BTV NEWS

ចៅក្រមស៊ើបសួរសម្រេចឃុំខ្លួនមន្ត្រីនគរបាល-អាវុធហត្ថខេត្តកំពត និងអ្នកទទួលផលចោរកម្មសរុបចំនួន ៤៧នាក់

អាជ្ញាធររាជធានីភ្នំពេញ បន្តប្រតិបត្តិការបោសសម្អាត Online Scams ត្រួតពិនិត្យ ៨០ ទីតាំងទៀត និងផាកពិន័យម្ចាស់ទីតាំងរស់នៅប្រមូលផ្ដុំចំនួន ៤ទីតាំង

អាវុធហត្ថរាជធានីភ្នំពេញ បង្ក្រាបទីតាំងលក់សម្ភារៈអាសអាភាសចំនួន ៣កន្លែង ឃាត់ខ្លួនជនសង្ស័យ ៩នាក់

គណៈបញ្ជាការឯកភាពរាជធានី បន្តចុះបង្ក្រាប Online Scams នៅសង្កាត់ចាក់អង្រែលើ ឃាត់មនុស្ស១៦នាក់

សន្តិសុខ និង សង្គម

អាមេរិកនឹងស្វាគមន៍រាល់ជំហានរបស់អ៊ីរ៉ង់ក្នុងការកាត់បន្ថយកម្មវិធីនុយក្លេអ៊ែរ

អាមេរិក៖ រដ្ឋមន្ត្រីការបរទេសសហរដ្ឋអាមេរិក លោក Antony Blinken បាននិយាយកាលពីថ្ងៃអង្គារថា លោកមិនអាចបញ្ជាក់ពីរបាយការណ៍ដែលថា ប្រទេសអ៊ីរ៉ង់ បានកាត់បន្ថយល្បឿននៃការបង្កើនការចម្រាញ់សារធាតុអ៊ុយរ៉ាញ៉ូមដែលជិតឈានដល់កម្រិតផលិតអាវុធបាន ប៉ុន្តែនឹងស្វាគមន៍រាល់វិធានការណាមួយរបស់អ៊ីរ៉ង់ ដើម្បីកាត់បន្ថយ ការគំរាមកំហែងនុយក្លេអ៊ែរដែលកំពុងកើនឡើងរបស់ប្រទេសនេះ។ លោក Blinken បានប្រាប់អ្នកសារព័ត៌មានថា អ៊ីរ៉ង់កំពុងផ្លាស់ប្តូរអ្នកជាប់ឃុំអាមេរិកចូលទៅក្នុងការឃុំខ្លួននៅក្នុងលំនៅឋានដែលមិនជាប់ទាក់ទងនឹងទិដ្ឋភាពផ្សេងៗទៀតនៃគោលនយោបាយរបស់សហរដ្ឋអាមេរិកចំពោះអ៊ីរ៉ង់ ដែលលោកបាននិយាយថា បង្ហាញពីយុទ្ធសាស្ត្រនៃការរារាំង សម្ពាធ និងផ្នែកការទូត។ប្រភពនានាបាននិយាយថា ប្រទេសអ៊ីរ៉ង់ អាចដោះលែងពលរដ្ឋអាមេរិកចំនួនប្រាំនាក់ដែលត្រូវបានឃុំខ្លួនជាផ្នែកមួយនៃកិច្ចព្រមព្រៀងដើម្បីបញ្ចេញប្រាក់ចំនួន ៦ ពាន់លានដុល្លារអាមេរិកនៅក្នុងមូលនិធិអ៊ីរ៉ង់នៅក្នុងប្រទេសកូរ៉េខាងត្បូង។ អ៊ីរ៉ង់ បានអនុញ្ញាតឱ្យពលរដ្ឋអាមេរិកចំនួនបួននាក់ដែលត្រូវបានឃុំខ្លួនឲ្យផ្លាស់មកដាក់ឃុំខ្លួនក្នុងផ្ទះ ដោយផ្ទេរចេញពីពន្ធនាគារ ខណៈអ្នកទីប្រាំបានស្ថិតនៅក្រោមការឃុំខ្លួនក្នុងផ្ទះរួចហើយ។ សារព័ត៌មាន Wall Street Journal បានរាយការណ៍ថា ប្រទេសអ៊ីរ៉ង់ បានបន្ថយល្បឿនយ៉ាងខ្លាំង ដែលខ្លួនកំពុងបង្កើនការចម្រាញ់សារធាតុអ៊ុយរ៉ាញ៉ូមជិតឈានដល់កម្រិតផលិតអាវុធ ហើយបានកាត់បន្ថយបរិមាណស្តុកមួយចំនួន ជាចំណាត់ការដែលអាចជួយបន្ធូរបន្ថយភាពតានតឹងជាមួយសហរដ្ឋអាមេរិក និងរៀបចំឡើងវិញកិច្ចពិភាក្សាកាន់តែទូលំទូលាយជុំវិញកម្មវិធីនុយក្លេអ៊ែររបស់អ៊ីរ៉ង់៕

អ្នកដំណើរជាង១០.០០០នាក់ បានរងផលប៉ះពាល់ពីកូដកម្មបុគ្គលិកព្រលានយន្តហោះនៅក្នុងប្រទេសអាហ្សង់ទីន

អាហ្សង់ទីន៖ កូដកម្មរបស់បុគ្គលិកជញ្ជូនឥវ៉ាន់នៅព្រលានយន្តហោះ បានធ្វើឱ្យអ្នកដំណើរជាង១០.០០០នាក់ជាប់គាំង និងបណ្តាលឱ្យមានការលុបចោលជើងហោះហើរយ៉ាងហោចណាស់៦០ជើង នៅអាកាសយានដ្ឋានជាច្រើនក្នុងប្រទេសអាហ្សង់ទីន កាលពីព្រឹកថ្ងៃអង្គារ (១៥ សីហា)។ក្រុមកម្មករនៃក្រុមហ៊ុនរដ្ឋ Intercargo ដែលផ្តល់សេវាផ្ទេរឥវ៉ាន់ បញ្ជូន និងដឹកជញ្ជូន នៅតំបន់រងចាំឡើងយន្តហោះ បានចាប់ផ្តើមធ្វើកូដកម្មកាលពីថ្ងៃចន្ទ (១៤ សីហា) ក្នុងការតវ៉ាទាក់ទងនឹងជម្លោះអន្តរសហជីពជាមួយក្រុមហ៊ុនសេវាកម្មព្រលានយន្តហោះ Swissport។បន្ទាប់ពីការតវ៉ាអស់រយៈពេល២០ម៉ោង ក្រុមបុគ្គលិកជញ្ជូនឥវ៉ាន់បានបញ្ឍប់កូដកម្មនៅពាក់កណ្តាលថ្ងៃបន្ទាប់ពីកិច្ចប្រជុំថ្មីជាមួយក្រុមអាជ្ញាធរនៃក្រសួងការងារអាហ្សង់ទីន។ អាកាសយានដ្ឋានដែលរងផលប៉ះពាល់ដោយការធ្វើកូដកម្មគឺមានអាកាសយានដ្ឋាន Ezeiza, អាកាសយានដ្ឋាន Cordoba, អាកាសយានដ្ឋាន Mendoza, អាកាសយានដ្ឋាន Salta, អាកាសយានដ្ឋាន Iguazu និងស្ថានីយអាកាសយានដ្ឋាន Bariloche ផងដែរ៕

បេសកជនអង្គការសហប្រជាជាតិ ជំរុញឱ្យតុលាការពិភពលោកកាត់ទោសការរើសអើងភេទនៅអាហ្វហ្គានីស្ថាន

UN៖ បេសកជនអប់រំពិភពលោករបស់អង្គការសហប្រជាជាតិ លោក Gordon Brown បាននិយាយកាលពីថ្ងៃអង្គារ (១៥ សីហា)ថា តុលាការព្រហ្មទណ្ឌអន្តរជាតិ (ICC) គួរតែទទួលស្គាល់ការរើសអើងភេទនៅអាហ្វហ្គានីស្ថាន ថាជាឧក្រិដ្ឋកម្មប្រឆាំងមនុស្សជាតិ ហើយបើកការស៊ើបអង្កេតករណីនោះក្នុងគោលបំណងកាត់ទោសអ្នកដែលប្រព្រឹត្តខុស។លោក Brown បានប្រាប់ក្រុមអ្នកសារព័ត៌មានថា "នេះគឺជាឧទាហរណ៍ដ៏អាក្រក់បំផុតនៃការរំលោភសិទ្ធិមនុស្សលើក្មេងស្រី និងស្ត្រីនៅជុំវិញពិភពលោក ហើយប្រសិនបើយើងអនុញ្ញាតឱ្យរឿងនេះកើតឡើង ហើយបន្តដោយនិទណ្ឌភាព នោះអ្នកផ្សេងទៀតអាចនឹងព្យាយាមធ្វើរឿងដូចគ្នានេះ" ។ក្មេងស្រីដែលមានអាយុលើសពី១២ឆ្នាំភាគច្រើន មិនត្រូវបានអនុញ្ញាតឲ្យចូលរៀនទេ ចាប់តាំងពីពួកតាលីបង់ បានកាន់កាប់អំណាចនៅអាហ្វហ្គានីស្ថានមក។ ពួកតាលីបង់ក៏បានបញ្ឈប់បុគ្គលិកស្ត្រីជនជាតិអាហ្វហ្គានីស្ថាន ភាគច្រើន មិនអោយធ្វើការនៅភ្នាក់ងារផ្តល់ជំនួយ ដោយបិទហាងកែសម្ផស្ស រារាំងស្ត្រីមិនឲ្យទៅកាន់សួនកម្សាន្តនិងកាត់បន្ថយការធ្វើដំណើរសម្រាប់ស្ត្រី ក្នុងករណីដែលគ្មានអាណាព្យាបាលបុរស។លោកបានជំរុញឱ្យបណ្ដាប្រទេសដែលកាន់សាសនាឥស្លាមភាគច្រើន បញ្ជូនគណៈប្រតិភូទៅទីក្រុង Kandahar ដើម្បីបញ្ចុះបញ្ចូលបណ្ដាមេដឹកនាំតាលីបង់ ឱ្យលុបចោលបម្រាមរបស់ពួកគេលើការអប់រំសម្រាប់ក្មេងស្រី និងការងាររបស់ស្ត្រី ដែលមិនមានមូលដ្ឋាននៅក្នុងគម្ពីរកូរ៉ាន ឬសាសនាឥស្លាម៕

ការដឹកជញ្ជូនតាមយន្តហោះយោធា ជួយដល់ការភៀសខ្លួន ខណៈចំហេះព្រៃរាលដាលដល់ភាគខាងជើងប្រទេសកាណាដា

កាណាដា៖ ការរត់ភៀសខ្លួនរបស់លោក Jordan Evoy ពីចំហេះព្រៃដែលកំពុងរាលដាលនៅតំបន់ចុងខាងជើង ប្រទេសកាណាដា គឺជាពេលវេលាដ៏គួរឱ្យភ័យខ្លាចបំផុតនៃជីវិតរបស់លោក ខណៈភ្លើងព្រៃឆេះរាលដាលបានបិទផ្លូវ ដែលបង្ខំឱ្យលោកត្រលប់ក្រោយ ដើម្បីឡើងជិះលើជើងហោះហើរយោធាចាកចេញ នៅក្នុងការជម្លៀសខ្លួនធំបំផុតមិនធ្លាប់មាននៅដែនដីភាគពាយ័ព្យ។ មនុស្សរាប់រយនាក់ត្រូវបានដឹកជញ្ជូនតាមយន្តហោះទៅកាន់ទីសុវត្ថិភាពពីភូមិដាច់ស្រយាលកាលពីយប់ថ្ងៃអង្គារ ទី១៥ ខែសីហា បន្ទាប់ពីទីក្រុង Yellowknife ជាទីក្រុងធំបំផុតនៅក្នុងតំបន់ បានប្រកាសភាពអាសន្ន។សម្រាប់មនុស្សជាច្រើននៅក្នុងសហគមន៍តូចៗ វាគឺជាលើកទីពីរក្នុងរយៈពេលប៉ុន្មានខែថ្មីៗនេះ ដែល ពលរដ្ឋត្រូវបានបង្ខំឱ្យចាកចេញពីលំនៅឋានរបស់ពួកគេ។ ដោយផ្លូវជាច្រើនទៅកាន់ភាគខាងត្បូង ត្រូវបានបិទបន្ទាប់ពីត្រូវបានឆេះហ៊ុមព័ទ្ធដោយអណ្តាតភ្លើង មានការដឹកជញ្ជូនតាមយន្តហោះយោធា ដែលត្រូវបានដាក់ពង្រាយរួមជាមួយទាហាន ១២០ នាក់ដើម្បីទប់ទល់អណ្តាតភ្លើង ដែលជាមធ្យោបាយតែមួយគត់នៃការភៀសខ្លួនចេញ។ កាលពីល្ងាចថ្ងៃអង្គារ អាជ្ញាធរដែនដីភាគពាយ័ព្យ បានប្រកាសដាក់តំបន់នោះក្នុងគ្រាអាសន្ន ដោយលើកឡើងពីស្ថានភាពផ្លាស់ប្តូរយ៉ាងឆាប់រហ័ស និងការផ្លាស់ប្តូរតម្រូវការជាមូលដ្ឋាន។ លោក Shane Thompson រដ្ឋមន្ត្រីក្រសួងបរិស្ថានដែនដី បាននិយាយថា យើងបានមើលឃើញខ្លួនយើងស្ថិតនៅក្នុងស្ថានភាពវិបត្តិ ហើយរដ្ឋាភិបាលរបស់យើងកំពុងប្រើគ្រប់ឧបករណ៍ដែលមានដើម្បីជួយ។ លោក Evoy ជាពលរដ្ឋនៅតំបន់ Fort Smith និយាយ ថា លោកបានព្យាយាមបើករថយន្តទៅភាគខាងត្បូងទៅកាន់ខេត្ត Alberta ប៉ុន្តែត្រូវត្រលប់មកវិញ ហើយធ្វើតាមការស្នើសុំរបស់មន្ត្រីឱ្យទៅកាន់អាកាសយានដ្ឋានភ្លាមៗ ដោយព្រមានថាផ្លូវចេញដែលមានសុវត្ថិភាពបំផុតគឺធ្វើឡើងតាមយន្តហោះ។

ហេតុអ្វីបានជាកងជីវពលAmhara របស់ប្រទេសអេត្យូពីកំពុងប្រយុទ្ធជាមួយកងទ័ព?

អេត្យូពី៖ នាយករដ្ឋមន្រ្តីអេត្យូពី លោក អាប៊ីយ អាមេដ( Abiy Ahmed) បានមើលឃើញខ្លួនលោកស្ថិតនៅកណ្តាលនៃជម្លោះថ្មីមួយ នៅពេលនេះ នៅក្នុងតំបន់អាមហារ៉ា( Amhara) ដ៏សំខាន់ដែលបានបញ្ជាកងទ័ពរបស់ខ្លួន ដើម្បីជួយរូបលោករារាំងការប៉ុនប៉ងរបស់គូប្រជែង គឺកងកម្លាំងទីហ្គ្រេ (Tigrayan forces) ដើម្បីផ្តួលរំលំរូបលោកកន្លងមកនោះ។ជម្លោះនេះ គឺជាសញ្ញាចុងក្រោយបង្អស់ដែលថា លោកអាប៊ីយ កំពុងតស៊ូដើម្បីរស់នៅអាស្រ័យលើរង្វាន់ណូបែលរបស់ខ្លួន ដែលជាកិត្តិយសប្រគល់ឲ្យរូបលោកក្នុងឆ្នាំ២០១៩សម្រាប់ការបញ្ចប់អរិភាពដ៏យូរជាមួយប្រទេសអេរីទ្រី និងកំណត់ប្រទេសអេត្យូពីលើផ្លូវប្រជាធិបតេយ្យ បន្ទាប់ពីគ្រប់គ្រងកណ្តាប់ដៃដែកជិតបីទសវត្សរ៍។ប៉ុន្តែកេរ្តិ៍ឈ្មោះរបស់លោកអាប៊ីយក្នុងនាមជាអ្នកបង្កើតសន្តិភាព និងជាអ្នកប្រជាធិបតេយ្យ ត្រូវបានធ្វើឲ្យស្រអាប់ដោយសារជម្លោះនៅតំបន់អាមហារ៉ា ដែលជាតំបន់ធំបំផុតទីពីរនៅក្នុងប្រទេសអេត្យូពី។អំពើហិង្សានេះ បានធ្វើឲ្យអន្តរជាតិមានការព្រួយបារម្ភ ដោយអ៊ីស្រាអែលបានជម្លៀសពលរដ្ឋ និងជនជាតិជ្វីហ្វរបស់ខ្លួនចេញពីតំបន់នេះ កាលពីសប្តាហ៍មុន៕

UN ព្រមានថា ស្ថានភាពនៅស៊ូដង់ឈានដល់ចំណុចមិនអាចគ្រប់គ្រងបាន ខណៈវិបត្តិមនុស្សធម៌កាន់តែធ្ងន់ធ្ងររយៈពេល៤ខែ ក្រោយផ្ទុះជម្លោះ

ស៊ូដង់៖ អង្គការសហប្រជាជាតិ បានព្រមានកាលពីថ្ងៃអង្គារទី១៥សីហាថា មនុស្សរាប់លាននាក់ជិតអស់ស្បៀងអាហារនៅក្នុងប្រទេសស៊ូដង់ ។ មនុស្សជាង៤លាននាក់ ត្រូវបានភៀសខ្លួនក្នុងប្រទេស រួមទាំងជាង១លាននាក់ ដែលបានត្រូវបានប៉ាន់ប្រមាណថាបានរត់គេចចូលទៅកាន់បណ្ដាប្រទេសជិតខាង។ ជម្លោះដែលបានអូសបន្លាយរយៈពេល៤ខែមកនេះ ចាប់តាំងពីផ្ទុះឡើងកាលពីថ្ងៃទី១៥ មេសា នៅក្នុងប្រទេសស៊ូដង់ បានបង្កឲ្យមានកង្វះខាតយ៉ាងខ្លាំងនៃសម្ភារៈប្រើប្រាស់ជាមូលដ្ឋានប្រចាំថ្ងៃដូចជាអាហារ និងថ្នាំពេទ្យ ដែលជំរុញឲ្យមានវិបត្តិមនុស្សធម៌ កាន់តែធ្ងន់ធ្ងរថែមទៀត នៅក្នុងប្រទេសនេះ ខណៈដែលពុំមានសញ្ញានៃការធូស្រាលនៅឡើយ។ យោងតាមទីតាំងជម្លោះប្រដាប់អាវុធ និងផែនការទិន្នន័យព្រឹត្តិការណ៍ បាននិយាយថា គិតត្រឹមថ្ងៃទី៤ខែសីហា ឧបទ្ទវហេតុហិង្សាជាង១.៣០០នាក់ត្រូវបានកត់ត្រា នៅប្រទេសស៊ូដង់ដែលបណ្ដាលឲ្យមនុស្សជាង៥.០០០នាក់ស្លាប់ ចាប់តាំងពីជម្លោះរវាងក្រុមគូប្រជែងយោធាចំនួន២ បានផ្ទុះឡើង ។ មនុស្សមួយចំនួន កំពុងស្លាប់ជាបន្តបន្ទាប់ដោយសារកង្វះការថែទាំសុខភាព បន្ទាប់ពីសង្គ្រាមរយៈពេល៤ខែ ដែលបានបំផ្លិចបំផ្លាញរដ្ឋធានីខាទុំ (Khartoum) និងបានបង្កើនការវាយប្រហារដាក់គោលដៅលើក្រុមជនជាតិភាគតិច នៅក្នុងតំបន់ដាហ្វួរ (Darfur) ។ ទីភ្នាក់ងារអង្គការសហប្រជាជាតិ បាននិយាយនៅក្នុងសេចក្ដីថ្លែងការណ៍រួមថា ពេលវេលាជិតអស់ហើយសម្រាប់កសិករដាំដុះដំណាំ ដើម្បីផ្គត់ផ្គង់ក្នុងប្រទេសពួកគេ និងប្រទេសជិតខាង និងការកង្វះខាតការផ្គង់ផ្គង់ឱសថ។ អង្គការសហប្រជាជាតិ និយាយថា ស្ថានភាពនៅក្នុងប្រទេសស៊ូដង់ឈានដល់ចំណុចមិនអាចគ្រប់គ្រងបាន។ អ្នកនាំពាក្យការិយាល័យ សម្របសម្រួលកិច្ចការមនុស្សធម៌ លោក ជែនស៍ ឡាអេគី ( Jens Laerke) បាននិយាយថា ក្រុមមេដឹកនាំអង្គការមនុស្សធម៌សកលទាំងនេះ ព្រមានថា សង្រ្គាមនេះកំពុងបំផ្លិចបំផ្លាញជីវិតមនុស្ស និងប្រទេសកំណើតរបស់ពួកគេ ព្រមទាំងបំពាសិទ្ធិមនុស្សជាមូលដ្ឋានរបស់ពួកគេ៕

របបសឹក៖ នីហ្សេបើកចំហក្នុងការចរចា ខណៈលោកពូទីន និងអាមេរិក សង្កត់ធ្ងន់លើសន្តិភាព

នីហ្សេ៖ កាលពីថ្ងៃអង្គារ របបសឹកនីហ្សេ បាននិយាយថា ខ្លួនបើកចំហសម្រាប់កិច្ចពិភាក្សាដើម្បីដោះស្រាយវិបត្តិក្នុងតំបន់ ដែលបណ្តាលមកពីរដ្ឋប្រហារយោធាកាលពីខែមុន ខណៈដែលរុស្ស៊ី និងសហរដ្ឋអាមេរិក បានអំពាវនាវឱ្យមានដំណោះស្រាយដោយសន្តិវិធី។មហាអំណាចលោកខាងលិច និងរដ្ឋាភិបាលអាហ្រ្វិកប្រជាធិបតេយ្យ បានអំពាវនាវឱ្យក្រុមមេដឹកនាំរដ្ឋប្រហារ ប្រគល់អំណាចឲ្យលោកប្រធានាធិបតីនីហ្សេ Mohamed Bazoum ដែលពួកគេបានឃុំខ្លួនតាំងពីថ្ងៃទី២៦ ខែកក្កដា ឡើងវិញ ប៉ុន្តែក្រុមមេដឹកនាំយោធាបានបដិសេធ និងច្រានចោលការប៉ុនប៉ងចរចា។បណ្ដាប្រមុខអាហ្រ្វិកខាងលិច នឹងជួបប្រជុំគ្នានៅថ្ងៃព្រហស្បតិ៍ និងថ្ងៃសុក្រ ខាងមុខនេះ នៅប្រទេសហ្គាណា ដើម្បីរៀបចំសម្រាប់លទ្ធភាពណាមួយនៃការធ្វើអន្តរាគមន៍យោធា ដែលប្លុកតំបន់សំខាន់ និងសហគមន៍សេដ្ឋកិច្ចនៃរដ្ឋអាហ្រ្វិកខាងលិច (ECOWAS) បានគំរាមថានឹងធ្វើឡើង ប្រសិនបើការដោះស្រាយការទូតបរាជ័យ។អន្តរាគមន៍យោធាណាមួយដែលអាចកើតឡើង នឹងធ្វើឱ្យមានអស្ថិរភាពបន្ថែមទៀតដល់ប្រទេសក្នុងតំបន់អាហ្វ្រិក Sahel ដ៏ក្រីក្រមួយនេះ ជាទីដែលការបះបោរដោយក្រុមមានទំនាក់ទំនងជាមួយក្រុមអាល់កៃដា និងរដ្ឋឥស្លាម បានជម្លៀសមនុស្សរាប់លាននាក់ក្នុងរយៈពេលមួយទស្សវត្សរ៍កន្លងមកនេះ ព្រមទាំងបង្កឱ្យមានវិបត្តិអត់ឃ្លានផងដែរ៕

កូរ៉េខាងជើង និយាយថា Travis King ចង់គេចចេញពីការរើសអើង និង ការធ្វើបាបនៅក្នុងសហរដ្ឋអាមេរិក

កូរ៉េខាងជើង៖ សារព័ត៌មានរដ្ឋបានរាយការណ៍នៅថ្ងៃពុធទី១៦សីហា នេះថា ពលទោ Travis King បានសារភាពពីមូលហេតុរត់ឆ្លងព្រំដែនចូលទៅក្នុងប្រទេសកូរ៉េខាងជើង ដោយសារតែការធ្វើបាបដ៏អមនុស្សធម៌ និងការរើសអើងពូជសាសន៍នៅក្នុងជួរកងទ័ពសហរដ្ឋអាមេរិក ដែលជាការទទួលស្គាល់ជាសាធារណៈលើកដំបូងនៃឧបទ្ទវហេតុនេះដោយទីក្រុងព្យុងយ៉ាង(Pyongyang)។កូនទាហានជាពលទោ ឈ្មោះ Travis T King បានរត់ចូលទៅក្នុងប្រទេសកូរ៉េខាងជើង ខណៈមានដំណើរកម្សាន្តរបស់ជនស៊ីវិលនៅតាមតំបន់សន្តិសុខរួម (JSA) នៅតាមព្រំដែនដែលមានការយាមកាមយ៉ាងតឹងរ៉ឹងបំផុត រវាងប្រទេសកូរ៉េទាំង២ ។ ក្រុមមន្ត្រីសហរដ្ឋអាមេរិក បាននិយាយថា ពួកគេជឿថា ពលទោ King មានបំណងរត់ឆ្លងព្រំដែន ។ ទីភ្នាក់សារព័ត៌មានរដ្ឋ KCNA បាននិយាយថា ពេលនេះក្រុមអ្នកស៊ើបអង្កេតកូរ៉េខាងជើង ក៏បានសន្មតិហើយដែរថា ទាហានស្បែកខ្មៅ រូបនេះ បានឆ្លងព្រំដែនដោយចេតនា និងខុសច្បាប់ ។ អំឡុងការស៊ើបអង្កេត លោក Travis King បានសារភាពថា លោក បានសម្រេចចិត្តឆ្លងចូលប្រទេសកូរ៉េខាងជើង ខណៈលោកមានអារម្មណ៍ឈឺចាប់ខឹងនឹងការធ្វើបាបដ៏អមនុស្សធម៌ និងការរើសអើងពូជសាសស៍។ លោកក៏បានបង្ហាញឆន្ទៈរបស់លោកក្នុងការស្វែងរកសិទ្ធិជ្រកកោននៅក្នុងប្រទេសកូរ៉េខាងជើងឬ ប្រទេសទី៣ ដោយនិយាយថាលោកមិនសប្បាយចិត្តចំពោះសង្គមវិសមភាពរបស់សហរដ្ឋងាមេរិកទេ ។ បន្ទាប់ពីការវាយតប់គ្នានៅពេលស្រវឹងនៅហាងស្រា ក្នុងឧបទ្ទវហេតុជាមួយនគរបាលនិង ជាប់ពន្ធនាគារកូរ៉េខាងត្បូង ពលទោឋានៈទី២ King ត្រូវបានបញ្ជូនទៅកាន់អាកាសយានដ្ឋានកាលពីឆ្នាំមុន ដើម្បីវិលត្រឡប់ទៅកាន់រដ្ឋ Texasវិញ ៕

ទីភ្នាក់ងារអនុវត្តច្បាប់ប្រឆាំងគ្រឿងញៀនអាមេរិក(DEA) ប្រចាំនៅភ្នំពេញ ចេញលិខិតថ្លែងអំណរគុណដល់មន្ត្រីអនុវត្តច្បាប់ប្រឆាំងគ្រឿងញៀនកម្ពុជា

ភ្នំពេញៈ ទីភ្នាក់ងារអនុវត្តច្បាប់ប្រឆាំងគ្រឿងញៀនអាមេរិក(DEA) ប្រចាំនៅភ្នំពេញ បានចេញលិខិតថ្លែងអំណរគុណដល់មន្ត្រីអនុវត្តច្បាប់ប្រឆាំងគ្រឿងញៀនកម្ពុជា ជាពិសេស ក្រោមការដឹកនាំដ៏ឈ្លាសវៃ របស់ ឯកឧត្តម នាយឧត្ដមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ និងឯកឧត្តម នាយឧត្ដមសេនីយ៍ ម៉ក់ ជីតូ អគ្គស្នងការរង ទទួលផែនប្រឆាំងបទល្មើសគ្រឿងញៀន និងក្រោមការបញ្ជាដឹកនាំផ្ទាល់របស់ ឯកឧត្តម ឧត្តមសេនីយ៍ឯក ឃឹង សារ៉ាត់ នាយកមន្ទីរប្រឆាំងបទល្មើសគ្រឿងញៀន ដែលកន្លងមក សមត្ថកិច្ចមន្ទីរប្រឆាំងបទល្មើសគ្រឿងញៀន នៃអគ្គស្នងការដ្ឋាននគរបាលជាតិ បានបើកកិច្ចប្រតិបត្តិការបង្ក្រាបគ្រឿងញៀនទ្រង់ទ្រាយធំដូចជាៈ បង្ក្រាបតាមច្រកប្រៃសណីយ៍, អាកាសយានដ្ឋានអន្តរជាតិ និងថ្មីៗនេះបង្ក្រាបក្រុមឧក្រិដ្ឋជន មេក្លោងមានអង្គការចាត់តាំង ដែលរៀបចំការដឹកជញ្ជូនគ្រឿងញៀនប្រភេទកេតាមីន ឆ្លងដែនតាមលំហរសមុទ្រទៅប្រទេសទី៣ សរុបគ្រឿងញៀនបង្ក្រាបបានប្រមាណ៨០០គីឡូក្រាម គិតជាទឹកប្រាក់ប្រមាណជាង៥០លានដុល្លារអាមេរិក ។គួរបញ្ជាក់ថា ទីភ្នាក់ងារអនុវត្តច្បាប់ប្រឆាំងគ្រឿងញៀនអាមេរិក(DEA) ប្រចាំនៅភ្នំពេញ បានចេញលិខិតថ្លែងអំណរគុណចំនួន ០៣លើករួចមកហើយ ដែលបង្ហាញពីកិច្ចសហប្រតិបត្តិការល្អ រវាងស្ថាប័នទាំងពីរ(DEA) និងមន្ទីរប្រឆាំងបទល្មើសគ្រឿងញៀន រួមគ្នាទប់ស្កាត់បទល្មើសគ្រឿងញៀន ដែលបង្ហាញពីស្នាដៃប្រយុទ្ធប្រឆាំងបទល្មើសគ្រឿងញៀនដ៏ធំធេង និងស្តែងចេញនូវឆន្ទៈ មោះមុតរបស់មន្ត្រីអនុវត្តច្បាប់ប្រយុទ្ធប្រឆាំងគ្រឿងញៀនកម្ពុជា ក្នុងការទប់ស្កាត់ការចរាចរគ្រឿងញៀនក្នុងពិភពលោក។ ទន្ទឹមនឹងនេះដែរ មន្ទីរប្រឆាំងបទល្មើសគ្រឿងញៀន សូមថ្លែងអំណរគុណដល់៖ • ទីភ្នាក់ងារអនុវត្តច្បាប់ប្រឆាំងគ្រឿងញៀនអាមេរិក(DEA) ក៏ដូចជាស្ថាប័នពាក់ព័ន្ធជាតិ និងអន្តរជាតិដ៏ទៃទៀត ដែលបានរួមគ្នាទប់ស្កាត់បទល្មើសគ្រឿងញៀន សំដៅរក្សាសុខមាលភាព និងសន្តិសុខដល់សង្គមជាតិទាំងមូល។• សាធារណៈជនដែលបានចូលរួមកែលំអរដល់កងកម្លាំង និងសហការផ្ដល់ព័ត៌មាន រួមគ្នាប្រឆាំងបទល្មើសគ្រឿងញៀន ដែលនេះជាស្មារតីដ៏ប្រពៃ ក្នុងការអនុវត្តន៍ទិសស្លោក «៣កុំ ១រាយការណ៍»៕ ដោយ ៖ ដារ៉ា

នាវាជាច្រើនបានមកប្រមូលផ្តុំនៅច្រកសមុទ្រខ្មៅ ខណៈការបាញ់ព្រមានរុស្ស៊ី រុញឲ្យមានភាពតានតឹង

នាវាពាណិជ្ជកម្ម នៅតែប្រមូលផ្តុំគ្នានៅច្រកនាវាចរណ៍ ជុំវិញសមុទ្រខ្មៅ កាលពីថ្ងៃចន្ទ ខណៈកំពង់ផែជាច្រើនព្យាយាមបញ្ចប់ការងារនៅសេសសល់ជាច្រើន ក្នុងពេលមានការព្រួយបារម្ភកើនឡើង ក្នុងចំណោមក្រុមហ៊ុនធានារ៉ាប់រង និងក្រុមហ៊ុនដឹកជញ្ជូន មួយថ្ងៃបន្ទាប់ពីនាវាចម្បាំងរុស្ស៊ី បាញ់ព្រមាននាវាដឹកទំនិញមួយគ្រឿង។ រុស្ស៊ី និយាយថា នាវាល្បាត Vasily Bykov របស់ខ្លួនកាលពីថ្ងៃអាទិត្យ បានបាញ់នាវា Sukru Okan ដោតទង់ជាតិប្រទេសប៉ាឡាវ (Palau) បន្ទាប់ពីកាពីទែននាវានោះ មិនបានឆ្លើយតបទៅនឹងសំណើរសុំឲ្យឈប់ដើម្បីត្រួតពិនិត្យ។ បន្ទាប់ពិការត្រួតពិនិត្យ នាវានោះ បានបន្តដំណើររបស់ខ្លួនឆ្ពោះទៅកាន់កំពង់ផែ Izmail ប្រទេសអ៊ុយក្រែនតាមដងទន្លេ Danube ។ កាលពីថ្ងៃចន្ទ ទីក្រុងគីវ បានថ្កោលទោសនូវអ្វីដែលខ្លួនបានចាត់ទុកសកម្មភាពរបស់រុស្ស៊ីថា ជាការបង្ករឿង និងបានអំពាវនាវឲ្យមានវិធានការប្រឆាំងដោយមិនស្ទាក់ស្ទើរ ធ្វើឡើងដោយសហគមន៍អន្តរជាតិ។ប្រភពពីឧស្សាហកម្មធានារ៉ាប់រងបាននិយាយថា អត្រាសម្រាប់ការបង់ប្រាក់ធានាហានីភ័យសង្គ្រាមបន្ថែមទៀត នៅតែមានស្ថិរភាពទោះបីជាមានលទ្ធភាពនៃការកើនឡើងប្រសិននាវាមួយគ្រឿងត្រូវបានធ្វើឲ្យខូចខាត ឬលិច។ ការចំណាយលើការបង់ប្រាក់ធានាពីហានីភ័យសង្គ្រាមនៅសមុទ្រខ្មៅ ដែលជាធម្មតាបន្តថ្មីរៀងរាល់៧ថ្ងៃ ហើយកំពុងបន្ថែមទៅលើការចំណាយធានារ៉ាប់រងប្រចាំឆ្នាំ ត្រូវបានប៉ាន់ប្រមាណថា មានចំនួនរាប់ម៉ឺនដុល្លារសម្រាប់នាវាមួយគ្រឿងក្នុងផ្លូវធ្វើដំណើរ។ យ៉ាងហោចណាស់ នាវា ៣០គ្រឿង កំពុងទម្លាក់យុទ្ធការនៅជុំវិញជ្រោយ Musura នៅសមុទ្រខ្មៅ ដែលឆ្ពោះទៅកាន់ព្រែកជីកមួយ ដែលភ្ជាប់ជាមួយកំពង់ផែ Izmail នៅតាមបណ្តោយផ្លូវទឹក ។

បណ្ដាញសង្គម

ព័ត៌មានថ្មីៗ

UNICEF ៖ សង្រ្គាមអ៊ីរ៉ង់គំរាមកំហែងដល់ការចែកចាយគ្រឿងផ្គត់ផ្គង់សង្រ្គោះជីវិតកុមារ

ក្រុមហ៊ុន Moderna និងក្រុមហ៊ុនផ្សេងទៀត ទទួលបានប្រាក់ ៦០លានដុល្លារ ដើម្បីផលិតវ៉ាក់សាំងបង្ការជំងឺអេបូឡា

កូដកម្មរថភ្លើងក្រោមដីធ្វើឲ្យប៉ះពាល់ដល់អ្នកដំណើរនៅទីក្រុងឡុងដ្រ៍ ចក្រភពអង់គ្លេស

របាយការណ៍៖ EU ពិចារណាដាក់ទណ្ឌកម្មរដ្ឋមន្ត្រីអ៊ីស្រាអែល ជុំវិញការប្រព្រឹត្តិ ចំពោះនាវាមនុស្សធម៌ឆ្ពោះទៅហ្កាហ្សា

WHO៖ ករណីសង្ស័យជំងឺ Ebola ធ្លាក់ចុះ ក្រោយមនុស្សរាប់រយនាក់ត្រូវបានដកចេញ

ប្រធានគ្លីនិករងការខូចខាតដោយសារការវាយប្រហាររុស្ស៊ីនិយាយថា ទីក្រុងមូស្គូ មិនចង់បញ្ចប់សង្រ្គាមនោះទេ

អគ្គិភ័យដ៏ធំមួយ បានឆាបឆេះផ្សារមួយកន្លែងស្ថិតក្នុងទីក្រុងហ្សាកាតា ប្រទេសឥណ្ឌូនេស៊ី

មនុស្សយ៉ាងតិច ១៥នាក់រងរបួស ដោយសារព្យុះនៅជប៉ុន ខណៈមានការអំពាវនាវឲ្យជម្លៀស

លោក Trump ថាលោកបាននិយាយជាមួយក្រុមហេសបូឡា តាមរយៈអន្តរការី

លោក Netanyahu ប្រាប់លោក Trump ថា អ៊ីស្រាអែលនឹងវាយប្រហារទីក្រុងបេរូត បើសិនការវាយប្រហាររបស់ក្រុមហេសបូឡានៅតែបន្ត

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877