BTV NEWS

គម្រោងស្ពានឆ្លងកាត់ទន្លេបាសាក់ (ចាក់អង្រែក្រោម-ព្រែកប្រា) និងផ្លូវតភ្ជាប់ សម្រេចបាន ៤៥% ហើយ ដែលលឿនជាងផែនការ ៤,១១%

សម្ដេចធិបតី អំពាវនាវដល់ជនរួមជាតិជឿទុកចិត្តលើរាជរដ្ឋាភិបាលដែលកំពុងធ្វើកិច្ចការងារយ៉ាងសកម្មស្វែងរកដំណោះស្រាយបញ្ចប់បញ្ហាព្រំដែនកម្ពុជា-ថៃ ឱ្យបានឆាប់រហ័ស

សម្ដេចធិបតីផ្ដល់អនុសាសន៍៧ចំណុច ដល់ក្រសួង-ស្ថាប័នពាក់ព័ន្ធឱ្យយកចិត្តទុកដាក់ក្នុងឱកាសទិវាអក្ខរកម្មអន្តរជាតិ ៨ កញ្ញា ២០២៥

សម្ដេចធិបតី៖ រាជរដ្ឋាភិបាលប្តេជ្ញាចិត្តយ៉ាងមុតមាំលើកកម្ពស់ការងារអក្ខរកម្ម និងបំពាក់បំប៉ន ជំនាញ និងឱកាសសិក្សាពេញមួយជីវិត ជាពិសេសជំនាញឌីជីថល

នយោបាយ និង ការអភិវឌ្ឍន៍

លោក Trump ទទួលជ័យជម្នះនៅរដ្ឋ Iowa ហើយលោក DeSantis និង លោកស្រី Haley ដណ្តើមតំណែងទីពីរ

លោក Donald Trump ទទួលបានជ័យជម្នះយ៉ាងច្រើននៅក្នុងការប្រកួតប្រជែងតំណែងប្រធានាធិបតីរបស់គណបក្សសាធារណរដ្ឋឆ្នាំ ២០២៤ លើកដំបូងនៅក្នុងរដ្ឋ Iowa កាលពីថ្ងៃចន្ទ ដោយបានអះអាងពីភាពលេចធ្លោរបស់លោកលើគណបក្ស ខណៈលោកស្វែងរកការតែងតាំងជាលើកទីបីជាប់ៗគ្នា និងការប្រកួតប្រជែងឡើងវិញជាមួយប្រធានាធិបតីគណបក្សប្រជាធិបតេយ្យ លោក Joe Biden ។អង្គការ Edison Research បានព្យាករណ៍ពីជ័យជម្នះនេះ ហើយបាននិយាយថា អភិបាលរដ្ឋ Florida លោក Ron DeSantis និងអតីតឯកអគ្គរដ្ឋទូតអង្គការសហប្រជាជាតិ លោកស្រី Nikki Haley កំពុងតែស្ថិតក្នុងការប្រជែងដណ្តើមយកលំដាប់ទីពីរ ខណៈពួកគេស្វែងរកការបង្ហាញឲ្យឃើញជាជម្រើសសំខាន់ជំនួសលោក Trump ដែលបានកាន់តំណែងជាប្រធានាធិបតីពីឆ្នាំ ២០១៧-២០២១។លោក Trump បានត្រៀមខ្លួនរួចជាស្រេចដើម្បីទទួលជ័យជម្នះដោយកម្រិតមិនធ្លាប់មានពីមុនមកសម្រាប់ការប្រកួតប្រជែងគណបក្សសាធារណៈរដ្ឋនៅរដ្ឋ Iowa ដោយធ្វើឲ្យរឹងមាំករណីរបស់លោកដែលថាការតែងតាំងរបស់លោកគឺជាការសន្និដ្ឋានមុន ដែលបានផ្តល់ឱ្យលោកនូវការនាំមុខដ៏ច្រើន នៅក្នុងការស្ទង់មតិជាតិ ទោះបីជាប្រឈមនឹងការចោទប្រកាន់ចំនួនបួនករណីក៏ដោយ។ជាមួយនឹងសំឡេង ៤០% នៃការបោះឆ្នោតដែលរំពឹងទុកបានកើនឡើង លោក Trump មានសំឡេង ៥២,៦ភាគរយខណៈលោក DeSantis មានសំឡេង ២០ភាគរយ និងលោកស្រី Haley មានសំឡេង១៨,៧ភាគរយ។

EU គ្រោងផ្តល់ហិរញ្ញប្បទានឥតសំណង ៨៦លានអឺរ៉ូ ដើម្បីគាំទ្រវិស័យអាទិភាពនៅកម្ពុជា

សហភាពអឺរ៉ុបគ្រោងផ្តល់ហិរញ្ញប្បទានឥតសំណងប្រមាណ ៨៦លានអឺរ៉ូ ដល់កម្ពុជា សម្រាប់វិស័យកសិកម្ម, អាហារ, ការអនុវត្ត ថាមពលប្រកបដោយចីរភាព ក្នុងឧស្សាហកម្មកាត់ដេរសម្លៀកបំពាក់ ស្បែកជើង និងផលិតផលធ្វើដំណើរ, ការបណ្តុះបណ្តាលអប់រំ បច្ចេកទេស, និងកម្មវិធីពាណិជ្ជកម្ម និងវិស័យឯកជន ។ឯកឧត្តម ឌ្រីសម៉ាន់ អីហ្គោរ៍ (Driesmans Igor) ឯកអគ្គរដ្ឋទូតសហភាពអឺរ៉ុបប្រចាំកម្ពុជា EU នៅក្នុងជំនួបសម្តែងការគួរ សម និងពិភាក្សាការងារជាមួយ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និង ហិរញ្ញវត្ថុ នៅថ្ងៃទី ១៥ ខែ មករា ឆ្នាំ ២០២៣ នេះថា បានវាយតម្លៃខ្ពស់ ចំពោះកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងការអនុវត្តកម្មវិធីកំណែទម្រង់គោលនយោបាយសំខាន់ៗ ដែលសម្រេចបាននូវការរក្សាស្ថិរភាពសង្គម និងការអភិវឌ្ឍសេដ្ឋកិច្ចប្រកប ដោយផ្លែផ្កា បើទោះជាស្ថិតក្នុងគ្រាដ៏លំបាក នៃផលប៉ះពាល់ពីវិបត្តិជំងឺកូដ-១៩, ជម្លោះភូមិសាស្ត្រនយោបាយ និងការបន្តធ្លាក់ចុះ នៃសេដ្ឋកិច្ចសកល ក្នុងរយៈពេលប៉ុន្មានឆ្នាំចុងក្រោយនេះក៏ដោយ ។ឯកឧត្តម លើកឡើងបន្ថែមថា ជុំវិញបរិបថនេះ ជំហរគាំទ្ររបស់ EU ជាពិសេសតាមរយៈយុទ្ធសាស្ត្រ Global Gateway ដែលជាយុទ្ធសាស្ត្រថ្មីរបស់ EU មានគោលបំណងកៀរគរការវិនិយោគបន្ថែម សម្រាប់ប្រទេសជាដៃគូ ដើម្បីបង្កើនវិសាលភាព, ប្រសិទ្ធភាព និងប្រសិទ្ធផល នៃកិច្ចអន្តរាគមន៍របស់ខ្លួន ។ នៅក្នុងយុទ្ធសាស្ត្រនេះផងដែរ ប្រទេសនៅក្នុងតំបន់អឺរ៉ុប និងប្រទេសជាសមាជិក EU ហៅថា “Team Europe” បានបង្កើតជាគំនិតផ្តួចផ្តើម (Team Europe Initiatives - TEIs) ចំនួនពីរ ដើម្បីគាំទ្រ ដល់ការធ្វើសមាហរណកម្មរបស់កម្ពុជាក្នុងអាស៊ាន តាមរយៈការលើកកម្ពស់ការអភិវឌ្ឍបៃតង និងការងារសមរម្យ ក្នុងនោះមាន៖ ការផ្តោតលើចីរភាពខ្សែច្រវាក់តម្លៃកសិកម្ម, និងផ្តោតលើថាមពលបៃតង និងខ្សែច្រវាក់តម្លៃឧស្សាហកម្ម។ជាក់ស្ដែង នៅក្រោមក្របខណ្ឌ Global Gateway នេះផងដែរ, EU និងផ្តល់ហិរញ្ញប្បទានឥតសំណងប្រមាណ ៨៦ លានអឺរ៉ូ ជូនកម្ពុជា សម្រាប់កម្មវិធីថ្មីចំនួន៤រួមមាន៖ កម្មវិធីភាពជាដៃគូរបស់កម្ពុជា សម្រាប់ប្រព័ន្ធកសិកម្ម និងអាហារប្រកបដោយ ចីរភាព, កម្មវិធីភាពជាដៃគូសហភាពអឺរ៉ុប សម្រាប់ការអនុវត្តថាមពលប្រកបដោយចីរភាព ក្នុងឧស្សាហកម្មវិស័យកាត់ដេរសម្លៀក បំពាក់ស្បែកជើង និងផលិតផលធ្វើដំណើរ, កម្មវិធីភាពជាដៃគូសហភាពអឺរ៉ុប-កម្ពុជា សម្រាប់ការបណ្តុះបណ្តាលការអប់រំបច្ចេក ទេស ២០២៤-២០២៧, និងកម្មវិធីពាណិជ្ជកម្ម និងវិស័យឯកជន ។ជាការឆ្លើយតប, ឯកឧត្តមអគ្គបណ្ឌិតសភាចារ្យ ឧបនាយករដ្ឋមន្ត្រី បានថ្លែងកោតសរសើរចំពោះ EU សម្រាប់ការចូលរួម យ៉ាងសកម្ម ក្នុងការជំរុញវឌ្ឍនភាព នៃវិស័យគាំពារសង្គមនៅកម្ពុជា ឆ្ពោះទៅរកនិរន្តរភាព និងភាពធន់ ដែលអាចឆ្លើយតបនឹងបញ្ហា ប្រឈមនានា, ជាពិសេសសហភាពអឺរ៉ុបជួយជាជំហរគាំទ្រកម្ពុជា ក្រោមក្របខណ្ឌ Global Gateway ដែលជាការចូលរួមគាំទ្រដល់ របៀបវារៈគោលនយោបាយអាទិភាពរបស់រាជរដ្ឋាភិបាល និងសង្ឃឹមយ៉ាងមុតមាំថា នឹងអាចសម្រេចបានជោគជ័យតាមផែនការ ដែលបានគ្រោងទុក៕ អត្ថបទ៖ សុន រ៉ាឌី

ប្រធានាធិបតីអ៊ុយក្រែន ចង់ឲ្យប្រទេសចិន ចូលរួមកិច្ចប្រជុំកំពូលសន្តិភាពសកល

លោកប្រធានាធិបតីអ៊ុយក្រែន Volodymyr Zelenskiy បានប្រាប់សន្នសីទសារព័ត៌មានមួយកាលពីថ្ងៃចន្ទថា លោកចង់ឲ្យប្រទេសចិន ចូលរួមសន្និសីទសន្តិភាពសកលដើម្បីដោះស្រាយជម្លោះជាមួយរុស្ស៊ី ។លោក Zelenskiy បានប្រាប់សន្និសីទសារព័ត៌មានមួយនៅក្នុងទីក្រុងប៊ើន(Bern) ប្រទេសស្វីស ថា យើងបើកចំហរដល់គ្រប់ប្រទេសទាំងអស់ក្នុងពិភពលោកដែលគោរពអធិបតេយ្យភាពនិងបុរណភាពទឹកដីរបស់យើង។លោក Zelenskiy បានទៅដល់ប្រទេសស្វីស កាលពីថ្ងៃចន្ទ ដើម្បីចូលរួមវាទិកាសេដ្ឋកិច្ចពិភពលោកក្នុងទីក្រុងដាវ៉ូស (Davos) ប្រទេសស្វីស និងបានជួបជាមួយក្រុមមន្ត្រីស្វីស។លោកស្រីប្រទេសស្វីស វីអូឡា អាមហើដ(Viola Amherd)បាននិយាយថាប្រទេសស្វីស ត្រូវរៀបចំព្រឹត្តិការណ៍នេះ ដែលនឹងចាប់ផ្ដើមនៅថ្ងៃអង្គារទី៦ខែមករានេះ។លោកស្រីប្រធានាធិបតីស្វីស បាននិយាយកាលពីថ្ងៃចន្ទអំឡុងទស្សនកិច្ចរបស់ប្រធានាធិបតីអ៊ុយក្រែន ទៅកាន់ទីក្រុងប៊ើន(Bern)ថា ប្រទេសរបស់លោកស្រី បានផ្ដល់ការរៀបចំកិច្ចប្រជុំសន្តិសុខ ក្នុងបំណងជួយបញ្ចប់សង្រ្គាមដែលនៅតែបន្តរបស់អ៊ុយក្រែនជាមួយប្រទេសរុស្ស៊ី៕-

ប្រទេសស្វីស នឹងធ្វើជាម្ចាស់ផ្ទះនៃកិច្ចប្រជុំកំពូលសន្តិភាពអ៊ុយក្រែន តាមសំណើរបស់លោក Zelenskiy

ប្រទេសស្វីស កាលពីថ្ងៃចន្ទ (១៥ មករា) បានយល់ព្រមធ្វើជាម្ចាស់ផ្ទះនៃកិច្ចប្រជុំកំពូលសន្តិភាពពិភពលោកស្តីពីអ៊ុយក្រែន តាមសំណើរបស់ប្រធានាធិបតីអ៊ុយក្រែន លោក វ្ល៉ូឌីមី ហ៊្សេឡិនស្គី (Volodymyr Zelenskiy)។ ស្វីស ដែលជាប្រទេអព្យាក្រឹត កាលពីមុនបានដើរតួជាអ្នកសម្របសម្រួលដើម្បីដោះស្រាយជម្លោះជាច្រើន ហើយឥឡូវនេះអាចជួយស្វែងរកដំណោះស្រាយសម្រាប់សង្រ្គាមដែលបានចាប់ផ្តើមនៅពេលដែលរុស្ស៊ី បានបញ្ជូនកងទ័ពចូលទៅក្នុងអ៊ុយក្រែន នៅថ្ងៃទី២៤ ខែកុម្ភៈ ឆ្នាំ២០២២។ថ្លែងជាមួយសមភាគីស្វីស លោក វីអូឡា អាមហឺត (Viola Amherd) ក្នុងសន្និសីទសារព័ត៌មាននៅទីក្រុងប៊ឺន (Bern) លោកប្រធានាធិបតី ហ៊្សេឡិនស្គី មិនបានផ្តល់បញ្ជីទូលំទូលាយនៃអ្នកចូលរួមនៃកិច្ចប្រជុំកំពូលសន្តិភាពដែលបានគ្រោងទុកនោះទេ ប៉ុន្តែបានចង្អុលបង្ហាញអំពីអ្នកដែលលោកចង់ឲ្យចូលរួមដូចជាបណ្ដាប្រទេសសកលខាងត្បូង និងចិន ដែលជាសម្ព័ន្ធមិត្តដ៏សំខាន់មួយរបស់រុស្ស៊ី។លោក ហ៊្សេឡិនស្គី បានប្រកាសជាលើកដំបូងនូវរូបមន្តសន្តិភាពរបស់ខ្លួននៅឯកិច្ចប្រជុំកំពូលខែវិច្ឆិកា នៃក្រុមសេដ្ឋកិច្ចសំខាន់ៗចំនួន ២០ប្រទេស។ រូបមន្តសន្តិភាពរបស់លោកគឺអំពាវនាវឱ្យមានការស្ដារឡើងវិញនូវបូរណភាពទឹកដីរបស់អ៊ុយក្រែន ការដកកងទ័ពរុស្ស៊ី និងការបញ្ឈប់អរិភាព ក៏ដូចជាការដោះលែងអ្នកទោស និងអ្នកជាប់ឃុំទាំងអស់ ក្នុងចំណោមរឿងផ្សេងៗទៀត។វិមានក្រឹមឡាំងកាលពីថ្ងៃចន្ទ បានច្រានចោលការពិភាក្សានៅទីក្រុងដេវ៉ូស (Davos) ស្តីពីសំណើសន្តិភាពរបស់អ៊ុយក្រែន ដោយនិយាយថា មិនមានអ្វីនឹងអាចសម្រេចបានទេព្រោះរុស្ស៊ីមិនមែនជាផ្នែកនៃកិច្ចពិភាក្សា៕

ក្រុមហ៊ុន EDF របស់បារាំង បង្ហាញបំណងវិនិយោគលើវិស័យថាមពលកកើតឡើងវិញនៅកម្ពុជា

លោកស្រី Makreeta LAHTI នាយិកាយុទ្ធសាស្ត្រកិច្ចការបរទេស នៃក្រុមហ៊ុនអគ្គិសនីបារាំង (Électricité de France, EDF) បានបង្ហាញបំណងវិនិយោគលើវិស័យថាមពលកកើតឡើងវិញនៅកម្ពុជា ខណៈសព្វ ថ្ងៃក្រុមហ៊ុនរបស់លោកស្រីបាននិងកំពុងវិនិយោគលើវិស័យវារីអគ្គិសនីនេះ នៅប្រទេសឡាវ។នៅក្នុងកិច្ចជំនួបជាមួយសម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា នៅទីក្រុងប៉ារីសប្រ ទេសបារាំងនាថ្ងៃទី១៥ ខែមករា ឆ្នាំ២០២៤នេះ លោកស្រី Makreeta LAHTI បានថ្លែងអំណរគុណចំពោះ សម្តេចធិបតី ដែលបានឆ្លៀតពេលវេលាដ៏មមាញឹកអនុញ្ញាតឱ្យលោកស្រី ចូលជួបសម្តែងការគួរសម ព្រមទាំងបានជម្រាបអំពីវឌ្ឍនភាពរីកចម្រើននៃសកម្មភាពអាជីវកម្មរបស់ក្រុមហ៊ុន EDF។ លោកស្រីបានគោរពជម្រាបជូនសម្ដេចធិបតី បន្ថែមទៀតថា ក្រុមហ៊ុនរបស់លោកស្រីបាននិងកំពុងវិនិយោគលើវិស័យវារីអគ្គិសនី នៅប្រទេសឡាវ និងកំពុងស្វែងរកឱកាសវិនិយោគលើវិស័យថាមពលនេះនៅកម្ពុជា។ ជាមួយគ្នានេះលោកស្រីបានវាយតម្លៃខ្ពស់ ចំពោះគោលនយោបាយអព្យាក្រឹត្យកាបូន នៅឆ្នាំ២០៥០ និងការយកចិត្តទុកដាក់ក្នុងការជំរុញការផ្គត់ផ្គង់ និងការផលិតនូវថាមពលកកើតឡើងវិញ របស់រាជរដ្ឋាភិបាលកម្ពុជាផងដែរ។ នៅក្នុងកិច្ចជំនួបនោះដែរ សម្តេចធិបតី នាយករដ្ឋមន្រ្តី ក៏បានប្រកាសស្វាគមន៍ចំពោះលោកស្រី Makreeta LAHTI និងបានបង្ហាញក្តីរីករាយចំពោះចំណាប់រម្មណ៍របស់ក្រុមហ៊ុន ក្នុងប្រតិបត្តិការនៅក្នុងប្រទេសកម្ពុជា ផ្នែកថាមពលកកើតឡើងវិញ និងស្នើឱ្យក្រុមហ៊ុនបន្តកិច្ចសហប្រតិបត្តិការល្អជាមួយក្រសួងរ៉ែ និងថាមពល ក៏ដូចជាអគ្គីសនីកម្ពុជា និងភាគីពាក់ព័ន្ធនានា ដើម្បីស្វែងរកឱកាសវិនិយោគលើវិស័យថាមពលកកើតឡើងវិញនេះ។សម្ដេចធិបតីនាយករដ្ឋមន្រ្តី បានគូសបញ្ជាក់បន្ថែមទៅកាន់លោកស្រី Makreeta LAHTI អំពីច្បាប់វិនិយោគរបស់កម្ពុជា ក្នុងការផ្ដល់ការអនុគ្រោះ និងលើកទឹកចិត្តដល់សកម្មភាពវិនិយោគក្នុងវិស័យនេះ ហើយសន្តិសុខថាមពលក៏ជាអាទិភាពមួយ ដែលជានិន្នាការរបស់ពិភពលោក ឆ្ពោះទៅកាន់អព្យាក្រឹត្យកាបូននៅថ្ងៃអនាគតផងដែរ៕ អត្ថបទ៖ បាន ចក់

សម្ព័ន្ធនិយោជកហ្រ្វង់កូហ្វូន ប្ដេជ្ញាជួយផ្សព្វផ្សាយឱកាសវិនិយោគកម្ពុជាដល់ក្រុមហ៊ុនបារាំង ខណៈកម្ពុជាកំពុងមានសុខសន្តិភាព

នៅក្នុងកិច្ចជំនួបជាមួយសម្តេចធិបតី ហ៊ុន ម៉ាណែត នាយករដ្ឋមន្រ្តីកម្ពុជានៅទីក្រុងប៉ារីស ប្រទេសបារាំងនាថ្ងៃទី១៥ ខែមករានេះ លោក Geoffroy Roux De Bezieux ប្រធានសម្ព័ន្ធនិយោជកហ្រ្វង់កូហ្វូន (APF) បានប្តេជ្ញាជួយផ្សព្វផ្សាយឱកាសវិនិយោគនៅកម្ពុជាទៅកាន់បណ្តាក្រុមហ៊ុនបារាំង បន្ទាប់ពីលោកមើលឃើញថា កម្ពុជាមានស្ថិរភាពម៉ាក្រូសេដ្ឋកិច្ច ស្ថិរភាពនយោបាយ និងសុខសន្តិភាពពេញលេញនោះ។នៅក្នុងកិច្ចជំនួបនោះ លោកប្រធាន APF បានគោរពជម្រាបជូនសម្តេចធិបតី អំពីបំណងរបស់ APF ក្នុងការស្វែងរកឱកាសវិនិយោគនៅកម្ពុជា ដែលនេះជាពេលវេលាដ៏សមស្របសម្រាប់ក្រុមហ៊ុនបារាំងពិចារណា និងស្វែងរកទីផ្សារបន្ថែមទៀតនៅក្នុងទ្វីបអាស៊ី ជាពិសេសនៅប្រទេសកម្ពុជា ដែលជាប្រទេសស្ថាបនិក នៃអង្គការអន្តរជាតិហ្រ្វង់កូហ្វូនី និងជាប្រទេសដែលបានដាក់បេក្ខភាពជាម្ចាស់ផ្ទះរៀបចំកិច្ចប្រជុំកំពូល នៃអង្គការអន្តរជាតិហ្រ្វង់កូហ្វូនីឆ្នាំ២០២៦។ លោកប្រធាន APF បានបង្ហាញ«នូវការប្តេជ្ញាចិត្តក្នុងការផ្សព្វផ្សាយ និងផ្តល់ព័ត៌មានអំពីឱកាសវិនិយោគនៅកម្ពុជា ដើម្បីឱ្យក្រុមហ៊ុនបារាំង បានស្គាល់កម្ពុជា ឱ្យ៝កាន់តែច្បាស់បន្ថែមទៀត ព្រោះកម្ពុជាមានស្ថិរភាពម៉ាក្រូសេដ្ឋកិច្ច ស្ថិរភាពនយោបាយ និងសុខសន្តិភាពពេញលេញ»។ លោកបន្ថែមថា នេះជាឱកាសល្អក្នុងការផ្សព្វផ្សាយអំពីឱកាសវិនិយោគនៅកម្ពុជាដល់ក្រុមហ៊ុនបារាំង ដោយសារតែកម្ពុជាអាចនឹងក្លាយជាម្ចាស់ផ្ទះរៀបចំកិច្ចប្រជុំកំពូលនៃអង្គការអន្តរជាតិហ្រ្វង់កូហ្វូនីឆ្នាំ២០២៦ ហើយកម្ពុជាក៏មានឱកាសបង្ហាញនូវភាពទាក់ទាញដល់វិនិយោគិន ជាមួយនឹងទំនាក់ទំនងដ៏ល្អរវាងបារាំង និងកម្ពុជានាពេលកន្លងមកផងដែរ។ឆ្លើយតបនឹងការលើកឡើងរបស់លោកប្រធាន APF សម្តេចធិបតីនាយករដ្ឋមន្រ្តី បានស្វាគមន៍ និងសម្ដែងនូវក្ដីរីករាយ ដែលបានជួបពិភាក្សាការងារជាមួយលោក Geoffroy Roux De Bezieux ហើយសម្តេចធិបតីបានលើកឡើងថា ក្រៅពីអ្វីដែលក្រុមហ៊ុនបារាំងបានវិនិយោគនៅប្រទេសដទៃ ក្រុមហ៊ុនគួរតែពិចារណាស្វែងរកឱកាសវិនិយោគនៅកម្ពុជា ដែលមានច្បាប់វិនិយោគ និងបរិស្ថានដ៏ល្អប្រសើរ សម្រាប់ការវិនិយោគ ជាពិសេសលើវិស័យបច្ចេកវិទ្យាថ្មី វិស័យថាមពលកកើតឡើងវិញ បចេ្ចកវិទ្យាឌីជីថល ហេដ្ឋារចនាសម្ព័ន្ធ និងវិស័យកសិកម្មជាដើម។ជាមួយគ្នានោះដែរសម្តេចធិបតី ក៏បានថ្លែងអំណរគុណចំពោះលោកប្រធាន APF សម្រាប់ការជួយផ្សព្វផ្សាយ និងការផ្តល់ព័ត៌មានជាច្រើនអំពីកម្ពុជាជូនដល់ក្រុមហ៊ុនបារាំង ដែលកម្ពុជាក៏មានបំណងផ្សារភ្ជាប់ខ្លួនទៅក្នុងច្រវាក់ផ្គត់ផ្គង់តំបន់ និងពិភពលោកផងដែរ។ សម្តេចធិបតីក៏បានបង្ហាញនូវសេចក្តីសង្ឃឹមថា ក្រុមហ៊ុនបារាំងនឹងស្វែងរកឱកាសវិនិយោគនៅកម្ពុជា ដោយរាជរដ្ឋាភិបាលបន្តអនុវត្តនូវអភិក្រមដែលមានលក្ខណៈប្រាកដនិយម ក្នុងការគាំទ្រដល់ការធ្វើវិនិយោគ តាមរយៈការបង្កើតបរិស្ថានអំណោយផល និងការផ្តល់ដំណោះស្រាយជាក់ស្តែងចំពោះវិស័យជាក់លាក់ ដើម្បីឱ្យអ្វីៗអាចដំណើរការបាន និងការធ្វើប្រតិបត្តិការអាជីវកម្មទទួលបានជោគជ័យផងដែរ៕ អត្ថបទ៖ បាន ចក់

ក្រុមហ៊ុន ប្រេងឥន្ធនៈ TotalEnergies បង្ហាញបំណងចង់វិនិយោគ លើថាមពល កកើតឡើងវិញនៅកម្ពុជា

នៅក្នុងកិច្ចជំនួបពិភាក្សាការងារជាមួយសម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា នៅ ទីក្រុងប៉ារីស ប្រទេសបារាំង នាថ្ងៃទី១៥ ខែមករានេះ លោក Patrick POUYANNÉ ប្រធាន និងជានាយកប្រតិបត្តិក្រុមហ៊ុន TotalEnergies បានបង្ហាញបំណងចង់វិនិយោគលើថាមពលកកើតឡើងវិញនៅកម្ពុជា ខណៈ គម្រោងនេះនឹងធ្វើឱ្យកម្ពុជាកាន់តែមានជម្រើសប្រភពថាមពលបន្ថែមទៀត។ លោកប្រធាន និងជានាយកប្រតិបត្តិ បានគោរពជម្រាបជូនសម្តេចធិបតីថា ក្រុមហ៊ុន TotalEnergies របស់លោក គឺជាក្រុមហ៊ុនមានកិត្តិនាមល្បីល្បាញ លើវិស័យប្រេង និងឧស្ម័ន នៅព្រះរាជាណាចក្រកម្ពុជា ហើយក្រៅពីវិស័យនេះ ក្រុមហ៊ុនក៏មានអាជីវកម្មលើវិស័យថាមពល អគ្គិសនីផងដែរ។ ក្នុងន័យនេះ លោកប្រធាន និងជានាយកប្រតិបត្តិក្រុមហ៊ុន ក៏បានបង្ហាញអំពីបំណងក្នុងការស្វែងរកឱកាសវិនិយោគលើវិស័យថាមពលកកើតឡើងវិញ ដោយបច្ចុប្បន្នក្រុមហ៊ុន TotalEnergies កំពុងស្វែងរកឱកាសវិនិយោគលើវិស័យថាមពលកកើតឡើងវិញនៅប្រទេសសិង្ហបុរី ហើយជោគជ័យនៃគម្រោងនេះនឹងជំរុញដល់ការវិនិយោគលើថាមពលកកើតឡើងវិញនៅកម្ពុជា ដែលនឹងធ្វើឱ្យកម្ពុជាកាន់តែមានជម្រើសប្រភពថាមពលបន្ថែមទៀតផងដែរ។ នៅក្នុងកិច្ចជំនួបនោះដែរ លោក Patrick POUYANNÉ ក៏បានថ្លែងអំណរគុណដល់សម្តេចធិបតីនាយករដ្ឋមន្រ្តី ដែលបានឆ្លៀតពេលវេលាដ៏មមាញឹកអនុញ្ញាតឱ្យរូបលោក និងសហការី ចូលជួបសម្តែងការគួរសមព្រមទាំងបានជម្រាបអំពីវឌ្ឍនភាពនៃការរីកចម្រើននូវសកម្មភាពអាជីវកម្មរបស់ក្រុមហ៊ុន TotalEnergies និងអំពីគម្រោងនៃការពង្រីកការវិនិយោគរបស់ខ្លួនបន្ថែមទៀតនៅក្នុងប្រទេសកម្ពុជានោះ។ថ្លែងនៅក្នុងកិច្ចជំនួបនោះដែរសម្តេចធិបតី ហ៊ុន ម៉ាណែត បានស្វាគមន៍ចំពោះលោក Patrick POUYANNÉ និង សហការី និងបានបង្ហាញក្តីរីករាយ និងគាំទ្រចំពោះគម្រោងរបស់ក្រុមហ៊ុនក្នុងការបោះទុនវិនិយោគនៅកម្ពុជាទៅលើវិស័យថាមពលកកើតឡើងវិញ ព្រោះថាកម្ពុជាមានគោលនយោបាយច្បាស់លាស់ក្នុងការជំរុញការបង្កើតប្រភពថាមពលកកើតឡើងវិញនេះ។ សម្តេចក៏បានបង្ហាញការគាំទ្រ និងផ្ដល់កិច្ចសហប្រតិបតិ្តការលើការវិនិយោគនៃការតភ្ជាប់បណ្តាញចរន្តអគ្គិសនី ក្រោមបាតសមុទ្រពីកម្ពុជាទៅសិង្ហបុរីផងដែរ។ មួយវិញទៀតសម្ដេចធិបតីក៏បានលើកទឹ៝ចិត្ត និងជំរុញឱ្យក្រុមហ៊ុន បន្ដកិច្ចសហការជាមួយក្រសួង ស្ថាប័នពាក់ព័ន្ធ ជាពិសេស ក្រសួងរ៉ែ និងថាមពលផងដែរ៕ អត្ថបទ៖បាន ចក់

ក្រុមហ៊ុន Blue Circle របស់បារាំងថា ខេត្តចំនួនពីរនៅកម្ពុជាដែលអាចផ្តល់លទ្ធភាពផលិតអគ្គិសនីដើរដោយខ្យល់បាន

ក្រុមហ៊ុន Blue Circle របស់បារាំង ចាប់អារម្មណ៍វិនិយោគលើថាមពលកកើតឡើងវិញ ពិសេសថាមពលដែលដើរដោយកម្លាំងខ្យល់នៅកម្ពុជាក្រោយក្រុមហ៊ុននេះបានកត់សម្គាល់ឃើញថាខេត្តចំនួនពីរនៅកម្ពុជា មានខេត្តកំពត និងខេត្តមណ្ឌលគិរី ដែលអាចផ្តល់លទ្ធភាពផលិតអគ្គិសនីដើរដោយកម្លាំងខ្យល់បាន។ក្នុងកិច្ចជំនួបជាមួយសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីកម្ពុជា នាថ្ងៃទី១៥ ខែមករា ឆ្នាំ២០២៤ នៅទីក្រុងប៉ារីស ប្រទេសបារាំង លោក Olivier Duguet ប្រធាន និងជានាយកប្រតិបត្តិក្រុមហ៊ុន Blue Circle បានថ្លែងអំណរគុណចំពោះ សម្តេចធិបតី ដែលបានឆ្លៀតពេលវេលាដ៏មមាញឹកអនុញ្ញាតឱ្យរូបលោក និងសហការី ចូលជួបសម្តែងការគួរសម ព្រមទាំងបានជម្រាបអំពីវឌ្ឍនភាពរីកចម្រើន នៃសកម្មភាពអាជីវកម្មរបស់ក្រុមហ៊ុន Blue Circle និងអំពីគម្រោងនៃការពង្រីកការវិនិយោគរបស់ខ្លួននៅក្នុងប្រទេសកម្ពុជាផងដែរ។ លោកនាយកប្រតិបត្តិក្រុមហ៊ុន បានគូសរំលេចជូនសម្តេចធិបតីថា ក្រុមហ៊ុន របស់លោក គឺជាក្រុមហ៊ុន មានជំនាញ និងបទពិសោធន៍ក្នុងអាជីវកម្មថាមពលកកើតឡើងវិញ ពិសេសថាមពលដែលដើរដោយកម្លាំងខ្យល់ ហើយកន្លងមកតំណាងក្រុមហ៊ុនរបស់លោក បានធ្លាប់មកកាន់តំបន់អាស៊ី រួមទាំងកម្ពុជាផងដែរ និងបានជួបពិភាក្សាជាមួយក្រុមហ៊ុនដែលជាដៃគូក្នុងស្រុក ក្នុងការសិក្សាស្វែងយល់ពីស្ថានភាពភូមិសាស្រ្តនៅកម្ពុជា និងរកទីតាំងដែលសម្បូរខ្យល់ ក្នុងកម្រិតល្បឿនល្អដែលអាចផលិតជាថាមពលអគ្គិសនីបាន។ លោកបន្ថែមទៀតថា «ក្រោយពីការសិក្សាទៅលើស្ថានភាពភូមិសាស្រ្តរួចមកខាងក្រុមហ៊ុន បានកត់សម្គាល់ទីតាំងមួយចំនួនដែលអាចផ្តល់លទ្ធភាពផលិតអគ្គិសនីដើរដោយកម្លាំងខ្យល់ រួមមាន តំបន់ភ្នំបូកគោ ក្នុងខេត្តកំពត និងខេត្តមណ្ឌលគីរីជាដើម»។ ជាមួយគ្នានោះលោកនាយកប្រតិបត្តិក្រុមហ៊ុន ក៏បានគោរពជម្រាបជូនសម្តេចធិបតីថា ជាមួយការជួយជ្រោមជ្រែង និងការសហប្រតិបត្តិការល្អជាមួយនឹងដែគូពាក់ព័ន្ធនឹងកម្ពុជា និងការគាំពារពីរាជរដ្ឋាភិបាល ក្រុមហ៊ុននឹងអាចផលិតថាមពលអគ្គិសនីបានច្រើន ដោយក្នុងដំណាក់កាលដំបូង ក្រុមហ៊ុនអាចផលិតថាមពលបាន១០០ មេហ្កាវ៉ាត់ និងអាចឈានទៅពង្រីកជាបន្តបន្ទាប់ ទៅថ្ងៃអនាគត។ ក្នុងន័យនេះ កម្ពុជាអាចនឹងទទួលបានប្រភពថាមពលអគ្គិសនីដែលកើតចេញពីប្រភពកកើតឡើងវិញកាន់តែច្រើន និងអាចនាំចេញថាមពលអគ្គិសនីទៅក្រៅប្រទេស បានផងដែរ។ ថ្លែងនៅក្នុងកិច្ចជំនួបនោះដែរម្តេចធិបតី ហ៊ុន ម៉ាណែត បានស្វាគមន៍ចំពោះលោក Olivier Duguet និងសហការី និងបានបង្ហាញក្តីរីករាយ និងសូមគាំទ្រចំពោះគម្រោងរបស់ក្រុមហ៊ុនដែលចាប់អារម្មណ៍ក្នុងការបោះទុនវិនិយោគនៅក្នុងព្រះរាជាណាចក្រកម្ពុជា និងសូមជូនពរក្រុមហ៊ុនទទួលបានជោគជ័យលើកិច្ចការដែលវិនិយោគនៅពេលអនាគត និងស្នើក្រុមហ៊ុនទាក់ទងជាមួយដៃគូ ក៏ដូចជាក្រសួង ស្ថាប័នពាក់ព័ន្ធនៅកម្ពុជា ដើម្បីពិនិត្យលទ្ធភាព និងស្វែងរកឱកាសធ្វើយ៉ាងណាឱ្យគម្រោងផលិតថាមពលអគ្គិសនី ដើរដោយកម្លាំងខ្យល់នេះ ឱ្យសម្រេចបានជាលទ្ធផលផ្លែផ្កាជាក់ស្តែងផងដែរ៕ អត្ថបទ៖ បាន ចក់

រដ្ឋមន្ត្រីក្រសួងការងារ ស្វែងយល់ការបណ្តុះបណ្តាលជំនាញផលិតនាឡិកាស្តង់ដារស្វីសរបស់Prince Horology

ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ នៅរសៀលថ្ងៃទី១៥ ខែមករា ឆ្នាំ២០២៤នេះ បានអញ្ជើញទស្សនា និងស្វែងយល់ការបណ្តុះបណ្តាលជំនាញផលិតនាឡិកាដៃរបស់មជ្ឈមណ្ឌលបណ្តុះបណ្តាលវិជ្ជាជីវៈPrince Horology ដែលមានទីតាំងក្នុងរាជធានីភ្នំពេញ។ ក្នុងឱកាសនោះ អ្នកជំនាញរបស់មជ្ឈមណ្ឌល បានពន្យល់ឯកឧត្តមរដ្ឋមន្ត្រីពីដំណាក់កាលនីមួយៗនៃការបណ្តុះបណ្តាល និងហ្វឹកហ្វឺនសិក្ខាកាម និងបុគ្គលិកខ្មែរដែលកំពុងហាត់ការ និងបម្រើការងារក្នុងមជ្ឈមណ្ឌលផ្ទាល់។ តាមគោលការណ៍មជ្ឈមណ្ឌលផ្តល់ការហ្វឹកហ្វឺនជូនសិក្ខាកាមរយៈពេល២ឆ្នាំ ដោយភ្ជាប់នឹងប្រាក់ឧបត្ថម្ភផងដែរ ដើម្បីឱ្យសិក្ខាកាមអាចក្រេបជញ្ជក់ដើម្បីទទួលបានអាជីពដ៏កម្រនេះព្រោះថា ថ្វីត្បិតតែមជ្ឈមណ្ឌលមិនស្វែងរកប្រាក់ចំណេញចេញពីការផលិតក៏ពិតមែន ប៉ុន្តែមជ្ឈមណ្ឌលបាននាំចូលបច្ចេកវិទ្យាស្តង់ដារនៃប្រទេសស្វីស តាមរយៈអ្នកជំនាញរបស់ស្វីសមកបណ្តុះបណ្តាលផ្ទាល់។ ជាមួយគ្នានោះ ឯកឧត្តមរដ្ឋមន្ត្រី បានវាយតម្លៃខ្ពស់ចំពោះមជ្ឈមណ្ឌលបណ្ដុះបណ្តាលវិជ្ជាជីវៈ Prince Horology ដែលបានបណ្តុះបណ្តាលជំនាញពិសេសនេះឱ្យពលរដ្ឋខ្មែរ។ សូមរំលឹកថា មជ្ឈមណ្ឌលបណ្តុះបណ្តាលវិជ្ជាជីវៈ Prince Horology នេះហើយដែលបានផលិតនាឡិកាជូនប្រមុខរដ្ឋ និងប្រមុខរដ្ឋាភិបាល អាស៊ាន និងពិភពលោកក្នុងកិច្ចប្រជុំកំពូលអាស៊ានលើកទី៤១ កាលពីឆ្នាំ២០២២ដែលកម្ពុជាធ្វើជាម្ចាស់ផ្ទះ៕

កិច្ចពិភាក្សាផែនការសន្តិភាពអ៊ុយក្រែននៅទីក្រុង Davos បញ្ចប់ដោយគ្មានផ្លូវច្បាស់លាស់ទៅមុខ

កិច្ចប្រជុំនៃទីប្រឹក្សាសន្តិសុខជាតិ ផ្តោតលើផែនការសន្តិភាពរបស់អ៊ុយក្រែន បានបញ្ចប់នៅទីក្រុង Davos ប្រទេសស្វ៊ីស ដោយពុំមានផ្លូវច្បាស់លាស់ឆ្ពោះទៅមុខ មុនពេលការមកដល់របស់លោកប្រធានាធិបតី វ៉ូឡូមៀ ហ្សេឡិនស្គី (Volodymyr Zelenskiy) ទៅចូលរួមកិច្ចប្រជុំសកល នៅថ្ងៃអង្គារ។ទីក្រុងគីវ បានសង្ឃឹមថា កិច្ចប្រជុំដែលបានធ្វើឡើងមុនពេលចាប់ផ្តើមជាផ្លូវការនៃវេទិកាសេដ្ឋកិច្ចពិភពលោកនៅទីក្រុងតំបន់ភ្នំនៃប្រទេសស្វ៊ីស នឹងជួយកសាងការគាំទ្រសម្រាប់ផែនការសន្តិភាព ១០ចំណុចរបស់ខ្លួនក្នុងចំណោមប្រទេសមកពីសកលលោកខាងត្បូង ដែលភាគច្រើនមានការស្ទាក់ស្ទើរ ក្នុងការគាំទ្រ គីវ ចាប់តាំងពីការឈ្លានពានរបស់រុស្ស៊ីជិតពីរឆ្នាំហើយនោះ។រដ្ឋមន្ត្រីការបរទេសស្វ៊ីស លោក Ignazio Cassis ដែលធ្វើជាប្រធានកិច្ចប្រជុំ បាននិយាយថា ជំនួបនេះ បានបំភ្លឺចំណុចមួយចំនួនសម្រាប់ពិភាក្សានៅដំណាក់កាលខ្លះ ប៉ុន្តែថា ទាំងអ៊ុយក្រែន និងរុស្ស៊ី ដែលមិនត្រូវបានអញ្ជើញ ត្រូវបានរៀបចំដើម្បីធ្វើសម្បទានទឹកដី។ កិច្ចប្រជុំថ្នាក់ដឹកនាំដែលអ៊ុយក្រែនចង់ធ្វើ មិនត្រូវបានកំណត់ពេលវេលាទេ។នៅក្នុងសន្និសីទសារព័ត៌មានមួយ ជំនួយការប្រធានាធិបតីលោក Andriy Yermak បាននិយាយថា អ៊ុយក្រែន មិនត្រូវបានដាក់សម្ពាធដោយដៃគូ ដើម្បីពិភាក្សាអំពីការប្រគល់ទឹកដីទៅឲ្យរុស្ស៊ី ជិតពីរឆ្នាំបន្ទាប់ពីការលុកលុយ។ រដ្ឋមន្ត្រីការពារជាតិ លោក Rustem Umerov បាននិយាយថា ការវិលត្រឡប់ទៅកាន់ព្រំដែនឆ្នាំ ១៩៩១នៅតែជាគោលដៅយុទ្ធសាស្ត្ររបស់អ៊ុយក្រែន។ នោះនឹងរួមបញ្ចូលឧបទ្វីបគ្រីម៉េដែលជាឧបទ្វីបដែលរុស្ស៊ីបញ្ចូលដោយខុសច្បាប់ ក្នុងឆ្នាំ ២០១៤។

បណ្ដាញសង្គម

ព័ត៌មានថ្មីៗ

តំណាងអចិន្ត្រៃយ៍កម្ពុជា ប្រចាំ UN ចូលរួមថ្លែងការណ៍នៅក្នុងកិច្ចប្រជុំបើកចំហររបស់ក្រុមប្រឹក្សាសន្តិសុខ UN

អភិបាលខេត្តតាកែវដឹកនាំកិច្ចប្រជុំជាមួយក្រុមហ៊ុនទទួលបន្ទុកសាងសង់គម្រោងព្រែកជីកហ្វូណនតេជោ ពិភាក្សាលើចំណុចគន្លឹះចំនួន៤

ក្រោយជំនួបជាមួយរដ្ឋមន្រ្ដីការពារជាតិ, ក្រុមអ្នកសង្កេតការណ៍អន្តរកាល (IOT) បន្តដំណើរពីភ្នំពេញឆ្ពោះទៅខេត្តព្រះវិហារ និងបន្ទាយមានជ័យដើម្បីសង្កេតការណ៍ ផ្ទៀងផ្ទាត់ និងរាយការណ៍អំពីស្ថានភាពព្រំដែនក្រោយបទឈប់បាញ់

បាតុករនេប៉ាល់ ចង់ឱ្យអតីតរដ្ឋមន្រ្តីយុត្តិធម៌ ធ្វើនាយករដ្ឋមន្ត្រីបណ្ដោះអាសន្ន ខណៈកងទ័ពប្រឹងស្ដារសណ្តាប់ធ្នាប់

សម្តេចអគ្គមហាពញាចក្រី ហេង សំរិន និងសម្តេចធម្មវិសុទ្ធវង្សា សៅ ទី ហេង សំរិន អញ្ជើញចូលរួមកាន់បិណ្ឌវេនទី៤

អស្ថិរភាពនយោបាយ និងបញ្ហាសេដ្ឋកិច្ច ជាមូលហេតុនៅពីក្រោយកំហឹងដ៏កម្រោលរបស់បាតុករនេប៉ាល់

ប្លុកអឺរ៉ុប កំពុងជំរុញទណ្ឌកម្មថ្មីលើរុស្ស៊ី ខណៈពង្រីកជំនួយយោធា និងហិរញ្ញវត្តុដល់អ៊ុយក្រែន

កាតា ចង់បាន "ការឆ្លើយតបរួម" ចំពោះការវាយប្រហាររបស់អ៊ីស្រាអែល ខណៈមជ្ឈិមបូព៌ាស្ថិតក្នុងហានិភ័យ

កម្ពុជា-បារាំង បានឯកភាពរៀបចំសម័យប្រជុំលើកទី៣នៃកិច្ចពិគ្រោះយោបល់នយោបាយទ្វេភាគីនាចុងឆ្នាំ២០២៥នេះ នៅរាជធានីភ្នំពេញ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

នយោបាយ និង ការអភិវឌ្ឍន៍

លោក Trump ទទួលជ័យជម្នះនៅរដ្ឋ Iowa ហើយលោក DeSantis និង លោកស្រី Haley ដណ្តើមតំណែងទីពីរ

EU គ្រោងផ្តល់ហិរញ្ញប្បទានឥតសំណង ៨៦លានអឺរ៉ូ ដើម្បីគាំទ្រវិស័យអាទិភាពនៅកម្ពុជា

ប្រធានាធិបតីអ៊ុយក្រែន ចង់ឲ្យប្រទេសចិន ចូលរួមកិច្ចប្រជុំកំពូលសន្តិភាពសកល

ប្រទេសស្វីស នឹងធ្វើជាម្ចាស់ផ្ទះនៃកិច្ចប្រជុំកំពូលសន្តិភាពអ៊ុយក្រែន តាមសំណើរបស់លោក Zelenskiy

ក្រុមហ៊ុន EDF របស់បារាំង បង្ហាញបំណងវិនិយោគលើវិស័យថាមពលកកើតឡើងវិញនៅកម្ពុជា

ក្រុមហ៊ុន ប្រេងឥន្ធនៈ TotalEnergies បង្ហាញបំណងចង់វិនិយោគ លើថាមពល កកើតឡើងវិញនៅកម្ពុជា

ក្រុមហ៊ុន Blue Circle របស់បារាំងថា ខេត្តចំនួនពីរនៅកម្ពុជាដែលអាចផ្តល់លទ្ធភាពផលិតអគ្គិសនីដើរដោយខ្យល់បាន

រដ្ឋមន្ត្រីក្រសួងការងារ ស្វែងយល់ការបណ្តុះបណ្តាលជំនាញផលិតនាឡិកាស្តង់ដារស្វីសរបស់Prince Horology

កិច្ចពិភាក្សាផែនការសន្តិភាពអ៊ុយក្រែននៅទីក្រុង Davos បញ្ចប់ដោយគ្មានផ្លូវច្បាស់លាស់ទៅមុខ

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

នយោបាយ​ និង ការអភិវឌ្ឍន៍

លោក Trump ទទួលជ័យជម្នះនៅរដ្ឋ Iowa ហើយលោក DeSantis និង លោកស្រី Haley ដណ្តើមតំណែងទីពីរ

EU គ្រោងផ្តល់ហិរញ្ញប្បទានឥតសំណង ៨៦លានអឺរ៉ូ ដើម្បីគាំទ្រវិស័យអាទិភាពនៅកម្ពុជា

ប្រធានាធិបតីអ៊ុយក្រែន ចង់ឲ្យប្រទេសចិន ចូលរួមកិច្ចប្រជុំកំពូលសន្តិភាពសកល

ប្រទេសស្វីស នឹងធ្វើជាម្ចាស់ផ្ទះនៃកិច្ចប្រជុំកំពូលសន្តិភាពអ៊ុយក្រែន តាមសំណើរបស់លោក Zelenskiy

ក្រុមហ៊ុន EDF របស់បារាំង បង្ហាញបំណងវិនិយោគលើវិស័យថាមពលកកើតឡើងវិញនៅកម្ពុជា

ក្រុមហ៊ុន ប្រេងឥន្ធនៈ TotalEnergies បង្ហាញបំណងចង់វិនិយោគ លើថាមពល កកើតឡើងវិញនៅកម្ពុជា

ក្រុមហ៊ុន Blue Circle របស់បារាំងថា ខេត្តចំនួនពីរនៅកម្ពុជាដែល​អាចផ្តល់​លទ្ធភាពផលិតអគ្គិសនី​ដើរដោយខ្យល់បាន

រដ្ឋមន្ត្រីក្រសួងការងារ ស្វែងយល់​ការបណ្តុះបណ្តាលជំនាញផលិត​នាឡិកាស្តង់ដារ​ស្វីស​របស់Prince Horology

កិច្ចពិភាក្សាផែនការសន្តិភាពអ៊ុយក្រែននៅទីក្រុង Davos បញ្ចប់ដោយគ្មានផ្លូវច្បាស់លាស់ទៅមុខ

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

នយោបាយ និង ការអភិវឌ្ឍន៍

ក្រុមហ៊ុន Blue Circle របស់បារាំងថា ខេត្តចំនួនពីរនៅកម្ពុជាដែលអាចផ្តល់លទ្ធភាពផលិតអគ្គិសនីដើរដោយខ្យល់បាន

រដ្ឋមន្ត្រីក្រសួងការងារ ស្វែងយល់ការបណ្តុះបណ្តាលជំនាញផលិតនាឡិកាស្តង់ដារស្វីសរបស់Prince Horology