នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
សម្ដេចធិបតី៖ រាជរដ្ឋាភិបាល និងមហាគ្រួសារខ្មែរ​នៅ​ជាមួយ​កងទ័ព​ជួរ​មុខ​គាំទ្រ​គ្រប់​មធ្យោបាយ​ទាំង​អស់
សម្ដេចធិបតី ដឹកនាំគណៈប្រតិភូចូលក្រាបបង្គំគាល់ព្រះករុណា ព្រះមហាក្សត្រ ទូលថ្វាយលទ្ធផលចុះបញ្ជីបូជនីយដ្ឋានចងចាំនៃកម្ពុជា ក្នុងបញ្ជីបេតិកភណ្ឌពិភពលោក
សភាតំណាងប្រជាជនចិនចាត់ទុកសម្តេចតេជោ ជាតួអង្គសំខាន់បន្ត​ពីព្រះបរម​រតនកោដ្ឋ​ក្នុង​ការ​ពូន​ជ្រំ​ទំនាក់ទំនងរវាងកម្ពុជា និងចិន
សម្តេចតេជោអនុញ្ញាតឱ្យសមាជិកគណៈកម្មាធិការអចិន្ត្រៃយ៍សភាប្រជាជនចិនជួបសម្តែងការគួរសម

នយោបាយ​ និង ការអភិវឌ្ឍន៍

របបសឹក៖ នីហ្សេបើកចំហក្នុងការចរចា ខណៈលោកពូទីន និងអាមេរិក សង្កត់ធ្ងន់លើសន្តិភាព

2023/08/16 10:31:13 am        113
Facebook Telegram Linkin
នីហ្សេ៖ កាលពីថ្ងៃអង្គារ របបសឹកនីហ្សេ បាននិយាយថា ខ្លួនបើកចំហសម្រាប់កិច្ចពិភាក្សាដើម្បីដោះស្រាយវិបត្តិក្នុងតំបន់ ដែលបណ្តាលមកពីរដ្ឋប្រហារយោធាកាលពីខែមុន ខណៈដែលរុស្ស៊ី និងសហរដ្ឋអាមេរិក បានអំពាវនាវឱ្យមានដំណោះស្រាយដោយសន្តិវិធី។មហាអំណាចលោកខាងលិច និងរដ្ឋាភិបាលអាហ្រ្វិកប្រជាធិបតេយ្យ បានអំពាវនាវឱ្យក្រុមមេដឹកនាំរដ្ឋប្រហារ ប្រគល់អំណាចឲ្យលោកប្រធានាធិបតីនីហ្សេ Mohamed Bazoum ដែលពួកគេបានឃុំខ្លួនតាំងពីថ្ងៃទី២៦ ខែកក្កដា ឡើងវិញ ប៉ុន្តែក្រុមមេដឹកនាំយោធាបានបដិសេធ និងច្រានចោលការប៉ុនប៉ងចរចា។បណ្ដាប្រមុខអាហ្រ្វិកខាងលិច នឹងជួបប្រជុំគ្នានៅថ្ងៃព្រហស្បតិ៍ និងថ្ងៃសុក្រ ខាងមុខនេះ នៅប្រទេសហ្គាណា ដើម្បីរៀបចំសម្រាប់លទ្ធភាពណាមួយនៃការធ្វើអន្តរាគមន៍យោធា ដែលប្លុកតំបន់សំខាន់ និងសហគមន៍សេដ្ឋកិច្ចនៃរដ្ឋអាហ្រ្វិកខាងលិច (ECOWAS) បានគំរាមថានឹងធ្វើឡើង ប្រសិនបើការដោះស្រាយការទូតបរាជ័យ។អន្តរាគមន៍យោធាណាមួយដែលអាចកើតឡើង នឹងធ្វើឱ្យមានអស្ថិរភាពបន្ថែមទៀតដល់ប្រទេសក្នុងតំបន់អាហ្វ្រិក Sahel ដ៏ក្រីក្រមួយនេះ ជាទីដែលការបះបោរដោយក្រុមមានទំនាក់ទំនងជាមួយក្រុមអាល់កៃដា និងរដ្ឋឥស្លាម បានជម្លៀសមនុស្សរាប់លាននាក់ក្នុងរយៈពេលមួយទស្សវត្សរ៍កន្លងមកនេះ ព្រមទាំងបង្កឱ្យមានវិបត្តិអត់ឃ្លានផងដែរ៕

កូរ៉េខាងជើង និយាយថា Travis King ចង់គេចចេញពីការរើសអើង និង ការធ្វើបាបនៅក្នុងសហរដ្ឋអាមេរិក

2023/08/16 10:26:39 am        139
Facebook Telegram Linkin
កូរ៉េខាងជើង៖ សារព័ត៌មានរដ្ឋបានរាយការណ៍នៅថ្ងៃពុធទី១៦សីហា នេះថា ពលទោ Travis King បានសារភាពពីមូលហេតុរត់ឆ្លងព្រំដែនចូលទៅក្នុងប្រទេសកូរ៉េខាងជើង ដោយសារតែការធ្វើបាបដ៏អមនុស្សធម៌ និងការរើសអើងពូជសាសន៍នៅក្នុងជួរកងទ័ពសហរដ្ឋអាមេរិក ដែលជាការទទួលស្គាល់ជាសាធារណៈលើកដំបូងនៃឧបទ្ទវហេតុនេះដោយទីក្រុងព្យុងយ៉ាង(Pyongyang)។កូនទាហានជាពលទោ ឈ្មោះ Travis T King បានរត់ចូលទៅក្នុងប្រទេសកូរ៉េខាងជើង ខណៈមានដំណើរកម្សាន្តរបស់ជនស៊ីវិលនៅតាមតំបន់សន្តិសុខរួម (JSA) នៅតាមព្រំដែនដែលមានការយាមកាមយ៉ាងតឹងរ៉ឹងបំផុត រវាងប្រទេសកូរ៉េទាំង២ ។ ក្រុមមន្ត្រីសហរដ្ឋអាមេរិក បាននិយាយថា ពួកគេជឿថា ពលទោ King មានបំណងរត់ឆ្លងព្រំដែន ។  ទីភ្នាក់សារព័ត៌មានរដ្ឋ KCNA បាននិយាយថា ពេលនេះក្រុមអ្នកស៊ើបអង្កេតកូរ៉េខាងជើង ក៏បានសន្មតិហើយដែរថា ទាហានស្បែកខ្មៅ រូបនេះ បានឆ្លងព្រំដែនដោយចេតនា និងខុសច្បាប់ ។  អំឡុងការស៊ើបអង្កេត លោក Travis King បានសារភាពថា លោក បានសម្រេចចិត្តឆ្លងចូលប្រទេសកូរ៉េខាងជើង ខណៈលោកមានអារម្មណ៍ឈឺចាប់ខឹងនឹងការធ្វើបាបដ៏អមនុស្សធម៌ និងការរើសអើងពូជសាសស៍។ លោកក៏បានបង្ហាញឆន្ទៈរបស់លោកក្នុងការស្វែងរកសិទ្ធិជ្រកកោននៅក្នុងប្រទេសកូរ៉េខាងជើងឬ ប្រទេសទី៣ ដោយនិយាយថាលោកមិនសប្បាយចិត្តចំពោះសង្គមវិសមភាពរបស់សហរដ្ឋងាមេរិកទេ ។ បន្ទាប់ពីការវាយតប់គ្នានៅពេលស្រវឹងនៅហាងស្រា ក្នុងឧបទ្ទវហេតុជាមួយនគរបាលនិង ជាប់ពន្ធនាគារកូរ៉េខាងត្បូង ពលទោឋានៈទី២ King ត្រូវបានបញ្ជូនទៅកាន់អាកាសយានដ្ឋានកាលពីឆ្នាំមុន ដើម្បីវិលត្រឡប់ទៅកាន់រដ្ឋ Texasវិញ ៕

ប្រទេសចិននឹងប្រជែងជាមួយកងទ័ពជើងទឹកអាមេរិក សម្រាប់ការគ្រប់គ្រងពិភពលោក

2023/08/15 02:44:23 pm        221
Facebook Telegram Linkin
នៅពេលដែលមហិច្ឆតាសកលរបស់ប្រទេសចិន កើនឡើង ដូច្នេះក៏មានការរំពឹងទុកផងដែរអំពីកន្លែងដែលទីក្រុងប៉េកាំង អាចបង្កើតមូលដ្ឋានទ័ពជើងទឹកនៅក្រៅប្រទេសជាអចិន្ត្រៃយ៍ និងអ្វីដែលនឹងមានផលប៉ះពាល់សម្រាប់មនុស្សគ្រប់គ្នា។តាមលក្ខណៈពាណិជ្ជកម្ម ប្រទេសចិនគ្រប់គ្រងសមុទ្រទាំងអស់របស់ពិភពលោក។ ប្រទេសនេះគឺស្ថិតនៅក្នុងក្រុមហ៊ុនសាងសង់ឈានមុខទាំងបីជារៀងរាល់ឆ្នាំដែលសាងសង់នាវាពាណិជ្ជថ្មី មានកងនាវាពាណិជ្ជកម្មធំបំផុតទីពីរនៅលើពិភពលោក ធ្វើជាកំពង់ផែចំនួន៧ ក្នុងចំណោមកំពង់ផែស៊ីវិលដែលមមាញឹកបំផុតចំនួន១០នៅលើពិភពលោក មានកងនាវានេសាទ​ក្រៅប្រទេសដែលមាននាវាប្រហែល១.៧០០គ្រឿង និងសាងសង់​ហេដ្ឋារចនាសម្ព័ន្ធឆ្នេរ​សមុទ្រពាណិជ្ជកម្មភាគច្រើនរបស់ពិភពលោក រួមទាំង៩៦ភាគរយ នៃកុងតឺន័រដឹកជញ្ជូនទាំងអស់ និងជាង៨០ភាគរយនៃកំពង់ផែស្ទូចទំនិញ។ បន្ថែមពីលើគុណសម្បត្តិពាណិជ្ជកម្មទាំងអស់ ពេលនេះ ប្រទេសចិនក៏មានកងទ័ពជើងទឹកដ៏ធំបំផុតរបស់ពិភពលោក គឺកងទ័ពជើងទឹករំដោះប្រជាជន (PLAN)។ទោះបីជាយ៉ាងក៏ដោយ ប្រទេសចិនមានមូលដ្ឋានទ័ពជើងទឹកក្រៅប្រទេសតែមួយគត់ គឺមូលដ្ឋាននោះនៅក្នុងប្រទេសជីប៊ូទី (Djibouti) នៃតំបន់ញកអាហ្វ្រិក (Horn of Africa)។ តើវានឹងទៅណាបន្ទាប់ទៀត? ប្រទេសចិនមិនចូលចិត្តបង្ហាញពីផែនការរបស់ខ្លួនទេ ដូច្នេះ​ក្រុមមួយនៅមន្ទីរពិសោធន៍ស្រាវជ្រាវ AidData ​បានព្យាយាមធ្វើការព្យាករណ៍អប់រំមួយចំនួន។ ការ​សន្មតិ​ដែលបានចាប់ផ្តើម គឺថាប្រទេសចិននឹងជ្រើសរើសទីតាំងមូលដ្ឋានដែលខ្លួន​បានចំណាយ​ប្រាក់រួចហើយ ​និងកន្លែងដែលខ្លួនបានសាងសង់​មិនត្រឹមតែកំពង់​ផែប៉ុណ្ណោះទេ ថែមទាំងប្រភេទ​នៃទំនាក់ទំនងរយៈពេលវែងចាំបាច់ជាមួយក្រុមឥស្សរជននៃប្រទេសម្ចាស់ផ្ទះដែលនឹងអនុញ្ញាតឲ្យមានកិច្ចសហប្រតិបត្តិការប្រភេទនេះ។

លោក Yoon៖ ជំនួបរវាងកូរ៉េខាងត្បូង ជាមួយសហរដ្ឋអាមេរិក និងជប៉ុន គឺជាព្រឹត្តិការណ៍សំខាន់មួយ ក្នុងទំនាក់ទំនងត្រីភាគី

2023/08/15 02:37:41 pm        148
Facebook Telegram Linkin
ប្រធានាធិបតីកូរ៉េខាងត្បូង លោក Yoon Suk Yeol នៅថ្ងៃអង្គារ (ទី១៥ ខែសីហា) នេះ បាននិយាយថា កិច្ចប្រជុំកំពូលនាពេលខាងមុខជាមួយមេដឹកនាំសហរដ្ឋអាមេរិក និងជប៉ុន នឹងបង្កើតបាននូវព្រឹត្តិការណ៍ថ្មីមួយ ក្នុងកិច្ចសហប្រតិបត្តិការត្រីភាគី នៅចំពោះមុខការគំរាមកំហែងពីអាវុធនុយក្លេអ៊ែរ និងមីស៊ីលដែលរីកធំឡើងជាលំដាប់របស់ប្រទេសកូរ៉េខាងជើង។ក្នុងសុន្ទរកថា រំលឹកខួបនៃការរំដោះប្រទេសរបស់លោកពីអាណានិគមជប៉ុន ឆ្នាំ១៩១០-១៩៤៥ លោក Yoon បានសង្កត់ធ្ងន់លើតម្រូវការ ក្នុងការបង្កើនកិច្ចសហប្រតិបត្តិការផ្នែកសន្តិសុខ​ជាមួយ​ទីក្រុងវ៉ាស៊ីនតោន និងតូក្យូ តាមរយៈឧបករណ៍ឈ្លបយកការណ៍ និងការចែករំលែក​ទិន្នន័យតាមពេលវេលាជាក់ស្តែងពាក់ព័ន្ធនឹងអាវុធនុយក្លេអ៊ែរ និងមីស៊ីលរបស់កូរ៉េខាងជើង។លោក Yoon បានថ្លែងថា៖ «កិច្ចប្រជុំកំពូល នឹងបង្កើតបាននូវព្រឹត្តិការណ៍ដ៏សំខាន់ថ្មីមួយ ក្នុងកិច្ចសហប្រតិបត្តិការត្រីភាគី ដែលរួមចំណែកដល់សន្តិភាព និងវិបុលភាព នៅឧបទ្វីបកូរ៉េ និងក្នុងតំបន់ឥណ្ឌូ-ប៉ាស៊ីហ្វិក»។សូមបញ្ជាក់ថា លោក Yoon គ្រោងនឹងចូលរួមជាមួយប្រធានាធិបតីអាមេរិក លោក Joe Biden និងនាយករដ្ឋមន្ត្រីជប៉ុន លោក Fumio Kishida នៅឯកន្លែងសម្រាកលំហែរបស់ប្រធានាធិបតី Camp David ក្នុងរដ្ឋ Maryland នៅថ្ងៃសុក្រ (ទី១៨ ខែសីហា) ជាកន្លែងដែលថ្នាក់ដឹកនាំទាំងអស់ នឹងចាប់ផ្តើមគំនិតផ្តួចផ្តើមរួមគ្នាជាបន្តបន្ទាប់លើផ្នែកបច្ចេកវិទ្យា ការអប់រំ និងការការពារជាតិ។គិតចាប់តាំងពីចូលកាន់តំណែង ក្នុងខែឧសភា ឆ្នាំ២០២២ មក លោក Yoon បានប្រឹងប្រែង​ធ្វើឲ្យ​ទំនាក់ទំនងជាមួយទីក្រុងតូក្យូប្រសើរឡើង ​បន្ទាប់ពីទំនាក់ទំនងនេះ បានបែកបាក់ដោយ​សារការ​ជាប់គាំង ក្នុងជម្លោះ ជុំវិញបណ្តឹងទាមទារសំណង ដែលធ្វើឡើងដោយជនរងគ្រោះនៃពលកម្ម​ដោយបង្ខំរបស់ប្រទេសជប៉ុន អំឡុងពេលការគ្រប់គ្រងអាណានិគមរបស់ខ្លួន៕

អាជ្ញាធរជាតិអប្សរា ជួសជុលកំពង់ទឹកប្រាសាទព្រះខ័ន ដំណាក់កាលទី២

2023/08/15 02:32:20 pm        396
Facebook Telegram Linkin
ក្រុមអ្នកជំនាញរបស់អាជ្ញាធរជាតិអប្សរា ចាប់ផ្ដើមអនុវត្តគម្រោងជួសជុលកំពង់ទឹក ដែលស្ថិតនៅលើច្រាំងនៃទំនប់ខាងលិចបារាយជ័យតដាក នាទិសខាងកើតរបស់ប្រាសាទព្រះខ័នដែលជាដំណាក់កាលទី២។ការជួសជុលនេះ នឹងត្រូវចំណាយពេលមួយឆ្នាំ ចាប់ផ្តើមពីដើមឆ្នាំ២០២៣ និងគ្រោងនឹងបញ្ចប់នៅចុងឆ្នាំ២០២៣នេះ។លោក ជា សារិទ្ធ បុរាណវិទូ និងជាអ្នកគ្រប់គ្រងគម្រោងជួសជុលការដ្ឋានកំពង់ទឹកប្រាសាទព្រះខ័ន ឱ្យដឹងថា ខឿនកំពង់ទឹក នាទិសខាងកើតរបស់ប្រាសាទព្រះខ័ន មានរាងជាចតុកោណកែង ដោយចែកចេញជាបីផ្នែក ផ្នែកខាងកើតមានប្លង់ជារាងការ៉េ មានទំហំ ១៥.២០ម៉ែត្រ គុណនិង១៥.២០ម៉ែត្រ ដែលមានកាំជណ្តើរចំនួន៥កាំ។ មុននឹងឈានដល់ការជួសជុល ក្រុមការងារបានស្វែងរកឯកសារចាស់ៗមកសិក្សា ព្រមទាំងកំណាយបុរាណវិទ្យា សម្អាតកំណកដី ធ្វើសម្រង់ប្លង់ ការកត់ត្រា ការថតរូប ដើម្បីបង្ហាញពីស្ថានភាពអភិរក្សមុនពេលជួសជុល ដោយប្រៀបធៀបស្ថានភាពក្រោយពេលជួសជុលផង។លោកឱ្យដឹងទៀតថា បច្ចេកទេសនៃការជួសជុលកំពង់ទឹកផ្នែកខាងកើតនេះ គឺត្រូវយកមកប្រើ ក្នុងវិធីសាស្ត្រជួសជុលពង្រឹងខឿននេះទាំងស្រុង គឺជួសជុលតាមបច្ចេកទេសបុរាណ។ បច្ចុប្បន្ននេះ សម្រេចបាន៣០ទៅ៤០ភាគរយហើយ ដោយបានបញ្ចប់ការរៀបចំផ្គុំកាំជណ្តើរផ្នែកខាងជើង និងខឿនជាន់ទី១ និងបន្តទៅខឿនជាន់ទី២។ រីឯជណ្តើរខាងកើត ក្រុមការងារកំពុងរៀបចំ បាន​៥០ភាគរយ ដោយបានរៀបចំបានជណ្ដើរចំនួន៤កាំនៅសល់កាំទី៥ និងខឿនជាន់ទី១និងទី២ប៉ុណ្ណោះ។អ្នកគ្រប់គ្រងការដ្ឋានឱ្យដឹងទៀតថា ការជួសជុលកំពង់ទឹកនេះ គឺជួសជុលអន្តរាគមន៍​ក្នុងកម្រិតមួយអតិបរមា ធ្វើយ៉ាងណារៀបចំជណ្តើរ រៀបចំថ្មកម្រាល រៀបចំជញ្ជាំងនៃខឿនឱ្យរឹងឡើងវិញ ដើម្បីបង្ហាញអំពីតួនាទីរបស់កំពង់ទឹក និងទំនាក់ទំនងរវាងប្រាសាទព្រះខ័ន ជាមួយបារាយជ័យតដាក និងប្រាសាទនាគព័ន្ធ។ គោលបំណងនៃការជួសជុល គឺពង្រឹងតែផ្នែកខូចខាតទ្រុឌទ្រោមខ្លាំងឱ្យរឹងមាំ ដើម្បីបង្ហាញឱ្យឃើញនូវគ្រប់ស្រទាប់ប្រវត្តិសាស្ត្រ ចាប់តាំងពីសម័យកសាង រហូតមកដល់បច្ចុប្បន្ន។កាលពីឆ្នាំ២០២២កន្លងទៅ ក្រុមអ្នកជំនាញធ្លាប់បានជួសជុលខឿនកណ្តាលមានទំហំបណ្តោយប្រវែង២១.៦០ម៉ែត្រ គុណ​និង២១.៦០ម៉ែត្រនិងរចនាសម្ពន្ធកាំជណ្តើរចុះទៅកាន់ប្រាសាទព្រះខ័នក្នុងដំណាក់កាលទី១។កំពង់ទឹកផ្នែកខាងកើតនៃប្រាសាទព្រះខ័ន មានស្ថានភាពទ្រុឌទ្រោមខ្លាំង​ ដោយសារខឿនផ្នែកនេះ កាលពីសម័យសាងសង់ក្នុងដំណាក់កាលទី១ ប្រហាក់ប្រហែលគ្នា និងសម័យកាលនៃការកសាង​ប្រាសាទព្រះខ័ន ប្រាសាទនាគព័ន្ធ ​និងប្រាសាទតាសោមនោះ ដោយការរៀបចំរាជធានីជ័យស្រី មានប្រព័ន្ធធារាសាស្រ្តដែលកសាងក្នុងដំណាក់កាលជាមួយគ្នា។ខឿនជណ្តើរនៃតួកំពង់ទឹក ធ្វើអំពីថ្មភក់រៀបជាជញ្ជាំងពីខាងក្រៅមានឆ្លាក់ចម្លាក់ជាសត្វហង្ស និងនាគស្រដៀងគ្នាទៅនិងស្ពានហាលឆ្លងកាត់ទៅកាន់ប្រាសាទព្រះខ័ន។ ប៉ុន្តែក្រោយពីរាជ្យព្រះបាទជ័យវរ្ម័នទី៧ ផ្នែកខ្លះនៃកំពុងទឹកនេះ ត្រូវបានគេដកយកថ្មភក់ ទៅប្រើនៅកន្លែងផ្សេង៕

ចិន៖ សម្ព័ន្ធមិត្តការពារជាតិអាមេរិក កូរ៉េខាងត្បូង ជប៉ុន បានបង្កើនភាពតានតឹងក្នុងតំបន់

2023/08/15 02:11:52 pm        218
Facebook Telegram Linkin
បណ្ដាមេដឹកនាំរដ្ឋនៃសហរដ្ឋអាមេរិក ជប៉ុន និងកូរ៉េខាងត្បូង នឹងជួបប្រជុំគ្នានៅឯលំឋានលំហែកាយ Camp David នៅថ្ងៃសុក្រខាងមុខនេះ ហើយពួកគេត្រូវបានគេរំពឹងថា នឹងចាប់ផ្តើមគំនិតផ្តួចផ្តើមរួមគ្នាជាបន្តបន្ទាប់ ជាពិសេសលើបច្ចេកវិទ្យា និងការការពារជាតិ នេះបើយោងតាមមន្ត្រីរដ្ឋបាលជាន់ខ្ពស់របស់សហរដ្ឋអាមេរិក។ជាការឆ្លើយតបទៅនឹងការពង្រឹងកិច្ចសហប្រតិបត្តិការយោធារវាងសហរដ្ឋអាមេរិក កូរ៉េខាងត្បូង និងជប៉ុននៅក្នុងតំបន់អាស៊ីប៉ាស៊ីហ្វិក ក្រសួងការបរទេសចិនបានចង្អុលបង្ហាញថា កិច្ចសហប្រតិបត្តិការយោធារវាងរដ្ឋ និងរដ្ឋ គួរតែអំណោយផលដល់សន្តិភាព និងស្ថិរភាពក្នុងតំបន់ ហើយមិនគួរកំណត់គោលដៅលើភាគីទីបី ឬប៉ះពាល់ដល់ផលប្រយោជន៍របស់ភាគីទីបីណាមួយឡើយ។ក្រសួងក៏បានបន្ថែមផងដែរថា ប្រទេសចិន ប្រឆាំងយ៉ាងម៉ឺងម៉ាត់ចំពោះបណ្តាប្រទេសនៅក្រៅតំបន់អាស៊ីប៉ាស៊ីហ្វិក ដែលជ្រៀតជ្រែកក្នុងកិច្ចការអាស៊ី ហើយកូរ៉េខាងត្បូង និងជប៉ុន គួរតែបដិសេធមិនធ្វើអ្វីដែលធ្វើឱ្យខូចទំនុកចិត្តគ្នាទៅវិញទៅមកក្នុងចំណោមប្រទេសក្នុងតំបន់ ព្រមធ្វើឱ្យខូចសន្តិភាព និងស្ថិរភាពក្នុងតំបន់នោះទេ។ក្រៅពីនេះ ប្រទេសចិនបានបញ្ជាក់យ៉ាងច្បាស់ថា កោះតៃវ៉ាន់ជាផ្នែកមួយរបស់ចិន ហើយសំណួរទាក់ទងតៃវ៉ាន់គឺជាផលប្រយោជន៍ស្នូលរបស់ចិន និងជាបន្ទាត់ក្រហមលេខមួយ ដែលមិនត្រូវឆ្លងកាត់ ហើយថាប្រទេសផ្សេងទៀតមិនគួរជ្រៀតជ្រែកក្នុងកិច្ចការផ្ទៃក្នុងរបស់ចិនឡើយ៕

ការពង្រីកតំបន់ការពារបង្ហាញសញ្ញាវិជ្ជមាន ខណៈកម្ពុជាជាប់ក្នុងចំណោម១០ប្រទេសលើលោក ដែលសម្បូរតំបន់ការពារ

2023/08/15 12:32:46 pm        125
Facebook Telegram Linkin
ភ្នំពេញ៖ នាយកអង្គការមូលនិធិសត្វព្រៃ (WWF) លើកឡើងថា ការពង្រីកតំបន់ការពារ និងតំបន់ធម្មជាតិបង្ហាញសញ្ញាវិជ្ជមានរបស់កម្ពុជា ខណៈកម្ពុជាជាប់ចំណាត់ថ្នាក់ល្អ ក្នុងចំណោម១០ប្រទេសលើសកលលោក ដែលសំបូរដោយតំបន់ការពារ។ បើតាម លោក សេង ទៀក នាយកអង្គការមូលនិធិសត្វព្រៃ (WWF) បានប្រាប់BTV News ឲ្យដឹង​នៅថ្ងៃទី១៥ ខែសីហា ឆ្នាំ២០២៣ថា ក្នុងនាមអង្គការដៃគូដែលធ្វើកិច្ចការយ៉ាង​ជិតស្និទ្ធិ​ជាមួយ​រាជរដ្ឋាភិបាល ​ជាពិសេស​ជាមួយក្រសួងបរិស្ថាន ​អង្គការ WWF បានគាំទ្រទៅដល់​ការពង្រី​កនៃគ្រប់គ្រង​តំបន់ការពារទេសភាព​ តំបន់ការពារធម្មជាតិ​ តំបន់បេតិកភណ្ឌធម្មជាតិ និងតំបន់​ការពារសត្វព្រៃ ​គឺជាការគិតគូរដ៏មានអត្ថប្រយោជន៍ពីរាជរដ្ឋាភិបាលដល់ប្រជាជនកម្ពុជា និងសកលលោក។ លោក បន្តថា បច្ចុប្បន្ននៅកម្ពុជាបានពង្រីកវិសាលភាពតំបន់ចំនួនប្រមាណ៧០តំបន់ ដែលគ្រប់គ្រង​លើផ្ទៃដីជាង៧លានហិកតា ខណៈកម្ពុជាជាប្រទេសមួយក្នុងចំណោម១០ប្រទេស​លើសកលលោក​ដែលមានតំបន់ការពារច្រើនជាងគេ។ នាយកអង្គការមូលនិធិសត្វព្រៃ (WWF) បញ្ជាក់ថា ក្នុងពេលវិសាលភាពគ្រប់គ្រងកាន់តែធំ រាជ​រដ្ឋាភិបាល​មានភាព​ស្មុគស្មាញ​ជាងមុន ដែលទាមទារត្រូវឲ្យមានការកសាងសេដ្ឋកិច្ចផ្អែក​លើការអភិរក្ស ​តាមរយៈជំរុញការវិនិយោគ​។គួរបញ្ជាក់ថា កាលពីថ្មីៗនេះ រាជរដ្ឋាភិបាល បានចេញអនុក្រឹត្យជាបន្តបន្ទាប់ ​ដោយពង្រីក​ការ​គ្រប់គ្រង និងសម្រេចពង្រីកផ្ទៃដីបន្ថែមនៅដែនជម្រកសត្វព្រៃ​ តាមបណ្តាខេត្តមួយចំនួន ដូចជា ការបង្កើតតំបន់ការពារទេសភាពប្រាសាទបាកាន (ព្រះខ័នកំពង់ស្វាយ) នៅខេត្តព្រះវិហារ, ការកំណត់ភ្នំប្រាំពីរ ស្ថិតក្នុងភូមិសាស្រ្ត ខេត្តបាត់ដំបង ជាតំបន់បេតិកភណ្ឌធម្មជាតិ, ការពង្រីកផ្ទៃដី ដែន​ជម្រកសត្វព្រៃតាតៃ ​ស្ថិតនៅក្នុងភូមិសាស្រ្តខេត្តកោះកុង ដើម្បីលើកកម្ពស់​នៃការ​ថែរក្សា​ការពារ​សត្វព្រៃ និងបរិស្ថាននៅតំបន់នោះឲ្យកាន់តែមានប្រសិទ្ធភាពបន្ថែមទៀត និងការពង្រីក​ដែនជម្រកសត្វព្រៃព្រែកប្រសព្វជាង ១ពាន់ហិកតា នៅខេត្តក្រចេះផងដែរ៕ អត្ថបទ សេក ឧត្តម

គណបក្សភឿថៃ មានការលំបាកក្នុងការមិនដាក់បញ្ចូលគណបក្សគាំទ្រយោធា ខណៈវិបត្តិនយោបាយឈានដល់រយៈពេល៣ខែ

2023/08/15 12:24:51 pm        90
Facebook Telegram Linkin
ថៃ៖ ប្រទេសថៃនៅតែគ្មាននាយករដ្ឋមន្ត្រីថ្មី រយៈពេល៣ខែបន្ទាប់ពីការបោះឆ្នោតសកលថ្ងៃទី១៤ ខែឧសភា ដោយគណបក្សភឿថៃ ដែលជាគណបក្សទទួលបានសំឡេងឆ្នោតគាំទ្រលំដាប់លេខពីរក្នុងការបោះឆ្នោត មានការលំបាកក្នុងការមិនដាក់បញ្ចូលឥទ្ធិពលរបស់គណបក្សយោធា ខណៈដែលខ្លួនព្យាយាមបង្កើតរដ្ឋាភិបាលថ្មី។ភាពជាប់គាំងនយោបាយចុងក្រោយបង្អស់ ពាក់ព័ន្ធនឹងញត្តិមួយនៅមុនពេលតុលាការធម្មនុញ្ញរបស់ប្រទេសថៃ ដែលអះអាងថា ការបដិសេធរបស់សភាកាលពីខែមុនលើសំណើសុំតែងតាំងមេដឹកនាំគណបក្សបោះជំហានទៅមុខ លោក ភីថា លីមចារើនរ៉ាត់ ជាបេក្ខភាពនាយករដ្ឋមន្ត្រី ផ្ទុយនឹងរដ្ឋធម្មនុញ្ញឬយ៉ាងណានោះ។ប្រទេសមួយនេះ កំពុងស៊ូទ្រាំនឹងការរង់ចាំដ៏យូរបំផុតរបស់ខ្លួនក្នុងរយៈពេលពីរទសវត្សរ៍ សម្រាប់ការជ្រើសរើសមេដឹកនាំថ្មី បន្ទាប់ពីការបោះឆ្នោតសកលមួយ ដោយមិនមានភាពច្បាស់លាស់ថា តើនៅពេលណាដែលការបោះឆ្នោតសភាបន្ទាប់ ក្នុងការជ្រើសរើសបេក្ខជននាយករដ្ឋមន្ត្រីថ្មី នឹងត្រូវធ្វើឡើង។គណបក្សគាំទ្រយោធាកំពុងខិតចូលមកជិតបក្សភឿថៃ។ សមាជិកសភាគណបក្សគាំទ្រយោធា Palang Pracharath លោក Pai Leeke បាននិយាយថា សមាជិកសភាជាន់ទាបទាំង៤០រូបមកពីគណបក្សរបស់ខ្លួន នឹងបោះឆ្នោតឱ្យបេក្ខជនបក្សភឿថៃ ដោយគ្មានលក្ខខណ្ឌ ដោយបង្ហាញថាខ្លួនមានឆន្ទៈចូលរួមជាមួយក្រុមចម្រុះ ប្រសិនបើគណបក្ស ភឿថៃ ស្នើសុំ។ចំណុចអារម្មណ៍មួយសម្រាប់គណបក្សភឿថៃ ប្រសិនបើខ្លួនចូលរួមជាមួយបណ្ដាបក្សគាំទ្រយោធានោះ គឺការវិលត្រឡប់របស់អតីតនាយករដ្ឋមន្ត្រីដែលរស់នៅក្នុងនិរទេសភាពគឺ លោក ថាក់ស៊ីន ស៊ីណាវ៉ាត់ ជាមេដឹកនាំគណបក្សនេះតាមជាក់ស្តែង ហើយការវិលត្រឡប់របស់លោក ថាក់ស៊ីន ត្រូវបានគេនិយាយថា ជាផ្នែកមួយនៃកិច្ចព្រមព្រៀងមួយដើម្បីធ្វើការជាមួយក្រុមគាំទ្រយោធាផងដែរ៕

ជប៉ុនបដិសេធរបាយការណ៍របស់ប្រព័ន្ធផ្សព្វផ្សាយកូរ៉េខាងត្បូង ស្តីពីសំណល់ទឹក ហ្វ៊គូស៊ីម៉ា

2023/08/15 12:21:44 pm        80
Facebook Telegram Linkin
ជប៉ុន៖ តូក្យូ (១៥ សីហា)៖ ប្រទេសជប៉ុន បានបដិសេធរបាយការណ៍ប្រព័ន្ធផ្សព្វផ្សាយអនឡាញរបស់កូរ៉េខាងត្បូង អំពីឯកសារដែលត្រូវបានចោទប្រកាន់ថា ជាទូរលេខផ្លូវការរបស់ជប៉ុន ស្តីពីគម្រោងការបញ្ចេញសំណល់ទឹកដែលត្រូវបានធ្វើប្រព្រឹត្តកម្មរួចចេញពីរោងចក្រនុយក្លេអ៊ែរ ហ្វ៊ូគូស៊ីម៉ា ដែលត្រូវបានខូចខាតលេខ១ ចូលទៅក្នុងសមុទ្រ។ ក្រសួងការបរទេសជប៉ុន បាននិយាយនៅក្នុងសេចក្តីថ្លែងការណ៍មួយកាលពីថ្ងៃចន្ទថា របាយការណ៍នោះមិនមានមូលដ្ឋាននៅក្នុងការពិតទេ ហើយឯកសារនោះគឺជាការក្លែងបន្លំទាំងស្រុង។យោងតាមក្រសួងបានឲ្យដឹងថា ប្រព័ន្ធផ្សព្វផ្សាយកូរ៉េខាងត្បូង បានរាយការណ៍កាលពីថ្ងៃចន្ទថា ទូរលេខដែលត្រូវបានចោទប្រកាន់ដោយក្រសួង បានបញ្ជាក់ថាការវាស់ស្ទង់សំណល់ទឹក ដែលត្រូវបានធ្វើប្រព្រឹត្តកម្មរួច ផ្ទុកទុកក្នុងអាងក្រោមដី កាលថ្ងៃទី៨ ខែកក្កដារបស់ក្រុមហ៊ុន TEPCO បានបង្ហាញពីកម្រិតវិទ្យុសកម្មលើសពីតួលេខស្ដង់ដារយ៉ាងច្រើន។ របាយការណ៍នោះក៏បាននិយាយផងដែរថា ប្រទេសជប៉ុន កំពុងពិចារណាលើការបំពេញតាមស្តង់ដារសុវត្ថិភាពដោយសម្លាប់មេរោគពីទឹកដែលបានធ្វើប្រព្រឹត្តកម្មរួចបន្ថែមទៀត។ក្រុហ៊ុន TEPCO គ្រោងនឹងបញ្ចេញសំណល់ទឹកពីរោងចក្រថាមពល ហ្វ៊ូគូស៊ីម៉ា ទៅកាន់មហាសមុទ្រប៉ាស៊ីហ្វិក ដែលបានរងការបំផ្លិចបំផ្លាញចំនួន៣ដងកាលពីខែមីនា ឆ្នាំ២០១១ ពីការរញ្ជួយដីដ៏ធំ និងរលកយក្សស៊ូណាមិ បន្ទាប់ពីបានធ្វើប្រព្រឹត្តកម្មតាមរយៈឧបករណ៍សម្អាត៕

កម្ពុជានឹងផ្លាស់ប្ដូរប្រើប្រាស់ឆ្នាំគោលគណនេយ្យជាតិឆ្នាំ ២០១៤ ដើម្បីដឹងពីស្ថានភាព​សេដ្ឋកិច្ច​បច្ចុប្បន្ន

2023/08/15 12:20:19 pm        286
Facebook Telegram Linkin
ភ្នំពេញ៖ក្រសួងផែនការ រួមទាំងក្រសួងសេដ្ឋកិច្ច ​កំពុងប្រមូលធាតុចូលបន្ថែមពី ​គ្រប់ស្ថាប័នពាក់ព័ន្ធ ដើម្បីឈានទៅ​ផ្លាស់ប្ដូរ​ប្រើប្រាស់ឆ្នាំ​គោលគណនេយ្យជាតិថ្មី ឆ្នាំ ២០១៤។ ​គោលដៅផ្លាស់ប្ដូរ ឆ្នាំ​គោលគណនេយ្យជាតិពីឆ្នាំ ២០០០ ​ទៅឆ្នាំ ២០១៤ គឺក្នុងគោលដៅសំខាន់ពាក់ព័ន្ធសេដ្ឋកិច្ចជាតិ​កម្ពុជា។ឯកឧត្តម រិន វីរៈ រដ្ឋលេខាធិការប្រចាំការ ក្រសួងផែនការ ​បានលើកឡើងក្នុងការសិក្ខាសាលាថា ការ​ផ្លាស់ប្ដូរឆ្នាំគោលគណនេយ្យជាតិម្ដងៗ​ គឺត្រូវរង់ចាំពេលវេលាដែលសមស្រប មានប្រភពទិន្នន័យ​គ្រប់គ្រាន់​ ទទួលបានពី ទិន្នន័យជំរឿន​ អង្កេត ​និងទិន្នន័យរដ្ឋបាលជាដើម។ ឯកឧត្តមថា កម្ពុជានឹង​ប្រើប្រាស់​ឆ្នាំគោលគណនេយ្យជាតិថ្មី នៅឆ្នាំ ​២០២៤ខាងមុខនេះ។ឯកឧត្តមបន្តថា ​ការផ្លាស់ប្ដូរឆ្នាំគោលគណនេយ្យជាតិពីឆ្នាំ ​២០០០ ​មកប្រើប្រាស់ឆ្នាំគោល​គណនេយ្យ​ជាតិឆ្នាំ ២០១៤ ​ជារឿងត្រឹមត្រូវ ​ដោយវិទ្យាស្ថានជាតិស្ថិតិ ​មានជំរឿនសេដ្ឋឆ្នាំ ២០១១ ជំរឿន​កសិកម្មឆ្នាំ ២០១៣ អង្កេតពាក់​កណ្ដាល​ជំរឿន​សេដ្ឋកិច្ច​ឆ្នាំ ២០១៤ ​អង្កេត​សេដ្ឋកិច្ច សង្គមកិច្ច ឆ្នាំ ២០១៤​ និង​ប្រភពរដ្ឋបាលផ្សេងទៀត ​ដូចជា ​ជញ្ជីង​ទូទាត់​របស់​ធនាគារជាតិ​នៃកម្ពុជា ស្ថិតិ​ហិរញ្ញវត្ថុរដ្ឋាភិបាលរបស់ក្រសួងសេដ្ឋកិច្ច​ និង​ហិរញ្ញវត្ថុ ​ទិន្នន័យ​ពាណិជ្ជកម្មអន្តរជាតិ និង​ទិន្នន័យក្រសួង-ស្ថាប័នផ្សេងទៀត​ ក្នុងរាជរដ្ឋាភិបាលកម្ពុជា។ពាក់ព័ន្ធនឹងការផ្លាស់ប្ដូរឆ្នាំគោលគណនេយ្យជាតិនេះ​ ឯកឧត្តម កែវ ចិត្រា ប្រធាននាយកដ្ឋាន​គណនេយ្យជាតិ ​នៃវិទ្យាស្ថានជាតិស្ថិតិ បញ្ជាក់ថែមថា ការ​ផ្លាស់ប្ដូរ​គឺផ្ដល់​ជាផលប្រយោជន៍​ជាច្រើន​។ ​ផលប្រយោជន៍គឺបង្ហាញពីស្ថានភាពសេដ្ឋកិច្ចបច្ចុប្បន្ន ​បង្ហាញពីការ​ផ្លាស់ប្ដូរ​រចនា​សម្ព័ន្ធ​សេដ្ឋកិច្ច កំណើន​សេដ្ឋកិច្ចត្រឹមត្រូវ ​ក៏ដូចជាផ្លាស់ប្ដូរចំណាត់ថ្នាក់សកម្មភាពសេដ្ឋកិច្ចពីជំនាន់​ ៣.១ មកជំនាន់ ៤.០ ស្របតាមបរិបទថ្មី និងបង្កើនគុណភាពស្ថិតិគណនេយ្យជាតិ ​និងសង្គតិភាពជាមួយ​ស្ថិតិ​ម៉ាក្រូសេដ្ឋកិច្ច​ដទៃទៀត ​និងធ្វើឱ្យប្រសើរការប្រៀបធៀប​ជាអន្តរជាតិ។ក្នុងការធ្វើបទបង្ហាញ ​ឯកឧត្តម ​​ក៏បានសំណូមពរសុំឱ្យមានការផ្ដល់​ជាទិន្នន័យ​ យោបល់ រឺ​សំណូម​ពរនានាពី​​​​     វិស័យរ៉ែ វិស័យម្ហូបអាហារ​ វិស័យភស្តុភារ​ វិស័យ​ផលិតស៊ីម៉ងត៍ វិស័យ​អចលនទ្រព្យ វិស័យ​ទូរគមន​គមន៍​ និងវិស័យផ្សេងៗ​ទៀត៕ ​អត្ថបទ៖គឹមហុក

បណ្ដាញសង្គម

ព័ត៌មានថ្មីៗ

ប្រតិភូអន្តរក្រសួងចុះវាយតម្លៃគុណភាពសំណង់ព្រះវិហារ និងសាលាបាលីវត្តពិជ័យលង្កា ហៅ​វត្ត​ឈើ​ខ្មៅដើ​ម្បីធ្វើការអភិរក្ស
07/22/2025 03:07 PM
Facebook Telegram Linkin
រដ្ឋមន្ត្រីក្រសួងការងារ ស្នើភាគីពាក់ព័ន្ធពិភាក្សាឱ្យបានផុលផុសលើសេចក្ដីព្រាង “គោលនយោបាយជាតិ ស្ដីពី​មុខរបរនិងការងារ ឆ្នាំ២០២៦-២០៣៥”
07/22/2025 02:07 PM
Facebook Telegram Linkin
សមាគមអតីតយុទ្ធជនខេត្តកំពង់ឆ្នាំង សាងសង់ផ្ទះ និងផ្តល់ដីអោយអតីតយុទ្ធជនបាន១០៥ខ្នង និងកំពុងបន្តសាងសង់១០០ខ្នងទៀត
07/22/2025 02:07 PM
Facebook Telegram Linkin
មន្ត្រី​វប្បធម៌ជាង​១០០នាក់ ទទួលការបណ្តុះបណ្តាលស្តីពីគរុកោសល្យ វិធីសាស្រ្តនៃការបង្រៀន និង​ការគ្រប់គ្រងថ្នាក់រៀន
07/22/2025 02:07 PM
Facebook Telegram Linkin
ម៉ិកស៊ិក ការពារការប្តូរទីតាំងទំនិញតាមយន្តហោះ ដោយច្រានចោលការដាក់ទណ្ឌកម្មរបស់អាមេរិក
07/22/2025 02:07 PM
Facebook Telegram Linkin
សហរដ្ឋអាមេរិកនិងអឺរ៉ុប បញ្ជាក់ពីកិច្ចសហប្រតិបត្តិការលើជំនួយយោធាដល់អ៊ុយក្រែន
07/22/2025 02:07 PM
Facebook Telegram Linkin
ឯកឧត្តម ឃួង ស្រេង ណែនាំឱ្យស្នងការរាជធានីភ្នំពេញ និងអភិបាលខណ្ឌទាំង១៤ រៀបចំ​ផែន​ការ​បន្ត​បង្ក្រាប​ការឆបោកតាមប្រព័ន្ធបច្ចេកវិទ្យា (ONLINE SCAMS) ឱ្យបានម៉ឺងម៉ាត់បំផុត
07/22/2025 02:07 PM
Facebook Telegram Linkin
អ៊ីស្រាអែល ច្រានចោលការអំពាវនាវរបស់ប្រទេសលោកខាងលិច២៥ប្រទេសដែលឲ្យបញ្ចប់សង្រ្គាមនៅហ្កាហ្សា
07/22/2025 02:07 PM
Facebook Telegram Linkin
អាជ្ញាធរមីន និងសាកលវិទ្យាល័យ​លេនកាហ្សៀរនៃចក្រភពអង់គ្លេស ចុះ​អនុស្សារ​ណៈ​យោគ​យល់​គ្នា ពង្រឹង​ភាពជាដៃគូក្នុងការអភិវឌ្ឍបច្ចេកវិទ្យាថ្មី​ដ្រូន​គ្មាន​មនុស្ស​បើក
07/22/2025 02:07 PM
Facebook Telegram Linkin
កាកបាទក្រហមអន្តរជាតិ ព្រមានពីវិបត្តិជុំទិសកាន់តែអាក្រក់ទៅៗសម្រាប់ពលរដ្ឋអាហ្វហ្គានីស្ថាន
07/22/2025 01:07 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.