នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
BREAKING NEWS|កម្ពុជាចាត់ទុកផែនការថៃចង់ដណ្តើមប្រាសាទតាក្របី និងបិទប្រាសាទតាមាន់ធំគឺជាការប៉ុនប៉ងឈ្លានពានកម្ពុជាគិតទុកជាមុន និងមិនគោរពបទឈប់បាញ់
សម្ដេចតេជោ៖សង្គ្រាមព្រំដែនកម្ពុជា-ថៃបានផ្ទេរពីសង្គ្រាមប្រើប្រាស់អាវុធមកជាសង្រ្គាម ប្រើប្រាស់ជំពាមកៅស៊ូ ខណៈបើពិនិត្យឲ្យសុីជម្រៅវាជារឿងធំ ប្រសិនបើមិនទប់ស្កាត់
ឯកឧត្តម ចាន់ ដារ៉ុង ដឹកនាំគណៈកម្មការ​អន្តរ​ក្រសួង​ចុះ​ពិនិត្យ​វាយ​តម្លៃ​បញ្ចប់​សុពល​ភាព​ការងារ​ថែ​ទាំ​ផ្លូវ​ខួបចំនួន ៣កំណាត់ ក្នុងខេត្តពោធិ៍សាត់
BREAKING NEWS! សម្តេចធិបតី អបអរសាទរចំពោះការប្រព្រឹត្តទៅដោយជោគជ័យ​នូវ​កិច្ច​ប្រជុំ​​វិសាមញ្ញ នៃ​គណៈកម្មាធិកា​រ​ព្រំដែន​ទូទៅកម្ពុជា-ថៃ

នយោបាយ​ និង ការអភិវឌ្ឍន៍

លោក Trump ព្រមានពីការបង្ហូរឈាម ប្រសិនបើលោកចាញ់ការបោះឆ្នោតប្រធានាធិបតីនៅឆ្នាំនេះ

2024/03/18 02:32:45 pm        132
Facebook Telegram Linkin
លោក Donald Trump បានព្រមានពីការបង្ហូរឈាម ប្រើសិនបើលោកបរាជ័យការបោះឆ្នោតប្រធានាធិបតីនៅក្នុងខែច្ឆិកាឆ្នាំ២០២៤នេះ។អតីតប្រធានាធិបតីរូបនេះ បានបញ្ឆេះភាពតានតឹងឡើងវិញ ខណៈលោកថ្លែងទៅកាន់ក្រុមអ្នកគាំទ្រនៅការជួបជុំក្នុងរដ្ឋអូហៃយ៉ូ (Ohio) កាលពីថ្ងៃសៅរ៍។ លោកនិយាយថា ប្រសិនបើលោកមិនជាប់ឆ្នោត នោះនឹងនាំឲ្យមានការបង្ហូរឈាមសម្រាប់ប្រទេសនេះ។គេមិនច្បាស់ថាតើការប្រើពាក្យបង្ហូរឈាមរបស់លោកពេលនោះមានន័យយ៉ាងណានោះទេ នៅក្នុងសុន្ទរកថារបស់លោកនៅពាក់កណ្តាលនៃការអត្ថាធិប្បាយអំពីការគំរាមកំហែងដល់ឧស្សាហកម្មរថយន្តរបស់សហរដ្ឋអាមេរិក។លោក Trump នៅតែច្រានចោលថាលោកមិនបានចាញ់ឆ្នោតកាលពីឆ្នាំ២០២០ ទេ និងបានសន្យារំដោះអ្នកគាំទ្រពីពន្ធនាគារដែលបានជាប់ចោទពីបទទំលាយចូលវិមាន Capitol ក្នុងកុបកម្មកាលពីថ្ងៃទី៦មករា។ អតីតប្រធានាធិបតីរូបនេះ កំពុងប្រឈមនឹងការចោទប្រកាន់ជាច្រើនករណីពាក់ព័ន្ធនឹងការព្យាយាមបង្វែរលទ្ធផលចាញ់របស់លោកកាលពីឆ្នាំ២០២០។ រដ្ឋអាជ្ញាពិសេសលោក Jack Smith បានចោទប្រកាន់រូបលោកពីបទឧក្រិដ្ឋកម្មចំនួនបួន រួមទាំងការឃុបឃិតក្នុងការក្លែងបន្លំរដ្ឋាភិបាលសហរដ្ឋអាមេរិក និងការសមគំនិតដើម្បីរារាំងដំណើរការផ្លូវការបញ្ជាក់ពីសភាចំពោះជ័យជំនះរបស់លោក Joe Biden ។ លោក Donald Trump បានវាយប្រហារលោកប្រធានាធិបតីអាមេរិក Joe Biden ថាជាមនុស្សល្ងង់៕

អន្តរជាតិមានប្រតិកម្មចម្រុះគ្នាចំពោះលទ្ធផលនៃការបោះឆ្នោតប្រធានាធិបតីរបស់រុស្ស៊ី

2024/03/18 02:25:26 pm        168
Facebook Telegram Linkin
រដ្ឋាភិបាលបរទេស និងក្រុមមន្ត្រី ជាច្រើនមានប្រតិកម្មមិនពេញចិត្តការបោះឆ្នោតប្រធានាធិបតីរុស្ស៊ី ដែលបានផ្តល់ឱ្យលោក វ្ល៉ាឌីមៀ ពូទីន នូវជ័យជម្នះដ៏លើសលប់ក្នុងសំឡេងគាំទ្រលើស ៨៧ ភាគរយ និងអាណត្តិរយៈពេលប្រាំមួយឆ្នាំទៀតនៅក្នុងតំណែងកំពូល នេះបើយោងតាមលទ្ធផលផ្លូវការដំបូងកាលពីថ្ងៃអាទិត្យ (១៧ មីនា) ខណៈបណ្ដាប្រទេសមួយចំនួនបានអបអរសាទរជ័យជម្នះដែលបានរំពឹងទុកមួយនេះ។អាមេរិក អ៊ុយក្រែន អង់គ្លេស ប៉ូឡូញ ស្លូវ៉ាគី និងអាល្លឺម៉ង់ បានរិះគន់លទ្ធផលនេះ ដោយនិយាយថា ការបោះឆ្នោតនោះពិតជាមិនសេរី និងយុត្តិធម៌ទេ ដោយសារលោក ពូទីន បានចាប់អ្នកប្រឆាំងនយោបាយដាក់ពន្ធនាគារទាំងអស់ និងរារាំងអ្នកផ្សេងពីការបោះឆ្នោតប្រឆាំងនឹងខ្លួន។រដ្ឋមន្ត្រីការបរទេសអង់គ្លេស លោក ដេវីដ កាម៉េរ៉ូន (David Cameron) បានបង្ហោះក្នុងបណ្ដាញសង្គម X ថា រុស្ស៊ី បានរៀបចំការបោះឆ្នោតដោយខុសច្បាប់ នៅលើទឹកដីអ៊ុយក្រែន ជាមួយនឹងកង្វះជម្រើសសម្រាប់អ្នកបោះឆ្នោត ហើយនេះមិនមែនជាអ្វីដែលការបោះឆ្នោតសេរី និងយុត្តិធម៌ គួរតែត្រូវធ្វើឡើងទេ»។ ដោយឡែក បណ្ដាមេដឹកនាំរបស់ប្រទេសបូលីវី គុយបា និងវេណេហ៊្សុយអេឡា បានអបអរសាទរលោក ពូទីន ចំពោះជ័យជម្នះរបស់លោក ដោយនិយាយថាការឈ្នះឆ្នោតនេះបង្ហាញថាប្រជាំជនរុស្ស៊ី ពេញចិត្តនឹងរដ្ឋបាលរបស់លោក ហើយថារយៈពេលបីថ្ងៃនៃដំណើរការបោះឆ្នោតនោះប្រកបដោយភាពប្រជាធិបតេយ្យបំផុត ខណៈបេជ្ញាពង្រឹងចំណងទំនាក់ទំនងរវាងប្រទេសរបស់ពួកគេជាមួយរុស្ស៊ី៕

រដ្ឋបាលខេត្តព្រះវិហារ បើកយុទ្ធនាការធ្វើតេស្តទឹកម៉ូតរកសារធាតុញៀន ដល់ថ្នាក់ដឹកនាំ មន្ត្រីរាជការ និងមន្ត្រីជាប់កិច្ចសន្យា

2024/03/18 01:50:47 pm        128
Facebook Telegram Linkin
នៅព្រឹកថ្ងៃទី១៨ ខែមីនា ឆ្នាំ២០២៤នេះ រដ្ឋបាលខេត្តបានរៀបចំបើកយុទ្ធនាការធ្វើតេស្តទឹកម៉ូតរកសារធាតុញៀនដល់ថ្នាក់ដឹកនាំ មន្ត្រីរាជការ និងមន្ត្រីជាប់កិច្ចសន្យានៃសាលា ខេត្តព្រះវិហារ ដែលប្រព្រឹត្តទៅនៅសាលប្រជុំសាលាខេត្តជាន់ទី៣ ក្រោមអធិបតីភាព ឯកឧត្តម ប្រាក់ សុវណ្ណ ប្រធានក្រុមប្រឹក្សាខេត្ត ឯកឧត្តម គីម រិទ្ធី អភិបាលនៃគណៈអភិបាលខេត្ត និងមានការអញ្ជើញ​ចូលរួម​ពីសំណាក់ អភិបាលរងខេត្ត មន្ត្រីរាជការ និងមន្ត្រីជាប់កិច្ចសន្យាជាច្រើនរូប។ការធ្វើតេស្តរកសារធាតុញៀននេះ ដោយអនុវត្តតាមបទបញ្ជាលេខ ​០១បប ចុះថ្ងៃទី២០ ខែកុម្ភៈ ឆ្នាំ២០២៤ របស់រាជរដ្ឋាភិបាលកម្ពុជា​ ស្តីពីការដាក់ចេញវិធានការម៉ឺងម៉ាត់ក្នុងការ ប្រយុទ្ធប្រឆាំង​គ្រឿងញៀនខុសច្បាប់ នៅតាមក្រសួង ស្ថាប័ន និងរដ្ឋបាលថ្នាក់ក្រោមជាតិ និងត្រូវចាត់វិធានការ​បញ្ចប់​មុខតំណែង និងបណ្តេញចេញពីក្របខ័ណ្ឌ ដោយគ្មានការលើកលែង ចំពោះមន្ត្រីរាជការ​ស៊ីវិល មន្ត្រីនគរបាលជាតិ និងយោធិន ព្រមទាំងមន្ត្រីជាប់កិច្ចសន្យាណា ដែលត្រូវបានរកឃើញថា មានការប្រើប្រាស់គ្រឿងញៀនខុសច្បាប់ ឬមានការពាក់ព័ន្ធនឹងគ្រឿង ញៀនខុសច្បាប់។ ក្នុងឱកាសនោះ ឯកឧត្តម គីម រិទ្ធី បានឱ្យដឹងថា ការធ្វើតេស្តរកសាធាតុញៀនលើ មន្ត្រីរាជការ និងមន្ត្រីជាប់កិច្ចសន្យានាពេលនេះ ​ដើម្បីចូលរួមចំណែកធានាប្រសិទ្ធភាពនៃការ អនុវត្តយុទ្ធនាការ​ប្រឆាំងគ្រឿងញៀនខុសច្បាប់លើកទី៩ ​ដែលជាអាទិភាពនយោបាយរបស់ រាជរដ្ឋាភិបាល ក៏ដូចជាការលើកកម្ពស់ជំនឿទុកចិត្តប្រសិទ្ធភាពការងារ និងអភិបាលកិច្ចល្អ នៅក្នុងស្ថាប័ន មន្ទីរ អង្គភាព ជុំវិញខេត្ត។ ឯកឧត្តម ក៏បានណែនាំដល់មន្ត្រីទាំងអស់សូមកុំពាក់ព័ន្ធ និងប្រើប្រាស់គ្រឿងញៀន ព្រោះច្បាប់គ្មាន​ការយោគយល់ ឬលើកលែងឡើយ។​ សូមបញ្ជាក់ ផងដែរថា​ ការធ្វើតេស្តទឹកម៉ូតដល់ថ្នាក់ដឹកនាំ មន្រ្តីរាជការ ​និងមន្រ្តីកិច្ចសន្យា សាលាខេត្ត សរុបចំនួន ១២៥នាក់ ជាលទ្ធផលអវិជ្ជមាន១២៥នាក់។

ស្ត្រីមេម៉ាយរបស់លោក Navalny និងជនជាតិរុស្ស៊ីផ្សេងទៀត នៅទីក្រុងប៊ែរឡាំង បោះឆ្នោតតវ៉ាប្រឆាំង លោក ពូទីន

2024/03/18 01:20:26 pm        118
Facebook Telegram Linkin
ស្ត្រីមេម៉ាយរបស់អតីតមេដឹកនាំប្រឆាំងរុស្ស៊ី លោក Alexei Navalny និងជនជាតិរុស្ស៊ីជាច្រើននាក់ទៀតបានបោះឆ្នោតតវ៉ាប្រឆាំងប្រធានាធិបតី លោក Vladimir Putin នៅស្ថានទូតរុស្ស៊ីក្នុងរដ្ឋធានីរបស់ប្រទេសអាល្លឺម៉ង់ កាលពីថ្ងៃអាទិត្យ។ លោកស្រី យូលៀ ណាវ៉ាល់ណាយ៉ា(Yulia Navalnaya) បានរង់ចាំក្នុងជួរយ៉ាងយូរ ដើម្បីបោះឆ្នោតជ្រើសរើសប្រធានាធិបតីរុស្ស៊ី នៅស្ថានទូតរបស់ប្រទេស ក្នុងទីក្រុងប៊ែរឡាំង។ ថ្ងៃអាទិត្យ គឺជាថ្ងៃចុងក្រោយនៃការបោះឆ្នោត។ ប្រជាជនរុស្ស៊ី ក្នុងបេសកកម្មការទូត បានស្រែកដើម្បីបង្ហាញពីសាមគ្គីភាពរបស់ពួកគេជាមួយលោកស្រី Navalnaya។ ពួកគេ ក៏បានទាមទារឲ្យវិមានក្រឹមឡាំង បញ្ឈប់ប្រតិបត្តិការយោធានៅអ៊ុយក្រែនជាបន្ទាន់ផងដែរ។លោកស្រី Navalnaya បានអរគុណដល់ជនរួមជាតិរបស់លោកស្រី ដែលបានមកចូលរួមក្នុងការតវ៉ា។ លោកស្រីនិយាយថា លោកស្រី បានសរសេរឈ្មោះស្វាមីរបស់លោកស្រីនៅលើសន្លឹកឆ្នោត ហើយដាក់ក្នុងប្រអប់សន្លឹកឆ្នោត។ នៅមុនការបោះឆ្នោត លោកស្រី Navalnaya បានជំរុញប្រជាជនឱ្យតវ៉ាប្រឆាំង លោក ពូទីន ដោយការប្រមូលផ្តុំមហាជននៅការិយាល័យបោះឆ្នោត កាលពីពេលថ្ងៃត្រង់ ថ្ងៃអាទិត្យ។ លោកស្រី បានអំពាវនាវឱ្យពួកគេគូសចោលសន្លឹកឆ្នោត ឬបោះឆ្នោតឱ្យបេក្ខជនណាមួយ លើកលែងតែលោកពូទីន សរសេរឈ្មោះលោក Navalny នៅលើសន្លឹកឆ្នោតរបស់ពួកគេ។ អ្នកបោះឆ្នោតរុស្ស៊ីអាយុ ២៦ឆ្នាំម្នាក់ បាននិយាយថាលោកមិននឹកស្មានថាបានឃើញមនុស្សក្នុងជួរដ៏វែងបែបនេះរង់ចាំបោះឆ្នោតនៅក្នុងការបោះឆ្នោតប្រធានាធិបតីរុស្ស៊ី ក្នុងរដ្ឋធានីប្រទេសអាល្លឺម៉ង់ទេ។ លោកនិយាយថា អ្នកបោះឆ្នោតភាគច្រើន ប្រឆាំង លោកពូទីន។ ស្រ្តីជនជាតិរុស្ស៊ីអាយុ ២៥ ឆ្នាំម្នាក់ បាននិយាយថា លោកពូទីន គឺជា មនុស្សអាក្រក់ខ្លាំង ជាអ្នកដែលបាន សម្លាប់មនុស្សជាច្រើននាក់។ នាង និយាយថា នាងមានការខកចិត្តជាខ្លាំងដែលរុស្ស៊ី មិនអាចរៀបចំការបោះឆ្នោតពិតប្រាកដបាន។

ក្រុមអ្នកវិភាគ៖ កូនស្រីរបស់លោក គីម ជុងអ៊ុន ទំនងជាអ្នកស្នងតំណែងមេដឹកនាំរបស់កូរ៉េខាងជើង

2024/03/18 01:16:47 pm        125
Facebook Telegram Linkin
ក្រុមអ្នកវិភាគបាននិយាយថា សារព័ត៌មានរដ្ឋកូរ៉េខាងជើងកាលពីថ្ងៃសៅរ៍ (១៦ មីនា) បានហៅកូនស្រីវ័យជំទង់របស់មេដឹកនាំ លោក គីម ជុងអ៊ុន ថាជា «អ្នកដឹកនាំដ៏អស្ចារ្យ» ដែលជាធម្មតាជានាមទុកសម្រាប់ប្រើប្រាស់ហៅមេដឹកនាំជាន់ខ្ពស់ និងប្រាប់ពីឋានៈរបស់កូនស្រីរបស់ គីម ថាជាអ្នកស្នងតំណែង ដែលអាចទៅរួចបន្ទាប់ពីឪពុករបស់ខ្លួន។ក្រុមអ្នកវិភាគបាននិយាយថា នេះជាលើកទីមួយហើយដែលកូនស្រីរបស់លោក គីម ដែលមិនធ្លាប់ត្រូវបញ្ចេញឈ្មោះដោយប្រព័ន្ធផ្សព្វផ្សាយរដ្ឋរបស់ទីក្រុងព្យុងយ៉ាង ប៉ុន្តែត្រូវបានគេកំណត់អត្តសញ្ញាណដោយភ្នាក់ងារស៊ើបការណ៍កូរ៉េខាងត្បូង ថាឈ្មោះ ជូអេ (Ju Ae) ត្រូវបានពិពណ៌នាក្នុងឋានៈដ៏ខ្ពង់ខ្ពស់បែបនោះដោយកូរ៉េខាងជើង។នាង ជូអេ ត្រូវបានណែនាំទៅកាន់ពិភពលោកជាលើកដំបូងដោយប្រព័ន្ធផ្សព្វផ្សាយរដ្ឋរបស់ទីក្រុងព្យុងយ៉ាង ក្នុងឆ្នាំ២០២២ នៅពេលដែលនាងអមដំណើរឪពុករបស់ខ្លួនងក្នុងការបាញ់បង្ហោះមីស៊ីលបាលិស្ទិក។ ចាប់តាំងពីពេលនោះមក នាងត្រូវបានគេឃើញបង្ហាញវត្តមានក្នុងពិធីផ្លូវការជាច្រើនរបស់ឪពុកខ្លួន រួមទាំងការធ្វើសមយុទ្ធយោធា ដំណើរទស្សនកិច្ចទៅកាន់រោងចក្រផលិតអាវុធ ដំណើរសំចតនៅកសិដ្ឋានចិញ្ចឹមមាន់ថ្មី និងក្បួនដង្ហែរយោធាជាដើម។ទីក្រុងសេអ៊ូល បានបង្ហាញពីដំបូងថាលោក គីម និងភរិយារបស់ខ្លួន គឺលោកស្រី រី សូលជូ (Ri Sol Ju) ដែលបានរៀបការក្នុងឆ្នាំ២០០៩ មានកូនដំបូងប្រុសម្នាក់ក្នុងឆ្នាំ២០១០ ហើយ ជូអេ ជាកូនទីពីររបស់ពួកគេ ប៉ុន្តែកាលពីឆ្នាំមុន រដ្ឋមន្ត្រីបង្រួបបង្រួមរបស់ទីក្រុងសេអ៊ូល បាននិយាយថា រដ្ឋាភិបាល «មិនអាចបញ្ជាក់បានច្បាស់ទេ» អំពីអត្ថិភាពរបស់កូនប្រុសលោក គីម ជុងអ៊ុន៕

យោធាកូរ៉េខាងត្បូងនិយាយថា កូរ៉េខាងជើង បាញ់មីស៊ីលបាលីស្ទីក

2024/03/18 12:06:53 pm        165
Facebook Telegram Linkin
ប្រទេសកូរ៉េខាងជើង បានបាញ់មីស៊ីលបាលីស្ទីក ចូលទៅក្នុងសមុទ្រនៅថ្ងៃច័ន្ទនេះ ជាលើកដំបូងក្នុងរយៈពេលពីរខែមកនេះ នៅក្នុងពេលដែលរដ្ឋមន្ត្រីការបរទេសសហរដ្ឋអាមេរិក លោក Antony Blinken កំពុងបំពេញទស្សនកិច្ចនៅទីក្រុងសេអ៊ូល ដើម្បីចូលរួមសន្និសីទដែលរៀបចំដោយប្រធានាធិបតី លោក Yoon Suk Yeol ស្តីពីការជំរុញលទ្ធិប្រជាធិបតេយ្យ។ យោធារបស់ប្រទេសកូរ៉េខាងត្បូង បាននិយាយថា មីស៊ីលនេះត្រូវបានបាញ់ទៅកាន់ភាគខាងកើតនៃឧបទ្វីបកូរ៉េ។ ឆ្មាំឆ្នេររបស់ប្រទេសជប៉ុន បានរាយការណ៍ពីការបាញ់បង្ហោះនេះ ជាអ្វីដែលខ្លួនបាននិយាយថាទំនងជាមីស៊ីលបាលីស្ទីក របស់ប្រទេសកូរ៉េខាងជើង ហើយបានបញ្ជាក់ថាវាបានធ្លាក់រួចទៅហើយ។ ក្រោយមក ប្រទេសជប៉ុនបាននិយាយថា ខ្លួនបានរកឃើញអ្វីដែលទំនងជាការបាញ់មីស៊ីលបាលីស្ទីកលើកទីពីរ ធ្វើឡើងដោយប្រទេសកូរ៉េខាងជើង ហើយក៏បានធ្លាក់នៅខាងក្រៅតំបន់សេដ្ឋកិច្ចផ្តាច់មុខរបស់ខ្លួន។ យោធារបស់ប្រទេសកូរ៉េខាងជើង បានធ្វើសមយុទ្ធដោយប្រើអាវុធធម្មតា ក្នុងប៉ុន្មានសប្តាហ៍ថ្មីៗនេះ ដែលជារឿយៗត្រូវបានពិនិត្យដោយផ្ទាល់ពីមេដឹកនាំរដ្ឋឯកោមួយនេះ គឺលោក Kim Jong Un ។ ការបង្ហាញកម្លាំងដោយទីក្រុងព្យុងយ៉ាង កើតមានឡើងខណៈយោធាប្រទេសកូរ៉េខាងត្បូង និងសហរដ្ឋអាមេរិក បានធ្វើសមយុទ្ធយោធារួមគ្នាប្រចាំឆ្នាំទ្រង់ទ្រាយធំរយៈពេល ១០ ថ្ងៃ ដែលបានបញ្ចប់ទៅកាលពីថ្ងៃព្រហស្បតិ៍ សប្តាហ៍មុន។ កាលពីថ្ងៃអាទិត្យ យោធាកូរ៉េខាងត្បូង ក៏បានចល័តកងម៉ារីន ឧទ្ធម្ភាគចក្រវាយប្រហារ និងយានយន្តវាយប្រហារទាំងក្នុងទឹកនិងលើគោក នៅក្នុងសមយុទ្ធដែលមានគោលបំណងបង្កើនចំនួនកងទ័ព ដើម្បីពង្រឹងកម្លាំងនៅកោះភាគខាងលិច ក្បែរព្រំដែនសមុទ្រជាមួយប្រទេសកូរ៉េខាងជើង។ នៅក្នុងការបាញ់បង្ហោះមីស៊ីលបាលីស្ទីកចុងក្រោយរបស់ខ្លួន កាលពីថ្ងៃទី ១៤ ខែមករា ប្រទេសកូរ៉េខាងជើងបានបាញ់នូវអ្វីដែលខ្លួនបាននិយាយថាជាមីស៊ីលល្បឿនលឿនជាងសំឡេងកម្រិតមធ្យមដោយប្រើប្រាស់ឥន្ធនៈរឹង ដើម្បីសាកល្បងម៉ាស៊ីនជំរុញថ្មី និងក្បាលគ្រាប់ដែលអាចគ្រប់គ្រងបាន។

រដ្ឋមន្ត្រីការបរទេសចិន មានឆន្ទៈពង្រឹងទំនាក់ទំនងជាមួយប្រទេសនូវែលសេឡង់

2024/03/18 12:01:04 pm        62
Facebook Telegram Linkin
ប្រទេសចិន និយាយថា ខ្លួនចង់ពង្រឹងទំនាក់ទំនងជាមួយនូវែលសេឡង់ និងធ្វើការ ដើម្បីរក្សាសន្តិភាព និងស្ថិរភាពក្នុងតំបន់ ខណៈដែលរដ្ឋមន្ត្រីការបរទេសនៃប្រទេសទាំងពីរ បានជួបគ្នានៅថ្ងៃចន្ទនេះ។ជំនួបរវាងលោក វ៉ាង យី (Wang Yi) និង លោក វីនស្តុន ភីធឺ (Winston Peters) គឺជាជំនួបផ្ទាល់លើកដំបូងរបស់ពួកគេ ចាប់តាំងពីប្រទេសនូវែលសេឡង់ បានបោះឆ្នោតជ្រើសរើសរដ្ឋាភិបាលអភិរក្សនិយម ក្នុងខែតុលា ឆ្នាំ២០២៣។ ពួកគេធ្លាប់បាននិយាយគ្នាតាមទូរស័ព្ទពីមុនមក។មុនពេលកិច្ចប្រជុំនេះ លោកវ៉ាង បាននិយាយជាភាសាចិនថា ប្រទេសចិន មានឆន្ទៈក្នុងការពង្រឹងទំនាក់ទំនងជាយុទ្ធសាស្ត្រជាមួយនូវែលសេឡង់លើបញ្ហាអន្តរជាតិ និងតំបន់ បន្ទាប់ពីមានស្ថានការណ៍អន្តរជាតិដ៏ច្របូកច្របល់ និងមានការពាក់ព័ន្ធគ្នា។លោកបានបញ្ជាក់ថា៖«យើងនឹងធ្វើការរួមគ្នា ដើម្បីរក្សាសន្តិភាព និងស្ថិរភាពនៅក្នុងតំបន់ និងពិភពលោក»។នូវែលសេឡង់ ត្រូវបានគេមើលឃើញថា ជាប្រទេសនិយមកណ្តាល ឬសូម្បីតែអវត្តមានចំពោះប្រទេសចិននៅក្នុងសម្ព័ន្ធភាពចែករំលែកព័ត៌មានចារកម្ម Five Eyes ដែលរួមមានសហរដ្ឋអាមេរិក និងសម្ព័ន្ធមិត្ត ប៉ុន្តែក្នុងរយៈពេលប៉ុន្មានឆ្នាំថ្មីៗនេះ បាននិយាយកាន់តែខ្លាំងឡើងជាសាធារណៈ នៅពេលដែលមានការព្រួយបារម្ភអំពីសកម្មភាពរបស់ចិន។លោកវ៉ាង បានបន្ថែមថា ទំនាក់ទំនងរវាងនូវែលសេឡង់ និងចិន នៅតែបន្តមាន «សន្ទុះដែលមានភាពល្អប្រសើរឡើង»។ប្រទេសចិន គឺជាដៃគូពាណិជ្ជកម្មឈានមុខគេរបស់នូវែលសេឡង់។ ក្រសួងការបរទេស និងពាណិជ្ជកម្មនៃប្រទេសនូវែលសេឡង់ បានរាយការណ៍ថា ពាណិជ្ជកម្មទំនិញ និងសេវាកម្មពីរផ្លូវមានចំនួនសរុប ៣៨,៦៧ ពាន់លានដុល្លារនូវែលសេឡង់ (២៣,៥៥ពាន់លានដុល្លារ) ក្នុងឆ្នាំ ដែលបានបញ្ចប់ក្នុងខែកញ្ញា ឆ្នាំ២០២៣។

ឥណ្ឌា នឹងចាប់ផ្តើមបោះឆ្នោតនៅថ្ងៃទី ១៩ មេសា ខណៈលោក Modi និយាយថាមានទំនុកចិត្តនឹងឈ្នះ

2024/03/18 10:40:14 am        94
Facebook Telegram Linkin
អាជ្ញាធររៀបចំការបោះឆ្នោតឥណ្ឌាបាននិយាយកាលពីថ្ងៃសៅរ៍ (១៦ មីនា) ថា ប្រទេសឥណ្ឌានឹងបោះឆ្នោតសភាថ្មីក្នុង ៧ ដំណាក់កាលនៅចន្លោះថ្ងៃទី ១៩ ខែមេសា ដល់ដើមខែមិថុនា ដែលមានចំនួនប្រជាជនបោះឆ្នោតដ៏ធំបំផុតរបស់ពិភពលោកដោយសារអ្នកមានសិទ្ធិបោះឆ្នោតជិតមួយពាន់លាននាក់ ខណៈលោកនាយករដ្ឋមន្រ្តី ណារ៉េនដ្រា ម៉ូឌី (Narendra Modi) មានទំនុកចិត្តថាខ្លួននឹងទទួលបានការពេញចិត្តពីប្រជាជន ហើយទទួលបានជ័យជម្នះ។ការបោះឆ្នោតនេះ ធ្វើឱ្យលោកនាយករដ្ឋមន្ត្រី ម៉ូឌី ដែលជាបុរសខ្លាំងកាន់អំណាចពីរអាណត្តិ និងសម្ព័ន្ធមិត្តក្នុងតំបន់របស់ខ្លួន ប្រកួតទល់នឹងសម្ព័ន្ធដ៏ចម្រូងចម្រាសនៃគណបក្សប្រឆាំងរាប់សិបបក្សទៀត ជាមួយនឹងការស្ទង់មតិបង្ហាញពីការឈ្នះយ៉ាងស្រួលសម្រាប់គណបក្សជាតិនិយមហិណ្ឌូ បារ៉ាតទីយ៉ា ថាណាតា (Bharatiya Janata-BJP) របស់លោក ម៉ូឌី។ប្រសិនបើទទួលជ័យជម្នះម្ដងទៀត នោះនឹងធ្វើឱ្យលោក ម៉ូឌី វ័យ ៧៣ ឆ្នាំ ដែលជានាយករដ្ឋមន្ត្រីទី២ បន្ទាប់ពីលោក ចាវ៉ាហាឡាល ណេរ៉ុ (Jawaharlal Nehru) វីរបុរសឯករាជ្យ និងជានាយករដ្ឋមន្ត្រីដំបូងគេរបស់ឥណ្ឌា ឈ្នះបានអាណត្តិទីបីជាប់គ្នា។លោក រ៉ាជីវ គូម៉ា (Rajiv Kumar) ប្រធានគណៈកម្មាធិការរៀបចំការបោះឆ្នោតឯករាជ្យនៃប្រទេសឥណ្ឌាបានប្រាប់អ្នកសារព័ត៌មានថា ការបោះឆ្នោតដំណាក់កាលទី១ នឹងចាប់ផ្តើមនៅថ្ងៃទី១៩ ខែមេសា ហើយដំណាក់កាលចុងក្រោយនៃការបោះឆ្នោតចំនួន ៧ ដំណាក់កាលនេះនឹងធ្វើឡើងនៅថ្ងៃទី០១ ខែមិថុនា ចំណែកការរាប់សន្លឹកឆ្នោតនឹងត្រូវធ្វើឡើងនៅថ្ងៃទី០៤ ខែមិថុនា។ មនុស្សជិត ៩៧០ លាននាក់បានចុះឈ្មោះបោះឆ្នោតនៅការិយាល័យបោះឆ្នោតជាងមួយលានទីតាំងនៅក្នុងដំណើរការបោះឆ្នោតដ៏ធំដែលមានគណបក្សនយោបាយចំនួន ២.៤០០ បក្សទំនងជានឹងចូលរួមប្រកួតប្រជែង៕

លោក ពូទីន ព្រមានលោកខាងលិចថា ជម្លោះរុស្ស៊ី-ណាតូ អាចនាំទៅរកសង្គ្រាមលោកលើកទីបី

2024/03/18 10:37:18 am        110
Facebook Telegram Linkin
ប្រធានាធិបតីរុស្ស៊ី លោក វ្ល៉ាឌីមៀ ពូទីន បានព្រមានលោកខាងលិច នៅថ្ងៃចន្ទ (១៨ មីនា) នេះថា ជម្លោះដោយផ្ទាល់រវាងរុស្ស៊ី និងសម្ព័ន្ធយោធាណាតូ ដែលដឹកនាំដោយសហរដ្ឋអាមេរិក នឹងមានន័យថា ភពផែនដីមិននៅឆ្ងាយពីសង្គ្រាមលោកលើកទីបីទេ ប៉ុន្តែស្ទើរតែគ្មាននរណាម្នាក់ចង់បានសេណារីយ៉ូបែបនេះឡើយ។សង្រ្គាមអ៊ុយក្រែន បានបង្កឱ្យមានវិបត្តិដ៏ជ្រៅបំផុតនៅក្នុងទំនាក់ទំនងរបស់ទីក្រុងមូស្គូ ជាមួយលោកខាងលិច ចាប់តាំងពីវិបត្តិមីស៊ីលគុយបា ឆ្នាំ១៩៦២ មក។ លោក ពូទីន ជារឿយៗបានព្រមានពីហានិភ័យនៃសង្គ្រាមនុយក្លេអ៊ែរ ប៉ុន្តែនិយាយថា លោកមិនដែលមានអារម្មណ៍ថាត្រូវការប្រើអាវុធនុយក្លេអ៊ែរនៅអ៊ុយក្រែនទេ។ប្រធានាធិបតីបារាំងលោក អ៊ីម៉ានុយអែល ម៉ាក្រុង (Emmanuel Macron) កាលពីខែមុនបាននិយាយថា លោកមិនអាចបដិសេធការដាក់ពង្រាយកងទ័ពជើងគោកក្នុងអ៊ុយក្រែន នាពេលអនាគតបានទេ ដោយប្រទេសលោកខាងលិច ជាច្រើនបានបដិសេធបំណងនេះ ខណៈដែលប្រទេសផ្សេងទៀត ជាពិសេសនៅអឺរ៉ុបខាងកើត បានសម្តែងការគាំទ្រ។នៅពេលត្រូវសាកសួរដោយសារព័ត៌មានរ៉យទ័រ អំពីសុន្ទរកថារបស់លោក ម៉ាក្រុង ព្រមទាំងហានិភ័យ និងលទ្ធភាពនៃជម្លោះរវាងរុស្ស៊ី និងអង្គការណាតូ លោក ពូទីន បានឆ្លើយថា «អ្វីៗគ្រប់យ៉ាងគឺសុទ្ធតែអាចទៅរួចនៅក្នុងពិភពសម័យទំនើបនេះ»៕

ប្រធានស្ដីទីរដ្ឋសភាអរគុណគណបក្សភឿថៃ បានចូលរួមគាំទ្រដល់ដំណើរការប្រជាធិបតេយ្យ​នៅកម្ពុជា

2024/03/18 10:32:24 am        164
Facebook Telegram Linkin
ឯកឧត្តមកិត្តិសេដ្ឋាបណ្ឌិត ជាម យៀប ប្រធានរដ្ឋសភាស្តីទីរដ្ឋសភាជាតិនៃកម្ពុជា និងជា​សមាជិក​អចិន្ត្រៃយ៍ នៃ​គណៈកម្មាធិការកណ្តាលគណបក្សប្រជាជនកម្ពុជាបានថ្លែងអំណរគុណ និងកោត​សរសើរចំពោះកិច្ចសហប្រតិបត្តិការរវាងគណបក្សភៀថៃ និងគណបក្ស​ប្រជាជនកម្ពុជា​នៅ​គ្រប់​វេទិកា ជាពិសេសក្នុងក្របខ័ណ្ឌ ICAPP ដែលគណបក្សភឿថៃ​បាន​បញ្ជូន​ប្រតិភូ​មក​ចូលរួម​សង្កេតការណ៍ការបោះឆ្នោតនៅកម្ពុជាតាំងពីឆ្នាំ២០១៣មក ដែលសកម្មភាពនេះ​ពិតជាបានចូលរួម​គាំទ្រ​ដល់ដំណើរការប្រជាធិបតេយ្យ​នៅកម្ពុជា​ក្នុងស្មារតី​នៃ​គ្រួសារ​គណបក្ស​នយោបាយ​នៅ​អាស៊ី។ឯកឧត្តមកិត្តិសេដ្ឋាបណ្ឌិត ជាម យៀប បានមានប្រសាសន៍បញ្ជាក់បែបនេះ ក្នុងឱកាសជួបពិភាក្សការងារជាមួយលោកជំទាវ ផេថងថាន ស៊ីណាវ៉ាត្រ ប្រធានគណបក្សភឿថៃ នាថ្ងៃទី១៨ ខែមីនា ឆ្នាំ២០២៤ នៅវិមានរដ្ឋសភា។ ក្នុងឱកាសនោះ ឯកឧត្តមប្រធានស្ដីទីរដ្ឋសភាមានប្រសាសន៍ថា រដ្ឋសភាប្រទេសទាំងពីរតែងតែផ្លាស់ប្តូរគណៈប្រតិភូទៅវិញទៅមក ទាំងក្នុងក្របខណ្ឌទ្វេភាគី និងពហុភាគី ជាពិសេសទស្សនកិច្ចរបស់ ឯកឧត្តម វ៉ាន់មូហាម៉ាត់ណ មះថា (Wanmuhamadnoor Matha) ប្រធានរដ្ឋសភាថៃ ដែលនឹងមកបំពេញទស្សនកិច្ចនៅកម្ពុជានៅថ្ងៃទី២១-២៣ ខែមីនា ឆ្នាំ២០២៤ខាងមុខនេះ។ឯកឧត្តមបណ្ឌិតបន្តថារដ្ឋសភាប្រទេសទាំងពីរយកចិត្តទុកដាក់ក្នុងការជំរុញយន្តការសភាវ័យក្មេង និងស្ត្រី នៅក្នុងក្របខណ្ឌជាតិ និងអន្តរសភាអាស៊ាន (អាយប៉ា) ជាពិសេស ភាគីទាំងពីរបានរួមគ្នាអភិវឌ្ឍ និងគាំទ្រការជំរុញសភាឌីជីថល ដែលក្នុងន័យនេះភាគីទាំងពីរបានគាំទ្រដល់គំនិតផ្តួចផ្តើមបង្កើត «បណ្ណាល័យច្បាប់ឌីជីថល AIPA» ដើម្បីជាប្រយោជន៍ដល់ប្រជាជននៃប្រទេសនីមួយៗ និងប្រជាជនក្នុងតំបន់អាស៊ាន។ បណ្ណាល័យច្បាប់ឌីជីថល នឹងជំរុញឱ្យសភាអាស៊ានអាចពង្រឹងកិច្ចសហប្រតិបត្តិការផ្នែកនីតិប្បញ្ញតិ និងមជ្ឈភាពអាស៊ាន ហើយពិសេស នឹងពង្រឹងលើការជឿជាក់ក្នុងការវិនិយោគនៅក្នុងតំបន់អាស៊ាន។ឯកឧត្តមបណ្ឌិត ជាម យៀប បន្តថា បានថ្លែងអំណរគុណ និងកោតសរសើរចំពោះកិច្ចសហប្រតិបត្តិរវាងគណបក្សទាំងពីរនៅគ្រប់វេទិកាជាពិសេសក្នុងក្របខ័ណ្ឌ ICAPP ដែលគណបក្សភឿថៃបានបញ្ជូនប្រតិភូមកចូលរួមសង្កេតការណ៍ការបោះឆ្នោតនៅកម្ពុជា តាំងពីឆ្នាំ២០១៣មក ដែលសកម្មភាពនេះពិតជាបានចូលរួមគាំទ្រដល់ដំណើរការប្រជាធិបតេយ្យនៅកម្ពុជាក្នុងស្មារតីនៃគ្រួសារគណបក្សនយោបាយនៅអាស៊ី។ ឯកឧត្តមបន្តថាក្នុងឆ្នាំ២០២៤នេះ សភាកម្ពុជា នឹងធ្វើជាម្ចាស់ផ្ទះនៃកិច្ចប្រជុំពេញអង្គនៃសភាអន្តរជាតិដើម្បីភាពអត់ឱន និងសន្តិភាព (International Parliament for Tolerance and Peace – IPTP) លើកទី១១ ហើយគណបក្សប្រជាជនកម្ពុជានឹងធ្វើជាម្ចាស់ផ្ទះនៃមហាសន្និបាតនៃសន្និសីទអន្តរជាតិនៃបណ្ដាគណបក្សនយោបាយនៅអាស៊ី (ICAPP) លើកទី១២ ហើយរដ្ឋសភាកម្ពុជាសង្ឃឹមថារដ្ឋសភាថៃ និងគណបក្សភឿថៃគាំទ្រនិងចូលរួមព្រមទាំងបញ្ជូនគណៈប្រតិភូជាន់ខ្ពស់ចូលរួមក្នុងកិច្ចប្រជុំទាំងពីរនេះ៕ អត្ថបទ៖ វ៉ន ដារ៉ា

បណ្ដាញសង្គម

ព័ត៌មានថ្មីៗ

ជនភៀសខ្លួន និងជនអន្តោប្រវេសន៍២៦ នាក់បានស្លាប់ក្នុងការលិចទូកនៅកោះLampedusa ប្រទេសអ៊ីតាលី
08/14/2025 10:08 AM
Facebook Telegram Linkin
ព្យុះត្រូពិក Podul បក់បោកទៅដល់ភាគខាងត្បូងប្រទេសចិន ទម្លាក់ទឹកភ្លៀងយ៉ាងខ្លាំងក្លា
08/14/2025 10:08 AM
Facebook Telegram Linkin
ក្រុមស្រាវជ្រាវ៖ រុស្ស៊ី ហាក់ត្រៀមសាកល្បងមីស៊ីលថ្មី ខណៈជំនួបលោក Trump-Putin ជិតមកដល់
08/14/2025 10:08 AM
Facebook Telegram Linkin
Press Briefing – Update on the implementation of the immediate and unconditional ceasefire agreement between Cambodia and Thailand ( August 14, 2025 )
08/14/2025 10:08 AM
Facebook Telegram Linkin
Press Briefing -Update on the implementation of the immediate and unconditional ceasefire agreement between Cambodia and Thailand ( August 14, 2025 )
08/14/2025 10:08 AM
Facebook Telegram Linkin
ពលរដ្ឋប៉ាឡេស្ទីនជាង១០០នាក់ ត្រូវបានសម្លាប់ ខណៈកងទ័ពអ៊ីស្រាអែលបាញ់ផ្លោងចូលទីក្រុងហ្កាហ្សា
08/14/2025 10:08 AM
Facebook Telegram Linkin
ក្រុមអ្នកសង្កេតការណ៍អន្តរកាលយោធាមកពីប្រទេស៧ ជួបមេបញ្ជការយោធភូមិភាគទី៥ ដើម្បីស្វែងយល់លម្អិតពីស្ថានភាពសន្តិសុខតាមព្រំដែន
08/14/2025 10:08 AM
Facebook Telegram Linkin
សម្ដេចតេជោ ហ៊ុន សែន៖ «ប៉ុន្មាន​​ថ្ងៃ​នេះ​ផ្ទុះ​រឿង​ផ្លែស្ពឺ «ហូបស្ពឺអត់» លុះ​ស្រាវ​ជ្រាវ​ទៅ​ទើប​ដឹង​ថា​ជា​រឿងរបស់​នាយករដ្ឋមន្ត្រី​បច្ចុប្បន្ន​ជាមួយ​ស្ត្រីទី១ កាលពី​ក្មេង​»
08/14/2025 10:08 AM
Facebook Telegram Linkin
ថៃកំពុងឈានទៅរកវិបត្តិរដ្ឋធម្មនុញ្ញមួយទៀត ខណៈថ្ងៃ២៩សីហានឹងកំណត់ជោគវាសនានាយករដ្ឋមន្ត្រី Paetongtarn
08/14/2025 09:08 AM
Facebook Telegram Linkin
លោក Zelensky និងក្រុមមេដឹកនាំអឺរ៉ុប បានព្រមព្រៀងជាមួយលោក Trump លើយុទ្ធសាស្ត្រសម្រាប់ការចរចាជាមួយរុស្ស៊ី
08/14/2025 09:08 AM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.