នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
អតីតសកម្មជនគណបក្សប្រឆាំងចំនួន ៨៧នាក់ ចូលរួមជីវភាព​នយោបាយ​ជាមួយ​គណបក្ស​ប្រជាជន​កម្ពុជា នៅក្នុងស្រុកស្អាង និងស្រុកកោះធំ
ក្រុមការងារគណបក្សចុះមូលដ្ឋានស្រុកលើកដែកណែនាំយុវជនរក្សាជាកម្លាំងសាមគ្គី
ប្រធានក្រុមការងារចុះមូលដ្ឋាន៖ បក្សប្រជាជនប្រកាន់ខ្ជាប់នូវឧត្តមគតិស្នេហាជាតិ និងការអភិវឌ្ឍ
សម្ដេចធិបតី បញ្ជាក់ជាថ្មីជំហររបស់កម្ពុជាបន្តដោះស្រាយបញ្ហាព្រំដែនគោក និងសមុទ្រជាមួយថៃ ដោយសន្ដិវិធី និងច្បាប់អន្តរជាតិ និងបដិសេធជជែករឿងបើកច្រកព្រំដែនគោក

នយោបាយ​ និង ការអភិវឌ្ឍន៍

កោះតៃវ៉ាន់ សាកល្បងប្រព័ន្ធការការពារដែនអាកាស ក្នុងសមយុទ្ធមីស៊ីលទាំងព្រឹកព្រលឹម

2024/03/26 11:29:15 am        369
Facebook Telegram Linkin
កោះតៃវ៉ាន់ បានសាកល្បងប្រព័ន្ធការពារដែនអាកាសរបស់ខ្លួននៅថ្ងៃអង្គារ (២៦ មីនា) នេះ ក្នុងសមយុទ្ធពេលព្រឹកព្រលឹមដោយប្រើមីស៊ីលបាញ់ពីដីទៅអាកាស និងកម្លាំងទ័ពអាកាស ដីគោក និងកងទ័ពជើងទឹក ដោយនិយាយថាខ្លួននឹងបន្តពង្រឹងការហ្វឹកហ្វឺន នៅចំពោះមុខសកម្មភាពយោធាជាញឹកញាប់របស់ប្រទេសចិន នៅក្បែរនោះ។កោះតៃវ៉ាន់ ដែលចិនអះអាងសិទ្ធថាជាទឹកដីរបស់ខ្លួន បានត្អូញត្អែរក្នុងរយៈពេលបួនឆ្នាំចុងក្រោយនេះនៃករណីម្តងហើយម្តងទៀតនៃយន្តហោះកងទ័ពអាកាស និងនាវាកងទ័ពជើងទឹករបស់ចិន ដែលប្រតិបត្តិការនៅជិត និងជុំវិញកោះនេះ។បញ្ជាការកងទ័ពអាកាសរបស់កោះតៃវ៉ាន់ បាននិយាយនៅក្នុងសេចក្តីថ្លែងការណ៍ខ្លីមួយថា នៅចន្លោះម៉ោង ៥ ព្រឹកដល់ម៉ោង ៧ ព្រឹក(ម៉ោងក្នុងស្រុក) ខ្លួនបានអនុវត្ត «សមយុទ្ធផែនការការពារដែនអាកាសទាំងមូល»។ សមយុទ្ធនេះគឺ «ដើម្បីត្រួតពិនិត្យ និងផ្ទៀងផ្ទាត់បញ្ជាការប្រយុទ្ធការពារដែនអាកាសរួមគ្នា និងការគ្រប់គ្រងនៃសាខាទាំងបី» ដោយបន្ថែមថាលទ្ធផលគឺ «ល្អប្រសើរ»។ អ្នកនាំពាក្យអាជ្ញាធរការពារជាតិតៃវ៉ាន់ លោក ស៊ុន លីហ្វាង (Sun Li-fang) បាននិយាយថា ទោះបីជាមិនមានទំនាក់ទំនងដោយផ្ទាល់រវាងអ្វីដែលលោកហៅថា សមយុទ្ធប្រចាំឆ្នាំជាប្រចាំបែបនេះ ទៅនឹងភាពតានតឹងបច្ចុប្បន្នក៏ដោយ ក៏ប៉ុន្តែការគំរាមកំហែងពីប្រទេសចិន នៅតែបន្តកើនឡើង៕

លោក Trump៖ ការវាយប្រហាររបស់ហាម៉ាស គឺអាក្រក់ខ្លាំងណាស់ ប៉ុន្តែអ៊ីស្រាអែល គួរតែបញ្ចប់សង្រ្គាម

2024/03/26 10:22:21 am        218
Facebook Telegram Linkin
បេក្ខជនប្រធានាធិបតីនៃគណបក្សសាធារណរដ្ឋ លោក ដូណាល់ ត្រាំ (Donald Trump) បាននិយាយថា លោកក៏នឹងមានប្រតិកម្មតបដូចដែលអ៊ីស្រាអែលបានធ្វើ បន្ទាប់ពីការវាយប្រហាររបស់ពួកហាម៉ាស កាលពីថ្ងៃទី០៧ ខែតុលា ប៉ុន្តែថាអ៊ីស្រាអែល កំពុងបាត់បង់ការគាំទ្រពីអន្តរជាតិ ហើយគួរតែបញ្ចប់សង្រ្គាមប្រឆាំងនឹងក្រុមអ៊ីស្លាមនេះនៅតំបន់ហ្កាហ្សា។អតីតប្រធានាធិបតីអាមេរិករូបនេះ បានធ្វើអត្ថាធិប្បាយនៅក្នុងបទសម្ភាសន៍ជាមួយសារព័ត៌មាន អ៊ីស្រាអែល ហាយូម (Israel Hayom) ដែលបានចេញផ្សាយកាលពីថ្ងៃច័ន្ទ ដោយនិយាយថា ការសម្លាប់រង្គាលរបស់ក្រុមហាម៉ាស ឆ្លងកាត់ភាគខាងត្បូងអ៊ីស្រាអែល គឺជារឿងដ៏សោកសៅបំផុតមួយ ប៉ុន្តែអ៊ីស្រាអែល ក៏ចាំបាច់ត្រូវតែបញ្ចប់សង្រ្គាមដែរ។ការវាយប្រហារកាលពីថ្ងៃទី០៧ ខែតុលា បានជំរុញឲ្យមានសង្គ្រាមនៅតំបន់ហ្កាហ្សា ដែលបានអូសបន្លាយជិតកន្លះឆ្នាំ។ អ៊ីស្រាអែលនិយាយថា ការវាយលុករបស់ខ្លួននឹងបន្តរហូតដល់ក្រុមហាម៉ាស ត្រូវបានបំផ្លាញ ហើយចំណាប់ថ្នូរនៅក្នុងតំបន់ហ្កាហ្សា ត្រូវបានដោះលែង។ចេតនារបស់អ៊ីស្រាអែលក្នុងការពង្រីកប្រតិបត្តិការរបស់ខ្លួនទៅកាន់ទីក្រុងរ៉ាហ្វា (Rafah) ភាគខាងត្បូងហ្កាហ្សា ជាទីដែលប្រជាជនប៉ាឡេស្ទីនជាងមួយលាននាក់កំពុងជ្រកកោន បានបង្កឱ្យមានការបែកបាក់ជាមួយរដ្ឋបាលលោកប្រធានាធិបតីអាមេរិក ចូ បៃដិន ដែលបាននិយាយថា ការធ្វើបែបនោះនឹងក្លាយជាកំហុសដ៏ធំមួយរបស់អ៊ីស្រាអែល៕

រដ្ឋមន្ត្រីអ៊ីស្រាអែល លាលែងពីរដ្ឋាភិបាលរួបរួម ដោយនិយាយថា ខ្លួនត្រូវគេដាក់ឱ្យនៅក្រៅប្រព័ន្ធ

2024/03/26 09:42:04 am        354
Facebook Telegram Linkin
រដ្ឋមន្ត្រីអ៊ីស្រាអែលជើងចាស់ម្នាក់ ដែលបានចូលរួមជាមួយរដ្ឋាភិបាលរួបរួមគ្រាអាសន្នរបស់លោកនាយករដ្ឋមន្ត្រី បេនចាមីន ណេតាន់យ៉ាហ៊ូ (Benjamin Netanyahu) បន្ទាប់ពីការវាយប្រហារកាលពីថ្ងៃទី០៧ ខែតុលា របស់ពួកហាម៉ាស បាននិយាយកាលពីថ្ងៃចន្ទ ថាខ្លួនបានលាលែងពីតំណែង បន្ទាប់ពីមិនត្រូវបានដាក់បញ្ចូលក្នុងគណៈរដ្ឋមន្ត្រីសង្គ្រាមកម្រិតខ្ពស់បំផុត។លោក ហ្គីឌៀន សា (Gideon Saar) បានចូលរួមក្នុងរដ្ឋាភិបាលរួបរួមជាមួយនឹងសមាជិកបក្សប្រឆាំងមួយចំនួនទៀត ដើម្បីជួយគ្រប់គ្រងសង្រ្គាមប្រឆាំងក្រុមហាម៉ាស នៅតំបន់ហ្កាហ្សា។ ការចាកចេញរបស់លោក សា រួមជាមួយនឹងសម្ព័ន្ធមិត្តរបស់លោកផ្សេងទៀត មិនត្រូវបានរំពឹងថានឹងប៉ះពាល់ដល់ស្ថិរភាពនៃរដ្ឋាភិបាលរបស់លោក ណេតាន់យ៉ាហ៊ូ ដែលនៅតែគ្រប់គ្រងសំឡេងភាគច្រើនច្បាស់លាស់នៅក្នុងសភាទេ។លោក សា ធ្លាប់ជាគូប្រជែងនឹងលោក ណេតាន់យ៉ាហ៊ូ នៅក្នុងគណបក្សស្តាំនិយម លីគុត (Likud) មុនពេលចូលរួមជាមួយប្លុកកណ្តាលនិយម ដែលដឹកនាំដោយអតីតប្រមុខយោធា លោក បេននី ហ្កាន់ស៍ (Benny Gantz) ហើយអ្នកទាំងពីរនេះបានរួមគ្នាចូលទៅក្នុងរដ្ឋាភិបាលគ្រាអាសន្ន។ លោក ហ្កាន់ស៍ បានក្លាយជាសមាជិកនៃវេទិកាតូចក្នុងការធ្វើការសម្រេចចិត្តនៅក្នុងគណៈរដ្ឋមន្ត្រីសង្រ្គាម ខណៈពេលដែល លោក សា មិនត្រូវបានគេដាក់បញ្ចូលនោះទេ។ការលាលែងពីតំណែងនេះមិនមានការភ្ញាក់ផ្អើលឡើយ ខណៈលោក សា បានបែកបាក់សម្ព័ន្ធភាពជាមួយលោក ហ្កាន់ស៍ កាលពីដើមខែនេះ៕

ប្រមុខរបបសឹកនិយាយថា ការបោះឆ្នោតបន្ទាប់របស់មីយ៉ាន់ម៉ា អាចនឹងមិនធ្វើទូទាំងប្រទេសទេ

2024/03/26 09:20:57 am        370
Facebook Telegram Linkin
ប្រមុខមេទ័ពរបស់របបសឹកបាននិយាយថា សហភាពមីយ៉ាន់ម៉ា ដែលគ្រប់គ្រងដោយយោធាគ្រោងនឹងរៀបចំការបោះឆ្នោត ប្រសិនបើមានសន្តិភាព និងស្ថិរភាពនៅក្នុងប្រទេស ប៉ុន្តែប្រហែលជាមិនអាចរៀបចំបោះឆ្នោតទូទាំងប្រទេសបានទេ ខណៈដែលរបបសឹកកំពុងប្រយុទ្ធដើម្បីទប់ទល់នឹងការបះបោរនៅលើសមរភូមិមុខជាច្រើន។មេដឹកនាំយោធា លោក មីន អ៊ុងល៉ាំង (Min Aung Hlaing) បានប្រាប់ទីភ្នាក់ងារសារព័ត៌មាន ថាស (Tass) របស់រុស្ស៊ី ថា យោធាដែលកាន់អំណាចចាប់តាំងពីការធ្វើរដ្ឋប្រហារកាលពីបីឆ្នាំមុន នៅតែគ្រោងនឹងប្រគល់ប្រទេសទៅកាន់ការគ្រប់គ្រងតាមលទ្ធិប្រជាធិបតេយ្យវិញ នេះបើយោងតាមសម្រង់អត្ថបទនៃបទសម្ភាសន៍ ដែលធ្វើឡើងដោយប្រព័ន្ធផ្សព្វផ្សាយរដ្ឋរបស់មីយ៉ាន់ម៉ា។របបសឹកបានបន្តច្បាប់គ្រាអាសន្នរបស់ប្រទេសម្តងហើយម្តងទៀតរៀងរាល់ប្រាំមួយខែម្តង ដោយលើកឡើងពីតម្រូវការដើម្បីធ្វើឱ្យមានស្ថេរភាពប្រទេស និងកម្ទេចគូប្រជែងរបស់ខ្លួន ដែលខ្លួនពិពណ៌នាថាជាភេរវករ។ក្រុមអ្នករិះគន់ និងបណ្តាប្រទេសលោកខាងលិចបាននិយាយថា ការបោះឆ្នោតនៅមីយ៉ានម៉ា នឹងក្លាយជារឿងអាម៉ាស់មួយ ដោយគណបក្សជាង ៤០ ត្រូវបានរំលាយចាប់តាំងពីរដ្ឋប្រហារមក និងច្បាប់ហាមឃាត់ជាច្រើនដែលធ្វើឱ្យមានការលំបាកសម្រាប់គណបក្សថ្មីក្នុងការបង្កើត ឬប្រជែងនឹងអ្នកតំណាងនៃយោធា៕

ចិន និយាយថាទំនាក់ទំនងជាមួយហ្វីលីពីន កំពុងស្ថិតនៅផ្លូវបំបែក ស្របពេលឧប្បត្តិហេតុសមុទ្រ

2024/03/26 09:03:02 am        349
Facebook Telegram Linkin
ប្រទេសចិន បានព្រមានហ្វីលីពីន កាលពីថ្ងៃចន្ទ (២៥ មីនា) ឱ្យធ្វើសកម្មភាពដោយប្រុងប្រយ័ត្ន និងស្វែងរកការសន្ទនា ដោយនិយាយថាទំនាក់ទំនងរបស់ពួកគេគឺកំពុងស្ថិតនៅលើ «ផ្លូវបំបែក» ខណៈដែលការប្រឈមមុខដាក់គ្នាថ្មីៗរវាងឆ្មាំល្បាតឆ្នេរសមុទ្ររបស់ពួកគេជុំវិញការទាមទារដែនសមុទ្រ ធ្វើឱ្យភាពតានតឹងកាន់តែស៊ីជម្រៅ។នេះគឺជាការព្រមានលើកទីពីរដោយក្រសួងការបរទេសចិន ក្នុងរយៈពេល ៣ ខែ ខណៈដែលប្រទេសទាំងពីរបានឈ្លោះគ្នាដោយបើកចំហចំពោះការទាមទារទឹកដីនៅក្នុងប្រជុំកោះ ស្ព្រាតលី (Spratly) ដែលជាប្រជុំកោះភាគច្រើនគ្មានមនុស្សរស់នៅនៅក្នុងសមុទ្រចិនខាងត្បូង។សារព្រមាននេះត្រូវបានបញ្ជូនដោយអនុរដ្ឋមន្ត្រីការបរទេសចិន លោក ឈិន សាវតុង (Chen Xiaodong) ក្នុងអំឡុងពេលសន្ទនាតាមទូរស័ព្ទជាមួយសមភាគីហ្វីលីពីន លោកស្រី ថឺរ៉េសា ឡាហ្សារូ (Theresa Lazaro) ស្របពេលមានជម្លោះកាន់តែអាក្រក់ទៅៗ ជុំវិញការប៉ះទង្គិចគ្នានៅឯដែនទឹក សេខិន ថូម៉ាស ស្ហូល (Second Thomas Shoal) នៅសមុទ្រចិនខាងត្បូង។ហ្វីលីពីន បានចោទប្រកាន់ឆ្មាំល្បាតឆ្នេររបស់ចិន ថាបានប្រើប្រាស់កាណុងបាញ់ទឹកប្រឆាំងនឹងទូកស៊ីវិលដែលផ្គត់ផ្គង់កងទ័ពកាលពីថ្ងៃសៅរ៍ នៅឯដែនទឹក សេខិន ថូម៉ាស ស្ហូល ដែលខ្លួនបាននិយាយថាបានធ្វើឱ្យទូកខូចខាត និងធ្វើឱ្យនាវិកមួយចំនួនរងរបួស។ ឆ្មាំល្បាតឆ្នេរចិនបាននិយាយកាលពីថ្ងៃសៅរ៍ថា ខ្លួនបានចាត់វិធានការចាំបាច់ប្រឆាំងនឹងនាវាហ្វីលីពីន ដែលឈ្លានពាននៅក្នុងដែនទឹករបស់ខ្លួនប៉ុណ្ណោះ៕

លោក បៃដិន និងលោក ណេតាន់យ៉ាហ៊ូ ប៉ះទង្គិចគ្នា បន្ទាប់ពីការបោះឆ្នោតហ្កាហ្សា នៅ UN

2024/03/26 08:59:10 am        491
Facebook Telegram Linkin
ទំនាក់ទំនងរវាងប្រធានាធិបតីអាមេរិក លោក ចូ បៃដិន (Joe Biden) និងនាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) បានធ្លាក់ចុះដល់កម្រិតទាបមួយក្នុងសម័យសង្គ្រាម កាលពីថ្ងៃចន្ទ (២៥ មីនា) ដោយសហរដ្ឋអាមេរិក អនុញ្ញាតឱ្យអនុម័តសេចក្ដីសម្រេចបទឈប់បាញ់តំបន់ហ្កាហ្សា នៅអង្គការសហប្រជាជាតិ និងបានទាក់ទាញការស្តីបន្ទោសយ៉ាងខ្លាំងពីមេដឹកនាំអ៊ីស្រាអែល។លោក ណេតាន់យ៉ាហ៊ូ បានលុបចោលដំណើរទស្សនកិច្ចទៅកាន់ទីក្រុង វ៉ាស៊ីនតោន ក្នុងសប្តាហ៍នេះដែលដឹកនាំដោយគណៈប្រតិភូជាន់ខ្ពស់មួយរូប ដើម្បីពិភាក្សាអំពីការវាយលុករបស់អ៊ីស្រាអែលនៅក្នុងទីក្រុង រ៉ាហ្វា (Rafah) ភាគខាងត្បូងហ្កាហ្សា បន្ទាប់ពីសហរដ្ឋអាមេរិក បានអនុបវាទនៅក្នុងការបោះឆ្នោតក្រុមប្រឹក្សាសន្តិសុខ ដែលទាមទារឱ្យមានបទឈប់បាញ់ជាបន្ទាន់រវាងអ៊ីស្រាអែល និងក្រុមហាម៉ាស និងការដោះលែងចំណាប់ថ្នូរទាំងអស់ ដែលត្រូវបានចាប់ខ្លួនដោយពួកសកម្មប្រយុទ្ធប៉ាឡេស្ទីននេះ។ការផ្អាកកិច្ចប្រជុំនោះ បានដាក់ឧបសគ្គថ្មីដ៏ធំមួយនៅក្នុងផ្លូវនៃកិច្ចខិតខំប្រឹងប្រែងរបស់សហរដ្ឋអាមេរិក ដែលព្រួយបារម្ភអំពីគ្រោះមហន្តរាយមនុស្សធម៌ដ៏ស៊ីជម្រៅនៅក្នុងតំបន់ហ្កាហ្សា ដើម្បីឱ្យលោក ណេតាន់យ៉ាហ៊ូ ពិចារណាជម្រើសផ្សេងជំនួសការឈ្លានពានជើងគោកលើក្រុង រ៉ាហ្វា ដែលជាជម្រកសុវត្ថិភាពចុងក្រោយសម្រាប់ជនស៊ីវិលប៉ាឡេស្ទីន។ការគំរាមវាយលុកបែបនេះ បានបង្កើនភាពតានតឹងរវាងសម្ព័ន្ធមិត្តដ៏យូររបស់សហរដ្ឋអាមេរិក និងអ៊ីស្រាអែល ហើយបានចោទជាសំណួរថាតើសហរដ្ឋអាមេរិក អាចនឹងដាក់កម្រិតលើជំនួយយោធាឬយ៉ាងណា ប្រសិនបើលោក ណេតាន់យ៉ាហ៊ូ ប្រឆាំងនឹងលោក បៃដិន ហើយរឹងទទឹងបន្តទៅមុខជាមួយផែនការក្រុងរ៉ាហ្វានេះ៕

លោក ម៉ាក្រុង និយាយថា ក្រុមរដ្ឋអ៊ីស្លាម ដែលបានវាយប្រហាររុស្ស៊ី បានព្យាយាមវាយប្រហារបារាំង

2024/03/26 08:26:35 am        484
Facebook Telegram Linkin
លោកប្រធានាធិបតីបារាំង អេមម៉ានុយអែល ម៉ាក្រុង (Emmanuel Macron )បាននិយាយកាលពីថ្ងៃចន្ទថា ក្រុមខ្មាន់កាំភ្លើងដែលបានសម្លាប់មនុស្ស១៣៧នាក់ ក្នុងសាលប្រគំតន្ត្រីខាងក្រៅទីក្រុងមូស្គូ គឺជាផ្នែកមួយនៃសាខារបស់ក្រុមរដ្ឋអ៊ីស្លាម IS ដែលនៅពីក្រោយការប៉ុនប៉ងពុំបានសម្រេចក្នុងការវាយប្រហារនៅប្រទេសបារាំង កាលពីប៉ុន្មានខែមុន។ លោកម៉ាក្រុង និងលោកនាយករដ្ឋមន្ត្រី ហ្កាប្រ៊ីយ៉ែល អាតាល់ ( Gabriel Attal) បាននិយាយថា នេះជាមូលហេតុដែលរដ្ឋាភិបាលបារាំងកាលពីថ្ងៃអាទិត្យបានដំឡើងការព្រមានផ្នែកសន្តិសុខរបស់ប្រទេសនេះដល់កម្រិតខ្ពស់បំផុត ។ ទាហានជាច្រើនបន្ថែមទៀត នឹងត្រូវដាក់ពង្រាយត្រៀម និងល្បាតតំបន់នានាដែលប្រឈមគ្រោះថ្នាក់ខ្លាំង រួមទាំងសាលារៀនផងដែរ។ ក្រុមរដ្ឋអ៊ីស្លាម បាននិយាយថា ការវាយប្រហារនៅព្រឹត្តិការណ៍ប្រគតន្ត្រីនៅទីក្រុង មូស្គូ គឺជាស្នាដៃរបស់ពួកគេ។ លោកប្រធានាធិបតីបារាំងរូបនេះបាននិយាយថាការវាយប្រហារនេះ ត្រូវបានអះអាងដោយក្រុមរដ្ឋអ៊ីស្លាម ហើយហើយព័ត៌មាននេះ ដូចទៅនឹងទីភ្នាក់ងារចារកម្មរបស់យើង ព្រមទាំង ដៃគូរសំខាន់ៗ របស់យើងដែរ បានបង្ហាញថា គឺជារដ្ឋក្រុមរដ្ឋអ៊ីស្លាម ដែលបានរៀបផែនការ និងបានបើកការវាយប្រហារនេះ ។ លោកបានបន្ថែមថា ក្រុមនេះ ធ្លាប់បានប៉ុនប៉ងវាយប្រហារកាលពីប៉ុន្មានខែមុន នៅលើទឹកដីរបស់យើង ។ ក្រោយមកលោកអាតាល់ បាននិយាយថា ទាំងនេះ រួមបញ្ចូលទាំងកម្រោងវាយប្រហារលើទីក្រុង ស្ត្រាស្បើក (Strasbourg ក្នុងប្រទេសបារាំងភាគខាងកើត៕

អបអរសាទរខេត្តក្រចេះ ត្រូវបានប្រកាសជាខេត្តអស់មីន នៅទូទាំងព្រះរាជាណាចក្រកម្ពុជា

2024/03/26 07:26:58 am        345
Facebook Telegram Linkin
ថ្ងៃទី២៦ខែមីនា ឆ្នាំ២០២៤ គឹជាថ្ងៃប្រវត្តិសាស្រ្ត ដែលប្រជាជនខេត្តក្រចេះ បានទទួលនូវសេរីភាពរួចចាកផុតពីគំរាមកំហែងដោយសារមីន ហើយ ខេត្តក្រចេះ គឺជាខេត្តទី១៥ ដែលត្រូវប្រកាសជាខេត្តអស់មីននៅទូទាំងព្រះរាជាណាចក្រកម្ពុជា។រយៈពេល ២០ឆ្នាំ ចាប់ពីឆ្នាំ២០០៣ ដល់ឆ្នាំ២០២៣ នៃការងារបោសសម្អាតមីន និងសំណល់​ជាតិផ្ទុះ​ពីសង្រ្គាម ក្នុងទឹកដីខេត្តក្រចេះ មានប្រតិបត្តិករចំនួន ៣ រួមមាន មជ្ឈមណ្ឌលជាតិគ្រប់គ្រង​កងកម្លាំងរក្សាសន្តិភាព បោសសម្អាតមីន និងកាកសំណល់សង្រ្គាម មជ្ឈមណ្ឌលសកម្មភាព​កំចាត់មីនកម្ពុជា និងអង្គការហេឡូត្រាស់ បានបោសសម្អាតក្នុងទំហំផ្ទៃដីជាង ១៣៣ គីឡូម៉ែត្រការ៉េ ស្មើនឹង ៧៩៥ ចម្ការមីននិងគ្រាប់ ដោយរកឃើញ និងបានកំទេចចោលមីន និងសំណល់ជាតិ​ផ្ទុះផ្សេងទៀត​ប្រមាណ ៦ ម៉ឺនគ្រាប់ ព្រមទាំងផ្តល់ផលប្រយោជន៍ជូន​ប្រជាពលរដ្ឋជិត ៤០ ម៉ឺននាក់។សមិទ្ធផលខេត្តក្រចេះអស់មីន គឺជាសមិទ្ធផលមួយក្នុងចំណោមសមិទ្ធផលជាច្រើនទៀត​ក្នុង​រយៈពេលជាង ៦ខែ នៃរាជរដ្ឋាភិបាលអាណត្តិទី៧ ដោយទទួលបានការគាំទ្រផ្នែក​ហិរញ្ញវត្ថុពីមូលនិធិកម្ពុជាគ្មានមីនឆ្នាំ២០២៥ និងគម្រោងសម្តេចតេជោសម្រាប់សកម្មភាពមីន រួមជាមួយនឹងការចូលរួមដ៏សប្បុរសបណ្តាប្រទេសជាមិត្ត ដៃគូអភវិឌ្ឍន៍ និងសប្បុរសជននានា ៕

សម្តេចធិបតី ហ៊ុន ម៉ាណែត អនុញ្ញាតឱ្យប្រធានសមាគមមិត្តភាពឡាវ-កម្ពុជា ចូលជួបសម្តែងការគួរសម និងពិភាក្សាការងារនៅរដ្ឋធានីវៀងចន្ទន៍

2024/03/26 07:10:50 am        283
Facebook Telegram Linkin
នារសៀល ថ្ងៃទី២៥ ខែមីនា ឆ្នាំ២០២៤ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានអនុញ្ញាតឱ្យ ឯកឧត្តម ខាំបៃ ដាំឡាត់ (Khambai Damlat) ប្រធានសមាគមមិត្តភាពឡាវ-កម្ពុជា ចូលជួបសម្តែងការគួរសម និងពិភាក្សាការងារ ក្នុងឱកាសនៃដំណើរបំពេញទស្សនកិច្ចផ្លូវការ នៅសាធារណរដ្ឋប្រជាធិបតេយ្យប្រជាមានិតឡាវ នៅថ្ងៃទី២៥-២៦ ខែមីនា ឆ្នាំ២០២៤។ ក្នុងឱកាសនៃជំនួប ឯកឧត្តម ខាំបៃ ដាំឡាត់ បានថ្លែងអំណរគុណចំពោះសម្តេចធិបតី ដែលបានឆ្លៀតពេលវេលាដ៏មមាញឹកអនុញ្ញាតឱ្យរូបឯកឧត្តម និងសហការីបានចូលជួបសម្តែងការគួរសម ព្រមទាំងបានអបអរសាទរចំពោះសម្ដេចធិបតី ដែលត្រូវបានរដ្ឋសភាបោះឆ្នោតជ្រើសតាំងជានាយករដ្ឋមន្រ្តី នៃព្រះរាជាណាចក្រកម្ពុជា នីតិកាលទី៧ កាលពីខែសីហា ឆ្នាំ២០២៣ កន្លងទៅនេះ ដើម្បីដឹកនាំប្រទេសកម្ពុជាឆ្ពោះទៅរកការអភិវឌ្ឍបន្ថែមទៀត។ ឯកឧត្តមប្រធានសមាគម ក៏បានអបអរសាទរចំពោះសមិទ្ធផលរបស់រាជរដ្ឋាភិបាលកម្ពុជា ក៏ដូចជាការធ្វើឱ្យជីវភាពរបស់ប្រជាជនមានភាពរីកចម្រើនកាន់តែប្រសើរ។ ព្រមជាមួយគ្នានេះ ឯកឧត្តមប្រធានសមាគម បានវាយតម្លៃខ្ពស់ចំពោះដំណើរទស្សនកិច្ចរបស់សម្ដេចធិបតីមកកាន់ប្រទេសឡាវនាឱកាសនេះ ហើយមានជំនឿជាក់ថា ដំណើរទស្សនកិច្ចនេះនឹងរួមចំណែកក្នុងការលើកពង្រឹងនិងពង្រីកទំនាក់ទំនង កិច្ចសហប្រតិបត្តិការ និងមិត្តភាពរវាងប្រទេសទាំងពីរបន្ថែមទៀត។ ឯកឧត្តមប្រធានសមាគម បានគោរពរាយការណ៍ជូនសម្ដេចធិបតី អំពីសកម្មភាពសំខាន់ៗមួយចំនួន និងរចនាសម្ព័ន្ធរបស់សមាគមមិត្តភាពឡាវ-កម្ពុជាផងដែរ។ជាការឆ្លើយតប សម្ដេចធិបតី បានវាយតម្លៃខ្ពស់ចំពោះកិច្ចការរបស់សមាគមមិត្តភាពកម្ពុជា-ឡាវ និងឡាវ-កម្ពុជា ព្រមទាំងបានវាយតម្លៃខ្ពស់ផងដែរចំពោះឯកឧត្តមប្រធានសមាគមមិត្តភាពឡាវ-កម្ពុជា ដែលបានរួមចំណែកពង្រឹងទំនាក់ទំនងរវាងប្រទេសកម្ពុជា និងឡាវនាពេលកន្លងមក។ សម្តេចធិបតី បានលើកទឹកចិត្តឱ្យសមាគមមិត្តភាពទាំងពីរខិតខំបន្តក្នុងការលើកកម្ពស់ទំនាក់ទំនងប្រជាជន និងប្រជាជននៃប្រទេសទាំងពីរ ជាពិសេសប្រជាជនដែលរស់នៅតាមបណ្តាខេត្តដែលជាប់ព្រំដែនផងដែរ។ ទន្ទឹមនេះ សម្តេចធិបតី បានគូសបញ្ជាក់អំពីសារៈសំខាន់នៃការជំរុញការប្រាស្រ័យទាក់ទងរវាងប្រជាពលរដ្ឋនៃប្រទេសទាំងពីរ ដែលនឹងរួមចំណែកលើកកម្ពស់ថែមទៀតនូវពាណិជ្ជកម្ម ទេសចរណ៍ និងវិស័យសំខាន់ៗដទៃទៀតរបស់ប្រទេសទាំងពីរ។ មុននឹងបញ្ចប់ សម្តេចធិបតី បានសង្កត់ធ្ងន់ផងដែរថា សក្តានុពលនៃកម្ពុជា និងឡាវនៅមានច្រើន និងលើកទឹកចិត្តសមាគមមិត្តភាពរវាងប្រទេសទាំងពីរខិតខំធ្វើសកម្មភាពបន្ថែមទៀតក្នុងការសម្របសម្រួលឱ្យមានការតភ្ជាប់រវាងប្រទេសទាំងពីរកាន់តែច្រើន៕

រដ្ឋមន្ត្រីហ្វីលីពីន ហ៊ានជំរុញចិន ឱ្យដាក់ការទាមទារអធិបតេយ្យភាពដែនសមុទ្រទៅតុលាការមជ្ឈត្តកម្ម

2024/03/25 02:06:05 pm        125
Facebook Telegram Linkin
រដ្ឋមន្ត្រីការពារជាតិហ្វីលីពីន នៅថ្ងៃចន្ទ (២៥ មីនា) នេះ បានរុញឱ្យប្រទេសចិន យកការទាមទារអធិបតេយ្យភាពរបស់ខ្លួននៅក្នុងសមុទ្រចិនខាងត្បូង ទៅកាន់តុលាការមជ្ឈត្តកម្មអន្តរជាតិ ប្រសិនបើចិនមានភាពក្លាហានធ្វើបែបនោះ បន្ទាប់ពីការប្រឈមមុខដាក់គ្នាមួយទៀតកាលពីចុងសប្តាហ៍ ប៉ុន្តែបាននិយាយថាទីក្រុងម៉ានីល នឹងមិនរាថយចំពោះជំហររបស់ខ្លួនឡើយ។ហ្វីលីពីន បានចោទប្រកាន់ឆ្មាំល្បាតឆ្នេរចិន ថាបានប្រើប្រាស់កាណុងបាញ់ទឹកប្រឆាំងនឹងទូកស៊ីវិលដែលផ្គត់ផ្គង់កងទ័ពឈរជើងលើនាវាចម្បាំង មានមូលដ្ឋាននៅដែនទឹក សេខិន ថូម៉ាស ស្ហូល (Second Thomas Shoal) ដែលមានជម្លោះ ដោយបានធ្វើឱ្យខូចខាតដល់ទូកផ្គត់ផ្គង់ឡើងវិញ និងធ្វើឱ្យនាវិកមួយចំនួនរងរបួស។រដ្ឋមន្ត្រីការពារជាតិហ្វីលីពីន លោក ហ្គីលប៊ឺតតូ តេអូដូរ៉ូ (Gilberto Teodoro) បានប្រាប់អ្នកសារព័ត៌មានថា «ប្រសិនបើចិនមិនខ្លាចក្នុងការបញ្ជាក់ការអះអាងរបស់ខ្លួនទៅកាន់ពិភពលោក ហេតុអ្វីបានជាមិនយកការអះអាងនោះទៅតុលាការមជ្ឈត្តកម្មដើម្បីសម្រេចនៅក្រោមច្បាប់អន្តរជាតិទៅ»។ ប្រទេសចិនបានទាមទារសមុទ្រចិនខាងត្បូងស្ទើរតែទាំងមូលជាកម្មសិទ្ធិរបស់ខ្លួន រួមទាំងដែនទឹក សេខិន ថូម៉ាស ស្ហូល ដែលស្ថិតនៅក្នុងតំបន់សេដ្ឋកិច្ចផ្តាច់មុខ ចំងាយ ៣២០ គីឡូម៉ែត្ររបស់ហ្វីលីពីន។ទីក្រុងប៉េកាំង បានដាក់ពង្រាយនាវាឆ្មាំល្បាតឆ្នេររាប់រយគ្រឿងនៅទូទាំងសមុទ្រចិនខាងត្បូង ដើម្បីល្បាតនូវអ្វីដែលខ្លួនចាត់ទុកថាជាទឹកដីរបស់ខ្លួន ទោះបីជាតុលាការមជ្ឈត្តកម្មអចិន្ត្រៃយ៍បានបញ្ជាក់យ៉ាងច្បាស់ក្នុងឆ្នាំ២០១៦ ថាការទាមទារដ៏ធំរបស់ខ្លួននេះមិនមានមូលដ្ឋាននៅក្រោមច្បាប់អន្តរជាតិក៏ដោយ៕

បណ្ដាញសង្គម

ព័ត៌មានថ្មីៗ

មនុស្ស ៣នាក់ស្លាប់ នៅប្រទេសបារាំង ខណៈសីតុណ្ហភាពកើនឡើងជាង ៤០អង្សាសេ អំឡុងរលកកម្តៅនៅអឺរ៉ុប
06/22/2026 08:06 PM
Facebook Telegram Linkin
តំបន់គ្រីមៀ ផ្អាកការបោះជំរំរដូវក្តៅរបស់ក្មេងៗ ខណៈការវាយប្រហាររបស់អ៊ុយក្រែនធ្វើឲ្យជួបកង្វះខាតប្រេង
06/22/2026 08:06 PM
Facebook Telegram Linkin
អ្នកការទូតជាន់ខ្ពស់​របស់ចិន ជួបអនុប្រធានសន្តិសុខអ៊ីរ៉ង់ ក្រោយកិច្ច​​ពិភាក្សាជាមួយ​អាមេរិក នៅ​ស្វីស​
06/22/2026 08:06 PM
Facebook Telegram Linkin
វិមានក្រឹមឡាំង ចោទប្រកាន់អ៊ុយក្រែនថា បាន​គំរាមកំហែងដល់អធិបតេយ្យភាពរបស់បេឡារុស
06/22/2026 08:06 PM
Facebook Telegram Linkin
អតីតរដ្ឋមន្រ្តីដឹកជញ្ជូនអេស្ប៉ាញ ត្រូវបានកាត់ទោសឲ្យជាប់ពន្ធនាគាររយៈពេល ២៤ឆ្នាំ ក្នុងករណីពុករលួយ
06/22/2026 08:06 PM
Facebook Telegram Linkin
កងទ័ពស៊ូដង់ទទួលយកអ្នករត់ចោលជួររបស់កងកម្លាំង RSF នៅ Darfur បង្កការខឹងសម្បារនៅក្នុងចំណោមពលរដ្ឋ
06/22/2026 08:06 PM
Facebook Telegram Linkin
ទីក្រុងប៉េកាំងប្ដេជ្ញា​ពង្រឹងទំនាក់ទំនងជាមួយបង់ក្លាដែស ខណៈនាយករដ្ឋមន្ត្រីគ្រោងទស្សនកិច្ចនៅចិន
06/22/2026 07:06 PM
Facebook Telegram Linkin
ទីក្រុងមូស្គូបាញ់ទម្លាក់យានដ្រូនក្រុងគីវជាង ៨០គ្រឿង ខណៈការវាយប្រហាររុស្ស៊ីសម្លាប់មនុស្ស ៦នាក់នៅអ៊ុយក្រែន
06/22/2026 07:06 PM
Facebook Telegram Linkin
ទីភ្នាក់ងារប្រឆាំងអំពើពុករលួយម៉ាឡេស៊ី បើកការស៊ើបអង្កតករណីផ្ទេរដំរីទៅកាន់សួនសត្វជប៉ុន
06/22/2026 07:06 PM
Facebook Telegram Linkin
ប្រភព៖ ឥណ្ឌាកំពុងចរចាលក់មីស៊ីលល្បឿនលឿនជាងសំឡេង BrahMos ទៅអារ៉ាប់រួម
06/22/2026 07:06 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.