BTV NEWS

សម្ដេចធិបតី បញ្ជាក់ជាថ្មីជំហររបស់កម្ពុជាបន្តដោះស្រាយបញ្ហាព្រំដែនគោក និងសមុទ្រជាមួយថៃ ដោយសន្ដិវិធី និងច្បាប់អន្តរជាតិ និងបដិសេធជជែករឿងបើកច្រកព្រំដែនគោក

សម្ដេចធិបតី៖គិតត្រឹមខែមេសាឆ្នាំនេះយុវជនមកពីគ្រួសារក្រីក្រ និងងាយរងហានិភ័យចំនួន ២៧,១ម៉ឺននាក់ទទួលបានការបណ្ដុះបណ្ដាលជំនាញវិជ្ជាជីវៈ

សម្ដេចតេជោ ហ៊ុន សែន៖«២០ មិថុនា ១៩៧៧ ជីវិតរបស់ខ្ញុំ និងភរិយាពេលនោះជួបជាមួយគ្រោះថ្នាក់ និងលំបាកវេទនាខ្លាំងណាស់»

សម្តេចតេជោ ហ៊ុន សែន ថ្លែងថា អាវក្រោះ និងសម្ភារយោធាម៉ាក DSS សុទ្ធតែមានគុណភាពហើយអាវការពារនេះនាយករដ្ឋមន្រ្តីបានសាករួចហើយ

នយោបាយ និង ការអភិវឌ្ឍន៍

លោកជំទាវ ឱ វណ្ណឌីន៖ អ្នកចាក់វ៉ាក់សាំងJohnson & Johnson រួសរាន់ទៅចាក់វ៉ាក់សាំងដូសទី៣

ភ្នំពេញ៖ លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ-១៩ ក្នុងក្របខណ្ឌទូទាំងប្រទេស បានអំពាវនាវដល់ពលរដ្ឋ ដែលបានចាក់វ៉ាក់សាំង Jonhson&Jonhson ត្រូវរួសរាន់ទៅចាក់វ៉ាក់សាំងដូសទី៣ តាមការកំណត់របស់គ្រូពេទ្យ។លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការ ចំពោះកិច្ចចាក់វ៉ាក់សាំងកូវីដ-១៩ ក្នុងក្របខណ្ឌទូទាំងប្រទេស អមដំណើរដោយក្រុមការងារក្រសួងសុខាភិបាល និងអាជ្ញាធរមូលដ្ឋាន កាលពីម្សិលមិញ បានចុះពិនិត្យទីតាំងចាក់វ៉ាក់សាំង និងជួបសំណេះសំណាលជាមួយមន្រ្តីសុខាភិបាល និងប្រជាពលរដ្ឋ នៅមណ្ឌលសុខភាពមួយចំនួន ស្ថិតនៅខេត្តកណ្តាល។ក្រោយបញ្ចប់ការចុះពិនិត្យទីតាំងចាក់វ៉ាក់សាំង លោកជំទាវវេជ្ជបណ្ឌិត ឱ វណ្ណឌីន បានកោត សសើរចំពោះការងាររបស់ក្រុមគ្រូពេទ្យ និងអាជ្ញាធរ ដែលរៀបចំបានល្អ ក្នុងដំណើរការចាក់វ៉ាក់សាំងជូនពលរដ្ឋក្នុងមូលដ្ឋាន។ ក្រៅពីនេះ លោកជំទាវបានក្រើនរំលឹកដល់ពលរដ្ឋធ្លាប់បានចាក់វ៉ាក់សាំង ដូសមូលដ្ឋាន ឬដូសទី២រួចហើយ រាប់បញ្ជូលទាំងអ្នកធ្លាប់ចាក់វ៉ាក់សាំង Johnson & Johnson ត្រូវទៅទទួលការ ចាក់វ៉ាក់សាំងដូសទី៣តាមការកំណត់របស់ក្រុមគ្រូពេទ្យ។យុទ្ធនាការចាក់វ៉ាក់សាំងដូសទី៣ បានចាប់ផ្តើមតាំងពីអំឡុងខែសីហា ចាក់ជូនក្រុមអាទិភាពមុន បន្ទាប់មកចាក់ជូនពលរដ្ឋទូទៅ ដោយប្រើប្រាស់យុទ្ធសាស្រ្តផ្ការីក។ ការចាក់វ៉ាក់សាំងដូសទី៣ ត្រូវមានគម្លាតយ៉ាងតិចចាប់ពី៤ខែឡើង ក្រោយទទួលបានចាក់វ៉ាក់សាំងដូសទី២ ឬដូសមូលដ្ឋាន។នៅកម្ពុជាការចាក់វ៉ាក់សាំងកូវីដ-១៩ គឺជាមធ្យោបាយមួយ ក្នុងចំណោមវិធានការសុខាភិបាលចាំ បាច់ដទៃទៀត ដែលនឹងបង្ការការរាតត្បាត ការចម្លង និងកាត់បន្ថយផលប៉ះពាល់នៃជំងឺកូវីដ-១៩ ទៅលើវិស័យសេដ្ឋកិច្ចនិងសង្គម។ បច្ចុប្បន្នកម្ពុជា បានបើកដំណើរការប្រទេសឡើងវិញតាមបែបគន្លងថ្មី បន្ទាប់ ពីទទួលបានជោគជ័យលើនយោបាយចាក់វ៉ាក់សាំងជូនពលរដ្ឋបានជាច្រើនលាននាក់៕ អត្ថបទ៖ ទូច សោភ័ណ

គ្រូពេទ្យស្ម័គ្រចិត្តឯកឧត្តម ហ៊ុន ម៉ានី គឺជាកម្លាំងក្មេងចាស់ រួមកម្លាំងសាមគ្គីគ្នាលើកកម្ពស់សុខមាលភាពប្រជាពលរដ្ឋឲ្យបានល្អ

ពោធិ៍សាត់៖ គ្រូពេទ្យស្ម័គ្រចិត្តឯកឧត្តម ហ៊ុន ម៉ានី គឺជាកម្លាំងក្មេង ចាស់ ប្រុស ស្រី រួមកម្លាំងសាមគ្គីគ្នា ដើម្បីលើកកម្ពស់សុខភាពប្រជាពលរដ្ឋឲ្យបានល្អប្រសើរ។ឯកឧត្តម លេង ផាលី ប្រធានប្រតិបត្តិក្រុមការងាគ្រូពេទ្យស្មគ្រ័ចិត្តឯកឧត្តម ហ៊ុន ម៉ានី បានអះអាងបែបនេះ ក្នុងពិធីបុណ្យផ្កាប្រាក់សាមគ្គី និងចុះអប់រំផ្សព្វផ្សាយពីវិធានការការពារទប់ស្កាត់ការរីករាលដាលជំងឺកូវីដ-១៩ កាលពីថ្ងៃទី២៣ ខែធ្នូ កន្លងមកនេះ ។ ព្រមទាំងនាំយកអំណោយដ៏ថ្លៃថ្លារបស់ ឯកឧត្តម ហ៊ុន ម៉ានី ប្រធានកិត្តិយសក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី ចែកជូនដល់ ប្រជាពលរដ្ន យាយជី តាជី អាចារ្យ ព្រមទាំងព្រះសង្ឃ នៅវត្តទួលគូ ភូមិទួលគូ ឃុំកោះជ្រុំ ស្រុកកណ្តៀង ខេត្តពោធី៍សាត់។ឯកឧត្តម លេង ផាលី បានលើកឡើងទៀតថា ក្រុមការងារគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី នៅតែបន្តផ្តល់ស្នាមញញឹម និងសុខុមាលភាព ដើម្បីសុភមង្គលជូនបងប្អូនប្រជាពលរដ្ឋនៅគ្រប់ទីកន្លែង។ សកម្មភាពសប្បុរសធម៌នេះកើតឡើងទៅបាន គឺដោយសារតែមានការគិតគូរដល់សុខទុក្ខរបស់ប្រជាពលរដ្ឋពីសំណាក់ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា និងជាតំណាងរាស្រ្តវ័យក្មេង នៃព្រះរាជាណាចក្រកម្ពុជា ប្រធានគណៈកម្មការទី៧ នៃរដ្ឋសភា និងជាប្រធានកិត្តិយសក្រុមការងារគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី ដោយលោកបានគាំទ្រណែនាំនិងចង្អុលបង្ហាញប្រកបដោយសមានធម៌ ភាពឈ្លាសវៃ និងប្រកបដោយថាមពល ដើម្បីអោយសកម្មភាពមនុស្សធម៌នេះកើតមានក្នុងន័យសម្លឹងឃើញថា ជនរួមជាតិមានសុខភាពល្អ ក្នុងពេលដែលប្រទេសជាតិមានសុខសន្តិភាព មានការអភិវឌ្ឍរីកចម្រើនឥតឈប់ឈរ។ ជាពិសេសតបតាមការឧទ្ទេសនាមរបស់គណៈកម្មាការ ចំពោះកិច្ចចាក់វ៉ាក់សាំងកូវីដ-១៩ ក្នុងក្របខណ្ឌទូទាំងប្រទេស និងតាមយុទ្ធសាស្ត្រ《ផ្ការីក》ដែលជា ចក្ខុវិស័យដ៏ខ្ពង់ខ្ពស់របស់សម្តេចតេជោ ហ៊ុន សែន កម្លាំងជំនាញក្រុមការងារគ្រូពេទ្យស្ម័គ្រចិត្ត ចាប់តាំងពីខែមេសា រហូតមកដល់ខែធ្នូ ឆ្នាំ២០២១ យើងបានចូលរួមក្នុងយុទ្ធនាការចាក់វ៉ាក់សាំងបង្ការជំងឺកូវីដ-១៩ ជូនប្រជាពលរដ្ឋបានចំនួន ០៧រាជធានី-ខេត្ត ដោយចាប់ផ្តើមដំបូងនៅក្នុងខេត្តកោះកុង ខេត្តព្រះសីហនុ ខេត្តពោធិ៍សាត់ រាជធានីភ្នំពេញ ខេត្តកណ្តាល ខេត្តឧត្តរមានជ័យ និងខេត្តស្វាយរៀងផងដែរ។ ជាពិសេសសូមអំពាវនាវដល់ប្រជាពលរដ្ឋទាំងអស់ ព្រមទាំងព្រះសង្ឃ ត្រូវយកចិត្តទុកដាក់ទៅលើសុខភាព និងអានាម័យ ផឹកស្អាត ហូបស្អាត រស់នៅស្អាត ត្រូវពាក់ម៉ាស់ និងការលាងដៃជាមួយសាប៊ូ ឬជែលអោយបានត្រឹមត្រូវ និងបន្តអនុវត្ត៣កុំ ៣ការពារ អោយបានខ្ជាប់ខ្ជួនដើម្បីការពារការឆ្លងរាលដាលនៃជម្ងឺកូវីដ-១៩ តាមអនុសាសន៍ដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រី្តនៃព្រះរាជាណាចក្រកម្ពុជា។ជាមួយគ្នានោះដែរអ្នកស្រី មួង សុជាតិ សមាជិកអចិន្ត្រៃយ៍នៃក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី បានមានប្រសាសន៍ដែរថា ក្នុងអន្តរកាលកូវីដ-១៩នេះ ក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី មិនបានរាថយនោះទេ គឺរួមកម្លាំងគ្នាដើម្បីសង្គមជាតិ៕

លោកជំទាវ សុភ័គ្គ ថាវី គាំទ្រអង្គសន្និបាតដែលជ្រើសតាំងឯកឧត្តម ហ៊ុន ម៉ាណែតជាបេក្ខភាពនាយករដ្ឋមន្ត្រី នៅថ្ងៃអនាគត

ភ្នំពេញ៖ លោកជំទាវ សុភ័គ្គ ថាវី សមាជិកគណៈកម្មាធិការកណ្តាល នៃគណបក្សប្រជាជនកម្ពុជា និងជាសមាជិកក្រុមការងារ ចុះជួយរាជធានីភ្នំពេញ រដ្ឋលេខាធិការក្រសួងទំនាក់ទំនង ជាមួយរដ្ឋសភា ព្រឹទ្ធសភា និងអធិការកិច្ច សូមគាំទ្រយ៉ាងពេញទំហឹងចំពោះ ការសម្រេចជាឯកច្ឆន្ទរបស់អង្គសន្និបាតគណៈកម្មាធិការកណ្តាល លើកទី៤៣ អាណត្តិទី៥ របស់គណបក្សប្រជាជនកម្ពុជា នាថ្ងៃទី២៤ ខែធ្នូ ឆ្នាំ២០២១ ដែលជ្រើសតាំងឯកឧត្តម ហ៊ុន ម៉ាណែត ជាបេក្ខភាពនាយករដ្ឋមន្ត្រី នៅថ្ងៃអនាគត។សារគាំទ្រនេះ បានលើកឡើងថា ឯកឧត្តម ហ៊ុន ម៉ាណែត គឺជាឥស្សរជនវ័យក្មេង ជាថ្នាក់ដឹកនាំយុវជន និងបញ្ញវន្តខ្មែរដ៏ឆ្នើមមួយរូបដែលពោរពេញដោយសមត្ថភាពទេពកោសល្យ និងភាពជាអ្នកដឹកនាំដ៏ល្អប្រសើរព្រមទាំងមានគុណធម៌ សុជីវធម៌ និងតម្កល់ផលប្រយោជន៍ជាតិ និងប្រជាជនជាធំ ដែលតែងទទួលបាននូវការគោរពកោតសរសើរ ការគោរពស្រលាញ់ការជឿជាក់ពីមន្ត្រីរាជការ កងកម្លាំងប្រដាប់អាវុធ និងប្រជាពលរដ្ឋខ្មែរទូទៅ ហើយឯកឧត្តមបាននិងកំពុងចូលរួមចំណែកយ៉ាងសកម្មក្នុងបេសកកម្ម ដើម្បីបុព្វហេតុជាតិមាតុភូមិ និងប្រជាពលរដ្ឋកម្ពុជា។សារគាំទ្រនេះ បានលើកឡើងទៀតថា យើងមានជំនឿយ៉ាងមុតមាំថា ឯកឧត្តម ហ៊ុន ម៉ាណែត ពិតជាឥស្សរជនដែលសក្តិសមជាអនាគត នាយករដ្ឋមន្ត្រី ដើម្បីបន្តវេនដឹកនាំការពារបូរណភាពទឹកដីអធិបតេយ្យភាព សុខសន្តិភាព សាមគ្គីភាព ស្ថិរភាពសង្គម និងជំរុញការអភិវឌ្ឍជាតិឱ្យមានការរីកចម្រើនលើគ្រប់វិស័យ ដើម្បីសេចក្តីសុខ សុភមង្គល និងបំណងប្រាថ្នារបស់ប្រជាជនកម្ពុជាគ្រប់ៗរូបនាពេលអនាគត៕

សម្តេចតេជោ បើកការប្រកួតវាយកូនគោលពានរង្វាន់សម្តេចតេជោ លើកទី៥ ឆ្នាំ២០២១

កណ្ដាល៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា នៅព្រឹកថ្ងៃទី២៥ធ្នូ បានអញ្ជើញបើកការប្រកួតវាយកូនគោលពានរង្វាន់សម្តេចតេជោ នាយករដ្ឋមន្រ្តីលើកទី៥ ឆ្នាំ២០២១ ដែលការប្រកួតនេះ បានធ្វើឡើងនៅទីលានវាយកូនគោលវឌ្ឍនៈ ស្ថិតនៅក្នុងឃុំឈើទាល ស្រុកកៀនស្វាយ ខេត្តកណ្តាល។ការរៀបចំកម្មវិធីប្រកួតកីឡាវាយកូនគោលនេះ ត្រូវបានសហព័ន្ធកីឡាវាយកូនគោលកម្ពុជារៀបចំឡើងដើម្បី ចូលរួមអបអរសាទរទិវានយោបាយឈ្នះឈ្នះខួបទី២៣ នៃការបញ្ចប់សង្គ្រាមស៊ីវិលកម្ពុជា (២៩ ធ្នូ ១៩៩៨-២៩ ធ្នូ ២០២១) ។ការប្រកួតកីឡាវាយកូន គោលរង្វាន់សម្ដេចតេជោ លើកទី៥នេះក្រោមវត្តមានដ៏ខ្ពង់ខ្ពស់របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជានិងត្រូវបានចូលរួមដោយកីឡាករកីឡាការិនីជាតិ អន្តរជាតិ និងបណ្ដាអង្គទូតប្រចាំនៅកម្ពុជាផងដែរ។សម្ដេចពិជ័យសេនាឧបនាយករដ្ឋមន្ត្រីរដ្ឋមន្ត្រីក្រសួងការពារជាតិនិងជាប្រធានសហព័ន្ធកីឡាវាយកូនគោលកម្ពុជាបញ្ជាក់ថា៖ ការរៀបចំព្រឹត្តិការណ៍ប្រកួតកីឡាវាយកូនគោលពានរង្វាន់សម្ដេចតេជោនាយករដ្ឋមន្ត្រីលើកទី៥ នៅថ្ងៃនេះ ដើម្បីចូលរួមអបអរសាទរទិវានយោបាយឈ្នះឈ្នះ ខួបទី២៣ឆ្នាំ នៃការបញ្ចប់សង្គ្រាមស៊ីវិលកម្ពុជា (២៩ ធ្នូ ឆ្នាំ ១៩៩៨ – ២៩ ធ្នូ ឆ្នាំ ២០២១) ស្របនឹងសភាពការណ៍នៅកម្ពុជាមានសន្តិភាព សន្តិសុខ និង សណ្ដាប់ធ្នាប់សង្គម ពិសេសការទប់ស្កាត់ការរីករាលដាលនៃជំងឺកូវីដ-១៩ មានលក្ខណៈល្អប្រសើរតាមរយៈការដាក់ចេញយុទ្ធសាស្ត្រនិងវិធានការនានាក្រោមការដឹកនាំដ៏ឈ្លាសវៃប្រកបដោយគតិបណ្ឌិតរបស់សម្ដេចតេជោ នាយករដ្ឋមន្ត្រីនិងបានសម្រេចបើកប្រទេសឡើងវិញ ដើម្បីស្ដារសេដ្ឋកិច្ចជាតិតាមរយៈការរស់នៅតាមកន្លងប្រក្រតីភាពថ្មី។សម្ដេចពិជ័យសេនា ទៀ បាញ់បន្តថា តាមរយៈនយោបាយឈ្នះឈ្នះរបស់សម្ដេចតេជោ បានធ្វើឱ្យប្រទេសជាតិមានការអភិវឌ្ឍរីកចម្រើន លើគ្រប់វិស័យក្នុងនោះវិស័យកីឡារាជរដ្ឋាភិបាលបានខិតខំយកចិត្តទុកដាក់ធ្វើការវិនិយោគកាន់តែច្រើនឡើងជាលំដាប់ទាំងហេដ្ឋារចនាសម្ព័ន្ធទន់ រឹង ការហ្វឹកហ្វឺន,ការបណ្ដុះ បណ្ដាលធនធានមនុស្សទាំងក្នុងនិងក្រៅប្រទេស ,ការជួយគាំទ្រឧបត្ថម្ភគ្រប់ពេលវេលា គ្រប់ទីកន្លែងនិងលើកទឹកចិត្តដល់កីឡាករកីឡាការិនី ដែលដណ្ដើមបានពានរង្វាន់ មេដាយមាស ប្រាក់ សំរឹទ្ធិ នៅក្នុងថ្នាក់តំបន់និងថ្នាក់អន្តរជាតិទៀតផង។ជាក់ស្ដែងកាលពីថ្ងៃទី ១៨ធ្នូ កន្លងមកនេះ រាជរដ្ឋាភិបាលបានរៀបចំសម្ពោធដាក់ឲ្យប្រើប្រាស់ជាផ្លូវការវិមានកីឡដ្ឋាននៃពហុកីឡដ្ឋានជាតិមរតកតេជោបង្ហាញពីកិច្ចខិតខំ ប្រឹងប្រែងក្នុងការអភិវឌ្ឍហេដ្ឋារចនាសម្ព័ន្ធកីឡាសម្រាប់ឈានឆ្ពោះទៅកាន់ការរៀបចំព្រឹត្តិការណ៍ប្រកួតកីឡាស៊ីហ្គេមនិងអាស៊ាន ប៉ារ៉ាហ្គេម ឆ្នាំ ២០២៣ នឹងទុកជាមត៌កមនុស្សជាតិ និងយុវជនគ្រប់ជំនាន់ព្រមទាំងក្លាយជាប្រទេសមានសក្ដានុពលកីឡា,ទេសចរណ៍ វប្បធម៌ នយោបាយ និងសេដ្ឋកិច្ចក្នុងតំបន់និងពិភពលោក«កីឡារស់ក្នុងសន្តិភាព!» ។សម្ដេចពិជ័យ ក៏បានចាត់ទុកថា ព្រឹត្តិការណ៍ប្រកួតកីឡាវាយកូនគោលថ្ងៃនេះ ក៏ដើម្បីបង្កើនសមត្ថភាពកីឡាវាយកូនគោលកម្ពុជា ឲ្យមានសមត្ថភាព និងគុណ ផលកីឡាកម្រិតខ្ពស់ រឹងមាំ សម្រាប់ឆ្ពោះទៅដណ្ដើមជោគជ័យ ក្នុងការប្រកួតកីឡាស៊ីហ្គេម និងអាស៊ានប៉ារ៉ាហ្គេមនៅឆ្នាំ ២០២៣ ខាងមុខនេះផងដែរ ៕ អត្ថបទ មុត សុទ្ធ

សមាជិកព្រឹទ្ធសភាបាននាំយកគ្រឿងឧបភោគបរិភោគផ្ដល់ជូនប្រជាពលរដ្ឋចាស់ជរា

កំពង់ធំ ៖ លោកជំទាវ ឃួន ឃុនឌី សមាជិកព្រឹទ្ធសភា និងជាប្រធានក្រុមការងារចុះមូលដ្ឋានស្រុកកំពង់ស្វាយ ខេត្តកំពង់ធំ ផ្តល់អំណោយដល់ចាស់ជរាចំនួន ៣០គ្រួសារនៅ ឃុំកំពង់ស្វាយ ស្រុកកំពង់ស្វាយ ខេត្តកំពង់ធំ នៅថ្ងៃទី២៤ ខែធ្នូ ឆ្នាំ២០២១។ក្នុងឱកាសនោះលោកជំទាវ ឃួន ឃុនឌី បានផ្តាំផ្ញើសាកសួរសុខទុកពីសំណាក់ប្រមុខថ្នាក់ដឹកនាំ និងបានកោតសរសើរដល់អាជ្ញាធរមូលដ្ឋានដែលបានខិតខំប្រឹងប្រែងយកចិត្តទុកដាក់ដល់បងប្អូនប្រជាពលរដ្ឋជួបការលំបាក ។លោកជំទាវ បានលើកឡើងថាការផ្តល់ស្បៀងអាហារនិងសម្ភារៈប្រើប្រាស់ថ្ងៃនេះ គឺមិនបានបែងចែកវណ្ណៈ ពណ៌សម្បុរ ឬប្រកាន់បក្សនយោបាយអ្វីឡើយ គឺផ្តល់ជូនគ្រួសារជួបការលំបាកពិតប្រាកដជាក់ស្តែង ទោះបីការផ្តល់ជាអំណោយមនុស្សធម៌ថ្ងៃនេះ មានតិចតួចមិនបានជួយដល់ពលរដ្ឋយូរអង្វែងក៏ដោយ ប៉ុន្តែវាអាចជួយដោះស្រាយពលរដ្ឋនៅពេលលំបាកបានមួយគ្រាដែរ។លោកជំទាវ បានផ្តាំផ្ញើដល់លោកយាយលោកតាសូមឲ្យមានការប្រុងប្រយ័ត្នខ្ពស់ទៅលើផ្នែកអនាម័យ ដូចការបរិភោគសាច់ឆៅ បន្លែឆៅ ទឹកឆៅដែលបណ្តាលឱ្យមានការរាគរុះបង្កជាជំងឺឆ្លងផ្សេងៗ ធ្វើឱ្យប៉ះពាលដល់សុខភាពដោយផឹកស្អាត ហូបស្អាត រស់នៅស្អាត ស្របពេលសកលលោកក៍ដូចជាកម្ពុជាកំពុងជួបវិបត្តិនូវការរាតត្បាតជំងឺកូវីដ១៩ ជាពិសេសវីរុសបំប្លែងថ្មី អូមីក្រុង។លោកជំទាវ បានក្រើនរំលឹកដល់មន្ដ្រីក្រោមឱវាទ និងប្រជាពលរដ្ឋទាំងអស់ត្រូវបន្ដបង្កើនការប្រុងប្រយ័ត្ននិងអនុវត្តឲ្យបានខ្ជាប់ខ្ជួននូវវិធានការណែនាំនានារបស់ក្រសួងសុខាភិបាល ក៏ដូចជាវិធានការណែនាំរបស់ប្រមុខរាជរដ្ឋាភិបាល ៣កុំ និងការពារ ឲ្យបានខ្ជាប់ខ្ជួនជានិច្ចផងដែរ។អំណោយដែលចែកជូននាពេលនោះក្នុង១គ្រួសារៗ រួមមាន អង្ករ២០គីឡូក្រាម ត្រីខ១យួរ ភួយ១ ក្រមា១ និងថវិកា៣ម៉ឺនរៀល និងបានផ្តល់ជូនដល់អាជ្ញាធរនូវថវិកាមួយចំនួនផងដែរ ៕

កិច្ចព្រមព្រៀងពាណិជ្ជកម្ម រវាងកម្ពុជា-ចិន និង RCEP នឹងចូលជាធរមាននៅដើមឆ្នាំក្រោយ

ភ្នំពេញ៖ ឯកឧត្តម ប៉ាន សូរស័ក្ដិ រដ្ឋមន្ដ្រីក្រសួងពាណិជ្ជកម្ម បានលើកឡើងថា នៅខែមករា ឆ្នាំ២០២២ ខាងមុខនេះ កិច្ចព្រមព្រៀងពាណិជ្ជកម្មសេរី (FTA) កម្ពុជា-ចិន និងដៃគូសេដ្ឋកិច្ចគ្រប់ជ្រុងជ្រោយតំបន់ហៅកាត់ អាសិប (RCEP) នឹងត្រូវដាក់ចូលជាធរមាន។ក្នុងពិធីបិទសន្និបាតបូកសរុបការងារពាណិជ្ជកម្ម ឆ្នាំ២០២១ និងលើកទិសដៅការងារពាណិជ្ជកម្ម ឆ្នាំ២០២២ កាលពីរសៀលថ្ងៃទី២៣ ខែធ្នូកន្លងទៅ ឯកឧត្តមរដ្ឋមន្រ្តី ប៉ាន សូរស័ក្តិ មានប្រសាសន៍ថា កិច្ចព្រមព្រៀងទាំងនេះ នឹងក្លាយជាកម្លាំងចលករដ៏សំខាន់ក្នុងការជំរុញកំណើនពាណិជ្ជកម្មទំនិញ សេវាកម្ម និងវិនិយោគ កាន់តែធំជាងមុន ជាពិសេសផ្តល់ទីផ្សារបន្ថែមលើមុខទំនិញថ្មីៗជាច្រើនមុខបន្ថែមទៀត សម្រាប់ការនាំចេញពីកម្ពុជាបន្ថែមពីលើការផ្ទេរបច្ចេកវិទ្យា ចំណេះដឹង ចំណេះធ្វើ និងជំនាញថ្មីៗពីការវិនិយោគបរទេសផ្ទាល់ និងការងារ ថ្មីៗជូនប្រជាពលរដ្ឋផងដែរ។ឯកឧត្តម បានបន្តថា ទោះបីជាកម្ពុជាជួបបញ្ហាប្រឈមនឹងជំងឺរាតត្បាតកូវីដ១៩ក៏ដោយ ក៏ក្រសួងបានខិតខំបំពេញការងារយ៉ាងសកម្ម ក្នុងការជំរុញកំណើនវិស័យពាណិជ្ជកម្មកម្ពុជា ទាំងក្នុងក្របខ័ណ្ឌទ្វេភាគី តំបន់ និងសកលលោក ដោយសម្រេចបាននូវលទ្ធផលគួរជាទីមោទនៈ ជាពិសេសការចរចាបើកច្រកទីផ្សារសម្រាប់ទំនិញកម្ពុជា។ឯកឧត្តម រដ្ឋមន្រ្តីលើកឡើងបន្តថា ក្រសួងនៅមានបេសកកម្មចរចាបង្កើតកិច្ចព្រមព្រៀងពាណិជ្ជកម្ម សេរីថ្មីៗបន្ថែមទៀតជាមួយដៃគូពាណិជ្ជកម្មសំខាន់ៗមួយចំនួន មានដូចជា ជាមួយសហភាពសេដ្ឋកិច្ចអឺរ៉ុប អាស៊ី ឥណ្ឌា រុស្ស៊ី ជប៉ុន ម៉ុងហ្គោលីជាដើម។ឯកឧត្តម បានឲ្យដឹងទៀតថា ក្នុងរយៈពេលខាងមុខក្រសួងក៏បានខិតខំចរចាផងដែរ ដើម្បីកម្ពុជាអាចចុះហត្ថលេខា លើអនុស្សរណៈយោគយល់គ្នាជាច្រើន ជាមួយប្រទេសជាដៃគូមួយចំនួនដូចជា បេឡារុស ហុងគ្រី គុយវែត និងម៉ូរីសជាដើម ដើម្បីជំរុញកិច្ចសហប្រតិបត្តិការលើវិស័យសេដ្ឋកិច្ច ពាណិជ្ជកម្ម វិនិយោគកសិកម្ម ទេសចរណ៍ ឧស្សាហកម្ម បច្ចេកវិទ្យា វិទ្យាសាស្ត្រជាដើម។យោងតាមសន្ទរកថារបស់ឯកឧត្តម ប៉ាន សូរស័ក្តិ បានបញ្ជាក់ថា ថ្វីត្បិតតែតម្លៃនាំចេញក្នុងរយៈពេល ១១ខែ ឆ្នាំ២០២១ មានចំនួន ១៥ ៧២៩លានដុល្លារអាម៉េរិក ដែលមានការធ្លាក់ចុះចំនួន ០.១២ភាគរយ បើធៀបនឹង រយៈពេលដូចគ្នានឹងឆ្នាំ២០២០ក៏ដោយ ប៉ុន្តែបើតាមការព្យាករណ៍របស់ក្រសួងសេដ្ឋកិច្ចនិងហិរញ្ញវត្ថុកំណើនសេដ្ឋកិច្ចនៅក្នុងឆ្នាំ២០២១នេះ នឹងមានប្រមាណ ២,៤ភាគរយ។ ដោយឡែក សម្រាប់ឆ្នាំ២០២២ កំណើនដែលបានធ្វើការព្យាករណ៍ គឺមានរហូតដល់ ៤,៨ភាគរយ ក្នុងករណីការអនុវត្តគោលនយោបាយបានល្អប្រសើរតាមការគ្រោងទុក៕អត្ថបទ៖ ឈិត បូរ៉ាវី

រដ្ឋមន្រ្តីការងារ ចង់ឃើញវិស័យឯកជនចាប់ដៃគូជាមួយរដ្ឋ អភិវឌ្ឍន៍ទីផ្សារការងារសម្រាប់យុវជន

ភ្នំពេញ៖ ឯកឧត្តមបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ កាលពីព្រឹកថ្ងៃទី២៣ ធ្នូ ឆ្នាំ២០២១នេះ បានអនុញ្ញាតឲ្យលោក Patrice Vignes នាយកគ្រប់គ្រងប្រចាំប្រទេសរបស់ក្រុមហ៊ុន ឌីលីវើរី ហេរ៉ូ (ខេមបូឌា) (foodpanda) ចូលជួបសម្តែងការគួរ និងពិភាក្សាអំពីការអភិវឌ្ឍធនធានមនុស្សនៅប្រទេសកម្ពុជា និងទីផ្សារការងារសម្រាប់យុវជន។ នៅក្នុងជំនួបនោះ ឯកឧត្តមរដ្ឋមន្រ្តី អ៊ិត សំហេង បានវាយតម្លៃខ្ពស់ចំពោះក្រុមហ៊ុន ដែលបានធ្វើការវិនិយោគ បង្កើតសេវាដឹកជញ្ជូននៅកម្ពុជា។ ចំពោះការវិនិយោគនេះទៀតសោត ពិតជាបានចូលរួមអភិវឌ្ឍន៍សេដ្ឋកិច្ច ការផ្តល់ការងារដល់យុវជន និងជាការនាំមកនូវសេវាថ្មីមួយទៀតចូលមកកម្ពុជាផងដែរ។ឯកឧត្តម បានលើកឡើងថា នៅក្នុងដំណាក់កាលកូវីដ-១៩ ក្រុមហ៊ុនបានផ្តល់ការផ្គត់ផ្គង់អាហារមកដល់ពលរដ្ឋ កម្ពុជាបានយ៉ាងល្អ។ ជាមួយគ្នានេះ ឯកឧត្តមចង់ឲ្យខាង Foodpanda បង្កើតភាពជាដៃគូតាមរយៈការអភិវឌ្ឍធនធានមនុស្ស ដោយក្រសួងមានសាលាបណ្តុះបណ្តាលវិជ្ជាជីវៈ អាចបង្កើតជាមេរៀនបង្រៀនក្នុងរយៈពេលទាំងខ្លី និងមធ្យម។ និងឲ្យមានការបណ្តុះបណ្តាលជំនាញទន់ថែមទៀត ដើម្បីធ្វើការទំនាក់ទំនងជាមួយអតិថិជនរបស់ខ្លួន។ឯកឧត្តម គូសបញ្ជាក់ថា យើងអាចធ្វើកិច្ចព្រមព្រៀងលើអនុស្សរណៈរួមគ្នា ថាតើក្រសួងអាចជួយអ្វីខ្លះទៅដល់ក្រុមហ៊ុនបាននឹងក្លាយជាដៃគូសហការដ៏ជិតស្និតជាមួយគ្នានាពេលអនាគត។ ជាការឆ្លើយតលោកនាយគ្រប់គ្រង បានបង្ហាញក្តីរីករាយ ដែលបានធ្វើការជាដៃគូជាមួយក្រសួងការងារ លើកិច្ចការអាទិភាពមួយចំនួននេះ ដែលអាចនិយាយបានថា កិច្ចសហការនេះ នឹងផ្តល់ផលប្រយោជន៍ដល់បុគ្គលិករបស់ ក្រុមហ៊ុនផង និងភាពរីកចម្រើនរបស់ក្រុមហ៊ុនថែមទៀត និងពេញចិត្តចុះកិច្ចព្រមព្រៀងលើអនុស្សរណៈជាមួយក្រសួង ដើម្បីធានាបាននូវកិច្ចសហការដ៏យូរអង្វែង និងកាន់តែមានប្រសិទ្ធភាព។ លោកបានឲ្យដឹងទៀតថា ក្រុមហ៊ុននឹងប្តេជ្ញាចិត្តធ្វើការវិនិយោគកាន់តែធំជាងនេះបន្ថែមទៀត នៅកម្ពុជាដោយមានផែនទីបង្ហាញផ្លូវបង្កើតជាប្រព័ន្ធស្តង់ដារមួយ ឲ្យមានការគាំទ្រពីអ្នកប្រើប្រាស់សេវានេះឲ្យកាន់តែច្រើនបន្ថែមទៀ ខណៈដែលក្រុមហ៊ុនលោកចាប់ផ្តើមសេវាដឹកជញ្ជូនគ្រឿងទេស និងដឹកជញ្ជូនម្ហូបអាហារទូទៅ ដោយមានបុគ្គលិក៨ពាន់នាក់ និងត្រូវការកម្លាំងពលកម្មបន្ថែមទៀតនាពេលខាងមុខ៕ អត្ថបទ៖ ឈិត បូរ៉ាវី

ក្រសួងទេសចរណ៍បង្កើនការថតវីដេអូខ្លី ផ្សព្វផ្សាយការដើរកម្សាន្តតាមគោលដៅទេសចរណ៍ថ្មីៗ

ភ្នំពេញ៖ ស្ថាប័នចំនួន៣រួមមាន៖ ក្រសួងទេសចរណ៍ គណៈកម្មាធិការជាតិគ្រប់គ្រង និងអភិវឌ្ឍសហគមន៍ទេសចរណ៍ និងអេកូទេសចរណ៍ និងក្រុមហ៊ុន នរៈ ស្ទីឌីយូ នៅល្ងាចថ្ងៃទី២៣ ខែធ្នូនេះ បានព្រមព្រៀងគ្នា បង្កើនការចុះថតបង្កើតជាវីដេអូខ្លីជាច្រើន ដើម្បីធ្វើការផ្សព្វផ្សាយ និងបង្ហាញពីការត្រៀមលក្ខណៈ និងរបៀបនៃការទៅដើរកម្សាន្តនៅតាមបណ្តាគោលដៅទេសចរណ៍សំខាន់ ជាពិសេសតំបន់សហគមន៍ទេសចរណ៍ និងអេកូទេសចរណ៍នានារបស់កម្ពុជា។បើតាមលោក ជុក ជំនោរ ប្រធាននាយកដ្ឋានអភិវឌ្ឍន៍ទេសចរណ៍ នៃក្រសួងទេសចរណ៍បានថ្លែងប្រាប់BTVថា នៅពេលពេលនេះ ក្រសួងទេសចរណ៍បានចុះហត្ថលេខាលើ MOUព្រមព្រៀមជាមួយក្រុមហ៊ុន នរៈស្ទីឌីយ៉ូ ធ្វើជាដៃគូមួយបន្ថែមទៀត ក្នុងរយៈពេលបីឆ្នាំ ដើម្បីផលិតជាវីដេអូទេសចរណ៍ថ្មី និងការផ្សព្វផ្សាយផលិតផលទេសចរណ៍ ព្រមទំាងអភិវឌ្ឍន៍សហគមន៍ទេសចរណ៍ និងអេកូទេសចរណ៍អោយមានភាពទាក់ទាញភ្ញៀវជាតិអន្តរជាតិទៅទស្សនាកម្សាន្ត។លោក ឡោ វុឌ្ឍី ប្រធានគ្រប់គ្រងទូទៅនៃក្រុមហ៊ុន នរៈស្ទីឌីយ៉ូ ថ្លែងថា អស់រយៈពេលជាង ៥ឆ្នាំមកហើយ ដែលក្រុមហ៊ុនបានធ្វើកិច្ចការងារនេះជាមួយក្រសួងទេសចរណ៍ ហើយតាមរយៈ MOUថ្ងៃនេះ ក្រុមការងារលោកនឹងបង្កើនការប្តេជ្ញាចិត្តចូលរួមជាមួយក្រសួងទេសចរណ៍ និងគណៈកម្មាធិការជាតិ ក្នុងការផលិតវីដេអូ ដើម្បីចូលរួមកម្មវិធីប្រលងប្រណាំងនៅក្នុងព្រឹត្តិការណ៍នានា ដើម្បីធ្វើការផ្សព្វផ្សាយគោលដៅទេសចរណ៍ថ្មីៗ ពិសេសគោលដៅសហគមន៍ អេកូទេសចរណ៍ និងទេសចរណ៍ផ្សេងព្រេង ដែលកំពុងក្លាយជានិន្នាការថ្មីនៃដំណើរកម្សាន្តរបស់ភ្ញៀវទេសចរ។ឯកឧត្តម តុប សុភ័ក រដ្ឋលេខាធិការក្រសួងទេសចរណ៍ ថ្លែងថា នៅទូទាំងប្រទេសកម្ពុជា មានតំបន់ទេសចរណ៍ ទេសចរណ៍វប្បធម៌ អេកូទេសចរណ៍ជាច្រើនកន្លែង ខណៈបច្ចុប្បន្នក្រសួងទេសចរណ៍បានរៀបចំសៀវភៅបញ្ជីសារពើភណ្ឌតំបន់ទេសចរណ៍ក្នុងប្រទេសកម្ពុជាឡើងវិញ ដោយបានបង្ហាញគោលដៅទេសចរណ៍ប្រមាណជិត ១១០០កន្លែង អាចទៅលេងកម្សាន្ត ហើយនៅក្នុងគោលដៅទេសចរណ៍នីមួយៗ មានកន្លែងដើរកម្សាន្តដែលមានទាក់ទាញរាប់ពាន់កន្លែងទៀត។ឯកឧត្តម តុប សុភ័ក បន្ត បន្តថា តាមរយៈកិច្ចព្រមព្រៀង និងការបង្កើនផលិតវីដេអូខ្លីស្តីពីដំណើរកម្សាន្តតាមគោលដៅទេសចរណ៍ថ្មីនៅកម្ពុជា នឹងជម្រុញចលនាទេសចរជាតិ អន្តរជាតិមានកំណើនឡើង ជាពិសេសជម្រុញពលរដ្ឋខ្មែរទូទៅ ទៅលេងកម្សាន្តស្គាល់ទឹកដីជាតិខ្មែរខ្លួនឯងអោយបានច្បាស់ មុននឹងដើរកម្សាន្តទៅក្រៅប្រទេស៕អត្ថបទ ស៊ុម សុខជា

អ្នកដំណើរអន្តរជាតិចូលកម្ពុជាកើនឡើងជាង ៦០ភាគរយ ខណៈមន្រ្តីរឹងបន្តឹងបង្ការការឆ្លងអូមីក្រុង

ភ្នំពេញ៖ លោកឧត្តមសេនីយ៍ត្រី ថោង សុផាត នាយរងប៉ុស្ត៍ច្រកទ្វារអាកាសយានដ្ឋានអន្តរជាតិភ្នំពេញ បានឲ្យដឹងថា រយះពេល៣សប្តាហ៍ក្នុងខែធ្នូនេះ អ្នកដំណើរអន្តរជាតិចូលកម្ពុជា បានកើនឡើងចំនួនជាង ៦០ភាគរយ ខណៈមន្រ្តីទាំងអស់រឹតបន្តឹងខ្ពស់បង្ការការឆ្លងជំងឺកូវីដ១៩ប្រភេទអូមីក្រុង មុនអនុញ្ញាតអ្នកដំណើរទាំងអស់ចូលកម្ពុជា។ថ្លែងក្នុងកិច្ចសម្ភាសន៍ជាមួយBTV នៅថ្ងៃទី២៤ ខែធ្នូ ឆ្នាំ២០២១ លោកឧត្តមសេនីយ៍ត្រី ថោង សុផាត នាយរងប៉ុស្ត៍ច្រកទ្វារអាកាសយានដ្ឋានអន្តរជាតិភ្នំពេញ បានឲ្យដឹងថា បន្ទាប់ពីទទួលបានសម្តេចតេជោ ហ៊ុន សែន ប្រមុខរាជរដ្ឋាភិបាល បានប្រកាសបើកប្រទេស ក៏ដូចជាអនុញ្ញាតឲ្យអ្នកដំណើរទាំងជនជាតិខ្មែរ និងជនជាតិបរទេសទាំងអស់ដែលធ្វើដំណើរចូលកម្ពុជា ហើយបានចាក់វ៉ាក់សាំងពេញលេញ (២ដូស) គឺមិនតម្រូវឲ្យធ្វើចត្តាឡីស័កនោះ មកទល់ពេលនេះ កំណើនអ្នកដំណើរអន្តរជាតិចូលកម្ពុជាបានកើនឡើងគួរឲ្យកត់សម្គាល់។ការកើនឡើងនេះ ឧត្តមសេនីយ៍ត្រី ថោង សុផាត បន្តថា បើប្រៀបធៀបរយះពេល៣សប្តាហ៍ក្រោយបើកប្រទេសភ្លាម និងរយះពេល៣សប្តាហ៍មុនបំណាច់ខែធ្នូនេះ អ្នកដំណើរចូលកម្ពុជាក្នុងមួយថ្ងៃចំនួនប្រមាណ៨០០នាក់ និងកើនឡើងជាង៦០ភាគរយ។ឧត្តមសេនីយ៍ត្រី ថោង សុផាត បានបញ្ជាក់ថា តាមរយៈកំណើននេះបានធ្វើឲ្យមន្រ្តីអន្តោប្រវេសន៍សហការជាមួយមន្រ្តីសុខាភិបាល និងក្រុមហ៊ុនអាកាសយានដ្ឋានអន្តរជាតិភ្នំពេញ បានរៀបចំការទទួលអ្នកដំណើរបន្ថែម ដើម្បីឲ្យការមកដល់របស់អ្នកដំណើរមិនមានការកកស្ទះ។ក្នុងពេលកម្ពុជារកឃើញអ្នកដំណើរចូលកម្ពុជាតាមអាកាសយានដ្ឋានអន្តរជាតិភ្នំពេញឆ្លងជំងឺកូវីដ១៩ប្រភេទអូមីក្រុង ចំនួន៨ករណី ឧត្តមសេនីយ៍ត្រី ថោង សុផាត បានសង្កត់ធ្ងន់ថា គ្រប់អ្នកដំណើរចូលទាំងអស់ត្រូវបំពេញដាច់ខាតទៅតាមលក្ខខណ្ឌរបស់កម្ពុជា ខណៈមន្រ្តីអន្តោប្រវេសន៍ទាំងអស់ក៏បានអនុវត្តយ៉ាងម៉ត់ច្មត់បង្ការការឆ្លងជំងឺកូវីដ១៩ ប្រភេទអូមីក្រុង។គួរបញ្ជាក់ថា រាល់អ្នកដំណើរចូលកម្ពុជាទាំងខ្មែរ និងបរទេស មិនតម្រូវឲ្យធ្វើចត្តាឡីស័កឡើយ ប៉ុន្តែការមិនធ្វើចត្តាឡីស័កនេះ សម្រាប់តែអ្នកដែលបានចាក់វ៉ាក់សាំងគ្រប់ចំនួនរួចរាល់ប៉ុណ្ណោះ។ ក្នុងនោះ បើទោះបីមិនតម្រូវឲ្យធ្វើចត្តាឡីស័ក សម្រាប់អ្នកចាក់វ៉ាក់សាំងហើយក៏ពិតមែន ប៉ុន្ដែអ្នកដំណើរទាំងអស់ត្រូវបំពេញកាតព្វកិច្ចមួយទៀត គឺការយកសំណាកដោយប្រើប្រាស់ឧបករណ៍តេស្ដរហ័ស ឬហៅថា Rapid Test ខណៈសម្រាប់អ្នកដែលមិនទាន់បានចាក់វ៉ាក់សាំង គឺតម្រូវឲ្យធ្វើចត្តាឡីស័ក ចំនួន១៤ថ្ងៃ និងយកសំណាកដោយម៉ាស៊ីន PCR ដដែល៕ អត្ថបទ សេក ឧត្តម

សម្តេច ទៀ បាញ់ និងលោកជំទាវ ម៉ែន សំអន ត្រូវបានជ្រើសតាំងជាអនុប្រធានបក្សប្រជាជនកម្ពុជា

ភ្នំពេញ៖ សម្តេចពិជ័យសេនា ទៀ បាញ់ និងលោកជំទាវកិត្តិសង្គហបណ្ឌិត ម៉ែន សំអន ដែលជាសមាជិកអចិន្រ្តៃយ៍គណបក្សប្រជាជនកម្ពុជា ត្រូវបានជ្រើសតាំងជាអនុប្រធានគណបក្សប្រជាជនកម្ពុជាបន្ថែមទៀត ដែលធ្វើឱ្យចំនួនអនុប្រធានបក្សនេះ មកដល់ពេលនេះកើនដល់ចំនួនបួននាក់។ក្នុងសន្និបាតគណៈកម្មាធិការកណ្តាលគណបក្សប្រជាជនកម្ពុជាលើកទី៤៣ នៅវិមាន៧មករា (ចំការមន) បានបោះឆ្នោតផ្តល់ការគាំទ្រជ្រើសតាំងបន្ថែមអនុប្រធានបក្សពីររូបទៀត គឺសម្តេចពិជ័យសេនា ទៀ បាញ់ និងលោកជំទាវកិត្តិសង្គហបណ្ឌិត ម៉ែន សំអន ដែលធ្វើឱ្យគណបក្សនេះរហូតមកដល់ពេលនេះ មានអនុប្រធានចំនួន៤រូបហើយ គឺសម្តេចវិបុលសេនាភក្តី សាយ ឈុំ សម្តេចក្រឡាហោម ស ខេង សម្តេចពិជ័យសេនា ទៀ បាញ់ និងលោកជំទាវកិត្តិសង្គហបណ្ឌិត ម៉ែន សំអន ។គណបក្សប្រជាជនកម្ពុជា បានរៀបចំសន្និបាតគណៈកម្មាធិការកណ្តាល លើកទី៤៣ អាណត្តីទី៥ នៅព្រឹកថ្ងៃទី២៤ ខែធ្នូនេះ ក្រោមអធិបតីភាពដ៏ខ្ពង់ខ្ពស់សម្ដេចតេជោ ហ៊ុន សែន ប្រធានគណបក្ស សម្ដេចពញាចក្រី ហេង សំរិន ប្រធានកិត្តិយស សម្ដេចក្រឡាហោម ស ខេង សម្ដេចវិបុលសេនាភក្ដី សាយ ឈុំ អនុប្រធាន និងងថ្នាក់ដឹកនាំថ្នាក់កណ្ដាល សរុប៣៥រូប ដោយមានការចូលរួមពីឯកឧត្តម លោកជំទាវ ជាសមាជិក សមាជិការ នៃគណៈកម្មាធិការកណ្ដាល ចំនួន៧៧៥រូប ។គណបក្សប្រជាជនកម្ពុជា មកដល់ពេលនេះ មានសមាជិកគណៈកម្មាធិការកណ្តាល សរុបចំនួន ៨៣៧នាក់ ក្នុងនោះមានសមាជិកគណៈកម្មាធិការអចិន្រ្តៃយ៍ចំនួន៣៧នាក់ ៕អត្ថបទ៖ មុត សុទ្ធ

បណ្ដាញសង្គម

ព័ត៌មានថ្មីៗ

មេដឹកនាំប្រឆាំងវ៉េណេស៊ុយអេឡា ធ្វើដំណើរទៅទស្សនកិច្ចសហរដ្ឋអាមេរិក បន្ទាប់ពីពិភាក្សាជាមួយរដ្ឋាភិបាលបណ្ដោះអាសន្ន

ប្រទេសន័រវែសស្វែងរកការហាមឃាត់ការធ្វើពាណិជ្ជកម្មជាមួយនឹងអ្នកតាំងលំនៅឋានអ៊ីស្រា អែលខុសច្បាប់

ជនអន្តោប្រវេសន៍នីហ្សេរីយ៉ាដែលវិលត្រឡប់មកពីអាហ្វ្រិកខាងត្បូង កំពុងប្រឈមនឹងបញ្ហាសេដ្ឋកិច្ច

សម្ដេចពិជ័យសេនា ទៀ បាញ់ ណែនាំដល់ស្ថាប័នពាក់ព័ន្ធឱ្យបន្ដរៀបចំអភិវឌ្ឍន៍តំបន់ប្រវត្តិសាស្ត្រយោធាកម្ពុជា X-16

មេដឹកនាំសហភាពអឺរ៉ុបឯកភាពគ្នាបន្តទណ្ឌកម្មលើប្រទេសរុស្ស៊ីរយៈពេលមួយឆ្នាំទៀត

មន្ត្រីជាន់ខ្ពស់៖ អ៊ីរ៉ង់មិនដកពីការចរចាអំពីបទឈប់បាញ់នៅប្រទេសលីបង់ជាមួយអាមេរិកទេ

WHOនិយាយថា ការផ្ទុះឡើងនៃជំងឺអេបូឡានៅកុងហ្គោបានឆ្លងដល់គ្រូពេទ្យចំនួន ៧៥នាក់ ចាប់តាំងពីខែឧសភាមក

សម្តេចពិជ័យសេនា ទៀ បាញ់ អញ្ជើញជាអធិបតី ទិវានៃការចងចាំដំណើរឆ្ពោះទៅការផ្តួលរំលំរបបប្រល័យពូជសាសន៍ ប៉ុល ពត (២០ មិថុនា ១៩៧៧) នៅខេត្តត្បូងឃ្មុំ

ការវាយប្រហាររបស់អ៊ីស្រាអែលនៅទូទាំងលីបង់បណ្តាលឲ្យមនុស្សយ៉ាងតិច ៤៧នាក់ ស្លាប់ និង ៩៧នាក់រងរបួស

ជនជាតិចិន១៦៤នាក់ពាក់ ព័ន្ធករណី Online Scams ត្រូវបានបណ្ដេញចេញពីកម្ពុជា

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

នយោបាយ​ និង ការអភិវឌ្ឍន៍