរបស់លោក បានអះអាងថា លោក Cohen បានបង់ប្រាក់ឱ្យនាង Daniels ដើម្បីទុកភាពអាម៉ាស់ក្នុងគ្រួសាររបស់លោក Trump ពុំមែនដើម្បីបង្កើនឱកាសបោះឆ្នោតរបស់លោក ដូចដែលរដ្ឋអាជ្ញានៅក្នុងការិយាល័យមេធាវីទីក្រុង Manhattan លោកអាល់វីន ប្រាក(Alvin Bragg) បានចោទប្រកាន់នោះទេ។

អាមេរិក៖ សមយុទ្ធសម្ព័ន្ធណាតូនៅតំបន់អាកទិក បង្កើនការត្រៀមខ្លួនដើម្បីការពារសម្ព័ន្ធមិត្ត

2024/03/15 11:59:04 am        77
Facebook Telegram Linkin
កងទ័ព នាវា និងយន្តហោះរបស់សម្ព័ន្ធយោធាណាតូ(NATO)ដឹកនាំដោយសហរដ្ឋអាមេរិកកំពុងចូលរួមសកម្មភាពសមយុទ្ធយោធារបស់សម្ព័ន្ធនេះ នៅក្នុងតំបន់ខ្ពង់រាបភាគខាងជើងរបស់អឺរ៉ុប ជាផ្នែកមួយនៃលំហាត់យោធាដ៏ធំបំផុតរបស់អង្គការណាតូ ចាប់តាំងពីសង្រ្គាមត្រជាក់មក។ កងទ័ពប្រមាណ៩ម៉ឺននាក់ មកពីសហរដ្ឋអាមេរិក និងប្រទេសជាសម្ព័ន្ធមិត្តណាតូជាច្រើនទៀតកំពុងចូលរួមក្នុងសមយុទ្ធដែលមានឈ្មោះថា Steadfast Defender 2024 ដែលបានចាប់ផ្ដើមកាលពីចុងខែមករា និងបន្តរហូតដល់ខែឧសភា នៅទូទាំងអឺរ៉ុប។ មេបញ្ជាការរងកងទ័ពជើងទឹកទី ២ របស់សហរដ្ឋអាមេរិក លោកឧត្តមនាវីទោ ដេវីដ ផាតឆេល (David Patchell) បាននិយាយថា ផ្នែកខាងជើងនៃសមយុទ្ធនេះបាននឹងកំពុងផ្តោតលើការពង្រឹងអន្តរអាត្លង់ទិក ជាការដាក់ពង្រាយកងកម្លាំងអាមេរិកនៅខាងជើងឆ្លងកាត់មហាសមុទ្រអាត្លង់ទិកទៅកាន់ទ្វីបអឺរ៉ុប ហើយបានរួមបញ្ចូលសមយុទ្ធបាញ់គ្រាប់ពិតដែនសមុទ្រ និងការហ្វឹកហ្វឺនវាយលុកក្នុងសមុទ្រអាត្លង់ទិកខាងជើង និងអាកទិក។ ស្របពេលនាវាមួយចំនួនដែលបានចូលរួមក្នុងសមយុទ្ធបានធ្វើដំណើរត្រឡប់ទៅប្រទេសវិញ លោក Patchell ក៏បាននិយាយផងដែរថា ដោយស្ថិតនៅជិតប្រទេសរុស្ស៊ី សម្ព័ន្ធនេះបានបន្ថែមធាតុនៃភាពប្រាកដនិយមដល់ការហ្វឹកហាត់។ ផ្នែកទីពីរគឺធ្វើឡើងនៅទ្វីបអឺរ៉ុបក្នុងគោលបំណងបង្ហាញពីបំណងរបស់ណាតូក្នុងការដឹកនាំសមត្ថភាពជាតិក្នុងគ្រប់វិស័យ ទាំង ផ្លូវអាកាស លើដី សមុទ្រ លំហ និងអ៊ីនធឺណេត និងដើម្បីសាកល្បងការដាក់ពង្រាយទ័ព និងឧបករណ៍យ៉ាងលឿនឆ្លងកាត់ព្រំដែនក្នុងសម្ព័ន្ធភាពនេះ។ ជារួម បន្ថែមពីលើកងទ័ព ៩ម៉ឺននាក់ នាវាជាង ៥០ គ្រឿង ចាប់ពីនាវាផ្ទុកយន្តហោះរហូតដល់នាវាពិឃាតនឹងចូលរួម ក៏ដូចជាយន្តហោះចម្បាំងជាង៨០គ្រឿង ឧទ្ធម្ភាគចក្រ និងយានដ្រូន និងរថយន្តប្រយុទ្ធយ៉ាងហោចណាស់ ១.១០០ គ្រឿង រួមទាំងរថក្រោះ ១៣៣ គ្រឿង និងរថយន្តប្រយុទ្ធថ្មើរជើងចំនួន ៥៣៣គ្រឿង៕

បណ្ដាញសង្គម

ព័ត៌មានថ្មីៗ

អនុគណៈកម្មការកំណែចាប់ផ្តើមកែសន្លឹកកិច្ចការបេក្ខជនដែលបានចូលរួមប្រឡងប្រជែងក្របខ័ណ្ឌ ៤ក្រសួង ស្ថាប័ន
08/04/2025 10:08 AM
Facebook Telegram Linkin
ឯកឧត្តម អ៊ុច បូររិទ្ធ ដឹកនាំកិច្ចប្រជុំគណៈកម្មាធិការអចិន្ត្រៃយ៍ព្រឹទ្ធសភា ដើម្បី​ពិនិត្យ​សម្រេច​លើ​របៀប​វារៈ​ចំនួន៤
08/04/2025 09:08 AM
Facebook Telegram Linkin
សម្តេចសង្ឃ បួរ គ្រី យាងសួរសុខទុក្ខ និងប្រទានទេយ្យទានដល់វត្តចំនួន១៦ ក្នុងស្រុកអន្លងវែង
08/04/2025 09:08 AM
Facebook Telegram Linkin
សម្តេចព្រះអភិសិរីសុគន្ធាមហាសង្ឃរាជាធិបតី យាង​ចែក​អំណោយ​ជូន​ជនភៀស​សឹក​ចំនួន​ជាង ២០០​គ្រួសារ នៅស្រុកចុងកាល់
08/04/2025 09:08 AM
Facebook Telegram Linkin
នាយករដ្ឋមន្ត្រីអ៊ីស្រាអែល ជំរុញកាកបាទក្រហមឱ្យជួយចំណាប់ថ្នូរ ខណៈពលរដ្ឋប៉ាឡេស្ទីន កាន់តែច្រើនស្លាប់ព្រោះគ្រោះអត់ឃ្លាននៅហ្កាហ្សា
08/04/2025 08:08 AM
Facebook Telegram Linkin
TOP STORY | សម្ដេចតេជោ៖ យើងឈាន​ទៅរកការពឹងពាក់​លើ​កាក​បាទ​ក្រហម​អន្តរជាតិ​ដើម្បី​ជួយ​ដល់​ទាហាន​កម្ពុជា​១៨​រូប​ដែល​ថៃ​ចាប់​ក្រោយ​បទ​ឈប់​បាញ់ ​និង​មិនទា​ន់​បញ្ជូន​មក​ឱ្យ​កម្ពុជា​វិញ
08/04/2025 06:08 AM
Facebook Telegram Linkin
សម្តេចកិត្តិព្រឹទ្ធបណ្ឌិត​ ប៊ុន​ រ៉ានី​ ហ៊ុនសែន​ ឧបត្ថម្ភកុមារា២នាក់ដែលឱពុកជាប់បំពេញកាតព្វកិច្ចជូនជាតិ​
08/03/2025 08:08 PM
Facebook Telegram Linkin
TOP STORY | សម្តេចតេជោប្រកាសមិនចូលរួមប្រជុំព្រឹទ្ធសភាថ្ងៃស្អែកទេដោយជាប់រវល់ប្រចាំការរួមបញ្ជាកងទ័ព២៤ម៉ោងលើ២៤ម៉ោងក្រោយថៃរៀបចំផែនការវាយប្រហារកម្ពុជា
08/03/2025 07:08 PM
Facebook Telegram Linkin
BREAKING NEWS ÷ ក្រសួងការពារជាតិកម្ពុជា៖កងទ័ពថៃគ្រោងនឹងបើកការវាយលុកតាមបណ្តោយព្រំដែនជាមួយកម្ពុជាឆាប់ៗនេះ
08/03/2025 07:08 PM
Facebook Telegram Linkin
លោកជំទាវ ហ៊ុន ម៉ាណា អញ្ជើញនាំយកទេយ្យវត្ថុប្រគេនព្រះសង្ឃនៅវត្តគោកត្របែក ក្នុងខេត្តកំពង់ធំ និងចែកអំណោយជូនប្រជាពលរដ្ឋ៣៤៩គ្រួសារ
08/03/2025 05:08 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.