នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
កម្ពុជាកំពុងរៀបចំសេចក្តីព្រាងលើការបោះផ្សាយលក់សញ្ញាបណ្ណហេដ្ឋារចនាសម្ព័ន្ធ
អគ្គនាយកដ្ឋានពន្ធដារ ប្រកាសដល់ម្ចាស់យានយន្តបង់ពន្ធមធ្យោបាយដឹកជញ្ជូនឆ្នាំ២០២៥
រយៈពេល៤ខែក្នុងឆ្នាំនេះ កំពង់ផែស្វយ័តភ្នំពេញ ទទួលកុងតឺន័រឆ្លងកាត់ជាង ១៥៦ ពាន់ធីអ៊ីយូ (TEUs)
អាមេរិកបង្ហាញការគាំទ្រពេញទំហឹង លើការជំរុញការវិនិយោគអាមេរិកមកកាន់កម្ពុជា

សេដ្ឋកិច្ច និង កសិកម្ម

កម្ពុជាកំពុងរៀបចំសេចក្តីព្រាងលើការបោះផ្សាយលក់សញ្ញាបណ្ណហេដ្ឋារចនាសម្ព័ន្ធ

2025/05/22 03:26:39 pm        102
Facebook Telegram Linkin
កម្ពុជាកំពុងរៀបចំសេចក្តីព្រាង ស្តីពីការបោះផ្សាយលក់សញ្ញាបណ្ណហេដ្ឋារចនាសម្ព័ន្ធ ដោយ​សេចក្តី​ព្រាង​ប្រកាស​នេះកំណត់ អំពីលក្ខខណ្ឌ នីតិវិធីនៃការបោះផ្សាយ និងកាតព្វកិច្ចក្រោយ​ការ​បោះផ្សាយ​លក់​សញ្ញាបណ្ណ​ហេដ្ឋារចនាសម្ព័ន្ធ ក្នុងគោលបំណងអភិវឌ្ឍ វិស័យហេដ្ឋារចនាសម្ព័ន្ធ​សាធារណៈ​។ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និង​ហិរញ្ញ​វត្ថុ និងជាប្រធានក្រុមប្រឹក្សាអាជ្ញាធរសេវាហិរញ្ញវត្ថុមិនមែនធនាគារ (អ.ស.ហ.) នៅថ្ងៃ​ទី​២១ ខែឧសភា ឆ្នាំ២០២៥ នេះ បានដឹកនាំកិច្ចប្រជុំក្រុមប្រឹក្សា អាជ្ញាធរ​សេវា​ហិរញ្ញ​វត្ថុ​មិន​មែន​ធនាគារលើ​ក​ទី២៤ អាណត្តិទី១ ដើម្បីពិនិត្យ និងពិភាក្សាលើរបៀបវារៈសំខាន់ៗមួយចំនួន ក្នុ​ង​នោះក្រុមប្រឹក្សា (អ.ស.ហ.) បានលើកឡើងពីសេចក្តីព្រាង “ប្រកាសស្តីពី​ការ​បោះផ្សា​យ​លក់​សញ្ញា​បណ្ណ​ហេដ្ឋារចនាសម្ព័ន្ធ”និងសេចក្តី ព្រាងគោលការណ៍ណែនាំ ស្តីពី “ទ្រព្យសកម្ម​មាន​លក្ខណ​សម្បត្តិគ្រប់គ្រាន់ដែលត្រូវបានប្រើប្រាស់ សម្រាប់ការបោះផ្សាយលក់សញ្ញា បណ្ណ​ហេដ្ឋា​រចនា​សម្ព័ន្ធ” របស់និយ័តករមូលបត្រកម្ពុជា។សេចក្តីព្រាងប្រកាសនេះបានកំណត់អំពីលក្ខខណ្ឌ នីតិវិធីនៃការបោះផ្សាយ និងកាតព្វ​កិច្ច​ក្រោយ​ការ​បោះផ្សាយ​លក់សញ្ញា បណ្ណហេដ្ឋារចនាសម្ព័ន្ធ ប្រកបដោយប្រសិទ្ធភាព ស័ក្តិសិទ្ធភាព គណ​នេយ្យ​ភាព និងតម្លាភាព ក្នុងគោលបំណងអភិវឌ្ឍវិស័យហេដ្ឋា- រចនាសម្ព័ន្ធសាធារណៈ និងការ​ស្វែង​រក​ប្រភពទុនរយៈពេលវែង ស្របតាមយុទ្ធសាស្រ្តបញ្ចកោណដំណាក់កាលទី១ របស់​រាជ​រដ្ឋាភិ​បាលកម្ពុជា។ ប្រកាសនេះមាន៧ជំពូក និង២៥ប្រការ ដោយមាន​វិសាលភាព​អនុវត្ត​ចំពោះ​ការបោះ​ផ្សាយ​លក់សញ្ញាបណ្ណហេដ្ឋារចនា សម្ព័ន្ធជាសាធារណៈ ការលក់សញ្ញា​បណ្ណ​ហេដ្ឋា​រចនា​សម្ព័ន្ធ​ជា​ឯកជន និងការលក់សញ្ញាបណ្ណហេដ្ឋារចនាសម្ព័ន្ធ សម្រាប់វិនិយោគិន គុណវុឌ្ឍិ ព្រម​ទាំង​បុគ្គលពាក់ព័ន្ធនឹងប្រតិបត្តិការនេះនៅក្នុងព្រះរាជាណាចក្រកម្ពុជា។ បន្ថែមពីនេះ, សេចក្តីព្រាង ”គោលការណ៍ណែនាំ ស្តីពី​ទ្រព្យ​សកម្ម​មាន​លក្ខណៈ​សម្បត្តិ​គ្រប់​គ្រាន់​ដែល​ត្រូវ​បានប្រើប្រាស់ សម្រាប់ការបោះផ្សាយលក់សញ្ញាបណ្ណហេដ្ឋារចនាសម្ព័ន្ធ” ត្រូវបាន​រៀបចំ​ឡើង​ដើម្បី​សម្រួលនិងពន្យល់បន្ថែម ពីការអនុវត្តចំពោះ ប្រភេទទ្រព្យសកម្ម ដែលមាន​លក្ខណៈ​សម្បត្តិ​គ្រប់​គ្រាន់ សម្រាប់ការបោះផ្សាយលក់សញ្ញាបណ្ណហេដ្ឋារចនាសម្ព័ន្ធ។ ជាលទ្ធផល, ក្រុម​ប្រឹក្សា អ.ស.ហ. បានពិនិត្យ និងអនុម័តជាគោលការណ៍លើសេចក្តីព្រាងប្រកាស និងសេចក្តី​ព្រាង​គោល​ការណ៍ណែនាំ ជាមួយ នឹងការណែនាំ ឱ្យមានការកែ​សម្រួល​បន្ថែ​ម​តាម​ស្មារ​តី​អង្គ​ប្រជុំ​បាន​លើក​ឡើងនិងសម្រេច មុននឹងដាក់ឆ្លងនីតិវិធីបន្ទាប់។សូមបញ្ជាក់ថា ក្រៅពីរបៀបវារៈខាងលើ, ក្រុមប្រឹក្សាអាជ្ញាធរសេវាហិរញ្ញវត្ថុមិនមែនធនាគារ បាន​លើក​ឡើង​នូវវារៈចំនួនមកពិភាក្សា រួមមាន៖ សេចក្តីព្រាង “ប្រកាសស្តីពី​លក្ខ​ខណ្ឌ​ និង​នីតិ​វិធី​នៃ​ការបន្ត ការផ្អាក និងការបញ្ចប់កិច្ចសន្យាធានារ៉ាប់រង” របស់និយ័តករ ធានារ៉ាប់រងកម្ពុជា សេចក្តី​ព្រាង​ប្រកាសនេះកំណត់អំពីលក្ខខណ្ឌ និងនីតិវិធីនៃការបន្ត ការផ្អាក និងការ​បញ្ចប់​កិច្ច​សន្យា​ធានា​រ៉ាប់រង ដើម្បីធានានូវប្រសិទ្ធភាព សុចរិតភាព និងភាពស្មោះត្រង់ ក្នុងការអនុវត្ត​កិច្ច​សន្យា​ធានា​រ៉ាប់​រងរវាងក្រុមហ៊ុនធានារ៉ាប់រង និងម្ចាស់ បណ្ណសន្យារ៉ាប់រង ឬអ្នកត្រូវបាន​ធានា​រ៉ាប់​រង​ស្រប​តាម​មាត្រា២៤ មាត្រា២៥ និងមាត្រា២៦ នៃអនុក្រឹត្យស្តីពីការធានារ៉ាប់រង។ សេចក្តី ព្រាង “អនុ​ក្រឹត្យស្តីពីការធានារ៉ាប់រងភារៈទទូលខុសត្រូវយានយន្តជាកាតព្វកិច្ច”សេចក្តីព្រាងអនុក្រឹត្យស្តីពីការធានារ៉ាប់រងភារៈទទួល ខុសត្រូវយានយន្តជាកាតព្វកិច្ច កំណត់ពីវិធាន នីតិវិធី និងនិយាម នៃ​ការ​អនុវត្ត​ការធានារ៉ាប់រង ភារៈទទួលខុសត្រូវយានយន្ត ជាកាតព្វកិច្ច, ការរៀបចំម​ជ្ឈ​មណ្ឌល​បច្ចេក​វិទ្យា​ធានា​រ៉ាប់រង និងមូលនិធិអភិវឌ្ឍវិស័យធានារ៉ាប់រង ដើម្បីធានាបាននូវការការពារ និង ការផ្តល់​សំណង​ធានា​រ៉ាប់រងជូនតតិយជនជាដើម៕ អត្ថបទ៖ សុន រ៉ាឌី

អគ្គនាយកដ្ឋានពន្ធដារ ប្រកាសដល់ម្ចាស់យានយន្តបង់ពន្ធមធ្យោបាយដឹកជញ្ជូនឆ្នាំ២០២៥

2025/05/21 03:31:53 pm        120
Facebook Telegram Linkin
អគ្គនាយកដ្ឋានពន្ធដារ ចេញសេចក្តីជូនដំណឹង ជម្រាបជូនដល់ម្ចាស់យានយន្តគ្រប់ប្រភេទ ស្តីពីការប្រមូលពន្ធលើមធ្យោបាយ ដឹកជញ្ជូនសម្រាប់ឆ្នាំ ២០២៥ ដែលនឹងត្រូវអនុវត្តចាប់ផ្តើមពីថ្ងៃទី ១ ខែ មិថុនា រហូតដល់ថ្ងៃទី ៣០ ខែ វិច្ឆិកា ឆ្នាំ២០២៥ ខាងមុខ។ជុំវិញប្រមូលពន្ធលើមធ្យោបាយដឹកជញ្ជូនសម្រាប់ឆ្នាំ២០២៥ នេះ, អគ្គនាយកដ្ឋានពន្ធដារ ជម្រាបជូនដំណឹងដល់ម្ចាស់យាន យន្ត និងសាធារណជន អំពីការប្រមូលពន្ធលើមធ្យោបាយដឹកជញ្ជូនសម្រាប់ឆ្នាំ២០២៥ ក្នុងនោះយានយន្តទាំងអស់ដែលធ្លាប់ចុះបញ្ជី ក្នុងប្រព័ន្ធគ្រប់គ្រងពន្ធមធ្យោបាយរបស់អគ្គនាយកដ្ឋានពន្ធដារកន្លងមក ទាំងមានបណ្ណសម្គាល់ការបង់ពន្ធ (កាត) និងពុំមានបណ្ណ សម្គាល់ការបង់ពន្ធត្រូវបានអនុញ្ញាតឱ្យម្ចាស់យានយន្តបង់ពន្ធនេះ ដោយពុំតម្រូវឱ្យបំពេញលិខិតប្រកាសបង់ពន្ធលើមធ្យោបាយដឹក ជញ្ជូននោះទេ ដោយគ្រាន់តែបង្ហាញ ឬភ្ជាប់មកនូវឯកសារដែលអាចបញ្ជាក់អត្តសញ្ញាណយានយន្តណាមួយដូចជា៖ បណ្ណសម្គាល់ យានយន្ត ឬបង្កាន់ដៃទទួលប្រាក់ពន្ធលើមធ្យោបាយដឹកជញ្ជូន ឬលតាបត្របង់ពន្ធឆ្នាំចាស់ សម្រាប់ឱ្យមន្ដ្រីពន្ធដារ ឬបុគ្គលិកធនាគារ ពាណិជ្ជដៃគូធ្វើការផ្ទៀងផ្ទាត់ទិន្នន័យក្នុងប្រព័ន្ធគ្រប់គ្រងពន្ធមធ្យោបាយរបស់អគ្គនាយកដ្ឋានពន្ធដារ។ ចំពោះយានយន្តថ្មី ដែលត្រូវចុះបញ្ជីលើកដំបូង ម្ចាស់យានយន្តត្រូវដាក់លិខិតប្រកាសបង់ពន្ធចំនួន ២សន្លឹក តាមទម្រង់ VT 001 របស់អគ្គនាយកដ្ឋានពន្ធដារ ដោយភ្ជាប់មកជាមួយនូវឯកសាររួមមាន៖ បណ្ណសម្គាល់យានយន្ត អត្តសញ្ញាណបណ្ណផ្ទាល់ របស់ កម្មសិទ្ធិករ និងវិញ្ញាបនបត្រត្រួតពិនិត្យលក្ខណៈបច្ចេកទេសយានយន្ត ចំពោះរថយន្តដឹកទំនិញ និងរថយន្តដឹកអ្នកដំណើរ។ ម្ចាស់យានយន្តអាចធ្វើការបង់ពន្ធនៅអគ្គនាយកដ្ឋានពន្ធដារ ឬនៅសាខាពន្ធដារខេត្ត-ខណ្ឌ ឬនៅធនាគារដៃគូដែលបានចុះ អនុស្សរណៈនៃការយោគយល់គ្នា ជាមួយក្រសួងសេដ្ឋកិច្ច និងហិរញ្ញវត្ថុ ឬអាចបង់តាមរយៈកម្មវិធី "GDT Taxpayer App" ដែលអាច ទាញយកចេញពី App Store ចំពោះ iOS ឬ Play Store ចំពោះ Android សម្រាប់យានយន្តដែលធ្លាប់បានប្រកាសបង់ពន្ធលើមធ្យោ បាយដឹកជញ្ជូនកន្លងមក។ ដោយឡែក យានយន្តដែលជាកម្មសិទ្ធិរបស់ស្ថានទូត ឬស្ថានកុងស៊ុលបរទេស អង្គការអន្តរជាតិ ឬទីភ្នាក់ ងារសហប្រតិបត្តិការបច្ចេកទេសរបស់រដ្ឋាភិបាលនានា ត្រូវស្នើសុំមកអគ្គនាយកដ្ឋានពន្ធដារ ដើម្បីទទួលបាននូវលតាបតបង់ពន្ធ (ពន្ធជាបន្ទុករបស់រដ្ឋ)។ ចំពោះយានយន្តរបស់ក្រសួង-ស្ថាប័ន ឬអង្គភាពដែលត្រូវទទួលបានលតាបតពន្ធលើមធ្យោបាយដឹកជញ្ជូន (ពន្ធជាបន្ទុករបស់រដ្ឋ ឬបង់តាមអាណត្តិបើកប្រាក់) ត្រូវភ្ជាប់មកជាមួយនូវបញ្ជីសារពើភណ្ឌយានយន្តទ្រព្យសម្បត្តិរដ្ឋ (តារាងកើន ឡើង និងថយចុះទ្រព្យ សម្បត្តិរដ្ឋប្រចាំឆ្នាំ) ដែលបានចុះបញ្ជីនៅអគ្គនាយកដ្ឋានទ្រព្យសម្បត្តិរដ្ឋ និងចំណូលមិនមែនសារពើពន្ធ នៃក្រសួងសេដ្ឋកិច្ច និងហិរញ្ញវត្ថុ។បញ្ហានេះ, ម្ចាស់យានយន្តទាំងនេះ អាចបង់ពន្ធលើមធ្យោបាយដឹកជញ្ជូនសម្រាប់ឆ្នាំ២០២៥ បានលុះត្រាតែបំពេញកាតព្វកិច្ច ពន្ធ និងអាករនាំចូលស្របតាមច្បាប់ និងបទប្បញ្ញត្តិស្តីពីគយ និងចុះបញ្ជីយានយន្តនៅក្រសួងសាធារណការ និងដឹកជញ្ជូន ឱ្យបានរួច រាល់ជាមុនសិន។ ក្នុងករណីខកខានមិនបានបង់ពន្ធទាន់ពេលវេលាកំណត់ខាងលើ ម្ចាស់យានយន្តនឹងត្រូវទទួលរងនូវពិន័យ តាមច្បាប់ ស្តីពីសារពើពន្ធជាធរមាន។ អគ្គនាយកដ្ឋានពន្ធដារ នឹងចេញលិខិតជូនដំណឹងដល់លំនៅឋានម្ចាស់យានយន្ត ឬសហការជាមួយ អាជ្ញាធរមានសមត្ថកិច្ច ជាពិសេសនគរបាលចរាចរណ៍ និងកងរាជអាវុធហត្ថ ដើម្បីចុះត្រួតពិនិត្យការអនុវត្តប្រមូលពន្ធនេះ នៅតាម ដងផ្លូវនានា បន្ទាប់ពីបិទបញ្ចប់ការប្រមូលពន្ធនៅថ្ងៃទី៣០ ខែវិច្ឆិកា ឆ្នាំ២០២៥៕ អត្ថបទ៖ សុន រ៉ាឌី

រយៈពេល៤ខែក្នុងឆ្នាំនេះ កំពង់ផែស្វយ័តភ្នំពេញ ទទួលកុងតឺន័រឆ្លងកាត់ជាង ១៥៦ ពាន់ធីអ៊ីយូ (TEUs)

2025/05/20 09:39:44 am        184
Facebook Telegram Linkin
កំពង់ផែស្វយ័តភ្នំពេញ នៅក្នុងរយៈពេល ៤ខែ ឆ្នាំ២០២៥ នេះ ទទួលបាននាវាសរុបប្រមាណ ១ ១៦៣ គ្រឿង និងមានបរិមាណ កុងតឺន័រឆ្លងកាត់ សរុបប្រមាណជាង ១៥៦ ពាន់ធីអ៊ីយូ (TEUs) កើនឡើងជិត ២៤ ភាគរយ បើធៀបរយៈដូចគ្នាឆ្នាំ ២០២៤។តាមប្រកាសព័ត៌មាន របស់កំពង់ផែស្វយ័តភ្នំពេញ បានបង្ហាញអំពីលទ្ធផលអាជីវកម្ម និង សេវា កម្ម ដែលអនុវត្តសម្រាប់ខែ មេសា ឆ្នាំ ២០២៥ (ដែលពុំទាន់ធ្វើសវនកម្ម) ក្នុងនោះកំពង់​ផែ​ស្វយ័ត​ភ្នំពេញ ទទួលបានបរិមាណនាវាសរុបប្រមាណ ២៦៦ គ្រឿង កើនឡើងជាង ១៧ ភាគ​រយ និងទទួលបានបរិមាណកុងតឺន័រជាង ៣៤ ពាន់ធីអ៊ីយូ (TEUs) ថមថយាង ៥ ភាគរយ និង​មានបរិមាណទំនិញ-ប្រេងឥន្ធនៈឆ្លងកាត់ ជិត ៤០ ម៉ឺនតោន ថយចុះប្រមាណជិត ៤ ភាគរយ បើ​ធៀបរយៈដូចគ្នាឆ្នាំ ២០២៤។ ចំណែកនៅក្នុងរយៈពេល ៤ ខែ ឆ្នាំ២០២៥ នេះវិញ, កំពង់ផែស្វយ័តភ្នំពេញ ទទួល​បាន​នាវា​សរុប​ចំនួន ១ ១៦៣ គ្រឿង កើនឡើងជិត ២៥ ភាគរយ ក្នុងនោះមានបរិមាណកុងតឺន័រឆ្លងកាត់ ១៥៦ ពាន់ធីអ៊ីយូ (TEUs) កើនឡើងជិត ២៤ ភាគរយ, បរិមាណទំនិញ-ប្រេងឥន្ធនៈឆ្លងកាត់ មាន​ចំនួនជិត ១,៧ លានតោន កើនឡើងិត ២៤ ភាគរយ, បរិមាណនាវាដឹកអ្នកដំណើរចូល ១៧១ គ្រឿង កើនជាង ១ ភាគរយ និងមានចំនួនមនុស្សឆ្លងកាត់ ១៨ ពាន់នាក់ កើន ៨ ភាគរយ បើ​ធៀបរយៈដូចគ្នាឆ្នាំ ២០២៤។សូមបញ្ជាក់ថា នៅក្នុងមហាសន្និបាតភាគហ៊ុនិកលើកទី១០ របស់កំពង់ផស្វយ័តភ្នំពេញ ថ្មីៗនេះ, ឯកឧត្តម ប៉េង ពោធិ៍នា រដ្ឋមន្ត្រី ក្រសួងសាធារណការ និងដឹកជញ្ជូន បានជំរុញ និងគាំ​ទ្រ​កំពង់​ផែ​ស្វយ័ត​ភ្នំពេញ យកចិត្តទុកដាក់បន្ថែមទៀត លើការពង្រីកចំណត ផែកុងតឺន័រ LM១៧ ជំហាន​ទី៤ ដំណាក់កាលទី១ ដែលបានបញ្ចប់រួចរាល់ និងបន្តអភិវឌ្ឍដំណាក់កាលទី២ ដែលធ្វើ​ឱ្យ​សមត្ថភាព ទទួលកុងតឺន័រ កើនឡើងរហូតដល់ ១ លាន TEUs ក្នុងមួយឆ្នាំ។ ខណៈ​ដែល​ចំណត​ផែ​រណប​ពហុបំណង LM២៦ បាននិងកំពុងប្រែក្លាយ ឱ្យទៅជាចំណត​ផែ​ទទួល​ទំនិញ​ជា​កុង​តឺន័រ​ផង​ដែរ​ ដែលមានសមត្ថភាពផ្ទុកកុងតឺន័រ ៣០ ម៉ឺន TEUs ក្នុងមួយឆ្នាំ៕ អត្ថបទ៖ សុន រ៉ាឌី

អាមេរិកបង្ហាញការគាំទ្រពេញទំហឹង លើការជំរុញការវិនិយោគអាមេរិកមកកាន់កម្ពុជា

2025/05/18 12:23:09 pm        166
Facebook Telegram Linkin
វ៉ាស៊ីនតោន៖ សមាជិកសភាសហរដ្ឋអាមេរិក បង្ហាញនូវការគាំទ្រយ៉ាងពេញទំហឹង ក្នុង​ការ​ជំរុញ​ការ​វិនិយោគ​ពីសហរដ្ឋអាមេរិកមកកាន់កម្ពុជា ជាពិសេសការបង្កើន​កិច្ច​សហប្រតិបត្តិ​ការ​រវាង​កម្ពុជា​-អាមេរិក ពាក់ព័ន្ធលើវិស័យអាទិភាពផ្សេងៗផងដែរ។ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា អម​ដោយ​លោក​ជំទាវ ចម និម្មល រដ្ឋមន្ត្រីក្រសួងពាណិជ្ជកម្ម, ឯកឧត្តម កុយ គួង ឯកអគ្គរាជទូតកម្ពុជា ប្រចាំ​សហរដ្ឋអាម៉េរិក និងប្រទេសម៉ិចស៊ិចកូ និង ឯកឧត្តមឧត្តម សេនីយ៍ឯក ផាត វិបុលសុភ័ក្រ្ត អគ្គ​នាយករង អគ្គនាយកដ្ឋាននយោបាយនិងកិច្ចការបរទេស និងជានាយក នាយកដ្ឋាន​ទាក់​ទង​អន្តរជាតិ នៃក្រសួងការពារជាតិ នៅថ្ងៃទី១៦ ខែឧសភា ឆ្នាំ២០២៥ បានជួបសម្តែងការគួរសម និង​ពិភាក្សាការងារជាមួយ លោកជំទាវ Beth Van Duyne សមាជិកសភាសហរដ្ឋអាមេរិក និង​ជា​សមាជិក​នៃ​គណៈកម្មាធិការចំនួនពីរគឺ គណៈកម្មាធិការស្តីពីរបៀប និង មធ្យោបាយ និងគណៈ​កម្មាធិការ​អាជីវកម្មធុនតូច នៃរដ្ឋសភាសហរដ្ឋអាមេរិក។ឯកឧត្តមឧបនាយករដ្ឋមន្ត្រី បានជម្រាបទៅលោកជំទាវ អំពីវឌ្ឍនភាព នៃ​ការ​អភិវឌ្ឍ​ថ្មី​ៗ​បន្ថែម​ទៀត ដែលរាជរដ្ឋាភិបាល កម្ពុជាសម្រេចបាន បន្ទាប់ពី​ដំណើរ​ទស្សន​កិច្ច​របស់​លោក​ជំទាវ​មក​កាន់​ប្រទេស​កម្ពុជា កាលពីខែសីហា ឆ្នាំ២០២២ កន្លងទៅ និងបាន លើកឡើងអំពី​ចំណង​មិត្តភាព និងកិច្ចសហប្រតិបត្តិការរវាងប្រទេសទាំងពីរ ដែលឆ្នាំនេះជាខួបលើកទី៧៥ ឆ្នាំ នៃ​ទំនាក់​ទំនងការទូត រវាងប្រទេសកម្ពុជានិងសហរដ្ឋអាម៉េរិក។ ជាមួយនឹងទំនាក់ទំនងដែលមានអាយុកាលជិតមួយសតវត្សរ៍ ឯកឧត្តមឧបនាយករដ្ឋមន្ត្រី ក៏​បាន​លើក​បង្ហាញអំពីការយកចិត្តទុកដាក់ខ្ពស់របស់រាជរដ្ឋាភិបាលកម្ពុជា ក្នុងការជំរុញ​ការ​វិនិយោគ​ឱ្យ​បាន​កាន់​តែច្រើន បន្ថែមទៀត ពីពីសហរដ្ឋអាម៉េរិកមកកាន់ប្រទេសកម្ពុជា។ក្នុងជំនួបនេះ, លោកជំទាវ Beth Van Duyne បង្ហាញនូវការគាំទ្រយ៉ាងពេញទំហឹង លើការ​ជំរុញ​ការ​វិនិយោគពីសហរដ្ឋ អាមេរិកមកកាន់កម្ពុជា និងបង្កើន​សកម្មភាព​ពាណិជ្ជ​កម្ម​រវាង​ប្រទេស​ទាំង​ពីរ​ឱ្យ​កាន់តែផុលផុស។ លោកជំទាវ ក៏បានលើកឡើងអំពី ការពិនិត្យលទ្ធភាព ក្នុងការ​បង្កើន​កិ​ច្ច​សហប្រតិបត្តិការ​រវាងកម្ពុជា-អាមេរិក ពាក់ព័ន្ធលើវិស័យអាទិភាពមួយចំនួនផងដែរ។ក្នុងថ្ងៃដ៏ដែលនេះដែរ, ប្រតិភូកម្ពុជា ដែលដឹកនាំដោយឯកឧត្តមឧបនាយករដ្ឋមន្ត្រី បាន​ជួប​សម្តែង​ការ​គួរសម និងពិភាក្សា ការងារជាមួយ ឯកឧត្តម Adam Smith សមាជិកសភា​សហរដ្ឋ​អាមេរិក ដែលជំនួបនាឱកាសនោះ ត្រូវបានរៀបចំឡើងដើម្បីពិភាក្សា ពិនិត្យ​លើ​ឱកាស​ពង្រឹង​កិច្ច​សហ​ប្រតិបត្តិការរវាងប្រទេសទាំងពីរ ដោយផ្តោតលើការពង្រីកសកម្មភាពពាណិជ្ជកម្ម ការ​វិនិយោគ សំដៅ បង្កើនការ វិនិយោគពីអាមេរិកចូលមកវិនិយោគក្នុងប្រទេសកម្ពុជាបន្ថែមទៀត ក៏​ដូចជាពិភាក្សាលើការងារពាក់ព័ន្ធ នឹងកិច្ចសហប្រតិ- បត្តិការ លើកិច្ច​ការការ​ពារ​ជាតិ​រវាង​ប្រទេស​ទាំង​ពីរផ​ងដែរ៕ អត្ថបទ៖ សុន រ៉ាឌី

អ្នកជំនាញ៖ កិច្ចចរចាព្រមព្រៀងពាណិជ្ជកម្មកម្ពុជា-អាមេរិក នឹងសម្រេចផលវិជ្ជាមាន​ក្នុងពេលឆាប់ៗ

2025/05/16 02:07:05 pm        152
Facebook Telegram Linkin
អ្នកជំនាញសេដ្ឋកិច្ច មើលឃើញថា ការចរចាកិច្ចព្រមព្រៀងពាណិជ្ជកម្មរវាងកម្ពុជា-អាមេរិក, កម្ពុជានឹងទទួលបានផលវិជ្ជាមាន នាពេលខាងមុខជាមិនខាន ខណៈកម្ពុជាបានបន្ធូបន្ថយពន្ធនាំចូល, ប្រទេសទាំងពីរមានកិច្ចសហប្រតិបត្តិការជាយូរលង់, អាមេរិកក៏ជា ប្រទេសធ្លាប់ផ្តល់ជំនួយដល់កម្ពុជា និងអាមេរិកខ្លួនក៏មានតម្រូវការនាំចូលដើម្បីផ្គត់ផ្គង់ និងដើម្បីកំណើនសេដ្ឋកិច្ចផងដែរ។លោកបណ្ឌិត ហុង វណ្ណៈ ជំនាញសេដ្ឋកិច្ច វិទ្យាស្ថានទំនាក់ទំនងអន្តរជាតិរាជបណ្ឌិតសភា ថ្លែងលើកឡើងក្នុងកិច្ចសម្ភាសន៍ ជាមួយ BTV ស្តីពីការចរចាកិច្ចព្រមព្រៀងពាណិជ្ជកម្មរវាងកម្ពុជា-អាមេរិក នេះថា សេដ្ឋកិច្ចកម្ពុជាយើង មួយចំណែកធំគឺពឹងផ្អែកទៅ លើការនាំចេញ ក្នុងនោះសហរដ្ឋអាមេរិកគឺជាទីផ្សារដ៏ធំមួយនៃការស្រូបយកទំនិញកម្ពុជា គឺតាំងពីប្រទេសយើងទទួលបាន GFP រហូត ត្រូវបានបញ្ចប់នៅឆ្នាំ២០២០។ បន្ទាប់ពីបញ្ចប់ GFP ការធ្វើពាណិជ្ជកម្មទ្វេភាគីរវាងកម្ពុជានិងអាមេរិក គឺរកស៊ីស្នើមុខស្មើមាត់គ្នា និងត្រូវកំណត់ពន្ធលើការពាណិជ្ជកម្មទ្វេភាគីទៅវិញទៅមក, ហើយអ្វីដែលកត់សម្គាល់ បន្ទាប់ពីបញ្ចប់ GFP ការធ្វើពាណិជ្ជកម្មរវាង ប្រទេសទាំងពីរបានឈរលើកំណើនកើនឡើងជាបន្តបន្ទាប់ រហូតមកដល់សព្វថ្ងៃ។លោកបណ្ឌិត បន្តថា ចំណែកតាមរយៈនៃការចរចាកិច្ចព្រមព្រៀងពាណិជ្ជកម្មរវាងកម្ពុជា-អាមេរិក ដែលប្រតិភូកម្ពុជា ចេញ ទៅចរចានៅសហរដ្ឋអាមេរិកដោយផ្ទាល់ជុំទី១ និងឯកភាពនៅជុំបន្តទៀតនោះ លោករំពឹងថា កម្ពុជានឹងទទួលបានផលវិជ្ជាមាន ដោយបានកើតឡើងពីកត្តាជាច្រើនដូចជា៖ កម្ពុជានិងអាមេរិកមានកិច្ចសហប្រតិបត្តិការជាយូរលង់មកហើយ, អាមេរិកក៏ជាប្រទេស ធ្លាប់ផ្តល់ជំនួយដល់កម្ពុជានាពេលកន្លងមក, កម្ពុជាបានបន្ធូបន្ថយពន្ធនាំចូលរបស់សហរដ្ឋអាមេរិក ជាពិសេសអាមេរិកក៏ជាប្រទេស ដែលមានតម្រូវការក្នុងការនាំចូល សម្រាប់ផ្គត់ផ្គង់ក្នុងស្រុក និងដើម្បីកំណើនសេដ្ឋកិច្ចផងដែរ តាមរយៈការធ្វើពាណិជ្ជកម្មជាមួយ បណ្តាប្រទេសផ្សេងៗ ក៏ដូចកម្ពុជា។ឯកឧត្តម ប៉ែន បូណា រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានអង្គភាពអ្នកនាំពាក្យរាជរដ្ឋាភិបាល លើកឡើងថា តាមរយៈនៃការចរចាកិច្ចព្រមព្រៀងពាណិជ្ជកម្មរបស់ក្រុមការងារចំពោះកិច្ចកម្ពុជា, ជាមួយសមាជិកព្រឹទ្ធសភាសហរដ្ឋអាមេរិកនៃជុំទី១នេះ គឺបានប្រព្រឹត្តទៅក្នុងបរិយាកាសល្អ ស្មោះត្រង់ ស៊ីជម្រៅ និងយោគយល់គ្នា។ ភាគីទាំងពីរក៏បានឯកភាពគ្នា នៅជុំទី២ ក្នុងដើមខែ មិថុនា ឆ្នាំ២០២៥ នៅទីក្រុងវ៉ាស៊ឹងតោនដ៏ដែល ដើម្បីឈានទៅរកកិច្ចព្រមព្រៀងនៅពេលខាងមុខ។ជុំវិញកិច្ចចរចាព្រមព្រៀងពាណិជ្ជកម្មរវាងកម្ពុជា-អាមេរិក, បើយោងតាមសេចក្តីប្រកាសព័ត៌មាន របស់អង្គភាពអ្នកនាំពាក្យរាជរដ្ឋាភិ-បាលកម្ពុជា, ក្រុមការងារចំពោះកិច្ចរបស់កម្ពុជា ដែលដឹកនាំដោយ ឯកឧត្តម ស៊ុន ចាន់ថុលឧបនាយករដ្ឋមន្ត្រី និងជាអនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា និងលោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម បានចូលរួមកិច្ចប្រជុំចរចាជុំទី១ លើកិច្ចព្រម ព្រៀងពាណិជ្ជកម្មបដិការ រវាងកម្ពុជានិងសហរដ្ឋអាមេរិក, ដែលភាគីសហរដ្ឋអាមេរិក ដឹកនាំដោយលោកជំទាវ Sarah Ellerman អនុប្រធានតំណាងពាណិជ្ជកម្មសហរដ្ឋអាមេរិក ទទួលបន្ទុកតំបន់អាស៊ីអាគ្នេយ៍ និងប៉ាស៊ីហ្វិក។កិច្ចប្រជុំចរចាជុំទី១នេះ ភាគីទាំងពីរបានផ្លាស់ប្តូរយោបល់ដោយត្រង់ទៅត្រង់មក ក្នុងបរិយាកាសយោគយល់គ្នា លើការពង្រឹងបន្ថែម នូវទំនាក់ទំនងពាណិជ្ជកម្ម និងវិនិយោគទ្វេភាគី និងបានពិភាក្សាស៊ីជម្រៅ លើអត្ថបទសេចក្តីព្រាងកិច្ចព្រមព្រៀងពាណិជ្ជកម្មបដិការ។ ភាគីទាំងពីរបានឯកភាពគ្នា រៀបចំកិច្ចប្រជុំចរចាជុំទី២ នៅសប្ដាហ៍ទី១ ខែមិថុនា ឆ្នាំ២០២៥ នៅរដ្ឋធានីវ៉ាស៊ីនតោន។ រាជរដ្ឋាភិបាល ដែលមានសម្ដេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី នឹងបន្តធ្វើកិច្ចការងារនេះដោយយកចិត្តទុកដាក់បំផុត៕ អត្ថបទ៖ សុន រ៉ាឌី 

រយៈពេល៤ខែឆ្នាំនេះ ទំហំពាណិជ្ជកម្មគ្រឿងអលង្ការ និងត្បូងមានតម្លៃមានទឹកប្រាក់ជាង២៤៤ លានដុល្លារ

2025/05/16 01:51:20 pm        208
Facebook Telegram Linkin
ក្នុងរយៈពេល ៤ ខែ ឆ្នាំ២០២៥ ទំហំពាណិជ្ជកម្មគ្រឿងអលង្ការ និងត្បូងមានតម្លៃ មានចំនួនជាង ២៤៤ លានដុល្លារសហរដ្ឋ អាមេរិក ហើយចំនួននេះនឹងបន្តកើនឡើងបន្ថែមទៀត ដើម្បីចូលរួមចំណែកជួយជ្រោមជ្រែងដល់កំណើនសេដ្ឋកិច្ចជាតិ។ឯកឧត្តម សុខ ចិន្តាសោភា ឧបនាយករដ្ឋមន្រ្តី តំណាងដ៏ខ្ពង់ខ្ពស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា លើកឡើងនៅក្នុងពិព័រណ៍គ្រឿងអលង្ការ និងត្បូងកម្ពុជាអន្តរជាតិលើកទី១៦ ឆ្នាំ២០២៥ រៀបចំដោយ សមាគមពាណិជ្ជករគ្រឿងអលង្ការ និងត្បូងមានតម្លៃកម្ពុជា នៅថ្ងៃទី១៥ ខែឧសភា ឆ្នាំ២០២៥ នេះថា តាមរយៈការរៀបចំព្រឹត្តិការណ៍ ពិព័រណ៍កម្រិតអន្តរជាតិ ដោយប្រយោល និងដោយផ្ទាល់នេះ សមាគមបានចូលរួមយ៉ាងសកម្មជាមួយរាជរដ្ឋាភិបាលកម្ពុជា ក្នុងការ ជំរុញលើកកម្ពស់ និងការតាំងបង្ហាញផលិតផលគ្រឿងអលង្ការ និងត្បូងមានតម្លៃនៅកម្ពុជា នៅលើឆាកអន្តរជាតិ បង្កើតឱកាសក្នុង ការផូផ្គង រវាងធុរជនក្នុងនិងក្រៅប្រទេស ជំរុញអភិវឌ្ឍន៍ និងនវានុវត្ត ឧស្សាហកម្មផលិតគ្រឿងអលង្ការ និងកែច្នៃត្បូង ព្រមទាំងផ្សព្វ ផ្សាយពីកាលានុវត្តភាពពាណិជ្ជកម្ម និងវិនិយោគលើវិស័យនេះនៅកម្ពុជា។ឯកឧត្តមឧបនាយករដ្ឋមន្រ្តី លើកឡើងឱ្យដឹងថា ក្នុងឆ្នាំ២០២៤ ទំហំពាណិជ្ជកម្មគ្រឿងអលង្ការ និងត្បូងមានតម្លៃ សម្រេច បានជាង ៧៨៨ លានដុល្លារ ថមថយប្រមាណ ៣០% ធៀបនឹងឆ្នាំ២០២៣។ ចំណែកនៅក្នុងរយៈពេល ៤ ខែ ឆ្នាំ២០២៥ នេះ ទំហំ ពាណិជ្ជកម្មគ្រឿងអលង្ការ និងត្បូងមានតម្លៃ មានទឹកប្រាក់ជាង ២៤៤ លានដុល្លារ។ ចំនួននេះនៅកម្រិតនៅឡើយ ដែលជាកម្មវត្ថុ និងជាវិញ្ញាសារតម្រូវឱ្យសមាគម ក្រសួង-ស្ថាប័ន និងគ្រប់ភាគីពាក់ព័ន្ធខិតខំបន្ថែមទៀត តែទោះបីយ៉ាងណានៅក្នុងឆ្នាំនេះ ក៏កម្ពុជា រំពឹងថា និងមានកំណើនល្អ ខណៈសមាគម ក៏ដូចជា គីពាក់ព័ន្ធបានកំពុងយកចិត្តទុកដាក់។លោកជំទាវ ញ៉ែត ស្រីអូន ប្រធានសមាគមពាណិជ្ជករគ្រឿងអលង្ការ និងត្បូងមានតម្លៃកម្ពុជា លើកឡើងថា ជុំវិញវិស័យ គ្រឿងអលង្ការ និងត្បូងមានតម្លៃនេះ សមាគមបានកិច្ចខិតខំប្រឹងប្រែងយ៉ាងខ្លាំង ដើម្បីធានាឲ្យបាននូវផលប្រយោជន៍ និងការលើក ស្ទួយកិត្តិសព្ទល្បីរន្ទឺរបស់សមាគម ឲ្យកាន់តែរីកសុះសាយលើឆាកអន្តរជាតិ, ជាក់ស្តែងតាមរយៈនៃព្រឹត្តិការណ៍តាំងពិព័រណ៍នេះ នឹង ចូលរួមចំណែកដល់ការធ្វើអាជីវកម្ម និងពាណិជ្ជកម្មបន្ថែម។ ឯកឧត្តមឧបនាយករដ្ឋមន្រ្តី បន្ថែមឱ្យដឹងថា ពាក់ព័ន្ធការដោះដូរពាណិជ្ជកម្មនេះ នៅក្នុងឆ្នាំ២០២៤ កន្លងមក ការធ្វើពាណិជ្ជកម្មទៅ កាន់ទីផ្សារអន្តរជាតិរបស់កម្ពុជា សម្រេចបានប្រមាណ ៥៥.៣៧ ប៊ីលានដុល្លារអាមេរិក ក្នុងនោះការនាំចេញមានចំនួនប្រមាណ ២៦.៦៦ ប៊ីលានដុល្លារអាមេរិក កើនឡើង ១៣.៦១% ធៀបនឹងឆ្នាំ២០២៣។ ចំណែកទំហំពាណិជ្ជកម្មរបស់កម្ពុជា ជាមួយនឹងបណ្តា ប្រទេសហត្ថលេខី នៃកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) មានចំនួនប្រមាណ ៣៤,៥២ ប៊ីលានដុល្លារ អាមេរិក។ ចំណែកទីផ្សារ RCEP គឺជាទីផ្សារដ៏សំខាន់មួយសម្រាប់កម្ពុជា មានចំណែកប្រមាណ ៦២,៣៤% នៃទំហំពាណិជ្ជកម្ម សរុបរបស់កម្ពុជា ដែលក្នុងនោះទីផ្សារសំខាន់ៗដែលទ្រទ្រង់នៃការនាំចេញរបស់កម្ពុជារួមមាន៖ ទីផ្សារអាស៊ាន ចិន (រួមទាំងហុងកុង) សហរដ្ឋអាមេរិក អឺរ៉ុប ជប៉ុន កាណាដា សាធារណរដ្ឋកូរ៉េ ចក្រភពអង់គ្លេស អូស្ត្រាលី នូវែល ហ្សេឡង់ និងអេមីកកការ៉ាប់រួមជាដើម៕ អត្ថបទ៖ សុន រ៉ាឌី 

គណៈកម្មាធិការវិនិយោគ លើកទឹកចិត្តដល់ធុរកិច្ចជប៉ុនវិនិយោគ បង្កើតតំបន់សេដ្ឋកិច្ចពិសេសនៅកម្ពុជា

2025/05/14 02:25:56 pm        95
Facebook Telegram Linkin
អគ្គលេខាធិការគណៈកម្មាធិការវិនិយោគកម្ពុជា លើកទឹកចិត្តដល់ក្រុមហ៊ុន Yazaki វិនិយោគបង្កើតតំបន់សេដ្ឋកិច្ចពិសេស ដើម្បី ជួយទាក់ទាញវិនិយោគិនជប៉ុន ឱ្យមកបណ្តាក់ទុនវិនិយោគនៅកម្ពុជាបន្ថែម។  ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា និងសហការី នៅថ្ងៃទី១២ ខែឧសភា ឆ្នាំ២០២៥, បានទទួលជួបពិភាក្សាការងារជាមួយគណៈប្រតិភូនៃក្រុមហ៊ុន Yazaki ដែលមានមូលដ្ឋានផលិតកម្ម នៅខេត្ត ក្វាងតុង នៃសាធារណរដ្ឋប្រជាមានិតចិន ដឹកនាំដោយលោក Yoshimoto Ito អគ្គនាយករងក្រុមហ៊ុន និងដោយមានការចូលរួម ពីតំណាងក្រុមហ៊ុន Guangdong Dongfang Investment Co., Ltd. ដែលជាក្រុមហ៊ុនដៃគូវិនិយោគនៅប្រទេសចិន។ ក្រុមហ៊ុន Yazaki បានបណ្តាក់ទុនវិនិយោគបង្កើតរោងចក្រផលិតគ្រឿងបង្គុំខ្សែភ្លើងនៅកម្ពុជា ក្នុងតំបន់សេដ្ឋកិច្ចនាងកុក កោះកុង ប្រមាណ ជាង១០ឆ្នាំ និងបានមានវត្តមាននៅខេត្តក្វាងតុង សាធារណរដ្ឋប្រជាមានិតចិតប្រមាន ៤០ ឆ្នាំមកហើយ។ ឯកឧត្តមអគ្គលេខាធិការ បានស្វាគមន៍យ៉ាងកក់ក្តៅចំពោះគណៈប្រតិភូ និងបានសម្តែងនូវសេចក្តីសោមនស្សរីករាយ ដល់ ក្រុមហ៊ុនដែលបានវិនិយោគ និងទទួលបានជោគជ័យនៅកម្ពុជា ក្នុងប្រតិបត្តិការអាជីវកម្មរបស់ខ្លួន ហើយពេលនេះក្រុមហ៊ុនបានមាន បំណងពង្រីកការវិនិយោគបន្ថែមទៀត។ ក្នុងន័យនេះ ឯកឧត្តមអគ្គលេខាធិការ បានផ្តល់អនុសាសន៍ ឱ្យក្រុមហ៊ុនជ្រើសរើសទីតាំង សម្រាប់ការពង្រីកការវិនិយោគ និងបានលើកទឹកចិត្តឱ្យក្រុមហ៊ុនគិតគូរ ក្នុងការវិនិយោគបង្កើតតំបន់សេដ្ឋកិច្ចពិសេសណាមួយ នៅក្នុងព្រះរាជាណាចក្រកម្ពុជា ដើម្បីជួយទាក់ទាញវិនិយោគិនជប៉ុន ឱ្យមកបណ្តាក់ទុនវិនិយោគនៅកម្ពុជាបន្ថែម។ ជាការឆ្លើយតប លោក Yoshimoto Ito ប្រធានគណៈប្រតិភូបានថ្លែងអំណរគុណដល់ ឯកឧត្តមអគ្គលេខាធិការ ដែលបាន ចំណាយពេលវេលាដ៏មានតម្លៃ ទទួលជួបពិភាក្សាការងារជាមួយក្រុមហ៊ុន និងបានសម្តែងនូវសេចក្តីរីករាយ ដែលឯកឧត្តមអគ្គលេខា- ធិការ បានគាំទ្រគម្រោងពង្រីកការវិនិយោគរបស់ក្រុមហ៊ុន៕អត្ថបទ៖ សុន រ៉ាឌី

កម្ពុជានាំចេញទំនិញទៅកាន់ទីផ្សារអន្តរជាតិ មានទំហំទឹកប្រាក់ជាង ៩,១ ពាន់លាន​ដុល្លារ​អាមេរិក

2025/05/14 11:35:20 am        235
Facebook Telegram Linkin
កម្ពុជាបាននាំចេញទំនិញទៅកាន់ទីផ្សារ ដែលជាប្រទេសដៃគូ នៅក្នុងរយៈពេល ៤ ខែ ក្នុង​ឆ្នាំ​២០២៥នេះ មានទំហំទឹកប្រាក់ ប្រមាណ ៩,១ ពាន់លានដុល្លារអាមេរិក កើនឡើងជាង ១៤ ភាគ​រយ ធៀបនិងឆ្នាំ២០២៤ បានគាំទ្រដោយប្រភេទទំនិញសំខាន់ៗ ជាច្រើន។អគ្គនាយកដ្ឋានគយ និងរដ្ឋាករកម្ពុជា នៃក្រសួងសេដ្ឋកិច្ច និងហិរញ្ញវត្ថុ បាន​បង្ហាញស្ថិ​តិ​ពាណិជ្ជ​កម្ម ​នៃការធ្វើពាណិជ្ជកម្មលើ ទីផ្សារអន្តរជាតិរបស់កម្ពុជា ក្នុងនោះសម្រាប់រយៈពេល ៤ ខែ ឆ្នាំ​២០២៥ នេះ ការនាំចេញមុខទំនិញរបស់កម្ពុជា មានទំហំ ទឹកប្រាក់សរុបជាង ៩,១ ពាន់​លាន​ដុល្លារ​អាមេរិក មានកំណើនកើនឡើងជាង ១៤ ភាគរយ ខណៈការនាំចេញ ក្នុងរយៈពេលដូចគ្នា ឆ្នាំ​២០២៤ មានទឹកប្រាក់ត្រឹម ៨ ពាន់លានដុល្លារប៉ុណ្ណោះ។ ការនាំចេញនេះបានគាំទ្រដោយទីផ្សារសំខាន់ៗដូចជា៖ ទីផ្សារសហរដ្ឋ អាមេរិក, វៀតណាម, ជប៉ុន, កាដាណា, អេស្បាញ និងអង់គ្លេសជាដើម។ឯកឧត្តម សួន ម៉ិ ប្រធានសមាគមសហគ្រិនវីម៉ូនៅកម្ពុជា លើកឡើងថា បច្ចុប្បន្នពិភពលោកមិនទាន់មានភាពប្រាកដប្រជា នៅឡើយដូចជា ភាពតាន់តឹងភូមិសាស្រ្តនយោបាយ, ការអូសបន្លាយសង្គ្រាមរុស្សី-អ៊ុយក្រែន និងសង្គ្រាមពាណិជ្ជកម្មជាដើម បាន កំពុងហ៊ុមព័ទ្ធដោយហានីភ័យ។ ស្ថិតក្នុងស្ថានភាពនេះ ការធ្វើពាណិជ្ជកម្មនាំចេញទំនិញរបស់កម្ពុជា បាននិងកំពុងបន្តកំណើននាំ ចេញល្អប្រសើរ, ដែលការណ៍នេះ បានបង្ហាញឱ្យឃើញពីការរយកចិត្តទុកដាក់របស់រាជរដ្ឋាភិបាល ក្រោមការដាក់ចេញនូវគោលនយោ បាយ, យុទ្ធសាស្រ្ត និងផែនការអភិវឌ្ឍន៍ច្បាស់លាស់ ត្រឹមត្រូវ និងគ្រប់ជ្រុងជ្រោយ។ សូមបញ្ជាក់ថា នៅក្នុងរយៈពេល ៤ខែ ឆ្នាំ២០២៥ នេះ ការដោះដូរពាណិជ្ជកម្មទៅកាន់ទីផ្សារអន្តរជាតិរបស់កម្ពុជា មានទំហំទឹកប្រាក់ សរុបជាង ១៩,៥ ពាន់លានដុល្លារអាមេរិក កើនឡើងប្រមាណ ១៧ ភាគរយ បើធៀបនិងឆ្នំា២០២៤ ក្នុងនោះការនាំចេញ ទំនិញ របស់កម្ពុជាមានទឹកប្រាក់ជាង ៩,១ ពាន់លានដុល្លារ កើនជាង ១៤ ភាគរយ ដោយគាំទ្រប្រភេទទំនិញជាច្រើនដូចជា៖ ការនាំចេញ សម្លៀកបំពាក់ គ្រឿងបន្ទាប់បន្សំធ្វើពីក្រណាត់ធ្វើពីក្រណាត់ និងមិនធ្វើពីក្រណាត់, ម៉ាស៊ីន ឧបករណ៍អគ្គិសនី និងគ្រឿងបង្គុំ, ស្បែក ជើងនិងស្រោមជើង, កៅស៊ូនិងផលិតផលធ្វើពីកៅស៊ូ, គ្រឿងសង្ហារឹម, ផ្លែឈើ និងគ្រាប់ពីផ្លែឈើ និងមានប្រភេទទំនិញជាច្រើន ទៀត បានគាំទ្រដល់កំណើននៃការនាំចេញ៕ អត្ថបទ៖ សុន រ៉ាឌី

អគ្គនាយកដ្ឋានគយ និងរដ្ឋាករណែនាំដល់មន្រ្ដីគយឱ្យពង្រឹងប្រសិទ្ធភាពគ្រប់គ្រងការនាំចូលផ្លែទុរេនស្រស់

2025/05/14 09:29:22 am        156
Facebook Telegram Linkin
អគ្គនាយកដ្ឋានគយ និងរដ្ឋាករកម្ពុជា នៅថ្ងៃទី១៣ ខែឧសភា ឆ្នាំ២០២៥នេះ បានចេញសេចក្ដីណែនាំដល់ប្រធានលេខាធិការដ្ឋាន នាយកដ្ឋាន សាខា និងការិយាល័យគយនិងរដ្ឋាករឱ្យពង្រឹងប្រសិទ្ធភាពគ្រប់គ្រងការនាំចូលផ្លែទុរេនស្រស់ ដើម្បីបញ្ចៀសការនាំចូលទុរេនមានសារធាតុគីមីអាចបង្កផលប៉ះពាល់ដល់សុខភាពពលរដ្ឋ។ ដើម្បីចូលរួមទប់ស្កាត់ ផ្លែទុរេនស្រស់ប្រើប្រាស់សារធាតុគីមីដែលប៉ះពាល់ដល់សុខភាពប្រជាជន អគ្គនាយកដ្ឋានគយនិង រដ្ឋាករកម្ពុជា ណែនាំបណ្តោះអាសន្នដល់លោកលោកស្រី ប្រធានលេខាធិការដ្ឋាន នាយកដ្ឋាន សាខា និងការិយាល័យគយ និងរដ្ឋាករ៖១. ត្រូវអនុវត្តឱ្យបានម៉ឺងម៉ាត់តាមបញ្ញត្តិអនុក្រឹត្យលេខ ៣៧០ អនក្រ.បក ជាធរមាន ដូចយោងខាងលើ ដោយការនាំចូលផ្លែទុរេនត្រូវអមភ្ជាប់ជាមួយប្រតិវេទន៍គយនូវវិញ្ញាបនបត្រភូតគាមអនាម័យ។២. ត្រូវចាត់ចែងការដកសំណាកគម្រូតាមគោលការណ៍ហានិភ័យ ឬតាមរូបភាពចោះៗ ដើម្បីស្នើសុំ កិច្ចសហការពីមន្ត្រីនៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែង បន្លំ (ក.ប.ប.) ធ្វើការវិភាគ។ ក្នុងករណីនេះ ទំនិញនាំចូលអាចត្រូវបានអនុញ្ញាតដឹកជញ្ជូនទៅគម្យដ្ឋាន ក្នុងប្រទេសបន្ទាប់ពីបានបំពេញបែបបទបញ្ចេញទំនិញពីគយរួច ដោយអ្នកនាំចូលត្រូវបញ្ជាក់ជូនមន្ត្រី គយមានសមត្ថកិច្ចឱ្យបានច្បាស់លាស់នូវទីតាំងគម្បដ្ឋាននៃការដឹកជញ្ជូន ចែកចាយក្នុងប្រទេស។៣. ក្នុងករណីលទ្ធផលនៃការវិភាគបង្ហាញថា “ផលិតផលមានសារធាតុប៉ះពាល់ដល់សុខភាព ឬ “ខូចគុណភាព” ត្រូវចាត់ចែងប្រមូលឬឃាត់ទុកទំនិញទាំងនោះ និងធ្វើរបាយការណ៍ស្នើត ចាត់វិធានការបន្តពី អគរ។៤. ត្រូវចាត់វិធានការតាមដានទប់ស្កាត់ការលួចប៉ុនប៉ងនាំចូលដោយខុសច្បាប់ផ្លែទុរេនស្រស់តាមច្រក របៀងក្នុងភូមិសាស្ត្ររបស់ខ្លួនឱ្យបានម៉ឺងម៉ាត់៕

សហគ្រិនស្រ្តីនៅកម្ពុជា បានកំពុងចាប់យកបច្ចេកវិទ្យាឌីជីថល​សម្រាប់ដំណោះស្រាយធ្វើអាជីវកម្ម

2025/05/13 02:30:16 pm        184
Facebook Telegram Linkin
សហគ្រិនស្រ្តីនៅកម្ពុជា បាននិងកំពុងផ្លាស់ប្តូរឥរិយាបថ លើការគ្រប់គ្រងខ្សែច្រវាក់ផលិតកម្ម នៃការចាប់យកបច្ចេកវិទ្យាឌីជីថល សម្រាប់ជាដំណោះស្រាយនៅក្នុងការធ្វើអាជីវកម្ម និងពាណិជ្ជកម្មជាបណ្តើរៗ។លោកជំទាវ ចាន់ ភារី ប្រធានសមាគមសហគ្រិនស្រ្តីកម្ពុជា លើកឡើងក្នុងកិច្ចសម្ភាសន៍ជាមួយ BTV ស្តីពីសហគ្រិនស្រ្តី និង វិស័យបច្ចេកវិទ្យាឌីជីថលនៅកម្ពុជានេះថា ជុំវិញផលិតផលក្នុងស្រុក ពីមួយឆ្នាំទៅមួយមានការរីកចម្រើនគួរឱ្យកត់សម្គាល់ ខណៈដែល កម្ពុជាមានដៃគូរជាច្រើន ក្នុងការកសាងសមត្ថភាព ចំណេះ និងជំនាញ ជាពិសេសនៅលើគុណភាព និងកម្រិតស្តង់ដារនៃការផលិត ក្នុងនោះក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ ក៏បានផ្តល់នូវផ្នែកបច្ចេកទេស និងបច្ចេកវិទ្យាផ្សេងៗ ខណៈដែល ក្រសួងពាណិជ្ជកម្ម ក៏បានខិតខំជួយត្រួសត្រាយផ្លូវ ផ្តល់ឱកាសដល់សហគ្រិនផលិតក្នុងស្រុក មានឱកាសបង្ហាញនូវផលិតផល របស់ខ្លួនសម្រាប់ទីផ្សារក្នុង និងក្រៅប្រទេស។លោកជំទាវ បន្តថា ស្របពេលវិស័យបច្ចេកវិទ្យាកំពុងរីកចម្រើននេះ ឃើញថា បច្ចុប្បន្នសហគ្រិនជាស្រ្តី បាននិងកំពុងផ្លាស់ប្តូរ ឥរិយាបថ និងបានបណ្តុះនូវគំនិតថ្មីៗស្របតាមនវានុវត្តន៍ ជាពិសេសការចាប់យកបច្ចេកវិទ្យាឌីជីថល សម្រាប់ដំណោះស្រាយនៅក្នុង អាជីវកម្ម ទោះបីបច្ចុប្បន្នការចាប់យកវិស័យនេះនៅមានកម្រិតនៅឡើយ ការណ៍នេះ, បានបង្ហាញដល់ពួកគាត់បានយល់ដឹងខ្លះៗ អំពី សារៈសំខាន់ៗនៃការប្រើប្រាស់បច្ចេកវិទ្យា ដើម្បីជាផ្លូវឈានទៅសិក្សាឱ្យបានកាន់តែច្រើន ក្នុងគោលដៅជំរុញធ្វើអាជីវកម្ម ពាណិជ្ជកម្ម ឱ្យកាន់តែជោគជ័យ។សូមបញ្ជាក់ថា ជុំវិញវិស័យឌីជីថលនេះ, រាជរដ្ឋាភិបាលនីតិកាលទី៧ នៃរដ្ឋសភា បាននិងកំពុងបន្តជំរុញការប្រើប្រាស់បច្ចេកវិទ្យាឌីជី ថលឱ្យបានជាអតិបរមា ជាពិសេសក្នុងសកម្មភាពធុរកិច្ច និងសេដ្ឋកិច្ច តាមវិធានប្រទាក់ក្រឡា និងជាប្រព័ន្ធ, ក្នុងគោលដៅកែលម្អ បរិយាសអំណោយផលដល់ការធ្វើធុរកិច្ច ការធ្វើអាជីវកម្ម និងការវិនិយោគ តាមរយៈការសម្រួលនិងការធ្វើសាមញ្ញកម្មនីតិវិធីពាក់ព័ន្ធ នានា, ការធ្វើឌីជីថលភាវូបនីយកម្ម សម្រាប់ការផ្តល់សេវា និងកិច្ចការរដ្ឋបាល ការពង្រឹងសមត្ថភាពស្ថាប័ន, និងការលើកប្រសិទ្ធភាព នៃការសម្របសម្រួលអន្តរក្រសួង-ស្ថាប័ន៕ អត្ថបទ៖ សុន រ៉ាឌី

បណ្ដាញសង្គម

ព័ត៌មានថ្មីៗ

រុស្ស៊ីបាញ់មីស៊ីល និងយានដ្រូនលើរដ្ឋធានីអ៊ុយក្រែន ប៉ុន្មានម៉ោងបន្ទាប់ពីការដោះដូរឈ្លើយសឹកបានចាប់ផ្តើម
05/24/2025 03:05 PM
Facebook Telegram Linkin
ឯកឧត្តម ឌិត ទីណា បន្តលើកទឹកចិត្តកសិករឱ្យងាកមកចងក្រងជាសហគមន៍កសិកម្មទំនើប ដើម្បីស្ថិរភាពតម្លៃទំនិញ
05/24/2025 03:05 PM
Facebook Telegram Linkin
ប្រមុខUNអំពាវនាឲ្យមានការដឹកជញ្ជួនជំនួយប្រកបដោយសុវត្ថិភាពដើម្បីទប់ស្កាត់ភាពអត់ឃ្លានលើពលរដ្ឋហ្កាហ្សា
05/24/2025 03:05 PM
Facebook Telegram Linkin
នាយឧត្តមសេនីយ៍ សៅ សុខា អញ្ជើញចុះត្រួតពិនិត្យការងារសាងសង់ព្រះមហាចេតិយ នៅវត្តច័ន្ទបុរីវង្ស
05/24/2025 03:05 PM
Facebook Telegram Linkin
ឯកឧត្តម នេត្រ ភក្ត្រា និងឯកអគ្គរដ្ឋទូតឥណ្ឌា អញ្ជើញសម្ពោធគម្រោងបំពាក់ឧបករណ៍ផ្តល់ចរន្តអគ្គិសនីក្នុងផ្ទះ និងបង្គោលបំភ្លឺផ្លូវដើរដោយថាមពលពន្លឺព្រះអាទិត្យ ដើម្បីលើកកម្ពស់ការទទួលព័ត៌មាន និងចំណេះដឹង
05/24/2025 02:05 PM
Facebook Telegram Linkin
អ៊ីរ៉ង់មើលឃើញក្តីសង្ឃឹមសម្រាប់វឌ្ឍនភាពក្រោយកិច្ចចរចានុយក្លេអ៊ែរជុំទីប្រាំជាមួយអាមេរិក
05/24/2025 02:05 PM
Facebook Telegram Linkin
សហភាពអឺរ៉ុប អំពាវនាវឱ្យមានការគោរពបន្ទាប់ពីលោក Trump គំរាមដំឡើងពន្ធ ៥០%
05/24/2025 01:05 PM
Facebook Telegram Linkin
លោកTrump និយាយថាលោកមិនស្វែងរកកិច្ចព្រមព្រៀងជាមួយសហភាពអឺរ៉ុបទេ បន្ទាប់ពីគំរាមដំឡើងពន្ធ៥០%
05/24/2025 01:05 PM
Facebook Telegram Linkin
ឯកឧត្តម ហែម វណ្ណឌី ចុះពិនិត្យរោងចក្រទឹកស្អាតតាំងក្រសាំង និងប្រតិបត្តិករទឹកស្អាតស្រុកបារាយណ៍
05/24/2025 01:05 PM
Facebook Telegram Linkin
[UPDATE] អូស្ត្រាលី ចាប់ផ្តើមសម្អាត បន្ទាប់ពីទឹកជំនន់សម្លាប់មនុស្ស៥នាក់ និងបំផ្លិចបំផ្លាញទ្រព្យសម្បត្តិ
05/24/2025 01:05 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.