នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
នាយកប្រតិបត្តិអង្គការ HFHI កោតសរសើរគោលនយោបាយ​អភិវឌ្ឍលំនៅដ្ឋានរបស់កម្ពុជា​
ឯកអគ្គរាជទូតជប៉ុនថ្មី ប្តេជ្ញាបន្តពង្រឹង និងពង្រីកកិច្ចសហប្រតិបត្តិការទ្វេភាគីឱ្យកាន់តែរឹងមាំ និងស៊ីជម្រៅ
សម្ដេចតេជោផ្ដល់អនុសាសន៍ដល់គុនខ្មែរ និងសមាគមខ្មែរនៅជប៉ុនឱ្យខិតខំបន្ថែម ដើម្បីនិរន្តរភាពស្ថាប័ន
តំណាងពិសេសរបស់អគ្គលេខាធិការអង្គការសហប្រជាជាតិ កោតសរសើរកម្ពុជាលើការអនុវត្តផែនការសកម្មភាពជាតិស្តីពីការបង្ការ និងការឆ្លើយតបចំពោះអំពើហិង្សាលើកុមារ

នយោបាយ​ និង ការអភិវឌ្ឍន៍

រដ្ឋមន្ត្រីក្រសួងការងារ លើកទឹកចិត្តឱ្យសិស្សនិស្សិតចូលរួមការប្រកួតប្រជែងរ៉ូបូតឱ្យបានច្រើន ដើម្បីលើកកម្ពស់សេដ្ឋកិច្ចជាតិបន្ថែមទៀត

2024/07/14 10:09:48 pm        242
Facebook Telegram Linkin
ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃទី១៤ ខែកក្កដា ឆ្នាំ២០២៤នេះ បានលើកទឹកចិត្តសិស្សនិស្សិតឱ្យចូលរួមក្នុងការប្រកួតប្រជែងរ៉ូបូតឱ្យបានច្រើនបន្ថែមទៀត ព្រោះជាពហុជំនាញដែលធ្វើឱ្យសិស្សនិស្សិតអាចមានលទ្ធភាពកាន់តែខ្ពស់បន្ថែមទៀតដោយមិនត្រឹមតែមានជំនាញស្នូលរបស់ខ្លួនមួយមុខប៉ុណ្ណោះទេ។ការលើកឡើងបែបនេះ គឺនៅក្នុងពេលដែលឯកឧត្តមរដ្ឋមន្ត្រី បានចូលរួមជាសហប្រធានជាមួយឯកឧត្តម នេត ភក្ត្រា រដ្ឋមន្ត្រីក្រសួងព័ត៌មាន បើកក្នុងកម្មវិធីប្រកួតប្រជែងរ៉ូបូតថ្នាក់ជាតិលើកទី១១ ឆ្នាំ២០២៤ នេះដែលរៀបចំឡើងនៅពហុកីឡដ្ឋានជាតិមរតកតេជោ។សម្រាប់ឯកឧត្តមរដ្ឋមន្ត្រី សិស្សនិស្សិតដែលចូលរួមការប្រកួតប្រជែងនេះ នឹងបានរៀន​សូត្រពី​ការធ្វើការ​ងារជាក្រុមព្រោះថា ការបង្កើតរ៉ូបូតនីមួយៗនេះត្រូវការក្រុមពហុជំនាញ​ផ្សេងៗគ្នា​ដូចជាជំនាញកម្មវិធីកុំព្យូទ័រ ​ជំនាញមេកានិក ជំនាញអគ្គិសនីជាដើម ហើយការមានជំនាញ​ជាក់​លាក់​ច្បាស់លាស់សម្រាប់ជីវិតនេះគឺស្របទៅនឹងយុទ្ធសាស្ត្របញ្ចកោណ​របស់រាជរដ្ឋាភិបាលកម្ពុជា​ដែលដឹកនាំដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា​ដែលមានទិសដៅធ្វើឱ្យពលរដ្ឋម្នាក់មានជំនាញមួយយ៉ាងតិច។ថ្លែងទៅកាន់កម្មវិធីដែលមានអ្នកចូលរួមជាង៣ពាន់នាក់ ​ឯកឧត្តមរដ្ឋមន្ត្រី បានសង្ឃឹមថា អ្នក​សិក្សាជំនាញបច្ចេកទេសទាំងអស់នឹងអាចប្រើប្រាស់បច្ចេកវិទ្យាដែលមានដើម្បីសម្រួលដល់ការរស់នៅ ការប្រកបរបរអាជីវកម្មរបស់ពលរដ្ឋ និងសេដ្ឋកិច្ចជាតិឱ្យកាន់តែប្រសើរ។សូមបញ្ជាក់ថា កម្មវិធីនេះ មានអ្នកចូលរួមប្រមាណជាង ៣០០០នាក់ ​និងមានក្រុមនិស្សិតចំនួន ៩ក្រុម ​ចូលរួមប្រកួតប្រជែង ដែលមកពីគ្រឹះស្ថានសិក្សានានាចំនួន ៥ រួមមាន វិទ្យាស្ថានជាតិ​ពហុបច្ចេកទេសកម្ពុជា(NPIC), វិទ្យាស្ថានបណ្តុះបណ្តាលបច្ចេកទេស (NTTI), បណ្ឌិត្យសភា​បច្ចេកវិទ្យាឌីជីថលកម្ពុជា(CADT), សាកលវិទ្យាល័យជាតិគ្រប់គ្រង (NUM), និងវិទ្យាស្ថានបច្ចេកវិទ្យាកម្ពុជា (ITC)។កម្មវិធីប្រកួតប្រជែងរ៉ូបូតថ្នាក់ជាតិលើកទី១១ ឆ្នាំ២០២៤នេះ ក្រោមប្រធានបទការប្រមូលផល​ស្រូវ​ដែលមានគោលបំណង ដើម្បីផ្ដល់ឱកាសដល់និស្សិត មកពីបណ្ដាលវិទ្យាស្ថាន និង​សកល​វិទ្យាល័យ​ផ្សេងៗ បង្ហាញសមត្ថភាពស្រាវជ្រាវ និង​ផលិតឧបករណ៍បច្ចេកវិទ្យាជារ៉ូបូត​ដោយ​ផ្ទាល់ក្នុងការចូលរួមប្រកួតប្រជែង និងស្វែងរកក្រុមជើងឯកសម្រាប់តំណាងកម្ពុជា​ទៅប្រកួតប្រជែងរ៉ូបូតថ្នាក់អន្តរជាតិនៅប្រទេសវៀតណាម ​នាខែសីហា ឆ្នាំ២០២៤ ខាងមុខនេះ៕

ការស៊ើបអង្កេតផ្ដោតលើបរាជ័យផ្នែកសន្តិសុខ បន្ទាប់ពីការបាញ់ប្រហារលើលោក Trump

2024/07/14 09:42:56 pm        288
Facebook Telegram Linkin
សមាជិកសភាមកពីគណបក្សសាធារណរដ្ឋបាននិយាយថា ពួកគេនឹងបើកការស៊ើបអង្កេតយ៉ាងរហ័សទៅលើថាតើខ្មាន់កាំភ្លើងអាចគេចពីភ្នែកភ្នាក់ងារសម្ងាត់ ហើយឡើងទៅលើដំបូលអគារ ក្បែរកន្លែងអតីតប្រធានាធិបតីអាមេរិក លោក ដូណាល់ ត្រាំ (Donald Trump) កំពុងថ្លែងនៅក្នុងការជួបជុំបោះឆ្នោត ហើយបាញ់ប្រហារជាច្រើនគ្រាប់មុនពេលត្រូវបានសម្លាប់នោះដោយរបៀបណា។លោក ម៉ៃ ចនសុន (Mike Johnson) ប្រធានសភាតំណាងរាស្រ្តសហរដ្ឋអាមេរិក ដែលគ្រប់គ្រងដោយគណបក្សសាធារណរដ្ឋ បាននិយាយថា ក្រុមនៅក្នុងអង្គជំនុំជម្រះនឹងកោះហៅមន្ត្រីមកពីសេវាសម្ងាត់ នៅនាយកដ្ឋានសន្តិសុខមាតុភូមិ និងភ្នាក់ងារពិសេស FBI ចូលសវនាការក្នុងពេលឆាប់ៗនេះ។ គណៈកម្មការត្រួតពិនិត្យសភា បានកោះហៅប្រធានសេវាសម្ងាត់ លោកស្រី គីនប៊ឺលី ឆៀតថល (Kimberly Cheatle) ទៅផ្តល់សក្ខីកម្មនៅថ្ងៃទី២២ ខែកក្កដា។ខណៈពេលដែលព័ត៌មានអំពីឧបទ្ទវហេតុនេះនៅមានភាពស្រពិចស្រពិលនៅឡើយ របាយការណ៍ដំបូងពីប្រព័ន្ធផ្សព្វផ្សាយបាននិយាយថា អ្នកបាញ់ប្រហារនោះនៅខាងក្រៅបរិវេណសន្តិសុខនៃកន្លែងប្រមូលផ្តុំនៅទីក្រុង បាត់ល័រ (Butler) រដ្ឋ ផិនស៊ីលវេនៀ (Pennsylvania)។ មនុស្សម្នាក់ដែលត្រូវបានសម្ភាសដោយសារព័ត៌មាន BBC បាននិយាយថា គេបានឃើញបុរសនោះកាន់កាំភ្លើង ហើយព្យាយាមជូនដំណឹងដល់នគរបាល និងសេវាសម្ងាត់ តែមិនបានសម្រេច។អ្នកគាំទ្រលោក Trump បានរិះគន់សេវាកម្មសម្ងាត់ដែលទទួលខុសត្រូវក្នុងការការពារលោក Trump ក្នុងនាមជាអតីតប្រធានាធិបតីអាមេរិក។ លោកមហាសេដ្ឋី អ៊ីឡុន ម៉ាស (Elon Musk) បានអំពាវនាវឱ្យថ្នាក់ដឹកនាំរបស់ទីភ្នាក់ងារនេះលាលែងពីតំណែង។ ភ្នាក់ងារពិសេសរបស់ FBI លោក ខេវិន រ៉ូជេក (Kevin Rojek) បាននិយាយនៅក្នុងសន្និសីទសារព័ត៌មានមួយ ដោយនិយាយថា «វាជារឿងគួរឱ្យភ្ញាក់ផ្អើលណាស់» ដែលជននោះអាចបាញ់បានជាច្រើនគ្រាប់បែបនេះ៕

អ្នកធាក់ស៊ីក្លូ២៩៥នាក់ ទទួលបានការយកចិត្តទុកដាក់បន្ថែមពីសម្ដេចតេជោ ហ៊ុន សែន

2024/07/14 09:35:03 pm        218
Facebook Telegram Linkin
ភ្នំពេញ៖ ដោយមានការយកចិត្តទុកដាក់ពីសម្តេចអគ្គមហាសេនាបតីតេជោ ហ៊ុន សែន ប្រធានកិត្តិយសមូលនិធិត្រីចក្រយានកម្ពុជា(ស៊ីក្លូ) និងជាប្រធានព្រឹទ្ធសភានៃព្រះរាជាណាចក្រកម្ពុជា នាព្រឹកថ្ងៃទី១៤ ខែកក្កដា ឆ្នាំ២០២៤ ឯកឧត្ដម ឃួង ស្រេង អភិបាលនៃគណៈអភិបាលរាជធានីភ្នំពេញ និងជាប្រធានក្រុមប្រឹក្សាភិបាលមូលនិធិត្រីចក្រយានកម្ពុជាបានចាត់ឲ្យលោក ម៉េត មាសភក្តី អ្នកនាំពាក្យរដ្ឋបាលរាជធានីភ្នំពេញ និងជាប្រធានលេខាធិការដ្ឋានមូលនិធិត្រីចក្រយានកម្ពុជា ផ្ដល់ប័ណ្ណសមធម៌ និងអាវជាសមាជិកមូលនិធិស៊ីក្លូចំនួន២កំប្លេរ ជូនដល់អ្នកធាក់ស៊ីក្លូ ដែលជាសមាជិកមូលនិធិស៊ីក្លូក្នុងរាជធានីភ្នំពេញចំនួន ២៩៥នាក់ នៅសាលារាជធានីភ្នំពេញ។លោក ម៉េត មាសភក្តី បានឲ្យដឹងថា សម្តេចអគ្គមហាសេនាបតីតេជោ ហ៊ុន សែន តែងក្រើនរំលឹកឲ្យឯកឧត្ដម ឃួង ស្រេង យកចិត្តទុកដាក់ និងមើលថែពីសុខទុក្ខសមាជិកអ្នកធាក់ស៊ីក្លូក្នុងរាជធានីភ្នំពេញ ជាក់ស្តែងដូចពេលនេះ។ លោកបន្តថា ក្រៅពីនេះ អ្នកធាក់ស៊ីក្លូទាំង ២៩៥នាក់ តែងទទួលបានប្រាក់ខែជារៀងរាល់ខែចំនួន ២១ម៉ឺនរៀលផងដែរ ដោយក្នុង១ខែអាចបើកបាន៣ដង ក្នុង១ដង៧ម៉ឺនរៀល ជាមួយនឹងការផ្តល់​ជូន​ប័ណ្ណសមធម៌(ប. ស. ស)នេះ ដើម្បីឲ្យសមាជិកអាចទៅពិនិត្យក៏ដូចជាព្យាបាលជំងឺដោយ​មិនអស់ប្រាក់នៅតាមមន្ទីរពេទ្យនានា។ បន្ថែមពីនេះទៀត ក្នុងអំឡុងពេលដែលប្រទេសកម្ពុជា ក៏ដូចជារាជធានីភ្នំពេញ កំពុងប្រឈមមុខនឹងការរាតត្បាតជម្ងឺកូវីដ-១៩ សម្តេចតេជោ មិនត្រឹមតែផ្តល់វ៉ាក់សាំងជូនសមាជិកស៊ីក្លូដូចប្រជាពលរដ្ឋទូទៅប៉ុណ្ណោះទេ គឺសម្តេចនូវបានផ្តល់អំណោយជាគ្រឿងឧបភោគ បរិភោគ ម៉ាស អាកុល ជែល ជូនថែមទៀត។ក្នុងឱកាសនោះដែរ លោក ម៉េត មាសភក្តី ក៏បានជូនពរអ្នកធាក់ស៊ីក្លូទាំងអស់មានសុខភាពល្អ ជៀសវាងនឹងជម្ងឺផ្សេងៗ តែបើមានជម្ងឺក៏អស់ក្តីកង្វល់ទៀតដែរ ព្រោះមានប័ណ្ណសមធម៌(ប. ស. ស)ដែលអាចទៅពិនិត្យក៏ដូចជាព្យាបាលជំងឺដោយមិនអស់ប្រាក់នៅតាមមន្ទីរពេទ្យនានា។លោកពូ ម៉ៅ ឆន អាយុ៥៧ឆ្នាំ មានស្រុកកំណើតនៅស្រុកកំពង់ត្របែក ខេត្តព្រៃវែង និងលោកអ៊ុ រស់ អ៊ាង អាយុ៦៦ឆ្នាំ បានថ្លែងការគោរពអរគុណយ៉ាងជ្រាលជ្រៅបំផុត​ចំពោះសម្តេច​អគ្គមហា​សេនា​បតីតេជោ ហ៊ុន សែន ដែលកន្លងមកតែងតែជួយ​ឧបត្ថម្ភ​ដល់គាត់ ​ដោយមានទាំងប្រាក់ប្រចាំខែ ចែកជូនជាគ្រឿងឧបភោគ បរិភោគ និងថវិកានៅរាល់បុណ្យជាតិធំៗ ដូចជាចូលឆ្នាំ និង​ភ្ជុំបិណ្ឌជាដើម។ បន្ថែមពីនេះនៅបានផ្តល់ប័ណ្ណសមធម៌ (ប. ស. ស)ដែលអាចឲ្យគាត់ទៅ​ពិនិត្យក៏ដូចជាព្យាបាលជំងឺដោយមិនអស់ប្រាក់នៅតាមមន្ទីរពេទ្យនានាថែមទៀត។គួរបញ្ជាក់ផងដែរថា​ មូលនិធិត្រីចក្រយានកម្ពុជា ត្រូវបានបង្កើតឡើងតាំងពីថ្ងៃទី១៨ ខែមករា ឆ្នាំ២០១៨ ក្រោមការ​ផ្តួចផ្តើម​ដ៏ខ្ពង់ខ្ពស់របស់​សម្តេចអគ្គមហាសេនាបតីតេជោ ហ៊ុន សែន សំដៅអភិរក្សស៊ីក្លូ ដែលមានដើមកំណើតតាំងពីសម័យ​អាណានិគម​និយមបារាំងមកម្ល៉េះ៕ អត្ថបទ ៖ ប្រាក់ វ៉ាន់ដា

ក្រសួងកសិកម្មបន្តបាញ់ថ្នាំកសិកម្មកម្ចាត់សត្វចង្រៃ ក្នុងស្រុកចំនួនបី នៅខេត្តព្រៃវែង

2024/07/14 09:27:44 pm        196
Facebook Telegram Linkin
ភ្នំពេញ៖ មន្រ្តីជំនាញនៃក្រសួងកសិកម្ម រុក្ខាប្រមាញ់ និងនេសាទ បានបន្តចុះពិនិត្យស្ថានភាពនៃការបំផ្លាញដំណាំស្រូវពីសំណាក់រុយស ដង្កូវមូរស្លឹក និងនាំយកដ្រូនបង្ហោះបាញ់ថ្នាំកសិកម្មកម្ចាត់ នៅស្រុកកំពង់ត្របែក ស្រុកព្រះស្ដេច និងស្រុកបាភ្នំ ខេត្តព្រៃវែង នៅថ្ងៃទី១៣ ខែកក្កដា ឆ្នាំ២០២៤។ឯកឧត្តម ងិន ឆាយ អគ្គនាយកនៃអគ្គនាយកដ្ឋានកសិកម្ម នៅក្នុងផេកផ្លូវការរបស់ក្រសួងកសិកម្ម រុក្ខាប្រមាញ់ និងនេសាទ បានលើកឡើងថា ការបន្តចុះពិនិត្យនេះធ្វើឡើងក្នុងគោលបំណងដើម្បីសិក្សាវាយតម្លៃលើការរាតត្បាត និងបំផ្លាញដំណាំស្រូវពីរុយស ដង្កូវមូរស្លឹក និងណែនាំដល់ប្រជាកសិករអំពីវិធានការទប់ស្កាត់ និងកម្ចាត់សមាសភាពចង្រៃទាំងនោះ និងនាំយកដ្រូនបាញ់ថ្នាំកសិកម្មកម្ចាត់រុយស និងដង្កូវមូរស្លឹកជូនប្រជាពលរដ្ឋដែលរងការបំផ្លាញពីពពួកសមាសភាពចង្រៃទាំងនោះ និងផ្ដល់បច្ចេកទេសប្រើប្រាស់ថ្នាំសម្លាប់សត្វល្អិតឱ្យត្រឹមត្រូវ ស្របតាមស្តង់ដាបច្ចេកទេស ដែលអាចកម្ចាត់សមាសភាពចង្រៃជូនប្រជាពលរដ្ឋប្រកបដោយប្រសិទ្ធភាព និងប្រសិទ្ធផលខ្ពស់។ឯកឧត្តម ក៏បានអំពាវនាវទៅដល់ប្រជាកសិករទាំងអស់ សូមចុះពិនិត្យស្រែជាប្រចាំ ដោយសារបច្ចុប្បន្ននេះស្ថិតនៅក្នុងដំណាក់កាលនៃការផ្ទុះឡើងនូវរុយស និងដង្កូវមូរស្លឹកនៅឡើយ។ ជាក់ស្តែង បញ្ហារុយស និងដង្កូវមូរស្លឹកបានបំផ្លាញដំណាំស្រូវរបស់ប្រជាកសិករជាបន្តបន្ទាប់នៅខេត្តព្រៃវែង ជាពិសេសនៅស្រុកកំពង់ត្របែក ស្រុកព្រះស្ដេច និងស្រុកបាភ្នំជាច្រើនហិកតា។ឯកឧត្តមបន្តថា បើសិនជាប្រជាកសិករមានភាពយឺតយ៉ាវ ក្នុងការចុះពិនិត្យស្រែ និងចាត់វិធានការកម្ចាត់ឱ្យបានទាន់ពេលទេនោះ រុយស និងដង្កូវមូរស្លឹកអាចបំផ្លាញដំណាំស្រូវរបស់ប្រជាកសិករមិនខាន។ឯកឧត្តម បានបន្ថែមថា ប្រសិនបើប្រជាកសិករជួបប្រទះនឹងរុយស និងដង្កូវមូរស្លឹក កំពុង​បំផ្លាញ​ដំណាំស្រូវ ត្រូវរាយការណ៍ឬធ្វើការទាក់ទងទៅអាជ្ញាធរមូលដ្ឋានដែលនៅជិតបំផុត ឬផ្តល់ព័ត៌មាន​ទៅមន្ត្រីកសិកម្មនៅតាមឃុំ-ស្រុក-ខេត្ត ដើម្បីជួយផ្តល់ការណែនាំផ្នែកបច្ចេកទេស ឬវិធីសាស្ត្រ​នៃការ​ជ្រើសរើសថ្នាំកសិកម្មសម្រាប់បាញ់កម្ចាត់រុយស និងដង្កូវមូរដើមនោះឱ្យទាន់ពេលវេលា។សូមបញ្ជាក់ថា ក្នុងសកម្មភាពខាងលើនេះ ក៏មានការចូលរួមពីឯកឧត្តម សួន សុម៉ាលីន អភិបាល នៃគណៈអភិបាលខេត្តព្រៃវែង អភិបាលរងខេត្ត មន្ត្រីជំនាញនៃអគ្គនាយកដ្ឋានកសិកម្ម ប្រធានមន្ទីរកសិកម្មខេត្តព្រៃវែង អភិបាលស្រុក អាជ្ញាធរមូលដ្ឋាន និងមន្ត្រីកសិកម្មឃុំផងដែរ៕

គម្រោងសាងសង់ផ្លូវជាតិលេខ៧១C សម្រេចលទ្ធផល១០០%ហើយ

2024/07/14 09:21:42 pm        179
Facebook Telegram Linkin
ភ្នំពេញ៖ ក្រសួងសាធារណការ និងដឹកជញ្ជូន បានឲ្យដឹងថា ខ្សែផ្លូវផ្លូវជាតិលេខ៧១C គឺជាផ្លូវដែលមានចរាចរណ៍ដ៏រលូនមានប្រវែង ១១៤,៦២គីឡូម៉ែត្រ (ចាប់ពីផ្លូវជាតិលេខ៧ ចំណុច PK150+700 ក្នុងខេត្តត្បូងឃ្មុំ ទៅដល់ផ្លូវជាតិលេខ៧១ ចំណុច PK30+400 ខេត្តកំពង់ចាម) សម្រេចបានលទ្ធផល១០០%ហើយ។ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន តែងបានគិតគូរខ្ពស់ និងបានចង្អុលបង្ហាញឱ្យឯកឧត្តម បុង ប៊ុនហួន រដ្ឋលេខាធិការក្រសួងសាធារណការ និងដឹកជញ្ជូន និងជានាយកគម្រោងសាងសង់ផ្លូវជាតិលេខ៧១C ប្រឹងប្រែងធ្វើឱ្យកាន់ប្រសើរឡើង និង​បំពេញ​ចន្លោះខ្វះខាតដែលនៅសេសសល់តិចតួច ដើម្បីឈានទៅដល់ការសម្រេចលទ្ធផលជារួម និងត្រៀមសម្ពោធដាក់ឱ្យដំណើរការជាផ្លូវការនាពេលបន្ទាប់។ផ្លូវជាតិលេខ71C ត្រូវបានសាងសង់ដោយក្រុមហ៊ុនសាងសង់សៀងហៃគ្រុប( SCG) និងទីប្រឹក្សា​បច្ចេកទេស​ដោយក្រុមហ៊ុន ក្វាងចូវ វ៉ាងអាន ប្រើប្រាស់ហិរញ្ញប្បទានថវិកាពីសាធារណរដ្ឋ​ប្រជាមានិតចិន។ ផ្លូវជាតិដ៏សំខាន់នេះ ជាប្រភេទ AC/DBST ចុះកិច្ចសន្យាសាងសង់ នៅថ្ងៃទី២០ ខែឧសភា ឆ្នាំ២០២០, ចាប់ផ្តើមសាងសង់នៅថ្ងៃទី០២ ខែមេសា ឆ្នាំ២០២១ និង​កាលបរិច្ឆេទ​បញ្ចប់ការសាងសង់ ត្រឹមថ្ងៃទី០២ ខែតុលា ឆ្នាំ២០២៤ ដែលមានរយៈពេលសាងសង់៤២ខែ និងរយៈពេលថែទាំ(ក្នុងកិច្ចសន្យា) ២៤ខែ។គួរបញ្ជាក់ថា ក្រុមការងារបានបន្តប្រឹងប្រែងតាមដានយ៉ាងយកចិត្តទុក​ដាក់លើដំណើរ​បញ្ចប់ការគូសសំនូសចរាចរណ៍លើដងផ្លូវ ការងារបំពាក់ផ្លាកសញ្ញាចរាចរណ៍ ការងារដាំបង្គោលគីឡូម៉ែត្រ និងកិច្ចការដាំស្មៅការពារការហូរច្រោះជើងទេរផ្លូវ៕

បណ្ដាមេដឹកនាំពិភពលោក ភ្ញាក់ផ្អើលខ្លាំងចំពោះការប៉ុនប៉ងលួចធ្វើឃាតលើលោក Donald Trump

2024/07/14 08:56:16 pm        175
Facebook Telegram Linkin
ដំណឹងនៃការបាញ់ប្រហារប៉ុនប៉ងធ្វើឃាតក្នុងអំឡុងពេលការជួបជុំយុទ្ធនាការបោះឆ្នោតរបស់អតីតប្រធានាធិបតីអាមេរិក លោក ដូណាល់ ត្រាំ (Donald Trump) នៅរដ្ឋ ផិនស៊ីលវេនៀ (Pennsylvania) កាលពីល្ងាចថ្ងៃសៅរ៍ (១៣ កក្កដា) បានធ្វើឱ្យបណ្ដាមេដឹកនាំទូទាំងទ្វីបអាមេរិក អឺរ៉ុប និងអាស៊ី ភ្ញាក់ផ្អើលយ៉ាងខ្លាំងចំពោះអ្វីដែលទំនងជានឹងផ្លាស់ប្តូរទិដ្ឋភាពនយោបាយរបស់សហរដ្ឋអាមេរិក។ប្រតិកម្មទាំងនោះមានលាយឡំនៃភាពរន្ធត់ ភ្ញាក់ផ្អើល ព្រមទាំងភាពងឿងឆ្ងល់អំពីស្ថានភាពប្រជាធិបតេយ្យរបស់សហរដ្ឋអាមេរិក ហើយមេដឹកនាំពិភពលោក ដែលជាសម្ព័ន្ធមិត្តរបស់លោក Trump និងអ្នករិះគន់ បានថ្កោលទោសយ៉ាងក្តៅគគុកចំពោះការវាយប្រហារនេះ។នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) បាននិយាយនៅលើបណ្ដាញសង្គម X ថា «យើងភ្ញាក់ផ្អើលយ៉ាងខ្លាំងចំពោះការវាយប្រហារលើលោក Trump។ យើងបួងសួងសុំឱ្យលោកមានសុវត្ថិភាព និងឆាប់ជាសះស្បើយ»។ នាយករដ្ឋមន្រ្តីអង់គ្លេសដែលទើបជាប់ឆ្នោតថ្មី លោក គា ស្តាមើ (Kier Starmer) បានសរសេរថា «ខ្ញុំរន្ធត់ចិត្តចំពោះហេតុការណ៍ដែលកើតលើលោក Trump ហើយយើងសូមជូនពរលោក និងក្រុមគ្រួសារឱ្យរួចផុតពីពេលវេលាដ៏លំបាកនេះ»។នាយករដ្ឋមន្ត្រីជប៉ុន លោក ហ្វ៊ូមីអូ គីស៊ីដា (Fumio Kishida) បាននិយាយថា «យើងត្រូវតែឈរយ៉ាងម៉ឺងម៉ាត់ប្រឆាំងនឹងគ្រប់ទម្រង់នៃអំពើហិង្សាលើលទ្ធិប្រជាធិបតេយ្យ»។ នៅក្នុងប្រទេសចិនវិញ ការអត្ថាធិប្បាយដ៏ក្ដៅគគុកនៅលើការបង្ហោះរបស់សារព័ត៌មាន People's Daily ដែលគ្រប់គ្រងដោយរដ្ឋបានប្រើឃ្លាថា «អាមេរិកមានសេរីភាព ហើយរៀងរាល់ថ្ងៃគឺជាការបាញ់ប្រហារ»។ជាមួយគ្នានេះ ក្រុមអ្នករិះគន់លោក Trump ក៏បានថ្កោលទោសការវាយប្រហារនេះដែរ។ មេដឹកនាំជាច្រើនផ្សេងទៀត រួមទាំងមេដឹកនាំនៃប្រទេសហុងគ្រី កាណាដា អាហ្សង់ទីន អែលសាល់វ៉ាឌ័រ ហូឡង់ អ៊ីតាលី បារាំង វេណេហ្ស៊ុយអេឡា ប្រេស៊ីល និងអ្នកផ្សេងទៀតទូទាំងពិភពលោកក៏បានថ្កោលទោសការវាយប្រហារនេះ និងបង្ហាញពីសាមគ្គីភាព រួមទាំងការជូនពរដល់លោក Trump ឱ្យឆាប់ជាសះស្បើយ៕

[BREAKING NEWS | Update] ខ្មាន់កាំភ្លើងដែលបាញ់លោក Trump ត្រូវបានកំណត់អត្តសញ្ញាណថា ឈ្មោះ Thomas Matthew Crooks វ័យ ២០ ឆ្នាំ

2024/07/14 08:11:31 pm        321
Facebook Telegram Linkin
សារព័ត៌មាន New York Post បានរាយការណ៍ដោយដកស្រង់ពីប្រភពថា ខ្មាន់កាំភ្លើងដែលប៉ុនប៉ងធ្វើឃាតអតីតប្រធានាធិបតីអាមេរិក លោក ដូណាល់ ត្រាំ (Donald Trump) ក្នុងយុទ្ធនាការបោះឆ្នោតមួយនៅរដ្ឋ ផិនស៊ីលវេនៀ (Pennsylvania) កាលពីល្ងាចថ្ងៃសៅរ៍ (១៣ កក្កដា) ត្រូវបានគេស្គាល់ថាឈ្មោះ ថូម៉ាស ម៉ាធូ ឃ្រុកស៍ (Thomas Matthew Crooks) ភេទប្រុស វ័យ ២០ ឆ្នាំនៅភូមិមួយឈ្មោះ បេថល ផាក (Bethel Park) រដ្ឋដដែលនេះ ដែលជាភូមិចម្ងាយប្រហែល ៦៤ គីឡូម៉ែត្រនៅភាគខាងត្បូងពីព្រឹត្តិការណ៍ជួបជុំនៅក្រុង បាត់ល័រ (Butler) នេះ។។ បុរសនោះត្រូវបានសម្លាប់ដោយ កងអង្គរក្សសម្ងាត់ ហើយក្រោយមកកាំភ្លើងវែងប្រភេទ AR ត្រូវបានរកឃើញ។យោងតាមសារព័ត៌មាន Washington Post បានឱ្យដឹងថា ហេតុផលនៃការវាយប្រហារដែលបានធ្វើឱ្យលោក Trump រងរបួស សម្លាប់អ្នកចូលរួមម្នាក់ និងពីរនាក់ទៀតរបួសយ៉ាងធ្ងន់ធ្ងរនេះ នៅមិនទាន់ច្បាស់នៅឡើយទេ។ New York Post បានរាយការណ៍ដោយដកស្រង់ប្រភពថា លោក Crooks បានលាក់ខ្លួននៅលើដំបូលរោងចក្រមួយកន្លែង ដែលមានចម្ងាយជាង ១១៨ ម៉ែត្រពីវេទិកាជួបជុំនោះ។ភ្នាក់ងារពិសេស FBI ទទួលបន្ទុកលើហេតុការណ៍នេះលោក ខេវិន ស៉ូជេក (Kevin Rojek) បាននិយាយថា វាពិតជាគួរឱ្យភ្ញាក់ផ្អើលណាស់ដែលខ្មាន់កាំភ្លើងអាចបាញ់បានជាច្រើនគ្រាប់។ ក្រុមមន្ត្រីគណបក្សសាធារណរដ្ឋ បាននិយាយនៅក្នុងសេចក្តីថ្លែងការណ៍មួយភ្លាមៗបន្ទាប់ពីឧប្បត្តិហេតុនោះថា លោក Trump មិនមានគ្រោះថ្នាក់ធ្ងន់ធ្ងរនោះទេ។លោក Trump ត្រូវបានគេបាញ់ចំត្រចៀកនៅឯការជួបជុំយុទ្ធនាការបោះឆ្នោតនៅពេលលោកកំពុងនិយាយទៅកាន់អ្នកគាំទ្ររាប់ពាន់នាក់នៅក្នុងទីក្រុង Butler រយៈពេលពីរថ្ងៃប៉ុណ្ណោះមុនពេលសន្និបាតជាតិរបស់គណបក្សសាធារណរដ្ឋ ត្រូវបានធ្វើឡើងដើម្បីតែងតាំងលោកជាបេក្ខជនប្រធានាធិបតីរបស់គណបក្ស៕

ប្រធានរដ្ឋវៀតណាមថ្លែងបាឋកថា នៅសាកលវិទ្យាល័យភូមិន្ទភ្នំពេញ មុនបញ្ចប់ដំណើរទស្សនកិច្ចនៅកម្ពុជា

2024/07/14 07:00:08 pm        155
Facebook Telegram Linkin
ឯកឧត្តម តូ ឡឹម ប្រធានរដ្ឋនៃសាធារណរដ្ឋសង្គមនិយមវៀតណាម បានចូលថ្លែងបាឋកថា នៅសាកលវិទ្យាល័យភូមិន្ទភ្នំពេញ មុននឹងបញ្ចប់ដំណើរទស្សនកិច្ចនៅកម្ពុជា នាល្ងាចថ្ងៃទី ១៣ ខែកក្កដា ឆ្នាំ ២០២៤ ដោយមាននិស្សិត សាស្រ្តាចារ្យ បញ្ញវន្ត និងមន្រ្តីរាជការជាច្រើនចូលរួម។ នៅក្នុងបាឋកថារបស់ឯកឧត្តម តូ ឡឹម ប្រធានរដ្ឋនៃសាធារណរដ្ឋសង្គមនិយមវៀតណាម បានអបអរសាទរចំពោះវឌ្ឍនភាពសំខាន់ៗ នៃវិស័យអប់រំនៅកម្ពុជាក្រោមការដឹកនាំប្រកប​ ដោយភាពឈ្លាសវៃរបស់រាជរដ្ឋាភិបាលកម្ពុជា។ ជាមួយគ្នានោះ ឯកឧត្តមប្រធានរដ្ឋវៀតណាមក៏បានលើកឡើងនូវកិច្ចសហប្រតិបត្តិការល្អក្នុងវិស័យអប់រំរវាង​ប្រទេសទាំងពីរ ដែលអនុញ្ញាតនិស្សិតវៀតណាម និង​និស្សិតខ្មែរអាចផ្លាស់ប្ដូរការសិក្សា​លើមុខវិជ្ជាផ្សេងៗ​ជាច្រើនរៀងរាល់ឆ្នាំ។ឯកឧត្តម បានថ្លែងអំណរគុណចំពោះការទទួលនិស្សិតវៀតណាមមកសិក្សានៅកម្ពុជា ហើយ​ក៏ស្វាគមន៍និស្សិតកម្ពុជាទៅសិក្សានៅប្រទេសវៀតណាមវិញដូចគ្នា។ ក្នុងឱកាសនោះ ឯកឧត្តម ក៏បានលើកទឹកចិត្តដល់និស្សិតដែលកំពុងសិក្សាត្រូវពង្រឹងការស្វាធ្យាយរៀនសូត្រដើម្បីក្លាយជាបញ្ញវន្តល្អរួមចំណែកក្នុងការកសាងជាតិ។ ឯកឧត្តម ជេត ជាលី សាកលវិទ្យាធិការ នៃសាកលវិទ្យាល័យភូមិន្ទភ្នំពេញ បានលើកឡើង​ទាក់ទងនឹងដំណើរ​ទស្សនកិច្ចរបស់ប្រធានរដ្ឋវៀតណាម ដែលបានចាប់អារម្មណ៍ចូលមកថ្លែង​បាឋកថានាពេលនេះថា ជាកាយវិការមួយដ៏ល្អបង្ហាញពីការឱ្យតម្លៃលើវិស័យអប់រំ និងការយកចិត្តទុកដាក់ចំពោះយុវជន ក្នុងមានជាអ្នកនយោបាយជាន់ខ្ពស់របស់វៀតណាម។ ឯកឧត្តមសាកលវិទ្យាធិការ បានលើកឡើងទៀតថា សាកលវិទ្យាល័យភូមិន្ទភ្នំពេញ មានកិច្ចសហប្រតិបត្តិការជាមួយស្ថាប័នអប់រំនៃសាធារណរដ្ឋសង្គមនិយមវៀតណាមមានដូចជា៖ សាកលវិទ្យាជាតិហាណូយ, សាកលវិទ្យាល័យជាតិហូជីមិញ, សាកលវិទ្យាល័យសង្គមសាស្រ្ត-មនុស្សសាស្រ្ត ហូជីមិញ, សាកលវិទ្យាល័យកៀនយ៉ាង, សាកលវិទ្យាល័យ Cantho ជាដើម។ សូមជម្រាបជូនថា សាកលវិទ្យាល័យភូមិន្ទភ្នំពេញ គឺជាគ្រឹះស្ថានឧត្តមសិក្សារដ្ឋ ដែលត្រូវបាន​ទទួលស្គាល់ដោយសហគមន៍ជាតិ និងអន្តរជាតិថា ជាទីបណ្ដុះបណ្ដាលបញ្ញវត្តរបស់ជាតិឈាន​មុខគេនៅកម្ពុជា។ ម្យ៉ាងវិញទៀត​ សាកលវិទ្យាល័យភូមិន្ទភ្នំពេញ ជាសាកលវិទ្យាល័យជាតិ​តែមួយគត់ដែល់មាននិស្សិតបរទេសច្រើនជាងគេ៕ អត្ថបទ៖ កញ្ញា ចេន សុភានាថ

នាយឧត្តមសេនីយ៍ ទៀ សីហា៖ អ្នកបាត់ខ្លួនក្នុងឧបទ្ទវហេតុធ្លាក់ឧទ្ធម្ភាគចក្រ នៅខេត្តពោធិ៍សាត់ មានតែពីរនាក់ប៉ុណ្ណោះ

2024/07/14 06:42:15 pm        351
Facebook Telegram Linkin
នាយឧត្តមសេនីយ៍ ទៀ សីហា ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិកម្ពុជា បានបញ្ជាក់ថា ជនរងគ្រោះដែលបានបាត់ខ្លួនដោយសារឧបទ្ទវហេតុធ្លាក់ឧទ្ធម្ភាគចក្រ នៅតំបន់ភ្នំជួរក្រវាញ រវាងខេត្តខេត្តពោធិ៍សាត់ និងខេត្តកោះកុងនោះ មានតែពីរនាក់ប៉ុណ្ណោះ គឺអ្នកបើកបរម្នាក់ និងជំនួយការបើកបរម្នាក់ ពុំមែន៧នាក់ដូចការផ្សព្វផ្សាយរបស់សារព័ត៌មួយចំនួន ដែលផ្សាយខុសពីការពិតនោះទេ។ថ្លែងនៅក្នុងឱកាសអញ្ជើញជាអធិបតីប្រារព្ធពិធីអបអរសាទរខួបលើកទី៣១ឆ្នាំ នៃការបង្កើតកង រាជអាវុធហត្ថ នាថ្ងៃទី១៤ ខែកក្កដា ឆ្នាំ២០២៤នេះ នាយឧត្តមសេនីយ៍ ទៀ សីហា បានបញ្ជាក់ថា ករណីធ្លាក់ឧទ្ធម្ភាគចក្រ គឺកើតចេញពីអាកាសធាតុមិនអំណោយផល ខណៈការធ្លាក់នេះ គឺកំពុងធ្វើការហ្វឹកហាត់ពីរាជធានីភ្នំពេញ ទៅកាន់ថ្មដា ខេត្តពោធិ៍សាត់ កាលពីព្រឹកថ្ងៃទី១២ ខែកក្កដា ឆ្នាំ២០២៤កន្លងទៅនេះ។នាយឧត្តមសេនីយ៍ ទៀ សីហា បានបញ្ជាក់ថា ឧទ្ធម្ភាគចក្ររបស់ក្រសួងការពារជាតិគឺតែងតែ ចេញហោះហើរជារៀងរាល់ថ្ងៃ ដើម្បីធ្វើការហ្វឹកហ្វឺន ហើយក៏ដើម្បីពិនិត្យមើលបច្ចេកទេស ឬឧបករណ៍ជា ដើម ដោយការហ្វឹកហ្វឺននេះពេលខ្លះគឺមានរយៈពេលឆ្ងាយ និងរយៈពេលជិត។ ឧទ្ធម្ភាគចក្រដែលបាន បាត់ចេញពីរាដានេះ គឺមានទិសដៅហ្វឹកហ្វឺនពីភ្នំពេញទៅថ្មដា ពីថ្មដាទៅ​ពោធិ៍សាត់ហើយ នឹងត្រូវបកមក ភ្នំពេញវិញ តែយ៉ាងណាក៏ដោយ​ឯកឧត្តម​មិនទាន់ហ៊ាន​សណ្ឋានថា យ៉ាងណាទេរហូតមកដល់ថ្ងៃនេះ ខណៈក្រុមការងារកំពុងរុករកនោះ។ឯកឧត្តមនាយឧត្តមសេនីយ៍ បានបញ្ជាក់បន្ថែមទៀតថា «ការបាត់ខ្លួនគឺមានអ្នកជំនាញភីឡត់ (អ្នកបើកបរ)ម្នាក់ និងជំនួយការម្នាក់ កំពុងបើកបរទៅតាមទិសដៅដែល​បញ្ជាការដ្ឋាន​ទ័ពអាកាសបានកំណត់ ហើយជាអកុសលយើងឃើញថា នាថ្ងៃនោះអាកាសធាតុមិនអំណោយផល ហើយបានផ្តាច់ការទាក់ ទងគ្នារហូតដល់ថ្ងៃនេះគឺមានរយៈពេលពីរថ្ងៃ ហើយក្រុមជំនាញ​ក៏បានចេញប្រតិបត្តិការរុករកផងដែរ»។ទាក់ទងនឹងករណីធ្លាក់ឧទ្ធម្ភាគចក្រនេះដែរ នាយឧត្តមសេនីយ៍ ទៀ សីហា ក៏បានផ្តាំទៅប្រព័ន្ធ ផ្សព្វផ្សាយ​មួយចំនួន​ បើពុំទាន់​ដឹងព័ត៌មានច្បាស់ទាក់ទង​នឹងការធ្លាក់ឧទ្ធម្ភាគចក្រទេ គឺសូម​កុំចុះផ្សាយ ខុសពីការពិត ខណៈករណីនេះគឺជាបញ្ហាសន្តិសុខជាតិ ដោយកុំចុះផ្សាយ​លើសពីការពិត​ដោយសារព័ត៌មានខ្លះចុះថា រកឃើញជនរងគ្រោះរហូតដល់៧នាក់ ខ្លះចុះផ្សាយថា រកឃើញហើយអ្វីជាដើមនោះ។នាយឧត្តមសេនីយ៍ ទៀ សីហា បានបញ្ជាក់ថា«ករណីធ្លាក់ឧទ្ធម្ភាគចក្រនេះគប្បី​ចាំស្តាប់រាជរដ្ឋាភិ បាល ឬក្រសួងការពារជាតិ នឹងមានការជូនដំណឹង​ជាបន្តបន្ទាប់ ហើយបញ្ហានេះ ក៏គ្មានអ្វីដែល​ត្រូវ​លួចលាក់​នោះទេ វាជាព័ត៌មានទូទៅ ករណីនេះ ប្រទេសណាក៏ធ្លាប់មាន​បទពិសោធន៍ធ្លាក់​ឧទ្ធម្ភាគចក្រ នេះដែរ ខណៈគេមានឧទ្ធម្ភាគចក្រនេះទំនើបជាងយើង (កម្ពុជា) ឆ្ងាយណាស់ ហើយ​នៅតែមានឧបទ្ទវហេតុធ្លាក់ឧទ្ធម្ភាគចក្រនេះដែរ»។សូមបញ្ជាក់ថា ឧទ្ធម្ភាគចក្រមួយគ្រឿងប្រភេទZ-9 បានបាត់​ចេញពីរាដា( ធ្លាក់) នៅតំបន់​ភ្នំជួរក្រវាញ​រវាងព្រំប្រទល់ខេត្តពោធិ៍សាត់ និងខេត្តកោះកុង កាលពីព្រឹកថ្ងៃទី១២ ​ខែកក្កដា ឆ្នាំ២០២៤កន្លងទៅនេះ ខណៈកំពុងធ្វើការហ្វឹកហ្វឺន (រៀនបើកបរ)។បើតាមការលើកឡើងរបស់​នាយឧត្តមសេនីយ៍ ទៀ សីហា​ បានបញ្ជាក់ថា ​ការធ្លាក់នេះ​គឺកើតចេញ​ពី​អាកាសធាតុមិនអំណោយផល។ រហូតដល់ថ្ងៃទី១៤ ខែកក្កដា​ ឆ្នាំ២០២៤នេះ ក្រុមប្រតិបត្តិការរុករក​ពុំទាន់ឃើញពន្លឺណាមួយកំណត់គោលដៅរកឃើញកន្លែងឧបទ្ទវហេតុនៅឡើយនោះទេ ខណៈក្រុមប្រតិបត្តិការ​ បានកំពុងដាក់គោលដៅកំណត់យ៉ាងសកម្មបំផុតក្នុងការរុករក ដោយ​ថ្ងៃទី១៤ ខែកក្កដានេះ បានដាក់ផែនការ ៥០គីឡូម៉ែត្រ៤ជ្រុង ក្នុងការរុករកនោះ៕អត្ថបទ បាន ចក់ 

ឯកឧត្តម ស៊ុន ចាន់ថុល បន្តចុះពិនិត្យវឌ្ឍនភាពការងារ រៀបចំទីតាំងត្រៀមប្រារព្ធពិធីបើកការដ្ឋានគម្រោងព្រែកជីកហ្វូណនតេជោ

2024/07/14 06:01:39 pm        307
Facebook Telegram Linkin
កណ្ដាល៖ នាព្រឹកថ្ងៃអាទិត្យ ទី១៤ ខែកក្កដា ឆ្នាំ២០២៤ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា អមដំណើរដោយ ឯកឧត្តម លោកជំទាវ មន្ត្រីជំនាញមកពីក្រសួង-ស្ថាប័ន និងតំណាងរដ្ឋបាលរាជធានី-ខេត្តពាក់ព័ន្ធជាច្រើនរូប បានអញ្ជើញចុះពិនិត្យវឌ្ឍនភាពការងាររៀបចំទីតាំងត្រៀមប្រារព្ធពិធីបើកការដ្ឋានគម្រោងព្រែកជីកហ្វូណនតេជោ ដែលស្ថិតនៅភូមិព្រែកតាកែវ ឃុំសំរោងធំ ស្រុកកៀនស្វាយ ខេត្តកណ្តាល គ្រោងនឹងប្រព្រឹត្តទៅ នាថ្ងៃទី៥ ខែសីហា ឆ្នាំ២០២៤ខាងមុខ ក្រោមអធិបតីភាពដ៏ខ្ពង់ខ្ពស់របស់សម្តេចមហាបវរធិបតីនាយករដ្ឋមន្ត្រី។

បណ្ដាញសង្គម

ព័ត៌មានថ្មីៗ

កាតាបញ្ជាក់​ថា អាមេរិក និង​អ៊ីរ៉ង់ ផ្ដល់​ការ​ឆ្លើយ​តប​វិជ្ជមាន​ ចំពោះកិច្ចប្រឹងប្រែង​សម្រប​សម្រួល​
11/10/2026 07:11 PM
Facebook Telegram Linkin
ប៉ាគីស្ថានបង្កើនវិធានការបង្ក្រាបការបំភាយឧស្ម័នពុលរបស់រថយន្ត ខណៈផ្សែងអ័ព្ទកាន់តែធ្ងន់ធ្ងរនៅទីក្រុង Lahore
11/10/2026 07:11 PM
Facebook Telegram Linkin
ប៉ាគីស្ថាន៖ ការដុត​កាំជ្រួចភ្ញី ក្នុងពិធីបុណ្យ Diwali របស់ឥណ្ឌា បង្ក​ឱ្យមាន​​ខ្យល់ពុល នៅ​ទី​ក្រុង Lahore
11/10/2026 07:11 PM
Facebook Telegram Linkin
សិស្សានុសិស្ស នៅបារាំង បិទសាលារៀនរាប់សិបកន្លែង ដើម្បី​បន្ត​ដាក់សម្ពាធ​រដ្ឋាភិបាល​​
11/10/2026 07:11 PM
Facebook Telegram Linkin
ផ្លូវជនបទកំពុងផ្តល់ក្តីសង្ឃឹមដល់ប្រជាពលរដ្ឋ តាមរយៈការជំរុញដំណើរអន្តរកម្មផ្នែកសេដ្ឋកិច្ច
11/10/2026 07:11 PM
Facebook Telegram Linkin
ការវាយប្រហាររុស្ស៊ីលើទីក្រុង Odesa របស់អ៊ុយក្រែន សម្លាប់មនុស្ស ៣នាក់ និងមនុស្សម្នាក់រងរបួស
11/10/2026 06:11 PM
Facebook Telegram Linkin
ម៉ិកស៊ិកចាប់ខ្លួនមេខ្លោងគ្រឿងញៀន ក្នុងប្រតិបត្តិការដោយមានជំនួយពីចារកម្មអាមេរិក
11/10/2026 06:11 PM
Facebook Telegram Linkin
រដ្ឋមន្រ្តីការបរទេសបារាំងជួបសមភាគីមកពីអ៊ីតាលី កូរ៉េខាងត្បូង ប្រេស៊ីល និងអារ៉ាប៊ីសាអ៊ូឌីត
11/10/2026 06:11 PM
Facebook Telegram Linkin
នាយករដ្ឋមន្ត្រី៖ ហុងគ្រីឃាត់ខ្លួនប្អូនប្រុសរបស់លោក Viktor Orban ពាក់ព័ន្ធ​សំណុំរឿងជួញដូរមនុស្ស
11/10/2026 06:11 PM
Facebook Telegram Linkin
កម្មករ ៣នាក់ស្លាប់ ក្នុងឧបទ្ទេហេតុក្នុងរោងចក្រផលិតគ្រឿងបង្គុំក្រុមហ៊ុន Tata Electronics ប្រទសឥណ្ឌា
11/10/2026 06:11 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.