នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
សម្ដេចធិបតីបញ្ជាក់ជាថ្មីទៅប្រធានអាស៊ានប្តូរវេនចំពោះការប្ដេជ្ញាចិត្តរបស់កម្ពុជាលើការដោះស្រាយបញ្ហាជម្លោះព្រំដែនទាំងអស់ជាមួយប្រទេសជិតខាងដោយសន្តិភាព និងច្បាប់អន្តរជាតិ
គណៈកម្មាធិការអន្តរក្រសួងចុះពិនិត្យ និងវាយតម្លៃការស្ថាបនាផ្លូវក្រួសក្រហម១ខ្សែ ក្នុង​ស្រុកបាកាន ខេត្តពោធិ៍សាត់
រដ្ឋមន្ត្រីក្រសួងអភិវឌ្ឍន៍ជនបទចុះពិនិត្យវឌ្ឍនភាពការងារសាងសង់ស្ពានភ្នំក្រវាញ និង​ផ្លូវកៅ​ស៊ូ​ក្នុង​​ខេត្តពោធិ៍សាត់
BREAKING NEWS|កម្ពុជាចាត់ទុកផែនការថៃចង់ដណ្តើមប្រាសាទតាក្របី និងបិទប្រាសាទតាមាន់ធំគឺជាការប៉ុនប៉ងឈ្លានពានកម្ពុជាគិតទុកជាមុន និងមិនគោរពបទឈប់បាញ់

នយោបាយ​ និង ការអភិវឌ្ឍន៍

ប្រភព៖ ប្រទេសចិន ស្នើអ៊ីរ៉ង់ឲ្យទប់ស្កាត់ការវាយប្រហាររបស់ក្រុម ហ៊ូទី នៅសមុទ្រក្រហម

2024/01/26 09:05:44 am        97
Facebook Telegram Linkin
ប្រភពពីអ៊ីរ៉ង់ និងក្រុមមន្ត្រីការទូតម្នាក់ ដែលដឹងពីបញ្ហានេះបាននិយាយថា ក្រុមមន្ត្រីចិនបានស្នើឱ្យសមភាគីអ៊ីរ៉ង់ ជួយទប់ស្កាត់ការវាយប្រហារលើនាវាដឹកទំនិញនានានៅសមុទ្រក្រហម ដោយក្រុមហ៊ូទីគាំទ្រដោយអ៊ីរ៉ង់ ឬបើពុំនោះ នឹងត្រូវប៉ះពាល់ដល់ទំនាក់ទំនងធុរកិច្ចជាមួយទីក្រុងប៉េកាំង ។ ប្រភពនានាពីប្រទេសអ៊ីរ៉ង់បាននិយាយថា ការពិភាក្សាអំពីការវាយប្រហារ និងពាណិជ្ជកម្មរវាងចិន និងអ៊ីរ៉ង់បានធ្វើឡើងនៅក្នុងកិច្ចប្រជុំថ្មីៗជាច្រើននៅទីក្រុងប៉េកាំង និងទីក្រុងតេហេរ៉ង់ ដោយបដិសេធមិនផ្តល់ព័ត៌មានលម្អិត ដែលពួកគេបានធ្វើឡើង ឬអ្នកណាបានចូលរួមខ្លះ។ មន្ត្រីអ៊ីរ៉ង់មួយរូបបានប្រាប់សារព័ត៌មាន Reuters ដោយមិនបញ្ចេញឈ្មោះថា ប្រទេសចិននិយាយថា ប្រសិនបើផលប្រយោជន៍របស់យើងត្រូវបានប៉ះពាល់តាមមធ្យោបាយណាមួយ នោះនឹងប៉ះពាល់ដល់អាជីវកម្មរបស់យើងជាមួយទីក្រុងតេអេរ៉ង់។ ដូច្នេះសូមប្រាប់ក្រុមហ៊ូទីឱ្យមានការអត់ធ្មត់។ ការវាយប្រហារដែលក្រុមចលនាហ៊ូទីនិយាយថា ជាការបង្ហាញការគាំទ្រប៉ាឡេស្ទីននៅតំបន់ហ្កាហ្សា បានធ្វើថ្លៃសេវាដឹកជញ្ជូន និងការធានារ៉ាប់រង ហក់ឡើងខ្ពស់ ដោយបង្អាក់ផ្លូវពាណិជ្ជកម្មសំខាន់រវាងអាស៊ី និងអឺរ៉ុប ដែលប្រើប្រាស់យ៉ាងទូលំទូលាយដោយនាវាមកពីប្រទេសចិន។ ប្រភពចំនួន៤ពីខាងអ៊ីរ៉ង់បាននិយាយថា ទោះយ៉ាងណាក៏ដោយ ក្រុមមន្ត្រីចិនពុំបានធ្វើអត្ថាធិប្បាយជាក់លាក់ណាមួយ ឬការគំរាមកំហែងអំពីរបៀបដែលទំនាក់ទំនងពាណិជ្ជកម្មរបស់ទីក្រុងប៉េកាំងជាមួយអ៊ីរ៉ង់អាចរងផលប៉ះពាល់នោះទេ ប្រសិនបើផលប្រយោជន៍របស់ខ្លួនត្រូវបានបំផ្លាញដោយការវាយប្រហាររបស់ក្រុមឧទ្ទាមហ៊ូទី៕

ឯកឧត្តមសាស្រ្តាចារ្យ ឈាង រ៉ា៖ គ្រប់មន្ទីរពេទ្យនៅកម្រិតថ្នាក់ជាតិ ជំហានបឋមសូមឱ្យរៀបចំកែលំអរប្រព័ន្ធការត្រួតពិនិត្យសុខភាព

2024/01/26 08:40:02 am        125
Facebook Telegram Linkin
ឯកឧត្ដមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានលើកឡើងថា នៅគ្រប់មន្ទីរពេទ្យ ជាពិសេសមន្ទីរពេទ្យនៅកម្រិតថ្នាក់ជាតិ ជំហានបឋមសូមឱ្យរៀបចំកែលំអរប្រព័ន្ធការត្រួតពិនិត្យសុខភាព (Medical Check Up) សម្រាប់អ្នកទទួលសេវា ក្នុងការពិនិត្យព្យាបាលដោយប្រសិទ្ធិភាព និងគោរពជំហានការងារពីនេះទៅមុខដើម្បីឱ្យប្រសើរឡើង។ការថ្លែងរបស់ឯកឧត្តមសាស្រ្តាចារ្យ ឈាង រ៉ា យ៉ាងដូច្នេះ ក្នុងកិច្ចប្រជុំប្រចាំខែមករា ដើម្បីពិនិត្យវឌ្ឍនភាពការងារ និងលើកទិសដៅការងារបន្ត, នារសៀលថ្ងៃទី២៥ ខែមករា ឆ្នាំ២០២៤ នៅទីស្តីការក្រសួងសុខាភិបាល។ឯកឧត្តមសាស្រ្តាចារ្យរដ្ឋមន្រ្តី ជម្រុញអោយថ្នាក់ដឹកនាំគ្រប់កម្រឹត និងប្រធានមន្ទីរសុខាភិបាល ជាពិសេសមន្រ្តីជំនាញដែលបម្រើសេវាសាធារណៈ សូមបន្តយកចិត្តទុកដាក់ បន្តប្រុងប្រយ័ត្នខ្ពស់ និងមានមតិយោបល់ ដើម្បីដោះស្រាយនូវរាល់បញ្ហាប្រឈមមាននៅក្នុងបន្ទុក ដែលជួបប្រទះ ឬរាំងស្ទះជាយូរមកហើយ។ឯកឧត្តមសាស្រ្តាចារ្យរដ្ឋមន្រ្តី ក៏បានរំលឹកឡើងវិញនូវគ្រប់បញ្ហាដែលប្រឈមដើម្បីយកមកឆ្លុះបញ្ចាំងខ្លួនឯងស្វែងរកចំណុចខ្វះខាត និងកែតម្រូវបំពេញបន្ថែមជាប់ជាប្រចាំ។ជាចុងក្រោយឯកឧត្តមរដ្ឋមន្រ្តី បានផ្តល់ជូនអនុសាសន៍គន្លឹះៗ ដែលជាជំនួយស្មារតីដំណោះស្រាយលើបញ្ហាប្រឈមនានា។សូមបញ្ជាក់ផងដែរថា កិច្ចប្រជុំនេះរៀបចំឡើងតាមប្រព័ន្ធ Hybrid ដែលមានការចូលរួមដោយផ្ទាល់ពី ឯកឧត្តម លោកជំទាវ រដ្ឋលេខាធិការ អនុរដ្ឋលេខាធិការ ទីប្រឹក្សាក្រសួង អគ្គនាយក អគ្គាធិការ និងឯកឧត្តម លោកជំទាវ លោក លោកស្រី អគ្គនាយករង ប្រធាន-អនុប្រធានអង្គភាពថ្នាក់កណ្តាល និងប្រធានការិយាល័យនៃទីស្តីការក្រសួងសុខាភិបាល និងតាមប្រព័ន្ធអនឡាញ ជាប្រធានមន្ទីរសុខាភិបាល នៃរដ្ឋបាលរាជធានី-ខេត្ត៕អត្ថបទ រដ្ឋា

ចិនថ្កោលទោសការបង្កហេតុរបស់អាមេរិកនៅច្រកសមុទ្រតៃវ៉ាន់ ដោយសន្យាធ្វើសមយុទ្ធបន្ថែមទៀត

2024/01/26 08:27:58 am        139
Facebook Telegram Linkin
ប្រទេសចិនបានរិះគន់សហរដ្ឋអាមេរិកកាលពីថ្ងៃព្រហស្បតិ៍ទី២៥ ខែមករាសប្ដាហ៍នេះ ចំពោះការបង្កបញ្ហា និងការបង្កហេតុ បន្ទាប់ពីកងទ័ពជើងទឹកអាមេរិកបានបើកនាវាចម្បាំងដំបូងរបស់ខ្លួនកាលពីថ្ងៃទី ពុធទី២៤ ខែមករា សប្ដាហ៍នេះ ឆ្លងកាត់ច្រកសមុទ្រតៃវ៉ាន់ដ៏រសើបចាប់តាំងពីការបោះឆ្នោតជ្រើសរើសមេដឹកនាំ និងសភា នៅលើកោះនេះ។កងទ័ពជើងទឹកអាមេរិកបាននិយាយថា នាវាពិឃាត USS John Finn បានឆ្លងកាត់ច្រករបៀងមួយក្នុងច្រកសមុទ្រតៃវ៉ាន់ ដែលហួសពីដែនទឹកនៃរដ្ឋឆ្នេរសមុទ្រណាមួយ ។ កងទ័ពជើងទឹកអាមេរិក បាននិយាយនៅក្នុងសេចក្តីថ្លែងការណ៍របស់ខ្លួនថា ការឆ្លងកាត់របស់នាវាចម្បាំង John Finn ក្នុងឆ្លងកាត់ច្រកសមុទ្រតៃវ៉ាន់ បង្ហាញពីការប្តេជ្ញាចិត្តរបស់សហរដ្ឋអាមេរិកក្នុងការរក្សាសេរីភាពនៃការធ្វើនាវាចរណ៍សម្រាប់ប្រជាជាតិទាំងអស់ជាគោលការណ៍។គ្មានសមាជិកសហគមន៍អន្តរជាតិណាម្នាក់គួរត្រូវបានគេបំភិតបំភ័យ ឬបង្ខំឲ្យបោះបង់សិទ្ធិ និងសេរីភាពរបស់ពួកគេឡើយ។ក្រសួងការពារជាតិចិនបាននិយាយកាលពីថ្ងៃទី ២៥ ខែមករាថា នាវាចម្បាំង និងយន្តហោះរបស់សហរដ្ឋអាមេរិកបានបង្កបញ្ហា និងការបង្កហេតុនៅមាត់ទ្វារផ្ទះរបស់ប្រទេសចិន ហើយបានធ្វើសកម្មភាពទ្រង់ទ្រាយធំ ជាញឹកញាប់នៅក្នុងដែនទឹក និងដែនអាកាសជុំវិញប្រទេសចិន ។ អ្នកនាំពាក្យក្រសួងការពារជាតិចិន លោក វូ ជៀន (Wu Qian) បាននិយាយនៅក្នុងសន្និសីទសារព័ត៌មានប្រចាំថ្ងៃ ថាកងកម្លាំងប្រដាប់អាវុធចិនបានដោះស្រាយបញ្ហានេះដោយស្របតាមច្បាប់ ហើយសកម្មភាពដែលពាក់ព័ន្ធមានភាពយុត្តិធម៌ សមហេតុផល វិជ្ជាជីវៈ និងមានការអត់ធ្មត់៕

អាមេរិក បានស្នើឱ្យចិន ជំរុញអ៊ីរ៉ង់ឱ្យទប់ស្កាត់ការវាយប្រហារនៅសមុទ្រក្រហមដោយក្រុមហ៊ូទី

2024/01/25 02:50:34 pm        112
Facebook Telegram Linkin
សហរដ្ឋអាមេរិក បានស្នើឱ្យប្រទេសចិន ជំរុញឱ្យទីក្រុងតេអេរ៉ង់ ទប់ស្កាត់ក្រុមឧទ្ទាមហ៊ូទី (Houthi) ដែលមានសម្ព័ន្ធមិត្តជាមួយអ៊ីរ៉ង់ និងដែលបានវាយប្រហារលើនាវាពាណិជ្ជកម្មនៅសមុទ្រក្រហម ប៉ុន្តែគេឃើញមានសញ្ញាតិចតួចប៉ុណ្ណោះនៃការជួយពីទីក្រុងប៉េកាំង នេះបើតាមសារព័ត៌មាន FT បានរាយការណ៍កាលពីថ្ងៃពុធ (២៤ មករា) ដោយដកស្រង់សម្តីក្រុមមន្ត្រីសហរដ្ឋអាមេរិក។របាយការណ៍នោះបាននិយាយថា សហរដ្ឋអាមេរិកបានលើកបញ្ហានេះម្តងហើយម្តងទៀតជាមួយបណ្ដាមន្ត្រីជាន់ខ្ពស់របស់ចិនក្នុងរយៈពេលបីខែកន្លងមកនេះ។របាយការណ៍ដដែលនោះបាននិយាយថា រដ្ឋមន្ត្រីការបរទេសអាមេរិក លោក អាន់តូនី ប្លីងខិន (Antony Blinken) ក៏បានលើកឡើងពីបញ្ហានេះជាមួយសមភាគីចិនរបស់លោកផងដែរ ដោយបន្ថែមថា ក្រុមមន្ត្រីអាមេរិកជឿថា មានភស្តុតាងតិចតួចណាស់ដែលថាចិនបានដាក់សម្ពាធណាមួយលើអ៊ីរ៉ង់ដើម្បីទប់ស្កាត់ក្រុមហ៊ូទី លើសពីសេចក្តីថ្លែងការណ៍យកគួរមួយដែលទីក្រុងប៉េកាំង បានចេញកាលពីសប្តាហ៍មុន។ការវាយប្រហាររបស់ក្រុមហ៊ូទី បានរំខានដល់ការដឹកជញ្ជូនទូទាំងពិភពលោក និងបង្កការភ័យខ្លាចចំពោះអតិផរណាពិភពលោក។ ការវាយប្រហារទាំងនោះក៏បានបង្កឲ្យមានការព្រួយបារម្ភយ៉ាងខ្លាំងដែរថា ការរាលដាលនៃសង្រ្គាមអ៊ីស្រាអែល និងក្រុមហាម៉ាស អាចធ្វើឲ្យមជ្ឈិមបូព៌ាមានអស្ថិរភាព៕

សមាជិកសភាគណបក្សការងារ៖ លោក ស៊ុណាក់ មានឈាមជនស្លូតត្រង់ជាប់ដៃរបស់ខ្លួន ពាក់ព័ន្ធនឹងជម្លោះតំបន់ហ្កាហ្សា

2024/01/25 02:39:05 pm        157
Facebook Telegram Linkin
សមាជិកសភាមួយរូបនៃគណបក្សការងារ បានចោទប្រកាន់លោកនាយករដ្ឋមន្ដ្រីអង់គ្លេស រីស៊ី ស៊ុណាក់ (Rishi Sunak)ថា មាន «ឈាមរបស់មនុស្សស្លូតត្រង់រាប់ពាន់នាក់ជាប់ដៃរបស់ខ្លួន» ជុំវិញការដោះស្រាយជម្លោះរបស់រដ្ឋាភិបាលនេះ នៅតំបន់ហ្កាហ្សា។លោកតាហ៊ី អាលី (Tahir Ali) សមាជិកសភាសម្រាប់សភា Birmingham Hall Green បានជំរុញឲ្យ នាយករដ្ឋមន្ត្រីប្តេជ្ញាទាមទារឲ្យមានបទឈប់បាញ់ជាបន្ទាន់ ក្នុងអន្តរាគមន៍ដ៏ខ្លាំងក្លានៅក្នុងសភាតំណាងរាស្ត្រ។ លោកបានសួរថា៖«តើឥឡូវនេះមិនមែនជាពេលដែលលោកនាយករដ្ឋមន្ត្រី ទទួលស្គាល់ថា លោកមានឈាមមនុស្សស្លូតត្រង់រាប់ពាន់នាក់ជាប់ដៃរបស់ខ្លួនទេឬ ហើយសម្រាប់លោកត្រូវប្តេជ្ញាទាមទារបទឈប់បាញ់ជាបន្ទាន់ និងការបញ្ចប់ជួញដូរអាវុធរបស់ចក្រភពអង់គ្លេសជាមួយអ៊ីស្រាអែលដែរ?ចាប់តាំងពីពេលនោះមក ភាគីទាំងពីរ បានសម្តែងការគាំទ្រចំពោះបទឈប់បាញ់ «ប្រកបដោយនិរន្តរភាព» នៅក្នុងតំបន់ហ្កាហ្សា ប៉ុន្តែបានជំរុញការអំពាវនាវឲ្យមានបទឈប់បាញ់ជាបន្ទាន់។នៅសប្តាហ៍នេះ លោកដេវីត កាមេរូន ( Lord Cameron) រដ្ឋមន្ត្រីការបរទេស បាននិយាយថា លោកបានធ្វើដំណើរទៅកាន់មជ្ឈិមបូព៌ា ដើម្បីធ្វើការឈានទៅរកផែនការសម្រាប់ «បទឈប់បាញ់ប្រកបដោយនិរន្តរភាព និងអចិន្ត្រៃយ៍ដោយគ្មានការវិលត្រឡប់ទៅរកអរិភាពវិញ»។

សាធារណៈរដ្ឋកូរ៉េ កោតសរសើរ​ការរៀបចំ​បរិស្ថានរបស់កម្ពុជា​ដែលផ្តល់​សក្តានុពល​ដល់ការវិនិយោគ

2024/01/25 02:39:03 pm        126
Facebook Telegram Linkin
ភ្នំពេញ៖ ថ្ងៃទី២៤ ខែមករា ឆ្នាំ២០២៤ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុ​ប្រធាន​ទី១ ក្រុមប្រឹក្សាអភិវឌ្ឍន៍កម្ពុជា បានអញ្ជើញទទួលជួបពិភាក្សាការងារជាមួយឯកឧត្តម Chung Sye-kyun អតីតនាយករដ្ឋមន្ត្រីនៃសាធារណរដ្ឋកូរ៉េ ក្នុងដំណើរ​បំពេញ​ទស្សនកិច្ច​របស់​ឯកឧត្តម​នៅ​ប្រទេសក​ម្ពុជា។ ក្នុងកិច្ចប្រជុំពិភាក្សានេះ ក៏មានការចូលរួមពីគណៈប្រតិភូក្រុមហ៊ុន CAMKO MOTOR COMPANT LTD. និងក្រុមហ៊ុន CAMKO INFRACORE CO., LTD.។ក្នុងឱកាសនេះ ឯកឧត្តមឧបនាយករដ្ឋមន្ត្រី បានសម្ដែងនូវការស្វាគមន៍យ៉ាងកក់ក្ដៅជូនចំពោះ ឯកឧត្តម Chung Sye-kyun ក្នុងដំណើរទស្សនកិច្ចមកកម្ពុជា បន្ថែម​ពី​នេះ​តប​លើការ​លើក​ឡើង​អំពី​គុណ​ភាព​ខ្យល់ ឯកឧត្តមឧបនាយករដ្ឋមន្ត្រី បានជម្រាបផងដែរ​អំពី​ទិសដៅ​របស់​កម្ពុជា​ក្នុង​ការ​ជំរុញ​ការប្រើប្រាស់ថាមពលកកើតឡើងវិញឱ្យបាន៧០% នៃថាមពល​ប្រើប្រាស់​សរុប​សម្រាប់​ឆ្នាំ​២០២៤​។ ឆ្លៀតក្នុងឱកាសនេះ ឯកឧត្តមឧបនាយករដ្ឋមន្ត្រី ក៏បានស្នើសុំឱ្យឯកឧត្តម Chung Sye-kyun ជួយសម្របសម្រួល និងពិនិត្យ​លទ្ធភាព​ក្នុង​ការ​ផ្សព្វ​ផ្សាយ​អំពី​សក្ដានុពល​របស់​ប្រទេស​កម្ពុជា​បន្ថែមទៀតជូនដល់វិនិយោគិនកូរ៉េ ក្នុងគោលដៅដើម្បី​ពង្រីក​សកម្មភាព​វិនិយោគ​រវាង​ភាគី​ទាំងពីរ។ក្នុងឱកាសនេះ ឯកឧត្តម Chung Sye-kyun បានបង្ហាញ​ទស្សនៈ​វិជ្ជមាន​អំពី​កំណើន​សេដ្ឋកិច្ច​របស់​ប្រទេស​កម្ពុជា និងការអភិវឌ្ឍឥតឈប់ឈរ រួមជាមួយរោងចក្រវិនិយោគថ្មីៗជាច្រើន ហើយ​កម្ពុជា​អាច​រក្សាបាននូវបរិយាសកាសគុណភាពខ្យល់ល្អ ដែលនេះក៏​ស្រប​តាម​ទិស​ដៅ​របស់​ក្រុមហ៊ុន CAMKO MOTOR និងក្រុមហ៊ុន CAMKO INFRACORE ក្នុង​ការ​ពង្រីក​ផលិតកម្ម​របស់​ខ្លួន​នៅ​កម្ពុជា ដោយអនុវត្តលើការការពារបរិស្ថានផងដែរ។ ជំនួបនេះត្រូវបានរៀបចំឡើងក្នុងគោលបំណងដើម្បីពិភាក្សាអំពីកិច្ចសហប្រតិបត្តិការរវាងភាគីទាំង​ពីរ​កម្ពុជា-កូរ៉េ នាពេលកន្លងមក ពិសេសលើសកម្មភាពវិនិយោគ និងការ​ជំរុញ​ឱ្យ​មាន​វិនិយោ​គិន​ពី​ក្រុមហ៊ុន​នានារបស់សាធារណរដ្ឋកូរ៉េចូលមកបណ្ដាក់ទុននៅកម្ពុជាបន្ថែមទៀត។ ដោយឡែកចំពោះក្រុមហ៊ុន CAMKO MOTOR បច្ចុប្បន្នកំពុងមានប្រតិបត្តិការអាជីវកម្មនៅកម្ពុជា លើការតម្លេីងរថយន្តម៉ាក Hyundai និងផលិតខ្សែភ្លេីងអគ្គិសនីសម្រាប់រថយន្ត ដើម្បី​នាំ​ចេញ​។ ​ជាមួយគ្នានេះដែរ ចំពោះក្រុមហ៊ុន CAMKO INFRACORE តាមរយៈកិច្ចប្រជុំនេះ បាន​បង្ហាញ​ទិស​ដៅ​ក្នុង​ការដាក់ទុនវិនិយោគបង្កើតរោងចក្រផលិតគ្រឿងបង្គុំរថយន្តអគ្គសនីនៅកម្ពុជា សម្រាប់​នាំ​ចេញ​ទៅទីផ្សារពិភពលោក៕

ស្វីសសន្យាបង្កើនកញ្ចប់ថវិកាបន្ថែមលើសកម្មភាព និងបេសកកម្មរបស់កម្ពុជា ក្នុងការធ្វើជាម្ចាស់ផ្ទះនៃកិច្ចប្រជុំអនុសញ្ញា ឆ្នាំ២០២៤

2024/01/25 02:22:53 pm        87
Facebook Telegram Linkin
ប្រទេសស្វីសបានអបអរសាទរ និងកោតសរសើរចំពោះភាពជាប្រធាន ការប្តេជ្ញាចិត្ត និងការខិតខំ​ប្រឹងប្រែងរបស់កម្ពុជា ក្នុងនាមជាប្រធានអនុសញ្ញាអូតាវ៉ា ឆ្នាំ២០២៤ ព្រមទាំង​បានសន្យាផ្តល់​នូវកិច្ចសហការ គាំទ្រ និងចូលរួមជាមួយកម្ពុជា​ឱ្យទទួលបានជោគជ័យទៅតាមគោលដៅ​ដែលរំពឹង​ទុក ​ព្រមទាំងបានសន្យាបង្កើនកញ្ចប់ថវិកា​បន្ថែមសម្រាប់សកម្មភាព និង​បេសកកម្មរបស់​កម្ពុជា ក្នុងការធ្វើ ជាម្ចាស់ផ្ទះនៃកិច្ចប្រជុំត្រួតពិនិត្យឡើងវិញលើកទី ៥ នៃអនុសញ្ញានៅកម្ពុជា និងគាំទ្រដល់កិច្ចប្រជុំនានានៅទីក្រុងហ្សឺណែវ ក្នុងខែមិថុនា ឆ្នាំ២០២៤។ការសាទរកោតសសើរនិងសន្យាគាំទ្រដល់កម្ពុជាយ៉ាងដូច្នេះ ខណៈឯកឧត្តមបណ្ឌិត លី ធុជ ឯកឧត្តមបណ្ឌិត លី ធុជ ប្រធានកិច្ចប្រជុំត្រួតពិនិត្យឡើងវិញលើកទី៥ ​នៃអនុ សញ្ញាអូតាវ៉ាឆ្នាំ២០២៤ បានជួបប្រជុំទ្វេភាគី ជាមួយ ឯកឧត្តម Jullien Thoni ឯកអគ្គរដ្ឋទូត និងតំណាងអចិន្ត្រៃយ៍ប្រទេសស្វីសប្រចាំនៅអង្គការសហប្រជាជាតិ និងអង្គការអន្តរជាតិនានា នៅទីក្រុងហ្សឺណែវ ​ដើម្បីស្វែងរកកិច្ចសហប្រតិបត្តិការ និងការគាំទ្ររបស់ប្រទេសស្វីសនា ថ្ងៃទី២៤ ខែមករាឆ្នាំ២០២៤ស្ថិតនៅទីក្រុងហ្សឺណែវ នៃប្រទេសស្វីស។ក្នុងជំនួបទ្វេភាគីនេះ ក្នុងនាមជាប្រធាននៃកិច្ចប្រជុំអនុសញ្ញាអូតាវ៉ាឆ្នាំ២០២៤ ឯកឧត្តមបណ្ឌិត លី ធុជ បានផ្តោតលើការងារសំខាន់ៗចំនួន ៣ រួមមាន (១)ការផ្សព្វផ្សាយភាពជាប្រធាន និងម្ចាស់ផ្ទះរៀបចំកិច្ចប្រជុំត្រួតពនិត្យឡើងវិញលើកទី៥ នៃអនុសញ្ញាអូតាវ៉ា របស់កម្ពុជា (២)ការកៀរគរការគាំទ្រនិងកិច្ចសហប្រតិបត្តិការពីដៃគូរពាក់ព័ន្ធ និង(៣)ការជំរុញឱ្យមានការចូលរួមជាមួយកម្ពុជាដើម្បីឱ្យកម្ពុជាទទួលបានជោគជ័យក្នុងភាពជាប្រធាន និងម្ចាស់ផ្ទះរៀបចំកិច្ចប្រជុំត្រួតពិនិត្យឡើងវិញលើកទី៥ នៃអនុសញ្ញាអូតាវ៉ា។នៅកិច្ចប្រជុំទ្វេភាគីនេះកម្ពុជាបានទទួលនូវលទ្ធផលជាវិជ្ជមាន ដោយប្រទេសស្វីស បាន​អបអរសាទរ និងកោត សរសើរចំពោះភាពជាប្រធាន ការប្តេជ្ញាចិត្ត និងការខិតខំប្រឹងប្រែង​របស់កម្ពុជាក្នុងនាមជាប្រធានអនុសញ្ញាអូតាវ៉ាឆ្នាំ២០២៤ ព្រមទាំងបានសន្យាផ្តល់នូវកិច្ចសហការ គាំទ្រ និងចូលរួមជាមួយកម្ពុជាឱ្យទទួលបានជោគជ័យទៅតាមគោលដៅដែលរំពឹងទុក ព្រមទាំង​បាន​សន្យាបង្កើនកញ្ចប់ថវិកាបន្ថែមសម្រាប់សកម្មភាព និងបេសកកម្មរបស់កម្ពុជា ក្នុងការធ្វើជា​ម្ចាស់ផ្ទះនៃកិច្ចប្រជុំត្រួតពិនិត្យឡើងវិញលើកទី៥ នៃអនុសញ្ញានៅកម្ពុជា និងគាំទ្រ​ដល់កិច្ចប្រជុំនានានៅទីក្រុងហ្សឺណែវ ក្នុងខែមិថុនា ឆ្នាំ២០២៤៕ដោយ ភារម្យ

សាខាកាកក្រហមកម្ពុជាខេត្តសៀមរាប ជួបប្រតិភូកាកបាទក្រហមសាធារណរដ្ឋកូរ៉េសាខាឆុងជឺ ក្នុងដំណើរទស្សនកិច្ចផ្លាស់ប្តូរបទពិសោធន៍

2024/01/25 01:58:44 pm        176
Facebook Telegram Linkin
នាព្រឹកថ្ងៃទី២៥ ខែមករាឆ្នាំ២០២៤នេះ លោកជំទាវ ទុយ ជិ អនុប្រធានគណៈកម្មាធិការសាខាកាកក្រហមកម្ពុជាខេត្តសៀមរាប បានជួបទទួលស្វាគមន៍ដំណើរទស្សនកិច្ចផ្លាស់ប្តូរបទពិសោធន៍របស់គណៈប្រតិភូកាកបាទក្រហមសាធារណរដ្ឋកូរ៉េសាខាឆុងជឺ នៅទីស្នាក់ការសាខាកាកបាទក្រហមកម្ពុជាខេត្តសៀមរាប ។នាឱកាសនោះលោកជំទាវ ទុយ ជិ បានមានប្រសាសន៍ថា ក្នុងដំណើរទស្សនកិច្ចផ្លាស់ប្ដូរ​បទពិសោធន៍​របស់ប្រតិភូកាកបាទក្រហមសាធារណរដ្ឋកូរ៉េសាខាឆុងជឺ នាពេលនេះ លោកជំទាវ បានសម្តែងនូវក្តីសោមនស្សរីករាយ និងស្វាគមន៍យ៉ាងកក់ក្តៅ ចំពោះដំណើរ​ទស្សនកិច្ចផ្លាស់ប្តូរ​បទពិសោធន៍​រយៈពេល៣ថ្ងៃ គឺចាប់ពីថ្ងៃទី២៣ ដល់ថ្ងៃទី២៥ ខែមករា ឆ្នាំ២០២៤ របស់កាកបាទក្រហមសាធារណរដ្ឋកូរ៉េសាខាឆុងជឺ ជាមួយសាខាកាកបាទក្រហមកម្ពុជាខេត្តសៀមរាប។នៅក្នុងឱកាសនោះផងដែរ​លោកជំទាវ ទុយ ជិ និងគណៈប្រតិភូកាកបាទ​ក្រហម​សាធារណរដ្ឋកូរ៉េ​សាខាឆុងជឺ ក៏​បានដាំកូនឈើទាល​នៅក្នុង​បរិវេណ​សាខាកាកបាទក្រហមកម្ពុជាខេត្ត ដើម្បីទុកជា​អនុស្សាវរីយ៍ ហើយបន្តទៀតគណៈប្រតិភូកាកបាទក្រហមសាធារណរដ្ឋកូរ៉េសាខាឆុងជឺ ​ក៏​បាន អញ្ជើញ​ទស្សនាព្រៃឈើ​ ក្នុង​សួនឧទ្យាន​សហវត្ស​កាកបាទក្រហមកម្ពុជាផងដែរ ៕

អាមេរិក និងអ៊ីរ៉ង់ ខិតជិតយ៉ាងគ្រោះថ្នាក់ដល់ការប្រឈមមុខដាក់គ្នានៅមជ្ឈិមបូព៌ា

2024/01/25 12:59:30 pm        101
Facebook Telegram Linkin
សង្គ្រាមរវាងអ៊ីស្រាអែល និងក្រុមហាម៉ាស បានរាលដាលរួចហើយទៅដល់មជ្ឈិមបូព៌ាកាន់តែទូលំទូលាយ ដោយមានការរំពឹងទុកនៃការប្រឈមមុខដាក់គ្នា រវាងប្រទេសមហាអំណាចក្នុងតំបន់ និងមហាអំណាចពិភពលោក ដែលក្លាយជាភាពកាន់តែទំនងមិនធ្លាប់មាន។ នៅទូទាំងតំបន់ ការប្រយុទ្ធគ្នាភាគច្រើនត្រូវបានកំណត់ព្រំដែនទៅនឹងការវាយប្រហារសងសឹក រវាងកងជីវពលគាំទ្រដោយអ៊ីរ៉ង់នៅម្ខាង ហើយសហរដ្ឋអាមេរិក អ៊ីស្រាអែល និងសម្ព័ន្ធមិត្ត នៅម្ខាង។ ប៉ុន្តែអន្តរាគមន៍ផ្ទាល់ទាំងអ៊ីរ៉ង់ និងសហរដ្ឋអាមេរិក ក្នុងប៉ុន្មានសប្តាហ៍ថ្មីៗនេះ បានបង្កើនការព្រួយបារម្ភថាជម្លោះតំណាងរវាងប្រទេសទាំងពីរ អាចប្រែក្លាយទៅជាជម្លោះដោយផ្ទាល់។រហូតមកដល់ពេលនេះ អាមេរិក និងអ៊ីរ៉ង់ បានជៀសវាងការប្រឈមមុខដាក់គ្នាដោយផ្ទាល់។ សហរដ្ឋអាមេរិក បានវាយប្រហារក្រុមដែលគាំទ្រដោយអ៊ីរ៉ង់នៅប្រទេសយេម៉ែន ស៊ីរី និងអ៊ីរ៉ាក់ ខណៈក្រុមដែលមានទំនាក់ទំនងជាមួយអ៊ីរ៉ង់ បានកំណត់គោលដៅលើបុគ្គលិកអាមេរិក នៅក្នុងប្រទេសអ៊ីរ៉ាក់ និងស៊ីរី។ ទីក្រុងតេអេរ៉ង់ បានវាយប្រហារទៅលើអ្វីដែលខ្លួនបាននិយាយថាក្រុមប្រឆាំងអ៊ីរ៉ង់ នៅក្នុងប្រទេសអ៊ីរ៉ាក់ ស៊ីរី និងនៅប្រទេសប៉ាគីស្ថាន។ ប៉ាគីស្ថាន បានឆ្លើយតបដោយការវាយប្រហារសងសឹក។ សាធារណរដ្ឋឥស្លាមមួយនេះ ដែលបានប្រឆាំងជាយូរមកហើយចំពោះវត្តមានរបស់កងកម្លាំងសហរដ្ឋអាមេរិក ជាអ្វីដែលខ្លួនចាត់ទុកថាជាផែនការខាងក្រោយរបស់ខ្លួន ដែលបានចំណាយពេលប៉ុន្មានទសវត្សរ៍កន្លងទៅនេះ ក្នុងការកសាងបណ្តាញឥស្លាមនិយម កងជីវពលប្រឆាំងលោកខាងលិច និងប្រឆាំងអ៊ីស្រាអែល ដែលខ្លួនបណ្តុះបណ្តាល ផ្តល់មូលនិធិ និងអាវុធ។ សហរដ្ឋអាមេរិក ដែលបានព្យាយាមងាកចេញពីមជ្ឈិមបូព៌ាអស់រយៈពេលជាច្រើនឆ្នាំមកនេះ បានមើលឃើញថាខ្លួនត្រូវបានទាញចូលត្រឡប់ទៅក្នុងតំបន់នេះវិញ។

គណបក្សប្រឆាំង តង់ហ្សានី តវ៉ាទាមទារឲ្យធ្វើកំណែទម្រង់រដ្ឋធម្មនុញ្ញ

2024/01/25 12:44:52 pm        94
Facebook Telegram Linkin
ប្រឆាំងរបស់ប្រទេសតង់ហ្សានី បានរៀបចំការតវ៉ាដ៏ធំលើកដំបូងរបស់ខ្លួនក្នុងរយៈពេលជាច្រើនឆ្នាំមមនេះ កាលពីថ្ងៃពុធទី២៤ខែមករា ដើម្បីទាមទារឲ្យកែប្រែរដ្ឋធម្មនុញ្ញក្នុងការកាត់បន្ថយអំណាចរបស់ប្រធានាធិបតី និងកំណែទម្រង់គណៈកម្មការរៀបចំការបោះឆ្នោតមុនការបោះឆ្នោតសកលនៅឆ្នាំក្រោយ។ ការតវ៉ាកាលពីថ្ងៃពុធ នៅក្នុងរដ្ឋធានីពាណិជ្ជកម្ម ដាអេសសាឡាម (Dar es Salaam) ត្រូវបានហៅដោយគណបក្សប្រឆាំងសម្រាប់លទ្ធិប្រជាធិបតេយ្យនិងជឿនលឿន ដែលត្រូវគេស្គាល់ថា CHADEMA។ ក្រុមអ្នកគាំទ្រចលនា CHADEMA រាប់ពាន់នាក់បានដើរក្បួនឆ្លងកាត់រដ្ឋធានី ដាអេសសាឡាម ដោយក្រវីបរដា ដែលមានសុភាសិតជំរុញឲ្យធ្វើកំណែទម្រង់ឲ្យឯករាជ្យនៅគណៈកម្មការរៀបចំការបោះឆ្នោត និងរដ្ឋធម្មនុញ្ញ។ ក្រុមមន្រ្តីនគរបាល បានអមក្បួនរបស់ក្រុមបាតុករ។ ក្រុមអ្នកតវ៉ានៅក្បួននោះ បាននិយាយថា ពួកគេបារម្ភអំពីការអត់ការងារធ្វើ និងការកើនឡើងនៃការចំណាយសម្រាប់ជីវិភាពប្រចាំថ្ងៃ នៅក្នុងប្រទេសតង់ហ្សានី ដូច្នះទើបពួកគេអំពាវនាវឲ្យមានកំណែទម្រង់រដ្ឋធម្មនុញ្ញ។ លោកស្រីប្រធានាធិបតី សាមីយ៉ា ស៊ូលូហ៊ូ ហាសាស(Samia Suluhu Hassan) កាលពីខែមុន បានដកបម្រាមលើការប្រមូលផ្ដុំខាងនយោបាយនានា ដែលអ្នកកាន់តំណែងមុនរបស់លោកស្រី គឺលោក ចន ម៉ាហ្គូហ្វ៊ូលី(John Magufuli) បានអនុវត្តន៍កាលពីឆ្នាំ២០១៦ និងបានបន្ធូរបន្ថយការរឹតត្បឹតលើផ្នែកព័ត៌មាន និងបក្សប្រឆាំង។ ទោះយ៉ាងណាក្ដីលោកស្រី ហាសាន បានប្រឈមនឹងការរិះគន់ពីក្រុមសកម្មជនសិទ្ធិមនុស្ស កាលពីឆ្នាំមុន បន្ទាប់ពីមនុស្សមួយចំនួនត្រូវបានចាប់ខ្លួន ពីបទរៀបចំគម្រោងការតវ៉ា ប្រឆាំងនឹងកិច្ចព្រមព្រៀងគ្រប់គ្រងកំពង់ផែមួយកន្លែង៕

បណ្ដាញសង្គម

ព័ត៌មានថ្មីៗ

ធានាគារវិនិយោគហេដ្ឋារចនាសម្ព័ន្ធអាស៊ី ចាប់អារម្មណ៍សហការ អភិវឌ្ឍហេដ្ឋារចនាសម្ព័ន្ធសង្គម និងវិស័យអប់រំទំនើប នៅកម្ពុជា
09/02/2025 01:09 AM
Facebook Telegram Linkin
ឯកឧត្តម វ៉ាង វិនពីន៖សំឡេងរបស់ប្រទេសកម្ពុជាឮកាន់តែខ្លាំងឡើងៗនៅលើឆាកអន្តរជាតិ
09/01/2025 11:09 PM
Facebook Telegram Linkin
សម្ដេចតេជោអរគុណវៀតណាមបានផ្ដល់អាហារូបករណ៍គ្រប់វិស័យជាបន្តបន្ទាប់ទាំងវិស័យសេដ្ឋកិច្ច វិស័យយោធាបណ្ដុះបណ្ដាលធនធានមនុស្សនៅកម្ពុជា
09/01/2025 10:09 PM
Facebook Telegram Linkin
អគ្គលេខាធិការបក្សកុម្មុយនីសវៀតណាមសម្តែងក្តីរីករាយចំពោះវឌ្ឍនភាពនៃទំនាក់ទំនងរវាងកម្ពុជា និងវៀតណាមនាពេលបច្ចុប្បន្នដែលមានភាពរីកចម្រើន
09/01/2025 10:09 PM
Facebook Telegram Linkin
សម្ដេចធិបតី ហ៊ុន ម៉ាណែត អំពាវនាវម៉ឺងម៉ាត់ឱ្យចាត់វិធានការចំពោះមុខតថភាពភូមិសាស្ត្រនយោបាយកាន់តែស្មុគស្មាញ
09/01/2025 09:09 PM
Facebook Telegram Linkin
មន្ត្រីកូរ៉េខាងត្បូង៖ កូរ៉េខាងត្បូង និងអាមេរិក ពិភាក្សាគ្នា «យ៉ាងតានតឹង» ជុំវិញមូលនិធិ នៅមុនជំនួបកំពូល
09/01/2025 08:09 PM
Facebook Telegram Linkin
ក្រុមអ្នកជំនាញ៖ អ៊ីស្រាអែលកំពុងប្រព្រឹត្តអំពើប្រល័យពូជសាសន៍នៅតំបន់ហ្កាហ្សា
09/01/2025 08:09 PM
Facebook Telegram Linkin
នគរបាលអ៊ុយក្រែន សង្ស័យរុស្ស៊ីពាក់ព័ន្ធនឹងការសម្លាប់អតីតប្រធានសភា
09/01/2025 08:09 PM
Facebook Telegram Linkin
រដ្ឋមន្រ្តីសុខាភិបាល «ភាពរឹងមាំក្នុងការបំពេញតួនាទីរបស់មន្រ្តីសុខាភិបាល ធ្វើឱ្យសម្រេចបានគោលដៅ និងទទួលបានលទ្ធផលល្អ តាមការរំពឹងទុក»
09/01/2025 08:09 PM
Facebook Telegram Linkin
«បញ្ហាភាពស៊ាំនៃថ្នាំផ្សះប្រឆាំងមេរោគ គឺផ្តើមពីបុគ្គលម្នាក់ៗ ដែលត្រូវយកចិត្តទុកដាក់ ពិចារណា និងគោរពបទដ្ឋានវេជ្ជសាស្ត្រត្រឹមត្រូវ មុនការសម្រេចប្រើប្រាស់»
09/01/2025 08:09 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.