នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
BREAKING NEWS | កម្ពុជា និងថៃឯកភាពឈប់បាញ់គ្នា និងត្រលប់ទៅអនុវត្តបទឈប់បាញ់តាមរយៈការសម្របសម្រួលរបស់ប្រធានាធិបតីអាមេរិក
តម្លៃសេវាអ៊ីនធឺណិតនឹងទាបជាងមុន បន្ទាប់ពីកម្ពុជាតបណ្តាញប្រព័ន្ធអ៊ីនធឺណិតពីហុងកុង
វេទិកានយោបាយអាស៊ី-អឺរ៉ុប ស្នើឱ្យភាគីជម្លោះគោរពចំពោះកិច្ចព្រមព្រៀងសន្តិភាពនានា និង​ធម្មនុញ្ញ UN
ក្រសួងរៀងចំដែនដី នឹងបង្កើតសួនបន្ថែមក្នុងទីក្រុង ឆ្លើយតបនឹងកំណើនពលរដ្ឋក្នុងទីក្រុង

នយោបាយ​ និង ការអភិវឌ្ឍន៍

មន្រ្តីសុខាភិបាល៖ ការចាក់វ៉ាក់សាំងជូនកុមារ ត្រូវមានភាពអត់ធ្មត់ជាងមនុស្សធំ

2022/02/24 12:15:48 pm        545
Facebook Telegram Linkin
ភ្នំពេញ៖ មន្ត្រីសុខាភិបាល បាននិយាយថា ការចាក់វ៉ាក់សាំងជូនកុមារអាយុ ៣ឆ្នាំដល់ក្រោម ៥ឆ្នាំ គឺត្រូវមានបច្ចេកទេសច្បាស់ និងភាពអត់ធ្មត់ច្រើនជាងមនុស្សធំ។អ្នកគ្រូពេទ្យ ហ៊ាង មករា ប្រធានមណ្ឌលសុខភាពស្ទឹងមានជ័យ ក្នុងខណ្ឌមានជ័យ រាជធានីភ្នំពេញ នៅថ្ងៃទី២៤ ខែកុម្ភៈ នេះ បានប្រាប់BTVថា បន្ទាប់ពីចាប់ផ្តើមយុទ្ធនាការចាក់វ៉ាក់សាំង ប្រភេទស៊ីណូវ៉ាក់ ជូនកុមារអាយុ៣ឆ្នាំ ដល់ក្រោម៥ឆ្នាំ ពីថ្ងៃទី២៣ រហូតដល់ថ្ងៃនេះ អាណាព្យាលបាល បានសម្រុកនាំក្មេងៗ មកទទួលការចាក់វ៉ាក់សាំងដូសទី១ ហើយក្រុមគ្រូពេទ្យ​មមាញឹក​ច្រើនក្នុងការបំពេញការងារ​ ហើយការចាក់វ៉ាក់សាំងជូនក្មេងៗនេះ គឺត្រូវមាន​បច្ចេកទេស​ច្បាស់ ​និងភាព​អត់ធ្មត់​ច្រើនជាងមនុស្សធំ​ ដោយសារ​ ក្មេងៗ​មួយ​ចំនួន​ខ្លាច​ម្ជុល។អាណាព្យាបាល ​ដែលនាំកូនមកចាក់វ៉ាក់សាំង ​នៅមណ្ឌលសុខភាព​ស្ទឹងមានជ័យ ​បាន​និយាយថា បន្ទាប់ពីកូនៗ​បានចាក់វ៉ាក់សាំងរួច ​បាន​ជួយបង្កើន​ទំនុកចិត្តជាងមុន​ ក្នុងរស់នៅ​តាម​បែប​គន្លងថ្មី ជាមួយជំងឺកូវីដ-១៩ ​ជាពិសេសបច្ចុប្បន្ន ​មេរោគបំប្លែងថ្មី ​អូមីក្រុង កំពុងរីករាលដាល​ក្នុង​សហគមន៍​។ ពួកគេ បានអរគុណរាជរដ្ឋាភិបាល ដែលបានខិតខំស្វែងរកវ៉ាក់សាំងចាក់ជូនប្រជាពលរដ្ឋរាប់​ពីដូសទី១ ដល់ដូសទី៤។សម្រាប់អាណាព្យាបាល ​ដែលនាំកុមារទៅចាក់វ៉ាក់សាំងបង្កាជំងឺកូវីដ-១៩​ នៅទីតាំង​សុខាភិបាល សាធារណៈ ដែលរៀបចំ​ដោយអាជ្ញាធរមូលដ្ឋាន​ ត្រូវភ្ជាប់​ជាមួយនូវ​ឯកសារដូចជា៖ ​សំបុត្រកំណើត សៀវភៅគ្រួសារ សៀវភៅស្នាក់នៅ ឬលិខិតឆ្លងដែន ​និងចំពោះកូនចៅមន្រ្តីរាជការ ថ្នាក់ជាតិវិញ ត្រូវភ្ជាប់ឯកសារ ដូចជាប័ណ្ណសម្គាល់ខ្លួនមន្រ្តីរាជការ ​ឬប័ណ្ណសម្គាល់មន្រ្តីជាប់កិច្ច សន្យា៕ អត្ថបទ៖ ទូច សោភ័ណ 

សម្ដេចតេជោ៖ រាជរដ្ឋាភិបាលកម្ពុជា​ប្ដេជ្ញា​បន្តយកចិត្តទុកដាក់ដោះស្រាយ​បញ្ហា​បង្កឡើង​ដោយ​សារមីន

2022/02/24 11:52:44 am        269
Facebook Telegram Linkin
ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានថ្លែងថា រាជរដ្ឋាភិបាលកម្ពុជា ប្ដេជ្ញាបន្តយកចិត្តទុកដាក់ដោះស្រាយបញ្ហា ដែលបង្កឡើងដោយសារមីន គ្រាប់បែកចង្កោម និងសំណល់ ជាតិផ្ទុះពីសង្គ្រាម ដើម្បីលុបបំបាត់អ្នកស្លាប់ និងពិការ ។សម្ដេចតេជោ ហ៊ុន សែន បានថ្លែងថា រាជរដ្ឋាភិបាលកម្ពុជា ប្ដេជ្ញាបន្តយកចិត្តទុកដាក់ដោះស្រាយ​បញ្ហា ​ដែលបង្កឡើងដោយសារមីន គ្រាប់បែកចង្កោម និងសំណល់ ជាតិផ្ទុះពី សង្គ្រាមដោយ​អនុវត្ត​ឱ្យ​បានត្រឹមត្រូវតាមគោលដៅអភិវឌ្ឍន៍​ប្រកបដោយចីរភាពកម្ពុជា ​២០១៦-២០៣០ ផែនការ​យុទ្ធសាស្ត្រ​អភិវឌ្ឍន៍ជាតិ ២០១៩-២០២៣ ​យុទ្ធសាស្តចតុកោណដំណាក់កាលទី៤ ​២០១៨-២០២៣ និង​ផែនការ​យុទ្ធសាស្ត្រជាតិ ​សកម្មភាពមីន២០១៨-២០២៥។ នេះបើយោង​តាមសារលិខិត ​របស់សម្ដេចតេជោ ក្នុងឱកាសប្រារព្ធខួបលើកទី២៣ នៃទិវាជាតិយល់​ដឹង​អំពី​មីន ២៤ កុម្ភៈ ឆ្នាំ២០២២។សម្ដេចតេជោ ​បានអំពាវនាវទៅកាន់ជនរួមជាតិ ​ជាពិសេសតាមរយៈក្រសួង ​ស្ថាប័ន​ អាជ្ញាធរផ្នែក ពាក់ព័ន្ធ​ទាំងអស់ ​ឱ្យចូលរួមអប់រំផ្សព្វផ្សាយការ​យល់​ដឹងអំពីគ្រោះថ្នាក់ដោយសារមីន យុទ្ធភណ្ឌមិនទាន់ផ្ទុះ និងសំណល់ជាតិផ្ទុះពីសង្គ្រាម។សម្ដេចតេជោ បានធ្វើការអំពាវនាវដល់ក្រសួង ស្ថាប័នពាក់ព័ន្ធ ​អាជ្ញាធរដែនដីគ្រប់លំដាប់ថ្នាក់ កង កម្លាំងប្រដាប់អាវុធគ្រប់ប្រភេទ​ ប្រតិបត្តិករជាតិ​ និងអន្តរជាតិ​ ត្រូវចូលរួមឱ្យបានខ្លាំងក្លាថែមទៀត ក្នុងការផ្សព្វផ្សាយ​ការយល់ដឹងពីគ្រោះថ្នាក់ដោយសារមីន ​គ្រាប់បែកចង្កោម និងសំណល់​ជាតិ​ផ្ទុះ​ពីសង្គ្រាមដល់ ប្រជាពលរដ្ឋ ​នៅតាមសហគមន៍ ​ដែលរងផលប៉ះពាល់ តាមរយៈសកម្មភាពអប់រំ​ដោយ​ផ្ទាល់។ អាជ្ញាធរមីន ​ត្រូវបន្តសម្របសម្រួលជាមួយប្រតិបត្តិករជាតិ ​និងអន្តរជាតិ និង​ភាគីពាក់ព័ន្ធ ​ដើម្បីកំណត់ឱ្យបានជាក់ ​លាក់នូវតំបន់ ឬទីតាំង ដែលរងការប្រឈមគ្រោះថ្នាក់​ដោយ​សារមីន ​គ្រាប់បែក ​ចង្កោម ​និង​សំណល់ជាតិ​ ផ្ទុះពីសង្គ្រាម ដើម្បីធ្វើការអប់រំទប់ស្កាត់​គ្រោះថ្នាក់​បានទាន់ពេលវេលា។ ម្ចាស់ជំនួយ ​និងដៃគូអភិវឌ្ឍ សូម បន្តគាំទ្រដល់សកម្មភាពបោសសម្អាតមីន ​គ្រាប់បែកចង្កោម និង​សំណល់ជាតិផ្ទុះពីសង្គ្រាម ​អប់រំកាត់ ​បន្ថយគ្រោះថ្នាក់ និងសង្គ្រោះជនពិការ​ដោយសារគ្រឿង​ផ្ទុះ​ទាំងនេះ និងគួរបន្តស្រាវជ្រាវ ​វិធីសាស្ត្រកៀរគរ ​ធនធាន​ប្រកប​ដោយនវានុវត្តន៍ ជាពិសេស​ជំរុញ​ការ​ចូលរួមពីវិស័យឯកជន ​ក្នុងដំណើរឆ្ពោះទៅរកការ សម្រេចបានចក្ខុវិស័យ “កម្ពុជាមួយគ្មានមីន​ឆ្នាំ​២០២៥» ។រយៈពេល២៩ឆ្នាំកន្លងមកនេះ (១៩៩២-២០២១) ​ផ្ទៃដីទំហំ២៣២៥គីឡូម៉ែត្រក្រឡា ​ត្រូវបាន បោស​សម្អាត​សម្រាប់យកទៅប្រើប្រាស់​ និង​បង្ក​បង្កើន​ផល ​ដោយមាន​ប្រជាពលរដ្ឋ​ចំនួន​ជាង ៧លាននាក់ បានទទួលផល៕ អត្ថបទ៖ មុត សុទ្ធ

សម្តេចតេជោ ហ៊ុន សែន ព្រមានដល់រដ្ឋមន្រ្តីក្រសួងកសិកម្ម ទាក់ទងនឹងបញ្ហាជ្រូកឡើងថ្លៃ

2022/02/23 05:51:11 pm        2494
Facebook Telegram Linkin
ភ្នំពេញ៖ សម្តេចតេជោ ហ៊ុន សែន ព្រមាននិងប្រតិកម្មយ៉ាងខ្លាំងចំពោះរដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ ត្រូវចេះធ្វើការសហការជាមួយស្ថាប័នដទៃ ជាពិសេសគឺករណីជ្រូកនេះតែម្តង ដោយនាពេលកន្លងទៅ រដ្ឋមន្រ្តីក្រសួងរូបនេះ បានធ្វើការ មិនចេះស្តាប់គេស្តាប់ឯង ដោយបណ្តោយឲ្យដំឡើងថ្លៃស្រេចតែចិត្ត ធ្វើឲ្យបងប្អូនប្រជាពលរដ្ឋមានការថ្នាំងថ្នាក់ជាដើមនោះ។ការព្រមានរបស់សម្តេចតេជោ ហ៊ុន សែន នាយករដ្ឋមន្រ្តី ធ្វើឡើងនៅក្នុងពិធី​អញ្ជើញ​ជា​អធិបតីភាព ក្នុង​ពិធីបិទសន្និបាតត្រួតពិនិត្យលទ្ធផលការងារឆ្នាំ២០២១​ និងលើកទិសដៅការងារឆ្នាំ២០២២ របស់ក្រសួងមហាផ្ទៃ នារសៀលថ្ងៃទី២៣ ខែកុម្ភៈ ឆ្នាំ២០២២នេះនៅសណ្ឋាគារសុខាភ្នំពេញ។សម្តេចតេជោ ​បានលើកឡើងថា​ តាមរយៈលិខិត​ឆ្លើយឆ្លង​គ្នារ​វាង​រដ្ឋមន្រ្តីក្រសួងកសិកម្ម រុក្ខា​ប្រមាញ់ ​និងនេសាទ ​គឺឯកឧត្តម វេង សាខុន ​និង​រដ្ឋមន្រ្តីក្រសួងសេដ្ឋកិច្ច​ និង​ហិរញ្ញវត្ថុ​ឯកឧត្តម​ឧបនាយករដ្ឋមន្រ្តី អូន ព័ន្ធមុន្នីរ័ត្ន នាពេលកន្លងទៅនោះ​ បាន​ធ្វើឲ្យ​សម្តេចក្រៅក្រហាយខ្លាំង​ដោយ​សារតែរដ្ឋមន្រ្តី​ក្រសួងសិកម្ម មិន​ព្រម​ធ្វើការ​ជាមួយគេ​ដោយ​បាន​បណ្តោយ​ឲ្យសាច់ជ្រូក​ឡើងថ្លៃ​ស្រេចតែចិត្ត​របស់ឈ្មួញ។ជាមួយគ្នានោះដែរ សម្តេចតេជោ ហ៊ុន សែន នាយករដ្ឋមន្រ្តី បានស្នើដល់រដ្ឋមន្រ្តី​ក្រសួងកសិកម្ម រុក្ខាប្រមាញ់ និងនេសាទរូបនេះ ត្រូវ​បង្កើត​គណៈកម្មការ​ជាមួយ​ក្រសួង​នានា ជា​បន្ទាន់​ដើម្បីធ្វើការ​ដោះស្រាយ​ឲ្យ​បាន​សមស្រប​លើ​ករណីតម្លៃជ្រូក ​ដែលកំពុង​មាន​បញ្ហា​នាពេលបច្ចុប្បន្ននេះ​ផងដែរ ដើម្បីធ្វើយ៉ាងណាកុំឲ្យបងប្អូន​ប្រជាពលរដ្ឋ មាន​ការ​ធុញទ្រាន់​បន្ត​ទៀតនោះ៕អត្ថបទ៖ បាន ចក់

ប្រសាសន៍សំខាន់ៗរបស់​សម្តេចតេជោ នាយករដ្ឋមន្រ្តី​ ក្នុង​ពិធី​បិទ​សន្និបាត​ក្រសួងមហាផ្ទៃ

2022/02/23 05:31:07 pm        643
Facebook Telegram Linkin
ភ្នំពេញ៖ នារសៀលថ្ងៃទី២៣ ខែកុម្ភៈនេះ នៅសណ្ឋាគារសុខាភ្នំពេញ សម្តេចតេជោ ហ៊ុន សែន នាយករដ្ឋមន្រ្តី នៃកម្ពុជា អញ្ជើញជាអធិបតីភាព ក្នុងពិធីបិទសន្និបាតត្រួត​ពិនិត្យ​លទ្ធផល​ការងារឆ្នាំ២០២១ និងលើកទិសដៅការងារឆ្នាំ២០២២ របស់ក្រសួងមហាផ្ទៃ។ក្នុងពិធីបិទ​សន្និបាត​សម្តេចតេជោ នាយករដ្ឋមន្រ្តី ប្រសាសន៍សំខាន់ៗដូចខាងក្រោម៖ -សម្តេចតេជោ ហ៊ុន សែម បានវាយតម្លៃខ្ពស់ចំពោះថ្នាក់ដឹកនាំក្រសួងមហាផ្ទៃ កម្លាំងនគរបាលជាតិ មន្ត្រីស៊ីវិល និងរដ្ឋបាលបាលថ្នាក់ក្រោមជាតិ ​ដែលបានប្រឹងប្រែងយ៉ាងខ្លាំងក្នុងពេលដែលកម្ពុជា​កំពុងប្រយុទ្ធប្រឆាំងកូវីដ-១៩ ដែលផ្តល់លទ្ធភាពឲ្យរាជរដ្ឋាភិបាលបើកប្រទេសឡើងវិញ។-សម្តេចតេជោ ប្រកាសកោត​សរសើរ​ដល់នគរបាលជាតិ​ ក្នុងការប្រឆាំង​នឹងក្រុមប្រឆាំង​ជ្រុលនិយម និង​មជ្ឈដ្ឋាន​អគតិក្នុងនិងក្រៅប្រទេស បានប្រើឧបាយកល​ និង​សកម្មភាព​ខុសច្បាប់ ដើម្បី​ប៉ុនប៉ង​ផ្ដួល​រំលំ​រាជរដ្ឋាភិបាល និងរបបរាជានិយមនៅកម្ពុជា។-សម្តេចតេជោ ហ៊ុន សែន បានកោត​សរសើរ​ចំពោះកិច្ចខិតខំ​ប្រឹងប្រែង​រក្សាសន្តិសុខ​សណ្ដាប់ធ្នាប់​សាធារណៈ និងការប្រឹងប្រែងរួមគ្នារក្សាការពារបានយ៉ាងរឹងមាំនូវសុខសន្តិភាព​ ស្ថិរភាពនយោបាយ ឯករាជ្យ អធិបតេយ្យជាតិ បូរណភាពទឹកដី សន្តិសុខជាតិ​ ដោយ​បញ្ចៀស​បានអំពើភេវរកម្ម និង​បង្ការ​ទប់ស្កាត់បានទាន់ពេលវេលានូវឧក្រិដ្ឋកម្មឆ្លងដែនគ្រប់ប្រភេទ ធានារក្សាបាន​សន្តិសុខ​ផ្ទៃក្នុងប្រទេសយ៉ាងល្អប្រសើរជាទូទៅ។-សម្តេចតេជោ ហ៊ុន សែន បានកោតសរសើរចំពោះកិច្ចខិតខំ​ពុះពារ​រែកពន្ធ​ ការងារ​ជាច្រើនប្រកប​ដោយការទទួលខុសត្រូវខ្ពស់ក្នុងការរក្សាសន្តិសុខ សណ្ដាប់ធ្នាប់សង្គម ចូលរួមអនុវត្ត​ដោយផ្ទាល់​នូវ​វិធានការរាជរដ្ឋាភិបាលក្នុងការប្រយុទ្ធនឹងជំងឺកូវីដ-១៩ ការជួយដោះស្រាយជីវភាពពលរដ្ឋ​ទទួល​រងផលប៉ះពាល់ដោយកូវីដ-១៩​ និងគ្រោះធម្មជាតិនានា។-សម្តេចតេជោ ហ៊ុន សែន កោតសរសើរដល់ក្រសួងមហាផ្ទៃ ដែលប្រឹងប្រែងក្នុងយុទ្ធនាការ​ប្រយុទ្ធ​ប្រឆាំង​គ្រឿងញៀន​ខុសច្បាប់ សកម្មភាពប្រយុទ្ធប្រឆាំងអំពើជួញដូរមនុស្ស ​និងផ្លូវភេទ ការ​ប្រយុទ្ធប្រឆាំងផលិតផលក្លែងក្លាយ​ បទល្មើសសេដ្ឋកិច្ច​ និងបទល្មើសផ្សេងៗ ទោះជាកម្ពុជា​រងការ​រំខានខ្លះៗដោយជំងឺកូវីដ-១៩ក៏ដោយ។-សម្តេចតេជោ ហ៊ុន សែន ជំរុញឲ្យបង្កើនការយកចិត្តទុកដាក់ក្នុងការគ្រប់គ្រង​ការចេញចូលតាម​បណ្ដា​ច្រកព្រំដែននានា ​ជាមួយនឹកការអនុវត្តវិធានការសុខាភិបាល ដើម្បីទប់ស្កាត់ការឆ្លងរាលដាល​ជំងឺនៃកូវីដ-១៩ និងការគ្រប់គ្រង​វត្តមានស្នាក់នៅរបស់ជនបរទេស​នៅក្នុងប្រទេសដោយយក​ចិត្ត​ទុកដាក់ ការពង្រឹង​សមត្ថភាពការងាររបស់មន្រ្តី ​ការបំពាក់មធ្យោបាយ​ និងប្រព័ន្ធបច្ចេកវិទ្យាព័ត៌មាន ដើម្បីលើកម្ពស់ប្រសិទ្ធភាពការងារ។-សម្តេចតេជោ ហ៊ុន សែន ជំរុញឲ្យយកចិត្តទុកដាក់បញ្ហាសន្តិសុខសណ្ដាប់ធ្នាប់ផ្ទៃក្នុងប្រទេស បញ្ហាប្រឈមដែលជាកង្វល់ក្នុងសង្គម គឺការចរាចរណ៍ ជួញដូរ និងប្រើប្រាស់គ្រឿងញៀនខុសច្បាប់ ក្នុងនោះរួមទាំង​និន្នាការ​នៃការលួចប្រើប្រាស់សាធាតុគីមី​ផ្សំ​ដើម្បីផលិតគ្រឿងញៀនខុសច្បាប់​ទ្រង់ទ្រាយ​ធំ គ្រោះថ្នាក់ចរាចរណ៍ ​ការជួញដូរមនុស្ស ​អាជីវកម្មផ្លូវភេទ និងផលិតផលក្លែងក្លាយ​អន់​គុណភាព។-សម្តេចតេជោ ហ៊ុន សែន បន្តជំរុញឲ្យមានការអនុវត្តកម្មវិធីកំណែទម្រង់វិមជ្ឈការ និង​វិសហមជ្ឈការ ​ដោយត្រូវខិតខំសម្របសម្រួលជាមួយដៃគូអភិវឌ្ឍន៍ ដើម្បីសម្រេចនូវកម្មវិធីជាតិ​សម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិរយៈពេល​ ១០ឆ្នាំដំណាក់កាលទីពីរ ២០២១-២០៣០។-សម្តេចតេជោ ហ៊ុន សែន ស្នើដល់អាជ្ញាធរគ្រប់រាជធានី-ខេត្តទាំងអស់ត្រូវតែងតាំង​បងប្អូនខ្មែរ​ឥស្លាមម្នាក់ជាអភិបាលរង ​ឬអាចធ្វើជាអភិបាលស្រុកម្នាក់ ​ខណៈខេត្តណា ​ឬស្រុកណា​ដែល​សម្បូរបងប្អូន​ខ្មែរឥស្លាម ​ហើយស្នើឲ្យមានការរៀបចំបងប្អូន​ជនជាតិដើមភាគតិច​ធ្វើជា​អភិបាលរងខេត្តម្នាក់​ផងដែរ។-សម្តេចតេជោ ហ៊ុន សែន នាយករដ្ឋមន្រ្តីលើកឡើងថា គ្មានអ្នកក្រណាមានលុយ​ទៅទិញឡាន​ជិះនោះទេ ​ខណៈអ្នកមាន ឬពួកអ្នកធំមានលុយទិញឡានជិះហើយបែ​ជា​លួចពន្ធ និង​មិនព្រមបង់ពន្ធចូលរដ្ឋទៅវិញ។-សម្តេចតេជោ ហ៊ុន សែន អំពាវនាវឲ្យមានស្មារតី​បង់ពន្ធជូនរដ្ឋ​តាមច្បាប់ដែលបានកំណត់។ ទន្ទឹមនឹងនឹងនោះ ​កម្លាំងប្រដាប់អាវុធមានតួនាទីសំខាន់ណាស់សម្រាប់កិច្ចការមួយនេះ។ សម្តេច បញ្ជាក់ថា “បើមានលុយទិញឡានហើយ សូម​ទុកលុយ​ដើម្បីបង់ពន្ធផង”។-សម្តេចតេជោ នាយករដ្ឋមន្រ្តី បានប្រកាសថា ក្រោមកណ្តាប់ដៃដឹកនាំរបស់សម្តេច គឺគ្មាន​គោលនយោបាយណាមួយយកពន្ធដីស្រែ​ ឬដីចំការពីបងប្អូងប្រជាកសិករនោះឡើយ ខណៈគោល​នយោបាយបែបនេះ គឺបានចាប់ផ្តើមតាំងពីអំឡុងឆ្នាំ១៩៨០ មកម្ល៉េះ។-សម្តេចតេជោ ហ៊ុន សែន ប្រកាសថា ដរាបណាសម្តេចនៅដឹកនាំប្រទេស សម្តេច​នឹង​មិន​យកពន្ធ​ដីស្រែ​ពីកសិករឡើយ ។ បើនរណាហ៊ានយក សម្តេច​សូមដាក់បណ្តាសារ​ចំពោះ​ករណីនេះ។- សម្តេចតេជោ ហ៊ុន សែន ប្រកាសដល់ក្រសួងស្ថាប័ន ឲ្យផ្អាករាល់​គម្រោងដែលមិនទាន់​បាន​អនុម័ត និងអំពាវនាវដល់មន្ត្រីឲ្យមានការសន្សំសំចៃខ្ពស់ ព្រោះយើងត្រូវទុកថវិកា​ទាំងនោះ​ ដើម្បី​ចំណាយ​លើការទិញវ៉ាក់សាំងកូវីដ-១៩​ និងយុទ្ធនាការ​ប្រឆាំងកូវីដ-១៩ ព្រមទាំង​ផ្តល់ការគាំទ្រ​លើជីវភាពដល់ប្រជាពលរដ្ឋក្រីក្រ។-សម្តេចតេជោ ហ៊ុន សែន បញ្ជាក់ថា ចំណូលរបស់ជាតិខ្ទង់ជាង ៤០០លានដុល្លារអាមេរិក​ក្នុង​មួយខែ គឺមិនគ្រប់លើចំណាយក្នុង​បរិបថ​កូវីដ-១៩នោះទេ ហើយយើងក៏ពិបាកទុកថវិកា​ខ្លះ​សម្រាប់​សន្សំ​បម្រុងទុកប្រើប្រាស់ផងដែរ។-សម្តេចតេជោ ហ៊ុន សែន អំពាវនាវដល់ក្រសួង ស្ថាប័ន សូមពិចារណាលើការចំណាយ​ចរន្ត​ដែលមិនចាំបាច់ និងមិនតម្រូវការ។ សម្តេច​សូមអង្វរ​ដ៏ទទូចឲ្យមើលព្រៃទាំង​មូល សូម​កុំមើល​ឈើ​តែមួយដើម។-សម្តេចតេជោ បានអំពាវនាវហើយអំពាវនាវទៀត អ្នកណាក៏ដោយដែលមិនទាន់ មកបង់ពន្ធរថយន្ត​ប្រញាប់ប្រញាល់​មក​បង់ជាបន្ទាន់ ចាប់ពីពេលនេះតទៅ ​ហើយប្រសិនបើមិនព្រមបង់ទេ នឹង​បញ្ជាឲ្យ​រឹបអូស​រថយន្តនោះ​ដល់ផ្ទះតែម្តង ​ខណៈបច្ចុប្បន្ននៅសល់រថយន្តប្រមាណ ៥ពាន់គ្រឿងទៀតនោះ។-សម្តេចតេជោ ហ៊ុន សែន អំពាវនាវដល់ម្ចាស់រថយន្តអត់ពន្ធទាំងឡាយ សូមមេត្តាចេញមកបង់ពន្ធឲ្យបានគ្រប់ៗគ្នា ​ហើយក៏គ្មានការអនុគ្រោះពន្ធ ១០ភាគរយទៀតដែរ។ សម្តេចព្រមានថា “ប្រយ័ត្នគេទៅរឹបអូសឡានដល់ក្នុងផ្ទះ និងយកកម្ទេចចោល​ ដូចពេលកន្លងទៅ”។- សម្តេចតេជោ ហ៊ុន សែន ប្រកាសអំពាវនាវដល់ប្រជាពលរដ្ឋឲ្យបន្តប្រុងប្រយ័ត្នខ្ពស់​លើបញ្ហាកូវីដ-១៩ ទោះជាកូវីដ-១៩ បំប្លែងខ្លួនថ្មី អូមីក្រុង ​មិនបណ្តាលឲ្យមានបញ្ហាធ្ងន់ធ្ងរ​ច្រើន​ក៏ពិតមែន តែ​ករណីឆ្លងរីករាលប្រចាំថ្ងៃមានកម្រិតខ្ពស់ខ្លាំងណាស់។-សម្តេចតេជោ ហ៊ុន សែន ព្រមានរដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ ត្រូវចេះ​ធ្វើការ​សហការជាមួយស្ថាប័នដទៃ ជាពិសេសគឺករណីជ្រូកនេះតែម្តង ដោយ​នាពេល​កន្លងទៅ​រដ្ឋ​មន្រ្តី​ក្រសួងរូបនេះ បានធ្វើការតែឯងមិនចេះស្តាប់គេស្តាប់ឯង ដោយ​បណ្តោយ​ឲ្យ​ដំឡើង​ថ្លៃ​ស្រេច​តែចិត្ត ធ្វើឲ្យបងប្អូនប្រជាពលរដ្ឋ មាន​ការ​ថ្នាំងថ្នាក់​ជាដើមនោះ។

ក្រុមគ្រូពេទ្យក្នុងខេត្តកំពង់ធំ ចាប់ផ្តើមចាក់វ៉ាក់សាំងជូនកុមារអាយុ៣ឆ្នាំដល់ក្រោម៥ឆ្នាំ

2022/02/23 04:09:42 pm        500
Facebook Telegram Linkin
កំពង់ធំ ៖ ក្រុមគ្រូពេទ្យខេត្តកំពង់ធំ ចាប់ផ្តើមចាក់វ៉ាក់សាំងកូវីដ-១៩ ជូនកុមារអាយុ៣ឆ្នាំ ដល់ក្រោម៥ឆ្នាំ ដូសទី១ ដែលចំនួនជិត ៣ម៉ឺននាក់ ដែលត្រូវបានបែងមណ្ឌលចាក់វ៉ាក់សាំង ចំនួន៣៩ នៅតាមក្រុងស្រុក ទាំង៩។នៅថ្ងៃទី២៣ ខែកុម្ភៈ នេះ អាជ្ញាធរខេត្តកំពង់ធំ សហការជាមួយក្រុមគ្រូពេទ្យ នៃមន្ទីរសុខាភិបាល ខេត្តកំពង់ធំ ចាប់ផ្តើមបើកឲ្យដំណើរការចាក់វ៉ាក់សាំងបង្ការជំងឺកូវីដ-១៩ ដល់កុមារអាយុ៣ឆ្នាំ ដល់ ក្រោម អាយុ៥ឆ្នាំ ដែលលោក ញ៉ឹក បានខេង អភិបាលរងខេត្តកំពង់ធំ បានលើកឡើងថា ការ​ចាក់វ៉ាក់​សាំង ដូសទី១ សម្រាប់កុមារអាយុចាប់ពី៣ឆ្នាំ ដល់ក្រោម៥ឆ្នាំ គឺជាជំហានមួយផ្សេង​ទៀត ដែលរាជរដ្ឋាភិបាលកម្ពុជា បង្កើនការយកទុកដាក់បន្ថែមលើ​សុខុមាលភាព​កុមារ ក៏ដូចជា​ប្រជាពលរដ្ឋទូទៅ។ ការផ្តល់វ៉ាក់សាំងនេះ នៅតែធ្វើទន្ទឹមគ្នាជាមួយដូសទី១ ដូសទី២ ដូសទី៣ និងដូសទី៤ ដល់កុមារ ​និងប្រជាពលរដ្ឋ អាយុពី១៨ឆ្នាំឡើងផងដែរ។មាតាបិតារបស់កុមារ បានសាទរចំពោះយុទ្ធនាកាចាក់វ៉ាក់សាំង ​ដែលក្នុងក្រុមគ្រួសាររបស់ ពួកគេ ភាគច្រើន បានចាក់វ៉ាក់សាំងទៅតាមដូស​ ដែលរាជរដ្ឋាភិបាលផ្តល់ជូន ទៅតាមដំណាក់កាល​រួចរាល់។ ថ្ងៃនេះដែរ ពួកគេ បាននាំកូនៗរបស់ខ្លួន ដែលមានអាយុ៣ឆ្នាំ ដល់ក្រោម៥ឆ្នាំ មក​ទទួលការ​ចាក់វ៉ាក់សាំង ​ដើម្បី​បង្កើន​សុវត្ថិភាព​ក្នុង​ការ​រស់ននៅ។លោកវេជ្ជបណ្ឌិត ស្រី ស៊ីន ប្រធានមន្ទីរសុខាភិបាលខេត្តកំពង់ធំ បានឱ្យដឹងថា គិតត្រឹមថ្ងៃទី២២ ខែកុម្ភៈ នេះ ប្រជាពលរដ្ឋអាយុ១៨ឆ្នាំងឡើង ចាក់ដូសទី១ សរុបចំនួនជិត៤៨ម៉ឺននាក់, ចាក់ដូសទី២ សរុបចំនួនជិត៤០ម៉ឺននាក់ ចាក់ដូសទី៣ (ដូសជំរុញ) មានចំនួនសរុបជិត១៥ម៉ឺននាក់ ដូសទី៤ ចំនួន ជាង១ម៉ឺននាក់។ កុមារអាយុ១២-១៧ឆ្នាំ ចាក់ដូសទី១ សរុបជាង៩ម៉ឺននាក់, ចាក់ដូសទី២ សរុបជាង៩ម៉ឺន នាក់ ចាក់ដូសទី៣ ជាង៤ម៉ឺននាក់។ កុមារអាយុ០៦-១១ឆ្នាំ ចាក់ដូសទី១ សរុបចំនួនជិត១០ម៉ឺននាក់ ចាក់ ដូសទី២ សរុបចំនួនជាង៩ម៉ឺននាក់។ កុមារអាយុ០៥ឆ្នាំ ចាក់ដូសទី១ សរុបចំនួនជិត២ម៉ឺននាក់ និង ចាក់ ដូសទី២ សរុបចំនួនជាង៩ពាន់នាក់៕អត្ថបទ៖ លី សាងស៊ីន

ខេត្តកណ្តាលចាប់ផ្តើមដំណើរការចាក់វ៉ាក់សាំងដូសទី១ ដល់កុមារអាយុ៣ឆ្នាំដល់៥ឆ្នាំ

2022/02/23 01:00:37 pm        531
Facebook Telegram Linkin
កណ្តាល៖ ខេត្តកណ្តាល ចាប់ផ្តើមយុទ្ធនាការចាក់វ៉ាក់សាំងដូសទី១ ដល់កុមារអាយុ ៣​ឆ្នាំដល់៥ឆ្នាំ នៅតាមមន្ទីរពេទ្យបង្អែក និងមណ្ឌលសុខភាពជាង ១០០កន្លែងនៅទូទាំងខេត្តកណ្តាល នៅថ្ងៃទី២៣ ខែកុម្ភៈនេះ។ ក្នុងថ្ងៃចាក់វ៉ាក់សាំងថ្ងៃដំបូងនេះ អាណាព្យាបាល បាននាំកូនៗទៅចាក់វ៉ាក់សាំង ជាមួយនឹងការអនុវត្តវិធានសុខាភិបាលការពារឆ្លងមេរោគកូវីដ១៩។សម្រាប់ការចាក់វ៉ាក់សាំងបង្ការកូវីដ១៩ ជូនកុមារអាយុ៣ឆ្នាំដល់៥ឆ្នាំ អាណាព្យាបាលកុមារខ្លះ បានសុំច្បាប់សំរាកពីការងារមួយព្រឹក ខ្លះផ្អាកការប្រកបរកស៊ីមួយព្រឹក ហើយខ្លះរវល់ការងារមិន​អាកខាន ក៏ផ្ញើ​កូន​ផ្ញើចៅ​អោយ​ជីដូន ឬ​សាច់ញាតិ​ជិតខាង​នាំ​កូន​តូច​ទៅ​ចាក់​វ៉ាក់សាំង​ការពារកូវី​ដ១៩​នេះ​ ដោយមិនអាកខានបាន។ពួកគេលើកឡើងថា ​នៅពេលបច្ចុប្បន្ន ​ប្រជាពលរដ្ឋ ទាំង​អស់គ្នាពិត​ជា​មានជំនឿ​ទុក​ចិត្ត​ខ្លាំង​លើ​ការងារចាក់វ៉ាក់សាំងការពារកូវីដ១៩ ​ បន្ថែមលើការអនុវត្ត​ពាក់ម៉ាស់ ​ឧស្សាហ៍លាងដៃអាកុលជែល រក្សាគន្លាត ដើម្បីទប់ស្កាត់ការឆ្លង ​មេរោគកូវីដ១៩ ​ជាពិសេស​មេរោគបំបែ្លងខ្លួនថ្មីអូមីក្រុង។សម្រាប់ការចាក់វ៉ាក់សាំងនេះ ប្រជាពលរដ្ឋ ​ក៏ទន្ទឹងរងចាំជាយូរមកហើយសម្រាប់ការចាក់​ជូន​ក្មេងៗអាយុក្រោម៦ឆ្នាំ ​ស្របពេល ​កុមារតូចៗ​ចូល​រៀននៅថ្នាក់មត្តេយ្យទាំងសាលារដ្ឋ និងសាលាឯកជន។យោងតាមមន្រ្តីសុខាភិបាលនៃមន្ទីរពេទ្យបង្អែកជ័យជំនះ ​ក្រុងតាខ្មៅ សម្រាប់ការចាក់វ៉ាក់សាំងជូន​កុមារតូចដូសទី១នេះគឺ​ យើងអាចចាក់បាន ​ដោយ​គ្រាន់តែ​ អាណាព្យាបាលត្រូវយក សំបុត្រ​កំណើត​កូនតូច​មកជាមួយ​ ដើម្បីអោយក្រុមពេទ្យចុះក្នុងប្រព័ន្ធបញ្ជីតាមទូរសព្ទដៃ ។សូមបញ្ជាក់ថា បច្ចុប្បន្ន នៅទូទាំងខេត្តកណ្តាល ​មានកុមារអាយុចាប់ពី៣ឆ្នាំ ​ដល់អាយុ៥ឆ្នាំ ដែល​ត្រូវចាក់វ៉ាក់​សំាង​ការពារកូវីដ១៩នេះ ​មានប្រមាណ ៤ម៉ឺន៤០៩៦នាក់ ៕អត្ថបទ៖ ស៊ុម សុខជា

យុទ្ធនាការចាក់វ៉ាក់សាំងជូនកុមារអាយុ៣ឆ្នាំដល់ក្រោម៥ឆ្នាំ ផ្តើមដំណើរការនៅថ្ងៃនេះ

2022/02/23 12:51:27 pm        477
Facebook Telegram Linkin
ភ្នំពេញ៖ យុទ្ធនាការចាក់វ៉ាក់សាំងបង្ការជំងឺកូវីដ-១៩ ដូសទី១ ជូនកុមារអាយុពី៣ឆ្នាំ ដល់ក្រោម៥ឆ្នាំ នៅក្នុងប្រទេសកម្ពុជា ចាប់ផ្តើមអនុវត្តពីថ្ងៃទី២៣ ខែកុម្ភៈនេះតទៅ។ ការចាក់វ៉ាក់សាំង គឺដើម្បីបង្កើតអង់ទីគ័រ ទប់ទល់នឹងការវាយលុកពីជំងឺកូវីដ-១៩ ជាពិសេសមេរោគបំប្លែងថ្មីអូមីក្រុង។អាណាព្យាលបាល រស់នៅរាជធានីភ្នំពេញ បាននាំកូនទៅចាក់វ៉ាក់សាំងនៅមន្ទីរពេទ្យគន្ធបុប្ផា នាថ្ងៃទី២៣ ខែកុម្ភៈ នេះ បានប្រាប់BTVឱ្យដឹងថា បន្ទាប់ពីកូនៗចាក់វ៉ាក់សាំងរួច ជួយបង្កើនទំនុកចិត្ត ជាងមុន ក្នុងរស់នៅតាមបែបគន្លងថ្មី ជាមួយជំងឺកូវីដ-១៩ ជាពិសេសបច្ចុប្បន្នមេរោគបំប្លែងថ្មី អូមីក្រុង កំពុងរីករាលដាលក្នុងសហគមន៍។ តែបើទោះចាក់វ៉ាក់សាំងរួច ពួកគេនៅបន្តយកចិត្តទុកដាក់ចំពោះកូន ដោយប្រកាន់​ភ្ជាប់វិធាន​ការ​សុខាភិបាល និងវិធានការ៣កុំ ៣ការពារ។ ក្រៅពីនេះ ពួកគេបានថ្លែងអំណរគុណចំពោះរាជរដ្ឋាភិបាល ដែលបានខិតខំស្វែងរកវ៉ាក់សាំង​មក​ចាក់​ជូនប្រជាពលរដ្ឋ។សម្រាប់អាណាព្យាបាល ដែលនាំកុមារទៅចាក់វ៉ាក់សាំងបង្កាជំងឺកូវីដ-១៩​ នៅទីតាំងសុខាភិបាល សាធារណៈ ដែលរៀបចំដោយអាជ្ញាធរមូលដ្ឋាន ​ត្រូវភ្ជាប់​ទៅជាមួយនូវឯកសារ​ ដូចជា សំបុត្រ​កំណើត ឬសំបុត្របញ្ជាក់កំណើត សៀវភៅគ្រួសារ ​សៀវភៅស្នាក់នៅ ​ឬលិខិតឆ្លងដែន និង​ចំពោះកូនចៅ​មន្រ្តីរាជការ ថ្នាក់ជាតិវិញ ត្រូវភ្ជាប់ឯកសារទៅជាមួយ ​ដូចជា​ប័ណ្ណ​សំគាល់​ខ្លួន​មន្រ្តី​រាជការ ឬប័ណ្ណសម្គាល់មន្រ្តីជាប់កិច្ចសន្យា។បច្ចុប្បន្នកម្ពុជា ​រកវ៉ាក់សាំងកូវីដ-១៩ ​បានជាង៤៣លានដូស ​រាប់​បញ្ចូល​ទាំង​ការ​បញ្ជា​ទិញ​ពី​ប្រទេស​ចិន ​ជំនួយ​តាមរយៈយន្តការកូវ៉ាក់ ​និង​បណ្តាប្រទេសផ្សេងៗ​មួយ​ចំនួន​ទៀត​ សម្រាប់​ប្រើប្រាស់​ក្នុង យុទ្ធនាការ​ចាក់​វ៉ាក់សាំង​បង្ការ​ជំងឺកូវីដ-១៩៕អត្ថបទ៖ សោភ័ណ 

នាវាទេសចរណ៍ឈ្មោះ NORWEGIAN SPIRIT ចូលចតនៅកំពង់ផែស្វយ័តក្រុងព្រះសីហនុ

2022/02/23 12:01:00 pm        843
Facebook Telegram Linkin
ព្រះសីហនុ៖ នាវាទេសចរណ៍មួយគ្រឿងឈ្មោះ NORWEGIAN SPIRIT សញ្ជាតិ Bahamas បានចូលចតនៅកំពង់ ផែស្វយ័តក្រុងព្រះសីហនុ នៅព្រឹកថ្ងៃទី២៣ ខែកុម្ភៈ ឆ្នាំ២០២២នេះ ។ការចូលចតរបស់នាវាទេសចរណ៍នេះ មិនមានដឹកភ្ញៀវទេសចរទេ គឺជាដំណើរចូលចតនដើម្បីរង់ចាំទទួលយកក្រុមនាវិក និងបុគ្គលិករបស់នាវានេះ តាមបណ្តាប្រទេសមួយចំនួន ដែលឈប់សម្រាកក្នុងវិបត្តិជំងឺកូវីដ-១៩កន្លងមកចូលធ្វើការក្នុងនាវាវិញ។គួរបញ្ជាក់ថា នាវាទេសចរណ៍នេះ មានបណ្ដោយ ២៦៩ម៉ែត្រ ទទឹង ៣៦ម៉ែត្រ និងជម្រៅទឹក៨,២ម៉ែត្រ ។ ការឈប់សំចតនៅកំពង់ផែអន្តរជាតិក្រុងព្រះសីហនុ ដោយរង់ចាំទទួលយកក្រុមនាវិក និងបុគ្គលិកបម្រើការរបស់ខ្លួននេះ អាចនឹងប្រើពេល ៣-៤ថ្ងៃ មុននឹងចាកចេញត្រឡប់ទៅវិញ៕

កម្ពុជាកំពុងអនុវត្តគម្រោងផលិតអគ្គិសនីធំៗចំនួន៨កន្លែង ស្មើនឹងជាង ២០០០មេហ្គាវ៉ាត់

2022/02/23 11:56:59 am        581
Facebook Telegram Linkin
ភ្នំពេញ៖ កម្ពុជាកំពុងសាងសង់រោងចក្រ និងវារីអគ្គិសនី ដើម្បីផលិតអគ្គិសនីសម្រាប់ប្រើប្រាស់ក្នុងស្រុក ចំនួន ៨កន្លែង ដែលអាចផលិតបានចំនួនជាង ២០០០មេហ្គាវ៉ាត់ ខណៈបច្ចុប្បន្នការតភ្ជាប់បណ្ដាញអគ្គិសនីតាម ភូមិ សម្រេចបានជិត ១០០ភាគរយហើយ ។របាយការណ៍របស់អាជ្ញាធរអគ្គិសនីកម្ពុជា ក្នុងសន្និបាតបូកសរុបលទ្ធផលការងារ ឆ្នាំ២០២០-២០២១ និងលើកទិសដៅឆ្នាំ២០២២ នៅថ្ងៃទី២៣ ខែកុម្ភៈ ឆ្នាំ២០២២ បានបង្ហាញថា អគ្គិសនីកម្ពុជា បានចុះកិច្ចព្រមព្រៀងទិញ-លក់អគ្គិសនី (PPA) ជាមួយក្រុមហ៊ុនជាច្រើន សម្រាប់គម្រោងផលិត​អគ្គិសនី ហើយគម្រោងទាំងនោះ កំពុងស្ថិតក្នុងដំណាក់កាលអភិវឌ្ឍន៍ផ្សេងៗគ្នា។របាយការណ៍ បានបន្តថា គម្រោងកំពុងផលិតអគ្គិសនីទាំងអស់នោះ ​មានគម្រោងប្រើធ្យូងថ្ម ពន្លឺ ព្រះអាទិត្យ និងវារីអគ្គិសនី កំពុងអនុវត្តនៅក្នុងខេត្តព្រះសីហនុ ពោធិ៍សាត់ កោះកុង បាត់ដំបង ស្វាយរៀង កំពង់ឆ្នាំង និងខេត្តឧត្តរមានជ័យ ។របាយការណ៍ដដែល បានបន្ថែមថា ក្រៅពីការអភិវឌ្ឍផលិតអគ្គិសនីក្នុងស្រុក កម្ពុជា គ្រោងនាំ ចូលបន្ថែមអគ្គិសនីពីប្រទេសឡាវ ចំនួនជាង ២០០០មេហ្គាវ៉ាត់ ​ខណៈបច្ចុប្បន្នកម្ពុជាមានរោងចក្រ និងវារី អគ្គិសនី កំពុងដំណើរការចំនួន ១០កន្លែង ។ឯកឧត្តម យឹម ពិសិដ្ឋ ប្រធានអាជ្ញាធរអគ្គិសនីកម្ពុជា បានបញ្ជាក់ថា ដើម្បីសម្រេចចក្ខុចវិស័យ ក្រសួងរ៉ែ និងថាមពល បានកំណត់ផែនការសកម្មភាពមួយចំនួនក្នុងនីតិកាលទី៦ នៃរដ្ឋសភា ក្នុងនោះ មានការជំរុញការវិនិយោគអភិវឌ្ឍបង្កើនសមត្ថភាពផលិត ​បញ្ជូន​ ចែកចាយ និង​ការភ្ជាប់​បណ្ដាញឲ្យអ្នក ​ប្រើប្រាស់អគ្គិសនី ​ឲ្យទាន់តាមផែនការកំណត់។ឯកឧត្តម បានបញ្ជាក់ថា អគ្គិសនីកម្ពុជា នឹងបន្តជំរុញកែលម្អការផ្ដល់សេវាឲ្យអ្នកប្រើប្រាស់​ ឲ្យរឹត តែខ្លាំង គ្រប់គ្រាន់​ មានចីរភាព​ អាចទុកចិត្តបាន ​មានគុណភាព ​និងមានតម្លៃសមរម្យ រួមទាំង​ពង្រឹង​យន្តការគ្រប់គ្រងការអភិវឌ្ឍ និងការផ្ដល់សេវាអគ្គិសនី​ឲ្យរឹតតែមានប្រសិទ្ធភាព។គិតត្រឹមចុងឆ្នាំ២០២១ ព្រំដែន នៃអាជ្ញាបណ្ណ ដែលផ្តល់ឱ្យអ្នកចែកចាយ ធ្វើការវិនិយោគ និង អភិវឌ្ឍន៍​បណ្តាញចែកចាយអគ្គិសនី ​ទាំងរដ្ឋ ​និងឯកជន ​មានចំនួន១៤ ​១៥១ភូមិ ស្មើនឹង៩៩.៨៨ភាគរយ ​នៃចំនួនភូមិ​សរុបទូទាំងប្រទេស​ ដោយ​ក្នុង​ចំណោមភូមិទាំងអស់នេះ មាន​ចំនួន៣៥០ភូមិ ស្មើនឹង ២.៤៧ ​ភាគរយ ​ពុំទាន់​មានខ្សែបណ្ដាញទៅដល់ ៕ អត្ថបទ៖ បាន សុខរិទ្ធិ

នាយករដ្ឋមន្រ្តីម៉ាឡេស៊ី នឹងអញ្ជើញដល់កម្ពុជានាល្ងាចនេះ សម្រាប់ដំណើរទស្សនកិច្ចផ្លូវការពីរថ្ងៃ

2022/02/23 11:41:25 am        394
Facebook Telegram Linkin
ភ្នំពេញ៖ តាមការគ្រោងទុក នៅល្ងាចថ្ងៃទី២៣ ខែកុម្ភៈនេះ នាយករដ្ឋមន្រ្តីម៉ាឡេស៊ី នឹងដឹកនាំគណៈប្រតិភូ ជាន់ខ្ពស់អញ្ជើញមកបំពេញទស្សនកិច្ចផ្លូវការនៅកម្ពុជា រយៈពេល២ថ្ងៃ ពីថ្ងៃទី២៣-២៤ខែកុម្ភៈ ឆ្នាំ២០២២។តបតាមការអញ្ជើញរបស់សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា ឯកឧត្តម ដាតុ ស្រ៊ី អ៊ីស្មាអែល សាប្រ៊ី ប៊ីន យ៉ាកុប នាយករដ្ឋមន្រ្តីម៉ាឡេស៊ី នឹងដឹកនាំគណៈប្រតិភូជាន់ខ្ពស់អញ្ជើញ​មកបំពេញទស្សនកិច្ចផ្លូវការនៅកម្ពុជា ដែលក្នុងអំឡុងពេលទស្សនកិច្ចនេះ ឯកឧត្តមនាយករដ្ឋ​មន្រ្តីម៉ាឡេស៊ី នឹងអញ្ជើញចូលថ្វាយបង្គំគាល់ព្រះករុណា ព្រះបាទ សម្តេច ព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជានៅព្រះបរមរាជវាំង។ បន្ទាប់ពីនោះ ឯកឧត្តមនាយករដ្ឋមន្រ្តី ក៏នឹងអញ្ជើញចូល ជួបសម្ដែងការគួរសមចំពោះសម្តេចវិបុល​សេនាភក្តី សាយ ឈុំ ប្រធានព្រឹទ្ធសភា និងសម្តេចអគ្គមហាពញាចក្រី ហេង សំរិន ប្រធានរដ្ឋសភា។សម្ដេចតេជោ ហ៊ុន សែន នាយករដ្ឋមន្រ្តី និងឯកឧត្តមនាយករដ្ឋមន្រ្តីម៉ាឡេស៊ី នឹងមានជំនួប ពិភាក្សា​អំពី​ទំនាក់ទំនង ​និងកិច្ចសហប្រតិបត្តិការទ្វេភាគី រួមមាន​ វិស័យពាណិជ្ជកម្ម និងការ​វិនិយោគ ​សេដ្ឋកិច្ច-សង្គម ​ការការពារជាតិ និងសន្តិសុខ និងការស្តារ សង្គម-សេដ្ឋកិច្ចឡើងវិញ ក្រោយ​វិបត្តិ នៃជំងឺកូវីដ-១៩។ ជាមួយគ្នានោះ នាយករដ្ឋមន្រ្តីទាំងពីរ នឹងផ្លាស់ប្តូរទស្សនៈលើបញ្ហាតំបន់ ​និងអន្តរជាតិនានា ដែល​ជាផលប្រយោជន៍ និងក្តីបារម្ភរួម ​ខណៈក្រោយពីជំនួបទ្វេភាគី នាយករដ្ឋមន្រ្តី នៃប្រទេសទាំងពីរ នឹង ​អញ្ជើញធ្វើ​សន្និសីទ​កាសែត​រួមគ្នាផងដែរ។ឆ្នាំនេះ ជាខួបអនុស្សាវរីយ៍លើកទី៦៥ នៃការបង្កើតទំនាក់ទំនងការទូតរវាងប្រទេសទាំងពីរ ដូច នេះ ដំណើរទស្សនកិច្ចផ្លូវការរបស់ឯកឧត្តមនាយករដ្ឋមន្រ្តីម៉ាឡេស៊ី ​នឹងក្លាយជាព្រឹត្តិការណ៍ដ៏មានសារ សំខាន់​ ដើម្បីពង្រឹងបន្ថែមទៀតនូវចំណងមិត្តភាព​ សាមគ្គីភាព​ និងកិច្ចសហប្រតិបត្តិការ ដែល​មាន​ស្រាប់រវាងកម្ពុជានិងម៉ាឡេស៊ី ​ទាំងក្នុងក្របខ័ណ្ឌទ្វេភាគី ​និងពហុភាគី សម្រាប់ផល​ប្រយោជន៍​ទៅវិញ​ទៅ​មក ​នៃប្រទេសទាំងពីរ៕អត្ថបទ៖ សេក ឧត្តម

បណ្ដាញសង្គម

ព័ត៌មានថ្មីៗ

រដ្ឋាភិបាលឥណ្ឌូនេស៊ី មានផែនការផ្តល់ប្រាក់ឧបត្ថម្ភរស់នៅប្រចាំថ្ងៃដល់គ្រួសាររងគ្រោះដោយសារទឹកជំនន់នៅកោះស៊ូម៉ាត្រា
12/19/2025 09:12 PM
Facebook Telegram Linkin
ឪពុកម្តាយនៅឥណ្ឌា ខកចិត្តពេលដែលកូនៗរបស់ពួកគេមានជំងឺគ្រាប់ឈាមក្រហមធ្វើតេស្តមានវីរុសហ៊ីវ
12/19/2025 09:12 PM
Facebook Telegram Linkin
ពលរដ្ឋស៊ីរីមានសង្ឃឹមឡើងវិញ ក្រោយសហរដ្ឋអាមេរិកលុបចោលទណ្ឌកម្មច្បាប់ Caesar
12/19/2025 08:12 PM
Facebook Telegram Linkin
លោក Macron៖ អឺរ៉ុបនឹងត្រូវមានទំនាក់ទំនងជាមួយលោក Putin បើការចរចាសន្តិភាពរបស់អាមេរិកបរាជ័យ
12/19/2025 08:12 PM
Facebook Telegram Linkin
ចក្រភពអង់គ្លេសស្វាគមន៍កិច្ចព្រមព្រៀងផ្តល់មូលនិធិរបស់ EU សម្រាប់អ៊ុយក្រែន
12/19/2025 08:12 PM
Facebook Telegram Linkin
យានដ្រូនរកឃើញវីរុសដែលអាចបណ្តាលឲ្យត្រីងាប់នៅក្នុងដង្ហើមរបស់ត្រីបាឡែនអាក់ទិក
12/19/2025 08:12 PM
Facebook Telegram Linkin
BREAKING NEWS | ក្រសួងការពារជាតិប្រកាសថានៅម៉ោង៦កន្លះល្ងាចថ្ងៃនេះទាហានឈ្លានពានថៃបានបាញ់កាំភ្លើងធំចេញពីនាវាចម្បាំងរបស់ខ្លួនចូលក្នុងស្រុកមណ្ឌលសីមា ខេត្តកោះកុង
12/19/2025 08:12 PM
Facebook Telegram Linkin
ចិនគំរាមចាត់វិធានការខ្លាំងក្លា ពាក់ព័ន្ធនឹងកញ្ចប់លក់អាវុធរបស់អាមេរិកទៅឲ្យកោះតៃវ៉ាន់
12/19/2025 08:12 PM
Facebook Telegram Linkin
ឆ្មាំល្បាតឆ្នេរក្រិកសង្រ្គោះជនអន្តោប្រវេសន៍ ៥៤៥នាក់ នៅជិតកោះ Crete
12/19/2025 08:12 PM
Facebook Telegram Linkin
អាមេរិកដាក់ពង្រាយយន្តហោះយោធាទំនើបទៅកាន់ព័រតូរីកូ ខណៈភាពតានតឹងជាមួយវេណេស៊ុយអេឡាកើនឡើង
12/19/2025 07:12 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.