នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
គណៈកម្មការអន្តរក្រសួងចុះពិនិត្យវាយតម្លៃការងារថែទាំផ្លូវចំនួន៨ខ្សែ ក្នុងខេត្តពោធិ៍សាត់
ឯកឧត្តម កែវ រតនៈ បញ្ជាក់ជាថ្មីថាបច្ចុប្បន្នកម្ពុជាពុំបាននាំចូលអគ្គិសនី ប្រេងសាំង និង​ឧស្ម័ន​ពី​ប្រទេស​ថៃ​នោះទេ
ទំនប់អូរតេធិបតី ត្រៀមផ្គត់ផ្គង់ទឹកស្អាតជូនពលរដ្ឋរាប់ពាន់គ្រួសារបន្ថែមទៀតក្នុងខេត្តមណ្ឌលគិរី
រដ្ឋមន្ត្រីអាកាសចរណ៍ស៊ីវិល ចុះពិនិត្យអាកាសយានដ្ឋានអន្តរជាតិតេជោ ដើម្បីត្រៀម​ផ្តល់​វិញ្ញា​បន​ប័ត្រ​ដល់ប្រតិបត្តិករ

នយោបាយ​ និង ការអភិវឌ្ឍន៍

កិច្ចព្រមព្រៀងបានឈានដល់ការបញ្ជូនរថក្រោះឡេភឺតជំនាន់ទី១ ផលិតនៅអាល្លឺម៉ង់ពីបែលហ្ស៊ិកទៅអ៊ុយក្រែន

2023/08/09 12:20:16 pm        277
Facebook Telegram Linkin
អ៊ុយក្រែន៖ យោងតាមឈ្មួញអាវុធដែលបានធ្វើកិច្ចព្រមព្រៀងកាលពីថ្ងៃអង្គារ ទី៨ ខែសីហា បានឲ្យដឹងថា រថក្រោះឡេភឺតជំនាន់ទី១(Leopard 1) ដែលប្រើប្រាស់រួចរាប់សិបគ្រឿង ដែលនៅពេលនោះធ្លាប់ជាកម្មសិទ្ធិរបស់ប្រទេសបែលហ្សិក ត្រូវបានទិញដោយប្រទេសអ៊ឺរ៉ុបមួយផ្សេងទៀតសម្រាប់ផ្តល់ឲ្យកងកម្លាំងអ៊ុយក្រែន ប្រយុទ្ធប្រឆាំងការឈ្លានពានរបស់រុស្ស៊ី ។លោក Freddy Versluys នាយកប្រតិបត្តិនៃក្រុមហ៊ុនការពារជាតិ OIP Land Systems បានទិញរថក្រោះផលិតនៅអាល្លឺម៉ង់ពីរដ្ឋាភិបាលប្រទេសបែលហ្ស៊ិកកាលពីជាងប្រាំឆ្នាំមុន។ លោកបានប្រាប់សារព័ត៌មាន Reuters ថាបច្ចុប្បន្ននេះលោកបានលក់រថក្រោះទាំង៥០ គ្រឿងទៅឲ្យរដ្ឋាភិបាលអឺរ៉ុបមួយផ្សេងទៀត ដែលលោកពុំអាចបញ្ចេញឈ្មោះនោះទេ ដោយសារមានខសន្យាសម្ងាត់។ លោកនិយាយថា លោកក៏មិនអាចបង្ហាញពីតម្លៃបានដែរ។សារព័ត៌មាន Handelsblatt( ហែបដលស្ព្លែត) របស់អាល្លឺម៉ង់ បានរាយការណ៍កាលពីល្ងាចថ្ងៃអង្គារថាក្រុមហ៊ុនផលិត អាវុធ Rheinmetall ( រ៉ាញម៉ែតតាល់) បានទទួលរថក្រោះហើយនឹងរៀបចំរថក្រោះភាគច្រើនសម្រាប់ការនាំចេញទៅកាន់ប្រទេសអ៊ុយក្រែន។ក្រុមហ៊ុនបានបដិសេធមិនធ្វើអត្ថាធិប្បាយនោះទេ។ រថក្រោះ Leopard ជំនាន់ទី១ ត្រូវបានផលិតដោយក្រុមហ៊ុនអាល្លឺម៉ង់ Krauss-Maffei ដែលបានចាប់ផ្តើមនៅទសវត្សរ៍ឆ្នាំ ១៩៦០ ។ វាមានទម្ងន់ស្រាលជាងរថក្រោះ Leopard 2( ឡេភឺតជំនាន់ទី២) និងមានកាំភ្លើងធំប្រភេទផ្សេងគ្នា។ ម៉ូឌែលដែលលក់ដោយ លោក Versluys ត្រូវបានធ្វើឱ្យប្រសើរឡើងចុងក្រោយនៅក្នុងទសវត្សរ៍ឆ្នាំ ១៩៩០៕

ក្រសួងប្រៃសណីយ៍ ចាប់ផ្ដើមដំណើរការកសាងមជ្ឈមណ្ឌលបច្ចេកវិទ្យាសហគមន៍នៅតាមវិទ្យាល័យ

2023/08/09 12:19:32 pm        351
Facebook Telegram Linkin
ភ្នំពេញ៖ ក្រសួងប្រៃសណីយ៍ និងទូរគមនាគមន៍ បានចាប់ផ្ដើមសាងសង់មជ្ឈមណ្ឌល​បច្ចេកវិទ្យា​សហគមន៍ (Community Tech Center) នៅតាមវិទ្យាល័យ ដើម្បីជំរុញការអភិវឌ្ឍជំនាញ និង​ការបង្កើនសមត្ថភាព ផ្នែកឌីជីថល ​ទៅដល់គ្រូបង្រៀន សិស្សានុសិស្ស និងប្រជាពលរដ្ឋទូទៅ ។ឯកឧត្តម សូ វិសុទ្ធី អ្នកនាំពាក្យក្រសួងប្រៃសណីយ៍ និងទូរគមនាគមន៍ បានប្រាប់BTV នៅថ្ងៃទី៩ ខែសីហា នេះថា ចំពោះគម្រោងសាសងសង់នូវមជ្ឈមណ្ឌលបច្ចេកវិទ្យា​សហគមន៍នេះ គឺត្រូវ​អនុវត្តនៅ គ្រប់វិទ្យាល័យ ទាំង៥៥៨នៅទូទាំងប្រទេស​ ខណៈគម្រោងនេះ​ ត្រូវបានផ្ដើមអនុវត្តហើយ គឺជាដំបូងនៅ ក្នុងខេត្តតាកែវ ។ឯកឧត្តម បានបន្តថា ការសាងសង់នូវមជ្ឈមណ្ឌលនេះ ដើម្បីជំរុញឲ្យសិស្សបានសិក្សាតាម​អនឡាញ ពីគ្រូបង្រៀន​ក្នុងសាលាខ្លួនឯងផ្ទាល់ ឬនៅរាជធានីភ្នំពេញ និងតាមបណ្ដាខេត្តផ្សេងៗ​បាន​ផងដែរ ហើយក៏អាចជួយពង្រឹងចំណេះដឹង ​ដល់លោកគ្រូ អ្នកគ្រូក្នុងមូលដ្ឋាន និងអាចដក​ស្រងយកចំណេះដឹងល្អៗ ពីគ្រូបង្រៀនពូកែ និងល្បីៗ ​ដែលជាគោលដៅរួម គឺការជួយ​ពង្រឹង​បន្ថែមដល់វិស័យអប់រំ និងផ្នែកបច្ចេកវិទ្យាឌីជីថល ។ឯកឧត្តម សូ វិសុទ្ធី បានបន្ថែមថា មជ្ឈមណ្ឌលបច្ចេកវិទ្យាសហគមន៍ នឹងមានរៀបចំនូវសាល​បំពាក់នូវកុំព្យូទ័រ និ​ងសម្ភារផ្សេងៗ ក៏ដូចជារៀបចំនូវប្រព័ន្ធអ៊ីធឺណេត រួមទាំងមានគ្រូជំនាញ​ចាំ​ជួយបង្រៀនផ្នែកបច្ចេកវិទ្យានេះ ​ហើយការបង្កើតមជ្ឈមណ្ឌលនេះ ក៏ជាឱកាសផងដែរដល់​សិស្សានុសិស្ស អាចមានការប្រកួតប្រជែងនៅទូទាំងប្រទេស ។គួរបញ្ជាក់ថា សម្រាប់មជ្ឈមណ្ឌលបច្ចេកវិទ្យាសហគមន៍នេះ ​បាននិងកំពុងសាងសង់មុនគេនៅក្នុង នៅវិទ្យាល័យ​ហ៊ុនសែន១មិថុនា​ ស្ថិតនៅឃុំពារាម ស្រុកបាទី​ ខេត្តតាកែវ ត្រូវបានបើកការដ្ឋាន​សាងសង់កាលពីថ្ងៃទី៩ ខែកក្កដា ឆ្នាំ២០២៣ ដោយ​ឯកឧត្តមបណ្ឌិត ជា វ៉ាន់ដេត រដ្ឋមន្ត្រីក្រសួង​ប្រៃសណីយ៍ និងទូរគមនាគមន៍ ។ មជ្ឈមណ្ឌលនេះមានទំហំ ៣០ម៉ែត្រ គុណនឹង១២ម៉ែត្រ មាន​បន្ទប់កំព្យូទ័រ (Computer Lab) បន្ទប់បណ្តុះបណ្តាល​ (Training Room) បន្ទប់អ៊ីនធឺណិត និងហាងកាហ្វេ (Internet Kiosk and Cafe) ​និងប៉ុស្តិ៍ប្រៃសណីយ៍ ៕អត្ថបទ បាន សុខរិទ្ធិ

អាមេរិក និយាយថា ក្រុមទាហានស៊ីឈ្នួលរុស្ស៊ី វ៉េកណា កំពុងទាញយកផលប្រយោជន៍ពីអស្ថិរភាពក្នុងរដ្ឋប្រហារនៅនីហ្សេ

2023/08/09 12:16:05 pm        57
Facebook Telegram Linkin
អាមេរិក៖ ប្រមុខការបរទេសសហរដ្ឋអាមេរិក លោក អង់តូនី ប្លីនខិន(Antony Blinken) បានប្រាប់សារព័ត៌មាន BBC ថា ក្រុមទាហានស៊ីឈ្នួលវ៉េកណា(Wagner) របស់រុស្ស៊ីកំពុងទាញយកផលប្រយោជន៍ ពីអស្ថិរភាពនៅក្នុងប្រទេសនីហ្សេ។ប្រទេសនេះត្រូវបានគ្រប់គ្រងដោយរបបយោធាបន្ទាប់ពីការទម្លាក់លោកប្រធានាធិបតី ម៉ូហាម៉េដ បាហ្សូម (Mohamed Bazoum )រយៈពេលជិតពីរសប្តាហ៍មកនេះ។  មានការលើកឡើងថា ក្រុមមេដឹកនាំរដ្ឋប្រហារបានសុំជំនួយពីក្រុមទាហានស៊ីឈ្នួលវ៉េកណា ដែលត្រូវបានគេដឹងថាមានវត្តមាននៅក្នុងប្រទេស ជិតខាងម៉ាលី។ លោក Blinken បាននិយាយថា លោកមិនគិតថា រុស្ស៊ី ឬក្រុមទាហានស៊ីឈ្នួល បានញុះញង់ឲ្យមានរដ្ឋប្រហាររបស់នីហ្សេនោះទេ។លោកបានប្រាប់កម្មវិធី Focus on Africa របស់សារព័ត៌មាន BBC ថា ទោះបីជាយ៉ាងណាក៏ដោយ សហរដ្ឋអាមេរិកមានការព្រួយបារម្ភអំពីក្រុមនេះ លើលទ្ធភាពនៃការបង្ហាញខ្លួន នៅក្នុងផ្នែកខ្លះនៃតំបន់     សាហេល (Sahel) ។លោកគិតថាអ្វីដែលបានកើតឡើង ហើយអ្វីដែលនៅតែបន្តកើតឡើងនៅក្នុងប្រទេសនីហ្សេ មិនត្រូវបានជំរុញដោយរុស្ស៊ី ឬដោយក្រុមវ៉េកណានោះទេ ប៉ុន្តែ ពួកគេព្យាយាមទាញយកប្រយោជន៍ពីរដ្ឋប្រហារនេះ៕

កម្មករនៅទីក្រុងឡូសអេនជឺលេស សហរដ្ឋអាមេរិក ចេញតវ៉ាជុំវិញកិច្ចសន្យាការងារ

2023/08/09 12:08:24 pm        93
Facebook Telegram Linkin
អាមេរិក៖ បុគ្គលិកនៅទីក្រុងឡូសអេនជឺលេស របស់សហរដ្ឋអាមេរិក បានធ្វើកូដកម្មរយៈពេល២៤ម៉ោងកាលពីថ្ងៃអង្គារ ដើម្បីតវ៉ាចំពោះអ្វីដែលសហជីពរបស់ពួកគេហៅថា ការចរចាដោយជំនឿអាក្រក់ដោយមន្ត្រីរដ្ឋាភិបាលជុំវិញកិច្ចសន្យាថ្មី ដែលជាការតវ៉ាចុងក្រោយបំផុតនៃសកម្មភាពការងារដែលប៉ះពាល់ដល់ទីក្រុង។កម្មករទីក្រុងរាប់រយនាក់ រួមទាំងជាងក្រុមការងាររោងជាង ឆ្មាំសមុទ្រ និងក្រុមមន្ត្រីចរាចរណ៍ជាច្រើន បានដើរដង្ហែក្បួននៅសាលាក្រុង និងអាកាសយានដ្ឋានអន្តរជាតិ ឡូសអេនជឺលេស ដោយនិយាយថា ការគ្រប់គ្រងទីក្រុងបានរួមចំណែកក្នុងការអនុវត្តការងារមិនយុត្តិធម៌ អំឡុងពេលចរចាលើបញ្ហាជ្រើសរើសបុគ្គលិក ការរក្សាទុក និងការជួលបុគ្គលិកជាដើម។ក្រុមមន្ត្រីនៅទីក្រុង ឡូសអេនជឺលេស បានបដិសេធមិនគោរពកិច្ចព្រមព្រៀងពីមុនៗ ហើយបានបញ្ជូនក្រុមអ្នកចរចាទៅកាន់តុចរចាដោយគ្មានសិទ្ធិអំណាច និងបានរឹតបន្តឹងការចូលទៅកាន់កន្លែងធ្វើការរបស់សហជីព។អភិបាលក្រុង ឡូសអេនជឺលេស លោកស្រី Karen Bass បាននិយាយនៅក្នុងសេចក្តីថ្លែងការណ៍មួយថា សេវាកម្មទីក្រុងមួយចំនួន នឹងមិនអាចប្រើប្រាស់បានទេក្នុងអំឡុងពេលធ្វើកូដកម្មរយៈពេលមួយថ្ងៃនេះ។ អាងហែលទឹកចំនួន៥៥កន្លែង របស់ទីក្រុងនឹងត្រូវបិទ ការយកសំរាមនឹងមិនដំណើរការរយៈពេលមួយថ្ងៃ ហើយមជ្ឈមណ្ឌលហៅទូរសព្ទសម្រាប់ព័ត៌មាន លេខ ៣១១ របស់ទីក្រុង អាចនឹងមានការពន្យារពេលផងដែរ៕

កម្ពុជា-ថៃ នឹងជំរុញសហប្រតិបត្តិការគ្នាលើជំនាញគ្រោះមហន្តរាយ

2023/08/09 12:04:19 pm        233
Facebook Telegram Linkin
ភ្នំពេញ៖ នៅថ្ងៃទី៨ខែសីហា ឆ្នាំ២០២៣ម្សិលមិញ ឯកឧត្តម គីម វីរៈ អគ្គលេខាធិការនៃ គណៈកម្មាធិការ​ជាតិគ្រប់គ្រោះមហន្តរាយ បានជួបពិភាក្សាជាមួយគណៈប្រតិភូក្រុមការងារកង​ទ័ពជើងគោកភូមិន្ទថៃ ដែលដឹកនាំ​ដោយ​ឧត្តមសេនីយ៍​ឯក ភីផាត ជោវ៉ាតានាភីសា (PHIPAT JONGWATTANAPAISAL) និងអង្គភាពកិច្ចការសាធារណនៃកងទ័ពជើងគោកភូមិន្ទថៃ ដើម្បីសិក្សាស្វែងយល់ ​និងផ្តល់បទពិសោធន៍​រវាង​ប្រទេស​ទាំង​ពីរ​លើ​ការ​គ្រប់គ្រង​គ្រោះមហន្តរាយ។ ឯកឧត្តម គីម វីរៈ មានប្រសាសន៍ថា ប្រព័ន្ធការងាររបស់គណៈកម្មាធិការជាតិគ្រប់គ្រោះមហន្តរាយ មានតួនាទី និងភារកិច្ចឆ្លើយតបចំពោះគ្រោះមហន្តរាយកើតឡើង​ដោយយថា​ហេតុបង្ក​ដោយធម្មជាតិ និងមនុស្ស។ ឯកឧត្តម បន្តថា គណៈកម្មាធិការជាតិគ្រប់គ្រោះមហន្តរាយថ្នាក់ជាតិ​ជាសេនាធិការ​របស់​នាយក​រដ្ឋមន្រ្តី ដែលជាប្រធាន ​និងសម្របសម្រួលជាមួយក្រសួងស្ថាប័នពាក់ព័ន្ធនានារួមទាំងកង​កម្លាំង​ប្រដាប់អាវុធរហូតទៅដល់ថ្នាក់ក្រោមជាតិ និងមូលដ្ឋានផងដែរ។ នាឱកាសនោះ ឯកឧត្តម​ បានស្នើឲ្យមានការសហការនិងបន្តនៃកិច្ចសហប្រតិបត្តិការក្នុងការ​ទំនាក់ទំនង​នៃប្រទេសជាមិត្តឲ្យកាន់ជិតស្និត ​ក៏ដូចកងទ័ពនិងកងទ័ព​ ប្រជាជននិងប្រជាជន​ឲ្យអោយកាន់ស៊ីជម្រៅបន្ថែមទៀត ​ដើម្បីជួយគ្នាទៅវិញទៅមកក្នុងគ្រាអាសន្ន ឬ​មាន​ឧបទ្ទវហេតុ​ដោយគ្រោះធម្មជាតិ ​និងមនុស្សបង្កឡើង ។ឧត្តមសេនីយ៏ឯក តំណាងកងទ័ពជើងគោកថៃ ​បានកោតសសើរ ​និងវាយតម្លៃខ្ពស់​ចំពោះ​គណៈកម្មាធិការជាតិ​គ្រប់គ្រោះមហន្តរាយ​ ដែលកន្លងមកដោយសង្កេតឃើញថា បាន​សម្រប​សម្រួល​ទាន់ពេលវេលា​ ក្នុងកាលៈទេសៈណាក៏ដោយ ថែមទាំងបានចូលរួមលើការងារ​សមយុទ្ធ​គ្រោះមហន្តរាយអាស៊ានជាមួយបណ្តាលប្រទេសជាមិត្តទៀតផង។ ភាគីទាំងពីរបាន​ សម្តែងនូវការគាទ្រនិងត្រៀមខ្លួនរួចជាស្រេច ដើម្បីបង្កើនកិច្ចសហប្រតិបត្តិការ​ទ្វេភាគី តាមរយៈការរៀបចំ​អនុស្សរណៈនៃការយោគយល់គ្នា ​ស្តីពីការផ្តល់ជំនួយសង្គ្រោះគ្រោះ​មហន្តរាយ, ​ការត្រៀមបង្ការពហុមុខសញ្ញាគ្រោះថ្នាក់, ​ការកាត់បន្ថយ និងប្រតិបត្តិការឆ្លើយ​តប​គ្រោះអាសន្ននាពេលខាងមុខ។ ​ភាគីថៃ ក៏បានសម្តែងនូវឆន្ទៈ ក្នុងកិច្ចសហប្រតិបត្តិការយ៉ាងជិតស្និទ្ធ​ជាមួយភាគីកម្ពុជា ក្នុងការពង្រឹងកិច្ចសហប្រតិបត្តិការរួមគ្នា ​សម្រាប់ភាពធន់នឹង​គ្រោះ​មហន្តរាយឆ្លងដែន​តាមរយៈកិច្ចព្រមព្រៀងអាស៊ានស្តីពីការគ្រប់គ្រងគ្រោះមហន្តរាយ និង​ការឆ្លើយតបសង្គ្រោះបន្ទាន់ (អាត់ម៉ែ) ឆ្នាំ២០២១-២០២៥៕ 

មនុស្ស៥នាក់បានស្លាប់ ខណៈកូដកម្មរថយន្តស៊ីឈ្នួលខ្នាតតូចរបស់ប្រទេសអាហ្រ្វិកខាងត្បូង នៅតែបន្ត

2023/08/09 12:01:16 pm        106
Facebook Telegram Linkin
អាហ្រ្វិកខាងត្បូង៖ នគរបាលបានប៉ះទង្គិចជាមួយក្រុមបាតុករនៅទីក្រុង Cape Town កាលពីថ្ងៃអង្គារ (៨ សីហា) ខណៈការធ្វើកូដកម្មបន្តរំខានដល់ការរស់នៅប្រចាំថ្ងៃនៅក្នុងទីក្រុងទេសចរណ៍របស់អាហ្វ្រិកខាងត្បូងមួយនេះ។ ការប៉ះទង្គិចគ្នានៅពេលព្រឹក បានកើតឡើងនៅក្នុងសង្កាត់ Masiphumelele ជាទីដែលអ្នកស្រុកមួយចំនួនបានដំឡើងរបាំងដែក មនុស្សជាច្រើនបានដុតភ្លើង ដើម្បីរារាំងអ្នកស្រុកផ្សេងទៀតនៅក្នុងសង្កាត់នេះមិនឱ្យចាកចេញ។បណ្ដាអង្គការប្រតិបត្តិកររថយន្តស៊ីឈ្នួលខ្នាតតូច ស្ថិតក្នុងភាពជាប់គាំងជាមួយរដ្ឋាភិបាលក្រុង Cape Town បន្ទាប់ពីបានបរាជ័យក្នុងការដោះស្រាយសោកនាដកម្មផ្សេងៗ រួមទាំងការរឹបអូសរថយន្តតាក់ស៊ី ដែលរដ្ឋាភិបាលអះអាងថាមិនសក្តិសមក្នុងការប្រើប្រាស់ផងដែរ។ អង្គការរថយន្តស៊ីឈ្នួលទាំងនោះបានអំពាវនាវឱ្យមានការធ្វើកូដកម្ម និងបិទប្រតិបត្តិការកាលពីសប្តាហ៍មុន ដែលបណ្តាលឱ្យបុគ្គលិកខកខានមិនបានបំពេញការងារ និងអាជីវកម្មជាច្រើនត្រូវបិទ។យោងតាមសេចក្តីថ្លែងការណ៍របស់ក្រសួងនគរបាលអាហ្វ្រិកខាងត្បូង មនុស្សចំនួន៥នាក់បានស្លាប់ (រួមទាំងជនជាតិអង់គ្លេសម្នាក់) ដោយសារតែកូដកម្មនេះ ហើយមនុស្សចំនួន១២០នាក់ត្រូវបានចាប់ខ្លួនចាប់តាំងពីថ្ងៃទី៣ ខែសីហា មក នៅពេលដែលកូដកម្មបានចាប់ផ្តើម និងមានឧប្បត្តិហេតុនៃការលួចរបស់របរពីហាង ការគប់ដុំថ្ម ការបិទផ្លូវ ការដុតដោយចេតនា និងអំពើហិង្សាសាធារណៈជាច្រើនទៀតក៏បានកើតឡើងផងដែរ៕

ជនជាតិដើមភាគតិចចេញតវ៉ាក្នុងទីក្រុងបេឡេម ប្រទេសប្រេស៊ីល ខណៈកិច្ចប្រជុំកំពូលអាម៉ាហ្សូនចាប់ផ្តើម

2023/08/09 11:58:18 am        96
Facebook Telegram Linkin
ប្រេស៊ីល៖ ជនជាតិដើមភាគតិចបានដើរដង្ហែតាមដងផ្លូវក្នុងទីក្រុងបេឡេម ប្រទេសប្រេស៊ីល ដើម្បីតវ៉ា ខណៈដែលបណ្ដាមេដឹកនាំនៃក្រុមប្រទេសតំបន់ព្រៃអាម៉ាហ្សូន ចំនួនប្រាំបី បានជួបប្រជុំគ្នានៅថ្ងៃដំបូងនៃកិច្ចប្រជុំកំពូលអាម៉ាហ្សូន កាលពីថ្ងៃអង្គារ (៨ សីហា)។ក្រុមបាតុករបានដើរដង្ហែតាមដងផ្លូវដោយគ្រវីទង់ជាតិ និងស្រែកពាក្យស្លោកប្រឆាំងនឹងការជីកយករ៉ែ ការខួងយកប្រេង និងអ្វីដែលពួកគេហៅថា "គម្រោងជីកយកធនធានធម្មជាតិ" នៅក្នុងតំបន់ព្រៃអាម៉ាហ្សូន ដោយកាន់ផ្លាកសញ្ញាទាមទារការការពារទឹកដីរបស់ពួកគេ។ ក្រុមប្រទេសតំបន់ព្រៃអាម៉ាហ្សូនទាំងប្រាំបីត្រូវបានគេរំពឹងថា នឹងប្រឈមមុខនឹងការខ្វែងគំនិតគ្នាជុំវិញសំណើទប់ស្កាត់ការខួងយកប្រេងថ្មី និងបញ្ចប់ការកាប់បំផ្លាញព្រៃឈើ នៅពេលដែលពួកគេជួបគ្នាសម្រាប់កិច្ចប្រជុំកំពូលលើកដំបូងរបស់ពួកគេក្នុងរយៈពេល១៤ឆ្នាំនោះ។កិច្ចប្រជុំរបស់អង្គការសន្ធិសញ្ញាសហប្រតិបត្តិការព្រៃអាម៉ាហ្សូន (ACTO) ប្រមូលផ្តុំប្រមុខរដ្ឋមកពីប្រទេសបូលីវី ប្រេស៊ីល កូឡុំប៊ី អេក្វាឌ័រ ហ្គីយ៉ាណា ប៉េរូ ស៊ូរីណាម និងវេណេហ្ស៊ុយអេឡា រយៈពេលពីរថ្ងៃនៅទីក្រុងបេឡេមភាគខាងជើងនៃប្រទេសប្រេស៊ីល។ពួកគេមានបំណងបង្កើតគោលនយោបាយ គោលដៅ និងមុខតំណែងបង្រួបបង្រួមក្នុងការចរចាអន្តរជាតិលើបញ្ហាចំនួន១៣០ករណី រាប់ចាប់ពីការផ្តល់ហិរញ្ញប្បទានសម្រាប់ការអភិវឌ្ឍប្រកបដោយចីរភាពរហូតដល់ការដាក់បញ្ចូលជនជាតិដើមភាគតិចផងដែរ៕

អ៊ីស្រាអែលគំរាមធ្វើឲ្យប្រទេសលីបង់ទៅជាសម័យយុគ្គថ្មបើមានសង្រ្គាមជាមួយក្រុមហេសបូឡា

2023/08/09 11:55:20 am        123
Facebook Telegram Linkin
អ៊ីស្រាអែល៖ ប្រទេសអ៊ីស្រាអែល បានគំរាមកាលពីថ្ងៃអង្គារថានឹងធ្វើឲ្យប្រទេសលីបង់វិលត្រឡប់ទៅកាន់សម័យកាលយុគថ្មក្នុងសង្គ្រាមប្រឆាំងក្រុមហេសបូឡា បន្ទាប់ពីរយៈពេលច្រើនសប្តាហ៍នៃភាពតានតឹងជាមួយក្រុមប្រដាប់អាវុធគាំទ្រដោយប្រទេសអ៊ីរ៉ង់នៅតាមបណ្តោយព្រំដែនប្រទេស។រដ្ឋមន្ត្រីការពារជាតិអ៊ីស្រាអែល លោក Yoav Gallant បាននិយាយនៅក្នុងសេចក្តីថ្លែងការណ៍ថា កុំធ្វើឲ្យមានបញ្ហា យើងមិនចង់បានសង្រ្គាមនោះទេ។ ប៉ុន្តែយើងត្រៀមទប់ទល់ដើម្បីការពារជនស៊ីវិល ទាហាន និងដែនអធិបតេយ្យភាពរបស់យើង។វោហាសាស្ត្របែបនេះ ត្រូវបានដឹងឮពីភាគីទាំងសងខាង ចាប់តាំងពីសង្គ្រាមអ៊ីស្រាអែលនិងក្រុមហេសបូឡាហ៍ចុងក្រោយនៅក្នុងឆ្នាំ ២០០៦។ប៉ុន្តែវាកាន់តែច្បាស់លាស់ចាប់តាំងពីការបំផ្ទុះគ្រាប់បែកនៅតាមដងផ្លូវក្នុងប្រទេសអ៊ីស្រាអែលកាលពីខែមីនា ដែលខ្លួនបានដាក់កំហុសទៅលើអ្នកជ្រៀតចូលក្រុមហេសបូឡា។ក្រុមនេះពុំបានអះអាងទទួលខុសត្រូវចំពោះការបំផ្ទុះគ្រាប់បែកនេះទេ។ ប៉ុន្មានកាលពីសប្តាហ៍ថ្មីៗនេះ មានការប្រឈមមុខដាក់គ្នារវាងជនស៊ីវិលលីបង់ ដែលយ៉ាងហោចណាស់មួយក្រុមនៃប្រតិបត្តិការហេសបូឡា និងទាហានអ៊ីស្រាអែល បានឆ្លងកាត់ព្រំដែនដែលមានសំណង់ការពាររឹងមាំ៕

តំបន់រងគ្រោះដោយទឹកជំនន់ក្នុងប្រទេសចិន បង្កើនកិច្ចខិតខំប្រឹងប្រែងសង្គ្រោះគ្រោះមហន្តរាយ និងការសាងសង់ឡើងវិញ

2023/08/09 11:52:19 am        94
Facebook Telegram Linkin
ចិន៖ ក្រុមឆ្លើយតបគ្រោះមហន្តរាយនៅតំបន់រងគ្រោះដោយទឹកជំនន់ក្នុងប្រទេសចិន ជាពិសេសភាគខាងជើង និងភាគឦសាននៃប្រទេសចិន ទីក្រុងប៉ាវទីង ទីក្រុងប៉េកាំង និងតំបន់ជាច្រើនទៀតទូទាំងប្រទេស បានពង្រឹងការងារសង្គ្រោះ និងការកសាងឡើងវិញ បន្ទាប់ទឹកជំនន់ ដែលមានសម្លាប់មនុស្សយ៉ាងហោចណាស់៣៣នាក់ និងមនុស្ស១៨នាក់ទៀតនៅបន្តបាត់ខ្លួន ដោយបានខិតខំឱ្យអស់ពីលទ្ធភាពក្នុងដំណើរការជម្លៀស និងការតាំងទីលំនៅថ្មីឡើងវិញផងដែរ។ នៅពេលនេះទឹកជំនន់នៅខេត្តហឺប៉ី ភាគខាងជើងប្រទេសចិនកំពុងស្រកបន្តិចម្តងៗ ហើយតំបន់ដែលរងផលប៉ះពាល់កំពុងពន្លឿនការជួសជុល និងស្តារឡើងវិញ។នៅក្នុងភូមិ សៀជ័ង នៃទីក្រុងប៉ាវទីង និងខេត្តហឺប៉ី បណ្ដាអ្នកភូមិ និងពាណិជ្ជកររាប់ពាន់នាក់បានត្រឡប់ទៅផ្ទះរបស់ពួកគេវិញ បន្ទាប់ពីការស្ដារឡើងវិញនូវមធ្យោបាយដឹកជញ្ជូន ថាមពល និងទូរគមនាគមន៍។ រដ្ឋាភិបាលខេត្តហឺប៉ី បានរៀបចំក្រុមគ្រូពេទ្យចល័តជាង៩៦០នាក់ ដើម្បីផ្តល់សេវាវេជ្ជសាស្រ្តនៅក្នុងតំបន់រងគ្រោះដោយទឹកជំនន់ផងដែរ។ទីក្រុងប៉េកាំងក៏បានបង្កើនការងារស្តារ និងកសាងឡើងវិញផងដែរ ដោយផ្តោតលើសង្កាត់ជាយក្រុងចំនួនបីគឺតំបន់ហ្វាងសាន តំបន់ម៉ិនថូវហ្គូវ និងតំបន់ចាងភីង ហើយរដ្ឋធានីរបស់ប្រទេសចិនមួយនេះបានដំណើរការយ៉ាងទូលំទូលាយនូវសកម្មភាពពិសេសចំនួនប្រាំមួយ ដែលផ្តោតលើការបូមខ្សាច់សហគមន៍ ការកែលម្អបរិស្ថាន និងសុវត្ថិភាពទឹកផឹកផងដែរ។យោងតាមទិន្នន័យពីរដ្ឋបាលជាតិនៃនិយ័តកម្មហិរញ្ញវត្ថុ គិតត្រឹមព្រឹកថ្ងៃអង្គារ ស្ថាប័នធានារ៉ាប់រងនៅក្នុងតំបន់រងគ្រោះដោយគ្រោះមហន្តរាយចំនួន១៦ទីតាំង រួមមានខេត្តហឺប៉ី ទីក្រុងប៉េកាំង និងទីក្រុងហ៊ីឡុងជាំង បានទទួលរបាយការណ៍ធានារ៉ាប់រងជាង២០០.០០០ករណី ជាមួយនឹងការខាតបង់ប៉ាន់ស្មានឈានដល់៧ពាន់លានយ័ន (ប្រហែល១ពាន់លានដុល្លារអាមេរិក) ផងដែរ៕

ក្រសួងវប្បធម៌ទទួលហូលពិដាន និងផ្ទាំងក្រណាត់សូត្រសរុបចំនួន៤១ផ្ទាំង ពីក្រុមការងារពិដាន ជប៉ុន

2023/08/09 11:50:19 am        800
Facebook Telegram Linkin
ភ្នំពេញ៖ ក្រសួងវប្បធម៌ និងវិចិត្រសិល្បៈថ្ងៃទី៨ ខែសីហា បានទទួលហូលពិដាន និងផ្ទាំងក្រណាត់សូត្រសរុបចំនួន ៤១ផ្ទាំង ​ពីក្រុមការងារពិដាន ​នៃប្រទេសជប៉ុន ដូចមានក្នុងបញ្ជីភ្ជាប់ ​ជូនទៅសារមនី្ទរជាតិកម្ពុជា។ការប្រគល់ទទួលនេះធ្វើឡើងក្រោមអធិបតីភាពរបស់លោកជំទាវ ​បណ្ឌិតសភាចារ្យ ភឿង ​សកុណា រដ្ឋមន្រី្តក្រសួងវប្បធម៌ ​និងវិចិត្រសិល្បៈ ​និងចុះហត្ថលេខាប្រគល់-ទទួល ​ដោយលោក ​ឆាយ វិសុទ្ធ ប្រធាននាយកដ្ឋានសារមនី្ទរ ​និងជាប្រធានសារមនី្ទរជាតិ ​និងលោកស្រីសាស្រ្តាចារ្យ Yonekura Yukiko អ្នកសម្របសម្រួលក្រុមការងារពិដាន។ឆ្លៀតក្នុងឱកាសនោះលោក ឆាយ វិសុទ្ធ ប្រធាននាយកដ្ឋានសារមនី្ទរ និងជាប្រធានសារមនី្ទរជាតិ បានពណ៌នាអំពីប្រភពដើម នៃវត្ថុដែលប្រគល់-ទទួល ថា ពិដាន និងក្រណាត់សូត្រទាំង៤១ផ្ទាំងនេះ បានប្រមូលមកពីទីកន្លែងផ្សេងៗ​ភាគច្រើន​នៅព្រះរាជាណាចក្រកម្ពុជា ​និងមានមួយចំនួន​មកពី​តំបន់ពាយ័ព្យ​នៃប្រទេសថៃ​ និងភាគខាងត្បូងនៃប្រទេសវៀតណាម។ ​វត្ថុសិល្បៈទាំង​អស់នេះ និង​ត្រូវរក្សាទុកនៅសារមនី្ទរជាតិកម្ពុជា​ ជាសម្បតិ្តរដ្ឋចាប់ពីថ្ងៃចុះហត្ថលេខានេះតទៅ៕ អត្ថបទ រដ្ឋា

បណ្ដាញសង្គម

ព័ត៌មានថ្មីៗ

ការពិនិត្យឡើងវិញ៖ ភាពយន្តឯកសារពីតំបន់ហ្កហ្សារបស់ BBC បំពានគោលការណ៍ណែនាំអំពីភាពត្រឹមត្រូវ
07/14/2025 08:07 PM
Facebook Telegram Linkin
មនុស្សជាច្រើននាក់ស្លាប់ក្នុងអគ្គិភ័យនៅមជ្ឈមណ្ឌលសង្គ្រោះ ក្នុងរដ្ឋ Massachusetts
07/14/2025 08:07 PM
Facebook Telegram Linkin
ជំនួយការរបស់លោក Netanyahu ប្រឈមនឹងការចោទប្រកាន់ផ្លូវការ ជុំវិញការបែកធ្លាយព័ត៌មានយោធា
07/14/2025 08:07 PM
Facebook Telegram Linkin
រដ្ឋមន្ត្រីការបរទេសអ៊ីស្រាអែល និងប៉ាឡេស្ទីន នឹងចូលរួមកិច្ចប្រជុំរបស់ EU
07/14/2025 08:07 PM
Facebook Telegram Linkin
អ៊ីរ៉ង់៖ ការដាក់ទណ្ឌកម្មជាថ្មីរបស់ UN នឹងជួបជាមួយការឆ្លើយតបយ៉ាងសមស្រប
07/14/2025 07:07 PM
Facebook Telegram Linkin
វិមានក្រឹមឡាំង៖ ការបញ្ជូនអាវុធ និងគ្រាប់រំសេវទៅអ៊ុយក្រែនពីអាមេរិក កំពុងបន្តមានធម្មតា
07/14/2025 07:07 PM
Facebook Telegram Linkin
នគរបាលឃាត់ខ្លួនមនុស្ស ៨នាក់ ក្រោយមានការប៉ះទង្គិចរបស់ក្រុមប្រឆាំងជនអន្តោប្រវេសន៍ ក្នុងទីក្រុងនៅអេស្ប៉ាញ
07/14/2025 07:07 PM
Facebook Telegram Linkin
ព្រះអង្គម្ចាស់ នរោត្តម ចក្រាវុធ ជួបពិភាក្សាការងារជាមួយ ឯកឧត្តម Chen Zhou អនុរដ្ឋមន្រ្តី ក្រសួងទំនាក់ទំនងអន្តរជាតិចិន
07/14/2025 07:07 PM
Facebook Telegram Linkin
EU នឹងត្រៀមបញ្ជីពន្ធ ២៤,៥២ពាន់លានដុល្លារ សម្រាប់ទំនិញរបស់អាមេរិក
07/14/2025 06:07 PM
Facebook Telegram Linkin
សេដ្ឋកិច្ចកម្ពុជានៅបន្តរឹងមាំ៖ ២២ខែនៃរាជរដ្ឋាភិបាលអាណតិ្តទី៧របស់សម្តេចធិបតី រោងចក្រសហគ្រាសកើនជាង៥,៣ពាន់ដែលបង្ហាញពីភាពរឹងមាំ និងជំនឿទុកចិត្ត
07/14/2025 06:07 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.